གནས་འདྲེན་ཟིན་བྲིས།
གནས་འདྲེན་ཟིན་བྲིས་ལ། ན་མོ་གུ་རུ་ཝེ། ཐོག་མར་ལས་བུམ་ཆུས་བྲན་ཞིང་། ཨོཾ་མ་ཧཱ་ཤུ་ནྱ་ཏ་སོགས་ཀོ྅ཧཾ། རང་སེམས་མ་ བཅོས་སྟོང་ཉིད་སོགས་ནས། དཀོན་མཆོག་གསུམ་གྱི་བདེན་པས་འདིར་ཁུག་ཅིག །ཇི་ལྟར་བལྟམས་པ་སོགས་དེ་བཞིན་བདག་གིས་སོགས་ཡི་གེ་བརྒྱ་པ་བཟླ། ཨོཾ་བཛྲ་ཨ་མྲ་ཏ་སོགས་སྭ་བྷ་ཝས་སྦྱངས། སྟོང་པའི་ངང་ལས་བྷྲཱུྃ་ལས་རིན་པོ་ཆེ་སྣོད་ཡངས་ཤིང་རྒྱ་ཆེ་བའི་ནང་དུ་ལན་ཆགས་བགེགས་ཀྱི་གཏོར་མ་གཟུགས་སྒྲ་དྲི་རོ་རེག་བྱ་ཕུན་སུམ་ཚོགས་པར་གྱུར། ཨོཾ་ཨཱཿཧཱུྃ། ལན་གསུམ། ཨོཾ་བཛྲ་ཨ་ཀརྴ་ཡ་ཛ༔ ལན་གསུམ། ཨོཾ་སརྦ་བྷིགྷྣཾན་ན་མ་སརྦ་ཏ་ཐཱ་ག་ཏ་བྷྱོ་བི་ཤྭ་སོགས། བྷ་ལིངྟ་སྭཱ་ཧཱ། ལན་གསུམ་དང་། ས་དང་ལམ་ལ་སོགས་ནས། མ་འདུག་གཞན་དུ་དེངས༔ ན་མོ་རྩ་རྒྱུད་ཀྱི་བླ་མ་མཆོག་གསུམ་རྒྱལ་བ་རྒྱ་མཚོའི་ཚོགས་དང་བཅས་པ་རྣམས་ཀྱི་བདེན་པ་དང་། ངན་འགྲོ་ཐམས་ཅད་རྣམ་པར་སྦྱོང་བ་རྒྱལ་བ་ཞི་ཁྲོ་རབ་འབྱམས་ཀྱི་ལྷ་ཚོགས་རྣམས་ཀྱི་བཀའ་བདེན་པ་དང་། གསང་སྔགས་རིག་སྔགས་གཟུངས་སྔགས་སྙིང་པོ་ཕྱག་རྒྱ་ཏིང་ངེ་འཛིན་གྱི་བདེན་པ་དང་། ཁྱད་པར་དུ་དཔལ་ཆེ་མཆོག་ཧེ་རུ་ཀའི་སྤྲུལ་པ་ཕྱག་བརྙན་དང་བཅས་པའི་མཐུ་དང་རྩལ་གྱིས་སློབ་
མའམ་དམིགས་ཡུལ་འདི་རྣམས་ལ་དབང་བསྐུར་གྱི་ཆོ་ག་ཟབ་མོ་སྒྲུབ་པར་བྱེད་པ་ལ་བར་དུ་གཅོད་པའམ། གཤིན་པོ་ལ། ཚེ་ལས་འདས་པ་གསོན་གྱི་དུས་སུ་ཚེ་ལ་བར་དུ་གཅོད་ཅིང་། གཤིན་གྱི་དུས་སུ་སྡིག་པ་སྦྱོང་བ་ལ་བར་དུ་གཅོད་པའི་གདོན་བགེགས་ཐམས་ཅད་གཏོར་མ་འདིས་ཚིམ་པར་གྱིས་ལ་དཔག་ཚད་དང་རྒྱང་གྲགས་སུ་མ་གནས་པར་སོང་ཤིག །གལ་ཏེ་མི་འགྲོ་ན་ཡེ་ཤེས་ཀྱི་རྡོ་རྗེ་འབར་བའི་མགོ་བོ་ཚལ་བ་བརྒྱར་འགས་༼མཆོད་རོལ།༽པར་གྱུར་ཏ་རེ། ཨོཾ་ཨཱཿཧཱུྃ་བྷོ་དྷི་ཙིཏྟ༴ ཨོཾ་རུ་ལུ༴ ཨོཾ་སུམ་བྷ་ནི་སོགས་དྲག་སྔགས་བཟླ་ཡུངས་ཐུན་གྱིས་བྲབ། ཧཱུྃ༔ རང་ཉིད་ལྷ་ཡི་ཐུགས་ཀ་ནས༔ སོགས་ཙཀྲ་ཛྭ་ལ་རཾ་ཧཱུྃ་ཕཊ༔ བླ་མས། ཞེས་བརྗོད་པས་སྟེང་འོག་ཕྱོགས་མཚམས་ཐམས་ཅད་རྡོ་རྗེའི་རྭ་བ་གུར་བླ་བྲེ་ཡེ་ཤེས་ཀྱི་མེ་དཔུང་མཐའ་མེད་དུ་འཕྲོ་བས་བཅིངས་ཏེ་ཅིས་ཀྱང་མི་ཤིགས་པའི་མོས་པ་མཛོད། ཧཱུྃ། ཚེ་འདས་ལུས་བརྗེས་བར་དོའི་རྣམ་ཤེས་ཁྱོད༔ སོགས་ནས། ས་མ་ཡ་ལྷན༔ གང་འདིར་རྫོགས་པའི་སོགས། གསོལ་བར་བགྱིའོ། །ཁྲུས་ཀྱི་ཁང་པ་སོགས་ནས་ལྷ་ཁྲུས་བྱའོ། །དེ་ནས། པྲ་ཏི་ཙྪ་ཡེ་སྭཱ་ཧཱ༔ ཧཱུྃ༔ འདིར་ནི་སྦྱིན་པའི་སོགས་ནས། དུག་རྣམས་གཏན་ནས་དག་གྱུར་ཅིག །ཡིག་བརྒྱ་དང་ཀཾ་ཀ་ནི་སོགས་བརྗོད་ཅིང་ཁྲུས་བྱས། བླ་མས། དེ་ནས་གསོལ་བ་གདབ་པ་འདི་ཡི་རྗེས་ཟློས་མཛོད། ཀྱེ་མ་མགོན་པོ་ཐུགས་རྗེ་ཅན༔ སོགས་ནས། བཟུང་དུ་གསོལ༔ འོ་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་དུ་རྣམ་མཁྱེན་རྫོགས་པའི་སངས་རྒྱས་ཟུང་འཇུག་སྐུ་བཞི་ཡེ་ཤེས་ལྔ་ཡི་བདག་ཉིད་ཅན་ཁྱབ་བདག་གདོད་མའི་མགོན་པོ་ཀུན་བཟང་རྡོ་རྗེ་འཆང་
ཆེན་པོའི་གོ་འཕང་དམ་པ་ཐོབ་པར་བྱ། དེའི་ཆེད་དུ་གསང་སྔགས་རྡོ་རྗེ་ཐེག་པའི་སྒོ་ནས་མངོན་པར་དབང་བསྐུར་བ་ཟབ་མོ་གསན་ཏེ་བདག་གཞན་སེམས་ཅན་ཐམས་ཅད་ཀྱི་དོན་རྒྱ་ཆེན་པོ་བྱ་སྙམ་པའི་སེམས་བསྐྱེད་ཡང་དག་པ་དང་བཅས་ཏེ་ཆོས་ཉན་པའི་ཀུན་སྤྱོད་ཡང་མདོ་རྒྱུད་རྣམས་ལས་ཇི་ལྟར་གསུངས་པ་ལྟར་ལེགས་པར་གསན་འཚལ། དེ་ཡང་འོ་སྐོལ་གྱི་སྟོན་པ་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་དེ་ཉིད་ཀྱིས་སེམས་ཅན་གྱི་བསམ་པ་དང་མཐུན་པའི་ཆོས་ཀྱི་བདུད་རྩི་བསམ་མི་ཁྱབ་པ་བསྟན་པས། བསྡུ་ན་ཐེག་པ་ཆེ་ཆུང་གཉིས་ལས། ཐེག་པ་ཆེན་པོ་དེ་ལའང་གསར་རྙིང་གཉིས་ལས་འདིར་ཕྱི་མ། དེ་ལའང་ཕྱི་རྒྱུད་སྡེ་གསུམ། ནང་རྒྱུད་སྡེ་གསུམ་དུ་ཕྱེ་བའི་ནང་ཚན་རྫོགས་པ་ཆེན་པོ་ཨ་ཏི་ཡོ་ག །དེ་ལས་འདིར་བསྐྱེད་རྫོགས་རྣམ་པ་གསུམ་གྱི་སྒོར་ཞུགས་པའི་སྦྱོར་བ་རྣམས་ཀྱི་ཉམས་ཆག་སྐོང་ཞིང་རྟོག་སྒྲིབ་སྦྱོང་བ་ལ་སེམས་ཅན་ཐམས་ཅད་ངན་སོང་གི་སྡུག་བསྔལ་ལས་དྲངས་ནས་བླ་ན་མེད་པའི་དངོས་གྲུབ་ཀྱི་སྐལ་བ་ཅན་དུ་བྱེད་པའི་ཐབས་མཁས་ཀྱི་སྒོ་ནས་རྨད་དུ་བྱུང་བའི་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་སྒོ་ནས་དབང་བསྐུར་བ་ཡིན་པས། ཐོག་མར་ལོ་རྒྱུས་མདོ་ཙམ་ནི། སྔོན་འདོད་ཁམས་ཀྱི་གནས་འདི་ན་བྲམ་ཟེ་དུང་གི་ཕྲེང་བ་ཅན་ཞེས་བྱ་བ་རིག་པའི་གནས་ལྔ་ལ་མཁས་པ་ཞིག་ལ་སློབ་མ་རྒྱལ་པོའི་བུ་ཞིག་ཡོད་པ་དེའི་སློབ་སྦྱོང་མཐར་ཕྱིན་པ་ན། ད་ནི་ང་ཡི་གོང་ན་རིག་པ་སྨྲ་བ་སློབ་དཔོན་འདི་ཙམ་དུ་ཟད་པས། འདི་གོང་དུ་མི་གཏོང་
སྙམ་དུ་བསམ་ནས་སློབ་དཔོན་ལ་མཐོ་འཚམ་ཞིང་སློབ་དཔོན་གྱིས་ཀྱང་ཞེ་སྡང་གི་དམོད་པ་བོར་བའི་ལས་ཀྱིས་གཉིས་ཀ་ངན་འགྲོར་ལྷུང་ནས་སྡུག་བསྔལ་གྱིས་ཉམ་ཐག་པར་གྱུར་པ་ལ། ཡུལ་དང་འཕྲད་པའི་ཐུགས་རྗེ་སྐྱེ་ནས། དཔལ་རྡོ་རྗེ་སེམས་དཔའ་མངོན་སུམ་དུ་བྱོན་ནས་འགྱོད་ཚངས་ཀྱི་བཤགས་པ་དང་། ཡིག་བརྒྱའི་སྔགས་བསྟན་པས་སྔོན་གྱི་གནས་དྲན་ཏེ་འགྱོད་པ་དྲག་པོ་སྐྱེས་པ་ལ་གསང་བའི་བདག་པོའི་ཕྱི་ནང་གསང་བའི་དབང་བསྐུར་བའི་དགེ་བས་གསོས་ཐེབས་ཏེ་བྱང་ཆུབ་ཀྱི་མྱུ་གུ་སྐྱེས་པས་རིམ་གྱིས་རིག་འཛིན་གྱི་ས་ལ་གནས་པར་གྱུར་ཏོ། །དེ་ལྟར་ཀུན་བཟང་རྡོ་རྗེ་འཆང་ཆེན་པོས་རྡོ་རྗེ་སེམས་དཔའ་ལ་དགོངས་པའི་བྱིན་གྱིས་བརླབས་པ་རྒྱལ་བ་དགོངས་རྒྱུད། རྡོ་རྗེ་སེམས་དཔའི་མན་ངག་གི་གནད་རྫོགས་ཆེན་འཁོར་འདས་རང་གྲོལ། བཏགས་གྲོལ་རྒྱུད་དྲུག་གི་ཆོས་སྐོར་སོགས་བརྡའི་སྒོ་ནས་རིག་འཛིན་དགའ་རབ་རྡོ་རྗེ་དང་། དེས་ཤྲི་སིངྷ། དེས་སངས་རྒྱས་གཉིས་པ་པདྨ་འབྱུང་གནས་སོགས་ལ་བརྡའ་ཙམ་བསྟན་པས་དོན་ཁོང་དུ་ཆུད་ལ། དེ་ཡན་རིག་འཛིན་བརྡའ་བརྒྱུད། འགྱོད་ཚངས་བཤགས་པའི་རྒྱུད་ནི་གླང་པོ་ཆེ་རབ་འབོག་གི་རྟོགས་པ་གཅིག་ཁོལ་དུ་བྱུང་བ་ཡིན་ཞིང་། དེ་ནི་གསང་བདག་གི་མཐུས། རྒྱལ་པོ་ཛཿ ལ་གླེགས་བཾ་གྱི་ཆར་བབས་པའི་ནང་ཚན་ཡིན་ཞིང་། འཕགས་ཡུལ་གྱི་རིག་འཛིན་རྣམས་ལས་བརྒྱུད་དེ་ཤིང་རྟ་ཆེན་པོ་སངས་རྒྱས་གསང་བ་ལ་བཀའ་བབས། དེ་ཉིད་ཀྱིས་བི་མ་ལ་དང་པདྨ་འབྱུང་གནས་ལ་གནང་ཞིང་། པདྨ་འབྱུང་གནས་ལས་
གངས་ཅན་ལྗོངས་སུ་ཡོ་གའི་རྒྱུད་དང་ཨ་ཏིའི་མན་ངག་ཟུང་དུ་བསྡེབས་པའི་བསྐྱེད་རྫོགས་རྣམ་པ་གསུམ་གྱི་སྒོར་ཞུགས་པའི་རྣལ་འབྱོར་པ་རྣམས་ཀྱི་ཉམས་ཆག་སྐོང་ཞིང་། རྟོག་སྒྲིབ་སྦྱོང་བ་སེམས་ཅན་ཐམས་ཅད་ངན་སོང་གི་སྡུག་བསྔལ་ལས་དྲངས་ནས་བླ་ན་མེད་པའི་དངོས་གྲུབ་ཀྱི་སྐལ་བ་ཅན་དུ་བྱེད་པ་ལ། ཐབས་མཁས་ཀྱི་སྒོ་རྨད་དུ་བྱུང་བ་རྣལ་འབྱོར་སྤྱི་ཁྲུས་ན་རག་དོང་སྤྲུག་གི་ཆོ་ག་མང་དུ་མཛད་པ་གཉགས་ལོ་ཡེ་ཤེས་གཞོན་ནུ་ལ་བཀའ་བབས་ཏེ་བཀའ་མ་ལྟར་དུ་དར་བར་མཛད། དེ་ལྟར་དོང་སྤྲུག་ལས་ཁོལ་དུ་བྱུང་བ་དགོངས་པ་རང་གྲོལ་འདི་ཉིད་རྒྱུད་བསྐྱེད་པ་མ་ཧཱ་ཡོ་ག་ལྟར་ཁོག་ཕུབ་ལ། ལྟ་སྒོམ་རྫོགས་པ་ཆེན་པོ་གཙོ་བོར་སྟོན་ཏེ་སྒྲུབ་ཕྲིན་གྱི་རིམ་པ་དང་། འཁོར་འདས་ཀྱི་ཆོས་ཐམས་ཅད་བར་དོ་རྣམ་པ་དྲུག་གིས་གཏན་ལ་ཕབ་སྟེ་ལམ་རྫོགས་ཆེན་ལྟར་ཉམས་སུ་ལེན་བྱའི་གདམས་པ་འདི་ཉིད་མཁའ་འགྲོའི་གཙོ་མོ་མཁར་ཆེན་བཟའ་མཚོ་རྒྱལ་དང་། ལོ་ཙཱ་བ་ཅོག་རོ་ཀླུ་ཡི་རྒྱལ་མཚན་སོགས་ལ་སྙན་བརྒྱུད་དུ་གནང་ཞིང་། མ་འོངས་སྙིགས་དུས་ཀྱི་འགྲོ་བ་བསོད་ནམས་དམན་པ་རྣམས་ཀྱི་དོན་དུ་བཀའ་བབས་ལུང་བསྟན། སྨོན་ལམ་དབང་བསྐུར། མཁའ་འགྲོ་གཏད་རྒྱའི་བརྒྱུད་པ་གསུམ་ལྡན་དུ་གཏེར་དུ་སྦ་བར་མཛད། ཕྱིས་སྤྲུལ་པའི་གཏེར་སྟོན་ཀརྨ་གླིང་པའི་ཟབ་ཆོས་འདི་ཉིད་གསང་གཏེར་བྱས་ཏེ་བརྒྱུད་པ་གསུམ་གྱི་བར་དུ་ཆིག་བརྒྱུད་མཛད་ལ། དེ་ནས་རིམ་པར་བརྒྱུད་དེ། བདག་ཅག་གི་རྣམ་འདྲེན་དམ་པ་ལས་ཐོབ་པ་ནི་གང་ལས་བྱུང་བའི་བརྒྱུད་པའི་ལོ་རྒྱུས་ཡིན་ལ།
ལོ་རྒྱུས་དེ་ལྡན་གྱི་གདམས་པ་འདི་ནི་མ་བསྒོམས་པར་འཚང་རྒྱ་བའི་གདམས་པ་དྲུག་གི་ནང་ཚན། ཚིག་རྣ་བར་ཐོས་པ་ཙམ་གྱིས་གྲོལ་ནུས་པའི་སྙན་བརྒྱུད་ཐོས་གྲོལ་ཆེན་མོ་ཞེས་བྱ་བ། ཐོས་པ་ཙམ་གྱིས་གྲོལ་བ་ཐོབ་པའི་ཆོས། སྡིག་པོ་ཆེ་གསང་ལམ་ལ་ཁྲིད་པའི་ཆོས། སྐད་ཅིག་གཅིག་གིས་རྫོགས་སངས་རྒྱས་པའི་ཆོས་ཟབ་མོ་མཚམས་མེད་པ་ལྔ་བསགས་པའི་མིའི་རྣ་ལམ་དུ་ཐོས་ནའང་། ངེས་པར་གྲོལ་བར་འགྱུར་ཏེ། དཔལ་ཀུན་ཏུ་བཟང་པོ་ཉིད་ཀྱི་ཞལ་ནས་ཀྱང་། གལ་ཏེ་རྣལ་འབྱོར་ཕོ་མོ་གང་ཞིག་གིས་དཀྱིལ་འཁོར་གྱི་ལྷ་འདི་རྣམས་ཀྱི་མཚན་རྣ་བར་ལན་གཅིག་ཐོས་པ་ཙམ་གྱིས་ཀྱང་། ན་རཀ་ཆེན་པོར་མི་ལྟུང་ངོ་། །ཞེས་གསུངས་པ་དང་། གཞན་ཡང་། རང་བཞིན་སྒྱུ་འཕྲུལ་དཀྱིལ་འཁོར་ལ། །གང་ཞིག་གུས་པས་ཕྱག་འཚལ་ན། །ཉམས་ཆག་སྐོང་ཞིང་དངོས་གྲུབ་ཐོབ། །ཅེས་གསུངས་པས་དེ་ལྟ་བུའི་གདམས་པ་ཁྱད་པར་ཅན་འདིའི་སྒོ་ནས་གསོན་པོ་རྣམས་ལ་གནས་ལུང་དབང་བསྐུར་བ་དང་། ཚེ་འདས་རྣམས་ཀྱང་རིགས་དྲུག་གི་གནས་ནས་དྲངས་ཤིང་དབང་བསྐུར་བ་ལྷན་ཅིག་ཏུ་མཛད་པའིི་ཕྱག་སྲོལ་ད་ལྟར་གྱི་བླ་མ་རྣམས་ཀྱི་མཛད་པ་ལྟར་སྒྲུབ་པ་དེའི་སྐབས་སུ་བབས་པ་ཡིན་པས། བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པ་ལ་མོས་གུས་གདུང་ཤུགས་དྲག་པོས་གསོལ་བ་རྩེ་གཅིག་ཏུ་ཐོབ་ཅིག །༼བཞི་བཅད་ཀྱིས།༽ ཀྱཻ་མ་ཚེ་འཕོས་ལུས་བརྗེས་བར་དོའི་ཡིད་ལུས་ཁྱོད༔ སོགས་ནས། གསོལ་བ་ཐོབཿ ཀྱཻ་མ་བདག་འདྲའི་སོགས་ནས་གཞུང་ལྟར་ནར་འདེད་ཀྱི་མིའི་ཕྱི་ལམ་བཅད་དེ། ས་
ཐོབ་ཤོག །དེ་ནས་སློབ་དཔོན་གྱིས། འོ་གསང་ཆེན་ལམ་གྱི་འཇུག་སྒོ་དབང་བསྐུར་བའི་སྐབས་སུ་བབས་པ་ཡིན་པས་བདག་ཅག་གི་བགྱི་འོས་རྣམས་སྔོན་དུ་སོང་གྲུབ་པ་ཡིན། ད་ཁྱོད་ཀྱི་ངོ་སྐལ་དུ་གྱུར་པ་དབང་བསྐུར་ཟབ་མོ་ཞུ་བའི་ཡོན་དུ་མཎྜལ་ཕུལ་མཛོད། ས་གཞི་སྤོས་སོགས་མཎྜལ་ཕུལ་ལ། གསོན་པོ་ལ། ྿ སྔོན་ཆད་དཀྱིལ་འཁོར་གྱི་ལྷ་དང་མ་མཇལ་བའི་མཇལ་ན་ཡང་དཀྱིལ་འཁོར་སོ་མ་འདི་ཉིད་མ་མཐོང་བའི་བརྡར་རས་དམར་པོས་གདོང་གཡོགས་ཏེ་འཆང་བའི་མོས་པ་མཛོད། ཨོཾ་ཙཀྵུ་བྷན་དྷ་ཝ་ར་མ་ན་ཡེ་ཧཱུྃ། ཨོཾ་ཨཱཿ ཧཱུྃ་གིས་མིག་དར་བཅིང་། དཀྱིལ་འཁོར་གྱི་ལྷ་དང་མཇལ་བའི་ཚེ་ཕྱག་སྟོང་པས་མཇལ་དུ་མི་རུང་བས་ཕྱག་རྟེན་དུ་ཨུ་དུམ་ཝ་རའི་མེ་ཏོག་གི་ཕྲེང་བ་ཁ་དོག་ལྔ་པ་རེ་བྱིན་པའི་མོས་པ་མཛོད། ཨོཾ་ཨཱཿ ཁཾ་ཝ་ར་ཧཱུྃ༔ གིས་མེ་ཏོག་གཏད། ྿ གཤིན་པོ་ལ་སྔགས་ཁོ་ནས་ཆོག །ས་ཕྱོགས་འདི་ཉིད་དག་པ་རབ་འབྱམས་ཡེ་ཤེས་ཀྱི་དཀྱིལ་འཁོར་ཆེན་པོར་གྱུར་པའི་ནང་དུ་སློབ་དཔོན་ཉིད་བཅོམ་ལྡན་འདས་དཔལ་རྡོ་རྗེ་སེམས་དཔའི་རྣམ་པར་བཞུགས་པ་ལ་མི་ཕྱེད་པའི་གདུང་ཤུགས་དྲག་པོས་གསོལ་བ་འདེབས་པ་འདི་ཡི་རྗེས་ཟློས་མཛོད། །ཨེ་མ་མགོན་པོ་ཐུགས་རྗེ་ཅན་སོགས། འཇུག་ཏུ་གསོལ༔ དེ་ནས་གནང་བ་སྦྱིན་པ་འདི་ལ་གསན་པའི་ཁྱབ་པར་གདལ། ཨེ་མ་སྐལ་ལྡན་བུ་ཁྱོད་ལེགས་པར་ཉོན༔ སོགས་ནས། ལེགས་པར་ཉོན༔ མགོན་པོ་ཐུགས་རྗེ་ཆེ་ལྡན་སོགས། དག་པའི་སོགས། གྲོལ་ནས་སོགས། ཕྱག་འཚལ་བ་དང་སོགས། བསྔོ། །྿ གསོན་པོ་ལ། དེ་ནས་མདུན་གྱི་ནམ་མཁར་རྒྱལ་བ་ཞི་ཁྲོའི་ལྷ་ཚོགས་རྣམས་
སྤྲིན་ཕུང་འཁྲིགས་པ་བཞིན་བཞུགས་པ་ལ་ཐུན་མོང་དང་ཁྱད་པར་གྱི་སྐྱབས་སུ་འགྲོ་བ། སོ་སོར་ཐར་པའི་སྡོམ་པ་བཟུང་བ་སྨོན་པ་འཇུག་པའི་སེམས་བསྐྱེད་བླང་བ་སྤྱི་དང་ཁྱད་པར་གྱི་དམ་ཚིག་དང་སྡོམ་པ་རྣམས་གཟུང་བར་བྱའོ་སྙམ་པའི་འདིའི་རྗེས་ཟློས་མཛོད། ཞེས་པའོ། །འདི་ལྟར་གྱིས། ཕྱོགས་བཅུའི་སངས་རྒྱས་བྱང་སེམས༴ ཚུར་ཤོག ཨོཾ་བཛྲ་ཤྲཱི་ཧེ་རུ་ཀ་ཨུ་ཙ་ཏ་ཡ་ཕཊ། ཁྱེད་རང་རྣམས་ཀྱི་སྤྱི་བོར་བླ་མ་དང་གཉིས་སུ་མེད་པའི་དཔལ་རྡོ་རྗེ་སེམས་དཔའ་སྐུ་མདོག་དཀར་པོ་ཞལ་གཅིག་ཕྱག་གཉིས་པ་ཕྱག་གཡས་རྡོ་རྗེ་རྩེ་ལྔ་པ་ཐུགས་ཀར་འཛིན་ཅིང་། གཡོན་དྲིལ་བུ་དཀུར་བརྟེན་པ་དར་དང་རིན་པོ་ཆེའི་རྒྱན་ཅན་མཚན་དཔེའི་གཟི་བྱིན་མཆོག་ཏུ་འབར་བའི་སྐུ་གསལ་བའི་ཐུགས་ཀར་ཧཱུྃ་ཡིག་དཀར་པོའི་མཐར་ཡི་གེ་བརྒྱ་པས་གཡས་སུ་བསྐོར་བ་ལས་བདུད་རྩིའི་རྒྱུན་བབས་པས་ཁྱེད་རང་རྣམས་ཀྱི་སྤྱི་བོར་ཚངས་བུག་ནས་ཞུགས་ལུས་ཐམས་ཅད་གང་། ཉམས་ཆག་དང་རྟོག་སྒྲིབ་ཐམས་ཅད་སྦྱངས་པར་བསམ་ལ་ཡི་གེ་བརྒྱ་པ་ལན་གསུམ་གསུང་བར་ཞུ། ཨོཾ་བཛྲ་ས་ཏྭ་ས་མ་ཡ་སོགས་ལན་གསུམ། ༼ལྷུག་འདོན། ༽ བདག་ནི་མི་ཤེས་གཏི་མུག་རྨོངས་པ་ཡིས། །དམ་ཚིག་བསྲུང་མཚམས་ལས་ནི་འགལ་ཞིང་ཉམས། །བླ་མ་མགོན་པོ་ཁྱེད་ཀྱིས་སྐྱབས་མཛོད་ཅིག །གཙོ་བོ་དཔལ་ལྡན་རྡོ་རྗེ་འཛིན་པ་སྟེ། །ཐུགས་རྗེ་ཆེན་པོ་བརྩེ་བའི་བདག་ཉིད་ཅན། །འགྲོ་བའི་གཙོ་བོས་བདག་སོགས་སྐྱབས་མཛོད་ཅིག །སྡིག་སྒྲིབ་ཉེས་ལྟུང་དྲི་མའི་ཚོགས་བཅས་ཀུན། །མ་ལུས་བྱང་ཞིང་དག་པར་མཛད་དུ་གསོལ། །ཞེས་གསོལ་བ་
བཏབ་པས་རྡོར་སེམས་འོད་དུ་ཞུ་ནས་ཁྱེད་རང་ལ་ཐིམ་པར་གྱུར། བར་བསམ་ལ། ༼རྫོགས་ཆེན་ལྟར་ལ་ཚུར་ཤོག་ཚུར་ཤོག༽ ཨོཾ་སྭ་བྷ་ཝ་སོགས། སྟོང་པའི་ངང་ལས་སློབ་མའི་རིག་པའི་ངོ་བོ་དཔལ་རྡོ་རྗེ་སེམས་དཔའ་གསལ་བའི་གནས་གསུམ་འབྲུ་གསུམ་ལས་འོད་ཟེར་འཕྲོས་པས་འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས་ཀུན་བཟང་རྡོ་རྗེ་སེམས་དཔའ་སྒྱུ་འཕྲུལ་ཞི་ཁྲོའི་ལྷ་ཚོགས་ཐམས་ཅད་ཁ་བ་དང་བུ་ཡུག་འཚུབ་པ་ལྟར་བྱོན་ནས་ཁྱེར་རང་རྣམས་ལ་སིབ་སིབ་ཏུ་ཐིམ་པའི་མོས་པ་མཛོད། ལས་བུམ་གྱི་ཆུས་འཐོར་ཞིང་། སློབ་མ་ལྷར་གསལ་གྱིས་མཚམས་སྦྱར་བྱས་ཏེ་ཌཱ་དྲིལ་སྤོས་འདྲེན་བཅས་བྱིན་འབེབས་ཆེ་བ་རྟ་བཅས། ཧཱུྃ་ཆོས་དབྱིངས་ཀ་དག་ཕོ་བྲང་སོགས་རྩ་སྔགས་མཐར། ས་མ་ཡ་ཛྙཱ་ན་ཨ་བེ་ཤ་ཡ་ཨ་ཨཱཿ ཞེས་བརྟགས་པ་བཟླས་ཤིང་ཌཱ་དྲིལ་ཡུན་བསྲིང་། དེ་ལྟར་བྱིན་ཕབ་པས་ཡེ་ཤེས་པ་རྣམས་ཁྱེད་རང་རྣམས་ལ་རོ་གཅིག་ཏུ་ཐིམ་པའི་མོས་པ་མཛོད། ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ༔ ཞེས་བརྟན་པར་བྱ། དེ་ནས་སྒོ་དབྱེ། དེ་ནས་སྒོ་དབྱེ་བར་གསོལ་བ་བཏབ་པ་འདིའི་རྗེས་ཟློས་མཛོད། དེ་ཡང་འདི་ན་རྒྱལ་བ་ཞི་ཁྲོ་རབ་འབྱམས་ཀྱི་ལྷ་ཚོགས་བཞུགས་པ་ཡིན་པས་དེ་དག་གི་ངོ་བོ་ཡེ་ཤེས་གཅིག་གི་རོལ་པར་ཤར་བ་མ་གཏོགས་བཟང་ངན་མེད་ཀྱང་རང་གི་ལས་འབྲེལ་ཡོད་པའི་ལྷ་དེ་ལ་དབབ་པར་ཤོག་སྙམ་དུ་འདིའི་རྗེས་ཟློས་དང་བཅས་ཏེ་མེ་ཏོག་ལྟོས་པ་མེད་པར་དོར་མཛོད། ཧཱུྃ། བདག་ཅག་རིག་པའི་མེ་ཏོག་འདི། །སོགས། ཧཱུྃ་དཀྱིལ་འཁོར་ཆེན་པོའི་ཤར་གྱི་སྒོ༔ སོགས་ནས། མེ་ཏོག་དོར་བ། སྤྱན་དབྱེ། ལྷ་ངོ་བསྟན་པ། སོགས་སོང་ནས། དེ་ནས་བུམ་དབང་གི་སྔོན་དུ་འགྲོ་བ་ཐུན་མོང་རིག་པའི་དབང་ལྔ་ཞུ་བ་ལ་
གསོལ་བ་གདབ་པ་འདི་ཡི་རྗེས་ཟློས་མཛོད། ཀྱཻ་མ་བླ་མ་རྡོ་རྗེ་འཛིན༔ བདག་ཅག་རིགས་དྲུག་གནས་སུ་འཁྱམས༔ དམ་ཚིག་ཉམས་ཆག་དབང་མེད་བསགས༔ འགྲོ་མགོན་ཐུགས་རྗེ་ཅན་ཁྱོད་ཀྱིས༔ ཉམས་ཆག་སྐོང་ལ་དངོས་གྲུབ་སྩོལ༔ དབང་མཆོག་རྣམས་ཀུན་དུས་འདིར་སྩོལ༔ ཅེས་གསོལ་བ་བཏབ་པའི་ནམ་མཁར་བཞུགས་པའི་དེ་བཞིན་གཤེགས་པ་རྣམས་དབང་གི་བྱ་བ་ལ་དགྱེས་ཤིང་མཆོད་པའི་རྣམ་རོལ་དུ་མ་དང་བཅས་ཏེ་དབང་བསྐུར་བའི་མོས་པ་གྱིས། ཞེས་ལས་བུམ་མགོར་བཞག །སྤྱི་བོ་ཆུ་ཐིགས་གཅིག་ལ། ཧཱུྃ། སྐུ་གསུམ་དམ་ཚིག་སོགས་ནས། ཥིཉྩ་མཾ༔ འོ་དེ་ལྟར་ཐུན་མོང་རིག་པའི་སོགས་ནས་གྱུར་ཅིག༔ དེ་ནས་བུམ་དབང་ཆེན་མོ་ཞུ་བའི་དོན་དུ་གསོལ་བ་གདབ་པ་འདིའི་རྗེས་ཟློས་མཛོད། ཀྱེ་ཧོ་བླ་མ་རྡོ་རྗེ་འཛིན་པ་ཆེ༔ སོགས། བུམ་པའི་དབང་མཆོག་བསྐུར་དུ་གསོལ༔ ཁྱེད་རང་རྣམས་དཀྱིལ་འཁོར་གྱི་ཤར་ཕྱོགས་སུ་བཅོམ་ལྡན་འདས་དཔལ་རྡོ་རྗེ་སེམས་དཔའི་རྣམ་པར་འཁོད་པའི་མོས་པ་མཛོད། སྙིང་གའི་ས་བོན་ལས་འོད་ཟེར་འཕྲོས་པས་མདུན་གྱི་ནམ་མཁར་དབང་གི་ལྷ་ཕྱོགས་བཅུའི་དུས་བཞིའི་རྒྱལ་བ་སྲས་དང་བཅས་པ་རྣམས་སྤྲིན་ཕུང་གཏིབས་པ་བཞིན་བྱོན་ནས་བཞུགས་པར་གྱུར། དེ་རྣམས་ལ་སློབ་དཔོན་གྱིས་མཆོད་ཅིང་གསོལ་བ་བཏབ་པའི་མོས་པ་མཛོད། ཨོཾ་སརྦ་ཏ་ཐཱ་ག་ཏཱ་ས་པ་རི་ཝཱ་ར་པུཥྤེ་པྲ་ཏཱིཙྪ་ཡེ་སྭཱ་ཧཱ༔ ཞེས་དེ་བཞིན། ཤཔྟའི་བར་གྱིས་མཆོད། ༼མཆོད་རོལ་ཌྰ་རྒྱ་དུང་དཀར༽དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་བ་སྩལ་དུ་གསོལ་ཞེས་གསོལ་བ་བཏབ་པས་ནམ་མཁར་བཞུགས་པའི་དེ་བཞིན་
གཤེགས་པ་ཡབ་རྣམས་ཀྱིས་དབང་བསྐུར་བའི་དགོངས་པ་མཛད། ཡུམ་རྣམས་ཀྱིས་བུམ་པའི་ཆུ་རྒྱུན་གྱིས་དབང་བསྐུར། འཁོར་གྱི་སེམས་དཔའ་སེམས་མ་རྣམས་ཀྱིས་ཤིས་པ་བརྗོད། ཁྲོ་བོ་ཁྲོ་མོ་རྣམས་ཀྱིས་བགེགས་བསྐྲད་པའི་སྦྱོར་བ་དང་བཅས་ཏེ་དབང་བསྐུར་བར་གྱུར། ཧཱུྃ༔ རིན་ཆེན་བུམ་པ་གཞལ་ཡས་ཁང༔ རྒྱལ་བ་ཞི་ཁྲོའི་ལྷ་ཚོགས་བཞུགས༔ རིགས་ཀྱི་བུ་ལ་དབང་བསྐུར་བས༔ ལྷ་དབང་ལུས་ལ་ཐོབ་པར་ཤོག༔ ཧཱུྃ་བཛྲ་ཨ་བྷི་ཥིཉྩ་ཨ་ཨ༔ ཨོཾ་བྷུདྡྷ་ཨ་བྷི༴ སྭ་རཏྣ་ཨ་བྷི༴ ཨོཾ་པདྨ་ཨ་བྷི༴ ཧཱ་ཀརྨ་ཨ་བྷི་ཥིཉྩ་ཨ་ཨ༔ ཧཱུྃ་རྡོ་རྗེ་འཁོར་ལོ་རིན་པོ་ཆེ༔ པདྨ་རྒྱ་གྲམ་ཐུགས་ཀྱི་རྟགས༔ རིགས་ཀྱི་བུ་ལ་དབང་སྐུར་བས༔ འཁོར་ལོ་ལྔ་ལ་དབང་རྫོགས་ཤོག༔ བཛྲ་ཙཀྲ་རཏྣ་པདྨ་ཀརྨ་ཁ་ཁ་ཨ་བྷི་ཥིཉྩ་ཨ༔ འོ་རིགས་ཀྱི་བུ་ཁྱོད་ལ་བུམ་པའི་དབང་སྐུར་བས་ཕྱི་སྣོད་ཐམས་ཅད་གཞལ་ཡས་ཁང་སོགས་ནས་སངས་རྒྱས་པར་གྱུར་ཅིག །དེ་ནས་བུམ་དབང་གི་རྗེས་འབྲེལ་དུ་ནང་ལུས་དཀྱིལ་གྱི་བསྐྱེད་རིམ་ལ་དབང་བའི་ཕྱིར་སྐུའི་རྗེས་གནང་ཞུ་བའི་དོན་དུ་གསོལ་བ་གདབ་པ་འདིའི་རྗེས་ཟློས་མཛོད། །ཀྱེ་ཧོ་བླ་མ་རྡོ་རྗེ་འཛིན་པ་སོགས། དབང་བསྐུར་དུ་གསོལ༔ དེ་ལྟར་གསོལ་བ་བཏབ་པས། སློབ་དཔོན་དང་མདུན་བསྐྱེད་དཀྱིལ་འཁོར་དུ་བཞུགས་པའི་ཞི་བ་བཞི་བཅུ་རྩ་གཉིས་ལས་ཡེ་ཤེས་ཀྱི་སྐུ་གཉིས་པ་རེ་འཕྲོས་ཏེ་ཁྱེད་རང་རྣམས་ཀྱི་སྙིང་ག་དྭངས་མ་ལྔ་འདུས་འོད་ཀྱི་ཐིག་ལེའི་ཀློང་དུ་བཞུགས་པར་གྱུར་པའི་མོས་པ་མཛོད་ཅིག །ཧཱུྃ༔ སྐལ་ལྡན་རིགས་ཀྱི་སོགས་ནས་ཞི་ཁྲོ་ཡོངས་རྫོགས་མཐར། གྲོལ་བ་དུས་མཉམ་འོང་ངོ་༔ དེ་ལྟར་བུམ་དབང་
གི་རྗེས་འབྲེལ་དུ་ནང་ལུས་དཀྱིལ་གྱི་བསྐྱེད་རིམ་ལ་དབང་བའི་ཕྱིར་སྐུའི་རྗེས་གནང་བཅས་ཐོབ་པའི་ལུས་ཀྱི་དྲི་མ་དག །ལམ་བསྐྱེད་རིམ་བསྒོམ་པ་ལ་དབང་། འབྲས་བུ་སྤྲུལ་སྐུ་ཐོབ་པའི་སྐལ་བ་ཅན་དུ་བྱས་སོ། །བླ་མ་ཡབ་ཡུམ་སྙོམས་པར་འཇུག་པའི་བྱང་ཆུབ་སེམས་ཀྱི་ཐིག་ལེ་ལྕེ་ཐོག་ ཏུ་བཞག་པར་གྱུར། ཧཱུྃ༔ གསང་བ་ཡེ་ཤེས་སོགས་ནས། སུ་ཀ་ཨཱ༔ དེ་ལྟར་ཀུན་ རྫོབ་བྱང་ཆུབ་སེམས་ཀྱི་དཀྱིལ་འཁོར་དུ་གསང་བའི་དབང་ཐོབ་ངག་དྲི་མ་སྦྱངས། ལམ་རྩ་རླུང་བསྒོམ་པ་ལ་དབང་། འབྲས་བུ་ལོངས་སྐུ་ཐོབ་པའི་སྐལ་བ་ཅན་དུ་བྱས་སོ། །ལྷ་སྔགས་ཀྱི་སྣང་ཆ་ཐམས་ཅད་འཛིན་མེད་ཁྱབ་བརྡལ་སྤྲོས་པ་དང་བྲལ་བའི་དོན་མཚོན་ཕྱིར་གསལ་སྟོང་དབྱེར་མེད་དུ་ངོ་སྤྲོད་པ་དེས་གསན་པའི་ཁྱབ་པར་གདལ། ཧཱུྃ། མེ་ལོང་སྤྲོས་བྲལ་སོགས་ནས་ཨ་བྷི་ཥིཉྩ་ཧཱུྃ༔ དེ་ལྟར་ན་རྟེན་ཤེས་རབ་ཡེ་ཤེས་ཀྱི་དབང་ཐོབ། ཡིད་ཀྱི་དྲི་མ་དག །ལམ་ཐིག་ལེ་བསྒོམ་པ་ལ་དབང་། འབྲས་བུ་ཆོས་སྐུ་ཐོབ་པའི་སྐལ་བ་ཅན་དུ་བྱས་སོ། །དེ་དོན་རྒྱུད་ལ་སྦྱོར་ཕྱིར་ངོ་སྤྲོད་ཀྱི་ཚིག་རྣ་བར་གདབ་པ་འདིའི་དོན་སྒོམས་ཤིག །ཧྲཱིཿ ངོ་བོ་ཉིད་ནི་ཀ་དག་པས༔ སོགས། ཨ་བྷི་ཥིཉྩ་ཧཱུྃ༔ དེ་ལྟར་དོན་དམ་བྱང་ཆུབ་སེམས་ཀྱི་དཀྱིལ་འཁོར་དུ་དབང་བཞི་པ་ཐོབ། ཡེ་ཤེས་ཀྱི་དྲི་མ་སྦྱངས། ལམ་རྫོགས་པ་ཆེན་པོ་བསྒོམ་པ་ལ་དབང་། འབྲས་བུ་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་སོ། །ཧཱུྃ༔ འཁོར་ལོ་རིན་ཆེན་སོགས། འོ་རིགས་ཀྱི་བུ་རྣམས་ལ་རྒྱལ་སྲིད་སྣ་བདུན་
སོགས། ཧཱུྃ༔ ཇི་ལྟར་སྔོན་གྱི་རྒྱལ་བ་ཡི༔ སོགས། འོ་རིགས་ཀྱི་བུ་ཁྱོད་ལ་བཀྲ་ཤིས་རྟགས་བརྒྱད་སོགས་གྱུར་ཅིག །འོ་སྐལ་ལྡན་རིགས་ཀྱི་བུ༔ དད་པ་དང་དམ་ཚིག་ལྡན་པ་རྣམས་ཉོན་ཅིག །སོགས་ནས། ཨོཾ་ཨཱཿ ཧཱུྃ། སྐྱེ་མེད་དབྱིངས་ཀྱི་སོགས། ཕ་ལ་ཨཱ་བྷི་ཥིཉྩ༔ ཨོཾ་ཨཱཿ ཧཱུྃ་ཧྲཱིཿ ཨོཾ་ཨཱཿ ཧཱུྃ། ཆོས་སྐུ་ཀུན་ཏུ་བཟང་པོ། ལོངས་སྐུ་༼དྲུག་པ་རྡོ་རྗེ་འཆང་ཆེན།༽ སོགས་ནས་བརྒྱུད་པའི་གསོལ་འདེབས་མཐར། སརྦ་སིདྡྷི་ཧྲཱིཿ ཞེས་དང་ཞི་ཁྲོ་སྤྱི་སྔགས་ འཛབ་དབྱངས་བཅས་འགྲིམ་མཐར། ཕྱོགས་བཅུའི་རྒྱལ་བ་སྲས་བཅས་རྩ་བརྒྱུད་བླ་མ་ཡི་དམ་མཁའ་འགྲོ་ཆོས་སྐྱོང་གི་ཚོགས་དང་བཅས་པ་མདུན་གྱི་ནམ་མཁར་སྤྲིན་ཕུང་འཁྲིགས་པ་ལྟར་བྱོན་ནས་ཁྱེད་རང་རྣམས་ལ་དབང་དོན་གྱི་ཡེ་ཤེས་པ་དེ་ཉིད་མ་བསྐྱེད་པ་བསྐྱེད་ཅིང་བསྐྱེད་པ་མི་ཉམས་ཤིང་བརྟན་པར་རབ་ཏུ་གནས་པའི་ཕྱིར་མེ་ཏོག་གི་ཆར་བབས་ཤིང་ཤིས་བརྗོད་མཛད་པའི་མོས་པ་མཛོད་ཅིག །ཨོཾ་ཡེ་དྷརྨ་སོགས་བཀྲ་ཤིས་ཅི་རིགས་བརྗོད་ཅིང་། མི་འགྱུར་ལྷུན་པོ་སོགས། གཙོ་བོས་ཇི་ལྟར་བཀའ་སྩལ་བ། །དེ་དག་ཐམས་ཅད་བདག་གིས་བགྱི། །དེང་ནས་བརྩམས་ཏེ་བདག་བྲན་དུ། །ཁྱེད་ལ་བདག་ནི་འབུལ་ལགས་ན། །ཁྱེད་ཀྱིས་སློབ་མར་གཟུང་བ་དང་། །ཆ་ཤས་ཀྱིས་ཀྱང་སྤྱད་དུ་གསོལ། །ས་གཞི་སྤོས་ཆུ་སོགས། ཁས་བླང་ལུས་འབུལ། གཏང་རག དགེ་བསྔོ་སོགས་བྱའོ། །དེ་ལྟར་དབང་ཡོངས་སུ་རྫོགས་པར་ངེས་པར་ཐོབ་པའི་དགེ་རྩ་སེམས་ཅན་ཐམས་ཅད་ཀྱི་དོན་དུ་བསྔོ་བའི་ཐུགས་འདུན་གནང་བར་ཞུ། བསོད་ནམས་འདི་ཡིས་ཐམས་ཅད་གཟིགས་པ་ཉིད། །ཐོབ་ནས་ཉེས་པའི་དགྲ་རྣམས་ཕམ་མཛད་ཅིང་། །སྐྱེ་རྒ་ན་འཆིའི་རྦ་ཀློང་འཁྲུག་པ་ཡི། །སྲིད་
པའི་མཚོ་ལས་འགྲོ་བ་སྒྲོལ་བར་ཤོག །འཇམ་དཔལ་དཔའ་བོས་ཇི་ལྟར་མཁྱེན་པ་དང་། །སོགས་བརྗོད་ལ། སློབ་མ་རྣམས་རང་གནས་སུ་གཏོང་། སླར་གཤིན་ཆོག་གི་ཟས་གཏད་ནས་བྱང་ཞུ་བཀྲ་ཤིས་པར་བྱའོ། །ཞེས་པ་འདི་ཡང་མཁས་བཙུན་བཟང་པོའི་དཔལ་གྱིས་འབྱོར་པའི་བཤེས་གཉེན་བླ་མ་དམ་པ་འཇིགས་མེད་བློ་གསལ་དང་། བླ་མ་ཀུན་བཟང་ཆོས་རྒྱལ་གཉིས་ཀའི་གསུང་གིས་བསྐུལ་བར། རྒྱལ་བ་ཀཿཐོག་པ་དང་། ཞེ་རྫོགས་ཀྱི་ཕྱག་ལེན་ཟུང་འབྲེལ་དུ་མཐུ་སྟོབས་རྣམ་པར་རྒྱལ་བས་སོ། །དགེའོ། །མངྒ་ལམ།། །།
ཕྱོགས་བཅུའི་རྒྱལ་བ་སྲས་བཅས་རྩ་བརྒྱུད་བླ་མ་ཡི་དམ་མཁའ་འགྲོ་ཆོས་སྐྱོང་གི་ཚོགས་དང་བཅས་པ་མདུན་གྱི་ནམ་མཁར་སྤྲིན་ཕུང་འཁྲིགས་པ་ལྟར་བྱོན་ནས་ཁྱེད་རང་རྣམས་ལ་དབང་དོན་གྱི་ཡེ་ཤེས་པ་དེ་ཉིད་མ་སྐྱེས་པ་བསྐྱེད་ཅིང་སྐྱེས་པ་རྣམས་མི་ཉམས་ཤིང་བརྟན་པར་རབ་ཏུ་གནས་པའི་ཕྱིར་མེ་ཏོག་གི་ཆར་དབབ་ཅིང་ཤིས་བརྗོད་མཛད་པའི་མོས་པ་མཛོད་ཅིག །ཨོཾ་ཡེ་དྷརྨ་སོགས་བརྗོད་ཅིང་། ཀུན་བཟང་རིགས་ལྔ་སེམས་དཔའ་སོགས། ཉིན་མོ་བདེ་ལེགས་སོགས། དེ་ལྟར་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་དབང་བཞི་མཐའ་རྟེན་དང་བཅས་པ་ལེགས་པར་གྲུབ་པས་གསང་སྔགས་ཀྱི་རྩ་བ་དབང་ལ་རག་ལས་ཤིང་དབང་གི་རྩ་བ་དམ་ཚིག་བསྲུང་བར་གལ་ཆེ་སྟེ། དེ་ལྟར་དམ་ཚིག་རྣམས་མ་ཉམས་པར་བསྲུངས་ན་གནས་སྐབས་མཐར་ཐུག་ཐམས་ཅད་བདེ་སྐྱིད་ཀྱི་གཞི་ཐིང་ཞིང་བླ་མེད་བྱང་ཆུབ་མྱུར་དུ་ཐོབ་ལ། དམ་ཚིག་ཉམས་ན་གནས་སྐབས་མཐར་ཐུག་ཐམས་ཅད་སྡུག་བསྔལ་བཟོད་དཀའ་བ་མྱོང་ཞིང་བྱང་ཆུབ་ཀྱི་འབྲས་བུ་བརླག་པར་འགྱུར་ཏེ། རྒྱུད་པད་སྡོང་བརྩེགས་པ་ལས། མ་ཉམས་བསྲུང་ན་དོན་འབྲས་འགྲུབ། །ཉམས་ན་ཡུན་རིང་དུ་ཁཿ མྱོང་། །དེ་ཕྱིར་དེ་དོན་ལེགས་པར་བྱ། །ཞེས་གསུངས་པས་སོ། །དམ་ཚིག་དང་སྡོམ་པ་རྣམས་སྤང་བླང་མ་ཉམས་པར་བསྲུང་སྙམ་པའི་འདིའི་རྗེས་ཟློས་མཛོད། གཙོ་བོས་ཇི་ལྟར་བཀའ་སྩལ་པ། །
དེ་དག་ཐམས་ཅད་བདག་གིས་བགྱི། །བཀའ་དྲིན་གཏང་རག་གི་ཡོན་དུ་མཎྜལ་ཕུལ། ས་གཞི་སྤོས་སོགས། སླར་ཡང་ལུས་ལོངས་སྤྱོད་དུས་གསུམ་དགེ་ཚོགས་ དང་བཅས་པ་ཀུན་བཟང་མཆོད་པའི་སྤྲིན་ཕུང་དུ་སྤྲོས་ཏེ་ཕུལ་ན་ཆ་ཤས་ནས་ལོངས་སྤྱད་དུ་གསོལ་སྙམ་པའི་འདིའི་རྗེས་ཟློས་མཛོད། དེང་ནས་བརྩམས་ཏེ་བདག་བྲན་དུ། །ཁྱེད་ལ་བདག་ནི་འབུལ་ལགས་ན། །ཁྱེད་ཀྱི་སློབ་མར་བཟུང་བ་དང་། །ཆ་ཤས་ཀྱིས་ཀྱང་བཞེས་སུ་གསོལ། །དེ་ལྟར་དབང་ཡོངས་སུ་རྫོགས་པ་ཐོབ་པའི་དགེ་རྩ་སེམས་ཅན་ཐམས་ཅད་ཀྱི་དོན་དུ་བསྔོ་བར་བྱོས་ཤིག །བསོད་ནམས་འདི་ཡིས་ཐམས་ཅད་གཟིགས་པ་ཉིད་སོགས། རྃ་ཡྃ་ཁྃ། འདོད་ཡོན་གྱི་ཕུང་པོ་སོགས། ཞེས་སོགས་བརྗོད་ལ་སློབ་མ་རྣམས་རང་གནས་སུ་བཏང་། སླར་ཡང་གཤིན་ཆོག་གི་ཟས་གཏད་ནས་བྱང་བུ་བསྲེག་པའི་བར་བྱའོ། །ཞི་ཁྲོའི་དབང་གི་མཚམས་སྦྱོར་འགྲོ་དྲུག་གི་སྒེར་ཆོས་སོགས་ཟུར་དུ་ཕྱུང་སྟེ་མཁས་གྲུབ་ཆེན་པོ་འགྱུར་མེད་མཐུ་སྟོབས་རྣམ་རྒྱལ་གྱི་གསུང་རབ་ལས་སོ། །