བཀའ་བརྒྱད་བདེ་གཤེགས་འདུས་པའི་ཟིན་བྲིས་ཡིད་ཀྱི་མུན་སེལ།
བཀའ་བརྒྱད་བདེ་གཤེགས་འདུས་པའི་ཟིན་བྲིས་ཡིད་ཀྱི་མུན་སེལ་བཞུགས་སོ། །ན་མོ་བྷ་ག་ཝཱན་ཤྲཱི་ཧེ་རུ་ཀཱནྩ་བྷེ་ད་གུ་ར་ཝེ། །རྣལ་འབྱོར་ཆེན་པོ་སྒྲུབ་སྡེ་བཀའ་བརྒྱད་ཀྱི། །རིམ་གཉིས་མཐར་ཕྱིན་མཆོག་དངོས་འབྲས་བུ་ཐོབ། །རྒྱ་བོད་རིག་འཛིན་གྲུབ་པའི་སར་གཤེགས་དང་། །ཁྱབ་བདག་དྲིན་ཆེན་བླ་མ་གཙུག་ཏུ་མཆོད། །གསང་ཆེན་ལམ་གྱི་དངུལ་ཆུའི་སྦྱོར་བ་ཡིས། །ཐ་མལ་འགྲོ་རྒྱུད་ལྕགས་ཁམས་ཀ་ན་ཀར། །སྒྱུར་བྱེད་དབང་བཞིའི་ལམ་གྱི་ཕྱག་བཞེས་སྲོལ། །ནུབ་པར་དོགས་ཏེ་མི་བརྗེད་ཟིན་ཐོ་སྤེལ། །
དེ་ཡང་མཁས་རྣམས་ཕྱག་བཞེས་མཁའ་ལྟར་ཡངས། །བདག་བློ་ས་ཀུ་ཙི་ཡི་མིག་ལྟར་ཕྲ། །འོན་ཀྱང་མཁའ་ལྡིང་རྗེས་ཤུལ་སྦྲང་བུའི་རྩལ། །ངོམ་པའི་བློ་འདི་མ་སྤངས་ཚུལ་འདིར་བརྩོན། །ཞེས་ཤིས་པར་བརྗོད་དེ། འདིར་སྒྲུབ་ཆེན་བཀའ་བརྒྱད་བདེ་གཤེགས་འདུས་པའི་དཀྱིལ་འཁོར་དུ་བསྙེན་བསྒྲུབ་མཐར་ཕྱིན་པའི་རྡོ་རྗེ་འཛིན་པས། སྐལ་ལྡན་གྱི་སློབ་མ་དཀྱིལ་འཁོར་གཞུག་པར་འདོད་ན། སྤྲོས་བཅས་ཚོམ་བུ་ཚོགས་སྒྲུབ་བསྒྲུབ་ཆེན་དང་འབྲེལ་བ་རྡུལ་ཚོན་སྟེང་ནས་སྨིན་སློབ་དང་། འདྲ་འབག་གང་རུང་གི་རྗེས་སུ་བཟུང་བ་དང་། སྤྱི་ཙམ་རས་བྲིས་དང་ཚོམ་བུ་ལ་བརྟེན་པ་ལས། འདིར་ཕྱི་མའི་ལུགས་ལྟར་འཇུག་བདེའི་ཟིན་བྲིས་ལ་ཉིན་སྔ་མའི་སྐབས་སུ་བྱེད་ན། བཤམས་དང་། སྒྲུབ་པ། དབང་དངོས། ཞར་བྱུང་འཕྲོས་དོན་དང་བཞི་ལས། དང་པོའི་རྩ་བའི་ས་བཅད་བཤམས་ལ། གནས་ཁང་ཕྱགས་བདར་སོགས་ལེགས་པར་བྱས་ལ། བླ་རེ། ཡོལ་བ་སོགས་ཀྱིས་མཛེས་པར་བརྒྱན། སློབ་དཔོན་དང་ཞལ་སྤྲོད་ཀྱིས་མཆོད་སྟེགས་བང་རིམ་ཅན་སྟེང་ཁེབས་གཞི་རས་བཅས་པར་མེ་ཏོག་བཀྲམ་པ་དང་། གཏོར་མ་ནི། བདག་བསྐྱེད་ཀྱི་གཏོར་མ་དཔལ་གཏོར་ཕོ་རྒྱུད་དམར་པོ་འཁོར་རང་འདྲ་བརྒྱད་ཀྱིས་བསྐོར་བ་མཐེབ་ཀྱུ་དང་ཉི་ཟླ་སོགས་ཀྱིས་བརྒྱན་པ། དེ་མཚུངས་བདག་འཇུག་དབང་གཏོར་བཅས་གཉིས་ཀར་རྩེ་ཁྲོམ་ལ་རྡོ་རྗེ་དང་ཐོད་ཁྲག་གིས་མཚན་པའམ། ལྔ་རྒྱན་ཉི་ཟླ་སོགས་ནོར་བུ་
གང་རུང་། སྒྲུབ་གཏོར་གཏོར་གདུགས་མཐིང་ཁྲ། བཀའ་སྲུང་དཔལ་མགོན་ཕྱག་བཞིར་དཔལ་གཏོར་ཕོ་རྒྱུད་དམར་པོ་འཁོར་རང་འདྲ་བརྒྱད་དང་། བྱང་དུ་གཟའ་ལ་གཡས་གཅུས་ཐམས་ཅད་ལ་མཐེབ་ཀྱུ་རེ་སྦྱར་བ་དང་། མཚམས་རྣམས་སུ་མཐེབ་ཀྱུ་གྲངས་མང་གིས་བཅེར་བ། གཙོ་བོར་རྩེ་ཁྲོམ་གྲི་ཐོད་ཀྱིས་མཚན་པ། གཞན་རྣམས་སྐོར་རྒྱན་གཉིས་རེ་རྒྱན་པ་གཏོར་གདུགས་མཐིང་ཀ །ཞིང་སྐྱོང་མ་མོར་གྲུ་གསུམ་རྩེ་རྒྱས་དམར་པོ་འཁོར་རང་འདྲ་བཞི། མཚམས་རྣམས་སུ་མཐེབ་ཀྱུས་གཏམས་པ། གཙོ་བོར་དཀར་རྒྱན་བཞི་སྒྲོམ། ཉི་ཟླ་མེ་ཏོག་སོགས་འཁོར་རྒྱན་གཉིས་རེས་བརྒྱན་པ་གཏོར་གདུགས་དམར་སྨུག །སྡེ་དཔོན་སུམ་ཅུར་གྲུ་གསུམ་དམར་པོ། འཁོར་རང་འདྲ་ཆེ་བ་བརྒྱད། ཆུང་བ་ཉེར་གཅིག་བཅས་མཐེབ་ཀྱུ་བཅས། གཙོ་བོར་དཀར་རྒྱན་བཞི་སྒྲོམ། ཉི་ཟླ་མེ་རི་སོགས་དང་། འཁོར་རྒྱན་གཉིས་རེ་རྒྱན་པ་གཏོར་གདུགས་དམར་པོ། ཐབས་ཤེས་ཚེ་ཡི་གའུ་ཉི་ཟླ་ཁ་སྦྱོར་གྱི་དབྱིབས་མཚོན་འོག་མ་དམར་པོ་དང་། སྟེང་མ་དཀར་པོ་བྱས་པའི་སྟེང་དུ་སྣ་ཚོགས་རྡོ་རྗེ་རྒྱ་གྲམ་གྱི་དབུས་སུ་རྡོ་རྗེ་ཕྱེད་པ་གྱེན་ལངས་ཀྱིས་མཚན། རྩེར་ཉི་ཟླའི་ཏོག་དང་། གདན་པདྨ་འདབ་བརྒྱད་ཅན། ཚེ་ཟན་རིལ་བུ་སུམ་ཕྲེང་སྟེང་དུ་བུམ་གཟུགས་སྒྲོས་ལྡན་རྩེ་ཁྲོམ་ཧྲཱིཿཡིག་དཀར་པོས་མཚན་པ། དངོས་གྲུབ་ཀྱི་རྫས་འབྲང་རྒྱས་ནི། རིན་པོ་ཆེའི་སྣོད་དུ་གསེར་གཡུ་སོགས་རིན་པོ་ཆེ་སྣ་ཚོགས་བསྲེས་པའི་ཕྱེ། མངར་གསུམ་ཞོ་མར་གྱིས་སྦྲུས་པར་དབུས་སུ་ཟླུམ་པོ་བག་ཙམ་གྱིས་མཐོ་བ་དང་། ཕྱོགས་བཞིར་ལས་བཞིའི་དབྱིབས་མདོག་
ཅན། རང་རྟགས་ཉི་ཟླ་མེ་རིའི་རྒྱན་ཅན་རིལ་བུས་བསྐོར་བ། མཾ་ས། མར། ཐུད། འབྲས་ཆན། ཁུར་བ། ཞོ་དང་། ལ་དུ། ཤིང་ཐོག་སྣ་ཚོགས། སུ་ར་སོགས་བཟའ་བཅའ་བཏུང་བའི་བྱེ་བྲག་སྣ་ཚོགས་ཀྱིས་བསྐོར་བ། བགེགས་གཏོར་དམར་ཟླུམ་མདུན་དུ་མཐེབ་རིལ། གཡས་སུ་ཏིང་ལོ། རྒྱབ་དུ་ཆང་བུའི་མགོ་གཡས་ཕྱོགས་སུ་གུག་ཙམ་བྱས་པ། དྲག་པོའི་ཞལ་ཟས་གྲུ་གསུམ་རྣོ་དབལ་ལྟོ་ཁྲ་ཅན་མིའི་མགོ་ལག་དོན་སྙིང་སོགས་ཀྱིས་བརྒྱན་པ། དབང་པོའི་མེ་ཏོག་ནི་དབུས་སུ་སྙིང་། གཡས་གཡོན་རྣ་བ། སྟེང་དུ་ལྕེ་དང་སྣ། དེའི་གཡས་གཡོན་དུ་མིག་གཉིས། སྣའི་སྟེང་དུག་གི་མེ་ཏོག་དང་ལོ་མ་ཅན་རྒྱན་གྱིས་བཀྲ་བ་གཅིག །ལིངྒ་དངོས་ཉམས་དོད་ཅིང་རིད་པ། རྒྱུན་གྱི་གཏོར་འབུལ་པད་སྣོད་དུ་གཙོ་བོ་ལེགས་ལྡན་གྱི་གཏོར་མ་གྲུ་གསུམ་དཔུང་རོང་ཅན། དེའི་གཡས་སུ་ཕྱག་བཞི་པར་གྲུ་གསུམ་རྩེ་ཟླུམ། གཡོན་དུ་མ་ནིང་ལ་གྲུ་གསུམ་དཔུང་རོང་། དེ་མདུན་དུ་ཞལ་བཞི་པར་གྲུ་གསུམ་རྩེ་ཟླུམ། དེའི་གཡས་སུ་ལྷ་ཆེན་ལ་གཏོར་མ་ཟླུམ་པོ་རིན་པོ་ཆེའི་སྙེ་མ་ལྟ་བུ་དང་། ཁྱབ་འཇུག་ལ་གྲུ་གསུམ་གཡས་གཅུས་གཉིས་མཐེབ་རིལ་གྱིས་མཚན་པ། ཞལ་བཞིའི་གཡོན་དུ་སྔགས་སྲུང་མར་གྲུ་གསུམ་དམར་པོ་གཅིག་དང་། ཞིང་སྐྱོང་མ་མོར་གྲུ་གསུམ་གཅིག །ཞལ་བཞིའི་མདུན་ནས་རིམ་བཞིན། ལས་གཤིན། སྡེ་དཔོན། ཕུར་སྲུང་། རྡོར་ལེགས། བྲག་བཙན། གནོད་སྦྱིན་ཙིའུ་དམར་པོ་རྣམས་ལ་གྲུ་གསུམ་དམར་པོ་རེ་རེ། གཙོ་བོའི་རྒྱབ་གཡས་སུ་རྣམ་སྲས་ལ་གྲུ་གསུམ་དཔུང་རོང་ལྟོ་ལྡིར་མཐེབ་རིལ་ཅན། ཞིང་སྐྱོང་སེང་གདོང་ལ་གྲུ་
གསུམ་དམར་པོ་སྨན་བཙུན་མར་བླ་གཏོར་མཐེལ་རིལ་ཅན་དཀར་པོ། གཏེར་བདག་ལ་གྲུ་གསུམ་དམར་པོ་གཅིག །པེ་ཧར་ལ་ཟླུམ་པོ་གཤོག་དྲུག་བཅས་པའི་མཚམས་རྣམས་སུ་མཐེབ་ཀྱུ་བཅད་ཁ་ཕྱིར་བསྟན་པས་རྩེར་ཞིང་གཏོར་སྣོད་ཀྱི་ཕྱིར་མ་ཐལ་བ་སོ་སོའི་རྩེར་ཉི་ཟླ་མེ་རི་སོགས་རྒྱན་གྱིས་བཀྲ་བར་བྱ། རྒྱུན་བཞག་དང་། རྒྱུན་འབུལ་གྱི་ཆད་བསྟན་མཚུངས་པར་ཆད་ཐོའི་གཏོར་མ། གྲུ་གསུམ་ རྩེ་རྒྱས་དམར་པོའི་མདུན་དུ་མཐེབ་ཀྱུ་འཕྲེད་སྦྱར་གསུམ་ལ། དེ་རེ་རེའི་སྟེང་མཐེབ་ཀྱུ་ལངས་རེ་བཅས་དྲུག་ལོགས་གཉིས་སུ་མཐེབ་ཀྱུ་གྱེན་ལངས་རེ་རེ་བཅས་བསྡོམས་པས་སྡེ་བརྒྱད་ཀྱི་གྲངས་དང་མཉམ་པ། བསྟན་མའི་གཏོར་མ་སྣོད་གཅིག་ཏུ། དབུས་སུ་བདུད་མོ་བཞི་ལ་གྲུ་གསུམ་ནག་པོ་དེའི་གཡས་སུ་གནོད་སྦྱིན་བཞིར་གྲུ་བཞི་དམར་པོ། །གཡོན་དུ་སྨན་མོ་བཞིར་ཟླུམ་པོ་དཀར་པོ་སྟེ། སོ་སོའི་མདུན་དུ་རང་མདོག་དང་མཚུངས་པའི་མཐེབ་ཀྱུ་གསུམ་སྦྱར་བ་སྟེ་དེ་རྣམས་ནི་གཏོར་མ་བཅའ་དགོས་ཀྱི་རིགས་རྣམས་སོ། །མཆོད་སྟེགས་སྟར་དང་པོའི་དབུས་སུ་བདག་བསྐྱེད་ཀྱི་གཏོར་མ། གཡས་སུ་སྨན། གཡོན་དུ་རཀྟ། སྟར་གཉིས་པར་མདུན་བསྐྱེད་ཀྱི་གཡོན་ནས་བརྩམས་ཏེ་ཆུ་གཉིས་ཉེར་སྤྱོད་ལྔ་བྲེང་ཚར་དུ་བཀོད། དེའི་མདུན་ངོས་ཀྱི་ས་གཞི་ལ་དཀྱིལ་འཁོར་གྱི་སྟེགས་དབུས་གྲུ་བཞི་པའི་དབུས་སུ། འབྲུ་ཚོམ་གཅིག་བཀོད་པའི་སྟེང་དུ་མཉྫི་ལ་ས་ལྷའི་གཏོར་མ་དཀར་ཟླུམ་མཐེབ་རིལ་ཅན། མདུན་དུ་གསེར་སྐྱེམས། མཐའ་བསྐོར་དུ་བྱང་ཤར་མཚམས་འཛིན་མེ་ཏོག་ནས་བརྩམས་ཆུ་
གཉིས་ཉེར་སྤྱོད་དང་བཅས་པ་གཡས་སུ་བསྐོར། གཞན་ཡང་ཉེ་བར་མཁོ་བའི་ཡོ་བྱད་ལ། ཀ་ཏོ་ར་ལྟ་བུའི་སྣོད་སྟེགས་གང་རིགས་སུ་ཁྲོ་བཅུའི་ཕུར་པ་གདན་བཅས་གོ་རིམ་མ་འཆོལ་བ་ཐོ་བ་བཅས། དབང་མཆོག་ཕུར་པ་གདན་བཅས་གཞན་ཡང་སྤོས་ཕོར་གུ་གུལ། ཡུངས་དཀར་རྔ་རོལ་འབུད་དཀྲོལ་གྲྭ་ཚང་བཞུགས་གདན་སོགས་གང་དགོས། སློབ་དཔོན་མདུན་དུ་ཅོག་སྟེགས་ལ་གཡོན་ནས་རིམ་པར་ནང་མཆོད། རྡོ་དྲིལ། ཌ་མ་རུ། གཡབ་དར་ནས་ཟེ་སོགས་ཉིན་དང་པོར་ས་ཆོག་སྟ་གོན་བྱ་བ་དང་། ཕྱི་དྲོ་རྒྱན་འགོད་བྱས་ན་འགྲིགས་སོ། །གཉིས་པའི་རྩ་བའི་ས་བཅད་བསྒྲུབ་པ་ལ། ས་ཆོག །སྟ་གོན། རྒྱན་འགོད། དབང་བསྒྲུབ་དངོས་དང་བཞིའོ། །དང་པོ་ས་ཆོག་ནི། ཚིག་བདུན་གསོལ་འདེབས། བརྒྱུད་འདེབས་ཁྱབ་བདག་སྟོན་པ་དང་། ཡན་ལག་བརྒྱད་ པ་རྡོ་རྗེ་སློབ་དཔོན་ཚར་གསུམ། སེམས་ཅན་བདེ་སོགས་ཚད་མེད་བཞི་ཚར་གཅིག །སྨིན་གཏེར་གསུང་སྒྲུབ་ཁོག་དངོས་གྲུབ་སྙེ་མ་གསལ་བའི་མེ་ལོང་ལྟར་ཕྱག་རྒྱ་རྐྱང་བསྒྲུབ་ཀྱི་རྡོར་བཟླས་གཙོ་སྔགས་སུམ་བརྒྱ། ཡུམ་སྔགས་བརྒྱ་ཉེར་བསྡུ་བྱས། མཆོད་པར་ལས་རྡོར་ནས་ཆབ་བྲན། ཨོཾ་བཛྲ་ཨ་མྲ་ཏ་སོགས་ས་ལྷའི་གཏོར་མ་བསྔོ་ཞིང་གཏོར་མ་གསེར་སྐྱེམས་ཕྱིར་འབུལ། མདུན་དཀྱིལ་ཚོམ་བུ་དང་མཆོད་པ་རྣམས་བསྡུ། སློབ་དཔོན་བཞེངས་ཏེ་ཆོས་གོས་སྣམ་སྦྱར་པད་ཞྭ་བཅས་སྟེགས་བུའི་མདུན་དུ་ཁྲིའུར་བཞུགས། རྡོར་དྲིལ་བསྣམས། ལས་
རྡོར་གྱིས་དབང་མཆོག་ཕུར་བུ་སྟེགས་བུའི་དབུས་སུ་བཀོད། བདག་ཉིད་ཆེ་མཆོག་སོགས་ནས། རྟ་སྔགས་ལན་བདུན་བཟླས་ནས། ཕུར་བུ་ལས་བྱུང་བའི་སོགས་ནས། དབང་ཕུར་བསྡུ། ལག་གཡས་རྡོ་རྗེ་བཅས་སོར་མོ་ལྔ་གདེངས་ཏེ། ལག་གཡས་ཀྱི་ནས་སྭ་བྷཱའི་སྔགས་ལན་གསུམ་བརྗོད་བསྟུན་སློབ་དཔོན་ཕྱག་སོར་སྟེགས་བུ་ལ་རེག །དེ་ནས། སློབ་དཔོན་དྲིལ་འཛིན་བཅས་སྟེགས་བུའི་སྟེང་ནས་ཞལ་དཀྱིལ་འཁོར་གྱི་ཤར་དུ་ཕྱོགས་པར་བཞེངས། བདག་ཉིད་ཆེ་མཆོག་ནས། གདོན་བགེགས་འཇོམས་པར་མཆོད་དཔོན་ནས་ཕྱག་དྲིལ་ཞུ། ཐོ་ཕུར་ཕུལ། སྟངས་སྟབས་དང་བཅས་གཡས་སུ་བསྐོར་བར་བསྟུན་ཁྲོ་བཅུའི་སྔགས་ལ་གྷ་གྷའི་ལས་སྔགས་བཏགས་པ་སོ་སོའི་སྟེགས་བུའི་སྟེང་ཧཱུྃ་མཛད་ཕུར་བུ་ཤར་གྱི་ཤར་དུ་བཏབ། དེ་བཞིན་དུ་རྣམ་རྒྱལ། གཤིན་རྗེ། རྟ་མགྲིན་འཁྱིལ་བ་རྣམས་ཤར་ནས་བརྩམས་ཏེ་གཡས་བསྐོར་དུ་ཕྱོགས་བཞིར་བཏབ། ཁམས་གསུམ་རྣམ་རྒྱལ་གྱི་ཕུར་བུ་ཐོགས་ནས་སྟངས་སྟབས་གཡོན་དུ་བསྐོར་བྱང་ཤར་དུ་བཏབ། དེ་བཞིན་དུ་འདོད་རྒྱལ་མི་གཡོ་བ། དབྱུག་སྔོན་དང་བཅས་པའི་ཕུར་བུ། ནུབ་བྱང་། ལྷོ་ནུབ། ཤར་ལྷོ་རྣམས་སུ་བཏབ་རྗེས་སྟོབས་ཆེན་ཕུར་བུ་ནུབ་ཀྱི་ནུབ་ཏུ་བཏབ་ནས་ཐོ་བ་ཞུ། ཕྱག་དྲིལ་ཕུལ། ཕྱོགས་བཅུར་ཕུར་བུ་གཏབ་པས་སོགས། སློབ་དཔོན་བྱང་ཤར་ངོས་སུ་ཕེབས། ལས་རྡོར་ཞྭ་གྱོན་གཟན་ཕབ། ལག་གཡས་ཡུངས་ཀར། གཡོན་སྤོས་ཕོར་གུ་གུལ་འཛིན། སློབ་དཔོན་དྲིལ་བསིལ་བཅས་དྲག་སྔགས་སོ་ལྔ་དང་ཧཱུྃ་བཞིའི་སྔགས་ཀྱིས་དཀྱིལ་འཁོར་
བསྐོར་ཞིང་ཐུན་བྲབ་ནས། སྐབས་འདིར་རྒྱལ་ཐོ་དང་། དམ་སྲི་མནན་པ་སྒོ་བྱང་ཕྱི་ནང་མ་ཏྲཾ་བསྒྲལ་བ་སོགས་སྒྲུབ་ཆེན་སྐབས་ལྟར་སྤྲོས་མཛད་ཀྱང་ལེགས་ལ། གནས་སྐབས་ཟོར་ཡང་ཕྱིར་བཏང་སྙོམས་མཛད་ཀྱང་འཐུས། སློབ་དཔོན་ལྡིང་ཁྲིའི་དབུས་སུ་བཞེངས་པ་ཞལ་ཤར་དུ་ཕྱོགས། ཧཱུྃ། ཆེ་མཆོག་འཛིན་པའི་སོགས་ལས་རྡོར་གྱིས་བདུད་རྩི་ལྔ་ཆང་རྒོད་དང་སྦྱར་བའི་དྲི་ཆུའི་སྣོད་ཐོགས་ཤིང་། སློབ་དཔོན་རྡོ་དྲིལ་བཅས། མཎྜལ། ཧཱུྃ་ཞེས་རྡོ་རྗེ་ཁུ་ཚུར་གྱིས་དཀྱིལ་འཁོར་གྱི་གཞིར་བྱང་ཤར་ནས་གཡས་བསྐོར་དུ་ཁྱམས་མེད་པར་འཐོར་ཤིང་བཞུགས་ཁྲིར་ཕེབས། སྣ་སེལ་སྐུ་རིམ་གནས་ཁང་གི་ཕྱོགས་བཞིར། ཤར་དུ་ཤེར་ཕྱིན། ལྷོར་སྟོབས་ཆེན། ནུབ་ཏུ་ལང་གཤེགས། བྱང་དུ་ཏོག་གཟུངས་ཆུ་གཏོར་སཱ་ཙྪ། བཟང་སྤྱོད། ཚོགས་སྐོང་སོགས་བསོད་ནམས་བསྐྱེད་པའི་རིམ་པ་རྒྱས་པ། སློབ་མ་རྣམས་ནས་སྒྲུབ། སློབ་དཔོན་དང་ལས་རྡོར་ཡུམ་དུ་བཏགས་པས་ཐིག་སྐུད་བྱིན་རླབས་གནམ་ཐིག་ས་ཐིག་འདེབས་པ་སོགས་སྤྲོ་ན་བྱས་ཀྱང་རུང་ལ། མ་བྱས་ན་ཡང་འཐུས། མདུན་དཀྱིལ་སྟེང་དུ་རས་བྲིས་བཀྲམ། ཆུ་གཉིས་ཉེར་སྤྱོད་ལྔ་བསྐོར་བཤམ་བྱ། མདོ་བྱང་དུ། འབྲིང་ནི་དལ་དེའི་སྟེང་དུ་ཕྱི་ནང་གི་མཆོད་པ་བཤམས་ལ་རས་ལ་བྲིས་པའི་དལ་ལ་བརྟེན་ཏེ་འཕྲིན་ལས་གཞུང་བཞིན་བྱའོ། །ཞེས་གསུངས་པའི་དོན། སློབ་དཔོན་གྱིས་ཞི་ཁྲོ་སྤྱི་སྔགས་བཟླ་ཞིང་། རྟེན་འབྲེལ་སྙིང་པོས་ནས་འཐོར་བ་མདོ་བྱང་དུ། ལྷ་སྟ་གོན་ལ་གནས་པའི་བསྙེན་པ་བྱེད་པ་སྟེ། ཞེས་དང་། དེ་ལྟར་སྔོན་དུ་བསྙེན་པ་ཅི་འགྲུབ་འདོན་ཞེས་སོ། །དཀྱིལ་
འཁོར་ཡོལ་བས་བསྒྲིབས། དེའི་ཕྱི་རོལ་དུ་ཁྲུས་བུམ་རྡོར་སེམས་ཡིག་དྲུག་བཟླས་པ། བགེགས་གཏོར། མཎྜལ། སོ་ཤིང་མེ་ཏོག་གི་ཚོམ་བུ། སྐྱོར་ཆུ། ཚོན་སྐུད་སྣ་ལྔ་གསུམ་བསྒྲིལ་རྡོ་རྗེའི་མདུད་པ་ཉེར་གཅིག་གམ་གསུམ། སློབ་མའི་གྲངས་མཉམ། ཀུ་ཤ་རིང་ཐུང་རྒྱ་གྲམ་ཕོན་པོ་སོགས་སྟ་གོན་དབང་ཆས་གང་དགོས་ཚོགས་པར་བཤམས། གཉིས་པ་སྟ་གོན་ལ། སློབ་མ་འདུས། མཆིལ་ལྷམ་ཕུད། ཕྱག་དང་ཞེ་སར་བཅས་མདུན་དུ་འཁོད་པ་ལ། བླ་མས་ཁྲུས་དང་། གཏོར་མ་བསྔོ་ཞིང་བགེགས་བསྐྲད་མཚམས་བཅད་པ་སོགས་གསང་བ་སྤྱི་འགྲོས་ལྟར་མཛོད། དབང་བཤད་སྨིན་གླིང་ལོ་ཆེན་གྱིས་མཛད་པ་སྔགས་ཕྱི་ནང་དང་བཀའ་གཏེར་སོགས་དབྱེ་བ་མི་ནོར་བར། བཀའ་བརྒྱད་བཤད་པ་གསུམ་དངོས་ལ། སྟ་གོན་ཁ་བསྒྱུར་ལྟར་མཎྜལ་ཕུལ་བ་སོང་ནས། ཞི་བ་དབང་ནི་ལས་རིམ་ལའང་སྟ་གོན་བཤད་ཀྱང་དེང་སང་མདོ་བྱང་ལྟར་མཛད་པ་འཇུག་པ་བདེ་བས། དེ་ལྟར་མཎྜལ་ཕུལ་བ་སོང་ནས་བླ་མས་སྤྲོ་བ་བསྐྱེད་པའི་ཆོས་བཤད་པ་ནི་གསང་བ་སྤྱི་རྒྱུད་ལས། སྔགས་ཀྱི་དངོས་གྲུབ་སོགས་ནས་འདི་འབྲས་འགྲུབ། དེ་ནས་སློབ་མས་ལྷག་པར་གནས་ཆོ་ག་ཞུ་བ་འདིའི་རྗེས་ཟློས་མཛོད། ཧོཿ བླ་མ་སངས་རྒྱས་ཞི་ཁྲོའི་སོགས། མཛད་དུ་གསོལ། བར་ལན་གསུམ་རྗེས་ཟློས་བྱ། འདི་སོགས་རྗེས་ཟློས་རྣམས་ལན་གསུམ་རེ་དགོས་རྒྱུ། རྡོ་བྲག་རིག་འཛིན་ཆེན་པོས་སླ་ཆོས་ཚར་རེ་བྱེད་པ་དང་། ཚིག་རྗེས་མ་དེ་ལན་
གསུམ་བྱེད་པ་སོགས་མི་རུང་ཞེས་དགག་པ་ནན་ཆེར་གནང་བ་དགོས་དོན་ཆེ་བར་སེམས། དེ་ནས་བླ་མས་གནང་བ་སྦྱིན་པ་ནི། བུ་ཚུར་ཐེག་ཆེན་སོགས། ལྷ་གནས་སྦྱིན་བར། སློབ་མས་དེ་ལྟར་ནུས་པར་ཁས་བླངས་པ་འདིའི་རྗེས་ཟློས་ཀྱིས། ཧོཿ བླ་མས་ཇི་ལྟར་སོགས། ཡན་ལག་བདུན་པ་ཡིན་པས་དེ་བྱ་བ་ལ། ཐོག་མར་མཎྜལ་ཕུལ། དེ་ནས་བདུན་རྣམ་དག་འདི་ཡི་རྗེས་ཟློས་མཛོད། ཧོཿ ཞི་བའི་ལྷ་ཚོགས་སོགས། བཞུགས་པར་གསོལ་བ་འདེབས་བར་ལན་གསུམ་གསང་སྔགས་ཀྱི་རྟེན་དུ་རུང་སོགས། སྡིག་པ་བཤགས་པ་ནི། བདག་ཉིད་ཆེ་མཆོག་ཧེ་རུ་ཀར་གསལ་བའི་ཐུགས་ཀ་ནས་ཡ་ལས་ལྕགས་སྡིག་མགོ་དགུ་རྭ་བཅོ་བརྒྱད་པ་འཕྲོས། དེ་ལས་ཡེ་ཤེས་མེ་འབར་བས་སློབ་མ་རྣམས་ལ་ཕོག་པས། ལུས་ངག་ཡིད་གསུམ་ལ་གནས་པའི་སྡིག་སྒྲིབ་ཐམས་ཅད་བྱ་སྒྲོ་མེས་བསྲེགས་པ་ལྟར་ཚིག་པར་གྱུར། ཨོཾ་བཛྲ་ཡཀྴ་ཀྲོ་དྷ་ཧ་ན་ཧ་ན་ཧཱུྃ་ཕཊ༔ ཞེས་ཟླ་ཞིང་ཡུངས་ཐུན་གཏོར། ཧཱུྃ། ཡང་དག་གསང་བའི་སོགས་དབྱངས་རོལ་བཅས་བགེགས་བསྐྲད། གཉིས་པ་དངོས་གཞི་ལ་གསུམ་སྟེ་སོགས་ནས། སྡོང་གྲོགས་ཞུ་སྙམས་པས་འདིའི་རྗེས་ཟློས་ཀྱིས། དུས་གསུམ་སངས་རྒྱས་སོགས། གཉིས་པ་ཚིགས་བཅད་ལྟར་བྱ་བ་འདིའི་རྗེས་ཟློས་མཛོད། བླ་མ་དཀོན་མཆོག་སོགས། ཡང་དག་པའི་ལམ་ལ་འགོད་པའི་ཕྱིར་འདིའི་རྗེས་ཟློས་མཛོད། བདག་དང་མཐའ་ཡས་སོགས། གཉིས་པ་བླངས་པ་ནི་འདིའི་རྗེས་ཟློས་མཛོད། སྲས་བཅས་སོགས། བརྗོད་པ་ཁས་བླངས་པ་འདིའི་རྗེས་ཟློས་གྱིས། སྡོམ་པ་ཡི་ནི་སོགས། གོང་ལྟར་ལན་གཅིག་བྱ། གསུམ་
པ་བསླབ་བྱ་སོགས། ཐལ་མོ་སྦྱོར་ལ་འདིའི་རྗེས་ཟློས་གྱིས། ཧོཿ བླ་མ་སློབ་དཔོན་སོགས་ནས་ལྷ་ལ་དད་པའི་སེམས་དང་ལྡན་པས་འདིའི་རྗེས་ཟློས་མཛོད། ཧོཿ བླ་མས་བསྒོ་བ་སོགས། འདི་ནས་ཡིག་ཆེ་ཆུང་མི་ཕྱེད་པར་ནར་འདེད་ཀྱིས་བགེགས་སྲུང་ཤོག །སློབ་མས་འདིའི་རྗེས་ཟློས་ཀྱིས། བླ་མས་བསྲུང་སོགས། རྨི་ལམ་ལྟོས་ལ་འདིའི་རྗེས་ཟློས་གྱིས། ཧོཿ བླ་མས་གནང་བའི་སོགས་ཡིད་ལ་བྱེད་བཞིན་པས་ཉོལ་ཅིག །ཅེས་སློབ་མ་རྣམས་གྲོལ། དབང་དངོས་གཞི་རྗེས་སུ་འབྱུང་ཕྱིར་ཁས་བླངས་གཏང་རག་མཎྜལ། དགེ་བསྔོ་སོགས་མཛད་སྲོལ་མེད། སྟ་གོན་འདི་ལ་སྤྱི་ལྟར་མཚམས་སྦྱོར་རྒྱས་སྤྲོས་བྱེད་དུ་ཡོད་ཀྱང་དབང་གཞུང་བྱིན་རླབས་ཅན་ལ་བསྲེ་བསླད་ཀྱི་ཆོ་ག་ཉམས་པའི་རྒྱུར་འགྲོ་དོགས་མཛད་སྲོལ་མི་འདུག་པའང་ཤེས་པར་བྱ། གསུམ་པ་རྒྱན་འགོད་བྱ་བ་ལ། དེ་ནས་སློབ་དཔོན་ཆོས་གོས་གསུམ་པད་ཞྭ་རྡོ་དྲིལ། སྤོས་ཆག །རྒྱལ་ཚབ་སོགས་གྲྭ་མང་ཞྭ་ཆོས་བཅས་སྨན་གྱི་ཕོ་བྲང་། རྡོ་རྗེ་ཡུམ་དུ་བཏགས་པས་གཙོ་བོའི་ཐོད་སྐུ། གཞན་རྣམས་དཔལ་དགུའི་རྟེན་ཐོད། ཁྲོ་བཅུའི་ཕུར་བུ། རལ་གྲི་བཞི། མདའ་དར་མེ་ལོང་ཅན་བཞི། ཚོན་སྐུད། འཕན་བཞི། རྒྱལ་མཚན་བཞི། མར་མེ་དགུ། མ་ཏྲཾ་གཟུགས། བདག་བསྐྱེད་གཏོར་མ། སྨན་རཀ་ཉེར་སྤྱོད་སོགས་ཐོགས་ཏེ་རོལ་མོ་ནང་འབུད་བརྡུང་བཅས་དཀྱིལ་འཁོར་ལན་གསུམ་བསྐོར། སློབ་དཔོན་དཀྱིལ་མདུན་ཁྲིའུར་བཞུགས། སེར་ཕྲེང་མང་མ་བཞེངས་ནས། དཀྱིལ་འཁོར་བསྐོར། འཚོགས་པ་ཐམས་ཅད་
བཞེངས་བཞིན་སྒྲུབ་ཁོག་ནས། ཧཱུྃ། འཕྲུལ་བཞད་ཡིད་བཞིན་སོགས། ཆེ་མཆོག་སྔགས་དབྱངས་ལན་གསུམ་མཐར་སྨན་གྱི་ཕོ་བྲང་ལྡིང་ཁྲི་བར་མའི་དབུས་སུ་བཀོད། དེའི་གཡས་སུ་གཙོ་བོའི་ཐོད་སྐུ། གཡོན་དུ་ཆེ་མཆོག་ཐོད་པ་རྟེན་ཕུར་བཅས་ཞལ་ཤར་དུ་ཕྱོགས་པར་འགོད་པ་སོགས་རྒྱལ་ཚབ་ཏུ་བཏགས་པས་མཛད་པ་འདི་བཞིན་འདྲེས། ཡང་དག་སོགས་དཔལ་བརྒྱད་པོའི་ཐོད་སྐུ་རིམ་བཞིན་སོ་སོའི་སྔགས་དང་བསྟུན། ཕྱོགས་མཚམས་མ་ནོར་བར་ཐོད་པའི་དཔྲལ་བ་དང་། རྟེན་ཕུར་རྣམས་ཞལ་དབུས་སུ་ཕྱོགས་སར་གཡས་བསྐོར་ཁོ་ནས་བཀོད་ཅིང་ནང་ནས་རིམ་པར་མཐིང་དམར་དཀར་བའི་དར་ཡོལ་བྲེས། སློབ་དཔོན་མདུན་དུ་ཅོག་སྟེགས་ལ། ཀ་ཏོ་ར་ལྟ་བུའི་སྣོད་དུ་ཁྲོ་བཅུའི་ཕུར་པ་བཀོད། བདག་གི་ཐུགས་ཀ་ནས་སོགས། དྲག་སྔགས་སོ་ལྔ་ལན་གསུམ་གྱི། དང་པོར་ལས་རྡོར་གྱིས་གུ་གུལ་བདུག །གཉིས་པར་སློབ་དཔོན་གྱིས་ཡུངས་ཀར་བྲབ། གསུམ་པར་སློབ་དཔོན་ཕྱག་གཡོན་སྲིན་ལག་གིས་རཀྟ་བྲན། ཧཱུྃ། ཚངས་ལ་དབང་མཛད་སོགས། ལས་རྡོར་གྱིས་ཕུར་སྣོད་བཟུང་། རྒྱལ་ཚབ་པས་སྔར་ཕུར་གདབ་དུས་བཞིན་སྟེང་དང་ཕྱོགས་བཞི་གཡས་བསྐོར་མཚམས་བཞི་འོག་བཅས་གཡོན་བསྐོར་རྡོ་རའི་སྟེང་དུ་ཕུར་གདན་ལ་བཀོད། ཧཱུྃ། ལོག་རྟོག་སོགས། རལ་གྲི་བཞི་སྟེགས་བུའི་སྟེང་གི་ལྡིང་ཁྲིའི་ཕྱོགས་བཞིར་འཇུག །ཧཱུྃ་མེ་ལོང་སོགས། མདའ་དར་མེ་ལོང་ཅན་བཞི་སྟེགས་བུའམ་ཟུར་བཞིར་མདའ་དར་དཀར་པོ་ཤར་ལྷོ། སེར་པོ་ལྷོ་ནུབ། དམར་པོ་ནུབ་བྱང་། ལྗང་གུ་བྱང་ཤར་དུ་བཙུགས། མཛེས་
པའི་སོགས། མདའ་དར་རལ་གྲི་རྣམས་ཚོན་སྐུད་ཀྱིས་དྲྭ་བས་སྦྲེལ། ཧཱུྃ། དཀྱིལ་འཁོར་ཆེན་པོའི་སོགས། ཕྱོགས་བཞིར་འཕན་བཞི། ཟུར་བཞི་རྒྱལ་མཚན་བཞི་འཛུགས། ཧཱུྃ། སྐྱེ་མེད་ཆོས་དབྱིངས་སོགས། མ་ཏྲཾ་གྱི་མགོ་བོ་ལྷོ། སྙིང་ལྷོ་ནུབ། ལག་གཡོན་ནུབ། རྐང་གཡོན་ནུབ་བྱང་། གསང་གནས་བྱང་། རྐང་གཡས་ཤར། ལག་གཡས་ཤར། གློ་བ་ཤར་ལྷོར་བཀོད། ཨོཾ། ཆོས་དབྱིངས་ཡེ་ཤེས་སོགས། མར་མེ་དགུ་སོགས། དབུས་ཀྱི་མར་མེ་ཤར་ངོས་དང་། གཞན་ཚིག་བསྟུན་ཕྱོགས་དང་མཚམས་སུ་རྟེན་ཐོད་རྣམས་དང་གོ་ས་མཐུན་པར་དར་ཡོལ་གྱི་ཕྱི་ལ་བཀོད། དཀྱིལ་འཁོར་གྱི་ཤར་དུ་ལྕོག་ཙེ་ཁེབས་ལྡན་གྱི་སྟེང་དུ་མེ་ཏོག་བཀྲམ་པར་མཉྫི་ལ་བདག་འཇུག་གི་དབང་གཏོར། གཡས་གཡོན་དུ་སྨན་དང་། རཀྟ། དེའི་མདུན་ནས་རིམ་བཞིན་མཆོད་ཡོན་ནས། ཞལ་ཟས་བར་དཀྱིལ་འཁོར་གྱི་ནུབ་ཏུ་ལྕོག་སྟེགས་ཁེབས་ལྡན་གཞི་རས་བཅས་པའི་སྟེང་། མེ་ཏོག་བཀྲམ་པའི་དབུས་སུ་བདག་བསྐྱེད་ཀྱི་གཏོར་མ། དེའི་གཡས་ནས་རིམ་བཞིན་ལེགས་ལྡན་གཙོ་བོར་བྱས་པའི་ཆོས་སྐྱོང་ཕོ་རྒྱུད་གཏོར་མ། ཕྱག་བཞི། སྡེ་དཔོན་སུམ་ཅུ། རྒྱུན་བཞག་ཆད་ཐོ། ཐོད་གདན་ལ་བདུད་རྩིའི་ཐོད་པར་ཆང་བཟང་པོར་ཨ་མྲ་ཏ་དང་ཆོས་སྨན་བཏབ་པ་ཁེབས་ལྡན་བཅས་བཤམས། བདག་བསྐྱེད་གཏོར་མའི་གཡོན་ནས་རིམ་པར། སྔགས་སྲུང་མར་གཙོ་བོར་བྱས་པའི་མོ་རྒྱུད་གཏོར་མ། ལྷ་ཆེན། དུར་ཁྲོད་བདག་མོ། རྒྱུན་བཞག་བསྟན་མ། ཐོད་གདན་ལ་རཀྟའི་ཐོད་པར་ཆུ་གཙང་རཀྟ་སོ་ལྔ་བཏབ་པ་ལེགས་པར་བཤམས། བྱང་དུ་ལྕོག་སྟེགས་ལ།
ནུབ་བྱང་ནས་རིམ་པར་དྲག་མཆོད་དབང་ལྔའི་མེ་ཏོག །གསུར་ཆེན་སྤོས། ཞུན་ཆེན་མར་མེ། ཨ་མྲ་ཏ་དང་སྦྱར་པའི་དྲི་ཆབ། ཤ་ཆེན་ཞལ་ཟས་རྣམས་བཤམས། བླ་མེད་མཆོག་གི་ནས། བཞེས་སུ་གསོལ། ན་མཿསརྦ་ཏ་ཐཱ་ག་ཏ་བྷྱོ་སོགས། ནམ་མཁའ་མཛོད་ཀྱི་སྔགས་རྒྱ་སེ་གོལ་བཅས་ལན་གསུམ་གྱིས་མཁའ་ཁྱབ་ཏུ་སྤེལ། སྒྲུབ་ཆེན་སྐབས་ལས་ཚན་མངའ་གསོལ་ལ། ལས་རྡོར་ནས་བདུད་རྩི་དྲངས་པ་སོགས་ཡོད་ཀྱང་འདིར་བཏང་སྙོམས་སུ་མཛད། རྒྱལ་ཚབ་པས་ཆས་བཅུའི་སྟོང་ཐུན་སྔོན་འགྲོའི། ཧཱུྃ། དོན་དམ་སྤྲོས་མེད་སོགས་རྗེས་ཟློས་བཅས་ཚིག་བསྟུན། གསོལ་ཚུལ་མཛད། བརྡའ་སྒོ་དབྱེ། བརྡའ་ཕྱག་འཚལ། བསྒྲུབ་ཆེན་སྐབས་འདུས་པ་དབང་མ་ཐོབ་པ་ཡོད་ན་མཆེད་གསར་རྙིང་སྣོན་པ་ཡོད་ཀྱང་འདིར་དབང་ཆེན་སླར་བསྐུར་རྒྱུ་ཡིན་པས་མི་དགོས། ཨོཾ་མ་ཧཱ་བཛྲ་སོགས། རྡོ་རྗེ་གསོར། དྲིལ་བུ་དཀྲོལ། འཁྱུད་རྒྱ་བྱས། རོལ་མོ་བྱིན་རླབས་བརྒྱ་བརྡུང་སོགས་མཛད་ཀྱང་ལེགས་མ་བྱས་ཀྱང་ཆད་པའི་སྐྱོན་མེད། དཀྱིལ་འཁོར་མདུན་དུ་གཡང་གཞིའི་སྟན་གཙང་མའམ། ཡང་ན་ལྕོག་སྟེགས་ཁེབས་ལྡན་གྱི་ཁར། དཔལ་དགུའི་ལྷ་ཕུར་སོ་སོའི་མགུལ་དུ་དར་སྣ་ལྔའི་ཅོད་པཎ་ལ་སོ་སོའི་སྔགས་ཀྱང་བྲིས་པ། དབང་ཕྱུག་ཉེར་བརྒྱད་ཕུར་བུ། བུམ་པ་དགུ་པོ་བུམ་གོས་བཅས་སོ་སོར་ཁུངས་ལྡན་གྱི་བུམ་རྫས་སོ་ལྔ་དང་། དྲི་བཟང་གིས་ཆུས་སུམ་གཉིས་བཀང་བར་ཁ་རྒྱན་སྒྲོ་མདོངས་ལ་སོ་སོའི་སྐུ་ཙག་རྣམས། བདག་འཇུག་གི་གཙོ་ལས་བུམ་པ་བཅས། ཕྱོགས་དང་གོ་རིམ་མ་ནོར་བར་བཀོད་པའི་མདུན་དུ། སློབ་དཔོན་ཞྭ་ཆོས་རྡོར་དྲིལ་བཅས་རྒྱ་
ཁྲིར་བཞུགས། རྒྱལ་ཚབ་ཡར་བཞེངས་སྟབས་བཅས། ཆེ་མཆོག་སྔགས་དབྱངས་ལན་གསུམ་གྱི་དང་པོར་ལས་རྡོར་གྱིས་ཚིལ་ཆེན་དང་། གུ་གུལ་བདུག །གཉིས་པར་སློབ་དཔོན་གྱིས་ཡུངས་ཀར་བྲབ། གསུམ་པར་སློབ་དཔོན་གྱིས་གཡོན་པའི་སྲིན་ལག་གིས་རཀྟ་བྲན། དེ་བཞིན། ཡང་དག་ནས་བཀའ་སྡོད་བར་སོ་སོའི་སྔགས་ལན་གསུམ་རེ་བརྗོད་པར་བདུག་བྲབ་བྲན། རྟེན་དེ་དག་སོགས་ཐམས་ཅད་ཞྭ་བཅས་བཞེངས། བདག་ཉིད་དཔལ་ཆེན་པོ་སོགས། སློབ་དཔོན་ཡར་བཞེངས། ཧཱུྃ། སྤྲོས་མེད་རྟོག་བྲལ་སོགས། རྒྱལ་ཚབ་ནས་བུམ་པ་དང་། ལས་རྡོར་ནས་ཕུར་པ་བསྣམས་པ་འདྲེས་ཞལ་དཀྱིལ་འཁོར་ལ་ཕྱོགས། ཧཱུྃ། དབུས་ནས་རང་བྱུང་སོགས་སྔགས་ལ་ལྡིང་ཁྲི་གོང་མའི་དབུས་སུ་བུམ་པའི་མཆུ་དང་། ཙཀ་ལི་ཞལ་ཤར་དུ་ཕྱོགས་པས་བཀོད། ལས་རྡོར་གྱིས་ཕུར་བུ་རྒྱལ་ཚབ་ལ་ཕུར་པ་ལྡིང་། འོག་མའི་ཕུར་ཁུང་དུ་ཞལ་ཤར་དུ་ཕྱོགས་པར་བཙུགས། དེ་བཞིན་འདོན་བྱ་དང་བསྟུན། ཡང་དག་ནས་དྲག་སྔགས་བར་ཕྱོགས་མཚམས་མ་ནོར་བ་གཙོ་བུམ་བསྐོར་ཏེ་མཆུ་དང་ཙཀླི་དབུས་སུ་བསྟན་ནས་བཀོད། ཕུར་པ་ཡང་གཙོ་ཕུར་བསྐོར་ཏེ་ཞལ་ནང་བསྟན་འགོད། བཀའ་སྡོད་སྔགས་ལ། ལས་རྡོར་གྱིས་དབང་མོ་ཉེར་བརྒྱད་ཀྱི་ཕུར་པ་རྣམས་ཞལ་ནང་དུ་ཕྱོགས་པས། དང་པོ་ཞི་ཕུར་དཀྱིལ་འཁོར་གྱི་ཁྱམས་ལ་ཤར་ཕྱོགས་ཁྱམས་སྟོད་ནས་རིམ་པར་དྲུག་རེ་ཕུར་ཁུང་དུ་བཙུགས། དེ་བཞིན་ལྷོ་ནུབ་བྱང་གི་ཁྱམས་རྣམས་སུ་སོ་སོར་ཕུར་པ་དྲུག་རེ་གཡས་བསྐོར་དུ་བཀོད་རྗེས། ཤར་གྱི་སྒོ་མ་ཞལ་ཕྱིར་བསྟན་ནས་ཤར་
སྒོར་འགོད། དེ་བཞིན་དུ་ཕྱོགས་གཞན་གསུམ་གྱི་སྒོ་མ་ཡང་ཞལ་ཕྱིར་བསྟན་དུ་སོ་སོའི་སྒོར་བཀོད་ཅིང་། འཚོགས་གྲོལ་བས་འཐུས་སོ། །སྐུ་མདུན་དུ་མཎྜལ་ཚོམ་བུ་སོ་བདུན། དབུ་རྒྱན། གཙོ་ལས་བུམ་པ་བདག་འཇུག་ཆས། ཙཀླི། མེ་ལོང་། ཤེལ་རྡོ། ཕུར་པ་གདན་བཅས་ཡུངས་ཐུན་སོགས་འགོད། ལྡིང་ཁྲི་གོང་མའི་སྟེང་གི་བུམ་པ་དགུ་པོར་གཟུངས་རྡོར་བཏགས་པའི་གཟུངས་ཐག་ཁ་དོག་ལྔ་ལྡན་ཅན་སྣེ་མོ་སློབ་དཔོན་ཕྱག་ཏུ་སླེབས་ཚོད་དང་། སྔར་དཀྱིལ་འཁོར་གྱི་ཤར་ཕྱོགས་བདག་འཇུག་གཏོར་མའི་གཡས་ཕྱོགས་དེར། ཉིན་རེ་བཞིན་རྒྱུན་འབུལ་དམ་ཅན་གཏོར་མ། ཆད་ཐོ། གཡོན་ཕྱོགས་སུ་རྒྱུན་འབུལ་བསྟན་མའི་གཏོར་མ། གཞི་བདག་དཀར་གཏོར། གསེར་སྐྱེམས། སྨན་རཀ་ཁར་ཁེམ་ཐུར་སོགས་ཛ་གད་ཀྱི་བུམ་པ་ཁ་རྒྱན་མགུལ་ཆིངས་ཅན་དྲི་བཟང་པོའི་ཆུས་སུམ་གཉིས་བཀང་བ། ཐབས་ཤེས་ཚེ་ཡི་གའུ། ལས་བཞིའི་འབྲང་རྒྱས་མདའ་གདུགས་སེར་པོ་བཙུགས་པ། ཚེ་འབྲང་རྒྱན་ལྡན་བཅས་བཤམས། དཀྱིལ་འཁོར་བྱང་དུ། ཐོད་ནང་དུ་སྤྱིའི་ཐུན་རྫས་ཡུངས་ཀར། མཚེ་ཕོན། གུ་གུལ། ལྕགས་ཧོམ་དུ་ལིངྒ་ཁེབས་ལྡན། བྱང་ཤར་སོགས་སྟབས་བདེར་ལྕོག་སྟེགས་ལ། ཚོགས་གདན་ཞིང་ལྤགས་སམ་སྟག་ལྤགས་ཀྱི་ཁར་ཚོགས་འཁོར་རྫས། ཤ་མཐུད། ཤིང་ཐོག་མངར་གསུམ་ཚོགས་ཆང་མཆོད་ཁེམ། གཞན་ཡང་ཅོག་སྟེགས་ལ་སྔོན་གཏོར་དང་། སྤོས་ཕོར། ལས་རྡོར་གྱི་གཡབ་དར། ལས་བུམ་དྲི་བཟང་ཆུས་བཀང་བ། ཁ་རྒྱན་མགུལ་ཆིངས་ཅན། ཆུ་གཙང་ནས་སོགས།
བདག་འཇུག་གཙོ་བུམ་ཁ་རྒྱན། མགུལ་ཆིངས། གཟུངས་རྡོར་བཅས། བུམ་རྫས་ཉེར་ལྔ་དང་དྲི་བཟང་ཆུས་སུམ་གཉིས་དགང་བར་བྱ། གཞན་ཡང་། ལྷ་ལ་བརྙས་པ་སྤང་བ་དང་། རང་གི་བསོད་ནམས་གསག་ཕྱིར་གནས་ཁང་ལ་གདུགས་རྒྱལ་མཚན། འཕན་བླ་རེ། དར་དཔྱངས། ཕྱེ་འཕུར་སོགས་རྒྱན་སྤྲོས་དང་། སྒྲུབ་པ་པོ་རྣམས་ཁྲུས་དང་གཙང་སྦྲ་གོས་ཟས་ཡོ་བྱད་རྒྱན་སྤྲོས། རོལ་མོ་འབུད་དཀྲོལ། ཆོ་ག་དབྱངས་རོལ་ཕྱག་ལེན་སོགས་མཐོང་བརྒྱུད་ལྟར་རྒྱས་པར་མཛད་དགོས་སོ། །༈ ཉིན་གཉིས་པ་ནས་རིམ་པར། བཞི་པ་དབང་བསྒྲུབ་དངོས་གཞི་ཉིན་བསྟར་མཛད་རྒྱུར། ལས་བྱང་རྒྱས་འབྲིང་སོགས་ཆོ་ག་གཏེར་གཞུང་རྒྱས་པ་ལ་མངའ་བདག་ཉང་གི་ཞལ་གཟིགས་རྗེས་སུ་གནང་བ་ཐོབ་པས་སྨིན་གླིང་གཏེར་བདག་གླིང་པའི་ལས་བྱང་བདེ་བ་ཆེན་པོའི་རྣམ་རོལ་ཆོག་བསྒྲིགས་མཛད་པ་ལྟར་ཕྱག་ལེན་བདེ་བས་བརྒྱུད་འདེབས་མཐར་རོལ་མོ་བརྒྱ་བརྡུང་རྒྱས་བསྡུས་རེས་མོས་སྔོན་གཏོར་བཏང་། ཡན་ལག་བརྒྱད་པ་རྡོར་སེམས་སྒོམ་བཟླས། བགེགས་གཏོར་བསྔོ་བ། མཚམས་གཅོད། བརྡའ་སྒོ་དབྱེ་བ། བརྡའ་ཕྱག་འཚལ་བ། བཤགས་མཐར་ཐལ་སྦྱར་བཅས་ཡེ་ཤེས་སྐུ་མཆོག་བཏང་། དམ་བཅའ་བ་སློབ་དཔོན་དང་ལས་རྡོར་ཞྭ་ཡོད་གཡབ་དར་བཅས་བྱིན་འབེབས་མཐར་རྒྱུད་གསུམ་རོལ་མོ་བཤུག་པ་ཌཱ་དྲིལ་རྐང་གླིང་བཅས། མཆོད་པ་བྱིན་རླབས། ཏིང་འཛིན་
རྣམ་གསུམ། གཞལ་ཡས་ཁང་དང་གདན་ལྷ་བསྐྱེད། དབང་བསྐུར་རྒྱས་གདབ། སྤྱན་འདྲེན་ལ་སློབ་དཔོན་དང་ལས་རྡོར་ཞྭ་ཡོད། གཡབ་དར། བཞུགས་གསོལ། ཕྱག་འཚལ། སྨན་མཆོད་ལ་སློབ་དཔོན་དང་ལས་རྡོར་སྨན་སྔགས་བསྟུན་འབུལ་ བ་དངོས་གྲུབ་བློངས། མཆོད་པ་བླ་གྲྭ་ཚང་མས་ཕྱག་རྒྱ་དབྱངས་རྟ་སྦྱར། བསྟོད་པའི་བར་བཏང་། བཟླས་པ་ལ་འདིར་སྒྲུབ་ཆེན་མི་འབྲེལ་བས་འཛབ་བསྐུལ་སོགས་མི་མཛད། ལས་བྱང་ལྟར་ལ་ཞི་བ་སྤྱི་སྔགས། ཁྲོ་བོ་སྤྱི་སྔགས་སོ་སོར་ལྔ་བརྒྱ་རེ། ཆེ་མཆོག་སྟོང་། ཡང་དག་ནས་ཕུར་པའི་བར་ལྔ་བརྒྱ་རེ། མ་མོ་ནས་དྲག་སྔགས་བར་སུམ་བརྒྱ་རེ། བཀའ་སྡོད་བརྒྱ། དྲག་སྔགས་སོ་ལྔ་ལྔ་བཅུ་ལས་རྡོར་སྤྱིའི་ཐུན་རྫས་དང་། སློབ་དཔོན་མདུན་ཐུན་རྫས་གྲལ་བསྐོར་སོ་སོར་མཚམས་རྣམས་སུ་སྟོང་ཚིག་གི་མཆོད་པ་སྨན་འཐོར་མཆོད་སིལ་རྔ་བཅས། དཀར་དུང་། རྒྱ་གླིང་། དུང་ཆེན། ཌཱ་དྲིལ་བྱ། ཚེ་འཛབ་བྱ། སྒྲུབ་ཁོག་ནས་བུམ་པ་རང་བྱུང་གི་སོགས། ལས་རྡོར་དཀྱིལ་འཁོར་སྟེང་གཟུངས་ཐག་མེ་ཏོག་འཐོར་ནས་པད་ཀོར་གྱིས་བློངས། སླར་པད་ཀོར་གྱིས་སློབ་དཔོན་ལ་འབུལ། སློབ་དཔོན་གྱིས་ནས་འཐོར་ཞིང་པད་ཀོར་གྱིས་བློངས། སྐུ་མདུན་གྱི་བདག་འཇུག་གཙོ་བུམ་ཁར་བཞག་པའི་གཟུངས་ཐག་སྣེ་མོ་བཅས་ཕྱག་གཡོན་པས་བཟུང་ལ་ཞི་བ་སྤྱི་སྔགས་དང་། ཁྲོ་བོ་སྤྱི་སྔགས་ལ་སྐུ་གསུང་ཐུགས་སྔགས་བཏགས་པ་སུམ་བརྒྱ་རེ་བཟླས། གཟུངས་ཐག་རིང་བ་ལས་རྡོར་ནས་བསྡུ། གཟུངས་ཐག་ཆུང་བའི་གཟུངས་རྡོར་སློབ་དཔོན་གྱིས་ལས་བུམ་ཁར་སྤོས་ཏེ། ཨོཾ་བཛྲ་ས་ཏྭ་ཨཱཿ ཞེས་སྐད་ཅིག་གིས་
ལས་བུམ་དུ་རྡོར་སེམས་བསྐྱེད། ཡིག་བརྒྱ་ལྔ་བཅུ། ཡིག་དྲུག་བརྒྱ་རྩ་བཟླས་ཏེ་འཇོག །ལས་རྡོར་ནས་སྣོད་སོ་སོར་ཚོགས་ཕུད་རིམ་པ་གསུམ་དུ་སྤྲོས། ཟུར་དུ་བསྒྲལ་བའི་ཉ་བོ་ཡོད་ན་དང་། མེད་ན་ཚོགས་ཟན་དུམ་གཅིག་བཅད་པ་བཤམས། སློབ་དཔོན་སོགས་མཆེད་རྣམས་ལ་ཚོགས་རྫས་ལོངས་བར་གཏུབ། བསྒྲལ་བ་མ་གཏོགས་པའི་ཚོགས་རྫས་རྣམས་ལ་ཚོགས་ཆང་བྲན། སྒྲོན་ཐུར་གྱིས་སློབ་དཔོན་མདུན་གྱི་ནང་མཆོད་ནས་ཅུང་ཟད་བཅུས་པ་དང་། ལས་བུམ་གྱི་ཆུ་སྒྲོ་མདོངས་ཀྱིས་བླངས་ནས་སོ་སོར་བྲན། ཚོགས་བྱིན་རླབས་ཞུ། ཚོགས་བྱིན་རླབས་ནས་ཞལ་སྟབས་བར་སོང་། སྐབས་འདིར་སྒྲུབ་ཁོག་ལྟར་བདག་འཇུག་རྒྱས་པར་ལེན། གཏོར་བསྔོ་དམ་ཅན་སྤྱི་གཏོར་བསྡུས་པ། སྡེ་དཔོན་སུམ་ཅུ། གཏེར་གཞི་བཅས་བཏང་། གཏོར་བསྔོ་སྐབས་ལས་རྡོར་ནས་ཚོགས་དྲངས། ལྷག་མ་བསྡུ། ཆུ་གཏོར་བརྒྱ་རྩ་གཏོང་མཁན་ཟུར་དུ་ཡོད་ན་དེས་ཆ་གསུམ་བཏང་ཡང་། མེད་ན་སློབ་དཔོན་ཞྭ་ཆོས་བཅས་འཚོགས་མང་སྒྲུབ་ཁང་ཕྱིར་བྱོན་ནས། ཞྭ་རྡོར་དྲིལ།༼མཆོད་སིལ་རྔ།༽ དཀར་དུང་བཅས་ཆ་གསུམ་བཏང་བའམ། ནང་ནས་བཏང་ཡང་རུང་བར་མཛད། ལྷག་མ་ཕྱག་ལེན་ལྟར་བཏང་། གོང་དུ་བདག་འཇུག་མ་སོང་ན་འདིར་རིག་པའི་མེ་ཏོག་དོར། སློབ་མ་འཇུག་པར་གནང་བ་ཞུ་དགོས། བདག་འཇུག་བླངས་ན་མི་དགོས། དབང་ཡོལ་རྒྱབ་སློབ་མ་འཚོགས་བརྡའ་བཏང་། རྩ་བའི་ས་བཅད་གསུམ་པ་དབང་དངོས་ལ། བླ་མ་གོང་མ་རྣམས་ཀྱི་གསན་
ཡིག་ཏུ། ཕྱི་རས་བྲིས་ཀྱི་དཀྱིལ་འཁོར་དུ་བུམ་དབང་བརྒྱ་རྩ་བརྒྱད་ནང་ལུས་ལ་བརྟེན་ནས་ལྷ་དབང་བཞི་བརྒྱ་དང་སུམ་ཅུ། བྱང་ཆུབ་ཀྱི་སེམས་ལ་བརྟེན་ནས་གསང་དབང་ཙམ། གསང་བ་བྷ་གའི་དཀྱིལ་འཁོར་ལ་བརྟེན་ནས་གསང་དབང་དངོས་དང་། རྡོ་རྗེ་སློབ་དཔོན་གྱི་དབང་ལ། བསྟན་ཅིང་འཛིན་པའི་དབང་། འཆད་ཅིང་སྟོན་པའི་དབང་། སྒོམ་ཞིང་སྒྲུབ་པའི་དབང་། མཆོད་ཅིང་བསྟོད་པའི་དབང་། ཕྲིན་ལས་འགྲོ་བ་འདུལ་བའི་དབང་། རྡོ་རྗེ་རྫོགས་པའི་དབང་། ལྟ་བ་སྤྱི་འབྱམས་ཀྱི་དབང་། དེ་ལ་སོགས་པ་ཕྲ་ཞིབ་ཀྱི་དབང་དང་། རྫས་དབང་སུམ་ཅུ་སོ་ལྔ། གྲུབ་པ་ལུང་གི་དབང་། རྣལ་འབྱོར་རྒྱུན་གྱི་དབང་། བཀྲ་ཤིས་ཚེའི་དབང་རྣམས་ཞེས་གསུངས་པ་ཙམ་འདུག་པ་ཁུངས་དག་ཡིན་ཕྱིར་མཁའ་ཀློང་ཡངས་པའི་ཆོག་བསྒྲིགས་མདོ་བྱང་བདེ་ཆེན་གསལ་བ་ལྟར་བསྐུར་བ་ལ། སློབ་མ་རྣམས་གྲལ་ལ་འཁོད། ཇི་ལྟར་བལྟམས་པ་སོགས་ཁྲུས་དང་། ཡིག་བརྒྱ་བཟླས། ཨོཾ་བཛྲ་ཨ་མྲ་ཏས་བགེགས་གཏོར། སྭ་བྷཱ་ཝས་སྦྱངས། སྟོང་པའི་ངང་ལས་བྷྲཱུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཁ་དོག་དྲི་རོ་ནུས་པ་ཕུན་སུམ་ཚོགས་པར་གྱུར། ཨོཾ་ཨཱཿ ཧཱུྃ། རྒྱ་བཅས། ཨོཾ་ན་མཿ སརྦ་ཏ་ཐཱ་ག་ཏེ་བྷྱོ་སོགས་ལན་གསུམ་སེ་གོལ་བཅས། ན་མོ། རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། གསང་སྔགས་རིག་སྔགས་གཟུངས་སྔགས་སྙིང་པོ་ཕྱག་རྒྱ་བཟླས་བརྗོད་ཏིང་
ངེ་འཛིན་གྱི་བདེན་པ་དང་། ཆོས་ཉིད་གདོད་ནས་སྟོང་ཀྱང་ཆོས་ཅན་རྒྱུ་འབྲས་བསླུ་བ་མེད་པའི་བདེན་པ་དང་། ཁྱད་པར་བཅོམ་ལྡན་འདས་བདེ་གཤེགས་སྒྲུབ་པ་བཀའ་བརྒྱད་དཀྱིལ་འཁོར་གྱི་ལྷ་ཚོགས་འཁོར་དང་བཅས་པ་རྣམས་ཀྱི་བདེན་པ་དང་། བདེན་པ་ཆེན་པོའི་བྱིན་རླབས་ཀྱིས། དེང་འདིར་རྡོ་རྗེའི་སློབ་མ་རྣམས་ལ་དབང་བསྐུར་གྱི་ཆོ་ག་ཟབ་མོ་སྒྲུབ་པར་བྱེད་པ་ལ་བར་དུ་གཅོད་པའི་བགེགས་ཚོགས་ཐམས་ཅད་གཏོར་མ་འདིས་མགུ་ཞིང་ཚིམ་པར་གྱིས་ལ་འདིར་མ་གནས་པར་གཞན་དུ་དེངས་ཤིག །གལ་ཏེ་མི་འགྲོ་ན་ཁྲོ་བོའི་ཡེ་ཤེས་ཀྱི་རྡོ་རྗེའི་མེ་རབ་ཏུ་འབར་བ་འདིས་མགོ་བོ་ཚལ་བ་བརྒྱར་འགས་པར་འགྱུར་ཏ་རེ། སུམ་བྷའི་སྔགས་དང་དྲག་སྔགས་སོ་ལྔ་ཡུངས་ཐུན་གུ་གུལ་བདུག །དྲིལ་བསིལ་བཅས་བགེགས་སྤྲད། ཨོཾ་བཛྲ་རཀྵ་རཀྵ་ཧཱུྃ། ཞེས་བརྗོད་པས་སྟེང་འོག་ཕྱོགས་མཚམས་ཐམས་ཅད་རྡོ་རྗེའི་རྭ་བ་དྲྭ་བ་གུར་བླ་བྲེ། ཡེ་ཤེས་ཀྱི་མེ་དཔུང་འབར་བས་མཚམས་བཅད་དེ་ཅིས་ཀྱང་མི་ཤིགས་པར་གྱུར། ཅེས་བརྗོད། སྤྲོས་བཅས་ལྟར་ན་སློབ་དཔོན་སྔགས་ཆས་ཞུགས་རྒྱ་ཁྲིར་བཞུགས། གྲྭ་ཚང་རྔ་རོལ་འབུད་བརྡུང་བཅས། བདེ་གཤེགས་འདུས་པའི་དཀྱིལ་འཁོར་དུ་སོགས་དབྱངས་རོལ། མཚམས་བཅད་མི་བཟད་ཁྲོ་གཏུམས་བཅས་མཛད་པའི་ཕྱག་ལེན་གནང་། ལས་རྡོར་མེ་ཏོག་བཀྱེ་བསྡུ་བྱ། འོ་ན། ནམ་མཁའ་དང་མཉམ་པའི་སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་པར་བྱ། དེའི་ཆེད་དུ་སྒྲུབ་ཆེན་བཀའ་བརྒྱད་བདེ་གཤེགས་འདུས་པའི་དཀྱིལ་འཁོར་དུ་དབང་བསྐུར་ཟབ་
མོ་ལེགས་པར་གསན་འཚལ། དེ་ལ་གང་གསན་པར་བྱ་བའི་ཆོས་ནི་དབང་གི་མདོ་བྱང་ཆེན་པོ་འདི་ལ་སྤྱི་དོན་གསུམ་སྟེ། སོགས་ནས། ས་མ་ཡ་ཨ་བྷི་ཥིཉྩ་རྒྱ་རྒྱ་རྒྱ༔ བར་བརྗོད། དེ་ལྟར་སྒྲུབ་ཆེན་བཀའ་བརྒྱད་བདེ་གཤེགས་འདུས་པ་མངའ་བདག་ཉང་གི་ཟབ་གཏེར་དུ་བྱོན་པ་གནམ་ལ་རིག་འཛིན་བརྒྱུད་པའི་གྲལ་མ་ཞིག་ས་ལ་དཀྱིལ་འཁོར་བསྒྲུབ་པའི་བཀྲག་མ་ཡལ། བར་དུ་སྨན་རཀ་བདུད་རྩིའི་མཚོ་མ་སྐམ། དམ་ཉམས་དང་འདྲེས་ཁྱེར་གྱི་ལྷད་མ་ཞུགས་པ་སྙན་བརྒྱུད་ཚད་མ་བཞི་ལྡན་གྱི་ཕྱག་བཞེས་ལྟར་དབང་བསྐུར་ཟབ་མོ་སྒྲུབ་པར་བྱེད་པ་ལ་རྡོ་རྗེ་སློབ་དཔོན་གྱི་བྱ་བ་དཀྱིལ་འཁོར་སྒྲུབ་ཅིང་བདག་འཇུག་བླངས་པ། སློབ་མ་འཇུག་པར་གནང་བ་ནོད་པ་སོགས་སྔོན་དུ་སོང་གྲུབ་པ། ད་སློབ་མ་རྣམས་ཀྱི་ངོ་སྐལ་དུ་གྱུར་པ་དབང་བསྐུར་ཟབ་མོ་ཞུ་བའི་ཡོན་དུ་མཎྜལ་ཕུལ། ཞེས་བརྗོད་མཎྜལ་ཕུལ། དེ་ལྟར་མཎྜལ་ཕུལ་བ་སོང་ནས་གནང་བ་སྦྱིན་པ་ནི། རིགས་ཀྱི་བུ་ཁྱོད་ཐེག་པའི་དོན། རྡོ་རྗེ་ཐེག་པའི་སོགས། གསང་སྔགས་ཀྱི་ཚུལ་ལ་འདུན་པས་སྒྲུབས་ཤིག །བར་དེ་ནས་ཡུལ་ཐུན་མོང་མ་ཡིན་པ་རྒྱལ་བ་ཞི་ཁྲོའི་སོགས། སྡོང་གྲོགས་ཞུ་སྙམ་པས་འདིའི་རྗེས་ཟློས་མཛོད། དུས་གསུམ་སངས་རྒྱས་ཐམས་ཅད་ཀྱི་སོགས། དགེ་འདུན་ལ་སྐྱབས་སུ་མཆིའོ་བར་ལན་གཅིག །བླ་མ་དཀོན་མཆོག་ལན་གསུམ། དེ་ལྟར་སྐྱབས་སུ་སོང་བའི་ཕན་ཡོན་དཔག་ཏུ་མེད་པ་སོགས། ཡང་དག་པའི་ཕྱིར་འདིའི་རྗེས་ཟློས་མཛོད། བདག་དང་མཐའ་ཡས་སེམས་ཅན་རྣམས། །
སོགས་ནས། དེ་ལྟར་ཏིང་འཛིན་རིམ་བཞིན་བསྒོམ། །ཞེས་ལན་གཅིག །སྲས་བཅས་སངས་རྒྱས་སོགས་སེམས་ཅན་མྱ་ངན་འདས་ལ་འགོད། ལན་གསུམ། དེ་ལྟར་བྱས་པའི་ཕན་ཡོན་བསམ་གྱིས་མི་ཁྱབ་སྟེ། མདོར་བསྡུ་ན་སོགས། བསླབ་སྟེ་གསུམ་དུ་འདུས་སོ། །བར་སྟ་གོན་ལྟར་བརྗོད། དེ་ནས་དབང་དངོས་གཞི་ལ་ཐོག་མར་དཀྱིལ་འཁོར་དུ་འཇུག་པའི་ཕྱིར་ཆས་སུ་འཇུག་པ་ནི། སྔོན་ཆད་གཉིས་འཛིན་གྱི་ཞེན་རྟོག་འཐུག་པོས་མིག་ལྡང་སྟེ། དཀྱིལ་འཁོར་གྱི་ལྷ་ཚོགས་མ་མཇལ་བའམ་མཇལ་ནའང་དཀྱིལ་འཁོར་སོ་མ་འདི་ཉིད་ལ་ཡང་བསྐྱར་འཇུག་པའི་བརྡར་མིག་དར་འཆིང་མཛོད། ཧཱུྃ་སརྦ་སྭ་ཏ་ཡ་ཧཱུྃ། ཨ་ཁཾ་བྷི་ར་ཧཱུྃ། དཀྱིལ་འཁོར་གྱི་ལྷ་དང་མཇལ་བའི་ཚེ་ཕྱག་སྟོང་པར་མཇལ་དུ་མི་རུང་བས་ཕྱག་རྟེན་དུ་མེ་ཏོག་གི་ཕྲེང་བ་ཟུངས་མཛོད། ཨོཾ་པུཥྤེ་རཏྣ་མཱ་ལྱེ་ཏྲཾ། ཆས་སུ་ཞུགས་པ་ནི། སྤྱི་བོར་གཙུག་ཏོར་དུར་བའི་ཐོར་ཅོག་སྦྱིན་ཞིང་། ཨིུཥ་ཙ་དྷ་ཎ་སོགས་ནས་ཡིག་ཆུང་མི་ཕྱེ་བར་ནར་འདེད། ཨ་ལ་ལ་ཧོཿ བར་བརྗོད། དེ་ནས་གསོལ་བ་གདབ་པ་འདིའི་རྗེས་ཟློས་གྱིས། ཧོཿ བླ་མ་དུས་བཟང་སོགས། མགྲིན་གཅིག་ཏུ་འདིའི་རྗེས་ཟློས་མཛོད། ཧོཿ དགོངས་སུ་གསོལ་ལོ། །བདག་ཅག་འདིར་འདུས་ཤིང་སོགས། སློབ་མས་དེའི་ལན་གདབ་པ་འདིའི་རྗེས་ཟློས་མཛོད། ཀྱེ། དཔལ་ཆེན་བདག་ཅག་སོགས། འདུན་པ་ཡང་ཡང་བྱས་ལ་འདིའི་རྗེས་ཟློས་མཛོད། ཨོཾ། གདོད་མའི་དབྱིངས་སོགས། གྲོང་དུ་ཕྱིན་པར་ཤོག །དབང་བསྐུར་བ་ནི་དམ་ཚིག་ལ་བརྟེན་ནའང་། དབང་འཛིན་པ་ནི་སྡོམ་པ་ལ་རག་ལས་
པའི་ཕྱིར། ཧོཿ རྫོགས་སངས་རིན་ཆེན་དག་པའི་སེམས་ཉིད་ངང་། །སོགས། ཐར་པའི་སྒོ་ནི་དབྱེ་བར་བགྱི། དེ་བསྟན་པར་བྱ་བ་ནི། སློབ་མའི་གནས་གསུམ་དུ་དྲིའི་ཐིག་ལེ་བྱས་ལ། ཟླ་བ་དང་སོགས། ཙིཏྟ་བཛྲ་སྭ་བྷཱ་ཝ་ཨཏྨ་ཀོ྅ཧཾ། ཡེ་ཤེས་དབབ་པ་ནི། གསོལ་བ་གདབ་པ་འདིའི་རྗེས་ཟློས་མཛོད། བྱང་ཆུབ་རྡོ་རྗེ་སངས་རྒྱས་ཐམས་ཅད་ལ། །སོགས། བསྟན་དུ་གསོལ། ལན་གསུམ་ཞུ། ཨོཾ་བཛྲ་ས་ཏྭ་ཨཱཿ ས་བསངས། སྭ་བྷཱ་ཝས་སྦྱངས། སྟོང་པའི་ངང་ལས་སློབ་མ་རྣམས་སྐད་ཅིག་གིས་སྣང་བ་མཐའ་ཡས། སོགས། ཛྷཻ་ཾསྭཱ་ཧཱཿ རོལ་མོ་འབུད་དཀྲོལ། གུ་གུལ་བདུག །ཐོད་རྔ་དཀྲོལ། མི་རྐང་གླིང་བུ་འབུད། དེ་ལྟར་བྱིན་དབབ་པའི་ཡེ་ཤེས་པ་རྣམས་ཁྱོད་རང་དང་རོ་གཅིག་ཏུ་གྱུར་པའི་མོས་པ་མཛོད། ཏིཥྛ་བཛྲཿ ཞེས་སྤྱི་བོར་རྡོ་རྗེ་བཞག །ནས་འཐོར། དེ་ནས་ལྷོ་སྒོ་ནས་ཕྱག་འཚལ་བ་འདིའི་རྗེས་ཟློས་མཛོད། ཧོཿ དཀྱིལ་འཁོར་དགུ་ཡི་སོགས། མེ་ཏོག་ཁ་དོག་འཕྲེང་བར་བརྒྱུས་ལ་འདིའི་རྗེས་ཟློས་མཛོད། ཧོཿ དཀྱིལ་འཁོར་ལྷ་ཚོགས་དྲུང་ན་སོགས་མིག་དབྱེ་ཞིང་ལྷ་ངོ་བསྟན་པ་འདིའི་རྗེས་ཟློས་མཛོད། ཧོཿ དུས་བཟང་དེང་སོགས། སློབ་མས་ཞུ་བ་འདིའི་རྗེས་ཟློས་མཛོད། ཧོཿ ཇི་ལྟར་ལྷ་ཡི་སོགས། མ་བསྒོམས་པར་སངས་རྒྱས་པར་འགྱུར་རོ། །བླ་མ་ལ་ལུས་འབུལ་ཞིང་དམ་ཚིག་བསྲུང་བ་སོགས། བླ་མ་དང་ལྷ་ལ་འབུལ་བ་འདིའི་རྗེས་ཟློས་མཛོད། དངོས་གྲུབ་རྩོལ་ཕྱིར་སོགས། རྡོ་རྗེ་དམྱལ་བར་ལྟུང་། དེ་ནས་ཕྱི་དབང་རྫས་ལ་བརྟེན་ནས་དབང་བསྐུར་བ། སོགས་ནས། གསོལ་བ་གདབ་པ་འདིའི་རྗེས་ཟློས་མཛོད། བྱང་ཆུབ་རྡོ་རྗེ་སངས་རྒྱས་ལ། །སོགས། ཨ་ཝེ་ཤ་ཡ་
ཨ་ཨཱཿ ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ་སོགས། ལྔ་པ་ཕྱག་རྒྱའི་དབང་གཉིས་ཏེ་སོགས་ནར་འདེད། དབུ་རྒྱན་ནས་བཟུང་རྣམ་པར་སྣང་མཛད་མིང་དབང་གི་དབང་རྫོགས་པར། རིགས་ལྔ་སོ་སོའི་སྔགས་ཀྱི་གཙོ་བོ་བྱས་ཏེ། དེ་རྗེས་བུམ་དབང་། བུམ་པ། གཞལ་ཡས་ཁང་། བུམ་ཆུ། འབྲུ། སྨན། སྤོས། རིན་ཆེན། སྙིང་པོ། ཁ་རྒྱན། མགུལ་ཆིངས། གཟུངས་ཐག་བཅས། རྒྱལ་སྲིད་སྣ་བདུན་བཅས་ཡང་བསྐྱར་སོ་སོར་སྦྱར་དགོས་པས་རིམ་བཞིན། ཞི་དབང་མཇུག་སྨོན་བཞིན་དུ་བླ་མ་དང་སློབ་མ་གཉིས་ཀས་བགྱི་བ་གཅེས་སོ། །དེ་མཐར་བཀྲ་ཤིས་བརྗོད། དམ་ཚིག་ཁས་བླངས། ལུས་དབུལ་བ། གཏང་རག མཎྜལ། དགེ་བསྔོ་བྱས། སློབ་མ་གྲོལ། དེ་རྗེས་ན་རག་སྐོང་བཤགས་གཏོང་། གཏོར་འབུལ། བསྐུལ་ཆད་ཐོ། བརྟན་མ། རྟ་བྲོ། མཆོད་བསྟོད། ཡིག་བརྒྱ། བཟོད་གསོལ། རས་བྲིས་བརྟན་བཞུགས་ཉེར་བསྡུ། ལྷར་ལངས། གོ་བསྒོ། སྨོན་ལམ་བཀྲ་ཤིས་རྒྱས་པར་བྱའོ། །༈ ཉིན་གསུམ་པ་དང་བཞི་པ་ལ། ལས་བྱང་སོགས་ཉིན་གཉིས་པ་སོར་གནས་བྱ། ཉིན་གསུམ་པར་དབང་གི་སྐབས། ཁྲུས་བགེགས་གཏོར་བཏང་ཞིང་བགེགས་སྐྲོད། མཚམས་བཅད། ཆོས་བཤད་བསྡུས་ཙམ་ནས་མཎྜལ་འབུལ་བ་བར་བྱ། དེ་ནས་གསོལ་བ་གདབ་པ་སོགས་སྒྲུབ་ཁོག་གི་བདག་འཇུག་ཁ་བསྒྱུར། ཞི་བ་རིགས་བཞིའི་དབང་གི་མཇུག་བར་ནར་འདེད། དེ་ནས་མདོ་བྱང་བདེ་ཆེན་
གསལ་བའི་དབང་གི་འཕྲོ་ནས། གཉིས་པ་ནང་ཁྲོ་བོའི་དབང་བསྐུར་བ་ལ་དྲུག་སྟེ་སོགས་ནར་དེད་བྱས། ཕུར་པའི་ལྷ་ཚོགས་རྫོགས་པར་བསྐུར། དེ་རྗེས་སྒྲུབ་ཁོག་བདག་འཇུག་ནས་བཟླས་ལུང་ནས་ཕུར་པ་གཏད་པའི་བར་ཁས་བླངས་ལ་ལུས་འབུལ། གཏང་རག་དགེ་བསྔོ་བྱ། ༈ ཉིན་བཞི་པ་ལ་སྔར་ཉིན་ལྟར་ལས། བདག་འཇུག་ལྷ་དབང་གི་ཕུར་པ་བར་བསྐུར། དེ་ནས་མདོ་བྱང་བདེ་ཆེན་གསལ་བའི། བདུན་པ་མ་མོ་རྦོད་གཏོང་གི་ལྷ་ཚོགས་ཀྱི་དབང་བསྐུར་བ་ནི། ཞེས་པ་ནི་ནར་འདེད། མཁའ་གསང་བྱིན་གྱིས་བརླབས་པའོ། །དེ་ལ་ཐོག་མར་མཎྜལ་ཕུལ། དེ་ནས་གསོལ་བ་འདེབས་པ་འདིའི་རྗེས་ཟློས་མཛོད། བཅོམ་ལྡན་ཞི་བ་སོགས། བླ་མ་ལ་ཕུལ་ལ་འདིའི་ རྗེས་ཟློས་མཛོད། ཨེ་མ་ཧོཿ རྣལ་འབྱོར་ཡོངས་ཀྱི་སོགས་ནས་ནར་འདེད་ལ་ཉན་དབང་སོགས་ལྔ་ལས། གཞལ་ཡས་ཁང་གྲུ་བཞི་སྒོ་བཞི་རྟ་བབས་དང་བཅས་པའི་ནང་དུ། ཞེས་དང་། བླ་མ་ཀུན་བཟང་ཡབ་ཡུམ་དུ་གསལ་བའི་སྦྱོར་མཚམས་ནས་འོད་ཟེར་འཕྲོས་པས། གོང་དུ་བསྐྱེད་པའི་ལྷ་རྣམས་རྒྱལ་ཕོག །སྦྱོར་བའི་བརྡས་བསྐུལ་ནས་སྙོམས་པར་ཞུགས་པས། ཞེས་པ་འདི་རྣམས་འདྲིས་ཤེས་དགོས། ཤེས་རབ་ཡེ་ཤེས་ཀྱི་དབང་ལ་མཎྜལ་ཕུལ། གསོལ་བ་བཏབ་པ་འདིའི་རྗེས་ཟློས་གྱིས། མགོན་པོའི་སྤྲུལ་སོགས། ཧོཿ གཉིས་མེད་སོགས་ནས་ནར་འདེད། དེ་ཁོ་ན་ཉིད་
སེམས་ལ་བརྟེན་ནས་བསྐུར་བ་ལ་མཎྜལ་ཕུལ། གསོལ་བ་འདེབས་པ་འདིའི་རྗེས་ཟློས་མཛོད། ཧོཿ ཁྱོད་ཞབས་པདྨོའི་སོགས་ནས་བག་ཆགས་རྒྱུད་ལ་གཞག་པར་བྱའོ། །བར། ཡོན་དབུལ་བ་ནི། ལུང་ལས། རྒྱལ་སྲིད་དང་ནི་སོགས། མདོ་བྱང་ཆེན་མོ་རྫོགས་སོ་བར་བརྗོད། དེ་ནས་ནམ་མཁའ་ལ་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཤིས་བརྗོད་ཀྱི་མེ་ཏོག་ཆར་བཞིན་དུ་དབབ་པས་དབང་གི་ཡེ་ཤེས་སྔར་མ་བསྐྱེད་པ་བསྐྱེད་ཅིང་། བསྐྱེད་པ་མི་ཉམས་པར་རབ་ཏུ་བརྟན་པའི་མོས་པ་མཛོད། ཨོཾ་ཡེ་དྷརྨཱ་སོགས། ཡང་དག་འཇམ་དཔལ་སོགས། བྱིན་རླབས་མཆོག་སོགས། དམ་ཚིག་ཁས་བླངས། ལུས་འབུལ་བ། གཏང་རག་མཎྜལ། དགེ་བསྔོ་བྱས། སློབ་མ་གྲོལ་བའོ། །ཉིན་གསུམ་བཞིར་དབང་ཁོག་རྣལ་འབྱོར་རྒྱུན་དབང་བྱས་པ་ཡིན་པས་ཟུར་དུ་བསྐུར་མི་དགོས། ༈ ཉིན་ལྔ་པར། བཀའ་བརྒྱད་ལས་བྱང་བསྙེན་པ་བུམ་བཟླས་བཅས་གཏོར་བསྔོ་སྡེ་དཔོན་སོགས་གཏེར་གཞི་བཅས་རྫོགས་པར་བཏང་། སྐབས་འདིར་དངོས་གྲུབ་ཀྱི་རྫས་བཤམས་པ་ལ། དཀྱིལ་འཁོར་ཤར་དུ་ཅོག་སྟེགས་ཁེབས་དཀར་པོ་དང་ལྡན་པའི་སྟེང་དུ་གྲོ་ཡིས་གཡུང་དྲུང་གཡས་འཁྱིལ་དུ་བྲིས་པའི་སྟེང་མཉྫི་མཐོ་བའི་ཁར་སྨན་གྱི་ཕོ་བྲང་ཁར་ཐོད་པ་ཁ་སྦྱར་བཀོད་ལ། ཕྱི་ནས་སྟེགས་ཁེབས་ཀྱིས་གཡོགས། དེའི་མདུན་དུ་ལྷ་བུམ་བཅུ་སོ་སོའི་བུམ་ ཆུ་གཅིག་ཏུ་བསྡུས། དུས་རྒྱུན་སློབ་དཔོན་མདུན་གྱི་རྣམ་བུམ་དུ་བླུགས་པ་དང་། གཡས་སུ་སྔར་གྱི་དཀྱིལ་འཁོར་ལྷོའི་འབྲང་རྒྱས་ལས་བཞི་མཆོག་བཅས་རང་
རྟགས་མེ་རིའི་རྒྱན་ཅན་བཟའ་བཅའ་སྣ་ཚོགས་ཀྱིས་ཁ་གསོས་པ་བཞག །གཡོན་དུ་ཐོད་པར་ཆང་བཟང་པོར་མངར་གསུམ་དང་། ཨ་མྲ་ཏས་སྦགས་པའི་བདུད་རྩི་དང་། དེ་ཉིད་ཁ་གསོ་བའི་སྣོད་གས་ཆག་མེད་པའི་ནང་དུ་བུ་རམ་དང་བྱིན་ཅན་གྱི་ཕབས་ལྡན། རྒྱབ་ཏུ་ཀ་ཏོ་རའི་སྣོད་དུ་མངར་གསུམ་བསྲེས་པའི་གྲོ་མཐུད་ཀྱི་རིལ་བུ། སློབ་དཔོན་མདུན་དུ་ཆང་དང་རཀྟ་བསྲེས་པའི་དུང་ཞལ་སྣོད་དང་། ཁེམ་ཐུར་བཅས་བཟེད་ཞལ་གྱི་སྣོད་ཀ་པཱ་ལ་སྟོང་པ་སྟེགས་བཅས་བཀོད་དོ། །དཀྱིལ་འཁོར་མདུན་དུ་རྒྱལ་ཚབ་པ་ཞྭ་ཆོས་རྡོར་དྲིལ་བཅས་བཞེངས། གཡོན་དུ་གུ་གུལ་དུད་པ་དང་། ཐུན་ཟེ་ཞྭ་བཅས་ལས་རྡོར་འཁོར། རྔ་རོལ་འབུད་བརྡུང་དབྱངས་བཅས། ཧཱུྃ། བདེ་གཤེགས་འདུས་པ་སོགས། ལས་རྡོར་རྒྱལ་ཚབ་བཅས་དཀྱིལ་འཁོར་བསྐོར་ཐུན་བྲབ། ཧཱུྃ། མི་བཟད་ཁྲོ་གཏུམ་སོགས་མཚམས་བཅད། རྒྱལ་ཚབ་ལས་རྡོར་བཅས་གཡབ་དར་སོགས། ཧཱུྃ། དུས་གསུམ་བདེ་གཤེགས་བྱིན་འབེབས་བརྒྱུད་གསུམ་རོལ་མོ་བཅས་རྒྱལ་ཚབ་ཁྲིར་འཁོད། བདུད་རྩི་བྱིན་རླབས། རཾ་ཡཾ་ཁཾ་སོགས། ལས་བྱང་བཞིན་རྩ་བའི་དཀྱིལ་འཁོར་ནས། ཞི་བསྙེན། དཔལ་དགུ་སོགས་ཀྱི་སྔགས་མཐར། སརྦ་ཨ་མྲ་ཏ་བཏགས་པ་ལྔ་བཅུ་རེ་བཟླ། བདག་ཉིད་དཔལ་ཆེན་པོ་སོགས། འགལ་བར་གྱུར། ཞི་བསྙེན་ལ། ས་མ་ཡ་བཏགས་པ་སུམ་ཅུ། ཆེ་མཆོག་ལྔ་བཅུ། གཞན་བརྒྱད་སོགས་ཉེར་གཅིག་རེ་བཟླས་མཐར། ཧཱུྃ། རིང་པོ་ལན་གསུམ་བརྗོད་པར་སློབ་དཔོན་གྱིས་བདུད་རྩི་རཀྟ་སྦྱར་བ་སྒྲོན་སྐྱོང་ལན་གཅིག་འཕྱར། གཉིས་བསྡུས་སོགས། ཧཱུྃ་ལ་གོང་བཞིན་
འཕྱར། སྣང་སྲིད་སོགས། ཧཱུྃ་ལ་འཕྱར། བདེ་གཤེགས་སོགས། ཧཱུྃ་བཅོམ་ལྡན་ནས། ཞི་བསྙེན་དཔལ་དགུའི་སྙིང་པོ་བཅས་ལན་གསུམ་རེ། མཐར་མ་ཧཱ་རཀྟ་ཁཱ་ཧི། ལན་གསུམ་ལ་སློབ་དཔོན་དུང་ཞལ་དུ་བདུད་རྩི་རཀྟ་སྦྱར་བ་ཕྱག་གཉིས་ཀས་བཟུང་སྟེ་བཟེད་ཞལ་དུ་ལན་གསུམ་ཕུལ། ཞི་བསྙེན་དཔལ་དགུ་བཅས་ལན་ཉེར་གཅིག་རེ་སོ་སོར་སྟོང་ཚིག་མཆོད་པ་བཅས། སྐབས་འདིར་ལས་རྡོར་གྱིས། སློབ་དཔོན་གྱི་བཟེད་ཞལ། ཁེམ་ཐུར་བཅས་བླངས་ནས་བཟེད་ཞལ་གྱི་རཀྟ་གཏོར་མ་ལ་བྲན། དཀྱིལ་མདུན་གྱི་བདུད་རྩི་ལའང་ཅུང་ཟད་བསྲེས་ནས་ཡང་སློབ་དཔོན་མདུན་དུ་ཕུལ། དེ་ལྟར་གསོལ་སོགས། སློབ་དཔོན་དྲིལ་བཅས་སྨན་གྱི་བཟེད་ཞལ་ཐོགས། ཧཱུྃ། རང་བྱུང་གདོད་ནས་སོགས། སྨན་མཆོད་རྒྱས་པ་དངོས་གྲུབ་བླངས་པའི་བར། ཆེ་མཆོག་སྔགས་དབྱངས་ལན་གསུམ་མཐར་འཇམ་རོལ་འབུད་དཀྲོལ་ལ་རྒྱལ་ཚབ་ཞྭ་གོས་རྡོར་དྲིལ་བཅས་སློབ་དཔོན་མདུན་གྱི་བཟེད་ཞལ་ནས་གཡོན་པའི་སྲིན་ལག་གིས་རྡོ་རྗེ་རྒྱལ་པོ་ནས་བཟུང་འདུས་པ་ཚང་མའི་གནས་གསུམ་དུ་ཐིག་ལེ་བྱ། ལས་རྡོར་དང་ཚོགས་གཉེར་བ་རྣམས་ཀྱིས། སྒྲུབ་རྫས་ལས་བཞིའི་འབྲང་རྒྱས། ཤིང་ཐོག །མངར་གསུམ་རིལ་བུ་སོགས་གཙོ་ཕལ་དེར་འཚོགས་ཀུན་ལ་འདང་ངེས་བསྒྲིགས། སྐུ་གསུང་ཐུགས་ཀྱི་སོགས་བརྗོད། རྒྱལ་ཚབ་སོགས་ཞྭ་གོས་བཅས་སྨན་གྱི་ཕོ་བྲང་། ཡུམ་གྱིས་རྣམ་བུམ། ལས་རྡོར། བདུད་རྩི། གཞན་རོགས་ཁ་ཤས་ཀྱིས། དངོས་གྲུབ་རྫས་དང་རིལ་བུ་
ཤིང་ཐོག་སོགས་བསྣམས་ཏེ་གཞུང་གྲལ་དཀྱིལ་དུ་ཕྱིན། འདུས་པས་དྲིལ་འཛིན་རྩ་གདངས་ཀྱིས། ཧཱུྃ། དུར་ཁྲོད་གསང་བ་མཆོག་གི་སོགས། ཆེ་མཆོག་སྔགས་དབྱངས་ལན་གསུམ་མཐར་འཇམ་རོལ་བཅས། རྡོ་རྗེ་སློབ་དཔོན་ནས་བཟུང་འདུས་པ་རྣམས་ལ་བྲིམ་ཞིང་དངོས་གྲུབ་ཀྱི་རྫས་ལ་རོལ། ལྷག་མ་དངོས་གྲུབ་ཏུ་རོལ་བས་སོགས་བརྗོད། ཚོགས་བྱིན་རླབས་ནས་བསྒྲལ་མཐར་ཆ་གསུམ་བཅས་ལྷག་མའི་བར་བཏང་ངོ་། །དེ་ནས་དབང་གྲལ་འཚོགས། ༈ རྩ་བའི་ས་བཅད་བཞི་པ་ཞར་བྱུང་འཕྲོས་དོན་ལ། གོང་སྨྲོས་དབུས་གཙང་ གསན་ཡིག་ཏུ། ཞི་བ་དབང་གི་རིམ་པ་དང་། སྔགས་སྒྲུབ་ནང་མའི་དབང་ཆོག་པདྨ་ཤེལ་ཕུག་མ་བྱུང་ཡང་། ཁམས་ཀཿ ཐོག་བརྒྱུད་པར་བཞུགས་པ་ལྟར་བསྐུར་བ་ལ། སྟ་གོན་སྔར་སོང་བས་མཐུས་རྩིས་བྱས་ན། ཁྲུས། སྔོན་གཏོར། བགེགས་སྐྲོད། མཚམས་བཅད། དབང་བཤད་བསྡུས་ཙམ་ནས། མཎྜལ་ཕུལ། མིག་དར་མེ་ཏོག་གཏད། ཞི་བའི་ཆོས་སྐོར་རིམ་པ་དབང་གི་ལས་ལྟར། དེ་ནས་གསོལ་བ་གདབ་པ་འདིའི་རྗེས་ཟློས་མཛོད། བླ་མེད་གོ་འཕང་མཆོག་སྙེམ་པའི་སོགས། ཛྙཱ་ན་ན་མ་ཡ་ཧཱུྃ། དེ་ནས་མེ་ཏོག་དོར་བ་འདིའི་རྗེས་ཟློས་མཛོད། སངས་རྒྱས་དངོས་གྲུབ་སོགས། མིག་དར་བསལ་བ་སོགས་ནར་འདེད་ཀྱིས་ཡོན་བདག་དབུས་སུ་སྤྱན་དྲངས་ཏེ། དཀྱིལ་འཁོར་དུ་བཞུགས་སུ་གསོལ། བར། དེ་ནས་བུམ་པས་དབང་བསྐུར་ཏེ། སློབ་མའི་སྤྱི་བོར་ཟླ་བའི་དཀྱིལ་འཁོར་ལྔ་བཀོད་ལ། དེའི་སྟེང་དུ་སོགས་ནས་ནར་འདེད། འགྲོ་རྣམས་ཡེ་ཤེས་ཆེན་པོའི་ངང་དུ་གཉིས་སུ་མེད་པའི་
དབང་ཐོབ་པར་གྱུར་ཅིག །དབང་ཆོག་པདྨ་ཤེལ་ཕུག་ནས། དེ་ལ་དང་པོ་ཞི་བའི་དབང་རྫས་ལ་དྲུག་སྟེ། ཞེས་པ་ནས་ནར་འདེད། ཕྲིན་ལས་བདག་ཉིད་ཆེན་པོར་བསམ། བར་ཡིག་ཆེ་ཆུང་མེད་པ་བཏང་། དེ་ནས་དྲེགས་པའི་མཐུ་དབང་ནི། དྲེགས་པའི་སྡེ་དཔོན་སུམ་ཅུའི་སྒྲུབ་ཐབས་མཇུག་གི་ཐོ་རངས་སྐྱ་རེངས་ཤར་བ་ལ། རིགས་ཀྱི་བུ་ལ་དབང་བསྐུར་རོ། །ཞེས་པས། དེ་ནས་དྲེགས་པའི་མཐུ་དབང་ཞུ་བའི་ཡོན་དུ་མཎྜལ་ཕུལ། གསོལ་བ་གདབ་པ་འདིའི་རྗེས་ཟློས་མཛོད། ཨེ་མ་སློབ་དཔོན་དགོངས་སུ་གསོལ། སོགས་ནས་ནར་འདེད། དགྲ་སྲོག་རྩད་ནས་གཅོད་པར་ཤོག །དྲག་པོ་མཐུ་ཡི་དབང་བསྐུར་བ་སོགས། ཟས་ནོར་འཕེལ་ལོ་བར་བརྗོད། དེ་ནས་བཀྲ་ཤིས། ཁས་བླང་། ལུས་དབུལ། མཎྜལ། དགེ་བསྔོ་བྱས་སློབ་མ་རྣམས་གྲོལ་ལོ། །དེ་རྗེས་གཏོར་འབུལ། བསྐུལ་བ་ཆད་བསྟན། རྟ་བྲོ་མཆོད་བསྟོད། བཟོད་གསོལ། ཡིག་བརྒྱ་ལན་གསུམ། རས་བྲིས་བརྟན་བཞུགས། བསྡུ་རིམ། གོ་བསྒོ། སྐབས་འདིར་ཁྲོ་བཅུའི་ཕུར་པ་མ་གཏོགས་པའི་མཆོད་སྟེགས་དཀྱིལ་འཁོར་རྒྱན་ཆས་སོགས་ལེགས་པར་བསྡུ་ཚགས་བྱེད་པས་དེ་སྐབས་ཞི་ཁྲོ་སྤྱི་སྔགས་འཚམས་པ་བཟླ། སློབ་དཔོན་དྲིལ་བཅས་དཀྱིལ་མདུན་ཕེབས་ནས། ཨོཾ་བཛྲ་ཀི་ལཱ་ཡ་སོགས་ཚར་བཅུ་དང་བསྟུན་ཧཱུྃ་མཛད་རྒྱས་པ་ཁྲོ་བཅུའི་ཕུར་བུ་རྣམས་འོག་གི་ཕུར་བུ་དང་མཚམས་གཞི་གཡས་བསྐོར་དང་། བྱང་ནས་ཕྱོགས་བཞི་གཡོན་བསྐོར་གྱིས་སྟེང་ཕུར་བཅས་གདབ་རིམ་ལྡོག་ཕྱོགས་སུ་ཕྱུང་ལ་ཀ་ཏོ་
རའི་སྣོད་དུ་བཀོད། ཨོཾ་རུ་རུ་སྥུ་རུ། སོགས། སྤྱན་མའི་སྔགས་ལན་བདུན་ལ་ཕྱག་སོར་གྱི་འོ་མས་ཕུར་རྩེ་བཀྲུ་ཕུར་ཁུང་དུ་འཐོར། དེ་ནས་དཔོན་སློབ་དར་དཀར་ཡུག་རིང་གིས་སྦྲེལ་ལ། རྒྱལ་ཚབ་བམ། སློབ་དཔོན་ནས་བཤད་པ་བཅས། ཐམས་ཅད་མར་མེ་བསྣམས་ནས་རྗེས་ཟློས་བཅས། ཧཱུྃ། དུར་ཁྲོད་གསང་བ་མཆོག་གི་དཀྱིལ་འཁོར་དུ། །སོགས། མར་མེ་སྨོན་ལམ་ཚིག་ཐ་མ་བླ་མེད་སྐུ་གསུང་ཐུགས་སུ་འགྲུབ་པར་ཤོག །ལན་གསུམ་བྱ། དེ་རྗེས། བླ་མ་ཡི་དམ་ལྷ་ཚོགས་དགོངས་སུ་གསོལ། །སོགས། སྨོན་ལམ་རྒྱས་པ་དབྱངས་རྟ་བཅས། འདུས་པར་འབྲུ་དཀར་བཀྲམ། རྟེན་འབྲེལ་སྙིང་པོ་བཟླ། བཀྲ་ཤིས་ཞལ་སྐོར་རྒྱས་པ་དང་། རོལ་མོ་འབུད་དཀྲོལ་སོགས་མཛད་དོ། །སྐབས་འདིར་ཞི་རྒྱས་ཀྱི་སྦྱིན་སྲེག་མཛད་ན། ཉིན་སྔ་མ་དབང་གྲོལ་རྗེས་ཚོམ་ བུ་འགོད་པ་དང་། འདི་ཉིན་དབང་གྲོལ་རྗེས་སྦྱིན་སྲེག་མཛད་པ་ལེགས་སོ། །སྨྲས་པ། སྔ་འགྱུར་རྒྱུད་སྡེའི་རི་བོ་ལྷུན་སྟུག་སྤོར། །སྨིན་བྱེད་དབང་གི་ཙན་དན་ས་མཆོག་གི །ནགས་ཚལ་ཉམས་དགའ་ལྷོ་ཀླུང་གིས་བསྐྱོད་པས། །ཕྱག་བཞེས་དྲི་བསུང་ངད་པ་ཆེས་ཆེར་འཐུལ། །ཐོས་བསམ་སྒོམ་པའི་ལང་ཚོ་དར་དྲག་ཅིང་། །སྐྱེས་སྦྱངས་མཁྱེན་རབ་རྒྱན་ཆས་ལེགས་ཕྱུག་པའི། །
བསྟན་འཛིན་མཆོག་རྣམས་ཡིད་དབང་ཚིམ་བྱེད་ཕྱིར། །ལེགས་བཤད་འདི་ཡང་བྱས་པ་དོན་ལྡན་རིགས། །དེ་མཐུས་རྒྱལ་བསྟན་དར་ཞིང་སྐྱེ་དགུ་བདེ། །འདྲེན་པ་ཡོངས་ཀྱི་ཞབས་བརྟན་ཆོས་ཚུལ་འདིར། །འཇུག་པའི་དགེ་བ་བྱང་ཆེན་མཆོག་ཏུ་བསྔོ། །ཐོག་མཐའ་བར་དུ་བཀྲ་ཤིས་དགེ་ལེགས་སྩོལ། །ཅེས་བཀའ་བརྒྱད་བདེ་གཤེགས་འདུས་པར་དབང་ཆོག་རྒྱས་པ་ཉིན་ལྔ་མའི་ ཟིན་བྲིས་འདི། སྒྲུབ་བརྒྱུད་བསྟན་པ་འཛིན་སྐྱོང་སྤེལ་བ་དཔལ་སྤུངས་འཆི་མེད་སྤྲུལ་སྐུས་གསུང་ནན་མ་ཆོག་པར་ཤཱཀྱའི་དགེ་སློང་རྒན་པོ་ཞེ་ཆེན་བསྟན་གཉིས་དར་རྒྱས་གླིང་དུ་མཁན་པོའི་ཚུལ་བཟུང་བ་ལྔ་རིགས་སྨྲ་བའི་ཡང་ཐར་འགྱུར་མེད་མཐུ་སྟོབས་རྣམ་རྒྱལ་དཔལ་བཟང་པོས་རང་ཤག་བདེ་བ་ཅན་དུ་སྦྱར་པ་གསང་ཆེན་རྡོ་རྗེ་ཐེག་པའི་བསྟན་པ་ཉིན་མོ་ལྟར་གསལ་བའི་རྒྱུར་གྱུར་ཅིག །མངྒ་ལ་ཤྲཱི་དཱི་པཾ་ཛམྦུ་དཱི་པྰ་ལམ་ཀ་ར་བྷཱུ་ཕཱེཔཱདཱ། དབང་ཆོག་འདི་རྣམས་ལ་མཛེས་ཆོས་ཀྱི་ཚིག་སྦྱོར་ལོགས་སྤྲོས་སེམས་ཀྱང། བྱིན་རླབས་ཉམས་པའི་རྒྱུར་འགྲོ་དོགས། སྔར་ནས་ཕྱག་བཞེས་དཔེ་རྒྱུན་མ་ཉམས་པར་མཛད་སྲོལ་ལྟར་སོར་བཞག་བྱས་པ་དགོངས་དགོས་སོ། །ཞེས་ཀྱང་སྨྲས་སོ།། །།