སངས་རྒྱས་ཀླུ་དབང་རྒྱལ་པོ་ལྷ་ལྔའི་སྒྲུབ་ཐབས་སྨིན་དབང་བཅས་ནད་བརྒྱ་སེལ་བའི་སྨན་གཅིག
ཧུ།༔ སངས་རྒྱས་ཀླུ་དབང་རྒྱལ་པོ་ལྷ་ལྔའི་སྒྲུབ་ཐབས་སྨིན་དབང་བཅས་ནད་བརྒྱ་སེལ་བའི་སྨན་གཅིག་བཞུགས། ན་མོ་བུདྡྷ་ནཱ་གེནྟྲ་ར་ཛྙཱེ། རྒྱལ་ཀུན་ཆོས་དབྱིངས་ངོ་བོར་རོ་གཅིག་ཀྱང་། །གདུལ་བྱར་རྣམ་འགྱུར་སྣ་ཚོགས་གང་འདུལ་དུ། །སྟོན་ཕྱིར་སངས་རྒྱས་སོ་ལྔར་ཀླུ་དབང་རྒྱལ། །འོག་གདོན་གནོད་པ་སེལ་མཛད་དེར་བཏུད་ནས། །སྒྲུབ་ཐབས་རིན་ཆེན་ཀ་ན་ཀ་ཡི་བུམ། །སྨིན་དབང་གཡུ་བྱུར་མུ་ཏིག་ཕྲས་སྤྲས་པར། །ནད་བརྒྱའི་ཚ་གདུང་གཞིལ་བའི་བདུད་རྩིའི་རྒྱུན། །འབེབས་འདི་རྡོར་འཛིན་རྣམས་ཀྱི་ཕྱག་ཏུ་མཛེས། །དེ་ལ་བསམ་གཏན་གླིང་པའི་གཏེར་བྱོན་དབང་སྒྲོམ་ནས་གསུངས་པ་ཅུང་ཟད་རྟོགས་དཀའ་བས་བཀླག་ཆོག་མར་འགོད་པ་ལ། སྦྱོར་བ་ཡོ་བྱད་ཀྱི་བཤམས་དང་། དངོས་གཞི་ཆོ་གའི་རིམ་པ། དབང་དང་མཇུག་ཆོག་བཅས་དོན་ཚན་བཞི་ལས། དང་པོ་བཤམས་ནི། གནས་དབེན་པར་བྱི་དོར་བྱས། བླ་བྲེ། ཡོལ་བ། སྤྱན་གཟིགས། སྐུ་གསུང་ཐུགས་རྟེན་
སོགས་བཀྲམ་པས་མཛེས་པར་བྱ། སྟེགས་བུ་གཙང་མར་སྟོད་ཁེབས་སྟེང་འབྲུ་ཚོམ་ལྔ་དང་དབང་གཏོར་དཀར་ཟླུམ་པད་འདབ་བཞི་བཅས་ལྔ་རྒྱན་ཅན། འབུལ་གཏོར་དཀར་གཏོར་མཐེབ་རིལ་ཅན་གསུམ། བགེགས་གཏོར་གཉིས། ཆུ་གཉིས་སྔོན་འགྲོའི་ཉེར་སྤྱོད་ལྔ། ཞལ་ཟས། དཀར་མེ། སྤོས། མེ་ཏོག་སོགས་བསོག་ཕྱིར་ཅི་འབྱོར་བྱ། དཀྱིལ་འཁོར་ནས་ཚོམ་དབུས་སུ་བུམ་པ་གཙང་མར་བུམ་གོས་དར་སྔོན་པོའི་མགུལ་ཆིངས་ཀྱིས་འཐུས་ལ། ཁ་རྒྱན་ཤུག་པ་གཙང་མ་དང་། ནང་དུ་དྲི་བཟང་གི་ཆུས་སུམ་གཉིས་བཀང་། བྱ་རྒྱུད་བུམ་རྫས་ཉེར་ལྔ་ཡོད་ན་བླུགས། དུང་ཞལ་གྱི་ཆུ་དང་གཟུངས་ཐག་བཞག །ཁ་རྒྱན་ཤིང་གི་མལ་དུ་ཀུ་ཤ་དང་རྨ་བྱའི་སྒྲོ་ཐིག་གཅིག་པ་བྱས་ན་འགལ་བ་མེད། སྔགས་ཕྲེང་དང་ཙཀླི་ཡང་བཤམས། རང་མདུན་རྡོར་དྲིལ། ལས་བུམ། ནས་ཟེ། གུལ་ཡུངས་སོགས་བསགས། སྒྲུབ་པ་པོ་ཁྲུས་དང་གཙང་སྦྲ་ལ་གནས་པས་ཤ་ཆང་སྒོག་བཙོང་སོགས་སྤངས། བྱམས་སྙིང་རྗེ་བྱང་ཆུབ་སེམས་ཀྱི་ཀུན་སློང་ཞི་དུལ་དང་ལྡན་པར་བྱ། གཉིས་པ་དངོས་གཞི་ཆོ་ག་ལ། སྔོན་འགྲོ་ནི། ན་མོཿ བླ་མ་སྐྱབས་ཡུལ་ཀུན་ལ་སྐྱབས་ སུ་མཆི༔ འགྲོ་ཀུན་སངས་རྒྱས་ཐོབ་པར་སེམས་བསྐྱེད་དོ༔ ཀུན་ཁྱབ་ཚད་མེད་བཞི་འགོད་རྣམ་དག་གིས༔ ཡན་ལག་བདུན་གྱི་རྩེ་གཅིག་ཆེན་པོར་གནས༔ བགེགས་བསྐྲད་ཅིང་བསྲུང་འཁོར་བསྒོམ་པ་ནི། བགེགས་གཏོར་ལས་བུམ་ཆབ་བྲན་བསངས་སྦྱངས་ནི། རཾ་ཡཾ་ཁཾ། ཨོཾ་སྭ་བྷཱ་ཝ་ཤུདྡྷ་སོགས། གཏོར་མ་བདུད་རྩིའི་རྒྱ་མཚོ་ཆེན་པོར་གྱུར། སརྦ་བྷུ་ཏ་ཨཱ་ཀར་ཀྵཱ་ཡ་ཛ༔ ཞེས་འགུགས། ཨོཾ་སརྦ་བིགྷྣཱན་སོགས་ལན་གསུམ་གྱིས་བསྔོས། ཧཱུྃ་ཧཱུྃ་ཧཱུྃ། ཡང་གསང་བླ་མེད་དཀྱིལ་འཁོར་སྒྲུབ་པ་འདིར༔ འདུ་བར་མི་དབང་བགེགས་ཚོགས་ཕྱིར་དེངས་ཤིག༔ གནས་འདིར་རིགས་ལྔ་ཡེ་ཤེས་འབར་བ་ཡི༔ གཞོམ་གཞིག་མེད་པ་བསྲུང་བའི་འཁོར་ལོར་གྱུར༔ གནོད་བྱེད་ཨུཙྪ་ཏ་ཡ་ཕཊ྄༔ བགེགས་
གཏོར་ཕྱིར་དོར། ཧཱུྃ་བཞིའི་སྔགས་གུལ་ཡུངས་བཅས་ཐུན་བྲབ། བཛྲ་རཾ་རཀྵ༔ མཆོད་རླབས་ནི། རཾ་ཡཾ་ཁཾ༔ ཨོཾ་ཨཱཿ ཧཱུྃ༔ མཆོད་རྫས་ནམ་མཁའི་ཁམས་ཀུན་གང་བར་གྱུར། བྱིན་འབེབས་ནི། ཧཱུྃ༔ བླ་མ་དཀོན་མཆོག་བྱིན་རླབས་ཐིབས་སེ་ཐིབ༔ ཡི་དམ་ལྷ་ཚོགས་དངོས་གྲུབ་ཉི་ ལི་ལི༔ མཁའ་འགྲོ་ཆོས་སྐྱོང་ཕྲིན་ལས་ཚུབས་སེ་ཚུབ༔ ཞིང་ཁམས་ཀུན་ནས་བྱིན་ཆེན་འབེབ་ཏུ་གསོལ༔ ཨོཾ་ཨཱཿ བུདྡྷ་ནཱ་གེནྟྲ་རཱ་ཛྙཱ་ཨ་བེ་ཤ་ཡ་ཨ་ཨཱཿ ལྷ་བསྐྱེད་པ་ནི། ཧཱུྃ༔ རྒྱུ་རྐྱེན་མཚན་མའི་གཟུགས་སྣང་སྟོང་པའི་ངང་༔ མ་འགགས་རང་ བྱུང་ངོ་མཚར་འབྱུང་བཞིའི་ཁྲི༔ བཀོད་པ་ཡིད་འཕྲོག་ཀླུ་ཆེན་རྒྱ་མཚོའི་དབུས༔ པད་སྡོང་འདབ་མ་སྟོང་བརྡལ་ཟླ་དཀྱིལ་སྟེང་༔ ཧཱུྃ་སྔོན་འོད་ཀྱིས་ཀླུ་ཁམས་ ཀུན་ཁྱབ་ནས༔ སྡིག་སྒྲིབ་སྡུག་བསྔལ་སྦྱངས་ནས་ཧཱུྃ་ལ་ཐིམ༔ དེ་ཉིད་རང་ གསལ་རྫོགས་པའི་སངས་རྒྱས་མཆོག༔ ཀླུ་དབང་རྒྱལ་པོ་ཨིནྡྲ་ནཱི་ལའི་མདོག༔ མཚན་དཔེ་དཔལ་འབར་མགྲིན་པ་ཡན་ཆད་དཀར༔ ཞལ་གཅིག་ཕྱག་གཉིས་ ཆོས་འཆད་ཕྱག་རྒྱ་ཅན༔ སྤྲུལ་སྐུའི་ཆ་ལུགས་རྡོ་རྗེ་སྐྱིལ་ཀྲུང་བཞུགས༔ སྣ་ཚོགས་མདངས་ལྡན་སྦྲུལ་མགོའི་གདེངས་ཀ་བདུན༔ བསིལ་གཡབ་རྒྱབ་ཡོལ་མཇུག་རྣམས་གདན་དུ་འཁྱིལ། །ཕྱོགས་བཞིའི་པད་ཟླར་མདུན་དུ་སྒྲིབ་སེལ་དཀར། །རིན་ཆེན་དབྱུག་བསྣམས་གཡས་སུ་བྱམས་པ་དམར། །རིན་པོ་ཆེས་མཚན་ཀླུ་ཤིང་མེ་ཏོག་འཛིན། །རྒྱབ་ཏུ་འཇམ་དཔལ་སེར་པོ་ཨུཏྤལ་སྟེང་། །གླེགས་བམ་རལ་གྲི་གཡོན་དུ་སྤྱན་གཟིགས་དཀར། །པདྨ་དཀར་པོའི་བཞི་ཀའི་གཡོན་བུམ་པ། །ལོངས་སྤྱོད་རྫོགས་སྐུ་དར་དང་རིན་ཆེན་བརྒྱན། །གཙོ་བོའི་ཞལ་
ལ་རྩེ་གཅིག་ཡིད་ཀྱིས་བལྟ། །ཕྱི་རོལ་ཕྱོགས་མཚམས་དགྲ་བཅོམ་དཔག་མེད་བསྐོར། །འོག་ནས་ཀླུ་རྒྱལ་ཚོགས་ཀྱིས་མཆོད་པ་འབུལ༔ གཞན་ཡང་ཀླུ་རིགས་སྣད་ཉམས་འཁོན་པའི་ཚོགས༔ ཀུན་གྱི་ནད་བྱང་སྒྲིབ་བྲལ་སྐྱེ་སྒོ་ཆོད༔ ཐམས་ཅད་ཞི་བདེ་སྨིན་གྲོལ་འདུད་པར་གྱུར༔ གཙོ་འཁོར་གནས་ཡིག་ས་བོན་འོད་ཟེར་གྱིས༔ ཁབ་ལེན་ལྕགས་ཀྱི་སྣང་ཚུལ་ཡེ་ཤེས་པ༔ བརྩེ་བས་ཉེར་གཟིགས་མྱུར་མགྱོགས་ཐུགས་རྗེ་ཡིས༔ ཁ་བ་བུ་ཡུག་འཚུབས་ལྟར་གནས་ནས་བསྐུལ༔ སྤྱན་འདྲེན་པ་ནི༔ ཧཱུྃ༔ ཆོས་དབྱིངས་མཐའ་བྲལ་ཞིང་ཁམས་རྒྱ་མཚོ་དང༔ རང་བཞིན་རྣམ་དག་འགྲོ་དོན་གར་བཞུགས་ནས༔ ཡེ་ཤེས་ལྷ་ཚོགས་བསྐྱེད་བསྟིམ་དཀྱིལ་འཁོར་ལྷ༔ མ་ལུས་དམ་ཚིག་དབང་གིས་གཤེགས་སུ་གསོལ༔ ཨོཾ་ཨཱཿ བུདྡྷ་ནཱ་གེནྟྲ་རཱ་ཛ་ཧཱུྃ༔ ས་པ་རི་ཝཱ་ར་བཛྲ་ས་མ་ཡཿ ཛཿ ཛཿ བཞུགས་ཕྱག་དམ་ཡེ་དབང་གི་རྒྱས་གདབ་ལ༔ ཧཱུྃ༔ པདྨ་ཟླ་བ་བརྩེགས་པའི་གདན་ལ་བཞུགས༔ གུས་པས་ཕྱག་འཚལ་གསལ་བའི་འོད་ཟེར་གྱིས༔ ཡེ་ཤེས་སྤྱན་དྲངས་དམ་ཡེ་དབྱེར་མེད་ལ༔ དབང་བསྐུར་རྒྱས་གདབ་མི་བསྐྱོད་དབུར་བརྒྱན་གྱུར༔ ཛཿ ཧཱུྃ་བྃ་ཧོཿ ཨ་བྷི་ཥིཉྩ་ཧྲཱིཿ མཆོད་ པ་འབུལ་བ་ནི༔ ཧཱུྃ༔ གཙུག་ན་རིན་ཆེན་ཞབས་བསིལ་ཕུལ་བཞིན་དུ༔ བརྒྱད་ལྡན་མཆོད་ཡོན་ཙནྡན་ཞབས་བསིལ་མཆོད༔ གངྒཱའི་ལྷ་མོས་མེ་ཏོག་ཕུལ་བཞིན་དུ༔ སྣོད་བཅུད་སྣང་སྲིད་མེ་ཏོག་བཀོད་པ་འབུལ༔ སྤོས་ཚོགས་བདུག་སྤོས་གསེར་ ལག་སྣང་གསལ་བཞིན༔ ཚུལ་ཁྲིམས་དྲི་ཞིམ་སྲིད་པའི་ཉི་ཟླའི་འོད༔ རབ་དགའི་དྲི་ཆབ་ཟས་སྦྱིན་ཞལ་ཟས་དང་༔ ལྷ་དགའ་ཀླུ་དགའ་སིལ་སྙན་ཕུལ་བ་ལྟར༔
སྟོང་གསུམ་རབ་འབྱམས་ཞིང་ཡུལ་ཐམས་ཅད་ནས༔ མཆོད་པའི་བྱེ་བྲག་བསམ་པའི་ཡུལ་འདས་པ༔ དཀྱིལ་འཁོར་ལྷ་ཚོགས་དགྱེས་བསྐྱེད་མཆོད་པའི་སྤྲིན༔ དངོས་འབྱོར་ཡིད་སྤྲུལ་མཁའ་མཉམ་རྒྱ་མཚོས་མཆོད༔ ཨོཾ་ཨཱཿ བུདྡྷ་ནཱ་གེནྟྲ་རཱ་ ཛ་ཧཱུྃ༔ ཨཾ་པདྱཱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝི་དྱཱ་ཤབྟ་པཱུ་ཛ་མེ་གྷ་ས་མུ་དྲ་སྥ་ར་ཎ་སརྦ་པྲ་ཏཱིཙྪ་ཧོཿ བསྟོད་པ་ནི། ཧཱུྃ༔ ཚད་མེད་ཆོས་དབྱིངས་ཀུན་ཁྱབ་ཐུགས་རྗེའི་གཏེར༔ སྐུ་གསུམ་བཀོད་པ་འཁོར་འདས་གཙུག་གི་ནོར༔ ཞིང་ཀུན་སྟོན་པ་འགྲོ་བའི་སྐྱབས་གནས་མཆོག༔ སངས་རྒྱས་ཀླུ་དབང་རྒྱལ་པོར་ཕྱག་འཚལ་ལོ༔ བཤགས་པ་དང་འཛབ་བཟླས་ནི༔ ཨེ་མ་ཧོ༔ བདག་གི་ཚེ་རབས་བསགས་པའི་སྡིག་སྒྲིབ་དང་༔ དམ་ཚིག་ཉམས་ཆག་ཐམས་ཅད་མཐོལ་ཞིང་བཤགས༔ འཁྱེར་གསུམ་དག་པ་ལྷ་ཡི་ཐུགས་ཀ་རུ༔ དོན་གཉིས་འཕྲོ་འདུའི་སྔགས་ཕྲེང་འཁོར་བར་གྱུར༔ ཏདྱ་ཐཱཿ ཨོཾ་ཏ་ཐཱ་ག་ཏོ་བྷ་ག་ཝཱན྄་ནཱ་ག་རཱ་ཛེ་ཤྭ་ཨ་དྷིཥྛ་ན་ཨངྷིཥྛི་ཏེ་སྭཱ་ཧཱ༔ ཞེས་བསྙེན་ཚད་འབུམ་ཕྲག་གཅིག་གམ་བཞི་ལ་སོགས་པ་བཟླ༔ ཨོཾ་ཨཱཿབུདྡྷ་ནཱ་གེནྟྲ་རཱ་ཛ་ཧཱུྃ༔ བརྒྱ་སྟོང་ཁྲི་སོགས་བཟླ༔ བུམ་བཟླས་ནི། ཨོཾ་སྭ་བྷ་ཝ་སོགས། ཧཱུྃ༔ སྟོང་གསལ་པད་ཟླར་བུམ་ཟུང་མཚན་ཉིད་རྫོགས༔ ཁ་རྒྱན་མགུལ་ཆིངས་ཐབས་ཤེས་རྟགས་ཀྱིས་སྤྲས༔ རྣམ་རྒྱལ་བུམ་པ་ཡེ་ཤེས་བདུད་རྩིའི་དབུས༔ ཀླུ་དབང་རྒྱལ་པོ་གཙོ་འཁོར་ཡོངས་རྫོགས་གསལ༔ ལས་བུམ་དབུས་སུ་པད་ཉིར་ཧཱུྃ་ཡིག་ལས༔ བདུད་རྩི་འཁྱིལ་པ་ལྗང་སྔོན་རྡོར་དྲིལ་འཛིན༔ ཁྲོ་ཉམས་རྒྱན་རྫོགས་སྒྲིབ་སྦྱོང་བགེགས་འདུལ་གྱི༔ ལྷ་ཚོགས་འཕྲོ་ལ་ཐམས་ཅད་འོད་ཟེར་འབར༔ ཡེ་ཤེས་སྤྱན་དྲངས་དམ་ཡེ་དབྱེར་མེད་ཀྱི༔
སྔགས་ཕྲེང་འོད་ཀྱིས་སྐུ་གསུམ་བདུད་རྩིར་གྱུར༔ གཟུངས་ཐག་བླངས། གཙོབུམ་ལ་རྩ་སྔགས་ཟུང་དང་། ལས་བུམ་ལ། ཨོཾ་ཨ་མྲ་ཏེ་ཧཱུྃ་ཕཊ༔ ཅི་འགྲུབ་བཟླས། དུང་ཞལ་ཆུས། ཨོཾ་ཨཱཿ ཧཱུྃ༔ ལྷ་རྣམས་འོད་དུ་ཞུ་ནས་བུམ་པའི་ཆུ་དང་གཉིས་མེད་དུ་གྱུར༔ དབྱངས་གསལ་དང་རྟེན་སྙིང་མཐར། ཨོཾ་ཨཱཿ ནཱ་གེནྟྲ་རཱ་ཛ་ས་པ་རི་ཝཱ་ར་ཨཾ་ནས་ཤབྡ་ཨཱཿ ཧཱུྃ༔ བསྟོད་པ་ནི༔ ཧཱུྃ༔ ཚད་མེདཀུན་ཁྱབ་སོགས། ཡིག་བརྒྱ་བཟླས། གཏོར་མཆོད་ལ། དང་པོ་ནི། ཨོཾ་ཨཱཿ ཧཱུྃ་ཧ་ཧོཿ ཧྲཱིཿ ལན་གསུམ་བྱིན་རླབས། ཧཱུྃ༔ རིན་ཆེན་སྣོད་དུ་འབྲུ་གསུམ་ལས་བྱུང་བའི༔ འབྲུ་སྨན་གཏོར་མ་བདུད་རྩིའི་རྒྱ་མཚོར་གྱུར༔ གཏོར་བཅུད་ཡེ་ཤེས་ལྔ་ཡི་བདུད་རྩི་རྣམས༔ ཞལ་ལྗགས་འོད་ཀྱི་སྦུ་གུའི་ཀློང་ནས་གསོལ༔ ཨོཾ་ཨཱཿ བུདྡྷ་ནཱ་གེནྟྲ་རཱ་ཛ་ ས་པ་རི་ཝཱ་ར་ཨི་དམ་བ་ལིང་ཏ་པཱུ་ཛ་ཁཱ་ཧིཿ ལན་གསུམ། བཅོམ་ལྡན་འདས་ཀླུའི་དབང་ ཕྱུག་རྒྱལ་པོས་བདག་དང་སེམས་ཅན་ཐམས་ཅད་ཀྱི་ཀླུ་གཉན་ས་བདག་གི་ཉེར་འཚེ་ལ་སོགས་པ་ལས་ངན་སྡིག་སྒྲིབ་ཐམས་ཅད་བྱང་ཞིང་དག་པར་བྱིན་གྱིས་བརླབ་ཏུ་གསོལ༔ གཉིས་པ་ནི། ཨོཾ་ཨཱཿ ཧཱུྃ༔ ཨོཾ་ལོ་ཀ་པཱ་ལ་ས་པ་རི་ཝཱ་ར་ཨཱ་ཀརྵ་ཡ་ཛཿ ཞེས་འཇིག་རྟེན་སྐྱོང་བ་རྣམས་སྤྱན་དྲངས། ཨ་ཀཱ་རོ་མུ་ཁཾ་སོགས། འཇིག་རྟེན་སྐྱོང་བ་ཆེན་པོ་རྣམས། །མཆོད་སྦྱིན་གཏོར་མ་འདི་བཞེས་ལ། །སོགས། འདོད་པ་ཀུན་འགྲུབ་མཛོད། །ཨོཾ་ལོ་ཀ་པ་ལ་ས་པ་རི་ཝཱ་ར་གཙྪ་ཞེས་གཤེགས། གསུམ་པ་ནི། རྡོ་རྗེ་གནོད་སྦྱིན་གྱི་རྒྱས། ཨོཾ་བཛྲ་ཡཀྵ་ཧཱུྃ༔ ཞེས་བསངས། རྡོ་རྗེ་མེའི་རྒྱས། ཨོཾ་བཛྲ་ཛྭ་ལ་ཨ་ན་ལ་ཧ་ན་ད་ཧ་པ་ཙ་མ་ཐ་བྷཉྫ་ར་ཎ་ཧཱུྃ་ཕཊཿ ཀྱིས་སྦྱངས་ཏེ། རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་གཏོར་མ་ཀླུ་རྣམས་དགའ་བར་བྱེད་པའི་བདུད་རྩིའི་རང་བཞིན་དུ་གྱུར་
པར་བསམ། རྡོ་རྗེ་བསྡམས་པ་འདེགས་ཚུལ་གྱིས། ཨོཾ་ཨ་ཀཱ་རོ་སོགས་ལན་གསུམ་གྱིས་སྤེལ་ལ། འདོད་རྒྱལ་གྱི་ཕྱག་རྒྱ་བཅིངས་ཏེ། རང་གི་སྙིང་ག་ནས་འོད་ཟེར་འཕྲོས་པས་ཀླུའི་ཚོགས་འཁོར་དང་བཅས་སྤྱན་དྲངས་པར་བསམས་ལ། ཨོཾ་བ་ཏ་བ་ཏ་ལི་མ་ཧཱ་བ་ཏ་ལི་ཧཱུྃ་ཧཱུྃ་ཛ་ཛཿ སྭཱ་ཧཱ། ཨོཾ། ཀླུ་རྒྱལ་མཐའ་ཡས་ནོར་རྒྱས་བུ། །འཇོག་པོ་དང་ནི་སྟོབས་ཀྱི་རྒྱུ། །པདྨ་པདྨ་ཆེན་པོ་དང་། །དུང་སྐྱོང་དང་ནི་རིགས་ལྡན་ནོ། །ལྷ་མོ་ལྷ་མོ་ཆེན་མོ་དང་། །ཟླ་བའི་སྤྱི་གཙུག་སྤྱི་གཙུག་ཆེ། །དབྱུག་འཛིན་དབྱུག་འཛིན་ཆེན་པོ་དང་། །སོག་མ་མེད་དང་ཧུ་ལུཎྜ། །དགའ་བོ་དང་ནི་ཉེ་དགའ་བོ། །རྒྱ་མཚོ་རྒྱ་མཚོ་ཆེན་པོ་དང་། །ཚ་བ་ཚ་བ་ཆེན་པོ་དང་། །དཔལ་གྱི་འོད་དང་འོད་པོ་ཆེ། །རིན་ཆེན་འོད་དང་གཟུགས་མཛེས་དང་། །གཟུགས་མཛེས་ཆེན་པོ་སྤྲུལ་བཟང་དང་། །ལྟོ་འཕྱེ་ཆེན་པོ་ཚི་ལི་དང་། །ཚི་ལི་ཆེན་པོ་རྣམ་དག་ནི། །མཆོད་པའི་གནས་འདིར་གཤེགས་སུ་གསོལ། །ཨོཾ་ཨཱཿ་གཙྪ་ཨཱ་གཙྪ་མ་ཧཱ་ནཱ་ག་ཨ་དྷི་པ་ཏ་ཡེ་སརྦ་བྷུརྦྷུ་ཝཿ ཕྲུཾ་ཕུ་སྭཱ་ཧཱ། ཞེས་མདུན་དུ་བྱོན་པར་བསམ་མོ། །པདྨ་ཀ་མ་ལ་ཡ་སྟཾ་གྱིས་གདན་ཕུལ། ཨོཾ་མ་ཧཱ་ནཱ་ག་ཨ་དྷི་པ་ཏ་ཡེ་གྷྲཧྞེ་དམ་ཨཾ་སྭཱ་ཧཱ། དེ་བཞིན། པུཥྤེ་སོགས་ཀྱིས་མཆོད། ཀླུ་དགའ་བར་བྱེད་པའི་རྒྱས། ཨོཾ་ཧི་ལི་ཧི་ལི་མ་ཧ་ཧི་ལི་ཕྲུཾ་ཕུ་སྭཱ་ཧཱ། ཞེས་སེ་གོལ་དང་བཅས་པ་གསུམ་དང་། ཨོཾ་བྷཀྵཱ་ཡ་བྷཀྵ་ཡ་ས་མ་ཡ་ཏིཥྛ་ཕྲུཾ་ཕུ་སྭཱ་ཧཱ། ལན་གསུམ་གྱིས་གཏོར་མ་བསྔོ། །ཡེ་དྷརྨ་སོགས། སྡིག་པ་ཅི་ཡང་སོགས། ཆོས་ཀྱི་སྦྱིན་པ་བྱ། ཀླུ་ཆེན་པོ་བརྒྱད་སོགས་ཀླུའི་རིགས་སུ་གྱུར་པ་ཐམས་ཅད་དང་། བྱེ་བྲག་བདག་ཅག་ལ་གནོད་ཅིང་ལན་ཆགས་པ་ཐམས་ཅད་མཉེས་ཤིང་ཚིམ་ནས་གནོད་འཚེ་དང་གདུག་སེམས་ཞི་སྟེ། ཕན་པ་
བྱང་ཆུབ་ཀྱི་སེམས་དང་ལྡན་པར་གྱུར་ཅིག །ཅེས་སྨོན་ལམ་གདབ། ཨོཾ་མ་ཧཱ་ནཱ་ག་ཨ་དྷི་པ་ཏ་ཡེ་ས་པ་རི་ཝཱ་ར་གཙྪ། ཞེས་དཀར་ཕྱོགས་ཀྱི་ཀླུ་རང་གནས་སུ་གཤེགས། མཁའ་ལྡིང་གི་རྒྱས། ཨོཾ་ག་རུ་ཊ་ཧཾ་ས་ཧཾ་ཙ་ལེ་ཙ་ལེ་སྭཱ་ཧཱ། ཞེས་ནག་པོའི་ཀླུ་རྣམས་བསྐྲད་པར་བྱའོ། །རང་གི་དངོས་གྲུབ་དབང་ལེན་བྱ་བ་ནི། ཨོཾ་ཨཱཿ ཧཱུྃ༔ སངས་རྒྱས་ཀླུ་དབང་རྒྱལ་པོ་འཁོར་བཅས་ཀྱི༔ སྐུ་གསུང་ཐུགས་ཀྱི་དངོས་གྲུབ་བདག་ལ་སྩོལ༔ དབང་བཞི་བསྐུར་ལ་སྐུ་བཞིའི་ས་བོན་གནང་༔ ཉིད་དང་མཉམ་པའི་མཁའ་ཁྱབ་སྨིན་གྲོལ་སྩོལ༔ ཨོཾ་ཨཱཿ ཧཱུྃ༔ བུདྡྷ་ནཱ་གེནྟྲ་རཱ་ཛ་ཀཱ་ཡ་ཝཱཀ་ཙིཏྟ་སརྦ་སིདྡྷི་ཕ་ལ་ཧཱུྃ༔ གསུམ་པ་དབང་བསྐུར་བར་བྱེད་པ་ལ། སློབ་མ་གྲལ་དུ་འཁོད། ནས་བཀྱེ། སློབ་དཔོན་ལས་བུམ་ཐོགས་ལ། ཧཱུྃ༔ ངོ་མཚར་བུམ་པ་ལས་རྣམས་ལྷུན་གྲུབ་ཀྱི༔ ཁྲོ་བོ་ཡེ་ཤེས་དམ་ཚིག་བདུད་རྩིའི་ཆུས༔ སྐལ་ལྡན་ཁྲུས་གསོལ་ནད་གདོན་སྡིག་སྒྲིབ་དག༔ འཐོར་བ་ཙམ་གྱིས་བགེགས་ཚོགས་བརླག་པར་གྱུར༔ ཨོཾ་ཨ་མྲ་ཏེ་ཧཱུྃ་ཕཊཿ ཡིག་བརྒྱ། བགེགས་གཏོར་ལ་ལས་བུམ་ཆུ་འཐོར། ཨོཾ་ཨ་མྲ་ཏེ་ཧཱུྃ་ཕཊཿ ཨོཾ་སྭ་བྷཱ་ཝས་སྦྱངས་ལ། སྟོང་པའི་ངང་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ལན་ཆགས་བགེགས་ཀྱི་གཏོར་མ་ཕུན་སུམ་ཚོགས་པ། རི་རབ་བས་དཔང་མཐོ་བ། རྒྱ་མཚོ་བས་གཏིང་ཟབ་པ། ཉི་ཟླ་བས་འོད་གསལ་བ། འདོད་ཡོན་ལྔ་དང་ལྡན་པར་གྱུར༔ ཨོཾ་ཨཱཿ ཧཱུྃ༔ ཨོཾ་ཨཱཿ ཀཱ་ རོ་གསུམ་སོགས། མཆོད་སྦྱིན་གྱི་གཏོར་མ་འདི་ཉིད་བསྔོ་བའི་གནས་སུ་གྱུར་པ་ནི། འདིར་གསང་སྔགས་བླ་མེད་ཀྱི་དཀྱིལ་འཁོར་ཟབ་མོ་ཞལ་ཕྱེས་ནས་སྨིན་གྲོལ་གྱི་དབང་བསྐུར་བ་ལ་བར་དུ་གཅོད་པར་བྱེད་པའི་འབྱུང་པོ་མི་མིན་མི་རུ་བརྫུ་བ༔
ལྷ་མིན་ལྷ་རུ་བརྫུ་བ། ཕྱི་གོ་དོན་གྱི་བརྡ་འཕྲོག་པ༔ ནང་དད་འདུན་གྱི་བསྐྱེད་རྫོགས་བསླད་པ༔ གསང་བ་དབང་བཞིའི་ཡེ་ཤེས་མི་སྨིན་པར་བྱེད་པའི་གདོན་བགེགས་ཐམས་ཅད་གཏོར་མ་འདིས་ཚིམ་པར་གྱིས་ལ་སོ་སོ་རང་རང་གི་གནས་སུ་དེངས་ཤིག༔ ཧཱུྃ༔ སྣང་སྲིད་ཟིལ་གནོན་ཁྲོ་བོའི་བཀའ༔ དཀོན་མཆོག་ རྩ་གསུམ་བདེན་པའི་མཐུས༔ སྨིན་བྱེད་དབང་ལ་མི་མོས་པའི༔ གནོད་བྱེད་ཐམས་ཅད་ཚར་གཅོད་ཅིག༔ ཧཱུྃ་ཧཱུྃ༔ གང་དག་མི་འགྲོ་བ་དང་༔ ཚེ་ལ་རྐུ་བ་སྲོག་ལ་འཇབ་པ་ལ་སོགས་པའི་གནོད་བྱེད་ཐམས་ཅད་ནམ་མཁར་བཀུག༔ བར་སྣང་ནས་བཟུང་༔ ར་ཕག་སེར་བས་བསྡུས་པ་ལྟར་དུ་བཀུག་ནས་ཁྲོ་ཚོགས་རྣམས་ཀྱིས་རྡུལ་དུ་བརླག་པས༔ དེ་བས་ཕྱིར་དེངས་ཤིག༔ ཨོཾ་སུམ་བྷ་ནི་སོགས། ཧཱུྃ་བཞིའི་སྔགས་དང་ཡུངས་བྲབ། གུ་གུལ་བདུག །སྲུང་འཁོར་ནི། སྟེང་ཐམས་ཅད་རྡོ་རྗེའི་གུར་དང་བླ་བྲེ༔ འོག་ཐམས་ཅད་རྡོ་རྗེའི་ས་གཞི༔ ཁོར་ཡུག་ཐམས་ཅད་རྡོ་རྗེའི་ར་བ་དང་དྲ་བ༔ ཕྱི་རོལ་ཐམས་ཅད་ཡེ་ཤེས་ལྔའི་མེ་དཔུང་འབར་བས་བལྟམས་པར་གྱུར༔ ཨོཾ་བཛྲ་ཛྭ་རཾ་རཀྵ་རཀྵ་ཧཱུྃ༔ འོ་ན་ནམ་མཁས་ཁྱབ་པའི་སེམས་ཅན་འགྲོ་བ་རིགས་དྲུག་གི་སྡུག་བསྔལ་ལས་གྲོལ་ནས་རྣམ་མཁྱེན་རྫོགས་སངས་རྒྱས་པའི་ཐབས་ལ་རྒྱལ་བ་ཐམས་ཅད་ཐུགས་རྗེ་ཆེན་པོ་དང་ལྡན་པས་ཆོས་ཀྱི་འཁོར་ལོ་བསམ་གྱིས་མི་ཁྱབ་པ་བསྐོར་བ་ལ་རྒྱུ་འབྲས་ཀྱི་ཐེག་པར་མིང་བཏགས་པ་ལས་འདིར་འབྲས་བུའི་ཐེག་པ་ཡིན། དེ་ལ་གསང་སྔགས་གསར་རྙིང་གཉིས་སུ་གྲགས་པའི་ནང་ཚན་རྙིང་མ་ཡིན། དེ་ལ་བཀའ་གཏེར་དག་སྣང་གསུམ་ལས་འདིར་གཏེར་མ་ཡིན། དེ་ལ་
གཏེར་སྟོན་གྱི་རྒྱལ་པོ་མཆོག་གཉིས་གླིང་པ་བརྒྱད་སོགས་ལས། འདིར་གླིང་པ་བརྒྱད་ཀྱི་ནང་ཚན་བསམ་གཏན་གླིང་པའི་གཏེར་མ་སྟེ༔ གཏེར་གནས་ཀྱང་རུ་དམ་ལུང་པ་ནག་པོར་ཉེ་བ་དཔྱལ་མོ་བྲག་དཀར་ཞེས་ཨོ་རྒྱན་རིན་པོ་ཆེས་ཞབས་ཀྱིས་བཅགས་ཤིང་སྒྲུབ་གནས་སུ་བྱིན་གྱིས་བརླབས་པ་ཡར་རྗེ་ཨོ་རྒྱན་གླིང་པའི་བཀའ་ཐང་ཤེལ་བྲག་མར། དཔྱལ་གྱི་བྲག་ལ་ལོ་གཅིག་བཞུགས༔ ཞེ་འབྱུང་བ་དང་། གཏེར་སྟོན་ཡང་བོད་ཀྱི་གྲུབ་ཆེན་བརྒྱད་ཀྱི་ནང་ཚན་རྟ་མགྲིན་དབང་གི་གྲུབ་པ་ཐོབ་པས་སྤྱི་བོར་རྟ་ཞལ་གྱིས་རྟ་སྐད་མཚེར་བ་བོད་ཁམས་ཐམས་ཅད་དུ་ཐོས་པར་ནུས་པས་རྗེ་འབངས་ཉེར་ལྔའི་གསོལ་འདེབས་བྱང་བདག་བཀྲ་ཤིས་སྟོབས་རྒྱལ་གྱིས་མཛད་པར། དབུ་རུ་ངན་ལམ་རིགས་འཁྲུངས་བྷིཀྵུ། །དབེན་རྩར་པདྨ་དབང་ཆེན་གྲུབ་བརྙེས། །རྟ་སྐད་གཙུག་བཏོན་རྒྱལ་མཆོག་དབྱངས་དེར། །ཞེས་གསུངས་པ་དེའི་སྤྲུལ་པ་ཡིན་པ་ལ། ཆོས་བདག་གཏེར་སྟོན་ལུང་བསྟན་ཡང་བཀའ་ཐང་ཤེལ་བྲག་མར། བོད་འདིར་རྒྱལ་པོའི་མིང་བཏགས་བརྒྱ་རྩ་བརྒྱད༔ གངས་དང་སེངྒེ་ལས་ཀྱི་འབྲེལ་བ་ཡིས༔ འཇིག་རྟེན་པ་ལ་བདེ་བ་སྐད་ཅིག་མེད༔ དཔྱལ་གྱི་བྲག་ལ་སྦས་པའི་གཏེར་ཁ་འདི༔ མི་བཞག་འདོན་པའི་རྟགས་དེར་བསྟན་ནས་བྱུང་༔ ཨོ་རྒྱན་བསམ་གཏན་གླིང་པ་ཞེས་བྱ་འབྱུང་༔ ཞེས་པ་ཐོག་ཏུ་བབ་པ་དེའི་ནང་ཚན་རྩ་གསུམ་ལྷ་ཚོགས་རྣམས་ཀྱི་སྨིན་དབང་དཔག་བསམ་ཆར་འབེབས་ལས་བྱུང་བ་སངས་རྒྱས་ཀླུ་དབང་རྒྱལ་པོའི་དབང་རྒྱལ་པོའི་དབང་བསྐུར་ཞུ་བའི་ཡོན་དུ་མཎྜལ་ཕུལ། དེ་ལྟར་མཎྜལ་ཕུལ་ནས་གསོལ་བ་གདབ་
པ་འདིའི་རྗེས་ཟློས་མཛོད། ཨེ་མ་ཧོ༔ མཆོག་གི་སྐྱབས་གནས་ཐམས་ཅད་ལ༔ རྩེ་གཅིག་སྙིང་ནས་སྐྱབས་སུ་མཆི༔ འཁོར་བར་འཁྱམས་པའི་ཕ་མ་རྣམས༔ སངས་རྒྱས་ཐོབ་པར་སེམས་བསྐྱེད་དོ༔ ཨོཾ་ཨཱཿ ཧཱུྃ༔ བླ་མ་དཀོན་མཆོག་རྩ་ གསུམ་ལ༔ ཕྱག་འཚལ་མཆོད་འབུལ་སྡིག་པ་བཤགས༔ དགེ་ལ་ཡི་རང་ཆོས་འཁོར་བསྐོར༔ བླ་མེད་བྱང་ཆུབ་ཆེན་པོར་བསྔོ༔ དེ་ནས་ཁྱད་པར་གྱི་གསོལ་བ་གདབ་པ་འདིའི་རྗེས་ཟློས་མཛོད། བླ་མ་གསང་སྔགས་ཆེ་བའི་མཆོག༔ སྐལ་ལྡན་རྗེས་སུ་འཛིན་པའི་ཕྱིར༔ ཡང་གསང་བླ་ན་མེད་པ་ཡི༔ དབང་གི་སྨིན་གྲོལ་སྩལ་དུ་གསོལ༔ ལས་བུམ་གྱི་ཆུ་འཐོར། ཨོཾ་ཨ་མྲ་ཏེ་ཧཱུྃ་ཕཊ྄༔ སློབ་མ་རྣམས་མི་དམིགས་པ་སྟོང་པའི་ངང་ལས་པད་ཟླའི་སྟེང་དུ་སངས་རྒྱས་ཀླུ་དབང་གི་རྒྱལ་པོ་སྐུ་མདོག་ཨིནྡྲ་ནཱི་ལ་ལྟར་སྔོ་བ་ཞལ་གཅིག་ཕྱག་གཉིས་ཆོས་འཆད་ཀྱི་ཕྱག་རྒྱ་ཅན་གཙུག་ཏོར་དང་བཅས་ཤིང་འཛུམ་བག་དང་ལྡན་པ༔ ཤམ་ཐབས་དང་ཆོས་གོས་ངུར་སྨྲིག་གསོལ་བ༔ ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་པ༔ ཁ་དོག་སྣ་ཚོགས་པའི་སྦྲུལ་མགོའི་གདེངས་ཀ་བདུན་གྱེན་ལ་ཕྱོགས་པའི་ཆུན་པོའི་རྒྱབ་ཡོལ་མངའ་ཞིང་སྦྲུལ་མཇུག་རྣམས་གདན་དུ་བཏིང་བ༔ དེའི་འཁོར་དུ་བྱང་ཆུབ་སེམས་དཔའ་སྒྲིབ་པ་རྣམ་སེལ༔ བྱམས་པ༔ སྤྱན་རས་གཟིགས་གཙོས་སངས་རྒྱས་བྱང་སེམས་དགྲ་བཅོམ་བླ་མ་ཡི་དམ་དཔའ་བོ་མཁའ་འགྲོ་ཆོས་སྐྱོང་སྲུང་མ་དང་བཅས་སྤྲིན་ཕུང་གཏིབས་པ་ལྟར་བཞུགས་པའི་སྤྱི་བོར་ཨོཾ་དཀར་པོ༔ མགྲིན་པར་ཨཱཿ དམར་པོ༔ ཐུགས་ཀར་ཧཱུྃ་སྔོན་པོ༔ དེ་ལས་འོད་ཟེར་སྣ་ལྔའི་ཕྲེང་བ་མཁའ་
ཁྱབ་ཏུ་སྤྲོས་པས༔ ཕྱོགས་བཅུ་རབ་འབྱམས་ཞིང་གི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀླུ་དབང་རྒྱལ་པོའི་རྣམ་པར་སྟེང་ནས་ཁ་བ་བུ་ཡུག་འཚུབས་པ་ལྟ་བུ༔ འོག་ནས་དབྱར་གྱི་ས་རླངས་རྡོལ་བ་ལྟ་བུ༔ བར་ནས་སྦྲང་ཚང་ཞིག་པ་ལྟ་བུ་འུར་འུར་ཐིབ་ཐིབ་ཉི་ཞུལ་གྱི་རྡུལ་ལྟར་བྱོན་ནས་ཁྱེད་རང་རྣམས་ལ་གཉིས་སུ་མེད་པར་ཐིམ་པའི་མོས་པ་མཛོད༔ དྲིལ་བུའི་དབྱངས་ཀྱིས༔ ཧཱུྃ༔ བྱིན་ཆེན་ངོ་མཚར་མཆོག་གི་གནས༔ ཕུན་ཚོགས་ཞིང་ཁམས་རྒྱ་མཚོ་ནས༔ ཡེ་ཤེས་ལྷ་ཚོགས་མ་ལུས་ཀུན༔ བྱིན་གྱིས་བརླབ་ཕྱིར་གཤེགས་སུ་གསོལ༔ སྐུ་ཡི་གཟི་མདངས་ཡ་ལ་ལ༔ གསུང་གི་ཛབ྄་དབྱངས་འུ་རུ་རུ༔ ཐུགས་ཀྱི་བྱིན་རླབས་ཐིབས་སེ་ཐིབ༔ དངོས་གྲུབ་རྣམ་གཉིས་དབང་བསྐུར་སྩོལ༔ ཨོཾ་ཨཱཿ བུདྡྷ་ ནཱ་གེནྟྲ་རཱ་ཛ་ཧཱུྃ༔ ས་པ་རི་ཝཱ་ར་བཛྲ་ས་མ་ཡ་ཛ་ཛཿ ཛཿ ཧཱུྃ་བྃ་ཧོཿ ཨཱ་ཝེ་ཤ་ཡ་ཨ་ཨཱཿ བྱིན་ཕབ་པའི་ཡེ་ཤེས་པ་རྣམས་སློབ་མ་རྣམས་དང་དབྱེར་མེད་དུ་གྱུར༔ ཏིཥྛ་བཛྲ༔ ཞེས་རྡོ་རྗེ་སྤྱི་བོར་རྒྱ་གྲམ་བཞག་ལ་ནས་འཐོར། སློབ་དཔོན་གྱི་ཐུགས་ཀ་ནས་འོད་ཟེར་འཕྲོས༔ དབང་གི་ལྷ་ཚོགས་ནམ་མཁའ་གང་བར་སྤྱན་དྲངས་པ་རྣམས་ཀྱིས་རིན་པོ་ཆེའི་བུམ་པ་བདུད་རྩིའི་ཆུས་གང་བས་དབང་བསྐུར་བའི་མོས་པ་མཛོད༔ ཧཱུྃ༔ རིན་ཆེན་བུམ་པ་ཐར་ལམ་གཞལ་ཡས་ཁང་༔ རིགས་འདུས་སྐུ་ལས་བྱིན་རླབས་བདུད་རྩི་བབ༔ སྐལ་ལྡན་དབང་བསྐུར་ཕུང་ཁམས་ཡེ་ཤེས་སྨིན༔ སངས་རྒྱས་ཀུན་འདུས་སྐུ་ཡི་དབང་ཐོབ་ཤོག༔ ཨོཾ་ཨཱཿ བུདྡྷ་ནཱ་གེནྟྲ་རཱ་ཛ་ཧཱུྃ༔ ཀཱ་ཡ་ཨ་བྷི་ཥིཉྩ་ཨོཾ༔ བུམ་པ་སྤྱི་བོར་བཞག་ལ་བུམ་ཆུ་བླུད། དེས་སངས་རྒྱས་ཀླུ་དབང་རྒྱལ་པོའི་
སྐུའི་དབང་ཐོབ༔ ལུས་ཀྱི་སྒོ་ནས་བསགས་པའི་སྡིག་སྒྲིབ་དག༔ འབྲས་བུ་སྤྲུལ་སྐུ་ཐོབ་པའི་ས་བོན་སྨིན་པ་ཡིན་ནོ༔ སློབ་དཔོན་གྱི་མགྲིན་པ་ནས་འོད་ཟེར་འཕྲོས། མདུན་བསྐྱེད་རྒྱལ་བ་རབ་འབྱམས་ཀྱི་གསུང་གི་བྱིན་རླབས་ཐམས་ཅད་ཀླུ་དབང་རྒྱལ་པོའི་རྩ་སྔགས་ཀྱི་རྣམ་པར་བྱོན་ནས༔ ཁྱེད་རང་རྣམས་ཀྱི་མགྲིན་པ་ནས་ཞུགས༔ ཐུགས་ཀའི་སྔགས་ཕྲེང་ལ་ཐིམ་པར་བསམ་ལ་སྔགས་འདིའི་རྗེས་ཟློས་གྱིས༔ ཕྲེང་བ་གཏད་ལ། ཏདྱ་ཐཱ༔ ཨོཾ་ཏ་ཐཱ་ག་ཏོ་བྷ་ག་ཝན་ནཱ་ག་ར་ཛེ་ཤྭ་ར་ཨ་དྷིཥྛ་ན་ཨ་དྷིཥྛི་ཏེ་སྭཱ་ཧཱ། ལན་གསུམ། སྔགས་ཕྲེང་མགྲིན་པར་བཞག་ལ། ཧཱུྃ༔ དངོས་གྲུབ་སྙིང་པོ་གསུང་གི་བྱིན་རླབས་ཀུན༔ སྔགས་ཀྱི་ཕྲེང་བ་གསང་སྔགས་རང་སྒྲ་སྒྲོགས༔ སྐལ་ལྡན་དབང་བསྐུར་ངག་གི་གྲགས་སྟོང་སྨིན༔ སངས་རྒྱས་ཀུན་གྱི་གསུང་གི་དབང་ཐོབ་ཤོག༔ ཨོཾ་ཨཱཿ་བུདྡྷ་ནཱ་གེནྟྲ་རཱ་ཛ་ཧཱུྃ༔ ཝཱཀ་ཨ་བྷི་ཥིཉྩ་ཨཱཿ དེས་སངས་རྒྱས་ཀླུ་དབང་རྒྱལ་པོའི་གསུང་གི་དབང་ཐོབ༔ ངག་གི་སྡིག་སྒྲིབ་དག༔ འབྲས་བུ་ལོངས་སྐུའི་ས་བོན་སྨིན་པ་ཡིན་ནོ༔ སློབ་དཔོན་གྱི་ཐུགས་ཀ་ནས་འོད་ཟེར་འཕྲོས༔ མདུན་བསྐྱེད་རྒྱལ་བ་རབ་འབྱམས་ཀྱི་ཐུགས་ཀྱི་བྱིན་རླབས་ཐམས་ཅད༔ ཀླུ་དབང་རྒྱལ་པོའི་ཐུགས་ཉི་ཟླ་ཕྱག་མཚན་གྱི་རྣམ་པར་བྱོན་ནས་རྡོ་རྗེ་ལ་ཐིམ༔ དེས་ཁྱེད་རང་རྣམས་སྙིང་གར་དབང་བསྐུར་བའི་མོས་པ་མཛོད༔ རྡོ་རྗེ་སྙིང་གར་བཞག་ལ། ཧཱུྃ༔ མི་གཡོ་ཆོས་དབྱིངས་ཡེ་ཤེས་ཀུན་ཀློང་ནས༔ སྐད་ཅིག་མྱུར་ལམ་རྡོ་ རྗེ་སྙིང་པོའི་དོན༔ སྐལ་ལྡན་དབང་བསྐུར་རྒྱལ་བའི་དགོངས་ཀློང་སྨིན༔ སངས་རྒྱས་ཀུན་གྱི་ཐུགས་ཀྱི་དབང་ཐོབ་ཤོག༔ ཨོཾ་ཨཿབུདྡྷ་ནཱ་གེནྟྲ་རཱ་ཛ་ཧཱུྃ༔ ཙིཏྟ་ཨ་བྷི་
ཥེཉྩ་ཧཱུྃ༔ དེས་སངས་རྒྱས་ཀླུ་དབང་རྒྱལ་པོའི་ཐུགས་ཀྱི་དབང་ཐོབ་ཤོག༔ ཡིད་ཀྱི་སྡིག་སྒྲིབ་ཐམས་ཅད་དག་འབྲས་བུའི་ཆོས་སྐུའི་ས་བོན་སྨིན་པ་ཡིན་ནོ། །སློབ་དཔོན་གྱི་གནས་ལྔ་ནས་འོད་ཟེར་འཕྲོས༔ མདུད་བསྐྱེད་དང་རྡུལ་སྙེད་ཞིང་གི་ལྷ་ཚོགས་ཀྱི་མཁྱེན་བརྩེ་ནུས་པའི་བྱིན་རླབས་ཐམས་ཅད་སངས་རྒྱས་ཀླུ་དབང་རྒྱལ་པོའི་སྐུ་གསུང་ཐུགས་ཡོན་ཏན་ཕྲིན་ལས་ཡེ་ཤེས་ལྔའི་འོད་མདངས་སུ་བྱོན་ནས་ཕྱག་མཚན་རྡོ་རྗེ་འཁོར་ལོ་རིན་ཆེན་པདྨ་རྒྱ་གྲམ་ལྔ་ལ་ཐིམ༔ དེས་ཁྱེད་རང་རྣམས་ཀྱི་གནས་ལྔར་དབང་བསྐུར་བའི་མོས་པ་མཛོད༔ ཙཀླི་ཐོགས་ལ། ཧཱུྃ༔ ཚད་མེད་བཀོད་པ་མཐའ་ཡས་རྒྱལ་ཀུན་གྱི༔ སྐུ་ལྔའི་ཡོན་ཏན་བདེ་བླག་སྨིན་པའི་རྫས༔ སྐལ་ལྡན་དབང་བསྐུར་སྐུ་བཞིའི་ཡེ་ཤེས་བརྙེས༔ སངས་རྒྱས་ཀུན་གྱི་གོ་འཕང་དབང་ཐོབ་ཤོག༔ ཨོཾ་ཨཱཿ བུདྡྷ་ནཱ་གེནྟྲ་རཱ་ཛ་ཧཱུྃ༔ སརྦ་སིདྡྷི་ཨ་བྷི་ཥིཉྩ་ཧྲཱིཿ ཞེས་ལག་ཏུ་གཏད༔ དེས་ཀླུ་དབང་རྒྱལ་པོའི་ལྷན་སྐྱེས་ཡེ་ཤེས་ཀྱི་དབང་ཐོབ༔ སྒོ་གསུམ་ཐ་དད་དུ་འཛིན་པའི་སྒྲིབ་པ་དག༔ འབྲས་བུ་ངོ་བོ་ཉིད་སྐུ་འགྲུབ་པ་ཡིན་ནོ༔ གཏོར་མ་འདི་ནི་ཕྱི་འབྲུ་སྨན་ལས་གྲུབ་པ་ཡེ་ཤེས་ཀྱི་བདུད་རྩི། མཆོད་ན་ལྷ་ཚོགས་དགྱེས་པའི་ཞལ་ཟས༔ སྒྲུབ་རྟེན་རྒྱལ་བ་ཡོངས་ཀྱི་ངོ་བོ༔ བྱིན་རླབས་དངོས་གྲུབ་འདུ་བའི་ཕུང་པོ༔ སངས་རྒྱས་བྱང་ཆུབ་སེམས་དཔའ་རྒྱལ་བ་རྩ་གསུམ་ཐམས་ཅད་ཀྱི་ཕྲིན་ལས་འདུས་པ་སངས་རྒྱས་ཀླུའི་དབང་ཕྱུག་རྒྱལ་པོ་གཙོ་འཁོར་གྱི་གཟི་འོད་འབར་བའི་གཏོར་མས་མཐའ་བརྟེན་བཀའ་བསྒོ་བ་དང་༔ བྱིན་གྱིས་བརླབས་པས་དངོས་གྲུབ་ཐོབ་པར་མོས༔ ཧཱུྃ༔ རྒྱལ་བ་རིགས་ལྔ་
ཡེ་ཤེས་བདུད་རྩིའི་འཕྲུལ༔ སྙིང་པོ་སྨིན་གྲོལ་ཀུན་གྱི་ཕྲིན་ལས་གཞི༔ སྐལ་ལྡན་དབང་བསྐུར་ལྷག་པའི་ལྷ་མཆོག་གི༔ ངོ་བོར་སྨིན་ནས་གཞན་ཕན་ཀུན་འགྲུབ་ཤོག༔ ཨོཾ་ཨཱཿ བུདྡྷ་ནཱ་གེནྟྲ་རཱ་ཛ་ཧཱུྃ༔ ཀཱ་ཡ་ཝཱཀ་ཙིཏྟ་བ་ལིང་ཏ་ཨ་བྷི་ཥིཉྩ་ཧཱུྃ༔ ཞེས་གཏོར་མ་སྤྱི་བོར་བཞག༔ རྒྱལ་བ་དགོངས་པའི་བརྒྱུད་པ། རིག་འཛིན་བརྡའི་བརྒྱུད་པ། གང་ཟག་སྙན་ཁུང་བརྒྱུད་པ། གཏེར་ཆོས་སྨོན་ལམ་བརྒྱུད་པ། བཀའ་བབས་དོན་གྱི་བརྒྱུད་པ་བར་མ་ཆད་པ། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། མཁའ་འགྲོ་ཡེ་ཤེས་མཚོ་རྒྱལ། ལོ་ཙཱ་རྒྱལ་བ་མཆོག་དབྱངས། གཏེར་སྟོན་བསམ་གཏན་གླིང་པ། ཆོས་བདག་གྲུབ་དབང་དཔལ་ལྡན་ཆོས་རྒྱལ། དྲིན་ཅན་རྩ་བའི་བླ་མའི་བར་དུ་བྱོན་པ་རྣམས་དང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀླུའི་དབང་ཕྱུག་རྒྱལ་པོ་སྤྲུལ་པ་འཁོར་ཚོགས་དང་། ཞིང་ཁམས་རབ་འབྱམས་ཀྱི་སངས་རྒྱས་ཐམས་ཅད་ཀྱིས་བྱིན་གྱིས་རློབས་ཤིག །ཡེ་ནས་བསགས་པའི་སྡིག་སྒྲིབ་ཐམས་ཅད་བྱང་ཞིང་དག་པ་དང་། ཁྱད་པར་ཀླུ་གཉན་ས་བདག་གིས་གནོད་པའི་ནད་གདོན་རྐྱེན་ངན་བར་ཆད་ཐམས་ཅད་ཞི་བ་དང་། གནས་སྐབས་འདིར་ཚེ་ནོར་ཆོས་གསུམ་རྒྱས་ཤིང་མཐར་ཐུག་ས་བཅུ་ལམ་ལྔ་མྱུར་དུ་རྫོགས་ནས་སངས་རྒྱས་ཉིད་ཀྱི་གོ་འཕང་ཐོབ་པར་བྱིན་གྱིས་བརླབ་ཏུ་གསོལ། རྩ་སྔགས་མཐར། ཧྲཱིཿ སྭཱ་ཧཱ་ཧཱུྃ་སྭཱ་ཧཱཿ ཛཿ ཧཱུྃ་བྃ་ཧོཿ ལྷ་ཚོགས་རྣམས་འོད་དུ་ཞུ་ནས་སློབ་མ་ལ་ ཐིམ་པར་གྱུར༔ དེ་ནས་ཚིག་དབང་ངོ་སྤྲོད་དོན་བསྡུས་ནི། ཨཱཿ འོད་གསལ་སེམས་ཀྱི་དཀྱིལ་
འཁོར་འདི༔ ཨ་ནི་སྐྱེ་མེད་ཡེ་ཤེས་ལུས༔ བུ་ཁྱོད་སེམས་ཀྱི་ངོ་བོ་བསྟན༔ དྲན་རིག་ལྟོས་ལ་ཅི་གནས་ཞོག༔ མ་བཅོས་ཡེངས་མེད་ངང་ལ་སྐྱོངས༔ དུག་ལྔའི་ངོ་བོ་བལྟས་པས་སྟོང་༔ ཡེ་ལྔ་ཡིན་ནོ་འཇིགས་ཚོགས་གང་༔ སྟོང་ཉིད་གཞོམ་མེད་སངས་རྒྱས་པའོ༔ དེ་ནས་དབང་བསྐུར་ནས་མངའ་གསོལ་བ་ནི། བཀྲ་ཤིས་རྫས་བརྒྱད་རྒྱལ་སྲིད་སྣ་བདུན་གྱིས་དབང་བསྐུར་བས༔ སྔོན་རབས་མདོ་སྔགས་སྟོན་པ་རྣམས་ལ་མི་དབང་བདུན་གྱི་རྟེན་འབྲེལ་གྱིས་ལེགས་འབྱུང་ཡོན་ཏན་འབྱུང་བ་ལྟར་རྒྱལ་བུ་རྒྱལ་སར་བཏོན་བཞིན་ཐེག་ཆེན་ཡང་གསང་བླ་མེད་ཀྱི་དབང་མཆོག་དམ་པ་ཐོབ་པར་གྱུར་ཅིག༔ རྟགས་བརྒྱད་ཐོགས་ལ། ཧྲཱིཿ གསེར་གདུགས་དྲི་མེད་ཀུན་སྐྱོབ་པ༔ རྒྱལ་མཚན་ཐེག་ཆེན་ཆོས་འཁོར་བསྐོར༔ དུང་དཀར་སྙན་གྲགས་ཕྱོགས་བཅུར་སྒྲོགས༔ ནོར་བུས་དགོས་འདོད་ཀུན་འབྱུང་མཆོག༔ འཁོར་ལོས་སྲིད་པའི་མཚོ་ལས་བསྒྲལ༔ དཔལ་བེའུས་འདོད་རྒུ་སྟོབས་རྒྱས་པ༔ གསེར་ཉས་ཤེས་རབ་མིག་མཆོག་འབྱེད༔ བུམ་པས་ཆོས་ནོར་གཏེར་ཆེན་དབང་༔ བཀྲ་ཤིས་རྫས་བརྒྱད་དབང་བསྐུར་བས༔ རྒྱལ་སྲིད་བུ་ལ་བསྐོས་པ་བཞིན༔ ཐེག་ཆེན་ཡང་གསང་བླ་མེད་ཀྱི༔ དབང་མཆོག་དམ་པ་ཐོབ་པར་ཤོག༔ དེ་ནས་རྒྱལ་སྲིད་སྣ་བདུན་ཐོགས་ལ༔ ཧྲཱིཿ སྲིད་པའི་མཚོ་སྒྲོལ་འཁོར་ལོ་རིན་པོ་ཆེ༔ དབུལ་བའི་གདུང་སེལ་དགོས་འདོད་ནོར་བུ་མཆོག༔ བདེ་སྟོང་སྦྱོར་ལྡན་བཙུན་མོ་མཛེས་ལྡན་མ༔ བསོད་ནམས་རྒྱས་པར་སྦྱོར་བ་མི་ཡི་དབང་༔ མྱུར་ལམ་ས་ཆེན་བསྒྲོད་པ་ཤུགས་
ལྡན་རྟ༔ འཁོར་བའི་གནས་ནས་རབ་སྒྲོལ་གླང་པོ་ཆེ༔ ཉོན་མོངས་གཡུལ་ལས་རྒྱལ་བའི་དམག་དཔོན་རྣམས༔ དེང་འདིར་སྐལ་ལྡན་རིགས་ཀྱི་བུ་ཁྱོད་ལ༔ རྒྱལ་སྲིད་སྣ་བདུན་དབང་བསྐུར་མངའ་གསོལ་བས༔ སྔོན་རབས་མཉམ་མེད་མདོ་སྔགས་སྟོན་པ་རྣམས༔ མི་དབང་བདུན་གྱི་རྟེན་འབྲེལ་ཡོན་ཏན་བཞིན༔ ལེགས་འབྱུང་རྒྱལ་བ་རྣམས་དང་དབྱེར་མེད་ཤོག༔ ཨོཾ་རཱ་ཛྱ་སཔྟ་མངྒ་ལཾ་ཨ་བྷི་ཥིཉྩ་ཧཱུྃ༔ བཀྲ་ཤིས་ནི༔ དེ་ནས་བླ་མ་ཡི་དམ་མཁའ་འགྲོ་ཆོས་སྐྱོང་རྣམས་ཀྱིས་བཀྲ་ཤིས་ཀྱི་གླུ་དབྱངས་བརྗོད༔ རོལ་མོ་སྒྲོགས༔ མེ་ཏོག་གི་ཆར་འབེབས་པའི་མོས་པ་མཛོད༔ ཨེ་མ་ཧོཿ ཆོས་སྐུའི་བཀྲ་ཤིས་ཉི་འོད་གཟི་འབར་བ༔ ཀུན་ཁྱབ་མུན་པ་སེལ་བའི་བཀྲ་ཤིས་ཤོག༔ ལོངས་སྐུའི་བཀྲ་ཤིས་སྣོད་ཀྱི་དཔལ་འབྱོར་རྒྱས༔ ནང་བཅུད་སེམས་ཅན་བདེ་སྐྱིད་བཀྲ་ཤིས་ཤོག༔ སྤྲུལ་སྐུའི་བཀྲ་ཤིས་དགོས་འདོད་ནོར་བུ་མཆོག༔ འགྲོ་ཀུན་སྟོབས་འབྱོར་རྒྱས་པའི་བཀྲ་ཤིས་ཤོག༔ རྩ་གསུམ་བཀྲ་ཤིས་སྨིན་གྲོལ་ཆོས་ཀྱི་སྒོ༔ མཁའ་ཁྱབ་རྫོགས་སངས་རྒྱས་པའི་བཀྲ་ཤིས་ཤོག༔ དེ་ལྟར་དབང་བཞི་རྫོགས་པར་ཐོབ་ནས༔ གསང་སྔགས་རྡོ་རྗེ་ཐེག་པའི་དམ་ཚིག་རྣམས་ཁས་བླངས་པ་ལྟར་བསྲུང་དགོས་ཤིང་༔ བློ་བླ་མ་དཀོན་མཆོག་ལ་གཏད༔ བྱ་བ་ཕ་མ་སེམས་ཅན་གྱི་དོན་དུ་སྐྱབས་སེམས་ཆོས་སྤྱོད་བཅུ་འཁྱེར་སོ་གསུམ་མི་བྲལ་བས་ཉིན་མཚན་སྐྱོང་སྙམས་པས་འདིའི་རྗེས་ཟློས་མཛོད༔ རྡོ་རྗེ་འཛིན་པའི་བཀའ་བཞིན་བསྒྲུབ༔ དེ་དག་ཐམས་ཅད་བདག་གིས་བགྱི༔ ཁྱེད་ལ་བདག་འབུལ་རྗེས་འཛིན་ཚེ༔ ཁྱེད་མཆོད་སྙིང་གི་ཐིག་ལེར་གཟུང་༔ དབང་
ལེགས་པར་ཐོབ་པའི་བཀའ་དྲིན་གཏང་རག་ཏུ་མཎྜལ་ཕུལ༔ ས་གཞི་སྤོས་སོགས། དེ་ལྟར་དབང་ཐོབ་པའི་དགེ་རྩ་སེམས་ཅན་གྱི་དོན་དུ་བསྔོ་བར་ཞུ༔ བསོད་ནམས་འདི་ཡིས་སོགས། སློབ་མ་རྣམས་རང་གནས་སུ་བཏང་། དབང་རྒྱས་པར་སྤྲོ་ན། ཟུར་རྒྱན་སྤྲད་དེ་ཙཀླི་བསྐུར་བ་དང་། བསྡུ་ན་རྗེས་གནང་ཕྱེད་པ་སོགས་ཀྱང་ཤེས་པར་བྱའོ། །བཞི་པ་རྗེས་ཀྱི་རིམ་པ་མཆོད་བསྟོད་ནི། མཆོད་པ་ཁ་གསོ། ཨོཾ་ཨཱཿ བུདྡྷ་ནཱ་གེནྟྲ་རཱ་ཛ་ཧཱུྃ༔ ས་པ་རི་ ཝཱ་ར་ཨཾ་ནས་ཤབྡ་པྲ་ཏཱིཙྪ་སྭཱ་ཧཱ། བསྟོད་པར་འོས་པ་སོགས། བཤགས་པ་ནི། མ་རྙེད་ཡོངས་སུ་སོགས། ཡིག་བརྒྱ་བཟླ། བསྡུ་རིམ་ནི། ཨོཾ་འཁོར་འདས་སྣང་རིག་བསྐྱེད་རྫོགས་ཟུང་འཇུག་ལ༔ ཐམས་ཅད་སྟོང་གསལ་མ་འགགས་ཆོས་དབྱིངས་ཀློང་༔ ཨཱཿ ཡིག་མཐའ་བྲལ་ཡེ་དབྱིངས་གཤེགས་པའི་འཕྲུལ༔ དམ་ཚིག་རང་སྣང་ཧཱུྃ་ལས་འཇིག་རྟེན་མཱུ༔ བསྔོ་བ་ནི། ན་མོ། དཀྱིལ་འཁོར་ལྷ་ཚོགས་བསྒྲུབ་པའི་དགེ་བ་གང་༔ འགྲོ་ཀུན་སྒྲིབ་གཉིས་དག་ནས་སྨིན་གྲོལ་ཤོག༔ བདག་གིས་རྫོགས་པ་སྤྱིར་ཆིབས་སར་འགོད་པའི༔ ཀུན་ཀྱང་བྱང་ཆུབ་སྟོན་པའི་སློབ་དཔོན་ཤོག༔ བཀྲ་ཤིས་ནི། ཧཱུྃ༔ སྐུ་གསུམ་བླ་མའི་སྨིན་གྲོལ་བྱིན་རླབས་དང་༔ རྩ་གསུམ་རྒྱ་མཚོའི་དངོས་གྲུབ་འབྱུང་བའི་དཔལ༔ ཟབ་ལམ་མཁའ་འགྲོ་སྙིང་ཐིག་ནུས་མཐུ་ཡིས༔ ཀུན་ཁྱབ་བདེ་སྐྱིད་རྒྱས་པའི་བཀྲ་ཤིས་ཤོག༔ དུས་ངན་སྙིགས་མའི་ལྔ་བདོར་འོག་གདོན་གྱིས། འཚེ་བ་ཆེ་ཕྱིར་ལྷ་མཆོག་འདི་ཉིད་ཀྱི། །བྱིན་རླབས་ཐོབ་ན་ནད་གདོན་བགེགས་རིགས་ཞི། །དེ་ཕྱིར་ལམ་མཆོག་འདི་ལ་ཉམས་ལེན་མཛོད། །འོན་ཀྱང་རྙིང་ཕྱོགས་བརྒྱུད་པ་ཆེས་ཕྲ་ཞིང་། །གཏེར་བརྒྱུད་དཀོན་པས་འདི་ནི་བྱིན་རླབས་ཀྱི། །ཚན་ཁ་མ་ཉམས་བརྒྱུད་པ་ཟམ་མ་ཆད། །རང་ལུགས་དྲི་མེད་ཡིད་ཆེས་གནས་སུ་འོས། །ཞེས་ཀླུ་དབང་རྒྱལ་པོ་ལྷ་ལྔའི་
སྒྲུབ་ཐབས་དབང་བཅས་ནད་བརྒྱ་སེལ་བའི་སྨན་གཅིག་འདི། རྡོ་རྗེ་འཛིན་པ་མཆོག་གི་སྤྲུལ་སྐུ་ཀཿ ཐོག་པད་འགུར་ནས་གསུང་བསྐུལ་དོན་ལྡན་དུ་བསམ། ཤཱཀྱའི་དགེ་སློང་ཞེ་ཆེན་པ་འགྱུར་མེད་མཐུ་སྟོབས་རྣམ་རྒྱལ་དཔལ་བཟང་པོས་རང་གནས་བདེ་བ་ཅན་གྱི་ཕོ་བྲང་དུ་སྦྱར་བའི་ཡི་གེ་པ་ནི་ལྡང་རིགས་ཤཱཀྱའི་དགེ་སློང་ལྔ་རིག་སྨྲ་བ་པདྨ་རྒྱལ་མཚན་ནོ། །སརྦ་མངྒ་ལམ།། །། གཏེར་ཚེག་དང་ཤད་མ་ནོར་བ་གལ་ཆེ། ཞུས་སོ།།