བདེ་ཆེན་ཞིང་སྒྲུབ་ཀྱི་སྒོ་ནས་ཕུང་པོ་བསྲེག་ཆོག་ལྔ་ལྡན་འོད་འབར་ངན་སོང་རྒྱུན་གཅོད།
བདེ་ཆེན་ཞིང་སྒྲུབ་ཀྱི་སྒོ་ནས་ཕུང་པོ་བསྲེག་ཆོག་ལྔ་ལྡན་འོད་འབར་ངན་སོང་རྒྱུན་གཅོད་བཞུགས་སོ། །ན་མཿ གུ་རུ་ཤྩཱ་བྷེ་དཱ་མི་དེ་ཝཱ་ཡ། སྤྲོས་བྲལ་ཆོས་སྐུ་འོད་དཔག་མེད་པ་ཉིད། །མ་འགགས་རང་གསལ་ལོངས་སྐུ་སྙིང་རྗེའི་ལྷ། །གང་འདུལ་དེར་འཚམ་སྤྲུལ་སྐུ་ཐོད་ཕྲེང་རྩལ། །དབྱེར་མེད་བསམ་གཏན་གླིང་པར་གུས་ཕྱག་འཚལ། །མགོན་དེའི་སྐུ་གསུང་ཐུགས་ཀྱི་རྒྱལ་ཚབ་ཏུ། །དོན་བརྒྱུད་དགོངས་པས་བྱིན་བརླབས་སྣང་བཞིའི་ལམ། །མཐར་ཕྱིན་དཔལ་ལྡན་ཆོས་རྒྱལ་གྲུབ་རིག་འཛིན། །རང་རིག་ངོ་བོར་དབྱེར་མེད་སྙིང་ནས་འདུད། །
དམ་པ་མཆོག་དེས་རྗེས་བཟུང་ལམ་འདི་ཡི། །སྨིན་གྲོལ་གདམས་པ་ཉམས་སུ་བླངས་པའི་འབྲས། །གཞན་དོན་མིང་བཞིའི་ཕུང་པོ་བསྲེག་བླུགས་ཀྱིས། །ཚོགས་གཉིས་སྤེལ་བའི་ཐབས་འདི་འཆད་པར་སྤྲོ། །འདིར་བདེ་ཆེན་ཞིང་སྒྲུབ་ཀྱི་དཀྱིལ་འཁོར་དུ་ཚོགས་གཉིས་གསོག་པའི་ཕྲིན་ལས་མཆོག་ཏུ་གྱུར་པ་བསྲེག་བླུགས་ཀྱི་ཆོ་ག་བསྒྲུབ་པ་ལ་གང་གིས་སྒྲུབ་པའི་གང་ཟག་དང་། དེས་བསྒྲུབ་པའི་ཆོ་གའོ། །དང་པོ་ནི། འདི་ཉིད་ཀྱི་དཀྱིལ་འཁོར་དུ་དབང་ཐོབ་ཅིང་། དམ་ཚིག་ལ་གནས་པ་བསྙེན་སྒྲུབ་མཐར་ཕྱིན་ཅིང་དྲོད་ཚད་ཐོབ་པ་སྙིང་རྗེས་བློ་སྦྱངས་པ་བསྒྲུབ་བྱའི་ལས་ལ་མཁས་ཤིང་རང་དབང་དུ་སྤྱོད་པའི་གང་ཟག་གིས་སོ། །སྦྱོང་རྒྱུད་ལས། ངན་སོང་གསུམ་གྱི་སྡུག་བསྔལ་ལས། །སེམས་ཅན་རྣམས་ནི་སྒྲོལ་བྱའི་ཕྱིར། །སྔགས་མཁན་གཞན་ལ་ཕན་བརྩོན་ཞིང་། །སྙིང་རྗེ་ཅན་གྱིས་དབང་བསྐུར་རོ། །ཞེས་སོ། །གཉིས་པ་དེས་བསྒྲུབ་པའི་ཆོ་ག་ལ་གང་ཟག་དམན་པ་དང་མཆོག་གི་དབང་དུ་བྱ་བ་གཉིས་སོ། །དང་པོ་ལ་སྦྱིན་སྲེག་དང་། དེའི་ཡན་ལག་གཞན་བསྟན་པའོ། །དང་པོ་ལ། སྤྱིར་སེམས་ཅན་འཆི་ཁ་མར་དབང་བསྐུར་སྡིག་སྦྱོང་། རྐྱེན་སེལ་གསོན་རིམ་གྱིས་མི་ཕན་པར་མཐོང་ཕྱིན། སྡིག་སྦྱོང་དབང་བསྐུར་འཕོ་ལུང་ངོ་སྤྲོད་མྱོང་གྲོལ་དམ་རྫས་བྱིན་རྟེན་སྦྱིན་པ་སོགས་དབང་པོ་གསལ་སྐབས་གནད་ཆེ་ཞིང་ཉམས་ལེན་ཡོད་རིགས་ལ་ཐིམ་རིམ་སྐོར་ཡང་བསླབ་བྱས་ངོ་སྤྲད་ཅིང་ཤུལ་དུ་ཆགས་ཞེན་མི་བྱ་བར་གདམས། སྤྱི་གཙུག་ནས་སྐྲ་འཐེན་ཞིང་བདེ་བ་ཅན་དང་སངས་རྒྱས་འོད་དཔག་མེད་ལ་རིག་པ་མ་ཡེངས་པར་གཏོད་ཅེས་བརྡ་སྦྱར་ཞིང་། བསམ་སེམས་མཐུན་པའི་མཛའ་གྲོགས་དང་བླ་མས་ཕྱི་དབུགས་ཆད་སྐབས་རྣ་དྲུང་ནས་སྐད་འཇམ་པོའི་འབོད་ནས་ཤི་བར་བརྡ་འཕྲོད་པར་བྱ། དྲོད་མ་ལྡོག་བར་བསྒུལ་བསྐྱོད་
མི་བྱེད་ཅིང་། ལུས་སྨད་དུ་ཐུག་རེག་སྤངས། འཕོ་ལུང་ཕྱི་དབུགས་མ་ཆད་ཙམ་དུ་འདེབས་པའི་དུས་ཡིན། ཉམས་ལེན་ཡོད་པར་ཐུགས་དམ་སྡོད་རིགས་ལ་འཕོ་ལུང་མི་བྱེད་ཟེར་ཞག་གསུམ་སོང་བར་ཕྱི་འཐེན་བྱེད་ཀྱང་དེ་འདྲའི་རྣམ་རྟོག་དེ་དགོས་པ་ཆུང་ཞིང་འཕོ་ལུང་བྱས་པས་ཐུགས་དམ་ཡོད་པར་ཕན་པ་ལས་གནོད་པ་ཅི་ལ་ཡོད། འདི་སྐོར་འཕྲོས་དགོས་མང་པོ་ཡོད་ཀྱང་ཡི་གེས་འཇིགས་སོ། །གང་ལྟར་ཉམས་ལེན་ཅན་ལ་ངོ་སྤྲོད་སྐབས་བསྟུན། ཞག་གསུམ་ཉིན་ཆོས་ཉིད་བར་དོ་དང་སྲིད་པ་བར་དོ་སོགས་བཤད་པས་ངོ་སྤྲོད། དེ་རྗེས་གནས་ལུང་དབང་བསྐུར་སྡིག་སྦྱོང་སོགས་དགེ་རྩ་བསྒྲུབ། སྤྱིར་ཚེ་འདས་ལ་མངོན་ཤེས་ཕྲའུས་བླ་མཆོད་ཀྱི་བསམ་པ་ཤེས་པས་ཀུན་སློང་ངན་པ་མི་དགེ་བ་ཤར་ན་དད་པ་ལྡོག་རྐྱེན་ཡོང་བས་རང་གི་སེམས་རྒྱུད་ཚེ་འདས་ལ་ཕན་བསམ་གྱི་དྲན་པ་བསྟེན་པ་ནི་ཤིན་ཏུ་གལ་ཆེ། ཞག་གསུམ་སོང་ནས་སྲེག་ཆོག་བྱ་ཉེར། ཕུང་པོ་གཟུངས་སྔགས་བྱིན་ཅན་བཟླས་པའི་གཟུངས་ཆུ་དྲི་བཟང་ཅན་གྱིས་ཞིབ་པར་བསྐྲུས། ག་བུར་སོགས་བཟང་དྲུག་ཕྱི་མས་བྱུག་ཅིང་ཁར་བླུག །ཕུང་པོ་ལྔ་གདོད་ནས་རང་བཞིན་གྱིས་དག་པར་མོས། སྤྱི་བོར་ༀ། མགྲིན་པར་ཨཱཿ སྙིང་གར་ཧཱུྃ། ལྟེ་བ་ཏྲཾ། གསང་བར་ཧཱ། སྙིང་གར་སོར་འབྲང་དང་བཏགས་གྲོལ་འཁོར་ལོ་ཡིག་ངོས་ཤ་ལ་བསྟན་པར་བཅིངས་པ་དང་། ཞིང་སྒྲུབ་གཙོ་འཁོར་རྩ་སྔགས་ཚང་མ། སངས་རྒྱས་སྟོང་གཟུངས། ༀ་རཏྣ་ཏྲ་ཡཱ་ཡ་ༀ་མཻ་ཏྲི་མཻ་ཏྲི་མ་ཧཱ་མཻ་ཏྲི་སྭཱ་ཧཱ། ཞེས་པ་རྣམས་དྲི་བཟང་གིས་བྲིས་པའི་ཤོག་བུ་སྦྲང་དང་མར་གྱིས་སྦྱར། རབ་བྱུང་ཡིན་ན་ཆོས་གོས་དང་། ཁྱིམ་པ་ལ་དགོས་དཀར་པོས་གྲིལ་ནས་གོས་རས་སེར་པོ་ལ་པད་འདབ་བརྒྱད་བྲིས་པའི་སྟན་ལ་བཞག །སྙིང་གར་གཟུངས་ཐག་བཏགས་པ་ཕྱིར་དྲངས། པུར་ཁེབས་དར་རས་གོས་སོགས་སྔོན་པོ་འཁོར་ལོ་རྩིབས་བརྒྱད་བྲིས་པས་བཀབ། ཧྲིཿ བི་ཏྲཾ་ཨ་ར་མ་དྷ་ཤཔྟ༔ ཞེས་བརྗོད། དེ་ནས་གནས་སྦྱོང་ཁྲུས་ཆོག་གནད་སྨིན་བསྐུར་ཟིན་ནས། ཕུང་པོ་འོད་དཔག་མེད་པར་བསྐྱེད་
དེ་མཆོད་བསྟོད་བསྡུས་ཙམ་བྱས་ནས་གཙོ་འཁོར་རྩ་སྔགས་མཐར་སྤེལ་ཚིག་སྦྱར་བ་བརྒྱ་སྟོང་བཟླས་བཞིན་གཟུངས་ཐག་ལ་བརྟེན་པ་ནི་རོ་བསྙེན་གྱི་ཚུལ་ཏེ། སྦྱོང་རྒྱུད་ལས། རོ་ལ་སྔགས་ཀྱིས་བཏབ་ནས་ཀྱང་། །ཆུ་མཆོག་གིས་ནི་བསྐྲུས་ནས་ནི། །བཟླས་པའི་དྲི་ཡིས་བྱུགས་པར་བྱ། །གོས་དང་བརྒྱན་གྱིས་བཀླུབས་ནས་ནི། །སྔགས་ཀྱིས་བཏབ་པའི་བདུག་པས་བདུག །མེ་ཏོག་ཕྲེང་བ་ལ་སོགས་མཆོད། །ཅེས་གསུངས་པ་བཞིན་ནོ། །སྦྱིན་བསྲེག་དངོས་ལ་སྔོན་འགྲོ་དངོས་གཞི་རྗེས་གསུམ། དང་པོ་བདག་གི་རྣལ་འབྱོར་བཟླས་པའི་མཐར་བུམ་པ་ཟུང་སྒྲུབ། གཏེར་སྲུང་མཆོད་པ་དང་ཚོགས་མཆོད་ལྷག་མའི་མཇུག་བར་མཛད་ནས། གང་དུ་བསྲེག་ཆོག་བྱ་བའི་གནས་དེར་ཕྱིན་ནས་ལྔ་སེར་སོགས་མེད་པར་ཕྱོག་གཙང་ལ་ཁ་གྱུ་ནས། གཞི་དེར་མཆོད་པ་རྣམ་ལྔ་དང་། དཀར་ཟླུམ་གཉིས་གསེར་སྐྱེམས་བཤམས། ལས་བུམ་དང་། དྲི་བཟང་ཆུ་རྡོར་དྲིལ་སོགས་དགོས་ཆས་ཚང་བར་བྱ། ཆོས་གོས་གསུམ་ཞྭ་བཅས་རྒྱ་ཁྲི་སྟེང་དུ་གདིང་བ་ལ་འདུག །ཚིག་བདུན་གསོལ་འདེབས་སྔོན་འགྲོས་ལས་བུམ་ཆབ་བཅས། ༀ་བཛྲ་ས་ཏྭ་ཧཱུྃ་ཨཱཿས་བསངས། ༀ་སྭ་བྷ་ཝ་ཤུ་དྷཿ སརྦ་དྷརྨཱཿ སྭ་བྷཱ་ཝ་ཤུདྷོ྅ཧཾཿ གིས་སྦྱངས། ཧྲཱིཿ རང་ཉིད་སྐད་ཅིག་མགོན་པོ་འོད་དཔག་མེད༔ མཚན་དཔེའི་རྒྱན་རྫོགས་དཔལ་འབར་གསལ་བའི་མདུན༔ ཁཾ་ལས་ས་ཡི་ལྷ་མོ་བུམ་འཛིན་སེར༔ རྒྱན་མཛེས་སྐུ་སྟོད་ཐོན་གསལ་རང་བཞིན་གྱི༔ ལྷ་མོ་འཁོར་བཅས་སྤྱན་དྲངས་གཉིས་མེད་གྱུར༔ ཁྱེད་ཀྱིས་དུས་གསུམ་སངས་རྒྱས་ཐམས་ཅད་ལ༔ ས་ཕུལ་དཔང་མཛད་འགྲོ་ཀུན་སྨིན་གྲོལ་བྱུང་༔ དེ་ཕྱིར་བདག་ལ་གཞན་དོན་ས་འདི་གནང་༔ ༀ་པྲི་ཐི་དཱེ་ཝཱི་བྷུ་མི་པ་ཏི་ས་པ་རི་ཝཱ་ར་ཨི་དམ་བ་ལ་ཏ་ཁ་ཁ་ཁཱ་ཧི་ཁཱ་ཧི༔ ལན་གསུམ་ཕུལ༔ ཨཾ་
ནས་ཤཔྟ་ཨཱཿ ཧཱུྃ༔ ཞེས་པས་མཆོད། ཀྱཻ༔ ལྷ་མོ་འཁོར་འདས་མཆོད་པས་རབ་དགྱེས་ནས༔ དམ་ཚིག་དགོངས་ནས་ས་འདིར་འགྲོ་དོན་སྤྱོད༔ ཞེས་གསོལ་ལྷ་མོ་ས་ལ་ཐིམ་པར་གྱུར༔ ས་བདག་ཚོགས་རྣམས་རང་རང་གནས་སུ་མུ༔ དེ་ནས་གཞི་བདག་གཏོར་མ་ལ༔ ༀ་ཨཱཿ ཧཱུྃ༔ འབྲུ་གསུམ་ལས་བྱུང་རོ་བརྒྱའི་ཞལ་ཟས་ལ༔ འདོད་ལྔ་མཁོ་དགུ་ལྡན་འདིར་འཛམ་གླིང་བོད༔ བདེ་ཆེན་ཉེ་འཁོར་གནས་པའི་གཞི་བདག་ཀུན༔ གཏོར་མ་འདིར་བཞེས་དགེ་བའི་སྡོང་གྲོགས་མཛོད༔ སརྦ་བྷཱུ་མི་པ་ཏི་གཙྪ༔ དེ་ནས་སྣང་སྲིད་དྲེགས་བྱེད་གསེར་སྐྱེམས་ལ༔ ༀ་ཨཱཿ ཧཱུྃ་ཧ་ཧོ་ཧྲཱིཿ འབྲུ་སྨན་བཅུད་ལྡན་ཕུན་ཚོགས་གསེར་སྐྱེམས་འདི༔ ནག་ཕྱོགས་གཞི་བདག་དྲེགས་པ་ལྷ་སྲིན་ཚོགས༔ ཀུན་ལ་འབུལ་བཞེས་རོ་སྲེག་ཆོ་ག་ལ༔ རུ་ང་ཕྲག་དོག་མ་མཛད་ཤེས་པར་མཛོད༔ སརྦ་རཏྣ་ཨ་མྲི་ཏ་ཁཱ་ཧི་ཁཱ་ཧི༔ བཛྲ་མུ༔ གསེར་སྐྱེམས་དང་གཏོར་མ་གཉིས་གཙང་སར་འབུལ། རྡོ་རྗེ་དང་བཅས་པའི་ལག་གཡས་ས་ལ་ཕབ་ནས་རྩ་སྔགས་དང་ཧ་ན་ཧ་ན་ཧཱུྃ་ཕཊ༔ བརྒྱ་རྩ་བཟླས་པས་སྦྱངས། དྲི་བཟང་གིས་ཆག་ཆག་གདབ་པས་ལས་རུང་དུ་བྱས་ནས་དེར་ཐབ་སྲེག་རྒྱར་འདོམ་གང་གྲུ་བཞིར་བརྩིགས་པའི་ཁར་བ་བྱུང་རྣམ་ལྔས་བྱུགས་ཚངས་སྐུད་ཀྱིས་ཐིག་བཏབ། དབུས་ནས་མཐོ་གང་ཟླུམ་པོར་བསྐོར་བའི་ཕྱིར་ཁ་ཁྱེར་སོར་བཞི་པ་རེ་བསྐོར། ཟླུམ་སྐོར་ནང་མར་རྡོ་རྗེའི་ཕྲེང་བས་བསྐོར་བའི་པདྨ་འདབ་བརྒྱད་གེ་སར་དང་བཅས་པའི་དབུས་སུ་ལྷ་མཚན་རྡོ་རྗེ་བཀོད། ཕྱིའི་གྲྭ་བཞིར་ཟླ་ཕྱེད་རྡོ་རྗེས་མཚན་པ་བྲིས་དཀྱིལ་མཛད་ན་འཇུག་པ་བདེ་ཞིང་ཕྱག་ལེན་ལའང་དེ་ལྟར་གནང་། བྲིས་དཀྱིལ་སྟེང་རས་དཀར་པོ་པདྨ་འདབ་བརྒྱད་བྲིས་པ་བུམ་ཆུ་ལ་དྲངས་པ་བཀབ་ཐབ་ཀྱི་ཁ་ཁྱེར་ཕྱི་ནས་ཕ་གུ་སོགས་ཀྱིས་རོ་ཁང་གྲུ་བཞི་ཇི་ལྟར་རིགས་པ་བརྩིགས། ཡང་པུར་ཁང་མི་བྱེད་པ་ས་སྲེག་བྱེད་ན་བྲིས་
དཀྱིལ་སྟེང་ས་བཀྲམ་ནས་རྡོ་བཞག་པ་ཕྱག་ལེན་ལྟར་བྱས་པས་འཐུས། ཕུང་པོ་ཁྲུས་ཆོག་གནས་སྤར་མཇུག་ཏུ་ལས་བུམ་ཆུ་འཐོར་དེ། ༀ་བཛྲ་ས་ཏྭས་བསངས་ༀ་སྭ་བྷཱ་བས་སྦྱངས། ཕུང་པོ་སྟོང་གསལ་མགོན་པོ་འོད་དཔག་མེད༔ གཟི་འོད་རབ་འབར་དམར་གསལ་པད་རག་མདངས༔ མཉམ་བཞག་དར་དང་རིན་ཆེན་རྒྱན་ལྡན་གྱུར༔ དབང་བསྐུར་རྒྱས་གདབ་འོད་དཔག་མེད་པས་བརྒྱན༔ དར་གྱི་སྟོད་གཡོགས་སྨད་གཡོགས་གསོལ་བ་ནི༔ སྨད་གོས་ཐོགས་ལ། ཧྲཱིཿ གཟི་བརྗིད་འོད་འབར་སྐུ་སྨད་ན་བཟའ་གསོལ༔ ཚེ་འདས་ཕྱི་ཡི་སྡིག་སྒྲིབ་དག་གྱུར་ཅིག༔ ༀ་ཀོ་པི་ནཾ་ཝསྟྲཱ་ཡ་ཨཱཿ ཧཱུྃ༔ སྟོད་གཡོགས་ཐོགས་ལ༔ ཧྲཱིཿ ངན་སོང་རྣམ་སྦྱོང་སྟོད་དུ་དར་ཀླུབ་གསོལ༔ ཚེ་འདས་ནང་གི་སྡིག་སྒྲིབ་སྦྱོང་དུ་གསོལ༔ ༀ་ཨུཏྟ་ར་ཝསྟྲཱ་ཡ་ཨཱཿཧཱུྃ༔ ཞེས་དར་རས་ཀྱི་སྟོད་གཡོགས་དང་སྨད་གཡོགས་སྲབ་མོ་མེ་ལེན་སླ་བས་གཡོགས། ཐབ་ནང་དུ་ལྕགས་སྲེགས་སམ་ཤིང་རྡུམ་སྦོམས་སུ་མཐོ་དོས་འཁྱུད་ཅིང་སྲིད་དུ་རྩེ་ཁྲུ་གང་བ་གཉིས་རྒྱབ་དང་། དེ་ལས་སོར་བཞིས་ཐུང་བ་གཉིས་མདུན་དུ་བཀོད་པའི་ཁར་ཙོག་པུའི་སྟབས་ཀྱིས་སྒུ་བར་བཞག་ནས་རྐང་པ་གཉིས་འོག་ཏུ་ཅུང་ཟད་བརྐྱངས་པའི་མཐེ་བོང་གཉིས་རས་ལྡེ་སྣུམ་ཅན་མེ་སྦར་ཆོག་པས་བསྡམས་ཏེ་འོག་ཏུ་མེ་ཚང་བཅས་ཏེ་མེའི་སྙིང་པོ་རྒྱུ་ཞབས་ལ་ཕོག་པར་བྱ་ཞིང་། མདུན་དང་ལོགས་རྣམས་བུད་ཤིང་གིས་གཙེར་སྔར་གྱི་ཁང་བུའི་སྟེང་ནས་བརྟན་པར་བརྩིགས་པའི་རྩ་བ་སྦར་ཁུང་། སྙིང་ཁར་རྫས་ཁུང་དང་། ལོགས་གཉིས་སུའང་རླུང་སེང་གི་བུག་པ་རེ་བྱ། སྟེང་དུ་རྫ་མ་ཁ་སྦུབ་པའི་དབྱིབ་ཅན་དུད་ཁུང་དང་ལྡན་པའི་ཕྱི་ནས་ཞལ་བས་འཇམ་པོར་བྱས་པ་དཀར་རྩིས་བྱུགས། སྟེང་ནས་གདུགས་དང་ཟུར་ནས་ལོགས་བཞིར་རྒྱལ་མཚན་དང་བ་དན་གྱིས་བརྒྱན་པར་བྱའོ། །སྦྱིན་སྲེག་གི་ཆས་ལ་སློབ་དཔོན་གྱི་གཡོན་དུ་སྟེགས་བུར་རས་དཀར་པོའི་སྟེང་ཡར་གཞི་ལ་འདས་
མ་འདས་ཀྱི་མཆོད་གཏོར་དཀར་ཟླུམ་རྒྱན་ལྡན་གཉིས་ཀྱི་འདས་པར་མཐེབ་སྐྱུ་ལྷ་གྲངས་བསྐོར། ཆོས་སྐྱོང་དམར་གཏོར་གཉིས་སྨན་རཀ་སྒྲོན་ཐུར་བཅས་ཆུ་གཉིས་སྔོན་འགྲོ་ཉེར་སྤྱོད་རོལ་མོ་ཚོགས་འཁོར་བཅས་བཤམས། གཡས་སུ་སྲན་དཀར་གཙང་མར་བསྲེག་རྫས་བཅོ་བརྒྱད་རིམ་པ་ཇི་ལྟ་བ་ཉིས་རིམ་དུ་བཤམས་ཏེ། ཐོག་མར་ཡམ་ཤིང་འོམ་བུ་མཐོ་གང་བ་རྩེ་མོ་པད་ཁ་ཅན་མར་ཁུར་མངར་གསུམ་འདྲེས་པར་རྩེ་མོ་ཤན་པ་འཇིག་རྟེན་པ་ལ་ཉེར་གཅིག་དང་བདུན། དཀྱིལ་འཁོར་གཙོ་བོ་ལ་བཅུ་ཚན་བཅུ། འཁོར་ཟུང་ལ་ཉེར་གཅིག་རེ། བྱང་ཆུབ་སེམས་དཔའམ་སྒོ་བཞི། ཐུབ་དྲུག་རྣམས་བཅུ་རེ་སྟེ་ཁྱོན་ཡམ་ཤིང་གཉིས་བརྒྱ་དང་གསུམ། དེ་བཞིན་མར་ཁུ་ཏིལ་ནག་བུང་ཡོད། ཡུངས་ཀར། ཟས་མཆོག དུར་ཝ། ནས། གྲོ། སོ་བ། སྲན་མ། འབྲས། ཀུ་ཤ །འབྲས་བུའི་རིགས་སམ་མ་འཛོམས་ན་ཤུག་ཐོག་གོ །དཀར་གསུམ་མངར་གསུམ་མེ་ཏོག་སྣ་ཚོགས། དུག་རིགས་མ་འདྲེས་པའི་སྨན་སྣ་ཚོགས། གོས་དར་རམ་རས་དུམ། དྲི་བཟང་དང་ཆོས་སྨན་བཏབ་པའི་བཏུང་བ་ཇ་སོགས་ཀྱང་གྲངས་ཀ་དེ་མཚུངས་འབུལ་རྒྱུ་བུད་ཤིང་ཁྲ་མ་དང་། ཤུག་པ་སོགས་ཤིང་སྐམ་རློན་མེད་པ་འདང་ཚོད། མར་ཁུ་མི་ཉུང་བ་ཀུ་ཤ་རིང་བ་བཞི་ཐུང་བ་བཞི་དང་བརྒྱད། དཔལ་འབར་རིང་བ་ཁ་ཤས། མེ་ཚང་ཏིང་ལོ་སྡོང་བུ་བཅས་སྦོམ་པ། སློབ་དཔོན་མདུན་ནང་མཆོད། རྡོར་དྲིལ། ནས་ཟེ། ཡུངས་ཐུན། མེ་དར། དགང་བླུགས། མེ་ཡོལ་མཐོ་བར་གང་རི་དང་ཆུ་རིས་ཅན་ལ་ཝཾ་བྲིས་པ། མདའ་དར་དམར་པོ། སྐུ་ཆས་སྟོད་གཡོགས་པང་ཁེབས། དབུ་དཀྲིས་རྣམས་དཀར་པོ། རླུང་གཡབ་ལྗང་གུ་སོགས་དགོས་ཆས་ཚང་ནས། སློབ་དཔོན་ཆས་སུ་ཞུགས་རྡོར་དྲིལ་དང་དཔལ་འབར་རིང་བ་མེ་འབར་བ་ཐོགས་ཏེ། པུར་ཁང་བསྐོར་བ་བྱས་ཏེ་མདུན་དུ་ལས་རྡོར་གྱིས་མཆོད་པ་རྣམ་ལྔ་བཀྱགས། ༀ་ཨཱཿ ཧཱུྃ༔ ཀུན་བཟང་རྣམ་ཐར་མཆོད་སྤྲིན་རྣམ་ལྔ་འདི༔ ཕུང་པོ་རང་གྲོལ་གཟི་འབར་ལྷ་ལ་འབུལ༔ ཐུགས་དང་དབྱེ་མེད་རྣམ་ཤེས་བདེ་
ཆེན་གཤེགས༔ ཕྲིན་ལས་ཡེ་ཤེས་སྒྲིབ་སྦྱོང་མེ་ལྔར་གྱུར༔ ༀ་ཤྲཱི་ཨ་རཾ་ཐ་ཨ་བྷ་ཝ་སྭཱ་ཧཱ༔ ཞེས་མཆོད་པ་པུར་ཁང་དུ་མཆོད༔ ཧཱུྃ། ཆོས་ཀྱི་དབྱིངས་ཀྱི་ཐབ་ཁུང་དུ༔ བདག་འཛིན་ཕུང་པོའི་བུད་ཤིང་ལ༔ ཤེས་རབ་ཡེ་ཤེས་མེ་སྦར་བས། །ཚེ་འདས་ཉོན་མོངས་བག་ཆགས་བསྲེག །འདི་ནི་སྐྱེ་འགག་སྨོན་པ་དང་། །གནས་མེད་མཚན་པ་མེད་པའི་མེ། །འདི་ནི་རང་བྱུང་ཡེ་ཤེས་མེ། །བདག་འཛིན་མཚན་མའི་རྟོག་པ་བསྲེག །དོན་ལ་བསྲེག་བྱ་སྲེད་བྱེད་ཀུན། །བྱ་རྩོལ་མེད་པ་ཡེ་སངས་རྒྱས། །འབད་མེད་ལྷུན་གྲུབ་ཆོས་ཀྱི་སྐུ། །རང་བྱུང་ཡེ་ཤེས་དེར་སྣང་ངོ་། །ཨགྣི་ཛྭ་ལ་རཾ། ༼རོལ་མོ།༽ ཞེས་མེ་སྦར་ནས་ཚེ་འདས་ཀྱི་རླུང་སེམས་ཙམ་ལས་གྲུབ་པའི་འཇའ་ལུས་ཡེ་ཤེས་ཀྱི་སྐུ་ནི་མཆོད་ཡུལ་དང་དབྱེར་མེད་དུ་བྱ་ཞིང་དྲི་མ་ཕུང་ཁམས་སྐྱེ་མཆེད་ལ་སོགས་རོ་དང་ལྷན་གཅིག་མཆོད་རྫས་སུ་འབུལ་བ་ཡིན་ནོ། །དེ་ལྟར་མེ་སྦར་མ་ཐག་ཏུ་བདེ་བའི་སྟན་ལ་སྐྱིལ་ཀྲུང་གིས་ཞི་ཞིང་ངེས་པར་སྙིང་རྗེའི་སེམས་དང་ལྡན་པས་འཁོད་དེ་སྨྲ་བ་བཅད། ༀ་མ་ཧ་བཛྲ་ཧཱུྃ༔ ཞེས་རྡོ་རྗེ་ཐབས་ཀྱི་རང་བཞིན་ལག་གཡས་ཀྱིས་ཐུགས་ཀར་གསོལ། ༀ་བཛྲ་གེ་ཨཱཿ ལག་གཡོན་དྲིལ་བུ་དཀྲོལ་ཞིང་དཀུར་བརྟེན། གཉིས་ཀའང་དོན་དམ་པ་བྱང་ཆུབ་སེམས་ཀྱི་རང་བཞིན་དུ་མོས་ནས། ༀ་སརྦ་ཏ་ཐཱ་ག་ཏ་མ་ཧཱ་ཨ་ནུ་རཱ་ག་ཎ་བཛྲ་སྭ་བྷ་བ་ཨཏྨ་ཀོ྅ཧཾ། ཞེས་ཐུགས་ཀར་འཁྱུད་རྒྱ་བྱ། རྡོ་རྗེ་ཐུགས་ཀྱི་དམ་ཚིག་དྲིལ་བུ་གསུང་གི་དམ་ཚིག་ཕྱག་རྒྱ་སྐུའི་དམ་ཚིག་སྟེ་ནང་གི་རྡོར་དྲིལ་ཁ་སྦྱོར་ལས་བྱུང་བའི་བདེ་བ་ཆེན་པོའི་བདག་ཉིད་ངའོ་སྙམ་པའི་དམ་ཚིག་གསུམ་དྲན་པར་བྱས་ལ་སྦྱིན་སྲེག་མ་གྲུབ་བར་རྡོར་དྲིལ་དང་མི་འབྲལ་བ་དམ་ཚིག་ཡིན་ནོ། །གཉིས་པ་ཆོ་ག་དངོས་གཞི་ལ་མཆོད་རྫས་བྱིན་གྱིས་བརླབ་པ་ནི། ལས་བུམ་གྱི་ཆུ་འཐོར་ཏེ། ༀ་
བཛྲ་ས་ཏྭས་བསངས། ༀ་སྭ་བྷཱ་བས་སྦྱངས། སྟོང་པའི་ངང་ལས་གནས་ཁང་ཞིང་ཁམས་དག་པ་རབ་འབྱམས་ཀྱི་ཀློང་དུ་མཆོད་པའི་ཡོ་བྱད་ཀུན་བཟང་གི་རྣམ་པ༔ བསྲེག་རྫས་རྣམས་སོ་སོའི་ལས་སྒྲུབ་པའི་ནུས་པ་ཁྱད་པར་དང་ལྡན་པར་གྱུར་ཅིག༔ ༀ་མ་ཧ་པཱུ་ཛ་སཾ་བྷ་དྲ་ཧོཿ རྡོ་རྗེ་རྩེ་གཅིག་གི་རྒྱ་དཔོན་སློབ་ཀུན་ནས་བཅའ། ༀ་ཨཱཿ ཧཱུྃ༔ ༀ་ཧ་བི་ཥ༔ ཋ་ཋ་ཋ༔ རྫས་ཀྱི་རིགས་རྣམས་བཀྲུས་ནས་དག་པར་བསམ༔ ༀ་ཨཱཿ སྭཱ་ཧཱ༔ ཡམ་ཤིང་ལ་རེག༔ ༀ་ཤྲ་སྭཱ་ཧཱ༔ མར་ཁུ་ལ་རེག༔ ༀ་ཨཱཿ སྭཱ་ཧཱ༔ འབྲུ་རྣམ་ལ༔ ༀ་ཛྲཱ་སྭཱ་ཧཱ༔ ཟས་མཆོག་ལ༔ ༀ་ཀུ་རུ་ཀུ་རུ་སྭཱ་ཧཱ༔ ༼རོལ་མོ།༽ སློབ་དཔོན་ལག་གཡོན་མཐེབ་སྲིན་གྱིས་ནང་མཆོད་སྲེག་རྫས་བུད་ཤིང་བཅས་ལ་བྲན་དགོས། འདི་ཕྱིན་རྫས་རྣམས་སློབ་དཔོན་གྱིས་ལས་རྡོར་ལ་གཏད་པ་རྫས་གཡོག་གིས་ཐབ་ཏུ་སྐྱེལ་དགོས། ལར་ཚིག་ལུགས་དང་དཀྲུག་རྒྱུ་སོགས་པུར་གཡོག་མཁས་པ་ཡོད་དགོས་པ་གལ་ཆེ། དེ་ནས་སྐུ་ཤ་ཐོགས་ལ། ༀ་ས་སྐྱེས་རྩྭ་མཆོག་རྫོགས་སངས་རྒྱས་པའི་གདན༔ མཆོག་གསུམ་བྱིན་རླབས་ཚངས་པའི་དག་བྱེད་འདི༔ ཐབ་ཀྱི་ཡོ་བྱད་མ་དག་སེལ་བ་དང་༔ སྲུང་བའི་ཡོན་ཏན་མཐུ་དང་ལྡན་གྱུར་ཅིག༔ ༀ་བཛྲ་ས་ཏྭ་ཨཱཿ ༼རོལ་མོ།༽ཐབ་ཀྱི་ཁ་ཁྱེར་དག་ལ་དགོས་པ་ཏེ༔ གང་བདེར་གཡས་བསྐོར་མགོ་བསྟན་ཕྱོགས་བཞིར་འགོད༔ ཕྱི་མ་གཡོན་བསྐོར་མཚམས་བཞི་དག་ལ་བཞག༔ དེ་ནས་མེ་སྦར་བ་ལ༔ དཔལ་འབར་བཟུང་ནས་སེམས་བསྐྱེད་དབྱངས་ཆེན་གྱིས༔ ཧྲཱིཿ འདི་ནི་འཇིག་རྟེན་མེ་ལ་རིག་ལྔའི་མདངས༔ ཉོན་མོངས་དུག་ལྔ་སྲེག་པའི་ཡེ་ཤེས་ལྔ༔ རྟེན་འབྲེལ་རྣམ་སྨིན་འཁོར་ལོའི་ཕུང་པོ་ལ༔ འཁོར་བ་རང་རྒྱུད་གཅོད་པའི་མེ་སྦར་རོ༔ སྲེག་གཞི་འཁྲུལ་སྣང་དུག་ལྔའི་ཕུང་པོ་བསྲེགས༔ སྦྱང་བྱ་ཐམས་ཅད་སྐུ་ལྔའི་མཁྱེན་བརྩེས་
སྦྱངས༔ རྣམ་ཤེས་འཕགས་པའི་ཐུགས་རྗེའི་ལྕགས་ཀྱུས་དྲངས༔ སྐྱེ་མེད་ཆོས་དབྱིང་བཀོད་པའི་མེ་སྦར་རོ༔ ༼རོལ་མོ།༽ ༀ་ཨ་མི་དེ་ཝ་ཧྲཱིཿ ༀ་ཛྭ་ལ་རཾ༔ ཞེས་དཔལ་འབར་རྡོ་རྗེའི་ཐལ་མོ་སྦྱར་བའི་བར་དུ་བཟུང་ནས་བསྐོར་བ་ལས་མེ་སྔོན་དུ་སྦར་ཟིན་པས་འདིར་ས་བཅད་ཙམ་ཡིན། དེ་ནས་མེ་དར་བཟུང་ལ། ཧྲཱིཿ ཡེ་ཤེས་ལྔ་ཡི་རང་བཞིན་འབར་བའི་མེ༔ ཁམས་ལྔའི་སེམས་མས་རླུང་གི་འཁྲུལ་འཁོར་སྦྱོར༔ འཁྲུལ་རྟོག་མེད་ཀྱང་ཕྱོགས་མཚམས་འཕྲོས་གྱུར་ན༔ བདེན་ཚིག་གཅིག་ཆོད་སྣང་བའི་དར་གྱིས་མནན༔ ༀ་མེ་དབལ་ཤཱནྟི་ཀུ་རུ་ཡེ་སྭཱ་ཧཱ༔ ༼རོལ་མོ།༽ མེ་དར་གཡབ་བོ༔ ༀ་ཨ་མི་དེ་ཝ་ཧྲཱིཿ ༀ་མ་ཎི་པདྨེ་ཧཱུྃ༔ ༀ་བཛྲ་པཱ་ཎི་ཧཱུྃ༔ ན་མཿ སརྦ་ཏ་ཐཱ་ག་ཏ་ཧྲཱིཿ ད་ཡ་ཨ་ནུ་ག་ཏེ༔ ༀ་ཀུ་རུཾ་གི་ནི་སྭཱ་ཧཱ༔ ༀ་བོ་དྷི་ས་ཏྭ་མ་ཏི་སརྦ་ཛྙཱ་ན་སིདྡྷི་ཧཱུྃ༔ ཨ་འ་ཧ་ཤ་ས་མ༔ ཛ་དྷི་ཧྲཱིཿཧཱུྃ༔ བསྲེག་རྫས་མཆོད་པའི་ཕུང་ཁམས་བདུད་རྩི་ལྔའི་རང་བཞིན་ལ་ཡེ་ཤེས་ལྔ་ཡི་སྣང་བ་འབར་བར་གྱུར༔ བླུགས་གཟར་གྱིས་མར་ཁུ་བདུན་འབུལ་བསྟུན། ༀ་ཨགྣ་ཡེ་ཛྭ་ལ་རཾ༔ ལན་བདུན་བརྗོད། མེ་ཐབ། ༀ་བཛྲ་ས་ཏྭ་ཧཱུྃ་ཨཱཿབསངས། སྭ་བྷ་བས་སྦྱངས། སྟོང་པའི་ངང་ལས་ཞི་བའི་ཐབ་ཁུང་ཟླུམ༔ མཚན་ཉིད་རྫོགས་པའི་དབུས་སུ་པད་ཟླའི་སྟེང༔ རཾཿ་ལས་མེ་ལྷ་ཞལ་གཅིག་ཕྱག་བཞི་དཀར༔ དབྱུག་གུ་སྐྱབས་སྦྱིན་བསྒྲང་ཕྲེང་སྤྱི་བླུག་འཛིན༔ དྲང་སྲོང་ཆ་ལུགས་དར་དང་རིན་ཆེན་བརྒྱན༔ ར་སྐྱེས་སྟེང་དུ་ཕྱེད་སྐྱིལ་མེ་དཔུང་འབར༔ གནས་གསུམ་འབྲུ་གསུམ་ས་བོན་འོད་ཟེར་གྱིས༔ ཤར་ལྷོ་མཚམས་ནས་མེ་ལྷ་སྤྱན་དྲངས་གྱུར༔ ལག་གཡས་རྡོ་རྗེ་བཅས་ཐལ་མོ་ཕྱིར་སྟོན་མི་འཇིགས་རྒྱས་མཐེ་བོང་གཡབ། གཡོན་དྲིལ་བུ་བསིལ་ཞིང་༔ ༀ་ཀུན་རྫོབ་
མེ་བདག་སྣང་བ་ཡེ་ཤེས་ཀློང་༔ ལྷ་ཡི་དྲང་སྲོང་གཉིས་སྐྱེས་མེ་ཡི་ལྷ༔ ཐུགས་རྗེ་ཚད་མེད་ཕྲིན་ལས་ཀུན་གྱི་བདག༔ འགྲོ་བའི་དོན་དུ་གནས་འདིར་གཤེགས་སུ་གསོལ༔ ༼རོལ་མོ།༽ ༀ་ཨགྣ་ཡེ་ས་པ་རི་ཝཱ་ར་བཛྲ་ས་མཱ་ཡ་ཛཿ ཛ༔ བཞུགས་སུ་གསོལ་བ་ནི༔ ཧཱུྃ༔ གཞལ་ཡས་བཀོད་པ་མེ་ཡི་ཡེ་ཤེས་ཀློང་༔ ཕྲིན་ལས་བསྒྲུབ་ཕྱིར་དགྱེས་པར་བཞུགས་སུ་གསོལ༔ སྔོན་གྱི་རྡོ་རྗེའི་དམ་ཚིག་རབ་གནས་ནས༔ མེ་དང་མེ་ལྷ་དམ་ཡེ་དབྱེར་མེད་གྱུར༔ ༀ་ཨགྣ་ཡེ་དེ་བ་ས་མ་ཡ་ཏིཥྛ་ལྷན༔ ༀ་ཧ་ན་པ་ཡཱ་ཧཱུྃ་ཕཊ༔ ཛཿ ཧཱུྃ་བཾ་ཧོ༔ ༀ་ཨགྣ་ཡེ་དཀྵ་བྷ་ཝ་སྭཱ་ཧཱ༔ དེ་ནས་མེ་ལྷའི་རྒྱལ་པོ་འཁོར་བཅས་ལ༔ བྱོན་སྐྱེམས་དགང་བླུགས་མ་ཁུ་ཕུལ་ནས་ནི༔ ལན་བདུན་བླུག་གཟར་ནང་དུ་བསྒྲང་བ་ལ༔ ༀ་ཡེ་ཤེས་གཟི་བརྗིད་ཆེན་མོ་མེ་ཡི་ལྷ༔ འགྲོ་བའི་དོན་བྱོན་མཆོད་སྤྲིན་ངོ་མཚར་ཆེ༔ དགྱེས་པའི་ཞལ་སྐྱེམས་སྙིང་པོ་འདུས་པའི་བཅུད༔ ཞལ་སྒོ་འོད་ཀྱི་སྦུ་གུའི་ཀློང་ནས་གསོལ༔ དགང་བླུགས་ཐོགས་ཏེ། ༀ་ཨགྣ་ཡེ་སྭཱ་ཧཱ༔ ལན་བདུན་མར་ཁུ་བླུགས་གཟར་གྱིས་དགང་གཟར་བཀང་ཁ་སྦྱར་ནས་ལག་གཉིས་པུས་མོ་(ལས་)ཕྱིར་མི་འདའ་བས་གཡས་སུ་ལན་གསུམ་བསྐོར། ༀ་ཨགྣ་ཡེ་ཧ་བྱ་ཀ་བྱ་བ་ཧ་ན་ཡ་ཨཱ་དི་བྱ་སྭཱ་ཧཱ༔ དགང་གཟར་ཟག་མཆུ་ལས་བབས་པའི་མར་ཁུ་བདུད་རྩིའི་དྭངས་མར་དྲངས་ཏེ། གསོལ་བས་དགྱེས་ཤིང་ཚིམ་པར་བསམ། ལས་རྡོར་གྱིས་སྐྱོགས་སྣོད་ཟད་པར་བླུག་རྫས་གཡོག་གིས་པུར་ཁང་ལ་བསྐྱལ། ཡང་། ༀ་ཨགྣ་སོགས་མར་ཁུ་བདུན་ཚན་གཉིས་པོ་ཡང་ཕུལ། དེ་ལྟར་སོ་སོའི་མཐར། ཚེ་ལས་འདས་པའི་སྡིག་སྒྲིབ་བར་ཆད་མི་མཐུན་པའི་ཕྱོགས་ཐམས་ཅད་ཞི་བའི་ཕྲིན་ལས་མཛད་དུ་གསོལ༔ ཞེས་སྤེལ་ཚིག་ཡང་སྦྱར། པད་ཀོར་རང་རྒྱ་སེ་གོལ་བཅས། ༀ་ཨགྣ་ཡེ་ས་པ་རི་
ཝཱ་ར་ཨཾ་པྲ་ཏཱིཙྪ་ཨཱཿཧཱུྃ༔ དེ་བཞིན་དུ། ༀ་ཨགྣ་ཡེ་ས་པ་རི་ཝཱ་ར་པཱདྱཾ་པྲ་ཏཱིཙྪ་ཨཱཿ ཧཱུྃ༔ པུཥྤེ་པྲ་ཏཱིཙྪ་ཨཱཿཧཱུྃ༔ དྷུབྤེ་པྲ་ཏཱིཙྪ་ཨཱཿཧཱུྃ༔ ཨཱ་ལོ་ཀེ་པྲ་ཏཱིཙྪ་ཨཱཿཧཱུྃ༔ གནྡྷེ་པྲ་ཏཱིཙྪ་ཨཱཿཧཱུྃ༔ ནཻ་ཝི་དྱ་པྲ་ཏཱིཙྪ་ཨཱཿཧཱུྃ༔ ཤབྟ་པྲ་ཏཱིཙྪ་ཨཱཿཧཱུྃ༔ ༼རོལ་མོ།༽ བསྟོད་པ་ལ། ཕྱེད་ཕྱག་བཅས། ༀ་ཚངས་པ་འཇིག་རྟེན་མགོན་སྲས་གཉིས་སྐྱེས་དབང་༔ ཐབས་མཁས་ཐུགས་རྗེ་ཕྲིན་ལས་ཀུན་གྱི་དཔལ༔ རྫུ་འཕྲུལ་ཐོགས་མེད་ལས་ཀྱི་སྟོབས་པོ་ཆེ༔ ཡེ་ཤེས་མེ་ལྷའི་རྒྱལ་པོ་ཁྱོད་ལ་བསྟོད༔ དེ་ནས་བསྲེག་རྫས་ཐམས་ཅད་རིམ་པར་མཆོད༔ སྡིག་ཅན་ཡིན་ན་དམིགས་སྦྱོང་ཕུལ་བ་ལ༔ ༀ་ནྲི་ཛཿ ཚེ་ལས་འདས་པ་མིང་འདི་ཞེས་བྱ་བའི་ཀང་ཀ་ནི་ཨཱ་བཱ་ར་ཎ་ཨ་པ་དྷ་ར་དྷ་ར། པྲ་ཡཱ་ཏཾ་ཨཱ་སྥ་ལཱ་ནཱཾ་པྲ་ཏིཙྪ་བཛྲ་ཧོ༔ ཞེས་པ་ཉེར་གཅིག་ཤོག་གཙང་ལ་བྲིས་ནས་མེ་ནང་ཕུལ༔ དེ་ནས་ལྷ་དེའི་ཐུགས་དམ་བསྐུལ་བར་བསམ༔ རཾ་ཛཿ མེ་ལྷའི་ཐུགས་ནས་འོད་ཟེར་དཔག་མེད་འཕྲོས༔ ཚེ་འདས་ལས་ཀྱི་རྣམ་སྨིན་སྡིག་སྒྲིབ་ཀུན༔ འུབ་ཀྱིས་འོད་ཟེར་དྲྭ་བས་བསྡུས་ནས་ནི༔ བསྲེག་རྫས་རྣམས་ལ་གཉིས་མེད་ཐིམ་པར་གྱུར༔ ཛཿ ཧཱུྃ་བཾ་ཧོ༔ ༀ་ཨཱཿ ཧཱུྃ༔ སྡིག་སྒྲིབ་མེ་ལྷར་ཕུལ་ནས་གསོལ་བར་བསམ༔ དེ་ནས་ཡཾ་ཤིང་ལ། ༀ་ཨགྣེ་དེ་བ། འདི་ནི་སྔགས་མགོ་ཀུན་ལ་སྦྱོར༔ ༀ་བོ་དྷི་བྲིཀྵ་ཡེ་སྭཱ་ཧཱ༔ སྔགས་ཉེར་གཅིག་དང་བསྟུན། ལག་གཡས་བསྐོར་ཡཾ་ཤིང་ཉེར་གཅིག་ཕུལ། ཚེ་ལས་འདས་པ་བར་དོའི་འཇིགས་སྐྲག་གི་འཁྲུལ་གཞིའི་སྡིག་སྒྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ དེ་བཞིན་རྫས་རྣམས་ཉེར་གཅིག་རེས་བྱོན་སྐྱེམས་མ་གཏོགས་བླུགས་གཟར་གྱིས་མར་ཁུ་འབུལ་བ་ལས་དགང་གཟར་མི་འཛིན་པ་ཕྱག་བཞེས། ༀ་ཨགྣ་ཡེ་སྭཱ་ཧཱ༔ ཚེ་ལས་འདས་པ་ངན་སོང་གི་དུཿ ཁ་ལ་ལྟུང་བས་ལས་ཀྱི་སྡིག་སྒྲིབ་ཐམས་ཅད་ཤནྟི་
ཀུ་རུ་ཡེ་སྭཱ་ཧཱ༔ ཏིལ་ལ། ༀ་སརྦ་པ་པཾ་ད་ཧཱ་ན་བཛྲ་ཡ་སྭཱ་ཧཱ༔ ཚེ་ལས་འདས་པའི་སྐྱེ་བ་ཡེ་ནས་ཚེ་རབས་སྔོན་དང་ད་ལྟའི་བར་གྱི་སྡིག་སྒྲིབ་ཉེས་ལྟུང་དྲི་མ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ ཡུངས་ཀར་ལ། ༀ་སརྦ་ཨརྠ་སིདྡྷི་ཡ་སྭཱ་ཧཱ༔ ཚེ་ལས་འདས་པ་རིགས་དྲུག་གི་སྐྱེ་གནས་ངན་པར་ལྟུང་བའི་སྡིག་སྒྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ ཟས་མཆོག་ལ༔ ༀ་སརྦ་སཾ་པ་དེ་སྭཱ་ཧཱ༔ ཚེ་ལས་འདས་པའི་གནས་ལུགས་ས་ལམ་ཆོད་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ དུར་ཝཱ་ལ༔ ༀ་བཛྲ་ཨཱ་ཡུར་ཥེ་སྭཱ་ཧཱ༔ ཚེ་ལས་འདས་པ་སྐྱེ་བ་གཞན་དུ་ཚེ་རིང་བར་ཡོང་བ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ ནས་ལ༔ ༀ་མ་ཧཱ་བེ་གཱ་ཡ་སྭཱ་ཧཱ༔ ཚེ་ལས་འདས་པ་སྐྱེ་བ་གཞན་དུ་རིགས་བཟང་དུ་འགྱུར་བ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ གྲོ་ལ༔ ༀ་བཛྲ་གྷསྨཱ་རི་སྭཱ་ཧཱ༔ ཚེ་ལས་འདས་པ་སྐྱེ་བ་གཞན་དུ་བདེ་བ་འབྱུང་བ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ སོ་བ་ལ༔ ༀ་བཛྲ་བི་ཛཱ་ཡ་སྭཱ་ཧཱ༔ ཚེ་ལས་འདས་པ་སྐྱེ་བ་གཞན་དུ་བཟའ་བཏུང་ཡོན་ཏན་རྒྱས་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ སྲན་མ་ལ། ༀ་བཛྲ་མ་ཧཱ་བ་ལཱ་ཡ་སྭཱ་ཧཱ༔ ཚེ་ལས་འདས་པ་སྐྱེ་བ་གཞན་དུ་དབང་ཤུགས་སྟོབས་དང་ལྡན་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ འབྲས་ལ། ༀ་བཛྲ་པུ་ཡ་སྭཱ་ཧཱ༔ ཚེ་ལས་འདས་པ་སྐྱེ་བ་གཞན་དུ་གཟི་མདངས་ཕུལ་དུ་འབྱུང་བ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ ཀུ་ཤ་
ལ༔ ༀ་ཨ་པྲ་ཏི་ཧ་ཏ་བཛྲཱ་ཡ་སྭཱ་ཧཱ༔ ཚེ་ལས་འདས་པ་སྐྱེ་བ་གཞན་དུ་བློ་ཡོངས་སུ་གཞོལ་བ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ འབྲས་བུའི་རིགས་སམ་མ་བྱུང་ན་ཤུག་ཐོག་ལ༔ ༀ་ཤྲཱི་ཕ་ལ་ཡ་སྭཱ་ཧཱ༔ ཚེ་ལས་འདས་པ་སྐྱེ་བ་གཞན་དུ་བརྩེ་ལྡན་གྱི་གྲོགས་འཁོར་འདུ་བ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ དཀར་གསུམ་མངར་གསུམ་ལ༔ ༀ་བཛྲ་མཱ་ལེ་པཱུཙྪ་ཡེ་སྭཱ་ཧཱ༔ ཚེ་ལས་འདས་པ་སྐྱེ་བ་གཞན་དུ་འབྱོར་པ་མངའ་ཐང་འབྱུང་བ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ མེ་ཏོག་སྣ་ཚོགས་ལ༔ ༀ་བཛྲ་པུཥྤེ་སྭཱ་ཧཱ༔ ཚེ་ལས་འདས་པ་སྐྱེ་བ་གཞན་དུ་རྒྱན་གོས་ལོངས་སྤྱོད་ཕུན་སུམ་ཚོགས་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ སྨན་སྣ་ཚོགས་ལ༔ ༀ་བཛྲ་ཨོ་ཥ་དྷི་སྭཱ་ཧཱ༔ ཚེ་ལས་འདས་པ་སྐྱེ་བ་གཞན་དུ་འགྲོ་དོན་གཞན་ཕན་སྨོན་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ གོས་དར་རས་དུམ་ལ༔ ༀ་བཛྲ་ཝསྟྲཱ་ཡ་སྭཱ་ཧཱ༔ ཚེ་ལས་འདས་པ་སྐྱེ་བ་གཞན་དུ་འབྱོར་པ་ཚོགས་ཞིང་ཆེན་པོ་ཡོང་བ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ དྲི་བཟང་ཆོས་སྨན་བཏུང་བ་ཇ་སོགས་མཆོད༔ ༀ་དྷརྨ་ཛཱི་བི་ཨ་ཤ་སྭཱ་ཧཱ༔ ཚེ་ལས་འདས་པ་སྐྱེ་བ་གཞན་དུ་སྨིན་གྲོལ་བྱང་ཆུབ་ཐོབ་པ་ལ་བར་དུ་གཅོད་པའི་སྡིག་སྒྲིབ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ ༼རོལ་མོ།༽ བཅོ་བརྒྱད་པ་ལ་རབ་གནས་དམིགས༔ དེ་ནས་མཆོད་བདུན་རིམ་བཞིན༔ བཀོད་པ་ངོ་མཚར་འཇིག་རྟེན་དཔག་མེད་ན༔ གཙང་སྦྱར་ཚད་མེད་མཆོད་ཡོན་ཇི་སྙེད་ཀུན༔ བདག་
གིས་དྲང་སྲོང་མེ་ལྷའི་ཚོགས་ལ་འབུལ༔ བཞེས་ནས་སྒྲིབ་སྦྱོང་ཞི་བའི་ཕྲིན་ལས་མཛོད༔ ༀ་ཨགྣ་ཡེ་ས་པ་རི་ཝཱ་ར་ཨཾ་པྲ་ཏཱིཙྪ་པཱུཙྪ་ཨཱཿ ཧཱུྃ༔ བཀོད་པ་ངོ་མཚར་འཇིག་རྟེན་དཔག་མེད་ན༔ དྲི་མེད་རྣམ་དག་ཞབས་བསིལ་ཇི་སྙེད་ཀུན༔ བདག་གིས་དྲང་སྲོང་མེ་ལྷའི་ཚོགས་ལ་འབུལ༔ བཞེས་ནས་སྒྲིབ་སྦྱོང་ཞི་བའི་ཕྲིན་ལས་མཛོད༔ ༀ་ཨགྣ་ཡེ་ས་པ་རི་ཝཱ་ར་པཱདྱཾ་པྲ་ཏཱིཙྪ་པཱུཙྪ་ཨཱཿ ཧཱུྃ༔ བཀོད་པ་ངོ་མཚར་འཇིག་རྟེན་དཔག་མེད་ན༔ ཐང་སྐྱེས་ཆུ་སྐྱེས་མེ་ཏོག་ཇི་སྙེད་ཀུན༔ བདག་གིས་དྲང་སྲོང་མེ་ལྷའི་ཚོགས་ལ་འབུལ༔ བཞེས་ནས་སྒྲིབ་སྦྱོང་ཞི་བའི་ཕྲིན་ལས་མཛོད༔ ༀ་ཨགྣ་ཡེ་ས་པ་རི་ཝཱ་ར་པུཥྤེ་པྲ་ཏཱིཙྪ་པུཙྪ་ཨཱཿ ཧཱུྃ༔ བཀོད་པ་ངོ་མཚར་འཇིག་རྟེན་དཔག་མེད་ན༔ དྲི་ཞིམ་སྤོས་སྣའི་བྱེ་བྲག་ཇི་སྙེད་ཀུན༔ བདག་གིས་དྲང་སྲོང་མེ་ལྷའི་ཚོགས་ལ་འབུལ༔ བཞེས་ནས་སྒྲིབ་སྦྱོང་ཞི་བའི་ཕྲིན་ལས་མཛོད༔ ༀ་ཨགྣ་ཡེ་ས་པ་རི་ཝཱ་ར་དྷུབྤེ་པྲ་ཏཱིཙྪ་པུཙྪ་ཨཱཿ ཧཱུྃ༔ བཀོད་པ་ངོ་མཚར་འཇིག་རྟེན་དཔག་མེད་ན༔ ཉིན་བྱེད་འོད་ཀྱི་སྣང་གསལ་ཇི་སྙེད་ཀུན༔ བདག་གིས་དྲང་སྲོང་མེ་ལྷའི་ཚོགས་ལ་འཕུལ༔ བཞེས་ནས་སྒྲིབ་སྦྱོང་ཞི་བའི་ཕྲིན་ལས་མཛོད༔ ༀ་ཨགྣ་ཡེ་ས་པ་རི་ཝཱ་ར་ཨཱ་ལོ་ཀེ་པྲ་ཏཱིཙྪ་པུཙྪ་ཨཱཿ ཧཱུྃ༔ བཀོད་པ་ངོ་མཚར་འཇིག་རྟེན་དཔག་མེད་ན༔ ཡིད་འོང་མངར་བཅུད་དྲི་ཆབ་ཇི་སྙེད་ཀུན༔ བདག་གིས་དྲང་སྲོང་མེ་ལྷའི་ཚོགས་ལ་འབུལ༔ བཞེས་ནས་སྡིག་སྒྲིབ་ཞི་བའི་ཕྲིན་ལས་མཛོད༔ ༀ་ཨགྣ་ཡེ་ས་པ་རི་ཝཱ་ར་གྷནྡྷེ་པྲ་ཏཱིཙྪ་པུཙྪ་ཨཱཿ ཧཱུྃ༔ བཀོད་པ་ངོ་མཚར་འཇིག་རྟེན་དཔག་མེད་ན༔ ཁ་དོག་རོ་བརྒྱའི་ཞལ་ཟས་ཇི་
སྙེད་ཀུན༔ བདག་གིས་དྲང་སྲོང་མེ་ལྷའི་ཚོགས་ལ་འབུལ༔ བཞེས་ནས་སྡིག་སྒྲིབ་ཞི་བའི་ཕྲིན་ལས་མཛོད༔ ༀ་ཨགྣ་ཡེ་ས་པ་རི་ཝཱ་ར་ནཻ་ཝི་ཏྱེ་པྲ་ཏཱིཙྪ་པཱུཙྪ་ཨཱཿ ཧཱུྃ༔ བཀོད་པ་ངོ་མཚར་འཇིག་རྟེན་དཔག་མེད་ན༔ སྙན་མཇེབས་འབུད་དཀྲོལ་རོལ་མོ་ཇི་སྙེད་ཀུན༔ བདག་གིས་དྲང་སྲོང་མེ་ལྷའི་ཚོགས་ལ་འཕུལ༔ བཞེས་ནས་སྡིག་སྒྲིབ་ཞི་བའི་ཕྲིན་ལས་མཛོད༔ ༀ་ཨགྣ་ཡེ་ས་པ་རི་ཝཱ་ར་ཤབྟ་པྲ་ཏཱིཙྪ་པུཙྪ་ཨཱཿ ཧཱུྃ༔༼རོལ་མོ།༽ བསྟོད་པ་ནི། རིགས་ལྔ་ཕྱེད་ཕྱག་བཅས། ༀ་འཇིག་རྟེན་དབང་ཕྱུག་སྟོབས་ཆེན་ཡོངས་ཀྱི་མཆོག༔ རྫུ་འཕྲུལ་དབང་ཕྱུག་ཚངས་དབང་མགོན་གྱི་སྲས༔ མེ་ལྷའི་རྒྱལ་པོ་དྲང་སྲོང་གཉིས་སྐྱེས་དཔལ༔ ཕྲིན་ལས་མངའ་བདག་ཁྱེད་ལ་ཕྱག་འཚལ་བསྟོད༔ རིགས་སྔགས་གྲུབ་པའི་མངོན་ཤེས་མཐུ་རྩལ་ཅན༔ ཐུགས་རྗེ་ཚད་མེད་གཟི་བྱིན་བསྐལ་པའི་མེ༔ ཞི་རྒྱས་དབང་གི་ཡོན་ཏན་ཀུན་གྱི་མཛོད༔ ཐོགས་མེད་ཐབས་དགུས་བཀོད་ལ་ཕྱག་འཚལ་བསྟོད༔ མྱང་འདས་ཆེན་པོའི་ཀློང་དུ་རབ་གནས་ཀྱང་༔ འགྲོ་བའི་དོན་མཛད་འཇིག་རྟེན་སྣང་ཚུལ་སྟོན༔ ཐབས་ཀྱི་ཐེག་པའི་ར་སྐྱེས་གདན་ལ་རོལ༔ ཡེ་ཤེས་འབར་བ་ཁྱེད་ལ་ཕྱག་འཚལ་བསྟོད༔ ཐལ་སྦྱོར་བཅས། མེ་ལྷ་མེ་དང་དབྱེར་མེད་འབར་བ་ལ༔ ཁྱེད་ཀྱི་ཀློང་དུ་འཕགས་པའི་ལྷ་ཚོགས་བཞུགས༔ དམ་བཅའ་མ་གཡེལ་བསྲེག་རྫས་སྦྱང་གཞི་རྣམས༔ ལྷ་རྣམས་ཞལ་དུ་སྟོབས་ཤིག་མེ་ཡི་ལྷ༔ དེ་ནས་ཡུངས་དཀར་ཐབ་ཏུ་གཏོར། ཐལ་མོ་སྦྱར་བས། དྲང་སྲོང་ཆེན་པོ་འཁོར་དང་བཅས་པས་བསྲེག་རྫས་ལྷ་ཡི་ཞལ་དུ་སྟོབ་པ་དང་། མེ་ཉིད་ཡེ་ཤེས་ཀྱི་མེར་བྱིན་གྱིས་བརླབས་ཏེ། ཚེ་ལས་
འདས་པའི་སྡིག་སྒྲིབ་ཐམས་ཅད་ཞི་བའི་ཕྲིན་ལས་མཛད་དུ་གསོལ། ཞེས་གསོལ་བ་རྒྱུད་ལས། མི་ཡི་མིང་དང་ཡུངས་དཀར་གྱིས། །བརྒྱ་ཕྲག་སྟོང་དུ་བསྲེགས་བྱས་ན། །ངན་སོང་ཀུན་ལས་རྣམ་པར་ཐར། །ཞེས་གསུངས་པའོ། །དེ་ནས་བླུགས་གཟར་གྱིས་མར་ཁུ་གང་ཕུལ། ༀ་ཨགྣ་ཡེ་ཛྭ་ལ་རཾ༔ མེ་ལྷ་འབར་བའི་དཀྱིལ་འཁོར་པད་ཟླའི་སྟེང་༔ ཧྲཱིཿཡིག་དམར་པོའི་འོད་ཟེར་ཀུན་ཁྱབ་འཕྲོས༔ རབ་འབྱམས་རྒྱལ་བའི་རྒྱུད་བསྐུལ་འགྲོ་ཀུན་གྱི༔ སྡིག་སྒྲིབ་སྦྱངས་ནས་ཚུར་འདུས་ཧྲཱིཿལ་ཐིམ༔ རིག་རྩལ་ཐོག་མའི་སངས་རྒྱས་འོད་དཔག་མེད༔ ར་གའི་མདངས་ལ་མཚན་བཟང་དཔེ་བྱེད་ཀྱི༔ གཟི་བྱིན་རབ་འཕྲོ་ཉིན་བྱེད་སྣང་བའི་ཁྱབ༔ ཞི་འཛུམ་སྙིང་རྗེའི་སྤྱན་གྱིས་འགྲོ་ལ་གཟིགས༔ ཕྱག་གཉིས་མཉམ་བཞག་བཻ་ཌཱུར་ལྷུང་བཟེད་འཛིན༔ སྤྲུལ་སྐུའི་ཆ་ལུགས་ཆོས་གོས་གསུམ་གྱིས་བཀླུབས༔ མི་གཡོ་མཉམ་ཉིད་རྡོ་རྗེའི་སྐྱིལ་ཀྲུང་བཞུགས༔ མཆོག་ཟུང་གཡས་སུ་འཇིག་རྟེན་དབང་ཕྱུག་དཀར༔ ཕྱག་བཞི་ཐལ་སྦྱར་པད་དཀར་ཕྲེང་བ་འཛིན༔ གཡོན་དུ་མཐུ་ཆེན་མཐིང་གསལ་རྡོར་དྲིལ་འཛིན༔ གཉིས་ཀར་ལོངས་སྤྱོད་རྒྱན་རྫོགས་པད་ཟླར་བཞེངས༔ དེ་རྒྱབ་ཁོར་ཡུག་ཁྲི་དང་པད་ཟླའི་སྟེང་༔ རྣམ་གཟིགས་སེར་པོ་མཉམ་བཞག་འཁོར་ལོ་འཛིན༔ རིམ་པ་གཙུག་ཏོར་ཅན་དང་ཐམས་ཅད་སྐྱོབ༔ གཉིས་ཀ་སྔོན་པོ་སྐྱབས་སྦྱིན་མཉམ་བཞག་མཛད༔ འཁོར་འཇིགས་སྔོན་པོ་མཉམ་བཞག་ནོར་བུ་འཛིན༔ གསེར་ཐུབ་སེར་པོ་མཆོག་སྦྱིན་མཉམ་བཞག་མཛད༔ འོད་སྲུངས་དཀར་པོ་མཉམ་བཞག་རྡོར་དྲིལ་བསྣམས༔ ཐམས་ཅད་སྤྲུལ་སྐུའི་ཆ་ལུགས་སྐྱིལ་ཀྲུང་བཞུགས༔ དེ་རྒྱབ་ས་
སྙིང་དཀར་པོ་རིན་ཆེན་དྲིལ༔ བྱམས་པ་དམར་སེར་ཀླུ་ཤིང་དྲིལ་བུ་འཛིན༔ ཀུན་བཟང་དཀར་པོ་རྡོ་རྗེ་དྲིལ་བུ་བསྣམས༔ ནམ་སྙིང་མཐིང་ཀས་འཁོར་ལོ་དྲིལ་བུ་འཛིན༔ འཇམ་དཔལ་དམར་སེར་རལ་གྲི་པོ་ཏི་བསྣམས༔ སྒྲིབ་སེལ་དཀར་པོ་གླེག་བམ་དྲིལ་བུ་འཛིན༔ དེ་རྣམས་ལོངས་སྤྱོད་རྒྱན་རྫོགས་ཕྱེད་སྐྱིལ་བཞུགས༔ དེ་རྒྱབ་ལཱ་སྱེ་དཀར་མོས་མེ་ལོང་འཛིན༔ པུཥྤེ་མཐིང་མོས་མེ་ཏོག་སྣ་ཚོགས་བཀྲམ༔ མཱ་ལྱེ་སེར་མོས་རིན་ཆེན་ཕྲེང་བ་འདྲེན༔ དྷཱུབྤེ་སྔོན་མོས་དྲི་ཞིམ་སྤོས་ཁང་ཐོགས༔ གཱིརྟི་དམར་མོས་པི་ཝང་སྙན་འགྱུར་འཐེན༔ ཨཱ་ལོ་དམར་སྐྱས་སྣང་གསལ་ཉི་འོད་བལྟམས༔ གནྡྷེ་དམར་སེར་མ་ཡིས་དུང་ཞལ་ཐོགས༔ ནཱིརྟི་ལྗང་མོས་རོ་བརྒྱའི་ཞལ་ཟས་བཏེག༔ ཐམས་ཅད་རྒྱན་གོས་རོལ་སྟབས་རབ་མཛེས་མ༔ སེམས་དཔའ་སེམས་མ་པད་ཟླའི་གདན་ལ་བཞུགས༔ དེ་རྒྱབ་ལྷ་སྟོན་རྒྱ་བྱིན་པི་ཝང་དཀར༔ ལྷ་མིན་ཐུབ་པ་ཐགས་བཟང་གོ་མཚོན་ལྗང་༔ མི་ཡི་ཐུབ་པ་ཤཱཀྱ་གསེག་ཤང་སེར༔ བྱོལ་སོང་ཐུབ་པ་སེང་རབ་པོ་ཏི་མཐིང་༔ ཡི་དྭགས་ཐུབ་པ་ཁ་འབར་སྒྲོམ་བུ་དམར༔ དམྱལ་བའི་ཐུབ་པ་ཆོས་རྒྱལ་མེ་ཆུ་ནག༔ དེ་རྣམས་སྤྲུལ་སྐུའི་ཆ་ལུགས་པད་ཟླར་བཞེངས༔ དེ་རྣམས་ཉན་རང་དགྲ་བཅོམ་ཚོགས་ཀྱིས་བསྐོར༔ སྒོ་བཞིར་པད་ཉི་ཉོན་མོངས་བདུད་བཞིའི་སྟེང་༔ རྣམ་རྒྱལ་དཀར་པོ་རྡོ་རྗེ་ལྕགས་ཀྱུ་འཛིན༔ གཤིན་རྗེ་སེར་པོ་རིན་ཆེན་ཞགས་པ་བསྣམས༔ རྟ་མགྲིན་དམར་པོ་པདྨ་ལྕགས་སྒྲོག་འཛིན༔ བདུད་རྩི་ལྗང་གུ་རྒྱ་གྲཾ་དྲིལ་བུ་འཛིན༔ བཞི་ཀ་ཁྲོ་ཆས་རྫོགས་པའི་འདོར་ཐབས་བཞེངས༔ རྩ་གསུམ་
འཁོར་ཚོགས་རྒྱས་པའི་དཀྱིལ་འཁོར་ལྷ༔ དངོས་འཛིན་གཟུགས་སྣང་རང་རྒྱུད་མ་ཡིན་པ༔ མཁའ་ལ་འཇའ་ཚོན་ཤར་བ་ལྟ་བུ་གསལ༔ ༀ་ཨཱཿ ཧཱུྃ་ཧྲཱིཿ ཨ་མི་དྷེ་ཝ་ཧྲཱིཿ ཛཿ ཧཱུྃ་བྃ་ཧོ༔ དེ་ནས་རྔ་རོལ་དབྱངས་ཀྱིས་སྤྱན་འདྲེན་པ་ནི༔ ཧཱུྃ་ཧྲཱིཿ ངོ་མཚར་ཕུན་ཚོགས་ནུབ་ཕྱོགས་བདེ་ཆེན་ཞིང་༔ འཕོ་འགྱུར་མེད་པར་རྒྱལ་བའི་དཀྱིལ་འཁོར་ནས༔ ཡེ་སངས་རྒྱས་པ་ཆོས་སྐུ་སྣང་མཐའ་ཡས༔ རིགས་འདུས་རྒྱལ་བའི་གཙུག་རྒྱན་སྤྱན་འདྲེན་ཞུ༔ ཚད་མེད་བཀོད་པ་ཀུན་ཁྱབ་ཐུགས་རྗེ་ཅན༔ ཇི་སྲིད་རྡུལ་གྱི་སེམས་ཅན་འདྲེན་པའི་དཔལ༔ མགོན་མེད་བདག་གིས་སྐྱབས་གནས་ཁྱེད་བསྐུལ་ཚེ༔ འགྲོ་བའི་དོན་དུ་གནས་འདིར་གཤེགས་སུ་གསོལ༔ མཉམ་ཉིད་ངོ་བོ་རང་སྣང་འཁོར་གྱི་གཞི༔ ཕྲིན་ལས་མཆོག་བཟང་སྤྱན་གཟིགས་མཐུ་ཆེན་ཐོབ༔ སྡིག་སྒྲིབ་ཀུན་སྦྱོང་སངས་རྒྱས་དཔའ་བོ་དང་༔ སེམས་དཔའ་སེམས་མ་ཐུབ་པ་རིགས་དྲུག་སྒྲོལ༔ ཉན་རང་དགྲ་བཅོམ་ཁྲོ་རྒྱལ་སྒོ་བ་བཞི༔ སོར་རྟོགས་ཡེ་ཤེས་རྩ་གསུམ་དཀྱིལ་འཁོར་ལྷ༔ གར་བཞུགས་ཞིང་ནས་གནས་འདིར་བྱིན་ཕོབས་ལ༔ མཆོག་དང་ཐུན་མོང་དངོས་གྲུབ་སྩོལ་ཕྱིར་བྱོན༔ ༀ་ཨ་མི་དྷེ་ཝ་ས་པ་རི་ཝཱ་ར་བཛྲ་ས་མཱ་ཡ་ཛ་ཛ༔༼རོལ་མོ།༽ བཞུགས་སུ་གསོལ་བ་ནི༔ ཧྲཱིཿ སྟོང་ཉིད་ཀློང་ཡོངས་ཡེ་ཤེས་འཕྲུལ་གྱི་ཞིང་༔ མ་བཅོས་ལྷུན་གྲུབ་བཀོད་པ་ཕུན་ཚོགས་དབུས༔ ཆགས་མེད་སྐྱོན་བྲལ་ཐབས་ཤེས་ཉི་ཟླའི་སྟེང་༔ མི་གཡོ་དགྱེས་ཤིང་བརྟན་པར་བཞུགས་སུ་གསོལ༔ ༀ་སརྦ་ཏིཥྛ་ལྷན༔ ཛཿ ཧཱུྃ་བཾ་ཧོ༔ བསྟིམས་ནས་བྱོན་སྐྱེམས་ལ༔ ཧྲཱིཿ འོད་དཔག་མེད་མགོན་ངན་སོང་སྦྱོང་བའི་ལྷ༔ འགྲོ་བའི་
དོན་དུ་དགོངས་ནས་བྱོན་པ་ལེགས༔ དགྱེས་པའི་ཞལ་སྐྱེམས་སྙིང་པོ་འདུས་པའི་བཅུད༔ ཞལ་སྒོ་འོད་ཀྱི་སྦུ་གུའི་ཀློང་ནས་གསོལ༔ ༀ་ཨ་མི་དྷེ་ཝ་ཧྲཱིཿ ལན་བདུན་པ་ཚོ་གསུམ་དགང་བླུགས་བྱོན་སྐྱེམས་ཉེར་གཅིག་སྔར་བཞིན་ལ༔ སོ་སོར་མཆོག་ཟུང་གཙོ་འཁོར་སྔགས་མཐར༔ ཚེ་ལས་འདས་པའི་སྡིག་སྒྲིབ་བར་གཅོད་མི་མཐུན་པའི་ཕྱོགས་ཐམས་ཅད་ཞི་བའི་ཕྲིན་ལས་མཛད་དུ་གསོལ༔༼རོལ་མོ།༽ ཞེས་སྦྲེལ། ཕྱག་འཚལ་བ་ནི༔ ཧྲཱིཿ ཡེ་ནས་རྫོགས་པ་སངས་རྒྱས་ཀུན་གྱི་མཆོག༔ བཀོད་པ་མཐའ་ཡས་ངོ་མཚར་འོད་དཔག་མེད༔ གང་ཤར་ཁྱེར་གསུམ་དབྱེར་མེད་སངས་རྒྱས་ལ༔ སྣང་རིག་འགྱུར་མེད་ངང་ནས་ཕྱག་འཚལ་ལོ༔ ཨ་ཏི་པུ་ཧོ༔ པྲ་ཏི་ཛ་ཧོ༔ སྒེག་སོགས་ལྷ་མོ་བཅུ་དྲུག་མཆོད་པ་ལ༔ དོན་གྱི་འཕྲོ་འདུ་སྤྲོས་བཅས་སྤྲོས་མེད་གང་༔ ༀ་ཨཱཿ ཧཱུྃ༔ འཛིན་ཆགས་བྲལ་བ་བློ་ཡི་མདུད་གྲོལ་ཀྱང་༔ དམན་པའི་ཡུལ་དུ་ཚོགས་རྫོགས་སྙིང་སྟོབས་ཕྲ༔ འོན་ཀྱང་དངོས་ཡིད་སྣང་ཤར་རིག་པའི་རྩལ༔ སྟོང་གསུམ་རབ་འབྱམས་ཀུན་བཟང་མཆོད་སྤྲིན་འབུལ༔ ཕྱི་ནང་མཆོད་པ་ཕྱག་རྒྱ་བཅས། ཧཱུྃ༔ རྡོ་རྗེ་སྒེག་མོས་བཞད་པའི་གཟུགས་མཛེས་སྤྲོ༔ རྡོ་རྗེ་ཕྲེང་བས་རིན་ཆེན་རྒྱན་ཚོགས་འབུལ༔ རྡོ་རྗེ་གར་མས་གར་གྱི་རྣམ་འགྱུར་གཡོ༔ གཟུགས་མཛེས་ལྷ་ཡུལ་བཀོད་པ་མཆོད་སྤྲིན་འབུལ༔ ཕམ་ལྟུང་སྐྱེ་སྒོ་བཅད་ནས་སངས་རྒྱས་ཤོག༔ རྡོ་རྗེ་སྤོས་མས་དྲི་ཞིམ་སྤོས་རྣམས་བདུག༔ རྡོ་རྗེ་མེ་ཏོག་སྣ་ཚོགས་ཡིད་འོང་མཆོད༔ རྡོ་རྗེ་མར་མེས་ཀུན་གསལ་སྟོང་མཆོད་འབུལ༔ རྡོ་རྗེ་དྲི་ཆབ་དྲི་བཟང་བཅུད་འཛིན་སྤྲོ༔ མཆོད་སྤྲིན་ཕུན་ཚོགས་ལྷ་མིན་ཡུལ་བཀོད་འབུལ༔ འཐབ་རྩོད་སྐྱེ་སྒོ་བཅད་ནས་སངས་
རྒྱས་ཤོག༔ རྡོ་རྗེ་པི་ཝང་ཐེག་ཆེན་གཞུ་འགྱུར་འཐེན༔ རྡོ་རྗེ་གླིང་བུས་སྟོང་ཉིད་གླུ་དབྱངས་འབུལ༔ རྡོ་རྗེ་རྔ་ཟླུམ་ཀུན་ཁྱབ་གཟིགས་པའི་སྒྲ༔ རྡོ་རྗེ་རྫ་རྔ་སྨིན་གྲོལ་ལེན་ཐབས་བརྡུང་༔ སྐད་རིགས་སྣ་ཚོགས་མི་ཡུལ་མཆོད་སྤྲིན་འབུལ༔ མི་ཁོམ་གནས་བརྒྱད་སྐྱེ་གཅོད་སངས་རྒྱས་ཤོག༔ རྡོ་རྗེ་གཟུགས་མས་གཟུགས་མཆོད་སྣ་ཚོགས་བཀྲ༔ རྡོ་རྗེ་རེག་མས་ལྷ་གོས་ན་བཟའ་གསོལ༔ རྡོ་རྗེ་རོ་མས་རོ་བརྒྱའི་ཞལ་ཟས་འབུལ༔ རྡོ་རྗེ་ཆོས་ཀྱིས་ལྷ་མོའི་ཆོས་འབྱུང་ཐོགས༔ མཁོ་དགུ་ཡི་དྭགས་ཡུལ་དམིགས་མཆོད་སྤྲིན་འབུལ༔ དབུལ་ཕོངས་སྐྱེ་སྒོ་བཅད་ནས་སངས་རྒྱས་ཤོག༔ པད་ཀོར་རང་རྒྱ་སེ་གོལ་བཅས། ༀ་གུ་རུ་ཨ་མི་དྷེ་ཝཱ་ས་པ་རི་ཝཱ་ར་ཨཾ་པྲ་ཏཱིཙྪ་ཨཱཿ ཧཱུྃ༔ པདྱཾ་པྲ་ཏཱིཙྪ་ཨཱཿ ཧཱུྃ༔ པུཥྤེ་པྲ་ཏཱིཙྪ་ཨཱཿ ཧཱུྃ༔ དྷུབྤེ་པྲ་ཏཱིཙྪ་ཨཱཿ ཧཱུྃ༔ ཨ་ལོ་ཀེ་པྲ་ཏཱིཙྪ་ཨཱཿ ཧཱུྃ༔ གནྡྷེ་པྲ་ཏཱིཙྪ་ཨཱཿ ཧཱུྃ༔ ནཻ་ཝི་ཏྱེ་པྲ་ཏཱིཙྪ་ཨཱཿ ཧཱུྃ༔ ཤབྟ་པྲ་ཏཱིཙྪ་ཨཱཿ ཧཱུྃ༔ རུ་པ་ཤབྟ་གནྡྷེ་ར་ས་སྤརྴེ་པཱུཙྪ་ཨཱཿ ཧཱུྃ༔ ཡང་གསང་མཆོད་པ་འབུལ་བ་ལ༔ ཧྲཱིཿ འཁྲུལ་སྤྱོད་འཚིང་གསུམ་ཐེབ་པའི་ཕུང་ཁམས་ལ༔ དུག་གསུམ་སྐུ་གསུམ་དབྱིངས་བསྒྲལ་དུག་ལྔའི་རྒྱུ༔ ཡེ་ཤེས་ལྔས་སྦྱངས་དམྱལ་ཁམས་ཡུལ་སྤྲོས་མཆོད༔ ཚ་གྲང་སྡུག་བསྔལ་སྐྱེ་གཅོད་སངས་རྒྱས་ཤོག༔ ༀ་མ་ཧཱ་ཝཱ་ཊ་དྷ་ཏུ་ཛྙཱ་ན་ཁ་ཁ་ཁཱ་ཧི༔ སྨན་གཏོར་རཀྟ་འབུལ་བ་ནི༔ ཧྲཱིཿ རྩ་བརྒྱད་སྟོང་སྦྱར་བདུད་རྩི་བཅུད་ཀྱིས་མཆོད༔ རོ་བརྒྱའི་སྨན་གཏོར་ལྷུན་པོ་ཉི་ཟླས་བརྒྱན༔ རཀྟའི་ཡན་ལག་དུད་འགྲོའི་བཀོད་མཆོད་འབུལ༔ བླུན་རྨོངས་སྐྱེ་སྒོ་བཅད་ནས་སངས་རྒྱས་ཤོག༔ མ་ཧཱ་པཉྩ་ཨ་མྲཏ་བ་ལིང་ཏ་རཀྟ་པཱུཙྪ་ཁཱ་ཧི་ཁཱ་ཧི༔ དེ་ནས་བསྟོད་པ་དྲིལ་སྟབ་
དང་། རིག་ལྔའི་རྒྱ་མཚོ་རང་རྒྱ་བཅས། ཧཱུྃ་ཧྲཱིཿ ཚད་མེད་བཀོད་པ་རྣམ་དག་མཆོག་གི་ཞིང་༔ རྡུལ་སྙེད་སངས་རྒྱས་ཀུན་གྱི་གཙུག་མཆོད་པ༔ ཆོས་སྐུའི་སྟོན་པ་བཅོམ་ལྡན་འོད་མི་འགྱུར༔ མཆོག་གི་མགོན་པོ་ཁྱེད་ལ་ཕྱག་འཚལ་བསྟོད༔ ཡོན་ཏན་མཐའ་ཡས་ཀུན་ཁྱབ་ཐུགས་རྗེའི་གཏེར༔ རིགས་དྲུག་སྲིད་པ་ཡོངས་ལ་སྤྲུལ་པས་ཁྱབ༔ ཞིང་ཁམས་ཀུན་ཏུ་ཆོས་ཀྱི་འཁོར་ལོ་བསྐོར༔ ངོ་མཚར་རྫུ་འཕྲུལ་མཛད་པ་མཆོག་ལ་བསྟོད༔ ཐར་མེད་ལས་ཅན་ངན་སོང་སྡུག་བསྔལ་གཟིགས༔ སྙིང་རྗེས་མ་བཟོད་འདྲེན་པའི་ཐུགས་རྗེའི་མདངས༔ སངས་རྒྱས་དཔའ་བོ་སེམས་དཔའ་སེམས་མ་དང་༔ དབྱེར་མེད་རྒྱལ་བ་བྱང་སེམས་ཚོགས་ལ་བསྟོད༔ འཁོར་བ་རིགས་དྲུག་རྣམ་སྨིན་སྲིད་མཚོ་ལས༔ མྱུར་དུ་སྒྲོལ་བའི་ཐུབ་ཆེན་ཉན་རང་འཁོར༔ བར་དོའི་འཇིགས་སྐྱོབ་ཁྲོ་ཆེན་རྩ་གསུམ་སོགས༔ དཀྱིལ་འཁོར་ལྷ་ཚོགས་ཡིད་སྣང་དག་པས་བསྟོད༔ དེ་ནས་རྫས་ཆེན་བཅོ་བརྒྱད་མེ་ལྷའི་སྐབས་ལྟར་ཐོག་མར་གཙོ་བོའི་སྔགས་ལན་རེས་མགོ་དྲངས་བཅུ་ཚན་རེ་རྫོགས་པ་དང་། མཆོག་ཟུང་སོགས་འཁོར་སྔགས་ཚང་མ། ༀ་ཨ་མི་དྷེ་ཝ་ཧྲཱིཿ ༀ་མ་ཎི་པདྨེ་ཧཱུྃ༔ ༀ་བཛྲ་པཱ་ཎི་ཧཱུྃ༔ ན་མཿསརྦ་ཏ་ཐཱ་ག་ཏ་ཧྲཱིཿ ད་ཡ་ཨ་ནུ་ག་ཏེ༔ ༀ་གུ་རུཾ་གི་ནི་སྭཱ་ཧཱ༔ ༀ་བོ་དྷི་ས་ཏྭ་མ་ཏི་སརྦ་ཛྙཱ་ན་སིདྡྷི་ཧཱུྃ༔ ཨ་འ་ཧ་ཤ་ས་མ༔ ཛ་དྷི་ཧྲཱིཿ ཧཱུྃ༔ མཐར་སྤེལ་ཚིག་བསྡུས་པ། ཚེ་ལས་འདས་པའི་སྐྱེ་བ་ཡེ་ནས་བསགས་པའི་སྡིག་སྒྲིབ་ཉེས་ལྟུང་ས་ལམ་གྱི་བར་ཆད་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ ཞེས་སྦྲེལ་ནས་རྫས་བཅོ་བརྒྱད་སོ་སོར་བཅུ་ཚན་བཅུ་རེ་རྫོགས་དུས་བརྒྱ་རྩ་གྲུབ་པ་ཡིན། དེ་མཚམས་མཆོག་ཟུང་སོ་སོའི་སྔགས་མཐར། རྫས་ཚན་བཅོ་བརྒྱད་པོ་སྔགས་
སོ་སོར་ཉེར་གཅིག་རེའི་མཐར་ཚེ་ལས་འདས་པས་སོགས་སྤེལ་ཚིག་སྦྱོར། དེ་ནས་བྱང་ཆུབ་སེམས་པའམ་ཐུབ་དྲུག་ཁྲོ་རྒྱལ་བཞི་རྣམས་སོ་སོར་སྔགས་ཀྱི་མགོ་དྲངས་རྫས་ཚན་བཅོ་བརྒྱད་པོ་སྔགས་བཅས་བཅུ་ཚན་རྫོགས་པ་དང་སྤེལ་ཚིག་གང་ལྟར། སྒོ་བཞིའི་རྫས་ཀྱི་སྐབས་སོ་སོའི་མཐར་རྫས་ལྷག་ཉུང་རེ་སྣོད་གཅིག་ཏུ་ཟུར་དུ་བསོགས་པ་ལ། ཏིལ་མ་གཏོགས་འདས་པའི་རྫས་སྡེར་ཁ་སྦུབས་པ་ལག་ལེན་ཡིན། དེ་ནས་སློབ་དཔོན་གྱིས་ཏིལ་ནག་ལ་གཙོ་འཁོར་སྔགས་བཅུ་རེའི་མཐར། ༀ་སརྦ་པ་པཾ་ད་ཧ་ན། བཏགས་པ་བརྒྱ་རེའི་མཚམས་སྤེལ་ཚིག་སྦྱར་བས་ཕུང་པོ་མ་ཚིག་བར་དུ་རྒྱུན་བསྲིང་བ་ཡིན། མར་ཁུ་བླུག་པ་ཡང་རོ་གཡོག་གིས་བསྟུན་གལ་ཆེ་སར་སྐྱེལ་མིས་བླུགས། བུད་ཤིང་མང་པོ་ལྷན་དུ་མེ་སྦར་ཤིང་འཇོག་ལུགས་གཟབ་དགོས། དེ་ལྟར་རྫས་ཚང་བར་སོང་ནས་ལྷ་ཡི་མཆོད་གཏོར་བླུགས་གཟར་དུ་སྨན་རག་བྲན། ༀ་ཨ་ཀ་རོ་ཞེས་གསུམ། ༀ་ཨ་མི་དྷེ་ཝ་ཧྲཱིཿ ས་པ་རི་ཝཱ་ར་ཨི་དཾ་བྷ་ལིངྟ་ཁ་ཁ་ཁཱ་ཧི༔ ཞེས་ལན་གསུམ་གྱིས་ཕུལ་ནས། ཧྲཱིཿ ལྷ་ཚོགས་འཁོར་བཅས་བདུད་རྩིའི་གཏོར་མར་བཞེས༔ ཐུགས་རྗེའི་ཕྲིན་ལས་ལྟོས་བཅས་ཡུལ་ཁམས་ཀུན༔ དགེ་ཞིང་བདེ་སྐྱིད་ཕུན་ཚོགས་མཛད་དུ་གསོལ༔ དམིགས་ཡུལ་མཁའ་ཁྱབ་བདེ་ཆེན་སྒྲོལ་བ་མཛོད༔ ༼རོལ་མོ།༽ དེ་ནས་ཆོས་སྐྱོང་གཉིས་ཀྱི་གཏོར་མ་བླུགས་གཟར་དུ་སྨན་རག་བྲན༔ ༼ན་མོ། དཀོན་མཆོག་གསུམ་གྱི་སོགས། མཆོད་སྤྲིན་འབུལ༔ ཧཱུྃ༔ རང་མདུན་ཐོགས་སོགས། རཀྟ་བྷ་ལིངྟ་ཁཱ་ཧི༔༽ ༀ་ཨཱཿ ཧཱུྃ༔ རང་ཉིད་ལྷ་ཡི་ཐུགས་ཀའི་འོད་ཟེར་གྱིས༔ ཞིང་སྐྱོང་སེང་གདོང་སྤྱན་དྲངས་མེ་ལྷ་ཡི༔ དཀྱིལ་འཁོར་མུ་ཁྱུད་བཞུགས་ནས་མཆོད་འབུལ་བཞེས༔ ༀ་སིདྷ་མུ་ཁ་ས་པ་རི་ཝཱ་ར་ཨི་དཾ་བ་ལིང་ཏ་ཁ་ཁ་ཁཱ་ཧི༔ གསུམ་ཕུལ། བྷྱོཿ གཏུམ་དྲག་མྱུར་མགྱོགས་མཐུ་རྩལ་སེང་གེའི་གདོང་༔ འོད་དཔག་མེད་ཀྱི་སྲུང་མ་དམ་
ཚིག་ཅན༔ གཏོར་མ་བཞེས་ལ་ཚེ་འདས་བདེ་ཆེན་ཞིང་༔ སྒྲོལ་བའི་ལམ་སོལ་གསོན་ལ་བདེ་ལེགས་མཛོད༔ གཏོར་མ་ཐབ་འབུལ། ཡང་བཀྱགས་ཏེ༔ སླར་ཡང་འོད་ཀྱིས་པདྨ་རིགས་རྣམས་ཀྱི༔ སྲུང་མ་འཁོར་བཅས་སྤྱན་དྲངས་ལྷ་འཁོར་བཞུགས༔ བསྲེག་རྫས་མཆོད་གཏོར་བཞེས་ལ་ཚེ་འདས་འདི༔ སྔོན་བསུ་རྒྱབ་སྐྱོར་བདེ་ཆེན་ཞིང་དུ་སྤོར༔ ༀ་དྷརྨ་པཱ་ལ་སརྦ་ས་པ་རི་ཝཱ་ར་ཨི་དཾ་བ་ལིང་ཏ་ཁ་ཁ་ཁཱ་ཧི༔ ༼འཁོར་འདས་མཐུ་རྩལ་སོགས། རོལ་མོ། ཚོགས་དྲངས་སྐབས་སྦྱིན་བསྲེགས་ཀྱི་དངོས་གྲུབ་ཀྱང་ལེན། ཧྲཱིཿ ཧཱུྃ། ཆོས་དབྱིངས་ཀློང་དུ་སོགས།༽ གཏོར་མ་མེ་ལ་ཕུལ་བར་བྱ༔ ལས་བྱང་གི་ཚོགས་མཆོད་སྔར་མ་སོང་ན་ཆུ་ཆང་ནང་གསུམ་བྲན་ལ་ཕུད་བཤགས་སྟོབ་པ་སྦྱིན་སྲེག་ནང་འབུལ་བ་དང་ཚོགས་དྲངས་མཐར་ལྷག་མ་བསྡུ་བ་བསྔོས་སྐབས་སྲེག་དཀྱིལ་གྱི་བྱང་ཤར་དུ་མཆོད་པར་གསུངས། ལྷོ་སྒོར་བསྐུར་བ་སྔ་བྱས་པས་འཐུས་ཕྱིར་འདིར་ལག་ལེན་མི་གནང་། དེ་ནས་རྫས་ལྷག་ལན་ཆགས་རིགས་ལ་བསྔོ་དགོས་ལ༔ ཐོག་མར་ཡཾ་ཤིང་གསུམ། མར་ཁུ་གསུམ། རྫས་ལྷག་མ་སྤུངས་པ་གསུམ་རྣམས། ༀ་ཨ་མི་དེ་ཝ་ཧྲཱི༔ ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ༀ་སམྦྷཱ་ར་སམྦྷཱ་ར་ཧཱུྃ༔ གིས་སོ་སོར་ཕུལ་བ་ལ་སྤེལ་ཚིག༔ ༀ་ཨཱཿ ཧཱུྃ༔ བསྲེག་རྫས་འདོད་ཡོན་མཁོ་དགུའི་ལོངས་སྤྱོད་འདི༔ ཡེ་ནས་ལན་ཆགས་ཤ་འཁོན་གཉེར་ཚོགས་ཀུན༔ ཁས་དམན་དབང་ཆུང་ཡི་དྭགས་རྣམས་ལ་སྦྱིན༔ ཐམས་ཅད་འཕགས་པའི་སྐྱབས་ཚུད་སངས་རྒྱས་ཤོག༔ ༼རོལ་མོ།༽ ཅེས་སོ་སོར་སྦྱོར། དེ་རྗེས་དཀྱིལ་འཁོར་པའི་ལྷ་ལ་གཏང་རག་གི་དོན་དུ་མཆོད་པ་ཁ་གསོ། ཕྱག་རྒྱ་བཅས། ཧྲཱིཿ འཇིག་རྟེན་རབ་འབྱམས་ཞིང་ཁམས་དཔག་མེད་ན༔ རང་བྱུང་གཙང་སྦྱར་ཚད་མེད་མཆོད་ཡོན་ཀུན༔ འོད་དཔག་མེད་མགོན་དཀྱིལ་འཁོར་ལྷ་ལ་འབུལ༔
བཞེས་ནས་སྒྲིབ་སྦྱོང་བྱང་ཆུབ་ཐོབ་པར་མཛོད༔ ༀ་གུ་རུ་ཨ་མི་དྷེ་ཝ་ས་པ་རི་ཝཱ་ར༔ ཨཾ་པྲ་ཏཱིཙྪ་པཱུཙྪ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཧྲཱིཿ འཇིག་རྟེན་རབ་འབྱམས་ཞིང་ཁམས་དཔག་མེད་ན༔ དྲི་མེད་བདུན་ལྡན་རྣམ་དག་ཞབས་བསིལ་ཀུན༔ འོད་དཔག་མེད་མགོན་དཀྱིལ་འཁོར་ལྷ་ལ་འབུལ༔ བཞེས་ནས་སྒྲིབ་སྦྱོང་བྱང་ཆུབ་ཐོབ་པར་མཛོད༔ ༀ་གུ་རུ་ཨ་མི་དྷེ་ཝ་ས་པ་རི་ཝཱ་ར༔ པདྱཾ་པྲ་ཏཱིཙྪ་པུཙྪ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཧྲཱིཿ འཇིག་རྟེན་རབ་འབྱམས་ཞིང་ཁམས་དཔག་མེད་ན༔ མཆོག་གི་མེ་ཏོག་ཆུ་སྐྱེས་ཐང་སྐྱེས་ཀུན༔ འོད་དཔག་མེད་མགོན་དཀྱིལ་འཁོར་ལྷ་ལ་འབུལ༔ བཞེས་ནས་སྒྲིབ་སྦྱོང་བྱང་ཆུབ་ཐོབ་པར་མཛོད༔ ༀ་གུ་རུ་ཨ་མི་དྷེ་ཝ་ས་པ་རི་ཝཱ་ར༔ པུཥྤེ་པྲ་ཏཱིཙྪ་པུཙྪ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཧྲཱིཿ འཇིག་རྟེན་རབ་འབྱམས་ཞིང་ཁམས་དཔག་མེད་ན༔ མ་ལ་ཡ་ཡི་དྲི་བསུང་སྤོས་སྣ་ཀུན༔ འོད་དཔག་མེད་མགོན་དཀྱིལ་འཁོར་ལྷ་ལ་འབུལ༔ བཞེས་ནས་སྒྲིབ་སྦྱོང་བྱང་ཆུབ་ཐོབ་པར་མཛོད༔ ༀ་གུ་རུ་ཨ་མི་དྷེ་ཝ་ས་པ་རི་ཝཱ་ར༔ དྷུབྤེ་པྲ་ཏཱིཙྪ་པཱུཙྪ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཧྲཱིཿ འཇིག་རྟེན་རབ་འབྱམས་ཞིང་ཁམས་དཔག་མེད་ན༔ ཉིན་བྱེད་སྣང་བ་བཅུད་བསྡུས་སྣང་གསལ་ཀུན༔ འོད་དཔག་མེད་མགོན་དཀྱིལ་འཁོར་ལྷ་ལ་འབུལ༔ བཞེས་ནས་སྒྲིབ་སྦྱོང་བྱང་ཆུབ་ཐོབ་པར་མཛོད༔ ༀ་གུ་རུ་ཨ་མི་དྷེ་ཝ་ས་པ་རི་ཝཱ་ར༔ ཨཱ་ལོ་ཀེ་པྲ་ཏཱིཙྪ་པུཙྪ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཧྲཱིཿ འཇིག་རྟེན་རབ་འབྱམས་ཞིང་ཁམས་དཔག་མེད་ན༔ ལྷ་ཡི་བདུད་རྩི་སྲིད་པའི་སྨན་ཆབ་ཀུན༔ འོད་དཔག་མེད་མགོན་དཀྱིལ་
འཁོར་ལྷ་ལ་འབུལ༔ བཞེས་ནས་སྒྲིབ་སྦྱོང་བྱང་ཆུབ་ཐོབ་པར་མཛོད༔ ༀ་གུ་རུ་ཨ་མི་དྷེ་ཝ་ས་པ་རི་ཝཱ་ར༔ གནྡྷེ་པྲ་ཏཱིཙྪ་པཱུཙྪ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཧྲཱིཿ འཇིག་རྟེན་རབ་འབྱམས་ཞིང་ཁམས་དཔག་མེད་ན༔ ཡོན་ཏན་ལྔ་ལྡན་རོ་བརྒྱའི་ཞལ་ཟས་ཀུན༔ འོད་དཔག་མེད་མགོན་དཀྱིལ་འཁོར་ལྷ་ལ་འབུལ༔ བཞེས་ནས་སྒྲིབ་སྦྱོང་བྱང་ཆུབ་ཐོབ་པར་མཛོད༔ ༀ་གུ་རུ་ཨ་མི་དྷེ་ཝ་ས་པ་རི་ཝཱ་ར༔ ནཻ་ཝིཏྱེ་པྲ་ཏཱིཙྪ་པུཙྪ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཧྲཱིཿ འཇིག་རྟེན་རབ་འབྱམས་ཞིང་ཁམས་དཔག་མེད་ན༔ དྲུག་ཅུའི་སྙན་འཇེབས་འབུད་དཀྲོལ་རོལ་མོ་ཀུན༔ འོད་དཔག་མེད་མགོན་དཀྱིལ་འཁོར་ལྷ་ལ་འབུལ༔ བཞེས་ནས་སྒྲིབ་སྦྱོང་བྱང་ཆུབ་ཐོབ་པར་མཛོད༔ ༀ་གུ་རུ་ཨ་མི་དྷེ་ཝ་ས་པ་རི་ཝཱ་ར༔ ཤབྟ་པྲ་ཏཱིཙྪ་པུཙྪ་མེ་གྷ་ས་མུ་དྲ་སྥ་ར་ཎ་ས་མ་ཡེ་ཧཱུྃ༔ ཞེས་མཆོད་ལ༔ བསྟོད་པ་ནི༔ ཧྲཱིཿ དུས་གསུམ་འཁོར་བ་མ་སྟོངས་སྒྲོལ་བའི་མགོན༔ རིགས་དྲུག་སྡུག་བསྔལ་ཀུན་སྐྱོབ་ཐུགས་རྗེ་ཅན༔ སྤྲུལ་པ་ཉི་རྡུལ་འཁོར་འདས་ཀུན་ལ་ཁྱབ༔ བཅོམ་ལྡན་འོད་མཐའ་ཡས་པའི་སྐུ་ལ་བསྟོད༔ སྐུ་གསུམ་རིགས་འདུས་རྒྱལ་བ་ཀུན་གྱི་ཡབ༔ འགྲོ་དོན་ཐུབ་དྲུག་སངས་རྒྱས་སྟོང་རྩ་དྲུག༔ གང་འདུལ་ཞི་ཁྲོའི་འདས་དང་མ་འདས་སྐྱོང་༔ འོད་དཔག་མེད་མགོན་དཀྱིལ་འཁོར་ལྷ་ལ་བསྟོད༔ དེ་ནས་ཕྱག་ལེན་སྤྱི་འགྲོ་གཤེགས་སྐྱེམས་ལ། དཀྱིལ་འཁོར་པའི་ལྷ་ཅུང་ཟད་འཛུམ་པའི་ལྗགས་དང་གཟར་བུ་གཉིས་ཀྱི་ཁ་ལ་ཧྲཱིཿ ཡིག་འོད་ཟེར་གྱི་ཕུང་པོ་འབར་བས་མཚན་པས་བསྲེག་བླུག་གི་བདུད་རྩི་རྒྱུན་དྲངས་ཏེ་གསོལ་བར་གྱུར༔ དགང་གཟར་བླུགས་བཅས། ༀ་ཨ་མི་དྷེ་བ་བདུན་གྱིས་བསྐངས་
ནས་འཁོར་སྔགས་མཐར། ཚེ་ལས་འདས་པའི་སྡིག་སྒྲིབ་བར་ཆད་མི་མཐུན་པའི་ཕྱོགས་ཐམས་ཅད་ཞི་བའི་ཕྲིན་ལས་མཛད་དུ་གསོལ༔ དེ་ལྟར་སླར་ཡང་བདུན་ཚན་གཉིས་ཀྱིས་གཤེགས་སྐྱེམས་རྫོགས་པ་ཡིན། མེའི་པྲ་བརྟག་པ་བྱོན་སྐྱེམས་ཀྱི་རྗེས་སུ་བྱེད་པ་དངོས་བསྟན་དུ་མ་ཟད་སྤྱིར་མེའི་ནུས་པ་མ་རྫོགས་ཀྱི་བར་དེ་སྲིད་དུ་ཡང་བརྟག་ཅིང་། ཁྱད་པར་སྒྲིབ་སྦྱོང་ཁོ་ནའི་ཆེད་དུ་བྱས་ན། ལས་དེའི་འབྲས་བུ་མཚོན་ཕྱིར་གཤེགས་སྐྱེམས་ཀྱི་མཐར་ཡང་བརྟག་དགོས་ཏེ། རྒྱུད་ལས། ཆོ་ག་བཞིན་དི་སྦྱིན་བསྲེག་བྱ། །དེ་ནས་དེ་ནི་ངེས་པར་ཡང་། །ལྷ་ཡི་གནས་སུ་སྐྱེས་གྱུར་ནས། །དེ་ཡི་མཚན་མ་སྟོན་པར་བྱེད། །ཅེས་གསུངས་ཤིང་། དེ་ཇི་ལྟར་ཞེ་ན། སྡིག་པ་བཅོམ་པའི་མཚན་མ་ནི། །དཀར་པོ་ཉིད་དང་གཡས་སུ་འབར། །གྱེན་དུ་འབར་ཞིང་དྲི་མ་མེད། །ཟླུམ་ཞིང་རྣམ་པར་མི་འཕྲོ་བ། །བསྟན་པ་གློག་བཞིན་དྲི་མ་མེད། །ཡང་ན་མེ་ལྷ་ཉིད་ཀྱི་ནི། །བདག་ཉིད་དེ་བཞིན་སྟོན་བྱེད་དེ། །ཟླ་བ་དྲི་མེད་དཀར་འདྲ་བ། །བཞིན་མདོག་བཟང་ཞིང་ལྷམ་མེར་འབར། །དེ་ཡི་མཚན་མ་འདི་དག་གིས། །དམྱལ་བ་ལ་སོགས་རྣམ་གྲོལ་ཞིང་། །སྡིག་པ་བཅོམ་ནས་བདེ་འགྲོར་ནི། །སྐྱེས་པ་ཡིན་པར་ཤེས་པར་བྱ། །ཞེས་གསུངས་ཤིང་། མི་དགེ་བའི་མཚན་མ་ནི། དུ་བ་ཆེ་ཞིང་མེ་སྟག་འཕྲོ་བ་དང་། དལ་བུའི་མདོག་མི་གསལ་བ་དང་། ཞན་པ་དང་མེ་ལྕེ་ཆད་པ་དང་། འོད་མེད་ཅིང་སྔོ་བ་དང་། མདུང་རྩེ་གསུམ་པ་ལྟ་བུ་དང་། མིག་ཚག་ཅན། བ་ལང་གདོང་པའི་དབྱིབས་ལྟ་བུ་དང་། མི་རོ་ལ་སོགས་པའི་དྲི་ང་བ་དང་། དྲི་མེད་པའམ། འཚུབ་ཅིང་འབར་བ་རྣམས་སོ། །༈ དེ་ནས་བཤགས་པ་ནི། ༼ལྷུག་འདོན།༽ ཨེ་མ་ཧོ༔ ཕུང་པོ་མེ་མཆོད་སྡིག་སྦྱོང་ཆོ་ག་ཡི༔ མ་འབྱོར་མ་གསལ་འཁྲུལ་དང་ནོངས་པའི་ཚོགས༔ ཡེ་ཤེས་སྤྱན་ལྡན་རྣམས་ལ་མཐོལ་ལོ་བཤགས༔ བཟོད་བཞེས་ཚངས་པའི་དངོས་གྲུབ་རྣམ་གཉིས་
སྩོལ༔ ཡིག་བརྒྱ་ལན་གསུམ་རྡོ་རྗེ་ཐུགས་ཀར་གཏོད་དྲིལ་བུ་བསིལ་ཞིང་དམ་ཚིག་དྲན་པས་བཟླ། སྦྱིན་བསྲེག་དངོས་གྲུབ་ལེན་པ་ནི། སྔར་ཚོགས་དྲངས་པས་འཐུས་པར་མཛད། གཤེགས་གསོལ་ནི༔ ༀ། ཡེ་ཤེས་མེ་ཡི་ཀློང་ཡོངས་དཀྱིལ་འཁོར་དུ༔ ངན་སོང་ཞིང་སྒྲོལ་ལྷ་ཚོགས་གཙོ་འཁོར་རྣམས༔ ཐུགས་རྗེ་ལས་གྲུབ་སངས་རྒྱས་ཡུལ་དུ་གཤེགས༔ ཡེ་ཤེས་དབྱིངས་ལས་དམ་ཚིག་བདག་ལ་ཐིམ༔ བཛྲ་མུ༔ ས་མ་ཡ་ཛཿ ཧཱུྃ་བཾ་ཧོ༔ དེས་འདས་པའི་མེ་ལྷའི་བྱ་བ་རྫོགས་ནས། འཇིག་རྟེན་པའི་གཏང་རག་འབུལ་བར་བླུག་གཟར་མར་ཁུ་གང་ཕུལ་བས། ༀ་ཛྭ་ལ་རཾ་ཛྙཱ་ན་ཛ༔ ༀ་སྒྲིབ་སྦྱོང་ཕྲིན་ལས་ཡེ་ཤེ་དཀྱིལ་འཁོར་ཀློང་༔ ཐུགས་རྗེའི་ལས་གྲུབ་མེ་ལྷ་གསལ་རྫོགས་གྱུར༔ བཀའ་དྲིན་གཏང་རག་ད་བཅོལ་འགྲོ་ཀུན་དོན༔ ཡེ་ཤེས་ཞི་བའི་མཆོད་པ་བཞེས་སུ་གསོལ༔ མེ་ལྷ་ཅུང་ཟད་འཛུམ་པའི་ལྗགས་དང་གཟར་བུ་གཉིས་ཀྱི་ཁ་ལ་རཾ་ཡིག་གིས་མཚན་པར་གྱུར༔ ༀ་ཨགྣ་ཡེ་སྭཱ་ཧཱ༔ བདུན་ཚན་རེའི་མཐར། ༀ་ཨགྣ་ཡེ་དི་པྱཱ་དི་སྱ་བི་ཤུདྷེ་མ་ཧཱ་ཤྲཱི་ཧ་བྱ་ཀ་བྱ་བ་ཧཱ་ཡ་ཧཱུྃ་ཕཊ་སྭཱ་ཧཱ༔ དགང་བླུག་ཁ་སྦྱར་ལེན་གསུམ་གཡས་བསྐོར། བདག་ཅག་དཔོན་སློབ་འཁོར་དང་བཅས་པ་དང་༔ ཚེ་ལས་འདས་པའི་སྡིག་སྒྲིབ་བར་ཆད་མི་མཐུན་པའི་ཕྱོགས་མཐའ་དག་དང་། མཆོད་སྦྱིན་རྫས་དང་ཡོ་བྱད་མ་ཚང་ཞིང་། ཏིང་ངེ་འཛིན་མ་གསལ་བ་སྔགས་ཆད་ལྷག་གི་ཉེས་པ་ཐམས་ཅད་ཤཱནྟི་ཀུ་རུ་ཡེ་སྭཱ་ཧཱ༔ དེ་བཞིན་སླར་ཡང་བདུན་ཚོ་གཉིས་ཀྱིས་གཤེགས་སྐྱེམས་ཉེར་གཅིག་རྫོགས། དེ་ནས་སྔར་མེ་ལྷ་འཇིག་རྟེན་པའི་སྐབས་སོར་བཞག །ཡཾ་ཤིང་ནས་བཟུང་རྫས་བཅོ་བརྒྱད་པོ་སོ་སོར་ལན་བདུན་རེ་སྤེལ་ཚིག་སོ་སོ་མིན་པས་བརྗོད་མ་ཐག་པ་འདི་བཞིན་ཕུལ་ཞིང་འཇིག་རྟེན་པའི་རྫས་སྣོད་ཁ་སྦུབ་པ་
ལས་རྫས་ལྷག་མི་འཇོག་པ་ཕྱག་བཞེས་ཡིན། སྤྱིར་སྔགས་མང་བ་ནི་ལེགས་ཤིང་རྫས་ལྷག་པོ་མི་ཉན་གསུངས་པའང་ཤེས་པར་བྱ། འཇིག་རྟེན་པའི་གཏོར་མ་བླུག་གཟར་དུ་ལས་བུམ་ནས་དྲི་བཟང་གི་ཆབ་བྲན། ཨ་ཀ་རོས་བྱིན་རླབས་བྱས་ལ། ༀ་ཨགྣ་དེ་བ་ས་པ་རི་ཝཱ་ར་ཨེ་དཾ་བ་ལ་ཏ་ཁ་ཁ་ཁཱ་ཧི༔ ལན་གསུམ་གྱིས་ཐབ་ཏུ་འབུལ། ༀ་ཐུགས་རྗེ་ཚད་མེད་ཕྲིན་ལས་མེ་ཡི་ལྷ༔ མཆོད་གཏོར་བཞེས་ལ་ལྟོས་བཅས་ཡུལ་ཕྱོགས་འདིར༔ ནད་མཚོན་མི་གེ་མི་འབྱུང་བདེ་སྐྱིད་རྒྱས༔ འབྲུ་ནོར་ཆོས་འཕེལ་དགེ་ལེགས་མཛད་དུ་གསོལ༔ ༀ་ཨགྣ་ཡེ་དེ་བ་ས་པ་རི་ཝཱ་ར་ཨཾ་ནས་ཤབྟ་པྲ་ཏིཙྪ་སྭཱ་ཧཱ༔ ༼རོལ་མོ།༽ཕྱེད་ཕྱག་བཅས། ༀ་ཚངས་པ་འཇིག་རྟེན་མགོན་སྲས་གཉིས་སྐྱེས་དབང་༔ ཐབས་མཁས་ཐུགས་རྗེའི་ཕྲིན་ལས་ཀུན་གྱི་དཔལ༔ རྫུ་འཕྲུལ་ཐོགས་མེད་ལས་ཀྱི་སྟོབས་པོ་ཆེ༔ ཡེ་ཤེས་མེ་ལྷའི་རྒྱལ་པོ་ཁྱོད་ལ་བསྟོད༔ འདི་སྒྲུབ་མ་འབྱོར་ཉམས་ཆག་མཐོ་ལོ་བཤགས༔ བདག་གཞན་དོན་འདི་ཁྱོད་ཀྱིས་སྒྲུབ་ལ་གཤེགས༔ ཅི་བཞིན་དུས་སུ་སླར་འབྱོན་དངོས་གྲུབ་སྒྲུབས༔ ཡེ་ཤེས་གནས་གཤེགས་དམ་ཚིག་འབར་བར་གྱུར༔ ༀ་ཨགྣ་ཡེ་ས་པ་རི་ཝཱ་ར་བཛྲ་མཱུ༔ དེ་ནས་རྡོར་དྲིལ་སར་འཇོག་སྐུ་ཆས་བསལ༔ ངག་གྲོལ། བདེ་སྨོན་འདོན། བཀྲ་ཤིས་བྱ། ༼ཧྲཱིཿ ཧཱུྃ༔ སྣང་བའི་ཡུལ་དུ་སོགས།༽ ཆོ་གའི་མཇུག་ཆད་ཐོ་བསྟན་སྐྱོང་ནས་རྗེས་ཆོག་ཚང་མ་བྱའོ། །དེ་ལྟ་བུའི་བསྲེག་ཆོག་དེའི་ཕན་ཡོན་ཤིན་ཏུ་ཆེན་པོའི་དོན་དང་ལྡན་པ། རྒྱུད་ལས། དེ་ཡི་ཤ་དང་རུས་པ་དང་། །སྐྲ་དང་ཐལ་བ་ལ་སོགས་པས། །ཆོ་ག་དེ་དང་འདྲ་བར་ནི། །སྦྱིན་བསྲེགས་བྱས་ན་ངན་སོང་ཡང་། །ཀུན་ལས་རྣམ་པར་ཐར་བར་འགྱུར། །ཞེས་དང་། རྩ་བ་རང་གཞུང་། མ་དག་རྣམ་ཤེས་ལྔ་བྲལ་ཕུང་པོ་ལ། །སྒྲུབ་དཀྱིལ་མེས་སྦྱོང་དག་པའི་སྣང་ལམ་ཟིན། །སྦྱང་གཞི་རོ་ལ་
སྦྱོང་བྱེད་འབྱུང་ཡེ་མེས། །འབྱུང་བའི་བག་ཆགས་ཡེ་ཤེས་ཉོན་མོངས་བསྲེགས། །རྣམ་ཤེས་སངས་རྒྱས་ཡུལ་རྫོགས་སྡིག་སྦྱོང་འགྱུར། །ཞེས་པ་རྡོར་སེམས་དགའ་རབ་ཞུས་ལན་གསུངས། །འདི་ནི་མཆོག་འབྲིང་ཐ་མ་ཀུན་ལ་གལ། །ཞེས་སོགས་ལུང་མཐའ་ཡས་སོ། །སྦྱིན་སྲེག་གྲུབ་ནས་རྗེས་ཀྱི་རིམ་པ་སཱཙྪ་གདབ་པ་ལ། ལོང་ཡོད་ན་ཞག་བདུན་དང་གསུམ་ལ་སོགས་པ་ཐབ་ཁུང་མི་བསྒུལ་བར་བཞག་ནས་བཏགས་གྲོལ་དང་ཤེར་ཕྱིན་གྱི་མདོ་འདོན། མེ་རང་ཞིར་འཇུག །ལོང་མེད་ན་འོ་མ་དང་དྲི་བཟང་གི་ཆུས་མེ་གཞིལ། གང་ལྟར་ཡང་སློབ་དཔོན་ཤར་ནས་ནུབ་ཏུ་ཁ་བསྟན་ཏེ། རྡོ་རྗེ་སེམས་དཔའི་ང་རྒྱལ་གྱིས་རྡོར་དྲིལ་པད་ཀོར་བཅས། སཾ་ཧ་ར་ན་ཧཱུྃ། ཞེས་རྡོ་རྗེ་བསྡུ་བའི་རྒྱས་རུས་བུ་རྣམས་བསྡུས་ནས་ལས་ཀྱི་རྗེས་མི་མངོན་པར་བྱ་སྟེ། རྒྱུད་ལས། དེ་ནས་ཐལ་བར་གྱུར་པ་དང་། །རྡོ་རྗེ་བསྡུས་པའི་སྔགས་ཀྱིས་ནི། །ཆོ་ག་བཞིན་དུ་བསྡུ་བར་བྱ། །ཞེས་སོ། །ཡང་སྦྱིན་སྲེག་མ་བྱས་པའི་རུས་པ་ཡང་། རང་ཉིད་ལྷར་གསལ་བའི་ཐུགས་ཀ་ནས་ཡེ་ཤེས་ཀྱི་འོད་ཟེར་བྱུང་བས་དམིགས་ཡུལ་གྱི་སྡིག་སྒྲིབ་ཐམས་ཅད་བསྲེག་པར་བསམ་ནས་གཟུངས་སྔགས་སྤེལ་ཚིག་བཟླ་བཞིན་མེ་ལ་བསྲེག་དགོས། གོང་ལྟར་རུས་པ་རིན་པོ་ཆེའི་སྣོད་དུ་དྲི་བཟང་གིས་པདྨ་འདབ་བརྒྱད་བྲིས་པའི་ཁར་བཞག་དེའི་སྟེང་དུ་མཉྫིའི་ཁར་བུམ་པ་དྲི་བཟང་གིས་ཆུས་གང་བ་དང་། དེ་དང་ཉེར་བར་བ་བྱུང་ལྔའི་སྣོད་དང་གུར་གུམ་སོགས་དྲི་བཟང་ཆུའི་སྣོད་ཀྱང་བཤམས། ཞིང་སྒྲུབ་དཀྱིལ་འཁོར་དང་འབྲེལ་དགོས་པས་ལས་བྱང་བུམ་སྒྲུབ་ཚོགས་མཆོད་བཀའ་སྲུང་མཆོད་པ་སོགས་རྒྱས་པར་བྱེད། རུས་ཆོག་ཉིན་གྲངས་སམ། གང་ལྟར་གཟུངས་བུམ་སྒྲུབ་པ་ཉིད་གཙོ་བོ་ཡིན་པས། ༀ་བཛྲ་ས་ཏྭས་བསངས། སྭཱ་བྷ་བས་སྦྱངས། རུས་བུའི་སྟེང་དུ་ཟླ་བ་ལ་གནས་པའི་ཨ་ཡིག་དཀར་པོ་འོད་ཟེར་འཕྲོ་བ་དེ་ལས་ཡེ་ཤེས་ཀྱི་བདུད་རྩི་བབས་པས་སྡིག་སྒྲིབ་ཐམས་ཅད་སྦྱངས་པར་
བསམ་ལ། ཞིང་སྒྲུབ་རྩ་སྔགས་ཚང་མར། ༀ་ད་ཧ་ད་ཧ་སརྦ་ནཱ་ར་ཀ་ག་ཏེ་ཧེ་དུན་ཧཱུྃ་ཕཊ༔ ༀ་པ་ཙ་པ་ཙ་སརྦ་པྲེ་ཏ་ཀ་ག་ཏེ་ཧེ་དུན་ཧཱུྃ་ཕཊ༔ ༀ་མ་ཐ་མ་ཐ་སརྦ་ཏིརྱ་ཀ་ག་ཏེ་ཧེ་དུན་ཧཱུྃ་ཕཊ༔ ཚེ་ལས་འདས་པའི་སྡིག་སྒྲིབ་དག་པར་གྱུར་ཅིག༔ ཞེས་སྤེལ་ཚིག་སྦྱར་བ་བཟླ། ཁྱད་པར་ཡིག་བརྒྱ་ལ་ཚེ་འདས་ཀྱི་མིང་སྔགས་སུ་བསྒྱུར་ཤེས་ན་བཟང་མ་ཤེས་ན་མིང་བརྗོད་བཅས། སྡིག་པ་དང་སྒྲིབ་པ་ཐམས་ཅད་བྱང་བར་གྱུར་ཅིག༔ མ་མ་ཀོ་ལིང་ས་མནྟ༔ བཏགས་པ་འབུམ་ཕྲག་ཕྱིན་ངག་བཅད་ནས་བཟླ་དགོས། སྐབས་སུ་རུས་བུ་ལ་གནས་ལུང་དབང་བསྐུར་བསྔོ་སྨོན་སོགས་ཀྱང་བྱེད། དེ་ནས་ལས་ལ་སྦྱོར་ཉེར་གཟུངས་སྔགས་སྤེལ་ཚིག་ཅན་བཟླས་པའི་ཆུ་དྲི་བཟང་བཅས་ཀྱིས་རུས་བུ་བཀྲུ་ཟིན་ནས་ཀོ་ལྟེབ་གཙང་མར་རྡོ་གཞོང་བཞག་པར་ཉེ་རིང་མ་ཡིན་པར་གྲོགས་ལག་གཟོབ་ཀྱིས་རུས་བུ་ཞིབ་པར་བརྡུངས་ནས། སྔར་གྱི་བུམ་ཆུ་དང་དྲི་བཟང་བ་བྱུང་རྣམས་ཀྱིས་ས་སྤྱིན་སྦངས་པའི་འཇིམ་པ་དང་སྦྱར་བ་རིན་པོ་ཆེའི་ཕུང་པོ་བསམ་སྟེ། རང་གི་ཐུགས་ཀའི་འོད་ཟེར་གྱིས་འོག་མིན་དུ་རྣམ་པར་སྣང་མཛད་ཀྱི་ཐུགས་རྒྱུད་བསྐུལ། དེའི་ཐུགས་ཀ་ནས་འོད་ཟེར་བྱུང་བའི་སེམས་ཅན་ཐམས་ཅད་ཀྱི་སྡིག་སྒྲིབ་སྦྱངས། འཇིམ་པ་ལ་ཐིམ་པས་དེ་བཞིན་གཤེགས་པ་ཐམས་ཅད་ཀྱི་རང་བཞིན་དུ་གྱུར་པར་བསམ་ཞིང་སློབ་དཔོན་གྱིས་ལག་གཡོན་པའི་མཐེབ་སོས་མཐེའུ་ཆུང་མནན་པ་གྱེན་བསྟན་དང་། གཡས་དེ་བཞིན་དུ་སྦུབས་པའི་བར་དུ་འཇིམ་པ་བཞག་ནས། ༀ་ན་མོ་བྷ་ག་ཝ་ཏེ་བཻ་རོ་ཙ་ནཱ་ཡ། པྲ་བྷ་རཱ་ཛཱ་ཡ་ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྷཱ་ཡ། ཏདྱ་ཐཱ། ༀ་པུཀཥྨ་པུཀཥྨེ། ས་མེ་ས་མ་ཡེ། ཤནྟེ། དཱནྟེ། ཨ་པ་མ་རོ་སེ། ཨ་ན་ལམྦྷེ། ཏ་རམྦྷེ། ཡ་ཤོ་ཝ་ཏི། མ་ཧཱ་ཏེ་ཛ། ནིར་ཀུ་ལེ། ནིརྒ་ཎེ། སརྦ་བུདྡྷ་ཨ་དྷིཥྛ་ན། ཨ་དྷིཥྛ་ཏེ་སྭཱ་ཧཱ། ཞེས་པ་རྣམ་སྣང་
གི་གཟུངས་སམ། ཡང་ན། ༀ་ཛི་ན་ཛིཀ྄་སྭཱ་ཧཱ། ཞེས་ཉེར་གཅིག་དང་། ཡིག་དྲུག་མང་དུ་བཟླས་པས་བྱིན་གྱིས་བརླབས། ༼བྱང་ཆོག་རྣམས་ལམ་ལས་འཇིགས་པར་སོགས། ཧྲཱིཿབྷྲཱུཾ་བར།༽ ༀ་བཛྲ་ཨཱ་ཡུ་ཥེ་སྭཱ་ཧཱ། རྡོ་རྗེའི་སྲོག་ཐོབ་པར་བསམ་ལ་འཇིམ་པ་བཅད། ༀ་བཛྲོད་བྷ་བཱ་སྭཱ་ཧཱ། ཡེ་ཤེས་རྡོ་རྗེ་འབྱུང་བར་བསམ་ལ་འབི་འབི་བྱ། ༀ་ཨ་ར་ཛེ་བི་ར་ཛེ་སྭཱ་ཧཱ། ཡེ་ཤེས་རྡོ་རྗེ་རྡུལ་བྲལ་དུ་བསམ་ལ་སྣུམ་བྱུག །ༀ་དྷཱརྨ་དྷཱ་ཏུ་གརྦྷེ་སྭཱ་ཧཱ། ཆོས་ཀྱི་དབྱིངས་ཀྱི་སྙིང་པོ་རྙེད་པར་བསམ་ཞིང་། ༼ཧཱུྃ། བདེ་གཤེགས་ཡེ་ཀློང་སོགས། སྭཱ་ཧཱཿ༽ བཀོ༷ལ་(བརྐོས་)ཕོར་དུ་བཅུག །ༀ་བཛྲ་མུརྒཱ་ར་ཨ་ཀོ་ཊ་ཡ་{ཧཱུྃ}ཕཊ། སངས་རྒྱས་ཐམས་ཅད་ཀྱི་ཕྱག་རྒྱས་གདབ་པར་བསམ་ལ་གདབ། ༀ་སརྦ་བིདྱཱ་སྭཱ་ཧཱ། ཡེ་ཤེས་ཀྱི་སྙིང་པོ་ཁོང་དུ་ཆུད་པར་བསམ་ལ་གུར་གུམ་གྱིས་བྲིས་པའི་ཡིག་བརྒྱ་དང་། རྟེན་འབྲེལ་སྙིང་པོ་གཟུངས་སུ་གཞུག །ༀ་དྷརྨ་ར་ཏེ་སྭཱ་ཧཱ། ཆོས་སྐུ་ལས་གཟུགས་སྐུར་གྲུབ་པར་བསམ་ཞིང་ཕྱིར་འདོན། ༀ་སུ་པྲ་ཏིཥྛ་བཛྲཱ་ཡེ་སྭཱ་ཧཱ། སངས་རྒྱས་ཐམས་ཅད་དེ་ལ་བརྟན་པར་བཞུགས་པ་བསམ་ལ་མེ་ཏོག་འཐོར་ཞིང་རབ་ཏུ་གནས་པ་བྱའོ། །དེ་ལྟར་སཱཙྪ་ལྔ་བདུན་གང་དགོས་གྲུབ་ནས། རབ་གནས་ལ་བདག་བསྐྱེད་སྔོན་དུ་འགྲོ་བས་རྟེན་གྱི་བགེགས་སྦྱང་བ་དང་། མེ་ཏོག་འཐོར་ཞིང་ཁྲུས་གསོལ་ནས་རྣམ་སྣང་དམ་ཚིག་པར་བསྐྱེད། ཡེ་ཤེས་པ་སྤྱན་དྲངས་ལ་བསྟིམ། དབང་བསྐུར་མཆོད་བསྟོད་བྱས་ནས་རང་གཟུགས་སུ་སྒྱུར་ནས་བརྟན་བཞུགས་དང་ཤིས་བརྗོད་བྱའོ། །དེ་ལྟའི་སྒོ་ནས་མཆོད་རྟེན་གཅིག་བཏབ་པས་བྱེ་བ་སྙེད་བཏབ་བར་འགྱུར་ཞིང་ཐམས་ཅད་དུ་སྐྱེ་བ་དྲན་པར་འགྱུར་ཏེ། དེ་ལྟར་ཡང་སྔར་རུས་བུ་བསྡུ་བར་གསུངས་པ་དེ་དང་འབྲེལ་བ་ལུང་ལས། ཐལ་བ་དང་ནི་རུས་པའི་རྡུལ། །སྔགས་ཀྱིས་བཏབ་པའི་དྲི་ཆུ་དང་། །བ་སྐྱེས་འོ་མ་ལ་སོགས་ལྔས། །སྦྱོང་བའི་སྔགས་ཀྱིས་བློ་ལྡན་གྱིས། །འབུམ་དུ་བཟླས་པས་བརྫིས་ནས་ནི། །ག་བུར་དྲི་ཡི་བགོས་པ་ཡིས། །འཇིམ་པ་དང་ཡང་བསྲེས་ནས་
ཀྱང་། །གཟུགས་སུ་བྱ་བའི་ཡང་ན་ནི། །མཆོད་རྟེན་གྱི་ནི་ལྷར་བྱས་ལ། །གཅིག་གམ་གཉིས་སམ་གསུམ་མམ་ལྔ། །ཡང་ན་བརྒྱ་རྩ་བརྒྱད་དུ་བྱས། །སྔགས་དང་ཕྱག་རྒྱ་བཏབ་ནས་སུ། །འབུམ་ཕྲག་གཉིས་བརྒྱའི་བར་དུ་བཟླས། །དེ་ནས་མཆོད་རྟེན་འབར་གྱུར་རམ། །ཡང་ན་གཟུགས་ཀྱི་ཞལ་འཛུམ་མམ། །དྲི་དང་བདུག་པའི་འོད་ཀྱང་རུང་། །སྣང་ངམ་ཡང་ན་ངད་ལྡང་ངམ། །ཞེས་སོགས་གསུངས་སོ། །དེ་ལྟར་སྒོ་དུ་མ་ནས་སྡིག་པ་སྦྱངས་པས་མཐོ་རིས་སུ་སྐྱེ་བའི་མཚན་མ་མཐོང་ན་དེའི་འགལ་རྐྱེན་བསལ་བ་དང་ལེགས་ཚོགས་སྤེལ་བའི་ཐབས་ཀྱི་རིམ་པ་གཙུག་ལག་གི་གཞུང་རྣམས་སུ་འབྱུང་བཞིན་ཤེས་པར་བྱ་བ་ཡིན་ནོ། །གཉིས་པ་ཡན་ལག་གཞན་བསྟན་པ་ལ། མཆོད་རྟེན་དུ་བཞག་པ་དང་། ཁྱིམ་དང་མཆད་པར་བཞག་པ། རིའམ་ཆུར་དོར་བ་གསུམ་ལས། དང་པོ་ནི། དབང་བསྐུར་བ་ལམ་སྦྱངས་བསྟན་སོགས་སྔར་བཞིན་སོང་ནས། རོ་བཀྲུས་པའི་ཆུས་འཇིམ་པ་བྱ། རྨང་ཞབས་ཚེ་འདས་སོགས་ལ་གནོད་བྱེད་ཀྱི་མིང་མནན། དེའི་སྟེང་དུ་གནོད་སྦྱིན་བང་མཛོད་བཅའ་བ་སོགས་མཆོད་རྟེན་ཚུལ་བཞིན་བརྩེགས་པའི་བུམ་པར་རོ་བཞག །སྦྱོང་ཁྲུས་སྔོན་དུ་འགྲོ་བས་ལྷར་བསྐྱེད་འགུགས་བསྟིམ་དབང་བསྐུར་མཆོད་བཟླས་པ་སོགས་བྱ། མཆོད་རྟེན་ཚར་ནས་རབ་གནས་དགའ་སྟོན་རྣམས་བྱ་སྟེ། རྒྱུད་ལས། དེ་ནས་རྣལ་འབྱོར་ཅན་གྱིས་ནི། །སྔགས་དང་ཕྱག་རྒྱས་དེ་དབང་བསྐུར། །ལྷ་ཡི་གཟུགས་སུ་བསྟན་ནས་ཀྱང་། །མཆོད་རྟེན་དབུས་སུ་གཞག་པར་བྱ། །ཞེས་གསུངས་པ་ལྟར། མཆོད་རྟེན་གྱི་དབྱིབས་ཀྱི་ཁྱད་པར་ནི། བིལ་བ་ཁང་བུ་རྒྱལ་མཚན་མཆོད་རྟེན་བརྒྱད། ཅེས་མཆོད་རྟེན་བརྒྱད་སྟོད་དུ་བཤད་པ་ལྟར། དང་པོ་ཟླ་གདན་ལ་ལྷུང་བཟེད་སྦུབས་པ་ལྟ་བུའོ། །གཉིས་པ་ནི་གྲུ་བཞི་རིམ་པ་བརྐྱངས་པ་དང་། གཉིས་བརྩེགས་སུ་བྱས་པ་ནི། ཁང་བུ་དང་ཁང་པ་བརྩེགས་པའོ། །གསུམ་པ་ནི། པདྨ་སྤུངས་པ་དང་། བྱང་ཆུབ་མཆོད་
རྟེན་སོགས་བདེར་གཤེགས་མཆོད་རྟེན་བརྒྱད་དོ། །གཉིས་པ་ཁྱིམ་མམ་མཆད་པར་བཞག་པ་ནི། སྦྱོང་ཁྲུས་སོགས་སྔར་བཞིན་བྱས་ནས། རང་ངམ་ཚེ་འདས་ཀྱི་ལྷའི་སྙིང་པོ་གུར་གུམ་གྱིས་བྲིས་པ་སྙིང་ཁར་བཏགས། གནས་ཡིག་གཞན་ཡང་བཀོད། གསོན་པོའི་རྟེན་མཐུན་པའི་གོས་ཀྱིས་བསྒྲིལ་ནས་རང་ཁྱིམ་དབེན་པའམ། དུར་མཆད་ཀྱི་གནས་སུ་རིན་པོ་ཆེའམ། ཤིང་ངམ། ས་ལས་བྱས་པའི་སྣོད་རབ་བྱུང་ལ་དཀར་པོ་མཆོད་རྟེན་གྱི་དབྱིབས། དགེ་བསྙེན་ལ་དམར་པོ་པདྨ་ཁ་སྦྱར་ལྟ་བུ། རྒྱལ་པོ་སྔོན་པོ་གཙུག་ཏོར་ལྟ་བུ། སློབ་དཔོན་ལ་དམར་སྐྱ་ཟ་མ་ཏོག་ལྟ་བུ། གཞན་ཕོ་ལ་སེར་སྐྱ་གདན་ཁྲི་ལྟ་བུ། མོ་ལ་སྔོ་སྐྱ་བིལྦ་ལྟ་བུ། བྱིས་པ་དམར་སེར་ལྷུང་བཟེད་ལྟ་བུ་རྣམས་བྱས་པའི་ནང་དུ་མགོ་ནུབ་དང་། ཁ་ལྷོར་བསྟན་ཐལ་མོ་སྤྱི་བོར་སྦྱར་བ་བཞག །རབ་རྣམས་ཚྭའམ་བྱེ་མ་རྔོ་བགྲང་གིས་འཐེམ་པར་བལྟེམས། ཆུ་ཅན་ཡིན་ན་འོག་ཏུ་འཛག་སྣོད་སོལ་བས་བཀང་བའང་བྱ། སྐྲའམ་ཐལ་མོ་ལ་སྲད་བུ་དམར་པོ་བཏགས་པ་ཕྱིར་བཏོན་པ་ནུབ་ངོས་ཀྱི་ཐོག་ལ་བཏགས། སྟེང་དུ་གདུགས་ཕུབ། སྣོད་ཀྱི་ཕྱིར་རིན་ཆེན་བདུན་བྲི། མཆོད་རྫས་ཅི་འབྱོར་གྱིས་བསྐོར། ལྷར་བསྐྱེད་བསྟིམ་དབང་བསྐུར་མཆོད་བསྟོད་སོགས་སྔར་བཞིན་བྱས་ནས་རྒྱུན་དུའང་མཆོད་པ་བྱས་ཏེ། ལུང་ལས། རང་གི་ལྷ་དང་ལྷ་གཞན་གྱིས། །སྙིང་པོ་སྙིང་གར་བྲིས་ནས་ནི། །ཁྱིམ་གྱི་ནང་དུ་གཞག་པར་བྱ། །ཞེས་སོ། །གསུམ་པ་རིའམ་ཆུར་དོར་བ་ནི། ལུང་ལས། ཐལ་བའམ་ཡུངས་དཀར་ཕྱེ་མ་སོགས། །རང་གི་མིང་སྨོས་སྔགས་བཏབ་ནས། །བཟླས་པ་བྱས་ཏེ་སོང་ནས་ཀྱང་། །རྒྱ་མཚོར་འབབ་པའི་ཀླུང་དུ་དོར། །དེ་ལྟར་བྱས་ན་སྡིག་ཅན་ཡང་། །ངན་སོང་ལས་ནི་ཐར་བར་འགྱུར། །ཞེས་སོགས་དང་། བདེ་གཤེགས་གནས་འགོད་ལས། དེ་རྗེས་རུས་པ་རྣམས་སྦྱོངས་ནས། །ཞིབ་མོ་རྡོ་ལ་བཏགས་ནས་ནི། །ཤིན་ཏུ་རྒྱ་
ཆེའི་ཆུ་བོ་ལ། །མཆོད་པ་བྱས་ཏེ་བསྐུར་བར་བྱ། །ཞེས་སོ། །ཡང་ན་ས་འཛིན་ཆེན་པོ་ནི། །མཐོན་ པོའི་རྩེ་ལ་འཛེགས་ནས་ནི། །ཤིན་ཏུ་ཤུགས་དྲག་མཐུན་པ་ཡི། །རླུང་དེ་ལ་ནི་བསྐུར་བར་བྱ། །ཞེས་སོ། །ཡང་རོ་དམུ་ཆུ་ཅན་ཡིན་ན་སྔོན་དུ་འཚག་པའམ། འོག་ཏུ་རྫས་སྣོད་དུ་མར་ནག་ལ་མུ་ཟི་དང་སྤོས་དཀར་བཏབ་པ་བཞག་ན་ཕུང་པོ་བསྲེག་སྐབས་བབས་པའི་ཆུ་ཡང་འབར་བྱེད་དུ་འགྱུར་རོ། །གལ་ཏེ་ཟ་འདྲེ་སྦུབས་ཞུགས་ཀྱི་དོགས་པ་ཡོད་ན། རྐང་མཐིལ་གཉིས་སུ་པོ་བི་བཙུགས་པའི་རྩེ་མོ་བོལ་གོང་འཐོན་པར་བྱེད། འདི་མེར་བསྲེག་པ། སར་གཏོར་སྦ། ཆུར་འཕེན་པ་སོགས་ལའང་མཚུངས། དུར་ཁྲོད་སོགས་སུ་རོ་ཁྱེར་ནས་བསྲེག་ན། རོ་འཁྱེར་མཁན་རྣམས་ལ་ཡི་གེ་གསུམ་བཟླས་པའི་སྲུང་སྐུད་གདགས། དེ་ནས་གདུགས། རྔ་ཡབ། རལ་གྲི། བུམ་པ། དགང་བླུག །བཟའ་བཅའ། བ་དན་རྣམས་ཐོགས་པ་རིམ་བཞིན། དབང་པོ། ཚངས་པ། ཁྱབ་འཇུག །ཆུ་ལྷ། མེ་ལྷ། བདེན་བྲལ། རླུང་ལྷ། བསྟོད་པ་འདོན་པ། བདེ་བྱེད། རོ་ལས་པ་གཤིན་རྗེ་རྣམས་སུ་མོས་ནས་ཡིག་བརྒྱ་ཚར་བདུན་བཟླས་ཏེ་དགེ་བ་བསྔོས། སློབ་དཔོན་གྱིས་སྒྲིབ་སྦྱོང་གི་སྔགས་བཟླ་བཞིན་དུ་སྣ་དྲངས་ནས་རོལ་མོ་དང་བཅས་པས་གང་དུ་བྱ་བའི་ས་དེར་འགྲོ་བར་བཤད་དོ། ། ༈ སྤྱི་དོན་གཉིས་པ་གང་ཟག་མཆོག་ལ་ཇི་ལྟར་བྱ་བ་ནི། རྡོ་རྗེ་གུར་གྱི་ལེའུ་བཅོ་ལྔ་པ་ལས། སློབ་དཔོན་མཐར་བྱེད་དུས་ནས་ནི། །འཇིག་རྟེན་པ་ནི་ཤི་ཞེས་བརྗོད། །རྨོངས་ལྡན་མི་རྣམས་གང་ཟེར་བ། །ཤི་ཞེས་པ་དེ་རྨོངས་པ་འོ། །ཤི་བ་ཞེ་བྱ་རྣམ་རྟོག་སྟེ། །དག་པའི་གནས་སུ་འཁྲིད་པ་འོ། །ཞེས་སོགས་བྱ་བའི་ཡུལ་གཏན་ལ་ཕབ་ནས་ཇི་ལྟར་བྱ་བ་ལ་ཆས་འཛུགས་པ། དབང་བསྐུར། གདུང་བསྲེག་པ། མཆོད་རྟེན་བཞེངས་པའོ། །དང་པོ་ནི། སྔ་མ་ལས། རྡོ་རྗེ་དྲིལ་བུ་ལག་པར་བྱིན། །མགོ་བོར་
དབུ་བརྒྱན་བཀོད་ནས་ནི། །ཞེས་གསུངས་པ་ལྟར་ཐོག་མར་གདུང་ལ་རེག་པའི་དགག་བྱ་མེད་པར་མཐོང་ནས། དྲི་བཟང་གི་ཆུས་ཁྲུས་གསོལ་ཞིང་། ག་བུར་གུར་གུམ་སོགས་དྲིས་བྱུག་པ་བྱ། ཇི་ལྟར་འོས་པའི་གནས་ཡིག་གདགས། དར་རས་དྲི་བཟང་གིས་སྦགས་པས་དྲིལ་བའི་ཕྱི་ནས་རྟེན་དང་མཚུངས་པའི་ན་བཟའ་དང་། དར་གྱི་སྟོག་གཡོག་དང་སྨད་དཀྲིས་གསོལ་ཕྱག་ཏུ་རྡོར་དྲིལ་གཏད། དབུ་རྒྱན་སོགས་ལྷའི་རྒྱན་གྱིས་བརྒྱན་ནས་ཇི་ལྟར་འོས་པའི་གདན་ཁྲི་ལ་བརྟན་པར་བཀོད། མདུན་དུ་དམ་ཚིག་གི་ཡོ་བྱད་དང་མཆོད་རྫས་རྣམས་མཛེས་པར་བཤམ་མོ། །གཉིས་པ་དབང་བསྐུར་བ་ནི། རྡོ་རྗེ་སྡོམ་པ་བྱིན་པ་ནི། བུམ་པའི་དབང་བསྐུར་སོགས་བྱིན་ལ། ཞེས་གསུངས་པས། བདག་མདུན་གྱི་སྒྲུབ་མཆོད་དབང་ལེན་རྣམས་སྔོན་དུ་འགྲོ་བས། རྟེན་བསངས་སྦྱངས། བླ་མ་དང་དཀྱིལ་འཁོར་གཙོ་བོ་དབྱེར་མེད་དམ་ཚིག་པར་བསྐྱེད། གནས་གསུམ་བྱིན་གྱིས་བརླབས། ཐུགས་ཀའི་འོད་ཟེར་གྱིས་དུས་གསུམ་བླ་མ་རྒྱལ་བའི་དཀྱིལ་འཁོར་ཐམས་ཅད་ཡེ་ཤེས་ཀྱི་ངོ་བོར་ཚིག་བཅད་གང་འོས་སྔགས་དང་ཕྱག་རྒྱར་བཅས་པས་སྤྱན་དྲངས། དགུགས་བཞུགས་བཅིངས་མཉེས་བྱས་ཏེ་དབྱེར་མེད་དུ་བསམ། ཐུགས་དམ་དང་མཛད་པ་ཕྲིན་ལས་ལ་བར་དུ་གཅོད་པའི་བགེགས་སྦྱངས། ཇི་ལྟར་བལྟམས་པ་སོགས་དང་ཕར་ཕྱིན་དྲུག་གི་ཁྲུས་གསོལ། སྐུ་ཕྱི་བ་རྣམས་བྱས་ནས་དབང་འབུལ། བླ་མའི་བྱ་བ་རྣམས་དཀྱིལ་འཁོར་གྱི་གཙོ་བོ་དང་། སློབ་མའི་བྱ་བ་རྣམས་བླ་མ་ཉིད་ཀྱིས་མཛོད། རང་ཉིད་ལས་ཀྱི་རྡོ་རྗེའི་ཚུལ་དུ་བྱས་ཏེ་དབང་རྣམས་ཕུལ། བླ་མ་ཉིད་དཀོན་མཆོག་ཀུན་འདུས་ཀྱི་ངོ་བོར་བཞུགས་པ་ལ་ཕྱག་མཆོད་བསྟོད་པ་གསོལ་འདེབས་ནོངས་བཤགས་སོགས་བསགས་སྦྱང་གི་ཆོ་ག་རྒྱས་པ་བྱས་ནས་དབང་བཞི་བླང་མཐར་བླ་མ་འོད་ཀྱི་གང་བུར་ཞུ་བར་སྤྱི་བོ་ནས་གཉིས་མེད་དུ་བསྟིམ། རྣམ་ཐར་བཞི་ལྡན་གྱི་ཏིང་ངེ་འཛིན་ལ་མཉམ་པར་བཞག་ནས་དགེ་བ་
བསྔོ། འདི་ནི་རྙིང་ལུགས་བླ་མ་མཆོད་ཆོག་རྒྱས་པར་འབྱུང་བའི་སྡོམ་བྲིས་པ་ཡིན། རང་དང་ཆོས་འབྲེལ་མེད་ནའང་དེ་དང་གོ་འཕང་མཉམ་པར་བཞུགས་པ་དག་ལ་ཡང་དབང་ལེན་པ་སོགས་བོར་ནས་གཞན་གོང་ལྟར་དང་། བླ་མའི་མིང་ཙམ་གྱིས་མཚོན་པ་ལ་དམན་མཆོག་ཇི་ལྟར་རིགས་པའི་འདོར་ལེན་བུ་སློབ་སོགས་ཀྱི་བསམ་པ་དང་མཐུན་པར་སྐབས་ཕྱེད་པར་བྱའོ། །གསུམ་པ་སྐུ་གདུང་བསྲེག་སྦྱང་ལ། ལུང་ལས། རྡོ་རྗེ་ཐབ་ཁུང་སྦྱོར་བ་ཡི། །འདུ་བྱེད་རབ་ཏུ་བྱ་བ་བརྟན། །ཞེས་དང་། ཉི་མ་གསུམ་ནི་ལོན་པ་ན། །རུས་པའི་ཕྲེང་བ་བསྡུས་བྱས་ལ། །དྲི་དང་འོ་མས་བྲན་ནས་ནི། །དེ་ཡི་མཆོད་རྟེན་དུ་བྱའོ། །ཞེས་གསུངས་པས། ཞི་བའི་ཐབ་དང་པུར་ཁང་གིས་གཞི་སྔ་ལྟར་ལས་ཁྱད་པར་མྱང་འདས་མཆོད་རྟེན་མཚན་ཉིད་ཚང་བའི་རྣམ་པ་ཅན་དུ་བྱས་ལ། དེར་རོལ་མོ་མཆོད་པ་དང་བཅས་པས་སྤྱན་དྲངས། ཁྲུས་གསོལ། གདགས་ཡིག་སོགས་སྔར་བཞིན་དང་། ལྷར་བསྐྱེད་པ་མཆོད་ཅིང་བསྟོད་ནས་མེར་འཇུག་ཁར་ཡེ་ཤེས་པ་ནམ་མཁར་བཏེགས། ཆོས་འབྲེལ་མེད་པ་ཞིག་གིས་ཐོག་མའི་མེ་སྦར་དུ་འཇུག །འཇིག་རྟེན་པའི་མེ་ལྷའི་སྦྱིན་སྲེག་ཚར་ནས། ཡེ་ཤེས་ཀྱི་དཀྱིལ་འཁོར་གསལ་བཏབ། བླ་མ་དང་ཡེ་ཤེས་ཀྱི་དཀྱིལ་འཁོར་དབྱེར་མེད་དུ་སྤྱན་དྲངས་ནས་དམ་ཚིག་པ་ལ་བཞུས་སུ་གསོལ་བ་མཆོད་ཡུལ་དུ་བྱས་ནས་བསྲེག་རྫས་རྣམས་མཆོད་པའི་རྣམ་པར་འབུལ་ཞིང་། དཔལ་ལྡན་བླ་མ་དམ་པའི་སྐུ་གསུང་ཐུགས་ཡོན་ཏན་འཕྲིན་ལས་དང་བཅས་པ་ལ་བར་དུ་གཅོད་པ་ཐམས་ཅད་ཤཱནྟ་ཀུ་རུ་སྭཱ་ཧཱ། ཞེས་སོགས་སྤེལ་ཚིག་ཇི་ལྟར་འོས་པ་སྦྱར་ཏེ་འདས་པའི་སྦྱིན་སྲེག་གི་ཆོ་ག་རྣམས་བྱས་ནས་མཐར་འཇིག་རྟེན་པའི་མེ་ལྷ་མཆོད་པ་ཡང་དཀྱུས་བཞིན་ནོ། །དེ་ནས་ཞག་གསུམ་མམ་བདུན་ལ་སོགས་པར་མཆོད་དེ་མེ་མ་ཤི་ན་འོ་མས་གཞིལ་གདུང་ཐལ་རྣམས་སྣོད་གཙང་མར་བསྡུས་ཏེ་ཐལ་རྗེས་མི་མངོན་པར་བྱའོ། །
བཞི་པ་མཆོད་རྟེན་བཞེངས་པ་ལ། ལུང་ལས། དེ་ནས་རུས་པ་བསྡུས་པ་རྣམས། །མཁས་པས་ཡིད་འོང་འོ་མས་བཀྲུས། །འཇིམ་པ་བསྲེས་ནས་སཱཙྪ་གདབ། །སྙིང་པོ་མཆོད་རྟེན་བརྩེག་པར་བྱ། །ཞེས་གསུངས་པ་ལྟར་གདུང་འོ་མ་དང་དྲི་བཟང་གིས་ཆུས་བཀྲུས་ནས་ཞིབ་མོར་བཏགས་པ་འཇིམ་པ་དང་སྦྱར་བ་ལས་ཆོ་ག་སྔར་བཞིན་དུ་སཱཙྪར་བྱས་པ་རྟེན་ཀྱི་སྙིང་པོར་བཞུགས་པའམ། ཡང་ན་གདུང་ལྷར་བསྐྱེད་མཆོད་བསྟོད་བྱས་པ་རིན་པོ་ཆེའི་ངོ་བོ་རུས་པའི་རང་མཚན་ཅན་དྲི་བཟང་པོ་དང་ན་བཟའི་བཀུར་སྟི་དང་བཅས་རྟེན་གྱི་སྙིང་པོར་བཞུགས་སུ་གསོལ་བ་ཡང་ལེགས་སོ། །འདིར་གདུང་སཱཙྪར་བསྒྲུབས་ནས་བཞུགས་པར་བྱ་ཡི་རང་མཚན་པ་ནི་གཞུག་ཏུ་མི་རུང་ངོ་། །ཞེས་པའི་དགག་བྱ་དེ་ཡང་མཐའ་གཅིག་ཏུ་ངེས་པའི་གཏན་ཚིགས་ཡོད་པ་མི་སེམས་ཞེས་ཆོས་རྒྱལ་གཏེར་བདག་གླིང་པས་གསུངས། དེས་ན་བླ་མའི་མིང་ཙམ་བཟུང་བའི་གོ་འཕང་ཐོབ་པ་ཙམ་ལ་ནི་སཱཙྪ་སྒྲུབ་པ་ནི་ལེགས་སོ། །འདིར་བཤད་པ་རྣམས་རྡོ་རྗེ་སློབ་དཔོན་གྱི་གོ་སར་བཞུགས་པ་རྣམས་ཀྱི་བསྒྲུབ་བྱར་རྒྱུད་གཞུང་རྣམས་ལས་རྒྱ་ཆེར་གསུངས་པ་ལྟར་གཞན་དོན་གྱི་ཁུར་ཁྱེར་བའི་ལྷག་བསམ་ཅན་རྣམས་ཀྱིས་ཚུལ་བཞིན་དུ་བསྒྲུབ་པ་ལ་ནན་ཏན་དུ་བྱའོ། །འདིར་སྨྲས་པ། ཐབས་མཁས་གསང་ཆེན་ལམ་གྱི་ཉམས་ལེན་ལ། །བླང་དོར་མ་ནོར་སྒེག་མོའི་འགྲམ་ཆང་གིས། །དོན་གཉིས་བ་ཀུ་ལ་ཡི་འདབ་བརྒྱ་འཛུམ། །བློ་ལྡན་སྦྲ་མ་ར་རྣམས་རྩེ་གར་རོལ། །དོན་ལྡན་སྔོན་བྱོན་མཁས་པའི་ཕྱག་བཞེས་སྲོལ། །
དམ་པའི་དྲིན་གྱིས་རང་བློར་ངེས་པ་རྣམས། །དམ་པའི་གསུང་གིས་བསྐུལ་ཕྱིར་འདི་བརྩམས་དགེས། །དམ་པ་མཆོག་རྣམས་དགྱེས་པའི་མཆོད་སྤྲིན་ཤོག ། མཆོག་དམན་བར་དོའི་འགྲོ་ཀུན་ལམ་མཆོག་འདིས། །ངན་འགྲོ་ལས་ཐར་གཏན་བདེའི་ས་ལ་འགོད། །བདག་ཀྱང་སྲིད་པ་ཐ་མལ་བར་དོ་ལ། །སྔངས་སྐྲག་འཇིགས་སྣང་རང་སར་གྲོལ་གྱུར་ཅིག །དེ་ལྟར་བསམ་གླིང་གཏེར་བྱོན་འཇའ་ལུས་བདེ་ཆེན་ཞིང་སྒྲུབ་ཀྱི་སྒོ་ནས་གདོས་བཅས་ཕུང་པོ་བསྲེག་ཐབས་ཀྱི་ལག་ལེན་གསལ་བྱེད་ཁྲིགས་སུ་བཀོད་པ་ལྔ་ལྡན་ཡེ་ཤེས་འོད་འབར་ཞེས་བྱ་འདི་ཡང་། ཁྱབ་བདག་རྡོ་རྗེ་འཆང་ལྷ་འབྲང་གྲུབ་པའི་འཁོར་ལོས་སྒྱུར་བའི་རྗེ་དབོན་མཐུ་སྟོབས་ནུས་པའི་མངའ་བདག་བུདྷ་མངྒ་ལས་སྤྲིངས་ཡིག་གི་ལམ་ནས་རྣམ་སྣང་གསང་མཛོད་འགྲོ་འདུལ་ནམ་མཁའ་རྒྱལ་པོའི་ཕུང་པོ་བསྲེག་ཆོག་དེས་ཞིང་སྒྲུབ་འདི་སྐོར་གང་ཟག་མཆོག་འབྲིང་ཕལ་བ་བཅས་ཕྲིན་ལས་སྨིན་པའི་རོ་བསྲེག་གི་ཆོ་ག་རྒྱས་བསྡུས་འཚམ་པ་ཞིག་དགོས་པའི་བཀའ་ཕེབས་དོན་ལྡན་བྱ་ཕྱིར། ཆོས་འདི་ཉམས་སུ་ལེན་པ་ཤཱཀྱའི་དགེ་སློང་ཞེ་ཆེན་པ་མཁན་པོའི་ཁུར་འཛིན་སྤྲུལ་མིང་འགྱུར་མེད་མཐུ་སྟོབས་རྣམ་རྒྱལ་དཔལ་བཟང་པོས་ཁ་བསྒྱུར་དགོས་རིགས་བཅས་འཕྲལ་དུ་སྤེལ་བ་ཕྱོགས་དུས་ཀུན་ཏུ་བཀྲ་ཤིས་པར་གྱུར་ཅིག །ཞུས་སོ།། །།