སྨན་བསྡུ་ཚུལ་དང་སྨན་སྒྱེ་ཁ་དོག་ལྔར་བླུག་ཚུལ།
༈ ཡང་སྨན་བསྡུ་ཚུལ་དང་སྨན་སྒྱེ་ཁ་དོག་ལྔར་བླུགས་ཚུལ་འདི་ལྟར། སྒྱེ་དཀར་པོ། བྱང་སེམས་དཀར་པོ། མི་ཤ་གླད་པ་སྐུང་པ། སྲོག་ཆག་དཀར་པོ་རྣམས་ཀྱི་ཤ་ཁྲག་སྙིང་སྣ་སྡེར་ཆགས་ཀྱི་ཤ་སྟེ། བྱང་སེམས་དཀར་པོ་ནས་སྡེར་
ཆགས་ཤའི་བར་དངོས་རྙེད་ན་རབ། ཡང་ན་སྔོན་སེལ་མེད་པའི་ཕབས་རྒྱུན་བཟང་པོ་བཏང་། ཆོས་སྨན། ག་བུར། རིང་བསྲེལ། ཅུ་གང་། ཐལ་དཀར་རྡོ་རྗེ། ཙནྡན་དཀར་པོ་སོགས་སྨན་ཁ་དོག་དཀར་པོའི་རིགས། དུང་། མུ་ཏིག་སོགས་རིན་ཆེན་དཀར་པོའི་རིགས། འབྲས་ནས་དཀར་གྲོ་རྔོ་འབྲུ་དང་། མེ་ཏོག་དཀར་པོའི་རིགས། སྤོས་དཀར། ཤེལ་དཀར། དཀར་གསུམ་སོགས་དཀར་པོའི་རིགས་ཐམས་ཅད། ཨ་རུ་ར་སོགས་རོ་སྙ་གའི་རིགས། བུ་རམ། སྦྲང་རྩི། རྒུན་འབྲུམ་སོགས་མངར་རིགས་ཐམས་ཅད། སྨན་ཁ་དོག་དཀར་ཤས་ཅན་དང་། རྩ་བའི་རིགས་རྣམས་འགྲང་ཕུ་སོགས་སྨན་རྣམས་བསགས། ༈ སྒྱེ་སེར་པོར། རིན་ཆེན། བ་གླང་གི་ཤ །སྲོག་ཆགས་དམར་སེར་གྱི་ཤ་ ཁྲག་སྙིང་སྣ། རྨིག་པ་ཁ་བྲག་ཅན་གྱི་ཤ་སྟེ་དྲི་ཆེན་ནས་འདི་བར་དངོས་སམ་ཡང་ན་སེལ་མེད་ཀྱི་ཕབས་རྒྱུན། ཛཱ་ཏི། ཨ་རུ་ར། ཨ་ག་རུ། ཨར་ནག་གཉིས། དུ་རུ་ཤ༷་(ཀ)ཤིང་མངར་སོགས། ཁ་དོག་དམར་སེར་གྱི་སྨན་རྣམས། གསེར་དང་སྦུར་ལེན་སོགས་རིན་ཆེན་སེར་པོའི་རིགས། གྲོ་དང་འབྲུ་སོགས་མེ་ཏོག་དམར་སེར་རིགས། ཤིང་ཏོག་སེར་པོའི་རིགས། སྤང་སྤོས་སོགས་དམར་སེར་རིགས་སུ་གྱུར་པ་ཐམས་ཅད་ནིམ་པ། ཏིག་ཏ་སོགས་རོ་ཁ་བའི་རིགས་སྨན་ཐམས་ཅད་བསགས།
༈ སྒྱེ་སྔོན་པོར། ཤ་སྣ་ཚོགས། ཁྱིའི་ཤ་རྐང་མར་ཚིལ་དང་། ཀླད་པ་སྣ་ཚོགས། སྲོག་ཆགས་སྔོན་པོའི་རིགས་ཀྱི་ཤ་སྣ་སྙིང་སྣ་སོགས། ཤ་སྣ་འདི་བར་དངོས་སམ། ཡང་ན་སེལ་མེད་ཀྱི་ཕབས་རྒྱུན། སྙིང་ཞོ་ཤ །མཁལ་མ་ཞོ་ཤ །གླ་གོར་ཞོ་ཤ །ཙི་ཏྲ་ཀ །ཀ་ཀོ་ལ་སོགས་ཁ་དོག་སྔོ་བའི་རིགས། ཨིནྡྲ་ནཱི་ལ། མུ་མེན་སོགས་རིན་ཆེན་སྔོན་པོའི་རིགས། འབྲུ་དང་མེ་ཏོག་ཤིང་ཏོག་སོགས་སྔོན་པོའི་རིགས། སེ་འབྲུ། སྟར་བུ། སེ་ཡབ། སྐྱུ་རུ་ར་སོགས་སྨན་སྐྱུར་བའི་རིགས་ཐམས་ཅད་བསགས་སོ། །༈ སྒྱེ་དམར་པོར། པདྨའི་རཀྟ། ཁྲག་སྣའི་རིགས། རྟ་དང་། རྨ་བྱའི་ཤ ། སྲོག་ཆགས་དམར་པོའི་རིགས་ཀྱི་ཤ་ཁྲག་སྙིང་སྣ་སྟེ་པད་རག་ནས་འདི་བར་སོགས། ཙནྡན་སྨུག་པོ། ལི་ཤི། སྐྱུ་རུ་ར། རྒུན་འབྲུ། སྟར་བུ། སིནྡྷུ་ར། གནྡྷེར་ བྷཱ་དྲ། རྩྭ་འབྲས་སོགས་ཁ་དོག་དམར་པོའི་སྨན་རིགས། སྒ་སྐྱ། ན་ལེ་ཤམ། པི་པི་ལིང་སོགས་རོ་ཚ་བའི་སྨན་རིགས། བྱུ་རུ་པདྨ་ར་ག་སོགས་རིན་ཆེན་དམར་པོའི་རིགས། འབྲུ་དང་མེ་ཏོག་དམར་པོའི་རིགས་ཐམས་ཅད་བསགས། ༈ སྒྱེ་ལྗང་གུར། དྲི་ཆུ་སྣ་ཚོགས། གླང་པོའི་ཤ །གདོང་ཅན་གྱི་ཤ་རིགས། ཤང་ཤང་ངམ་ཕ་ཝཾ་ཤ་སྟེ། དྲི་ཆུ་ནས་འདི་བར་དངོས་སམ་སོགས། འོ་མ་ཅུང་ཞི། བྲག་ཞུན། གུར་གུམ། ཀྱི་ལྕེ་སོགས་དཀར་པོའི་གུ་གུལ་དཀར་པོ་གྲགས་པ། ཁ་དོག་ལྗང་བའི་རིགས། གཡུ་དང་། མར་གད་སོགས་རིན་པོ་ཆེ་ལྗང་བའི་རིགས།
འབྲུ་དང་མེ་ཏོག་ཤིང་ཐོག་སོགས་ལྗང་བུའི་རིགས་ཐམས་ཅད་བསགས། ༈ གཞན་ཡང་ཀཎྜཱ་ཀ་རི། སླེ་ཏྲེས། དབང་ལག །རྒྱ་མཚོའི་སྦུ་བ། ལི་ག་དུར་ སོགས་སྨན་དྲི་བཟང་པོ་ཇི་སྙེད་དང་། དོང་ག །ར་མཉེ། ཉེ་ཤིང་། ལྕ་བ། དཀར་གསུམ། སེ་འབྲུ། རྒྱ་ཤུགས། ད་ཏྲིག་སོགས། ཞོ་དར། རྒྱ་ཚྭ། ལྕེ་མྱང་ཚ། རྦ༷་ཚ༷།(ལྦ་ཚྭ།) ཁ་རུ་ཚྭ། ཙབ་རུ་ཚ། ཟེ་ཚ། ལན་ཚྭ། མཛེ་ཚྭ། ཐལ་ཚྭ། ཤིང་ཚ། ཡ་བ་ཀྵ་ར། བུལ་ཏོག །བོང་ང་དཀར་པོ། ཧོང་ལེན། གསེར་མེ། དུག་མོ་ཉུང་། མཁྲིས་མ༷།(པ་) སྐྱེར་བ། བ་ཤ་ཀ །བྲག་ཞུན། ཀྱི་ལྕེ། རེ་སྐོན། བཅའ་སྒ། སྒེ་གཤེར། ཤིང་ཀུན། སྲུབ་ཀ །ལྕེ་ཚ། རྟ་༷བ༷་ཙོ༷ང་།(དྭ་ལྤ།) སྒོག་སྐྱ། ཨུཏྤལ། ག་དུར། སྨག །མོན་ཀྵ༷་(ཆ་)ར། འོམ་བུ། ཆུ་མ་རྩི། ༈ གཞན་ཡང་སྣང་ཞིང་སྲིད་པའི་སྨན་དང་བཅུད་སོགས་བཟང་ཞན་མེད་ པར་ཐམས་ཅད་བདུད་རྩི་སྨན་གྱི་རྫས་སུ་སྦྱར་དུ་རུང་ངོ་། །ཞེས་གསུངས་པ་ལྟར་དགོངས་འཚལ་ལོ། །དེ་ལས་ཀྱང་སྤྱང་ཀིའི་རིགས་རྣམས་ཆེས་ས་མི་ལེགས་པར་གསུངས་པའི། སྤྱང་ཀིའི་རིགས་ནི། སྒོག་པ་ས། ཤིང་ཀུན། ཤུ་དག་ནག་པོ། བྱའི་རུག་པ། རྩ་གླ་བ། རྩྭ་ཁྱུ་བྱུག །ཟེར་མོང་གི་ཤ །སོག་ཏོ་རོག་པོའི་ཤ །མཛོ་ཏྲེམ་གྱི་ཤ །མེ་ཏོག་སྤུ་མ། མེ་ཏོག་རི་ཤྭ། སྲན་མའི་མེ་ཏོག །
གཞན་ཡང་དུག་རིགས་སྣ་ཚོགས་གཞོབ་ཀྱི་རིགས། ཐལ་ཚྭ། བ་ཚྭ། བོང་ང་ནག་པོ། དཀར་པོ། ཧོང་ལེན། སྤང་རྒྱན་སྔོན་པོའི་མེ་ཏོག་རྣམས་ཆེན་པོ་མི་གཏང་། སྤང་སྤོས། གླ་རྩི། ཡང་ན་མང་ན་དགའ་ཞིང་། བཟང་སྨན་ཁ་ཆེན་སོགས་ཅི་མང་གི་ན་བཟང་ངོ་། །ཁ་དོག་སེར་པོ་བསྒྱུར་ཚེ། ཡ༷ང་(ཡུང་)བ་ཞིབ་བཏགས་དང་། དམ་རྩི་ཆེ་ཆུང་ཚོད་དང་བསྟུན་པས་དབང་ལག་གི་ཕྱེ་མ་ཡང་འདེབས་ཚོད་དགོས་ཤིང་། ཕབས་རྩི་ཞིམ་པོ་ཆང་ལྟར་འདེབས་རྒྱུ་དགོས་པ་སོགས་གལ་ཆེའོ། །