ཉམས་མྱོང་གི་བསླབ་བྱ།

༈ ཉམས་མྱོང་གི་བསླབ་བྱ་ནི། ནམ་དུས་སོས་ཀ་དང་། སྟོན་དུས་ལྟ་བུར་བྱ་བདེ་ལ། དབྱར་རུལ་ཉེན་ཡོད་པས་དྲོད་གཤེར་མ་ཆེས་ཙམ་དང་། དགུན་འཁྱག་པ་དང་སྐམ་པ་སོགས་མི་ལང་བའི་དོགས་པ་དགོས་པས། རློན་དྲོད་ཆེ་བར་བྱ། སྦོལ་བའི་ཚེ་སྐམ་གཤེར་རན་པ་ལ། ཧ་ཅང་ཤེད་ཆེས་ན་གོང་བུར་འདྲིལ་བ་དང་། ཤུགས་ཆུང་སེ་བ་ཡུན་རིང་ཕུར་བས། ཁ་དོག་ཁུག་ཤིང་སྣུམ་ཞད་ཆེ་བར་འབྱུང་ངོ་། །དབྱར་དུས་ལྟ་བུར་རུལ་གྱི་དོགས་པའི་ཟོན་སྐྱོར་དགོས་ཚེ། ཐོག་མར་སྣོལ་དུས་རླན་གཤེར་ཆེ་བར་

གཏོང་མ་ནུས་ན། སླར་གྲོལ་ནས། བདུད་རྩིའི་ཁ་བྲུ་བཏབ་ཅིང་སྣོལ་བས་ཁ་དོག་ཁུགས་ཤིང་དྲི་ངད་ལྡང་བར་འགྱུར་རོ། །ལ་ལ་ཞིག་གིས་དར་ཁུག་གི་ཕྱི་ནས་ཞག་རེ་བཞིན་བདུད་རྩིའི་ཁ་བྲུ་འདེབས་པ་ནི། ཁ་དོག་མི་ལེགས་ཤིང་། དྲི་ངད་ཀྱང་འཕྲལ་དུ་ཆེ་ཡང་། སྐམ་ནས་ཡལ་འགྲོ་བའི་ཕྱིར་མི་བྱའོ། །བཀའ་བརྒྱད་སྒྲུབ་ཆེན་སྐབས་དཔལ་དགུའི་ཐོད་པ་དགུ་ཁོ་ན་ཡིན་ཞིང་། འོག་གཞི་རྡུལ་ཚོན་རས་བྲིས་གང་རུང་གི་སྐབས་སུ་དེ་སྟེང་རྒྱུན་དུ་ལྡིང་ཁྲི་གོང་འོག་གསུམ་ཡིན། སྨན་སྒྲུབ་དང་འབྲེལ་ན་བཞི་བྱེད་པའི། ལྡིང་ཁྲི་འོག་མའི་དཀྱིལ་དུ་དཔལ་དགུའི་སྲུང་ཕུར་གུ་རུ་གནམ་ལྕགས་སོགས་ཁྱད་པར་ཅན། མགུལ་དུ་སོ་སོའི་སྔགས་བྱང་ཅོད་པཎ་ནང་བྲིས་པ་གཙུག་ནས་བཀོད། དེ་སྟེང་སྨན་གྱི་ཕོ་བྲང་དབུས་སུ་སྨན་ལག་ལེན་ལྟར་འགོད། དར་ཡོལ་རིམ་པ་གསུམ་མཐིང་དཀར་དམར་བྱེད། དེ་སྟེང་དཔལ་དགུའི་རྟེན་ཐོད་མཚན་ལྡན་དགུ་ཁེབས་ལྡན་སྒྲུབ་ཕུར་སོ་སོར་བཙུགས་པ་བཀོད་དགོས་པས། དང་པོ་ཆེ་མཆོག་ཐོད་པའི་ནང་དུ་ལྟེ་བར་ཧཱུྃ་བདུན་རང་སར་གཏད་པ་མུ་ཁྱུད་ཟླུམ་སྐོར་ནང་ཧཱུྃ་གི་ཀླད་ནས་བརྩམས་ཆེ་མཆོག་རྩ་སྔགས་ལ་སྤེལ་ལ་ཚིག་ཕྱག་རྒྱ་ཆེན་པོ་མཆོག་གི་དངོས་གྲུབ་ཚེ་འདི་ཉིད་ལ་ཐོབ་པར་བྱིན་གྱིས་རློབ་ཏུ་གསོལ་ཡིག་མགོ་ཕྱིར་བསྟན། དེ་རྒྱབ་འཁོར་ལོ་རྩིབས་བཞི་སོ་སོར་ལྟེ་བའི་ཧཱུྃ་མགོ་ཕྱིར་བསྟན། དེ་རྒྱབ་ཟླུམ་སྐོར་ཉིས་རིམ། ཁ་ཁེབས་ཤིང་གི་ཟུར་ཐུམ་དངུལ་དང་ཟངས་གསེར་གང་རུང་སྟེང་། རྩ་བའི་ལྷ་

གནས་གྲུམ་མཐར་ཟླུམ་སྐོར་དང་། དེ་རྒྱབ་འཁོར་ལོ་རྩིབས་བཞི་མུ་ཁྱུད་ཟླུམ་སྐོར་གཉིས། དེ་སྟེང་ཆེ་མཆོག་ཐོད་སྐུ་དགྲ་ས་ཞབས་འོག་ཏུ་བསྟན་པ་བཀོད། ཕྱོགས་བཞི། ཡང་དག །གཤིན་རྗེ། རྟ་མགྲིན། ཕུར་པ། མཚམས་བཞིར་མ་མོ། རིག་འཛིན་དྲེགས་འདུལ། དྲག་སྔགས་བཞི་ལ་ཐོད་པ་སོ་སོའི་ནང་དུ་འཁོར་ལོ་རྩིབས་བཞི་སོགས་གཙོ་བོ་དང་མཚུངས་ཤིང་། རང་རང་གི་རྩ་སྔགས་སོ་སོར་ལ་སྤེལ་ཚིག་གོང་ལྟར། ཐོད་ཁེབས་སྟེང་ལྷ་གནས་གཙོ་བོ་ལྟར་གྱི་གྲུ་གསུམ། དེ་ནང་བླས་པར་སྒྲུབ་རྟེན་ཙནྡན་ཕུར་པ་སོ་སོར་འཛུགས་པའི་རྩེ་མོ་མི་འདྲ་བ། ཤར་དུ་ཡང་དག་ལ་ཕུར་རྩེ་རྒྱ་མདུད་སྟེང་དངུལ་གྱི་མར་མེ། གཤིན་རྗེ་རྒྱ་མདུད་སྟེང་ཁྲམ་བྱང་། རྟ་མགྲིན་ལ་ཁྲོ་བོ་དབུ་གསུམ་གྱི་སྟེང་རྟ་དབུ་གསུམ། ཕུར་པ་ལ་ཁྲོ་བོ་དབུ་གསུམ་སྟེང་རྡོ་རྗེ་རྩེ་ལྔའི་ཏོག །མ་མོ་རྒྱ་མདུད་སྟེང་སྙིང་། རིག་འཛིན་རྒྱ་མདུད་སྟེང་སྐུ་འོད་ཁང་ཅན། དྲེགས་འདུལ་རྒྱ་མདུད་སྟེང་སྐུ་འོད་ཁང་ཅན། དྲག་སྔགས་རྒྱ་མདུད་སྟེང་འོད་ཁང་ནང་རྩ་སྔགས་བྲིས་པ། ཕུར་པ་སོ་སོའི་མགུལ་དུ་གསེར་གཞུང་ལྟར་ཐུན་རྫས་ཐུམ་བུ་འདོགས། ཕྱི་རིམ་དར་ཡོལ་སུམ་རིམ་སྲུང་ཕུར་རྣམས། ལྷ་བུམ་དགུ་བཅས་བྱུག་བདུག་བྲབ་གསུམ་བྱེད་དགོས། སྒྲུབ་ཕུར་ལ་མི་དགོས། དེ་སྟེང་དཔལ་དགུའི་བུམ་པ་ཆས་ལྡན་བཅུད་ཀྱིས་གཏམས་པར་སོ་སོའི་ལྷ་ཙཀ་བཅས་དང་། མར་མེ་དགུ་ཡང་འགོད་པ་ལགས། རྡུལ་ཚོན་གྱི་ཁྱམས་ལ་ཤར་ནས་བརྩམས་དབང་མོ་རྣམས་ཕུར་པ་མགོ་བརྙན་སོ་སོ་ལྟར་ཞལ་ནང་བསྟན། དེ་རྒྱབ་སྒོ་བཞི་ཕྱིར་གཟིགས་འགོད་བྱའི་ཕུར་པ་སོ་སོའི་མགུལ་དུ་

དར་སྣ་ལྔའི་ཅོད་པཎ་རེ་ཡོད། དེ་རྒྱབ་དུར་ཁྲོད་ལ་མ་ཊཾ་ལྟ་བུ་སོ་སོར་མཐོང་བརྒྱུད་ལྟར་བཀོད། དེ་རྒྱབ་པད་རྭ་རྡོ་རྭ། དེའི་སྟེང་ཁྲོ་བཅུའི་ཕུར་པ་ཅོད་པཎ་ཕྱག་བཞེས་ལྟར། སྟེང་ཕུར་ཤར་གྱི་ཤར་དང་། འོག་ཕུར་ནུབ་ཀྱི་ནུབ་ཏུ་ཡིན་པ་སོགས་འདྲེས། མཐར་ཞི་མཆོད་སྐོར་བཤམས། དཀྱིལ་འཁོར་རྒྱབ་ཏུ་བདག་བསྐྱེད་གཏོར་མ། བཀའ་སྲུང་ཆད་བསྟན་སོགས་རྒྱུན་བཞག་སྨན་རཀྟ་ཞི་མཆོད་དྲག་མཆོད་སྣ་སྦྲེལ། དཀྱིལ་འཁོར་མདུན་དུ་སྨན་རཀྟ་གཏོར་མ། བཀའ་སྲུང་ཆད་བསྟན་སོགས་རྒྱུན་འབུལ་རྣམས་དང་། མཆོད་བསྟོད་ལ། སྟར་དང་པོ་ཁྲོ་བོའི་མཆོད་གཏོར་བརྒྱ། སྟར་གཉིས་པ་སྨན་བརྒྱ། སྟར་གསུམ་པ་རཀྟ་བརྒྱ། སྟར་བཞི་པར་བཀྲ་ཤིས་རྟགས་བརྒྱད། རྒྱལ་སྲིད་སྣ་བདུན། ཉེ་བའི་རིན་ཆེན་བདུན། རྫས་བརྒྱད། མཆོད་ལྷ་སོ་གཉིས། སྟར་ལྔ་པར་མཆོད་ཡོན་རྫས་ལྡན་བརྒྱ། སྟར་དྲུག་པར་ཞབས་བསིལ་རྫས་ལྡན་བརྒྱ། སྟར་བདུན་པར་མེ་ཏོག་གྲོ་ནས་འབྲས་སོགས་སྤེལ་མ་བརྒྱ། སྟར་བརྒྱད་པར་བདུག་སྤོས། སྤོས་རྟ་རེང་བུ་ལྔ་རེ་འཛུགས་པ་བརྒྱ། སྟར་དགུ་པར་མཚན་ཐུབ་བརྒྱ། བཅུ་པར་དྲི་ཆབ་རྫས་ལྡན་བརྒྱ། སྟར་བཅུ་གཅིག་པར་ཞལ་ཟས་སྡེར་ལྡན་བརྒྱ། བཅུ་གཉིས་པར་ཚོགས་སྡེར་ལྡན་རྫས་བཅས་བརྒྱ། དེ་དཀྱིལ་ཞལ་ཟས་ཆེ་བ་རྒྱན་ཁྲ་གཟབ་འཕྱོར་ཅན་གཡས་གཡོན་དུ་དེ་ལས་ཆུང་ཙམ་རེ་རྒྱན་འཕྱོར། དཀྱིལ་འཁོར་ལྷོར་སྟེགས་བུ་སྟེང་། ཛ་གད་བུམ་པ་ཁ་རྒྱན་མགུལ་ཆིངས་ཅན། ཚེ་གའུ། ཉི་ཟླ་ཁ་སྤྲོད། ཚེ་འབྲང་བུམ་གཟུགས། ལས་བཞིའི་གཏོར་མ་རིགས་ལྔའི་ཕྱག་མཚན་ཅན། དཀྱིལ་འཁོར་བྱང་དུ་ལྕོག་སྟེགས་ལ་དྲག་

མཆོད་རྫས་ལྡན། ཉུལ་ལེའི་ཆས་ཐུན། ཕུར་པ་ནམ། ཁེབས་ལྡན་སོགས། སློབ་དཔོན་མདུན་དུ་བདག་འཇུག་ལ་གང་དགོས་གཙོས་མདུན་ཆས་འགོད། གཟུངས་ཐག་སྣ་ལྔའི་རྡོ་རྗེ་སྨན་གྱི་སྟེང་ནས་ཐོད་སྐུ་བུམ་པ་སོགས་ལྡིང་ཁྲིའི་བུག་པ་གྱེན་དུ་རིབ་དྲངས་དེ་ནས། གཟུངས་ཐག་དྲུག་ཏུ་གྱེས་པ་སློབ་དཔོན། སྔགས་རྒྱུན་པ། ཕྱོགས་བཞིའི་སློབ་དཔོན་སོ་སོའི་ཕྱག་ཏུ་འབུལ་བདེ་བར་བྱེད་པའོ། །འདི་རྣམས་ཤིང་འབྲུག་ཟླ༩ཚེས༡༠ལ་དཔལ་སྤུངས་སུ་རང་སློབ་མཁས་བཙུན་བཟང་པོའི་མངའ་བདག་དགེ་སློང་དམ་པ་ཀོང་སྤྲུལ་ཡོན་ཏན་རྒྱ་མཚོའི་དྲིས་ལན་དུ་ཞེ་ཆེན་གདན་སར་མཁན་པོ་མངའ་རིག་སྨྲ་བའི་ཁུར་འཆང་སྤྲུལ་སྐུ་མཐུ་སྟོབས་པས་བརྗོད་པས་དགེའོ། །དགེའོ། །དགེའོ། །དགེའོ། །། །།