དམ་ཅན་གསོལ་མཆོད་ཕྲིན་ལས་མྱུར་མགྱོགས།

དམ་ཅན་གསོལ་མཆོད་ཕྲིན་ལས་མྱུར་མགྱོགས་ཞེས་བྱ་བ་བཞུགས་སོ། །ༀ་སྭ་སྟི། མཆོག་གསུམ་དབྱེར་མེད་བླ་མ་ལ། །བཏུད་ནས་དམ་ཅན་ནོར་སྒྲུབ་ཀྱི། །རྒྱུན་གསོལ་ཉུང་ངུ་ཁྱེར་བདེའི་རིགས། །འདོད་དོན་མཆོག་སྩོལ་བརྗོད་པར་བྱ། །གཞུང་ནས་བཤད་ལྟར་བཅས་གཤམ་གྱི་རིམ་པ་དང་། ཡོ་བྱད་ཚོགས་ནས་ཡི་དམ་གསལ་ལ་གནས་པས། ཧྲཱིཿ རང་ཉིད་དབང་ཆེན་རྟ་མགྲིན་གསལ་ བའི་གཙུག །པདྨ་ཐོད་ཕྲེང་གཟི་བརྗིད་འོད་འབར་མདུན། །རིན་ཆེན་གཞལ་ཡང་ཁང་བཀོད་ཕུན་ཚོགས་དབུས། །སེངྒེ་དཀར་མོའི་སྟེང་དུ་ཏྲི་ཡིག་ལས། །ནོར་ བདག་དགེ་བསྙེན་དཀར་ལ་དམར་བའི་མདངས། །ཞལ་གཅིག་ཕྱག་གཉིས་ཟ་འོག་འཇོལ་བེར་དཀར། །གསེར་སྐེད་སྐུ་རེག་སྟག་ཞུ་ཁྲ་བོ་གྱོན། །སག་ཏིའི་ལྷྭ་མནབ་ཕྱག་གཡས་ལྕག་ཀྱུ་དང་། །རིན་པོ་ཆེ་འཛིན་གཡོན་པ་ལྡེའུ་མིག །དུང་ལས་གྲུབ་དང་ནེའུ་ལེ་བསྣམས་པ། །རིན་ཆེན་རྒྱན་སྤྲས་ཀོང་བཙུན་དེ་མོ་ནི། །གཡས་པས་མེ་ལོང་དར་དཀར་ཡབ་ལ་འཁྱུད། །གཡོན་པས་མདའ་དར་གཡབ་པས་ཟས་ནོར་སྡུད། །སྐུ་ལ་དར་དཀར་གསེར་གྱི་ཐིག་ལེ་སྤྲས། །དབུ་ཞྭ་གཡུ་ཐོད་མུ་ཏིག་ཁྲ་ཚོམ་མཛེས། །སྒ་གོང་རིན་ཆེན་སྟག་སྒྲོར་ནོར་སྤྱང་འབོད། །ཕྱི་རིམ་པད་འདབ་བརྒྱད་ལ་འཛམ་ལྷ་བརྒྱད། །གཡས་རྣམས་གསེར་གྱི་ལྡེའུ་མིག་ལྕག་ཀྱུ་དང་། །གཡོན་རྣམས་ནེའུ་ལེ་དང་སྟག་སྒྲོ་འཛིན། །གཏེར་བརྒྱད་

སྟེང་འགྱིངས་རིན་ཆེན་རྒྱན་གྱིས་བཀླུབས། །དེ་རྒྱབ་དགེ་བསྙེན་ཉེར་གཅིག་སྐུ་མདོག་དམར། །མེན་ཏྲི་དམར་སེར་བེར་མནབ་ས་ཞུ་གསོལ། །གཡས་ན་ལྕག་ཀྱུ་སྟག་གི་རྒྱལ་མཚན་དང་། །གཡོན་པ་བ་དན་དམར་པོ་མཁའ་ལ་ཕྱར། །མཆན་དུ་སྟག་སྒྲོ་དེ་རྒྱབ་བརྟན་མ་རྣམས། །གཡས་པས་མེ་ལོང་ནོར་བུ་གཡོན་པ་ནས། །ནོར་སྡུད་མདའ་དར་ཐོགས་ཤིང་དར་དཀར་གྱི། །ན་བཟའ་གསེར་གཡུའི་ཐིག་ཕྲན་སྤུད་པ་དང་། །གཡུ་ཐོད་མུ་ཏིག་ཅན་མནབ་རྣལ་འབྱོར་པའི། །གྲགས་སྙན་སྒྲོགས་ཤིང་སྲིད་གསུམ་འགྲོ་བ་ཡི། །དཀར་ནག་སྙིང་གི་མཚམས་ནས་དྲངས་ཤིང་བསྐུལ། །དེ་རྒྱབ་མཆེད་འཁོར་སུམ་བརྒྱ་དྲུག་ཅུ་རྣམས། །སྟག་ཆས་ཞུབ་ཆེན་བཙུན་ཆས་ཐམས་ཅད་ཀྱི། །ཕྱག་ན་ནོར་བུ་རིན་པོ་ཆེའི་སྣོད་བསྣམས། །རྒྱབ་ཏུ་སྟག་སྒྲོ་ནོར་སྦས་བཀང་བ་ཁུར། །ཡི་དམ་ཐུགས་ཀའི་ཧྲཱིཿ དང་མདུན་བསྐྱེད་ཀྱི། །ཐུགས་ཀའི་ཏྲི་ལས་འོད་ཟེར་ལྕག་ཀྱུ་ལྟར། །འཕྲོས་པས་འཁོར་ཡུག་ལ་སོགས་གནས་རྣམས་ནས། །དམ་ཅན་ནོར་ལྷ་འདས་དང་མ་འདས་ཀྱི། །ནོར་ལྷ་བརྟན་མ་ཐམས་ཅད་སྤྱན་འདྲེན་གྱུར། །ལྷའི་ང་རྒྱལ་བརྟན་པོས་དར་དམར་གཡབ། རྐང་གླིང་རྔ་རོལ་སོགས་སྙན་པའི་དབྱངས་ཀྱིས། ཀྱཻ། ཕྱོགས་ཕྱོགས་དག་ཀྱང་ཕ་གི་ན༔ ནུབ་ཕྱོགས་གཙང་གི་འོ་ཡུག་ནས༔ ཤེལ་གུར་དཀར་པོའི་ནང་ཤེད་ན༔ རྡོ་རྗེ་ལེགས་པ་ཡབ་ཡུམ་དང་༔ གནོད་སྦྱིན་ནོར་ལྷ་བརྟན་མར་བཅས༔ དགྲ་ལྷ་ཉེར་གཅིག་ཡང་འཁོར་ཚོགས༔ མཆོད་པའི་གནས་མཆོག་དམ་པ་འདིར༔ དངོས་གྲུབ་སྩོལ་ཕྱིར་གཤེགས་སུ་གསོལ༔ བཛྲ་ས་དྷུ་ས་མ་ཡ༔ བཛྲ་ལི་ལ་མ་

ཀྐིང་ར་ས་མ་ཛཿ ཛ་ཧཱུྃ་བཾ་ཧོཿ ཐམས་ཅད་ཆར་སྤྲིན་འཁྲིགས་པ་ལྟར་བྱོན་པར་བསམ། ཧྲཱིཿ དེང་གི་བསྒྲུབ་པའི་གནས་འདི་རུ༔ རིན་ཆེན་ཤེལ་གྱི་གཞལ་ཡས་ཁང་༔ བཀོད་མཛེས་ཡིད་འོང་ཕོ་བྲང་དབུས༔ ནོར་ལྷ་དམ་ཅན་འཁོར་བཅས་བཞུགས༔ བཛྲ་ས་དྷུ་ས་མ་ཡ་ཏིཥྛ་ལྷན༔ མཆོད་འབུལ་ནི། ཧཱུྃ། དམ་ཅན་ནོར་ལྷ་འཁོར་བཅས་ལ༔ ཕྱི་ནང་མཆོད་པའི་བྱེ་བྲག་ནི༔ དངོས་འབྱོར་ཡིད་སྤྲུལ་ལས་བྱུང་བའི༔ ནམ་མཁའ་མཛོད་སྤྲོས་རྒྱས་པར་རོལ༔ ༀ་བཛྲ་ས་དྷུ་ཨ຋ཾ་ནས་ཤབྟ་རུ་པ་ཤབྟ་གནྡྷེ་ར་ས་སྤརྴེ་ཀརྨ་གུ་ཎ་པཉྩ་ཨ་མྲི་ཏ་རཀྟ་ཁ་ཁ་ཁ་ཧི། ཞེས་དང་། བཛྲ་ས་དྷུ་ས་པ་རི་ཝ་རེ་བྷྱཿ ཨེ་དཾ་བ་ལ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ། བསྟོད་པ་ནི། ཧཱུྃ། པདྨ་ཧེ་རུ་ཀ་ཡི་ཐུགས་སྤྲུལ་ནིཿ ༔རྡོ་རྗེ་ལེགས་པ་བསྟན་སྲུང་དགྲ་ལྷ་མཆོག༔ རྣལ་འབྱོར་སྒྲུབ་པོ་མཆོག་ཐུན་དངོས་གྲུབ་སྟེར༔ གང་བཅོལ་ལས་རྣམས་ཐོགས་མེད་མྱུར་དུ་སྒྲུབས༔ སངས་རྒྱས་བསྟན་བསྲུང་དཀོན་མཆོག་དབུ་འཕང་བསྟོད༔ དགེ་འདུན་སྡེ་སྐྱོང་སྲིད་ཞིའི་དཔལ་གཡང་སྡུད༔ དྲག་རྩལ་མྱུར་མགྱོགས་མཐུ་སྟོབས་རྫུ་འཕྲུལ་བདག༔ བསྟན་བསྲུང་ཆེན་པོ་འཁོར་དང་བཅས་ལ་བསྟོད༔ བསྙེན་པ་ནི། རང་ཉིད་ལྷ་ཡི་ཐུགས་ཀ་དང་། མདུན་བསྐྱེད་ལྷ་ཚོགས་ཀྱི་ཐུགས་ཀའི་ཧྲཱི་ལས་ཛཿ སྦྲེལ་མ་ལྕག་ཀྱུ་ལྟ་བུ་འཕྲོས། སྟོང་གསུམ་འཇིག་རྟེན་ལྷ་ཀླུ་མི་དང་མི་མ་ཡིན་གྱི་ཟས་ནོར་ལོངས་སྤྱོད་ཐམས་ཅད་ཀྱི་ཕོ་མོའི་གསང་གནས་སུ་ལྕག་ཀྱུའི་རྩེ་མོ་ཞུགས་ནས་རང་དབང་མེད་པར་བཀུག་སྟེ་བདག་ལ་སྩོལ་བར་བསམ། ༀ་བཛྲ་སཱ་དྷུ་ས་མ་ཡ་ཀིང་ཀ་ར་ཧཱུྃཿ བཛྲ་ལི་ལ་མ་ཧཱུཾ་ཛཿ ༀ་ཛམ་བྷ་ལ་ཛ་

ལེན་ཊ་ཡ་སྭ་ཧཱ། ཏྲི་ཀར་ཤ་ལིངཿ ཏྲི་པྲ་མ་ཎི་ཀྐི་ར་བྷྱོཿ རཏྣ་སིདྡྷི་ཀུ་རུ་ཧཱུཾ་ཛཿ ཛཿ ཏྲིའུ་ཏྲིའུ་སྲ་མ་དུན་ཀ་ར་སྐྱེས་པ་བུད་མེད་སརྦ་པཱ་ཤཾ་ཏྲི་ཡ་སིདྡྷི་ཕ་ལ་ཁུག་སྐྱོལཿ ཞེས་ཅི་ནུས་བཟླསཿ བསྐོང་བ་ནི། ཧཱྃ། དམ་ཅན་ཆེན་པོ་རྡོ་རྗེ་ལེགས་པ་མཆོག །འཇིག་རྟེན་འདི་ན་མཐུ་དང་རྫུ་འཕྲུལ་ཆེ། །མངོན་ཤེས་ཐོགས་མེད་སྒྲུབ་པོར་སྙིང་ཉེའི་བདག །ཐུགས་དམ་གཉན་པོ་བསྐང་བའི་དམ་རྫས་འབུལ། །མཆོད་ཡོན་ཞབས་བསིལ་མེ་ཏོག་བདུག་སྤོས་དང་། །མར་མེ་དྲི་ཆབ་ཞལ་ཟས་རོལ་མོའི་ཚོགས། །གཟུགས་སྒྲ་དྲི་རོ་རེག་བྱ་སྨན་རག་གཏོར། །ཕྱི་ནང་མཆོད་སྤྲིན་རྒྱ་མཚོས་ཐུགས་དམ་བསྐང་། །བཀྲ་ཤིས་རྟགས་བརྒྱད་རྒྱལ་སྲིད་སྣ་བདུན་དང་། །ཤིས་པའི་རྫས་བརྒྱད་གླིང་བཞི་རི་རབ་བཅས། །གསེར་རི་རོལ་མཚོ་སྟོང་གསུམ་སྣོད་བཅུད་ཀྱིས། །ལོངས་སྤྱོད་ཕུན་སུམ་ཚོགས་པས་ཐུགས་དམ་བསྐང་། །ར་ཤ་ར་ཚིལ་ཕ་ཝོང་ལོང་བུ་དང་། །སྟག་སྒྲོ་སྲོག་འཁོར་མེ་ལོང་མདའ་དར་བཅས། །གསེར་གཡུ་མུ་ཏིག་ཚོགས་དང་བྱི་རུའི་ཚོགས། །ལྷ་མི་ནོར་སྣ་ཁྱད་འཕགས་ཐུགས་དམ་བསྐང་། །སེངྒེ་དཀར་མོ་རྟ་མཆོག་ར་སྐྱེས་དང་། །སྟག་གཟིག་དམ་དྲེད་འཕར་སྤྱང་གཅན་ཟན་ཚོགས། །གནམ་ལ་འཕུར་དགུ་ས་ལ་འཛུལ་དགུ་ཚོགས། །སྲོག་ཆགས་མ་ཚང་མེད་པས་ཐུགས་དམ་བསྐང་། །རྔ་ཁྲབ་སྟག་རས་འབྲུ་སྣ་སྤྱན་གཟིགས་དཀོར། །ར་ཡི་དབང་པོ་གྲི་སྙིང་མཐུན་པའི་རྫས། །ཡོད་དོ་ཅོག་གི་དགྱེས་དགུར་སྤྱོད་པའི་རྟེན། །སྲིད་ན་གང་མཆིས་ཚོགས་ཀྱིས་ཐུགས་དམ་བསྐང་། །ཐུགས་དམ་གཉན་པོ་བསྐང་བའི་དམ་རྫས་ཀྱིས། །ནོར་ལྷ་

དམ་ཅན་ཡབ་ཡུམ་འཛམ་ལྷ་བརྒྱད། །བརྟན་མ་ཡང་འཁོར་སུམ་བརྒྱ་དྲུག་བཅུ་རྣམས། །དགེ་བསྙེན་ཉེར་གཅིག་བཅས་པའི་ཐུགས་དམ་བསྐང་། །ཐུགས་དམ་བསྐང་བས་འདི་ནས་བྱང་ཆུབ་བར། །མི་འབྲལ་ཡུན་གྱི་ལྷ་རུ་ཁྱེད་བསྟེན་ན། །བསམ་པའི་དོན་སྒྲུབ་འདོད་པའི་རེ་བ་སྐོང་། །ཚེ་ནོར་ཆོས་གསུམ་འཕེལ་བའི་སྡོང་གྲོགས་མཛོད། །སྒྲུབ་པོར་ཡོ་བྱད་དངོས་པོ་ཆེ་ཕྲ་ཆུང་། །དམ་ཅན་སྐྱེས་བུ་འཁོར་བའི་རྟེན་དུ་བཞག །དགྲ་རྐུན་ཉེར་འཚེ་མི་འདོད་བར་ཆད་སོལ། །མཐུན་རྐྱེན་འདོད་དགུའི་བཀྲ་ཤིས་དགེ་ལེགས་སྩོལ། །བཤགས་པ་ནི། ཧཱུྃ། ཆོས་སྐྱོང་ཆེན་པོ་དགོངས་ཤིག་བདག་ཅག་གིས། །མ་རིག་གཏི་མུག་དབང་སོང་ནོངས་པའི་ཆ། །སྙིང་ནས་འཐོལ་བཤགས་འབུལ་ལོ་ཚངས་པར་མཛོད། །མཆོག་དང་ཐུན་མོངས་དངོས་གྲུབ་མ་ལུས་སྩོལ། །ཡིག་བརྒྱ་བཟླ། གཏོར་མ་འབུལ་བ་ནི། དགྲ་བགེགས་འགུགས་བསྟིམ་ཤ་ཁྲག་བདུད་རྩིར་སྤེལ་བར་བསམ་ལ། ༀ་བཛྲ་སཱ་དྷུ་ས་མ་ཡ་ས་པ་རི་ཝ་རེ་བྷྱེཿ ཨེ་དམ་བ་ལིངྟ་ཁ་ཁ་ཁཱ་ཧིཁ་ཧི། ལན་གསུམ། ཧཱུྃ། བསྟན་དགྲ་བསྒྲལ་པའི་ཤ་རུས་དོན་སྙིང་སོགས། །འདོད་ཡོན་མ་ཚང་མེད་པའི་སྤྲིན་འཕྲོ་བ། །སྔར་མཛད་གཏང་རག་སླད་ཀྱིས་འཕྲིན་བསྐུལ་རྟེན། །འབུལ་བའི་དགྱེས་བཞེས་འཕྲིན་ལས་གཡེར་མེད་སྒྲུབ། །གཏོར་མ་གཙང་སར་འབུལ། སླར་གཏང་རག་གི་མཆོད་པ་ནི། བཛྲ་སཱ་དྷུ་ཨ຋ཾ་ནས་ཤབྟ་ཨ་མྲི་ཏ་རཀ་ཏ་བ་ལིངྟ་ཏ་ཁཱ་ཧི། ཧཱུྃ། སྔོན་གྱི་ཨོ་རྒྱན་ཆེན་པོའི་སྤྱན་སྔ་རུ། །ཚུལ་བཞིན་སྒྲུབ་པར་བྱེད་པའི་གང་ཟག་ལ། །མ་ཡིས་བུ་བཞིན་སྐྱོང་བར་ཞལ་བཞེས་པའི། །ཆོས་སྐྱོང་རྡོ་རྗེ་ལེགས་པ་ཁྱོད་ལ་བསྟོད། །རྟེན་ཡོད་ན་དེ་ལ་བསྟིམ། མེད་ན་བཛྲ་མུས་

གཤེགས། གང་ཞིག་ཡིད་ལ་དྲན་པ་ཙམ་གྱིས་སོགས། བདག་གི་བསམ་དོན་མ་ལུས་འགྲུབ་པར་མཛོད། །ཅེས་བརྗོད་དོ། །རྣོ་མྱུར་ཐོགས་མེད་སྙིང་ཉེའི་གྲོགས། །ས་ལམ་འགལ་རྐྱེན་ཀུན་སེལ་བ། །གསང་བདག་དངོས་སྤྲུལ་རྡོར་ལེགས་ཀྱི། །ངོ་མཚར་མཆོད་ཐབས་རྨད་དུ་བྱུང་། །དམ་ཅན་རྒྱུན་གསོལ་ཕྲིན་ལས་མྱུར་མགྱོགས་འདོད་དོན་མཆོག་སྩོལ་ཞེས་པ་འདི། རྒྱལ་བསྟན་མཛེས་པའི་རྒྱན་གཅིག་ཆོས་རྗེ་རིན་པོ་ཆེ་སྐུ་ཕྲེང་གསུམ་པའི་བཀའ་ཡིས་བསྐུལ་བ། ལྷ་རྫས་ཀྱི་རྟེན་བཅས་གནང་བའི། ཤཱཀྱའི་དགེ་སློང་ཞེ་ཆེན་པ་འགྱུར་མེད་མཐུ་སྟོབས་རྣམ་པར་རྒྱལ་བའི་སྡེས་མཉམ་མེད་ཙོང་ཁ་བའི་རང་ལུགས་འཛིན་པའི་ཆོས་སྡེ་ཆེན་པོ་བཀྲ་ཤིས་དགའ་ལྡན་ཆོས་འཕེལ་གླིང་གི་གཟིམ་ཆུང་རྡོ་རྗེ་གྲུབ་པའི་ཕོ་བྲང་དུ་ཤར་མར་སྤེལ་བའི་ཡི་གེ་པ་ནི་དགེ་སློང་སངས་རྒྱས་ཆོས་འཕེལ་ལོ། །མངྒ་ལཾ།། །།