དབང་དང་། བྱང་ཆོག །སྦྱིན་སྲེག
༈ རྩ་བའི་ས་བཅད་གསུམ་པ་རྗེས་ཀྱི་བྱ་བ་འཕྲོས་དོན་བཅས་འཆད་པ་ལ། དབང་། བྱང་ཆོག །སྦྱིན་སྲེག་དང་གསུམ་ལས། དང་པོ་དབང་ལ་རང་དོན་བདག་འཇུག་ལེན་པ་ནི། རང་ཉིད་དཀྱིལ་འཁོར་གྱི་ལྷ་དང་རང་བཞིན་དབྱེར་མེད་དུ་བལྟ་བ་ནི་རིག་པའི་མེ་ཏོག་དོར་བའང་རང་སྣང་གི་དཀྱིལ་འཁོར་དུ་རིག་པས་འཇུག་པའི་ཚུལ་ཞེས་ཀྱང་བྱ་སྟེ། དེ་བས་ན་འདིར་རང་ཉིད་ལྷ་དང་གཉིས་སུ་མེད་པར་མོས་པ་ཙམ་གྱིས་ཀྱང་ཆོག་མོད། རྒྱས་པར་ན་སློབ་མ་འཇུག་པ་ལྟར་ཁ་བསྒྱུར་
ནས་བདག་ཉིད་དཀྱིལ་འཁོར་དུ་ཞུགས་ཏེ། ཆོ་ག་རྒྱས་བསྡུས་ཅི་རིགས་པས་དབང་ལེན་པ་ཡིན་ནོ། །གཞན་དོན་དབང་བསྐུར་བ་ལ། ཁྲུས་དང་འབྱུང་གཏོར་བྱིན་རླབས་ལྷར་གསལ་ཞིང་༔ བཀའ་བསྒོ་མཚམས་གཅོད་བསྲུང་འཁོར་དང་བཅས་དྲུག༔ ཅེས་ས་བཅད་དྲུག་དང་། དབང་བཤད་རྗེ་བླ་མའི་གསུངས་ལྟར་ལ། མ་འོངས་པ་ན་བསམ་གཏན་གླིང་པ་ཞེས་འབྱུང་བས་དེ་ལ་སྤྲོད་ཅིག་ཅེས་བཀའ་བསྒོ་བར་མཛད་པ་དེ་བཞིན། པདྨ་བཀའ་ཐང་ལས། དཔྱལ་གྱི་བྲག་ལ་ལོ་གཅིག་བཞུགས༔ ཞེས་དང་། དེ་ཉིད་མི་གནས་མྱ་ངན་འདས་འོག་ཏུ༔ བོད་འདིར་རྒྱལ་པོའི་མིང་གཏགས་བརྒྱ་རྩ་གཅིག༔ གངས་དང་སེང་གེ་ལས་ཀྱི་འབྲེལ་བ་ཡིས༔ འཇིག་རྟེན་པ་ལ་བདེ་བ་སྐད་ཅིག་མེད༔ དཔྱལ་གྱི་བྲག་ལ་སྦས་པའི་གཏེར་ཁ་འདི༔ མི་བཞག་འདོན་པའི་རྟགས་དེར་བསྟན་ནས་འབྱུང་༔ ཨོ་རྒྱན་བསམ་གཏན་གླིང་པ་ཞེས་བྱ་འབྱུང་༔ ཞེས་པས། དེང་སྐབས་རྩོད་དུས་ཀྱི་སྙིགས་མ་ལས་ཆེར་སྙིགས་མ་སོགས་སྦྱོར། དེ་ནས་མཎྜལ་འབུལ་བའི་བར་སོང་། དབང་རྒྱས་འབྲིང་སྦྱོར་ནས་ལྷན་དུ་བསྐུར་བར་བྱེད་པ་ལ། དབང་རྒྱས་ནས་གསང་བ་སྤྱི་འགྲོས་ལྟར། སྔོན་ཆད་ཡང་གསང་བླ་མེད་བདེ་ཆེན་ཞིང་སྒྲུབ་ཀྱིས༔ དཀྱིལ་འཁོར་དུ་མ་ཞུགས་པའི་བརྡར་སོགས་མིག་དར་དང་། མེ་ཏོག་གཏད་ཝི་ར་ཧཱུྃ་བར་བརྗོད། དེ་ནས། བླ་མ་ལྔ་བཅུ་པ་ལས། པུས་བཙུགས་ཐལ་མོ་སྦྱར་བྱས་ནས། །ཉན་སོགས་འདོད་པས་གསོལ་གསུམ་བཏབ། །ཅེས་པ་ལྟར་འདིའི་རྗེས་ཟློས་མཛོད། ཨེ་མ་ཧོཿ སློབ་དཔོན་
གསང་སྔགས་སོགས་ནས། སྨིན་གྲོལ་དབང་མཆོག་བསྐུར་དུ་གསོལ༔ བར། དབང་འབྲིང་ནས། དེས་ན་གནས་འདི་ཉིད་རང་བྱུང་གི་གཞལ་ཡས་ཁང་སོགས། དབང་གི་སྨིན་གྲོལ་སྩལ་དུ་གསོལ། བར་བརྗོད། དབང་རྒྱས་ནས་དམ་ཆུ་བླུད་པ་ནི། ཀྱེ་ཧོ། སྐལ་ལྡན་རིགས་ཀྱི་བུ༔ སོགས། ཨུ་བྷ་ཥ་ཋ་ཋཿ དེ་ལྟར་ཆུ་དེ་ལྕེ་ལ་བཞག་ཀྱང་སྙིང་གི་དཀྱིལ་དུ་བབས་ཏེ། དམ་ཚིག་ལས་འདས་ན་བཛྲ་ཡཀྵ་ཀྲོ་དྷ་ཞེས་བྱ་བ་སྡིག་པ་མགོ་དགུ་པར་གྱུར་ནས་སྙིང་ཁྲག་འཇིབས་པས་མཐོང་ཆོས་སུའང་ཚེ་ཐུང་ཞིང་ནད་མང་། ཕྱི་མར་རྡོ་རྗེའི་དམྱལ་བར་ལྟུང་ནས་སྲེག་པར་བྱེད་ཅིང་དམ་ཚིག་བསྲུངས་ན་ཡེ་ཤེས་སེམས་དཔར་གྱུར་ནས་དུས་རྟག་ཏུ་བྱིན་གྱིས་རློབ་ཅིང་འདི་ཕྱིའི་ཕན་བདེ་མ་ལུས་པ་སྟེར་བར་འགྱུར་རོ། །རྡོ་རྗེ་སློབ་དཔོན་བཀའ་གཉན་པའི་སྒོ་ནས་དམ་ལ་གཞག་པ་ནི། རྡོ་རྗེ་གནས་གསུམ་དུ་བཞག་ལ། ཧཱུྃ༔ སྐལ་ལྡན་ཁྱོད་ཀྱི་སོགས། ཨུ་ད་ཀ་ཋཿ དེ་ནས་ཁྱེད་རང་རྣམས་དཀྱིལ་འཁོར་གྱི་ཤར་སྒོ་ནས་ལྷར་ཕྱག་འཚལ་བར་མོས་ལ་འདིའི་རྗེས་ཟློས་མཛོད། མ་མ་མུ་ན་ཡེ་ན་མཿ ཞེས་དཀྱིལ་འཁོར་གྱི་ཤར་སྒོར་སོགས། དབབ་ཏུ་གསོལ་བས། སློབ་མ་ལ་ལས་བུམ་ཆུ་འཐོར། དབང་འབྲིང་ནས། ༀ་སྭ་བྷཱ་ཝ་སོགས། གཉིས་སུ་མེད་པར་ཐིམ་པའི་མོས་པ་མཛོད། བདུད་རྩི་ལྔས་སྦགས་པའི་གཞོན་ནུ་མའི་རྡུལ་རས་དང་། བྱི་ལ་ནག་པོའི་བྲུན་གུལ་གུལ་རྣམས་རོ་སོལ་གྱི་མེ་ལ་བསྲེགས་པས་བདུག །ཌཱ་དྲིལ་བཅས། ཧྲཱིཿ བྱིན་ཆེན་ངོ་མཚར་སོགས། ཨ་ཝེ་ཤ་ཡ་ཨ་ཨཱཿ ཌཱ་དྲིལ་གྱིས་དྲངས་པའི་རོལ་མོའི་སྒྲ་དྲག་པོ་མྱུར་དལ་སྤེལ་
མའི་སྦྱོར་བ་དང་ལྷན་ཅིག་སྔགས་ཅི་ནུས་བརྗོད། སྐུ་ཕེབས་པས་འཕར་ཞིང་གཡོ་བ། གསུང་ཕེབས་པས་སྨྲ་ཞིང་རྒོད་པ། ཐུགས་ཕེབས་པས་བདེ་གསལ་མི་རྟོག་པའི་ཡེ་ཤེས་ཁྱད་པར་ཅན་རྒྱུད་ལ་སྐྱེ་རྟགས་བྱུང་བ་དང་། བྱིན་ཕབ་པའི་ཡེ་ཤེས་པ་རྣམས་སློབ་མ་ལ་རོ་གཅིག་ཏུ་བརྟན་པར་བཞུགས་པར་མོས། སྤྱིར་བོར་རྡོ་རྗེ་རྒྱ་གྲམ་གྱི་ཚུལ་དུ་བཞག་ལ། ཏིཥྠ་བཛྲཿ ཞེས་བརྗོད། མ་རིག་པའི་ལིང་ཏོག་མིག་དར་དང་ལྷན་ཅིག་བསལ་བར་མོས། དབང་བྱས་ནས། མེ་ལོང་དང་གསེར་ཐུར་ཐོགས་ལ། ཧཱུྃ། སྐལ་ལྡན་རིགས་ཀྱི་སོགས། ཙཀྵུ་པྲ་ཝེ་ཤ་ཡ་ཧཱུྃ༔ དེ་ནས་མེ་ཏོག་དོར་བ་ནི། འདི་ན་ཞིང་སྒྲུབ་ལྷ་ཚོགས་མེ་ཏོག་གི་ར་བར་བཞུགས་པ་ལ་བཟང་ངན་མེད་ཀྱང་རང་གི་ལས་འབྲེལ་ཡོད་པའི་ལྷ་དེ་ལ་འབབ་པར་ཤོག་སྙམ་པས་ལྟོས་པ་མེད་པར་མེ་ཏོག་དོར་མཛོད་། ཧཱུྃ། རང་ལུས་ཤ་ཁྲག་ཕུང་པོ་འདི། སོགས། པུཥྤེ་ཧཱུྃ༔ དེ་ལྟར་མེ་ཏོག་ཕུལ་བས་དབུས་སུ་ཕོག་ན་དེ་བཞིན་གཤེགས་རིགས། ཤར་ལྷོ་ནུབ་བྱང་བཞིར་རྡོ་རྗེ་རིན་ཆེན་པདྨ་ལས་ཀྱི་རིགས་སོགས། འདི་པདྨའི་རིགས་ལ་ནང་གསེས་རིགས་ཆུང་ཕྱེ་བ་ཡིན་ནོ། །ཡེ་ཤེས་ཀྱི་མིག་གསར་དུ་ཐོབ་པ་དེ་ལ་མཐོང་བ་བསྟན་པ་ནི། དེ་ཡང་མ་ཡེངས་ཉོན་ཅིག་སོགས། དངོས་གཞིའི་དབང་བསྐུར་སྩོལ༔ བར་བརྗོད། དབང་བསྐུར་བ་དེ་ལ་དབང་གི་ངོ་བོ། ངེས་ཚིག །དབྱེ་བ་སྤྱིར་བཤད་རྣམས་སློབ་བུའི་རྒྱུད་ལ་ངེས་པ་གཙོ་ཆེ་བས་བཤད་པ་ལ། ངོ་བོ་རྒྱུ་གཉིས་དང་རྐྱེན་བཞི་ཚོགས་པ་ལ་བརྟེན་ནས་གོ་འཕང་གི་ཆོས་རྒྱུད་ལ་འཇོག་པའི་ལས་ཀྱིས་ཐར་པའི་མྱུ་གུ་དབང་
དུས་དེ་ཉིད་དུ་མངོན་དུ་བསྐྱེད་པའམ། སླར་སྐྱེ་ངེས་ཀྱི་ནུས་པ་ཅན་དུ་སྒྲུབ་པའི་སྒོ་ནས་རྒྱུད་སྨིན་པར་བྱེད་པའོ། །དེ་ལ་རྒྱུ་གཉིས་ལས། མཚུངས་ལྡན་གྱི་རྒྱུ་ནི། རླུང་སེམས་རྩ་དང་ཐིག་ལེར་དབང་རྣམས་གདོད་མ་ནས་རང་ལ་རང་ཆས་སུ་ལྡན་པ་སྟེ། དབང་བསྐུར་རྒྱལ་པོའི་རྒྱུད་ལས། དབང་མཆོག་རང་ལ་མེད་གྱུར་ན། །བསྐུར་བས་ཐོབ་པ་ག་ལ་འགྱུར། །བྲ་སྲན་འབྲས་སུ་དབང་བསྐུར་ཀྱང་། །དེ་ལ་འབྲས་ཀྱི་དངོས་སྣང་མེད། །ཅེས་སོ། །ལྷན་ཅིག་སྐྱེས་པའི་རྒྱུ་ནི། དབང་རྫས་རབ་གནས་དང་ལྡན་པ་སྟེ། སློབ་བུའི་མཚུངས་ལྡན་གྱི་རྒྱུ་རྟོག་ཚོགས་སུ་སྣང་བའི་ཆོས་ཅན་གང་ལ་རང་གནས་ཀྱི་ཡེ་ཤེས་དེ་ཆོས་ཉིད་དུ་སོང་བའི་ལྡོག་ཆ་སོ་སོ་དང་། གཉིས་སུ་མེད་པའི་ཡེ་ཤེས་ཀྱིས་བྱིན་གྱིས་བརླབས་པས་དབང་རྫས་དེ་དང་དེ་ནུས་པ་ཅན་དུ་བསྒྲུབ་པའོ། །རྐྱེན་བཞི་ནི། དབང་བསྐུར་དུ་རུང་བའི་སློབ་བུ་རྒྱུའི་རྐྱེན། བསྐུར་ནུས་ཀྱི་སློབ་དཔོན་བདག་པོའི་རྐྱེན། རྫས་སྔགས་ཏིང་ངེ་འཛིན་སོགས་འཛོམས་པའི་ནུས་པ་ཁྱད་པར་ཅན་དམིགས་པའི་རྐྱེན། དབང་སྔ་མ་སྔ་མས་གོ་ཕྱེ་ནས་ཕྱི་མ་ཕྱི་མ་འགྱུར་བ་དེ་མ་ཐག་པའི་རྐྱེན་ནོ། །ངེས་ཚིག་ནི། ཨ་བྷི་ཤིཉྩ། ཞེས་པའི་སྒྲ་ལས་དྲངས་ན། ཨ་བྷི་ནི། མངོན་པ། ཥིཉྩ་ནི། གཏོར་བའམ་བླུགས་པ་ལ་འཇུག་པའི་རྒྱུ་མཚན་གྱིས་དབང་ཞེས་བྱ་སྟེ། སྒོ་གསུམ་གྱི་དྲི་མ་ཕྲ་རགས་མངོན་པར་གཏོར་ཞིང་འཁྲུད་པ་དང་། འབྲས་བུ་ཡེ་
ཤེས་ཀྱི་ནུས་པ་ཁྱད་པར་ཅན་རྒྱུད་ལ་འཇོག་པར་བྱེད་པའི་ཕྱིར། དེ་ལྟར་ཡང་། བརྟགས་གཉིས་ལས། གཏོར་དང་བླུགས་པ་ཞེས་བྱ་བ། །དེས་ན་དབང་ཞེ་བརྗོད་པར་བྱ། །ཞེས་སོ། །དབྱེ་བ་ལ། སྨིན་བྱེད་རྒྱུའི་དབང་། སློབ་མ་གང་ཞིག་སྔོན་ཆད་རྡོ་རྗེའི་ཐེག་པའི་དཀྱིལ་འཁོར་དུ་ཞུགས་མ་མྱོང་བ་ཞིག །རྡོ་རྗེ་སློབ་དཔོན་མཚན་ལྡན་གྱིས་དང་པོར་དཀྱིལ་འཁོར་དུ་བཅུག་ནས། དབང་གིས་དེའི་རྒྱུན་སྨིན་པར་བྱས་པའོ། །གྲོལ་བྱེད་ལམ་གྱི་དབང་། དེ་ལྟར་ཞུགས་ཤིང་དབང་ཐོབ་པ་ནས་བཟུང་ས་བཅུ་རྒྱུན་མཐའ་ལ་ཐུག་གི་བར་དུ་རྡོ་རྗེ་སློབ་དཔོན་ལས་སམ་བདག་འཇུག་སོགས་ལ་བརྟེན་པ་གང་ཡིན་ཡང་འདྲ་སྟེ། བར་སྐབས་དེ་དག་ཏུ་དབང་ནོད་པ་ཐམས་ཅད་དོ། །མཐར་ཕྱིན་འབྲས་བུའི་དབང་ནི། རྒྱུན་མཐའི་གནས་སྐབས་སུ་འོག་མིན་ཆེན་པོར་སྟོན་པ་ལོངས་སྤྱོད་རྫོགས་པའི་སྐུ་ལས། གསང་བ་ཟབ་མོའི་དབང་གསུམ་ནོད་པ་ལ་བརྟེན་ནས་སྐབས་དེར་སྟོན་འཁོར་དགོངས་པ་དབྱེར་མེད་དུ་བྱེད་པའོ། །དེ་ནི་རྒྱུད་ཚོད་དང་སྦྱར་ནས་ཕྱེས་པ་ཡིན་ལ། དབང་གི་རྣམ་གྲངས་བྱེ་བྲག་པ་ནི། སྤྱིར་རྒྱུད་སྡེ་བཞི་ལ་དབང་གི་བབ་མི་འདྲ་བ་བཞི་ཡོད་པ་སྟེ། བྱ་རྒྱུད་ལ་དབང་བུམ་གྱི་ཆུའི་དབང་། རིགས་གང་ཡིན་གྱི་དམ་ཚིག་གི་ཕྱག་རྒྱ་ཅོད་པཎ་གྱི་དབང་གཉིས། དེའི་མཐའ་བརྟེན་དུ་བཟླས་ལུང་བཀྲུ་བྱབ་བསྲུང་གསུམ། བཀྲ་ཤིས་རྫས་བརྒྱད་བྱིན་པ་རྣམས་སོ། །
སྤྱོད་རྒྱུད་ལ་ཆུ་ཅོད་པཎ་རྡོ་རྗེ་དྲིལ་བུ། མིང་དབང་རྣམས་དང་། མཐའ་རྟེན་དུ་མེ་ལོང་ཐུར་མ་ཆོས་འཆད་ཀྱི་རྗེས་གནང་དང་བཅས་པའོ། །ཡོ་གར། ལྷ་བུམ་སོགས་ཀྱི་ཆུའི་དབང་། རྡོ་རྗེ་རིན་ཆེན་ཅོད་པཎ་སོགས་རིགས་མཐུན་གྱི་དབུ་རྒྱན། རྡོ་རྗེ་དྲིལ་བུ་གསུམ། མིང་དབང་སྟེ་སློབ་མའི་དབང་ལྔ། ཕྱིར་མི་ལྡོག་པ་དམ་ཚིག་གསུམ་བཟུང་བ། གསང་དཀྱིལ་དུ་གསང་བའི་འཇུག་པས་ཞུགས་ཤིང་མཐོང་བ་། ལྷ་དང་དཀྱིལ་འཁོར་གྱི་དེ་ཁོ་ན་ཉིད། སློབ་དཔོན་གྱི་ལས་རིམ་རྣམས་ཤེས་པར་བྱ་བ། ཐུན་མོང་མ་ཡིན་པ་ཆོས་འཆད་རྗེས་གནང་དང་། ལུང་བསྟན་དབུགས་དབྱུང་གཟེངས་བསྟོད་དེ་བཅུ་གཅིག་གོ། བླ་མེད་ལ། སྙིང་པོའི་རྒྱུད་ཕྱི་མ་ལས། སློབ་དཔོན་གསང་བ་ཞེས་རང་དང་། །དེ་མ་ཐག་པ་བཞི་པ་སྟེ། །རྣམ་རྟོག་དྲི་མ་དག་བྱའི་ཕྱིར། །དབང་བསྐུར་རྣམ་པ་བཞི་ཡིན་ནོ། །ཞེས་གསུངས་པ་ལྟར་རྩ་བའི་དབང་བཞི། བྱེ་བྲག་ཏུ་བུམ་དབང་ལ་རིག་པའི་དབང་ལྔ། དྲུག་པ་རྡོ་རྗེ་འཆང་གི་དབང་སྟེ་སློབ་མའི་དབང་དྲུག །རྡོ་རྗེ་སློབ་དཔོན་གྱི་དབང་དང་བཅས་པ་བུམ་དབང་དངོས་གཞི་ལ་བདུན་དང་། དེའི་ཡན་ལག །རྗེས་གནང་། ལུང་བསྟན། དབུགས་དབྱུང་། གཟེངས་བསྟོད་དེ་བཅུ་གཅིག་ཏུ་འགྱུར་རོ། །དེས་མཚོན་ནས་ཐུན་མོང་དང་ཐུན་མོང་མ་ཡིན་པའི་དབང་གི་བྱེ་བྲག་དབྱེ་བ་འབྱེད་ཚུལ་མི་འདྲ་བ་མང་སྟེ་བརྗོད་ཀྱིས་མི་ལང་ངོ། །དེ་ནས་གཞུང་གི་དབང་དངོས་འཆད་པ་ལ། དབང་ལྷ་སྤྱན་འདྲེན་པ་ནི། དབང་འབྲིང་ནས་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་སོགས། འབྲས་བུ་ངོ་
བོ་ཉིད་སྐུ་འགྲུབ་པའི་འཕྲོ་བར་སོང་ནས། ཕྱག་མཚན་སོགས་ཀྱི་དབང་ལ་ལྷུང་བཟེད་ཐོགས་ཏེ། ཧཱུྃ། རིན་ཆེན་བཻ་ཌཱུརྱ་ཡི་སོགས་ནས། དབུ་གདུགས་བར་བསྐུར། ཡང་ན་ཟུར་བརྒྱན་འདི་གཏེར་གཞུང་དགོངས་པ་ལྟར་ལྷ་དབང་གཞུག་ཏུ་བསྐུར་ཀྱང་ལེགས་པའི་འབྲེལ་མཚུངས་ཉིད་དོ། །དབང་རྒྱས་ལས། དེ་ནས་གཙོ་འཁོར་རིམ་པས་དབང་བསྐུར་བ་ཡིན་པས། སོགས། ལྷ་དབང་འཇུག །ཛཿ་དྷི་ཧྲཱིཿ ཧཱུྃ༔ ཨ་བྷི་ཥཱིཉྩ་ཧཱུྃ༔ གཏོར་མ་འདི་ནི་ཕྱི་འབྲུ་སྨན་གྲུབ་པ་སོགས། རྒྱལ་སྲིད་སྣ་བདུན་དབང་གི་མཇུག་བར་བརྗོད། དེ་ནས་བླ་མ་ཡི་དམ་མཁའ་འགྲོ་ཆོས་སྐྱོང་རྣམས་ཀྱིས་སོགས། བཀྲ་ཤིས་ཕྱག་ནས་འཐོར་ཏེ། རྫོགས་སངས་རྒྱས་པའི་བཀྲ་ཤིས་ཤོག༔ བར་རོ། །དེ་ལྟར་དབང་ཐོབ་ནས་དེ་དང་འབྲེལ་བའི་དམ་ཚིག་དང་སྡོམ་པ་བསྐྱང་བར་བྱ་སྟེ། ཀུན་འདུས་ལས། དབང་རྣམས་ལེགས་པར་རྫོགས་གྱུར་པས། །རྩ་བ་ཡན་ལག་དམ་ཚིག་ཀུན། །མ་ཉམས་རབ་ཏུ་བསྲུང་བར་བྱ། །དེས་ནི་དངོས་གྲུབ་མཆོག་ཐོབ་འགྱུར། །ཞེས་སོ། །དེ་ལ་དམ་ཚིག་གི་སྐད་དོད་ས་མ་ཡ་ཞེས་པ་ཡལ་གམ་བཅས་པའི་ཐ་ཚིག་དང་། མནའ་དང་། སྡོམ་པ་ལ་སོགས་ལ་འཇུག་པས་ཇི་ལྟར་བཅས་པ་ལས་འདའ་བར་བྱ་བ་མ་ཡིན་པའི་དོན་ཏེ། ངོ་བོ་སྔགས་ཀྱི་སྒོར་ཞུགས་ནས་དེ་ཉིད་ཀྱི་བརྟུལ་ཞུགས་བསྲུང་ཞིང་བསྒྲུབ་པར་བྱ་བའི་དོན་ལས་མི་འདའ་བའི་ལྷག་བསམ་ཁྱད་པར་ཅན་ཡིན་ལ། དེ་ཡང་རང་རྒྱུད་སྡོམ་པའི་ཆ་ནས་སྡོམ་པ་དང་། སངས་རྒྱས་ཀུན་གྱི་གསང་བའི་རྡོ་རྗེ་གསུམ་འཛིན་ཞིང་མི་ཉམས་པར་
བསྲུང་བའི་ཆ་ནས་དམ་ཚིག་ཡང་ཡིན་པས། ངོ་བོ་གཅིག་ལ་ལྡོག་པས་ཕྱེ་བ་ཙམ་དུ་ཟད་དེ། དེ་ལྟར་ཡང་གསང་སྙིང་གི་རྒྱུད་ཕྱི་མ་ལས། གང་ཞིག་ནན་ཏན་ལས་མི་འགོང་། །རྨི་ལམ་དུ་ཡང་དམ་ཚིག་བརྗོད། །དམ་བཅའ་བ་ནི་སྡོམ་པར་འདོད། །ཅེས་དང་། ཕྲ་རྒྱས་ལས། དེ་ལྟར་སུམ་ཅུ་དྲུག་ཅུ་རྣམས། །བདག་གི་རྡོ་རྗེ་མཆོག་གསུམ་པོས། །ལོག་པར་མི་གཏོང་སྡོམ་པའི་དངོས། །ས་གཞི་ལྟ་བུར་གསུང་བ་ཡིན། །ཞེས་པའོ། །དེ་ལ་རེ་ཞིག་སྡོམ་པའི་ངོས་ནས་གཞལ་ན། སོ་ཐར། བྱང་སེམས། རིག་པ་འཛིན་པའི་སྡོམ་པ་དང་གསུམ་སྟེ། དེ་གསུམ་ཡང་རྣམ་པ་འགལ་བ་ལྟར་ཡང་ངོ་བོ་ཚང་བ་དང་གནས་འགྱུར་བའི་སྒོ་ནས་སོ་བྱང་གཉིས་སྔགས་སྡོམ་གྱི་ནང་དུ་འདུས་ཤིང་རྣམ་པར་དག་པ་སྟེ། ཇི་ལྟར་ན། སྡོམ་པ་འོག་མ་གཉིས་ལ་མཉམ་པ་ཆེན་པོའི་ཐབས་ཀྱིས་མ་ཟིན་པའི་ཐ་མལ་སྣང་ཞེན་གྱི་ཆ་དེ་ཡོད་པ་རྩ་ལྟུང་གི་སྒོ་ནས་སོ་ཐར་གྱི་གཞན་གནོད་གཞི་བཅས་ལས་ལྡོག་པ་དང་། བྱང་སྡོམ་གྱི་གཞན་ཕན་ལ་ཞུགས་པའི་ལྡོག་ཆ་གཉིས་པོ་དེ་སྔགས་སྡོམ་གྱི་མཉམ་པ་ཆེན་པོའི་ངང་ནས་གཞན་དོན་རྩོལ་མེད་དུ་མཛད་པའི་ཐབས་མཁས་ཀྱི་ནང་དུ་ཚང་ཞིང་རྫས་གོང་འཕེལ་གྱི་ཚུལ་གྱིས་སྔགས་ཀྱི་སྡོམ་རྫས་སུ་འགྱུར་བ་ཡིན་ནོ། །དེ་ཡང་གསལ་བཀྲ་ལས། ཐེག་ཆེན་དམ་ཚིག་ལ་གནས་ནས། །འོག་མའི་འདུལ་སྡོམ་དམ་ཚིག་ཀུན། །བསྲུང་བ་མེད་པར་ཐུབ་པས་ན། །དགེ་སློང་བྱང་ཆུབ་སེམས་དཔའ་དང་། །རྣལ་འབྱོར་རྣལ་འབྱོར་ཆེན་པོ་ཡིན། །ཞེས་སོ། །
དམ་ཚིག་ངོས་ནས་གཞལ་ན། བདེ་འདུས་ཞི་བ་རྩ་བའི་རྒྱུད་ལས། སྤྱི་དང་ཁྱད་པར་ལྷག་པ་ཡི༔ རྣམ་པར་དབྱེ་བས་གཟུང་བྱ་སྟེ༔ ཞེས་པས། དམ་ཚིག་གསུམ་སྟེ།སྤྱིའི་དམ་ཚིག་སོ་བྱང་ཕྱི་རྒྱུད་གསུམ་གྱི་བསྲུང་མཚམས་སུ་གྲགས་པ་རྣམས་སོ། །ཁྱད་པར་གྱི་དམ་ཚིག་ནི། རིགས་ལྔའི་དམ་ཚིག་དང་རྩ་བ་དང་ཡན་ཡག་གིས་བསྡུས་པའི་བླ་མེད་ཀྱི་དམ་ཚིག་ཁྱད་པར་བ་རྣམས་སོ། །ལྷག་པའི་དམ་ཚིག་ནི། སྤྱི་དང་ཁྱད་པར་གྱི་དམ་ཚིག་གནས་པའི་གང་ཟག་གིས་སྒྲུབ་པ་ལ་སོགས་པའི་སྐབས་སུ་བསྲུང་བར་བྱ་བ་ལྷག་པར་བསྟན་པའི་དམ་ཚིག་གཅན་ཟན་རྒྱལ་པོའི་ཁྲི་མི་བཤིག་པ་ལ་སོགས་པ་ཉི་ཤུའོ། །དེ་ལྟ་ནོས་པའི་དམ་ཚིག་དེ་དག་ཇི་ལྟར་སྲུང་བའི་ཐབས་ནི། གནང་བཀག་གི་གནད་རྣམས་མ་བརྗེད་པའི་དྲན་པ་དང་། དམ་ཚིག་ལས་འདས་མ་འདས་རྟོག་དཔྱོད་བྱེད་པའི་ཤེས་བཞིན་དང་། གཟོབ་པ་ལྷུར་ལེན་པའི་བག་ཡོད་དང་། ཉམས་ན་བདག་ཉིད་ངན་སྙམ་དུ་རང་ལ་བརྟེན་ནས་འཛེམས་པའི་ངོ་ཚ་ཤེས་པ་དང་། ཡུལ་གཞན་ལ་བརྟེན་ནས་འཛེམས་པའི་ཁྲེལ་ཡོད་དང་། ཉམས་པའི་ཉེས་དམིགས་མཐོང་བས་འཇིགས་པ་དང་། ཕན་ཡོན་ལ་བྲོད་པས་གུས་པ་སྟེ། དེ་དག་གི་སྒོ་ནས་འབད་པས་བསྲུང་བས་སོ། །ཉམས་ན་ཕྱིར་བཅོས་པ་ནི། ཡུལ་གང་ཟག་ལས་ཉམས་པ་རྣམས་དེ་དག་གི་དྲུང་དུ་བཤགས་ཤིང་། གཞན་རྣམས་འགྱོད་སྡོམ་གྱི་སྒོ་ནས་ཇི་ལྟར་རིགས་པས་བཤགས་པར་བྱ་ལ། ཉམས་པ་ཆེན་པོ་ནི། ཡུལ་གང་ལ་བརྟེན་ནས་ཉམས་ཀྱང་
རུང་སྟེ། ཐོག་མར་སོ་སོའི་ལུགས་གཞིན་བཤགས་ནས་སླར་དབང་དང་དམ་ཚིག་ནོད་པར་བྱ་བ་ཡིན་ནོ། །དེ་ལྟར་དབང་བཞི་རྫོགས་པར་ཐོབ་ནས། སོགས་དབང་གཞུང་དཀྱུས་ལྟར་དམ་ཚིག་ཁས་བླངས་དང་གཏང་རག་འབུལ་བར་བྱའོ། །དེས་ནི་སྨིན་དབང་བཤད་པ་སོང་ངོ་། །རྗེས་གནང་ནི་ཡིག་ཆས་གསལ། ཚེ་དབང་དང་ཚེ་སྒྲུབ་ཀྱང་ཟུར་གསལ་ཡོད་བཞིན་ལ། དབང་གི་སྐབས་མཚམས་སྦྱོར་རིགས་པས་འཕྲུལ་རྒྱུ། སྔོན་འགྲོ་གསོལ་འདེབས་སྐྱབས་སེམས་བདུན་མཐར་བྱིན་དབབ། དེ་རྗེས་ཚེ་འགུགས་བྱས་ནས། བུམ་པ། ཚེ་རིལ། ཚེ་ཆང་། རྒྱས་གདབ། རྫས་རྟགས་ཀྱིས་ཚང་བའོ། །༈ གཉིས་པ་བྱང་ཆོག་ལ། དམ་ཚིག་དང་ལྡན་པའི་སྔགས་པས་བྱང་ཆུབ་ཀྱི་སེམས་དང་། སྙིང་རྗེ་ཆེན་པོའི་སྒོ་ནས་བརྩམ་པར་བྱ་སྟེ། ཐོག་མར་གང་དུ་བྱ་བའི་གནས་དེར་འོད་ཆོག་དཀྱིལ་འཁོར་བཤམས་ནས་བསྒྲུབ་ཅིང་མཆོད་པ་སོགས་གང་དགོས་གྲུབ་སྟེ། ལྷག་མའི་མཇུག་སོགས་སྟབས་གང་བདེར་སློབ་དཔོན་མདུན་དུ་ཕུང་པོའམ། ཡང་ན་གཞུང་འདིར། འབྱུང་བཞི་འོད་སྐོར་འཁོར་ལོའི་སྟེང་༔ འདབ་བརྒྱད་དབུས་སུ་མཚན་བྱང་འཛུགས༔ ཞེས་པ། སྦྱོང་རྒྱུད་ལས། དེ་ཡི་གཟུགས་བརྙན་བྲི་བ་འམ། །གུར་གུམ་གྱིས་ནི་མིང་ཡང་རུང་། །ངན་སོང་གསུམ་གྱི་འཇིགས་ཆེན་ལས། །སེམས་ཅན་རྣམས་ནི་གྲོལ་བའི་ཕྱིར། །བློ་ཆེན་གྱིས་ནི་དབང་བསྐུར་བྱ། །ཞེས་དང་། བྱང་གཏེར་འགྲོ་བ་ཀུན་སྒྲོལ་ལས།
རྣམ་ཤེས་བརྟེན་པའི་མཁར་ཡིན་པས༔ འདྲ་འབག་པུས་བཙུགས་ཐལ་སྦྱོར་བ༔ ལག་ན་མེ་ཏོག་ཐོགས་པ་བྲི༔ ཞེས་གསུངས། བྱང་བུའི་རྒྱབ་ཏུ། ༀ་ཨ་མི་དེ་ཝ་ཧྲཱིཿ སངས་རྒྱས་འོད་དཔག་མེད་ལ་ཚེ་འདས་མིང་འདི། ཞེས་བགྱི་བ་ཕྱག་འཚལ་ཞིང་སྐྱབས་སུ་མཆིའོ། །སྒྲིབ་པ་སྦྱོང་དུ་གསོལ། དབང་བསྐུར་དུ་གསོལ། ལམ་བསྟན་དུ་གསོལ། མྱུར་དུ་འཚང་རྒྱ་བར་བྱིན་གྱིས་བརླབ་ཏུ་གསོལ། ཞེས་བྲི། ཀར་གླིང་ཞི་ཁྲོར། འཕན་ཕྲན་མཛེས་པ་འདི་ནི་ལུས་ཀྱི་རྟེན༔ མིང་ཡིག་བྱང་བུ་འདི་ནི་ངག་གི་རྟེན༔ མེ་ལོང་གསལ་བ་འདི་ནི་སེམས་ཀྱི་རྟེན༔ རས་ཕྲུག་དྲི་མེད་འདི་ནི་གོས་ཀྱི་རྟེན༔ གདུགས་ཆེན་འབར་བ་འདི་ནི་གཞལ་ཡས་ཁང༔ ལེགས་ཕྱིང་དཀར་པོ་འདི་ནི་འདུག་པའི་གདན༔ སྦ་སྨྱུག་ལྡེམ་པ་འདི་ནི་འཇུ་བའི་ཤིང་༔ ཞེས་འབྱུང་བ་ཕྱག་བཞེས་ལྟར་བྱ། གཞན་ཡང་འདིར་དགོས་དམིགས་བསལ་བུམ་པ་གཉིས། ཞི་སྦྱང་གཏོར་མ། ཏིང་ལོ་ཆང་བུ། བྲབ་རྫས་བྱེ་ནག་མི་ཁྱིས་མ་འགོམ་པ། སྡིག་སྒྲིབ་བསྲེག་པའི་རྟེན་འབྲེལ་དང་། དུག་ཕྲལ་ཕྱིར་མེ་ཐབ་ཏུ་བརྔོ་ཙམ་བྱས་པ་ཡིན་པས། བྱེ་མ་དཀར་པོ་མི་འཐད་པ་རྒྱུད་དུ་གསལ། སྤྱིར་བྲབ་རྫས་བྱེ་ཡུངས་ལ་ཞི་ཁྲོའི་སྔགས་དང་། ཡི་གེ་བརྒྱ་པ། གཙུག་ཏོར་རྣམ་རྒྱལ། གཙུག་གཏོར་དྲི་མེད། པདྨ་ཨུཥྞཱི་ཥ་སོགས་གཟུངས་བྱིན་ཆེན་བཟླས་ནས་བཏབ་པ་དགོས། སྡིག་སྦྱོང་ཏིལ་ནག་ལ་སྡིག་པའི་གཟུགས་གཏོད་པ། མེ་ཆུ། ལྷ་ཁྲུས་ཆས། མེ་ལོང་། ཁྲུས་དར། བཟེད་ཞལ། ཚྭ་ཀོང་། དུག་སྦྱོང་ཆས། ས་ཆུ་[སྦར་མེ།] རླུང་གཡབ། ཟས་གཏད་ལ། གཟུག་མེ་ལོང་། སྒྲ་ཏིང་ཤག །
དྲི་སྤོས། རོ་ཟས་སྣ་དང་བཏུང་བའི་རིགས། རེག་བྱ་དར་བཅས། བྱང་བུ་བསྲེག་པའི་མར་མེ། སཱཙྪ་གདབ་པའི་ས་པད་འདབ་བྱས་པ་སོགས་དགོས་ཆས་ཚགས་སུ་ཆུད་པར་བྱ། ལས་བུམ་སྒྲུབ་རྗེས་ལས་སྦྱོར་གྱི་བཟླས་པས་བྱེ་མ་སྔགས། བདག་འཇུག་ལེན་པའམ་རིག་མེ་དོར། སློབ་དཔོན་ལྷའི་ང་རྒྱལ་ལ་གནས་པས་དམིགས་རྟེན་ལ་ལས་བུམ་ཆུ་འཐོར། ༀ་བཛྲ་ས་ཏྭ་ཧཱུྃ༔ སོགས་རྟེན་བསྐྱེད། རྣམ་ཤེས་འགུག་པར་ལྕགས་ཀྱུ་ཕྱག་རྒྱ་འཆིང་བ་ཡང་། རྒྱུད་ལས། གསང་བའི་ལྕགས་ཀྱུས་བསྡམས་བྱས་ཏེ། །ཐ་མ་མཉམ་པར་[བརྐྱངས་]ནས་ནི། །ཤི་བའི་མགོ་བོར་བཞག་ན་ནི། །སྲོག་གི་ཕྱིར་ཡང་ཐོབ་པར་འགྱུར། །ཞེས་སོ། །འགུགས་པ་ལན་གསུམ་བྱས། བར་དོའི་སེམས་ཅན་དེ་བགེགས་ཀྱིས་བཟུང་ནས་ཐར་པ་ཐོབ་ཏུ་མི་འཇུག་པའི་དྲི་ཟ། པི་ཤ་ཙི་ན། གནོད་སྦྱིན་སྨྲ་འདོད། འབྱུང་པོ་ཝ་ར་ཧེ་ན། ཀུན་ཏུ་གཏོགས་འདོད། ཡི་དྭགས་གཤིན་རྗེའི་སྡེ་སོགས་ཤ་ཟ་དང་འབྱུང་པོ་བསམ་གྱིས་མི་ཁྱབ་ཅིང་། དེ་དག་གདོན་གསུམ་དུ་འདུ་བས་ཞི་སྦྱོང་གིས་ཀླུ་གདོན་སྦྱོང་བས། གཏོར་མ་དང་ནམ་མཁའ་མཛོད་རྫས་སྔགས་གཉིས་ཀ་ཞི་བ་ཡིན། སྔགས་ལན་གསུམ་ལ་གཏོར་མ་གཡས་སུ་ལན་གསུམ་བསྐོར། ཏིང་ལོ་ཆང་བུ་རྫས་ཞི་བ་སྔགས་ཁྲོ་གནོད་མཛེས་སྙིང་པོ་དྲག་པོ་སྟེ། ཞི་དྲག་ཕྱེ་མས་མོ་གདོན་སྦྱོང་། གཏོར་མ་གཡོན་དུ་ལན་གསུམ་བསྐོར། གནོད་བྱེད་གཤིན་འདྲེ་དེའི་སྒོ་གསུམ་གྱི་ཉེས་པ་སྦྱོང་། སྲོག་གཅོད་དབུགས་ལེན་སོགས་རྟག་ཏུ་འདོད་པའི་གདུང་བ་ངོམ་ཞིང་ཚིམ་པའི་རྒྱུར་བསྔོ། རང་དཔལ་རྟ་མགྲིན་གྱི་ང་རྒྱལ་
དྲག་སྔགས་གུ་གུལ་ཡུངས་རོལ་མོ་དང་བསྐྲད་པ་ནི་དྲག་པོ་སྟེ་ཕོ་གདོན་སྦྱོང་བའོ། །དེ་ཡང་། གྲུབ་ཐོབ་ཀརྨ་ཆགས་མེད་ཀྱིས། ཀླུ་གདོན་ཞི་བ་ཕོ་གདོན་དྲག་པོ་དང་། །མོ་གདོན་ཞི་དྲག་ཕྱེད་མས་སྦྱོང་བར་གསུངས། །ཞེས་དང་། ཆང་བུ་ཟུར་ལྔ་འདོད་ཡོན་ལྔ་པོ་མཚོན། །སོར་མོའི་རྗེས་དྲུག་རིགས་དྲུག་ལན་ཆགས་བྱང་། །འབུར་ཆུང་བཅུ་གཉིས་ལོ་བདུན་བཅུ་གཉིས་ཚིམ། །ཏིང་ལོ་མར་མེའི་གཟུགས་ཡིན་ལམ་སྒྲོན་གསལ། །ཞེས་སོགས་གསལ་བར་བསྟན་ནོ། །དེ་ལྟར་བགེགས་བསྐྲད་ནས་མཚམས་བཅད་དེ་ཚེ་འདས་སྲུང་གུར་དུ་འཛུད། བྱང་བུའི་གཡས་སུ་མེ་དང་། གཡོན་དུ་ཆུ། དབུས་སུ་ཏིལ་ནག་ལ་སྡིག་གཟུགས་བྱས་པ་བཞག །ཚེ་འདས་ཐ་མལ་པའི་སྙིང་ཁར་ཡི་གེ་ཀཾ་ནག་པོ་ལ་སྡིག་སྒྲིབ་བསྡུས་པ་སྡིག་པའི་གཟུགས་སུ་བསམ། རྐང་མཐིལ་གཉིས་སུ་ཡཾ་ལས་རླུང་གཡོས། སུམ་མདོར་གཏུམ་མོ་རཾ་ཡིག་ལས་མེ་འབར། དེའི་ཤུགས་ཀྱིས་སྙིང་གའི་སྡིག་པ་སྣ་ཕུག་གཡས་ནས་ཐོན་པ་མདུན་གྱི་ཏིལ་ལ་ཐིམ། མེ་ཆུ་བཞག་པར་ཟ་བྱེད་ཁྲོ་མོ་རྡོ་རྗེ་ཁྲོ་བོ་གཉིས་ཀ་མཐིང་ནག་རྡོ་དྲིལ་འཛིན་པར་གསལ་བ་དེ་གཉིས་ཐུགས་ཀར་ཞིང་སྒྲུབ་ལྷ་ཚོགས་བཞུགས་པ་བཅས་དཀྱིལ་འཁོར་གཉིས་ཀའི་ལྷ་ལ་བསྲེག་སྦྱང་འབུལ་བར་དམིགས་ནས། མཁའ་འགྲོ་ཟུང་གི་སྔགས་བཅས་ཏིལ་མཐེབ་སྲིན་བར་བཟུང་བ་ཁ་གྱེན་བསྟན། ཏིལ་གཡས་སུ་ལན་གསུམ་བསྐོར་མེར་བསྲེག །གཡོན་དུ་ལན་གསུམ་བསྐོར་ནས་ཆུར་དོར། གཡས་གཡོན་གཉིས་ཀར་ལན་གསུམ་བསྐོར་ལག་བསྣོལ་ནས་མེ་ཆུར་དོར། ཆུ་[མེ་ནང་བླུགས་]པ་ཕྱིར་
དོར། མཁའ་འགྲོ་ༀ་བཛྲ་མུས་གཤེགས། རྩ་སྔགས་ཡོངས་རྫོགས་མཐར། ཡིག་བརྒྱ་ལ་ངན་སོང་གསུམ་སྦྱོང་བའི་སྤེལ་ཚིག་དང་བྱེ་མས་བྲབ་པས་ཚེ་འདས་ཀྱི་སྡིག་སྒྲིབ་སྦྱོང་བར་བསམ་པ་སྟེ། དོན་ཞགས་ཆོ་གར། གང་ན་སེམས་ཅན་གྱི་རུས་པ་བྱང་བུ་སོགས་ལ་བྱེ་མ་གཏོར་ན། དེར་བྱེ་མ་བབས་པས་སེམས་ཅན་དམྱལ་བ་དང་། ཡི་དྭགས། ཤ་ཟ། གནོད་སྦྱིན། སྲིན་མོའི་སྐྱེ་གནས་སུ་སྐྱེས་ནའང་། དེའི་མོད་ལ་ཚེ་འཕོས་ཏེ། མཐོ་རིས་སུ་སྐྱེ་བར་འགྱུར་ཞིང་། ནམ་ཡང་དམྱལ་བར་གཞོལ་བར་མི་འགྱུར་རོ། །ཞེས་གསུངས། དེ་ནས་ཐོག་མར་
བཟང་ཁྲུས་རྣམ་བུམ་གྱིས་ལྷ་ལ་གསོལ་ཞིང་། སྐུ་ཕྱིས་གོས་འབུལ། དེའི་ཁྲུས་ཆུ 
་ལས་བུམ་དུ་བྲན་ནས། ངན་ཁྲུས། དམིགས་རྟེན་མེ་ལོང་ངོར་འཆར་བ་བཀྲུ་བ་ཡིན་པ། ཞིང་སྒྲུབ་ལྷ་ཚོགས་ཀྱི་བྱིན་རླབས་ཆུ་ལ་བསྟིམས་པ་དང་། གཏོང་བ་དང་། གཏོང་བ་ཆེན་པོ། ཤིན་ཏུ་གཏོང་བ་སྦྱིན་པ་གསུམ། ཉེས་སྤྱོད་སྡོམ་པ། དགེ་བ་ཆོས་སྡུད། སེམས་ཅན་དོན་བྱེད་ཚུལ་ཁྲིམས་གསུམ། སྡུག་བསྔལ་དང་ལེན། གནོད་ལ་ཇི་མི་སྙམ་པ། རང་རྒྱུད་ལ་འཁོན་དུ་མི་འཛིན་པ་སྟེ་བཟོད་པ་གསུམ། གོ་ཆ་བསྒོས་པ། བདུད་ཀྱིས་མི་བརྫི་བ། སྦྱོར་བ་ལག་ལེན་ཏེ་བརྩོན་འགྲུས་གསུམ། བྱིས་པ་ཉེར་སྤྱོད། དོན་རབ་འབྱེད་པ། དེ་བཞིན་གཤེགས་དགེ་སྟེ་བསམ་གཏན་གསུམ། ཐོས་བསམ་སྒོམ་པའི་ཤེས་རབ་གསུམ་སྟེ་ཕར་ཕྱིན་དྲུག་པ་ཡོངས་སུ་རྫོགས་པའི་བྱིན་ནུས་ཆུ་འདིས་ཁྲུས་བྱས་པས། སེར་སྣ། ཁྲིམས་འཆལ། ཁོང་ཁྲོ། ལེ་ལོ། རྣམ་གཡེང་། ཤེས་འཆལ་དྲི་མ་དྲུག་སྦྱོང་། ཐུབ་
པ་དྲུག་གིས་རིགས་དྲུག་གི་སྐྱེ་སྒོ་གཅོད། ཡེ་ཤེས་ལྔའི་ཆུས་ཉོན་མོངས་པ་དུག་ལྔ་དག །རྒྱལ་བ་རིགས་ལྔའི་ཞིང་ཁམས་མཐོང་། ས་བཅུའི་ཆུས་ལུས་ཀྱི་ལས་གསུམ། སྲོག་གཅོད་པ། མ་བྱིན་ལེན་པ། མི་ཚངས་སྤྱོད་པ། ངག་གིས་ལས་རྫུན། ཕྲ་མ། ཚིག་རྩུབ། ངག་འཁྱལ་བཞི། ཡིད་ཀྱི་ལས་བརྣབ་སེམས། གནོད་སེམས། ལོག་ལྟ་གསུམ་སྟེ་མི་དགེ་བཅུ་བཀྲུས་པས། སྟེང་འོག་གཉིས། ཕྱོགས་བཞི། མཚམས་བཞི་དང་བརྒྱད་དེ་བཅུའི་ཁྲོ་བོ་རྣམས་ཀྱིས་ཚེ་ལས་འདས་པའི་ས་ལམ་གྱི་བར་ཆད་སྒྲོལ་བའི་དོན་ཡིན། དུག་སྦྱོང་ནི། རྨ་བྱས་དུག་བཅོམ་ཕྱིར་ཡེ་ཤེས་ལྔ་ལྡན་གྱི་ཐིག་ལེའི་དབུས་སུ་ཧྲཱིཿ ལ་རྩ་སྔགས་ཀྱིས་བསྐོར་བའི་འོད་ཟེར་གྱིས་དུག་ལྔའི་སྒྲིབ་པ་དག་པར་བསམ་ལ། ཀུ་ཤ་རྨ་བྱའི་སྒྲོ་མདངས་ཀྱིས་བྱབ་ཅིང་ཚིག་དོན་གོ་སླ། འབྱུང་བའི་དུག་སྦྱོང་བ་ནི། ནང་ཤ་རུས་ལ་བརྟེན་པའི་དུག་ཐམས་ཅད་མདོག་སེར་ལ་མོག་པའི་རྣམ་པར་ཐོན། ཕྱིའི་འབྱུང་བ་ས་ལ་ཐིམ། སྦྱང་བྱ་གཏི་མུག ། སྦྱངས་འབྲས་རྣམ་སྣང་། ཁྲག་གི་དུག་སྔོ་ལ་མོག་པ་ཆུ་ལ་ཐིམ། ཞེ་སྡང་སྦྱོང་། སྦྱངས་འབྲས་མི་བསྐྱོད་པ། དྲོད་ཀྱི་དུག་དམར་ལ་མོག་པ། མེ་ལ་ཐིམ། འདོད་ཆགས་སྦྱོང། སྦྱངས་འབྲས་འོད་དཔག་མེད། དབུགས་ལྗང་ལ་མོག་པ་རླུང་ལ་ཐིམ། ཕྲག་དོག་སྦྱོང་། སྦྱངས་འབྲས་དོན་ཡོད་གྲུབ་པ་ཡིན་པ་ནི། བརྟགས་གཉིས་ལས། སྲ་བ་གཏི་མུག་ཆོས་ཀྱི་ཕྱིར། །གཏི་མུག་རྣམ་པར་སྣང་མཛད་བརྗོད། །ཆུ་ནི་མི་བསྐྱོད་གཟུགས་ཀྱི་ཕྱིར། །ཞེ་སྡང་འདྲེན་པ་མི་བསྐྱོད་པ། །དྲོད་ནི་རྟག་ཏུ་སྦྱོང་
བར་འགྱུར། །འདོད་ཆགས་དཔག་མེད་རྡོ་རྗེ་ཡིན། །ཕྲག་དོག་དོན་ཡོད་གྲུབ་པ་ཉིད། །དོན་ཡོད་རླུང་ལས་འབྱུང་བ་ཉིད། །ཅེས་གསུངས། དེ་ལྟར་ན་རྟེན་བརྟེན་པ་དང་སྦྱོང་བས་འདིར་ཡུམ་བཞིར་སྦྱོར་བ་གཞུང་ཚིག་ཏུ་གསལ་བས་གོ་སླའོ། །རིགས་དྲུག་གནས་འདྲེན་ཟུར་དུ་ཡོད་པ་འདིར་སྦྱོར་བར་སྤྲོ་ན་སྦྱར། བདེན་ཚིག་གིས་ཤིས་པར་བརྗོད་ཅིང་མེ་ཏོག་འཐོར། ལས་རྡོར་དམིགས་བྱང་ལག་གཡོན་དུ་བཟུང་ནས་ཕྱག་འཚལ་བར་བཅས་ཕྱག་འཚལ་འདོན། གནས་སྦྱོང་འདོན་སྒོམ་སྦྲགས། དེ་རྗེས་དབང་རྒྱས་འབྲིང་རྗེས་གནང་སོགས་གང་འོས་ཁ་བསྒྱུར་གྱིས་བཏང་། ཟས་བསྔོ་ལ་འདོད་ཡོན་ལྔ་ཚིག་བསྟུན་[མཆོད།] ལམ་བསྟན་མཐར་སྤྲོ་ན། ངོ་སྤྲོད་འཕོ་ལུང་རྒྱས་པར་བྱེད་གཞན་གཞུང་ལྟར། ཕུང་པོའམ་གནས་ལྔའི་རུས་བུ་ལྟ་བའི་སྐབས་ཡིན་ཚེ་རོ་བསྲེག་ཆོ་ག་ཡེ་ཤེས་འོད་འབར་ངན་སོང་རྒྱུན་གཅོད་ལྟར་བྱ་ཞིང་། བྱང་བུ་ཡིན་ན་བསྲེག །སྨོན་ལམ་བྱ། བྱང་ཐལ་སཱཙྪ་གདབ་ཆོག་ལྟར་བྱ་བ་རྣམས་གོ་སླའོ། །བྱང་བུ་བསྲེགས་པའི་ཐལ་བ། སཱཙྪ་གདབ་རབ་གནས་བྱ་བའམ། ཐལ་བ་དེར་བྲབ་རྫས་བྱེ་ཡུངས་སྔགས་ཀྱིས་གཏོར་ནས་རྒྱུན་འབབ་ཆུར་བླུགས་པའམ། རླུང་ལ་བསྐུར་བའང་ལག་ལེན་ཁུངས་མར་བཤད་དོ། །གནས་འདྲེན་བྱེད་པ་འདི་གསོན་པོ་དང་གཤིན་པོ་གཉིས་ཀ་ལ་སྦྱོར་ཆོག་སྟེ། གསོན་པོ་ལ་བསྐུར་དུས་རྣམ་ཤེས་འགུགས་པ། ཟས་བསྔོ། ལམ་བསྟན། གནས་སྤར་རྣམས་བསྒྱུར། ཚེ་འདས་ཟེར་བ་རྣམས་སྐལ་ལྡན་དུ་བསྒྱུར། གལ་ཏེ་གསོན་
པོ་དངོས་ཐག་རིང་དུ་སོང་ནས་མེད་ན། བྱང་བུ་དང་དབྱེར་མེད་དུ་བསམ་ལ་རྣམ་ཤེས་འགུགས་པ་དང་། བསྲེག་པའི་དུས་ནད་གདོན་བར་གཅོད་སྡིག་སྒྲིབ་རྣམས་བསྲེག་པར་བསམ་པ། ཚེ་འགུགས་བཀྲ་ཤིས་བརྗོད་པ་སོགས་རྗེ་བླ་མའི་ཆོག་བསྒྲིགས་གསོན་བྱང་ཆོ་ག་འཁོར་འདས་ཡེ་གྲོལ་བདེ་བ་ཆེན་པོའི་ཁང་བཟང་ལྟར་བྱ། དེས་ནི་དེ་ཡི་སྐག་ཆེན་དང་འཆི་བ་བཟློག་པ། བླ་མ་གོང་མ་རྣམས་གསུངས། ཁྲུས་དང་དུག་བཅོམ་དབང་བསྐུར་བ་ལ་སོགས་པས་ནད་གདོན་འཇོམས་པར་སྦྱོང་རྒྱུད་གྲ་ལྔ་སོགས་ཀྱི་དགོངས་པའོ། །རྡོ་རྗེ་མཁའ་འགྲོའི་རྒྱུད་ལས་ཀྱང་གསོན་ཤོག་བཞུ་ཐབས་དང་། མིང་གཟུགས་བསྲེག་པའི་ཁུངས་སྦྱོང་རྒྱུད་ལས་ཀྱང་གསུངས། སྲོང་བཙན་སྒམ་པོས་རང་གི་ཕུང་པོ་རང་གིས་བསྲེག་ཐབས་གསུངས་པ་སོགས་ཀྱང་གསོན་བྱང་ཉིད་དུ་ངེས་སོ། །དེ་ལྟར་ཚེ་བསོད་འཕེལ་བ་དང་། རྐྱེན་བཟློག་དུར་བསླུས་སོགས་འོང་བ་མཁས་པའི་ཞལ་ཤེས་ཡིན། ཡང་ན་བྱང་བུའི་དོད་དུ་དམིགས་བྱའི་སྐྲ་སེན་གོང་གི་དམིགས་པ་དང་ལྡན་པས་བསྲེག་ཀྱང་ཆོག །འདི་ལྟར་མི་རུང་སྙམ་ན། ཅིས་ཀྱང་རུང་སྟེ། གསོན་བྱང་གི་ཆོ་ག་དུ་མ་ཨུ་རྒྱན་ཆེན་པོའི་ཟབ་གཏེར་ལས་ཀྱང་འབྱུང་བས་སོ། །གསུམ་པ་སྦྱིན་སྲེག་ནི། འདོད་པའི་དངོས་གྲུབ་མྱུར་དུ་སྟེར་བའི་ཐབས་མཁས་ཀྱི་ཕྲིན་ལས་ཏེ། དེ་ལའང་དོན་བྱ་བའི་ཡུལ་ནི། སྤྱིར་སེམས་ཅན་ཐམས་ཅད་དང་། བྱེ་བྲག་ཏུ་ཕྱེ་ན། ཞི་རྒྱས་དབང་དྲག་མཆོག་གི་ཁྱད་པར་གནོད་སྡིག་ཅན་དང་། དབུལ་ཕོངས་ཅན་དང་། ལོག་ལྟ་ཅན་དང་། གདུག་པ་ཅན་དང་། སྒྲིབ་གཉིས་
བག་ཆགས་ཅན་རྣམས་སོ། །བྱེད་པའི་ཕྲིན་ལས་ནི་ཞི་རྒྱས་དབང་དྲག་ལས་བཞི་དང་། ཐུན་མོང་མ་ཡིན་པ་མཆོག་སྒྲུབ་ལྷུན་གྲུབ་ཀྱི་ལས་རྣམས་ཡོད་པའི་ནང་ཚན་འདིར་ཞི་བའི་ལས་སོ། །བྱ་བའི་ཐབས་ལ། ཕྱི་ནང་གསང་བ་ཡང་གསང་དང་བཞིའོ། །ཕྱི་ལའང་རྫས་ལ་བརྟེན་པ་དང་། མ་བརྟེན་པ་ཏིང་ངེ་འཛིན་གྱི་སྦྱིན་སྲེག་གཉིས། དང་པོ་ལའང་སྦྱོར་དངོས་རྗེས་གསུམ་ལས། ས་ཆོག །ས་ལྷའི་གཏོར་མ་འབུལ་བ། གཞི་བདག་གཏོར་འབུལ། སྡེ་བརྒྱད་གསེར་སྐྱེམས། ཐིག་ཚོན་བྱིན་རླབས། ཆག་ཆག་གདབ་པ་སོང་ནས། དཀར་ཕྱོགས་ཀྱི་ཚེས་གཅིག །བཞི་སོགས་དང་། སྟོད་ཀྱི་ཆ་ལ་ལྔ་སེར་མེད་ཕྱོགས་སམ། ཡང་ན་ཁ་ཤར་དུ་ཕྱོགས་པས། ཐབ་ཁུང་གཞི་དཀར་པོ་ལ་དམར་གྱིས་བཅད་པའི་ཟླུམ་པོ་རྒྱར་ཁྲུ་གང་བ་མུ་ཁྱུད་ནང་མར་པདྨ་འདབ་བརྒྱད་ལྟེ་བར་རྡོ་རྗེས་མཚན་པ། མུ་ཁྱུད་ཕྱི་མར་རྡོ་རྗེའི་ཕྲེང་བ། དཔངས་སུ་རང་གི་ཕྱེད་ཚད་དང་སོར་བཞི་པའི་ཁ་ཁྱེར་མུ་རན་དང་། གྲྭ་བཞིར་ཟླ་ཕྱེད་རྡོ་རྗེས་མཚན་པ་བཅས་པས་བསྐོར་བའོ། །སྲེགས་ཤིང་། བ་ལང་གི་ལྕི་བའམ་བལ་བུ་སོགས་མཆོད་སྦྱིན་གྱི་ཤིང་གིས་ཟླུམ་བསྐོར་དུ་བརྩིགས་པར་དབུས་སུ་མེ་སྙིང་ཏིང་ལོ་འབར་ཚང་། མེ་སྒོ་བཅས་གཡས་སུ་སྲེག་གཞིར་ཡམ་ཤིང་མཐོ་གང་བ་དང་། བུད་ཤིང་ཁྲ་མ་སོགས་རྩི་མར་བཞུ་བའི་མར་ཁུ་མངར་གསུམ་བསྲེས་པར་ཡམ་ཤིང་རྩེ་བསྣུབས་པར་འཇིག་རྟེན་པར་བདུན་པ་དང་། གསུམ་པ། དཀྱིལ་འཁོར་པར་བརྒྱ་རྩ་བརྒྱད་རེ། འཁོར་རྣམས་ཉེར་གཅིག་པ་དང་བཅུར་ཡིན་པས་
ང་གཅིག་དགོས། རྫས་གཞན་རྣམས་ཀྱང་དེ་མཚུངས། ཏིལ་ནག །ཡུངས་དཀར། ཟས་མཆོག །དུ། ནས། གྲོ། སོ་བ། སྲན་མ། འབྲས། ཀུ་ཤ །ཤུག་ཐོག་སོགས་འབྲས་བུའི་རིགས། དཀར་གསུམ། མངར་གསུམ། མེ་ཏོག་སྣ་ཚོགས། སྨན་སྣ་ཚོགས། གོས་དར་རས་དུམ། དྲི་ བཟང་ཆོས་སྨན་བཏུང་བ། ཇ་སོགས་དང་། གཞུང་འདིར། གཡོན་དུ་མཆོད་གཞིར་མེ་ཏོག་སྤོས་མེ་དང་༔ ཆུ ་བཤོས་ལ་སོགས་གང་འབྱོར་ཐ་ན་བདུན༔ རིམ་བསྒྲིག་རྣམ་ལྔ་ཕྲེང་ཚར་ཟླུམ་གཏོར་ཆེ༔ ལྷ་གྲངས་གཏོར་ཆུང་གྲུབ་པ་མཐེབ་ཀྱུས་བསྐོར༔ མེ་ལྷར་ཟླུམ་གཏོར་ཆོས་སྐྱོང་གཏོར་འབུལ་དང་༔ འབྱོར་ན་ཚོགས་དང་སོགས་གསུངས་པ་དང་། མདུན་དུ་བུམ་གཟུང་རྡོར་དྲིལ་དགང་བླུགས་དང༔ བསང་ཆུ་ཡང་བསགས་ཀུ་ཤ་ཆུན་པོ་བརྒྱད༔ དཔལ་འབར་ལ་སོགས་མཁོ་བའི་ཡོ་བྱད་རིགས༔ སོགས་གསུངས་པ་ལྟར་གང་དགོས་ཚོགས་པར་བྱས། སྦྱིན་སྲེག་འདིར་ངག་གཅོད་པ་དང་། རྡོར་དྲིལ་མི་འབྲལ་བ་དམ་ཚིག་ཡིན། དགང་བླུགས་དང་མེ་ཡོལ་ཆུ་བྲག་རི་མོ་ཝྃ་བྲིས་པ། མེ་དར་སོགས་འཛོམས་ནས། མཐུན་པའི་སྟན་ལ་པདྨའི་སྟབས་ཀྱིས་འཁོད་དེ། དོན་གྱི་སེམས་དེ་ཁོ་ན་ཉིད་རྟོགས་པའི་ཤེས་རབ་དང་། བྱང་ཆུབ་སེམས་ཀྱིས་ཟིན་པ་ནི། ལས་ཐམས་ཅད་ལ་ཁྱབ་བྱེད་དུ་དགོས་པ་རྒྱུའི་སེམས་དང་། སྟོབས་ཀྱི་སེམས་ནི་ཞི་ཞིང་དངས་པ། ལས་མཐུན་པའི་གྲོགས་བྱེད་པས་ན་རྐྱེན་གྱི་སེམས་སོ། །གཉིས་པ་དངོས་གཞི་ཆོ་ག་ལ། བདག་བསྐྱེད་བཟླས་པའི་བར་སོང་། དཀྱིལ་འཁོར་གྱི་འཁོར་ལོ་རང་ལ་བསྡུས་ཏེ་གཙོ་བོའི་ང་རྒྱལ་ལ་གནས་པས་ལས་ལ་
འཇུག་པ་ནི། འཛོམས་ན་ཞི་བའི་གར་ཆས། མ་འཛོམས་ན་སྟོད་ལེ་དང། དབུ་དཀྲིས་དར་དཀར་བྱེད། མཆོད་རྫས་བྱིན་བརླབས་ནས་རིམ་པར་ཀུ་ཤ་ཕྱོགས་བཞི་གཡས་བསྐོར་དང་། མཚམས་བཞི་གཡོན་བསྐོར་དགྲམ། ཛྭ་ལའི་སྔགས་ཀྱིས་རྩུབ་ཤིང་གིས་མེ་སྦར། དར་གཡུག །མར་ཁུས་གསོ། མེ་ལྷ་བསྐྱེད། སྤྱན་འདྲེན་ལ་ལག་གཡས་ཐལ་མོ་ཕྱིར་བསྟན་རྡོ་རྗེར་བཅས་མི་འཇིགས་པའི་རྒྱས་མཐེ་བོང་གཡབ་པ། མེ་ལྷ་དགའ་བར་བྱེད་པའི་རྒྱ་ཡིན། གཡོན་དྲིལ་བུ་གསིལ། བྱོན་སྐྱེམས་ལ་དགང་བླུགས་བཅས་མར་ཁུ་བདུན་གསུམ་ཉེར་གཅིག་འབུལ་སྐབས། དགང་བླུགས་ཁ་སྦྱར་པུས་མོ་ལས་མི་འདའ་བར་གཡས་སུ་ལན་གསུམ་བསྐོར་ནས་ཐབ་ཏུ་འབུལ། དེ་རྗེས་ཆུ་གཉིས་ཉེར་སྤྱོད་རོལ་མོ་བཅས་མཆོད། འདི་ཕྱིན་རྫས་རྣམས་འབུལ་སྐབས་བླུགས་གཟར་གྱིས་མར་ཁུ་འབུལ་བ་ལས་དགང་གཟར་མི་འཛིན་པ་ཕྱག་བཞེས། རྫས་མང་བ་མི་རུང་ཞིང་། སྔགས་མང་བ་བཟང་། མེ་ལྷའི་སྔགས་ཀྱིས་མགོ་དྲངས་ནས་རྫས་རྣམས་བདུན་ཚན་རེའི་མཚམས་སུ་སྤེལ་ཚིག་སྦྱར་བ་ཡིན་པ་འདྲེས། རྫས་རྫོགས་པ་དང་བསྟོད་པ་བྱེད་། སླར་ཡང་མར་ཁུ་བླུགས་གཟར་གང་ཕུལ་བའི་རྐྱེན་གྱིས་མེ་ལྷ་འབར་བར་བསམ་པ་ནི། འཇིག་རྟེན་པའི་མེ་ལྷ་མཆོད་པའི་ཆོ་ག་སྟེ། མེའི་ལས་ཀྱིས་མེ་ལྷ་ཚིམ་པས་དེས་དཀྱིལ་འཁོར་བའི་ལྷ་རྣམས་ཚིམ་པའི་དགོས་པ་ཡོད་དོ། །འདས་པའི་མེ་ལྷ་ནི། གཞུང་སོ་སོའི་དགོངས་པས་མེ་ལྷའི་ལྟོ་བར་བསྐྱེད་པ་དང་། སྙིང་གར་བསྐྱེད་པ། རང་བཞིན་གྱི་མེ་ལྷ་ཐབ་ཀྱི་ཤར་ལྷོར་བཞག་སྟེ། དམ་ཚིག་
པ་མེར་བསྒྱུར་བའང་། དམ་མེ་དབྱེར་མེད་དུ་འབར་བའི་དབུས་སུ་བསྐྱེད་པ་སྟེ་བཞི་ལས། འདིར་ཕྱི་མ་སྟེ། མེའི་དབུས་སུ་པད་ཟླ་སོགས་གདན་རྣམས་ཀྱི་སྟེང་ལྷ་ཚོགས་འཁོར་བཅས་བསྐྱེད་ནས། སྤྱན་འདྲེན་བཞུགས་གསོལ་ཕྱག་མཆོད་སོང་ནས་དགང་བླུགས་བདུན་ཚན་གསུམ་སྔར་ལྟར་འབུལ་བ། གཙོ་སྔགས་ཁོ་ནས་འབུལ། མཚམས་སུ་འཁོར་སྔགས་མཐར་སྤེལ་ཚིག་སྦྱོར། ༀ་ཨ་མི་དྷེ་ཝ་ས་པ་རི་ཝཱ་ར་ཨཾ་ནས། ཤབྟ་པྲ་ཏཱི་ཙྪཿ ཨཱཿ ཧཱུྃ༔ རྫས་མང་མ་སྔགས་མགོར་ཨ་མི་དྷེ་ཝ་ལན་རེའི་མཐར་རྫས་སྔགས་སོ་སོ་དང་། བཅུ་ཚན་རེའི་མཐར་འཁོར་སྔགས་རྣམས་ལ་སྤེལ་ཚིག་སྦྱོར། གོང་སྨོས་ལྟར་རྫས་དལ་བས་སྔགས་གྲངས་ཚང་བ་གལ་ཆེ། དེ་མཚམས་འཁོར་མཆོག་ཟུང་སོ་སོའི་སྔགས་ཀྱི་མཐར། རྫས་སྔགས་ཉེར་གཅིག་རྗེས་སྤེལ་ཚིག་སྦྱར། དེ་རྗེས་བྱང་ཆུབ་སེམས་དཔའ། སྒོ་བཞི་ཐུབ་དྲུག་རྣམས་ཀྱི་སོ་སོའི་སྔགས་ཀྱིས་མགོ་དྲངས་ནས་རྫས་སྔགས་རྣམས་བཅུ་རེའི་མཐར་སྤེལ་ཚིག་སྦྱོར། ལྷ་ཚོགས་རྣམས་ཀྱིས་བསྲེག་རྫས་བདུད་རྩི་དཀར་པོའི་རྣམ་པར་གསོལ་བར་བསམ། གཙོ་འཁོར་རྫས་རྫོགས་ནས་འདོད་གསོལ། བསྟོད་པ་དང་བཤགས་པ་བྱ། བཀའ་སྲུང་སྒེར་མཆོད་བྱ། དེ་རྗེས་ཚོགས་ལྷག་མའི་བར། དཀྱིལ་འཁོར་བའི་གཏང་རག་ནི་མཆོད་པ་ཁ་གསོས་ལ་བསྡུས་པའི་མཐར། དགང་བླུགས་ཉེར་གཅིག་སྔར་ལྟར། དེ་རྗེས་གཙོ་སྔགས་ལན་རེའི་མཐར། རྫས་སྔགས་བརྒྱད་རེ། མཚམས་སུ་འཁོར་སྔགས་སྤེལ་ཚིག་བཅས་སྔར་ལྟར་རྫས་སྣོད་ཁ་སྦུབས་སོ། །དེ་རྗེས་བླུགས་གཟར་གཏོར་མ་སློབ་དཔོན་གྱིས་ཐོགས་
པར། ལས་རྡོར་གྱིས་སྨན་རཀ་བྲན། ཨ་ཀ་རོས་བྱིན་རླབས། གཏོར་སྔགས་ལན་གསུམ་གྱིས་ཕུལ། དེ་རྗེས་བསྟོད་པ། གཤེགས་གསོལ། བསྲུང་བ། སླར་ཡང་མར་ཁུ་དང་སྔགས་ཀྱིས་འཇིག་རྟེན་པའི་མེ་ལྷ་གསལ། སྔར་ལྟར་བྱོན་སྐྱེམས་དགང་བླུགས་ཉེར་གཅིག་རྫས་ཆེན་རྣམས་གསུམ་རེ་འབུལ་ལ་རྫས་ཕོར་རྣམས་ཁ་སྦུབས། ལར་འཇིག་རྟེན་པ་དང་མེ་ལྷ་རྫས་གཞི་གཅིག་ཡིན་ན་མར་ཁུ་ཡམ་ཤིང་མ་གཏོགས་པ་ནས་འཇིག་རྟེན་པའི་ཕུད་བླངས་པ་ཕྱིར་བསྣན་ནས། དཀྱིལ་འཁོར་པར་འབུལ་བ་བོད་ལུགས་ཕྱག་བཞེས་ཡོད་པའང་ཤེས་པར་བྱ། ཆུ་གཉིས་སྔོན་འགྲོ་ཉེར་སྤྱོད་རོལ་མོ་བཅས་པས་མཆོད་ཅིང་བསྟོད། དབྱངས་གསལ་དང་། ཡིག་བརྒྱ། བཤགས་པ། གཤེགས་གསོལ་དང་སྨོན་ལམ། རྟེན་འབྲེལ་སྙིང་པོ་སྔོན་འགྲོའི་བཀྲ་ཤིས་བརྗོད། གསུམ་པ་རྗེས་ནི། མེ་རང་ཞིའམ་ཆུ་དཀར་གྱིས་གཞིལ། ཐལ་བ་དང་སོལ་བ་ཆུར་སྐྱེལ། གཉིས་པ་ཏིང་ངེ་འཛིན་གྱི་སྦྱིན་སྲེག་ནི། སྦྱིན་སྲེག་གི་རྫས་དང་ཡོ་བྱད་མ་འབྱོར་བའམ། འབྱོར་ཡང་སྒྲུབ་ལང་མེད་ན། ཏིང་ངེ་འཛིན་ལ་བརྟེན་པ་ཅི་རིགས་ཐོབ་པས་ནི། ཕྱིའི་རྗས་ལ་མ་བརྟེན་པར་ཏིང་ངེ་འཛིན་ཁོ་ནས་བསྒྲུབས་ཀྱང་འདོད་དོན་སྟེར་ལ་སྔ་མ་དང་མཚུངས་པར་འགྱུར་རོ། །གཉིས་པ་ནང་གི་སྦྱིན་སྲེག་ནི། རང་ལུས་ལྷར་གསལ་བའི་སྐུའི་ནང་དུ་དཔའ་བོ་དང་མཁའ་འགྲོ་ཏིལ་གྱི་གང་བུ་ལྟར་བཞུགས་པ་ལ་ཁ་ཟས་བདུད་རྩིར་སྦར་བ་ལྟེ་བའི་ཐབ་ཁུང་དུ་ལག་པའི་དགང་བླུགས་ཀྱིས་ཕུལ་བ་ཉིད་གཏུམ་མོའི་མེས་ཞུ་
བའི་དྭངས་མས་ལྷ་རྣམས་ཚིམ་ཞིང་སྙིགས་མ་ཐལ་བར་སྦྱངས་པར་བསམ་སྟེ། རླུང་ཁ་སྦྱོར་དུ་འཆིང་བའོ། །གསུམ་པ་གསང་བའི་སྦྱིན་སྲེག་ནི། རང་ལྷར་གསལ་བའི་སྐུ་ལ་རྩ་གསུམ་འཁོར་ལོ་བཞི་གསལ་བཏབ་པའི་འཁོར་ལོ་དང་། རྩ་ཁམས་ཐམས་ཅད་ལ་རྒྱལ་བ་ཏིལ་གྱི་གོང་བུ་ལྟར་བཞུགས་པར་མོས་ཏེ། བདེ་བ་བསྐུལ་བའི་རླུང་གི་ནུས་པས་གཏུམ་མོ་སྦར་བས་སྤྱི་བོའི་ཧཾ་བཞུ་བའི་བདུད་རྩིའི་དངས་མས་ལྷ་ཐམས་ཅད་ཚིམ་པར་བསམ་ཞིང་། ཞུ་བདེས་དྲངས་པའི་བདེ་སྟོང་གི་ངང་མདངས་བསྐྱངས་པའོ། །བཞི་པ་ཡང་གསང་མཆོག་གི་སྦྱིན་སྲེག་ནི། བདག་མེད་རྟོགས་པའི་ཡེ་ཤེས་ཀྱི་མེས། མ་རིག་བག་ཆགས་ཀྱིས་བསྡུས་པའི་རྟོག་ཚོགས་ཐམས་ཅད་བསྲེག་པའི་ཟུང་འཇུག་བདེ་ཆེན་གྱི་བདུད་རྩིས་འཁོར་འདས་རོ་མཉམ་དཀྱིལ་འཁོར་གྱི་འཁོར་ལོ་དག་པ་ཉིད་འཁོར་གསུམ་མི་དམིགས་པའི་དབྱིངས་སུ་མཆོད་པ་སྟེ། རྒྱས་པ་ལས། སྲིད་གསུམ་སྲེག་པ་མེ་ཡིན་ཏེ། །ཡིད་ཀྱི་ཡེ་ཤེས་མེ་རུ་འབར། །ཞེས་སོ། །དེ་ལྟར་སྒྲུབ་གཞུང་དང་ཡན་ལག་གི་ཆོ་ག་བཅས་ལ་གོ་དོན་རྒྱས་པར་བཤད་ན་བློ་གསར་རྣམས་ལ་ཉེ་བར་མཁོ་བར་འགྱུར་མོད་ཀྱི། དེ་ལྟ་ན་ཡང་ཡི་གེ་མང་བས་འཇིགས་ཏེ་དོན་བསྡུས་རྩ་ཐོ་ལྟ་བུར་ཉུང་ངུའི་ཚིག་གིས་བསྡུས་པ་སྟེ། བདེ་སྨོན་ནི་ཞིང་ཆོག་ཕན་ཡོན་གཏམ་བཤད་ཟུར་དུ་བྲིས་ཡོད་ཕྱིར་འདིར་མ་སྤྲོས་སོ། །