རྣམ་ཐར་སྐལ་བཟང་མགུལ་རྒྱན། རང་སློབ་བཤད་སྒྲུབ་ཉི་མས་མཛད།
གཞུང་གི་མཚན་དང་མཆོད་བརྗོད།
མཁས་ཤིང་དངོས་གྲུབ་བརྙེས་པའི་རྡོ་རྗེ་སློབ་དཔོན་འཇམ་དབྱངས་དགྱེས་པའི་བློ་གྲོས་མཚོ་སྐྱེས་བཞད་པའི་སྒྲ་དབྱངས་ཀྱི་རྟོགས་བརྗོད་མདོར་བསྡུས་པ་སྐལ་བཟང་མགུལ་རྒྱན་ཞེས་བྱ་བ་བཞུགས་སོ། །
དགེ་ལེགས་ཡོན་ཏན་བྱེ་བའི་རོལ་མཚོ་སྤངས་རྟོགས་མཐར་ཕྱིན་རྫོགས་སངས་རྒྱས།། སྒྲིབ་གཉིས་མུན་འཇོམས་སྲིད་ཞིའི་འཇིགས་འཕྲོག་བདེན་གཉིས་ངོ་བོ་དམ་པའི་ཆོས། །རིག་གྲོལ་ཡོན་ཏན་དཔལ་གྱི་མེ་ཏོག་རབ་མཛེས་དགེ་འདུན་དཔག་བསམ་དབང་། །རིན་ཆེན་གསུམ་ཞེས་གྲགས་པའི་གདུགས་དཀར་ཀུན་གྱི་ཉེར་འཚོའི་གཞི་དེར་འདུད། །ཐུབ་བསྟན་རིན་ཆེན་གསལ་བའི་སྒྲོན་མེ་མཁས་པའི་ཁྱུ་མཆོག་ཞི་བ་འཚོ། །རྒྱལ་ཀུན་འདུས་ཞལ་གྲུབ་བརྒྱའི་གཙུག་རྒྱན་ཚེ་དབང་རིག་འཛིན་པདྨ་འབྱུང་། །ཐུགས་བསྐྱེད་སྨོན་པས་རྒྱལ་བསྟན་འདྲེན་མཛད་མེས་དབོན་གསུམ་དང་ལོ་པཎ་ཚོགས། །གངས་ཅན་འགྲོ་ལ་བཀའ་དྲིན་ཟླ་མེད་གྱུར་པའི་གནས་དེར་གུས་ཕྱག་འཚལ། །ཤེས་བྱ་ཀུན་མཁྱེན་མཁྱེན་པའི་རང་གཟུགས་མཚམས་སྤྲིན་མདངས། །བདུད་བཞི་ལས་རྒྱལ་རྒྱལ་བའི་སྲས་པོ་འཇམ་པའི་དབྱངས། །སྨྲ་བའི་རོལ་མཚོ་མཚོ་བྱུང་ལྷ་མོ་ངག་གི་གཏེར། །བདག་གིས་ཁྱོད་བསྟེན་བསྟེན་པའི་འབྲས་བུ་དུས་འདིར་སྩོལ། །
འཇམ་དཔལ་དབྱངས་དངོས་མཁྱེན་བརྩེའི་རང་བཞིན་བསྟན་འགྲོའི་གཉེན། །ཡོན་ཏན་རྒྱ་མཚོ་བློ་གྲོས་མཐའ་ཡས་སྨྲ་བའི་དབང་། །བློ་བཟང་རྒྱ་མཚོ་བློ་གྲོས་མཐའ་ཡས་སྨྲ་བའི་དབང་། །རྣམ་གསུམ་གྱིས་མཚོན་སློབ་ཚོགས་རྒྱུ་སྐར་ཕྲེང་བར་བསྔགས། །རྣམ་དག་བསྟན་པའི་གཉེན་ཁ་མཆོག་ཏུ་འཛིན། །རྣམ་བཞའི་ཕྲིན་ལས་བུམ་བཟུང་རྗེས་འགྲོ་བ། །རྣམ་མང་བསྟན་སྲུང་རྒྱ་མཚོའི་ཚོགས་རྣམས་ཀྱིས། །རྣམ་དཀར་ལས་འདི་སྒྲུབ་པའི་སྡོངས་གྲོགས་མཛོད། །མཁས་བཙུན་བཟང་པོའི་རྟོགས་བརྗོད་བུམ་བརྒྱ་སྐྱེས། །ཟོག་པོའི་ངང་ཚུལ་སྨྲ་བའི་ཞ་ཉེ་གཉིས། །དཔྱད་ན་རིན་ཐང་ཉེ་བའི་ཆར་ཕོད་མིན། །སྙིགས་མ་ལས་ཀྱང་ཆེར་སྙིགས་གནས་སྐབས་འདིར། །པདྨའི་རིང་ལུགས་ཉི་ལྟར་གསལ་བའི་ཚུལ། །རྣམ་ཐར་མིཀྟི་ཀ་ཡི་སེ་མོ་དོ། །
སྐལ་བཟང་མགུལ་བའི་རྒྱན་དུ་སྤེལ་ཅིག་དང་། །ཐུབ་བསྟན་མཛེས་པའི་དཔལ་དུ་འགྱུར་རོ་ཞེས། །བཀའ་བབ་བདུན་ལྡན་རྡོ་རྗེ་གཟི་བརྗིད་ཀྱི། །བཀའ་ལུང་བདུད་རྩི་སྙིང་དབུས་སིམ་པའི་མོད། །བརྩམ་པའི་དམ་བཅའ་རྡོ་བར་རི་མོ་བྲིས། །དེས་ན་དཔལ་ལྡན་བླ་མ་ཡི། །རྟོགས་བརྗོད་སྒྲོ་སྐུར་བྲལ་བའི་གཏམ། །གཟུར་གནས་སྐྱེ་བོ་དགྱེས་བསྐྱེད་པའི། །མཆོད་སྤྲིན་ནམ་མཁའི་མཛོད་དུ་སྤེལ། །ཞེས་ཡུལ་དམ་པ་ལ་མཆོད་པར་བརྗོད་པ་དང་བརྩམ་པར་དམ་བཅའ་བ་ནི་ལེགས་བཤད་འབྱུང་བའི་སྒོ་ཡིན་ཏེ། ཡུལ་དམ་པ་ལ་བརྟེན་པ་ནི་གནས་སྐབས་དང་མཐར་ཐུག་གི་འདོད་པའི་དོན་ཡིད་བཞིན་དུ་འགྲུབ་པ་དང་། དམ་བཅས་པས་ཀྱང་བྱ་བ་མཐར་ཕྱིན་པའི་དགོས་པ་ཡོད་དེ། རྒྱུད་བླ་མ་ལས། བློ་ལྡན་རྒྱལ་བས་ཡུལ་འདི་ལ་མོས་པ། །སངས་རྒྱས་ཡོན་ཏན་ཚོགས་ཀྱི་སྣོད་གྱུར་ཏེ། །བསམ་མེད་ཡོན་ཏན་ཚོགས་ལ་མངོན་དགའ་བས། །སེམས་ཅན་ཀུན་གྱི་བསོད་ནམས་ཟིལ་གྱིས་གནོན། །ཞེས་ཚད་མེད་པའི་བསོད་ནམས་མངའ་བར་གསུངས་པ་དེ་ཡང་། བསོད་ནམས་ལྡན་པའི་མི་ཡིས་བྱ་བ་ཐམས་ཅད་འགྲུབ། །ཅེས་པ་ལྟར་དང་།
ཙནྡྲ་གོ་མིས། བདེན་དང་གཞུང་ལ་དགའ་བའི་གཟི་བརྗིད་ལྡན་པ་རྣམས། །སྲོག་ནི་བདེ་བླག་གཏོང་བར་བྱེད་ཀྱིས་དམ་བཅས་མིན། །ཞེས་དང་། སློབ་དཔོན་དཎྜིས། ཤིས་བརྗོད་ཕྱག་བྱ་དངོས་པོ་ནི། །ངེས་པར་བསྟན་པའང་དེ་ཡི་སྒོ། །ཞེས་གསུངས་པ་ལྟར་གྱིས་སྔོན་དུ་ལམ་ཡངས་པར་བྱས་ནས།
སྔོན་བྱུང་སྐྱེས་རབས་ཀྱི་ཕྲེང་བ།
འདིར་ངེས་པ་དོན་གྱི་རྡོ་རྗེ་འཛིན་པ་ཆེན་པོ་དཔལ་ཞེ་ཆེན་མ་ཧཱ་པཎྜི་ཏ་༧འགྱུར་མེད་མཐུ་སྟོབས་རྣམ་རྒྱལ་ལམ། གཞན་ཡང་མཚན་གྱི་རྣམ་གྲངས་འགྱུར་མེད་བསྟན་འཛིན་འཕེལ་རྒྱས་དང་། འཇ༵མ་དབྱང༵ས་དགྱེ༵ས་པ༵འི་བློ༵་གྲོ༵ས་མཚོ༵་སྐྱེ༵ས་བཞ༵ད་པ༵འི་སྒྲ༵་དབྱང༵ས་ཞེས་པ་སོགས་མཚན་གྱིས་བསྔགས་པ་དུ་མ་དོན་དང་ངེས་པར་ལྡན་པ་དེ་ཉིད་ཀྱི་རྟོགས་པ་བརྗོད་པ་ལ་གསུམ། སྔོན་བྱུང་སྐྱེས་རབས་ཀྱི་ཕྲེང་བ་ཟུར་ཙམ་སྨོས་པ་དང་། སྐུ་ཚེ་འདི་ཉིད་ཀྱི་རྣམ་ཐར་ཅུང་ཟད་སྤྲོས་པ། དེའི་དགོས་པ་ཕན་ཡོན་དང་བཅས་པའོ། །དང་པོ་ནི། དམ་པའི་ཚུལ་དགུས་རྣམ་པར་བརྒྱན་པའི་དགེ་བའི་བཤེས་གཉེན་འདི། ཐུགས་རྗེ་ཡས་སྤྲུལ་ཞིག་ཡིན་ནམ། ལམ་མས་སྦྱོང་པ་ཞིག་ཡིན་སྙམ་ན། དང་པོར་ངེས་ཏེ། གྲུབ་དབང་རྫོགས་ཆེན་པ་སོགས་ཚད་མར་གྱུར་པའི་སྐྱེས་བུ་དུ་མས། གཡུ་སྒྲ་དང་། ཞང་ཁྲོམ། དྷརྨ་ཤྲཱི་སོགས་ཀྱི་སྐྱེ་སྤྲུལ་དུ་ངོས་འཛིན་མཛད་པ་ནི། རྫོགས་ཆེན་པ་མི་འགྱུར་ནམ་མཁའི་རྡོ་རྗེས་ཁྱོད་རང་དུམ་རྒྱ་ཞང་ཁྲོམ་གྱི་སྐྱེ་བ་ཡིན། དེ་དུས་མཐུ་གཏད་ཕུང་སེལ་བྱས་པའི་རྣམ་སྨིན་ད་ལྟ་མ་ཉེས་ཁ་ཡོག་ཆེ་བ་ཡིན་གསུངས། རྒྱལ་ཚབ་རྡོ་རྗེ་འཆང་ནས་སྒྲུབ་བླ་སངས་རྒྱས་རབ་
བརྟན་གྱི་སྐྱེ་སྲིད་དུ་བསྙད་ཀྱང་དོན་དུ་སྨིན་གླིང་བསྟན་པ་ལ་ཕན་པའི་ཕྱིར་མཁན་ཆེན་ཨོ་ཌི་ཡ་ནས་བྱིན་རླབས་ཆགས་པ་ཞིག་ཡིན་པར་བཞེད། ཀཿ ཐོག་པཎྜི་ཏས་འཇམ་དཔལ་དབྱངས་ཀྱིས་བྱིན་གྱིས་བརླབས་པ་ཡིན་གསུངས། གྲུབ་དབང་གཞི་ཆེན་བླ་མ་བསོད་ནམས་དཔལ་ལྡན་གྱིས་ནག་ཚོ་ལོ་ཙཱའི་རྣམ་སྤྲུལ་ཡིན་པས་ལྷ་གཅིག་ཇོ་བོའི་ཞབས་ཕྱི་ཞུས་པའི་བག་ཆགས་ཡད་ཡུད་ཡོད་གསུངས། རང་ཉམས་ལ་རྩེ་ལེ་སྣ་ཚོགས་རང་གྲོལ་དང་། གསལ་ལྡོམ་སྒོམ་ཤེས་ཀྱི་བག་ཆགས་ཤིག་ཉམས་རྨིས་ལ་འཆར་བ་དང་། རྨོག་སྟོན་འཇིགས་བྲལ་ཆོས་དབྱིངས་རྡོ་རྗེའི་མནལ་ལམ་དུ་ཁོང་དང་ཐུགས་རྒྱུད་གཅིག་པ་ཡིན། ཁོང་དང་དབྱེར་མེད་གཅིག་འདྲེས་ལྟ་བུ་ཡོད་གསུངས་པའི་དོན་ལྟར། སྒྲུབ་བླ་འགྱུར་མེད་ཆོས་འཁོར་ངོར། ཉིད་ཀྱི་གསོལ་འདེབས་ཞལ་གསུང་མ། རིག་འཛིན་མཁའ་སྤྱོད་གླིང་པའི་འདུས་སྡེའི་འཚོགས་འདོན་བྱིན་རླབས་མྱུར་འཇུག་ཏུ་གྲགས་པར། ཨེ་མ་ཧོ། སྐྱེ་མེད་སྤྲོས་བྲལ་ཆོས་སྐུ་སྣང་མཐའ་ཡས། །ལོངས་སྤྱོད་རྫོགས་སྐུ་འཕགས་མཆོག་སྤྱན་རས་གཟིགས། །གང་འདུལ་དེར་སྟོན་སྤྲུལ་སྐུ་པདྨ་འབྱུང་། །སྐུ་གསུམ་དབྱེར་མེད་བླ་མར་གསོལ་བ་འདེབས། །གཟོད་ནས་ཞི་བའི་བདུད་རྩི་མངོན་བརྙེས་ཀྱང་། །གཞན་ཕན་ཐུགས་བསྐྱེད་རྒྱ་ཆེན་བོད་ཡུལ་ལྗོངས། །
རྒྱུད་ལྔའི་སེམས་ཅན་མིར་བསྒྱུར་འཕགས་པའི་སྤྲུལ། །སྤྲེལ་སྒོམ་བྱང་ཆུབ་སེམས་དཔའ་ལ་གསོལ་བ་འདེབས། །གངས་ལྗོངས་མུན་གླིང་སྒྲ་རིག་ཡི་གེ་སོགས། །འཕགས་ཡུལ་དམ་པའི་སྲོལ་བཟང་ཉིན་མོའི་འོད། །བརྡལ་མཛད་སྔོན་མེད་ཤིང་རྟ་ཀུན་གྱི་མཆོག །ཐུ་མི་སཾ་བྷོ་ཊ་ལ་གསོལ་བ་འདེབས། །མཁན་སློབ་ཆོས་གསུམ་གདན་འཛོམས་བསམ་ཡས་སུ། །རྒྱལ་མོ་རོང་ནས་བཻ་རོས་ཆོས་བསྒྱུར་མངགས། །རྫོགས་ཆེན་སེམས་སྨད་ཕྱི་འགྱུར་ལོ་ཙཱ་མཆོག །གཡུ་སྒྲ་སྙིང་པོར་གྲགས་ལ་གསོལ་བ་འདེབས། །འཇམ་དཔལ་ཞལ་གཟིགས་མངོན་སྤྱོད་ཕྲིན་ལས་གྲུབ། །མི་དང་མི་མིན་གདུག་ཅན་ཐལ་བར་བརླག །ཟབ་གཏེར་མཛོད་འཛིན་ཕྱག་རྒྱ་ཟིལ་ནོན་དངོས། །དུམ་རྒྱ་ཞང་ཁྲོམ་ཞབས་ལ་གསོལ་བ་འདེབས། །འཕགས་ཡུལ་པཎ་གྲུབ་གཙུག་རྒྱན་མར་མེ་མཛད། །སྤྱན་དྲངས་བཀའ་གདམས་བསྟན་པའི་འབྱུང་ཁུངས་གྲུབ། །ཕྱི་དར་བསྟན་ལ་བཀའ་དྲིན་ལག་རྗེས་ཅན། །ནག་ཚོ་ལོ་ཙཱའི་ཞབས་ལ་གསོལ་བ་འདེབས། །
མཉམ་མེད་དྭགས་པོའི་ཐུགས་སྲས་མི་གསུམ་གྲལ། །བདེ་མཆོག་གྲུབ་བརྙེས་མི་གཡེལ་གནས་མཆོག་ཏུ། །ཕྱག་རྒྱ་ཟུང་དང་མཛོ་ཁྱི་བཞི་ཡང་གྲོལ། །གསལ་ལྡོམ་སྒོམ་ཤེས་ཞབས་ལ་གསོལ་བ་འདེབས། །རྩེ་ལེ་རྒོད་ཚང་སྒྲུབ་པའི་རྒྱལ་མཚན་བཙུགས། །ཐོས་བསམ་སྒོམ་པ་མཐར་ཕྱིན་དྲོད་ཚད་བརྙེས། །དོན་གཉིས་ལྷུན་གྲུབ་ཆོས་བརྒྱད་ཞེན་པ་ཆོད། །སྣ་ཚོགས་རང་གྲོལ་ཞབས་ལ་གསོལ་བ་འདེབས། །སྔ་འགྱུར་ཏནྟྲའི་བསྡུས་དོན་གསང་བ་སྙིང་། །དར་རྒྱས་འཆད་སྤེལ་སྙིང་སྟོབས་གཟི་འོད་འབར། །སྨད་འདུལ་བརྒྱུད་པའི་པད་ཚལ་རྒྱས་མཛད་པ། །ལོ་ཆེན་དྷརྨ་ཤྲཱི་ལ་གསོལ་བ་འདེབས། །ལྟར་སྣང་འདུ་འཛི་རྒྱང་བསྲིངས་སྦས་ཚུལ་གྱིས། །འཕགས་མཆོག་སྒྲུབ་བརྩོན་ཡང་སྙིང་དུང་ཕྱུར་གྲངས། །དུ་མར་ཟློས་མཛད་བྱ་བྲལ་ཀུ་སཱ་ལི། །སངས་རྒྱས་རབ་བརྟན་ཞབས་ལ་གསོལ་བ་འདེབས། །ཨོ་རྒྱན་སྨིན་གྲོལ་གླིང་གི་ཕྱག་བཞེས་སྲོལ། །སྤེལ་ཕྱིར་མཁན་ཆེན་ཨཽ་ཌི་ཡཱ་ན་ཡིས། །
བྱིན་བརླབས་རྒྱུད་སྨིན་གསུམ་ལྡན་རྡོ་རྗེ་འཛིན། །མཐུ་སྟོབས་རྣམ་རྒྱལ་ཞབས་ལ་གསོལ་བ་འདེབས། །གསོལ་བཏབ་བྱིན་མཐུས་གནས་སྐབས་གདོན་ཚོགས་ཞི། །མཐར་ཐུག་སྣང་བཞིའི་རྩལ་རྫོགས་ལམ་ལྔ་དང་། །ས་བཅུའི་རྩེར་སོན་དོན་གཉིས་ལྷུན་གྱིས་གྲུབ། །རྒྱལ་བ་མཆོག་དང་ཕྲིས་ལས་མཉམ་པར་ཤོག ། ཅེས་པའི་བསྟན་དོན་ལྟར་ན། སྤྲུལ་གཞི་ནི་དུས་གསུམ་སངས་རྒྱས་ཐམས་ཅད་ཀྱི་སྙིང་རྗེའི་རང་གཟུགས་གངས་ཅན་ལྷ་གཅིག་ཕྱག་ན་པདྨ་ཉིད་ཡིན་ལ། དེ་ནི་བསྐལ་བཟང་གི་སངས་རྒྱས་སྟོང་ལ་སོགས་པ་ནས། ཐ་ན་བྱ་དང་རི་དྭགས་སོགས་སུ་སྤྲུལ་ནས་སེམས་ཅན་གྱི་དོན་ཁོ་ན་དུས་རྟག་ཏུ་མཛད་པའི་ཕྲིན་ལས་ཅན་ཡིན་ཏེ། དམ་ཆོས་པདྨ་དཀར་པོ་ལས། འཕགས་པ་བློ་གྲོས་མི་ཟད་པས་ཞུས་པར། རིགས་ཀྱི་བུ་གང་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་སངས་རྒྱས་ཀྱི་གཟུགས་ཀྱིས་ཆོས་སྟོན་པའི་འཇིག་རྟེན་གྱི་ཁམས་དག་ཀྱང་ཡོད་དོ། །གང་དག་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་གི་བྱང་ཆུབ་སེམས་དཔའི་གཟུགས་ཀྱིས་ཆོས་སྟོན་པའི་འཇིག་རྟེན་གྱི་ཁམས་དག་ཀྱང་ཡོད་དོ། །སེམས་ཅན་ཁ་ཅིག་ལ་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་དབང་ཕྱུག་རང་
གི་གཟུགས་ཀྱིས་ཆོས་སྟོན་ཏོ། །སེམས་ཅན་ཁ་ཅིག་ལ་ནི་ཉན་ཐོས་ཀྱི་གཟུགས་ཀྱིས་སོ། །ཁ་ཅིག་ལ་ནི་ཚངས་པའི་གཟུགས་ཀྱིས་སོ། །ཁ་ཅིག་ལ་ནི་བརྒྱ་བྱིན་གྱི་གཟུགས་ཀྱིས་སོ། །ཁ་ཅིག་ལ་ནི་ཤ་ཟའི་གཟུགས་ཀྱིས་སོ། །ཁ་ཅིག་ལ་ནི་དྲི་ཟའི་གཟུགས་ཀྱིས་སོ། །གནོད་སྦྱིན་རྣམས་ལ་ནི་དབང་ཕྱུག་ཆེན་པོའི་གཟུགས་ཀྱིས་སོ། །རྒྱལ་པོས་འདུལ་བ་ལ་འཁོར་ལོས་སྒྱུར་བའི་གཟུགས་ཀྱིས་ཆོས་སྟོན་ཏོ། །ཞེས་སོགས་མང་དུ་གསུངས་པ་དང་། ཟ་མ་ཏོག་བཀོད་པ་ལས་ཀྱང་རྒྱ་ཆེར་བཤད་པ་ལྟར་ཏེ། མདོར་ན་སངས་རྒྱས་རྣམས་ཀྱི་ལྷུན་གྱིས་གྲུབ་པའི་ཕྲིན་ལས་གདུལ་བྱའི་ཡུལ་ལ་ཅིར་ཡང་འཆར་བ་ཡིན་ཏེ། རྣམ་འགྲེལ་ལས། རྟོག་པའི་དྲྭ་བ་རྣམ་བསལ་ཞིང་། །ཟབ་དང་རྒྱ་ཆེའི་སྐུ་མངའ་བ། །ཀུན་ཏུ་བཟང་པོའི་འོད་ཟེར་དག །ཀུན་ནས་འཕྲོ་ལ་ཕྱག་འཚལ་ལོ། །ཞེས་དང་། མི་གཡོ་བའི་རྒྱུད་ལས། གང་དང་གང་གིས་འདུལ་བ་ནི། །སེམས་ཅན་འདུལ་བ་དེ་སྙེད་འཇུག ། ཅེས་གསུངས་པ་ལྟར། རྫོགས་པའི་སངས་རྒྱས་ཀྱིས་འཕགས་པའི་ཡུལ་དུ་ཆོས་ཀྱི་འཁོར་ལོ་བསྐོར་བའི་ཚེ་བོད་ཡུལ་འདི་མཚོ་ཆེན་པོ་གཅིག་ཏུ་གྱུར་པ་ལས། རི་དང་གྲོང་ཁྱེར་སོགས་མེད་དེ། འཇམ་དཔལ་རྩ་རྒྱུད་ལས། ང་ཡི་དུས་ནས་ལོ་བརྒྱ་ན། །ཁ་བ་ཅན་གྱི་མཚོ་བྲི་ནས། །སཱ་ལའི་ནགས་ནི་འབྱུང་བར་འགྱུར། །ཞེས་མཚོ་བྲི་ནས་རི་དང་ལྗོན་ཤིང་སོགས་འབྱུང་བའི་དུས་དེར། གདུལ་བྱའི་གཙོ་བོ་ལམ་མཚན་ཉིད་པའི་སྣོད་དུ་གྱུར་པ་མིའི་འགྲོ་བ་དག་གསར་དུ་ཆགས་པའང་རྒྱུ་རྐྱེན་ལ་མ་ལྟོས་པར་མི་འབྱུང་བས། དེའི་ཕྱིར་འཕགས་མཆོག་ཐུགས་
རྗེ་ཆེན་པོའི་རྣམ་འཕྲུལ་སྤྲེལ་སྒོམ་བྱང་ཆུབ་སེམས་དཔའ་ཉིད། རི་བོ་པོ་ཏཱ་ལ་ནས་མངོན་སུམ་དུ་བྱོན་པ་ཡིན་ཏེ། རྡོ་རྗེ་གུར་ལས། སངས་རྒྱས་སེམས་ཅན་བསྐྱབ་དགོངས་ནས། །སངས་རྒྱས་གར་མཁན་གར་མཛད་དེ། །རི་བོ་གངས་དང་སེངྒེ་དང་། །རྟ་དང་རིགས་ཅན་རྣམས་སུ་ཡང་། །སྙིང་རྗེའི་ཤུགས་ཀྱིས་སྟོན་པར་མཛད། །ཅེས་གསུངས་པ་ལྟར་དང་། དེ་དང་ལྷན་དུ་ཇོ་མོ་སྒྲོལ་མའི་སྤྲུལ་པ་བྲག་སྲིན་མོ་གཉིས་ཁྱོ་ཤུག་ཏུ་འདུས་པ་ལས་གངས་ཅན་དུ་མིའི་འགྲོ་བ་འཕེལ་བ་དང་། དེར་སངས་རྒྱས་ཀྱི་བསྟན་པ་ཡང་དར་བ་ཡིན་ཏེ། ལྷ་མོ་དྲི་མ་མེད་པས་ཞུས་པའི་མདོ་ལས། ང་ཡོངས་སུ་མྱ་ངན་ལས་འདས་ནས་ལོ་ཉིས་སྟོང་ལྔ་བརྒྱ་ན་གདོང་དམར་ཅན་གྱི་ཡུལ་དུ་ཆོས་དར་བར་འགྱུར་རོ། །ཞེས་གསུངས་པ་ལྟར། འགྲོ་བ་རིགས་ལྔའི་སེམས་ཅན་འགའ་ཞིག་མིའི་རིགས་སུ་སྐྱེ་བར་མཛད་པའི་སྤྲེའུ་བྱང་ཆུབ་སེམས་དཔའ་དེ་ནས་བཟུང་། སྤྱན་རས་གཟིགས་ཀྱི་སྤྲུལ་པའི་རྣམ་རོལ་དུ་མས་གར་བསྒྱུར་བ་ནི། བྱང་ཆུབ་སེམས་དཔའ་འཕགས་ཆེན་གྱི་རྣམ་པ་བཟུང་བ་དང་། གཞན་ཡང་དག་དང་མ་དག་པའི་ཚུལ་དུ་མ་འགྲོ་བ་རང་རང་གི་གཟུགས་དང་མཐུན་པར་འདུལ་བའི་ཐབས་གང་ལ་གང་བསྔགས་པའི་སྐྱེ་བའི་ཕྲེང་བ་སྣ་ཚོགས་སུ་སྣང་བ་ནི། རྒྱལ་བའི་སྲས་པོ་རྣམས་ཀྱི་ཐུན་མོང་མ་ཡིན་པའི་ངོ་མཚར་བའི་ཐུགས་བསྐྱེད་ཡིན་ཏེ། རྒྱུད་ལས། སྲིད་པར་ཡུན་རིང་དུས་སུ་བརྩོན་པ་ནི། །བྱང་ཆུབ་སེམས་དཔའི་ཡི་དམ་ལགས་པས་ན། །ཞེས་དང་། མདོ་སྡེ་རྒྱན་ལས།
སྐྱེ་བ་སྐྱེད་མོས་ཚལ་འགྲོ་ལྟར་རྟོགས་ནས། །སྤྲོ་བའི་སེམས་དྲངས་དགའ་བས་དེ་ལ་འཇུག །ཅེས་གསུངས་པ་ལྟར། སྲིད་པའི་ཟོལ་གྱིས་སྲིད་པའི་མུན་པ་རྣམ་པར་འཇོམས་པའི་ཡོན་ཏན་རྒྱ་མཚོའི་གངས་ཆེན་མཚོར་གྱུར་པའི་སྐྱེས་མཆོག་དུ་མ་བྱོན་པ་ལས། དང་པོ་ཐོན་མི་སམ་བྷོ་ཊ་ནི། དུས་འཁོར་འགྲེལ་ཆེན་ལས། བོད་ཀྱི་ཡུལ་དུ་ཐེག་པ་གསུམ་བོད་ཀྱི་སྐད་ཀྱིས་བྲིས་ཏེ། ཞེས་སོགས་སངས་རྒྱས་ཀྱི་གསུང་ཐམས་ཅད་ཡུལ་དེར་དེའི་སྐད་ཀྱིས་བསྡུ་བ་པོར་ལུང་བསྟན་པ་སྟེ། མང་དུ་ཐོས་པའི་མཆོག་འཕགས་པ་ཀུན་དགའ་བོ་ཉིད་བསམ་བཞིན་མིའི་སྲིད་པ་བཞེས་པ། ཕྱག་ན་པདྨ་རྒྱལ་པོའི་ཚུལ་བཟུང་བ་ཆོས་རྒྱལ་སྲོང་བཙན་སྒམ་པོའི་མེད་ཐབས་མེད་པའི་བློན་ཆེན། ཐོན་མའི་རིགས་ལས་བྱུང་བའི་ཨ་ནུ་སྣང་གྲགས་ཀྱི་སྲས་སུ་བལྟམས། ནར་སོན་ནས་རྒྱལ་པོའི་བཀས་བསྐུལ་པ་ལྟར་འཕགས་པའི་ཡུལ་དུ་བྱོན་ཏེ། ལྷ་རིག་པའི་སེངྒེ་སོགས་དམ་པའི་སློབ་དཔོན་མང་དུ་བསྟེན་ཏེ་ཐུན་མོང་དང་ཐུན་མོང་མ་ཡིན་པའི་རིག་གནས་རྒྱ་མཚོ་ལ་ནང་བྱན་ཆུབ་པར་མཛད། སྤང་སྐོང་ཕྱག་བརྒྱ་པ་སོགས་དམ་པའི་ཆོས་དུ་མ་བསྒྱུར་བཤད་ཀྱིས་གཏན་ལ་ཕབ་པའི་ཤིང་རྟའི་སྲོལ་བཏོད། བོད་ཡི་གེ་མེད་པ་ལ་ཡི་གེའི་གཟུགས་དང་བརྡ་ཆད་རྣམས་བོད་རང་སྐད་དང་འཚམས་པར་མཛད་དེ། བོད་རི་བྲག་པ་མཐའ་འཁོབ་ཀྱི་སྐད་ཡིན་ཡང་ཆོས་འབྲི་ཀློག་བསྒྱུར་བཤད་ལ་ལེགས་པར་སྦྱར་བའི་སྐད་ཀྱི་དོད་ཐུབ་པ་
ལས་ལྷག་པར་བྱུང་བས། དམ་པའི་ཆོས་མཐའ་དག་བསྒྱུར་བ་དང་ཉན་བཤད་སོགས་ཅི་དགར་ལོངས་སྤྱོད་ཆོག་པ་དང་། མ་ཟད་རབ་དམ་པའི་ཆོས་བཤད་ཅིང་སྒྲུབ་པ་ནས། ཐ་ན་འཇིག་རྟེན་པའི་བཟའ་བཏུང་ཉི་ཚེའི་དོན་བཅས་ཡི་གེའི་ལམ་དུ་གསལ་བར་བྱས་ཤིང་དོན་མཚོན་པས་སྐྱེས་བུའི་འདོད་དོན་བདེ་བླག་ཏུ་འགྲུབ་པ་ནི་སློབ་དཔོན་མཁས་པ་ཆེན་པོ་འདི་ཉིད་ཀྱི་བཀའ་དྲིན་ཡིན་ཏེ། གངས་ལྗོངས་མུན་པ་སེལ་བའི་ཉི་མ་གཅིག་པུ་འགྲན་ཟླ་དང་བྲལ་བ་ལགས། དེ་ནས་རྗེ་འབངས་ཉེར་ལྔའི་ནང་ཚན་བཻ་རོས་རྗེས་བཟུང་གཡུ་སྒྲ་སྙིང་པོ་ནི། འཁྲུངས་ཡུལ་རྒྱལ་མོ་རོང་ཡིན། ཡུལ་དེར་བཻ་རོ་ཙ་ན་སྤྱུགས་པ་དང་མཇལ་བས་ཟབ་རྒྱས་ཀྱི་གདམས་པ་དུ་མ་གསན་བསམ་སྒོམ་པ་མཛད་ནས་རྟོགས་པའི་གདེང་ཚད་དང་ལྡན་པར་གྱུར་ཏེ། བསམ་ཡས་སུ་ཁྲི་སྲོང་རྒྱལ་བློན་གྱིས་པཎ་ཆེན་བི་མ་ལ་སྤྱན་དྲངས་ནས་ཆོས་གསུངས་པའི་རྩར་བྱོན་ཏེ་ཟབ་མོ་ཆོས་ཀྱི་བགྲོ་གླེང་མཛད་པས། པཎ་ཆེན་གྱི་གཙོས་ཐམས་ཅད་ཡ་མཚན་དུ་གྱུར། སླར་རང་ཡུལ་དུ་བྱོན་ཏེ་བཻ་རོ་བོད་དུ་སྤྱན་དྲངས། རྒྱ་བོད་ཀྱི་ལོ་པཎ་གདན་འཛོམས་པའི་སར་བཻ་རོ་དང་གཡུ་སྒྲའི་མཁས་ཚུལ་ཁྱད་ཐོན་པར་མཛད། རྫོགས་ཆེན་སེམས་སྨད་ལྔ་སོགས་ཆོས་མང་དུ་བསྒྱུར་པས་བསྟན་པ་སྔ་འགྱུར་ལ་མཁས་ཤིང་གྲུབ་པའི་གྲགས་སྙན་མཆོག་ཏུ་གསལ་བའོ། །
དེ་ནས་དྲག་སྔགས་མཐུ་ཡི་བཀའ་བབ་རྒྱ་ཞང་ཁྲོམ་ནི། གཙང་གི་རོང་ཆེན་སྟོད་ལུང་དུམ་པ་ཆུ་ཚན་ཁར་རྒྱ་ཞེས་པའི་རུས་ལས། བལྟམས་པའི་དུས་ནས་དུང་སོ་འཁོར་མར་ཡོད་པ་དང་། སྐྲ་སིལ་མས་སྐུ་རྒྱབ་ཁེབས་པ་སོགས་ཡ་མཚན་པའི་རྟགས་དང་ལྡན་པ། སྐུ་གཞོན་ཚེ་ལོངས་སྤྱོད་དབུལ་བས་གླ་རྔན་གྱི་འཚོ་བ་ལ་བརྟེན། དུས་ལ་བབ་ཚེ་གནུབས་ཆེན་གྱི་སྤྲུལ་པ་ངེས་མེད་ཀྱི་རྣལ་འབྱོར་པ་ཞིག་གིས་གཏེར་གྱི་ཁ་བྱང་ཕུལ་བ་ལ་བརྟེན་ནས། ཕུང་པོ་རི་བོ་ཆེ་ནས་མཐུ་མཁན་སངས་རྒྱས་ཡེ་ཤེས་ཀྱིས་རྒྱ་གར་མཁས་པ་ཁྲག་འཐུང་ནག་པོ་དང་། དཔལ་གྱི་སེངྒེ། ཤཱནྟིང་གརྦྷ། བཱ་སུ་དྷཱ་ར་བཞིའི་ཐུགས་མཛོད་བརྟོལ་བའི་ཟབ་མོ་ཆོས་དྲུག་སོགས་དང་། གཞན་ཡང་གཡུང་གི་རྫ་ལྷུད་མོ། རྨུའི་མོན་མོ་གཙུག་རུམ། བསམ་ཡས་མཆིམས་ཕུ་རྣམས་ནས་གཤེད་སྐོར་གྱིས་མཚོན། ཚར་གཅོད་རྗེས་འཛིན་གྱི་ཟབ་གཏེར་དུ་མ་བཞེས་ཏེ། ཡེ་ཤེས་རྫུ་འཕྲུལ་དང་། རོག་ཇོ་སྲས་སོགས་ལུང་ཟིན་གྱི་སྐལ་ལྡན་རྣམས་ལ་རིམ་པར་སྤེལ་བས་ནག་པོའི་ཕྱོགས་ཀྱི་མི་དང་མི་མིན་ཐལ་བར་བརླག་པའི་ཕྲིན་ལས་རྒྱལ་བསྟན་རིན་པོ་ཆེ་མི་ཉམས་པའི་ལྕགས་རི་རྨད་དུ་བྱུང་བའོ། །དེ་ནས་ནག་ཚོ་ལོ་ཙཱ་བ་ཚུལ་ཁྲིམས་རྒྱལ་བ་ནི། འཁྲུངས་ཡུལ་ལ་སྟོད་གུང་ཐང་། སྐུ་ཆུང་ངུའི་དུས་ནས་བྱང་ཆུབ་སེམས་ཀྱིས་ཐུགས་རྒྱུད་གང་བས་ཆོས་ཕྱིར་སྐུ་སྲོག་གཏོང་ནུས་པ་ལྟ་བུའི་བློ་ཅན། བདག་
དོན་ལས་གཞན་དོན་གལ་ཆེན་མཛད་པ་ཞིག་ཡིན་ལ། བོད་དུ་བསྟན་པ་སྔ་དར་གྱི་མཇུག་ཕྱི་དར་གྱི་ཐོག་མར། ལྷ་བླ་མ་ཡེ་ཤེས་འོད་ཀྱིས་རྒྱ་གར་ནས་ཡབ་མེས་སྔོན་བྱོན་རྣམས་ཀྱི་མཛད་བཟང་འཕྲོ་མཐུད་ཀྱིས་འཕགས་ཡུལ་ནས་པཎྜི་ཏ་གདན་དྲངས་ནས། དམ་པའི་ཆོས་བསྒྱུར་བཤད་མཛད་པའི་ཐུགས་འདུན་ལ་ནག་པོའི་ཕྱོགས་གྱུར་གར་ལོག་རྒྱལ་པོས་བཙོན་དུ་བཅུག་པས་དགོངས་བཞེད་མ་འགྲུབ་པར། དེ་ཉིད་ཀྱི་ཚ་བོ་བྱང་ཆུབ་འོད་ཀྱིས་ཁུ་བོའི་བཞེད་དོན་ལྟར། རྒྱ་གར་ནས་ལྷ་གཅིག་དཱི་པཾ་ཀཱ་ར་སྤྱན་དྲང་དགོས་སྙམ་སྟེ། སྤྱན་འདྲེན་པར་གཏང་རྒྱུའི་ལོ་ཙཱ་བ་འཚོལ་ཚེ་ནག་ཚོ་ཉིད་སྔོན་དུ་ཡང་འཕགས་ཡུལ་དུ་ཕྱིན་ཏེ་ལེགས་ལམ་བྱུང་བ་ལྟར། ལྷ་བཙུན་བྱང་ཆུབ་འོད་ཀྱིས་འབྱོན་དགོས་ཀྱི་བཀའ་ཕེབས་པ་དང་དུ་བླངས་ཏེ་གསེར་གྱི་སྐྱེས་གཏོས་ཆེ་བ་བསྣམས་ནས་སྙིང་སྟོབས་ཆེན་པོའི་གོ་ཆ་བགོས་ཏེ་ཕེབས་ནས་བི་ཀྲཱ་མ་ཤཱི་ལ་ན་ཇོ་བོ་བཞུགས་པའི་སྤྱན་སྔར་བོད་ཆོས་རྒྱལ་ཁུ་དབོན་གྱི་ཐུགས་བསྐྱེད་ཀྱིས་ཉིད་དང་བསྟན་པའི་ཕྱིར་སྐུ་སྲོག་དང་གསེར་སོགས་ཕངས་མེད་བྱས་ལུགས་དང་། བོད་ལ་ཆོས་ཀྱི་ག་དར་མཛད་དགོས་པ་ཡུས་ཆེན་མཆི་མས་གདོང་ཁེབས་ཏེ་ཞུས་པས་བོད་དུ་འབྱོན་པར་ཞལ་གྱིས་བཞེས་ཏེ་ཕེབས་ནས་ལྷ་བཙུན་གྱི་བཞེད་དོན་འགྲུབ། བསྟན་པ་སྔ་དར་ལ་རྗེ་འབངས་ཉེར་ལྔ་སོགས་ཀྱི་དུས་པདྨ་འབྱུང་གནས་དངོས་བྱོན་ནས་བོད་ཡུལ་དམ་པའི་ཆོས་ཀྱི་སྣང་བས་ཁྱབ་པར་མཛད་ལ། དེ་རྗེས་པད་འབྱུང་དངོས་སྤྲུལ་དཱི་པཾ་ཀ་ར་བྱོན་ནས་ཕྱི་དར་གྱི་དབུ་བརྩམས། བསྟན་པ་ཐམས་ཅད་འགལ་
མེད་དུ་རྟོགས་ཤིང་། གསུང་རབ་མ་ལུས་པ་གདམས་པར་ཤར་བའི་ལུགས་བཟང་ཕྱི་གཙང་ནང་གཙང་པདྨའི་སྦུབས་ལྟ་བུའི་བཀའ་སྲོལ་དྲི་མ་མེད་པ་འདྲེན་པའི་ཕྱག་རྗེས་རྨད་དུ་བྱུང་ཞིང་། གཞན་ཡང་ཁ་ཆེ་ཡེ་ཤེས་འབྱུང་གནས་དང་། བལ་པོ་ཞི་བའི་སྙིང་པོ་སོགས་ལའང་གཏུགས་ཏེ། རྒྱུད་བླ་མ་དང་། དབུ་མ་འཇུག་པ། རྟོག་གེ་འབར་བ་སོགས་གཞུང་མང་པོ་བསྒྱུར་བཤད་ཀྱང་མཛད་དེ་གངས་ཅན་བསྟན་འགྲོའི་རྨོངས་མུན་སེལ་བའི་ཉི་མར་གྱུར་པའོ། །དེ་ནས་མཉམ་མེད་དྭགས་པོའི་ཐུགས་སྲས་མི་གསུམ་གྱི་ཡ་གྱལ་གསལ་ལྡོམ་སྒོམ་པ་ཤེས་རབ་ནི། འཁྲུངས་ཡུལ་མདོ་ཁམས་ལྷོ་ཕྱོགས་རྟ་ཤོད་གསལ་ལྡོམ་ཡིན། སྐུ་ཆུང་ངུའི་དུས་ནས་བྱམས་དང་སྙིང་རྗེ་བྱང་ཆུབ་སེམས་ཀྱིས་ཐུགས་རྒྱུད་མཛེས་ཤིང་། ཁྱད་པར་དྭགས་པོ་རིན་པོ་ཆེའི་མཚན་ཐོས་པས་ལུས་ཀྱི་བ་སྤུ་ལྡང་ནུས་པའི་མོས་གུས་ཡོད་པས། ཕྱིས་སྐུ་དྲུང་དུ་བསྙེན་ནས་ཟབ་རྒྱས་ཀྱི་ཆོས་མང་དུ་གསན། ཁྱད་པར་དུ་འཁོར་ལོ་སྡོམ་པའི་སྨིན་གྲོལ་གྱི་ལམ་ལ་རང་བྱན་ཆུབ་པས་རྩ་ཐིག་རླུང་གི་རྣལ་འབྱོར་ལ་བརྟན་པ་ཐོབ་པས་ཕྱག་སོར་རྩེ་ལས་མེ་འབར་བ་དང་ཕ་ཝོང་འདམ་ལྟར་བརྫི་བ། དམོད་པས་གདུག་ཅན་རེངས་པ་སོགས་གྲུབ་པའི་རྟགས་མཚན་མངོན་དུ་བརྙེས། བཙུན་མོ་ཟུང་ལ་རོལ་པས་གནས་མདའི་དགེ་འདུན་སྡེ་ཡིས་གཤེ་སྐུར་བཏབ་ཚེ་དགེ་འདུན་རྣམས་ཀྱི་སྣོད་སྤྱད་རིགས་ཆང་གིས་གང་
བའི་རྫུ་འཕྲུལ་མཛད། ཕྱག་རྒྱ་མ་ཟུང་དང་། ཁལ་བཀལ་བའི་མཛོ། སྒོ་ན་གནས་པའི་ཁྱི་དང་བཅས་པས་རྣམ་པར་གྲོལ་བའི་ཡེ་ཤེས་བརྙེས། མཐར་དགུང་ལོ་དོན་ལྔ་བཞེས་པ་ན་མྱ་ངན་ལས་འདའ་བའི་ཚུལ་བསྟན། སྐུ་གདུང་ལ་ཞུགས་ཕུལ་བ་རིང་བསྲེལ་གྱི་ཕུང་པོར་སོང་བ་མཆོད་རྟེན་སྒྲུབ་པ་མཁའ་འགྲོ་མ་རྣམས་ཀྱིས་ནམ་མཁར་བཏེགས་པ། དད་ལྡན་ཀུན་གྱིས་གསོལ་བ་བཏབ་པའི་ངོར། བྱམས་མེ་དགོན་གྱི་རྒྱབ་རི་བྲག་ཟངས་ཡག་གི་རྩེར་བཞག་སོང་བ་ད་ལྟ་ཡང་མཇལ་རྒྱུ་ཡོད་པར་གྲགས་པས། ས་གསུམ་ན་གྲུབ་པ་མཆོག་གི་གཏམ་རྣམ་པར་མཛེས་པའོ། །དེ་ནས་མཁས་གྲུབ་ཆེན་པོ་རྩེ་ལེ་སྣ་ཚོགས་རང་གྲོལ་ནི། འཁྲུངས་པའི་ཡུལ་དྭགས་ཀོང་གི་ས་མཚམས་རྒྱལ་མེ་ཏོག་ཐང་གི་ཉེ་རྒྱུད་ཡིན། ཆུང་ངུ་ནས་བྱམས་དང་སྙིང་རྗེ་འབྱོངས་པས་སེམས་ཅན་ལ་འཚེ་བ་དང་། ཤ་ཁྲག་གི་ལོངས་སྤྱོད་ལ་དུག་ལྟར་འཛེམ། སྐུ་ནར་སོན་ནས་ངེས་འབྱུང་དང་སྐྱོ་ཤས་ཀྱིས་རྒྱུད་བསྐུལ་ཏེ་རྒྱལ་བའི་བསྟན་པ་ལ་རབ་ཏུ་བྱུང་ནས། ཉེས་ལྟུང་ཕྲ་མོ་ལའང་སྲོག་ལས་གཅེས་པའི་སྲུང་སྡོམ་མཛད། ཕྱི་ནང་གི་རིག་པའི་གནས་དང་། ཁྱད་པར་དུ་མདོ་སྔགས་ཀྱི་གཞུང་ལམ། ཆོ་གའི་ཕྱག་བཞེས་དབྱངས་རོལ་སོགས་ལའང་མཁས་པར་སྦྱངས། གོང་མའི་གདན་ས་གཙང་རྩངས་པོ་མགོ་དགུའི་ཆོས་སྡེར་གསེར་ཁྲིར་མངའ་གསོལ་ནས། འཁོར་ལོ་གསུམ་གྱིས་འཛིན་སྐྱོང་སྤེལ་གསུམ་རྒྱ་གང་ཆེ་མཛད། སྐུ་ཚེའི་སྨད་དུ་བྱ་བ་བཏང་ནས་རྒོད་ཚང་
རི་ཁྲོད་དུ་བྲག་གི་བྱ་སྐྱིབ་ལ་བཞུགས་ནས་བླ་རྫོགས་ཐུགས་གསུམ་གྱིས་མཚོན་བཀའ་གཏེར་དུ་མའི་ལྷག་པའི་ལྷ་རབ་འབྱམས་ལ་བསྙེན་སྒྲུབ་མཛད་པས། ཞལ་གཟིགས་ལུང་བསྟན་སོགས་གྲུབ་པའི་མཚན་མ་མངོན་སུམ་དུ་བརྙེས། མཁས་བཙུན་བཟང་པོའི་ཡོན་ཏན་འཛམ་གླིང་མཛེས་པའི་རྒྱན་དུ་འོས་པར་མཛད། མཐར་དགུང་ལོ་བདུན་ཅུར་སོན་པ་ན་གཟུགས་སྐུའི་བཀོད་པ་དབྱིངས་སུ་བསྡུས་ཏེ། སྐུ་གདུང་ལ་རིང་བསྲེལ་གྱི་ཕུང་པོ་ཁ་དོག་ལྔ་དང་ལྡན་པ་མོས་ལྡན་ཡིད་ཀྱི་གསོས་སྨན་དུ་བཞག་པ་བཅས་སྙིགས་དུས་འདིར་སྔ་འགྱུར་གྱི་བསྟན་པ་རིན་པོ་ཆེ་འཛིན་པ་ལ་ཟླ་དང་བྲལ་བའི་སྐྱེས་མཆོག་དམ་པའོ། །དེ་ནས་འཛམ་གླིང་མཁས་པའི་ཁྱུ་མཆོག་སྨིན་གླིང་ལོ་ཆེན་ཆོས་དཔལ་རྒྱ་མཚོ་ནི། འཁྲུངས་ཡུལ་གཡོ་རུ་གྲྭ་ནང་གི་དར་རྒྱས་ཆོས་གླིང་ཞེས་མཁས་དང་གྲུབ་པའི་འབྱུང་གནས་དེར། མཐིང་མ་མྱོས་ཀྱི་གདུང་རྒྱུད་གནུབས་ཆེན་རྣམ་སྤྲུལ་གསང་བདག་ཕྲིན་ལས་ལྷུན་གྲུབ་དང་། ལྷ་འཛིན་དབྱངས་ཅན་སྒྲོལ་མ་གཉིས་ཀྱི་སྲས། རྗེ་གཏེར་ཆེན་བླ་མའི་གཅུང་དུ་ངོ་མཚར་བའི་ལྟས་སྣ་ཚོགས་དང་བཅས་སྐུ་བལྟམས། དགུང་ལོ་བཅུ་བཞེས་པ་ན་འབྲི་ཀློག་ལ་ཐོགས་པ་མེད་ཅིང་རིམ་གྱིས་སྦྱངས་ནས་བཅུ་ཕྲག་རིག་པའི་གནས་ལ་མཁས་པའི་རྩེར་སོན། རྒྱལ་མཆོག་ལྔ་པ་ཆེན་པོ་ལས་རབ་ཏུ་བྱུང་ཞིང་། མཁན་ཆེན་དཀོན་མཆོག་བསྟན་འཛིན་མདུན་
བསྙེན་པར་རྫོགས་ནས་ངུར་སྨྲིག་གི་རྒྱལ་མཚན་འཛིན་པའི་མཆོག་ཏུ་གྱུར་ཅིང་། ཁྱད་པར་རང་ཅག་རྙིང་མ་པ་རྣམས་བོད་ཐོག་མའི་འདུལ་བསྟན་མཁན་ཆེན་ཞི་འཚོའི་ཕ་ནོར་གར་སོང་ཆ་མེད་དུ་སྟོར་བ་འདིའི་རིང་ལ་ནོར་བདག་པོའི་ལག་ཏུ་འབྱོར། གཞན་ཡང་གསང་སྔགས་རྙིང་མར་གྲགས་པའི་མཚན་གཞི་མདོ་སྒྱུ་སེམས་གསུམ་དང་། མཆོག་གཉིས་གླིང་པ་ཕལ་ཆེར་གྱིས་མཚོན་གཏེར་ཆོས་ད་ལྟ་རྒྱུན་ཡོད་རིགས་དང་། ཆོས་དྲུག །ཞི་བྱེད། གཅོད་སྐོར་སོགས་ལ་གསན་བསམ་མཛད་པའི་ཕྱག་རྗེས་ལ། སྒྱུ་འཕྲུལ་འགྲེལ་ཆེན་རྣམ་གཉིས་དང་། འདུས་མདོའི་དབང་དང་སྒྲུབ་ཐབས་སྐོར་གྱི་ཡིག་ཆ། གར་ཐིག་གི་ངེས་པ་སོགས་མཁས་པའི་ལེགས་བཤད་སྐལ་བཟང་རྩེ་དགའི་འཁྲི་ཤིང་མའི་ཐོས་འཛིན་མཛེས་པའི་རྒྱན་དུ་རྣམ་པར་དཔྱངས་པས། རྒྱལ་དབང་པདྨའི་རིང་ལུགས་འཛིན་པ་ཀུན། དགྱེས་པའི་མེ་ཏོག་ཁོང་ནས་བཞད་པའི་བཀའ་དྲིན་བསྩལ། གོང་མའི་ལུང་གིས་བསྔགས་པ་ཐོབ་པའི་ཆབ་མདོའི་སྤྲུལ་སྐུ་རྣམ་གསུམ། ས་སྐྱ་བདག་ཆེན་སོགས་ཆེ་དགུའི་གཙུག་གིས་བཀུར་ཞིང་། མཁས་པར་གྲགས་པའི་གཏམ་གྱིས་འཛམ་གླིང་མཛེས་པ། བརྒྱུད་འཛིན་གྱི་བུ་སློབ་གྲུབ་མཐའ་རིས་མེད་པའི་བསྟན་པའི་གསལ་བྱེད་དུ་གྱུར་པ་གྲངས་ལས་འདས་པ་བྱུང་། མཐར་དགུང་ལོ་སྨིན་ཆེས་སྐབས་བསྟན་འགྲོའི་བདེ་ལེགས་ཐལ་བར་རློག་བྱེད་དུ་རུ་ཁའི་དམག་དཔུང་བྱུང་སྟེ་བཙོན་དུ་བཅིངས་ཚེ་སྐྱེ་འཆི་ལ་རང་དབང་ཐོབ་པས་ཐུགས་འོག་མིན་དུ་འཕོས་པས་ཐམས་ཅད་ངོ་མཚར་བའི་གནས་ལ་བཀོད་པའོ། །
དེ་ནས་སྐུ་འདི་ཉིད་དང་སྐྱེ་བ་བར་མ་ཆོད་པའི་གོང་མ་རྟོགས་ལྡན་སངས་རྒྱས་རབ་བརྟན་ནི། རྒྱལ་ཚབ་རྡོ་རྗེ་འཆང་བསྟན་འཛིན་ཆོས་རྒྱལ་གྱི་སྐུ་སྔོན་མ་ཨ་འཇའ་བླ་མ་པད་རྒྱལ་གྱི་གཅུང་དུ་འཁྲུངས། ཆུང་ངུ་ནས་དམ་པ་ཆོས་ཀྱི་བག་ཆགས་སད་དེ། སྤྱོད་ལམ་དུལ་བ་གཞན་གནོད་སྤོང་བ་སོགས་སྒོ་གསུམ་དགེ་བའི་ཕྱོགས་ལ་འདུན་པ་ཞིག་ཡིན། ཁྱད་པར་སྔོན་གྱི་སྨོན་ལམ་སྟོབས་བཙན་པས་རབ་འབྱམས་པ་བསྟན་པའི་རྒྱལ་མཚན་དང་བླ་སློབ་ཐུགས་ཡིད་གཅིག་འདྲེས་སུ་གྱུར། དེ་རྗེས་རབ་འབྱམས་གཉིས་པ་འགྱུར་མེད་ཀུན་བཟང་རྣམ་རྒྱལ་ལས་ཟབ་རྒྱས་ཀྱི་གདམས་པ་དུ་མ་གསན་ནས་སྒྲུབ་པའི་དཀའ་སྤྱད་གཞན་གྱི་བརྣག་དཀའ་བས། ཡིག་དྲུག་དུང་ཕྱུར་བདུན་དང་། ཨ་མི་དྷེ་ཝ་དུང་ཕྱུར་གཅིག་གིས་གཙོས་ལྷག་པའི་ལྷ་དུ་མའི་བསྙེན་སྒྲུབ་མི་ཚེ་ཧྲིལ་པོར་མཛད་པས་རྩ་གསུམ་དཀྱིལ་འཁོར་རྒྱ་མཚོས་དངོས་ཉམས་རྨི་ལམ་དུ་ཞལ་གཟིགས་ལུང་བསྟན་དང་བཅས་པས་རྗེས་སུ་བཟུང་། མཐར་འཆི་བ་ལ་ཉམ་ང་མེད་པར། དགེ་བའི་རྩ་བ་དེ་དག་སེམས་ཅན་ཐམས་ཅད་རྣམ་མཁྱེན་རྫོགས་བྱང་ཐོབ་པའི་ཕྱིར་ཁོ་བོས་ལྷག་བསམ་དག་པས་བསྔོ་བ་ཡིན་པས། དྲུང་ན་འཁོད་པའི་མཆེད་གྲོགས་རྣམས་ལ་ཁྱེད་ཅག་གིས་ཀྱང་དེ་དེ་བཞིན་དུ་འགྲུབ་པའི་མཐུན་འགྱུར་མཛོད་ཅིག་ཅེས་གསུངས་ནས་གདོང་ལྔའི་དབང་པོ་གངས་ལ་ཕྱིན་པ་ལྟར་འཆི་བ་འོད་གསལ་ཆོས་ཀྱི་སྐུར་མངོན་པར་བྱང་ཆུབ་པར་མཛད་དོ། །
སྐྱེ་ཕྲེང་གསོལ་འདེབས་ནང་དེར་འཁོད་པར་མ་མཛད་ཀྱང་། སློབ་བུ་འགྱུར་མེད་རྣམ་རྒྱལ་གྱི་གསོལ་འདེབས་ནང་ལ་འཁོད་པ་ལྟར། གྲུབ་པའི་དབང་ཕྱུག་ཤེས་རབ་ཡར་འཕེལ་གྱིས་ཉེ་བར་གནས་པ་ཨོ་རྒྱན་དཔལ་འབྱོར་ལ། རང་རེའི་སྤྲུལ་སྐུ་འདི་ལ་ཁ་ཟེར་བ་མང་དུ་འབྱུང་ན་ཡང་། ཁྱེད་རྣམས་ཀྱིས་དེ་ལྟར་འཛིན་མི་རུང་། འདི་ཟུར་ཆུང་ཤེས་རབ་གྲགས་པ་དངོས་ཡིན་གསུངས་པ། ཕྱིས་སུ་ཨོ་རྒྱན་དཔལ་འབྱོར་གྱིས་རྡོ་རྗེ་འཆང་ཀོང་སྤྲུལ་རིན་པོ་ཆེ་ལ་ཞུས་པ། ཀོང་སྤྲུལ་ནས་ཕྲན་སྐོར་ལ་ལན་མང་གསུངས་ཕེབས་པས། དེ་ལྟར་ན། དེའི་རྣམ་ཐར་ནི་མདོ་སྒྱུའི་ཆོས་འབྱུང་རྣམས་སུ་རླུང་ལྟར་གྲགས་པ་དེ་ལྟར་ལ། དེར་མ་ཟད་སྤྲུལ་པའི་གཏེར་སྟོན་དྲི་མེད་རྣམ་གསུམ་དུ་གྲགས་པའི་ཡ་གྱལ། སྐྱེ་མཐའི་བྱང་ཆུབ་སེམས་དཔའ་ཨོ་རྒྱན་དྲི་མེད་ཀུན་དགའི་རྣམ་འཕྲུལ་ཡིན་པའི་རྒྱུ་མཚན་ཡིད་ཆེས་དང་ལྡན་པ་ཡོད་དེ། དེའི་རྣམ་ཐར་ནི། རང་གཏེར་ཐུགས་རྗེ་ཆེན་པོ་རྒྱལ་བ་རྒྱ་མཚོའི་ལུང་བྱང་ལས། གྲྭ་ཕྱིའི་ཕྱོགས་སུ་ལས་ལྡན་སྔགས་པའི་རིགས༔ བུདྡྷའི་སྤྲུལ་པ་མཚོ་རྒྱལ་སྙིང་གི་བུ༔ མེ་ཁམས་ཕག་ལོ་སྐྱེ་མཐའི་བྱང་ཆུབ་སེམས༔ དྲི་མེད་བསླབ་ལྡན་མཚན་དཔེའི་ཆ་ཤས་རྫོགས༔ ངང་རྒྱུད་རིང་ཞིང་ཐབས་མཁས་འགྲོ་བ་འདུལ༔ ཀུན་དགའི་མིང་ཅན་དེ་དང་འཕྲད་པར་འགྱུར༔ དེ་ཚེ་རྒྱ་ཆེའི་བླ་རྫོགས་ཐུགས་རྗེའི་སྐོར༔ བཤད་དང་སྒྲུབ་པས་འགྲོ་མང་ཐར་ལམ་བཀོད༔ ཁྱད་པར་གདུལ་བྱ་ཤར་གྱི་ཕྱོགས་སུ་རྒྱས༔ དཀར་པོའི་བརྒྱུད་འཛིན་སྟོད་ཁམས་ཀུན་ཏུ་དར༔ ཞེས་གསུངས་པ་ལྟར་གྲྭ་ཕྱིའི་མདའ་ཁང་
དམར་ཞེས་བྱ་བར། ཡབ་དཔལ་འབྱོར་བཟང་པོ་དང་ཡུམ་འཛོམས་པ་ཞེས་བྱ་བའི་སྲས་སུ། མེ་མོ་ཕག་གི་ལོ་ལ་སྐུ་འཁྲུངས། དེ་ཡང་སྔགས་རིགས་བཟང་པོ་ཁྱད་པར་དུ་འཕགས་པ། དབུ་ལ་གཙུག་ཏོར་མཐེབ་གང་དང་། དཔྲལ་བར་མཛོད་སྤུ་དུང་གཡས་འཁྱིལ་གྱི་རི་མོའི་རྣམ་པ་དང་། གནས་ལྔ་ཡི་གེས་མཚན་པ་སོགས་ངོ་མཚར་བའི་མཚན་དཔེ་ཅན། གཞོན་ནུའི་རོལ་རྩེད་དུས་ནས་དབང་བསྐུར་བ་དང་ཆོས་འཆད་པའི་རྣམ་པ་མཛད་པས་དམ་པའི་ངང་ཚུལ་སད་པ་དེ་སྐབས་སུ་པེ་དཀར་གྱིས་ཆོ་འཕྲུལ་བཏང་བ་དང་། བར་ཆད་བྱུང་བ་རྣམས་རྩ་གསུམ་སྲུང་མས་མངོན་སུམ་དུ་བཏུལ། དེ་ནས་གྲྭ་ཕྱི་
ཆུ་བཟང 
་དུ་དམ་པའི་ཆོས་འདུལ་བ་ལ་མཁས་པར་སྦྱངས། དགུང་ལོ་ཉེར་གཅིག་བཞེས་པ་ན། མཁན་ཆེན་མཉམ་མེད་ ཆུ་བཟང ་བ་ཆེན་པོའི་དྲུང་དུ་ཚིགས་གསུམ་བར་མ་ཆད་དུ་ནོས་ནས་མཚན་ཤེས་རབ་རྒྱལ་མཚན་ཞེས་བྱ་བར་བཏགས། དེ་ནས་བླ་མ་དང་མཁའ་འགྲོའི་ལུང་བསྟན་ལ་བརྟེན་ནས་བསམ་ཡས་མཆིམས་ཕུར་སྒྲུབ་པ་མཛད་པས་དབང་དང་གདམས་ངག་ཐམས་ཅད་ཨོ་རྒྱན་དངོས་ཀྱིས་གནང་བ་བྱུང་། རྟོགས་པ་ཚད་མེད་པ་འཁྲུངས། ཁྱད་པར་དགུང་ལོ་ཉེར་དྲུག་གི་སྟེང་དུ། མཆིམས་ཕུ་བློན་པོ་མགུལ་གྱི་རྩེ་མོར་ཨོ་རྒྱན་རིན་པོ་ཆེ་དང་མཇལ་ཞིང་ལུང་བསྟན་པ་ལྟར་ཡེ་ཤེས་མཚོ་རྒྱལ་གྱིས་མཆིམས་ཕུ་བྲག་སྣ་ནས་གཏེར་བཞེས་རྒྱུའི་ཁ་བྱང་དངོས་སུ་གཏད། དེའི་ཕྱི་ལོ་བྲག་སྣ་སེངྒེའི་གདོང་པ་ཅན་ནས། བླ་མ་ནོར་བུའི་ལམ་ཁྱེར་དང་། རྫོགས་ཆེན་མཁའ་འགྲོ་ཡང་ཏིག །ཐུགས་རྗེ་ཆེན་པོ་ཡེ་ཤེས་འོད་མཆོག་ལ་
སོགས་བླ་རྫོགས་ཐུགས་གསུམ་དང་། གཞན་ཡང་བཀའ་བརྒྱད་གཙུག་རྒྱན་ནོར་བུ། ཚེ་སྒྲུབ་རྟ་མཆོག་རོལ་པ། མཁའ་འགྲོ་ཆེན་མོ། མགོན་པོ་འབར་ཆུང་ལ་སོགས་པའི་གཏེར་ཆོས་ཁྱད་པར་ཅན་མང་པོ་སྤྱན་དྲངས། གཞན་ཡང་ནོར་བུ་སྟག་ཤ་དེ་བ་དང་། མཚོ་རྒྱལ་མགུལ་གཡུ་སོགས་རྫས་གཏེར་ཀྱང་མང་དུ་གདན་དྲངས། མཆིམས་ཕུ་ཨོ་རྒྱན་གསང་ཕུག་ཏུ་ལྷ་སོ་སོའི་སྒྲུབ་པ་མཛད་པས། བླ་མ་དང་ཐུགས་རྗེ་ཆེན་པོའི་ཞལ་མངོན་སུམ་དུ་མཇལ། བླ་རྫོགས་ཐུགས་གསུམ་གྱི་སྒོ་ནས། དབུས་གཙང་ལྷོ་མོན་ལ་སོགས་པར་འགྲོ་དོན་རྒྱ་ཆེན་པོར་མཛད། དེ་ནས་ཤར་ཕྱོགས་ཀོང་ཡུལ་དུ་བྱོན་ཏེ་ཆོས་ཀྱི་ཆར་ཆེན་པོ་ཕབ། ཁྱད་པར་དུ་ཨ་ཏི་བླ་མེད་ཀྱིས་འགྲོ་མང་སྨིན་གྲོལ་ལ་བཀོད། བསྟན་འགྲོར་སྨན་སླད་ལྷུན་གྲུབ་བྲག་དགོན་ཞེས་བྱ་བའི་སྔགས་འཆང་གི་སྡེ་བཏབ། དེའི་སྔགས་པ་རྣམས་གཏེར་སྟོན་ལ་གཙུག་ཏོར་མཐེབ་གང་ཡོད་པ་ལ་དབུ་སྐྲ་དཀྲིས་པའི་ཚུལ་བཞིན་སྐྲ་ཐོར་ཚུགས་ཁོ་ན་ཡིན་ཟེར། དེ་ནས་གཏེར་སྟོན་ཉིད་ཞི་བར་གཤེགས་རྗེས། འབྲི་གུང་གི་ཞལ་སློབ་མཚན་ལྡན་གཞོན་ནུ་སངས་རྒྱས་ཞེས་བྱ་བ་རྗེས་སུ་གཏེར་སྟོན་ཆེན་པོའི་སློབ་མའི་ཐུ་བོར་གྱུར་པ་དེ་ཉིད་ཀྱིས་གདན་ས་བསྐྱངས་ཏེ་དྭགས་པོ་མཚོ་མེར་ལ་སྒྲུབ་པར་བཞུགས་པའི་དུས་ཡེ་ཤེས་ཀྱི་མཁའ་འགྲོ་མས་ལུང་བསྟན་ཏེ། དབུའི་གཙུག་ཏོར་དཀྲིས་པ་འདི་བཞིན་ལ་སྐུ་ཆས་དཀར་པོར་བསྒྱུར་གསུངས་ཀྱང་ཐེ་ཚོམ་པས་བཏང་སྙོམས་སུ་བཞག་པས་དཀར་པོའི་ཆས་ཀྱིས་བོད་གངས་ཅན་གང་བའི་རྟེན་འབྲེལ་མ་འགྲིགས། ལུང་བསྟན་གསུམ་གྱི་རྗེས་
མའི་དུས་དཀར་ཆས་མཛད་པས། གངས་ཏི་སེ་ནས་ཀོང་པོ་རྒྱ་ལ་ཡན་ལ་རྟའི་ཟེ་བ་ཙམ་ཞིག་བྱུང་། དེའི་དུས་སུ་མཁའ་འགྲོས་ཕྲིན་ལས་སྒྲུབ། ཕྱོགས་ཀྱི་སྦྱིན་བདག་འདུས། ཚོགས་ཀྱི་ཡོ་བྱད་སྤྲིན་ལྟར་འཁྲིགས་པ་དང་། ཁྱད་པར་བདུད་རྩི་མཚོ་ལྟར་མེར་བས་དྭགས་པོ་མཚོ་མེར་དུ་གྲགས། གོང་གི་གཏེར་སྟོན་གྱིས་བཏབ་པའི་དགོན་པའང་དཀར་ཆས་སུ་བསྒྱུར་བས། ལྷུན་བྲག་དཀར་པོ་པར་གྲགས་ཏེ་འགྲོ་དོན་རྒྱ་ཆེ་སྟེ། འདི་ནས་བཟུང་དཀར་པོ་པར་གྲགས་པ་འདི་བྱུང་བ་ཡིན། མཚན་ལྡན་གཞོན་ནུ་སངས་རྒྱས་ནས། མཚུངས་མེད་གཞོན་ནུ་བསམ་འགྲུབ། འཇམ་དབྱངས་གཞོན་ནུ་དོན་གྲུབ། མཁས་གྲུབ་གླང་ཆེན་པ། ཐུགས་སྲས་དཀར་པོ་ཀུན་དགའ་གྲགས་པ་སོགས་སློབ་བརྒྱུད་རིགས་གཅིག་དང་། མཚོ་མེར་སྟེང་ནས་བརྒྱུད་པ་གདན་ས་མ་བུ་བརྒྱད་དུ་གྱེས་ཏེ། གླིང་མཐའ་བ། ས་དཀར་བ། འགོར་པ། ན་སྤུངས་པ། རི་བོ་ཏ་ལ་པ། སྲིན་སྦུག་པ་སོགས་སོ། །སྐུའི་རིགས་རྒྱུད་ནི་དབུས་ན་འགའ་ཞིག་ཡོད་པ་རྣམས་སྔགས་རིགས་འཛིན་པ་ཙམ་ལས་གྲགས་ཆེ་བ་མ་བྱུང་། ཀོང་པོ་ན་ཡོད་པ་རྣམས་ཐུགས་རྗེ་ཆེན་པོ་ཡེ་ཤེས་འོད་མཆོག་གི་ཁྲིད་རྒྱུན་སྤེལ་བ་སོགས་འགྲོ་དོན་ཆེ་བར་བྱུང་བའོ། །ཡིད་ཆེས་འོས་པའི་རྒྱུ་མཚན་ཇི་ལྟ་བུ་ཡིན་ཞེ་ན། སྔ་མའི་ཐུགས་རྗེ་ཆེན་པོའི་ལུང་བྱང་གི་འཕྲོར། སྙིང་པོའི་མཆོག་འདི་རང་གི་ཉམས་བླངས་ནས༔ སླར་ཡང་མགྲིན་པ་བཟང་པོའི་བྲེ་གུའི་སུལ༔ ཡང་གཏེར་རྒྱས་བཏབ་སྨོན་ལམ་རྒྱ་ཆེར་ཐོབ༔ དེ་ནས་མ་འོངས་ཤིན་ཏུ་རྩུབ་འགྱུར་དུས༔ ཡབ་གཅིག་ཁྲི་སྲོང་ལྷ་སྲས་
མཆོག་གྲུབ་རྗེ༔ ཟུང་འཇུག་རྣམ་འཕྲུལ་སྒྱུ་མའི་རང་མདངས་ཤིག༔ མདོ་ཁམས་ཤར་དུ་ལྕགས་ཁམས་འབྲུག་གི་ལོ༔ བཀའ་བབ་བདུན་ལྡན་རིག་རྩལ་ཐོད་རྒལ་འཆང་༔ བརྟུལ་ཞུགས་གཟི་ལྡན་དཔའ་བོ་སྟག་ཤམ་ཅན༔ ཨོ་རྒྱན་ཐུགས་སྲས་པདྨའི་མིང་ཅན་ལ༔ ཡེ་ཤེས་མཁའ་འགྲོས་གཏེར་ཁ་དངོས་སུ་སྤྲད༔ ཅེས་པའི་དོན་ལྟར་། ཡང་ཟབ་ཕུལ་དུ་ཕྱུང་བའི་གདམས་པ་ཐུགས་རྗེ་ཆེན་པོ་རྒྱལ་བ་རྒྱ་མཚོ་འདི་ཉིད། ཐོག་མར་རབ་བྱུང་དྲུག་པའི་ལྕགས་མོ་གླང་ལོའི་སྨལ་པོ་ཟླ་བའི་ཚེས་བཅུར་བསམ་ཡས་མཆིམས་ཕུའི་བྲག་སྣ་སེངྒེའི་གདོང་ནས་ས་བརྒྱད་པའི་བྱང་ཆུབ་སེམས་དཔའ་གནུབས་ཆེན་སངས་རྒྱས་ཡེ་ཤེས་ཀྱི་རྣམ་འཕྲུལ། སྤྲུལ་པའི་གཏེར་སྟོན་དྲི་མེད་ཀུན་དགའ་ཉིད་ཀྱིས་ཟབ་མོའི་གཏེར་ཁ་དུ་མ་བཞེས་ཏེ། བླ་རྫོགས་ཐུགས་གསུམ་རྒྱ་ཆེ་བའི་སྐོར་རྣམས་ཁྱབ་བརྡལ་དུ་སྤེལ་ནས་གདུལ་བྱ་མང་པོ་སྨིན་གྲོལ་ལ་བཀོད། ཡང་ཟབ་འདི་ལུང་བྱང་ལྟར་ཐུགས་ཉམས་སུ་བཞེས་ཏེ་གཞན་ལ་མ་སྤེལ་བར་སླར་བྲག་དམར་མགྲིན་བཟང་གི་བྲེ་གུར་རྒྱས་བཏབ་པ། སླད་ནས་རབ་བྱུང་བཅུ་བཞི་པའི་ས་སྤྲེལ་གནམ་ལོ་ཤར་བའི་དབྱུག་པ་ཟླ་བའི་ཚེས་བཅུ་ལ། རྗེ་ཞེ་ཆེན་པ་མ་ཧཱ་པཎྜི་ཏ་ཉིད་ཀྱི་སློབ་ཚོགས་རྒྱུ་སྐར་གྱི་ཕྲེང་བ་ལྟ་བུའི་དབུས་ན། མཚན་མོའི་མགོན་པོ་ཆ་ཤས་ཡོངས་སུ་གང་བ་ལྟ་བུ། རྒྱལ་བའི་མདུན་ན་རྒྱལ་སྲས་འཇམ་དཔལ་དབྱངས་དང་མཚུངས་ཤིང་། འཇམ་དཔལ་དབྱངས་དངོས་ཆོས་རྒྱལ་ཁྲི་སྲོང་ལྡེའུ་བཙན་དང་། དེ་ཉིད་ཀྱི་དེ་མ་ཐག་པའི་སྐྱེ་བ་ལྷ་སྲས་མཆོག་གྲུབ་རྗེའི་རྣམ་པར་སྤྲུལ་པའང་ཡིན་ལ་ཡིན་
བཞིན་འཇམ་དཔལ་དབྱངས་ཀྱི་མཁྱེན་རབ་ཀྱང་མངོན་སུམ་དུ་མངའ་བ། འཇམ་དབྱངས་མཁྱེན་བརྩེའི་དབང་པོའམ་སྤྲུལ་པའི་གཏེར་སྟོན་ཡོངས་ཀྱི་འཁོར་ལོས་སྒྱུར་བ་པདྨ་འོད་གསལ་མདོ་སྔགས་གླིང་པ་ཉིད་གཏེར་གནས་དེ་ཉིད་དུ་བྱོན་པའི་ཚེ། ཡང་གཏེར་དུ་ཡང་ཟབ་རྒྱལ་བ་རྒྱ་མཚོའི་ཆོས་སྐོར་འདི་དང་འགྲོ་འདུལ་འཕགས་པའི་ཐུགས་ཐིག་བཅས་ཡེ་ཤེས་ཀྱི་མཁའ་འགྲོ་མས་དངོས་སུ་བསྩལ་པ་རིང་དུ་གསང་རྒྱས་བཏབ་པ། ཕྱིས་རབ་བྱུང་བཅོ་ལྔ་པའི་མེ་གླང་གནམ་ལོ་ཤར་བ་ན། སྤྲུལ་པའི་གཏེར་སྟོན་ཆེན་པོ་འདི་ཉིད་ཀྱི་གདན་ས། སྔོན་འགྲོ་བའི་མགོན་པོ་ཆོས་རྒྱལ་འཕགས་པས་ཕྱག་བཏབ་ཀྱི་ཆོས་སྡེ་རྫོང་སར་བཀྲ་ཤིས་ལྷ་རྩེ་ཞེས། དཔལ་ས་ངོར་ཚར་གསུམ་གྱི་རིང་ལུགས་འཛིན་པའི་ཆོས་གྲྭ་ཆེན་པོ་དེར། རྗེ་ཞེ་ཆེན་པ་ཉིད་ཀྱི་སློབ་མའི་ཁྱུ་མཆོག་རྒྱལ་བའི་མདུན་ན་དཔལ་གསང་བའི་བདག་པོ་ལྟ་བུ། གསང་བདག་ཉིད་དགེ་བའི་བཤེས་གཉེན་གྱི་ཚུལ་དུ་བྱོན་པའང་ཡིན་ལ། གསང་བའི་བདག་པོ་ཉིད་ཀྱི་བློ་གྲོས་དང་བརྟུལ་ཞུགས་ཀྱང་མངོན་སུམ་དུ་སྣང་བ། ཀོང་བམ་སྟེང་སྤྲུལ་སྐུའམ་ཁྱུང་པོ་སྤྲུལ་སྐུ་མཚན་བློ་གྲོས་མཐའ་ཡས་སུ་འབོད་པ། སྤྲུལ་པའི་གཏེར་སྟོན་བསྟན་གཉིས་གླིང་པས། ཟབ་མོ་གཏེར་གྱི་སྐོར་ཐམས་ཅད་ཕྱོགས་གཅིག་ཏུ་བསྡུས་པ་རིན་ཆེན་གཏེར་གྱི་མཛོད་ཆེན་པོའི་ཆོས་ཀྱི་སྒོ་ཀཿ དཔལ་ཞེ་ཆེན་གྱི་སྤྲུལ་པའི་སྐུ་རྣམས་གཙོ་བོར་གྱུར་པའི་དད་འདུས་པ་ཡོངས་ལ་སྔ་འགྱུར་བསྟན་པའི་བཙས་སུ་ཕྱེ་བའི་སྐབས། འཕགས་ཆེན་རྣམས་ཀྱི་ཕྲིན་ལས་ནི་ཆུ་ཟླའི་ཚུལ་དུ་ཅིར་ཡང་སྣང་བ་ཆོས་ཉིད་ལགས་པས། ལུང་བྱང་
སྔ་མའི་འཕྲོར། རྨི་ལམ་ཚུལ་དུ་ཆོས་ཀྱི་བདག་པོ་ཡི༔ བཀའ་གཏད་བྱིན་རླབས་བསྐུལ་མ་ཐེངས་གསུམ་འོང་༔ དེ་དུས་གདམས་པ་འདི་ཉིད་གཏན་ལ་ཕོབ༔ ཅེས་གསུངས་པའི་དོན་ལྟར། ཀོང་སྤྲུལ་རིན་པོ་ཆེའི་གསུང་འཕྲོས་བཞིན་བཀོད་པ། ཞབས་དྲུང་རིན་པོ་ཆེ་པདྨ་འོད་གསལ་མདོ་སྔགས་གླིང་པ་ལ་འོད་གསལ་གྱི་སྣང་ཆར། མ་ཧཱ་པཎྜི་ཏ་ཞེ་ཆེན་དབོན་སྤྲུལ་མཐུ་སྟོབས་མཚན་ཅན་ཉིད། སྐུ་ཐ་མལ་ཉིན་ཐང་ལྟར་སྐུ་ཆས་ཡོ་བྱད་རྣམས་གྱི་ནའི་ཚུལ་དུ་བཞུགས་པ་མཇལ་བའི་མོད་ལ་དྲུང་དུ་བཅར་བ་དང་། ཞལ་ནས་ཀོང་སྤྲུལ་ཚང་དང་། ཁྱེད་རྣམ་གཉིས་ཀྱིས་གཏེར་ཆོས་རྒྱུན་ཡོད་མེད་རིགས་ཕྱོགས་སུ་བསྡོམས་ནས་དབང་ལུང་བྱེད་པ་འདི་ཅི་ཡིན་གསུངས་པ་དང་། ལན་ལ་སྔར་ཞེ་དགོན་དུ་སྐུ་རྩར་བཞུགས་སྐབས། བླ་སློབ་རྙིང་མ་དང་ས་སྐྱའི་གྲུབ་མཐའ་བཟུང་ནས་ཞལ་རྩོད་མཛད་པའི་བག་ཆགས་ཀྱིས། བརྒྱུད་པ་མེད་པ་གང་ཡང་བཞག་མེད། དངོས་སུ་བརྒྱུད་པ་ཡོད་རིགས་ནི་ཡོངས་སུ་གྲགས་པ་ལྟར་ལ། ཁྱེད་རྙིང་མ་པ་ལ་ཞལ་གཟིགས་དང་། དག་སྣང་ལུང་བསྟན་ཟེར་བའི་སྲོལ་འདུག་པ་དེ་རིགས་ནི་འགལ་མེད་སྙམ་ནས་བཞག་པ་ཡིན་ཞུས་པ་དང་། འོ་ན་ཇོ་མོ་སྨན་མོ་ཟེར་བའི་སྨད་འཚོང་མ་དེ་དང་། ར་མོ་ཤག་སྨན་ཟེར་བའི་ལྷ་རྗེ་སྐྱ་ཐོ་སེ་བ་དེའི་རིགས་ཀྱི་གཏེར་ཆོས་སྤེལ་ན། ངེད་རང་གི་གཏེར་ཆོས་དེ་མི་སྤེལ་བའི་རྒྱུ་མཚན་ཅི་ཡིན་གསུངས་བྱུང་བ་ལ། ཉིད་ཀྱིས་གཏེར་སྟོན་མཛད་པ་དང་། གཏེར་ཆོས་ཡོད་པ་མི་དྲན་ན་ཅི་ཞིག་སྤེལ་ཞུས་པ་དང་། གཏེར་ཆོས་ཡོད། ང་རང་གཏེར་སྟོན་དྲི་མེད་ཀུན་དགའ་ཡིན་གསུང་བྱུང་བ་
དང་། དེ་མ་ཐག་སྐུའི་རྣམ་འགྱུར་སྔར་དེ་དང་མི་འདྲ་བ་དབུ་སྐྲ་ཐོར་ཅོག་གླེགས་བམ་གྱིས་བརྒྱན་པ། བག་དྲོ་ལྷུན་ཆགས་དཀར་ཆས་མཛད་པ་སྙན་ལ་དུང་ལུང་གིས་མཛེས་པ་ཅན་ཞིག་ཏུ་གྱུར་ནས། ཅུང་ཟད་ནམ་མཁར་འཕགས་ཏེ། ངའི་ཡང་གཏེར་གྱི་སྐོར་དེ་རྣམས་འཕྲལ་དུ་གཏན་ལ་ཕབ་ནས་རིན་ཆེན་གཏེར་མཛོད་དུ་བཞག་དགོས་ཞེས་ནན་ཏན་དུ་བཀའ་སྩལ་པའི་མོད་ལ་ཨོ་རྒྱན་དྲི་མེད་ཀུན་དགའ་དངོས་ཀྱིས་རྗེས་སུ་བཟུང་ཞིང་བྱིན་གྱིས་བརླབས་པའི་ཉམས་ཤར་བ་ལ་བརྟེན་ནས། གཏེར་ཤོག་རིགས་ཚང་མ་གཏན་ལ་ཕབ་ཅིང་། ཤིང་རྟ་ཆེན་པོ་བློ་གྲོས་མཐའ་ཡས་སམ། ཨོ་རྒྱན་འཆི་མེད་བསྟན་གཉིས་གླིང་པ་སོགས་ལ་ཐོག་མར་ཆོས་སྒོ་ཕྱེ་བར་མཛད་ནས་ཀུན་གྱིས་སྤྱོད་ཡུལ་དུ་གྱུར་པ་འདི་ལྟར་ལགས་པས་གཏན་ཚིགས་བསྙོན་མེད་དུ་ངེས་པར་གྲུབ་པ་འདི་ལ་ཆོས་མཐུན་གྱིས་རྒོལ་བ་འཇུག་པའི་གནས་མེད་དོ། །དེ་ལྟ་བུའི་སྐྱེས་རབས་ཀྱི་ཕྲེང་བ་དག་གོ་རིམ་བསྟར་ཆགས་སུ་མ་ངེས་པ་དང་། སྐྱེ་འཕགས་ཀྱི་རྣམ་པ་ཐ་དད་པར་སྣ་ཚོགས་སུ་སྣང་བ་དང་། གང་ཟག་གཞན་དང་གཞན་གྱི་སྐྱེས་རབས་དང་ཟློས་པ་སོགས་ལ་ལོག་པར་མི་ལྟ་སྟེ། རྩ་བའི་སྤྲུལ་གཞི་འཕགས་པ་སྤྱན་རས་གཟིགས་ནི། རྒྱལ་བ་ཀུན་གྱི་སྙིང་རྗེའི་རང་གཟུགས་ས་བཅུའི་རྒྱུན་མཐའ་ན་གནས་པའི་ཚུལ་བཟུང་བ་ཡིན་པས་དེ་ལ་བྱིས་པའི་བློས་སྣང་ཚོད་ཀྱིས་དཔག་པའི་ཡུལ་མ་ཡིན་ཏེ། དབུ་མ་འཇུག་པ་ལས། རེ་ཞིག་བཅུ་པ་འདིར་དེའི་ཡོན་ཏན་དག །ངག་གི་སྤྱོད་ཡུལ་ལས་ཆེས་འདས་
གྱུར་ཞིང་། །ངག་གི་སྤྱོད་ཡུལ་མ་ཡིན་རྡུལ་རྣམས་ན། །རྡུལ་དག་ཇི་སྙེད་ཡོད་པ་དེ་སྙེད་འགྱུར། །བ་སྤུའི་ཁུང་བུར་བྱང་ཆུབ་སེམས་རྣམས་དང་། །ལྷན་ཅིག་རྫོགས་སངས་རྒྱས་སྐུ་གྲངས་འདས་དང་། །དེ་བཞིན་ལྷ་དང་ལྷ་མིན་མི་དག་ཀྱང་། །སྐད་ཅིག་སྐད་ཅིག་ལ་ནི་སྟོན་པར་ནུས། །ཞེས་དང་། ཤར་ཙོང་ཁ་བ་ཆེན་པོའི་འཇམ་དཔལ་ལ་བསྟོད་པ་ལས། བསོད་ནམས་ཚོགས་རབ་རབ་འབྱམས་རྒྱུ་ལས་འཁྲུངས་པའི་སྐུ་མཆོག་མཆོག་ཏུ་མཛེས་པ་ཁྱོད་ཀྱི་སྐུའི། །ནམ་མཁའི་མཐས་གཏུག་གཏུག་པ་མེད་པའི་ཞིང་མཆོག་ཀུན་ཏུ་དུ་མའི་འགྲོ་ལ་མིག་འཕྲུལ་བཞིན། །ལ་ལར་བལྟམས་ཤིང་ཞིང་གཞན་དུ་ཡང་བྱང་ཆུབ་ཚུལ་སྟོན་སྟོན་པ་ཁྱོད་ཀྱི་སྐུ་ཡི་ནི། །བཀོད་པ་མཆོག་འདི་འདི་དང་གཞན་དུ་མ་ལུས་འགྲོ་ཀུན་ཀུན་མཁྱེན་གྱུར་ཀྱང་བརྗོད་མི་ནུས། །ཞེས་སོ། །དེ་ལྟའི་ཚུལ་ལ་བློ་ཁ་ཕྱོགས་ཤིང་ཁོང་དུ་ཆུད་པ་ནི་སྔོན་གྱི་རྒྱལ་བ་ལ་ལྷག་པར་བྱ་བ་བྱས་པ་སོགས་མདོ་སྡེ་མང་པོ་ནས་བསྔགས་པར་བྱས་པའོ། །སྨྲས་པ། སྔོན་བྱོན་མཁས་དང་གྲུབ་པའི་ལག་རྗེས་དེ། །རྒྱུ་འབྲས་དེ་བྱུང་འབྲེལ་བ་མི་བསླུ་བས། །འདི་ན་ཐོས་བསམ་སྒོམ་པའི་ཤེས་རབ་ཀྱིས། །རྒྱལ་བསྟན་རྫོགས་ལྡན་དང་པོའི་གནས་སུ་བསྒྱུར། །མཁས་མཁས་འ༵གྱུར་མེ༵ད་དོན་དམ་རྟོགས་པས་མཁས། །
མཁས་མཁས་མདོ་སྔགས་བསྟན༵་པ་འཛི༵ན་ལ་མཁས། །མཁས་མཁས་སློབ་ཚོགས་འཕེ༵ལ་ཞིང་རྒྱ༵ས་ལ་མཁས། །མཁས་མཁས་གྲགས་པས་ས་གསུམ་སྙན་ལ་མཁས། །མདོ་དང་སྔགས་ཀྱི་ལུང་རྟོགས་ཆོས་འཁོར་ལོ། །འཁོར་ལོ་གསུམ་གྱིས་སྲིད་མཐར་རྒྱས་མཛད་པ། །མཛད་པ་མཆོག་དེ་ནུབ་མེད་གཏམ་བཟང་པོ། །བཟང་པོའི་ངག་ལས་འབད་པའི་རྩེ་མོར་སོན། །དེ་ལྟར་ཚིགས་སུ་བཅད་པས་མཚམས་སྦྱར་ནས།
སྐུ་འཁྲུངས་ནས་ཐོག་མའི་རིག་གནས་ཀྱི་དབུ་ཁྱུད་སྐབས།
༈ ད་ནི་བརྗོད་བྱའི་གཙོ་བོ་སྐུ་ཚེ་འདི་ཉིད་ཀྱི་རྟོགས་པ་བརྗོད་པ་ལ་གསུམ། དང་པོ་གདུལ་བྱའི་དབང་གིས་འཇིག་རྟེན་མི་ཡི་སྲིད་དུ་སྐུ་བལྟམས་པ་དང་། བར་དུ་འདུལ་བའི་ཐབས་སྣ་ཚོགས་སྐུ་ཚེའི་རིང་ལ་བསྐྱངས་ཚུལ། ཐ་མ་རྟག་འཛིན་ཅན་གྱི་ངོར་མྱ་ངན་ལས་འདའ་བ་བསྟན་པའི་སྐབས་དང་གསུམ་གྱིས་དང་པོ་ནི། བདག་ཅག་གི་སྟོན་པ་མཉམ་མེད་ཐུབ་པའི་དབང་པོ་དྲག་པོ་ལྕགས་སྤྲེལ་ལོ་ལ་སྐུ་འཁྲུངས་ནས་བགྲང་བྱ་ཉིས་སྟོང་བདུན་བརྒྱ་ཞེ་བདུན་འདས། ཨོ་རྒྱན་ཆེན་པོ་བོད་དུ་ཕེབས་ཏེ་མཁན་སློབ་ཆོས་རྒྱལ་རྣམ་གསུམ་བོད་ཁམས་འགྲོ་བ་རྣམས་དམ་པའི་ཆོས་ལ་ཅི་དགར་ལོངས་སྤྱོད་དུ་ཡོད་པའི་བསོད་ནམས་ཀྱི་ཞིང་དུ་ཞལ་འཛོམས་ནས་ལོ་ཚིགས་དགུ་བརྒྱ་དང་སོ་བརྒྱད་འདས་པ། རབ་བྱུང་བཅུ་གསུམ་
པའི་སྤྲེའུ་ཞེས་པ་མེ་ལུག་ལོ་ལ། འཛམ་གླིང་ཆུང་ངུ་འདིའི་ཡུལ་གྲུ་ལ་དུས་འཁོར་ལས། བྱང་མ་དྲུག་བགོས་ཡུལ་དྲུག་ཡིན་ཞེས་གསུངས་པའི་ནང་ཚན་བོད་དུ་གྲགས་པ། དེ་ལ་བོད་དང་བོད་ཆེན་པོའི་ཡུལ་གཉིས་སུ་ཕྱེ་བས་ཕྱི་མ། དེ་ཡང་སྔོན་གྱི་དུས་བོད་དབུས་གཙང་ཆོས་རྒྱལ་མེ་དབོན་གྱིས་ཞབས་ཀྱིས་བཅགས། སྤྲུལ་པའི་གཏེར་སྟོན་ཕལ་ཆེར་བྱོན། ལོ་པཎ་རྣམས་ཀྱིས་དམ་པའི་ཆོས་དངོས་སུ་བསྒྱུར་བའི་གནས་རྒྱ་གར་འཕགས་པའི་ཡུལ་དང་ཁྱད་མ་མཆིས་མོད། དེང་དུས་ཁམས་ཕྱོགས་འདིར་ཤར་གཏེར་ཟུག་པ་རྩ་བ་ལྟ་བུ་རྣམས་འབྱིན་པའི་སྤྲུལ་པའི་སྐྱེས་ཆེན་རྣམས་ཀྱང་བྱོན། དེ་དག་གི་མཐུས་ལུང་དང་རྟོགས་པའི་བསྟན་པ་འཛིན་སྐྱོང་སྤེལ་བའི་མཁས་གྲུབ་ཟླ་མེད་དུ་མ་ཞལ་འཛོམས། ཐུན་མོང་གི་རིག་གནས་ནས་འོད་གསལ་རྫོགས་པ་ཆེན་པོའི་བར་གྱི་བཤད་སྒྲུབ་ཀྱི་བསྟན་པ་དར། སྔ་མ་ལས་ཕྱི་མ་ལྷག་པ་ལྟ་བུར་གྱུར་པའང་འཕགས་པ་བརྒྱད་སྟོང་པ་ལས། ཤེར་ཕྱིན་གྱི་མདོ་སྡེ་རིན་པོ་ཆེ་མཐར་བྱང་ནས་བྱང་དུ་རྒྱས་པར་གསུང་བའི་དོན་ལྟར། འཕགས་ཡུལ་ཨོ་རྒྱན་དང་བཅས་པའི་ཆོས་ཀྱི་དགའ་སྟོན་ཐམས་ཅད་རྣམ་པར་རྒྱས་པའི་ཡུལ་གྱི་བྱེ་བྲག །སྨད་མདོ་ཁམས་སྒང་དྲུག་གི་ནང་གསེས་བྱང་སྨར་ཁམས་ཀེ་རེ་ཁ་སྒང་ངམ། མདོ་ཁམས་ལྷ་སྒང་རིང་མོ་ཞེས་པའི་སའི་ཆ་འབྲོང་པ་ལྷ་སྡེ་དཀར་པོ་ཞེས། ཡུལ་སྐྱོང་ཟོ་དོར་དགེ་བསྙེན་རྡོ་རྗེ་ཐོགས་མེད་ཀྱིས་ཉེ་བར་སྲུང་ཞིང་། ཆོས་ཀྱི་རྒྱལ་པོ་སྡེ་དགེའི་མངའ་རིས་སུ་གཏོགས་པ། རུས་ནི་ཨ་ལྕགས་འབྲུ། ཡབ་ནི་ཕོ་ཏེ་གྲ་ལྔ་ནོར་བུ་ཞེས་ལུགས་
གཉིས་ཀྱི་རྣམ་དཔྱོད་མཆོག་ཏུ་ཡངས་པ། ཕ་མེས་རིང་ནས་དཀོན་མཆོག་གསུམ་ལ་སྲི་ཞུ་མི་ལྷོད་པས་རྒྱལ་བའི་བཀའ་བསྟན་འགྱུར་གྱི་པུསྟི་ཀ་བརྒྱ་ཕྲག་མང་པོ་མཆོད་གནས་སུ་བཀུར་བ། ཡུམ་ནི་འབྲོང་དཔོན་ཚེ་རྒྱལ་གྱི་སྲས་མོ་ཟི་སྨན་སྐྱིད་ཅེས་པ་དད་པ་དང་གཏོང་བ་སྙིང་རྗེས་རྒྱུད་བརླན་ཞིང་བཟང་པོའི་ཡོན་ཏན་དང་ལྡན་པ་དེ་གཉིས་ལ་སྲས་གསུམ་དང་། སྲས་མོ་གཉིས་ཏེ་ལྔ་བྱུང་བའི། སྲས་ཆེ་བ་ཟུར་མང་གཏེར་སྤྲུལ། འབྲིང་བ་ཨ་དོན་གྱིས་སྲིད་བསྐྱངས། ཆུང་བ་ལ་རྗེ་འདི་ཉིད་འཁྲུངས། དེའི་དུས་སུ་ངོ་མཚར་བའི་ལྟས་ཅི་འདྲ་བྱུང་རྩ་ཐོ་དང་གནའ་བོའི་ངག་གསལ་མེད་པས་བྲི་ངོ་མ་ཤེས། གང་ལྟར་རུང་། སྤྱོད་འཇུག་ལས། བསོད་ནམས་ཀྱིས་ནི་ལུས་བདེ་ལ། །མཁས་པ་ཡིས་ནི་སེམས་བདེ་བས། །བདེ་ནས་བདེ་བར་འགྲོ་བ་ལ། །སེམས་ཤེས་སུ་ཞིག་སྒྱིད་ལུག་འགྱུར། །ཞེས་གསུངས་པ་ལྟར། བྱང་ཆུབ་སེམས་དཔས་སྲིད་པ་བཟུང་བ་ནི་རང་གཞན་ཕན་བདེ་ལ་འགོད་པ་ལས་གནོད་པའི་རྒྱུར་མི་འགྲོ་བ་ཆོས་ཉིད་བཞིན། མ་ལ་གནོད་པ་མེད་པ་ཐོ་རངས་ཞིག་ལ་བཙས། སློབ་བུ་རྣམ་རྒྱལ་གྱིས་མཛད་པའི་རྣམ་ཐར་གསོལ་འདེབས་ལྟར་ན་མ་ལ་སྤྱན་གྱིས་ཅེ་རེ་གཟིགས་ནས་ༀཨཱཿ ཧཱུྃ་ཧྲཱི༔ ༀ་མ་ཎི་པདྨེ་ཧཱུྃ་ཞེས་ལན་གཅིག་གསུངས་པས་ཉེ་འཁོར་བ་ཀུན་ངོ་མཚར་བའི་གནས་ལ་བཀོད་ཅེས་གསུངས། དེ་དུས་རྒྱལ་ཚབ་རྡོ་རྗེ་འཆང་སིབ་དགོན་དུ་བཞུགས་ཡོད་པ་རང་བསྟན་ལ་
ཕན་པའི་སྤྲུལ་སྐུ་གསར་འཁྲུངས་ཡོད་པའི་ཉམས་རྨིས་གསལ་བར་བྱུང་བ། དེ་ནངས་ཕོ་ཏེ་ཚང་ནས་གདན་དྲངས་པ་བ་གེ་ནང་བརྒྱུད་བྱོན་པའི་ལམ་ཁར། ཡབ་ཚང་གིས་ཡུལ་ལུགས་ཀྱི་བླ་མ་བྱོན་པའི་བཀུར་སྟི་ལ་བསང་ཁང་བཅུ་གསུམ་བརྩིགས། བསང་དར་ཡང་བཅུ་གསུམ་སྒྲོན་པ་དེ་གཟིགས་པས་ཐུགས་ལ་རྟེན་འབྲེལ་ལེགས་དགོངས་ནས། ཡབ་རྒན་གྲ་ལྔ་ནོར་བུ་ལ་ཕུ་མདུད་ཅིག་གཏད་དེ། འདི་ཁྱོད་རང་ཚང་ད་ནངས་བྱིས་པ་གསར་སྐྱེས་དེ་ལ་ཐོགས་གསུངས། བྱིས་པ་བཙས་ཚར་མིན་ཁྱིམ་མཚེས་སོགས་ཀྱིས་མ་ངེས་པས་ཐམས་ཅད་ཧ་ལས་པ་ལྟར་གྱུར་སོང་། རྒྱལ་ཚབ་རིན་པོ་ཆེ་རང་སྔར་བྱིས་པའི་རྩེ་འཇོས་གཡེངས་སྐབས་ཟུར་མང་གཏེར་སྟོན་སྤྲུལ་པའི་སྐུའི་ཆིབས་ཁ་ནས་བཟུང་སྟེ་ཁྱིམ་ལ་ཕེབས་ཞུས་པ་གྲྭ་པ་རྣམས་ནས་འདི་བྱིས་པ་ལགས་པས་བྱོན་ཉན་མི་འོང་ཞུས་པས་མི་སྐྱོན། ཁོ་བོ་དང་ངེད་གཉིས་འབྲེལ་ཆེ་བ་ཡོད་གསུང་བྱོན་པས་ཁྱིམ་ཚང་རྣམས་སྐྲག་སྔངས་བྲེལ་ཟིང་དུ་གྱུར་ཀྱང་སྐྱོན་མེད་གསུངས་ནས་གསོལ་ཇ་བཞེས། བྱིས་པ་ལ་རྒུན་འབྲུམ་སོགས་མངར་རིགས་གནང་སྟེ་བྱོན་སོང་བ། དེའི་རྒྱུ་མཚན་ད་ལྟ་ངེད་གཏེར་སྟོན་གྱི་མཆེད་དུ་སྐྱེ་བ་ཡིན་པ་འདྲ་གསུང་ཉིད་ཀྱིས་ཞལ་བཞེས་མཛད། སྐུ་འཁྲུངས་པའི་ཕྱི་ལོ་ས་སྤྲེལ་དབྱར་ཐོག་འཛི་སྒར་བསོད་ནམས་རྒྱ་མཚོའི་སྤྲུལ་པའི་སྐུ་ཕེབས་པས་ཁྲུས་གསོལ་དང་། ཚིག་བདུན་གསོལ་འདེབས་ཀྱིས་བྱིན་བསྐུལ་ཏེ་ཨོ་རྒྱན་སྣང་བརྙན་སྤྱི་བོར་བཞག་ནས་བྱིན་རླབས་གནང་། མཚན་ལ་འགྱུར་མེད་ཚེ་དབང་རྣམ་རྒྱལ་ཞེས་གསོལ། འདི་
སྤྲུལ་སྐུ་ཞིག་ཡིན་པས་བདག་པོ་བྱུང་ཚེ་ཁྱོད་རང་ཚང་ནས་དེར་སྤྲོད་པ་ལེགས་འོང་གསུངས། ལྕགས་ཁྱི་དགུང་ལོ་བཞི་བཞེས་པའི་ཚེ་རྡོ་རྗེ་འཆང་རྒྱལ་ཚབ་སྤྲུལ་པའི་སྐུ་ལྷོ་ཁོག་ཏུ་ཕེབས་ཏེ། སྔ་འགྱུར་བསྟན་པའི་བཤད་སྒྲུབ་ཀྱི་བགྱི་བ་མཆོག་ཏུ་གསལ་བ་སིབ་རྫོགས་ཆེན་དགོན་དུ་གཟའ་སྐར་སྦྱོར་བྱེད་ཕུན་སུམ་ཚོགས་པའི་ཉིན། སེར་སྐྱ་མང་པོས་སྐྱེལ་བསུ་དང་། སེར་ཕྲེང་བཅས་སྦྱོར་དངོས་རྗེས་ཀྱི་བཀུར་སྟི་བླ་ན་མེད་པས་ཁྲི་སྟོན་མཛད། བསླུ་ཡོན་དུ། རྟ་ཕོ་བདམ་པ་གཅིག །ཡང་རྟ་གཅིག །ཨོ་རོ་སུ་སོགས་ཇ་འཁོར་དྲུག་ཉེར་ལྔའི་བབ་འགྲོ་ངེས་གནང་། ཟུར་མང་བདུད་རྩི་མཐིལ་བ་ལ། སྤྲུལ་སྐུ་ཁྲིར་བཀོད་པའི་ལེགས་འབུལ་དུ། དར་གོས་ཡུག །རས་ཡུག །ལྭ་ཁྲ། ཞྭ་སྣམ། རྟ་ཕོ། དྲེལ་བཅས་བདུན་ཚན། ཟུར་མང་རྣམ་རྒྱལ་རྩེར། དར། ཝ་ལྤགས། རྟ་ཕོ། ཕ་ཡབ་ལ་དར། རྟ་ཕོ། མགོ་སྣམ། མ་ཡུམ་ལ་དར། མགོ་སྣམ་གོས། མཛོ་མོ། དབོན་པོ་ཚེ་རྒྱལ་ལ། དར། རྟ་ཕོ། འབྲོང་བ་བུ་ལྷ་དར་ལ། དར། མཛོ་བཅས་དང་། སྡེ་དགེ་ལ་སྐད་ཞུས་རྟེན། དར། ཝ་ལྤགས། རྟ་ཕོ་བཅས་ཕར་སོང་ཚུལ་དང་། ཚུར་ཁྲི་སྟོན་ལ། སྡེ་དགེ་ནས་ལྷ་གོས། ལིང་ཡུག །རས་ཡུག་གཉིས། ཝ་ལྤགས་གཉིས། གཡི་ལྤགས། མཛོ། རྟ་ཕོ་བཅས་དགུ་ཚན། སྐུ་ཚབ་རྡོ་རྗེ་རྣམ་རྒྱལ་ནས། ལྷ་རྫས་རབ་དཀར། ལིང་ཡུག །རས་ཡུག །ཝ་ལྤགས། ཁལ། འབྲི། མཛོ་མོ། མཛོ། རྟ་ཕོ་སྤུས་ལེགས་བཅས་དགུ་ཚན། ཟུར་མང་མཁན་སློབ་ནས། ལྷ་རྫས། ཟམ་ཡུག །ལིང་ཡུག །ཞྭ་ཕྲུག །ཝ་ལྤགས། ཆིབས་སེར་གྭ་ན་ལྔ་པ་འགྲོས་ལྡན། རྟ་ཕོ་སྔོ་སྨུག་ན་གསུམ་པ། རྒོད་མ་གྲོ་མོ་
བཅས་དགུ་ཚན། དེ་རིགས་བཞག་འཇོག་སྐབས་ཟུར་མང་བླ་མཆན་ཚུལ་ཁྲིམས་མཐར་ཕྱིན་གྱིས་བརྗོད་དོན་ཕུན་སུམ་ཚོགས་པའི་བཤད་པ་མཛད། ཞེ་ཆེན་གྲྭ་ཚང་ནས་དར། འབྲི་ཁལ་གཉིས། དམར་རྫོང་སྤྲུལ་སྐུ་ནས། ལིང་ཡུག །སྟོད་འགག ། མཛོ། ཤང་ཐོ་བླ་མས། དར། རས་ཡུག །མཛོ་སར། མགར་རའི་ངེས་དོན་ནས། དར་ཞྭ་སྣམ། ཁལ། བླ་མ་བསྟན་འཛིན་རབ་རྒྱས་ནས། དར་ཞྭ་སྣམ་ཁལ། ཆང་གཉིས། ཨ་ཁུ་ལྷ་དར་ནས། དར་ཡུག་གཉིས། རས་ཡུག་གཉིས། ཆང་གཉིས། ཤ་གཟུག་གསུམ། ཇ་བག །ཡོན་དགེའི་ཨ་བཀྲ་ནས། དར་རས་ཡུག །མཛོ་སར། ཤ་ཁོག ། ཆང་། ཀླུ་བསེ་ལྷ་འཕེལ་ནས། དར་ཆང་། ཇ་བག །ཤ་ཁོག །འབྲོང་དཔོན་ཚེ་རྒྱལ་ནས། ཁ་བཏགས། རས་ཡུག །ཝ་ལྤགས། ལུག་དྲུག །ཟོག་ཆེ་ཆུང་གསུམ། རྟ་ཕོ་གསུམ་བཅས་རྣམ་གྲངས་བཅོ་ལྔ། ཟ་མ་ཤ་གཟུག་བཞི། ཆང་། མར་རྒྱ་གང་། མར་ཐུད་བརྒྱད། ལུག་ཤ་དུམ་བུ། བླ་མ་ལྷུན་གྲུབ་ནས། དར་རས་དཀར་བུབ། མཛོ་སར། འབྲོང་པ་ལྷ་དར་ནས། དར་ཞྭ་སྣམ། ཁལ་སར། འབྲི་མཛོ་བཅས། འབྲོང་དཔོན་ཨ་བུ་རྒྱལ་ནས། དར་རྟ་ཕོ་བཅས། དེ་ཙམ་ལས་གཞན་ཆུང་གྲལ་མ་བྲིས། ཡབ་ཚང་ནས་ཞེ་ཆེན་གྲྭ་པ་བསུ་མ་རྣམས་ལ་ལྷ་རེག་ཞྭ་ཕྲུག །དར་ཡུག །གོས་ཅན་ཁ་གང་། རྟ་ཕོ། ཨ་ཁུ། ཀླུ་བསེ། ཡོན་དགེ་གསུམ་ལ། དར་ཞྭ་ཕྲུག །ཁལ་སོགས་བྱིན། གཞན་ཁྲི་སྟོན་ཚུར་བཞག་དང་། ཆིབས་སྐྱེལ་བར་སྦྱིན་པ་སོགས་མ་བྲིས་ཚུལ་རྩ་ཐོ་ལ་འདུག་པ། གང་ལྟར་ཡང་འདི་རིགས་བྲིས་པ་ལ་དགོས་པ་ཡེ་མི་འདུག་རུང་། དམ་པའི་རྣམ་ཐར་སྔོན་མ་རྣམས་ལའང་དེ་འདྲའི་རིགས་བྲི་སྲོལ་ཡོད་འདུག་པ་དང་།
འདི་གའི་བརྩམ་གཞིའི་རྩ་ཐོ་ལའང་འདུག་པས་རགས་བསྡུས་ཙམ་བྲིས་པ་ལགས། འདི་སྐབས་ཚེ་རབས་གཏན་གྱི་བླ་སློབ་ཏུ་འབྲེལ་བ་རྒྱལ་ཚབ་རིན་པོ་ཆེ་༧པདྨ་གསང་སྔགས་བསྟན་འཛིན་ཆོས་རྒྱལ་ནས་གཙུག་ཕུད་བཞེས། མཚན་དུ་འགྱུར་མེད་མཐུ་སྟོབས་རྣམ་རྒྱལ་ཞེས་གསོལ་ནས་ཐུབ་བསྟན་རིན་པོ་ཆེའི་སྒོར་འཇུག་པ་མཛད། དེ་རིགས་སྐུ་ན་ཕྲ་བའི་ཚུལ་གྱིས་གཞན་རྐྱེན་ཁོ་ན་ལ་རག་ལས་པ་ཡིན་ཏེ། ཁྲི་སྟོན་སྐབས་རྒྱལ་ཚབ་རིན་པོ་ཆེའི་གསོལ་དཔོན་གྱིས་རྟ་ཁ་ཁྲིད་དེ་འགྲོ་བ་དང་། སྔོན་དུ་རྟ་པ་རྒྱ་གླིང་པ་གཉིས་ཀྱིས་གླིང་བུ་འབུད་བཞིན་འགྲོ་བ་དྲན་ཙམ་ཡོད་གསུངས། ༈ གཉིས་པ་བར་དུ་འདུལ་བའི་ཐབས་སྣ་ཚོགས་སྐུ་ཚེ་རིལ་པོར་མཛད་ཚུལ་ལ། བྱིས་པ་ཆུང་ངུའི་གནས་སྐབས་རྫོགས་ནས། རང་གི་བསམ་སྦྱོར་གྱིས་འཇུག་པའི་མཐུ་ཐོབ་ནས་བཟུང་། རང་དོན་དུ་གསན་བསམ་སྒོམ་གསུམ། གཞན་དོན་དུ་འཆད་རྩོད་རྩོམ་གསུམ། བྱ་བ་ལས་ཀྱི་འཁོར་ལོ་བཅས། རྒྱལ་སྲས་བྱང་ཆུབ་སེམས་དཔའི་རྣམ་ཐར་ཐབས་ཤེས་ཟུང་འབྲེལ་གྱི་མཛད་པའི་ཚུལ་རྣམས་གང་ཤེས་རིམ་པར་བཀོད་པ་དང་། འཁོར་ལོ་གསུམ་གྱི་ཆིངས་སུ་མདོར་དྲིལ་བ་གཉིས་ཀྱིས། དང་པོ་ལ། ཐོག་མར་ལྕགས་ཕག་དགུང་གྲངས་ལྔ་བཞེས་པའི་ཚེ། ཡབ་རྒན་ལ་ནད་ཕོག་སྐབས་ཟུར་མང་གཏེར་དྲུང་སོགས་བླ་མཆོད་བྱོན་པ་དང་། ཉེ་
འབྲེལ་རྣམས་འོང་བ་ཐུགས་དྲན་གསལ་བོར་ཡོད་ཚུལ་དང་། ཕ་ཡབ་མ་འཚོ་སོང་བའི་བདུན་དེད་ཀྱི་ཨ་མཆོད་ལ། དཔོན་ནག་བསྟན་དར་དང་། མ་ཎི་བསྟན་པར་བོད་པ་སོགས་བཞུགས་དུས། བསྟན་དར་ལགས་ནས་གཤར་བྲིས་ཀ་ཁ་བསླབ་པར་ཀེ་ཤ་ཅན་གྱི་ཡི་གེ་གཟིགས་ཚེ་འདི་ཀློག་པའི་དུས་རིང་པོར་འཐེན་དགོས་པ་ཡིན་གསུངས་པས་ཀུན་གྱིས་ངོ་མཚར་དུ་གླེང་བ། ཁོང་གིས་ད་ལྟ་སྒྲ་ཤེས་པའི་རྟེན་འབྲེལ་ཡིན་གསུངས་ཞལ་བཞེས་མཛད་འདུག་ཀྱང་། དེའང་ཡིན་པ་གོར་མ་ཆག་རུང་ད་དུང་དཔྱད་ན་ནག་ཚོ་དང་། ལོ་ཆེན་དྷརྨ་ཤྲཱི་སོགས་བརྡ་སྤྲོད་རིག་པའི་རྩེར་སོན་པ་དག་གི་སྐྱེ་སྲིད་ཡིན་པའི་འབྲས་རྟགས་བསླུ་མེད་དེ། དུ་བ་ལས་མེར་ཤེས་པ་ལྟ་བུའོ། །ལོ་དེའི་དགུན་ཁར་ཀུན་བཟང་དང་། ཨ་དོན་ཟེར་བ་གཉིས་ཀྱིས་ཞབས་ཕྱི་བྱས་ཏེ་སིབ་དགོན་དུ་བཞུགས། ཡི་གེ་ཕྲན་བུ་བསླབ་པས་རིག་པ་ཤིན་ཏུ་བཟང་བས་ན་མཉམ་གཞན་ལས་ཁྱད་པར་འཕགས་པས་དེ་སྐབས་སུ་ང་རྒྱལ་གྱི་རྣམ་པ་ཆེ་བ་ལྟ་བུའི་ཚུལ་ཞིག་ཡོད་གསུངས། འདི་སྐབས་སུ་རྒྱལ་ཚབ་རིན་པོ་ཆེ་སིབ་མདར་ཕེབས་ནས་དགོན་པ་སྤོ་བའི་ཕྱིར། ས་འདུལ་ལ་ཕུར་སྒྲུབ་གནད་སྨིན་མཛད་པའི་དྲུང་དུ་བྱོན་པ་ལ། སྤྲུལ་སྐུ་ན་ཕྲ་ཕྱིར་ཉམས་སད་ཀྱིས་རྩེད་མོས་ཙཀླི་འགའ་རེ་བསྟན་ནས་འདི་ཡག་པོ་རང་ཨེ་འདུག་གསུངས་པ་ལ། ཡག་པོ་འདུག་སྟེ་ད་དུང་ཁྲོམ་ཚོགས་འདི་རིགས་ལ་ཙཀླི་འདིས་དབང་ཞིག་མཛད་ན་ཕྱིར་ཞིང་ཇེ་ཡག་ཏུ་འགྲོ་འོང་ལགས་ཞུས་པས། ཙཀླི་རྣམས་བསམ་ལྷུན་གྱི་དབང་ཙཀ་འདུག་པས་རྒྱལ་ཚབ་རིན་པོ་ཆེ་ནས་
གནས་སྐབས་སུ་ཞལ་ལྟས་ཀྱི་ལ་ཉེ་དགེ་ཞིང་ཕུགས་སུ་བྱང་ཆུབ་སེམས་དཔའི་རིགས་ཅན་དུ་དགོངས་ནས་ཐུགས་ལྷག་པར་དགྱེས་ཏེ། དེ་མ་ཐག་ཁྲོམ་དབང་མཛད་པས་ཐམས་ཅད་ཀྱིས་ལེགས་པའི་བསྔགས་བརྗོད་འབའ་ཞིང་གླེང་བར་བྱས་སོ། ། ཆུ་བྱི་དགུང་ལོ་དྲུག་བཞེས་ཐོག་རྒྱལ་ཚབ་རིན་པོ་ཆེ་ནས་བཀའ་ཕེབས་ཏེ་ཁྲ་ཚང་དཔལ་བཟང ་ལ་དབུ་ལྗོན་བཙས་ནས་མ་བསིལ་བ་བྲེག་ཏུ་བཅུག་པ་སྒར་གཤམ་ལ་ཐུག་པས། ངེད་ཀྱི་སྐྲ་འདི་སྒར་མགོ་ས་མཐོ་ས་ལ་བསིལ་དགོས་གསུངས་ནས་རང་དམ་པའི་སྐྱེས་བུ་ཡིན་པ་ཟུར་གྱིས་བསྟན། འདི་ལོ་གཤོང་ནགས་རི་ཁྲོད་བླ་མ་ཀོང་པོ་མཆོག་ལྡན་པ་ཞེ་ཆེན་ནས་དབུ་ཞྭ་གྲི་ཐོད་མ་ཞིག་བསྐུར་བ་བཞེས། དེ་སྐབས་ཨ་ཁུ་ལྷ་རྡོག་གི་གྲོགས་མཆེད་གང་དྲི་འཕགས་མཆོག་ཟེར་བ་ཞིག་འདས་སོང་བའི་བསྔོ་ཞུས་རྟེན་ལ་སྦུབ་ཆོལ་ཆུང་ངུ་ཞིག་ཕུལ་བ་ཁྱིམ་དུ་རྔ་རོལ་སྤྲད་དེ་གདངས་དབྱངས་རོལ་མོ་འདྲ་མིན་དུ་མ་བྱེད་པའི་སྟངས་ཀའི་སྐུ་རྩེད་ཀྱིས་དུས་འདའ་བར་མཛད། དགུན་ཚེ་རི་ཁྲོད་དུ་བཞུགས་ནས་ཀོང་བླས་གཟབ་ཀྱི་ཀ་དཔེ་བྲིས་པ་དང་འབྲུ་དེད་རྣམས་བསླབ་པས་འབད་པ་ཡེ་མ་དགོས་པར་དགའ་རབ་ཐུགས་སུ་ཆུད། འདི་སྐབས་སུ་སྐུ་རྩེད་སྣ་ཚོགས་མཛད་པ་སོགས་བྱིས་པ་གཤིས་རྒོད་པའི་རྣམ་པ་ཡོད། དེའི་དབྱར་ཐོག་ཡབ་ཚང་རུ་ཐོག་ལ་བཞུགས་པ། ཏོ་ལེ་དབང་རྒྱལ་ཟེར་བའི་བན་རྒན་ཞིག་ཆུ་གཏོར་བསྔོས་ནས་བཞུགས་ཡོད་པ། ཉིན་ཕྱེད་ཐམས་ཅད་ཀྱི་
གསོལ་ཆས་སྐབས་བན་རྒན་ལ་ཞལ་འདོན་བཟང་སྤྱོད་ཅིག་ཆག་མེད་གསུང་རྒྱུ་ཡོད་པ་དེ་ལ་ཐུགས་ཆེར་གྱིས་ཞུགས་པ་བཞིན་སོང་ནས་བྱིས་པའི་རྩེད་མོ་དང་། ཟ་འཐུང་སོགས་ཅི་ཡང་མི་བྱེད་པར་གྱུར་ནས་ཨ་མཆོད་བན་རྒན་གྱི་སྔོན་དེར་བསྡད་ནས་འདུག་པ་དེ་འདྲ་ཉིན་ལྟར་རེད་སོང་པས། ཨ་ཁུ་ནས་བྱིས་པའི་ཟ་འཐུང་མ་ཟིན་བར་ཨ་མཆོད་ལ་བཟང་སྤྱོད་མ་གསུངས་ཟེར་ནས་བཀོད་སྦྱར་བྱེད་དགོས་པ་བྱུང་ཚུལ་གསུངས་པ་ནི། བཟང་སྤྱོད་ནང་ལ་བྱིས་པ་ཤིན་ཏུ་མཚར་ཏེ་ཡེངས་འགྲོ་བའི་རྒྱུ་མཚན་སྣ་གཅིག་མེད་རུང་། བཟང་སྤྱོད་ནི་རྒྱལ་སྲས་བྱང་ཆུབ་སེམས་དཔའི་སྨོན་ལམ་གྱི་སྒོ་བརྒྱ་ཕྲག་དུ་མ་ཐམས་ཅད་འདུས་པའི་སྨོན་ལམ་གྱི་རྒྱལ་པོ་ཡིན་པར་རྒྱལ་བས་བསྔགས་པ་ལྟར། དེའི་ཚིག་དོན་ལ་སེམས་དབྱེར་མེད་དུ་འདྲེས་འགྲོ་བ་ལྟར་བྱུང་བ་ནི། རྒྱལ་བའི་སྲས་ཀྱི་རྣམ་འཕྲུལ་ཡིན་པའི་རྟགས་ཐུན་མོང་མ་ཡིན་པ་ཡིན་ཏེ། ཟླ་བའི་ཞབས་ཀྱི་དབུ་མ་འཇུག་པ་ལས། སོ་སོའི་སྐྱེ་བོའི་དུས་ནའང་སྟོང་པ་ཉིད་ཐོས་ནས། །ནང་དུ་རབ་ཏུ་དགའ་བ་ཡང་དང་ཡང་དུ་འབྱུང་། །རབ་ཏུ་དགའ་བ་ལས་བྱུང་མཆི་མས་མིག་བརླན་ཅིང་། །ལུས་ཀྱི་བ་སྤུ་ལྡང་བར་གྱུར་པ་གང་ཡིན་པ། །དེ་ལ་རྫོགས་པའི་སངས་རྒྱས་བློ་ཡི་ས་བོན་ཡོད། །ཅེས་གསུངས་པ་ལྟར་རོ། །ཡང་སྐབས་ཤིག་རི་ཁྲོད་དུ་ཡོད་དུས། ཀུན་བཟང་རྒྱུད་ལ་ཉལ་ནས་ཡོད་པ་གཉིད་དུ་སོང་བ་ན་གྲིབ་གནོན་གྱི་གདོན་གྱིས་མནན་པས་འཇིགས་སྐྲག་བྱུང་བ་དེ་མ་ཐག་གུར་དྲག་གི་བསྐྱེད་རིམ་བཟུང་སྟེ། ཨ་རྩིག་བགྲངས་པས་མོད་ལ་སེལ་
སོང་བ་དེ་ཁོང་གི་བསྐྱེད་རིམ་གྱི་ཐོག་མ་ཡིན་གསུངས་འདུག་པ་འདི། སྔོན་ཚར་ཆེན་རྡོ་རྗེ་འཆང་བློ་གསལ་རྒྱ་མཚོ་བྱིས་པའི་གྲོགས་མང་པོ་དང་སྐུ་རྩེད་མཛད་སྐབས། རྒྱལ་འགོང་ཁོག་ཏུ་ཞུགས་པའི་ཁྱི་ཞིག་གིས་ཕྱག་ལ་བཟུང་བས་དེ་མ་ཐག་ཧེ་རུ་ཀ་ཞལ་བརྒྱད་པའི་བསྐྱེད་རིམ་མཛད་པས་ཁྱི་དེ་བྲོས་སོང་བ། དེ་འཕྲལ་རྩེ་གྲོགས་རྣམས་འཚོགས། ཁོང་གི་སློབ་དཔོན་དང་། གཞན་རྣམས་ཀྱི་བྱང་འདྲེན་པ་སོགས་ཀྱིས་སྟངས་ཀ་བྱས་ནས་འཇིམ་པ་ལ་ཟོར་གཏོར་བཅོས་ཏེ་འཕངས་པས་ཁྱིའི་ཁ་ནས་ཁྲག་སྐྱུག་སྟེ་ཤི་སོང་བས་གྲོང་མི་ཐམས་ཅད་ཧ་ལས་སོང་བ་དེ་དང་ཁྱད་མེད་དེ། སད་རྨི་གཉིས་མཚུངས་པ་ནི། རྒྱན་ལས། རྨི་ལམ་ན་ཡང་ཆོས་རྣམས་ཀུན། །རྨི་ལམ་ལྟ་བུར་ལྟ་ལ་སོགས། །ཞེས་གསུངས་པ་ལྟར་རོ། །འདིར་སྐབས་ཤིག་ལ་ཨ་ཁུ་ལྷ་དར་ཚང་ནས་གདན་ཞུས་ལ་བྱོན་ནས་དཔོན་སློབ་ལྔས་ཡོན་དགེའི་གཏེར་བྱོན་ཚེ་སྒྲུབ་བླུགས། དབང་བསྐོས་བླས་མཛད། རྟ་སོགས་འབུལ་ནོད་རྒྱ་ཆེན་ཁོང་སྤྲུལ་སྐུ་ལ་ཞལ་གསར་གྱི་དགའ་སྟོན་དུ་ཕུལ་བ་ཡོན་བདག་གི་ཐོག་མ་ཡིན་གསུངས། དེ་ནས་བྱིས་པའི་རྩེད་མོ་དང་སྒོ་གསུམ་གྱི་སྤྱོད་ལམ་རྒོད་བག་གི་རྣམ་པ་དུ་མ་བསྟན་པས། རི་ཁྲོད་པ་རྣམས་ཀྱི་སྤྲུལ་སྐུ་འདི་ལ་ངེད་རྣམས་ཀྱིས་མགོ་འཛིན་དང་ཞབས་ཕྱི་ཐིངས་ཐབས་དཀའ་འདུག་པས། ཁྱེད་རང་ཚང་ལ་མཁོ་ན་ཕར་བསུས་ན་དགའ་ཚུལ་ཞེ་ཆེན་བླ་བྲང་ལ་ཞུ་ཡིག་ཕུལ་བས། ཤིང་སྟག་དགུན་ཁར་བསུ་རྟ་སོགས་ཐབས་མི་ཆག་ཙམ་འབྱོར་བྱུང་བ། ཤིང་ཡོས་ཟླ་བ་བཞི་པའི་ནང་ལ་གཤོང་ནག་རི་ཁྲོད་ནས་མཐུན་རྐྱེན་ཡེ་
མ་མཛད་རུང་། ཡབ་ཚང་རང་ནས་ཞེ་ཆེན་དུ་ཕེབས་ཚེ་མཆོག་སྤྲུལ་རྣམ་གཉིས་སོགས་ལ་ཕུལ་རྒྱུའི་མཇལ་དར་དང་། གསོལ་ཆས་རྣམས་བསྒྲིགས་ནས། གྱམ་པའི་གསང་སྔགས། ཨ་ཁུ་ལྷ་རྡོག །ཀུན་བཟང་། ཨ་འཇའི་ཕྲིན་ལས་བཅས་ཞེ་ཆེན་དུ་འབྱོར་རྒྱུ་མཛད། སྐབས་དེ་ཚོར་དགེ་རྩེ་བླ་མ་པདྨས་གཟིགས་སྐྱོང་ཆེ་བར་མཛད། ལམ་དུ་ཞུགས་ནས་རྟ་ཁལ་རྣམས་ཆད་ལུས་དང་། ཁ་བ་ཆེ་བ་བབས་པས་འོ་རྒྱལ་གྱི་རྣམ་པ་ཆེ་བ་བྱུང་བ་དང་། གྲྭ་པ་གསང་སྔགས་ལ་གསར་ནད་དྲག་པོ་ཞིག་བྱུང་བ་ལ། ཅུང་ཟད་བློ་འདོན་ཤེས་རིགས་བབ་ཅོལ་དུ་རྩེད་མོའི་རྣམ་པ་ལྟ་བུས་བཀའ་བསྒོ་བྱས་པས་ཤིན་ཏུ་ཕན་སོང་གསུངས་པ་ནི། བྱང་ཆུབ་སེམས་དཔའི་ལུང་བསྟན་ཐོབ་པའི་རྟགས་སུ་ཡུམ་ལས་བཤད་པ་ལྟར་ཐོག་ཏུ་ཁེལ།
གདན་སར་ཕེཔས་ནས་རིག་བདག་རྣམ་གཉིས་གཙོས་ལྔ་རིག་སྨྲ་བ་དབང་ཆེན་འབུམ་དང་མཁས་གྲུབ་ཆེན་པོ་ཕྱག་མཛོད་པདྨ་དོན་ལྡན་སོགས་ལས་ཐུན་མོང་ཐུན་མིན་གྱི་དབང་ལུང་གདམས་ཁྲིད། མཐོང་བརྒྱུད་ཕྱག་བཞེས། སྒྲ་རྩིས་སོགས་ཀྱིས་ཤེས་རབ་ཀྱི་ལུས་སྟོབས་རྒྱས་པ།
དེ་ནས་ཞེ་དགོན་དང་ཉེ་ཕྱོགས་འབྲོག་རུའི་ནང་སླེབས་པ་དང་། སྤེས་རབ་སྐྱ་རིས་ཐར་ཚང་ཡབ་ཚང་དང་ཤགས་ཤེས་བཟང་རྩེད་ཆེ་བས་རྟ་ཁལ་ཆད་མཐུད་ཀྱིས་མཐུན་རྐྱེན་དགོས་རིགས་བསྒྲུབས་ཏེ། དཔལ་ཞེ་ཆེན་བསྟན་གཉིས་དར་རྒྱས་གླིང་དང་ཡེ་མི་རིང་བར་སླེབ་པ་དང་། དུང་ཆེན་གྱི་སྒྲ་སྙན་བརྗིད་མིས་རྩོལ་བས་བྱས་པ་མ་ཡིན་པར་ཐམས་ཅད་ཀྱིས་ཐོས་པ། དགོན་གྱི་སྲུང་མ་རྣམས་དང་། ཡུལ་དེའི་གཉུག་མར་གནས་པའི་གཞི་བདག་དཀར་པོའི་ཕྱོགས་ལ་དགའ་བ་རྣམས་ཀྱིས་བསུ་བ་ཡིན་པར་ཀུན་ཡིད་ཆེས་སུ་གྱུར། དེ་ནས་དགོན་དུ་སླེབ་པ་དང་སེར་སྦྲེང་སྤོས་སྣ་སོགས་ཀྱིས་བསུས་ཏེ་བཞུགས་གདན་འཇགས་པར་མཛད།
དེ་སྐབས་སུ་རབ་འབྱམས་རིན་པོ་ཆེ་ལྷ་ལྡན་ལ་ཆིབས་སྐྱོད་གནང་ཤུལ་དུ་ཐུག ། ཞག་ཤས་མཚམས་གཟའ་སྐར་འཕྲོད་སྦྱོར་ལེགས་པ་དང་བསྟུན་རྡོ་རྗེ་འཆང་༧རྒྱལ་ཚབ་པདྨ་གསང་སྔགས་བསྟན་འཛིན་ཆོས་རྒྱལ་མདུན་ལ་མཇལ་འཕྲད་མཛད། དེ་ཐོག་བདེ་གཤེགས་ཀུན་འདུས་ལས་བྱང་། བདག་འཇུག །དཀོན་མཆོག་སྤྱི་འདུས་ཆ་ཚང་། དམ་ཅན་གཏོར་བསྔོ། རྟ་མགྲིན་རྣམས་བློ་རྒྱུགས་ཕུལ། ཟླ་བ་གཉིས་ཙམ་ལ་པདྨ་བཀའ་ཐང་འབྲུ་དེད་བྱས། ཟླ་བ་ལྔ་པའི་སྨད་རྒྱལ་ཚབ་རིན་པོ་ཆེའི་ཞབས་ཕྱིར། རབ་འབྱམས་སྤྲུལ་པའི་སྐུ་ལྷ་ལྡན་ནས་དབུ་ཐོན་ལེགས་ལམ་གྱིས་ཕྱིར་བྱོན་པའི་ཆིབས་བསུར་བྱོན་པ། དྲེལ་གྱི་དཀར་མོ་ལེབ་དུ་མཇལ། སྡུད་ཤིང་སུམ་མདོར་སྒར་ཆེན་སླེབ། བསུ་བ་རྣམས་ཀྱིས་གསོལ་སྟོན་བྱས་པ་གྲོལ་འཕྲལ། རྒྱལ་ཚབ་མཆོག་ནས་གསུང་གིས་བསྐུལ་ཏེ། རབ་འབྱམས་རིན་པོ་ཆེའི་མདུན་ལ་ལྷོ་སིབ་སྤྲུལ་པའི་སྐུ་དང་། ཁོང་རྣམ་གཉིས་དཔེ་རྒྱུགས་འགྲན་དུ་བཅུག་པས་ཁོང་རང་ཆེས་ལྷག་པ་བྱུང་གསུངས། མེ་འབྲུག་ལོར་དབུ་མཛད་བསྟན་འཛིན་སློབ་དཔོན་དུ་བཞག་སྟེ་དགོན་གྱིས་བསྒྲིགས་འདོན་རིགས་སོགས་སྐྱོར་སྦྱང་མཛད། རྒྱུགས་དང་པོ། གཉིས་པ། གསུམ་པ་རྣམས་རྒྱལ་ཚབ་རིན་པོ་ཆེའི་མདུན་ལ་རིམ་པ་བཞིན་ཐོགས་མེད་དུ་ཕུལ། བཀའ་ཐང་སྦྲེལ་འདོན་ཚར་ལྔ་བཅུ་ཙམ་མཛད་དེ་ཀློག་འདོན་ཕུལ་དུ་ཕྱིན་པར་བྱུང་། དེ་ནས། མདོ་སྡེ་རྒྱན་ལས། སྦྱོར་བའི་སྔོན་དུ་སྙིང་རྗེ་དང་། །མོས་པ་
དང་ནི་བཟོད་པ་དང་། །དགེ་ལ་ཡང་དག་སྤྱོད་པ་ནི། །རིགས་ཀྱི་རྟགས་སུ་ངེས་པར་བཤད། །ཅེས་གསུངས་པའི་དོན་རྣམས་སྐུ་ན་ཤིན་ཏུ་ཕྲ་བ་བྱིས་པའི་དུས་ནས་བཟུང་འདི་བར། གཞན་དོན་རླབས་ཆེན་སྤྱོད་པའི་བྱང་ཆུབ་སེམས་དཔའི་རིགས་ཀྱི་རྟགས་དེ་དག་སྔར་ཡོད་པ་རྣམས་དགེ་བའི་བཤེས་གྲོགས་དང་འགྲོགས་པ་དང་། ཐེག་ཆེན་གྱི་མདོ་སྡེ་དང་བཀའ་ཐང་སོགས་ལ་ཐོས་སྦྱང་མཛད་པ་དང་། ཞེ་ཆེན་དགོན་དུ་མངའ་གསོལ་ཟིན་ནས་བརྟན་པ་དང་ཇེ་མངོན་ཇེ་གསལ་དུ་སོང་བ་མངོན་དུ་གྱུར་པས། གཞན་རང་གཞན་གཉིས་ཀྱི་ཡུལ་ན་གནས་པའི་སྐྱེ་བོ་ཕོ་མོ་རྣམ་དཔྱོད་ཞན་པ་མཆོག་དམན་ཀུན་གྱིས་བུས་པ་ན་ཕྲ་བས་སྟོབས་ཆུང་བ་དང་། སྐུ་སྤྱོད་ལམ་རྒོད་པས་བཟང་པོ་འོང་རེ་ཡེ་མི་བྱེད་ན་ཡང་། དཔལ་ཞེ་ཆེན་པའི་མཆོག་སྤྲུལ་རིན་པོ་ཆེ་རྣམ་གཉིས་ཀྱིས་གནས་སྐབས་བྱིས་པའི་རྩེད་མོ་ཙམ་ལ་ངེས་པ་མེད་དེ། བདག་ཅག་གི་སྟོན་པས་ཀྱང་གཞོན་ནུ་རོལ་རྩེད་སྣ་ཚོགས་མཛད་པ་བཞིན་ལ། གང་ལྟར་ཡང་བཟང་པོའི་རིགས་ཀྱི་མཚན་མ་བྱ་ཁྱུང་སྒོང་རྒྱ་བྲལ་བ་ལྟར་དེ་མ་ཐག་མངོན་དུ་མ་གྱུར་རུང་། རྒྱན་ལས། ཟབ་ཅིང་རྒྱ་ཆེན་བཤད་པ་གཞན་ལ་ཕན་ཕྱིར་བསྟན་པའི་ཆོས་ཆེན་ལ། །མི་ཤེས་བཞིན་དུ་མོས་པ་ཤིན་ཏུ་རྒྱ་ཆེན་འབྱུང་ཞིང་བསྒྲུབ་ལ་བཟོད། །ཅེས་པའི་དོན་རྣམས་ནི་ཇི་བཞིན་པ་ཐོག་ཏུ་ཁེལ་འདུག་པས། ངེས་པར་བཤད་སྒྲུབ་ཀྱི་བསྟན་པ་ལ་ཕན་པ་ཞིག་འོང་བར་དགོངས་ནས། ཡོན་ཏན་གྱི་རྩ་བ་ཐོག་མར་འབྲི་འདོན་ལ་སྦྱོང་བ་གལ་ཆེ་བས། དྲུང་ཡིག་བསྟན་འཛིན་ཐོག་མར་ཡིག་བྲིས་ཀྱི་སློབ་དཔོན་
དུ་བཞག་སྟེ་སྦྱང་རྩོལ་མཐར་ཕྱིན་ཏུ་བཅུག །དེ་ནས་རིམ་པར་མཁས་པ་ཆེན་པོ་ཕྱག་མཛོད་པདྨ་དོན་ལྡན་གྱིས། སྐར་རྩིས་དང་། འབྱུང་རྩིས། སྙན་ངག་རྣམས་བསླབས། སྙན་ངག་ལེའུ་གསུམ་གའི་རྩོམ་རྒྱུགས་དང་། རྩ་བ་བློར་བླངས་ནས་རྒྱུགས་འབུལ་ཞུས་པས་མཆོག་སྤྲུལ་རྣམ་གཉིས་དང་། སློབ་དཔོན་ཕྱག་མཛོད་བཅས་ཐུགས་མཆོག་ཏུ་དགྱེས་པར་གྱུར། མེ་སྦྲུལ་ལོར་རབ་འབྱམས་རིན་པོ་ཆེ་ལྷོ་ཁོག་ཕྱོགས་སུ་གདུལ་བྱ་ལ་ཕེབས་པའི་བླ་མཆན་མཛད་དེ་བྱོན་པར། རང་ཡུལ་ཡིན་ཡང་ཆོས་དང་འཇིག་རྟེན་གང་ཐད་ནས་རྩིས་ཆེར་བྱེད་མཁན་ཡེ་སུ་མེད། རབ་འབྱམས་ཀེ་སྟོད་ཕྱོགས་ལ་ཕེབས་ཤུལ་དུ་ཨ་ཁུ་སློབ་དཔོན་གྲྭ་པ་ཞིག་དང་དཔོན་གཡོག་གསུམ་ཟུར་མང་བདུད་རྩི་མཐིལ་དུ་གསོལ་སྟོན་ཞུས། གཏེར་དྲུང་ཟུང་དང་ཞལ་ལྷན་རྒྱས་མཛད། བཀུར་བཟོས་རྒྱ་གང་ཆེ་མཛད། གོས་སྟོད་ཏྲཾ་རྒྱན་ཅན་དང་། འབྲོང་པ་ཚངས་དབྱངས་ཉི་མས་རྟ་རྐྱང་ངུ་འགྲོས་ལྡན་བཅས་ཀྱི་རྣམ་བཞག་དང་། སློབ་དཔོན་བསྟན་འཛིན་ལ་མཛོ་ཞིག་དང་། གྲྭ་པ་ལའང་དེ་བསྟུན་བསྙེན་བཀུར་མཛད། དེ་ནས་ཚུར་ཞེ་ཆེན་དུ་ཕེབས་ནས་སློབ་སྦྱོང་ནན་ཏུར་མཛད་སྐབས་ཞེ་ཆེན་མཆོག་སྤྲུལ་ཟུང་བརྩེ་གཟིགས་ཆེ་རུང་། གཉེར་ལས་བྱེད་ཀྱིས་སྤྲུལ་སྐུ་སྐུ་ན་ཆུང་བས་འཕྲལ་འཕྲལ་འབུལ་ནོད་སོགས་ལག་ཕོག་མེད་པས་མི་མ་རབས་སྤྱོད་པས་ཕུག་ལ་རྟོག་དཔྱོད་མི་ཤེས་སྟབས་ཀྱིས་གསོལ་ཆས་སོགས་བཀྲེན་ཉམས་དང་། སློབ་དཔོན་དགེ་རྒན་གྱིས་ཀྱང་སློབ་སྦྱང་གི་དོན་དུ་གྱུར་མ་གྱུར་ཀུན་ལ་རྡུང་རྡེག་
དང་། རྒྱལ་ཚབ་མདུན་དབྱེན་ཞུ་མང་པོ་ཡང་བྱས་པས་ཐུགས་ལ་སྡུག་སྣང་ཆེ་བ་བྱུང་ཡང་རྐྱེན་སྣང་སྒྱུ་མར་གོ་ནས་དང་ལེན་ཡེ་མ་བྱས་གསུངས། ལར་ལྕགས་སྤྲེལ་བར་ལོ་དྲུག་ཏུ་ཞེ་ཆེན་བླ་བྲང་དུ་བཞུགས་སྐབས་མཆོག་སྤྲུལ་ཟུང་ནས་གཟིགས་པས་བསྐྱངས་ཀྱང་ལས་བྱེད་གཞན་གྱིས་བརྩེ་སྐྱོང་ཞན། ཡབ་ཡུམ་དང་ས་ཐག་རིང་། གཅེན་ཟུར་མང་སྤྲུལ་སྐུས་ཞེ་ཆེན་བླ་བྲང་དུ་སྐྱིད་པོར་མཛད་ནས་བཞུགས་ཡོད་སྙམ་གྱིས་གྲོ་སྐྱེལ་སོགས་མ་བྱུང་ཡང་ན་ཚོད་དང་ཡོན་ཏན་ལྷན་ཅིག་རྫོགས་པས་ཕྱི་ནང་ཀུན་ནས་བཀུར་སྟི་དང་སྙན་གྲགས་བཟང་པོ་འབྱུང་བའི་འགོ་ཚུགས་པ་ནི། ལེགས་པར་བཤད་པ་རིན་པོ་ཆེ་ལས། ཆེན་པོ་རེ་ཞིག་གུད་གྱུར་ཀྱང་། །དེ་ལ་གདུང་བ་བསྐྱེད་མི་དགོས། །ཟླ་བ་རེ་ཞིག་གཟས་ཟིན་ཀྱང་། །དེ་མ་ཐག་ཏུ་གྲོལ་བར་འགྱུར། །ཞེས་པ་ལྟར་རོ། །ཡང་དེ་ལས། སྐྱེ་བོ་ཡོན་ཏན་ཡོད་མེད་པའི། །བླང་དོར་བློ་གྲོས་ལྡན་པ་མཁས། །རྡུལ་དང་འདྲེས་པའི་ལྕགས་ཕྱེ་རྣམས། །ཁབ་ལེན་རྡོ་ཡིས་ལེན་པར་ཤེས། །ཞེས་པ་ལྟར། མཆོག་སྤྲུལ་རྣམ་གཉིས་ཀྱིས་བསྟན་འཛིན་གྱི་སྐྱེས་བུ་ཁྱད་དུ་འཕགས་པ་འོང་བར་དགོངས་ཏེ། རབ་འབྱམས་མཆོག་སྤྲུལ་རིག་འཛིན་དཔལ་འབྱོར་རྒྱ་མཚོ་ནས་ཡར་སྙན་ཞུས་མ་དགོས་པར་རང་བབ་ཀྱིས། སྨིན་གླིང་གཏེར་ཆེན་བཀའ་འབུམ་པོད་རྣམས་དང་། འདུས་པ་མདོ་དབང་ཆེན་མོ་རྩ་བ་ཡན་ལག་དང་བཅས་པ་དང་། བཀའ་བརྒྱད་རྣམ་གསུམ་སོགས་དང་། བཀའ་དྲིན་འཁོར་མེད་རྒྱལ་ཚབ་རིན་པོ་ཆེ་པདྨ་གསང་སྔགས་བསྟན་འཛིན་
ཆོས་ཀྱི་རྒྱལ་པོས་རྒྱལ་བའི་བཀའ་འགྱུར་རིན་པོ་ཆེ་པོད་ཆེན་བརྒྱ་ཕྲག་ལྷག་དང་། ཀུན་མཁྱེན་རིན་པོ་ཆེའི་མཛོད་ཆེན་བདུན་སོགས་ཀྱི་ལུང་དང་། འདོད་འཇོའི་བུམ་བཟང་དང་། སྙིང་ཐིག་ཡ་བཞི་སོགས་ཀྱི་དབང་དང་། དཀོན་མཆོག་སྤྱི་འདུས་སོགས་དབང་ལུང་ཁྲིད་བཅས་སྦྲགས་མའི་རིམ་པ་དང་། དེ་མཉམ་དུ་རྫོགས་ཆེན་པའི་མཁན་པོ་ཀུན་གཟིགས་དགེ་བའི་བཤེས་གཉེན་རིག་འཛིན་བཟང་པོ་ཞེ་ཆེན་དུ་ཕེབས། མཆོག་སྤྲུལ་རྣམ་གཉིས་དང་ཐུགས་དགོངས་ནང་གཤིན་གཅིག་འདྲེས་ཀྱིས་དབང་ལུང་གདམས་པ་དུ་མ་ཕར་གསན་ཚུར་གསན་མཛད་པ་ཐམས་ཅད་ལྷག་ལུས་མེད་པ་གསན་བཞེས་མཛད་པ་བཅས་ཞིབ་ཏུ་བྲིས་ན་ཡི་གེས་འཇིགས་ལ། དེར་མ་ཟད་དེང་སང་བླ་ཆེན་ཕལ་ཆེར། དང་པོ་དབང་ལུང་སོགས་ཐོབ་འདོད་དང་རྩོལ་སྒྲུབ་མེད་པ། སླད་ནས་ཞུ་མི་སུ་བྱུང་ལ་བླ་མ་གཞན་དང་གཞན་གྱིས་ཐོབ་ཡིག་འདི་ནང་ལྟར་ཁོ་བོས་ནོད་དོ་ཟེར་ནས་སྔར་ཐོབ་ཚུལ་ཇི་འདྲ་ཡིན་སྨོས་རྒྱུ་མེད་པ་དང་། ད་ལྟ་ཡང་སྔོན་དུ་དཔེ་ཆ་གང་བྱུང་གྱ་ཚོམ་དུ་བཀླགས་ལ་རིངས་པ། ཀུན་མཁྱེན་འཇིགས་མེད་གླིང་པས། བསྟི་གནས་ཉམས་པར་དོགས་པའི་རྫིང་བུ་རུ། །ཐོས་བསམ་སྒོམ་པ་གནས་མིན་ཁྲུས་ལ་ཞུགས། །ཞེས་དང་། ཤིང་གི་རང་འཐག་ལྟ་བུ་དང་། ཁྲོན་པའི་ལག་འགྲོ་ལྟ་བུ་གསུངས་པ་སོགས་དང་ཚུལ་མཐུན་པ་དེ་འདྲ་ནི་མ་ཡིན་པས། ཐོག་མར་ཐོབ་ཚུལ་བརྒྱུད་པ་དང་བཅས་པ། དེ་ལྟར་ཐོབ་པའི་ཆོས་ཚན་གྱི་རྣམ་གྲངས། ཐ་ན་བརྒྱུད་པ་འདྲ་མིན་རེ་དང་། ཆོས་ཚན་སྣ་རེ་ལུང་ཡོད་མེད་ཀྱི་དབྱེ་གསལ་བཅས། གསན་
ཡིག་བཻ་ཌཱུརྱའི་བུམ་བཟང་ཁ་སྐོང་ལེ་ཚན་རྣམས་བཅས་སྐུ་དངོས་ཞལ་བཞུགས་པའི་ཚེ་ཞིབ་ལ་གཙང་དག་ཁྲིགས་སུ་བཏབ་སྟེ་བཀོད་པའི་ནང་དུ་ལེགས་པར་གསལ་བས། སླར་ཡང་འདིར་བྲིས་པ་ན་ཟློས་པའི་སྐྱོན་ལས་དགོས་པ་ཆུང་བར་སེམས་ཏེ་ཆེ་ལོངས་ཙམ་ལས་ཐོག་མཐའ་ཀུན་ཏུ་བཀོད་པར་མ་བྱས་སོ། །རྒྱལ་ཚབ་རིན་པོ་ཆེས་འདོད་བུམ་གནང་སྐབས། མ་ཏིའི་འཇམ་དཀར་དང་། དབྱངས་ཅན་མའི་དབང་མཛད་པ་དང་། གཟའ་སྐར་ལེགས་པ་གུང་བསྒྲིགས་ཏེ། ལྔ་རིག་སྨྲ་བ་བླ་མ་སངས་རྒྱས་ཆོས་འཕགས་སམ་དབང་ཆེན་འབུམ་གྱི་མདུན་ནས་གོ་སླ་བ་རྒྱལ་པོ་ལུགས་ཀྱི་བསྟན་བཅོས་སྒྲ་ཀ་ལཱ་པའི་རི་མོ་སྦྱང་རྩོལ་གྱི་དབུ་བཙུགས། མཚམས་སྦྱོར་ལྔ་པ་དང་། མིང་ལེའི་རི་མོ་རྣམས་སློབ་དཔོན་བླ་མ་ཐུགས་གཏུམ་ཞིང་རུ་ངར་བས་རྒྱུགས་ལེན་སོགས་ནན་ཏུར་ཆེར་མཛད་པས་དཔྱིས་ཕྱིན་པར་ཐུགས་སུ་ཆུབ། དེ་མཉམ་ཡིད་བཞིན་མཛོད་རྩ་བ་དང་། སྡོམ་གསུམ་རྩ་བ་སྤྲུལ་སྐུ་རྣམ་གཉིས་མདུན་ལ་བློ་རྒྱུགས་ཕུལ། ས་རྟ་དགུང་གྲངས་བཅུ་གཉིས་བཞེས་ཐོག་རྫོགས་སྤྲུལ་བཞི་པ་མི་འགྱུར་ནམ་མཁའི་རྡོ་རྗེ་ལྡན་ར་ཁོ་དཔོན་ཚང་ལ་འཁྲུངས་པ། རུ་དམ་ཨོ་རྒྱན་བསམ་གཏན་ཆོས་གླིང་དུ་སྔ་འགྱུར་བསྟན་པའི་གསལ་བྱེད་ཉི་ཟླའི་མཆེད་པོར་དགོན་ཡར་མར་གྱི་ཆེ་དགུ་རྣམས་དང་། གཞན་དགོན་ལག་ཏུ་གཏོགས་རིགས། བསྟན་པའི་སྦྱིན་བདག་སྡེ་གླིང་གཙོས་ཐམས་ཅད་ཀྱིས་མངའ་གསོལ་བའི་ཡོ་ལངས་རྔམ་ཆེན་བྱེད་སྐབས། ཞེ་ཆེན་ནས་མཆོག་སྤྲུལ་རྣམ་གཉིས་བྱོན་ཏེ་འཆི་མེད་
ཡང་སྙིང་གི་སྒོ་ནས་སྐུ་ཚེ་མི་འགྱུར་བའི་ཞབས་བརྟན་དང་། དེ་མཉམ་ཁྲི་འབུལ་རྒྱ་ཆེན་བསྟབས་པའི་སྐབས། ཁྲོམ་སྐྱ་སེར་མཆོག་དམན་ཁྲི་ལྷག་ཙམ་གྱི་དབུས་སུ་ཁྲིའུ་ཆུང་ཞིག་གི་སྟེང་དུ་བཞེངས་ཏེ། ཁྲིའུ་དེ་ཞེ་ཆེན་གྲྭ་པ་འགས་བརྟེན་ནས། ཕུན་སུམ་ཚོགས་པ་ལྔ་དང་། མདོ་སྔགས་ཀྱི་ཆོས་ཀྱི་བབ་ཚུལ། མཎྜལ་གྱི་རྣམ་བཤད། དེ་མཉམ་འཇིག་རྟེན་སྐྱེ་བོ་ཡ་རབས་ཀྱི་རྣམ་བཞག །གཞན་བརྗོད་འོས་རིགས་གང་ལ་གང་དགོས་ཀྱི་འབེལ་བའི་གཏམ་མཁས་པ་དགྱེས་པའི་ལེགས་བཤད་ཁྱད་ཐོན་པར་མཛད་པས། སྡེ་དགེ་གཉེར་པ་སྟག་རྒྱས་ནས་དཔའ་དར་ལ་ནང་མཛོད་ཉིན་བདེ་མ་ཞིག་ཕུལ་བ་སོགས་ཀྱིས་སྙན་གྲགས་ད་ལྟའི་བར་དུ་འདི་ཕྱོགས་ཀྱི་སྐྱེ་བོ་རྣམས་ཀྱིས་གླེང་བ་ནི། ཁྱད་པར་འཕགས་བསྟོད་ལས། ཁྱོད་ཀྱིས་འབྲས་བུ་མཆོག་བརྙེས་པའི། །གྲགས་པ་བརྒྱ་བྱིན་སྒྲོགས་པར་གྱུར། །ཅེས་པའི་དཔེ་ལྟར་སོང་། ས་ལུག་དགུང་ལོ་བཅུ་གསུམ་བཞེས་ཚེ་ཕྱག་མཛོད་མཁས་གྲུབ་ཆེན་པོ་པདྨ་དོན་ལྡན་སྐུ་གཤེགས་སོང་བས། དེ་ཕྱིན་རིག་གནས་སློབ་སྦྱོང་དུ་ཀཿ ཐོག་ཏུ་བྱོན་ན་མ་གཏོགས་སྤྲུལ་སྐུ་འདི་སྐུ་ཡོན་ལེགས་པར་འབྱོང་ཐབས་ཤིག་དཀའ་འདུག་པས་དེ་ལྟར་བྱ་དགོས་ཟེར་སྤྲུལ་སྐུ་རྣམ་གཉིས་བཅས་ཀྱིས་ཐུགས་ཐག་བཅད། དེ་སྐབས་ནས་བཟུང་སློབ་དཔོན་བསྟན་འཛིན་གྱིས་བྱམས་སྐྱོང་ཕ་མའི་དོད་ཐུབ་ངེས་ཡོད་པ་དང་། གཉེར་པ་ཨ་གྲོ་དར་རྒྱས་གཉིས་ཀྱང་ཡོན་མཆོད་ནང་གཤིན་བཟང་སྟབས་གྲོས་བསྟུན་གྱིས་ཁོང་ལའང་མཆོག་སྤྲུལ་རྣམ་གཉིས་
དང་ཕྱོགས་མཐུན་གྱི་བསྙེན་བཀུར་ལེགས་པར་སྦྱར་བས་ཞེ་ཆེན་གྱི་སྐུ་ངོ་ཞིག་གི་རྣམ་འགྱུར་དོད་པར་བྱུང་གསུངས། འདི་ལོ་དགུན་ཁར་རྫ་རྒྱུད་ལ་སྤྲུལ་སྐུ་ངོ་གསར་གྱིས་ནས་བསོད་ལ་བྱོན་པས་འབྲུ་ལྡོམ་སོགས་ལེགས་པར་བྱུང་།
ཀཿཐོག་ཏུ་ཀུན་གཟིགས་དགེ་པཎ་སོགས་བཀུར་ཏེ་ཡོན་ཏན་རྒྱ་མཚོར་མངའ་བརྙེས་ཏེ་སྲས་ཀྱི་ཐུ་བོར་གྱུར་པ།
ལྕགས་སྤྲེལ་གནམ་ལོ་གསར་འཆར་གྱི་ཟླ་བ་དྲུག་པའི་ནང་དུ། ཚེ་རབས་དུ་མ་ནས་མཐུན་པའི་གྲོགས་སུ་མར་མེ་དང་སྡོང་བུ་ལྟ་བུར་གྱུར་པ་དགེ་སློང་འགྱུར་མེད་ཆོས་རྒྱལ་གྲོགས་སུ་ཁྲིད་ནས། སྐྱེལ་མ་དང་བཅས་སྔ་འགྱུར་བསྟན་པའི་ཆུ་མགོ་གངས་ལ་ཐུག་པ་ལྟ་བུ་མཁས་དང་གྲུབ་པའི་འབྱུང་གནས་ཤར་ཀཿ ཐོག་རྡོ་རྗེ་གདན་དུ་དམ་པ་ཆོས་ཀྱི་ཕྱིར་སྐོམ་པ་ཆུ་འདོད་པའི་ཚུལ་གྱིས་ཕྱིན་ནས། ཟླ་བ་དེའི་ཚེས་ཉེར་གཅིག་ཉིན་གཟའ་སྐར་དུས་སྦྱོར་ཕུན་སུམ་ཚོགས་པ་འཛོམས་པར། དཔལ་རྡོ་རྗེ་འཆང་དང་ངོ་བོ་རྣམ་དབྱེར་མེད་པ་བཀའ་དྲིན་འཁོར་མེད་མཚན་བརྗོད་པར་དཀའ་བ། གནས་ལྔ་རིག་པའི་པཎྜི་ཏ་ཆེན་པོ་འགྱུར་མེད་ཚེ་དབང་མཆོག་གྲུབ་སྦྲ་མགོ་རི་ཁྲོད་དུ་བཞུགས་པའི་དྲུང་དུ་མཇལ། སངས་རྒྱས་ཐམས་ཅད་ཀྱི་གསུང་རྡོ་རྗེའི་རང་གཟུགས་རྡོ་རྗེ་རྣོན་པོ་དངོས་ཀྱི་དད་པ་ཐོབ། ཞེ་ཆེན་པའི་ཞུ་རྒྱ་དང་རྡིལ་ཚད་རྟ་རྨིག་མ་བཅས་ཕུལ། ལུགས་གཉིས་ཀྱི་སྒོ་ནས་རྗེས་སུ་བཟུང་བའི་དབུགས་དབྱུང་བསྩལ། སྐྱེལ་མ་རྣམས་རང་ཡུལ་དུ་ལོག །ཟླ་བ་བདུན་པའི་ཚེས་གཅིག་ལ་དབུ་འཛུགས་ཀྱིས། སྒྲ་ཀ་ལཱ་པ་ས་བཟང་འགྲེལ་ཆེན་གྱི་སྟེང་ནས། མཚམས་སྦྱོར་ལྔ། ནཱ་དྲུག །ཨཱ་བརྒྱད། ཀྲཏ་དྲུག་བཅས་ཀྱི་རི་མོ་རྣམས་སློབ་སྦྱོང་རྒྱུགས་འབུལ་བཅས་རང་རྐྱ་ཐུབ་པ་སྦྱངས། ཟླ་བ་བཅུ་གཉིས་པའི་
ཚེས་ཉེར་བཞིའི་ཉིན་སྒྲ་ཙནྡྲ་པའི་རི་མོའི་དབུ་བཟུང་ནས། ཀུན་མཁྱེན་སི་ཏུ་ཆོས་ཀྱི་འབྱུང་གནས་ཀྱི་འགྲེལ་ཆེན་པོད་གསུམ་དང་། འདོད་འཇོ་རྩ་འགྲེལ་པོད་གཉིས་བཅས་པ་དང་། གཞན་ཡང་དབྱངས་ཅན་སྒྲ་མདོ་དང་། པཱ་ཎི་པའི་རི་མོ་མཐར་ཆགས་དང་། སྡེབ་སྦྱོར་རིན་ཆེན་འབྱུང་གནས་ཀྱི་སྟེང་ནས་སུམ་འབེབས་ཀྱིས་དཔེར་བརྗོད་པྲཏྟ་ཛཱ་ཏིའི་རིགས་དབྱེ་ཐ་དད་པ་ཕལ་ཆེར་དང་། ངོ་མཚར་རྟོགས་བྱེད་ཀྱི་ཆོ་ག་བཅས་ཞིབ་ལ་གཙང་དག་རྒྱུགས་ཕུལ་བ་དང་། སླར་ཡང་སྙན་ངག་ལེའུ་གསུམ་ཀའི་རྩོམ་རྒྱུགས་ཀྱང་ཕུལ་ཏེ། བསླབ་སྦྱང་དེ་རིགས་ཁྲིད་ནི་ཁྲིད་ལ་ཤེས་ནི་མ་ཤེས་ཟེར་བའི་བྱས་ལོ་དང་ཐོས་ལོ་མ་བྱས་པར་ཐུགས་ཐོག་དང་དཔེ་ཆ་ལའང་གཟིགས་པ་ཙམ་གྱིས་བཤད་པ་དང་ལག་ལེན་ཐེབས་ངེས་སུ་སྦྱངས། སྐྱབས་རྗེ་དེ་ཉིད་ཀྱི་མདུན་ནས་ཀློང་གསལ་སྐོར་པོད་བཅུ་གཉིས་དང་། བླ་མ་དགོངས་འདུས་ཀྱི་དབང་ལུང་ཚང་མ། སྒྱུ་འཕྲུལ་ཞི་ཁྲོའི་དབང་དང་། རབ་འབྱམས་པ་ཨོ་རྒྱན་ཆོས་གྲགས་ཀྱི་ཡིག་ཆའི་སྟེང་ནས་རྒྱུད་ཀྱི་སྤྱི་དོན་དང་། གསང་བདག་དགོངས་རྒྱན་སྟེང་ནས་ཚིག་དོན་རྣམས་སྨིན་ཁྲིད་ཟབ་རྒྱས་དང་། ཁྱད་པར་ཀློང་གསལ་རྡོ་རྗེ་སྙིང་པོའི་ཁྲིད་སྔོན་འགྲོ་དང་། བསྐྱེད་རྫོགས་ཀྱི་ཉམས་ཁྲིད། ཁྱད་པར་དུ་ཁྲེགས་ཆོད་དང་ཐོད་རྒལ་གྱི་ཁྲིད་རྣམས་ཐུན་མོང་མ་ཡིན་པའི་ལུགས་སུ་བསྩལ་ནས། རིག་པ་རང་ངོ་གཅེར་མཐོང་དུ་སྤྲོད་པས་ཟབ་པ་དང་རྒྱ་ཆེ་བའི་ཕྱོགས་གཉིས་ཀ་ནས་བཀའ་དྲིན་འཁོར་མེད་ཀྱི་རྩ་བའི་བླ་མར་གྱུར་པའོ། །ཀཿ ཐོག་གྲུབ་པའི་དབང་པོ་རྡོ་རྗེ་འཆང་མཆོག་སྤྲུལ་ཀུན་བཟང་ངེས་དོན་
དབང་པོ་ནས། ཀློང་གསལ་གྱི་རྩ་རླུང་སྨིན་ཁྲིད་འཁྲུལ་འཁོར་བཅས་པ་གནང་ནས་སྦྱང་བ་གནད་དུ་འགྲོ་ངེས་མཛད་པའི་ཕྱག་རྗེས་ཕྱི་ནང་གི་དྲོད་སྐྱེ་བ་དང་། ཁྱད་པར་མཆིན་ནད་ཀྱི་བསྙུན་ཁམས་ཡོད་པའང་ལྷག་མེད་དུ་དག །གཏེར་ཆེན་བདུད་འདུལ་གྱི་གཏེར་ཆོས་དང་བཀའ་འབུམ་པོད་བཅུ་གསུམ་གྱི་དབང་ལུང་ཡོངས་རྫོགས། དེ་ནང་ཉམས་ལེན་དོགས་གཅོད་སྐོར་སོགས་ཞིབ་ལ་གཙང་དག་གི་བཀའ་དྲིན་རྒྱ་ཆེན་པོ་བསྩལ། ཤེས་བྱ་ཀུན་གཟིགས་མཆོག་སྤྲུལ་སི་ཏུ་རིན་པོ་ཆེ་ཨོ་རྒྱན་བསམ་གྲུབ་ནས་བདུད་འདུལ་པོད་བཅུ་གསུམ་གྱི་དབང་ལུང་མཐའ་རྒྱས། བཀའ་བརྒྱད་བདེ་གཤེགས་འདུས་པ་པོད་བཅུ་གཉིས་ཀྱི་དབང་ལུང་ཡོངས་རྫོགས་བཅས་གནང་། སྐྱབས་རྗེ་ཐམས་ཅད་མཁྱེན་པ་རྡོ་རྗེ་འཆང་དངོས་རིག་འཛིན་འཇིགས་མེད་མགོན་པོ་དང་། རྨོག་སྤྲུལ་སྙིང་གི་ནོར་བུ་འཇིགས་བྲལ་ཆོས་དབྱིངས་རྡོ་རྗེ་རྣམ་པ་གཉིས་ནས་ལུགས་གཉིས་ཀའི་སྒོ་ནས་བརྩེ་གཟིགས་རྒྱ་ཆེ་ལ། ཁྱད་པར་དུ་སྔ་མའི་མདུན་ནས་དྲག་པོ་ཡེ་ཤེས་རབ་འབར་གྱི་དབང་ལུང་དང་། རྗེས་མའི་མདུན་ནས་ཀློང་གསལ་གཏེར་བྱོན་དབང་ལུང་ཡོངས་རྫོགས་སོགས་གསན། སྐྱབས་རྗེ་རྡོ་རྗེ་འཆང་འདི་ལྔ་ནི་ཆོས་དང་འཇིགས་རྟེན་གང་ཐད་ནས་བཀའ་དྲིན་མཆོག་ཏུ་ཆེ་བས་དྲིན་དྲན་པ་ཙམ་གྱིས་ལག་པད་སྙིང་ཁར་ཟུམ་པ་ལ་རྩོལ་བ་མི་དགོས་པ་ལྟ་བུ་ཡིན་གསུངས། སྔ་འགྱུར་བསྟན་པའི་ཆུ་མགོ་གྲྭ་ས་ཆེན་པོ་འདིར་བསྡད་པའི་རིང་ལ་ཤེས་རབ་རྣམ་པ་གསུམ་གྱི་ཡོན་ཏན་འཕེལ་ཞིང་ཇི་ཙམ་བསྡད་རྒྱུ་བྱས་ཀྱང་སྡོད་སྙིང་སྤྲོ་བ་སོགས་སྐྱེ་བ་སྔོན་མ་རྣམས་སུ་བཟང་
པོའི་ལས་ཀྱི་འབྲེལ་བ་ཤིན་ཏུ་གོམས་པའི་གནས་སུ་སོམ་ཉི་བྲལ། གཞན་ཡང་གྲུབ་དབང་བླ་མ་དམ་པ་སྒོམ་བྱུང་གི་ཤེས་རབ་ཀློང་རྡོལ་བ་བྱང་ཆུབ་སེམས་དཔའ་རྨོག་སྟོན་ནམ་མཁའ་རྡོ་རྗེའི་མདུན་ནས་འཇའ་ཚོན་དཀོན་མཆོག་སྤྱི་འདུས་ཏའུ་གྲུབ་ཆེན་གྱི་ཁྲིད་ཡིག་ལྟར་སྨིན་ཁྲིད་མཛད་པ་གསན། ཐོད་རྒལ་གྱི་བཞུགས་སྟངས་སོགས་ཀྱིས་ཕྱག་ཁྲིད་མཛད། འདི་དང་དགེ་རྩེ་ཁྲོ་ཤུལ་བླ་མ་སྐལ་ བཟང་སོགས་ངེད་ལ་ཐོས་བསམ་དང་ཉམས་ལེན་ཅུང་ཟད་རེ་ཡོད་པ་འདི་མྱུ་གུ་ལ་ཆུ ་ལུད་ལྟ་བུ་མཐུན་པའི་རྐྱེན་བླ་ན་མེད་པ་ཡིན་གསུངས། ཀཿ ཐོག་པ་འཇམ་མགོན་མི་ཡི་གཟུགས་ཅན་དགེ་རྩེ་རིན་པོ་ཆེས་མན་ངག་ལམ་རིམ་གྱི་འགྲེལ་ཆེན་པོད་གཉིས་གསར་རྩོམ་གྱི་ཞབས་ཕྱི། ལུང་ཁུངས་ཀྱི་དཔེ་ཆ་རྣམས་འཚོལ་རྒྱུ་དང་ཚིག་དོན་ལྗགས་བཀོད་མཛད་རིགས། སྒྲ་དོན་འདྲེས་འཛིན་གྱིས་སྤོབས་པས་ནོར་འཁྲུལ་ལྷག་ཆད་བྲལ་བ་ཉིན་མོར་སྐུ་མདུན་ནས་བྱང་ནག་ཏུ་ཕབ་རིགས། དེའི་མཚན་མོ་གཉིད་སྤངས་ཏེ་སྣང་གསལ་གྱི་འོད་ལ་ཤོག་ཐོག་ཏུ་འབེབས་པའི་ངལ་བ་དང་དུ་བླངས་ནས་རང་ལའང་གསང་སྔགས་ཐུན་མོང་མ་ཡིན་པའི་ཆོས་མཐའ་དག་གི་སྒྲོ་འདོགས་ཞར་ལ་ཆོད་པ་དང་། རྩ་བའི་བླ་མའི་ཞབས་ཕྱི་ཐུགས་ཀྱི་བཞེད་པ་ལྟར་འགྲུབ་པ་དང་། ཆོས་ལ་དཀའ་བ་སྤྱད་པས་ལས་ཀྱི་སྒྲིབ་པ་བྱང་ཞིང་ཚོགས་རྫོགས་པ། རྙིང་བསྟན་མཛེས་པའི་རྒྱན་དུ་ཆེ་བ་སོགས་བྱ་བ་གཅིག་གིས་དགོས་པ་མང་པོ་ཆབས་ཅིག་ཏུ་འགྲུབ་པས་དགའ་སྤྲོ་རྒྱ་ཆེན་པོ་བྱུང་བ་ཡིན་གསུངས།
ཀུན་ཤེས་ཀྱི་མཚན་གྱི་ཅོད་པན་དང་མངའ་གསོལ་གཟེངས་བསྟོད།
༈ དེ་འཕྲལ་ཀཿ ཐོག་སྨྲ་བའི་སེངྒེ་ཆེན་པོས་ལེགས་སྦྱར་ཀུན་བཤད་ཀྱི་མཚན་དུ། ཕྱི་ནང་གི་རིག་པའི་གནས་རྒྱ་མཚོ་ལ་སྨྲ་བའི་སྤོབས་པ་མཆོག་ཏུ་དགེ་བར་གཟིགས་ནས། འཇམ༷་དབྱང༷ས་དགྱེ༷ས་པ༷འི་བློ༷་གྲོ༷ས་མ༷ཚོ་སྐྱེས༷་བཞ༷ད་པ༷འི་སྒྲ༷་དབྱང༷ས་ཞེས་བྱ་བ་སྐད་གཉིས་ཤན་སྦྱར་གྱི་སུམ་ཕབ་མཛད་དེ་མིང་གི་ཅོད་པན་བསྩལ་ནས། མངའ་གསོལ་གཟེངས་བསྟོད་སྨོན་ལམ་དང་བཅས་ཆོས་སྨྲ་བའི་གོ་སར་དབང་བསྐུར་བ་དང་། ལེགས་སྐྱེས་ཀྱི་གནང་སྦྱིན་རྒྱ་ཆེན་མཛད་པའི་ཆེད་དུ་བརྗོད་པའི་ལེ་ཚན་ནི། ༡ སྨིན་གྲོལ་གསེར་གྱི་འཁོར་ལོ་སྔོན་འགྲོའི་རང་རིག་གདོད་མའི་རྒྱལ་སྲིད་ཀྱིས། །ཀ་དག་ཆོས་སྐུའི་ཁམས་ལ་དབང་བསྒྱུར་ལྷུན་གྲུབ་སྣང་བཞིའི་དཔུང་པ་ཡིས། །ཟག་བཅས་ཆོས་ཀུན་ལོངས་སྐུའི་དབྱིངས་སུ་མཇའ་ལུས་གྲུབ་མཐའ་རྫོགས་ནས་སླར། །འགག་མེད་ཐུགས་རྗེའི་སྤྲོ་བ་དང་བཅས་སྤྲོ་མཛད་བླ་མ་དམ་པའི་དྲུང་། །༡ སྐལ་བ་དགེ་བའི་འདུས་བྱས་རིན་ཆེན་རྡུལ། །ཚོགས་གཉིས་ལེགས་སྨོན་གྱིས་བཟུང་ཕན་བདེའི་དཔྱ། །འགྲོ་བ་ཀུན་གྱི་ཡིད་བཞིན་འདོད་འཇོ་བའི། །འདྲེན་པ་གང་ཁྱོད་རྣམ་པར་རྒྱལ་གྱུར་ཅིག ། ༢ འཇམ༷་དབྱང༷ས་རབ་དགྱེ༷ས་ཀུན་ཤེས་པ༷འི། །
བློ༷་གྲོ༷ས་ལང་ཚོ་དར་བབ་པ། །མཚོ༷་སྐྱེས༷་རྒྱལ་བ་བཞ༷ད་པ༷འི་སྒྲ༷། །དབྱ༷ངས་ཀྱིས་བསྔགས་པས་དགེ་གྱུར་ཅིག ། ༣ སྒྲ་རྟོག་ཤེས་བྱའི་ཆོས་དང་མི་མཛའ་བའི། །བྱ་བྲལ་གདོད་མའི་འགོག་བདེན་རང་རིག་ཏུ། །བཅོས་སླད་བྲལ་བ་རྒྱལ་བའི་དགོངས་བརྒྱུད་དེ། །བདེན་མཆོག་དེ་ཡིས་བདེན་སྨོན་འགྲུབ་གྱུར་ཅིག །༤ བཏུང་བའི་ཕུལ་གྱུར་ཞི་བསིལ་བདུད་རྩིའི་རྒྱུན། །གསན་བསམ་སྒོམ་པས་རྫོགས་པ་ཆེན་པོའི་རོ། །ཆོས་རྣམས་ཡོངས་ཀྱི་མདོ་དང་རྒྱས་པ་རུ། །ཉམས་སུ་མྱོང་བ་སྟོབས་སུ་གྱུར་པ་དང་། །༥བྱང་ཆུབ་སེམས་གཉིས་མཆིལ་བའི་གཞན་དབང་དུ། །གྱུར་ཅིང་བསླབ་གསུམ་གསེར་གྱི་དྲ་བས་མཛེས། །བསྐྱེད་རྫོགས་གསུམ་གྱི་ཐེག་པ་རྨད་བྱུང་བ། །གླང་པོ་ཆེན་པོའི་བྱ་བ་འགྲུབ་གྱུར་ཅིག །
༦འཁོར་བ་ཕུང་ལྔས་དམ་ལ་བཞག་པའི་ཆོས། །རང་བཞིན་ཡོངས་གྲུབ་འཇལ་བས་རིམ་གཉིས་ཀྱིས། །མཐའ་གྲོལ་ཆེན་པོར་དག་པ་འབྱམས་ཀླས་པས། །ཀུན་ཏུ་བཟང་པོའི་གྲུབ་མཐའ་རྫོགས་པར་ཤོག །༧ཁྱོད་ཀྱི་བསྡུ་བཞིའི་དཔག་བསམ་དར་བའི་ཚལ། །སྡིག་ལྟའི་བྲང་འགྲོ་འགྲོགས་པའི་སྐབས་མེད་པར། །གཞན་ཕན་ཁོ་ལག་རྒྱས་པར་རྒྱལ་རྣམས་ཀྱི། །ཐུགས་བསྐྱེད་འབྲས་བུ་སྨིན་པའི་བཀྲ་ཤིས་ཤོག ། ཅེས་ཞེ་ཆེན་བསྟན་གཉིས་དར་རྒྱས་གླིང་གི་སྤྲུལ་སྐུ་རིན་པོ་ཆེ་འགྱུར་མེད་མཐུ་སྟོབས་རྣམ་རྒྱལ་རང་གི་གདན་སར་ཡར་ཐེག་པའི་ཚེ། འཇ༵མ་དབྱང༵ས་དགྱེས༵་པ༵འི་བློ་༵གྲོས༵་མཚོ༵་སྐྱེས༵་བཞ༵ད་པ༵འི་སྒྲ༵་དབྱང༵ས་ཞེས་པའི་མཚན་གྱི་ཅོད་པན་དཔྱངས་ནས་སྨོན་ལམ་དང་ཤིས་པས་ཆེད་དུ་བརྗོད་པ་སིདྡྷྱིནྟུ་མངྒ་ལཾ་ཀ་ལྱཱ་ཎཾ་བྷ་བ་ཏུ། ཞེས་དང་། གང་གི་ཞབས་ཀྱི་ཆུ་སྐྱེས་ལ་ཆགས་རྡུལ། །སྲིད་ན་དྲེགས་པ་རྣམས་ཀྱི་དོ་ཀེར་རྩེར། །རབ་ཏུ་འདར་ལྡན་བཏུད་པའི་བསྟི་སྟང་གིས། །མཆོད་བྱས་སངས་རྒྱས་གཉིས་པས་བཀྲ་ཤིས་སྩོལ། །
ཅེས་ཤིས་པར་བརྗོད་པའི་དབྱངས་ཀྱི་མེ་ཏོག་མནྡཱ་ར་བ་མངོན་པར་འཐོར་བ་སྔོན་དུ་འགྲོ་རྟིང་། ཐོག་མའི་དུས་ནས་གཞན་ཕན་ཐུགས་བསྐྱེད་དམ་བཅའི་ས་བོན་གྲུང་པོའི་རིགས་ཀྱི་ནུས་པ་སད་པ་ལས་ཐུབ་བསྟན་ཡོངས་སུ་རྫོགས་པའི་མྱུ་གུ་གཞོན་ནུ། སྔོན་བྱོན་གྲུབ་པ་རྣམས་ཀྱི་བསྟི་གནས་ཁྱད་པར་འཕགས་པ་འདིར་བྱོན་ནས་ཁོ་བོ་ཅག་གི་གམ་དུ་ཉེ་བར་བསྙེན་པར་མཛད་པའི་རིང་། ཕྱི་རིག་པ་རྗོད་བྱེད་ཐ་སྙད་ཀྱི་གཞུང་ཆེན་པོ་རྣམས་ལ་གསན་བསམ་དཔྱིས་ཕྱིན་པ་དང་། ནང་རིག་པ་སྨིན་གྲོལ་གྱི་གདམས་ཁྲིད་ཟབ་མོའི་བདུད་རྩི་ལེགས་པར་གསོལ་བས་བརྗོད་བྱ་རིམ་པ་གཉིས་ཀྱི་དེ་ཁོ་ན་ཉིད་ཐོག་མར་གཟིགས་ཤིང་སྒྲུབ་པ་ཉམས་ལེན་གྱི་གོམས་པ་སྟོབས་སུ་གྱུར་པའི་ཉེར་ལེན་གྱི་རྒྱུ་ཕུན་སུམ་ཚོགས་པར་བསྒྲུབས་ཟིན་པས། གསང་སྔགས་སྔ་འགྱུར་གྱི་བསྟན་པ་འདི་ལ་གཞན་དྲིང་མི་འཇོག་པའི་མཁས་པ་ཆེན་པོ་རོང་པ་པཎྜི་ཏ་དང་། ཀུན་མཁྱེན་ཆེན་པོ་དྲི་མེད་འོད་ཟེར། མངའ་རིས་པཎ་ཆེན་རིན་པོ་ཆེ། སྨིན་གླིང་པ་གཏེར་ཆེན་ཆོས་ཀྱི་རྒྱལ་པོ་སྐུ་མཆེད་ཡབ་སྲས། གོང་ལོ་གཞན་ཕན་རྡོ་རྗེ། མཁས་མཆོག་སོག་ཟློག་པ། ཀུན་མཁྱེན་འཇིགས་མེད་གླིང་པ་སོགས་ཀྱི་རྨད་དུ་བྱུང་བའི་རྣམ་པར་ཐར་པ་བཟང་པོ་ལ་བདག་གིར་མཛད་པས་མཁས་བཙུན་བཟང་པོའི་དབང་ཕྱུག་ཆེན་པོའི་གནས་ལ་བརྫི་བ་མེད་པར་སྤྱོད་ནས་སངས་རྒྱས་གཉིས་པའི་བཤད་སྒྲུབ་ཀྱི་བསྟན་པ་དྲི་མ་མེད་པ་འདི་ཉིད་ཀུན་ནས་ཀུན་ཏུ་འཛིན་པ་དང་། འཆད་པ་དང་། རྩོམ་པ་དང་། སྤེལ་བ་དང་། ཀུན་ནས་ཀུན་ཏུ་སྐྱོང་བ་དང་། སྒྲུབ་
པ་ལ་སོགས་པས་མཚོན་འཁོར་ལོ་གསུམ་གྱི་སྒོ་ནས་བྱ་བ་ཡང་དག་པ་བྱེད་པར་མངའ་གསོལ་ཞིང་གཟེངས་བསྟོད་པའི་དགེ་མཚན་འགོག་པ་མེད་པའི་རྟེན་འབྱུང་གི་སྒོ་གསར་དུ་དབྱེ་བ་ལ་གེགས་ཀྱི་རྒྱུ་བ་ཕྲ་མོ་ཙམ་གྱིས་ཀྱང་སྐབས་རྙེད་པར་མ་གྱུར་མི་འགྱུར་འགྱུར་བ་མེད་པས་སྟོན་འཁོར་གནས་དུས་ཕུན་སུམ་ཚོགས་ཤིང་བཀྲ་ཤིས་ལེགས་ལམ་གྱི་དགེ་མཚན་བསམ་གྱིས་མི་ཁྱབ་པའི་དགའ་སྟོན་ཉམས་སུ་བསྟར་བ་ལ་མངོན་དུ་ཕྱོགས་པ་ལ་རྟེན་ཅིང་འབྲེལ་འབྱུང་གི་རེ་ཁ་གསལ་བར་བྱ་བའི་ཕྱིར། དང་པོ་བཀྲ་ཤིས་པའི་ལྷ་གོས་དྲི་མ་མེད་པ་སྲིད་དུ་རིང་བ། སྐུའི་རྟེན་དུ་བསྟན་པའི་བདག་པོའི་སྣང་བརྙན་བཀྲ་ཤིས་ལི་མ་ཁྱད་འཕགས་ན་བཟའ་བཅས། གསུང་གི་རྟེན་གཏེར་ཆེན་ནུས་ལྡན་རྡོ་རྗེའི་གཏེར་བྱོན་ཆོས་སྐོར་པུསྟི་ཀ་བཅུ་གཅིག །གཏེར་ཆེན་རཏྣ་གླིང་པའི་ཆོས་སྐོར་པུསྟི་ཀ་ལྔ། ཐུགས་རྟེན་བདེ་སྟོང་ཟུང་འཇུག་གི་ཕྱག་རྒྱ་རྡོ་རྗེ་དྲིལ་བུ་ས་སྐྱོང་སྡེ་དགེའི་ཁྱད་དྲིལ་གསེར་རྩི་ཅན། ཡོན་ཏན་གྱི་རྟེན་དུ་དཔའ་བོ་མཁའ་འགྲོའི་ཐུགས་དམ་དགྱེས་བྱེད་སེང་ལྡིང་གི་ཌཱ་མ་རུ་ཐོད་གཟུགས་འཕན་ལྔར་བཅས། ཕྲིན་ལས་ཀྱི་རྟེན་དབང་བཞིའི་ཆུ་བོས་གདུལ་བྱ་སྨིན་བྱེད་དངུལ་དཀར་གྱི་ཀ་ལཱ་ཤ་བཅུད་ཀྱིས་བཏམས་པ། བུམ་གདན་སྣ་ཚོགས་པདྨའི་རེ་ཁ་བཀྲ་བ། ཚོགས་གཉིས་རྫོགས་པའི་མཚོན་བྱེད་མཎྜལ་རི་རབ་བཀོད་པ། གོས་བཟང་པོ་ལས་བཅོས་པའི་དབང་རྟགས་ཅོད་པན། བཟང་གོས་ཀྱི་གན་སྦྱར། སྐུ་ཤམ། ཞབས་ཆགས། སིལ་སྙན་རྒྱ་ནག་མ་ལེགས་པ།
དུང་དམར་ཆ་གཅིག །རྐང་གླིང་ཆ་གཅིག །སྡེ་དགེའི་ཆིབས་སྒ་ལེགས་པ་འཁོར་ཚང་། གོས་ཡུག །ལིང་ཡུག །ཟམ་ཡུག །ལ་དཀར་ཡུག །ཝ་ལྤགས། གཡི་ལྤགས། གཟིག་ལྤགས། ཆིབས་ཆེན་ཛཿ ཀ་དབོན་པོའི་གཡུ་འཛོང་། མཐའ་དཀར་རས་དཀར་ཡུག་བཅས་འབུལ་ལམ་ཞུས་པས་དགྱེས་བཞེས་ཞུ་ཞིང་། སླད་ནས་ཀྱང་སྲིད་པ་མཐའ་ཅན་དུ་མ་གྱུར་གྱི་བར་ལྷན་རྒྱས་ཆོས་དམ་གསེར་གྱི་སྲད་བུས་སྦྲེལ་བའི་སྲིད་ཞིའི་ལེགས་ཚོགས་མཐའ་དག་ཡར་ངོའི་ཟླ་སྣང་དཀར་པོའི་འཕེལ་ཆ་བཞིན་རྒྱས་པར་འགྱུར་བའི་རྟེན་འབྱུང་ཕུན་སུམ་ཚོགས་པར་ཞུ་ཞུ་ཞུ། སརྦ་མངྒ་ལམ། ཛ་ཡ་ཛ་ཡ་སུ་ཛ་ཡནྟུ། ཞེས་པའི་བསྔགས་བརྗོད་སྤྱིར་ཀཿ ཐོག་པ་ལ་སློབ་ཚོགས་རྒྱུ་སྐར་གྱི་ཕྲེང་བ་ལྟ་བུ་ཡོད་པའི་ནང་ནས་མཚན་མོའི་མགོན་པོ་ལྟ་བུ་ཁྱད་དུ་འཕགས་པའི་གོ་སར་དབུགས་དབྱུང་བར་མཛད་པའོ།། སྤྱིར་གོང་སྨོས་ལྟར་སྐྱེ་ནས་སྐྱེ་བར་བྱང་ཆུབ་ཀྱི་སེམས་གཉིས་གོམས་པ་ཤུགས་བརྟན་ཅིང་། ནག་པོའི་ཆོས་བཞི་སོགས་ཀྱིས་བར་མ་བཅད་པས་བྱམས་དང་སྙིང་རྗེ་བྱང་ཆུབ་ཀྱི་སེམས་གཞན་ལ་ཕན་སེམས་དུས་རྒྱུན་མར་ཐུགས་རྒྱུད་ལ་འབྲལ་མེད་དུ་ཡོད་ནའང་། ཁྱད་པར་ཀཿ ཐོག་ཏུ་བཞུགས་རིང་གནས་དང་བླ་མའི་བྱིན་རླབས་མངོན་དུ་འཆར་བས། དད་པ་དང་ངེས་འབྱུང་མི་རྟག་སྐྱོ་ཤས་སོགས་ཆོས་ལ་གསར་དུ་ཞུགས་པའི་བློ་སྦྱོང་དགའ་རབ་ཡོད་པ་དང་། མ་ཟད་བདེ་གསལ་མི་རྟོག་སོགས་ཀྱི་ཉམས་དུ་མའི་སྐྱེ་ཚུལ་སྣ་ཚོགས་ཤར་བ་རྡོ་རྗེ་འཛིན་པ་ཆེན་པོ་རྣམས་ལ་ཉིན་ལྟར་རྟོགས་འབུལ་ཞུས་པས་ཉམས་སྐྱོང་ལུགས་
དང་། གེགས་སེལ་བོག་འདོན་རྣམས་ལམ་རྒྱུས་ཞིབ་པའི་ས་མཁན་གྱི་གདམས་པ་ལྟར་རིམ་པར་བསྩལ་པས། ཐུགས་ལ་བདེ་ཉམས་དང་ཞི་གནས་བཟང་པོ་རྒྱ་མཚོ་རླུང་གིས་མ་བསྐྱོད་པ་ལྟར་ལ། ལྷག་མཐོང་གི་དང་ཆ་གསལ་བས་ས་ལམ་གྱི་ཡོན་ཏན་ཇི་བཞིན་པ་བསྐྱེད་ནུས་པ་དང་། དེས་དྲངས་པའི་ཤིན་སྦྱངས་ཀྱི་བདེ་བ་ཡང་རྩོལ་མེད་རང་བྱུང་དུ་འཆར་བ་ཞིག་ཡོད་པས། འདི་གའི་རྒྱུན་ལེགས་པར་ཡུན་དུ་སྐྱོང་རྒྱུ་བྱུང་ན་རྫོགས་ཆེན་ལུགས་ལ་དེ་འདྲའི་བརྡ་ཆད་ཀྱི་མིང་འདོགས་མེད་ཅིང་། ཕྱག་ཆེན་པ་ལྟར་ན་ཉམས་ཀྱི་སྤྲོས་བྲལ་ཙམ་ཟེར་ཆོག་པ་ཡོད་གསུངས་ཞལ་བཞེས་མཛད་དེ། སླར་ཡང་ཁེངས་སྐྱུང་གི་ཕྱིར་དུ་སྒོམ་ཡུན་ཐུང་བ་སོགས་ཀྱིས་རྩེ་གཅིག་ཆུང་ངུ་ཙམ་ཡང་ཡོད་དོན་ཅི་ཡོད་གསུངས། ལར་འདི་སྐོར་ལོ་གསུམ་སྐོར་ཙམ་ལ་ཞི་གནས་ཧ་ཅང་ཤུགས་དྲག་པས་ལྷག་མཐོང་གི་གསལ་ཆ་ཆེད་དུ་འདོན་དགོས་པ་བྱུང་བ་དང་། ཁྲིད་སྦྱང་སྐབས་ཀྱི་རྨི་ལམ་སྦྱངས་པའི་སྟོབས་ཀྱིས་ཨེ་ཡིན་སྙམ་པས། ཉིན་མོའི་སྣང་བ་ཐམས་ཅད་ཀྱང་རྨི་ལམ་དང་ཁྱད་པར་ཅི་ཡང་མེད་པ་བདེན་ཞེན་གྱིས་རྩིས་གདབ་མེད་པས་སྣང་བ་ཐམས་ཅད་ཅིར་ཡང་བསྒྱུར་དུ་བཏུབ་པ་ལྟ་བུའི་ཉམས་ཀྱིས་གཡང་ས་སོགས་ལ་གཏད་མེད་ཀྱིས་སྲོག་ལ་ཉེན་འོང་དོགས་ཀྱིས་བག་ཟོན་བྱེད་དགོས་པ་ཡང་སྐབས་འགར་བྱུང་བ་དང་། གང་ལྟར་ཡང་འདི་སྐབས་སུ་ཉམས་དང་རྨི་ལམ་ཅི་རིགས་པར། ལྷ་དང་བླ་མའི་ཞལ་མཐོང་བ། ཆོས་ཐོས་པ། དོན་ཤེས་པ། ཐོས་བསམ་སྒོམ་པའི་ཤེས་
རབ་འཕེལ་བ། རྟོག་པའི་རྐྱེན་ཐུབ་པ་སོགས་རང་གི་དག་སྣང་བཟང་བ་དང་། བླ་མའི་ཐུགས་རྗེའི་བྱིན་རླབས་ལས་ཐོབ་པ་ཅུང་ཟད་རེ་ཡོད་ཀྱང་གཞན་གྱིས་སྒྲོ་བསྐུར་གྱི་རྒྱུར་འགྲོ་བ་ཙམ་ལས་དགོས་པ་ཆུང་བར་སེམས་ཏེ་མ་བྲིས་གསུངས་པ། ལར་སྐྱེས་བུ་མཆོག་རྣམས་ནི་ཡོན་ཏན་སྦེད་པར་བྱ་བ་ལས། གཞན་ལ་ཆེ་འདོད་དང་གྲགས་འདོད་ཀྱིས་མངོན་པར་བྱ་བ་མ་ཡིན་ལ། ལྷག་པར་དུ་དམ་པ་འདི་ནི་ཕྱི་ནང་གསང་བའི་ཡོན་ཏན་རྒྱ་མཚོའི་བདག་ཉིད་ཡིན་ཡང་ཀུན་སྤྱོད་རང་བཞིན་ཐ་མལ་གྱི་ན་ཙམ་ལ་བརྟེན་པ་ལས་ཆེ་བཙན་བཟང་དྲག་གི་རྣམ་པ་གཏན་ནས་མི་མཛད་པ་དེ་འདྲ་ཡིན། དེ་ནས་ཀཿ ཐོག་ཏུ་ལོ་ལྔ་སོང་བ་དགུང་ལོ་བཅུ་དགུ་བཞེས་པ་ཤིང་གླང་ནག་པ་ཟླ་བའི་ཚེས་ཉེར་བདུན་ལ་དཔལ་ཀཿ ཐོག་རྡོ་རྗེ་གདན་ནས་བླ་མ་མཆེད་གྲོགས་ཟབ་རྒྱས་ཀྱི་ཆོས་ཚུལ་རྒྱ་མཚོ་ལ་འབྲལ་མི་ཕོད་པའི་གདུང་བ། གསང་སྔགས་གསར་འགྱུར་གྱི་ཤིང་རྟ་ཆེན་པོ་དཔལ་ལྡན་མར་པ་ཆོས་ཀྱི་བློ་གྲོས་འཕགས་ཡུལ་པུ་ལ་ཧ་རིའི་དགོན་པར་བླ་མ་ནཱ་རོ་ཏ་པའི་དྲུང་ནས་ཕྱིར་བྱོན་པའི་དུས་ལྟར་མཛད་ནས་ལམ་དུ་ཞུགས་ཏེ་རང་དགོན་ཞེ་ཆེན་དུ་ཟླ་བ་ཕྱི་མའི་ཚེས་བཅུ་ལ་ཕེབས་པ་བླ་གྲྭ་འཁོར་བཅས་ཀྱིས་ཟབ་རྒྱས་ཀྱི་ཆོས་ཚུལ་རྒྱ་མཚོ་ཐུགས་སུ་ཆུད་པའི་དགའ་སྟོན་དུ་ཐོག་རོལ་གྱིས་བསུ་བ་སོགས་མཛད་དེ་ལེགས་པར་གདན་འཇགས་པར་མཛད། རབ་འབྱམས་མཆོག་སྤྲུལ་དང་། རྒྱལ་ཚབ་རྡོ་རྗེ་འཆང་གཉིས་དང་མཇལ་འཕྲད་ཐོག་དཔལ་ཀཿཐོག་ནས་ཐོས་བསམ་སྒོམ་པའི་
བགྱི་བ་འགྲུབ་རིགས་ཀྱི་ཞུ་བྱ་དང་། ཆོས་ཕྱོགས་ཀྱི་བཀའ་འདྲི་མཛད་རིགས་ལ་ལན་རྣམས་ར་ཐོན་ལུག་ཐོན་ལྟ་བུ་ཕུལ་ཡང་རིག་པའི་གནས་ལ་གོ་བ་བྱིངས་འཇལ་ལུགས་ལེགས་འདུག་གསུངས་ནས་ཐུགས་དགྱེས་པའི་རྩེར་སོན། འདི་ནས་བཟུང་ལོ་བཅུ་དགུའི་རིང་ལ་བླ་བྲང་གི་འགན་ཁུར། དགོན་གྱི་བཅའ་བསྒྲིགས་ཀྱི་ལས་ཁུར་བྱེད་དགོས་བྱུང་བས་རྣམ་གཡེང་གིས་ཤེས་རབ་གསུམ་གྱི་སྣང་བ་མར་འགྲིབ། ཉོན་མོངས་པའི་རྩལ་ཁ་གྱེན་དུ་ཕྱོགས་པ་ཞིག་རེད་སོང་གསུངས་ནས། བླ་དགོན་གྱི་ལས་འཛིན་ཆོས་བརྒྱད་ཀྱི་གཟུགས་བརྙན་དེ་ལ་ཐུགས་མི་དགྱེས་པའི་ཚུལ་གསུངས་འདུག་ནའང་། སྔོན་གྱི་སྨོན་ལམ་མཐུ་བཙན་པས། རྒྱལ་དབང་པདྨའི་རིང་ལུགས་ཀྱི་མདོ་སྔགས་ཆོས་ཚུལ་རྒྱ་མཚོའི་ལུང་དང་རྟོགས་པའི་བསྟན་པ་རྣམ་པ་གཉིས་སྲིད་མཐའི་བར་དུ་མི་ཉམས་པ་དར་ཞིང་རྒྱས་པའི་ཕྲིན་ལས་ཚངས་པའི་རལ་ཀླུང་ལྟར་རྒྱ་ཆེ་ལ་རྒྱུན་མི་འཆད་པའི་བྱེད་པོར་རྔ་ཡབ་གླིང་པས་བསྐོས་པ་ལྟ་བུར་གྱུར་པས། ཞེ་ཆེན་དུ་རྒྱུད་བཤད་དང་། ཐུན་མོང་གི་རིག་གནས་དུ་མའི་བསླབ་གྲྭ་གཞི་བྱེས་ཀྱི་འདུས་པ་རྣམས་ལ་ཐུགས་ངལ་མེད་པར་མཛད་པ་ལས། ཁྱད་པར་ཀཿ ཐོག་དགོན་ཉིན་སྤྲུལ་སྐུར་སྒྲ་ཀ་ལཱ་པ་དང་། གཞན་མ་འགར་སྙན་ངག །སུམ་རྟགས་སོགས་སོ་སོ་རང་ལ་གང་འདོད་ཀྱིས་རེ་བ་བཀང་། དབང་ལུང་དགོས་རིགས་ཀྱང་བཏང་སྙོམས་སུ་མ་བཞག་པར་གནས་སྐབས་སྐུལ་བ་པོའི་འདོད་པའི་དོན་བསྒྲུབས་ནས།
ཟླ་བ་དྲུག་པའི་ཚེས་བཅུ་བཞི་ལ། རྡོ་རྗེ་འཆང་མི་ཡི་གཟུགས་སུ་བྱོན་པ་རྒྱལ་ཚབ་རིན་པོ་ཆེས། ཟབ་ལམ་བདེ་གཤེགས་ཀུན་འདུས་ཀྱི་སྨིན་ཁྲིད་གནང་བ་དབུ་ཚུགས་པས་མཁའ་ལ་འཇའ་སྤྲིན་དང་། བར་སྣང་ལ་མེ་ཏོག་གི་ཆར་འབབས་པ་སོགས་དགེ་བའི་ལྟས་བཟང་ཡ་མཚན་པ་དང་བཅས་བསྩལ། དེ་མཉམ་བཀའ་བརྒྱད་བདེ་གཤེགས་འདུས་པའི་དབང་ལུང་སོགས་མང་དུ་གསུངས་པ་ཐམས་ཅད་གསན་བཞེས་མཛད། དེ་ནས་ཟླ་བ་བདུན་པའི་ནང་དུ་རྒྱུད་བཤད་པ་རྣམས་ལ་སྒྱུ་འཕྲུལ་ཞི་ཁྲོའི་དབང་རྒྱས་པ་བསྐུར། དེའི་ཚེས་བཅོ་བརྒྱད་ལ་ལྷོ་ཁོག་ཡབ་ཡུལ་དུ་ཆིབས་བསྐྱོད་ཀྱི་སྒར་བཏེགས། རང་ཡུལ་དུ་འབྱོན་དུས་ཕོ་ཏེ་འབུམ་དྷིས་མ་གཏོགས་གཞན་ཉེ་འབྲེལ་རིགས་ཀྱིས་ཞབས་ཏོག་སོགས་ཅི་ཡང་མ་བྱས། ཨ་ཞང་ལྷ་བླ་དང་། བླ་མ་ཨ་ལྷུན་སྐུ་མཆེད་ཀྱིས་ཉེ་འདུན་གཟིགས་པའི་ངོ་ལེན་རྒྱས་པར་མཛད་པ་སོགས་ཐུགས་བསམ་ཤིན་ཏུ་དཀར་བ་ཡིན་གསུངས། སིབ་དགོན་བླ་སྤྲུལ་ཚང་མ་ལྷ་ས་ལ་ཕེབས་ཤུལ་ཡིན་ཡང་། ཤུལ་སྡོད་མགར་རས་ངེས་དོན་གྱིས་གསོལ་སྟོན་རང་ངོས་ནས་གཟབ་རྒྱས་ལྟ་བུ་བྱས། ཟུར་མང་དུ་རྗེ་བླ་མ་གཏེར་དྲུང་རྣམ་གཉིས་མཇལ། གཏེར་སྟོན་རིན་པོ་ཆེའི་མདུན་ནས་དྲག་ཁྲོས་དབང་ལུང་རྫོགས་པར་གསན། ཚེ་དབང་མཛད་ཐོག་རྟ་ཆིབས་རོལ་གྱིས་མཚོན་ལེགས་འབུལ་མཛད། ཤང་ཐོ་དགོན་དུ་བྱོན་བླ་གྲྭ་ཚང་མས་བསྙེན་བཀུར་བཟང་བ་བསྟོབས། དེ་སྐབས་ཡུལ་སྲོལ་དང་དུས་ནམ་ལ་བསྟུན་པའི་གདུལ་བྱ་སྐྱོན་མེད་ཙམ་བྱུང་ནས་རང་གནས་དགོན་དུ་དབུ་ཐོན་ལེགས་ལམ་གྱིས་བྱོན།
དེ་ནས་རང་བབ་སྙོམ་ལས་སུ་མ་སོང་བར། དགོན་པ་རང་ལུགས་ལ་མཁོ་བའི་འདོན་རྒྱུགས་དང་པོ། གཉིས་པ། གསུམ་པ་རྣམས་ཡང་བསྐྱར་དང་། ལོ་མཇུག་གི་དགུ་ཆེན་རྒྱས་སྤྲོས་ཆེན་མོའི་འཆམ་ལ། རྔ་འཆམ། རིགས་བསྡུས། སྒོ་བཞི། བྱ་འུག །ཟོར་འཆམ་ཚང་མ། སྒྲུབ་མཆོད་སུ་ར་ཏྭ་བཅུ་དྲུག་གི་མཆོད་གར། རྩ་འཆམ། རྔ་གིང་། ཊཱ་ཀི་བཅས་དང་། གུ་རུའི་དུས་དྲན་སྤྲོས་བཅས་ཚེས་བཅུ་ཆེན་མོའི་འཆམ། མཚམས་གཅོད། གཏུམ་རྔམ། གསེར་སྐྱེམས། ཚོགས་ལེན། བྱིན་འབེབས། བཀའ་དྲིན་ཅན། མཚན་བརྒྱད། གིང་ཆེན་བཅུ་དྲུག་རྣམས་དང་། གཞན་ཡང་། དུང་ཆེན་འབུད་ཚིགས། དེ་མཚུངས་རྒྱ་གླིང་། རྐང་གླིང་བཅས་དགོན་དེར་བླ་མ་གོང་མ་རྣམས་ཀྱིས་འོག་མིན་ཨོ་རྒྱན་སྨིན་གྲོལ་གླིང་གི་བསྒྲིགས་ལམ་གྱི་རིམ་པ་ཇི་སྙེད་ཅིག་བཞག་པ་ཐམས་ཅད་ལ་སློབ་སྦྱོང་རྡོ་རུས་སྤྲད་ནས་བླ་མ་ཆོས་ཁྲིམས་བྱང་འདྲེན་པ་རྣམས་ལ་རྒྱུགས་འབུལ་ཞུས་ཏེ་ཕྱིན་ཆད་གཞན་ལ་བསླབ་པ་དང་རང་གིས་ཀྱང་བྱང་འདྲེན་པ་ལ་ཉམས་ང་བ་མེད་པ་དང་། དེ་མཚམས་ནས་གུར་དྲག་གི་བསྙེན་མཚམས་ཤིག་མཛད། མེ་སྟག་ལོ་དགུང་གྲངས་ཉི་ཤུ་བཞེས་པའི་ཚེ་རྒྱལ་བས་ཆོས་འཁོར་དང་པོ་བསྐོར་བའི་དུས་ཆེན་ཆུ་སྟོད་ཟླ་བའི་ནང་། རྡོ་རྗེ་འཆང་རྒྱལ་ཚབ་རིན་པོ་ཆེས་བཀའ་འགྱུར་ལྗགས་ལུང་གནང་བ་མཐའ་ལེགས་པར་རྫོགས་ཏེ། གནམ་སྟོང་ཉིན་ཉི་མ་བཞི་ཆ་ཤར་བ། གྲིབ་ཚོད་སྐྱེས་བུ་གསུམ་གྱི་དུས་སུ། དཔལ་ཞེ་ཆེན་བསྟན་གཉིས་དར་རྒྱས་གླིང་གི་གཟིམས་ཆུང་ཉི་འོད་དུ། ཐུབ་སྐུ་མེ་རྡུགས་མའི་
སྤྱན་སྔར། མཁན་སློབ་སྦྲགས་མ་དོན་གྱི་སླད་དུ་མཚན་ནས་སྨོས་ན་བྱང་ཆུབ་སེམས་དཔའ་ཞི་བ་འཚོའི་ཞལ་ཚབ། བླ་ཆེན་དགོངས་པ་རབ་གསལ་དམ་པའི་ཆོས་འདུལ་བ་གངས་ཅན་དུ་སྤེལ་བའི་ཕྱིར་མིའི་སྲིད་པ་སླར་ཡང་བཟུང་བ་འཁྲུལ་པ་སྤངས་པ་མཁན་ཆེན་༧པདྨ་གསང་སྔགས་བསྟན་འཛིན་ཆོས་རྒྱལ་དཔལ་བཟང་པོ་དང་། དད་པའི་དགེ་འདུན་གྲངས་ཚང་བའི་དབུས་སུ་ཚིགས་གསུམ་བར་མ་ཆད་པར་བསྙེན་པར་རྫོགས་ཏེ་དགེ་སློང་གི་དངོས་པོ་བཞེས་ནས། མཚན་སྔ་མ་འགྱུར་མེད་མཐུ་སྟོབས་རྣམ་རྒྱལ་ལ་དཔལ་བཟང་པོས་བརྒྱན་པའི་གྲགས་སྙན་སྔ་འགྱུར་བསྟན་པའི་དཔལ་དུ་མངོན་པར་མཛེས་པའོ། །
ཕན་བདེ་འབྱུང་གནས་བྱང་ཆུབ་ཀྱི་སེམས་རིན་པོ་ཆེ་བསྐྱེད་པ་སོགས།
༈ དེ་ནས་རྒྱལ་བ་སྲས་དང་བཅས་པའི་བགྲོད་པ་གཅིག་པུའི་ལམ། སྐྱེ་དགུའི་ཕན་བདེ་མཐའ་དག་འབྱུང་བའི་གཞི་བྱང་ཆུབ་ཀྱི་སེམས་རིན་པོ་ཆེ་ཇི་ལྟར་བསྐྱེད་པའི་ཚུལ་ནི། སྔར་གྱི་གནས་དེ་ཉིད་དུ། བདེ་གཤེགས་མྱ་ངན་མེད་དགེ་བའི་བཤེས་གཉེན་གྱི་ཚུལ་དུ་བྱོན་པ་མཚན་བརྗོད་པར་དཀའ་ཡང་ཐོས་པ་ལ་དོན་མཆོག་ཏུ་གྲུབ་པའི་དགོས་པ་ཡོད་ཕྱིར་སྨོས་ན་རབ་འབྱམས་པ་རིག་འཛིན་དཔལ་འབྱོར་རྒྱ་མཚོ་ཞེས་ཡོངས་སུ་གྲགས་པ་བྱང་ཆུབ་སེམས་ཀྱིས་ཐུགས་རྒྱུད་མཆོག་ཏུ་གང་བ་དེ་ཉིད་ཀྱི་མདུན་ནས། སྨོན་འཇུག་གི་ཆོ་ག་སྟབས་གཅིག་ཏུ་ལེན་པ་རྒྱལ་སྲས་ལམ་བཟང་གི་སྟེང་ནས་གསན་བཞེས་མཛད། སླད་ནས་ལྷ་སྲས་རྣམ་རོལ་གྲུབ་པའི་དབང་པོ་འཇིགས་མེད་ཕྲིན་ལས་འོད་ཟེར་གྱི་མདུན་
ནས་ཀྱང་ཞེ་ཆེན་པའི་བླ་སྤྲུལ་གྲྭ་ཚང་རྣམས་དང་ལྷན་གཅིག་ཏུ་ལན་ཅིག་གསན། རྡོ་རྗེ་ཐེག་པའི་དབང་ཆོག་རྣམས་ནི་རྡོ་རྗེ་འཆང་དངོས་རབ་འབྱམས་དང་རྒྱལ་ཚབ་རྣམ་གཉིས་མདུན་ནས། བཀའ་བརྒྱད་རྣམ་གཉིས་ཀྱི་དབང་ཆེན་དང་། བདེ་གཤེགས་ཀུན་འདུས། ཞི་ཁྲོ་སོགས་གསན་པས་མཚོན། རང་གཞན་གྱི་སྐྱེས་ཆེན་རྣམས་ཀྱི་མདུན་ནས་སྔ་ཕྱི་ཀུན་ཏུ་སྔགས་གསར་རྙིང་གི་ཆོས་ཚུལ་རྒྱ་མཚོ་ལྟ་བུའི་ཕ་རོལ་ཏུ་སོན་པར་མཛད་པས་སུམ་ལྡན་རྡོ་རྗེ་འཛིན་པ་མཆོག་ཏུ་གྱུར་པ་དེ་བཞིན་ལ་སོར་བྱང་གསན་བཞེས་མཛད་གྲུབ་པའི་དེ་མ་ཐག་ཟླ་བདུན་པའི་ཚེས་སྟོད་ནས་དགེ་རྩེ་རྫ་ཆུ་ཁ་ལ་དབྱར་བསོད་དུ་ཕེབས། རྟ་ཕོ་རྒོད་ལྔ་བཅུ་ཙམ་དང་། རྟ་ནོར་བརྒྱ་ལྷག་དང་། དངུལ་རྡིལ་ཚད་དྲུག །མར་རྒྱ་ལྔ་བརྒྱ་སོགས་བླ་བྲང་ལ་དངོས་པོའི་འོང་སྒོ་བཟང་། ལོ་དེ་ནང་ཀཿ ཐོག་རྡོ་རྗེ་འཆང་དགེ་རྩེ་རིན་པོ་ཆེ་ཞེ་ཆེན་དུ་ཕེབས། ཞེ་ཆེན་མཆོག་སྤྲུལ་རིན་པོ་ཆེ་རྣམ་གཉིས་དང་ཐུགས་དགོངས་ནང་གཤིན་གཅིག་འདྲེས་ཡིན་ནས་ཡིན་བཞིན་བཀའ་གཏེར་ཆོས་ཚུལ་རྒྱ་མཚོའི་དབང་ལུང་ཕར་ཕུལ་ཚུར་ཕུལ་མཛད་རིགས་ཚང་མ་གསན་བཞེས་མཛད། དེའི་སྟོན་ཀ་རྫ་རྒྱུད་ལ་འབྲུ་ལྡོམ་ཐོག་མ་བྱོན། དེ་ནས་བླ་བྲང་གི་འབྲུ་ལྡོམ་ལོ་བསྟར་འགྲོ་རྒྱུ་ཞིག་གི་སྲོལ་ཡོད་པ་ལྟར་ལོ་འགའ་ལ་བྱོན། དེ་ནས་སྟོད་འབྲེལ་སྐད་དུ་རབ་བྱུང་ཞེས་པ་འབྱུང་ཁམས་མེ་ཡོས་ལོ་རབ་བྱུང་བཅུ་བཞི་པའི་ཐོག་མར། རྒྱལ་ཚབ་རྡོ་རྗེ་འཆང་རིན་པོ་ཆེ་སངས་རྒྱས་གཉིས་
པ་པདྨ་ཀ་རའི་བསླུ་མེད་ལུང་གིས་གནང་བ་ཐོབ་པ་ལྟར་སེངྒེ་གནམ་རྫོང་གི་གནས་སྒོ་གསར་དུ་འབྱེད་པའི་ཐུན་མོང་མ་ཡིན་པའི་རྟེན་འབྲེལ་གྱི་སྒོ་མངོན་དུ་གྱུར་པའི་མཐུན་པའི་རྐྱེན་གང་ལ་གང་འོས་ཐམས་ཅད་མཛད་པས་བླ་མའི་ཐུགས་དགོངས་ལྷག་པར་མཉེས་པར་གྱུར་པ་མཛད། དེ་མཉམ་རི་ཁྲོད་བདེ་ཆེན་པདྨ་འོད་གླིང་གསར་དུ་བཞེངས། རྡོ་བླ་གྲུབ་ཆེན་རིན་པོ་ཆེ་ཡང་ཕེབས་དེ་མདུན་ནས་དབང་ཆོས་གདམས་པ་དུ་མ་གསན། སྒ་ར་ཉག་གྲུབ་ཆེན་ཡང་བྱོན་དབང་ལུང་མང་དུ་གསན། ཁྱད་པར་ཐ་སྙད་རིགས་ལམ་རྒྱ་མཚོར་འཇུག་པའི་སྒོ་ར་སྟོད་ཡིག་ཆའི་སྟེང་ནས་བསྡུས་གྲྭའི་བཤད་པ་ཞིག་ཀྱང་གསན་བཞེས་མཛད། དེའི་སྟོན་ཁར་ལྕགས་མདུད་ཉག་རོང་གཟུར་བ་བླ་མ་ལྷུན་གྲུབ་བཀྲ་ཤིས་ཀྱིས་ལྷ་འབེལ་གསང་སྔགས་ཆོས་གླིང་དགོན་པ་གསར་བཏབ་ལ། ཐོག་མའི་རབ་གནས་དང་དགོན་དེར་དབང་ལུང་སོགས་ཀྱིས་ཐུགས་བཞེད་མཐའ་དག་བསྐངས། དེ་ནས་ས་སྟོད། ཞུར་བ་གོང་འགབ། ཟླ་གེ་བཅས་ལ་འབྲུ་ལྡོམ་དབང་ཆོས་གང་དགོས་དང་། ཁྱད་པར་གཟུར་བ་ཁྲོམ་སྐྱེ་ཕོ་མོ་སྟོང་ཕྲག་ཙམ་ལ་ཟབ་ལམ་བདེ་གཤེགས་ཀུན་འདུས་ཀྱི་ཐུན་མོང་གི་སྔོན་འགྲོའི་ཁྲིད་རྒྱས་པའི་ལུགས་སུ་མཛད། དགེ་སྒྲུབ་སྡིག་སྤོང་གི་ཁས་ལེན་དང་། ཁྱད་པར་སྔོན་འགྲོའི་ཁྲིད་སྦྱོང་གཞུང་ནས་བཤད་པ་ལྟར་སྒྲུབ་པ་ཉམས་ལེན་བྱེད་མཁན་མང་དུ་བྱུང་། ཡུལ་སྡེ་དཔོན་ཤོག་ནང་འཁྲུག་ཡོད་པ་བཤད་གཏམ་གྱི་མཐའ་ཆོས་དམ་གྱིས་བསྡུས་ཏེ་འདུམ་པར་མཛད། བླ་གྲྭ་ཚང་མར་ནས་སྒྲོམ་ལྔ་བརྒྱ་ལྷག་ཙམ་དང་།
བླ་བྲང་ལ་རྒྱ་དངུལ་རྡིལ་ཚད་གཅིག་སོགས་འབུལ་ནོད་བཟང་། རང་གཞན་འཕྲལ་ཡུན་གྱི་དགོས་པ་དུ་མ་འགྲུབ་ནས་ཚོང་པ་རིན་ཆེན་གླིང་ནས་འཁོར་བ་ལྟར་ལེགས་ལམ་གྱིས་རང་གནས་སུ་འབྱོར་བ་མཛད། ལོ་དེ་ནང་རྒྱལ་ཚབ་རིན་པོ་ཆེ་སྐུ་ཁམས་མི་དྭངས་བའི་ཚུལ་མཛད་པ་རང་གཞན་ལྷ་བླའི་དགོངས་པར་གང་བྱུང་རིམ་གྲོར་ཇ་འཁོར་དྲུག་སུམ་བརྒྱ་ཙམ་གྱིས་བསྒྲུབས་པས་ཟླ་བ་སྤྲིན་བྲལ་ལྟ་བུར་གྱུར། ས་འབྲུག་ལོ་བྱང་དགེ་རྩེའི་ཕྱོགས་ལ་དབྱར་ལྡོམ་ལ་བྱོན་གདུལ་བྱ་བཟང་། དབྱར་སྒར་སྟེང་ནས་དགེ་སྤྲུལ་རིན་པོ་ཆེ་དང་ཞལ་མཇལ། གསོལ་སྟོན་ལེགས་འབུལ་སོགས་མཛད་དེ་ལེགས་ཚོགས་སྟབས་འགྲིགས་མཐའ་རྒྱས་མཛད། འདི་ལོ་ཟླ་བ་དྲུག་པ་ཙམ་གྱི་ནང་ནས་རབ་འབྱམས་རྡོ་རྗེ་འཆང་རིན་པོ་ཆེ་བསྙུང་ཚུལ་མཛད་པ། འཇིག་རྟེན་པའི་བྱ་བ་དང་སྒོ་བསྟུན་ཏེ་རང་གཞན་གྲུབ་མཐའ་རིས་སུ་མ་ཆད་པའི་བླ་མ་དང་ལྷ་སྲུང་གིས་བརྟགས་བབས་རིགས་ཆེ་ཕྲ་ཐམས་ཅད་ཇ་འཁོར་དྲུག་བཞི་བརྒྱ་ཙམ་གྱིས་གཏོང་སྒོ་བྱས་ཏེ་ཞབས་བརྟན་བསྒྲུབས་ཀྱང་མ་ཕན་པ་བསྟན་འགྲོའི་བསོད་ནམས་ཀྱིས་མ་ཆུན་པར་ཟླ་བ་དགུ་བའི་ཚེས་བཅུའི་སྲོད་ལ་ཞིང་ཁམས་གཞན་དུ་གཟིགས་པའི་ཚུལ་མཛད་པའི་དགོངས་རྫོགས་རྒྱས་པར་སྒྲུབ་པར་མཛད་པ་རྣམས། རྒྱལ་ཚབ་རྡོ་རྗེ་འཆང་གིས་ལུགས་ཟུང་རྣམ་དཔྱོད་མཆོག་ཏུ་ཡངས་པའི་མཛད་པ་ལ་སྒོ་ཐམས་ཅད་ནས་མཐུན་རྐྱེན་གང་ལ་གང་དགོས་གཟིང་གི་ཁ་ལོ་པ་ལྟར་གཞན་འགྲན་བྲལ་བ་མཛད། དེ་
སྐབས་ནག་ཕྱོགས་ཀྱི་བྱིན་རླབས་ཕྲག་དོག་གདུག་པའི་སེམས་ལྡན་གྱི་རྒྱུད་ལ་ཞུགས་པས་མ་ཉེས་པའི་ཁ་ཡོག་སོགས་ཀྱིས་བཞུགས་ཉམས་བདེ་མིན་བྱུང་བ་སྤྱིར་མ་ཉེས་པའི་ཁ་ཡོག་ནི་ལས་སྒྲིབ་དག་པའི་སྔ་ལྟས་སུ་ཐེག་པ་མཆོག་གི་གཞུང་རྣམས་སུ་གསལ་བ་དང་། བྱེ་བྲག་ཏུ་འཇིག་རྟེན་པའི་གཏམ་དཔེ་ལའང་། བདེན་དང་ལུང་བ་ཕུ་ཐག་རིང་ཟེར་བའི་དཔེས་ལས་ཀྱི་མཐའ་ཚུལ་བཞིན་མངོན་པ་ཆོས་ཉིད་བསླུ་མེད་ཡིན་པ་གདེང་བཅས། ཁྱད་པར་མཉམ་མེད་ཇོ་བོས་འབྲོམ་ལ་གདམས་པ་ལས། ཡ་མཚན་བརྒྱ་ཡིས་བསྐོར་གྱུར་ཀྱང་། །མི་རྟོག་སེམས་དེ་དཔའ་བོ་ཡིན། །གནོད་པ་བརྒྱ་ཡིས་རབ་གཙེར་ཀྱང་། །ཇི་མི་སྙམ་དེ་དཔའ་བོ་ཡིན། །བསྟོད་ར་ཚིག་གིས་རབ་མཆོད་ཀྱང་། །དགའ་བར་མི་སེམས་དཔའ་བོ་ཡིན། །ཞེས་གསུངས་པ་ལྟར་སྐྱིད་སྡུག་རོ་སྙོམས་པ་ཀུན་ཏུ་བཟང་པོའི་སྤྱོད་པ་བསྐྱངས་པས། རྐྱེན་ངན་ལམ་དུ་བསླངས་ནས་མཐར་སྤྲིན་དང་བྲལ་བའི་ཉི་མའི་དཀྱིལ་འཁོར་ལྟར་བྱུང་བ་ཡིན་གསུངས་པ་ལྟར། དེ་དུས་ཀྱི་སྐྱེ་བོ་ཐམས་ཅད་ལ་ཚད་མར་གྱུར་པའི་ལོ་རྒྱུས་ད་ལྟའི་བར་ཡོད་པ་ཡིན། དེ་ནས་ལྕགས་རྟ་ཟླ་བ་བདུན་པའི་ཚེས་བཅུ་བཞི་ལ་ཀཿ ཐོག་ནས་མགར་བ་ཆེད་བཏང་མཛད་པ་དང་། ཆབ་མདོའི་མགར་བ་རྣམས་བཅས་ཀྱིས་རབ་འབྱམས་རིན་པོ་ཆེའི་གདུང་རྟེན་གསེར་ཟངས་ལས་གྲུབ་པ་ཁྱད་མཚར་བཞེངས་གྲུབ་ནས་རབ་གནས་བཅས་གེགས་མེད་ལེགས་ལམ་མཛད། དེའི་དགུན་ཁར་རྒྱལ་ཚབ་རིན་པོ་ཆེ་ཤར་ཀཿ ཐོག་ཏུ་ཕེབས་པའི་ཞབས་ཕྱིར་བླ་མཆན་ལ་བྱོན། ཀཿ ཐོག་
ཞིང་སྐྱོང་། དགེ་རྩེ་རིན་པོ་ཆེ། སྤྲུལ་སྐུ་ཨོ་རྒྱན་བསམ་གྲུབ་སོགས་ལ། རྒྱལ་ཚབ་དམ་པས་མཛོད་བདུན་དང་མདོ་དབང་སོགས་ཕར་ཕུལ། ཚུར་རཏ་གླིང་དང་འཇའ་ཚོན་གྱི་སྐོར་རྣམས་གསན་པ་ཐམས་ཅད་གསན་བཞེས་མཛད། དེ་ནས་དཔལ་ཀཿཐོག་པའི་བླ་མ་རྣམས་ལ་འབུལ་བ། འཚོགས་པ་ལ་ཕྱག་འགྱེད་རྒྱ་ཆེན་མཛད། ཟླ་བ་གསུམ་བཞུགས་ནས་ཚུར་ཕེབས། དེ་རིགས་ཞིབ་ཆ་རྒྱལ་ཚབ་རྣམ་ཐར་དུ་གསལ། ལྕགས་ལུག་ལོར་ཀཿ ཐོག་ཕྱག་ཚྭ་མཆོག་སྤྲུལ་ཞེ་ཆེན་རི་ཁྲོད་དུ་ཕེབས། དབང་ལུང་གདམས་པ་མང་པོ་ཕར་གསན་ཚུར་གསན་མཛད་པ་ཀུན་ཀྱང་གསན། ལར་ནམ་དུ་ཡང་དམ་པའི་ཆོས་ལ་དེས་ཆོག་དང་རིས་བོར་མེད་པས་གསན་རྒྱ་ཆེ་བ་དང་། གལ་ཆེ་ཤོས་རྣམས་ལན་གྲངས་མང་པོར་བལྡབ་སྟེ་གསན་བཞེས་མཛད་པ་གསན་ཡིག་ནང་འཁོད་ལྟར་ཡིན། ཀཿ ཐོག་ཕྱག་ཚྭ་རྡོ་རྗེ་འཆང་ལའང་ཞེ་ཆེན་ནས་འབུལ་བ་དགའ་སྟོན་རྒྱ་གང་ཆེ་མཛད་ནས་ཕར་ཕེབས། དེ་རྗེས་ཞིང་སྐྱོང་རིན་པོ་ཆེ་རབ་འབྱམས་ཀྱི་གསེར་གདུང་རབ་གནས་ལ་ཆེད་དུ་ཕེབས། ཆུ་སྤྲེལ་ལོར་གཙོ་ཁང་གི་ལྷ་རྣམས་ཉམས་གསོ་ལེགས་པར་གྲུབ། ལོ་དེར་ལྷོ་ཁོག་ཏུ་དཀར་བསོད་ལ་ཕེབས་པར་ཡབ་ཡུལ་དུ་སོང་གཤིས་ཉེ་འབྲེལ་རྩ་ལག་དུ་མར་སྐྱིད་སྡུག་གི་ལྟ་རྟོག་མགོ་འདྲེན་དགོས་རིགས་དང་། ཁྱད་པར་དུ་སིབ་དགོན་གྱི་གྲྭ་ཚང་སྤྱི་རྫས་ཉམས་པ་སོགས་ཞབས་ཕྱི་གང་དགོས་ཞིབ་ཆ་མཛད་པ་ལ། སིབ་སྤྲུལ་དང་སྔར་ནས་བཟང་རྩིས་ཆེ་བ་དང་། ཕོ་གྱམ་ནང་ཙ་དུས་
རྒྱུན་བསམ་པ་བཟང་པོས་ཞབས་ཕྱི་འབུལ་རྒྱུ་བྱས་ན་ཡང་། དབུ་ཆེ་ཚོ་ལ་ཞེ་ཆེན་ངོས་ནས་ཚིག་འགྲོ་བ་ཞིག་མེད་པ་གཞིར་བཅས་དེ་ཐོག་ནང་བརྙས་ཕོ་ཚོད་ཆེ་བར་སྣང་བས་ལས་ཀ་ཇི་བཞིན་ལམ་འགྲོ་དཀའ་བར་སྣང་ཡང་། མཁར་བོའི་རྒྱུ་རྩ་སྐོར་ལ། ཟུར་མང་གཏེར་སྟོན་དང་སྤུན་ཟླར་གྱུར་པས་དབུ་རྣ་གཟིགས་ཕྱོགས་ཆེ་བས་ལྟ་རྟོག་ཐམས་ཅད་མཛད་ཆོག་པ་གནང། སིབ་ཀྱི་དབུ་ཆེ་རྣམས་ནས་ཟ་རྒྱུ་མི་རྙེད་བསམ་པའི་ཚིག་སྣ་ཚོགས་ཁ་ནས་ཐལ་ཏེ་རང་མཚང་རང་གིས་བཏོན་པ་མང་དུ་བྱུང་ཡང་། ཁོང་ཡངས་བློ་ཆེན་ལྟ་བུས་དེ་ཐད་ལན་མ་སྨྲས། ཡུལ་དཔོན་ནོར་བུ་རྒྱལ་ལུགས་དང་མཐུན་པའི་རྣམ་དཔྱོད་ཡངས་ཤིང་། བྱ་བ་གང་དགོས་སྒྲུབ་པ་ལ་སྤོབས་པ་མི་ཞན་པ་དང་གྲོས་བསྟུན་པས་ལས་དོན་འཕྲོ་གཙང་ལེགས་པ་བྱུང་གསུངས། འོན་ཀྱང་ལས་ཀ་ཐམས་ཅད་ཚང་མ་གྲོས་བསྟུན་ཞིབ་ཆའི་སྒོ་ནས་མི་དྲང་རང་དྲང་གིས་སུ་ལའང་འགལ་འདུ་མེད་པར་མཛད། སིབ་དགོན་དང་གཤོང་ནག་གཉིས་ཀར་འབུལ་བ་ཕྱག་འགྱེད་རྒྱ་ཆེན་མཛད། ཤངས་ཐོ་དགོན་ལ་ཕེབས་ནས་མང་ཇ་དང་དར་འགྱེད་སོགས་ཀྱིས་བསྙེན་བཀུར་ཞུ་བར་མཛད། ཟུར་མང་དུ་བྱོན་དུས་གཏེར་སྟོན་ཚང་སྤུན་ཟླར་གྱུར་པས་འཇིག་རྟེན་ལུགས་ཀྱིས་ཕན་ཚུན་ནང་གཤིན་བླ་ན་མེད་པ་དང་། ཁྱད་པར་ཆོས་ཕྱོགས་ནས་རོལ་རྡོར་གྱི་ཆོས་སྐོར་ཚང་མའི་དབང་ལུང་གསན་འདུན་ཡོད་བཞིན་རོལ་རྡོར་ཆོས་སྐོར་ཚང་མ། ཡོན་དགེའི་ཆོས་སྐོར་པདྨ་བཛྲ་སོགས་ཀྱི་དབང་ལུང་མང་དུ་གསན། ཆུ་བྱ་ཟླ་བ་གསུམ་པའི་ནང་ཨ་ཁུ་ཀུན་བཟང ་འདས་པ་
གསོན་དུས་སྐུ་རིམ་དང་། འདས་རྗེས་དགོན་འདི་དང་སིབ་དགོན་སོགས་སུ་ཆོས་རྩ་བཅས་ཁོང་རང་ལ་གང་ཡོད་འཁོར་དྲུག་བརྒྱ་དང་བཅུ་གཉིས་ཙམ་གྱི་བབ་ཡོད་པ་གཙང་དག་བྱས་ཏེ་ཆོས་ཕྱོགས་སུ་བཏང་། དེ་རྗེས་བླ་མ་དྲག་པོའི་བསྙེན་མཚམས་ཟླ་བ་གཅིག་མཛད། མཚུངས་མེད་ཆོས་ཀྱི་སྤྱན་ལྡན་གཞི་ཆེན་སྤྲུལ་སྐུ་བསོད་ནམས་དཔལ་ལྡན་ལ་དབང་ལུང་གདམས་ཁྲིད་མང་ཞིག་ཕུལ། དེ་ནས་ཤིང་ཁྱི་གནམ་ལོ་གསར་འཆར་དགུང་གྲངས་ཉེར་བརྒྱད་བཞེས་པའི་དབོ་ཟླའི་ནང་། རབ་འབྱམས་མཆོག་སྤྲུལ་བཞི་པ་བ་ཡན་དཔོན་ཚང་ལ་འཁྲུངས་པའི་ཁྲི་སྟོན་གྱི་སྟ་གོན་དང་། ཆིབས་བསུ་ལ་བྱོན་ནས། ཚེས་བཅུ་གཅིག་རེས་གཟའ་ལྷ་ཡི་བླ་མ་དང་། རྒྱུ་སྐར་རྒྱལ་གྱི་འགྲུབ་སྦྱོར་ཕུན་སུམ་ཚོགས་པའི་ཉིན། དཔལ་ཞེ་ཆེན་བསྟན་གཉིས་དར་རྒྱས་གླིང་དུ་མི་མཇེད་ཞིང་གི་སྟོན་པ། ༧གར་དབང་ཆོས་ཀྱི་རྒྱལ་མཚན་ཞེས་ཡོངས་སུ་གྲགས་པར་གསེར་ཁྲིར་མངའ་གསོལ། དེ་སྐབས་ཀྱི་སེར་སྦྲེང་གི་བཀོད་པ་དང་། བརྟན་བཞུགས་ཀྱི་བཤད་པ། མཎྜལ་གྱི་རྣམ་བཤད། རྒྱུད་རྒྱལ་གསང་བ་སྙིང་པོའི་ཚོགས་བཤད། རྡོ་རྗེ་ལྷ་མོ་བཅུ་དྲུག་གི་གླུ་འགྲོས་སྤྲོས་བཅས་གར་འཆམས་ཀྱི་རིམ་པ་ཨོ་རྒྱན་སྨིན་གྲོལ་གླིང་གི་ཕྱག་བཞེས་ཇི་ལྟ་བ་བཞིན་རྣམས་མཁས་པ་མགུ་བ་བསྐྱེད་པ་བྱེད་པ་དང་། གཞན་སྟོན་མོ་ཆེ་ཆུང་གི་རྣམ་བཞག །ཡབ་ཡུམ་གྱི་གཙོས་ཉེ་འབྲེལ་རྣམས་ལ་བསྙེན་བཀུར་གྱ་ནོམ་པ་ཡ་རབས་ཀྱི་སྐྱེ་བོའི་ལུགས་དང་མཐུན་པར་རྒྱལ་ཚབ་རིན་པོ་ཆེའི་བཀས་ཁྱབ་པ་བཞིན་བགྱི་བ་དང་ལེན་མཛད་པས་སྡེ་གླིང་གཉིས་
ཀྱི་མངའ་འོག་གི་སེར་སྐྱ་ཕོ་མོ་ཁྲོམ་ཚོགས་རྒྱ་མཚོས་བྱ་བ་ལེགས་ལམ་དུ་སོང་བའི་བསྔགས་བརྗོད་མགྲིན་གཅིག་ཏུ་གླེང་ཞིང་། ཁྱད་པར་དུ་ས་སྐྱོང་སྡེ་དགེའི་ཆོས་བློན་སྟག་རྒྱས་ནས། ཕྱི་ནང་གི་ཁྲོམ་ཚོགས་རྒྱ་མཚོ་ལྟ་བུའི་དབུས་སུ། སྔར་རྫོགས་ཆེན་རིན་པོ་ཆེ་ཁྲི་སྟོན་སྐབས་སྐུ་ན་ཆུང་ཡང་། གཞོན་ནུའི་ལུས་ལ་རྒན་པོའི་བློ་དང་ལྡན་པ་ལྟ་བུའི་ཕུན་སུམ་ཚོགས་པ་ལྔ་དང་། མཎྜལ་གྱི་བཤད་པ་རྣམས་རྨད་དུ་བྱུང་བར་མཛད། ད་ལན་ཡང་ལུགས་གཉིས་ཀྱི་བྱ་བ་སྤྱི་དང་། བྱེ་བྲག་བརྟན་བཞུགས་དང་། རྒྱུད་བཤད་སོགས་ཀྱི་ལྗགས་བཤད། འབུལ་ཡིག་གསར་རྩོམ་བཅས་འཆད་པ་དང་རྩོམ་པ་མཁས་པའི་བྱ་བ་མཁས་མང་དགྱེས་པ་བསྐྱེད་པའི་མཆོད་སྤྲིན་དུ་སྤེལ་བས་སྤྲུལ་པའི་སྐུ་ཞེས་པའི་མིང་གི་ཅོད་པན་དེ་དོན་དང་ལྡན་པ་ཉིད་དུ་འདུག་གོ་གསུངས་བསྔགས་པ་བརྗོད་པ་དང་། ལྷ་རྫས་ནང་མཛོད་སྲིད་དུ་རིང་བས་མགུལ་དར་གསོལ་བ་སོགས་མཛད། གཞན་དེ་སྐབས་རྫོགས་ཆེན་རིན་པོ་ཆེ་སྐུ་ཉིད་བྱོན་ནས་བརྟན་བཞུགས་འབུལ་བ་དང་། ལེགས་འབུལ་རྒྱ་ཆེན་བསྟབས་པ་སོགས་ཀྱིས་མཚོན། འདུ་འཚོགས་མཆོག་དམན་ཡོངས་ལ་སྐྱེས་ལན་གྱི་དངོས་པོ་རྒྱ་གང་ཆེ་དང་བསླུ་ཡོན་དགོས་རིགས་རྒྱས་པར་སྤྲད། དེ་རྗེས་སྐུ་ཞབས་མཁྱེན་བརྩེའི་སྤྲུལ་སྐུ་གསར་ཕེབས་ལ། གསོལ་སྟོན་དང་འབུལ་ནོད་ཟབ་རྒྱས་བསྒྲུབས། རིག་འདུས་རྩ་དབང་དང་། ཚེ་དབང་སོགས་དགོངས་གཏེར་སྐོར་གྱི་དབང་ལུང་དུ་མ་མཛད་པ་གསན་བཞེས་མཛད།
དབུས་ཕེབས་དང་པོ་སྔ་འགྱུར་མདོ་སྔགས་བསྟན་པ་རྒྱ་མཚོའི་འབྱུང་གནས་འོག་མིན་ཨོ་རྒྱན་སྨིན་གྲོལ་གླིང་སོགས་ལས་དབང་ལུང་གདམས་པ་སོགས།
ལོ་འདི་ནང་དབུས་སུ་ཕེབས་པ་སྣྲོན་ཟླའི་ཚེས་བཅུ་ལ་ཞེ་ཆེན་ནས་ཐེག་སྟེ། ཚུགས་མལ་གསུམ་པ་ཚེམ་ཁོག་བར་རྒྱལ་ཚབ་རིན་པོ་ཆེ་དཔོན་གཡོག་གིས་ཆིབས་སྐྱེལ་མཛད། ལུགས་གཉིས་ཀྱི་བསླབ་བྱ་དུ་མས་བླང་དོར་གྱི་མིག་རྣམ་པར་ཕྱེ་སྟེ་ཕྱིར་ཕེབས། དེ་ནས་ལེགས་ལམ་གྱིས་ཕེབས་ཏེ། རང་གཞན་བྱེས་སུ་འགྲོ་བ་དང་། ལམ་འཁོད་ཀུན་ལ་ལུགས་གཉིས་ཀྱི་སྒོ་ནས་ཕན་བདེའི་ཕྲིན་ལས་གང་ལ་གང་འོས་སུ་ཉེ་རིང་མེད་པར་མཛད་དེ་ཁྲུམས་སྟོད་ཟླ་བའི་ཚེས་ཉི་ཤུ་ལ་ལྷ་ལྡན་དུ་ཕེབས་གྲུབ། སྐྱབས་རྗེ་འཇིག་རྟེན་དབང་ཕྱུག་ལུང་རྟོགས་རྒྱ་མཚོ་དང་། བོད་རྒྱལ་པོ་དེ་མོ་ཐུབ་བསྟན་རྣམ་རྒྱལ་ཏེ། རྩེ་ཞོལ་སོ་སོར་བརྒྱ་འབུལ་རེ་རེ་ཕུལ། སྨོན་ལམ་མང་ཇ་གཉིས་ལ་འཁོར་དྲུག་སོ་གཉིས་དང་། ཇོ་ཤཱག་རྣམ་གཉིས། ཐུགས་ཆེན་རང་བྱོན་ལྔ་ལྡན་སོགས་ལ་གསེར་གསོལ་དང་བརྒྱ་མཆོད། ཕྱག་བསྐོར་མཛད། དེ་ནས་དགའ་ལྡན་བརྒྱུད། བསམ་ཡས། ཁྲ་འབྲུག །རྡོར་སྨིན་དང་། གཙང་ཕྱོགས་ཀྱི་བླ་མ་ལྷ་རྟེན་རྣམས་ལ་མཇལ་ཕྱག་མཆོད་འབུལ་དུ་དཀའ་བ་དང་ལེན་གྱིས་བྱོན། དེ་སྐབས་སུ་གཞུང་ས་ནས་དོས་བརྡ་ས་རིམ་སོགས་ཞེ་ཆེན་པ་ལ་སྔར་ཐོབ་གང་ཡོད་ཀྱིས་བཀུར་ཟོས་མཛད། དེ་སྐབས་སྟག་ལུང་། རྭ་སྒྲེང་། ཆབ་མདོའི་སྤྲུལ་སྐུ་རྣམ་གསུམ། རྡོར་བྲག །སྨིན་གླིང་། བཀྲ་ཤིས་ཆོས་སྡེ། ངོར། ས་སྐྱ་གོང་། བཀྲ་ཤིས་ལྷུན་པོར་གཙང་པཎ་ཆེན་སོགས་ལ་འབུལ་བ་རྣམ་བཞག །འགྱེད་བཅས་ལ་ཇ་འཁོར་དྲུག་ཉིས་བརྒྱ་ལྷག །རྟ་ཕོ་རྒོད་བཞི་བཅུ། དངུལ་རྡིལ་
ཚད་བརྒྱད་ཙམ། དར། རས་གོས། ལིང་། གཅན་གཟན་སོགས་ཕོན་ཆེ་བར་བཏང་། བསམ་ཡས་ཁྲ་འབྲུག་ཤེལ་བྲག་སོགས་གནས་རྟེན་རྙིང་པ་བྱིན་ཆེན་རྣམས་ལ་གསེར་གསོ་མཆོད་འབུལ་མཛད། དབང་ལུང་གདམས་ཁྲིད་རྣམས་ནོད་ཚུལ་ལ། སྨིན་གླིང་ཁྲི་ཆེན་པདྨ་དབང་རྒྱལ་མདུན་ནས་བཀའ་མའི་སྐོར་དང་། ཞི་བྱེད་སྐོར་སོགས་དབང་ཆོས་དུ་མ་དང་། ནང་རྟེན་རྣམས་མཇལ་ཁ་ཞིབ་ཆ་བྱས། ཡར་ལུང་བཀྲ་ཤིས་ཆོས་སྡེའི་དབོན་རིན་པོ་ཆེ་ནམ་མཁའ་ལེགས་པ་ལྷུན་གྲུབ་མདུན་ནས་དམར་པོ་སྐོར་གསུམ། ཀྱེ་རྡོར་གྱི་དབང་སོགས་དང་། ས་སྐྱ་ཁྲི་ཆེན་པདྨ་བདུད་འདུལ་དབང་ཕྱུག་མདུན་ནས། རྟ་མགྲིན་ཡང་གསང་ཁྲོས་པ་དང་། ཉང་གི་གུར་དྲག་དབང་ཆེན། ཚེ་དབང་སོགས་དང་། རྒྱལ་བ་ལུང་རྟོགས་རྒྱ་མཚོའི་མདུན་ནས་གཙང་པཎ་ཆེན་གྱིས་མཛད་པའི་ཤམ་བྷ་ལའི་སྨོན་ལམ། རྭ་སྒྲེང་གསུང་སེང་ལྡེང་ནགས་སྒྲོལ་བསྟོད་པ་སོགས་ཁ་ཤས་ཀྱི་ལུང་། བསྟན་རྒྱས་གླིང་དེ་མོ་རིན་པོ་ཆེ་ནས་འཇམ་དཀར་མ་ཏིའི་ལུགས་དབང་། མཚན་བརྗོད་ལུང་། ཚེ་དབང་སོགས་དང་། མཁར་རྡོ་གྲུབ་ཆེན་ཆོས་ཀྱི་རྡོ་རྗེའི་མདུན་ནས་ཁོང་རང་གཏེར་ཆོས་ཕལ་ཆེ་བ་ཐོབ། ཆོས་ཀྱི་བདག་པོར་ལུང་གིས་ཟིན། ཞིབ་གསལ་གསན་ཡིག་ཏུ་འཁོད་པ་ལྟར་ལ། དེ་ནས་ལྷ་ལྡན་ནས་རང་ཡུལ་དུ་ཆིབས་སྐྱོད་མཛད་པ་སྟོན་འཁོར་ཚང་མ་དབུ་ཐོན་ལེགས་ལམ་གྱིས་ཤིང་ཕག་ཟླ་བ་བདུན་པའི་ནང་རང་གནས་ཞེ་ཆེན་དུ་འབྱོར་བར་ཀུན་གྱིས་དགའ་སྤྲོས་བསུ་མ་རིང་ཐུང་དང་གསོལ་སྟོན་
རྒྱ་ཆེན་བྱས། དེ་ལོ་ཐུགས་ངལ་བསོས་ཏེ་བསྡམས་མཚམས་ལྟ་བུའི་རང་མལ་དུ་བཞུགས། མེ་བྱའི་ལོ་ལ་ནང་གི་རྣལ་འབྱོར་གཙོ་བོར་གཞོལ་བས་སྐུ་མཚམས་སྨྲ་བཅད་ཟླ་བ་བཞི་རིང་མཛད། དེ་ནས་སྨར་ཁམས་མཆོག་སྤྲུལ་ལ་སྒྲ་ཀ་ལཱ་པའི་རི་མོ་མཐའ་རྒྱས་སུ་ཕུལ་ནས། ཀུན་བཤད་མཚན་གྱིས་མངའ་གསོལ་བཅས་མཛད། མདོ་ཤུལ་བླ་མ་ངག་དབང་རྒྱ་མཚོ་ལ་སྒྲ་ཀ་ལཱ་པའི་རི་མོ་དང་། རྒྱུད་རྒྱལ་གསང་བ་སྙིང་པོའི་བཤད་པ་བཅས་མཛད་པས། རྗེས་སོར་ལྕང་སྐྱའི་དབུ་བླར་ཕེབས་ཚེ་ཐུན་མོང་དང་ཐུན་མིན་གྱི་གཞུང་ལ་མཁས་པའི་བསྔགས་བརྗོད་གནང་། མེ་གླང་གནམ་ལོ་གསར་འཆར་གྱི་ལོ་གསར་འཚོགས་དབུར་རབ་འབྱམས་མཆོག་སྤྲུལ་ཐོག་མར་ཕེབས་པའི་ཞབས་ཕྱི་གང་དགོས་སྒྲུབ། ཟླ་བ་ལྔ་པའི་ནང་རྒྱལ་ཚབ་རིན་པོ་ཆེ་སྐུ་བསྙུན་པའི་ཚུལ་བསྟན་པའི་རྐྱེན་སེལ་རིམ་གྲོའི་རྒྱབ་ཆོག་དང་ཐུགས་བརྟགས་སོགས་ཞུ་ཕྱིར་ཤར་ཀཿ ཐོག་རྡོ་རྗེ་གདན་དུ་ཆིབས་བསྐྱོད་མཛད། སྐུ་ཞབས་ཞིང་སྐྱོང་རིན་པོ་ཆེ་དང་། རྨོག་སྤྲུལ་སྙིང་གི་ནོར་བུ་ལ། སྔར་ནས་ཐུགས་མཐུན་ཞིབ་འདྲིས་ཡིན་ནས་ཡིན་བཞིན་ཐུགས་ཡིད་གཅིག་འདྲེས་ཀྱི་གསུང་སྒྲོས་སྣ་ཚོགས་མཛད་པ་དང་། རྒྱལ་ཚབ་བསྙུན་གཞིའི་ཐད་མི་བློ་ལྷ་བློ་ནང་ཉམས་ཀྱི་གསུང་གླེང་ཅི་རིགས་པ་གྲོས་བསྟུན་དང་། དེ་སྐབས་ཀཿ ཐོག་པའི་ཚེས་བཅུ་འཚོགས་སྐབས་དང་ཡང་ཐུག་པས་ཚོགས་ཆེན་གྱི་དབུ་བ་མཛད།
རྨོག་སྤྲུལ་རྡོ་རྗེ་འཆང་ནས་ཀློང་གསལ་ཡོངས་རྫོགས་ཆོས་སྐྱོང་སྲོག་གཏད་བཅས་དང་། ཚོགས་བདག་རྗེས་གནང་ལབ་སྟོན་གསུང་ལྟར་སྟག་བླ་པདྨ་རིག་འཛིན་ཆོག་བསྒྲིགས། འོད་ཆོག་དབང་ཕྱག་སྤྲུལ་ཆོག་བསྒྲིགས་རྣམས་ཐོབ། མགོན་ཁང་དུ་དཔོན་སློབ་བསྙེན་སོང་སུམ་ཅུས་ཚོགས་བདག་བསྐུལ་ཁྲི་ཚར་བསགས། དེ་ནས་རང་གནས་སུ་ལོག་པ་ཉེ་ཞོ་མེད་པར་ཞེ་ཆེན་དུ་འབྱོར། སྔར་རྒྱུན་ལྟར་བླ་བྲང་གི་ཆ་རྐྱེན་ལ་དབྱར་ལྡོམ་ཐུང་བསྐོར་མཛད་ནས་ཕྱིར་ཕེབས། རྒྱལ་ཚབ་རིན་པོ་ཆེ་བསྙུན་ཡུན་རིང་བས་སྐུ་རིམ་སྨན་དཔྱད་སོགས་ཀྱི་ཆེད་འཁོར་དྲུག་སུམ་བརྒྱ་ལྷག་ཙམ་སོང་ཡང་། ལྔ་བརྒྱའི་དུས་ཀྱི་བསྟན་འགྲོའི་བསོད་ནམས་ཟད་པས་ནམ་འཇུག་གི་གྲང་ངར་སླེབ་པ་ལྟར་བཟློག་ཏུ་མེད་པ་ཟླ་བ་བདུན་པའི་ཚེས་བཅོ་ལྔ་ལ་དགོངས་པ་ཞི་བ་ཆོས་ཀྱི་དབྱིངས་སུ་གཤེགས། དེ་སྐབས་རབ་འབྱམས་རིན་པོ་ཆེ་བསྟན་པའི་བདག་པོ་དངོས་ཡིན་ཡང་སྐུ་ན་ཕྲ། གཞན་སྤྲུལ་དབོན་བླ་མཆན་འགན་ཁུར་ནུས་པ་སུ་ཡང་མེད་པ་དང་། ཁྱད་པར་རྒྱལ་ཚབ་རྡོ་རྗེ་འཆང་ཞལ་བཞུགས་པའི་དུས་སུ་ཡང་ཐུགས་གཏད་ཤིན་ཏུ་ཆེ་བས་ལུགས་གཉིས་ཀྱི་མཛད་པ་གང་དང་གང་ལའང་རྨོས་དོལ་གྱི་ཟླ་ལྟར་མེད་ན་མི་འབྱུང་གི་ཚུལ་དུ་སོང་བས། ཞེ་ཆེན་པའི་ཆོས་དང་འཇིག་རྟེན་གྱི་མཛད་སྒོ་ཇི་ཡོད་ཀྱི་ཁུར་ཆེན་དང་ལེན་མཛད་དགོས་བྱུང་ཡང་། སྙོམས་ལས་དང་སྒྱིད་ལུག་གི་དབང་དུ་མ་བཏང་བར་འཇིག་རྟེན་པའི་ལུགས་ལ་ཕ་ཤུལ་བུས་བཟུང་ཟེར་བ་དང་། རྒྱལ་སྲས་བྱང་ཆུབ་སེམས་དཔའི་རྣམ་ཐར་གྱི་དབང་དུ་བྱས་ན།
འཕགས་པ་རིན་པོ་ཆེ་སྡུད་པ་ལས། ཐབས་མེད་ཤེས་རབ་བྲལ་བ་ཉན་ཐོས་ཉིད་དུ་ལྷུང་། །ཞེས་དང་། ཕར་ཕྱིན་སྡུད་པ་ལས། ཡོངས་སུ་སྐྱེ་མེད་བརྩོན་འགྲུས་ཆེར་ལྡན་ན། །མི་ཐོབ་མི་འགྲུབ་རྣམ་པ་གང་ཡང་མེད། །ཅེས་དང་། ཉིན་མཚན་དུས་རྣམས་འབྲས་བུ་ཡོད་པར་འདའ། །ཡོན་ཏན་ཚོགས་ཀྱིས་དམའ་བར་འགྱུར་བ་མེད། །མི་ཡི་ཆོས་ལས་འཕགས་པའི་དོན་རྣམས་ཀྱིས། །མེ་ཏོག་ཨུཏྤལ་ལ་བཞིན་རྣམ་པར་འཕེལ། །ཞེས་བརྩོན་འགྲུས་ཆེན་པོས་ཐབས་ཤེས་ཟུང་འཇུག་གི་ཉམས་ལེན་ལ་འབད་པ་བྱས་ཤིང་། ཁྱད་པར་མི་ཆོས་གཙང་མ་ལས་ལྷ་ཆོས་འབྱུང་བ་དང་། འཕགས་པའི་ཆོས་ཚུལ་རྣམས་བཀོད་མའི་ཆུ་བཞིན་ཐབས་ལས་ཐབས་བྱུང་གི་ཚུལ་དུ་འཕེལ་བར་གསུངས་པ་བཞིན། ཐོག་མར་འདས་མཆོད་གསོལ་དགུང་མཆོད་འབུལ་དང་། རང་གཞན་གྲུབ་མཐའ་རིས་མེད་ཀྱི་བླ་མ་སྔོན་ནས་གདན་འདྲེན་སྲོལ་ཡོད་རིགས་ལ་གདན་ཞུས་ཀྱི་བསྙེན་བཀུར། དགོན་སྡེ་དུ་མར་ཆོས་རྒྱབ་བཅས་དགེ་བའི་ཕྱོགས་སུ་དངོས་རྫས་རྒྱ་གང་ཆེ་སྤེལ། དེ་ལྟར་ལྷག་བསམ་དག་པའི་སྟོབས་དང་སྐུ་བཞུགས་རིང་བླ་མ་སངས་རྒྱས་སུ་མཐོང་ཞིང་ཐུགས་ཡིད་གཅིག་ཏུ་འདྲེས་པའི་བྱིན་རླབས་ཀྱིས་གསོལ་དགུང་གི་སྨད་ཁྲུམས་ཟླའི་ཚེས་བཅུ་དགུའི་ནུབ་མོ་ཡེ་ཤེས་ཀྱི་སྐུ་དངོས་སུ་རྨི་ལམ་ན་མཇལ་ཞིང་བྱང་ཆུབ་བར་འབྲལ་མེད་རྗེས་སུ་བཟུང་བའི་དགེ་མཚན་མཐོང་བ་དང་། ཚེས་ཉེར་ལྔའི་ནུབ་མོར་རྨི་ལམ་ལྟར་ཕྱི་ཉིན་རང་བློ་ཡིད་ཆེས་པའི་སྤྲུལ་སྐུ་གསར་བྱོན་བློ་ཐག་ཆོད་པ་བྱུང་ཡང་། ལོ་གསུམ་བར་གསང་རྒྱ་
དམ་པར་བྱས། འདི་སྐབས་རྒྱལ་དབང་པདྨའི་རྒྱལ་ཚབ་གླིང་རྗེ་དྲུང་པདྨ་གར་དབང་འགྲོ་འདུལ་རྩལ་ལའང་ཟླ་བ་སྔ་མའི་ཉེར་བདུན་ལ་ངོ་མཚར་བའི་གཟིགས་སྣང་བྱུང་འདུག་པ་འབྱུང་འགྱུར་དོན་དང་ལྡན་པར་གྱུར། རི་ཁྲོད་སློབ་དཔོན་རིན་པོ་ཆེའི་སྣང་བརྙན་རྒྱལ་ཚབ་རྡོ་རྗེ་འཆང་ཉིད་ཀྱིས་ཞལ་འཆོས་མཛད་པ་ལ་ཚོན་རྩི་གཟུངས་འཇུག་གསེར་ཆབ་གསོལ་བ་རྣམས་བྱང་འདྲེན་དགེ་བའི་བཤེས་གཉེན་མཁས་པ་ཆེན་པོ་ཁྲབ་ཆོས་དར་ལགས་ནས་གསོལ་དགུང་ནང་དེར་རྟེན་འབྲེལ་ཆེད་གྲུབ་པར་མཛད། རྒྱལ་ཚབ་ཉིད་ཀྱི་སློབ་མ་ཐམས་ཅད་ཀྱི་མཆོག་གྲུབ་པའི་དབང་ཕྱུག་འཇུ་བླ་མ་ཤེས་རབ་ཡར་འཕེལ་ཞེས་པ། མི་ཚེ་སྒྲུབ་པ་ལ་བསྐྱལ་བས་ལྷག་པའི་ལྷ་དུ་མའི་བསྙེན་སྒྲུབ་ལས་གསུམ་གྱི་རྟགས་མཚན་ཅི་རིགས་བརྙེས་པ་དང་། ཁྱད་པར་དུ་འཕགས་པ་བརྒྱད་སྟོང་པ་རྒྱུན་དུ་ཞལ་འདོན་མཛད་ཅིང་དོན་ལ་རྣལ་འབྱོར་ཟབ་མོ་ནང་བྱན་ཆུད་པས་གནས་ལུགས་ཀྱི་དོན་མངོན་དུ་བརྙེས་པ་དེ་ཉིད་ཀྱིས། རབ་ཏུ་གནས་བྱ་གནས་བྱེད་གདོད་མའི་དབྱིངས་སུ་མངོན་པར་བྱང་ཆུབ་པ་དོན་དམ་པའི་རབ་ཏུ་གནས་པར་མཛད། དེ་རྗེས་རྗེ་ཉིད་ཀྱིས་ཟབ་ལམ་མཐར་ཐུག་བདེ་གཤེགས་ཀུན་འདུས་ཀྱི་སྒོ་ནས་རྒྱུད་སྡེ་ནས་ཇི་སྐད་བཤད་པའི་རབ་གནས་དངོས་སྟ་ཉིན་གསུམ་གྱི་རིམ་པ། ཨོ་རྒྱན་སྨིན་གྲོལ་གླིང་གི་ཕྱག་བཞེས་བཞིན་མཛད་དེ། གཟིམས་མལ་སྐུ་བརྙན་གྱི་དོད་ཐུབ་བྱས་ནས་བཞག་པ། སྐུ་གཟི་བྱིན་དཔལ་དུ་འབར་ཞིང་མཇལ་བའི་མོད་ལ་
དད་པའི་སྤུ་ལོང་གཡོ་ནུས་པ། དེར་མ་ཟད་དགེ་མི་དགེའི་མཚན་མས་ཞལ་ཁྱིམ་འགྱུར་བ་སོགས་ངོ་མཚར་བའི་རྟགས་དང་ལྡན་པ། ད་ལྟ་དབེན་རི་པདྨ་འོད་གླིང་གི་ནང་རྟེན་ཐུན་མོང་མ་ཡིན་པ་ཡོད་པ་འདི་ཡིན། དེ་སྐབས་སུ་དཔལ་སྤུངས་སྐུ་ཞབས་སི་ཏུ་རིན་པོ་ཆེ་གདན་འདྲེན་ཞུས་པ། ཕག་མོའི་སྒོ་ནས་མཆོད་འབུལ་དང་། རྟེན་ལ་སྙན་ཤལ་སོགས་མཛད། དམ་པ་འདི་ཉིད་ཀྱི་ལུགས་གཉིས་ཀྱི་མཛད་སྤྱོད་བསྔགས་འོས་མཆོག་ཏུ་གྱུར་པས་ཐུགས་ལྷག་པར་བརྩེ་ཞིང་གསུང་གིས་དབུགས་དབྱུང་དུ་མ་བསྩལ་ཞིང་གཟེངས་བསྟོད་པར་མཛད། ཁྲོ་བོ་བདུད་རྩི་འཁྱིལ་བའི་རྗེས་སུ་གནང་བ་ཞིག་ཀྱང་བསྩལ། འབུལ་བ་རྒྱ་དངུལ་རྡིལ་ཚད་ཚན་གྲངས་དུ་མས་སྣ་དྲང་བ་ཕུལ་ཏེ་མཆོད་ཡོན་ཤིན་ཏུ་ནང་གཤིན་དུ་གྱུར། དུས་རྒྱུན་གུ་རུ་རིན་པོ་ཆེ་ལ་མི་ཕྱེད་གདུང་ཤུགས་དྲག་པོས་གསོལ་འདེབས་ཀུན་གྱི་ཡང་ཟབ་ཚིག་བདུན་མ་ལ་བརྩོན་པས་དེ་སྐབས་སུ་འབུམ་ཐེར་གྱི་གྲངས་ཐེམ། སྡེ་དགེ་ས་སྐྱོང་ཆེན་པོ་ལྷ་ལྡན་དུ་ཆིབས་སྐྱོད་གནང་ཤུལ་དུ། སྡེ་དཔོན་བར་སྐུ་ཚབ་བྱོན་བཞུགས་པ་རྣམས་ཀྱི་མཛད་སྤྱོད་ཞན་པས། དགེ་རྩེ་རྫ་ཆུ་ཁ་སྟོད་སྨད་ཕལ་ཆེར་ས་རྒྱབ་ཏུ་བྲོས་བྱོལ་སོང་བ་དང་། ཁྱད་པར་ཁྲོམ་གཟའ་གོང་མ་ཨ་ཆེན་གངས་རྒྱབ་ཏུ་སོང་བའི་རྗེས་གཅོད་ལ། སྐུ་ཞབས་མཁྱེན་བརྩེའི་ཡང་སྲིད་དང་། རྫོགས་ཆེན་རིན་པོ་ཆེ། རྗེ་ཉིད་བཅས་ལྷན་དུ་ཕེབས་པ་དང་། སྡེ་དགེ་སྐུ་ཚབ་སྐལ་བཟང་ཚེ་རིང་། ཨ་སྔོ་དམ་ཆོས། སྒར་རྗེ་སྲས་པོ་སོགས་དམག་མི་
སྟོང་ཕྲག་ཙམ་བཅས་སོང་ནས། ཟླ་བ་གསུམ་ལྷག་ཞིག་འགོར། རྫ་སྟོད་སྨད་ཀྱི་སྡེ་ཆུས་ལེགས་ལམ་འགྲུབ། ས་སྟག་ལོ་བདག་པོ་ཆོས་རྒྱལ་ཚེ་དབང་རྡོ་རྗེ་ལྷ་ལྡན་ནས་ཕྱིར་ཕེབས་ཏེ་གསེར་ཁྲིར་གདན་འཇགས་སྐབས། རྒྱུ་མཚན་སྐད་ཞུས་ཐོག །བླ་མ་རྣམས་ལའང་གསུང་བཟང་མཛད་ཅིང་། ཁྱད་པར་རྗེ་ཉིད་ལའང་མཛོད་གོས་ནང་མ་ཡུག་ཆེན་སྒེར་དུ་བསྩལ། དེ་ནས་བཟུང་སྔར་རྒྱལ་ཚབ་རིན་པོ་ཆེའི་མཛད་པ་ཤིན་ཏུ་ལེགས་པའི་མུས་སྐྱོང་བས། ཆོས་རྒྱལ་མཆོག་ནས་བྱམས་སྐྱོང་ཆེ་ཞིང་། མཆོད་ཡོན་བར་སེལ་མེད་ཀྱིས་ཉི་མ་སྤྲིན་མེད་པ་དང་མཉམ་པས་མཛད་བཟང་མཐར་འཁྱོལ་བར་གྱུར། ལོ་དེའི་ཟླ་བ་གཉིས་པའི་ཚེས་བཅུ་རྒྱལ་དང་ཕུར་བུའི་འགྲུབ་སྦྱོར་བཟང་པོར། གྲུབ་དབང་རྡོ་རྗེ་འཆང་གོ་ཆ་རིན་པོ་ཆེའི་ཡང་སྲིད་འཇིགས་མེད་དཔལ་གྱི་སེངྒེ་གདན་སར་ཕྱག་ཕེབས་པར་མཛད། དེ་སྐབས་རྗེ་དབོན་བཀའ་དྲིན་འཁོར་མེད་ཕྲིན་ལས་དར་རྒྱས་ནས། རབ་འབྱམས་མཆོག་སྤྲུལ་དམ་པས་གཙོར་མཛད་རྗེ་ཉིད་དང་འདུས་པ་ཡོངས་ལ་ཟབ་རྒྱས་ཆོས་ཀྱི་མཛོད་ཁང་ཕྱེ་བའི་དབུ་བཙུགས། བླ་མ་འདི་ཉིད་གྲུབ་དབང་མཆོག་ནས་བཟུང་། ཞེ་ཆེན་པ་ལ་ཐུགས་བསམ་དཀར་ཞིང་། ཁྱད་པར་རྗེ་བླ་མ་ཉིད་དང་ཐུགས་དགོངས་གཅིག་འདྲེས་ཀྱིས་ལུགས་གཉིས་གང་ཐད་ནས་ལེགས་སྤེལ་ཉེས་བསུབ་ཀྱི་མཛད་པ་རྒྱ་གང་ཆེ་སྐུ་མ་གཤེགས་བར་ཐང་ལྷོད་མེད་པ་ཡིན་པས། སྐུ་གཤེགས་ཚེ་ཡང་སྤྲུལ་སྐུ་ལ་ཐུགས་གསོ་མཚོན་བྱེད་རྟ་ཆིབས་པ་འགྲོས་ལྡན་ཞིག་ཕུལ་བ་དང་། མཆོད་འབུལ་ཞུས་
པའི་སྐུ་ཡོན་རྒྱ་དངུལ་སྲང་བཅུ་ཕུལ་བའང་ཕར་གནང་སྟེ་རང་མི་རང་རྩ་ཟེར་བའི་དཔེ་ལྟར་མཛད། ལོ་དེའི་དགུན་སྟོད་ལ་ཤར་ཀཿ ཐོག་ཏུ་སི་ཏུ་མཆོག་སྤྲུལ་ཨོ་རྒྱན་བསམ་གྲུབ་ཞི་བར་གཤེགས་པའི་དགོངས་རྫོགས་ལ་གདན་ཞུས་བྱུང་བ་བྱོན་ནས་ཀཿ ཐོག་པས་སྔོན་ནས་རང་སློབ་མཁས་གྲགས་ཅན་ཡིན་པའི་རྒྱུ་མཚན་གྱིས་བསུ་བ་སེར་སྦྲེང་སོགས་བཀུར་བཟོས་རྒྱ་ཆེ་ཞིང་། འདུས་སྡེ་བྱིངས་ནས་ཞི་ཁྲོའི་བུམ་སྒྲུབ་མཛད་པའི་རྡོ་རྗེ་སློབ་དཔོན་གནང་། སྐུ་གདུང་ལ་ཞུགས་ཕུལ། ཚོགས་པ་བྱིངས་ལ་མ་ཎི་བཀའ་འབུམ་གྱི་བཀླག་ལུང་མཛད། འབུལ་ནོད་རྒྱ་ཆེ་བ་བཅས་རང་གནས་ཞེ་ཆེན་དུ་ཆིབས་ལམ་བདེ་ངང་ནས་ཕེབས། ཁྲོ་ཤུལ་འོམ་བུ་གོང་མ་དཔོན་སྡེ་རྣམས་སྔར་ནས་བཟུང་ཞེ་ཆེན་པ་སྐུ་ན་རིམ་ཅན་དང་། མཆོད་ཡོན་གྲྭ་རྩ་ནང་གཤིན་གཞན་འགྲན་བྲལ་བ་ཡིན་བཞིན། བདག་པོ་ཆོས་རྒྱལ་ཐུགས་དགོངས་ལ་ཁྲམ་རྐུན་འགས་མི་འཚམས་པའི་ལས་བྱས་པས། ཐུགས་ཕོག་ཆེན་པོར་གྱུར་ནས་སྡོད་གནས་མི་བདེ་བ་བྱུང་བར། སྡེ་དཔོན་བར་འཇགས་བདེའི་བསམ་སྤྱོད་ཐབས་གང་དྲག་མཛད། འོམ་བུ་འགབ་མ་དང་ཡང་སྔར་འོམ་འགབ་རང་གི་དཔོན་བླ་བསྟན་འཛིན་གྱི་སྐྱེས་བུ་མཁས་ཤིང་གྲུབ་པ་མཆོག་བརྙེས་རིག་འཛིན་རྒྱ་མཚོ་སྐུ་བཞུགས་རིང་ཁྲོ་ཤུལ་གོང་འགབ་ལ་བརྩེ་སྐྱོང་ཁྱད་མེད་མཛད་ཅིང་། ཁྱད་པར་སྐུ་གཤེགས་ཁ་ཡང་སྐྱིད་སྡུག་གཅིག་པ་ལས་ང་ཁྱོད་ཀྱིས་དབྱེ་བ་བྱེད་མི་ཉན་ཚུལ་བཀའ་གནང་དོན་ལྟར་མུས་སྐྱོང་འོང་ཐབས་ཀྱི་ལྷག་
བསམ་ཟླ་བ་ལྟ་བུས་ཁྱབ་པར་གནང་། དེ་འཕྲོས་སྔར་སྐྱབས་རྗེ་འགྲོ་བའི་མགོན་པོ་རབ་འབྱམས་བདེ་བར་གཤེགས་པའི་གདུང་རྟེན་བར་ཆད་སྣ་ཚོགས་ཀྱི་དབང་གིས་ཅུང་ཟད་ཆུང་ཤོར་བ། དགོན་སྡེའི་སྤྱི་ཆུས་ལ་ལ་ཉེ་ཞན་ཅིང་། རྒྱལ་ཚབ་རྡོ་རྗེ་འཆང་གི་ཡང་ཐུགས་དགོངས་མ་རྫོགས་པར་ཡོད་པས། རྒྱུ་མཚན་དེ་དག་ཐུགས་ལ་བརྣག་པར་མཛད་ནས་རྗེ་བླ་མ་འདི་ཉིད་ཐབས་ལ་མཁས་པས། རྒྱལ་ཚབ་རིན་པོ་ཆེའི་གདུང་རྟེན་འདི་རང་རེ་མཁོས་ཞེན་པས་ཤིང་གདུང་ཙམ་ལས་གསེར་ཟངས་སོགས་ཀྱིས་འགྲུབ་རེ་དཀའ་འདུག་པས། ཤིང་གདུང་ཆེ་ལེགས་ཤིག་བསྒྲུབ་ན་ལེགས་ཚུལ་ལས་བྱེད་པ་རྣམས་ལ་བསྙད་པས་དེ་ཁོ་ན་ལྟར་བྱ་བ་ཐམས་ཅད་ཁ་འཆམ་པས། ས་ཡོས་དབོ་ཟླ་བའི་ཚེས་བཅུའི་ཉིན་དགེ་བཤེས་བྱང་འདྲེན་པ་ཁྲབ་ཆོས་དར་ཞེས་བཟོ་རིག་པའི་རྩེར་སོན་པ་དེ་ཉིད་ཀྱིས། མཆོད་རྟེན་ཐིག་ཚད་ཞིབ་པར་གཏན་ལ་ཕབ། དེ་ནས་ལས་མགོ་བ་མཛད་ནས་ཤིང་མཁན་ཁ་ཤས་ཀྱིས་གྲོགས་དན་བྱས་ཏེ་འཕྲལ་དུ་ཐོན་པར་བྱས་ནས། རིང་བསྲེལ་རྣམ་པ་བཞི་དང་། སྐུ་གདུང་རིན་པོ་ཆེ་བཅས་ཀྱི་ནང་གཟུངས་རིགས་བཞག་ཚུལ་ལག་ལེན་སླ་ཆོས་དང་དེས་ཆོག་ཏུ་མ་སོང་བར་ཚད་ལྡན་དུ་བསྒྲུབས་ནས་རབ་ཏུ་གནས་པ་བཅས་འཕྲལ་དུ་ཐོན་པར་མཛད། དེ་ནས་ཁྲོ་ཤུལ་གོང་འགབ་ཀྱི་དཔོན་གཉིས་དང་། ཚོ་མི་གནད་ཆེན་རྣམས་ཁྲིད་ནས། དགོན་ཆེན་དུ་བདག་པོ་རིན་པོ་ཆེ་མཇལ་ཁ་ཞུས་པ། སྡེ་དཔོན་བར་གྱི་བརྗོད་གཞི་རྣམས་ལེགས་པར་འདུམ་པའི་ཞུ་དོན་འགྲུབ། གོང་རྗེ་མཆོག་
ནས་མཛོད་དར་དང་། རྒྱ་དངུལ་སྲང་འཁོར་བཅུའི་ལེགས་སྐྱེས་གནང་། དེ་ནས་ཚུར་སླེབ་འཕྲལ། རྒྱལ་ཚབ་རིན་པོ་ཆེའི་ཡང་སྲིད་ཐད་དམ་པ་ཉིད་ཀྱི་མནལ་ལམ་གྱི་ལྟས་དང་། པདྨའི་རྒྱལ་ཚབ་གླིང་རྗེ་དྲུང་རིན་པོ་ཆེའི་འབྱུང་འགྱུར་སྟོན་པའི་ལུང་གསལ་རྣམས་དོན་མངོན་དུ་གྱུར་ཕྱིར། རྒྱབ་ཕུ་བྲག་དཀར་དུ་ཆིབས་བསྐྱོད་མཛད། བཀའ་བགྲོ་བ་དང་། སྲུང་མ་ལ་ཕྲིན་ལས་བཅོལ་བ་སོགས་མཛད་དེ་ཐེ་ཚོམ་གྱི་འཕྲང་ལས་བརྒལ་ནས་རང་དགོན་དུ་ཕེབས། སྤྲེལ་ཟླའི་ཚེས་བཅུའི་སྐབས། རྒྱལ་སྲས་སྙན་གྲགས་ཡབ་སྲས་རྣམས་ཕེབས། ཚེས་བཅུའི་གར་འཆམ་གཟིགས་མོ་མཛད། གུར་ཆེན་ཕུབ་པ་སོགས་ཞེ་ཆེན་པས་རྒྱས་སྤྲོས་གང་ཡོད་སྐབས། རླུང་ནོན་རྗེ་ཉིད་ཀྱིས་མཛད་པས་ཉེ་ཞོ་གང་ཡང་མ་བྱུང་། རྒྱལ་སྲས་ཀྱིས་དགོན་སྡེ་བྱིངས་དང་རབ་འབྱམས་མཆོག་སྤྲུལ། རྗེ་ཉིད་བཅས་ལ། བདུད་འདུལ་ཐུགས་ཆེན་ནམ་མཁའི་རྒྱལ་པོའི་དབང་ལུང་མཛད། འབུལ་བ་དང་ཞབས་ཏོག་རྒྱ་གང་ཆེ་བསྒྲུབས། ཟླ་བ་དེའི་ཚེས་ཉེར་བདུན་གཟའ་སྐར་སྦྱོར་བྱེད་ལེགས་པའི་ཉིན། རབ་འབྱམས་མཆོག་སྤྲུལ་གཞན་དོན་ལ་ཐོག་མར་ཕེབས་པ། རྫོགས་ཆེན་དང་འབྲོག་རུ་སྟོད་སྨད། ཆེ་ཝོ་བརྒྱུད་བྱང་རྫ་ ཆུ་ཁ་ལ་བྱོན་པར། རྗེ་ཉིད་ཀྱིས་ལུགས་གཉིས་ཀྱི་བཀོད་པ་བཟང ་པོས་སྣ་དྲངས་པར་མཛད་ནས་ཤག་གི་མཚལ་དིས་བར་གྱི་ཆིབས་སྐྱེལ་དང་། སྤྲུལ་སྐུ་ལ་རྐྱེན་སེལ་དུ་ཐང་རྒྱལ་ཚེ་དབང་ཉེར་གཅིག །ཀློང་གསལ་རྣམ་འཇོམས་དབང་ཁྲུས། མ་ཏིའི་འཇམ་དཀར་དབང་སོགས་ཕུལ་ཏེ་
སྒར་ཆེན་དབྱར་བསོད་ལ་རིང་ཆས་མཛད། རྗེ་ཉིད་ཟླ་བ་བདུན་པའི་ཚེས་ཉེར་བདུན་ལ་སྒར་ཆུང་བྱས་ཏེ་ཁྲོ་ཤུལ་ནང་གྱོད་མཐའ་བསྡུ་ཕྱིར་སྐུ་ཚབ་དམ་ཆོས་རྩར་ཕེབ། བདག་པོའི་རྟ་བྲང་ཁྲོ་ཤུལ་པས་སྔ་མ་དགྲ་བརྒྱབ་བྱས་པས་འཇལ་བཤགས་སོགས་ཀྱི་སྤྲོད་ལེན་བྱས་ཏེ་ཟླ་བ་གཉིས་ཙམ་འགོར་ནས་ལེགས་པར་གཙང་ཆོད་གྲུབ། སྒར་དེར་བཞུགས་སྐབས་ཉིད་ཀྱི་ཞལ་སློབ་ཀཿཐོག་ཉིན་དགོན་སྤྲུལ་པའི་སྐུ་ཕེབས། གསོལ་སྟོན་སོགས་ཞབས་ཏོག་གཟབ་པར་མཛད། བླ་སློབ་བར་ཐུགས་དགོངས་གཅིག་འདྲེས་སུ་གྱུར། སྐུ་ཚབ་རོགས་བདག་པོ་ལ་སྐད་ཞུས་ཕུལ་བའི་ཕྱིར་མགྲོན་གཉེར་བསོད་ནམས་བསྟན་འཛིན་བཏང་། སྐུ་ཉིད་དགོན་དུ་ཆིབས་བསྐྱོད་གནང་། རབ་འབྱམས་མཆོག་སྤྲུལ་གླིང་འོག་རྫ་རྒྱུད་ལ་ཐོག་མར་འབྲུ་ལྡོམ་ལ་ཕེབས་པའི་ཕྱག་ཕྱིར་བྱོན་པས། ཆ་རྒྱུས་སྔོན་ཡོད་ཀྱིས་མཛད་སྒོ་གང་ལ་གང་བསྔགས་ཀྱིས་ཐབས་མཁས་མཛད་པས། རྙེད་པ་དངུལ་དང་། རྟ་ནོར། འབྲུ་ཆ་སོགས། རྒྱ་གང་ཆེ་བྱུང་ནས་སྤྱིར་སྒར་པ་ལེགས་ལམ་ལྟ་བུར་གྱུར་ནའང་། རྫ་རྐེད་རིན་ཆེན་གླིང་ཟེར་བའི་གྲོང་ནས་སྒར་ཐེག་སྐབས་གང་ནས་འོང་ཆ་མ་མཆིས་པ་ཁྱི་རྒྱ་བོ་ཞིག་གིས་རྗེས་བསྙགས་བྱུང་བ། རྗེའི་ཞལ་ནས་འདི་བཟང་པོ་མིན་པས་ཕྱིར་ནན་གྱིས་བསྐྲད་དགོས་ཞེས་གྲྭ་པ་རྣམས་ལ་ལན་གྲངས་གསུངས་པ། ཉིན་བཞིན་ཕྱིར་དེད་ཀྱང་ནུབ་བཞིན་ཚུར་སླེབ་འདུག་པ། དེ་མཚམས་སུ་གྲྭ་ཚང་ནང་འབའ་རེ་ཟླ་བ་ན། མཆོད་དཔོན་བསྟན་འཛིན་བཟང་པོ་བསྙུང་། ཁྱིའི་ཚ་ཁར་སྒར་ཚུགས་སླེབ་དུས་གཉེར་པ་པདྨ་དབང་ལྡན་ཤི། དེ་
མཚམས་སུ་ཁྱི་དེ་ཡང་སྒར་མཐའ་ན་རང་བཞིན་གྱིས་ཤི་སོང་བས་ཀུན་གྱིས་གསུང་ལ་ཡིད་ཆེས་ཐོབ། ལྕགས་འབྲུག་ཟླ་བ་དང་པོའི་ལོ་གསར་སྐབས། རབ་འབྱམས་མཆོག་སྤྲུལ་ལ་འཕོ་བ་འཇག་ཟུག་མའི་སྨིན་ཁྲིད་ཕུལ་བ་སྦྱང་བརྩོན་གནད་སྨིན་རྟགས་ཐོན་གནང་། ཟླ་བ་གཉིས་པའི་ནང་ཞེ་རྫོགས་སྔར་ཐོབ་ལྟར། རབ་འབྱམས་མཆོག་སྤྲུལ་རྫོགས་ཆེན་དུ་བྱོན་ནས་ཞག་ཉི་ཤུ་སྐོར་དབང་ལུང་གསན་པའི་ཞབས་ཕྱིར་ཡང་རྗེ་ཉིད་ཕེབས། ཕྱིར་བྱོན་ནས། སྔ་མ་རྒྱལ་ཚབ་རིན་པོ་ཆེའི་གདུང་རྟེན་དེ་དངུལ་གན་རྡུང་གིས་གཡོག་རྒྱུའི་ལས་གྲྭའི་དབུ་བརྩམ། ལས་མགོ་ལ་རྗེ་ཉིད་ཀྱི་ཉེ་བར་གནས་པ་དགེ་སློང་འགྱུར་མེད་ཆོས་རྒྱལ་གྱིས་བྱས་པས་ལས་ཀ་དངོས་གཙང་ཞིང་བཟོ་ཁྱད་ལྷག་པར་ཐོན་པ་ཡུན་ཧ་ཅང་མ་འགྱང་བར་གྲུབ། གསེར་དངུལ་རྡིལ་ཚད་ཉི་ཤུར་ལོང་ཉེ་སོང་། བཟོ་བོ་རྣམས་ཀྱི་འབུལ་བ། དབུ་རྟག་གོས། ཟ་མ། མེ་ཤིང་། སོལ་བ་སོགས་དགོས་དགུ་ཚང་མ་ཇ་ཐོག་ལ་ཕབ་པས་འཁོར་དྲུག་སྟོང་ལྷག་ཙམ་སོང་བ། ཁོང་ཞེ་ཆེན་བླ་བྲང་གི་མི་ཞིག་བྱས་ནས་སྡོད་པའི་དོན་པོ། དེར་མ་ཟད་རང་གི་མི་ལུས་ཐོབ་པའི་དགོས་པ་མཆོག་རྩ་བའི་བླ་མའི་ཞབས་ཕྱི་འགྲུབ་པ་ཡིན་གསུངས་ནས་ཐུགས་དགྱེས་པའི་ཡང་རྩེར་སོན། ཟླ་བ་དྲུག་པའི་ཚེས་བཅུ་གཟའ་སྐར་ལེགས་པའི་ཉིན། སྐྱབས་གཅིག་འཁོར་ལོའི་མགོན་པོ་པདྨ་གསང་སྔགས་བསྟན་འཛིན་ཆོས་གྱི་རྒྱལ་པོ་དགོངས་པ་ཞི་བ་ཆོས་ཀྱི་དབྱིངས་ལས། བསྟན་འགྲོའི་དོན་དུ་སྤྲུལ་པའི་སྣང་བརྙན་གསར་པ་
མི་བསྐྱོད་མཁས་གྲུབ་རྒྱ་མཚོ་ངོས་འཛིན་ལ། རྫོགས་ཆེན་རིན་པོ་ཆེ་དང་། དཔོན་སློབ་རྣམ་གཉིས། སྐུ་ཉིད་བཅས་རུ་དམ་སྟག་མཛེས་ནང་ཡབ་ཚང་ཚེ་བརྟན་གཞིས་ཐོག་ལ་གདན་འཛོམས་པར་མཛད། སྤྲུལ་སྐུ་གསར་བྱོན་ལ་སྔོན་གནས་རྗེས་དྲན་གྱི་སྤོབས་པ་དགེ་ཞིང་། ཡིད་དང་བ་འདྲེན་པ་ཞིག་འདུག་པ་ལ། རྫོགས་ཆེན་ནས་ཚེ་དབང་དང་ཁྲུས་གསོལ་མཛད། རྗེ་བླ་མ་ཉིད་ཀྱིས་གར་ཚེའི་དབང་བརྒྱ་དང་། དྭངས་མ་བཅུད་འདྲེན་གྱི་དབང་དང་བྱབ་ཁྲུས་ཕུལ་ཏེ། ཀུན་ནས་དགེ་བའི་རྟེན་འབྲེལ་གྱི་ཆོ་ག་དུ་མ་དང་། བཀྲ་ཤིས་པའི་ཚིགས་སུ་བཅད་པ་དང་བཅས་སྐུ་ལ་ན་བཟའ་ཕུལ་བ་དང་། སྲུང་བ་འདོགས་པ་སོགས་བསྩལ། དེ་རྗེས་ལྷོ་ཁོག་ཏུ་སྐུ་ཉིད་ཀྱི་མ་ཡུམ་བགྲང་བྱའི་ཁུར་ཆེན་ཐོབ་པ་ལ་འཕྲད་འདོད་ཀྱིས་མགྱོགས་སྐོར་མཛད་དེ་ཕེབས། མ་ཡུམ་ལ་དབང་བརྒྱ་ཞིག་མཛད། དྲོ་འཇམ་བདེ་བའི་གོས་ཞིག་གསར་པ་ཚེམ་ནས་གནང་། དེ་སྐབས་དྲུང་པ་རིན་པོ་ཆེའི་མདུན་ནས་གྲུབ་པའི་རྒྱལ་མོའི་ཚེ་དབང་དང་། གཏེར་སྟོན་མདུན་ནས་གནམ་ཆོས་ཚེ་དབང་བཅས་གསན་བཞེས་མཛད། ཤང་ཐོ་སྤྲུལ་སྐུ་ཉིད་ཀྱི་སྐུ་ཚ་དངོས་ཡིན་སྟབས། ན་བཟའི་གྲལ་ནས། གོས་ཆེན་སྟོད་འབོག་དང་། ཐེར་ཤམ་རྒྱུ་བཟང་། ཐེར་གཟན་སོ་མ། ཞབས་ཆགས། སྐུ་ཆིངས། རྫབ་ཀྱི་གསོལ་ཞལ་དངུལ་ཤན་ཅན་བཅས་གནང་། ཨ་ཏི་བསྟན་འཛིན་དང་གྱམ་པའི་དཔལ་མགོན་ནང་ངན་བྱུང་བ། དཔོན་ནོར་བུ་རྒྱལ་ཕུག་ཏུ་བཞག་སྟེ་འཇགས་བདེ་བཤད་པས་འདུམ་པར་མཛད། ཚུར་ཞེ་ཆེན་དུ་གདན་འཇགས་སྐབས་ཕུག་
ཁང་མཆོག་སྤྲུལ་ལྷ་སར་ཕེབས་པ་འདི་ལོ་ཕྱིར་དབུ་ཐོན་ལེགས་ལམ་གྱིས་དགོན་དུ་ཆིབས་སྐྱོད་མཛད། གཞི་བྱེས་ཞལ་འཛོམས་ཀྱིས་དགྱེས་སྤྲོ་དང་གསོལ་སྟོན་མཛད། སྐྱབས་རྗེ་ཉིད་ཀྱིས་རྒྱལ་ཚབ་ཡང་སྲིད་ལ་རྐྱེན་སེལ་དུ། སྨིན་གླིང་འཆི་མེད་ཡང་སྙིང་ཚེ་དབང་བརྒྱ། ཐང་སྟོང་ཚེ་དབང་བརྒྱ། བསམ་ལྷུན་དབང་། རྣམ་འཇོམས་བྱབ་ཁྲུས་བཅས་མཛད། ཟླ་བ་དགུ་པའི་ནང་དམ་པ་ཉིད་ཀྱི་མཛད་པ་ཀུན་གྱི་ཕུལ། རྒྱལ་ཚབ་གོང་མའི་དངུལ་གདུང་ཆེན་མོ་ལ། རབ་འབྱམས་མཆོག་སྤྲུལ་དབུ་བཞུགས་དང་། ཉིད་ཀྱིས་རྒྱལ་ཐེབས་མཛད་དེ། རབ་གནས་ཕྱག་ལེན་རྒྱས་པའི་ལུགས་ཉིན་གསུམ་མ། མཆོད་གར། སྦྱིན་བསྲེག་བཅས་སྤྲོས་པ་གང་རྒྱས་ཀྱི་ལུགས་སུ་མཛད། དེ་སྐབས་ལུགས་སུ་ཚོགས་པའི་ཞབས་ཕྱི་ཞུ་དགོས་རིགས་དང་། ཆོ་གའི་ཕྱག་ལེན། སྟོང་ཐུན་བཤད་པ་བཅས་མཁས་དབང་ཉིད་ཀྱིས་ཐུགས་ཁུར་མཛད་པས། དེ་དུས་རབ་གནས་ལྟར་ཞེས་ཟིན་ཐོ་ཀུན་གྱིས་ཡིད་བརྟན་དུ་རུང་ཞིང་ཕུལ་དུ་བརྩི་བ་འདི་ཡིན། དེ་ནས་ལྕགས་སྦྲུལ་ལོ་གསར་ཟླ་བའི་ཚེས་ཉེར་བརྒྱད་སྐོར་ལ་བྱང་ཆུབ་སེམས་དཔའི་རང་ངོས་ནས་གདུལ་བྱའི་དོན་སྒྲུབ་པ་ལ་སྐྱོ་ངལ་མེད་པ་ཆོས་ཉིད་ལགས་ན་ཡང་། གཞན་ངོར་སྣང་ཚུལ་ཉི་མས་སྲིན་བྱ་ལོང་བར་གྱུར་པ་ལྟར་སྣ་ཚོགས་སུ་སྣང་བས། དགོན་སྡེའི་ལས་སྒོ་ལ་བག་ཟོན་དགོས་པའི་བརྡའ་བྱུང་བས། རི་ཁྲོད་ལ་བཞུགས་རྒྱུའི་ཐོག་མའི་རྟེན་འབྲེལ་དེ་འགྲིགས་པའི་སྐབས། རི་
ཁྲོད་དུ་གདན་འཇགས་མ་ཐག །གོ་ཆ་མཆོག་སྤྲུལ་རིན་པོ་ཆེ་ལ། སྙིང་ཐིག་ཡ་བཞིའི་དབང་ལུང་ཁྲིད་བཅས་ཕུལ། འདི་སྐབས་རྒྱལ་ཚབ་ཡང་སྲིད་ཅུང་ཞིག་བསྙུང་བའི་རིམ་གྲོ་ལ་ཕུར་བསྙེན་དུང་གི་ཡོན་རྫོགས་ཆེན་ལ་རྒྱ་དངུལ་རྡིལ་ཚད་ཕུལ། བསྙུན་གཞི་ཡར་དྭངས་ལ་སོང་། དགོན་པའི་ས་དཔྱད། ཆུ་བྲན་གཞུང་ཆུ་དང་། དེ་ཆུ་ཆེན་དང་མཐོང་ས་ནས་འདྲེས་ཏེ་ཐལ་ལེ་རིང་དུ་སོང་བས་ཆུ་དཔལ་ཤིན་ཏུ་ཞན་པས། དེ་ལ་ཕན་ཕྱིར་དགོན་འོག་ཏུ་བཅོས་མའི་རྫིང་བུ་ཞིག་བསྐྱིལ། དེར་འཁྲུག་བཅོས་དང་ཀླུ་ཆོག་མཛད། དེ་མཚམས་སུ་རྒྱ་རོང་དབོན་སྤྲུལ་དམ་པ་ཞེ་ཆེན་དུ་ཐོག་མར་ཕེབས་པ་ལ་བསུ་བ་སེར་སྦྲེང་དང་འབུལ་བ་རྣམ་བཞག་རྒྱ་ཆེན་ཞུས། མ་ཡུམ་ཡང་ལྔ་ལམ་དུ་གཤེགས་པའི་དགེ་རྩར། སྐུ་ཉིད་དཔོན་སློབ་བཞིས་ཞི་ཁྲོའི་ཁྲུས་ཆོག་ཉིན་བདུན་བར་མཛད། རི་ཁྲོད་མཚམས་པ་རྣམས་ལ་ལྟུང་བཤགས་གསུང་ཡོན་སོགས་ཡུམ་རང་གི་ཞལ་ཆེམས་ལྟར་བྱས། ཚེས་བཅུ་སོགས་སྤྱི་ཁག་རྣམས་ལ་རྟེན་འཇོག་རེ་ཡང་ཕུལ། དེ་རྗེས་ཟླ་བ་བརྒྱད་པའི་གྲལ་ཚེས་བཅུ་བཞིའི་གཟའ་སྐར་དུས་ཚེས་དགེ་བའི་ཉིན། རབ་འབྱམས་མཆོག་སྤྲུལ་ལ་ཉིད་ཀྱིས་མཁན་པོ་དང་། གཞན་དགེ་འདུན་གྲངས་ཚང་བས་དགེ་ཚུལ་དུ་བསྒྲུབས། དེའི་ཕྱིར་ཉིན་ཚེས་བཅོ་ལྔ་ལ། ཡོངས་གཟིགས་རྡོ་རྗེ་འཛིན་པ་ཕུག་ཁང་མཆོག་སྤྲུལ་རིན་པོ་ཆེ་ནས། རབ་འབྱམས་མཆོག་སྤྲུལ་གཙོར་མཛད་གཞན་རྡོ་བླ་འཇིགས་མེད་སྐལ་བཟང་། རྫོགས་ཆེན་དཔོན་སློབ་སྤྲུལ་པའི་སྐུ། ཀཿ ཐོག་ཉིན་དགོན་སྤྲུལ་སྐུ་སོགས་
ཀྱིས་གཙོས་པའི་དགེ་འདུན་འདུས་པ་མང་ཞིག་ལ་རྒྱལ་བའི་བཀའ་འགྱུར་རིན་པོ་ཆེའི་ལྗགས་ལུང་གནང་། དེ་སྐབས་སུ་རྗེ་འདི་ཉིད་ཀྱིས། ད་རེས་ཁྱེད་རང་ལུང་ཞབས་འདིར་བཞུགས་ཀྱི་བླ་གྲྭ་ཚང་མ་ལུང་མཐའ་མ་ཞོག་བར་གྲོང་ཆོག་སོགས་བྱོན་བཞུགས་གཏན་ནས་མི་ཉན་བར་ཆད་ཞིག་ཡོད་གསུངས། རྫ་སྟོད་ཀ་ཐང་གྲོང་ནས་མི་ཞིག་ཤི་བར། དཔོན་སློབ་ཚང་ཕེབས་དགོས་བྱུང་བ། དེ་ནས་བསྙུན་གཞི་བཞེས་ཏེ་ཡར་རྫོགས་དགོན་དུ་ཕེབས་ནས་གཞན་དོན་ལ་གཟིགས་སོང་། བཀའ་འགྱུར་ལུང་གྲུབ་པ་དང་། རྗེ་ཉིད་མཁྱེན་རྒྱ་ཆེ་བས་ལུང་རིགས་སྨྲ་བ་རྡོ་བླ་འཇིགས་སྐལ་གྱིས་ཀྱང་དད་གུས་ཆེན་པོས་བཀུར་ཏེ་དབང་ལུང་གདམས་ཁྲིད་མང་ཞིག་གསན་དགོངས་ཀྱིས་ཞུས་པ། ཐུགས་བཞེད་དགྱེས་པར་བསྐངས། རབ་འབྱམས་མཆོག་སྤྲུལ་ལའང་། རྒྱལ་བ་ཀློང་ཆེན་པའི་མཛོད་བདུན། ངལ་གསོ་སྐོར་གསུམ། གསང་སྙིང་རྩ་འགྲེལ། བཀའ་ཐོར་བུ་སོགས་ལུང་གང་ཡོད་དང་རྗེ་ཀརྨ་པ་རང་བྱུང་རྒྱལ་བའི་ཟབ་མོ་ནང་དོན། རྣམ་ཤེས་ཡེ་ཤེས་འབྱེད་པ། སྙིང་པོ་བསྟན་པ། ཀུ་མ་རཱ་ཛའི་རྣམ་ཐར་རྣམས་ཀྱི་ལྗགས་ལུང་དང་། བཀའ་བརྒྱད་དབང་ཆེན། འཇའ་ཚོན་ཞི་ཁྲོའི་དབང་། སྤྱི་འདུས་དབང་། རཏྣའི་ཀློང་གསལ་དང་ཐུགས་སྒྲུབ་དབང་། མདོ་དབང་ཚང་མ། དེ་རྣམས་ཀྱི་རྒྱབ་རྟེན་ལུང་བཅས་དང་། ཀར་གླིང་ཞི་ཁྲོའི་དབང་ལུང་ཡོངས་རྫོགས། བར་དོ་དྲུག་ཁྲིད། དྲེགས་འཇོམས་དབང་ལུང་། རྟ་མགྲིན་དབང་ལུང་ཚང་མ། ཕུར་པ་སྤུ་གྲིའི་དབང་ལུང་ཚང་མ་དང་། སྡོམ་གསུམ་རྩ་འགྲེལ།
སྨན་ཡིག་རྒྱུད་བཞི། ལྷན་ཐབས། རི་ཆོས་ངེས་དོན་རྒྱ་མཚོ། རབ་འབྱམས་གཉིས་པའི་བཀའ་འབུམ་ཡོངས་རྫོགས། པདྨ་བཀའ་ཐང་། ཐང་ཡིག་སྡེ་ལྔ་རྣམས་ཀྱི་ལུང་ཕུལ། ཆུ་རྟ་ལོ་རབ་འབྱམས་མཆོག་སྤྲུལ་ཡིད་ལྷུང་ལྷ་རུའི་ཕྱོགས་སུ་དབྱར་བསོད་ལ་ཕེབས་དུས་གཞན་ལྷ་བླ་རྣམས་ཀྱིས་ཅུང་ཞིག་འཚུབས་ལྟས་མངོན་ཚུལ་གསུངས་པས། རབ་འབྱམས་ཉིད་ཀྱི་གསོལ་དཔོན་རྒན་པོ་ཀུན་བཟང་དབང་ཆེན་གྱིས། བླ་མཆན་མཛད་ནས་ཕེབས་རོགས་ཞུས་ལྟར་རྗེ་ཉིད་ཕེབས། སྒར་པའི་ལས་སྒོ་ལྟོ་རུ་བསྟན་འཛིན་དང་། ཀུན་བཟང་དབང་ཆེན་གཉིས་ཀྱིས་བྱས་པས་ཐུགས་སུན་སྣེ་གཅིག་མ་བྱུང་བ། གདུལ་བྱ་རྙེད་པ་རྒྱ་ཆེན་སྤྱིར་དབུ་ཐོན་ལེགས་ཀྱང་། མ་ཎི་གད་མགོའི་གནས་རྩར་སྒར་བབ་ནུབ། རྗེའི་ཞལ་ནས། སྔར་རབ་འབྱམས་གོང་མའི་སྒར་པ་འདིར་བབ་དུས་གྲྭ་པ་གཉིས་རྩ་འགོས་འདས་ཤོར་བ་ཡིན། དོ་ནུབ་རང་ཚང་ལའང་གཞི་བདག་ཁྱུང་རི་འདིས་འཁྲེན་གཟེར་ཞིག་གཏོང་འོང་བ་འདྲ་གསུངས་པ་དང་། དྲེལ་ཞིག་ལ་ནད་ཕོག་འདུག་པ་སྔགས་བཏབ་པས་བདེ་སོང་ཡང་། རྟ་ཟོག་ཁ་ཤས་ཤིག་གཞི་བདག་ལ་འབུལ་ན་ལེགས་པ་འདྲ་བས་ཁྲོ་ཆུ་ཕར་ཁ་ལ་རྒྱོབ་ཤོག་གསུང་བ། གྲྭ་པ་རྣམས་ཀྱིས་དེ་ཙམ་ཨེ་དགོས་ན་ཟེར། གསུང་བཞིན་མ་བསྒྲུབས་པས། མཚན་མོ་རྟ་གདང་ནང་ནས་རྟ་ཁ་ཤས་ཞིག་རང་བཞིན་གྱིས་མེད་སོང་བས་ཀུན་ཡ་མཚན་སྐྱེས། གཞན་སྐྱོན་ཆེན་མ་བྱུང་བར་རང་གནས་སུ་འབྱོར་པས། ད་རེས་བདེ་བར་འཁོར་བ་འདི་རྗེ་བླ་མ་འདིའི་
སྐུ་དྲིན་ཡིན་ཞེས་ཀུན་གྱིས་གླེང་། དེའི་ཟླ་བ་བཅུ་པའི་ཚེས་གཅིག་ལ་རྒྱལ་ཚབ་ཡང་སྲིད་རིན་པོ་ཆེ་ཁྲི་འདོན་ལ། བསུ་བ་སེར་སྦྲེང་། སྟོན་ཆེ་ཆུང་སོགས་སྔར་རབ་འབྱམས་ཁྲི་སྟོན་དང་ཕྱོགས་མཚུངས་ཙམ་དང་། ཁྱད་པར་བསླུ་ཡོན་དང་། ཡབ་ཡུམ་ལ་རྟ་ཆིབས་པ་དང་། གོས་ལག་སྣ་ཚང་རེ་དང་། གཞན་ཉེ་དུ་ཕོ་མོ་ཡོངས་ལ་གནང་སྦྱིན་གང་ལ་གང་དགོས་རེ་འཁང་མི་དགོས་པ་ཡ་རབས་སྐྱེ་བོའི་ལུགས་དང་མཐུན་པར་མཛད། དེ་སྐབས་རྡོ་བ་སྐྱ་ནང་བླ་མ་ཀློང་ཆེན་པ་ལ་དབང་ལུང་ཐུགས་མཁོ་བསྟུན་པ་མང་ཞིག་འབུལ་བ་མཛད། དེ་མཚམས་ ཆུ་ལུག་ལོ་དགུང་གྲངས་སོ་བདུན་བཞེས་སྐབས་གཟུགས་ཅན་གཟུགས་མེད་ཚོགས་ཀྱིས། དམ་པའི་མཛད་བཟང ་བློ་ལ་མི་ཤོང་བའི་ཕྲག་དོག་གི་འགལ་རྐྱེན་ངན་པའི་རྣམ་འགྱུར་དུ་མ་སྣང་བ་དང་། བླ་དགོན་གྱི་ལས་ཁུར་ཡུན་རིང་མཛད་པའི་སྐབས་མེད་པའི་ལྟས་སྣ་ཚོགས་ཤར་བ་དང་། སྔར་རྩེ་ལེ་རྒོད་ཚངས་པ་སྣ་ཚོགས་རང་གྲོལ་སོགས་དགེ་བའི་བཤེས་གཉེན་མང་པོ་འདུ་འཛིའི་གནས་ལས་རང་བཞིན་གྱིས་འདའ་བའི་རྐྱེན་སྣང་ཐོག་ཏུ་བབ་པ་བཞིན། བྱ་བྲལ་གྱི་ཀུན་སྤྱོད་དང་དུ་ལེན་པའི་གནས་སྐབས་དུ་མ་མངོན་པ་དང་། ཉེ་བར་གནས་པའི་དགེ་སློང་བསླབ་གསུམ་འཆང་བ་འགྱུར་མེད་ཆོས་རྒྱལ་ཡང་ཞལ་མ་རྟག་སོང་བས་འཕྲལ་རྐྱེན་བྱས་ཏེ། རྒྱལ་བའི་སྲས་པོ་ཐོགས་མེད་ཞབས་ཀྱིས། གཉེན་གྱི་ཕྱོགས་ལ་འདོད་ཆགས་ཆུ་ལྟར་གཡོ། །དགྲ་ཡི་ཕྱོགས་ལ་ཞེ་སྡང་མེ་
ལྟར་འབར། །བླང་དོར་བརྗེད་པའི་གཏི་མུག་མུན་ནག་ཅན། །ཕ་ཡུལ་སྤོང་བ་རྒྱལ་སྲས་ལག་ལེན་ཡིན། །ཞེས་པའི་དོན་ཐུགས་ཉམས་སུ་བསྟར་པའི་དུས་ལ་བབ་པར་དགོངས་ནས། ཉེ་གནས་ཀྱི་དགེ་རྩར་རིས་མེད་ཀྱི་བླ་གྲྭ་སུམ་བརྒྱ་ལྷག་ཙམ་གདན་ཞུས་བྱས་ནས། འཁོར་དྲུག་བརྒྱ་ལྷག་གིས་སྤོང་དག་བཏང་། ཁྱད་པར་མཆོད་སྦྱིན་གཉིས་ལས་སྦྱིན་པ་ལྷག་པར་དགོངས་ནས། ཞག་གསུམ་ལ་གཤིན་སྟོན་ཆེན་མོ་གཞན་རྫ་རྒྱུད་ཕྱོགས་སོགས་ལ་སྲོལ་ཡོད་པ་ལྟར་མཛད་པས། སླད་ནས་ཞེ་དགོན་དུ་སྲོལ་འཇགས་པ་འདི་བཅས་མཛད། མཛོད་དར་རྒྱས་དང་། བསོད་ནམས་བསྟན་འཛིན་དང་། དགེ་བསྟན་འཛིན་བཅས་ཀྱིས་རི་ཁྲོད་དུ་བཞུགས་རྒྱུའི་ཕན་ཆ་བསྒྲུབས་ན་ཡང་། རེ་ཞིག་རྐྱེན་ངན་དགེ་བའི་བསྐུལ་མ་བྱུང་ཐོག་ནམ་སྟོན་དུས་ཀྱི་གཞན་གསོས་བཞིན་རྒྱལ་ཁམས་ཕྱོགས་མེད་དུ་འགྲོ་བའི་དུས་ལ་བབ་པར་དགོངས་ནས། འདས་པོའི་དགེ་རྩར། དཔལ་ཀཿ ཐོག་རྡོ་རྗེ་གདན་དུ་ཟླ་བ་ལྔ་པའི་ཚེས་ཉི་ཤུ་ལ། སྔར་རབ་འབྱམས་གོང་མའི་སྐུ་ཉེར་གྱུར་པ་འགྱུར་མེད་ཟེར་བ་དང་། བསྟན་འཛིན་ཟེར་བ་གཉིས་ཕྱག་ཕྱིར་ཁྲིད་ནས་ཆིབས་སྐྱོད་མཛད། ཀཿ ཐོག་ཏུ་ཕེབས་ནས། ཚོགས་པ་དྲུག་བརྒྱ་ལྷག་ཙམ་ལ་ཕྱག་འགྱེད་དང་། མཆོག་སྤྲུལ་རྣམས་ཀྱི་མདུན་ལ་འབུལ་རྣམ་བཞག་འབྱོར་ཚོད་ཕུལ། དེ་མཚམས་ཚེས་བཅུ་ཆེན་མོ་ཚུགས་པ་དང་འཛོམས་པས། འཚོགས་དབུར་བཞུགས་དགོས་ཞེས་མཆོག་སྤྲུལ་མཆེད་ཀྱིས་བཀའ་ཕེབས་ལྟར་ཚེས་བཅུའི་རྡོ་རྗེ་སློབ་དཔོན་མཛད། དེ་ཟིན་པ་དང་། བྱ་བྲལ་ཀུ་སཱ་ལིའི་
སྤྱོད་པ་བསྐྱངས་ཏེ། ཐོག་མར་དཔལ་འཁོར་ལོ་སྡོམ་པའི་སྐུའི་གནས་རོང་བཙན་ཁ་བ་དཀར་པོའི་ཕྱི་གནས་ནང་གནས་བཅས་ལ་ཚོགས་འཁོར་དང་། མཆོད་འབུལ། ཞབས་བསྐོར་བཅས་མཛད་དེ། བྲག་ཡབ་ཆབ་མདོ་སོགས་རྒྱ་ཚུགས་བརྒྱུད། ལམ་བར་གྱི་དགོན་གནས། གཏེར་གནས་སོགས། རྟེན་ཡོད་རིགས་ལ་མཆོད་འབུལ། ཚོགས་གཏོང་བ། ཞབས་བསྐོར་བཅས་མཛད་ཀྱིན་ལྷ་ལྡན་དུ་དབུ་ཐོན་ལེགས་ལམ་གྱིས་ཕེབས། དེར་བསྐོར་ཚད། བརྐྱང་ཕྱག །རི་བསྐོར། མཆོད་འབུལ་སོགས་ཞིབ་ཆ་མཛད། དབུས་རི་བར་སྐོར་རྒྱས་པའི་ལུགས་དང་། བྱེ་བྲག་འབྲི་གུང་། གདན་ས་མཐིལ། ཡང་རི་སྒར། རྫོང་སར་སོགས་དང་། སེ་ར། འབྲས་སྤུངས། དགའ་ལྡན། འབྲུག་བདེ་ཆེན་ཆོས་འཁོར་སོགས་ལ་མཇལ་ཕྱག་ཞབས་བསྐོར། མང་ཇ་ཞལ་འདེབས། སྐར་མེ་ཞལ་གསོ། བླ་མ་རྣམས་ལ་འབུལ་མཚོན་རེ་བཅས་མཛད། མཚུར་ཕུར་དགུ་ཆེན་དང་དབུ་ཞྭ་སོགས་མཇལ་ཁ་ཞིབ་ཆ་དང་། ཀརྨ་པའི་མདུན་ལ་དངུལ་སྲང་འཁོར་ཁ་ཤས་ཕུལ། དེ་ནས་རྡོར་བྲག་ཏུ་ཕེབས། ལྷ་རྟེན་བླ་མ་རྣམས་ཞིབ་མཇལ་དང་། འབུལ་བ་མང་ཇ་བཅས་ཞུས། ཆུ་བཟང ་མཁན་རིན་པོ་ཆེ་ནས། ཞབས་དྲུང་ལ་ཐོག་མའི་ཆོས་བཀའ་ཕྱེ་བའི་སྐབས་དང་དུས་འགྲིགས་པས། བྱང་གཏེར་ཕུར་པ་ལྷ་ནག་གི་དབང་རྒྱས་པ་སོགས་གསན་བཞེས་དང་། རྗེ་བཙུན་མའི་དྲུང་ནས་ཚེ་དབང་སོགས་མང་ཞིག་གསན། དེ་མཚམས་ནས་བསམ་ཡས་ལ་ཕེབས་ཏེ་ཕྱག་བསྐོར། སྐར་མེ་ཞལ་གསོ། ཚོགས་འཁོར་སོགས་བསགས་སྦྱངས་ནན་ཆེར་མཛད།
དབུས་ཕེབས་གཉིས་པ་སླར་ཡང་སྨིན་གྲོལ་གླིང་དུ་ལོ་གསུམ་བཞུགས་ནས་རིག་འཛིན་མཐོང་བརྒྱུད་ཕྱག་བཞེས་སོགས་ལ་མཁས་པར་བྱས་ཏེ་རྡོ་སྨིན་བཤེས་གཉེན་ཉི་ཤུ་ཙམ་ལས་དབང་ལུང་ཁྲིད་གསུམ་གྱི་རྒྱུན་བླངས་པ།
དེ་ནས་ཤིང་སྤྲེལ་ཟླ་བ་དང་པོའི་ཚེས་བཅུ་དགུ་ལ། སྔ་འགྱུར་བསྟན་པ་རྒྱ་མཚོའི་འབྱུང་དང་འཕེལ་བའི་གཞི་གཅིག་པུ་འོག་མིན་ཨོ་རྒྱན་སྨིན་གྲོལ་གླིང་གི་ཚོགས་གྲལ་དུ་གྲྭ་གསར་བཅུ་བདུན་དང་ལྷན་དུ་ཞུགས་པར་མཛད། གྲྭ་སར་སྡོད་རྟེན་རྒྱ་དངུལ་སྲང་བཅུ་གསུམ་ཕུལ། དེ་སྐབས་ཁྲི་ཆེན་པདྨ་དབང་རྒྱལ་དགོངས་པ་ཞི་དབྱིངས་སུ་གཟིགས་ཟིན་པས་བདག་ཅག་བསོད་ནམས་ཟད་པས་ལན་གསུངས་ཐུགས་འགྱོད་ཆེ་ཐང་དུ་མཛད། དེ་ནས་གྲྭ་ས་དེའི་ལུགས་སྲོལ་ལྟར་རྗེ་ཉིད་ཀྱི་གཙུག་ཕུད་མཁན་ཨོ་རྒྱན་ཆོས་འཕེལ་ལ་ཕུལ། མཚན་འགྱུར་མེད་བསྟན་འཛིན་འཕེལ་རྒྱས་ཞེས་བྱ་བ་གསོལ། ཆོས་མཐུན་གྱི་སྒྲིགས་ལམ་དེར་སྒོ་གསུམ་གྱིས་བརྩོན་པ་ཆེ་ཐང་དུ་མཛད་པས། རྣམ་བཞག་ཆེ་ཕྲ་ཇི་སྙེད་ཅིག་མཆིས་པ་ཀུན་ལ་རང་བྱན་ཆུབ་པས་སླད་ནས་དེ་ཚུལ་སྨྲ་བ་ལ་སྤོབས་པ་ཟླ་དང་བྲལ་བར་གྱུར། གཞན་དེ་སྐབས་དབང་ལུང་གསན་བཞེས་མཛད་པ་ལ། རྗེ་བཙུན་ཕྲིན་ལས་ཆོས་སྒྲོན་མདུན་ནས་རྙིང་རྒྱུད་ལུང་དངོས་ཡོད་པོད་ཉི་ཤུ་སྐོར་སོགས་དང་། མཁན་ཨོ་རྒྱན་བསྟན་འཛིན་ཆོས་འཕེལ་མདུན་ནས། བཀའ་བརྒྱད་རྣལ་འབྱོར་རྒྱུན་དབང་སོགས་དང་། མ་ཧཱ་པཎྜི་ཏ་རྩེ་དགེ་རྒན་སྐྱེས་མཆོག་ལགས་ཀྱི་མདུན་ནས་དབུ་མ་རིགས་ཚོགས་སོགས་ཀྱི་ལྗགས་ལུང་དང་། ལྷ་ཆེན་རླུང་འཁོར་གྱི་ཟབ་གནད་དང་། སྔགས་སྡེབ་སྙིང་གཟེར་གྱི་སྐོར་གཤིན་རྗེའི་ཞལ་ཁྲིད། མགོན་པོའི་མདོས་ཆེན་གྱི་ལག་ལེན་སོགས་མན་ངག་ཀྱང་མང་དུ་གསན། ལྷག་པར་དུ་
ཐུགས་དགོངས་གཅིག་འདྲེས་སུ་གྱུར། གྲྭ་ས་དེར་བཞུགས་རིང་གནས་ཀྱིས་གང་ཟག་བྱིན་གྱིས་བརླབས་པའི་ཉམས་ལྟས་ཁྱད་པར་ཅན་དང་། གསོ་སྦྱོང་དབྱར་གནས་སོགས་འདུལ་བའི་ཚུལ་ཇི་ལྟ་བ་བཞིན་ལག་ཏུ་བླང་བའི་སྐབས་ཐོབ་པས་ཤིན་ཏུ་སྤྲོ་བའི་གསུང་ཚུལ་དུ་མ་གནང་། རྗེ་ཉིད་ཀྱི་མནལ་ལམ་དུ་རྡོ་རྗེ་བྲག་རྗེ་བཙུན་མ་དེ་རྒྱལ་གསུང་བཀའ་ཡི་བསྡུ་བ་མཛད་པའི་རྣམ་དཔྱོད་ཅན། ཡེ་ཤེས་མཚོ་རྒྱལ་གྱི་རྣམ་འཕྲུལ་དངོས་ཡིན་པ་དང་། འགྲོ་བའི་དོན་དུ་སྤྲུལ་པ་སྣ་ཚོགས་སྟོན་པ་དང་། སྨིན་གླིང་ནས་ཡེ་ཤེས་ཀྱི་མཁའ་འགྲོ་མ་མི་མོའི་རྣམ་པར་སྣང་བ་རྗེ་བཙུན་ཕྲིན་ལས་མཚན་གྱི་བྱིན་རླབས་ཀྱིས། སྣང་ཤེས་ཀྱི་ཉམས་ལ་སྤྲུལ་པའི་གུ་རུ་མཚན་བརྒྱད་ཀྱི་ཞབས་རྗེས་གསལ་བར་མངོན་པ་དང་། མཚན་བརྒྱད་པོའི་སྐུའི་རྣམ་འགྱུར་རྣམས་ཀྱང་རིག་པ་རང་བབས་སུ་བཞག་པའི་ངོ་ན་ཤིན་ཏུ་གསལ་ཞིང་། བརྟགས་ཤིང་དཔྱད་ན་ལྷག་པར་གསལ་དུ་མི་འགྲོ་བའི་དག་སྣང་མངོན་སུམ་དུ་བྱུང་བས་མཚོན། བླ་མ་དང་ལྷག་པའི་ལྷས་རྗེས་སུ་བཟུང་བ་དང་། དཔའ་བོ་མཁའ་འགྲོའི་ཚོགས་གྲལ་དུ་ལྷན་གཅིག་པར་ལོངས་སྤྱོད་པ་སོགས་དང་། གཞན་ཡང་ཨོ་རྒྱན་གཏེར་བདག་གླིང་པས་ཞལ་མངོན་སུམ་དུ་གཟིགས་ནས་སྐུ་བསྟོད་ངོ་མཚར་ཅན་མཛད་པ་སོགས། མོས་གུས་འགྱུར་མེད་ཀྱི་སློབ་བུ་འགའ་ལ་གསུང་གླེང་མཛད་པ་འགའ་ཟུང་ཐོས་ཀྱང་། རྩ་ཐོ་བཀོད་པ་མེད་པས་སྒྲོ་སྐུར་དུ་འགྱུར་གྱིས་དོགས་ནས་ཇི་བཞིན་བྲི་རྔོ་མི་ཐོགས། རྡོ་རྗེ་འཆང་གཙང་
པ་རྣམ་པད་རི་སྤྲུལ་སྐུའི་མདུན་ནས། པད་གླིང་ཕྱག་རྡོར་སྐོར་གྱི་དབང་ལུང་། སུམ་པ་བྱང་ཆུབ་བློ་གྲོས་ཀྱི་གཏེར་མ་རླུང་ནག་དྲེགས་པ་ཉི་ཤུའི་ལུང་། གསང་སྙིང་སྨན་ཊཱིཀ །སྒྲོལ་ཊཱིཀ་སོགས་དབང་ལུང་མང་ཞིག་གསན་བཞེས་མཛད། ཕར་ལ་གསང་སྙིང་འགྲེལ་བ་ཕྱོགས་བཅུའི་མུན་སེལ་དང་། ཡང་ཏི་ནག་པོ་གསེར་གྱི་འབྲུ་གཅིག་གི་ལུང་ཕུལ། མྱོས་རིགས་རྡོ་རྗེ་འཛིན་པ་ཆོས་མཛད་ཀུན་ལྡན་མདུན་ནས། གསང་སྙིང་རྩ་བ་དང་། གསང་བདག་དགོངས་རྒྱན་གྱི་ལུང་དང་། རྒྱུད་ཀྱི་བཤད་པ་གསན། འདུལ་བ་གཞི་གསུམ་གྱི་ལག་ལེན་ཞལ་ཁྲིད་ཞིབ་པར་ཞུས། ཟིན་བྲིས་བསྙེལ་ཐོ་བཅས་མཛད། གར་ཚེའི་དབང་གསན་ཐུགས་ནང་ཤིན་ཏུ་གཤིན་པར་གྱུར། དེ་སྐབས་ཕྱག་རྫས་སྔོན་ཡོད་རིགས་སྤོང་དག་མཛད་ནས། གྲྭ་ཚང་གི་མང་ཇ་ཁོ་ན་ལ་བརྟེན་པ་ལས་གཞན་མེད་ཀྱང་། སྦྱིན་པའི་རང་འབྲས་མངོན་དུ་གྱུར་བའི་ཕྱག་རྗེས་ལ། བོད་དངུལ་སྲང་བརྒྱ་དང་གྱ་གསུམ། མཛོད་དར་ཉིས་བརྒྱ་སོགས་རང་བབ་ཀྱིས་ཕྱག་ཁར་འབྱོར་བ་ཡང་། སྔ་ཕྱི་འཚོགས་པ་ལ་མང་ཇ་དང་། ཕྱག་འགྱེད། བླ་སྤྲུལ་རྣམས་ལ་འབུལ་བ། ལྷ་ཁང་རིགས་ལ་སྐར་མེ། མཆོད་འབུལ། ཚོགས་འཁོར། ཆོ་ག །ལྷ་བསང་མཛད་པ་བཅས་ལ་ཕུལ་ནས་བལ་ཊམ་གཅིག་ཙམ་ཡང་བདག་བཟུང་མ་བྱས་པར་ཚོགས་སུ་བསྒྲུབས། སྔར་རང་ལོ་ཆུ་ལུག་དེ་རང་ཀེག་དང་། སྤར་སྨེ་འཚུབ་པ་སོགས་ཀྱིས། མི་དང་མི་མིན་གྱིས་ཉེར་འཚེ་ཆེ་བའི་དུས་ལ་བབ་ཀྱང་། རོ་སྙོམས་ཀྱི་སྤྱོད་པས་རྒྱལ་ཁམས་ངེས་མེད་དུ་བྱོན་ཏེ་གཅེས་འཛིན་བློས་བཏང་
བས་སྐྱོན་ཆེར་མ་བྱུང་ནའང་། ཤིང་བྱ་གནམ་ལོ་གསར་ཚེས་ཀེག་རྒྱབ་ཀྱི་བསྙད་ལ་ཐུག་པས། ཟླ་བ་བདུན་ཙམ་ལ་སྐུ་བསྙུན་པ་དང་། ཁྱད་པར་ཟླ་བ་གསུམ་པའི་ནང་ལ། གཞི་བདག་གི་འཁྲེན་གཟེར་དང་། འཆི་བདག་གི་ཁྲམ་ལ་ཐེབས་རྟགས་ཀྱང་གསལ་བར་མངོན་ནའང་། སྨིན་གླིང་དྲག་དམར་གྱི་བསྙེན་མཚམས་དང་། ནད་ཟུག་གི་ཚོར་བ་ལ་དཔག་ནས་བདེ་སྡུག་གཏོང་ལེན་དང་། རོ་སྙོམས་དང་། ལུས་སྦྱིན་གྱི་ཉམས་ལེན་ལ་བསྲེ་བར་མཛད་པས་ནད་རྐྱེན་རང་སངས་སུ་སོང་། རིམ་གྲོ་ཡང་མོ་ཕྱྭ་དང་བསྟུན་ཅུང་ཞིག་སྒྲུབ་པར་མཛད། དེ་སྐབས་སུ་ཐ་མལ་གྱི་ནད་པ་དང་མི་འདྲ་བར། ཟུག་རྔུ་དེ་ཡུལ་ཡུལ་ཅན་སྣ་ཚོགས་ཤིག་འཕྲད་པ་ལས་བྱུང་བས་གཟུགས་བརྙན་ཀྱི་ཚུལ་ཙམ་ལས་བདེན་གྲུབ་མེད་པར་ཐུགས་ཐག་ཆོད་པས་སྡུག་བསྔལ་གྱི་ཚོར་བས་དེ་ཙམ་གླག་མ་རྙེད་པས། དེ་སྐབས་སུ་ཡུམ་པོད་ཆེན་བཅུ་གཉིས། འདུལ་བ་པོད་བཅུ་གསུམ། མདོ་སྡེ་པོད་གསུམ་བཅས་ཁྱོན་པོད་ཆེན་ཉེར་བརྒྱད་ཞལ་འདོན་མཛད། དེ་མཚམས་སུ་རང་དགོན་ནས་ཞེ་ཆེན་རབ་འབྱམས་རིན་པོ་ཆེའི་གསུང་རྒྱ་དང་། ཕྱག་མཛོད་བསོད་ནམས་བསྟན་འཛིན་དཔོན་གཡོག་ཆིབས་བསུ་ལ་ཆེད་བཏང་འབྱོར་བས། འཕྲལ་བྱོན་དགོས་ཚུལ་ནན་ཞུས་ཡང་ཡང་བསྐྱར་འཕྲལ། བྱོན་རྒྱུ་ཐུགས་ཐག་ཆོད་པས། ཟླ་བ་བཅུ་གཉིས་པའི་ཚེས་ཉེར་གསུམ་ཉིན། ལོ་མཇུག་དགུ་ཆེན་འཚོགས་པ་ལ་བལ་ཊམ་བརྒྱ་དང་ཉི་ཤུ་འགྱེད་དུ་བཏང་། མང་ཇ་གསུམ། བཞེས་ཐུག་བཅས་ཞུས། ཁྲི་ཆེན་སྲས་སངས་རྒྱས་ཀུན་དགའི་
མདུན་ལ། ནང་མཛོད་དང་། ལིང་ཡུག །བོད་དངུལ་སྲང་བཅུ། མཁན་རིན་པོ་ཆེའི་མདུན། མཛོད་ཐག །ཊམ་ག་བདུན། གླ་མགོ་བག །གཅུང་སྦུས་སྡེ་སྤྲུལ་སྐུ་ལ། མཛོད་ཐག །ལིང་ཡུག །ལིའི་གཏིབ་དཀར། རྗེ་བཙུན་གསུམ་ལ་མཛོད་ཐག་གསུམ་གླ་མགོ་གསུམ། ལྷ་ཁང་རྣམས་ལ་སྙན་ཤལ། སྐར་མེ་ཞལ་གསོ་དང་བཅས་ཐོན་ཕྱག་ཞུས། རྒྱལ་བསྟན་འཛིན་སྐྱོང་སྤེལ་གསུམ་ནུས་པ་དང་། སྐྱེ་ནས་སྐྱེ་བར་སྒྲིག་ལམ་དེ་ཉིད་ལ་ཡང་ཡང་འཇུག་པའི་སྨོན་ལམ་གཏེར་ཆེན་འདྲ་སྐུའི་མདུན་དུ་ནན་ཆེར་མཛད་ནས། ཉེར་བདུན་ཉིན་རྡོ་རྗེ་བྲག་ཏུ་ཕེབས། ཞབས་དྲུང་རིན་པོ་ཆེའི་མདུན་ནས་ཚེ་དབང་རྡོ་རྗེའི་རྒྱ་མདུད་གསན། མཛོད་ཐག་དང་དངུལ་སྲང་བཞི་ཕུལ། མཚོ་རྒྱལ་རྣམ་འཕྲུལ་རྗེ་བཙུན་མའི་དྲུང་ནས་ཚེ་དབང་ཉི་མའི་སྙིང་པོ་སོགས་གསན། ནང་མཛོད་དར་རིང་གསུམ་དང་བོད་དངུལ་སྲང་གང་ཕུལ། ཆུ་བཟང ་མཁན་རིན་པོ་ཆེ་ལ། དར་སྐྱ་ཆེན་དང་། བལ་ཊམ་གསུམ་ཕུལ། ཚོགས་པར་མང་ཇ་དང་། བལ་ཊམ་བརྒྱད་ཀྱི་རྣམ་བཞག་ཕུལ། བླ་སྤྲུལ་གྲྭ་ཚང་བཅས་ཐུགས་དགོངས་དབྱེར་མེད་འབྲལ་དཀའ་བ་ཙམ་དུ་གྱུར། མེ་ཁྱི་ཟླ་བ་དང་པོའི་ཚེས་བཞི་ནས་བཟུང་། རྡོ་བྲག་མཆོག་སྤྲུལ་རིན་པོ་ཆེ། ཆུ་བཟང ་མཁན་པོ། རྗེ་བཙུན་མ། བདེ་གྲོལ་གདུང་བརྒྱད་པ་ཀུན་བཟང་ཡེ་ཤེས་རྒྱལ་མཚན། སྤང་ལེབ་སྤྲུལ་སྐུ་ཕྲིན་ལས་རྣམས་ལ་ཞག་བཅུ་སྐོར་ལ་ཉིན་མཚན་ཁ་སྦྲེལ་ཏེ། ཉང་གཏེར་བཀའ་བརྒྱད་བདེར་འདུས་ཀྱི་དབང་ལུང་ཡོངས་རྫོགས། ཆོས་དབང་གཏེར་བྱོན་བཀའ་བརྒྱད་
གསང་རྫོགས་དབང་ལུང་ཚང་མ། ཀཿ ཐོག་མ་ཧཱ་པཎྜི་ཏའི་གསུང་པདྨའི་ལམ་རིམ་འགྲེལ་ཆེན་པོད་གཉིས་སོགས་ཀྱི་ལྗགས་ལུང་ལེགས་པར་ཕུལ། ཆོས་ཀྱི་དགའ་སྟོན་ལ། མཛོད་ཐག་དང་། ཨོ་རྒྱན་སྐུ་འབགས་རྒྱུ་བཟང་། རྒྱ་དངུལ་སྲང་ཉེར་ལྔ། འཕྲུག་གཟན་ཁ་གསར། ཐང་ཤམ་སོ་མ་ལམ་ཆས་དགོས་དགུ་བཅས་འབུལ་བ་མཛད། རྗེ་བཙུན་གྲུབ་པ་མཆོག་གི་མདུན་ནས། ཡང་ཏིག་གཅེས་སྒྲོན་པད་ཕྲིན་གྱི་གསུང་གསན་བཞེས་མཛད། ཕར་ལ་སྔགས་སྡེབ་སྙིང་གཟེར་ནག་པོ་དང་། མན་ངག་སྲིད་པའི་གཏེར་ཁྱིམ། ཀློང་སྙིང་ཚེ་རིང་མའི་དབང་ལུང་། རིན་འབྱུང་ཚེ་རིང་མའི་དབང་རྣམས་ཕུལ། འདི་སྐབས་རྡོ་རྗེ་བྲག་གི་ནང་རྟེན་ཐེམ་ཕྱིར་མི་འདའ་བ་བྱིན་ཅན་གལ་གནད་ཆེ་རིགས་ཞིབ་མཇལ་མཛད་རྒྱུ་བྱུང་བས་ཐུགས་དགྱེས་པའི་རྩེར་སོན། ཚེས་བཅོ་ལྔར་ལྷ་ལྡན་དུ་ཕེབས། སྨོན་ལམ་གྱི་མཆོད་མཇལ་དང་གཟིགས་མོ་སོགས་མཛད། ཟླ་བ་གཉིས་པའི་ཚེས་དྲུག་ལ་ལྷ་སའི་ཉེ་ཞོལ་སྟོད་ལུང་མདར། ཆོས་རྗེ་དངོས་གྲུབ་ལྡིང་བའི་རྩར་དབུས་གཙང་ཁམས་གསུམ་ན་དེ་ལྷག་མེད་པའི་མཇལ་རྒྱུ་ཤིན་ཏུ་གནད་ཆེན་མང་ཞིག་ཡོད་པར་ཐོས་ནས། ཞབས་ཐང་ལ་དཔོན་གཡོག་ཉུང་ཤས་ཆེད་དུ་ཕེབས་པར་མཛད་པས། རྟེན་གསུམ་མཇལ་རྒྱུ་ལ་བལ་ཡུལ་ཡང་ལེ་ཤོད་དུ་ཨོ་རྒྱན་ཆེན་པོས་ཕུར་སྒྲུབ་མཛད་པའི་སྒྲུབ་ཕུར་གཙོ་བོ་ཁྲུ་གང་ལྷག་པ་སྐུ་རྒྱུ་ཟི་ཀྵི་ཾགུ་རུ་ཇོ་ཚེས་ཟངས་ཡག་བྲག་ནས་བཏོན་པ། དེ་བཞིན་སྲས་ཕུར། ཡུམ་ཕུར་ཁྲོ་བཅུའི་ཕུར་པ་སོགས་བྱིན་ལྡན་ཁོ་ན། སློབ་
དཔོན་ཆེན་པོས་ཤ་མེད་གངས་དཀར་མ་བཏུལ་དུས་གསེར་གྱི་རྡོ་རྗེ་འཕངས་པས་མིག་ཡ་བཅར་ཚུལ་བཀའ་ཐང་དུ་ཡོད་རྒྱུའི་རྡོ་རྗེ་དེ་རྩེ་ལྔ་པ་ཞིག་པོ་གླིང་པས་ཁྱུང་ཚང་བྲག་ནས་བཏོན་པ། དེའི་ཤུབས་རས་ལྡིང་ནང་རྟེན་ནས་བྱུང་བ་ཁ་ཡིག་ཅན། བལ་བོ་ཨ་སུ་རའི་སྲས་སྨོན་ལམ་སེངྒེའི་ཐུགས་ལ་ཛམ་བྷ་ལ་རང་བྱོན། དེའི་སྲས་གྲགས་པ་སེངྒེའི་དབུ་ཐོད་རིལ་པོ་དབུ་སྐྲ་གསོན་པོ་ལྟར་ཡོད། གྲུབ་ཆེན་ཀུ་ཀུ་རིའི་ཕྱག་འཁར། མཁའ་འགྲོ་ཨུཥྞི་ཥའི་རུས་རྒྱན། ནཱ་རོ་པའི་དུང་ཆོས་རང་བྱོན་ཉིས་བརྩེགས། གྲུབ་ཐོབ་སྦྲུལ་གྱི་སྒོམ་ཐག་ཅན་གྱི་དུག་སྦྲུལ་སྒོམ་ཐག །སྐུ་རྟེན་རྡོ་རྗེ་འཆང་གསེར་ཟངས་མ། གསུང་རྟེན་བརྒྱད་སྟོང་། གསེར་འོད། ཐུགས་རྟེན་མཆོད་རྟེན་ལི་མ་སོགས་རྟེན་གསུམ་ངོ་མཚར་ཅན་དུ་མ་ཞིག་མཇལ་བར་མཛད། འདི་ལྷ་ས་ནས་ཐག་ཀྱང་ཉེ། མཇལ་རྒྱུ་ཡང་ཤིན་ཏུ་འགང་ཆེན་མང་ཞིག་འདུག་ན་ཡང་། རང་ཕྱོགས་གནས་མཇལ་བ་རྣམས་ཀྱིས་མཇལ་མྱོང་མཁན་སུ་ཡང་མི་སྣང་བས་ཉམས་མཚར་དུ་བཀོད་པ་ཡིན་གསུངས། བཞུགས་བྱང་འདི་བཞིན་བཀོད་པ་གནང་། དེ་ནས་ཚེས་བརྒྱད་གཟའ་སྐར་བཟང་བའི་ཉིན་ལྷ་ལྡན་ནས་རང་ཡུལ་དུ་ཆིབས་ཁ་བསྒྱུར་བ་ལམ་བར་ནས་དབུ་ཐོན་ལེགས་ལམ་གྱིས་ཕེབས་ཏེ་ཟླ་བ་ལྔ་པའི་ཚེས་ཉེར་དགུ་ལ། གཞི་ནས་གཉེར་པ་པདྨ་བསྟན་འཛིན་དཔོན་གཡོག་ཆིབས་བསུ་ལ་འོང་བ། སེར་ཤུལ་ནང་དབུའི་ན་བ་གཡང་འཁྱིལ་དུ་ངོ་འཕྲད་པ། དྲུག་པའི་ཚེས་བཅུ་ལ་དཔལ་ཞེ་ཆེན་བསྟན་གཉིས་དར་རྒྱས་གླིང་དུ་གཞི་
བྱེས་གདན་འཛོམས། དགའ་སྤྲོའི་སྟོན་མོ་བླ་གྲྭ་འཁོར་བཅས་ཀྱིས་གཟབ་རྒྱས་དང་། ཆོས་སྲུང་ལ་གཏང་རག་གི་བསྐང་གསོལ་གྲངས་ལྡན་མཛད། དེའི་ཚེས་ཉེར་གསུམ་ལ་རྒྱལ་ཚབ་མཆོག་སྤྲུལ་ཉེ་སྐོར་དུ་ཐོགས་མའི་དབྱར་སྒར་ཐེག །རྗེ་ཉིད་ཀྱང་དབྱར་ངོ་དེར་གྲྭ་སར་བཞུགས་ནས་དམ་པ་ཆོས་ཀྱི་སྐྱེས་ཆེན་བསྣམས་ཏེ་ལེགས་ལམ་གྱིས་འབྱོར་བས། དགོན་ཡུལ་ཚང་མས་གསོལ་སྟོན་དང་ཞལ་སྤྲོ་སྣ་ཚོགས་ཐུགས་བྲེལ་ལྟ་བུར་གྱུར། ཟླ་བ་བརྒྱད་པའི་ཚེས་གཉིས་ལ་རྒྱལ་ཚབ་མཆོག་སྤྲུལ་རི་ཁྲོད་དུ་ཐོག་མར་ཕེབས། རྗེ་ཉིད་ཀྱང་ཕྱག་ཕྱིར་བྱོན། རི་ཁྲོད་པ་རྣམས་ཀྱིས་བསུ་བ་དང་། ལྷ་བསང་བཅས་མཛད། ཟབ་ལམ་བདེ་གཤེགས་ཀུན་འདུས་ཀྱི་ཚོགས་བརྒྱ་བཏང་། ལ་ཉེ་རྟེན་འབྲེལ་ཤིན་ཏུ་དགེ་བར་བྱུང་། དེ་རྗེས་སྟོན་རྒྱབ་རྗེ་ཉིད་རྫ་རྒྱུད་དུ་ནས་བསོད་ལ་ཕེབས། འབུལ་ནོད་རྒྱ་གང་ཆེ་ཕྱག་ཏུ་སྨིན། དེ་མཚམས་ནས་རྗེ་འདི་ཉིད་ཀྱི་མཁས་དང་གྲུབ་པའི་གྲགས་སྙན་གྱི་རྒྱལ་མཚན་གདོང་བཞི་མངའ་བའི་ཁང་བཟང་གི་བ་གམ་དུ་མཛེས་པ། ཕྱོགས་ཀུན་ནས་ལྷམ་མེར་སྣང་བས། པདྨའི་དྲི་བསུང་ཆགས་པའི་རིན་ཆེན་འབྱུང་གནས་ལ། འཁོར་ལོའི་ཡན་ལག་ཅན་གྱི་ཚོགས་རྣམས་མགྲོན་དུ་མ་བོས་བཞིན་འདུ་བ་ལྟར། ཤེས་རབ་གསུམ་གྱི་དགའ་སྟོན་ལོངས་སུ་སྤྱོད་པར་འདོད་པའི་སྐལ་བཟང་སྐྱེ་བོའི་ཚོགས་ཀྱི་འདུ་བ་ཅིར་ཡང་འཕེལ་བས། ཧོར་གཙང་མདའ་སྤྲུལ་སྐུ་ཨོ་རྒྱན་མདོ་སྔགས་དོན་རྟོགས། དབོན་པདྨ་རིག་འཛིན། ཀུན་བཟང་ནོར་བུ་གཉིས་བཅས་
དཔོན་གཡོག་ཁ་ཤས་ཕེབས། ཐོག་མར་སྒྱུ་འཕྲུལ་ཞི་ཁྲོའི་དབང་སྔོན་དུ་འགྲོ་བས། གསང་སྙིང་གི་རྒྱུད་བཤད་སྒྲ་ཀཱ་ལ་པ། སྡེབ་སྦྱོར། སྙན་ངག་སོགས་ཀྱི་སྐུ་ཡོན་གསན་བཞེས་མཛད། ལོ་མཇུག་དགུ་ཆེན་འཚོགས་དབུར་རྗེ་ཉིད་བཞུགས། སྨིན་གླིང་གི་ཕྱག་བཞེས་གདངས་རོལ་འབུད་དཀྲོལ་སོགས་ལ་དག་ཐེར་དང་། སྐུ་འཆམ་རྣམས་ཀྱང་ཞིབ་པར་མཛད། དེ་ནས་མེ་ཕག་ལོ་གསར་ཟླ་བའི་ཚེས་གསུམ་ལ། རི་ཁྲོད་པདྨ་འོད་གླིང་དུ་སྤོང་བ་བསམ་གཏན་ལ་ཐུགས་དགོངས་གཞོལ་བའི་ཐོག་མར་གཞིས་ཆགས་པར་མཛད། དེ་འཕྲལ་རྫོགས་དགོན་དུ་སྤྲུལ་པའི་སྐུ་མཆོག་མི་འགྱུར་ནམ་མཁའི་རྡོ་རྗེ་ཞལ་མཇལ་བ་དང་། ཚེས་བཅུའི་འཆམས་གཟིགས་ལ་དཔོན་སློབ་གསུམ་བྱོན། རྫོགས་སྤྲུལ་མདུན་ལ་སྤྱིར་ལུགས་གཉིས་ཀྱི་ནང་ཉམས་གསུང་གླེང་དང་། ཁྱད་པར་ལོ་དྲུག་བར་ཟབ་ལམ་བདེ་གཤེགས་ཀུན་འདུས་ཀྱི་བསྙེན་མཚམས་མཛད་རྒྱུའི་དམ་བཅའ་དང་བར་ཆད་མེད་པའི་ཐུགས་གཏད་བཅས་ཞུས་པར། བདེ་གཤེགས་ཀུན་འདུས་འདི་དབང་གི་ལས་ལ་མཆོག་ཏུ་བསྔགས་པ་རང་ཡིན་པས། ཉིད་ཀྱིས་ཀྱང་དེ་ལྟར་མཛད་པ་ཤིན་ཏུ་ལེགས་ཞེས་གསུང་གནང་བ། ད་རེས་གཞན་དོན་དུ་མཆོག་སྒྲུབ་པ་ལས། དེ་འདྲའི་ཐུན་མོང་སྒྲུབ་བསམ་མིན་པས་གང་འདྲ་ཞིག་གསུང་བྱུང་དགོངས་ནས། རྗེ་ཉིད་ཀྱི་ཐུགས་ལ་ཅུང་ཟད་མ་རན་པའི་རྣམ་པ་ཞིག་བྱུང་ཡང་། སླད་ནས་སྒྲུབ་པ་ལ་ཞུགས་པས་རིམ་པར་རྒྱལ་
བའི་བསྟན་པ་ལ་མཛད་པ་རླབས་ཆེན་སྒྲུབ་ནུས་པའི་དམ་པའི་སློབ་ཚོགས་རྒྱུ་སྐར་གྱི་ཕྲེང་བ་ཡོངས་སུ་འདུས་པ་དང་། རང་སྣང་དབང་དུ་འདུས་པས། གཞན་སྣང་ཟིལ་གྱིས་ནོན་པའི་གྲུབ་པའི་རྟགས་མཚན་མངོན་དུ་བརྙེས་པས་ཐུགས་ལ་ངེས་ཤེས་ཐུན་མོང་མ་ཡིན་པ་འཁྲུངས་ནས་རྫོགས་ཆེན་པའི་གསུང་དེ་ལ་དགོངས་གཞི་ཁྱད་པར་ཅན་ཡོད་པའི་རྒྱུ་མཚན་རྗེ་ཉིད་ཀྱི་ཐུགས་ལ་རིམ་པར་མངོན་སུམ་དུ་གྱུར་པའི་ཚུལ་གསུང་གླེང་གནང་བ་ཁོ་བོས་གྲོགས་མཆེད་དུ་མ་དང་ལྷན་དུ་ཐོས་མྱོང་བ།
ཐུན་མོང་ཐུན་མིན་གྱི་ཆོས་འཁོར་གྱིས་སློབ་ཚོགས་སྐྱོང་ཚུལ།
དེའི་རྒྱུ་མཚན་ཡང་བཅད་རྒྱ་དེ་ཉིད་ཀྱི་ཁོངས་སུ་དབང་ལུང་དང་ཕྱི་ནང་གི་རིག་གནས་རྣམས་རིམ་པར་སྤེལ་བའི་ཚུལ་ནི། ཕག་ལོའི་དགུན་དེར་སྐུ་ན་ཆུང་དུས་ཀྱི་མཚན་ལ་རོང་རྒྱབ་ཁྱུང་པོའི་གདུང་རིགས། རྗེ་ཉིད་ནས་བསྙེན་པར་རྫོགས་པའི་མཚན་མཐུ་སྟོབས་བསྟན་འཛིན་གཡུང་དྲུང་གྲགས་པ་ཞེས་འབོད་པ། སླད་ནས་ཀཾ་ཚང་བཀའ་རྒྱུད་ཀྱི་བསྟན་པ་སྔར་ཉམས་རིགས་སླར་གསོ་བ་དང་། ཉམས་མེད་རྣམས་རིང་དུ་གནས་པར་མཛད་པ་དང་། ཁྱད་པར་ཨོ་རྒྱན་རྡོ་རྗེ་འཆང་གི་རྒྱལ་ཚབ་ཟབ་མོ་གཏེར་གྱི་བཀའ་བབ་མཁས་པའི་དབང་པོ་འཇ༵མ་མ༵གོན་ཀོང༵་བམ་སྟེང་སྤྲུལ༵་སྐུ་ཡོ༵ན་ཏ༵ན་རྒྱ༵་མཚོ༵་ཕེབས། དེ་ལ་ཐོག་མར་དབང་པོ་ཉམས་སད་ཕྱིར། རྩིས་ནག་གི་མ་བུ་དགྲ་གྲོགས་ཀྱི་ལག་རྩིས་སོགས་རིག་གནས་ཕྲ་མོ་ཁ་ཤས་བསླབ་པ་དེ་མ་ཐག་ཚེགས་མེད་དུ་མཁྱེན་པས། ཞི་བ་ལྷས། རྒྱ་ཆེན་ཆོས་ཀྱི་སྣོད་གྱུར་པ། །དམན་
པའི་ཆོས་ལ་སྦྱར་མི་བྱ། །ཞེས་དང་། ཀློང་ཆེན་ཞབས་ཀྱིས། གཞན་དོན་སྤྱོད་ལ་རིག་པའི་གནས་ལྔ་དང་། །ཞེས་གསུངས་པ་ལྟར། ཕྱི་ནང་གི་གཙུག་ལག་རྣམས་ལ་སློབ་སྦྱོང་རིམ་པར་མཛད་པའི་ཐོག་མར། སྒྲ་གཞུང་ཆེ་བ་ཙནྡྲ་པ་པོད་ཆེན་གསུམ་གྱི་རི་མོ། རྗེས་འབྲེལ་འཆི་མེད་མཛོད་པོད་གཉིས། གཞན་ཀ་ལཱ་པ། དབྱངས་ཅན་མ། པ་ཎི་པ་བཅས་དང་། སྙན་ངག་ཁམས་པའི་འགྲེལ་ཆེན་སྟེང་དང་། སྡོམ་གསུམ་རྣམ་ངེས་བཤད་པ་སོགས་གཞུང་ཆེན་པོད་དུ་མ་ལ་འཆད་ཉན་དང་། ཨ་གྲོ་སྒྲ་རམས་པ་འགྱུར་མེད་རྣམ་རྒྱལ་ཞེས་ཆབ་མདོ་དང་ནང་ཆེན་བྲག་ཡབ་སོགས་ཀྱི་བསླབ་གྲྭའི་ཡོངས་འཛིན་དུ་བཀུར་བའི་མཁས་པའི་དབང་པོ་དེ་ལ། སྒྲ་ཀ་ལཱ་པ་སོགས་ཕྱི་ནང་གི་རིག་གནས་ཡོངས་རྫོགས་བསླབ། ལྕགས་སྟག་ལོ་ནང་དཔལ་སྤྲུལ་རྡོ་རྗེ་འཆང་སྙིགས་དུས་ཀྱི་ཐམས་ཅད་མཁྱེན་པ་དེ་ཉིད་ཕེབས། ཟླ་བ་ལྔ་དྲུག་ཅིག་བཞུགས། སྒྲ་དབྱངས་ཅན་མ་དང་། ཕྱི་ནང་གི་གཙུག་ལག་དུ་མ་གསན་བསམ་མཛད་ནས་སྨྲ་བའི་སེངྒེ་ལྟ་བུར་གྱུར། བཞུགས་ཡུན་ཡེ་མི་རིང་ཡང་། ཇི་སྐད་དུ། ལ་ལས་ལོ་བརྒྱར་སྦྱངས་པ་ཡང་། །ལ་ལས་ཡུད་ཙམ་ཞིག་གིས་ཤེས། །ལ་ལས་ཚེགས་ཀྱིས་སྒྲུབ་པ་ཡང་། །ལ་ལས་འབད་པ་ཆུང་ངུས་འགྲུབ། །ཅེས་གསུངས་པའི་ཚུལ་ལྟར་ལས། མཁས་དབང་འདིས་གཞན་ནས་ཐུན་མོང་གི་རིག་གནས་སོགས་སློབ་སྦྱོང་མཛད་པའི་ལོ་རྒྱུས་མེད། གཙང་མདའ་སྤྲུལ་དབོན་རྣམས་ལ་སྒྲ་ཀ་ལཱ་པ་དང་། སྙན་ངག །རྩིས་དཀར་ནག །གསང་སྙིང་རྒྱུད་བཤད། སྡོམ་གསུམ་བཤད་པ་བཅས་མཛད།
སྔགས་རྒོད་ལོ་ཏྲིའི་དབང་ལུང་མན་ངག་ཡོངས་རྫོགས། འདོད་བུམ་ནས་འཇམ་དཀར། དབྱངས་ཅན་རྗེས་གནང་། བདུད་འདུལ་གྲོ་ལོད་དབང་། ཀློང་གསལ་སེང་སྒྲའི་དབང་། བསམ་ལྷུན་དབང་། ཚེ་དབང་སོགས་དབང་ལུང་མང་དུ་ཕུལ་བར་མཛད། རྫོགས་ཆེན་མཁན་པོ་བསླབ་གསུམ་ནོར་བུའི་མཛོད་འཆང་བླ་མ་དམ་པ་པདྨ་བཀྲ་ཤིས་ལ། སེམས་སྡེ་ཨ་དོན་བཅོ་བརྒྱད་དབང་ཚོགས་མཆོད་བཅོ་བརྒྱད་དང་འབྲེལ་བ། བྱམས་ཆོས་སྡེ་ལྔ་དང་། འདུལ་བ་མདོ་རྩ་བ། ལས་བརྒྱ་རྩ། ཚིག་ལེའུར་བྱས་པ། མེ་ཏོག་ཕྲེང་རྒྱུད། ཇོ་བོའི་བྱང་ཆུབ་ལམ་སྒྲོན། སྙིང་ཐིག་བླ་བརྒྱུད་རྣམ་ཐར་ཚང་མའི་ལུང་ཕུལ། གོར་རྩ་བླ་མ་ཨོ་རྒྱན་དཔལ་འབྱོར་ཞེས། ཉམས་རྟོགས་ཀྱི་ཡོན་ཏན་རྒྱ་ཆེ་ཞིང་ལམ་གྱི་དྲོད་ཚད་བརྙེས་པ་དེ་ལ། དབྱངས་ཅན་སྒྲ་མདོ་དང་། སྙན་ངག་སོགས་ཐུན་མོང་གི་རིག་གནས་འགའ་དང་། གཞན་འཇམ་མགོན་ཀོང་སྤྲུལ་རིན་པོ་ཆེ་སོགས། གཞི་བྱེས་ཀྱི་བླ་སྤྲུལ་རྣམས་དང་འདུས་པ་དུ་མ་ལ་བཀའ་བརྒྱད་བདེ་གཤེགས་འདུས་པའི་དབང་ཆེན། པོད་ཆེན་བཅུའི་ལུང་ཡོངས་རྫོགས། དབང་ཕྲན་སྐོར་ཚང་མ། ཕུར་པ་ཡང་གསང་བླ་མེད་ཀྱི་དབང་ཞེ་ཆེན་ལྗགས་འགྲིགས་ཀྱི་ལུང་། བདེ་གཤེགས་ཀུན་འདུས་ཀྱི་དབང་དང་ཁྲིད་ལུང་སོགས་ཀྱང་མཛད། བཀའ་བརྒྱད་དབང་ཆེན་སྐབས་གོར་ཙ་བླ་མའི་གཟིགས་སྣང་ལ་སྨན་རག་གི་ཐོད་པའི་ཁར་འཇའ་ཚོན་སྣ་ལྔའི་ཟེར་ཐག་སྦྲེལ་བ་མཐོང་བས། རང་རེའི་བླ་མ་འདི་གཞན་དང་མི་འདྲ་བའི་རྟགས་མཚན་
མངོན་དུ་སྟོན་པ་ཞིག་རེད་ཅེས་ཚུལ་དེ་འཇམ་མགོན་ཀོང་སྤྲུལ་རིན་པོ་ཆེ་སོགས་ལ་ནང་ཉམས་ཀྱི་གསུང་འཕྲོས་མཛད། གཞན་མ་ཏིའི་འཇམ་དཀར། དབྱངས་ཅན་མའི་དབང་། མཚན་བརྗོད་ལུང་། མཁའ་འགྲོ་སྙིང་ཐིག །མཁའ་འགྲོ་ཡང་ཏིག །བི་མ་སྙིང་ཏིག །བླ་མ་ཡང་ཏིག །ཟབ་མོ་ཡང་ཏིག་གི་དབང་ལུང་མཐའ་རྒྱས། སྙིང་ཐིག་བླ་བརྒྱུད་རྣམ་ཐར་ལུང་སོགས་ཕུལ། ཁྲོམ་ཐོག་བླ་མ་བཀའ་བབ་ལ་འཇའ་ཚོན་གཏེར་བྱོན་དཀོན་མཆོག་སྤྱི་འདུས་ཀྱི་དབང་ལུང་ཚང་མ། ཨ་མདོ་སོག་དགེ་སྤྲུལ་སྐུ་ལ་དམ་ཅན་དབང་། གཡུ་ཐོག་སྙིང་ཐིག་དབང་ལུང་ཚང་མ། དེ་མཚམས་ཞིག་ལ་སྤྲུལ་པའི་གཏེར་སྟོན་ཆེན་པོ་གླིང་རྗེ་དྲུང་རིན་པོ་ཆེ་བྱང་དགོན་ཡ་དིང་ནང་ལ་བུམ་སྒྲུབ་ཀྱི་དབུ་བཞུགས་སུ་ཕེབས་པ། ཚུར་ལམ་རི་ཁྲོད་དུ་བྱོན་པ་ལ་གསོལ་སྟོན་དང་། རྒྱ་དངུལ་རྡིལ་ཚད་ཀྱི་གཙོས་པའི་འབུལ་བ་བཅས་བཀུར་སྟི་རྒྱ་གང་ཆེ་ཞུས། ཚུར་ལ་དབང་ལུང་མང་ཞིག་གསན། ཕར་བླ་མ་གསང་འདུས་ཀྱི་དབང་ལུང་ཡོངས་རྫོགས། གར་ཚེའི་དབང་། ཕྱག་རྡོར་གཏུམ་པོའི་དབང་རྣམས་ཕུལ། གཙང་མཐིལ་སེངྒེ་བླ་མ་བསོད་ནམས་དབང་རྒྱལ། བླ་མ་གུ་རུ་རྡོ་རྗེ། བླ་མ་ཨོ་རྒྱན་བསོད་ནམས་སོགས་ལ། སངས་རྒྱས་གླིང་པའི་དགོངས་འདུས་པོད་བཅུ་གསུམ་དབང་ལུང་ཚང་མ་མཛད། གཙང་མདའ་སྤྲུལ་དབོན་རྣམས་ལ་མངའ་རིས་པཎ་ཆེན་གྱི་རིག་འཛིན་ཡོངས་འདུས་དབང་ལུང་ཚང་མ། ལྷ་འབྲང་བླ་མ་གྲུབ་པའི་དབང་ཕྱུག་པདྨ་དབང་རྒྱལ་ལ་ལོཀྟྲིའི་རིག་གཏད་ཕུལ། བླ་མ་དྷརྨ་ཙཀྲ་ལ་དགོངས་འདུས་རྫོགས་ཆེན་ཁྲིད་
ཡིག་རྡོ་ལ་གསེར་ཞུན་དགེ་དབང་མཛད་པ། རྗེ་རབ་འབྱམས་གཉིས་པའི་སེང་གདོང་སྐོར་ཚང་མ། འཇའ་ཚོན་སྤྱི་འདུས་ཁྲིད་རྟ་ཧོ་གྲུབ་ཆེན་ཀརྨ་རབ་འབྱོར་ཁྲིད་ཡིག་གི་ཁྲིད་ལུང་རྣམས་ཞིབ་པར་མཛད། ཆུ་འབྲུག་ལོ་གསར་ཟླ་བའི་ནང་། ས་སྐྱོང་ཆོས་ཀྱི་རྒྱལ་པོས་རྒྱལ་བསྟན་སྤྱི་དང་། ཁྱད་པར་སྔ་འགྱུར་རྡོ་རྗེ་ཐེག་པའི་བསྟན་པ་རིན་པོ་ཆེ་མི་ཉམས་ཤིང་ཡུན་དུ་གནས་པའི་ཐུགས་བཞེད་སྟོན་ཟླའི་རྗེས་སུ་འགྲོ་བས། བསྐུལ་མ་གནང་དོན་བཞིན། ཞེ་ཆེན་བླ་བྲང་དུ་ཕེབས་ནས། ཚེས་ཉི་ཤུའི་ཉིན། མཁས་བཙུན་ལྡན་པའི་དགེ་འདུན་གྲངས་ཚང་བ་དང་ལྷན་ཅིག་བཀྲ་ཤིས་པའི་གསོ་སྦྱོང་སྔོན་འགྲོའི། རྒྱལ་ཚབ་རིན་པོ་ཆེའི་ཡང་སྲིད་མི་བསྐྱོད་མཁས་གྲུབ་རྒྱ་མཚོ་སྐྱེས་སྦྱངས་ཀྱི་ཡོན་ཏན་མཆོག་ཏུ་མངའ་བ་དང་། གནས་ལྔ་རིག་པའི་པཎ་ཆེན་ཁྱུང་པོ་བླ་མ་(ཀོང་སྤྲུལ་ཡོན་ཏན་རྒྱ་མཚོ)། མཁས་བཙུན་བཟང་པོའི་དཔལ་གྱིས་མཐོ་བ་རང་དགོན་གྱི་བླ་མ་པདྨ་སྐལ་བཟང་གསུམ། ཚིགས་གསུམ་བར་མ་ཆད་པ་བསྙེན་རྫོགས་སུ་བསྒྲུབས་པར་མཛད། དེ་མ་ཐག་རྒྱལ་བའི་བཀའ་འགྱུར་གྱི་བཀླག་ལུང་མཛད་པའི་དབུ་ཚུགས། དཀར་ཕྱོགས་ཀྱི་ལྷ་རྣམས་དགའ་བའི་སྐྱེས་སུ་ཁ་བ་མེ་ཏོག་གི་དབྱིབས་ཅན་སྔོན་ཆད་མཐོང་མ་མྱོང་བའི་ཆར་བབ་པས་ཀུན་ཡ་མཚན་དུ་གྱུར། རྒྱལ་བཀའ་རིན་པོ་ཆེ་ས་སྐྱོང་སྡེ་དགེའི་སྤར་མ་པོད་ཆེན་བརྒྱ་ཕྲག་ལྷག་དང་། དུས་འཁོར་འགྲེལ་ཆེན་དྲི་མེད་འོད་བཅས་དང་། བསྟན་འགྱུར་ནང་སྐྱེས་རབས་དཔག་བསམ་ཁྲི་ཤིང་། འདུལ་བ་མདོ་རྩ། ཀརྨ་ཤ་
ཏམ། མེ་ཏོག་ཕྲེང་རྒྱུད། མངོན་རྟོགས་རྒྱན། དབུ་མ་རིག་ཚོགས་དྲུག །བྱམས་ཆོས་སྡེ་ལྔ། མངོན་མཛོད། གསང་འདུས་འགྲེལ་བ་སྒྲོན་གསལ། ཞི་བ་ལྷའི་སྤྱོད་འཇུག །བསླབ་བཏུས། ཇོ་བོའི་ཆོས་ཆུང་བརྒྱ་རྩ། ཟླ་གྲགས་གསང་འདུས་འགྲེལ་བ་བཅས་ཀྱི་ལྗགས་ལུང་མཛད། དེ་ནས་སླར་རི་ཁྲོད་དུ་ཕེབས་ནས། རྙིང་རྒྱུད་པོད་ཉེར་དྲུག་དཀར་ཆག་དང་བཅས་པ། ཆོས་དབང་གཏེར་བྱོན་ཕུར་པ་སྤུ་གྲིའི་དབང་ལུང་། རྒྱལ་བ་ཀློང་ཆེན་ཞབས་ཀྱི་མཛོད་ཆེན་བདུན། ངལ་གསོ་སྐོར་གསུམ། དོན་ཁྲིད། བཀའ་ཐོར་བུའི་སྐོར་ཡོངས་རྫོགས། གསང་སྙིང་རྩ་བ། འགྲེལ་བ་ཕྱོགས་བཅུའི་མུན་སེལ། སྤྱི་དོན་གཉིས། དཀར་ཆག །གསང་སྙིང་འགྲེལ་བ་གཡུང་ཊཱིཀ །རོང་ཊཱིཀ །སྒྲོལ་ཊཱིཀ །སྨན་ལུང་པའི་སྤྱི་དོན་ཊཱིཀྐ། ཆོས་གྲགས་ཟིན་བྲིས། ཇོ་ནང་རི་ཆོས་ངེས་དོན་རྒྱ་མཚོ། ཟབ་མོ་ནང་དོན་རྩ་འགྲེལ། རྣམ་ཤེས་ཡེ་ཤེས་འབྱེད་པ། སྙིང་པོ་བསྟན་པ། འཇིགས་མེད་གླིང་པའི་དགོངས་གཏེར་དང་བཀའ་འབུམ་ཚང་མ། སྡོམ་གསུམ་རྩ་འགྲེལ། ཀོང་པོ་བདེ་ཆེན་རྒྱ་མཚོའི་རྩ་གསུམ་ཟབ་མོ་ཀུན་འདུས་ཀྱི་དབང་ལུང་། འདོད་འཇོ་བུམ་བཟང་དབང་ལུང། མདོ་མགོན་གཙང་ཤོད་པའི་ཡིག་ཆ་ལྟར་ཙི་དམར་དང་ཐང་ལྷའི་སྲོག་གཏད། གོ་འཇོ་གཏེར་སྟོན་འོད་ཆོག་དབང་ལུང་། པདྨ་བཀའ་ཐང། ཐང་ཡིག་སྡེ་ལྔ། མ་ཎི་བཀའ་འབུམ། རྗེ་རབ་འབྱམས་གཉིས་པའི་བཀའ་འབུམ་ཡོངས་རྫོགས། སྨིན་གླིང་གཏེར་ཆོས་དབང་ལུང་ཡོངས་རྫོགས། གཏེར་ཆེན་བཀའ་འབུམ་གྱི་ལུང་ཚང་མ། བཀའ་བརྒྱད་རྣམ་གསུམ་གྱི་དབང་ལུང་ཡོངས་རྫོགས། སངས་
གླིང་བླ་མ་དགོངས་འདུས་ཀྱི་དབང་རྣམས་དང་། པོད་བཅུ་གསུམ་གྱི་ལུང་ཡོངས་རྫོགས། གསང་སྙིང་རྒྱུད་བཤད་རྒྱུད་ཆོག་སོགས་ཞིབ་པར་མཛད། རྒྱལ་ཚབ་རྡོ་རྗེ་འཆང་གིས་ཁོང་ལ་སྒོ་དུ་མ་ནས་བཀའ་དྲིན་གྱིས་བསྐྱངས་པ་ཡིན་པས། དེའི་ཡང་སྲིད་ལ་ཆོས་ཀྱི་སྐྱེས་ཆེན་འབུལ་རྒྱུ་བྱུང་བ་ནི་བདག་གིས་རྙེད་པའི་མཆོག་ལེགས་པར་རྙེད་པ་ཡིན་གསུངས། དེ་ཙམ་དུ་མ་ཟད་དབང་ལུང་དེའི་རིགས་ཀྱི་སྐབས་སུ་འཇམ་མགོན་ཀོང་སྤྲུལ་རིན་པོ་ཆེའི་གཙོས། བསྟན་པ་ལ་ཕན་ངེས་པའི་དམ་པའི་སྐྱེས་བུ་དུ་མ་ཞིག་བཞུགས་པས་སྔ་འགྱུར་གྱི་བསྟན་པ་ལ་མཛད་པ་རླབས་པོ་ཆེའི་བཀའ་དྲིན་བླ་ན་མེད་པ་མཛད་པ་ཡིན། དེ་རྗེས་རྒྱལ་ཚབ་ཡང་སྲིད་ལ། སྐར་རྩིས་བྱེད་གྲུབ་ཀྱི་ལྔ་བསྡུས། ཞག་གསུམ། གཟའ་ལྔ། དུས་སྦྱོར། དུས་གཟེར། ལྟ་གྲུབ་ཀྱི་སྐོར་དང་། བསྐྱེད་རྫོགས་ཀྱི་རྣམ་བཞག་བཅས་སྐུ་ཡོན་མང་ཞིག་ཕུལ། དེ་སྐབས་རྣམས་སུ་དབང་ལུང་ཚུར་གསན་བཞེས་གནང་བ་ལ། ས་བྱི་ཟླ་བ་གསུམ་པའི་ནང་རྫོགས་ཆེན་མཁན་པོ་མཁས་དང་གྲུབ་པའི་ཡོན་ཏན་དུ་མས་འབྱོར་ཞིང་། ལྷག་པར་བྱང་ཆུབ་སེམས་ཀྱིས་ཐུགས་རྒྱུད་ཡོངས་སུ་གང་བ་པདྨ་བཀྲ་ཤིས་མདུན་ནས། པཎྜི་ཏ་དོན་ཡོད་རྡོ་རྗེས་མཛད་པའི་ཁྲིད་ཡིག་ཟབ་དོན་ཐུགས་ཀྱི་ཉིང་ཁུ་དང་། ངོ་སྤྲོད་ཆོས་ཀྱི་སྒོ་འབྱེད་སོགས་མང་ཞིག་དང་། དྲན་དབང་བླ་མ་འཇིགས་མེད་བློ་གསལ་མདུན་ནས་མདོས་སྐོར་སྣ་ཚོགས་པ། བླ་མ་དྷརྨ་ཙཀྲའི་མདུན་ནས་དགོངས་འདུས་པོད་ཆེན་བཅུ་གསུམ་གྱི་དབང་ལུང་སྔོན་
དུ་ལན་གཉིས་གསན་ཟིན་ནའང་། འདིའི་བརྒྱུད་པ་ལ་རབ་འབྱམས་རིག་འཛིན་དཔལ་འབྱོར་རྒྱ་མཚོ་བཞུགས་པས་ཡོངས་རྫོགས་ཚར་གཅིག་གསན་ཏེ། ལར་དགོངས་འདུས་འདི་ཀཿདཔལ་གྱི་བླ་མ་རྣམས་ཀྱིས་ཚར་གསུམ་རེ་མ་གསན་ཐབས་མེད་ལྟ་བུ་མཛད་པའི་ཕྱག་སྲོལ་བཞིན་གནང་། གཞན་རིག་འཛིན་ཡོངས་འདུས་དབང་ལུང་ཚང་མ། བྱང་ཆུབ་བྱ་ཁྱུང་བའི་དཀྱིལ་ཆོག་དང་། དགེ་སྤྲུལ་གྱིས་མཛད་པའི་རྡོར་ཟམ་གྱི་དབང་ལུང་། ཀོང་གཏེར་རྩ་གསུམ་པོད་ཚང་མའི་དབང་ལུང་སོགས་མང་ཞིག་གསན་བཞེས་མཛད། གཙང་མདའ་མཆོག་སྤྲུལ་དབོན་གཉིས་བཅས་དམ་པའི་རྣམ་ཐར་ངང་གིས་གསལ་བའི་སྐྱེས་མཆོག་ཡིན་བཞིན། ལུགས་གཉིས་ཀྱི་སྒོ་ནས་མངའ་གསོལ་གཟེངས་བསྟོད་དང་། མཁས་དང་གྲུབ་པའི་བླ་དག་མཆོག་ཏུ་དཔྱངས་ཏེ་བསྟན་འགྲོའི་ཕན་བདེ་སྤེལ་བའི་སྨོན་ལམ། བརྟན་བཞུགས་དང་།
མཁས་གྲུབ་ཆེན་པོ་སྒྲ་རམས་པ་ལ་ཀུན་ཤེས་ཀྱི་མཚན་གནང་བ།
༈ ཨ་གྲོ་སྒྲ་རམས་པའང་ཐོས་བསམ་སྒོམ་པའི་ཡོན་ཏན་བཀོད་མའི་ཆུ་ལྟར་ཡོངས་སུ་འཕེལ་བ་གཟིགས་ནས་བརྡ་སྤྲོད་ཀུན་བཤད་ཀྱི་མཚན་ཐོས་པས་གུས་པ་བསྐྱེད་ནུས་པ་དག་གིས་གཟེངས་བསྟོད་པ་ནི། ༡མགྲིན་པའི་དབུས་བཞུགས་སྒྲ་དབྱངས་ལྷ་མོ་ཡི། །བློ་གྲོས་ཕུན་ཚོགས་ཟླ་བ་སྙིང་ལ་ཤར། །ཕྱི་ནང་རིགས་ལམ་འཆི་མེད་བདུད་རྩིའི་ཟེར། །
བྲན་པས་ཀུནྡའི་ལང་ཚོ་བརྟས་འདི་མཚར། །༢ བཟང་པོའི་ཡོན་ཏན་འབྱུང་ཁུངས་བླ་མ་རུ། །ཤེས་པས་མི་ལྡོག་དད་པ་བརྟན་པོ་ཡིས། །མཉེས་པ་སྒྲུབ་ལ་ལྷོད་མེད་དགེ་བའི་མཐུས། །རྒྱལ་བསྟན་ཉིན་མོར་བྱེད་ལ་སོམས་ཉི་བྲལ། །༣ལྔ་བདོར་ཐོས་བསམ་སྒོམ་པའི་རྟ་བདུན་པས། །བླང་དོར་སྒྲིབ་པའི་འཐིབ་བུ་བསལ་བ་ལ། །སྲས་བཅས་རྒྱལ་རྣམས་ཐུགས་བསྐྱེད་སྨིན་པའི་འབྲས། །ཁྱོད་ཀྱི་དོན་གཉིས་འགྲུབ་པའི་རྒྱུར་གྱུར་ཅིག ། ཅེས་པ་འདི་ཡང་རང་སློབ་བླ་མ་འགྱུར་མེད་རྣམ་རྒྱལ་སྒྲ་སྙན་སྡེབ་སྦྱོར་སོགས་རྫོགས་པར། བརྡ་སྤྲོད་ཀུན་བཤད་ཀྱི་མཚན་དུ་སྒྲ༵་དབྱང༵ས་ཟླ་༵བ༵་འཆི༵་མེ༵ད་ལ༵ང་ཚོ༵་ཞེས་ཤཱཀྱའི་དགེ་སློང་ཞེ་ཆེན་པ་འགྱུར་མེད་མཐུ་སྟོབས་རྣམ་རྒྱལ་དཔལ་བཟང་པོས་ཆེད་དུ་བརྗོད་པ་དགེའོ། །ཞེས་པའོ། །འདི་ནི་རྗེ་བླ་མ་དང་སྐུའི་སྐྱེ་བ་རིམ་ཅན་ནས་བླ་སློབ་ཏུ་འབྲེལ་བས། དང་པོ་གཙུག་ཕུད་ཕུལ་ནས་འགྱུར་མེད་རྣམ་རྒྱལ་ཞེས་པའི་མཚན་གྱི་ཅོད་པན་བཅིངས། དེ་ནས་བཟུང་དེ་དང་མཐུན་པར་ཕྱི་ནང་གི་རིག་པའི་གནས་རྣམས་ལ་
གསན་བསམ་སྒོམ་པ་མཐར་ཕྱིན་པར་མཛད། རིགས་ལམ་རྣམས་སློབ་བུའི་ཚོགས་ལ་ཇི་བཞིན་འདོམས་དཀའ་བའི་སོམ་ཉིར་གྱུར་ཚེ་རྨི་ལམ་དུ་ཡེ་ཤེས་ཀྱི་སྐུས་རྗེས་སུ་བཟུང་ནས་འཇམ་དཔལ་གྱིས་བྱིན་རླབས་མཛད་ནས་ལུས་ལ་བདེ་བས་ཁྱབ་ཅིང་སེམས་ལ་ཐེ་ཚོམ་གྱི་མུན་པ་སངས་ནས་སྨྲ་བའི་སྤོབས་པ་མཆོག་ཏུ་ཐོབ། བྲག་ཡབ་ཏུ་བླ་མཆན་མཛད་ནས་ཕེབས་སྐབས་རྒྱལ་ཚབ་ཏུ་དབང་བསྐུར། སྐྱེ་བར་མི་འབྲལ་བའི་རྟེན་འབྲེལ་བསྒྲིགས། དེའི་སྟོབས་ཀྱིས་རྗེ་བླ་མ་སྐུ་གཤེགས་པའི་སྐབས་ཀྱང་ཁོང་པ་ནང་ཆེན་དུ་བཞུགས་ཀྱང་དྲུང་ན་འཁོད་པ་ལྟ་བུའི་ཉམས་ཤར་ཞིང་ཤམ་བྷ་ལར་བླ་སློབ་ལྷན་ཅིག་ཏུ་གསང་ཆེན་ཆོས་ཀྱི་དགའ་སྟོན་ལ་སྤྱོད་པའི་སྐལ་ལྡན་དུ་བྱས། གཞན་ཡང་བྱ་བྲལ་གྱི་སྤྱོད་པས་ཙཱ་རིའི་ནང་སྐོར་དང་། རྒྱ་ནག་གླང་ཆེན། དབུས་གཙང་སོགས་ཀྱི་ལྷ་རྟེན་ལ་གནས་མཇལ་ཕྱག་སྐོར་དང་། ཆབ་བྲག་ཁམས་པ་སྒར། ནང་ཆེན་སོགས་ལ་ཕྱི་ནང་གི་རིག་གནས་ཀྱི་བསླབ་གྲྭ། མདོ་སྔགས་ཀྱི་རྒྱུན་སྤེལ་བར་མཛད། ཨོ་རྒྱན་རྗེས་བྱིན་གྱིས་བརླབས་པས་ཟབ་མོ་གཏེར་གྱི་བཀའ་བབ་ཀྱང་དུས་ཀྱི་བབ་ལ་གཟིགས་ནས་ཧ་ཅང་དར་རྒྱས་མ་མཛད། དད་འདུན་རྩེ་གཅིག་པ་རྣམས་ལ་ཕྱི་མཐའ་གཟིགས་པའི་ལུང་བསྟན་སྣ་ཚོགས་མཛད་པའང་ཇི་ལྟ་བ་བཞིན་མངོན་དུ་གྱུར་པ་སོགས་མདོར་ན་སྒོ་ཐམས་ཅད་ནས་མཁས་དང་གྲུབ་པའི་གྲགས་སྙན་བོད་ཆེན་པོའིི་ལྗོངས་སྤྱི་དང་ཁྱད་པར་ཆབ་བྲག་སྡེ་ནང་བཅས་ལ་ལྷག་པར་གསལ་བར་མཛད་པའོ། །
མཇམ་མགོན་ཀོང་སྤྲུལ་ལ་ཀུན་ཤེས་ཀྱི་མཚན་གནང་བ།
༈ ཆུ་སྦྲུལ་དཔྱིད་ཐོག་འཇམ་མགོན་ཀོང་སྤྲུལ་རིན་པོ་ཆེ་རྗེ་འདི་ཉིད་ཀྱི་སྐུ་རྩར་ལོ་དྲུག་བསྙེན་ཏེ་ཚུར་ཕེབས་སྐབས། ཤེས་རབ་གསུམ་གྱི་ཡོན་ཏན་ཡར་ངོའི་ཟླ་བའི་རྗེས་སུ་འགྲོ་ཞིང་། འཆད་རྩོད་རྩོམ་པའི་འོད་སྟོང་ཐུབ་བསྟན་གླིང་བཞིའི་རྒྱན་དུ་མཛེས་ཤིང་། བསྟན་འགྲོའི་མི་མཐུན་རྒུད་པའི་མུན་པ་རིང་དུ་བསྐྲད་ཅིང་། ཕན་བདེའི་སྣང་བའི་དགའ་སྟོན་ཕྱོགས་བརྒྱར་སྤེལ་བའི་བྱེད་པོའི་མཆོག་ཏུ་མངའ་གསོལ་བའི་བརྡ་སྤྲོད་ཀུན་བཤད་ཀྱི་མཚན་དུ། ༡བློ་༷གྲོས་གཏེར༷་ཆེན་རྙེད་པས་བདེ། །རབ༷་དཀར་ལྷག་བསམ་བསྟན་འགྲོར་དགའ༷། །ཚང༷ས་བྱུང༷་སྙིང་དབུས་བསྙེམ༷ས་པ༷འི་གར། །ལང༷་ཚོའི་༷ཟླ་༷སྣང༷་གསལ་གྱུར་ཅིག ། ༢གཟོད་ནས་ཆོས་ཁམས་དགེ་བའི་ཕྱག་རྒྱ་ཆེ། །འགྲོ་འདིའི་ལེགས་བཟུང་རྫོགས་བྱང་ཉེ་བའི་རྒྱུར། །ཡེ་ཤེས་གཟིགས་པས་བསྔགས་པ་མི་བསླུ་བས། །བདེན་ངེས་གང་གི་གསང་གསུམ་བརྟན་པར་མཛོད། །༣ ཐོས་པས་བཅུ་ཕྲག་རིག་པར་བྱང་ཆུབ་ཅིང་། །བསམ་པས་ཐེ་ཚོམ་འཆིང་གྲོལ་ངེས་པ་རྙེད། །
སྒོམ་པས་དེ་དོན་རྒྱུད་འབྱོར་ལུང་རྟོགས་བསྟན། །བདག་གིར་བགྱིད་ལ་རྒྱལ་བའི་རྗེས་སུ་སྙོགས། །༤ རང་རྒྱུད་མ་བཏུལ་གཞན་རྒྱུད་མི་དུལ་གཤིས། །སོ་བྱང་སྔགས་ལྡན་ས་ཟླའི་ཀཱ་ལ་ཤ ། ཁྱད་ཆོས་བཞི་ཡི་རིན་ཆེན་ཕྲ་ཚོམ་ཅན། །དོན་གཉིས་སྒྲུབ་པའི་རྟགས་སུ་བླང་བར་རིགས། །༥ ཉེ་རིང་མེད་པར་ཀུན་ལ་མ་འདྲིས་པའི། །མཛའ་བཤེས་ཉིད་བྱ་གཞན་གནོད་གཞི་བཅས་དོར། །དངོས་སམ་བརྒྱུད་ནས་ཕན་པ་འབའ་ཞིག་གིས། །བྱང་ཆུབ་སྤྱོད་མཆོག་རྒྱ་མཚོ་རྫོགས་པར་མཛོད། །༦བློ་གྲོས་བརྒྱ་ཕྲག་ཉི་མ་འབར་བའི་མཐུན། །ཤེས་བྱའི་ལྟད་མོར་མ་ཆུད་ཅི་ཞིག་ཡོད། །གནས་སྐབས་ཉི་ཚེའི་ཆུ་ཁུར་དྲི་ཕྲ་མོ། །རྟོག་དཔྱོད་དྲི་གཞོན་དར་བས་བསལ་བར་འོས། །
༧གང་ཐུགས་རིང་ནས་བསྟན་འགྲོར་རྗེས་ཆགས་ཀྱིས། །ཟུར་མིག་འཕངས་པའི་དམ་བཅའ་སྨིན་ལེགས་མས། །བློ་ལྡན་གྲོགས་སུ་སྦྲོན་ལ་གེགས་བྱེད་ཆ། །ཕྲ་མོ་ཙམ་གྱིས་གླག་ལྟར་མ་གྱུར་ཅིག ། ༨ ཆོས་ཀུན་རྟེན་འབྲེལ་ལྟོས་གྲུབ་བླ་སློབ་ཀྱི། །དམ་ཚིག་རྡོ་རྗེའི་སྲད་བུས་སྦྲེལ་བ་ཡང་། །བསྐལ་པར་མི་འགྱུར་ཉི་དང་ཟེར་བཞིན་འབྲེལ། །མདོར་ན་བསམ་པའི་དོན་ཀུན་ཡོངས་རྫོགས་ཤོག །ཅེས་སྐྱེས་སྦྱངས་ཤེས་རབ་ཕུལ་བྱུང་ཁྱུང་པོ་བླ་མ་བསྟན་འཛིན་གཡུང་དྲུང་སྒྲ་ཀཱ་ཙན་པཱ་ཎི་དབྱངས་ཅན་སོགས་སྒྲ་རིག་རྒྱ་མཚོར་བསླབ་སྦྱང་རྫོགས་སྐབས་བརྡ་སྤྲོད་ཀུན་བཤད་ཀྱི་མིང་དུ། བློ་གཏེར་རབ་དགའ་ཚངས་བྱུང་བསྙེམས་པའི་ལང་ཚོའི་ཟླ་སྣང་དུ་གསོལ་བའི་སྨོན་ཚིག་བསླབ་བྱ་དང་འབྲེལ་བ་ཤཱཀྱའི་དགེ་སློང་ཞེ་ཆེན་པ་འགྱུར་མེད་མཐུ་སྟོབས་རྣམ་རྒྱལ་ནས་སྦྱར་པའི་ཡི་གེ་པ་ནི་ལྔ་རིག་སྨྲ་བ་དགེ་བླ་པདྨ་སྐལ་བཟང་གིས་བགྱིས་པ་དགེ་ལེགས་འཕེལ། སརྦ་མངྒ་ལཾ་བྷ་བ་ཏུ། ཞེས་པའི་ཚིགས་སུ་བཅད་པས་འབྱུང་འགྱུར་གྱི་གནས་སྐབས་ཕུན་སུམ་ཚོགས་པ་ཇི་ལྟ་བ་བཞིན་མཚོན་པར་མཛད། དེ་མཉམ་སྲུང་མ་སྤྱི་སྒོས་རྣམས་ལ་
བུ་འདིའི་ཕྲིན་ལས་སྒྲུབ་དགོས་པའི་བཅོལ་དམ་དང་ལེགས་སྐྱེས་ཀྱི་གནང་སྦྱིན་བསྩལ་པའི་ཆེད་དུ་བརྗོད་པ། འགྲོ་ཕྱིར་དམ་བཅའ་ཆེན་པོའི་ཁུར་ཐོགས་ནས། །སྤངས་རྟོགས་ཡོན༷་ཏན༷་རྒྱ་༷མཚོ༷ར་ལོངས་སྤྱོད་པ། །བསྐལ་བཟང་རྒྱལ་བ་སྟོང་དང་ཐ་མི་དད། །ཨོ་རྒྱན་རྡོ་རྗེ་འཆང་དེས་ཁྱོད་ལ་སྲུངས། །དེང་སྔོན་སྦྱངས་སྐྱེས་ཐོབ་ཀྱི་ཤེས་རབ་མངོན་པར་རྒྱས་པའི་མཁྱེན་རབ་ཀྱི་མྱུ་གུ་གསར་པ་ཐོས་བསམ་སྒོམ་པའི་འདབ་སྟོང་རྣམ་པར་རྒྱས་གྲུབ་པས། བློ་གསལ་བུང་བ་གཞོན་ནུའི་གསོས་སུ་གྱུར་པ་ལ་ཐེ་ཚོམ་བྲལ་ཞིང་། སླད་ཀྱི་ཆར་རིས་བྲལ་རྒྱལ་བ་མཆོག་གི་བསྟན་པ་བླ་ནས་བླར་འཕེལ་བའི་བྱེད་པོ་སྲིད་ཞིའི་འདྲེན་པ་མཆོག་ཏུ་མངའ་གསོལ་བར་བྱ་ཕྱིར། རྟེན་འབྱུང་གི་སྒོ་འཕར་བརྒྱ་ཕྲག་ཕྱེ་བའི་ལེགས་སོ་འབུལ་བའི་རྟེན་མཚོན་ལ། བཀྲ་ཤིས་པའི་ལྷ་རྫས། བུམ་པ་ལེགས་པ་ཆ། རང་གི་གྱོན་པ་བཟང་གོས་ཀྱི་ཆོས་གོས་བཅས་ཕུལ་བ་བརྩེ་བ་མཆོག་གིས་རྗེས་སུ་བཞེས་པ་ནས། འཆད་རྩོད་རྩོམ་པ་དང་བཤད་སྒྲུབ་སྒོམ་པས་བསྟན་འགྲོའི་དོན་ཆེན་སྒྲུབ་པའི་མཛད་པ་སྐྱོ་ངལ་སྤངས་ནས་རང་གཞན་དོན་གཉིས་དཀའ་བ་མེད་པར་འགྲུབ་པར་གདོན་མི་ཟ་བ་ལགས་པས་ཐུགས་ལ་བསྟིམ་འཚལ། གང་གི་གསང་གསུམ་བསྐལ་པ་བརྒྱ་ཕྲག་བར། །
ཚེ་མཐའ་ཡས་པའི་ངོ་བོར་ལྷུན་ཆགས་ཤིང་། །མི་ཤིགས་རྡོ་རྗེ་མི་འགྱུར་གཡུང་དྲུང་དང་། །མི་ནུབ་རྒྱལ་མཚན་ལྟ་བུར་བརྟན་གྱུར་ཅིག ། བཅུ་ཕྲག་རིག་ལམ་ཉིན་མོར་བྱེད་པའི་གཟིས། །རྨོངས་པའི་མུན་སྟུག་མ་ལུས་བསལ་བྱས་ནས། །བསྟན་འགྲོའི་དཔལ་གྱི་འདབ་མ་རྣམ་གྲོལ་བར། །རྣམ་མཁྱེན་སྐུ་བཞིའི་འབྲས་བཅུད་རྒྱས་འགྱུར་སྨོན། །སརྦ་ཐཱ་ཤུ་བྷཾ། ཞེས་ཚིགས་སུ་བཅད་པ་དང་བཅས་པའི་བདག་རྐྱེན་མཛད་ནས་བཅུ་ཕྲག་རིག་ལམ་རྒྱ་མཚོ་སྨྲ་བ་ལ་ཉམ་ང་བ་མེད་པའི་སྤོབས་པ་ཐོབ་སྟེ་ཕེབས། སླད་ནས་དཔལ་སྤུངས་སུ་ཕྱག་ཕེབས་སྐབས་སི་ཏུ་པདྨ་ཉིན་བྱེད་དང་མཇལ། ཀཾ་ཚང་བསྟན་པའི་བདག་པོར་མཆོག་ཏུ་བསྔགས་པ་དང་། ཁྱད་པར་ཀོང་བམ་སྟེང་སྤྲུལ་སྐུས་འཇམ་དབྱངས་ཀྱི་ལྗགས་བསྙེན་དུང་ཕྱུར་བཟླས་པའི་ཡང་སྲིད་དུ་ངོས་འཛིན་མཛད་ནས། མཚན་ཀརྨ་ངག་དབང་ཡོན་ཏན་རྒྱ་མཚོ་ཞེས་གསོལ་སྐབས། ལར་ཁོང་པ་ཞེ་ཆེན་ལ་ཚུར་ཕེབས་དུས། དཔོན་ཁང་སར་ཚང་གི་དྲུང་ཡིག་ལྟ་བུ་ལས། བླ་མ་ལྟ་ཞོག་གྲྭ་པ་ཞིག་གི་རྣམ་འགྱུར་ཡང་མངོན་གསལ་ཅན་མེད་ན་ཡང་བླ་མ་རྡོ་རྗེ་སློབ་དཔོན་གྱི་གོ་སར་མངའ་གསོལ་བ་དང་། ཚིགས་བཅད་དེ་ནང་ལ་ཡོན་ཏན་རྒྱ་མཚོའི་ཞེས་པའི་ཟུར་ཐོན་པས། བླ་མ་འདི་རིགས་ལ་ཐུགས་དགོངས་
ཁྱད་དུ་འཕགས་པ་རེ་མངའ་བ་ཐུགས་གཏིང་ནས་ཆེས་པས། སླར་ཡང་རྗེ་འདི་ཉིད་ལ་མི་ཕྱེད་པའི་དད་པ་ལྷག་པར་ཐོབ་པ་ཡིན་ཞེས། ཀོང་སྤྲུལ་རྡོ་རྗེ་འཆང་ནས་ལན་གྲངས་གསུངས་གནང་བ་དེ་ལྟར་ཡིན། དེ་ལྟར་བཅད་རྒྱ་ལོ་དྲུག་གི་ཁོང་དེར་བཟླས་བརྗོད་ཀྱི་གྲངས་ཞལ་ལེན་མཛད་པ་ལྟར་མཐར་ཕྱིན་པ་དང་། བསམ་སྒོམ་གྱི་ལག་རྗེས་ཅི་རིགས་པ་མྱོང་བ་ཐོན་པ། བསྟན་འགྲོའི་དོན་ཆེན་སྒྲུབ་ནུས་པའི་སློབ་མ་ཁྱད་དུ་འཕགས་པ་དུ་མ་འདུས་ཤིང་། དེ་དག་ལ་གཙུག་ལག་རྒྱ་མཚོའི་དགའ་སྟོན་སྤེལ་བ་དང་། བཀའ་གཏེར་ཆོས་ཚུལ་རྒྱ་མཚོའི་སྨིན་གྲོལ་གྱི་ལམ་ལ་སྐལ་བཟང་གི་སྐྱེ་བོའི་ཚོགས་དཀྲི་བ་དང་། དབང་ལུང་གི་གདམས་པ་གང་ལ་གང་འདོད་བསྩལ་བས་ཕྱོགས་ཀྱི་དད་འདུས་ཀྱི་རིགས་མཆོག་ཏུ་ཚིམས་པར་མཛད་པ་སོགས་དུས་གཅིག་ལ་བྱ་བ་མང་པོ་ལྷན་ཅིག་ཏུ་ཐོགས་པ་མེད་པར་སྒྲུབ་ནུས་པ་ངོ་མཚར་བའི་གནས་ཏེ། རྒྱན་ལས། ཇི་ལྟར་སྐྱེས་བུས་ཟོ་ཆུན་རྒྱུན། །རྡོག་ཐབས་གཅིག་གིས་བསྐྱོད་པ་ན། །ཐམས་ཅད་དུས་གཅིག་འགུལ་བ་ལྟར། །སྐད་ཅིག་གཅིག་ཤེས་དེ་བཞིན་ནོ། །ཞེས་པའི་ཚུལ་དང་མཐུན་པ་ལས་རང་ཅག་སོ་སྐྱེས་རྣམས་ཀྱིས་བྱ་བ་གང་འདྲ་ཞིག་སྒྲུབ་ཀྱང་གཅིག་གི་གོ་ས་ལ་མང་པོ་འདུ་བའི་སྐབས་མེད་དེ། དངོས་པོའི་གཤིས་ལུགས་ཡིན་པའི་ཕྱིར། འཕགས་ཆེན་རྣམས་ཀྱི་རྣམ་ཐར་ལ། མཛད་པ་སྣ་རེ་མི་ཚེ་རེར་བསྐྱངས་པ་ལྟ་བུ་ལ། ཡང་དེ་འདྲ་བ་འདྲ་མིན་མང་པོ་མཛད་ཚུལ་སྣང་བས་ཚུར་མཐོང་གི་བློ་ལ་ཤོང་དཀའ་བར་སྣང་བ་དང་ངེས་པར་མཐུན་པ་ཉིད་དོ། །
བཅད་རྒྱ་ལོ་དྲུག་གྲོལ་མ་ཐག ། ཆུ་སྦྲུལ་ཟླ་བ་ལྔ་པའི་ཚེས་བཅུའི་སྐབས་ཞེ་ཆེན་དགོན་ཆེན་ལ་ཕྱིར་ཕེབས་ཏེ་ཚེས་བཅུའི་སྐྱ་འཆམ་རྣམས་ལ་འཆམ་སྣ་ཚང་མ་མང་གྲལ་དུ་སྐུ་འཆམ་དང་། དངོས་གཞིའི་ཉིན་བྱང་འདྲེན་པ་རྣམས་ཀྱི་གྲལ་ལ་འཆམ་རོལ་གདངས་དབྱངས་རྣམས་ཇི་ལྟ་བར་མཛད་པས། ཁོང་ལ་དད་པ་རྣམས་ཀྱིས་བླ་མ་འདིའི་ལོ་དྲུག་གི་རིང་ཚེས་བཅུའི་འཆམ་གཟིགས་ཐོས་མེད་པ་ལ། ད་རེས་འདི་འདྲ་ཐོགས་མེད་མཁྱེན་པ་མི་བརྗེད་པའི་གཟུངས་ཐོབ་པ་རེད་མ་གཏོགས་གཞན་རྣམས་ཀྱིས་ལོ་བསྟར་འཆམ་གྲལ་དུ་འགྲོ་ན་ཡང་དུས་ལ་བབ་ཚེ་བློ་གསོ་བཟང་བ་རེ་མ་བྱས་པར་མི་ཤེས་འདུག་ཟེར། ཡེ་མི་དད་པ་རྣམས་ཀྱིས། ཁོང་བླ་མ་ཚུལ་ལ་མི་མཁས་པ། མི་མགོ་ཡངས་རེད་མ་གཏོགས། འཆམ་དང་རོལ་མོ་བྱེད་པ་གྲྭ་པའི་བྱ་བ་རེད་མ་གཏོགས་བླ་མའི་མཛད་པ་རང་ཅི་ལ་ཡིན། བླ་མའི་ཀུན་སྤྱོད་དེ་རིང་མི་མང་ཁྲོད་དུ་ཁྲི་མཐོ་བའི་སྟེང་སྐུ་ཆས་གཟབ་སྤྲོས་དང་བཅས་བརྗིད་ཆགས་པ་ཞིག་བྱས་བཞུགས་ན་དེ་རང་ལེགས་པ་ཡིན་ཟེར། གང་ལྟར་ཡང་སྨིན་གླིང་ལུགས་ཀྱི་སྒྲིག་ལམ་རྣམ་བཞག་ལ་ཐུགས་ལྷག་པར་དགྱེས་པས། དུས་ནམ་གྱི་ཚེ་ཡང་བཏང་སྙོམས་དང་གལ་ཆུང་མི་མཛད་པར་མེ་དང་ཚ་བ་འགྲོགས་པའི་དཔེ་ལྟར་ཡོད་པ་ཡིན། དེའི་རྗེས་འཕྲལ་ནང་ཆེན་སྐོར་བརྒྱུད་ཕེབས་པར། ལྡན་བརྒྱུད་རིམ་པར་མདོ་ཁམས་ཅོག་ལེ་ཐང་དང་། མཁའ་འགྲོ་འབུམ་རྫོང་སོགས་ལ་རིམ་པར་སྒར་
བབ་པས། ནང་ཆེན་པས་ཇོ་སང་ཞིག་མཇལ་དར་བཏང་བར་འབྱོར་ནས། རྒྱལ་སར་བྱོན་ཐུབ་པར་ཞུས། ལྷོ་ཡེ་ཕུག་ལ་བྱོན། གནས་རྣམས་ལ་ཚོགས་འཁོར་དང་མཆོད་འབུལ་དང་། སྐུ་ཕྲེང་སྔོན་མ་གསལ་ལྡོམ་སྒོམ་ཤེའི་བཞུགས་གནས་དང་མཆོད་སྡོང་བྲག་རྩེར་ཡོད་པ་སོགས་ལ་རྒྱུ་མཚན་འཆད་པ་དང་། ཕྱག་མཆོད་ཕུལ། ནང་ཆེན་སྒར་དུ་ཕེབས་ནས་དབང་ཆོས་ཁ་ཤས་མཛད། སྲས་ཨ་བདེ་ལ་སྒྲ་ཀཱ་ལ་པའི་འགྲེལ་པ་སོགས་ཀྱི་དཔེ་ཆ་མ་འབྱོར་བས་རྩ་བ་ཁོ་ནའི་སྟེང་ནས་ཁྲིད་མཛད་དེ། མཚམས་སྦྱོར། མིང་ལེ་ཀུན་བཤད། ཀྲཏ་བཅས་མཐར་ཕྱིན་པར་གྲུབ་པས། སྒྲའི་རི་མོ་ལ་ཤིན་ཏུ་བྱང་ཆུབ་པས་ལྷ་དབང་གཞོན་ནུ་མིའི་རྣམ་པར་བཞེངས་པར་སོམ་ཉི་མེད་པ་དེ་འདྲའི་མཁས་པ་ཟེར་ནས་མཆོག་དམན་ཀུན་གྱིས་ཆབས་གཅིག་ཏུ་གླེང་། སྒོམ་སྡེ་འཁྲུལ་ཞིག་སྤྲུལ་པའི་རྒྱལ་སྲས་ཨ་བདེ་རིན་པོ་ཆེ་དེ་ཡང་སྔོན་སྦྱངས་ཀྱི་འཕྲོ་སད་པ་ལ། ཁྱད་པར་རྗེ་འདིའི་མཁྱེན་པའི་ཡེ་ཤེས་ཀྱི་བྱིན་རླབས་དངོས་སུ་ཞུགས་པས། སྒྲ་དང་སྙན་ངག་ལ་མཁས་པའི་རྩེར་སོན་པས། བརྡ་སྤྲོད་ཀུན་བཤད་ཀྱི་མཚན་གྱི་བསྔགས་པའི་ཟླ་བའི་ཅོད་པན་གསོལ་ནས་བླ་སློབ་ཐུགས་ཡིད་གཅིག་འདྲེས་སུ་གྱུར། དེ་ཚུར་ཆིབས་ཀྱི་ལམ་བར་རྣམ་རྒྱལ་གླིང་བརྒྱུད་ཟུར་མང་བདུད་རྩི་མཐིལ་དགོན་དུ་བྱོན། གཏེར་སྟོན་རོལ་རྡོར་སྤྲུལ་སྐུའི་མདུན་ནས་ཚེ་དབང་གསན་པས་མཚོན་བླ་བྲང་དགོན་པ་བྱིངས་དང་ཞིབ་ཆ་མཛད། དེ་རྣམས་ཀྱིས་བསྙེན་བཀུར་
ཕུལ་དུ་ཕྱིན་པ་བསྒྲུབས། དེ་ནས་གཤོང་ནག་རི་ཁྲོད་ལ་བྱོན་ནས་བདུན་མཚམས་ཞིག་བཞུགས། དེ་གྲོལ་ནས་ཀེ་རྒྱུད་པ་ལ་སྡོམ་བུ་དང་ཁྲོམ་དབང་། སྦྱི་བསང་སོགས་གང་དགོས་མཛད། དེ་རྣམས་ཀྱིས་ཀྱང་བཀུར་སྟི་དང་འབུལ་ནོད་རྒྱ་གང་ཆེ་ཕུལ། དེ་མཚམས་མདོ་སྨད་སྐྱེ་དགུའི་གཙུག་རྒྱན་སྒྲུབ་བརྒྱུད་བསྟན་པའི་ཉི་མ་ལྷོ་ཁམས་པ་རིན་པོ་ཆེས་མ་བྱོན་ཐབས་མེད་ཀྱིས་གདན་ཞུས་ལ་གྲྭ་མགྲོན་ཆེད་བཏང་འབྱོར་བས། དེ་མཚམས་སྒར་ཆེན་ཚུར་ལོག །སྒར་ཆུང་ཕྱེས་ནས་ཁམས་པའི་སྒར་དུ་བྱོན། བསུ་བ་དང་། ཐོག་རོལ། སྤོས་སྣ། རྒྱ་གླིང་གི་བསུ་མ་སོགས་ཀྱིས་གུས་པ་བསྟབས་ཏེ། ཕོ་བྲང་དུ་བྱོན་ནས་ཁམས་སྤྲུལ་རྡོ་རྗེ་འཆང་དང་ལུགས་གཉིས་ཀྱི་གླེང་མོ་སྣ་ཚོགས་དང་། ཁྱད་པར་རིག་གནས་ཀྱི་སྐོར། མདོ་སྔགས་ཀྱི་གཞུང་དང་། ཟབ་མོ་ནང་གི་སྐོར་རྣམས་ཞག་མང་དུ་སྦྲེལ་བས་ཐུགས་ལ་དགྱེས་པའི་ཚུལ་ཚད་མེད་པ་འཁྲུངས་ནས། སྔ་འགྱུར་རྙིང་རྒྱུད་རིན་པོ་ཆེའི་པོད་ལུང་ཚང་མ་གསན། གཞན་ཡང་གཏེར་རྙིང་རཏྣའི་སྐོར་དང་། སྨིན་གླིང་གཏེར་ཆོས་སྐོར་ཀྱང་མང་ཞིག་དང་། ལུང་ཕྲན་ཚེགས་སྣ་ཚོགས་པ་བཅས་གསན། གཤིན་རྗེ་དྲེགས་པ་འཇོམ་བྱེད་ཀྱི་སྒྲུབ་བཟློག་གནད་སྨིན་མཛད། ཚུར་ཡང་དབང་ལུང་ཕྲན་ཚེགས་འགའ་གསན། རྒྱ་དངུལ་རྡིལ་ཚད་གཉིས་ཀྱིས་གཙོས་པའི་ཚན་གྲངས་བརྒྱ་ཕྲག་གཅིག་དང་། ཉེར་ལྔའི་འབུལ་བ་དང་། ཆིབས་སྐྱེལ། གསོལ་སྟོན་སོགས་རྒྱ་གང་ཆེ་བསྒྲུབས་ཏེ། བླ་སློབ་ཤིན་དུ་ནང་གཤིན་འགྲན་
ཟླ་དང་བྲལ་བར་མཛད་དེ་ཚུར་བྱོན་པའི་ལམ་ཁ་ནས་ལྷ་ཐོག་དཔོན་ཚང་གིས་བཀའ་དབང་འགའ་གསན། གསོལ་སྟོན་དང་ཞབས་ཕྱི་མཐུན་འགྱུར་གང་དགོས་བསྒྲུབས་ནས། ཆིབས་ལམ་བདེ་བའི་ངང་དུ་ཕེབས་ཏེ་ཞེ་ཆེན་དུ་ཟླ་བ་བཅུ་གཉིས་པའི་སྟོད་ལ་འབྱོར། དེའི་ཕྱིར་ལོ་ཁམས་པ་སྐུ་ཞབས་རིན་པོ་ཆེའི་མདུན་ནས། བྲག་གཡབ་པ་ངག་དབང་ཉི་མ་དང་། ཆབ་མདོ་པ་ཤེས་རབ་བཟང་པོ་གཉིས་ཕྱི་ནང་གི་རིག་གནས་རྣམས་བསླབ་ཕྱིར་ཆེད་དུ་བཏང་། སྐུ་ཞབས་ཁམས་སྤྲུལ་རྡོ་རྗེ་འཆང་ཉིད་ཀྱིས་བཀའ་བཀོད་ལྟར། ངག་དབང་ཉི་མས་སྒྲ་གཞུང་ཙནྡྲ་པ་དང་། ཤེས་རབ་བཟང་པོས་ཀཱ་ལ་པ་གཉིས་ཐོག་མར་བསླབ་སྟེ། དེའི་ཁོངས་སུ་བོད་ཀྱི་བརྡ་དག་ཀྱང་ཞོར་དུ་འགྲོ་བར་མཛད། དེ་རྗེས་སྡེབ་སྦྱོར་དང་། སྙན་ངག །མིང་གི་མངོན་བརྗོད། རྩིས་དཀར་ནག་སོགས། ཤེས་བྱ་རིག་པའི་གནས་ལ་ཐོས་བསམ་ཉམས་འོག་ཏུ་ཚུད་དེ་སླར་རང་ཡུལ་དུ་ལྡོག་སྐབས། སོ་སོར་བརྡ་སྤྲོད་ཀུན་བཤད་ཀྱི་མིང་དོན་ལྡན་གྱི་བསྔགས་བརྗོད་ཞལ་གདམས་དང་འབྲེལ་བ། སྨོན་ཚིག་ཤིས་བརྗོད་ཀྱི་ཨུཏྤལ་ལའི་ཐོད་བཅིང་ལྷ་མིའི་འཇིག་རྟེན་ན་རིན་ཐང་དང་བྲལ་བ་དང་བཅས་ཕྱིན་པས། རྡོ་རྗེ་འཆང་ཁམས་སྤྲུལ་རིན་པོ་ཆེ་ཐུགས་དགྱེས་པའི་སྐྱེས་ལན་གཏོས་ཆེ་བ་དང་། སྙིགས་མའི་དུས་འདི་ཙམ་ན་ས་སྟེང་ན་འགྲན་ཟླ་བྲལ་བའི་མཁས་པ་ཆེན་པོ་ཡིན་པར་མ་ཟད། བྱང་ཆུབ་སེམས་ཀྱིས་ཐུགས་རྒྱུད་ཡོངས་སུ་གང་བས་འཕགས་པ་འཇམ་དཔལ་དབྱངས་དང་མཚུངས་པའི་གཞན་ཕན་ཕྲིན་ལས་དངོས་
སུ་སྣང་བའི་ཆེད་དུ་བརྗོད་པ་དང་བཅས་གནང་། དེ་ནས་ཤིང་གི་རྟ་ལུག་དང་མེ་སྤྲེལ་མེ་བྱའི་སྟོད་རྣམས་ལ་ཅི་མཛད་རྩ་ཐོ་ཞིབ་ཆ་མི་སྣང་། དོན་དུ་བཞུགས་གནས་རི་ཁྲོད་དུ་སྔར་རྒྱུན་བཞིན་སྤྱིར་བཞུགས་གདན་འཇགས་པར་གཞིར་མཛད་ལ། དབྱར་སྡོམ་དང་དགུན་ཁར་ནས་བསོད་ལོ་ལ་ཁ་ཡར་བྱོན་པ་དང་། དབང་ལུང་དང་གདམས་ཁྲིད་ཀྱིས་དད་ལྡན་གྱི་སྐྱེ་བོ་ཚིམ་པར་མཛད་པ་སྔར་རྒྱུན་ལྟར་ལས། ཁྱད་པར་ཕུག་ཁང་སྤྲུལ་སྐུའི་གསོལ་དཔོན་དགེ་རྩེ་བླ་མ་འགྱུར་མེད་དོན་གྲུབ་ལ། སྒྲ་མདོ་ཀཱ་ལ་པ་དང་། དབྱངས་ཅན་མ་གཉིས། སྡེབ་སྦྱོར། སྙན་ངག །ཡིག་རིགས། རྒྱུད་བཤད་དང་། སྡོམ་གསུམ་བཤད་པ་བཅས་ཕུལ་དུ་ཕྱིན་པར་བསླབ་པར་མཛད། འཇུ་བླ་བསྟན་དར། དགེ་མང་བླ་མ་སྨོན་ལམ་དར་རྒྱས། ཝ་ཤུལ་བླ་མ་སངས་རྒྱས་བཟང་པོ། ཕུག་ཁང་དབོན་སྙིང་པོའི་དོན་རྟོགས། བླ་མ་འགྱུར་མེད་སྙིང་པོ། ཞེ་དགོན་བླ་གྲྭ་ཁ་ཤས་བཅས་ལ། སྒྱུ་འཕྲུལ་ཞི་ཁྲོའི་དབང་སྔོན་དུ་འགྲོ་བས་གསང་བ་སྙིང་པོའི་སྤྱི་དོན་དང་། ཚིག་དོན། མཐའ་དཔྱོད་སོགས་ཀྱི་བཤད་པ་ངོ་མཚར་བ་དང་། རྗེས་འབྲེལ་རྒྱུད་ཆོག་བཏང་ནས། ལེགས་ལྡན་གྱི་དབང་། གཉེར་གཏད་སོགས་ཞིབ་པར་མཛད། དེ་རྗེས་གསེར་མདོག་ཅོད་པན་འཆང་བའི་ལུགས་བཟང་མཁའ་ཁྱབ་ཏུ་སྤེལ་བའི་ཕྲིན་ལས་ཅན་ཧོར་དགོན་སྡེ་བཅུ་གསུམ་གྱི་བདག་པོ་ལུང་དང་རིགས་པ་སྨྲ་བའི་དགེ་བའི་བཤེས་གཉེན་དགོན་སར་ཆོས་རྗེ་བློ་བཟང་མཐུ་སྟོབས་ལགས་
ནས། སྤྱིར་དགེ་ལྡན་པའི་བསྟན་པ་འདི་ལ་རྒྱལ་མཆོག་ལྔ་པའི་སྐུ་དུས་ནས་སྨིན་གླིང་གི་གཏེར་ཆོས་འདི་རིགས་རིམ་གྲོ་ལ་མཆོག་ཏུ་བསྔགས་པའི་ལེགས་ལམ་ཡོད་པ་ཐུགས་ལ་བརྣགས་ཏེ། ལུགས་དེ་ལ་རྗེ་འདི་ཉིད་བསྙེན་སྒྲུབ་ལས་གསུམ་ལ་ནང་བྱན་ཆུབ་པ་ཡིན་པ་མཁྱེན་ནས། འཇམ་དཔལ་གཤིན་རྗེ་དྲེགས་པ་འཇོམས་བྱེད་ཀྱི་སྲུང་བཟློག་བསད་པའི་ལས་རིམ་བསྟན་དོན་ལ་དགོས་ཞེས། གདན་འདྲེན་པ་ཆེད་བཏང་ནས་གསུང་ལེགས་སྐྱེས་བཅས་འབྱོར་བས། དགོངས་བཞེད་བཞིན་ཕེབས། སྒྲུབ་ཕྲིན་གྱི་རིམ་པ་གནད་དུ་འཁྱོལ་བ་དང་། ཕྱག་བཞེས་ཕྲ་ཞིབ་ཀྱི་རིམ་པ་དང་བ་འདྲེན་པར་མཛད་པས། ཆོས་རྗེ་རིན་པོ་ཆེས་འདི་ཉིད་སྔ་འགྱུར་པའི་གྲུབ་མཐའ་འཛིན་པ་ལ་ཁྱད་དུ་འཕགས་པ་གཟིགས་ནས་རིག་གི་བདག་པོར་བཀུར་ཏེ། འདུས་པ་མདོ་དབང་ཚང་མ་ལུང་བཅས་དང་། རྡོར་སེམས་དབང་ལུང་ཁྲིད་སོགས་མཛད། བསུ་བ་དང་སེར་སྦྲེང་བཅས་ཀྱི་བཀུར་སྟི་དང་། ལེགས་འབུལ་ཀྱང་རྒྱ་དངུལ་རྡིལ་ཚད་སོགས་ཚན་གྲངས་དུ་མའི་དངོས་པོ་བསྟབས། དེ་འཕྲོས་རྟ་ལུག་གཉིས་མཚམས་ནས། སྡེ་གླིང་གཉིས་པོ་ནང་འཁྲུག་ཚབས་ཆེན་བྱུང་བས། ཞེ་རྫོགས་གཉིས་སྡེ་གླིང་བར་གྱི་དགོན་སྡེ་ཡིན་པས། བརྗོད་གཞི་རྣམས་སྣེ་ཐུག་པ་དང་། འཇགས་མཚམས་འོང་དུ་རེ་ནས་བྱོན་བཞུགས་སྣ་ཚོགས་ཀྱིས་ཐུགས་ཁུར་དུ་མས་བྲེལ། གྲུ་ཟམ་འདི་སངས་རྒྱས་སྣ་ཚོགས་སྤྲུལ་སྐུ་རྣམས་ཀྱི་ནང་ནས་རྣོ་ཤོས་ཡིན་བཞིན། རྒྱལ་ཚབ་རྡོ་རྗེ་འཆང་རིན་པོ་ཆེའི་ཐུགས་བསྐྱེད་རྨད་དུ་བྱུང་བའི་སྒོ་ནས། ནམ་ཆུའམ་ཟིང་ཆུར་གྲགས་པའི་ཆུ་
ཆེན་འདི། དབྱར་དུས་མགྲོན་པོ་རྣམས་ལ་བགྲོད་དཀའ་བའི་འཇིགས་པ་དང་། སྤྲང་པོ་མང་པོ་ཆུ་གྲིར་ཤི་བ་ལ་རྗེས་སུ་བརྩེ་བས་ཟམ་ཆེན་གསར་འཛུག་མཛད་པ་ལ། དགེ་བསྙེན་དང་སྡེ་བརྒྱད་ཀྱིས་འཁྲེན་གཟེར་གྱིས། ཐེངས་ཁ་ཤས་ལ་ཆུས་ཁྱེར་ཤོར་སྐབས། རྨོག་གྲུབ་ནམ་མཁའི་མཚན་ཅན་གྱིས་ས་འདུལ་མཛད། སྡེ་བརྒྱད་ལ་བཀའ་ནན་དང་ཟམ་པ་འཛུགས་པའི་ས་དམིགས་འདི་ལེགས་གསུངས་ནས་རྨང་རྡོ་འགའ་ཞིག་ཕྱག་གིས་བཞག་སྟེ། ཕྱིན་ཆད་འདིའི་རྒྱུད་ལ་མ་ཎི་རྡོ་འབུམ་ཞིག་གཞག་ན་ཇི་སྲིད་བར་རྒྱུན་བརྟན་པར་འགྱུར་ཞེས་ལུང་བསྟན་པ། དེ་རྗེས་བཀྲ་ནང་ཨ་གྲོ་ཚང་གིས་པད་སྤུངས་ཤིག་བཞེངས་པ་ཟམ་པའི་ཉེ་རྩར་བཞག་ན་ལེགས་ཞེས་ཞེ་ཆེན་བླ་བྲང་གིས་བསྙད་ཀྱང་མ་བཞག་པ། ཁོ་རང་ཚང་གིས་བཀྲ་མདར་རང་རྩིག་སོང་བ། དེ་དོན་ཐུགས་ལ་བཅག་ནས་ཟམ་པའི་ཉེ་རྩ་དེར་རྡོ་འབུམ་བཞེངས་པའི་རྨང་གཟའ་སྐར་ཤིས་པ་ལ་བཏིང་ནས་རིམ་པར་བསྒྲུབས་པས། ཡིག་དྲུག་རྡོ་དུང་མང་ཞིག་དང་། གངས་ཅན་ལྗོངས་འདིའི་རིས་མེད་ཀྱི་བསྟན་པ་འཛིན་པའི་སྐྱེས་བུ་རྣམས་ལ་གསོལ་འདེབས་དང་། བསྟན་པ་རྒྱས་བྱེད་ཀྱི་ཚིགས་སུ་བཅད་པ་རྣམས་ལེགས་སྦྱར་དུ་བསྒྲུབས་ནས་སུམ་བིད་ངོ་མཚར་བ་བློ་གསལ་མིག་གི་བདུད་རྩིར་གྱུར་པ་དག་སྒྲུབ་པར་མཛད། མེ་བྱ་ལོ་དགུན་སྟོད་རྫ་རྒྱུད་འབྲུ་ལྡོམ་ལ་བྱོན་ཤུལ་དུ། ཀཿ ཐོག་རྨོག་ཚ་རིན་པོ་ཆེའི་རིགས་དབོན་རིག་འཛིན་འཇིགས་མེད་གླིང་པ་དང་ཐར་རྩེ་ནམ་མཁའ་འཆི་མེད་ཀྱི་སྤྲུལ་པའི་ཟློས་གར་སྐྱེས་ཐོབ་ཀྱི་ཤེས་རབ་ཟླ་བ་འབུམ་ལས་གསལ་བ།
རྟག་གུས་ཀྱི་བརྩོན་འགྲུས་དུས་མཐའི་ཞུགས་ལས་མྱུར་བ། བསྟན་འགྲོའི་ཕན་བདེའི་སྤེལ་བའི་ལྷག་བསམ་དུང་དང་པད་རྩ་ལྟར་དཀར་བ། སྐུ་ན་ཚོད་གཞོན་ཡང་། ཐུགས་ཤེས་བྱ་མཁྱེན་པའི་རྣམ་དཔྱོད་ལྷ་ལམ་ལྟར་ཡངས་པ་༧འཇིགས་མེད་མཁྱེན་བརྩེའི་མྱུ་གུར་འབོད་པ་ཉིད་ཆོས་ཁོ་ནའི་ཆེད་དུ་རྗེ་འདི་ཉིད་ཀྱི་ཞབས་པད་བསྙེན་པའི་ཕྱིར་རི་ཁྲོད་དུ་ཕེབས། རྫ་རྒྱུད་འབྲུ་ལྡོམ་འཁོར་མ་ཐག་ལྷོ་སེང་ཚ་དོན་གྲུབ་བཀྲ་ཤིས་ཞེས་ཤེས་རབ་བརྩོན་འགྲུས་ཕུན་སུམ་ཚོགས་པ་མངའ་བ་དེ་ཡང་སྔོན་ནས་བྱོན་ཏེ་བཞུགས་ཡོད་པ་བཅས་ཁོང་རྣམ་གཉིས་ལ། ཐོག་མར་སྒྲ་དབྱངས་ཅན་མ་དང་། དེ་རྗེས་སྙན་ངག །སྡེབས་སྦྱོར་སོགས་ཞིབ་ཆ་ཕུལ། ཁྱི་ལོ་དགུང་གྲངས་ང་གཉིས་བཞེས་ཐོག་སྤྲུལ་སྐུ་མཁྱེན་བརྩེའི་མྱུ་གུ་ལ། ཀ་ཙན་གཉིས་ཀྱི་རི་མོ་དང་། འགྲེལ་པ་འདོད་འཇོ་བཅས་བསླབས། ཟླ་བ་གསུམ་པའི་ནང་རྫ་དགོན་སར་ཆོས་རྗེ་རིན་པོ་ཆེ་ཞེ་ཆེན་རི་ཁྲོད་དུ་བྱོན། དེ་དང་སྤྲུལ་སྐུ་མཁྱེན་བརྩེའི་མྱུ་གུ་སོགས་སྐལ་ལྡན་གྱི་འདུས་པ་དུ་མ་དང་བཅས་པ་ལ། ཟབ་ལམ་བདེ་གཤེགས་ཀུན་འདུས་ཀྱི་དབང་ལུང་ཁྲིད་བཅས་མཐའ་རྒྱས་དང་། གཙུག་ཏོར་དྲི་མེད་དབང་། གྲུབ་ཆེན་བརྒྱད་ཅུའི་རྗེས་གནང་། ལྔ་པ་རིན་པོ་ཆེའི་དག་སྣང་རྒྱ་ཅན་ཉེར་ལྔའི་དབང་ལུང་ཚང་མ། བཀའ་བརྒྱད་བདེ་འདུས་དབང་ཆེན། སྔགས་སྡེབ་ཀྱི་ཕྱག་ཁྲིད། དྲེགས་འཇོམས་དབང་ལུང་། གཟའ་དང་དུར་ཁྲོད་མ་མོའི་བེ་བུམ་སོགས་ཟླ་བ་གཅིག་ལྷག་ཙམ་ལ་མཛད། དེ་མཚམས་ནས་ཆོས་རྗེ་ཕྱིར་བྱོན།
རྗེ་ཉིད་ཁྲོ་ཤུལ་ནས་གདན་ཞུས་བྱུང་བས་དེར་ཕེབས་ནས་ཟླ་བ་གཅིག་འཁོར། ཚུར་ཕེབས་ནས་ཟླ་བ་དྲུག་པའི་ནང་ལ་སྤྲུལ་སྐུ་མཁྱེན་བརྩེ་དང་བླ་སློབ་ཆབས་ཅིག་དཔལ་སྤུངས་ཚེས་བཅུ་ལ་ཆིབས་སྐྱོད་མཛད། སི་ཏུ་ཆོས་ཀྱི་འབྱུང་གནས་སྐུ་གདུང་མདུན་མཆོད་འབུལ་མར་མེ་སོགས་དང་། སྙན་ཤལ་ཕུལ་ནས་སྨོན་ལམ་དུ་མ་མཛད། ཀརྨ་པ་ཐེག་མཆོག་རྡོ་རྗེ་མཇལ། ལུགས་གཉིས་ཀྱི་གསུང་གླེང་ཞིབ་པར་གནང་། སི་ཏུ་རིན་པོ་ཆེས་སྐབས་དེར་འབུལ་བ་གནང་སྐྱེས་རྒྱ་ཆེར་བསྩལ་བ་སོགས་གཟེངས་བསྟོད། ཟླ་བ་དྲུག་པའི་ནང་དེར་ཚུར་ཕེབས། དེ་སྐབས་ཀརྨ་པ་ཚབ་ཚ་ལ་བྱོན་ལམ་དུ་ཟམ་ཁའི་རྡོ་འབུམ་ལ་ཕྱག་ནས་ཞུས། གསོལ་སྟོན་ཞིབ་ཆ་མཛད་སྐབས། ཁྱོད་རང་ཁམས་དབུས་གཉིས་ན་མཁས་པ་འགྲན་ཟླ་དང་བྲལ་བ་རེད་གསུངས་ནས། མ་ཧཱ་པཎྜི་ཏའི་མཚན་གྱི་ཅོད་པན་བཅིངས། ཟླ་བ་བདུན་པའི་ནང་། སྤྲུལ་སྐུ་མཁྱེན་བརྩེ་སླར་ཡང་བྱོན་པར་སྡོམ་གསུམ་རྣམ་ངེས་ཀྱི་བཤད་པ་དང་། སྒྱུ་འཕྲུལ་ཞི་ཁྲོའི་དབང་སྔོན་དུ་འགྲོ་བས། རྒྱུད་རྒྱལ་གསང་བའི་སྙིང་པོའི་སྤྱི་དོན་འབྲུ་འགྲེལ་བཅས་དང་། གཞན་རྒྱུད་འགྲེལ་ཕྱོགས་བཅུའི་མུན་སེལ། དཀོན་མཆོག་འགྲེལ། སྒྲོལ་གཡུང་གཉིས། སྨན་ཊཱིཀ་སོགས་ལུང་གང་བཞུགས་ཐམས་ཅད་གནང་། ཕྲན་ཡང་དེ་སྐབས་ཞིག་ལ་སྐུ་རྩར་བཅར་ནས་སྒྲ་དབྱངས་ཅན་མ་ཞིག་སྦྱང་རློམ་བྱས།
འཇམ་དབྱངས་མཁྱེན་བརྩེ་དབང་པོ་ལ་ཀུན་ཤེས་ཀྱི་མཚན་གནང་བ།
སྤྲུལ་སྐུ་མཁྱེན་བརྩེར་མདོ་མགོན་ལེགས་ལྡན་ལྗང་ནག་གཙང་ཤོད་པའི་ཡིག་ཆའི་སྟེང་ནས་དབང་ལུང་མཛད། དེ་དང་མཉམ་དུ་བུ་འདི་དང་ལུས་དང་གྲིབ་མ་ལྟར་མི་འབྲལ་བར་འགྲོགས་པ་དང་། ཅི་བསྒོ་བའི་ཕྲིན་ལས་ཐོགས་མེད་དུ་སྒྲུབ་དགོས་པའི་བཅོལ་དམ་དྲག་པོ་མཛད། ཚུལ་དེས་སྲུང་མས་ཕྲིན་ལས་མངོན་སུམ་དུ་སྒྲུབ་པ་རྒྱུ་མཚན་དུ་གཟིགས་ནས། ཞབས་དྲུང་རྡོ་རྗེ་འཆང་དང་། གཏེར་ཆེན་མཆོག་གྱུར་གླིང་པས་རྟེན་འབྲེལ་གྱི་སྒོ་འཕར་ཕྱེ་སྟེ་དཔལ་ཡུལ་རྣམ་རྒྱལ་བྱང་ཆུབ་གླིང་དུ་སྔ་འགྱུར་བཀའ་མའི་སྒྲུབ་ཕྲིན་ཡོད་དོ་ཅོག་གི་སྒྲུབ་མཆོད་གསར་འཛུགས་མཛད་ཚེ། དཔལ་ཡུལ་རྒྱ་སྤྲུལ་མདོ་སྔགས་བསྟན་འཛིན་ལ་བཀའ་མའི་དབང་ལུང་ཡོངས་རྫོགས་གནང་བའི་མཐའ་རྟེན་དུ་ལེགས་ལྡན་གྱི་དབང་མཛད་དེ་བརྒྱུད་པའི་མཚན་གཤར་དང་། ཁྱད་པར་དུ་རྡོ་རྗེ་འཆང་དངོས་འགྱུར་མེད་བསྟན་འཛིན་འཕེལ་རྒྱས་ཀྱིས་བཀའ་བསྒོས་པ་བཞིན་བུ་འདིའི་ལུས་དང་གྲིབ་ལྟར་འགྲོགས་ནས་སྔ་འགྱུར་གྱི་བསྟན་པའི་རྒྱལ་མཚན་མཆོག་ཏུ་བསྒྲེང་བའི་ཕྲིན་ལས་མཛོད་ཅིག་ཅེས་བཅོལ། དེ་དུས་དབང་གྲལ་དུ་སྐུ་ཞབས་དགེ་མང་མཆོག་སྤྲུལ་སོགས་འདུས་པ་མང་ཞིག་ཡོད་པ་དང་། ཁོ་བོས་མཆོད་གཡོག་བྱས་པས་མངོན་སུམ་ཚད་མས་མྱོང་བ་ཡིན། རྒྱུ་མཚན་དེའི་ཕྱིར། བསྟན་འཛིན་གྱི་སྐྱེས་བུ་དང་། བསྟན་པ་སྲུང་བའི་ཆོས་སྐྱོང་ཟེར་བ་དེ་འདི་འདྲ་ཞིག་ལ་མཚན་གཞི་ཆགས་པ་རེད་སྙམ་པ་བྱུང་།
༈ བརྡའ་སྤྲོད་ཀུན་བཤད་ཀྱི་མཚན་དུ། ཐོས་བསམ་སྒོམ་པའི་ལུས་སྟོབས་ཡོངས་སུ་རྒྱས་ཤིང་འཆད་རྩོད་རྩོམ་པའི་སྒྲ་ཆེན་གྱིས་ལོག་སྨྲ་རི་དྭགས་མཐའ་དག་ཞུམ་པར་མཛད་ཅིང་། མཁྱེན་བརྩེ་ནུས་པའི་གཡུ་རལ་གྱི་ཁུར་ཆེན་རྣམ་པར་བརྗིད་པའི་གདོང་ལྔའི་དབང་པོ་ཐུབ་བསྟན་གངས་རིའི་རྒྱན་དུ་ཅིར་ཡང་མཛེས་པའི་ཆེད་དུ་བརྗོད་པ་ནི། ༡ ཚང༷ས་སྲས༷་མཚོ་བྱུང་ལྷ་མོ་ཉིད། །དགྱེས༷་པ༷འི་གར་གྱིས་སྙིང་ལ་སིམ། །བློ་༷ལྡན༷་གདོང༷་དྲུག༷་ལང༷་ཚོ་༷འཛིན། །བརྟན་པའི་འཁོར་ལོ་ཁྱོད་མིན་སུ། །༢ ཚོགས་གཉིས་རིན་ཆེན་འབྱུང་གནས་བསྲུབས་སྐྱེས་ལས། །ཉེར་ཐོན་མཚན་དཔེའི་གཟུགས་སྐུ་སྲིད་པའི་མིག ། ཕར་ཕྱིན་བཅུ་ཡི་ཆོ་གའི་འོད་སྟོང་གིས། །མཛེས་བསྒྲུབ་སྲིད་ཞིའི་མཁའ་ལ་རྒྱལ་གྱུར་ཅིག ། ༣ འདི་ན་སྔར་མེད་ཟླ་བ་གསར་པའི་འཛུམ། །ལྔ་རིག་ཆ་ཤས་ཡོངས་རྫོགས་བྲི་གང་བྲལ། །འཆད་རྩོད་རྩོམ་པའི་བསིལ་ཟེར་སྤྲོ་བ་གང་། །
རྒྱལ་བསྟན་གྲོང་གསུམ་མཐར་གྱི་གཙུག་ན་བཀྲ། །༤གངྒཱ་ལྟོ་བར་བསྐྱིལ་ཞེས་ཛཧྦུ། །སྙེམས་པར་མི་འཚལ་ལུང་རྟོགས་ཤེས་བྱའི་མཚོ། །རྣམ་འདྲེན་གང་གི་མཁྱེན་དཔྱོད་ཡོལ་གོ་རུ། །མ་བཟུང་མེད་པའི་ངོ་མཚར་འདི་ཡིས་ཀྱང་། །༥ ཀུན་མཁྱེན་གོ་སར་བསླབ་གསུམ་རྒྱན་བཀླུབས་སྐུའི། །ལང་ཚོ་འདྲེན་བྱེད་བདུད་རྩིར་ཆགས་པའི་རོས། །སྙིགས་འགྲོ་གདུལ་བ་རྣམ་བཞིའི་དང་པོ་ཡི། །གདུལ་བྱར་མ་གྱུར་གཏམ་གྱི་རྫུན་རིས་ཡལ། །༦འཆད་པ་རྡོ་རྗེའི་ལྗགས་ཀྱི་འཇུག་པ་བརྒྱས། །མདོ་སྔགས་ཟབ་གནད་འགྲོལ་བྱེད་དབྱར་གྱི་རྔ། །བརྡུང་དེས་སྲིད་པ་ཧྲུལ་བྱེད་ལྟས་བཅོ་ལྔ། །མི་འཇིགས་འོད་སྲུང་བྱིན་འདི་ཅི་ཡིས་བརླིང་། །༧ཡུད་རེར་ཏིང་འཛིན་བྱེ་བའི་སྤྲོ་བསྡུ་ལ། །
མཁའ་ཁྱབ་སྐྱོབ་པའི་ཐུགས་གསང་བཀྲ་བའི་ཚོན། །རྣམ་དཔྱོད་ཀཱ་ཤི་སྐྱོན་སྤངས་དྭངས་པའི་ངོས། །བཀྲ་ལ་སྲས་བཅས་རྒྱལ་རྣམས་གཟིགས་མོར་འབྱམས། །༨ཁྱོད་ཀྱི་རྣམ་ཐར་ལི་ཤི་དར་དྲགས་དྲིས། །རབ་བགོས་པུཥྤེའི་ཚལ་ནས་ཅུང་ཟད་ཙམ། །འཐོར་བའི་བསྟོད་དབྱངས་དབྱར་གྱི་དཔལ་མོ་གང་། །བདག་བློ་འཁྱུད་པའི་བསོད་ནམས་ལྷུན་པོར་འཁུ། །༩ མ་འདྲིས་བརྩེ་བའི་དགྱེས་ཞལ་ཟླ་བ་གསར། །སྐྱེ་དགུའི་སྙིང་ལ་འཇོ་བས་ཉེས་བརྒྱའི་མུན། །བཅིལ་བའི་ནགས་ཀླུང་བསྡུ་བཞིའི་བཟང་པོ་དྲུག ། ཡོངས་སྨིན་དོན་གཉིས་ནོར་བུས་འབྱོར་བར་མཛོད། །ཅེས་ལུང་དང་རྟོགས་པའི་མཛོད་འཛིན་མཁྱེན་རབ་རྨད་བྱུང་རྣམ་འདྲེན་རྗེ་དབོན་བླ་མ་འཇིགས་མེད་མཁྱེན་བརྩེའི་མྱུ་གུ། རང་ཉིད་ནས་ཕྱི་ནང་རིག་པའི་གནས་ལ་གསན་བསམ་ཕུལ་བྱུང་གྲུབ་པར་བརྡའ་སྤྲོད་ཀུན་བཤད་ཀྱི་མཚན་དུ། ཚང༵ས་སྲས༵་དགྱེས༵་པ༵འི་བློ་༷ལྡན༵་གདོང༵་དྲུག༵་དག༵འ་བ༵འི་ལ༵ང་ཚོ༵་ཞེས་པའི་མཚན་འབུལ་བསྟོད་བསྔགས་བཅས། ཆོས་རྗེ་ཐམས་ཅད་མཁྱེན་དངོས་ཀཿ ཐོག་
པའི་སློབ་འབངས་ཤཱཀྱའི་དགེ་སློང་ལྔ་རིགས་པ་འགྱུར་མེད་མཐུ་སྟོབས་རྣམ་རྒྱལ་གྱིས་དབེན་རི་བདེ་ཆེན་པདྨ་འོད་ནས་ཆེད་དུ་བརྗོད་པ་ཛ་ཡནྟུ། དེ་ལྟར་སྨོན་ཚིག་བརྟན་བཞུགས་བཅས་ཀྱིས་ཤིས་པར་བརྗོད་པའི་མེ་ཏོག་ཆར་དུ་བསྙིལ་བས། ཤེས་བྱའི་གནས་ལ་ཆགས་ཐོགས་མེད་པའི་བློ་གྲོས་ཀྱི་མཐུ་ཐོབ་སྟེ་ཁྱུང་ཕྲུག་སྒོང་རྒྱ་བརྟོལ་བ་བཞིན་རང་ཡུལ་དུ་ཆིབས་བསྐྱོད་གནང་། སྙིང་པོའི་བསྟན་པ་ལ་ཕན་ཐོགས་འབྱུང་ཚུལ་ཕྱི་མཐའ་གཟིགས་པའི་ལུང་བསྟན་བསྩལ་བ་ལྟར་ཕྱིས་དཔལ་ཀརྨ་པ་དང་། འཇམ་མགོན་ཀོང་སྤྲུལ་རིན་པོ་ཆེ། གཏེར་ཆེན་མཆོག་གྱུར་གླིང་པ། ལི་ཐང་དགེ་བཤེས་བྱམས་པ་ཕུན་ཚོགས། ཧོར་ཁང་སར་རྒྱལ་བའི་ཡང་སྲིད་རིན་པོ་ཆེ་སོགས་བསྟན་འཛིན་ཆེན་པོ་དུ་མར་སྒྱུ་འཕྲུལ་གྱི་དབང་དང་། རྒྱུད་ཀྱི་བཤད་བཀའ་སོགས་ལན་གྲངས་བསྩལ་བ་དང་། སྒྲོལ་གཡུང་སོགས་ཀྱི་རྒྱུད་འགྲེལ་ལུང་རྒྱུན་ཉག་ཕྲ་བ་རྣམས་ཀྱང་སྐྱེས་ཆེན་དུ་མ་ལ་སྤེལ་བས་ལུང་དོན་མངོན་དུ་གྱུར། སླད་ནས་ཀྱང་རྗེ་འདི་ལ་སངས་རྒྱས་དངོས་སུ་མཐོང་བའི་དད་པ་བརྟན་པོ་ཡོད་པས། དེ་ལྟ་བུའི་ཚུལ་གྱི་གསོལ་འདེབས་ཤིག་དགོས་ཞེས་ཆེད་དུ་བསྐུལ་མ་ཕེབས་པའི་ངོར་གསུང་བ་ནི། མི་འགྱུར༵་འཕོ་མེད༵་བདེ་བ་ཆེན་པོའི་ཐུགས། །མཐུ༵་ནུས་བརྩེ་དང་མཁྱེན་པའི་སྟོབ༵ས་ཀྱིས་འབྱོར། །གཟུགས་སྐུའི་གསང་གསུམ་རྣམ༵་ཐར་བསྐལ་བརྒྱའི་བར། །
ཞབས་བརྟན་བདུད་བཞིའི་གཡུལ་ལས་རྒྱ༵ལ་གྱུར་ཅིག ། འདི་ནས་བྱང་ཆུབ་བར་དུ་མགོན་པོ་མཆོག ། བརྟན་པའི་འཁོར་ལོའི་རྣམ་པར་སྙིང་གི་དབུས། །རྟག་པར་གོམས་ལས་དོན་བརྒྱུད་བྱིན་རླབས་གཏེར། །མཆོག་ཐུན་དངོས་གྲུབ་སྩོལ་བས་རྗེས་བཟུང་མཛོད། །ཅེས་པའང་རང་སློབ་ལྔ་རིག་སྨྲ་བའི་དབང་ཕྱུག་རྡོ་རྗེ་འཛིན་པ་འཇིགས་མེད་མཁྱེན་བརྩེའི་མྱུ་གུས་རྒྱང་རིང་མོ་ནས་བསྐུལ་ངོར། ཤཱཀྱའི་དགེ་སློང་ཞེ་ཆེན་པ་འགྱུར་མེད་མཐུ་སྟོབས་རྣམ་པར་རྒྱལ་བས་མྱུར་བྲིས་སུ་སྤེལ་བ་དགེ །ཞེས་གསུངས་པས། བླ་མ་སངས་རྒྱས་སུ་མཐོང་ན་སངས་རྒྱས་དངོས་ཀྱི་བྱིན་རླབས་འཇུག་ཟེར་བ་དང་། འདིའི་ཚིག་དོན་ཇི་ལྟ་བ་དོན་བརྒྱུད་ཀྱི་བྱིན་རླབས་དངོས་སུ་འཕོས་པས་སྔར་གྱི་འཕགས་བོད་ཀྱི་གྲུབ་ཐོབ་རྣམས་ཀྱི་བླ་སློབ་ཀྱི་རྟེན་འབྲེལ་ཇི་ལྟ་བ་བཞིན་མངོན་དུ་གྱུར་པ་འདིའོ། །དེ་ནས་རྗེ་ཉིད་དགུན་དེར་སྐུ་མཚམས་མཛད། ས་ཕག་དགུང་གྲངས་ང་གསུམ་བཞེས་པའི་ཐོག་ཟླ་བ་གཉིས་པའི་ནང་རི་ཁྲོད་དུ་རྫོགས་ཆེན་རིན་པོ་ཆེ་གདན་འདྲེན་ཞུས་ནས། ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ཆོ་གས་གཤིན་གསོན་འབྲེལ་ཐོགས་རྗེས་སུ་འཛིན་པ་དང་། ལྟོས་བཅས་དགོན་ཡུལ་ཚང་མ་དབང་གིས་སྨིན་པར་མཛད། རྒྱ་དངུལ་རྡིལ་ཚད་ཀྱིས་མཚོན་པའི་བརྒྱ་འབུལ་ཞིག་ཕུལ། འབུལ་བའི་རྣམ་བཤད་རྗེ་ཉིད་ཀྱིས་མཛད་དེ་ལུགས་གཉིས་ཀྱི་གཏམ་ཡ་
རབས་སྐྱེ་བོའི་རྣ་བའི་བཅུད་ལེན་དུ་གྱུར་པ་གནང་སྐབས། ངེད་རང་ལ་སྤྲུལ་སྐུ་འབྱུང་རེ་གཏན་ནས་མེད་ཀྱང་། གལ་སྲིད་མི་ལུས་ཞིག་ཐོབ་རྒྱུ་བྱུང་ན། སྨོན་ལམ་ལན་གྲངས་བཏབ་པའི་བདེན་མཐུ་འབྱུང་སྲིད་ན། སྨིན་གྲོལ་གླིང་གི་ཉེ་འདབས་འདྲར་སྐྱེ་སྲིད་དམ་སྙམ། འདི་ཕྱོགས་སྤྲུལ་སྐུ་ཐམས་ཅད་རིན་པོ་ཆེ་ཉིད་ཀྱིས་ཐུགས་ཐག་བཅད་རྒྱུ་རེད་འདུག་པས་དེ་དོན་ཐུགས་ལ་བཞག་དགོས་གསུངས་ནས། ཞེ་རྫོགས་དགོན་ཡུལ་གྱི་མི་མང་འདུས་པ་ནས་ནན་ཞུས་ཕུལ་བ། སླད་ནས་རྫོགས་ཆེན་རིན་པོ་ཆེས་གྲྭ་ནང་དུ་སྨིན་གླིང་གྲྭ་པ་པདྨ་བློ་གྲོས་ཞེས་པར་སྐྱེ་བ་བཞེས་ཚུལ་གྱི་གསུང་ཤོག་དམ་འབྱར་གནང་བ་ད་ལྟ་རྟེན་སྒམ་དུ་ཡོད་འདུག་པ་འདི་ཡིན། དེའི་དབྱར་ཐོག་ཚེས་བཅུའི་རྒྱབ། རབ་འབྱམས་ཚང་ནས་ཁོང་རི་ཁྲོད་ལ་མ་བཞུགས་ཐབས་མེད་ལགས། ཁྱེད་རང་དགོན་ཆེན་སོགས་གར་བདེ་ཞིག་ལ་སྤོ་དགོས་གསུངས་ནས་རྒྱ་དངུལ་སྲང་བཅུ་གནང་སྟེ་བཀའ་ལྡོག་མེད་ལྟ་བུ་ཕེབས། དེ་སྐབས་ལར་རྗེ་ཉིད་ཀྱི་ཐུགས་དགོངས་ལ། ཁོང་བ་སྨིན་གླིང་ནས་ཕྱིར་འཁོར་ནས་རི་ཁྲོད་འདིར་གནས་འཇགས་པ། ད་མི་ཤི་ཁ་གནས་གཞན་དུ་སྤོ་འཇོག་དགོས་གསུངས་པ་ཅུང་ཞིག་འོས་བབ་མི་འདུག་ན་ཡང་། ད་དོན་དུ་ཁེ་དང་རྒྱལ་ཁ་མི་ལ་བསྐུར། གྱོང་དང་བུབ་ཁ་རང་གིས་ལེན་རྒྱུ་འདི་ཆོས་པ་སྤྱིའི་ལུགས་ཡིན་པ་དང་། མ་ཟད་ཁོང་བསྟན་པའི་བདག་པོ་ཡང་ཡིན་པས་ལགས་སོ་ཞུ་བ་ལས་ཐབས་མེད་གསུངས། གྲྭ་པ་རྣམས་ཀྱིས་འོ་ན་འདིར་སྡོད་མ་ཆོག་ན་དགོན་སྡེ་གཞན་ཞིག་ལ་རིང་འགྲོ་བྱ་བ་འཐད་ཞུས་པར། དེ་འདྲ་ཡང་
ཆོག་ད་ལོས་ཆོག་སྟེ། ཕྲན་བླ་མའི་གདན་ས་འདིར་ཞེན་ཆེ་བས་བློས་སྤོབས་པ་མི་འདུག་གསུང་། ཕྲན་ཡང་དེ་སྐབས་སྐུ་རྩར་བསྙེན་ནས་སྒྲ་ཀཱ་ལ་པའི་རི་མོ་ཞིག་སྦྱོང་རྩོལ་བྱས་ཀྱང་། ལྷ་འཁྲུག་ལྟ་བུས་རི་ཁྲོད་ཀྱི་བླ་རྒན་འགའ་བསྙུན་པ་དང་འདས་གྲོང་སོང་། ཕྲན་ཡང་དེ་མཉམ་རིམས་ནད་ལྟ་བུས་ན་ནས་རང་ཁྱིམ་དུ་འོང་དགོས་བྱུང་། དེ་ནས་ཞེ་ཆེན་དགོན་སྟོད་དུ་བླ་མ་འཇིགས་མེད་བློ་གསལ་གཤེགས་པའི་ཁང་ཧྲལ་ཞིག་ཡོད་པ་ཉམས་གསོས་ཕྲན་བུ་བྱས་ནས། མིང་དགོན་སྟོད་ནོར་བུ་རྩེ་ཞེས་པ་བཏགས། ཟླ་བ་དགུ་པའི་ནང་ལ་ཕྱིར་སྤོས་ནས་གདན་འཇགས་པར་མཛད་དེ་བརྗོད་གཞི་སོགས་སྣེ་གཅིག་མེད་པར། དགེ་འདུན་མཐུན་པ་བདེ་བ་སྟེ། །མཐུན་པར་རྣམས་ཀྱི་དཀའ་ཐུབ་བདེ། །ཞེའམ། བྱ་བ་དེ་དག་གི་འགྲོ་ཡུལ་ཐོག་མཐའ་བར་གསུམ་ལ་མི་རང་གང་ཐད་ནས་དཔྱད་ན། ཇི་སྐད་དུ། བདུད་རྩི་ཆུ་ཡི་བསྟན་བཅོས་ལས། མཁས་པ་ཀུན་ལ་སྙོམས་ལྡན་ཞིང་། །ཕྱོགས་རེའི་མིག་ཅན་ཆགས་སྡང་ཆེ། །བུམ་པ་གང་བ་ཁུར་བ་སླ། །ཕྱེད་ཙམ་གང་བ་ཡོ་འཁྱོལ་མང་། །ཞེས་གསུངས་པ་ལྟར་དམ་པའི་རྣམ་ཐར་གཙང་མར་བསྐྱངས། དེ་མ་ཐག་ཕྱོགས་ཀྱི་དད་འདུས་རིགས་ལ། འཆད་རྩོད་རྩོམ་པའི་མཛད་པ་སྔ་མ་ལྟར་ལས་ཉམས་རྒུད་ཅི་ཡང་མ་བྱུང་བའི་ཚུལ་ཡང་། སྔ་མ་ལས། དམ་པ་མཐོ་དམན་འབྱོར་རྒུད་སོགས། །ཅིས་ཀྱང་རང་བཞིན་མི་འགྱུར་ཏེ། །ཆུ་བོ་བསིལ་ལམ་ཚ་ཡང་རུང་། །རླན་གྱི་རང་བཞིན་ག་ལ་འདོར། །ཞེས་དང་། ཆེན་པོ་རེ་ཞིག་རྒུད་ན་ཡང་། །སླད་ནས་གཟི་བྱིན་འབར་བར་འགྱུར། །འཁྱག་གི་སྦུབས་སུ་ཆུད་པའི་
མཚོ། །སོས་ཀ་རིམ་གྱིས་འཕྱུར་ནས་འོང་། །ཞེས་གསུངས་པ་ལྟར་རོ། །ལྕགས་བྱིའི་དབྱར་ཐོག་ཟླ་གྲ་ལག་དགོན་མདོ་སྔགས་བཤད་སྒྲུབ་གླིང་དུ་བྱོན། སྐྱབས་རྗེ་དགེ་རྩེ་རིན་པོ་ཆེ་སྐུ་སྔོན་མའི་ཡབ་གཞིའི་དགེ་རྩེ་དཔོན་ཚང་ལ། སྐྱབས་མགོན་ཐམས་ཅད་མཁྱེན་པ་དགེ་རྩེ་རིན་པོ་ཆེའི་ཡང་སྲིད་ཅིག་འཁྲུངས་པ་དེ་ལ་ན་བཟའ་གསོལ་བ་སོགས་མཛད། ཡབ་ཚང་གིས་རྟ་ཆིབས་པ་འགྲོས་ལྡན་གྱིས་མཚོན་པའི་བསྙེན་བཀུར་གཟབ་པར་ཕུལ། རྡ་ཁོག་གི་སྒར་པ་མཐོང་ས་ཞིག་ཏུ། གཞི་ཆེན་བླ་མ་བསོད་ནམས་དཔལ་ལྡན་ཡང་ཕེབས་ཡོད་པར་དང་པོ་སུ་ཡིན་མ་ཤེས་པར། ཞེ་ཆེན་པས་ནུབ་མོ་སྒར་ཐོག་ནས་གསོལ་ཀ་བཏང་སྟེ་རྒྱལ་པོ་དགུ་བརྡུང་རོལ་མོའི་སྐབས། རྒྱལ་པོ་དངོས་སུ་བྱོན་པའི་རྟགས་མཚན་མཐོང་བས། དེ་མ་ཐག་གཞི་ཆེན་སྒར་ནས་རྩད་གཅོད་པར་གྲྭ་ཞིག་བཏང་བྱུང་བས། དེས་ཞེ་ཆེན་དབོན་སྤྲུལ་རེད་ཚུལ་ཞུས་པས། གཞི་ཆེན་ཚང་གིས་སྟག་རྩེ་དགོན་དུ་གདན་འདྲེན་ཞུས་ནས་རྟེན་གསུམ་རྣམས་ལ་རབ་གནས་དང་། དབང་ལུང་འབུལ་ལེན་མང་དུ་མཛད་ནས་ཐུགས་དགོངས་གཅིག་འདྲེས་ལྟ་བུར་གྱུར་ཏེ། དེ་ནས་རྡ་བསེར་བྱང་ཁག་རྣམས་བརྒྱུད་ནས་དབུ་ཐོན་ལེགས་ལམ་གྱིས་དགོན་དུ་གདན་འཇགས་གནང་། ལྕགས་གླང་སྟོན་ཁ་ཡིན་སྙམ་ལ། གཙང་མདའ་སྤྲུལ་དབོན་རྣམས་དཔལ་ཡུལ་དུ་བྱོན་ནས། ཚེས་བཅུའི་གར་འཆམ་གསར་དུ་བསླབ་སྟེ་ཚུར་ལམ་ཞེ་ཆེན་དུ་བྱོན་ནས། དགོན་སྟོད་ནོར་བུ་རྩེའི་གཟིམས་ཤག་ཏུ། རྗེ་འདི་ཉིད་ཀྱི་མདུན་
ནས། རྙིང་མ་རྒྱུད་འབུམ་དཀར་ཆག་བཅས་ཀྱི་ལུང་དང་། བཀའ་བརྒྱད་གསང་རྫོགས་ཀྱི་དབང་ཆེན་པོད་ལུང་རྣམས་དང་། གཞན་ཡང་དབང་ལུང་མང་ཞིག་ཉིན་མཚན་ཁ་སྦྲེལ་མཛད་ནས་གསན། ཚུར་ཡང་གནམ་ཆོས་སྐོར་མང་ཞིག་གསན་བཞེས་མཛད། དེ་སྐོར་ཕྲན་ཡང་སྐུ་རྩར་ཡོད། ཆུ་སྟག་དགུང་གྲངས་ང་དྲུག་སྟེང་ཕུག་ཁང་དུ་ཕེབས་ནས་བླ་སྤྲུལ་དགོན་པ་བྱིངས་ལ་དབང་ལུང་དང་། དགོན་དེའི་ཉམས་གཟིགས་གང་དགོས་གནང་། དེའི་དབྱར་ཐོག་རྫོགས་ཆེན་དགོན་དུ་བྱོན་ནས་དབྱར་གནས་ལ་བཞུགས། གནས་ཚང་སྔར་ནས་ཁོ་བ་བླ་སློབ་ནང་གཤིན་བཟང་རྩེད་འགྱུར་མེད་ཡིད་བཞིན་ཨཿ ཤར་བླ་མ་ཚང་སར་བཞུགས། ས་གཡོས་ཀྱི་སྔ་ལྟས་ལ་གཟིམས་ལམ་དང་ཉམས་སྣང་འཚུབས་པས། དབྱར་གནས་པ་ལ་མདོ་དགུ་བཟློག་དང་། གནོད་པ་ཟློག་པའི་གསོ་སྦྱོང་ཆ་གསུམ་བཅས་དགོས་ཚུལ་ལན་གྲངས་གསུངས་བཞིན་བསྒྲུབས། ཨ་ཤར་གྱི་ཁྱིམ་དུ་བྱེས་ཐོན་གྱི་བླ་གྲྭ་འགའ་ཞིག་གིས་གཅོད་དབང་ནམ་མཁའ་སྒོ་འབྱེད་ཅིག་ཞུས་པའི་དབང་བཤད་སྐབས་འཁོར་འདས་ཀྱི་ཆོས་ཐམས་ཅད་དང་། ཁྱད་པར་དུ་གནོད་བྱ་གནོད་བྱེད་གཉིས་གཟུགས་བརྙན་གྱི་དཔེས་ངོ་སྤྲོད་ཚིག་ཉུང་དོན་ཟབ་ཁྱད་དུ་འཕགས་པ་གནང་བ་དེའི་དུས་ཕྲན་ཡང་ཡོད་པ། ཕྱིས་ནས་དབུ་ཕར་གྱི་གཞུང་ལ་སྦྱོང་ཁུལ་བྱས་ཚེ་སྣང་བ་རྣམ་བདུན་གྱི་སྐབས་སོགས་ཀྱི་བཤད་པ་རྣམས་ཀྱི་གནད་འགག་གཅིག་ཏུ་འདུས་པ་ལྟ་བུ་འདུག་པས་ཕྲན་ནས་ངེས་ཤེས་ལྷག་པར་ཐོབ། དབྱར་གྲོལ་འཕྲལ་ཕྱིར་ཕེབས།
ཟླ་བ་དགུ་པའི་ཚེས་དྲུག་ལ་རྫོགས་ཆེན་དགོན་པ་ས་གཡོས་ཀྱི་འཇིགས་པ་ཆེན་པོས་བླ་རབས་བཞིའི་རིང་གི་རྟེན་བཞེངས་རྣམས་ཐལ་བར་བརླག་པ་དང་། བླ་གྲྭ་བརྒྱ་དང་བདུན་ཙམ་ལྔ་ལམ་དུ་བཏང་སྟེ་ཤིན་ཏུ་ཉམས་ཉེས་པར་གྱུར། ཞག་བདུན་བརྒྱད་མཚམས་ནས་རྗེ་ཉིད་ཡར་རྫོགས་ཆེན་དགོན་དུ་ཕེབས། དཔོན་སློབ་མཆོག་སྤྲུལ་གཙོས་ཀུན་ལ་མ་ལེགས་འབུལ་བ་དང་། གསུང་མཛད་ནང་ལུགས་སྣ་ཚོགས་གནང་། ཁྱད་པར་སྔར་ལོ་ཞིག་ཁྲོ་ཤུལ་ནང་ལ་བྱོན་སྐབས། གོ་ཆ་བླ་བྲང་གི་བུམ་སྒྲུབ་དབུ་བཞུགས་མཛད་པ་ལ་འབུལ་བ་བརྒྱ་དངུལ་རྡིལ་ཚད་ཞིག་དང་། སྔར་གོ་ཆ་གོང་མ་ས་སྐྱའི་དབུ་བླར་ཕེབས་པའི་ཚེ་ས་སྐྱའི་ནང་མཛོད་ནས་བྱུང་བའི་ཧོར་སྦུབ་རྒྱུ་བཟང་ཞིང་སྐད་ཆེ་སྙན་ཅན་ཆེ་ཆུང་འཚམས་པ་རྙེད་དཀའ་བའི་དངོས་རྫས་གྱ་ནོམ་པ་དེ་གཉིས་འདམ་ཁ་གཏད་པས། རྗེ་ཉིད་ཀྱིས་རྒྱ་དངུལ་ནམ་ཡང་ལོན། འདི་འདྲ་ད་རེས་བས་ལག་ཕོག་ཕར་ཞོག་མིག་མཐོང་ཡང་དཀའ་གསུངས་ནས་སྦུབ་ཆོལ་བཞེས་རྒྱུ་མཛད། གྲྭ་པ་རྣམས་ཀྱིས་ཉིད་ལྷ་ཆ་ལ་དགའ་བའི་ཤུགས་མ་གཏོགས། རྒྱ་དངུལ་རྡིལ་ཚད་ཀྱི་དོད་ཐུབ་རང་ཨེ་འོང་ན་ཞུས་པས། དེང་སང་དུས་ཀྱིས་ཅ་ལག་གང་བཟང་ལ་རིན་ཐང་མེད་པ་རེད་མ་གཏོགས། འདི་ལ་ཐ་ན་ཡང་གསེར་རྡིལ་ཚད་ཞིག་རི་ངེས་ཡིན་གསུངས་ནས་དགྱེས་བཞིན་བཞེས། དེ་ཉིད་རྫོགས་ཆེན་བླ་བྲང་ལ་ཐུགས་གསོས་སུ་ཕུལ་ཏེ། མིང་ལ་མཐུ་སྟོབས་འབྲུག་སྒྲ་ཐོགས་གསུངས། ད་ལྟ་བླ་བྲང་གི་ནང་མཛོད་གཅེས་དགུའི་གྲལ་ན་ཡོད་
པ་འདི་ཡིན། དེ་ནས་ཕྱིར་བྱོན་ནས་ཟླ་བ་བཅུ་པའི་ནང་ལ་དགོན་སར་ཆོས་རྗེས་གདན་ཞུས་བྱུང་བས་དེར་ཕེབས། རྒྱལ་བའི་བཀའ་འགྱུར་རིན་པོ་ཆེ་དང་། བསྟན་འགྱུར་རྒྱུན་བཞུགས་རིགས་ཀྱི་ལུང་དང་། རྙིང་ལུགས་བཀའ་གཏེར་གྱི་དབང་ལུང་མང་ཞིག་ཀྱང་ཕུལ། རྟ་མགྲིན་ཡང་གསང་ལ་ལྗགས་སྒྲིགས་དགོས་གསུངས། ཆོས་རྗེ་རིན་པོ་ཆེའི་བཀའ་གནང་ལྟར་མཛད་ནས། དེ་ལ་རྙིང་ལུགས་ཀྱི་སྒྲུབ་ཕྲིན་ཕྱག་བཞེས་དང་འབྲེལ་བའི་ཚུལ་ཆོས་རྗེ་ལ་བསླབ་པའི་ཞར་ལ་སྒྲུབ་གཞུང་སྲུང་བཟློག་བསད་པའི་ལས་རྣམས་མཐར་ཆགས་སུ་བཏང་། ཚུར་ལ་རྗེ་རིན་པོ་ཆེ་བློ་བཟང་གྲགས་པའི་བཀའ་འབུམ་ཡོངས་རྫོགས་དང་། ཐུའུ་ཀྭན་བཀའ་འབུམ་ལས་ཁ་ཤས་སོགས་དབང་ལུང་དུ་མ་གསན། ད་ལྟ་ཧོར་གྱི་དགོན་སྡེ་རྣམས་ལ་རྒྱལ་བཀའ་ཞེ་རྫོགས་ཀྱི་བརྒྱུད་པ་ཅན་གྱི་ལུང་རྒྱུན་ཡོད་རྒྱུ་དེ་ཡིན། དེ་ནས་དབྱར་སྟོད་ཚེས་བཅུའི་གདོང་ལ་ཡར་ཕེབས། དེ་སྐོར་ཞིག་ནས་ཕུག་ཁང་དགེ་རྩེ་བླ་མ་འགྱུར་མེད་སྟོབས་རྒྱས་དང་། ཚ་བོ་པདྨ་རྒྱལ་མཚན་གཉིས་སྐུ་རྩར་བཅར་ནས་སྒྲ་དབྱངས་ཅན་མ་དང་། ཀ་ལཱ་པ་གཉིས། སྙན་ངག་སྡེབ་སྦྱོར། སྡོམ་གསུམ་གྱི་བཤད་པ། རྒྱུད་བཤད། དབང་ལུང་། གདམས་ཁྲིད་དུ་མ་གསན་བཞེས་དང་། པདྨ་རྒྱལ་མཚན་བསྙེན་པར་རྫོགས། མཁས་དང་གྲུབ་པའི་ཡོན་ཏན་གྱིས་འབྱོར་བའི་ཚུལ་དང་མཐུན་པའི་བརྡ་སྤྲོད་ཀུན་བཤད་ཀྱི་མཚན་སྙན་གྱི་ཅོད་པན་སྲིད་ན་མཛེས་པའི་ཟླ་མེད་པ་བཅིངས། འགྱུར་མེད་
སྟོབས་རྒྱས་ཡར་ཕེབས་ནས་ལོ་མཚམས་བཅོ་ལྔ་ལྷག་ཙམ་བཞུགས། སླད་ནས་དུས་ཟིང་སྐབས་ཕུག་ཁང་དགོན་པ་འཐོར་ཉམས་དུས་ལྷ་ཁང་གསར་བཟོ་སོགས་མཛད་པ་རྒྱ་ཆེ། པདྨ་རྒྱལ་མཚན་ཐུན་མོང་དང་ཐུན་མིན་གྱི་རིག་པའི་གནས་ལ་ཤེས་རབ་གསུམ་གྱི་སྤོབས་པ་མཆོག་ཏུ་དགེ་བ། རྗེ་འདི་ཉིད་ཀྱི་གསན་ཡིག་བཻ་ཌཱུརྱ་བུམ་བཟང་ཁ་སྐོང་ཆ་ལག་དང་བཅས་པ་བསྒྲིགས་པའི་ཡི་གེའི་མཐུན་རྐྱེན་བསྒྲུབས་པ་དང་། རྫོགས་ཆེན་རིན་པོ་ཆེ་མི་འགྱུར་ནམ་མཁའི་རྡོ་རྗེའི་ཕྱིའི་རྣམ་པར་ཐར་བ་ལྗགས་རྩོམ་གསར་དུ་མཛད་པའི་ཡི་གེ་པ་སྟེ། མདོར་ན་ལུགས་གཉིས་ཀྱི་སྒོ་ནས་ཐུགས་ཟིན་གྱི་སློབ་མ་མཆོག་ཏུ་གྱུར་ཏེ། ཡར་ཕེབས་ནས་ཕུག་ཁང་གཞུང་གི་བླ་བྲང་གི་བླ་མ་མཛད་དགོས་པར་རྗེའི་བཀའ་གནང་ལྟར་དང་ལེན་མཛད། བྱང་འབྲོག་རྫ་རྒྱུད་ཉིན་སྲིབ་ལ། རྙིང་མ་དང་། དགེ་ལྡན་གྱི་བསྟན་པ་སྤེལ་མའི་ཚུལ་དུ་ཡོད་པས། སྔོན་ཆད་རྙིང་ལུགས་ལ་མཚམས་པ་གྲུབ་ཆེན་པདྨ་ཀུན་བཟང་དང་། དགེ་ལྡན་ལུགས་ལ་མང་དགེ་རྒོད་ཚངས་པ་དགེ་ལེགས་ཡར་འཕེལ་གཉིས་བསྟན་འཛིན་གྱི་སྐྱེས་བུ་དགེ་བའི་བཤེས་གཉེན་མཆོག་ཏུ་གྲགས་པ་ཡིན་ཞིང་། ཕྱིས་སུ་རྙིང་ལུགས་ལ་ཕུག་ཁང་བླ་མ་པདྨ་རྒྱལ་མཚན་དང་། དགེ་ལུགས་ལ་ ཆུ་ཧུར་དགེ་བཤེས་འཕགས་པ་བློ་བཟང ་གཉིས་མཁས་གྲུབ་ཕུལ་བྱུང་མངའ་བས་ཆོས་སྨྲ་བའི་སྤོབས་པས་འགྲོ་ཀུན་རྗེས་སུ་འཛིན་ནུས་པའི་གྲགས་པ་ཐོབ་པ་ཞིག་བྱུང་བ་ཡིན་ནོ། །ཆུ་ཡོས་ལོར་རྫོགས་ཆེན་དཔོན་སློབ་ལྷ་སར་ཕེབས་པ་དང་ཆབས་ཅིག་ཉེ་
བར་གནས་པའི་བླ་མ་དོན་གྲུབ་དཔལ་འབྱོར་ཕ་བུ། སེང་ཚ་བླ་མ་དོན་གྲུབ་བཀྲ་ཤིས་བཅས་ལྷ་ལྡན་ལ་ཆེད་བཏང་གིས། ཆོས་འཁོར་རྣམ་གསུམ་དང་། སྨིན་གླིང་གཙོས་དབུས་ཕྱོགས་ཀྱི་མཆོད་གནས་ཡོངས་ལ་གཏོང་སྒོ་ཕྱག་རྫས་གང་ཡོད་སྤངས་དག་མཛད་དེ་ཕུལ། རྫོགས་ཆེན་དཔོན་སློབ་སྐུ་རྐྱེན་བཟློག་ཕྱིར་ཀཿ ཐོག་རྨོག་ཚ་རིན་པོ་ཆེས་ཆག་ཆེན་སྦུབ་བཤིག་ཅིག་བབ་བྱུང་བ། རྗེ་ཉིད་མ་གཏོགས་ཞེ་རྫོགས་ལ་ཕྱག་ལེན་ཤེས་མཁན་མེད་པས་རྫོགས་ཆེན་དུ་གདན་ཞུས་གནང་བ་ལྟར་ཕེབས་ནས་ངེད་རང་གིས་བྱང་འདྲེན་པ་བྱས་ཏེ་དཔོན་སློབ་བཅུས་གནད་སྨིན་དུ་བསྒྲུབས། ཤིང་འབྲུག་དགུང་གྲངས་ང་བརྒྱད་བཞེས་ཐོག །རྫ་ཆུ་ཁ་བའི་སྡེ་ཤོག་འགའ་ཞིག་རྩེ་བས་བསུ་ཁྲིད་བྱས་པའི་རྐྱེན་གྱིས། སྡེ་དགེའི་དམག་ཆེན་ཆས་པའི་བར་འདུམ་ལ། ཀཿ ཐོག་རྨོག་སྤྲུལ་དང་། རྫོགས་ཆེན་རིན་པོ་ཆེ། རྗེ་བླ་མ་ཉིད་བཅས་ཕེབས་དགོས། ཤར་ཚེ་རྫོགས་ཆེན་གྱི་བླ་མཆན་ལྟ་བུ་མཛད་ནས་བྱོན། རྩེ་བ་དང་སྡེ་དགེའི་ཁ་མཆུ་ལེགས་ལམ་དུ་ཞོག་པས་རྫ་རྒྱུད་པ་བྱིངས་སྡོད་ཟོས་བདེ་བར་བྱུང་། རྨ་ཁོག་བཞུགས་དུས་བསྟན་པའི་བདག་པོ་ཞེ་ཆེན་རབ་འབྱམས་དངོས་ཀྱིས་གཏེར་སྟོན་གྱི་མཛད་པ་བསྐྱངས་པས། དགོན་པ་ལ་རྒྱལ་ཚབ་སྤྲུལ་སྐུ་བཞུགས་ནའང་བསྙུན་བབ་སོགས་ཀྱིས་བསྟན་པའི་འགན་ཆེན་ཐེག་དཀའ་འདུག་པས། རྗེ་བླ་མ་ལ་གཟིགས་དགོས་གསུངས་ནས་བདག་པོའི་བཀའ་རྒྱ་དང་རྒྱ་དངུལ་
སྲང་ཉེར་ལྔའི་སྐྱེས་དང་ཧོར་འདྲ་ཆེད་བཏང་འབྱོར། སླར་ལེགས་ལམ་གྱིས་རང་ཡུལ་དུ་ལྡོག་སྐབས་ཀཿ ཐོག་རྨོག་སྤྲུལ་རིན་པོ་ཆེ་ཞེ་ཆེན་དུ་གདན་ཞུས་ཕུལ་བ། ཁོང་སྐུ་ཞབས་ལྕང་སྐྱ་དང་མཇལ་དགོས་པའི་ཐུགས་བྲེལ་སྟབས་ཀྱིས་བྱོན་རྒྱུ་མ་རེད་པས། ཡོ་འབོམ་ཁ་མདོར་གསོལ་སྟོན་དང་། རྒྱ་དངུལ་རྡིལ་ཚད་ཀྱི་གཙོས་པའི་བསྙེན་བཀུར་ཕུན་སུམ་ཚོགས་པ་ཞུས། ཀཿ ཐོག་པས་ཀྱང་རྗེ་ཉིད་ལ་ཀཿ ཐོག་ཏུ་གསན་བསམ་མཛད་དུས་སུ་ཡང་རྨོག་སྤྲུལ་སྙིང་གི་ནོར་བུ་ཞེས་ལུགས་གཉིས་ཀྱི་ནང་གཤིན་འགྲན་བྲལ་ཡིན་ནས་ཡིན་བཞིན་འབྲལ་དཀའ་བ་ཙམ་དུ་གྱུར། དེ་རྗེས་ཕྲན་ལ་སྒྲ་ཙནྡྲ་པ་སྐུ་ཞབས་སི་ཏུ་རིན་པོ་ཆེའི་འགྲེལ་ཆེན་སྟེང་ནས་བཤད་ལུང་མཛད། རྫ་ཆུ་ཁ་བའི་བླ་གྲྭ་འགའ་ལ་བདེ་གཤེགས་ཀུན་འདུས་ཀྱི་དབང་ལུང་ཁྲིད་བཅས་གནང་། ཞེ་ཆེན་པའི་བསྟན་པའི་འགན་ཁུར་ཆེ་ཕྲའི་རིགས་ལ་ཐུགས་ཁུར་ལྷག་པར་མཛད། ཤིང་སྦྲུལ་ང་དགུ་བཞེས་ལོ་ཁྲོམ་ཐར་ཁོག་ཏུ་དབྱར་ལྡོམ་ལ་བྱོན། རིམ་པར་སྡེ་གཞུང་མའི་ནང་དུ་ཕེབས་ནས་བླ་དཔོན་རྣམས་དང་ཞིབ་ཆ་མཛད་ནས། མཚོ་ཕུ་ལ་ཆིབས་བསྐྱོད་གནང་བ། བླ་མ་སྒྲུབ་ཆེན་རིན་པོ་ཆེར་གྲགས་པའི་མཚན་དང་། སྔར་ཀཿཐོག་པ་རྡོ་རྗེ་འཆང་གི་མདུན་ནས་སློབ་གྲྭ་གཅིག་གིས་བསྡུས་པའི་རྒྱུ་མཚན་དང་། རྗེ་ཉིད་བཤད་སྒྲུབ་ཀྱི་ཕྲིན་ལས་ཟླ་མེད་པ་ཡིན་པས། ཆིབས་བསུ་རིང་ཐུང་། སེར་སྦྲེང་སོགས་དང་། ཁྱད་པར་སྒྲུབ་ཆེན་ཉིད་དཀར་ཆས་བག་དྲོ་བ་ཞིག་མཛད་ནས། ཕྱག་གཡས་གཡོན་གཉིས་གྲྭ་པ་གཉིས་ཀྱིས་བརྟེན་ཏེ།
སྤོས་ཀྱི་རེང་བུ་ཞིག་བསྣམས་ཤིང་དགོན་པའི་གཤམ་བར་དུ་བསུ་བར་ཕེབས། མཇལ་མ་ཐག་རྗེ་ཉིད་ཀྱང་ཆིབས་ལས་བཞེངས་ཏེ། དེ་ཉིད་དུ་མཇལ་དར་གཏོང་ལེན་སོགས་མཛད། དེ་ནས་རིམ་པར་དབང་ལུང་འབུལ་ལེན་དུ་མ་དང་། བྱང་སྡོམ་རྒྱལ་སྲས་ལམ་བཟང་གནང་། ཁྱད་པར་འབའ་ཕྱོགས་ན་ཀཿ ཐོག་དགེ་རྩེ་རྡོ་རྗེ་འཆང་གི་ཡང་སྲིད་བརྡའ་ཁོག་ན་བཞུགས་རྒྱུ་དེ་སྐུ་ནར་མ་སོན་པར་གཤེགས་སོང་བ་དེ་སླར་འཁྲུངས་ཡོད་པ་ལ། སྒྲུབ་ཆེན་རིན་པོ་ཆེས་ངོས་འཛིན་དང་སྐུ་བདག་གནང་བ་དེ་ལ། སྔར་བརྡའ་ཁོག་ནས་དགེ་རྩེའི་ཡབ་གཞིས་ཀྱིས་ཕུལ་རྒྱུའི་རྟ་ཆིབས་ཆེན་དེ་ད་རེས་རང་ཟོག་རང་བདག་ལ་ཕུལ་བ་ཡིན། རྟེན་འབྲེལ་ལེགས་པའང་ཡོད་གསུངས་ནས་དགེ་སྤྲུལ་འདི་པ་ལ་ཕུལ། དེ་ནས་མཚོ་ཕུ་བས་གསོལ་སྟོན་དང་འབུལ་བ་བསྙེན་བཀུར་རྒྱ་གང་ཆེ་བསྒྲུབས་ཏེ། སླར་ཁྲོམ་ཁོག་བརྒྱུད་འཛིང་རྨེ་རྟིང་ཕྱོགས་ལ་ནས་བསོད་མཛད། རྨེ་ཤོད་རྫོང་སར་དུ་ཞབས་དྲུང་འཇམ་དབྱངས་མཁྱེན་བརྩེ་དང་མཇལ། ཁོང་ལ་ཉང་གཏེར་ཁྲོས་ནག་གི་དབང་ལུང་ཁྲིད་གསུམ་སོགས་ཕུལ། ཚུར་ཡང་ཚེ་དཔག་མེད་གྲུབ་རྒྱལ་ལུགས་ཀྱི་དབང་ཁྲིད་དང་། གསེར་ཆོས་ཚེ་དཔག་མེད་སྤྲུལ་སྐུའི་རྗེས་གནང་། ཚེ་སྒྲུབ་བུ་སྟོན་གོང་ཁུག་མའི་ཁྲིད་ལུང་སོགས་གསན། དེ་ཕྱོགས་སུ་ཞབས་དྲུང་ཉིད་ཀྱིས་ཞབས་འདེགས་མཛད་པས་རྙེད་པ་བཟང་ཞིང་རིམ་པར་ལེགས་ལམ་གྱིས་ཞེ་དགོན་དུ་འབྱོར། འདི་སྐབས་ནས་བླ་བྲང་དངོས་དང་དགོན་སྟོད་གཉིས་རེས་མོས་ལྟ་བུར་
བཞུགས་ནས། བླ་བྲང་དང་དགོན་པའི་འགན་ཁུར་ཆེ་ཕྲ་གང་ཡོད་ལ་གཟིགས་རྟོག་ཞིབ་ཆ་གནང་། དེ་འཕྲོས་རྟ་ལུགས་གཉིས་ཀྱི་ལོ་སྔ་ཕྱི་འདི་ཡིན་ཞིབ་ཆ་མ་ངེས་ཀྱང་དགོན་སྟོད་གཟིམས་ཆུང་ནས་བླ་མ་དྷརྨཱ་ཙཀྲ་དང་། རྡོར་སློབ་བླ་མ་རང་གྲོལ་སོགས་ལ་བཀའ་འགྱུར་ལྗགས་ལུང་ཞིག་གནང་བར་མཛད། ཕུག་ཁང་བླ་མ་ལེགས་བཟང་ལ་སྒྲ་དབྱངས་ཅན་མ་དང་། སྙན་ངག་སྡེབ་སྦྱོར་སོགས་ཐུན་མོང་དང་། ཐུན་མིན་གྱི་རིག་གནས་སྐོར་རྣམས། དང་པོ་རྗེ་ཉིད་ཀྱིས་གནང་། རྗེས་སུ་བླ་མ་དོན་འགྲུབ་བཀྲ་ཤིས་ཀྱིས་ཁྲིད་བཤད་མཛད། མཁས་པའི་གྲགས་པ་དང་། སྒོམ་པའི་ཉམས་མྱོང་གིས་མཛེས་པའི་ཀུན་བཤད་ཀྱི་མཚན་སྙན་གྱིས་བསྔགས། ལེ་དགོན་ནས་ཟུར་མཁར་ཟླ་བའི་འོད་ཟེར་གྱི་ཡང་སྲིད་ཀྱང་ཕེབས་ཏེ་སྒྲ་དབྱངས་ཅན་མ་དང་། སྙན་ངག །སྡེབ་སྦྱོར། རྩིས་དཀར་ནག །སྔགས་ཆོག་གཏོང་ལུགས་ཀྱི་རྣམ་བཞག་མང་པོ་དང་། སེམས་བསྐྱེད་ཆོ་ག །སྡོམ་གསུམ་དང་། གསང་སྙིང་གིས་བཤད་པ་སོགས། ཁོང་ས་ཐག་ཡང་ཉེ་བས་དུས་རྒྱུན་སྟབས་ནམ་བདེར་བྱོན་ནས་གསན་བསམ་རྫོགས་པར་མཛད། བརྡའ་སྤྲོད་ཀུན་བཤད་ཀྱི་མཚན་དུ། འཆད་རྩོད་རྩོམ་པའི་ཡོན་ཏན་ཆེ་ཞིང་། བསྟན་འགྲོའི་དོན་ཆེན་སྨོན་ལམ་བཟང་པོ་དུས་སུ་སྨིན་པས་འགྲུབ་པར་འགྱུར་པའི་བསྔགས་བརྗོད་ཀྱི་མེ་ཏོག་ཆར་དུ་བསྙིལ་བའི་ཚིགས་སུ་བཅད་པས་མངའ་གསོལ། རང་ཡུལ་ནས་ཀྱང་མཁས་བཙུན་བཟང་པོའི་རྣམ་ཐར་འཆང་བ་ཡིན་ཀྱང་། ཁྱད་པར་དབུས་ཕྱོགས་སུ་བྱོན་ནས། ལྷོ་བྲག་ལྷ་ལུང་དང་། སྨིན་གྲོལ་གླིང་ལ་སྒྲ་སོགས་
རིག་གནས་ཀུན་ཤིན་ཏུ་ཉག་ཕྲ་བར་གྱུར་པ་ལ། བསླབ་སྦྱང་གི་ཡོངས་འཛིན་མཛད་པས་ད་ལྟ་ཤེས་མཁན་མང་ཞིག་ཡོད་པར་སྐད། ཁོང་རང་དེང་སང་བསམ་ཡས་མཆིམས་ཕུ་ན་ཚེ་དང་སྒྲུབ་པ་མཉམ་ནས་བཞུགས་ཡོད་པ་དེ་ཡིན། ལུག་ལོའི་ནང་རྫོགས་ཆེན་རིན་པོ་ཆེའི་སྐུ་ཕྱིར་རྐྱེན་བཟློག་ལ་བཀའ་བརྒྱད་ཁྲོམ་ཕྱིས་བབ་པར་གདན་འདྲེན་ཞུས་པ་དེར་ཕེབས་ནས། ཀཿ ཐོག་པའི་ལུགས་ཕྱག་ལེན་རྒྱས་པ་ལྟར་མཛད་པས། མདོས་རྫོངས་སྐབས་སུ་ལྟས་དང་། ཆོ་འཕྲུལ་སྣ་ཚོགས་བྱུང་བ་དང་། གླུད་རྫོངས་སྤྲང་འཁྱམ་ཞིག་གིས་ཁྱེར་བས་ཞག་ལྔ་དྲུག་བར་ཁོ་རང་ཕྱི་ལ་ལྕགས་སྤྱང་བདུན་བརྒྱད་ཙམ་གྱིས་དེད་ནས་བྱུང་། འབྲི་ཆུ་བརྒལ་ནས་གར་སོང་མ་ཤེས་ཟེར། འདི་དུས་ཕྲན་ཀྲོམ་མཚོ་ཕུ་སོགས་ལ་སོང་ནས་མེད་ཀྱང་ཀུན་གྱིས་ངག་ལམ་དུ་ཐུན་མོང་དུ་གྱུར་བཞིན་བྲིས་པ་ཡིན། ཡང་སྒ་རྫོགས་གཉིས་ཉག་རོང་མགོ་རོ་བའི་དུད་གཞིའི་སྐོར་གྱིས་གྲྭ་གྱོད་ཚབས་ཆེན་སློང་དུས་རྫོགས་ཆེན་རིན་པོ་ཆེ་ཉིད་ཀྱི་དགོངས་བབ་ལྟར། མཁར་རྡོའི་གཏེར་བྱོན་དྲག་པོ་ཕུར་ཤམ་ཅན་གྱི་སྒོ་ནས་གྱོད་སྲི་མནན་པ། རྗེ་བླ་མ་འདི་ཉིད་མ་གཏོགས་སུ་ལའང་དབང་ལུང་དང་ཕྱག་ལེན་མི་འདུག་པས་ངེད་རང་ནས་བྱང་འདྲེན་བསྐུལ་ཏེ་དཔོན་གཡོག་ཉུང་ཤས་ཀྱིས་སྒྲུབ་པ་ཞག་བདུན་དུ་མཛད། ལས་མཐའ་མནན་བསྲེག་འཕང་བས་བསྡུས། དེ་ཕྱིན་ཆད་སྒ་རྫོགས་གཉིས་ཁྲིམས་ར་འགྲིམ་དགོས་པའི་གླེང་བརྗོད་མ་བྱུང་། སྤྲེལ་ལོ་རེ་གཉིས་བཞེས་ཐོག་ཞབས་དྲུང་འཇམ་དབྱངས་མཚན་ཅན་དབུས་
སུ་ཕེབས་སྐབས་འཕྲད་འདོད་དང་། ཐར་རྩེ་མཁན་ཆེན་རྣལ་འབྱོར་འཇམ་དཔལ་བཟང་པོ་མཇལ་ཕྱིར་དགོན་ཆེན་དུ་ཆས་པ་ལ་འབྲུམ་འཕྲོས་ཀྱིས་སྡོམ་རས་བྱོན་སྐབས་མ་བྱུང་བས། དེ་ཕྱིན་ཞབས་དྲུང་རིན་པོ་ཆེ་དང་ཡང་བླ་སློབ་མཇལ་འཕྲད་མ་བྱུང་། ཚུར་ཕེབས་ནས་དབྱར་ཐོག་ཉག་རོང་ཕྱོགས་ཀྱི་བླ་གྲྭ་འགའ་ལ་བཀའ་བརྒྱད་གསང་རྫོགས་ཀྱི་དབང་ལུང་རྫོགས་པར་གནང་། ཕྲན་ཡང་ཡོད། དེ་ནས་ཞབས་དྲུང་རྡོ་རྗེ་འཆང་གི་ཉེ་བར་གནས་པ་སྨན་པ་ཚེ་དབང་དོན་གྲུབ་དང་། སྟག་སྒང་སྤོ་འགུར་བླ་མ་ཨོ་རྒྱན་བསམ་གྲུབ། རྩེ་བ་མདའ་མཁན་བུ་སངས་རྒྱས་ཆོས་འཕེལ་རྣམས་ལ། སྒྲ་ཀ་ལཱ་པའི་རི་མོ་དང་། སྙན་ངག་སྡེབ་སྦྱོར་སོགས་བསླབ། ལོ་གསར་རྙིང་མཚམས་སུ་ཁྲོ་ཤུལ་ལ་བུམ་སྒྲུབ་ཅིག་གི་དབུ་བཞུགས་ལ་ཕེབས། དབྱར་ཐོག་བརྡའ་གྲ་ལག་དགོན་དུ་དགེ་མང་གཅོད་རྒན་དང་། རྗེ་ཉིད་བླ་སློབ་ཤིན་ཏུ་ནང་གཤིན་མཆོག་ཏུ་གྱུར་པ་ཡིན་གཤིས་ཀྱིས། སྐུ་གཤེགས་སྐབས་དགོངས་རྫོགས་ལ་གདན་ཞུས་བྱུང་བས་དེར་བྱོན། གསུང་ཆོག་གནང་དགོས་རིགས་ཞིབ་པ་མཛད། གྲ་ལག་དགོན་པ་ཀཿ ཐོག་པའི་དགོན་ལག་ཡིན་པས་དེར་བཞུགས་ནས་སི་ཏུ་རིན་པོ་ཆེ་ལ་སྒྲ་དབྱངས་ཅན་མ་དང་། སྙན་ངག །མིང་གི་མངོན་བརྗོད། སྡེབ་སྦྱོར་སོགས་ཐུན་མོང་གི་རིག་པ་དང་། གཞན་དབང་ལུང་ཐུགས་མཁོའི་རིགས་དང་། གསང་སྙིང་རྒྱུད་བཤད་སོགས་ཕུལ།
བྲག་ཡབ་སྐྱབས་མགོན་གྱི་དགོངས་པ་ལྟར་ཕྲིན་ལས་བྲག་ཡབ་ཏུ་རྒྱས་ཚུལ།
ཕྱིར་ལོ་ཞེ་ཆེན་ནས་གྲྭ་ཚང་སབ་སྟེ་འགོ་ལོག་ཏུ་བྱོན་རྩིས་སྐབས། བྲག་ཡབ་མདུན་ཆེན་ནོ་མི་ཧན་དཔལ་ལྡན་འཇིགས་མེད་བསྟན་པའི་རྒྱལ་མཚན་སྤྱིར་རི་བོ་དགེ་ལྡན་པ་ཡིན་ན་ཡང་། རིས་མེད་པའི་བསྟན་པ་རྒྱ་མཚོར་གསན་བསམ་རྒྱ་ཆེ་གནང་བཞེད་སྐབས། དགའ་ལྡན་ཁྲི་རིན་པོ་ཆེའི་མདུན་ལ། རྙིང་མའི་ཆོས་གསན་བཞེས་ཆོག་པར་ཞུས་ཐོག །ཁམས་ཞེ་ཆེན་པཎྜི་ཏ་ཟེར་བ་སྔར་སྨིན་གླིང་གི་སྔགས་རམས་པ་དགེ་རྒན་སྐྱེས་མཆོག་ལགས་སོགས་གསར་རྙིང་གི་ཡོངས་འཛིན་ཚད་ཐུབ་མང་པོའི་ཞབས་ལ་གཏུགས་པས་ཕྱི་ནང་གི་རིག་པའི་གནས་ལ་མཁྱེན་རྒྱ་ཆེ་ཞིང་། བསྟན་པ་ཐམས་ཅད་འགལ་མེད་དུ་ལམ་དུ་ཁྱེར་ཐུབ་པ་ཞིག་ཡོད་པ་ཐོས་འདུག་པས། དེ་བླ་མར་བརྟེན་ན་འོང་མ་གཏོགས། དེ་མིན་རྙིང་སྔགས་རྒན་པོ་རས་ཆོད་ཅན་དག་བྱ་སླ་ཚེགས་ཆུང་གིས་སུ་རྙེད་གང་རྙེད་བྱེད་ནས་བླ་མར་བརྟེན་མི་ཆོག་པའི་བཀའ་གསལ་དམ་འབྱར་ཕེབས་པར་བརྟེན། ནོ་མི་ཧན་གྱིས་སྔ་ཕྱིར་ནན་ཞུས་ལན་མང་དང་། ཁྱད་པར་སྤྲེལ་ལོར་བྲག་གཡབ་ཏུ་མ་བྱོན་ཐབས་མེད་ཀྱི་བཀའ་རྒྱ་ཁྱེར་ནས་བང་ཕྱིན་མི་གཉིས་གྲ་ལག་དགོན་དུ་འབྱོར་འཕྲལ། ཟླ་བ་ལྔ་པའི་ཚེས་བཅུའི་གདོང་ཞེ་ཆེན་དུ་ཕེབས་ནས། གྲྭ་པ་འགྲོ་བའི་རྡེལ་བཀོད་སོགས་ཕེབས་ཆས་ཉེར་བསྡོག་མཛད་དེ། རིངས་པར་ཆིབས་བསྐྱོད་གནང་བ་ལྡན་ཁོག་བརྒྱུད་ལྷོ་གོ་སྟོད་དུ་ཕེབས་པ་དང་། ཞེ་ཆེན་པའི་མི་དྲག་འགས་ཞུ་དབྱེན་གྱི་རྐྱེན་གྱིས་བདག་པོ་སྡེ་དགེས་སྔ་མ་བཀོད་ཁྱབ་ལྟར་ཞེ་ཆེན་བླ་བྲང་གཟིགས་གཏོགས་མཛད་དགོས་པས་ས་མཐར་བྱོན་ཐབས་མེད་ཅེས་པའི་བཤོལ་མ་བཀའ་ཤོག་ཧོར་འདྲ་ཆེད་བཏང་ཞུ་རྟེན་
དངུལ་སྲང་ཉེར་ལྔ་བཅས་ཀྱིས་བཤོལ་བས། དབྱར་ཚེ་ལྷོ་ཁོག་སྐོར་དབྱར་ལྡོམ་མཛད་ནས་སྡེ་དགེའི་བཀའ་ལྟར་ཚུར་ཕེབས་རྒྱུ་མཛད་ཀྱང་། དེའི་ཕྱིར་ཉིན་ལས་མ་འགྱངས་པར། བྲག་ཡབ་མདོ་རུའི་རྗེ་དཔོན་ཨ་འབྲུག་དཔོན་གཡོག་དྲུག་ཆིབས་བསུ་ལ་འབྱོར་བས། ཕན་ཚུན་སྐོར་ཡོངས་ཀྱིས་བརྗོད་གཞི་སྣ་ཚོགས་བྱས་པ་ལས། ཕར་བྱོན་རྒྱུ་དང་ཚུར་ལོག་རྒྱུ་རེད་ཐག་མ་ཆོད་མཚམས་སུ། སྐྱབས་ཆེ། པདྨ། གོ་སྟོད་སྐོར་ལ་གསོལ་ལྡོམ་མཛད་ནས། ཡབ་ཚང་ཕོ་ཏེ་སྐོར་ཚང་མ་སར་ཕེབས། ཞག་ཤས་ཐུགས་དལ་གྱི་བཞུགས། དེ་ནས་རིམ་པར་སིབ་རྫོགས་ཆེན་དགོན་དུ་ཕེབས། དེ་རྣམས་ཀྱིས་བསུ་མ་རིང་ཐུང་དང་། སེར་སྦྲེང་སོགས་ཀྱིས་བཀུར་ཏེ་དགོན་ཐོག་ཏུ་བྱོན། སྔར་ནས་རང་གི་བླ་མ་དང་གྲྭ་ཚང་ཡོན་མཆོད་ཡིན་ནས་ཡིན་བཞིན་ལུགས་གཉིས་ཀྱི་སྒོ་ནས་ནང་ཉམས་ཤིན་ཏུ་ཆེ་བས། དགོན་པ་ལ་སེམས་བསྐྱེད་འབོགས་ཆོག །བླ་གྲྭ་ཚང་མར། བཀའ་བརྒྱད་དབང་ཆེན་གྱི་གཙོས་དབང་ལུང་འགའ་དང་། གྲྭ་པ་མང་ཞིག་བསྙེན་རྫོགས་བསྒྲུབས། སྡེ་ཡུལ་སྤྱི་ནས་རི་བསང་། ལྷ་ཁྲུས་ཁྲོམ་དབང་རྣམས་བྱས། དེ་ནས་སིབ་ཕུར་འབྲོང་པ་དཔོན་ཚང་གཙོས་གདན་འདྲེན་ནས། སྤྱི་དང་བྱེ་བྲག་ལ་དབང་དང་། སྤྱི་བསང་སོགས་དང་། དེ་ནས་ལ་བརྒལ་ཏེ་དམར་ཛོ་དགོན་དང་། གླེ་མདའ་སོགས་བརྒྱུད། གཤོང་ནག་རི་ཁྲོད་དུ་ཕེབས། ཀློང་སྡེ་རྡོ་རྗེ་ཟམ་པའི་དབང་ལུང་སོགས་དང་། བྱང་སྡོམ་གནང་། དེ་ནས་ཀེ་ཆུ་བརྒྱུད་སླར་སིབ་མདར་དགོན་པར་བྱོན་པའི་
ལམ་བར་རྣམས་ལ་ལྡོམ་བུ་བསང་དང་ཁྲོམ་དབང་སོགས་གནང་། རྙེད་པ་རྟ་ནོར་བྱུང་རིགས་ནང་ནས་ཡབ་གཞིས་གཙོས་སྐུ་ཉེར་གཏོགས་རིགས་ལ་གནང་སྦྱིན་རྒྱ་ཆེན་དང་། དགོན་པ་རྣམས་ལ་རྒྱབ་ཆོག་ཉམས་གསོས། བླ་སྤྲུལ་ཡོངས་ལ་གང་ལ་གང་འཚམས་ཀྱི་བཞག་སྒོ་དུ་མ་མཛད། དེ་ནས་ནམ་དུས་ཀྱང་དགུན་ཁར་ཉེར་སོང་ནས་བྲག་གཡབ་ཏུ་མི་བྱོན་རྒྱུ་ཐག་ཆོད། རང་དགོན་དུ་ཚུར་ལྡན་ཁོག་བརྒྱུད་ནས་བྱོན། ལོ་ཆུང་ནང་ཆུ་རྡོ་ཚང་གིས་གདན་ཞུས་དང་སྒྲོལ་མ་ལྷ་ཁང་ལ་མཆོད་འབུལ་དང་། ཞབས་བསྐོར་ཅུང་ཟད་མཛད། དགོན་དུ་འབྱོར་ནས་ཞེ་ཆེན་བླ་བྲང་དུ་བཞུགས་ཏེ། རིག་གནས་བསླབ་གྲྭ་མཇུག་མ་རྫོགས་ནས་སྐུར་རྩར་ཡོད་རིགས་བསླབ་སྦྱང་དང་། ཁྱད་པར་དུ། སྔ་ནས་ཞེ་ཆེན་དགོན་དུ་བཀའ་བརྒྱད་སྒྲུབ་མཆོད། དགུ་ཆུང་གཏོར་བཟློག །ལོ་མཇུག་དགུ་ཆེན་གཤིན་རྗེ་དྲེགས་འཇོམས། ཚེས་བཅུ་ཆེན་མོ་སོགས་ཨོ་རྒྱན་སྨིན་གྲོལ་གླིང་གི་ཕྱག་བཞེས་ཇི་ལྟ་བར་རྡོ་ལག་བརྒྱུད་དང་། ཆུ་བུམ་པ་གང་བྱོས་ཀྱི་དཔེ་ལྟར་བསྲེ་སླད་ཉམས་ཆག་མེད་པ་ཡོད་རིགས་རྗེ་ཉིད་ཀྱིས་ཡང་ནས་ཡང་དུ་དག་ཐེར་མཛད་པ། འདི་ལོ་ཡང་གཏོར་མ་བཅའ་བཟོ་དང་བཅས་བཀོད་བཤམས། མཆོད་དཔོན་རྒན་པ་མགོན་ཚ་ཆོས་དར་ཉིད་སེམས་ལ་ངེས་ཆ་ཆེ་ཞིང་། ཕྱག་གཟོབ་པ་ལེ་ལོ་སྙམས་བསྐྱུར་དེས་ཆོག་སོགས་ཀྱི་སྐྱོན་དང་བྲལ་བས་དེས་ཆོག་རྒྱུ་མཛད། དེ་མིན་གདངས་རོལ། འཆམ་ཆེ་ཕྲ་ཐམས་ཅད། དུང་གླིང་། རྐང་དུང་སོགས་དང་། ཐ་ན་འཚོགས་པའི་བྱོན་ལུགས་བཞུགས་
སྟངས། ཇ་མཆོད་ཅིག་གསུང་ལུགས་ཚུན་ལ་དག་ཐེར་སྣ་ཚོགས་ཐུགས་ཁུར་འོ་བརྒྱལ་ལ་མ་འཛེམས་པར་མཐའ་ཆོད་པར་མཛད། བླ་བྲང་གི་ལས་སྒོ་རྣམས་ཀྱང་གཉེར་ཕྱག་ཟུང་ལ་གྲོས་བསྟུན་གྱིས་བཀོད་པ་མཛད། ལོ་མཇུག་དེ་ནང་ལ་ཁྲོམ་ཐར་ནས་རྒྱ་སྒོར་བླ་མ་ངག་དབང་ཟེར་བའི་གཅོད་ཀྱི་སྒོ་ནས་གྲུབ་པ་བརྙེས་པ་དེ་བྱོན། ཕར་ལ་དབང་ལུང་དང་གདམས་ཁྲིད་ཁ་ཤས་གནང་། ཚུར་བེ་རི་གྲུབ་སྲས་ཀྱི་བཀའ་འབུམ་ཡོངས་རྫོགས་ཀྱི་ལུང་གསན། ད་རེས་རྟགས་མཚན་ལེགས་ལེགས་འདྲ་བར་སྣང་བས་བླ་མ་ངག་དབང་འདིས་རིམ་གྲོ་མཛད་ན། རྒྱལ་ཚབ་རིན་པོ་ཆེའི་བསྙུན་གཞི་འདི་ལ་ཕན་པ་འདུག་གསུངས་ནས། གཅོད་ཚོགས་འདུལ་དཀར་ནག་སོགས་མཛད། གཅོད་དེའི་དབང་ལུང་རྒྱལ་ཚབ་ལ་ཕུལ་ཐུགས་ཉམས་སུ་བཞེས་པས་བསྙུན་གཞི་ལས་ལེགས་པར་གྲོལ། དེའི་ཕྱི་ལོ་སོས་ཐོག་བྲག་གཡབ་ཀྱིས་སྡེ་དགེ་ལ་བླ་མ་གདན་ཞུས་སུས་ཀྱང་བྱེད་སྲོལ་ལ་ཁོང་ལ་མི་གཏོང་བའི་རྒྱུ་མཚན་གྱིས་སྡིགས་མོ་བྱས་པས། སླར་བྲག་གཡབ་ལ་ཅི་ནས་བྱོན་དགོས་པའི་སྡེ་དགེའི་ཞུ་རྒྱ་དང་ཧོར་འདྲ་ཆེད་གཏོང་འབྱོར་བ་ལ། སྤྱིར་དགུང་ལོ་མཐོ་བ་དང་། དགོན་པ་བླ་བྲང་ཡང་ཉམས་ཞན་པས་བྱོན་སྟབས་མི་འགྲིགས་པའི་རྒྱུ་མཚན་ལན་གྲངས་ཞུ་བ་ཕུལ་ཐོག །རྒྱལ་བློན་བཀའ་བགྲོས་ཀྱིས་བྱོན་ཆས་ཕྱག་མཐུད་རྒྱ་དངུལ་སྲང་ཉེར་ལྔ་སོགས་དང་། སྣ་ཤན་ཧོར་འདྲ་ས་ཚུགས་ལམ་ཡིག་གནང་སྟེ་མི་འབྱོན་ཀ་མེད་ལ་གཏུགས་པས། ཚེས་བཅུའི་རྒྱབ་དཔོན་སློབ་ཉི་ཤུ་སྐོར་བྱས་ནས་བྲག་ཡབ་ཏུ་ཕེབས། དེ་མཉམ་སིབ་རྫོགས་ཆེན་དགོན་པའི་
བླ་རྒན་སྤྲུལ་སྐུ་ཞེ་ཆེན་ནོར་མ་དུད་ཞིག་ལ་སྐུ་འཁྲུངས་པ་ལོ་བཅུ་བཞེས་པའང་ཞོར་དུ་གདན་དྲངས་པ་དང་བཅས་མཁར་སུམ་མདོ་བརྒྱུད་དེ་མགྱོགས་པར་ཆིབས་བསྐྱོད་གནང་། ལྷོ་ཁོག་ལམ་བར་གྱི་ཡོན་བདག་ཀུན་ནས་བསྙེན་བཀུར་དང་བཅས། སིབ་རྫོགས་ཆེན་དགོན་དུ་ཕེབས་པར། བསུ་མི་རིང་ཐུང་དང་། སེར་སྦྲེང་བཅས་ཀྱིས་མདུན་དྲངས་ནས། ཁོ་རང་ཚང་གི་སྤྲུལ་སྐུ་ཡང་རྗེ་ཉིད་ཀྱི་ཁྲི་འདོན་མཛད་དེ་ལེགས་ལམ་ཕུན་སུམ་ཚོགས་པར་གྱུར་ནས་གསོལ་སྟོན་དང་ལེགས་འབུལ་རྒྱ་གང་ཆེ་བསྟབས། དེ་མཉམ་དུ་དགོན་པ་ལ་བཅའ་ཡིག་གསར་བཞག་དང་། ཡུལ་པ་རྣམས་ལ་ཁྲོམ་དབང་དང་དགེ་སྒྲུབ་སྡིག་སྤངས་དང་། སྐྱབས་སེམས་ཀྱི་གོ་དོན་སོགས་ཐུན་མོང་གི་ཆོས་སྦྱིན་དང་རྔོན་རྒྱ་དགོས་པའི་བཀའ་ནན་བཅས་ཐམས་ཅད་ཕན་བདེ་ལ་བཀོད་པའི་མཛད་པ་གནང་། དེ་འཕྲལ་བྲག་གཡབ་རྗིས་དཔོན་ཨ་འབྲུག་སྐོར་རིང་བསུ་ལ་འོང་བའང་དེར་འབྱོར། དེ་ནས་རིམ་བཞིན་ཕེབས་ཏེ་ལྷོ་ཁམས་པའི་དགོན་དུ་གདན་ཞུས་བྱུང་བ་དེར་བྱོན་སྐབས་ཀྱང་བསུ་བ་རིང་ཐུང་དང་། ཐོག་རོལ། སྤོས་སྣ། རྒྱ་གླིང་བཅས་ཀྱིས་བསུ་བ་བསྟར། དེར་གསོལ་སྟོན་དང་། ཁམས་སྤྲུལ་ཞིང་ཁམས་ལ་གཟིགས་པའི་གདུང་རྟེན་མཇལ་ཁ་མཛད། དེ་ནས་རིམ་པར་ཕེབས་པས་ལྷ་ཆབ་ས་མཚམས་ཐོ་གཞུང་ཆགས་རམ་སྒང་དུ་སླེབས་པ་དང་། བྲག་གཡབ་མཛེས་བཅུ་དཔོན་ལྷུན་གྲུབ་རྒྱལ་དཔོན་གཡོག་
བརྒྱད་ཅུ་ཐམ་པ་བར་བསུ་ལ་འབྱོར། དེ་མཚམས་སུ་ཆབ་མདོའི་སྡེ་ནང་ལ་ཐུག་པ་ན། འུ་ལག་སོགས་སྔར་ལྟར་བྱས་ནས་ང་གཞུང་སྨད་གྲུབ་ཐོབ་དཔལ་འབྱོར་བཞུགས་སར་འབྱོར་བས་ཐབ་བསུ་དང་མཇལ་དར་བཏང་། དེ་ཐོག་ཐུང་བསུ་ལ་ཕྱག་མཛོད་དཔོན་གཡོག་བརྒྱ་ལྷག་ཙམ་འབྱོར། དེ་ཉིན་ཚོགས་བརྒྱ་རི་ཁྲོད་དུ་ཕེབས། ཚོགས་ཀྱི་དགའ་སྟོན་རྒྱ་གང་ཆེ་བྱས། དེའི་ཕྱི་ཉིན་ཟླ་བ་བདུན་པའི་དགའ་བ་དང་པོ་ལ་བྲག་གཡབ་སྐུ་ཞབས་ནོ་མི་ཧན་དང་ཐོག་མའི་ཞུ་མཇལ་བྱས། དགའ་སྤྲོའི་གསོལ་སྟོན་གཟབ་རྒྱས་མཛད། དེའི་ཕྱི་ཉིན་ནས་སྔ་འགྱུར་རྡོ་རྗེ་ཐེག་པའི་ཆོས་སྒོ་རྒྱ་ཆེན་འབྱེད་པའི་སྣ་སེལ་དུ་བཀའ་བརྒྱད་བདེ་གཤེགས་འདུས་པའི་གཏོར་བཟློག་མཛད་པས་བགེགས་ཀྱིས་འཚུབ་སློང་བྲག་རལ་བ་དང་། ཕ་ཝོང་གཡག་རོ་ཙམ་ཞིག་གཟིམ་གུར་གྱི་རྩར་འདྲིལ་བ་སོགས་བྱུང་ཡང་། རིམ་པར་བསྙེན་སྒྲུབ་གནད་དུ་སྨིན་པས། ཧོམ་ཁུང་དུ་གང་ནས་བྱུང་མ་ངེས་པར་ཁྲག་འཁྱིལ་བ་དང་། བྱང་གི་དྲག་པོའི་མཆོད་ཡོན་རིམ་པར་ཁྲག་ཏུ་འགྱུར་བ་བཅས་བླ་གྲྭ་ཡོན་མཆོད་ཚང་མའི་མཐུན་སྣང་དུ་གྲུབ་པའི་ལྟས་སྣ་ཚོགས་བྱུང་། དེ་མཚམས་ནས་འཚུབ་ལྟས་ཐམས་ཅད་ཆུ་ཁོལ་དུ་ཆུ་འཁྱག་བླུགས་པ་ལྟར་རང་ཞིར་སོང་། དེ་ནས་ཐོག་མའི་ཆོས་སྒོ་བླ་མ་དགོངས་པ་འདུས་པས་ཕྱེ་སྟེ་དབང་ལུང་ཆ་ཚང་མཛད། བཀའ་བརྒྱད་སྒྲུབ་མཆོད་མཚོན་ཙམ་དང་སྦྲེལ་ཏེ། དབང་ཆེ་ཆུང་རྣམས་དང་པོད་ལུང་ཡོངས་རྫོགས་མཛད། རྒྱལ་དབང་པདྨས་ལུང་ཟིན་གླང་ནག་གཏེར་སྟོན་ཡང་དེར་ཕེབས། བྲག་གཡབ་དང་
མཆོད་ཡོན་བསྒྲིགས། བི་མའི་སྨན་ཐོད་དང་། མཁན་ཆེན་གྱི་སྤྱི་བླུགས་ཚེ་ཆུའི་བཅུད་ལྡན་འཛད་མེད་ཀྱི་དྲི་ཞིམ་ཅན་དང་། སྒྱུ་འཕྲུལ་ཞི་ཁྲོའི་གཏེར་ཤོག་བཅས་བླངས་ནས་དེ་མ་ཐག་འབེབས་བཤུ་མཛད། ཕུར་པའི་ཆོས་སྐོར་གསར་དུ་ཐོན་པའང་གཏེར་སྟོན་ཉིད་ཀྱིས་དབང་ལུང་མཛད། རྗེ་འདི་ཉིད་དང་། བྲག་གཡབ་ནོ་མི་ཧན་གཉིས་ཆོས་ཀྱི་བདག་པོར་ལུང་གིས་བསྔགས། ཟླ་བ་དགུ་པའི་ཚེས་མགོ་ནས། མགྲོན་གཉེར་བྱམས་པ་ཕུན་ཚོགས་དཔོན་གཡོག་ཁ་ཤས་ཀྱིས་ཞབས་ཕྱི་ཞུས་ནས་དགུན་ལྡོམ་དང་ཕྱོགས་སྦྲགས་བྲག་གཡབ་མ་དགོན་དབྱེན་མདོ་དགོན་ཆེན་དུ་ཕེབས། དེར་སྔར་འཁྲུག་པ་ཆེ་བའི་སྐབས། མི་རྟ་སྟོང་ཕྲག་ཉེ་བ་གྲི་ཤིར་སོང་བ། དེ་ལ་དམིགས་ཏེ་རྗེ་ཉིད་དཔོན་སློབ་འཁོར་བཅས་ཀྱིས་ཀར་གླིང་ཞི་ཁྲོའི་གནས་འདྲེན་དང་། བླ་མཆན་རྟ་མགྲིན་གྱིས་གཅོད་འདུལ་གཤེད་ཕྲལ་དང་བཅས་ཉིན་ཁ་ཤས་ལ་མཛད། དེ་ནས་སླར་འཁྲུག་སྲི་མི་འཕར་བའི་ཆེད་དུ་ཆོས་དབང་གཏེར་བྱོན་ཕུར་པ་སྤུ་གྲིའི་སྒོ་ནས་དགྲ་དུར་ཕུང་གསུམ་མནན་པ་ཚད་ལྡན་མཛད། ས་དམིགས་ལ་མནན་པ་བྲུབ་པའི་ནུབ་མོ་ཉི་ཐལ་ལ་གཉེར་པ་ཨ་འགྲུབ་གཙོས་པའི་རྐྱ་བ་བཞི་བཅུ་ཙམ་མནན་པའི་སྟེང་དེར་ཐིམ་སོང་བ་ཀུན་གྱིས་མཐོང་ཆོས་སུ་གྱུར་བས། ཐམས་ཅད་ཀྱིས་རྟེན་འབྲེལ་ལེགས་ཉེས་སྣ་ཚོགས་སུ་གླེང་། གཙུག་ལག་ཁང་དང་རྟེན་གསུམ་རྣམས་ལ་ཟབ་ལམ་བདེ་གཤེགས་ཀུན་འདུས་དང་འབྲེལ་བར་རབ་གནས་དགེ་ལེགས་འདོད་འཇོ་དངོས་སྟ་ཞག་ཆོད་ཉིན་གསུམ་མ་མཛད།
སྔར་གྱི་དཔེ་མཛོད་ཆེན་པོ་ཞིག་འདུག་པ་དེ་ནང་པོད་འགའ་ཞིག་ལ་ཉི་མ་ཡ་ཟུང་གཟིགས་མོ་མཛད། དེ་ནས་བུ་དགོན་བྱམས་མདུན་ལ་ཕེབས། གཤིན་གསོན་ཐམས་ཅད་ལ་ཕན་པའི་སྒྲུབ་ཕྲིན་དུ་མ་མཛད། འཁྲུག་སྲི་གཙོར་བཏོན་གྱི་མནན་པ་སྨིན་གླིང་གཏེར་བྱོན་འཇམ་དཔལ་གཤིན་རྗེ་དྲེགས་པ་འཇོམས་བྱེད་ཀྱིས་གནང་བས། ཟོར་རྒྱག་སྐབས་སེར་སྦྲེང་པ་རྣམས་དང་། ཁྲོམ་ཚོགས་མཆོག་དམན་ཕོ་མོ་སྐར་ཚོགས་ལྟ་བུའི་དབུས་སུ་ཟོར་རྣམས་རིམ་པར་འཕངས་པས། སྣ་ཚོགས་ཟོར་ཀོང་ཕྱག་ཏུ་བསྣམས་པ་དང་མེ་དངོས་སུ་འབར། ཟོར་ཁང་དུ་འཕངས་བས་ཟོར་མེ་རང་འབར་དུ་སོང་བས་རང་གཞན་དེར་འཁོད་ཐམས་ཅད་ངོ་མཚར་བའི་གནས་ལ་བཀོད། སྔགས་རྙིང་མའི་ཆོས་ལ་གྲུབ་པའི་རྟགས་དངོས་སུ་བསྟན་པས་སྙན་པའི་གྲགས་པས་རྒྱལ་ཁམས་ཡོངས་ལ་གསལ་བར་བྱས། བྱམས་པ་རང་བྱོན་ལ་མཆོད་འབུལ་དང་། ཞབས་སྐོར་ཉིན་ཁ་ཡར་ལ་མཛད། རབ་གནས་དགོས་ཞེས་ཞུས་བྱུང་བ་སྔར་ལྟར་གནང་། མཆོད་ཡོན་ཚང་མས་དགའ་སྐྱིད་ཀྱི་དཔལ་ལ་ལོངས་སྤྱོད་ཅིང་ལྷ་མི་ཡོངས་ལ་དགྱེས་པ་མཆོག་ཏུ་བསྐྱེད་པའི་མཛད་བཟང་གྲུབ། དེ་ནས་རྒྱ་ཚུགས་བརྒྱུད་དེ་མཛེས་བཅུ་ཚང་སར་ཕེབས། སྔ་མོ་ཚ་བོ་ལོ་བཅུ་སྐོར་ལོན་ནས་ཤི་སོང་བའི་ཕུང་པོ་དོང་དུ་བཅུག་སྟེ་ལོ་དུ་མ་སོང་བའི་རུས་པ་ཁ་བ་དང་དུང་ལྟར་དཀར་བ་སླར་ཕྱུང་བ་ལ་སྦྱོང་ཆོག་དང་སྦྱིན་སྲེག་གནང་། འདིའི་སྐྱེ་སྔོན་རྫོགས་ཆེན་དབུ་མཛད་བུ་བུ་ཟེར་བ་དེ་ཡིན། དེས་ཕྲན་ལ་དུས་རྒྱུན་ཡག་
པོ་བྱས་པས། ད་རེས་རུས་བུ་འདི་ལ་བརྟེན་ནས་ཁོ་རང་ལ་ཕན་བཟང་པོ་ཐོགས་ཡོད་པས་བཟང་དྲིན་འཁོར་བ་ཡིན་གསུངས། དེ་འདྲ་བ་མི་རང་གཉིས་ཡུལ་གང་དུའང་གསུང་བ་ཉེ་བར་གནས་པ་རྣམས་སོགས་སུས་ཀྱང་ཐོས་མ་མྱོང་བས་ཐམས་ཅད་ཐེ་ཚོམ་མེད་པར་གྱུར། རྗེ་ཉིད་སྔར་ངེས་མེད་ཀྱི་སྤྱོད་པ་བསྐྱངས་སྐབས་གནས་མཆོག་ཁ་བ་དཀར་པོ་མཇལ་ཏེ་ལྷ་ལྡན་ལ་ཆིབས་སྐྱོད་གནང་བའི་ལམ་བར་ལ་མཛེས་བཅུ་ཚང་ཕ་རྒན་བསོད་རྡོག་ཟེར་བ་འབྱོར་པ་ཆེ་ཞིང་ཕན་སེམས་ཁྱད་པར་ཅན་དང་ལྡན་པ་ཞིག་ཡོད་པ་དེས་གནས་མཇལ་བ་ཀུན་ལ་མཐུན་རྐྱེན་གང་དགོས་སྒྲུབ་མཁན་ཞིག་ཡིན་པ་དེས་གདན་ཞུས་བྱས་ནས་གསོལ་ཆས་གང་དགོས་དང་ཚུགས་མལ་གཅིག་གཉིས་ལ་ཆིབས་རྟ་དྲེལ་གྱིས་སྐྱེལ་མ་ཞུས་པའི་མཆོད་ཡོན་རྙིང་པ་གྱུར་གཤིས་ཞག་འགའ་ཞིག་བཞུགས། དེ་ནས་ཡར་བྱོན་ཏེ་ལྔ་མཆོད་ཉིན་ཚོགས་བརྒྱ་རི་ཁྲོད་ལ་འབྱོར། བླ་མ་མཆོད་པ་དང་དཔའ་བོའི་དགའ་སྟོན་ཟབ་རྒྱས་མཛད། གཞན་ལམ་འཁོད་ཀྱི་དད་ལྡན་ཀུན་ལ། ཁྲོམ་དབང་དང་། གཅོད་ཐུན། འཕོ་ལུང་། བཀའ་བསྒོ། བྱིན་རླབས་གདན་ཞུས་སོགས་གང་ཞུས་ཐམས་ཅད་ལ་ཆོས་ཀྱི་སྦྱིན་པས་རེ་བའི་ཤིང་རྟ་ཕྱུར་བུར་བཀང་། འབྲུ་ལྡོམ་དང་འབུལ་ནོད་རྒྱ་གང་ཆེ་ཕྱག་ཁར་སྨིན། དེ་མཚམས་སུ་ཆབ་མདོའི་གདན་ཞུས་མགྲོན་གཉེར་ཆེད་བཏང་འབྱོར་ཀྱང་མི་ཕེབས་རྒྱུ་ཐག་བཅད་ཀྱི་བཀའ་མོལ་དང་ཞུ་རྒྱ་ཕུལ་བས། གཡོ་མདའ་ཆོས་རྗེ་ངག་དབང་འཇམ་དབྱངས་དབང་ལུང་ཞུ་སར་ཆེད་བཏང་མཛད། དེ་ནས་
ཟླ་བ་བཅུ་གཅིག་པའི་ཚེས་མགོ་ནས་དབུ་བརྩམས་ཏེ། རྙིང་མ་རྒྱུད་འབུམ་དང་། བསྟན་འགྱུར་ལུང་རྒྱུན་ཡོད་རིགས་སོགས་དང་། མདོ་སྒྱུ་སེམས་གསུམ་གྱི་གཙོས་བཀའ་མ་སྐོར་གྱིས་དབང་ལུང་དང་། མངའ་བདག་ཉང་། ཆོས་དབང་། རཏྣ་གླིང་པ་སོགས་གཏེར་སྟོན་ཡོངས་སུ་གྲགས་པ་ཕལ་མོ་ཆེའི་ཆོས་སྐོར་དང་། ཁྱད་པར་དུ་རྒྱལ་མཆོག་ལྔ་པའི་དག་སྣང་རྒྱ་ཅན་ཚང་མ་དང་། སྨིན་གླིང་གཏེར་བྱོན་ཡོངས་རྫོགས་ཀྱི་དབང་ལུང་གདམས་ཁྲིད་བཞུགས་རིགས་རྣམས་ཞིབ་པར་གནང་། བྲག་གཡབ་ནོ་མི་ཧན་མཆོག་གསང་སྔགས་རྙིང་མའི་ཆོས་དང་གང་ཟག་ལ་རྒྱུ་མཚན་ཤེས་པས་དད་པ་དང་དག་སྣང་ལྷག་པར་ཐུགས་ལ་འཁྲུངས་ནས་རྙིང་མའི་གྲྭ་ཚང་ཞིག་གསར་དུ་འཛུགས་རྒྱུ་གནང་བ་དེ་ལ་སྨིན་ལུགས་གཙོར་བཏོན་གྱིས་སྒྲུབ་པ་ཆེན་པོ་བཀའ་བརྒྱད་སོགས་ཀྱི་སྒྲུབ་ཕྲིན་སྣ་ཚོགས་པའི་ཕྱག་བཞེས་དང་། གདངས་དབྱངས། རོལ་མོ། འབུད་ཚིགས་སོགས་ཞིབ་པར་བསླབས། སྤྱིར་བསྟན་འགྲོའི་དོན་ཆེན་དང་བྱེ་བྲག་གྲྭ་ཚང་གསར་བཏབ་ལ་སྒྲིག་ལམ་དགོས་ངེས་ཕྱིར། ཡོན་མཆོད་གྲོས་བསྟུན་གྱིས་བཀའ་བརྒྱད་བདེ་གཤེགས་འདུས་པའི་སྒྲུབ་ཆེན་ཕྱག་ལེན་རྒྱས་པའི་ལུགས་དང་འབྲེལ་བ་བདུད་རྩི་སྨན་སྒྲུབ་ཆེན་མོ་བདུན་ཕྲག་གཉིས་ལ་མཛད། གྲོལ་དབང་དང་མཆོག་དམན་ཡོངས་ལ་སྨན་འགྱེད་རྒྱུ་བཅས་ཀྱིས་མཐའ་རྒྱས་ལེགས་པར་གྲུབ། གྲྭ་ཚང་གསར་བུ་ཞུགས་པ་འགའ་ལ། རབ་བསྙེན་དང་བྱང་སྡོམ་འབོགས་པ་སོགས་གནང་། མདོར་
ན་དབང་ལུང་ཐུགས་བབ་གང་དགོས་དང་། བསྟན་འགྲོའི་བདེ་ལེགས་སྤེལ་བའི་ཐབས་སྣ་ཚོགས་ཀྱི་རིམ་གྲོ་རྣམས་གནད་སྨིན་ལེགས་པར་གྲུབ་ནས། ཁྲུམས་ཟླའི་ནང་ད་དུང་བཞུགས་དགོས་ཀྱིས་བཤོལ་མ་ལན་གྲངས་ཞུས་ཀྱང་། ད་ནི་མི་རྒན་པོ་རང་ཡུལ་ལ་སོང་ན་མི་རང་གཉིས་ཆར་ཤིན་ཏུ་ལེགས་པ་ཡིན་གསུངས་ནས་བྱོན་རྒྱུ་ཐག་ཆོད། དེ་མཚམས་ནས་ཆབ་མདོའི་བླ་མཆན་ནས་དབང་ཡོན་དངོས་པོ་རྒྱ་གང་ཆེ་ཕུལ་ཏེ་རང་ཡུལ་དུ་ལོག །ནོ་མི་ཧན་མདུན་ནས་བཀའ་གདམས་ཕ་ཆོས་བུ་ཆོས་སོགས་དབང་ལུང་མང་ཞིག་ཐུགས་བྲེལ་ཆེ་རུང་སྟབས་ནམ་བདེར་བབ་བསྟུན་ཏེ་གསན་བཞེས་མཛད། བྲག་གཡབ་གཞུང་ནས་འབུལ་བ་དངུལ་རྡིལ་ཚད་བཅུ་གཅིག །གསེར་རྡིལ་ཚད་གཅིག །རྟ་ཉི་ཤུ། མཛོ་མཛོ་མོ་སུམ་ཅུ་སྐོར་ལ། ཐོག་མའི་ཚན་གྲངས་ལྷ་རྫས་ནང་མཛོད་སྲིད་དུ་རིང་བ་དང་། བདེ་བར་གཤེགས་པའི་སྐུ་གསུང་ཐུགས་རྟེན་གྱིས་མདུན་བསུས་ཏེ། ཟམ་ཡུག་སྣ་ལྔ། ལིང་ཡུག་སྣ་ལྔ། གོས་ཡུག་སྣ་ལྔ་སོགས་དར་ཟབ་རིགས་དུ་མ་དང་། གཅན་གཟན་སྣ་ཚང་གི་ལྤགས་པ་སོགས་ཚན་གྲངས་བརྒྱ་ཕྲག་གསུམ་དང་། གཞན་དབང་ཆོས་གསན་རིགས་ཀྱིས་རང་འཁོས་བསྟུན་པའི་འབུལ་ནོད་དུ་མ་བཅས་དང་། ནོ་མི་ཧན་མཆོག་གི་མདུན་ནས་ཐུགས་དགྱེས་པའི་རྩེར་སོན་པའི་ལེགས་འབུལ་སྐུ་གསུང་ཐུགས་རྟེན་ཁྱད་པར་ཅན་གྱིས་ཐོག་དྲང་པའི་དངོས་པོ་རིན་ཐང་ཅན་འགའི་གནང་སྐྱེས་མཛད་དེ། མཆོད་ཡོན་བླ་སློབ་འབྲལ་དཀའ་ཙམ་གྱི་ངང་ནས་རང་ཡུལ་དུ་ལྡོག་པ་ལ། སྔར་ཆིབས་བསུས་ཀྱི་གོ་རིམ་
ལྟར། ཆིབས་སྐྱེལ་ཡང་རིམ་པ་གསུམ་གྱིས་འགྲམ་ཐོག་ཕྱག་མཛོད། མགྲོན་གཉེར་བྱམས་པ་ཕུན་ཚོགས་དཔོན་གཡོག་བརྒྱ་ཤོག་གིས་བསྡུ་རུ་ནང་བར་དང་། མཛེས་བཅུ་དཔོན་དཔོན་འཁོར་ལྔ་བཅུ་སྐོར་གྱིས་ང་ཐོབ་གཞུང་དང་། ཁང་མདོ་དཔོན་སྦྱིན་པ་དང་། དྲུང་ཡིག་དོན་གྲུབ་བཀྲ་ཤིས་དཔོན་གཡོག་རྣམས་ཀྱིས་ལྷོ་པདྨ་རུ་བའི་ནང་བར་བྱོན། ལམ་བར་ནས་སྒ་ཉག་དགོན་དུ་ཕེབས། སྔར་ནས་མཆོད་ཡོན་ནང་གཤིན་ཡིན་ནས་ཡིན་བཞིན་ཆིབས་བསུ། སེར་སྦྲེང་སོགས་ཀྱིས་བསྙེན་བཀུར་དང་བཅས། ཁམས་སྤྲུལ་རིན་པོ་ཆེ་སྒྲུབ་བརྒྱུད་ཉི་མའི་སྐུ་གདུང་ལ་རབ་གནས་མཛད། བླ་བྲང་གིས་ལེགས་འབུལ་དང་གསོལ་སྟོན་ཞིབ་ཆ་ཞུས། ཕུག་ཏི་སྒྲུབ་སྤྲུལ་མདུན་ནས་ཁམས་སྤྲུལ་རིན་པོ་ཆེའི་བཀའ་འབུམ་ཚང་མའི་ལུང་གསན། དེ་ནས་རིམ་པར་ཕེབས་པས་ལྷ་ཐོག་སྒར་དུ་གསོལ་སྟོན། དབང་ཆོས་གང་དགོས་གནང་། དེ་ནས་རིམ་པར་ལམ་འཁོད་ཚང་མས་བསྙེན་བཀུར་དང་། ཆོས་འབྲེལ་གང་དགོས་གནང་སྟེ་སྔར་ནས་མཆོད་ཡོན་འབྲེལ་ཟབ་ཀྱི་མུས་སྐྱོང་གིས་ལྷོ་ཁོག་ནས་མཁར་སུམ་མདོའི་གྲུ་ལམ་བརྒྱུད་དེ། སྡེ་དགེ་ཆོས་རྒྱལ་ཆེན་པོ་བྱང་སྒར་ལྷ་ལུང་ཁུག་ཏུ་བཞུགས་པར་མཆོད་ཡོན་ཞལ་འཛོམས་མཛད། ཆབ་བྲག་སྒ་ཉག་སྐོར་སོགས་ལ་དམ་པ་ཆོས་ཀྱི་དགའ་སྟོན་སྤེལ་ཚུལ་གྱིས་སྙན་སྒྲོན་རྣམས་རིམ་པར་ཕུལ་བ་དང་། བྲག་གཡབ་པས་སྔ་མ་བླ་མ་གདན་ཞུས་མི་འབྱུང་བའི་རྒྱུ་མཚན་སྣ་ཚོགས་པའི་ལན་དུ་ད་རེས་བླ་མ་བྱོན་ཞིང་ཆོས་ཀྱི་བཀའ་དྲིན་ལེགས་པར་བསྐྱངས་ཚུལ་གྱི་ཞུ་རྒྱ་ལེགས་སྐྱེས་
བཅས་ཡོད་པ་ཕྱག་ཁར་ཕུལ་བས་རྒྱལ་བློན་འཁོར་བཅས་ཀྱིས་ཐུགས་དགྱེས་ཀྱི་གསུང་བཟང་དང་། དགའ་སྟོན་ལེགས་སྐྱེས་སྣ་ཚོགས་མཛད། ལྕགས་ཕག་ཟླ་བ་དགུ་པའི་ནང་ཞེ་ཆེན་དུ་གཞི་བྱེས་གདན་ལེགས་པར་འཛོམས་ནས། བླ་བྲང་གི་གཉེར་ཕྱག་རིགས་ལ་དངོས་རྫས་རྣམས་སོ་སོར་སྤྲད། རི་ཁྲོད་དང་དགོན་ཆེན་གྱི་མགོན་ཁང་སོ་སོར་གཏང་རག་གི་ཚོགས་དང་བསྐང་གསོལ། འདུས་པ་ཡོངས་ལ་ཕྱག་འགྱེད་དང་། མཚམས་པ་བཞུགས་རིགས་ལ་ཐུན་མིན་གྱི་གནང་སྦྱིན་བཅས་ལེགས་མཛད་མཐར་ཕྱིན་པར་མཛད། དེ་ནས་དགུན་ཚེས་དེར་སྡོམ་མཚམས་ལྟ་བུའི་སྐུ་ངལ་གསོའི་ཚུལ་གྱིས་ཞེ་ཆེན་བླ་བྲང་དུ་བཞུགས། དེ་སྐབས་སུ་བྲག་གཡབ་ཕྱོགས་ལ་སྔར་རྒྱ་བོད་ཀྱིས་ཆོད་ཁྲའི་ནང་བསྟན༵་སྲིད༵་བད༵ག་པོ༵་ནོ༵་མི༵་ཧན༵་དཔ༵ལ་ལྡན༵་འཇི༵གས་མེ༵ད་བསྟན༵་པ༵འི་རྒྱ༵ལ་མཚ༵ན་མ་གཏོགས་གཞན་མེད་པ་དང་། ཁོང་གིས་ལེགས་མཛད་མང་པོ་བསྒྲུབས་པ་སྐུ་ཆུང་ཕྱོགས་མི་མང་ཞིག་གི་སེམས་ལ་མ་བབ་སྟེ། ཕྲག་དོག་གདུག་པའི་སྟོབས་ཉེ་བར་གནས་པ་བློ་ཤིན་ཏུ་ཆུང་བ་འགའ་རྒྱུ་རྫས་ཕོངས་མེད་ཀྱིས་བསླུས། ཁོ་རང་རྣམས་དམག་ཆས་འོང་ནས། ནོ་མི་ཧན་བླ་མ་དགོངས་འདུས་ཀྱི་སྐུ་མཚམས་ལ་བཞུགས་པའི་གཟིམ་ཁང་དུ་གཤེད་མ་བརྒྱ་ཕྲག་ཙམ་གྱིས་མདུང་དང་། སྟྭ་རེ་སོགས་མཚོན་ཆ་སྣ་ཚོགས་ཐོགས་སྟེ་གསོད་པའི་ལས་བརྩམས་པས། མཚོན་གྱི་བྱ་བ་ཐམས་ཅད་ཆུ་དང་། སྲ་མཁྲེགས་ཕ་ཝོང་ལ་བྱས་པ་ལྟར་རྨ་ཕྲ་མོ་ཙམ་ཡང་མ་བྱུང་།
མགུལ་ཐག་པས་བསྡམས་ཀྱང་ཉམས་ཉེས་པར་མ་གྱུར་པ། ལ་ལ་དག་འདི་འདྲ་བ་ལ་མནོལ་ཕབ་དགོས་ཟེར་གྲོང་ནས་ཡུགས་ས་མ་ཞིག་གི་གོས་ཁྱེར་འོངས་ནས་བསྐོན་ཏེ། སླར་ཡང་མཚོན་རྣམས་བསྣུན་པས་ཀྱང་སྔ་མ་ལྟར་ལས་ཅིར་ཡང་བྱར་མེད་པས། ཁོང་རྣམས་ག་ཆད། ནམ་ལངས། གྲོང་མི་རྣམས་བྱིངས་འུར། གཤེད་མའི་ཚོགས་རང་ཁྱིམ་དུ་བྲོས། སླད་ནས་མཚོན་གྲིབ་ཀྱིས་ཟླ་བ་གཅིག་གཉིས་བསྙུན་ན་ཡང་། ཞེ་ཆེན་བླ་མཆན་རྟ་མགྲིན་གཤོང་ནག་རི་ཁྲོད་དུ་བཞུགས་པ་གདན་འདྲེན་ཞུས་ཏེ། བྱབ་ཁྲུས་དང་། ཚེ་སྒྲུབ་སོགས་ཞབས་བརྟན་ཕུལ་བས་ཟླ་བ་སྤྲིན་བྲལ་ལྟ་བུར་གྱུར། འཕགས་ཡུལ་གྲུབ་ཆེན་རྣམས་དང་། རྗེ་བཙུན་བཞད་པ་རྡོ་རྗེ། ཀརྨ་པཀྵི། ཞབས་དྲུང་པདྨ་ཕྲིན་ལས་སོགས་དང་གྲུབ་པའི་རྟགས་མཚན་ངོ་མཉམ་པའི་གྲགས་པ་འབར། སྔ་འགྱུར་གྱི་ཆོས་ལ་ཡིད་ཆེས་ཀྱི་དད་པ་མཆོག་ཏུ་ཐོབ། ཨོ་རྒྱན་རྡོ་རྗེ་འཆང་ལ་གསོལ་བ་བཏབ་པའི་ཐུགས་རྗེ་གློག་ལྟར་མྱུར་བ་ཡིན་ནོ་ཞེས་པ་ནི་ངེས་པར་བདེན་པ་ཉིད་དོ་ཞེས་ལྷ་མིའི་འཇིག་རྟེན་ན་དབྱར་གྱི་རྔ་གསང་ལྟར་སླར་ཡང་གྲགས་པར་གྱུར་ཏོ། །ཆུ་བྱི་གནམ་ལོ་གསར་འཆར་གྱི་ཟླ་བ་དང་པོའི་ནང་རྫོགས་ཆེན་དགོན་དུ་བྱོན་ནས་ཕྲན་གྱི་ཁུ་བོ་ཕྱག་མཛོད་ཨ་ཆོས་སྔ་ལོ་ལྔ་ལམ་དུ་སོང་བའི་དགེ་རྩར་རྫོགས་ཆེན་པ་ཚོགས་པ་བརྒྱ་ལྷག་གི་དབུ་བཞུགས་མཛད་ནས་ཞི་ཁྲོ་གནས་སྟོང་བྱས། དེ་ནས་རྫོགས་དགོན་དུ་བཞུགས་ཏེ་རྫོགས་ཆེན་རིན་པོ་ཆེའི་མདུན་ནས་གཏེར་ཆེན་ཉི་མ་གྲགས་པའི་ཆོས་སྐོར་ཡོངས་རྫོགས་ཀྱི་དབང་ལུང་
གདམས་ཁྲིད་ཇི་སྙེད་ཅིག་བཞུགས་པ་ཐམས་ཅད་ལྷག་ལུས་མེད་པར་གསན་བཞེས་མཛད་ནས། སྤྱིར་ཉི་གྲགས་ཆོས་སྐོར་འདི་ཚིག་དོན་ཕུན་སུམ་ཚོགས་པ་དང་། མ་ཟད་ཉི་གྲགས་དང་ཞེ་ཆེན་རབ་འབྱམས་པ་གཉིས་བླ་མ་གཅིག་གིས་བསྡུས་པའི་མཆེད་གྲོགས་ཡིན་སྟབས་ཀྱིས་རང་རེ་ཞེ་ཆེན་པས་ཀྱང་གསན་བསམ་མཛད་འོས་ལ། ད་སྔོན་དེ་འདྲ་མ་རེད་པ་ད་རེས་ཕྲན་གྱིས་ཞུ་རྒྱུ་བྱུང་བ་འདི་སྤྱིར་བསྟན་པའི་མིག་སྲོལ་ལེགས་པ་དང་། ཁྱད་པར་རང་ཡང་བགྲང་བྱ་མཐོ་ཐོག་རྫོགས་ཆེན་རིན་པོ་ཆེ་བླ་མ་ཆོས་ཟད་བློ་འདས་ཀྱི་དགོངས་པ་མངོན་དུ་གྱུར་པའི་མདུན་ནས་བླ་རྫོགས་ཐུགས་གསུམ་གྱི་དབང་ཆོས་ཐམས་ཅད་ཉེ་བརྒྱུད་སེལ་མེད་ཐོབ་པ་འདི་ནི་འཆི་ཁའི་མ་ཎི་རྟ་རིན་མ་ཟེར་བའི་དཔེ་ཡིན་པས་ཤིན་ཏུ་ལེགས་གསུངས་ནས་ཐུགས་དགྱེས་པའི་རྩེར་སོན་ཏེ་ཕྱིར་ཕེབས། དེ་མཚམས་བདག་པོ་སྡེ་དགེའི་མདུན་ཞེ་ཆེན་རབ་འབྱམས་ཀོང་ཡུལ་དུ་བཞུགས་ཡོད་པ་ཕྱིར་བྱོན་དགོས་ཞུ་སར་ཞེ་རྫོགས་ཀྱི་མགྲོན་གཉེར་དཔོན་གཡོག་ཁ་ཤས་ཆེད་བཏང་དགོས་གསུངས་པའི་བཀའ་ཕེབས་ཐོག །རྫོགས་ཆེན་ནས་ཕྲན་གྱི་ནུ་བོ་ནོར་བཟང་དཔོན་གཡོག་དང་། ཞེ་ཆེན་ནས་མགྲོན་གཉེར་བསྟན་འཛིན་དབང་རྒྱལ་དཔོན་སྟོབས་གསུམ་བཏང་བའི་གྲོ་ཆས་སོགས་དགོས་བྱ་རྣམས་བསྒྲུབས་ཏེ་ལམ་དུ་བཞག ། དབྱར་ཐོག་འབྲོག་རུ་ཞེ་མཛེས་སྐོར་ལ་ཐུང་ལྡོམ་ཞིག་ཕེབས། རྫ་ཆུ་ཁ་བའི་བླ་གྲྭ་འགའ་ཞིག་དང་། བརྡ་གྲ་ལག་དགོན་པའི་ཆོས་ཞུ་པ་རྣམས་ལ་དབང་ལུང་
དུ་མ་མཛད། དགུན་བསོད་རྫ་རྒྱུད་ལ་སྐོར་ཙམ་བྱོན། འདི་སྐབས་ཤིག་ལ་དགོན་ཆེན་ལུག་ར་བླ་མ་འཇམ་དབྱངས་ཡོན་ཏན་བྱོན། དེ་སོགས་འགའ་ལ་སྒྲ་དབྱངས་ཅན་མའི་རི་མོ་བསླབས། དགུན་ཁར་ཞེ་ཆེན་བླ་བྲང་དུ་སྐུ་མཚམས་ལ་བཞུགས། གླང་ལོའི་དཔྱིད་ཐོག་རྫོགས་དགོན་དུ་ཁྱུག་ཙམ་ཕེབས་ནས་ཕྲན་ཚང་སོགས་རྐྱེན་སེལ་དུ་དབང་གནས་འདྲེན་བསྒྲུབ་བཟློག་སོགས་འགའ་ཞིག་མཛད་ནས་ཕྱིར་ཕེབས། དེའི་དབྱར་ཐོག་དང་པོ་འབྲོག་རུ་བཀྲ་ནང་སོགས་ལ་ལྡོམ་སྐོར་མཛད་སྐབས། མཆོག་དམན་གྱི་ཡོན་བདག་ཕོ་མོ་ཐམས་ཅད་ལ་ཕྲན་འདི་ལོ་ནི་འཆི་བའི་ལམ་པོ་ཆེར་ཞུགས་ངེས་པར་ཐག་ཆོད་པ་ཡིན་གསུངས་ནས་ཞལ་ཆེམས་ལྟ་བུའི་བརྗོད་འོས་རིགས་སྣ་ཚོགས་གསུངས་པ་ཀུན་རང་བཞིན་བརྗོད་འདོད་ལྟ་བུ་ཡིན་ནམ་ངེས་པར་ཡིན་ཆ་མ་མཆིས་པ་ལྟ་བུའི་ངང་དུ་ལུས། དེ་འཕྲལ་བརྡ་གྲ་ལག་དགོན་དུ་མགྱོགས་སྐོར་ཞིག་ལ་བྱོན། དེ་སྐབས་ཡང་མཆོད་ཡོན་འབྲེལ་འདྲིས་ཡོད་རིགས་ལ་ཕྲན་འདི་ལོ་ནི་འཆི་བ་ཡིན་ངེས་སོ། །ཞེས་ཞལ་འདོན་ལྟ་བུ་མཛད་ནས་གསུངས་པས། གྲྭ་པ་རྣམས་ཀྱི་སེམས་ལ་འདི་ཙམ་ལན་གྲངས་བཟླས་ཏེ་གསུངས་པ་ལ་དགོས་པ་ཅི་ཡོད་ཟེར་ནས་ཅུང་ཡིད་མ་རངས། ཚུར་འཁོར་ནས་རྫ་ནམ་མདོའི་གྲུ་ཁ་ལ་སླེབས་པ་ན། ནམ་མདོ་ཁྱིམ་ཆུང་ཟེར་བའི་ཁྱིམ་འཛིན་མ་མ་འཚོ་སོང་བ་དེར་གདན་ཞུས་ལ་ཕེབས། ད་ནི་གླིང་གཏེར་པདྨ་འགྲོ་འདུལ་རྩལ་གྱིས་ཕྲན་ལ་ལུང་བསྟན་མཛད་རིགས་
ཐམས་ཅད་ཇི་ལྟ་བ་བཞིན་ཐོག་ཏུ་ཁེལ་བ་ཡིན། ད་རེས་བྱ་བ་ཐ་མའི་གནས་སྐབས་ཀྱི་ལུང་བསྟན་གནང་བའང་ཕལ་ཆེར་མངོན་དུ་གྱུར་བྱུང་གསུངས་ནས། ཞེ་ཆེན་བླ་བྲང་དུ་བྱོན་ཏེ་ཞག་ཤས་མཚམས་སུ་ཕྲན་གྱིས་ད་སྔོན་ནི་རང་ནུས་གང་ཡོད་ཀྱིས་ཞེ་ཆེན་བསྟན་དགོན་ལ་ཞབས་ཕྱི་ཞུས་པ་ཡིན། ད་ཕན་རོ་གུད་ཞིག་བརྒྱབ་ན་མི་ལེགས་འདུག་པས། ཕྲན་རི་ཕུག་ཅིག་ཏུ་ཤི་ན་ཤིན་ཏུ་བཟང་འདུག་གསུངས་ནས། ཞེ་ཆེན་ཕུའི་ཤ་འཁྲི་ནང་ཟེར་བ་དེ་ན་བྲག་ཕུག་ཅིག་ཡོད་ཟེར་བ་དེར་འདུག་ལོ་མིན་ལྟ་བར་འགྲོ་དགོས་གསུངས་ནས་དཔོན་གཡོག་གཉིས་བྱོན། ལམ་བར་ན་རབ་གསལ་ཚང་ཟེར་བས་ཇ་ཞུས་བྱས་ནས། འདི་ནས་གང་དུ་བྱོན་པ་ཡིན་ཞུས་པ་ལ་རྒྱུ་མཚན་རྣམས་གསུངས་པས། ཤ་འཁྲི་ལ་ང་རང་རྒྱུས་ཆེ་བཞུགས་ལོ་ས་གཏན་ནས་མེད། ཁྱེད་ད་ལྟ་སྐུ་ཁམས་བསྙུན་གཞི་ལྟ་བུ་ནི་གང་ཡང་མི་གདའ། འདས་དོན་རང་ཅི་ཡོད། གལ་སྲིད་འདས་ནའང་ཞེ་ཆེན་བླ་བྲང་དུ་འདའ་བ་ལས་འོས་ཅི་ཡོད། ཚེ་གཅིག་སྡོད་གནས་གང་དུ་འཆི་བའང་ཕལ་ཆེར་དེར་འཆི་བ་ཡིན་ཟེར། དེ་འཕྲལ་ཕྱིར་བྱོན་མཛེས་ཆུང་ངུ་དགོན་གྱི་བྲག་ཆེན་རི་ཁྲོད་དུ་ཉེ་ཐུང་གིས་བྱོན། དཔོན་གཡོག་གསུམ་བྱས་ནས་དེར་བཞུགས་གདན་འཇགས་པ་དང་། ཀཿ ཐོག་སི་ཏུ། མདོ་སྨྱོན་སྤྲུལ་སྐུ་དབང་ལུང་མང་ཞིག་ཞུ་ཕྱིར་དང་། ཞྭ་སེར་བསྟན་པའི་རྒྱལ་མཚན་འཛིན་པ་ཇོ་བོ་སྤྲུལ་སྐུ་སྒྲ་སོགས་རིག་གནས་དང་། མདོ་སྔགས་ཀྱི་གཞུང་འགའ་ལ་བསླབ་སྦྱང་མཛད་དགོངས་ནས་ཕེབས། རི་
ཁྲོད་ཀྱི་ཞོལ་དུ་གུར་དང་། སྦྲ་ཆུང་གིས་བཀང་ནས་བཞུགས་པ། ཟླ་བ་གཉིས་ལྷག་ཙམ་ལ་དབང་ལུང་དང་། ཕྱི་ནང་གི་རིག་གནས་སློབ་སྦྱོང་སྣ་ཚོགས་མཛད། དེ་མཚམས་ནས་ཁོང་ལ་དུས་རྒྱུན་སྲིན་ནད་ཅིག་ཡོད་པ་འཕར་ཏེ། བསྙུན་ཟུག་ཆེར་མེད་པ་ལ་ཞལ་འགྲམ་གཡོན་ཕྱོགས་ལ་སྐྲང་པ་ཆེ་བ་ཞིག་གི་གཞི་བཅས། རྫོགས་ཆེན་རིན་པོ་ཆེ་དང་། རྒྱལ་ཚབ་སྤྲུལ་སྐུ་སོགས་རང་གཞན་གྱི་ལྷ་བླའི་རིགས་ལ་བརྟགས་པ་ཞུས་རིགས་ཀྱི་རིམ་གྲོ་རྣམས། ཞེ་ཆེན་བླ་བྲང་དང་། དགོན་སྟོད་བླ་མ་དོན་དཔལ་བཅས་ཀྱིས་བསྒྲུབས་པར་མཛད་ཀྱང་ཇེ་ཐུ་ལྟ་བུ་ལས་ཡར་དྭངས་མ་སོང་བ། ཕྲན་བུ་ཡང་དེར་བསྙུན་འདྲི་ལ་སོང་བ། ད་དུང་ཡང་ཇོ་སྤྲུལ་ལ་སྒྲ་ཁྲིད་རྒྱུ་སོགས་མཛད་འདུག་ཀྱང་། བསྙུན་ཡུན་ཡང་ཅུང་ཞིག་རིང་བ་དང་། ཞལ་འགྲམ་སྐྲང་པའི་ཉེན་གྱིས་གསུང་ཇི་བཞིན་འབྱོན་དཀའ་རུང་། དཀའ་ཚེགས་ལ་མི་གཟིགས་པས། རྒྱལ་བའི་ལུང་རྟོགས་ཀྱི་བསྟན་པ་ལ་སྲོག་ལས་གཅེས་པའི་ཁུར་ཆེན་དང་དུ་བཞེས་པ་ནི། སྔོན་རོང་སྟོན་ཆེན་པོ་ཤེས་བྱ་ཀུན་གཟིགས་ཀྱིས་ང་རང་ཚོགས་དབུས་ཆོས་ཁྲིའི་སྟེང་དུ་ཤི་ན་བསམ་པ་རྫོགས་པ་ཡིན་གསུངས་པ་ལྟར་མཛད། དེ་མཚམས་ནས་བསླབ་གྲྭ་རྣམས་གྱེས། ཀཿ ཐོག་སི་སྤྲུལ་དང་། ཇོ་སྤྲུལ་གཉིས་ཀྱང་རང་དགོན་སོ་སོར་ཕེབས། ཇོ་སྤྲུལ་སྐུ་རྩར་སྨན་པ་ཞིག་ཡོད་པ་དེས་གསོལ་སྨན་དྲངས་ནས་བཞུགས། གོ་ཆ་སྤྲུལ་སྐུ་བྱོན། གུར་དྲག་དབང་དང་། ཚེ་དབང་། འཆི་བླུ་སོགས་ཞབས་བརྟན་དུ་མ་ཕུལ། རྒྱལ་ཚབ་སྤྲུལ་སྐུ་ཕེབས།
ཞི་ཁྲོའི་གནས་འདྲེན་དང་། ཚེ་དབང་། སྨན་ལྷའི་དབང་རྣམས་ཕུལ། ཞེ་ཆེན་པའི་གྲྭ་པ་རྣམས་ཀྱིས་བླ་མ་སྐུ་གཤེགས་ས་ཞེ་ཆེན་དུ་མ་བྱས་ཐབས་ཅི་ཡོད་ཟེར་ནས་མི་མགོ་བཞི་བཅུ་ཙམ་འོང་། རྒྱན་ཁང་ནང་ལ་ཤིང་གི་རུ་བཞི་ཞིག་ཡོད་པ་དེའི་གྱོམ་ཁྲི་ཐབས་མི་ཆག་ཙམ་བྱས་ནས། མི་མང་གིས་གྱོམ་ཁང་ཁྱེར་རེས་བྱས་ཏེ་ཞེ་ཆེན་དུ་བྱོན། གཟིམ་ཆུང་དངོས་ལ་རབ་འབྱམས་མཆོག་སྤྲུལ་ཕྱིར་ཕེབས་ནས་བཞུགས་ཡོད་པས། བླ་བྲང་ཡོས་ཁང་སྟེང་གཡན་ཆེན་བཟང་བ་ཡོད་པ་དེར་བཞུགས། ཞེ་ཆེན་དགོན་པ་བླ་སློབ་འབྲེལ་ཟབ་ཆེ་བ་སྐུ་རྩར་འོང་རིགས་ལ་རང་བབ་ཀྱི་གཏམ་སྣ་ཚོགས་དང་། ཞལ་གདམས་གསུང་ཐ་མའི་བརྗོད་འོས་དུ་མ་བསྩལ། རབ་འབྱམས་མཆོག་སྤྲུལ་ནས་ཀྱང་ཁོང་པ་མཐའ་ནས་ཕྱིར་འཁོར་བ་དང་། ཁྱེད་རང་བསྙུན་གཞི་འདི་ལྟ་བུར་གྱུར་པ་ཤིན་ཏུ་མ་ལེགས་གསུངས་ཐུགས་ངལ་ཆེ་བར་མཛད། ཞི་ཁྲོའི་དབང་། བདེ་གཤེགས་ཀུན་འདུས་དབང་སོགས་ཞབས་བརྟན་འགའ་བསྒྲུབ་པར་གནང་། གཞི་བྱེས་རང་བབ་ཀྱི་གསུང་གླེང་སྣ་ཚོགས་དང་། ཁྱད་པར་རྗེ་བླ་མས་རབ་འབྱམས་མཆོག་སྤྲུལ་ལ་ཉིད་གཏེར་སྟོན་མཛད་དེ་ཕྱོགས་ངེས་མེད་དུ་བྱོན་པ་ནས་བཟུང་། ཞེ་ཆེན་དགོན་པའི་མགོ་འཛིན་སྐྱིད་སྡུག་སྒེར་ཁུར་བྱས་ལུགས་དང་། ད་ལྟ་སྔར་གནས་གང་ཡོད་ཁ་རལ་ཞབས་རྡོལ་མ་སོང་བ་ཡོད་པ་འདི་བཞིན། ད་རེས་ཉིད་དོན་གྱི་བདག་པོ་སྐུ་དངོས་བྱོན། ཁོ་བོ་ཡང་དབུགས་ཀྱི་རྒྱུ་བ་མ་ཆད་སྔོན་དུ་འདི་ལྟར་ཞིབ་ཆ་བྱེད་རྒྱུ་བྱུང་བ་འདི་ཤིན་ཏུ་ལེགས་པ་སྲུང་མས་ཕྲིན་ལས་སྒྲུབ་
པ་ལྟ་བུ་ཡིན། ད་ངོས་ཉིད་ནས་ཀྱང་རང་དགོན་འདི་ལ་ཉམས་གཟིགས་རང་ཆུས་རང་གིས་བཟུང་ན་ལེགས་སྙམ་པ། ཁོ་བོའི་གཏམ་ཐ་མ་ཁ་ཆེམས་ཟེར་བ་དེ་ཡིན་པས་ཐུགས་ལ་བརྣག་པར་ཞུ་ཞུ། ཞེས་གསུངས། དེ་ཚེ་དྲུང་ན་གནས་པ་ཀུན་མིག་མཆི་མས་གང་། ཡིད་མི་བདེ་བའི་གནས་ཐོབ། ཞབས་བརྟན་འོང་དུ་རེ་ནས་རིམ་གྲོ་བྱས་རིགས་ཀྱང་རྡོ་ཐོག་ཆུ་ཕྱར་ཟེར་བའི་དཔེ་ལྟར་སོང་། དགུང་ཀའི་ཉི་མ་ནུབ་ཀྱི་རི་མགོར་ལྷུང་བ་ལྟར་བྱ་བ་གང་གིས་ཀྱང་མི་སླེབ་པའི་གནས་སུ་གྱུར་ཏོ། །དེ་ལྟར་སྲིད་པ་འདི་ན་སྲིད་ཞིའི་ལེགས་ཚོགས་སྤེལ་ཕྱིར་སྲིད་པའི་ཚུལ་བཟུང་བའི་ བཟང་པོའི་རྣམ་པར་ཐར་པ་རྣམས་དགུང་གྲངས་ཞེ་བདུན་ཆུ ་སྦྲུལ་བར་གཅེན་གཏེར་སྟོན་སྤྲུལ་པའི་སྐུའི་ཐུགས་དགྱེས་ཕྱིར་རྣམ་ཐར་ཞལ་གསུང་མཐོང་བས་འཛུམ་ཤོར་ཉིད་གཞིར་བཞག་ལ། དེ་ཕྱིན་ཆད་སློབ་མའི་ཁྱུ་མཆོག་རྣམས་དང་། རྒྱུས་ཤེས་སློབ་ཚོགས་ཡོན་བདག་གཟུར་གནས་ཀུན་དང་། ཁྱད་པར་དུ་ཉེ་བར་གནས་པ་དགེ་རྒན་བསོད་ནམས་ཆེ་མཆོག་སོགས་ཀྱི་ངག་རྒྱུན་སྒྲོ་སྐུར་བྲལ་བ་དང་། རང་གིས་ཀྱང་མཐོང་ཐོས་གོམས་པ་གང་ཡོད་རང་བློ་དཔང་དུ་བྱས། ཉེ་གནས་བླ་མ་དོན་གྲུབ་དཔལ་འབྱོར་གྱིས་སྐྱེ་ཕྲེང་རྩ་ཐོ་ཕྲན་བུ་ཞིག་འདུག་པ་དང་། ཕྱག་འཛིན་མཛད་པའི་ལོའུ་ཐོ་རྣམས་ལ་ཅི་བྱུང་གང་བྱུང་གི་ཐོ་སྣ་ཚོགས་མཛད་འདུག་པ་རྣམས་ཀྱི་བརྗོད་འོས་རིགས་དང་དུ་བླངས་ནས་རང་བློས་གང་དཔོག་ཞིབ་ཆ་བྲིས་པའོ། །
དེ་ལྟར་དམ་པའི་རྣམ་ཐར་མུ་ཏིག་ཕྲེང་། །དམ་པ་དགྱེས་པའི་མཆོད་སྤྲིན་བླ་ན་མེད། །སྐྱེ་བོ་དམན་པས་ཀྱང་གཙུག་ཏུ་བཀུར་བྱས་པས། །ཕན་དང་བདེ་བའི་དངོས་ཀུན་ལྷན་ཅིག་འཇོ། །དད་དད་བློ་ཡི་མཚོ་ལས་ལེགས་འོང་པའི། །སྙན་སྙན་ལེགས་བཤད་ཟླ་བ་ནོར་བུའི་ཕྲེང་། །ཡང་ཡང་ངོ་མཚར་གླེང་བར་འོས་པའི་གཏམ། །མཛེས་མཛེས་སྔ་འགྱུར་བསྟན་པའི་རྒྱན་དུ་ཆེ། །ཚིག་དོན་རྣམ་མང་མང་པོའི་བྱེད་ལས་ཀུན། །ཀུན་ཏུ་འཆར་བཞིན་བཞིན་གྱི་སྣོད་དང་མཚུངས། །མཚུངས་པའི་བསྡུས་དོན་དོན་ཆེན་འཁོར་ལོ་གསུམ། །གསུམ་གྱི་ཆིངས་འདི་འདི་ན་གཅིག་ཏུ་སྙན། །ཐོས་བསམ་འཁོར་ལོས་རང་རྒྱུད་སྨིན་བྱས་ནས། །སྤོང་བའི་འཁོར་ལོས་གཟུང་འཛིན་གཟེབ་ལས་གྲོལ། །བྱ་བའི་འཁོར་ལོས་དོན་གཉིས་ཕུན་ཚོགས་སྒྲུབ། །
རྣམ་གསུམ་དགེ་བ་དམ་པའི་ངང་ཚུལ་ཡིན། །ཞེས་པས་མཚམས་སྦྱར་ནས་སྐུ་ཚེ་རིལ་པོའི་རྣམ་ཐར་ཕྲ་ཞིབ་ཅི་ཤེས་གང་ནུས་སུ་སྤེལ་ནས།
ངོ་མཚར་བའི་མཛད་སྤྱོད་འགའ།
སླར་ཡང་དེ་དག་འཁོར་ལོ་གསུམ་གྱི་ཁོང་དུ་བསྡུས་ཏེ་བསྟན་ནས། ངོ་མཚར་བའི་མཛད་སྤྱོད་རྣམས་དད་མོས་ལྡན་པའི་བློ་ལ་འབད་མེད་དུ་འཆར་བའི་ཕྱིར་བརྗོད་པ་ནི། ཐོག་མར་ཀློག་པ་ཐོས་བསམ་མཛད་པའི་སྐབས། ཆུང་ངུའི་དུས་དང་པོ་ཡི་གེའི་ང་རོ་སློབ་པ་ནས་བཟུང་། དཔོན་སློབ་གཉིས་ཀས་ཧ་ཅང་འབད་པ་མི་དགོས་པར་དམ་པའི་བག་ཆགས་སད་པས་ལོབ་སྐྱེན་པ། དཔེར་ན་སྤྲ་བ་བརླན་མེད་མེ་དང་འཕྲད་པ་ལྟ་བུ་ཡིན་ཞིང་། རྗེས་སུ་ཕྱག་མཛོད་མཁས་པ་ཆེན་པོ་པདྨ་དོན་ལྡན་དང་། ལྔ་རིག་སྨྲ་བ་དགེ་སློང་སངས་རྒྱས་ཆོས་འཕགས་སོགས་ཀྱི་མདུན་ནས་རིག་གནས་རྣམས་གསན་བཞེས་མཛད་ཚེ་ཡང་ཐོགས་མེད་དུ་མཁྱེན་པ་དང་། ཁྱད་པར་དུ་ཤར་ཀཿཐོག་རྡོ་རྗེ་གདན་ནས་འཇམ་མགོན་མི་ཡི་གཟུགས་ཅན་པཎྜི་ཏ་ཆེན་པོ་ཚེ་དབང་མཆོག་གྲུབ་ཀྱི་མདུན་ནས། ཕྱི་ནང་གི་ཤེས་བྱ་རིག་པའི་གནས་ལ་གསན་བསམ་མཐར་ཕྱིན་པར་མཛད་པས། སྤྱིར་ཀཿ ཐོག་པ་ལ་སློབ་མ་མཁས་པ་དང་གྲུབ་པའི་མཚན་སྙན་དོན་དང་ལྡན་པ་མང་དུ་བྱོན་པ་ཡིན་མོད། བསྟན་པ་རིན་པོ་ཆེ་ལ་དངོས་སུ་ཕན་པ་རྒྱ་ཆེ་ཞིང་། བརྒྱུད་ནས་སློབ་མའི་ཚོགས་ཁྱུ་མཆོག་དང་། སེངྒེ་ལྟ་བུ་མང་དུ་བྱོན་པས། རྒྱལ་དབང་པདྨ་ཀཱ་རའི་བསྟན་པའི་རྫོགས་ལྡན་གསར་དུ་སློང་བར་ནུས་པ་རྗེ་འདི་ལྟ་བུ་སུ་ཡང་མ་བྱོན་པས། རྒྱུ་
སྐར་གྱི་དབུས་སུ་ཆ་ཤས་ཀྱི་བདག་པོ་ལྟ་བུ་ཡིན་པ་དང་། ཞེ་རྫོགས་གཉིས་བླ་མ་གོང་མ་རྣམས་ཀྱི་རིང་ནས། ཨོ་རྒྱན་སྨིན་གྲོལ་གླིང་གི་གར་འཆམ་གདངས་རོལ་འབུད་དཀྲོལ་རྣམས་རྒྱུན་འཇགས་སུ་ཡོད་རྩིས་ཡིན་ནའང་། གྲྭ་ས་དེ་ཉིད་དུ་ཞུགས་ནས་སྒྲིག་ལམ་ཕྱག་བཞེས་ཀྱི་རིགས། དབང་དང་གདམས་ངག་རྣམས་འབོག་པའི་ཚེ། བླ་སློབ་རྣམས་ཀྱི་ཇི་ལྟར་བགྱི་བའི་སྲོལ། སྐུ་ཆས་དང་ནབ་བཟའ་བཞེས་ཚུལ། བྱོན་ལུགས་བཞུགས་སྟངས་སོགས་ཐམས་ཅད་འདུས་པ་རྣམས་དང་སྤྱོད་ལམ་ལྷན་ཅིག་ཏུ་བསྐྱངས་པས་སུས་ཀྱང་འགྲན་དུ་མེད་པ་གྲྭ་སའི་ཕྱག་བཞེས་ཇི་ལྟ་བའི་ཁྱད་ཐོན་པ་དང་། ཐ་ན་ལྷ་བསང་དང་མདོས་ཕྲན་ཞིག་གཏོང་ལུགས་ཚུན་གལ་ཆུང་དང་སླ་ཆོས་སུ་མ་བྱས་པས། མགྱོགས་འགྲོ་རྣམས་ཀྱི་ནང་ནས་ཅང་ཤེས་ལྟ་བུར་བསྔགས་པར་འོས་པ་དང་། གཞན་ཡང་ཁམས་དབུས་གཙང་གི་བླ་མ་བཅུ་བདུན་ཙམ་དང་། བཀའ་དྲིན་གཞལ་བར་དཀའ་བའི་ཡོངས་འཛིན་རྣམ་པ་གསུམ་སོགས་བསམ་སྦྱོར་དག་པས་བསྟེན་ནས། སྔ་འགྱུར་བཀའ་གཏེར་རྒྱ་མཚོ་ལྟ་བུ་དང་། སྔགས་གསར་མའི་བཀའ་སྲོལ་ཡང་ཕལ་ཆེ་བ་ཞིག་གསན་བཞེས་མཛད་པ། དེ་དག་ཀྱང་བརྒྱུད་པའི་ཁྱད་པར་སོགས་ཞིབ་ཏུ་གཟིགས་ཤིང་། གལ་ཆེ་བ་རྣམས་ལན་གསུམ་རེ་སོགས་སུ་གསན་པ་དང་། དུས་རྟག་པར་རང་ཡུལ་གཞན་ཡུལ་གང་ནས་ཀྱང་ཆོས་སྨྲ་བའི་སྤོབས་པ་ཅུང་ཟད་ཡོད་པ་ཞིག་དང་འཕྲད་ནས་བཟུང་། མདོ་སྔགས་ཀྱི་གཞུང་དང་ཐུན་མོང་གི་རིག་གནས་སོགས་དེ་ཉིད་ལ་རྒྱུན་ཡོད་རིགས་གསན་བཞེས་མཛད་པ་ལ་ཐུགས་སྐྱོ་ངལ་དང་།
ཁྱད་པར་ང་རང་མི་ཆེན་པོའི་བླ་མ་ཡིན་པ་དང་། མཁས་བཙུན་གྱི་གྲགས་པ་ཐོབ་པ་ཡིན་པས། དམན་པ་ལ་ཡོན་ཏན་ཡོད་ཀྱང་ཞུ་བའི་སྐབས་ག་ལ་སོགས་ང་རྒྱལ་གྱི་གོང་བུ་ལ་ཡོན་ཏན་གྱི་ཆུ་མི་ཆགས་པའི་སྤྱོད་ངན་རིང་དུ་སྤངས་ཏེ། གུས་སྦྱོར་དང་རྟག་སྦྱོར་གྱི་བརྩོན་འགྲུས་ཀྱིས་གསན་བསམ་མཐར་ཕྱིན་མཛད་དེ། སྔོན་ཚོང་དཔོན་གྱི་བུ་ནོར་བུ་བཟང་པོས། བྱང་ཆུབ་ཀྱི་སྤྱོད་པ་སློབ་པའི་ཡོངས་འཛིན་བསྟེན་པ་བཞིན་ཆོས་ཀྱི་སྣང་བ་འབྱམས་སུ་ཀླས་པས་གང་དུ་བྱོན་ཀྱང་དེད་དཔོན་མཁས་པ་ནོར་བུའི་གླིང་དུ་ཕྱིན་པ་ལྟར་དམ་པ་ཆོས་ཀྱིས་འདོད་དོན་ཡོངས་སུ་རྫོགས་པར་མཛད་དེ། ཐུན་མོང་གི་རིག་པའི་གནས། སྒྲ་ཀཱ་ཙན་པཱ་ཎི་དབྱངས་ཅན་བཅས་དང་། སྙན་ངག །སྡེབ་སྦྱོར། ལྷ་བྲིས་འབུར་གྱི་ཐིག །རྩིས་དཀར་ནག་སོགས་དང་ཐུན་མོང་མིན་པ་སྡེ་སྣོད་གསུམ་དང་། རྒྱུད་ཀྱི་བཤད་པ། རྒྱལ་བཀའ་རིན་པོ་ཆེ། གསར་རྙིང་གི་རྒྱུད་འབུམ་རྣམས་དང་། དགོངས་འགྲེལ་བསྟན་བཅོས་རྒྱུན་ཡོད་རིགས། སྔ་འགྱུར་བཀའ་གཏེར་རྒྱ་མཚོའི་དབང་ལུང་། གསང་སྔགས་གསར་མའི་གསང་བདེ་འཇིགས་གསུམ་སོགས། རྡོར་ཕྲེང་། རིན་འབྱུང་བརྒྱ་རྩ། སྣར་ཐང་བརྒྱ་རྩ། མི་ཏྲ་སོགས་ཀྱི་དབང་ལུང་། རིག་གནས་གཞུང་བཤད་མཐའ་དག་གི་ལུང་རྒྱུན། ཐ་ན་མདོས་སྐོར་སྣ་ཚོགས་པའི་ལུང་། སྒྲུབ་སྡེ་ཆེན་པོ་བཀའ་བརྒྱད་དང་། འདུས་པ་མདོ། སྒྱུ་འཕྲུལ་སོགས་བཀའ་གཏེར་གྱི་སྒྲུབ་ཕྲིན་ཡོད་དོ་ཅོག་གི་ཕྱག་བཞེས། གཙོ་བོ་སྨིན་ལུགས་དང་། ཀཿཐོག་ལུགས་དང་། གཞན་རྡོར་བྲག་པ་སོགས་ཀྱི་ཕྱག་བཞེས་ཆེ་ཕྲ། གདངས་དབྱངས། རོལ་མོ།
གར་འཆམ། ཐིག་ཚོན་སོགས་གང་དགོས་པའི་རིགས་ལ་རྨོངས་པ་མེད་པ། མདོར་ན་བཟོ་རིག་ལག་ཁྲ་ཕྲན་བུ་མ་གཏོགས། ཕྱི་ནང་གི་ཤེས་བྱ་མཐའ་དག་གྲུབ་པའི་བུམ་པ་བཟང་པོར་ལག་པ་བཅུག་པ་བཞིན་གཞི་གཅིག་ལས་སྣ་ཚོགས་པའི་འདོད་པ་ཅི་དགར་འབྱུང་བ་མཐོང་ཆོས་ཚད་མས་གྲུབ་པ་དེ་བཞིན་ནོ། །
བྱ་བ་ལས་ལ་ཐུན་མོང་།
གཉིས་པ་བྱ་བ་ལས་ལ་ཐུན་མོང་དང་ཁྱད་པར་བ་གཉིས་ཀྱི། དང་པོ་ནི། གཞི་སྐྱེ་བོ་མི་ཆོས་ལའང་མཆོག་ཏུ་མཁས་པས། འཇིག་རྟེན་ན་བསྔགས་པར་འོས་པ། སྐྱེ་བོ་ཡ་རབས་ཀྱི་ལུགས་དང་མཐུན་པ་སྟེ། དཀྱེལ་ཆེ་ཞིང་། གཞུང་བཟང་བ། འདྲིས་ཐག་རིང་བ། བྱ་བ་ཐབས་ཀྱིས་སྒྲུབ་པ། མ་རབས་སྐྱེ་བོའི་དབང་དུ་མི་ཤོར་བ་སོགས་ཀྱིས། རང་ཚུགས་བརྟན་ཅིང་། གཞན་ལ་བྱམས་པ། ཀུན་གྱིས་བཀུར་ཞིང་། རེ་ལྟོས་འཆའ་བ་བཅས་བཟང་པོའི་ལུགས་དང་མཐུན་པ་སྟེ། དེ་ནི་ཇི་སྐད་དུ། དཔལ་མགོན་འཕགས་པ་ཀླུ་སྒྲུབ་ཀྱིས། མི་ཡི་ཆོས་ལུགས་ལེགས་ཤེས་ན། །ལྷ་ཡུལ་བགྲོད་པ་ཐག་མི་རིང་། །ལྷ་དང་མི་ཡི་ཐེམ་སྐས་ལ། །འཛེགས་ན་ཐར་པ་གམ་ན་འདུག །ཅེས་གསུངས་པ་ལྟར། ལུགས་གཉིས་ཀྱི་སྤྱོད་པ་མཐའ་དག་ཆར་པ་ཆུ་གྲོགས་སུ་འགྲོ་བས། གནས་སྐབས་དང་མཐར་ཐུག་གི་ཕུན་སུམ་ཚོགས་པ་ཀུན་གོང་ནས་གོང་དུ་འཕེལ་བ་རྒྱལ་སྲས་བྱང་ཆུབ་སེམས་དཔའི་རྣམ་ཐར་འཕྲལ་ཡུན་ཀུན་ཏུ་གནོད་པའི་རྒྱུར་གྱུར་པའི་རང་འདོད་ཀྱི་འཁྲི་བ་ཕྱིན་ཅི་ལོག་གིས་མ་སྦགས་པ་ཡིན་ཏེ། ཇི་སྐད་དུ། འདིར་ནི་ཕན་དང་བདེ་བ་རྣམས་
བྱ་ཞིང་། །འདིར་ཡང་མི་ཕན་ཕྱི་མར་གནོད་པ་སྤངས། །ཞེས་གསུངས་པ་ལྟར་གྱི་མཛད་པས། འཁོན་པ་སྡུམ་པ་དང་། ལེགས་ཉེས་སྟོན་པ་སོགས་ཀྱིས་ཀུན་གྱིས་བཟང་དུ་རྩི་ཞིང་ཡིད་ཆེས་པའི་གནས་ཐོབ་པ། ཁྱད་པར་ཞེ་ཆེན་བླ་བྲང་གི་མཛད་སྒོ་རྣམས་ལ། ཇི་སྐད་དུ། ལུགས་གཉིས་བླང་དོར་ཤེས་པ་ཡིས། །གནས་སྐབས་མཐར་ཐུག་དོན་འགྲུབ་སྟེ། །བརྟགས་པ་ཀུན་ལ་མཁས་པ་ཡི། །དེད་དཔོན་རྒྱ་མཚོར་ཞུགས་པ་བཞིན། །ཞེས་གསུངས་པ་ལྟར། སྐུ་ཚེའི་སྟོད་སྨད་བར་གསུམ་དུ། དངོས་བརྒྱུད་གང་རུང་ནས་ལྷག་བསམ་ཟླ་བ་ལྟ་བུས། སྐུ་དང་གསུང་གི་མཛད་པ་གང་ལ་གང་འོས་སྒྲུབ་པ་ལ་ཐུགས་ལ་སྐྱོ་ངལ་དང་སྒྱིད་སྙོམ་པ་རིང་དུ་སྤངས་ནས་བསྒྲུབས་པ་སྟེ། དེ་ཡང་ཐོག་མར་དཔལ་ཀཿ ཐོག་རྡོ་རྗེ་གདན་ནས་ཚུར་ཕེབས་ནས་བཟུང་། རྒྱལ་ཚབ་རིན་པོ་ཆེ་སྐུ་བསྙུན་ཚུལ་མ་བསྟན་པའི་བར་དེར་ལུགས་གཉིས་ཀྱི་བྱ་བཞག་སྤྱི་དང་། བྱེ་བྲག་རབ་འབྱམས་རྡོ་རྗེ་འཆང་བསྙུན་བཞེས་པ་དང་། སྐུ་གཤེགས་སྐབས། གདུང་རྟེན་བསྒྲུབས་པ། སླར་མཆོག་གི་སྤྲུལ་སྐུ་བསྟན་པའི་བཙས་སུ་མངའ་གསོལ་བ་སོགས་ཀྱི་མཛད་སྒོ་ཐམས་ཅད་ལ་ཤིང་རྟ་འདྲེན་པའི་ཁ་ལོ་པ་ལྟར་མེད་ན་མི་འབྱུང་གི་རྐྱེན་དུ་གྱུར་པ་དང་། རྒྱལ་ཚབ་ཚང་བསྙུན་བཞེས་པ་ནས། དགུང་གྲངས་སོ་བདུན་སྟེང་རྒྱལ་ཁམས་ངེས་མེད་ཀྱི་སྤྱོད་པ་བསྐྱངས་པའི་བར་གྱི་ཞེ་ཆེན་པའི་ལས་སྒོ་སྤྱི་དང་། ཁྱད་པར་རྒྱལ་ཚབ་ཚང་སྐུ་བསྙུན་ཚེ་རིམ་གྲོ། གཤེགས་དུས་དགོངས་རྫོགས་དངུལ་གྱི་གདུང་རྟེན་ཆེན་མོ་
བསྒྲུབས་པ། ཡང་སྲིད་ཁྲིར་བཀོད་པ་སོགས། རྗེ་ཉིད་ཀྱི་མཛད་པ་ལ་རག་ལུས་པས། དངོས་ཀྱི་རྒྱུ་ཡོད་ཡོད་པས་ཆོག་པ་དཔེར་ན་ཡུལ་ལ་ལོངས་སྤྱོད་པ་ལ་རྟེན་བཅས་ཀྱི་དབང་པོ་ལྟ་བུར་གྱུར་པ་དང་། གཞན་ཡང་ཞེ་ཆེན་པའི་བསྟན་པ་ལ་རྣམ་པ་ཀུན་ཏུ་ཕན་བདེའི་དངོས་པོ་ཀུན་གྱི་འབྱུང་གནས་སུ་གྱུར་པ་ཀླུ་ཡི་རྒྱལ་པོའི་མཐུས་འཇིག་རྟེན་ན་ལོ་འབྲས་སོགས་ཕུན་སུམ་ཚོགས་པ་འབྱུང་བ་ལྟ་བུ་དང་། སླད་ནས་རབ་འབྱམས་སྤྲུལ་པའི་སྐུས་གཏེར་སྟོན་མཛད་པའི་ཤུལ་གྱི་དགོན་པ་མགོ་འཛིན་མེད་པ་འཐོར་ཉེའི་ཚེ་ཡང་ཐབས་མཁས་ཀྱི་མཛད་པས་སྔར་ཡོད་རིགས་ཉམས་མེད་དུ་བསྐྱངས་ཏེ། རབ་འབྱམས་མཆོག་སྤྲུལ་བོད་ནས་ཕྱིར་ཕེབས་པའི་སྐབས། ཞེ་ཆེན་པའི་བསྟན་སྲིད་ཁ་རལ་ཞབས་རྡོལ་མེད་པ་གྲུ་བཞི་ལམ་མེ་པ་ཕྱག་ཏུ་བཞག་སྟེ། མྱ་ངན་འདའ་ཚེ་ཡང་ད་ནི་བསམ་པ་རྫོགས་པ་ཡིན་གསུངས་ནས་གཞི་བྱེས་ཡོངས་ལ་གླེང་འོས་དུ་མ་མཛད་པས་མཆོག་དམན་ཀུན་ཡིད་ཆེས་ཤིང་སྐྱོན་དུ་བརྗོད་པ་རྡུལ་ཙམ་མེད་པ་ཀུན་གྱི་མཐོང་ཆོས་སུ་གྱུར་པ་ཡིན་ནོ། །
རྩོམ་པས་ཐུབ་བསྟན་གསལ་བ་དང་གནས་སྐབས་ཀུན་ཏུ་ཐུགས་ཀྱི་སྤང་བ་ཕུན་སུམ་ཚོགས་པ།
གཉིས་པ་ནི་རྒྱན་དམ་པ་ལྷ་ཆོས་ལས་བརྩམས་པ་སྟེ། མཛོད་ལས། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་ཅན། །དེ་འཛིན་བྱེད་པ་སྨྲ་བ་དང་། །སྒྲུབ་པ་བྱེད་པ་ཁོ་ནའོ། །ཞེས་གསུངས་པ་ལྟར་རྒྱལ་བའི་ལུང་རྟོགས་ཀྱི་བསྟན་པ་བཤད་སྒྲུབ་ཀྱི་སྒོ་ནས་གསལ་བར་མཛད་པ།
དེ་ཡང་ཐོག་མའི་ངེས་པ་ལ་འཆད་པས་གཞན་རྗེས་སུ་བཟུང་བའི་ཚུལ་དང་། རྩོམ་པས་ཐུབ་བསྟན་གསལ་བར་མཛད་པའི་ཚུལ་གཉིས་ཀྱི། དང་པོ་ནི། ཤེས་བྱ་ཕྱི་ནང་གི་རིག་པའི་གནས་རྒྱུད་སྡེ་རྒྱ་མཚོའི་དབང་ལུང་གདམས་ཁྲིད་སོགས་ཀྱིས། སྐལ་བ་དང་ལྡན་པའི་སློབ་མ། ཉི་མ་དང་། ཟླ་བ། རྒྱུ་སྐར་གྱི་ཕྲེང་བ་ལྟ་བུ་དག་རྗེས་སུ་བཟུང་བས་རྒྱལ་བསྟན་གླིང་བཞི་མཛེས་པའི་རྒྱན་དུ་མངོན་པར་སྣང་བ་ནི། སྒྲ་ཀཱ་ཙན་པཱ་ཎི། དབྱངས་ཅན། སྙན་ངག་ལེའུ་གསུམ། སྡེབ་སྦྱོར། རྩིས་དཀར་ནག་སོགས་དང་། སྡོམ་གསུམ་དང་། དཔལ་གསང་བའི་སྙིང་པོའི་རྒྱུད་ཀྱི་རྣམ་བཤད། བཀའ་གཏེར་གྱི་དབང་ལུང་གདམས་ཁྲིད་བཅས་བསྩལ་ཏེ། ཡོངས་རྫོགས་བསྟན་པའི་རྒྱལ་མཚན་དུ་མངའ་གསོལ་བ་ལ་སྲས་ཀྱི་ཐུ་བོ་མཆོག་ནི། རྒྱལ་ཀུན་མཁྱེན་པའི་རང་གཟུགས་འཇམ་དཔལ་སྨྲ་བའི་སེངྒེ་རྒྱལ་པོའི་ཚུལ་གྱིས་གངས་ཅན་ན་སངས་རྒྱས་ཀྱི་བསྟན་པའི་སྒྲོན་མེ་སྦར་བའི་བྱེད་པོ་ཆོས་རྒྱལ་ཚངས་པ་ལྷ་ཡི་མེ་ཏོག་ངུར་སྨྲིག་རྡོ་རྗེ་འཆང་བའི་རྣམ་པར་བཞེངས་པ། ཆེས་སྙིགས་མའི་དུས་འདིར་རྒྱལ་བ་གཉིས་པའི་ཕྲིན་ལས་ཅན། རིས་མེད་པའི་བསྟན་འཛིན་ཀུན་གྱི་གཙུག་གིས་ཞབས་སེན་པདྨའི་ཕྲེང་བ་བཀུར་བས་བྲེལ་བ་ཆུ་བོའི་རྒྱུན་བཞིན་བསྟེན་པ། མངའ་བདག་ཆེན་པོ་ཉང་ཉི་མ་འོད་ཟེར་ལ་སོགས་པ་སྤྲུལ་པའི་གཏེར་སྟོན་དུ་མའི་ཟློས་གར། རྒྱལ་དབང་པདྨ་ཀ་རའི་རྒྱལ་ཚབ་བཀའ་བབ་རིན་ཆེན་བདུན་གྱི་བདག་པོ་༧པདྨ་འོད་གསལ་མདོ་སྔགས་གླིང་པའམ། མཚན་གཞན་རྡོ་རྗེ་གཟི་བརྗིད་རྩལ་དང་། འཇམ་དབྱངས་
མཁྱེན་བརྩེའི་དབང་པོ་ཀུན་དགའ་བསྟན་པའི་རྒྱལ་མཚན་དཔལ་བཟང་པོ་སོགས་སུ་འབོད་པའི་མཚན་སྙན་གྱི་རྣ་ཆ་ཕྱོགས་ཀྱི་ལང་ཚོ་མའི་ཐོས་འཛིན་གྱི་རྒྱན་དུ་ཅིར་ཡང་མཛེས་པ་དང་། སྟོན་པའི་ཉེ་གནས་ཀུན་དགའ་བོ་དང་། རྒྱལ་པོ་ཛཿ སོགས་ཀྱི་རྣམ་འཕྲུལ། གངས་ཅན་ཐུབ་བསྟན་གསར་དུ་འདྲེན་པའི་ལོ་ཙཱ་བ་ཀུན་གྱི་མཆོག་པ་གོར་བཻ་རོ་ཙཱ་ན་ཉིད། སླར་ཡང་སྙིང་བསྟན་སྤེལ་བའི་སླད་དུ་མི་ཡི་སྲིད་པ་བསམ་བཞིན་བཟུང་བ། མཁས་པར་གྲགས་པའི་དབྱར་གྱི་རྔས་སྲིད་པ་གསུམ་གྱི་མདོངས་མཐའ་ལྡན་པའི་མངལ་ཁུར་ལྕི་བར་བྱེད་ནུས་པ། ཤེས་བྱ་ཀུན་ལ་ཁྱབ་པའི་མཛོད་ལ་སོགས་པ་མཛོད་ཆེན་ལྔའི་བདག་པོ་༧རྒྱལ་བས་ལུང་བསྟན་བློ་གྲོས་མཐའ་ཡས་སམ། པདྨའི་ལུང་ཐོབ་ཨོ་རྒྱན་འཆི་མེད་བསྟན་གཉིས་གླིང་པའམ། པདྨ་གར་གྱི་དབང་ཕྱུག་ཕྲིན་ལས་འགྲོ་འདུལ་རྩལ་ལམ། བློ་གྲོས་མཐའ་ཡས་པའི་སྡེ་སོགས་མཚན་ཉི་ཟླ་ལྟར་གྲགས་པ། སྔ་འགྱུར་བཀའ་གཏེར་ལ་རིག་འཛིན་གཏེར་བདག་གླིང་པ་དང་། ཀརྨ་ཀཾ་ཚང་གི་བསྟན་པ་ལ་རྒྱལ་བ་རང་བྱུང་བ་ཉིད་ཀྱི་རྣམ་ཐར་དང་ཐ་མི་དད་པ་ཉིད་དང་། འཕགས་ཡུལ་མཁས་པ་ཀུན་གྱི་གཙུག་རྒྱན། རྒྱལ་སྲས་ཞི་བ་ལྷའི་རྣམ་འཕྲུལ། ལུང་དང་རིགས་པ་སྨྲ་བ་ལ་མཁས་མཆོག་དབྱིག་གཉེན་དང་སྤོབས་པ་མཚུངས་པ། བླ་མ་ཨ་ཝ་དྷུ་ཏི་བ་དཔལ་དགེ་མཆོག་སྤྲུལ་༧ཨོ་རྒྱན་འཇིགས་མེད་ཆོས་ཀྱི་དབང་པོ་བཅས། འདི་གསུམ་ནི་སངས་རྒྱས་ཀྱི་བསྟན་པ་ལུང་གི་
ལྷག་མའི་དུས་བྱོན་པའི་ཁྱད་མ་གཏོགས། འཕགས་ཡུལ་གྱི་རྒྱན་དྲུག་མཆོག་གཉིས་རྣམས་དང་ཁྱད་པར་ཅུང་ཟད་ཙམ་ཡང་དམིགས་སུ་མེད་པ་ཡིན། གཞན་ཡང་བསྟན་འགྲོའི་དོན་ཆེན་སྒྲུབ་པའི་དགེ་བའི་བཤེས་གཉེན་ལུང་རིགས་སྨྲ་བའི་ཉི་མ་གཙང་མདའ་མཆོག་སྤྲུལ་དང་། དབོན་སྐུ་མཆེད། གནས་ལྔ་རིག་པའི་པཎྜི་ཏ་རང་དགོན་གྱི་མཁས་དབང་བླ་མ་པདྨ་སྐལ་བཟང་། ལྷོ་ཨ་གྲོ་སྒྲ་རམས་པ་འགྱུར་མེད་རྣམ་རྒྱལ་དང་། ལྷོ་སེང་ཚ་བླ་མ་དོན་གྲུབ་བཀྲ་ཤིས། སྐུ་ཞབས་ཁམས་སྤྲུལ་རིན་པོ་ཆེའི་མདུན་ནས་ཆེད་དུ་བཏང་བའི་དྲུང་ཡིག་ཉི་མ་དང་། ཤེས་རབ་གཉིས། འདི་རྣམས་ཀྱང་། ཆབ་མདོ། ནང་ཆེན། བྲག་གཡབ་ཚུན་ལ་མཁས་པའི་སྙན་གྲགས་ཆེ་ཞིང་། སློབ་ཚོགས་ཀྱང་མང་དུ་འཕེལ་བས་བསྟན་ལ་ཆོས་མཐུན་གྱི་མཛད་པ་གཞན་འགྲན་དང་བྲལ་བ་མངའ་ཞིང་། ཁྱད་པར་སེང་ཚ་བླ་མ་དོན་གྲུབ་བཀྲ་ཤིས་ཀྱིས། སྐྱབས་གཅིག་འཁོར་ལོའི་མགོན་པོ། ཞབས་དྲུང་རྡོ་རྗེ་འཆང་འཇམ་དབྱངས་མཁྱེན་བརྩེའི་དབང་པོའི་བཀའ་ཚབ་མཛད་དེ། ཞེ་རྫོགས་ཀྱི་བརྒྱུད་པ་ཅན་གྱི་བཀའ་འགྱུར་རིན་པོ་ཆེའི་ལྗགས་ལུང་རྫོང་སར་བཀྲ་ཤིས་ལྷ་རྩེར་གནང་བ་དང་། སྐུ་ཚེའི་གཤམ་དུ་སྒྲུབ་གནས་པདྨ་འོད་གླིང་དུ་སྒྲུབ་པའི་རྒྱལ་མཚན་བཙུགས། གཞན་སྒྲ་གཞུང་། དབྱངས་ཅན་མ་དང་། ཀ་ལཱ་པ་གཉིས་གང་ཡིན་རེ་དང་། ཟློས་གར་མ་གཏོགས་པའི་རིག་གནས་ཆུང་བ་ལྔ། ཡིག་རིགས། སྡོམ་གསུམ་དང་། རྒྱུད་ཀྱི་བཤད་པ། སྔ་འགྱུར་བཀའ་གཏེར་གྱི་དབང་ལུང་གདམས་ཁྲིད་ཕྲིན་ལས་རྣམས་ཀྱི་ཕྱག་བཞེས་
བཅས་མཐའ་རྒྱས་སུ་བསྩལ་བ་དང་། འཇུ་ཉུང་དབོན་བླ་འཇིགས་མེད་རྡོ་རྗེ། ཕུག་ཁང་དགེ་རྩེ་བླ་མ་འགྱུར་མེད་དོན་འགྲུབ། འགྱུར་མེད་སྟོབས་རྒྱལ། དེའི་སྐུ་ཚ་བླ་མ་དམ་པ་པདྨ་རྒྱལ་མཚན། ཕུག་ཁང་དབོན་བླ་མ་ལེགས་བཟང་སོགས་དང་། ཀཿ ཐོག་ཉིན་དགོན་སྤྲུལ་པའི་སྐུ། མདོ་ཤུལ་བླ་མ་ངག་དབང་རྒྱ་མཚོ། གོར་ཙ་བླ་མ་ཨོ་རྒྱན་བསམ་གྲུབ། ཀཿ ཐོག་སི་ཏུ་མཆོག་སྤྲུལ། རབ་འབྱམས་བཞི་པ་གར་དབང་ཆོས་ཀྱི་རྒྱ་མཚོ། རྒྱལ་ཚབ་རིན་པོ་ཆེ་མི་བསྐྱོད་མཁས་གྲུབ་རྒྱ་མཚོ། ནང་ཆེན་དཔོན་བླ། མཁས་དང་གྲུབ་པའི་གཙུག་རྒྱན་ཟུར་མཁར་སྤྲུལ་པའི་སྐུ། རང་དགོན་གྱི་ཉེ་བར་གནས་པ་བླ་མ་དོན་གྲུབ་དཔལ་འབྱོར། བླ་མ་ཨོ་རྒྱན་ཆོས་གྲགས་སོགས་དང་། ནང་དོན་རིག་པ་གཙོར་སྟོན་གྱི། རྒྱལ་བཀའ་རིན་པོ་ཆེའི་གཙོས་དབང་ལུང་གདམས་ཁྲིད་རྒྱ་མཚོས་རྗེས་སུ་བཟུང་བ། རང་དགོན་ནས་རབ་འབྱམས་མཆོག་གི་སྤྲུལ་སྐུ་བཞི་པ་གར་དབང་ཆོས་ཀྱིི་རྒྱལ་མཚན། རྒྱལ་ཚབ་རིན་པོ་ཆེ་མི་བསྐྱོད་མཁས་གྲུབ་རྒྱ་མཚོ། གཞན་ཕྱོགས་ཉེའི་བསྟན་འཛིན་ཆེན་པོ། ལྷོ་ཁམས་སྤྲུལ་རིན་པོ་ཆེ་ལྔ་པ་བསྒྲུབ་བརྒྱུད་ཉི་མ། རི་བོ་དགེ་ལྡན་པའི་བསྟན་པའི་གསལ་བྱེད་ཧོར་དགོན་སྡེ་བཅུ་གསུམ་གྱི་བདག་པོ་ཆོས་རྗེ་སྤྲུལ་པའི་སྐུ་བློ་བཟང་མཐུ་སྟོབས། དཀའ་བཅུ་གྲགས་པ་རྒྱལ་མཚན་གྱི་ཡང་སྲིད་བྲག་གཡབ་ནོ་མི་ཧན་ཆེན་པོ། དཔལ་ལྡན་གསང་བ་སྙིང་པོའི་རྒྱུད་ཀྱི་བཤད་པའི་རྩེར་སོན་པ་དགེ་མང་བླ་མ་སྨོན་ལམ་དར་རྒྱས། ཝ་ཤུལ་བླ་མ་སངས་རྒྱས་བཟང་པོ། ཕུག་ཁང་དབོན་པོ་སྙིང་པོའི་དོན་རྟོགས། བླ་མ་འགྱུར་མེད་སྙིང་པོ།
རང་དགོན་གྱི་རྡོར་འཛིན་བླ་མ་འགྱུར་མེད་རང་གྲོལ། བླ་མ་དམ་པ་དྷརྨ་ཙཱཀྲ་སོགས་དང་། མཛེས་ཆུང་ངུ་དགོན་བཀྲ་ཤིས་ཆོས་གླིང་གི་སྤྲུལ་སྐུ་རྣམ་གཉིས་སོགས། གཞན་ཡང་རིག་གནས་སྣ་རེ་གཉིས་ཙམ་དང་། དབང་ལུང་གདམས་ཁྲིད་ཟླ་ཆོས་ཞག་བདུན་མ་སོགས་ཀྱི་ཆོས་གྲལ་དུ་ཡོད་པ་ནི། ཁམས་དབུས་ཀུན་ཏུ་མང་དུ་བྱོན་པ་ནི་སྨོས་ཀྱིས་མི་ལང་ངོ་། ཐ་ན་བློ་གྲོས་དམན་ཞིང་བརྩོན་པ་ཞན་པ་ཁོ་བོས་ཀྱང་རྗེ་བླ་མ་འདི་ཉིད་ཀྱི་ཞབས་པད་བསྙེན་ཅིང་རིག་གནས་རྣམས་སྦྱོང་ཁུལ་བྱས་པས་བླུན་པོ་དུད་འགྲོ་འགྲེང་སྟེ་འགྲོ་བའི་ཁྱུར་སྡོད་མི་དགོས་པ་ཙམ་བྱུང་བ་ཡིན། གཞན་ཡང་སྐྱབས་མགོན་རྡོ་རྗེ་འཆང་འདི་ཉིད་བླ་མར་བསྟེན་ཏེ་ཕྱི་ནང་གི་རིག་གནས་ལ་ཐོས་བསམ་བགྱིས་ཚད་ཀུན་རང་གི་བློ་གྲོས་དང་འཚམ་པའི་སྦྱངས་པའི་ལག་རྗེས་ཡོན་ཏན་ཁྱད་པར་ཅན་རེ་མངོན་དུ་མ་གྱུར་པ་ནི་སུ་ཡང་མེད་པ། མགོན་པོ་འཇམ་དཔལ་དབྱངས་ཀྱི་བྱིན་རླབས་ཀྱི་ཉེ་བརྒྱུད་ལྷག་པར་ཆགས་པ་དང་། ཁྱད་པར་དུ་གཞན་ཕན་ལྷག་བསམ་སྟོན་ཟླ་ལྟར་དཀར་བའི་རང་འབྲས་ཡུལ་ལ་སྨིན་པ་སོམ་ཉི་བྲལ་བའི་གནས་ཡིན་ཏེ། འགའ་ཞིག་བླ་སློབ་གཉིས་ཀས་སྦྱང་བརྩོན་ནན་དུ་བྱས་ཀྱང་། དུས་དབང་གིས་ཐོག་མར་ཅུང་ཟད་རེ་ཤེས་ཀྱང་ཇི་ཞིག་ནས་གང་ཡང་མི་ཤེས་པ་ཆང་གི་ར་རོ་དངས་བ་ལྟར་འགྲོ་བ་དང་མི་འདྲ་བར། ཆེ་ཐོབ་ཆེ་འཚེངས། ཆུང་ཐོབ་ཆུང་འཚེངས། འབྲེལ་ཚད་དོན་ལྡན་དུ་གྱུར་པ། དེང་སང་ཡོད་པའི་སྐྱེ་བོ་མཆོག་དམན་ཕོ་མོ་ཐམས་ཅད་ལ་མངོན་སུམ་
ཚད་མས་གྲུབ་པ་དེ་ལྟར་ཡིན་ནོ། །ལར་ད་ལན་བླ་མའི་ཡོན་ཏན་བརྗོད་པའི་སྐབས་འདིར། སློབ་མའི་རྣམ་གྲངས་དང་ཆེ་བ་སྨོས་པ་ནི་སྐབས་སུ་མ་བབ་པའི་གཏམ་དུ་འགྱུར་རོ་ཞེ་ན། དེ་ནི་མ་ཡིན་ཏེ། འཁོར་གྱི་བཀོད་པ་དང་ཡོན་ཏན། རྒྱན་སྤྲོས་ཕུན་སུམ་ཚོགས་པ་ནི། གཙོ་བོའི་ཆེ་བ་དབྱུང་བ་དང་མཛེས་པ་ཕུལ་དུ་བྱུང་བ་ཡིན་པ་དང་། མ་ཟད་བསྟན་པ་སྤྱིའི་འགྲོ་ལུགས་ལའང་། སློབ་མ་ཚོགས་ལམ་པས་བླ་མ་སྦྱོར་ལམ་པ་བསྟེན་དགོས་པ་དང་། དེ་བཞིན་དུ་སྦྱོར་ལམ་པས་མཐོང་ལམ་པ། མཐོང་ལམ་པས་སྒོམ་ལམ་པ། སྒོམ་ལམ་པས་མི་སློབ་པའི་ལམ་པ་བསྟེན་དགོས་པ་ལས། སློབ་མ་བས་བླ་མ་ལུང་རྟོགས་དམའ་བ་དང་། ན་མཉམ་པ་ལ་བརྟེན་པས་བརྟེན་བྱས་རྟེན་བྱེད་གོང་ནས་གོང་དུ་བོག་དབྱུང་མི་ནུས་པས་ཟོལ་གྱིས་བསྟོད་པ་ཆེན་པོར་སོང་བར་གྱུར་པ་དང་། པཎྜི་ཏ་དབྱུག་པ་ཅན་གྱི་བཞེད་པ། རིགས་དང་བརྩོན་འགྲུས་ཐོས་སོགས་ཀྱིས། །དགྲ་བོ་ལའང་བསྔགས་བྱས་ནས། །དེ་ལས་རྒྱལ་ཕྱིར་འདྲེན་པ་ནི། །ཁྱད་འཕགས་བརྗོད་པའང་བདག་དགའ་སྐྱེས། །ཞེས་པའི་ལུང་དོན་དང་ཡང་ཚར་གཅོད་དང་རྗེས་འཛིན་གྱི་ལས་ཀྱི་དབྱེ་བ་ཙམ་ལས་དོན་འདྲ་བ་དང་། ཀུན་མཁྱེན་དྲི་མེད་འོད་ཟེར་གྱིས། བླ་མ་བཟང་པོའི་མཚན་ཉིད་གང་ཞེ་ན། །སློབ་མ་མང་ཐོན་ཉམས་རྟོགས་ལྡན་པ་ཡིན། །ཞེས་དང་། གྲུབ་པའི་དབང་ཕྱུག་ཀརྨ་ཆགས་མེད་ཀྱིས། བླ་མ་ལྟ་བ་དང་དགོངས་པ་ཨེ་མཐོ་སློབ་མ་ལ་བརྟགས་ན་ཤེས་པ་ཡིན་གསུངས་པ་དང་། ཞྭ་དམར་ཅོད་པཎ་འཆང་བ་
དཀོན་མཆོག་ཡན་ལག་གིས། ཁྲ་ཚང་པ་ཆེན་པོ་བློ་མཆོག་རྡོ་རྗེ་ལ་གསུངས་པ། གངས་རའི་རྡོ་རྗེའི་གླིང་དུ་མཛད་པའི་བཅད་ལྷུག་སྤེལ་མའི་གླུ་ལས། སློབ་མ་བཟང་མིང་ཐོན་པ་དེ། །བླ་མའི་ཡོན་ཏན་གཙོ་བོ་ཞེས། །མཁས་གྲུབ་རྣམས་ལ་གྲགས་གྱུར་ན། །དེ་ནི་ཁྱོད་ལ་ལྡན་མཐོང་ངམ། །ཞེས་དང་། རང་ལ་འཁོར་བའི་བུ་སློབ་འཁོར། །མཁས་བཙུན་བཟང་པོར་བསྐྱེད་ནས་ཀྱང་། །སངས་རྒྱས་བསྟན་པ་བསྲུང་ནུས་པ། །ཀྱེ་མ་ཤིན་ཏུ་དཀོན་པ་བྱུང་། །འདི་ལྟ་བུ་འབྱུང་བའི་རྒྱུ་ནི་ཅི་ཞིག་ཡིན་ཞེ་ན། ཕ་རོལ་གཞན་གྱི་སྐྱོན་ནི་ཅུང་ཟད་ཀྱང་མ་ཡིན་ཏེ། ཕྲུ་བར་མེད་བའི་གཟར་བུ་བཞིན། །རང་རྒྱུད་ཡོན་ཏན་མེད་པས་ན། །གཞན་ལ་དེ་ལྟར་མི་འབྱུང་བ། །གཙོ་བོའི་རྒྱུ་ནི་དེ་ཉིད་ཡིན། །གཅིག་ཏུ་རང་རྒྱུད་ལ་བསླབ་ཤེས་ཀྱི་ཡོན་ཏན་སྨིན་པ་མེད་པ་དང་། གཉིས་སུ་གང་ཤེས་པའི་ཆོས་དེ་ཡང་ཟླ་གཅིག་སྦྲེལ་བའི་འཆད་ཉན་མི་ནུས་པ་དང་། གསུམ་དུ་གོ་ས་མཐོན་པོར་བཏགས་ནས་གཉོམ་ཆུང་ཤེས་ལྡན་ལ་དྲི་རྨེད་བྱེད་པ་ལྟ་ག་ལ་ཞིག །གམ་དུ་འོང་བ་ཡང་མེད་ཅིང་ཞུ་མི་ནུས་ཟེར་ནས་སྤ་བཀོང་སྟེ་གནས་དགོས་པ་དང་། བཞི་པ་ནི་དེ་ཚོ་ཐམས་ཅད་འོང་བའི་རྩ་བ་འུར་སྒྲོག་རྣམ་གཡེང་གི་འཁོར་ལོ་བསྐོར་བ་སྟེ་སྐྱོན་རྩ་རང་རྐྱེན་བཞི་པོ་འདི་ལ་འདུས་འདུག་གོ །ཞེས་གསུངས་ནས་བླ་མའི་མཛད་པའི་མཆོག་བསྟན་པ་ལ་ཕན་པའི་སློབ་མ་འོང་བ་ལ་གནད་གལ་ཤིན་ཏུ་ཆེ་བའི་གསུང་གཟུ་བོར་གནས་པ་ཡང་ཡང་གནང་བའི་དོན་ཐམས་ཅད་ལྡོག་ཕྱོགས་ནས་རྗེ་བླ་མ་ཕྱོགས་ལས་རྣམ་པར་རྒྱལ་བ་འདི་ལ་ཚང་བ་དང་། འཇིག་རྟེན་གྲགས་
པའི་རྗེས་སུ་འབྲང་ནའང་། རྒན་པོ་རྣམས་ཀྱི་ངག་ལས། བླ་མ་ཅི་བཟང་སློབ་མས་ཤེས། །མཉེད་པ་ཅི་བཟང་པགས་པས་ཤེས། །ཞེས་ཟེར་བ་ལྟར་སློབ་མ་ལ། ཐོས་བསམ་སྒོམ་གསུམ་དང་། འཆད་རྩོད་རྩོམ་གསུམ་དང་། མཁྱེན་བརྩེ་ནུས་གསུམ་ཅན་བྱུང་བ་ནི། བླ་མ་དེ་དེ་དག་ལས་ལྷག་པའི་ཡོན་ཏན་རྒྱ་མཚོའི་མངའ་བདག་ཡིན་པ་སོམ་ཉི་མེད་པར་གོ་ནུས་པ་སྟེ། དུ་བའི་རྟགས་ལས་མེ་ཡོད་པར་ཤེས་པ་བཞིན་འབྲས་བུའི་རྟགས་འཁྲུལ་བ་མེད་པ་ཡིན་ནོ། །གཉིས་པ་རྩོམ་པས་ཐུབ་བསྟན་གསལ་བར་མཛད་པའི་ཚུལ་ནི། སྙན་ངག་ལེའུ་གསུམ་གའི་དཔེར་བརྗོད་དཎྜིའི་དགོངས་པ་ཇི་བཞིན་གསལ་བར་མཛད་པ་དང་། མཎྜལ་རྣམ་བཤད་རྒྱས་པ། བདག་ཅག་གི་སྟོན་པའི་སྐྱེས་པའི་རབས་རྒྱས་འབྲིང་བསྡུས་གསུམ་ས་སྐྱོང་ཆེན་པོའི་ངོར་མཛད་པ། ཆབ་ཤོག་གོ་དོན་སློབ་མ་རྣམས་ལ་མིང་བཏགས་བསྟོད་ཚོགས་སྐོར་སྣ་ཚོགས་པོ་ཏིར་ལོངས་པ། ཐེག་པ་མཐའ་དག་གི་ལམ་རིམ་ལེགས་བཤད་སྦྲང་ཆུང་རྩི་བཅུད་ཅེས་པ། ཐིག་ལེ་སྟོང་གསལ་ཆེན་པོའི་རྒྱུད་ཀྱི་ལུང་དོན་གསལ་བྱེད། སྡེབ་སྦྱོར་འགྲེལ་བ། དྲིས་ལན། སྒྲ་སྐོར་ཟིན་བྲིས་ཀ་ལཱ་པ་དང་། ཙནྡྲ་པའི་སུབ་མཐའ་དང་། རིབ་མཐའི་གསལ་བྱེད་ལེ་ཚན། རྣམ་རྒྱལ་མའི་གཟུངས་སོགས་གཟུངས་སྔགས་དུ་མའི་བྱིངས་སྒྲུབ། དམ་པ་ལ་བསྔགས་པའི་ཀུན་བཟང་འཁོར་ལོ། རྫོགས་ཆེན་བཞི་པ་མི་འགྱུར་ནམ་མཁའི་རྡོ་རྗེའི་ཕྱིའི་རྣམ་ཐར་པོད། སྨིན་ལུགས་ཀྱི་བསྒྲིགས་ལམ་
ཇི་ལྟ་བར་དངོས་གྲུབ་རོལ་མཚོ་དང་། བླ་མ་གསང་འདུས། འཇམ་དཔལ་དྲེགས་འཇོམས། གུ་རུ་དྲག་དམར། བཀའ་བརྒྱད་སྨན་སྒྲུབ་འགྲེལ་བ་བཅས་ལ། གདངས་དབྱངས་ཀྱི་དཔྱད་ཁྲ་དང་འབྲེལ་བར། བླ་མ། ལས་རྡོར། བྱང་འདྲེན་སོགས་ཀྱིས་མཛད་སྒོ་ཅི་ཡོད་གཅིག་ཤེས་ཀུན་གྲོལ་བལྟས་ཆོག་མ་བློ་གསལ་ཡོངས་ཀྱི་དགའ་སྟོན་གཅིག་ཆར་དུ་སྤེལ་ནུས་པ་རྣམས་དང་། བསམ་གླིང་འོད་ཆོག་གི་རྣམ་འགྲེལ། གཞི་གསུམ་ཆོ་གའི་ཟིན་བྲིས། རྒྱུད་རྒྱལ་གསང་བའི་སྙིང་པོའི་སྤྱི་དོན། ཟབ་དོན་གཅོད་ཀྱི་གདམས་ཁྲིད་གནད་བསྡུས་སོགས། ཚིག་ཉུང་དོན་བསྡུས་ཀྱི་ལེགས་བཤད་མང་དུ་མཛད་པའོ། །གསུམ་པ་ནི་གནས་སྐབས་ཀུན་ཏུ་ཐུགས་ཀྱི་སྤངས་པ་ཕུན་སུམ་ཚོགས་པ་ནི། ཇི་སྐད་དུ། སློབ་དཔོན་ཆེན་པོས། ཕྱི་ལྟར་གཟུང་བའི་ཡུལ་སྣང་དག་པ་དང་། །ནང་ལྟར་འཛིན་པའི་སེམས་ཉིད་གྲོལ་བ་དང་། །བར་དུ་འོད་གསལ་རང་ངོ་ཤེས་པ་རུ། །དུས་གསུམ་བདེ་གཤེགས་རྣམས་ཀྱི་ཐུགས་རྗེ་ཡིས། །བདག་འདྲའི་རང་རྒྱུད་གྲོལ་བར་བྱིན་གྱིས་རློབས། །ཞེས་གསུངས་པའི་དོན་ལྟར། རྣལ་འབྱོར་ཆུ་བོའི་རྒྱུན་བཞིན་ཡོད་པ་གཞིར་བཅས་ལ། དམིགས་བསལ་ཐུགས་སྐབས་ནམ་བདེ་ལ་ཟླ་མཚམས། ལོ་མཚམས་ཀྱི་ཁོངས་སུ་ལྷག་པའི་ལྷ་དུ་མའི་བསྙེན་སྒྲུབ་ལས་སུ་རུང་བ་མཛད་པས་རྟགས་མཚན་ཅི་རིགས་པ་བྱུང་བ་དང་། ཁྱད་པར་དུ་གྲུབ་བརྒྱུད་རྒྱ་མཚོ་ལྟ་བུའི་བསྟི་གནས་དཔལ་ཀཿ ཐོག་རྡོ་རྗེ་
གདན་དུ་བཞུགས་པའི་ཚེ་བསླབ་སྦྱང་མཛད་བཞིན་པའི་དོན་རྣམས་ཉམས་སུ་ལེན་པ་འགལ་མེད་དུ་མཛད་པས་མཁས་པ་དང་གྲུབ་པའི་ཕྱག་རྗེས་ལྷན་ཅིག་ཏུ་འཇོག་པར་མཛད། སྨིན་གླིང་གྲྭ་ས་ནས་ཕྱིར་བྱོན་མ་ཐག །རྒྱལ་བའི་དབང་པོ་ཀློང་ཆེན་ཞབས་ཀྱིས། ཚངས་པར་སྤྱོད་པ་མང་དུ་ཐོས་པ་དང་། །ལེགས་པར་སྒོམ་དང་ནགས་སུ་གནས་པ་དང་། །དགེ་བ་གོམས་རྣམས་འཇིགས་པ་མེད་པ་ཡི། །འཆི་བའི་ཚེ་ན་རབ་དགའ་ཐོབ་པར་འགྱུར། །དགའ་བའི་རྒྱུ་ནི་ནགས་སུ་གནས་པས་འགྲུབ། །དེ་ཕྱིར་ནགས་ཀྱི་ནང་དུ་སྒོམ་དུ་གཤེགས། །ཞེས་གསུངས་པ་ལྟར། རང་དགོན་གྱི་དབེན་རི་སེངྒེ་གནམ་རྫོང་གི་གནས་ནང་། བདེ་ཆེན་པདྨ་འོད་གླིང་གི་ནགས་ཁྲོད་རིག་འཛིན་གྲུབ་པའི་དགའ་ཚལ་དུ་སྐུ་ཚེ་སྔ་མ་རྣམས་ནས་ལྷག་པའི་ལྷར་བསྟེན་པ་ཟབ་ལམ་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་གཙོས་རྩ་བ་གསུམ་གྱི་ལྷ་དུ་མའི་གྲངས་དུས་མཚན་མའི་བསྙེན་པ་ཅི་རིགས་པ་མཛད་པས། ཕྲིན་ལས་བཞི་གང་བརྩམ་པ་ལ་ཐོགས་པ་མེད་པའི་སྤོབས་པ་དགེ་བར་གྱུར་པ་ནི་ཉི་ཟླ་ལྟར་ཕྱོགས་ཀུན་ཏུ་ཡོངས་སུ་གྲགས་པའོ། །
སློབ་བུ་སྒྲ་རམས་པ་ལ་གདམས་པ།
དེར་མ་ཟད་ལམ་བསླབ་པ་གསུམ་གྱི་སྦས་དོན་མན་ངག་གིས་ཉམས་སུ་བླང་བྱ་ཀུན་ཐུགས་ཀྱི་དཔལ་བེར་སྒོམ་སྟོབས་ཀྱིས་ཡོངས་སུ་འཁྱིལ་བའི་གཏམ། དད་དམ་འགྱུར་མེད་ཀྱི་སློབ་བུ་རྣམ་རྒྱལ་ལ་སྤྲིངས་པ་འདི་ལས་ཀྱང་རྡོ་རྗེ་འཛིན་པ་ཆེན་པོ་ཡིན་པའི་ངེས་ཤེས་ཁྱད་པར་ཅན་སྐྱེ་བར་འགྱུར་བ་ཡོད་དེ།
ཇི་ལྟར་ཞེ་ན། ཐམས་ཅད་མཁྱེན་དངོས་བླ་མ་རྗེར། །གུས་འདུད་སློབ་བུ་རྣམ་རྒྱལ་ལ། །སྐྱེས་ཐོབ་སྦྱངས་པ་ཆེས་ཕྲ་ཡང་། །ཉམས་འགྱུར་མགྲིན་པའི་གླུ་འདི་སྤྲིང་། །ཐོག་མར་རྟེན་མཆོག་བསྟན་སྒོར་ཞུགས། །ཉིས་བརྒྱ་ལྔ་བཅུའི་འདུལ་ཁྲིམས་བསྲུངས། །ཐོས་བསམ་སྒོམ་པས་རྒྱུད་སྨིན་སྦྱངས། །ང་རྣམ་དག་ཐུབ་པའི་རྗེས་འཇུག་ཡིན། །བར་དུ་གསང་བ་སྔགས་ལམ་སྤྱོད། །རིམ་གཉིས་རྣལ་འབྱོར་ལམ་དུ་བསླངས། །བླ་མའི་གསང་གསུམ་དམ་ཚིག་འབད། །ང་གྲུབ་ཐོབ་རྣལ་འབྱོར་ཆེ་རྒྱུད་ཡིན། །ཐ་མར་གཞི་འབྲས་དབྱེར་མེད་ཀྱི། །ཀ་དག་ཆོས་སྐུའི་རྒྱལ་ས་བཟུང་། །ལྷུན་གྲུབ་སྣང་བཞིའི་ལྟད་མོས་གཡེངས། །ང་པད་འབྱུང་བི་མའི་བརྒྱུད་འཛིན་ཡིན། །ང་དེ་ལྟར་ལྡན་པའི་རྣལ་འབྱོར་ལ། །
ཁོང་འཁྲུལ་སྣང་ཅན་གྱིས་བསྒྱུར་དུ་མེད། །རྣམ་རྟོག་བདག་འཛིན་བྲལ་བ་ལ། །དགྲ་གཉེན་འཁྲི་བ་དབྱིངས་སུ་ཆོད། །ཁྱེད་རིམ་གཉིས་སྔགས་ཀྱི་དྲོད་ཚད་ཉུལ། །མཉམ་རྗེས་དབྱེར་མེད་འཇོག་པ་ལ། །གྲག་སྟོང་ཚིག་གི་རྗེས་དཔྱོད་པའི། །རྣམ་རྟོག་གཉེན་པོས་མ་ཐུལ་ལམ། །གང་ཤར་དྲན་པའི་རང་སོ་ལྟོས། །དེ་ངོར་དགའ་སྡུག་དབྱིངས་སུ་ཡལ། །དབྱིངས་རིག་བསྲེས་ལ་མཉམ་པར་ཞོག ། འཁོར་འདས་བྱང་ཆུབ་སེམས་སུ་རྫོགས། །ང་རང་རིག་དོན་གྱི་བླ་མ་ལ། །བཤགས་པ་དེར་འཛིན་བྲལ་བས་མཛོད། །བསྟོད་པ་འདུ་འབྲལ་མེད་པར་བསྟོད། །མཆོད་པ་རྣམ་པར་མི་རྟོག་མཆོད། །བླ་སློབ་དམ་ཚིག་སྲད་བུས་སྦྲེལ། །སྐྱེ་ཀུན་འབྲལ་མེད་རྗེས་སུ་སྐྱོངས། །ཁྱོད་རྐྱེན་ངན་ལམ་དུ་སློང་བར་གྱིས། །
འགལ་རྐྱེན་གྲོགས་སུ་འཆར་བར་མཛོད། །ང་རང་རིག་བླ་མ་སྙིང་དབུས་སྒོམས། །སངས་རྒྱས་ཀུན་འདུས་ངོ་བོར་བསྐྱེད། །དབང་བཞིས་རང་སེམས་བླ་མ་དང་། །དབྱེར་མེད་ངང་ལ་མཉམ་པར་ཞོག ། བུ་མ་ཡེངས་རྩོལ་བས་རང་དོན་སྒྲུབས། །མཉམ་རྗེས་དབྱེར་མེད་ལྟ་བ་དང་། །རིམ་གཉིས་རྣལ་འབྱོར་ཉམས་སུ་ལོངས། །ང་དང་སྐད་ཅིག་འདུ་འབྲལ་མེད། །ང་བཅུ་ཕྲག་ཤེས་བྱའི་གནས་ལ་མཁས། །ཐེག་དང་གྲུབ་མཐའི་གནས་ཀུན་འབྱེད། །རང་རིག་འགྱུར་མེད་བཙན་ས་ཟིན། །འགྲོ་འདྲེན་ལྷག་བསམ་ཀུནྡར་འཁུ། །ཁྱོད་བླ་མར་མོས་གུས་ལྟེམ་རྐྱང་མེད། །དད་འདུན་ཡིད་སྲུབ་ཀྱིས་བསྒྱུར་ན། །ཉམས་འགྱུར་དེ་བཞིན་དག་སྣང་སྦྱོངས། །ང་པདྨོ་འདམ་གྱིས་གོས་སྐྱོན་མེད། །ཁྱེད་རིག་པ་ཧུར་བསྐྱེད་ནམ་མཁར་ལྟོས། །
མཐོ་མི་མངོན་ཉི་མ་ཉི་ཟེར་གཉིས། །འདི་མ་བྲལ་ཁྱེད་རང་བདག་མི་འབྲལ། །ནམ་མཁར་ཕྱོགས་འཛིན་ཨེ་འདུག་སོམས། །ཉི་མར་མུན་པ་ཨེ་འདུག་སོམས། །ངེད་ཀྱི་མགུལ་ཕུར་དར་མདུད་འདི། །ཁྱེད་ལ་བར་ཆད་སྲུང་མཚོན་སྦྱིན། །རང་དོན་ལྷུན་གྱིས་གྲུབ་པ་དང་། །གཞན་དོན་མཐའ་རུ་ཕྱིན་པ་འོང་། །སྐྱེ་འདི་བཟུང་ཚེ་རབས་ཐམས་ཅད་དུ། །ཁྱེད་དང་བྱང་ཆུབ་མ་ཐོབ་བར། །འགྲོགས་ཤིང་མཐར་ཐུག་དབྱིངས་གཅིག་ཏུ། །དབྱེར་མེད་མངོན་འཚང་རྒྱ་བར་ཤོག ། དེ་སྐད་གང་དྲན་གླུ་ངག་འདི། །ཚིག་མི་སྙན་ཡང་དོན་ལ་སྙན། །ཉམས་སུ་ལོངས་ལ་གསོལ་བ་ཐོབ། །དེ་ལྟར་གསུང་ཚུལ་སློབ་མ་ལ་ཞལ་གདམས་ཡིན་ནའང་དོན་དུ་ཕྱི་ནང་གསང་གསུམ་གྱི་རྣམ་ཐར་ཞལ་གསུང་མ་དངོས་རེད་འདུག་པས་དོན་ཆེ་བར་སེམས་ནས་ཡིག་ཚོགས་ལ་མ་འཛེམས་པར་བྲིས་པ་ལགས།
ཐ་མ་རྟག་འཛིན་ཅན་གྱི་ངོར་མྱ་ངན་ལས་འདའ་བ་བསྟན་པ།
གསུམ་པ་རྟག་འཛིན་ཅན་གྱི་ངོར་མྱ་ངན་ལས་འདས་པའི་ཚུལ་བསྟན་པ་ནི། དགུང་གྲངས་རེ་བདུན་བཞེས་པ་ཆུ་གླང་ལོ་དེར། གླང་ལུག་བདུན་ཟུར་ཕུང་གྱོད་ལ་བབ་པ་དེའི་ཚེ་སྐུ་མི་རྟག་པའི་སྔ་ལྟས་རྣམས་བྱུང་ཞིང་ཞལ་བཞེས་ཀྱང་མཛད། བསྙུན་གཞི་ཡང་ཚབས་ཆེན་གྱི་གཞི་བཏིང་བ་སྨན་དཔྱད་རིམ་གྲོ་ལ་སོགས་ཀྱིས་བཟློག་ཐབས་མ་བྱུང་བ། ཕུག་ལུགས་པའི་རྒྱ་རྩིས་ལོ་མགོ་ཧོར་ཟླ་བཅུ་གཅིག་པ་མགོ་ཟླ་བ་ཉི་མ་གཞུ་ཁྱིམ་དུ་སླེབ་པ། དཔྱིད་ར་སྟག་ལ་བཞེད་པའི་ཤིང་སྟག་གནམ་ལོ་གསར་ཚེས་དགུང་གྲངས་རེ་བརྒྱད་ངོ་མཐོང་དཔྱིད་འབྲིང་ཧོར་ཟླ་བཅུ་གཉིས་པའི་ཚེས་བཅོ་བརྒྱད་ཀྱི་ཉི་ཐལ་བྱ་ཡི་དུས་ཚོད་ལ་བབ་པ་ན། ཇི་སྐད་དུ་ཐེག་བསྡུས་ལས། མཛད་པ་རྫོགས་པར་གྱུར་པའི་ཕྱིར། །ཞི་བ་མི་འདོད་བཟློག་པའི་ཕྱིར། །སངས་རྒྱས་བརྙས་པ་བཟློག་པའི་ཕྱིར། །སྤྲོ་བ་བསྐྱེད་པ་བྱ་བའི་ཕྱིར། །སོ་སོ་རང་བརྩོན་བརྩམ་བྱའི་ཕྱིར། །མྱུར་དུ་ཡོངས་སུ་སྨིན་པའི་ཕྱིར། །སངས་རྒྱས་རྣམས་ཀྱི་སྤྲུལ་པའི་སྐུ། །གཏན་དུ་བཞུགས་པ་མི་བཞེད་དོ། །ཞེས་གསུངས་པ་ལྟར། སྐྱེ་སྲིད་སྤྲུལ་སྐུའི་ཕྲིན་ལས་ཀྱི་རྣམ་རོལ་དང་བཅས་པ་རེ་ཞིག་ཞིང་འདིར་བསྡུ་བའི་ཚུལ་བསྟན་ནས། འཆི་སྲིད་ཆོས་སྐུའི་གོ་འཕང་མངོན་དུ་མཛད་པ་སྟེ། དེ་ཡང་ཐོག་མར་ཉེ་བར་གནས་པ་དག་ལ། ད་ནི་བདག་ལ་ས་སོགས་ཐིམ་རིམ་རྣམས་འཆར་བྱུང་བས། རྒྱལ་ཚབ་སྤྲུལ་སྐུ་བྱོན་ཞུས་གསུངས་པ། དེ་མ་ཐག་སྤྲུལ་སྐུ་བྱོན་རྒྱུ་མ་བྱུང་བ། སྤྱན་ནམ་མཁའ་ལ་ཅེར་གྱིས་གཟིགས་པ་མཛད་དེ། སྐུ་དྲང་
པོར་བསྲངས། ཞབས་སྐྱིལ་ཀྲུང་དང་། ཕྱག་མཉམ་བཞག་མཛད་དེ། རླུང་དང་དྲོད་ཐམས་ཅད་གྱེན་དུ་ལྡོག་སྟེ། སྦྲུལ་གྱི་ཤུན་པ་བརྗེ་བ་ལྟར་འདིར་སྣང་གི་ཞེན་འཛིན་དང་། གནད་གཅོད་ཀྱི་ཟུག་རྔུ་སོགས་ཕྲ་མོ་ཙམ་ཡང་མེད་པར་མྱ་ངན་ལས་འདའ་བའི་ཚུལ་བསྟན་ཏེ། དེ་འཕྲལ་རྒྱལ་ཚབ་རིན་པོ་ཆེ་ཕེབས་ནས་རང་བཞིན་རྫོགས་པ་ཆེན་པོའི་གནས་ལུགས་སྐུ་གསུམ་གྱི་དགོངས་པའི་ངོ་སྤྲོད་རྣམས་ལེགས་པར་གསུངས། ཞག་གསུམ་སོང་ཐོག་མཆོད་དཔོན་ཆོས་དར་སོགས་དད་དམ་གཙང་བ་འགས་གདུང་ཆོས་རིགས་ལྔ་སོགས་ལོངས་སྐུའི་རྣམ་པ་ལྟ་བུ་བྱེད་སྲོལ་འདུག་པ་ལྟར་བྱས། ཞག་གསུམ་མཆོད་འབུལ་ལ་རྫོགས་ཆེན་དཔོན་སློབ་བྱོན། བླ་མ་མཆོད་པ་དང་། དེ་དང་འབྲེལ་བར་འབྲེལ་ཐོགས་ལ་ཁྲུས་ཆབ་མཛད། སྐུ་མ་གཤེགས་སྔོན་བླ་མ་དོན་དཔལ་གྱིས་ཉིད་ཞལ་མ་རྟག་ན། གསོལ་དགུང་དང་། མཆོད་འབུལ་རྣམས་ཇི་ལྟར་བྱ་ཞུས་པ་ལས། རྫོགས་ཆེན་རིན་པོ་ཆེ་བྱོན་རྒྱུ་འདྲ་རེད་འོང་ན་ཕྲན་ཐ་མལ་གྱི་ཚུལ་ལྟར་གྱིས། གཞན་དགོན་ཡར་མར་གྱི་བླ་སྤྲུལ་སུ་བྱོན་རུང་མཆོག་གི་གདུང་ལྟར་གྱིས་དང་ཆོག་གསུངས་པ་ལྟར་ཐམས་ཅད་ཀྱིས་དེ་ལྟར་མཛད། ཕྲན་ཡང་དཔོན་སློབ་ཀྱི་བྱང་འདྲེན་པར་འོང་ཡོད་པ། མཚན་ཐུབ་བརྒྱ་མཆོད་ཅིག་ཕུལ། མཚན་ཐོག་ཐག་ལ་བླ་མ་མཆོད་པ་བཏོན་ནས་གསོལ་བ་གང་ཤེས་བཏབ། གསོལ་དགུང་མ་ཟིན་བར་གདུང་ཞེ་ཆེན་བླ་བྲང་དུ་བཞག །དགོན་ཁག་གི་བླ་མ་གདན་ཞུས་དགོས་རིགས་བྱོན།
དེ་མཚམས་ནས་ད་དུང་གདུང་ནམ་ཚའི་བབ་ཀྱིས་རུལ་ཉེན་མེད་པས་དགོན་སྟོད་ནོར་བུ་རྩེའི་གཟིམ་ཤག་ཏུ་དྲངས་ནས། བླ་མ་དོན་དཔལ་སོགས་ཀྱིས་མཆོད་འབུལ་དང་གསོལ་འདེབས་ཞུས་ཏེ་ཟླ་གཅིག་ཙམ་བཞག །དེ་མཚམས་ནས་ཞེ་དགོན་བླ་མཆན་བཞིས། དོང་སྤྲུགས་སོགས་བཀའ་གཏེར་གྱི་ཆོ་ག་བཞིའི་སྒོ་ནས་ཞུགས་ལ་སྦྱངས། གདུང་རུས་འགའ་ཞབས་དྲུང་རྡོ་རྗེ་འཆང་འཇམ་དཔལ་དབྱངས་མཁྱེན་བརྩེ་སོགས་དད་འབྱོར་ལྡན་པའི་སློབ་བུ་རྣམས་ཀྱིས་རྟེན་གསར་བཞེངས་ཀྱི་ནང་གཟུངས་སོགས་སུ་སྤྱན་དྲངས། ཕོན་མང་བ་སཱཙྪ་ཆོ་ག་བཞིན་བསྒྲུབས་ཏེ་མཆོད་རྟེན་ནང་ལ་འབུལ་རྒྱུ་བྱས། མཆོད་རྟེན་བླ་མ་དོན་དཔལ་དང་། ཕྱག་མཛོད་ཀུན་འགྲུབ་གྲོས་བསྟུན་གྱི་སྒོ་ནས་མདའ་ཚད་ལྷག་ཙམ་གསེར་ཟངས་ཀྱིས་བཞེངས། ཕྲ་རྒྱན་སོགས་ཆེ་ཡག་ཆུང་མཛེས་ཟེར་བའི་དཔེ་ལྟར་བྱས་ནས་བླ་བྲང་ཡང་སྟེང་སྐུ་གདུང་ཁང་དུ་བཞུགས་སུ་གསོལ་བ་འདི་ལྟར་ལགས། གང་ལྟར་ཡང་རང་ཅག་ཐ་མལ་པ་རྣམས་ནི་གཟུང་འཛིན་བདེན་གྲུབ་ཀྱིས་བཅིངས་པས་སྐྱེ་ཤི་བར་དོ་རང་མཚན་པ་མྱོང་ལ། དམ་པ་འདི་ལྟ་བུ་རྣམས་ནི། གཞན་ངོར་སྐྱེ་བ་སོགས་སྒྱུ་མའི་རྣམ་རོལ་དུ་སྟོན་པ་ཡིན་ཏེ། འཕགས་པ་སྡུད་པ་ལས། འགྲོ་བ་འཁྲུལ་བ་རི་དྭགས་རྒྱར་ཚུད་འདྲར་ཤེས་ནས། །ཤེས་རབ་ལྡན་པ་མཁའ་ལ་བྱ་བཞིན་རྣམ་པར་རྒྱུ། །ཞེས་གསུངས་པ་ལྟར་རོ། །
སྨྲས་པ། འཆི་བའི་རྣམ་རྟོག་སྒྱུ་མའི་ཚུལ་ཤེས་ནས། །འཆི་བའི་སྡུག་བསྔལ་རང་མཚན་གྱིས་མནར་འགྲོ། །འཆི་མེད་བདེ་ཆེན་བཙན་སར་མྱུར་བགྲོད་སླད། །འཆི་ཚུལ་བརྩོན་འགྲུས་བསྐུལ་མ་བསྟན་པར་མཛད། །འཆི་ཞེས་གཟུགས་སྐུའི་ཟླ་བ་སྟོང་པའི་མཐར། །ཆོས་དབྱིངས་ནམ་མཁའི་མཐོངས་ལས་ཕྱེད་མིན་ཡང་། །རྫོགས་སྨིན་སྦྱངས་པའི་ལག་རྗེས་ཚེས་པའི་ཟླ། །འཆར་བཞིན་གདུལ་བྱའི་རྫིང་བུའང་ཅིག་ཆར་མཛེས། །མཁའ་འདིའི་ཁྱོན་མཉམ་ཡིད་ཅན་ཐམས་ཅད་ཀུན། །ལས་ཉོན་ཀུན་དཀྲིས་ཞགས་པས་མ་བཅིངས་མེད། །རྒྱལ་བའི་ཕན་བདེའི་ཕྲིན་ལས་ཡང་དེ་དང་མཉམ། །དེས་ན་འགྲོ་འདུལ་སྤྲུལ་སྐུའང་རྒྱུན་ཆད་མིན། །ཞེས་ཚིགས་སུ་བཅད་པས་མཚམས་སྦྱར་ནས།
དགོས་པ་དང་ཕན་ཡོན་མཇུག་རྩོམ་བཅས།
གསུམ་པ་དགོས་པ་ཕན་ཡོན་དང་བཅས་པ་བཤད་པ་ལ། དང་པོ་རྒྱུ་མཚན་ནི། ཁ་ཆེའི་པཎྜི་ཏ་ཟླ་བ་མངོན་དགས། བསྟན་བཅོས་དག་ནི་ཐམས་ཅད་དང་། །ལས་ནི་ཅི་ཡང་རུང་བ་ཡི། །ཇི་སྲིད་དགོས་པ་མ་སྨྲས་པ། །དེ་སྲིད་དུ་ནི་སུ་ཞིག་
འཛིན། །ཞེས་པས་བརྗོད་བྱ་ཕུན་སུམ་ཚོགས་པ་དང་ལྡན་པའི་སྙན་ངག་དྲི་མ་མེད་པ་ལ་ལུགས་གཉིས་ཀྱི་རྣམ་དཔྱོད་དང་ལྡན་པ་དག་གིས་བླང་ཞིང་ཀུན་ཆུབ་པར་བྱ་བ་ཉིད་དོ། །རྒྱུ་མཚན་དེ་ལྡན་གྱི་དགོས་པ་དངོས་ནི། དཎྜིའི་རྒྱན་གྱི་བསྟན་བཅོས་མེ་ལོང་མ་ལས། སྔོན་གྱི་རྒྱལ་པོའི་གྲགས་པའི་གཟུགས། །ངག་གི་རང་བཞིན་མེ་ལོང་ཐོབ། །དེ་དག་ཉེར་བར་མི་གནས་ཀྱང་། །རང་བཞིན་ཉམས་པ་མེད་ལ་ལྟོས། །ཞེས་པས་སྔོན་གྱི་སངས་རྒྱས་དང་། བྱང་སེམས་འཁོར་ལོས་སྒྱུར་པ། ལོ་པཎ། ཆོས་རྒྱལ་ཆེན་པོ་རྣམས་ལ་སོགས་པ། ད་ལྟ་དུས་ཀྱིས་བསྐལ་ནས་ཉེ་བར་མི་གནས་ནའང་། དེ་དག་གི་རྣམ་པར་ཐར་པའི་གཟུགས་བརྙན་སྙན་ངག་གི་མེ་ལོང་ནང་དུ་སོང་བས། མངོན་སུམ་དུ་ཞལ་བཞུགས་པ་དང་འདྲ་བར་གསལ་བར་མཚོན་ནུས་པའོ། །དེ་ལྟར་བརྗོད་པའང་། སློབ་དཔོན་དཔའ་བོས། དམ་པ་རྣམས་དང་འཕྲད་ན་སྐྱེས་ཀྱི་མཆོག །ཚོགས་ཀྱི་ནང་ནས་མཁས་པ་མགུ་བྱེད་ཡིན། །ཞེས་དང་། དེ་ལྟར་འཆད་ནུས་པའི་བློ་གྲོས་དང་ལྡན་པའི་སྐྱེས་བུ་རྣམས་ཀྱང་། ཐ་མལ་གྱི་སྤྱོད་ཡུལ་ལས་འདས་པ། ཀུན་གྱིས་བསྔགས་པའི་འོས་སུ་ཆེ་བ་ཡིན་ཏེ། ཇི་སྐད་དུ། ཡོན་ཏན་རབ་ཀྱིས་བརྒྱན་པ་ཡི། །ཁ་ནི་པདྨ་ཡིད་འོང་འདྲ། །ཡོན་ཏན་མེད་པའི་ཁ་དག་ནི། །ས་ཡི་བུག་པ་དག་དང་མཚུངས། །ཞེས་སོ། །དེ་ལྟར་ལེགས་པར་བཤད་པ་དེ་ཉིད་ཀྱིས་རང་གཞན་གྱི་དོན་བཟང་པོ་འགྲུབ་པ་དང་། གནས་སྐབས་དང་མཐར་ཐུག་གི་ཕུན་སུམ་ཚོགས་པ་ཐམས་ཅད་བདེ་
བླག་ཏུ་འབྱུང་བའི་རྒྱུར་གྱུར་པའང་ཡིན་ཏེ། སྐྱེས་རབས་ལས། གྲགས་པའི་མཚན་མར་གྱུར་པ་བཟང་པོ་འདི་རྣམས་ཀྱིས། །བདེ་བར་གཤེགས་གྱུར་ལམ་རྣམས་གང་ཡིན་བརྟན་པར་གྱུར། །ཡིད་ལ་དད་པ་མེད་པ་རྣམས་ཀྱང་དད་པར་འགྱུར། །ཆོས་དང་ལྡན་པའི་གཏམ་གྱིས་རབ་ཏུ་དགའ་བར་འགྱུར། །ཞེས་གསུངས་པས། སྐྱེ་བོ་རྒྱུ་མཚན་མི་ཤེས་པ་དང་། ཤེས་ཀྱང་ལོག་པར་རྟོག་པས་ཡོན་ཏན་སྐྱོན་དུ་མཐོང་བ་དང་། མཉམ་འགྲོགས་ཀྱིས་ཐ་མལ་རང་དང་ལྟ་སྤྱོད་ན་མཉམ་པར་འཛིན་པ་དག །ལ་ལ་དོན་འགྱུར་གྱི་ཐེ་ཚོམ་སྐྱེ་བ་དང་། ལ་ལ་མི་ཕྱེད་པའི་དད་པ་གསར་དུ་ཐོབ་པ་དང་། སྔོན་དུ་དད་པས་བླ་མར་བཀུར་བ་རྣམས་ངེས་ཤེས་ཁྱད་པར་ཅན་གསར་དུ་འཁྲུངས་པ་སོགས་ཀྱི་དགོས་པ་ཡོད་པ་ཡིན། དེས་ན་དད་པ་ནི་དཀར་པོའི་ཡོན་ཏན་ཀུན་གྱི་གཞི་དང་རྩ་བ་ལྟ་བུ། མངོན་མཐོ་དང་ངེས་ལེགས་ཀྱི་ལམ་མཐའ་དག་ལ། ཐོག་མཐའ་བར་དུ་མེད་དུ་མི་རུང་བ་ཡིན་ཏེ། དཀོན་མཆོག་སྒྲོན་མེའི་གཟུངས་ལས། དད་པ་སྔོན་འགྲོ་མ་ལྟར་བསྐྱེད་པ་སྟེ། །ཡོན་ཏན་ཐམས་ཅད་སྲུང་ཞིང་འཕེལ་བར་བྱེད། །དོགས་པ་སེལ་ཞིང་ཆུ་བོ་རྣམས་ལས་སྒྲོལ། །དད་པ་བདེ་གཤེགས་གྲོང་ཁྱེར་མཚོན་བྱེད་ཡིན། །དད་པ་རྙོགས་པ་མེད་ཅིང་སེམས་དང་བྱེད། །ང་རྒྱལ་སྤོང་ཞིང་གུས་པའི་རྩ་བ་ཡིན། །དད་པ་ནོར་དང་གཏེར་དང་རྐང་པའི་མཆོག །ལག་པ་བཞིན་དུ་དགེ་ཚོགས་སྡུད་པར་བྱེད། །ཅེས་དང་། རྒྱལ་པའི་དབང་པོ་ཀློང་ཆེན་ཞབས་ཀྱིས།
གཅིག་ཏུ་དགེ་བ་དད་པའི་དཔུང་ཚོགས་བསྐྱེད། །འདོད་པའི་དད་པས་རྒྱུ་འབྲས་བླང་དོར་བྱེད། །མོས་པའི་དད་པས་ཡུལ་མཆོག་སེམས་རབ་གཞོལ། །གུས་པའི་དད་པས་བག་ཡོད་མཆོག་དང་ལྡན། །ཞེས་སོ། །སྤྱིར་དམ་པའི་རྣམ་ཐར་ནི་མ་ལ་ཡའི་ཙན་དན་གྱི་དུམ་བུ་ལྟར་ཟུར་ཙམ་ལའང་ཡོན་ཏན་ཚད་མེད་པ་མངའ་བ་ཡིན་ཅིང་། ཁྱད་པར་དུ་རྡོ་རྗེ་སློབ་དཔོན་འདི་ཉིད་ཀྱི་རྟོགས་པ་བརྗོད་པའང་། གཟུར་གནས་ཀྱི་སྐྱེས་བུ་མཆོག་རྣམས་དང་། རྒྱུས་ཤེས་ཀུན་གྱི་མངོན་སུམ་ཚད་མ་དང་མི་འགལ་བར། རང་བཟོའི་སྒྲོ་སྐུར་གྱི་དྲི་མས་མ་བསླད་པར་བརྗོད་པའི་ཚུལ་ནི། ཡིད་བཞིན་རིན་པོ་ཆེའི་མཛོད་ལས། ཤེས་རབ་རྒྱ་ཆེའི་སྐལ་བཟང་བླ་མ་ནི། །རིག་གནས་ཀུན་མཁྱེན་ཤེས་བྱའི་དཀྱིལ་འཁོར་རྒྱས། །ཐོས་བསམ་རྒྱ་ཆེ་གྲུབ་མཐའི་ཚིག་དོན་མཁས། །ལྟ་སྤྱོད་ཕུལ་བྱུང་གང་གིས་སྨད་དུ་མེད། །ལུང་རིགས་དང་ལྡན་རང་བཟོ་གཟུ་ལུམ་བྲལ། །གདུལ་བྱའི་བློ་རིགས་བརྟགས་ནས་ཆོས་སྟོན་ཅིང་། །བྱང་ཆུབ་ལམ་འདྲེན་དེད་དཔོན་བློ་མིག་ཅན། །རིན་ཆེན་ཐར་གླིང་བགྲོད་དེ་གུས་པས་བསྟེན། །
ཞེས་གསུངས་པའི་དོན་ལྟར་བཤད་པ་འདི་ནི། རྗོད་བྱེད་ཀྱི་ཚིག་དང་བརྗོད་བྱའི་དོན་འགལ་མེད་ཀྱིས་འབྲེལ་བ་ལེགས་པར་གྲུབ་པའོ། །འོ་ན་ལ་ལ་དག་འདི་སྙམ་སྟེ། དེ་ལྟར་ཡོན་ཏན་དང་ལྡན་པ་ཡིན་ན། ཉི་ཟླས་མུན་པ་སེལ་བ་དང་། དབྱར་གྱི་རྒྱལ་མོས་རྩི་ཤིང་ལོ་འབྲས་བསྐྱེད་པ་ལྟར་ངང་གིས་འབྱུང་བས། བཤད་པའི་ལམ་དུ་དྲངས་པ་ལ་དགོས་པ་ཅི་ཡོད་སྙམ་ན། རྒྱན་ལས། གཟུགས་རྒྱན་རང་བཞིན་ཡོན་ཏན་ལྡན་པ་མེ་ལོང་ནང་སོང་ན། །མཐོང་བའི་དབང་གིས་མི་རྣམས་རབ་ཏུ་དགའ་བའི་མཆོག་བསྐྱེད་པ། །དེ་བཞིན་ལེགས་གསུང་རྟག་ཏུ་རང་བཞིན་ཡོན་ཏན་ལྡན་པ་ཡི། །ཆོས་ཀྱང་དོན་རྣམས་ཕྱེ་བས་མཁས་རྣམས་འདི་ནས་དགའ་མཆོག་བསྐྱེད། །ཅེས་གསུངས་པས་ཡ་རབས་ཀྱི་སྐྱེ་བོའི་ལུགས་དང་མཐུན་པ་དང་། མཁས་པ་རྣམས་མགུ་བ་བསྐྱེད་པ་དང་། རིགས་ཀུན་འདུས་ཞལ་སློབ་དཔོན་མཆོག་གི་རྣམ་པར་ཐར་པ་ཐོས་བསམ་གྱི་ཡུལ་དུ་གྱུར་པས། རང་གཞན་གྱི་དོན་རྒྱ་ཆེན་པོ་འབྱུང་བ་ཡིན་ལ། ཁྱད་པར་དུ་བླ་མ་དམ་པ་ནི་སྐྱབས་གནས་ཀུན་འདུས། གདུལ་བྱའི་སླད་དུ་རྒྱལ་བ་ཐམས་ཅད་ཀྱི་ཡེ་ཤེས་ཀྱི་རང་གཟུགས་ཡིན་པ་དང་། སྐུ་གསུང་ཐུགས་ལ་ཕྱོགས་དུས་ཀྱི་སངས་རྒྱས་རྣམས་ཀྱི་དཀྱིལ་འཁོར་དགོས་པ་ཀུན་ཚང་དང་། ཕྲིན་ལས་ཡོངས་རྫོགས་ཀྱི་ཚུལ་དུ་འདུས་པ་ཡིན་ཏེ། རིམ་ལྔ་ལས། རྡོ་རྗེ་སློབ་དཔོན་ལུས་འདི་ལ། །རྒྱལ་བའི་སྐུ་ནི་རིམ་བཞིན་གནས། །ཞེས་དང་། ལུང་ལས། བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཀུན་གྱི་བྱེད་པོ་
བླ་མ་ཡིན། །བླ་མའི་སྐུ་ལ་ཕྱག་འཚལ་ལོ། །ཞེས་གསུངས་པས། དེས་ན་ཞིང་གི་ཕུལ། མི་བསླུ་བའི་སྐྱབས། ཐར་པའི་ལམ་མཁན། འཇིགས་པའི་སྐྱེལ་མ། བརྒྱ་གོ་གཅིག་ཆོད་ཀུན་འདུས་ཡིད་བཞིན་གྱི་ནོར་བུ་རིན་པོ་ཆེ་ལྟ་བུར་མདོ་རྒྱུད་རྒྱ་མཚོ་ནས་ཡང་ཡང་བསྔགས་པ་ལྟར། འདིར་རྣམ་པར་ཐར་པ་ཇི་བཞིན་བརྗོད་པ་ཡང་བསོད་ནམས་ཀྱི་ཚོགས་བསམ་གྱིས་མི་ཁྱབ་པར་ངེས་ཏེ། གང་གི་བ་སྤུའི་ཁུང་བུ་ལ་ཏིལ་མར་གྱིས་བྱུགས་པ་ཙམ་ཡང་། ཕྱོགས་བཅུའི་སངས་རྒྱས་ཀྱི་ཞིང་ཁམས་རྒྱ་མཚོར་མཆོད་པ་ཕུལ་བའི་བསོད་ནམས་དང་མཉམ་པར་གསུངས་པས། འདིར་ཡང་རབ་འབྱམས་རྒྱལ་བའི་གསང་བ་གསུམ་གྱི་རྣམ་པར་ཐར་བའི་བསྔགས་པ་རྗོད་པའི་བསོད་ནམས་ཐོབ་པ་ནི་ཐེ་ཚོམ་གྱི་ཡུལ་མ་ཡིན་པར་ལུང་རིགས་ཀྱི་ངེས་པས་ལེགས་པར་གྲུབ་པའོ། །སྨྲས་པ། ༡ མང་མང་བརྗོད་པ་ཀུན་གྱི་རྩེར་སོན་པའི། །སྙན་སྙན་བླ་མའི་རྣམ་ཐར་མུ་ཏིག་ཕྲེང་། །མཁས་མཁས་སྐལ་བཟང་མགུལ་པ་མཛེས་ཕྱིར་དུ། །དྭངས་དྭངས་བློ་ཡིས་རྡོ་རྗེ་འཆང་ཆེན་གྱི། །༢བཀའ་བཞིན་སྒྲུབ་འདི་ལེགས་བྱས་ཀུན་གྱི་ཕུལ། །ཕུལ་བྱུང་ཡོན་ཏན་རྒྱ་མཚོའི་དཔལ་གྱིས་མཛེས། །
མཛེས་པའི་ཟླ་མེད་སྲིད་ཞིའི་ཞིང་གི་རྒྱན། །རྒྱན་བཟང་སྔ་འགྱུར་བསྟན་པའི་རྩིས་སུ་ཆེ། །༣ རང་ཞེན་འདོད་པའི་གཏམ་གྱི་དྲི་བྲལ་བྲལ། །ཕྱོགས་ལྷུང་ཀུན་དཀྲིས་སྤངས་པའི་ངག་སྙན་སྙན། །ཤེས་བྱ་མཁྱེན་པའི་རྣམ་ཐར་དོན་ཟབ་ཟབ། །ཆོས་དང་མ་འགལ་བརྗོད་པ་རྣམས་བཟང་བཟང་། །༤ རྡོ་རྗེ་འཆང་དངོས་བླ་མའི་རྟོགས་བརྗོད་རྡོ་རྗེ་འཛིན་པའི་བཀའ་བཞིན་བསྒྲུབས་པ་ཡི། །དགེ་བའི་དངོས་པོ་ཟབ་ཅིང་རྒྱ་ཆེའི་དགེ་བའི་དཔལ་ཚོགས་ཡོངས་འདུས་ལྗོན་པའི་འབྲས། །ཕན་བདེའི་འདོད་པ་ཅིར་ཡང་འཇོ་བས་ཕན་བདེའི་འབྱུང་གནས་ཀུན་མཁྱེན་རྒྱལ་བའི་བསྟན། །ཕྱོགས་དུས་ཀུན་ཏུ་དར་ཞིང་རྒྱས་པས་ཕྱོགས་དུས་འགྲོ་ཀུན་བདེ་དགས་འཚོ་གྱུར་ཅིག ། ༥ ལེགས་ཉེས་ལྡོང་བའི་འགྲོ་བ་ལ། །ལེགས་པར་གཟིགས་པའི་རྒྱལ་སྲས་ཀུན། །ལེགས་བཤད་ཆོས་ཆར་འབེབས་བཞིན་དུ། །ལེགས་མཛད་མཐའ་རུ་ཕྱིན་གྱུར་ཅིག །
༦ ཁྱད་པར་རྒྱལ་བསྟན་གསལ་བའི་ཉི། །འཇམ་མགོན་མི་ཡི་ཤ་ཚུགས་ཅན། །འཇམ་དབྱངས་མཁྱེན་བརྩེ་དབང་པོ་ཡི། །ཞབས་པད་རྡོ་རྗེ་ལྟར་བརྟན་ཤོག ། ༧དེ་མཐུས་སྔ་འགྱུར་རྡོ་རྗེའི་ཐེག ། བཀའ་གཏེར་དག་སྣང་རྒྱ་མཚོའི་སྲོལ། །ཀུན་བཟོད་མ་ཡི་མཛེས་རྒྱན་དུ། །བསྐལ་པའི་མཐར་ཡང་ཉམས་མེད་སྨོན། །༨ སྲིད་པར་འཕྱན་པའི་འགྲོ་བ་ཀུན། །སྲིད་ན་མཐོ་རིས་བདེ་བས་འབྱོར། །སྲིད་པའི་བདེ་ལ་མ་ཆགས་པར། །སྲིད་ཞི་མཉམ་པའི་དཔལ་ཐོབ་ཤོག ། ༩ བཟང་ངན་ལས་ཀྱིས་འབྲེལ་ཚད་ཀུན། །ཡིད་ཤེས་བདེ་མྱུར་བསྐྱོད་པ་ཡི། །ལམ་ལས་རིག་འཛིན་རྣམ་པ་བཞི། །
མིག་འཕྲུལ་ལྟ་བུར་བགྲོད་པར་ཤོག ། ༡༠ བདག་ཀྱང་སྐྱེ་ནས་སྐྱེ་བ་རུ། །རྗེ་བཙུན་བླ་མ་ཡབ་སྲས་ཀྱི། །ཞལ་མཇལ་གསུང་གི་བདུད་རྩི་མཆོག ། མྱོང་བའི་སྐལ་བཟང་ཁོ་ནར་སྨོན། །༡༡ཀུན་མཁྱེན་ཡེ་ཤེས་རོལ་བ་ནི། །ཅིར་ཡང་འཆར་བ་ཆོས་ཉིད་ཕྱིར། །ཞིང་ཁམས་རྒྱ་མཚོའི་གདུལ་བྱ་ལ། །འདུལ་ཐབས་འཁྲུངས་དང་ཆོས་སྟོན་སོགས། །༡༢འགལ་མེད་གཅིག་ཆར་སྟོན་པ་ཡི། །ངོ་མཚར་ཆེན་པོའི་བཀོད་པ་ཀུན། །བདག་གི་དབང་མངོན་ཚད་མ་ཡིས། །ཇི་བཞིན་མྱོང་བའི་དཔལ་ཐོབ་ཤོག ། ༡༣རང་དོན་ཐོས་བསམ་སྒོམ་པའི་ཡན་ལག་རྫོགས། །གཞན་དོན་འཆད་རྩོད་རྩོམ་པའི་རླབས་ཕྲེང་མཛེས། །
གཉིས་དོན་མཁྱེན་ནུས་བརྩེ་བའི་ནོར་བུས་གཏམས། །རྣམ་ཐར་ཕ་མཐའ་བྲལ་བའི་རྒྱ་མཚོའི་འཇིངས། །༡༤བདག་གི་བློ་གྲོས་རི་བོང་རྐྱལ་གྱིས་ནི། །བརྒལ་བར་བརྩམས་འདི་བཞད་གད་གནས་གྱུར་ཀྱང་། །དད་དང་ལྷག་པའི་བསམ་པས་བགྱིས་པ་ལ། །ནོངས་པ་ཆུང་སྙམ་སྤྱི་བརྟོལ་བསྐྱེད་དེ་བྱས། །༡༥ འོན་ཀྱང་བསྟན་བཅོས་རྩོམ་པའི་ཡོན་ཏན་ནི། །མཆོག་འབྲིང་དམན་ལས་སྣེ་གཅིག་མ་ཚང་སྐྱོན། །བདག་ལ་ཆགས་པ་འདི་ཡིས་ཉེས་པའི་ཚོགས། །མཁས་རྣམས་འཕགས་པའི་སྤྱན་གྱིས་རྗེས་སྐྱོང་མཛོད། །༡༦ བྱིའུ་ནམ་མཁར་འཕུར་བ་ཡང་། །ནམ་མཁའི་ཕ་མཐའ་གཞལ་ཕྱིར་མིན། །རང་དོན་ཉི་ཚེའི་ཆེད་དེ་བཞིན། །བདག་གིས་འབད་འདིའང་དེ་རྗེས་འགྲོ། །
༡༧སྒོ་གསུམ་སྤྱོད་ལ་ཉེས་པའི་ཆ། །མཆིས་པ་བྱིས་པ་སྤྱི་ཡི་སྐྱོན། །བྱིས་ལས་བྱིས་པ་བདག་ཉིད་ལ། །ཉེས་གྱུར་གང་ལགས་མཁས་ལ་འཆག ། ༡༨ནད་པའི་ཟུག་རྔུ་ནད་ཀྱིས་བྱས། །བླུན་པོའི་རང་སྐྱོན་རྨོངས་ལས་བྱུང་། །དེས་ན་གཞན་གྱི་དབང་སོང་ལ། །དམ་པའི་ཐུགས་ཀྱིས་ཁྲེལ་འོས་མིན། །༡༩ བཀྲ་ཤིས་དུས་ཀུན་དགེ་བ་རྒྱལ་བསྟན་རིན་པོ་ཆེ། །གངས་རིའི་ཁྲོད་འདིར་ཐོག་མར་བྱོན་པ་སྔ་འགྱུར་ཐེག །དེ་ཡི་རིང་ལུགས་ཉམས་མེད་སྲིད་མཐར་དར་ཞིང་རྒྱས། །དེར་འཛིན་སྐྱེས་བུ་སྐུ་ཚེ་རབ་བརྟན་ཕྲིན་ལས་འཕེལ། །༢༠བཀྲ་ཤིས་བསྔགས་པ་དང་བཅས་མནྡ་ར་ཡི་ཆར། །རྔ་ཡབ་གླིང་ནས་པད་འབྱུང་མཁའ་འགྲོའི་ཚོགས་ཀྱིས་མཛད། །རྩོད་ལྡན་རྒུད་པའི་གདུང་བ་བཅིལ་དང་ལྷན་ཅིག་ཏུ། །
ཕན་བདེའི་དགེ་མཚན་ཅིར་ཡང་འཆར་བའི་རྫོགས་ལྡན་ཚེས། །༢༡བཀྲ་ཤིས་སྟོན་འཁོར་བཤད་སྒྲུབ་ཕྲིན་ལས་ཉི་ཟླའི་འགྲོས། །ཐུབ་བསྟན་གླིང་བཞི་གསལ་བའི་རྒྱན་དུ་རྟག་འཆར་བས། །མཁས་པའི་བྱ་བ་གསུམ་གྱི་པད་ཚལ་རྒྱས་པ་དང་། །ས་བཅུ་ལམ་ལྔའི་ཡོན་ཏན་ཀུནྡའི་ཚལ་རབ་རྒྱས། །ཀ་ལྱཱ་ཎ་སྱ་རུ་ཙི་བྷིཿསརྦ་དིཀྶཾ་མཱུཏྩ་ནཾ་བྷ་བནྟུ། ཞེས་སྔ་འགྱུར་བསྟན་པ་ཡོངས་རྫོགས་ཀྱི་གསལ་བྱེད་ཞེ་ཆེན་མ་ཧཱ་པཎྜི་ཏ་འགྱུར་མེད་མཐུ་སྟོབས་རྣམ་རྒྱལ་གྱི་རྣམ་པར་ཐར་པ་འདི་ནི། མགོན་པོ་གང་གི་སློབ་ཚོགས་རྒྱུ་སྐར་གྱི་ཕྲེང་བ་ལྟ་བུའི་དབུས་ན། མཚན་མོའི་མགོན་པོ་ལྟར་ཀུན་ནས་ལྷམ་མེར་གནས་པ། ཐར་རྩེ་ཞབས་དྲུང་འཇམ་དབྱངས་མཁྱེན་བརྩེའི་དབང་པོ་ཀུན་དགའ་བསྟན་པའི་རྒྱལ་མཚན་དཔལ་བཟང་པོ་ཞེས་ས་ངོར་ཚར་གསུམ་གྱི་བསྟན་པའི་རྒྱལ་མཚན་སྲིད་རྩེར་སྒྲེང་བར་མཛད་པ་དང་། ཁྱད་པར་དུ་རྒྱལ་དབང་པདྨ་ཀཱ་རའི་ལུང་གིས་པདྨ་འོད་གསལ་མདོ་སྔགས་གླིང་པའམ། རྡོ་རྗེ་གཟི་བརྗིད་རྩལ་ཞེས་རིན་ཆེན་གཏེར་འབྱིན་རྒྱ་མཚོའི་གཙུག་གི་ནོར་བུ་ལྟ་བུར་གྱུར་པ་གང་གིས། རང་ཅག་གི་བླ་མ་རྡོ་རྗེ་འཆང་ཆེན་པོ་བསྟན་པ་རྒྱ་མཚོའི་གསལ་བྱེད་དུ་གྱུར་པ་ལ་རྣམ་ཐར་ཞིག་སྔ་འགྱུར་བསྟན་པའི་རྒྱན་དུ་ཅི་ནས་སྤེལ་དགོས། དེ་ཡི་མཚན་དུ་སྐལ་བཟང་མགུལ་རྒྱན་ཞེས་པ་ཐོགས་གསུངས་པའི་བཀའ་ལུང་བདུད་རྩིའི་ཟིལ་མངར་དང་། བཀྲ་ཤིས་པའི་ལྷ་རྫས་རབ་དཀར་སྲིད་དུ་
རིང་བ་བཅས་སྤྱི་བོའི་རྒྱན་དུ་ཕེབས་པ་སྒོ་གསུམ་གུས་པས་དང་དུ་བླངས་ཏེ། འཇམ་མགོན་བླ་མ་ཡབ་སྲས་ཀྱི་བཀའ་དྲིན་ཁོ་ནས་འཚོ་བ། ཀོང་ཚེ་བླ་མ་རིམ་བྱོན་གྱི་དབོན་རྒྱུད་དུ་གཏོགས་པ། རྡོ་རྗེ་རབ་བརྟན་ནམ། རྒྱལ་བསྟན་རིན་པོ་ཆེའི་སྒོར་ཞུགས་པའི་བཏགས་མིང་དུ་བཤད་སྒྲུབ་ཉི་མ་དང་། བརྡ་སྤྲོད་ཀུན་བཤད་ཀྱི་མིང་དུ་བློ་གྲོས་བྱེ་བའི་གཏེར་མཛོད་འཇམ་དཔལ་དགའ་བ་མཚོ་བྱུང་མགྲིན་འཁྱུད་དུ་བོད་པ་བདག་གིས་བློ་གྲོས་ཀྱི་སྤོབས་པ་གང་ཡོད་ཀྱིས་རིང་དུ་འབད་དེ་སུག་བྲིས་སུ་སྤེལ་བ་འདིས་ཀྱང་། རྒྱལ་དབང་པདྨའི་རྒྱལ་བསྟན་ཉི་ཟླ་ལྟར་གསལ་བའི་རྒྱུར་གྱུར་ཅིག །བི་ཛ་ཡནྟུ།། །།
པར་བྱང་སྨོན་ཚིག འདི་ལྟར་བགྱིས་པའི་བསོད་ནམས་དགེ་ཚོགས་ཀྱིས། །སངས་རྒྱས་བསྟན་པ་དར་ཞིང་རྒྱས་པ་དང་། །དེ་འཛིན་བྱེད་པའི་སྐྱེས་བུ་དམ་པ་རྣམས། །སྐུ་ཚེ་བརྟན་ཅིང་མཛད་འཕྲིན་རྒྱས་པར་ཤོག ། འཇིག་རྟེན་བདེ་ཞིང་ནད་མུག་འཁྲུགས་རྩོད་ཞི། །འབྲེལ་ཐོགས་གཙོར་བྱས་མ་གྱུར་འགྲོ་བ་ཀུན། །ཚོགས་གཉིས་རྫོགས་ཏེ་སྒྲིབ་གཉིས་བྱང་ནས་སུ།། མྱུར་དུ་རྫོགས་པའི་སངས་རྒྱས་ཐོབ་པར་ཤོག ། ཅེས་པ་འདི་ནི་ཞེ་ཆེན་དབོན་སྤྲུལ་ལྔ་པའི་མཚན་འཛིན་འགྱུར་མེད་གཞན་ཕན་འོད་ཟེར་ནས་སྨོན་པའོ།། །།