བསམ་གཏན་ཡེ་ཤེས་གླིང་པའི་གཏེར་ཆོས་ཡིད་བཞིན་གན་མཛོད་ཀྱི་དཀར་ཆག་ནོར་བུའི་ཕྲེང་བ།
སྤྲུལ་པའི་གཏེར་སྟོན་ཆེན་པོ་གང་གི་མཛད་རྣམ་རགས་བསྡུས་སུ་བཀོད་པ།
༄༅། དྷྱཱནཛྙཱནདྭཱིཔསྱནིདྷིདྷརྨཙིནྟཱཤེབདྷིགྷརཾསྱཐུབཉྫནརཏྣམཱལྱབིཧརཏིསྨ། །
༄༅། དྷྱཱནཛྙཱནདྭཱིཔསྱནིདྷིདྷརྨཙིནྟཱཤེབདྷིགྷརཾསྱཐུབཉྫནརཏྣམཱལྱབིཧརཏིསྨ། །
༄༅། དྷྱཱ ན ཛྙཱ ན དྭཱི པ སྱ ནི དྷི དྷ རྨ ཙི ནྟཱ ཤེ བ དྷི གྷ རཾ སྱ ཐུ བ ཉྫ ན ར ཏྣ མཱ ལྱ བི ཧ ར ཏི སྨ། །
༄༅། བསམ་གཏན་ཡེ་ཤེས་གླིང་པའི་གཏེར་ཆོས་ཡིད་བཞིན་གན་མཛོད་ཀྱི་དཀར་ཆག་ནོར་བུའི་ཕྲེང་བ་ཞེས་བྱ་བ་བཞུགས་སོ།།
༄༅། འོད་མཚན་སྟོང་འབར་ཐུགས་ཀའི་དབང་མདོག་ཧྲཱིཿ སིནྡྷུའི་དྭངས་མཚོར་མཚན་དཔེའི་སྐུར་སྨིན་པ། །རྒྱལ་ཀུན་གསང་གསུམ་གཅིག་བསྡུས་འགྲོ་བའི་མགོན། །མཚོ་འཁྲུངས་པདྨ་ཀཱ་ར་སྤྱི་བོས་མཆོད། །གདོད་ནས་མ་སྐྱེས་སྟོང་ཆེན་ནམ་མཁའི་དབྱིངས། །བདེ་ཆེན་ཐིག་ལེར་འཁྱིལ་བའི་ཆོ་འཕྲུལ་ལས། །མི་མོའི་སྐུར་བཞེངས་སངས་རྒྱས་པདྨའི་ལྕམ། །མཚོ་རྒྱལ་ཌཱཀྐིའི་རྗེ་མོར་གུས་པས་འདུད། །རྒྱལ་དབང་པདྨས་རྗེས་བཟུང་གདམས་པ་ཐོབ། །ངེས་གསང་སྙིང་པོའི་དོན་གཟིགས་གྲུབ་པ་བརྙེས། །མཁའ་སྤྱོད་གནས་སུ་ཐོགས་མེད་བྱ་ལྟར་འཕུར། །ཨ་ཙར་ཡེ་ཤེས་དབྱངས་ལ་གཅིག་ཏུ་གུས། །མཚོ་རྒྱལ་སྟངས་དཔྱལ་ཟུང་དུ་འཇུག་པའི་གར། །ཉེ་བརྒྱུད་དག་སྣང་ཟུང་ལ་དབང་བའི་རྗེ། །མདོ་སྔགས་བསྟན་པ་ཟུང་འབྲེལ་སྤེལ་བའི་མགོན། །བསམ་གཏན་ཡེ་ཤེས་གླིང་པར་སྙིང་ནས་དད། །ངོ་བོ་ཀ་དག་འཕོ་མེད་ཆོས་ཀྱི་སྐུ། །རང་བཞིན་ལྷུན་གྲུབ་མཚན་དཔེ་ལོངས་སྤྱོད་རྫོགས། །ཐུགས་རྗེ་ཀུན་ཁྱབ་འགྲོ་འདུལ་སྤྲུལ་པའི་སྐུ། །དཔལ་ལྡན་བླ་མས་ཚེ་རབས་ཕྲེང་བར་སྐྱོངས། །ཟབ་དང་རྒྱ་ཆེའི་ཆོས་ཚུལ་རྒྱལ་བའི་བཀའི། །ཡང་བཅུད་གཅིག་དྲིལ་ཉེ་བརྒྱུད་གཏེར་གྱི་ཆོས། །ཛྙཱ་ན་དྭཱི་པའི་གསུང་གསང་རིན་ཆེན་མཛོད། །མི་ནུབ་དཀར་ཆག་ནོར་བུའི་ཕྲེང་བར་སྤེལ། །དེ་ལ་འདིར་དུས་གསུམ་གྱི་རྒྱལ་བ་ཀུན་གྱི་ཕྲིན་ལས་ཀྱི་རང་གཟུགས་ཐུགས་བསྐྱེད་དང་མཛད་པ་རྨད་དུ་བྱུང་བའི་བདག་ཉིད་རྒྱལ་དབང་ཨོ་རྒྱན་ཆེན་པོའི་བཀའ་དྲིན་དང་བདག་རྐྱེན་ལ་བརྟེན་ནས་སྙིགས་མའི་དུས་འདིར་བསྟན་དང་འགྲོ་བའི་དོན་དུ་བསམ་བཞིན་སྲིད་པ་བཟུང་བ། ཧོར་བླ་གཞན་ཕན་བཟང་པོའམ་སྤྲུལ་པའི་གཏེར་སྟོན་ཆེན་པོ་བསམ་གཏན་ཡེ་ཤེས་གླིང་པའི་དགོངས་གཏེར་དང་། ས་གཏེར། དག་སྣང་མ་གསུམ་ལས་བརྩམས་པའི་བཀའ་འབུམ་རིན་པོ་པར་དུ་བསྐྲུན་པའི་སྐབས་འདིར་དཔེ་རྒྱུན་མི་ཉམས་ཤིང་ཆོས་ཚན་འཚོལ་སླ་བ་སོགས་ཀྱི་ཆེད་དུ་དཀར་ཆག་བཞུགས་བྱང་འགོད་པ་ལ་བཞི། སྤྲུལ་པའི་གཏེར་སྟོན་ཆེན་པོ་གང་གི་མཛད་རྣམ་རགས་བསྡུས་སུ་བཀོད་པ། གཏེར་ཆོས་གླེགས་བམ་རྣམས་ཀྱི་བཞུགས་བྱང་དཀར་ཆག་དངོས་འགོད་པ། སྨིན་གྲོལ་མན་ངག་གི་བླ་མ་བརྒྱུད་པའི་རིམ་པ་བསྟན་པ། པར་དུ་བསྐྲུན་པའི་ཕན་ཡོན་བརྗོད་པས་མཇུག་བསྡུ་བའོ། །དང་པོ་ནི། རིག་འཛིན་གསང་སྔགས་གླིང་པའི་གཏེར་ལུང་ལས། དེ་ལ་སྐལ་ལྡན་གཉིས་པ་གཡུ་ཁྲོམ་ཡུལ༔ ལྕམ་སྤྲུལ་ཞེས་བྱ་ལྕགས་ཁམས་སྤྲེའུའི་ལོ༔ གཞན་ཕན་མིང་ཅན་རྫོགས་ཆེན་རྣལ་འབྱོར་པ༔ མ་ངེས་སྤྱོད་པས་འགྲོ་དོན་མཐའ་རུ་འཁྱོལ༔ ཞེས་དང་། ཨོ་རྒྱན་མཁའ་སྤྱོད་གླིང་པའི་གཏེར་ལུང་ལས། ཤར་ཕྱོགས་རྡོ་རྗེ་གཡུ་ཁྲོམ་འགྱིང་ཁུག་ཏུ༔ མཁས་མཆོག་ཡེ་ཤེས་དབྱངས་ཀྱི་ཟློས་གར་བ༔ ཐུབ་པའི་མིང་ཅན་རྩལ་ལྡན་ཁྱུང་གཤོག་ཅན༔ མགྲིན་པར་སྨེ་བ་ཐིག་ལེ་ཡུངས་འབྲུ་ཙམ༔ མ་བསླབ་ཆོས་ཀྱི་རང་རྩལ་རྡོལ་བ་འབྱུང་༔ ཞེས་དང་། པདྨ་དྲག་རྩལ་གླིང་པའི་གཏེར་ལུང་ལས། གཡུ་ཡི་ཕྱོགས་སུ་ཨ་ཙར་ས་ལེའི་འཕྲུལ༔ ཕན་པའི་མིང་ཅན་བརླ་གཡས་སྨེ་བས་བརྒྱན༔ ཞེས་དང་། ཆོས་གླིང་གི་ཕྱག་རྡོར་དྲེགས་པ་ཀུན་འདུལ་གྱི་མ་འོངས་ལུང་བསྟན་ལས། མཚོ་རྒྱལ་ཨ་ཙར་ཡེ་ཤེས་འཕྲུལ༔ གཡུ་ཡི་ཕྱོགས་སུ་སྐུ་བལྟམས་པ༔ ངེས་མེད་འགྲོ་བ་གཞན་ལ་ཕན༔ འབྲེལ་ཚད་དོན་ལྡན་འགྲོ་བ་འདུལ༔ ཞེས་དང་། རྡོ་རྗེ་བདེ་ཆེན་གླིང་པའི་གཏེར་ལུང་ལས། མདོ་ཁམས་ཤར་ཕྱོགས་ཨ་ཙར་ས་ལེའི་འཕྲུལ༔ བསམ་གཏན་མིང་ཅན་པདྨའི་བརྒྱུད་འཛིན་པ༔ ཞེས་སོགས་འཁྲུལ་མེད་རྡོ་རྗེའི་ལུང་བྱང་དུ་མ་ནས་ལུང་གིས་གསལ་བར་བསྔགས་པ་ལྟར། ཡབ་རྒུ་པེས་ཚེ་རིང་ནོར་བུ་དང་། ཡུམ་ཧོར་བཟའ་མདོ་སྐྱིད་གཉིས་ཀྱི་སྲས་སུ་རབ་བྱུང་བཅུ་བཞི་པའི་ལྕགས་སྤྲེལ་༼༡༨༦༠ ༡༩༠༣༽ཧོར་ཟླ་དང་པོའི་གནམ་སྟོང་ཉིན་ངོ་མཚར་བའི་ལྟས་དུ་མ་དང་བཅས་ཏེ་རྒྱལ་རོང་དགེ་བཤེས་ཙ་རྒྱལ་པོའི་མངའ་ཁོངས། དེམ་པའི་རྒུ་པེས་ཞེས་པར་སྐུ་བལྟམས། དེ་ཡང་ཁྱིམ་དེར་དམ་པའི་སྐྱེས་བུ་སྐུ་མཆེད་གསུམ་འཁྲུངས་པ་ནི་རྗེ་འདི་དང་། རྒྱལ་རོང་བསྟན་འཛིན་གྲགས་པ། སྐུ་ཞོག་ཨ་བུ་ཚང་དང་གསུམ་ཡིན། རྗེ་འདི་ཉིད་སྐུ་ན་ཆུང་དུས་ཀྱི་ནུབ་གཅིག་རྨི་ལམ་དུ་མཁའ་འགྲོ་ཡེ་ཤེས་མཚོ་རྒྱལ་གྱིས་དར་ལྗང་གུའི་བསྲུང་མདུད་དང་། རྟེན་འདུས་རིལ་བུ་བདུན་གནང་བ་ཕྱི་ཉིན་སྔས་ཐོག་ཏུ་ཡོད་པ་དང་། དགུང་གྲངས་བཅུ་གསུམ་སྐབས་གནམ་མཚོ་སྤྲུལ་སྐུ་འགྱུར་མེད་བྱང་ཆུབ་རྡོ་རྗེས་སྤྲུལ་པའི་སྐུ་ཉིད་དུ་ལུང་བསྟན་ཅིང་། ཡི་གེ་འབྲི་ཀློག་སོགས་ཀྱི་སློབ་དཔོན་མཛད། དགུང་གྲངས་བཅུ་དགུའི་དུས་གཡུ་ཁོག་རྒྱ་སྤྲུལ་རིག་འཛིན་ལུང་རིག་གླིང་པས་ཆོས་ཀྱི་བདག་པོའི་མཚན་གསོལ་ཏེ་རྒྱལ་ཚབ་ཏུ་དབང་བསྐུར་བ་དང་། ཀྱཻ་ཧོ་སྐལ་ལྡན་ཆོས་ཀྱི་བདག་པོ་གསོན༔ ཁྱོད་སྔོན་ཚོགས་གཉིས་བསགས་འབྲས་དུས་སྨིན་པས༔ ཐུབ་དབང་སྟོན་པ་མྱ་ངན་འདའ་བཞེད་ཚེ༔ བཞུགས་པར་གསོལ་འདེབས་དགེ་བསྙེན་ཙུནྡའི་མཚན༔ དེ་འོག་པདྨ་རྒྱལ་པོའི་གཟུངས་མ་མཆོག༔ མཚོ་རྒྱལ་ཐུགས་ཟིན་ཨ་ཙར་དཔལ་དབྱངས་གྲགས༔ དེ་འོག་ལྷོ་བྲག་གཏམ་ཤུལ་ཞེས་བྱ་བར༔ མངའ་བདག་ཐུགས་སྲས་ནམ་མཁའ་དཔལ་དེ་ཡི༔ ཞབས་འབྲིང་སྔགས་ཀྱི་རྣལ་འབྱོར་བསྟན་འཛིན་མིང་༔ དེ་འཕྲོས་ལྷོ་ནུབ་ལ་ཡག་ཞེས་པའི་སར༔ ཆོས་དབང་དང་འབྲེལ་ན་རཱི་ཛྙཱ་ན་ཞེས༔ དེ་འོག་སྐྱེ་མང་བརྒྱུད་མཐར་འཇའ་ཚོན་པའི༔ ཞབས་ཏོག་ཕུལ་ཕྱིན་པདྨ་བསྟན་འཛིན་མཚན༔ དེ་འོག་སྤྲུལ་སྐུ་ངེས་དོན་བསྟན་འཛིན་པའི༔ དངོས་སློབ་གྲུབ་དབང་ལྕམ་བླ་དཀོན་མཆོག་ཞེས༔ དེ་ཡི་འོག་ཏུ་ལྕམ་བླ་ཀློང་ཡངས་པ༔ དོན་དུ་གྲུབ་དབང་དཀོན་མཆོག་ཆོ་འབྲང་གཅིག༔ ད་ལྟ་ཁོ་བོའི་མཚོ་རྒྱལ་གསང་མཛོད་ཀྱི༔ ཟབ་ཆོས་ལུང་ཟིན་དཔལ་ལམ་ཕན་པའི་མིང༔ ཞེས་སྐྱེ་ཕྲེང་སོགས་ལུང་བསྟན་སྣ་ཚོགས་གནང་། དེ་ནས་བཟུང་རྒྱ་སྤྲུལ་གཏེར་གསར་ཁོ་ན་ཉམས་སུ་བླངས་པས་དུད་སོལ་མས་ཞལ་གཟིགས་ཤིང་འབྱུང་འགྱུར་ལུང་བསྟན་པ་སོགས་བྱུང་། ཡོངས་འཛིན་དཀོན་མཆོག་ཚུལ་ཁྲིམས་ཀྱིས་སྒྲ་སྐྱོར་སྦྱང་བྱེད་དུ་བཅུག་སྐབས་ཉིན་རེར་སྒྲའི་སྐོར་ལྡེབ་བརྒྱད་རེ་མ་བསླབ་ཀྱང་ཐུགས་སུ་ཆུད་པ་བྱུང་། གཏེར་ཆེན་བདུད་འཇོམས་གླིང་པས་ཆོས་བདག་ཏུ་ལུང་བསྟན། འོད་གསལ་རྫོགས་ཆེན་གྱི་ལྟ་བ་ངོ་སྤྲད། ཟླ་བ་བརྒྱད་དུ་བསྒོམ་པས་ཉམས་གོང་འཕེལ་སླེབ་པར་གསུངས། གོང་གསལ་གཏེར་སྟོན་གླིང་པ་གཉིས་དང་། རྒྱལ་རོང་གཏེར་རྒོད་གསང་སྔགས་གླིང་པ་དང་། དབང་ཆེན་སྔགས་བདག་གླིང་པ། ཨ་སིག་གཏེར་སྟོན་པདྨ་དྲག་རྩལ་གླིང་པ། གྲྭ་མདའ་གཏེར་སྟོན་ཨོ་རྒྱན་མཁའ་སྤྱོད་གླིང་པ། རྒྱ་ལྷ་མོ་ཚེ་རིང་ངམ་རིག་འཛིན་ལྷུན་གྲུབ་གླིང་པ་བཅས་གཏེར་སྟོན་གླིང་པ་བདུན་གྱིས་ཆོས་བདག་ཏུ་མངའ་གསོལ། རིག་འཛིན་གསང་སྔགས་གླིང་པས་ཡེ་ཤེས་སྒྱུ་མའི་སྐུས་རྗེས་སུ་བཟུང་། དགུང་གྲངས་ཉེར་ལྔའི་དུས་ཏཱ་རེའི་ཞོལ་དུ་སྐུ་མཚམས་ལ་བཞུགས། དགུང་གྲངས་ཉེར་བདུན་བཞེས་སྐབས་ལི་རྩང་ཕྱོགས་ཀྱི་ཡུལ་ལྷ་འགས་མཚམས་ཞུ་དང་ཞབས་ཏོག་འབུལ་བའི་ཉམས་སྣང་ཤར་བ་ལྟར། དེ་ཕྱོགས་སུ་ཕེབས་ཏེ་གཙང་སྨད་སེང་གེ་དགོན་དུ་སྙིང་ཐིག་བསྟན་པའི་སྲོལ་བཏོད་པ་སོགས་མཛད། གཙང་རོང་གི་རྫ་རི་སྟག་བཀྲ་ལ་བྱོན་ནས་གྲྭ་མདའ་གཏེར་སྟོན་ཀརྨ་སོགས་ལ་རྒྱ་སྤྲུལ་ཕུར་བ་དང་། ནོར་རྒྱུན་མ་སོགས་གཏེར་གསར་འགའི་དབང་ལུང་བསྩལ། གཏེར་སྟོན་དེས་ཀྱང་ཁོང་གི་གཏེར་ཆོས་རྣམས་ཕུལ་ནས་ཆོས་བདག་ཏུ་མངའ་གསོལ། དགུང་གྲངས་ཉེར་བརྒྱད་དུས་གཡུ་མཁར་དགོན་དུ་རིག་བྱེད་མས་ཞལ་གཟིགས་ཏེ་ངའི་རྣ་ཆ་འདི་ཁྱོད་ལ་གཏད། གཡུའི་ཆོས་ཁྲི་ལ་མངའ་གསོལ་བ་ཡིན་གསུངས། ཕྱི་ཉིན་མཆོག་སྤྲུལ་པདྨའི་མཚན་ཅན་གྱིས་ཁོང་དབུས་ལ་བྱོན་རན་པས། དབྱར་གནས་མཁན་པོ་ཁྱེད་ཀྱིས་མཛད་དགོས་གསུངས། དེ་ལུགས་རྒྱ་སྤྲུལ་རིན་པོ་ཆེར་ཞུས་པས། རིག་བྱེད་མའི་དངོས་གྲུབ་རེད། མོས་པ་རྣམ་བཞིའི་གཅིག་རེད་དེ་ལྟར་མཛོད་གསུངས་ནས། མཁན་ཞྭ་སྡེ་སྣོད་གསུམ་པ་ཞིག་གནང་ནས་ཕྱག་གཉིས་མགོ་ལ་བཞག་ནས་བསམ་པ་མྱུར་འགྲུབ་མ་ཚར་གསུམ་གསུངས་པས་གཞུང་ལུགས་རབ་འབྱམས་ལ་ཆགས་ཐོགས་མེད་པའི་ཤེས་རབ་བརྙེས། དགུང་གྲངས་སོ་གཅིག་སྐབས་ལྷ་སྒང་ཕྱོགས་སུ་ཕེབས། ལྕམ་པ་མྱུ་གུ་དགོན་དུ་བསྟན་པའི་བདག་པོར་མངའ་གསོལ་ཞིང་ཀུན་གྱིས་བླ་མར་བཀུར། པདྨ་དྲག་རྩལ་གླིང་པའི་སྐུའི་ཞབས་བརྟེན་དུ་ཐང་རྒྱལ་གྱི་ཚེ་དབང་ཞིག་ཕུལ་བའི་བྱིན་འབེབས་དུས་གྲུབ་ཆེན་དངོས་བར་སྣང་འཇའ་གུར་དུ་བཞུགས་པ་དབང་ཞུ་བ་ཀུན་གྱིས་མཇལ། དགུང་གྲངས་སོ་གསུམ་བཞེས་སྐབས་གཡུའི་ཆོས་གྲྭ་རུ་རྒྱ་སྤྲུལ་གཏེར་ཆོས་ཀྱི་དབང་ལུང་གསུང་བའི་ནུབ་གཅིག་ཟངས་མདོག་དཔལ་གྱི་རི་བོ་རྟེན་བརྟེན་པ་དང་བཅས་པ་མཇལ་ཞིང་། དེར་རིག་འཛིན་ལུང་རིག་གླིང་པས་ཡེ་ཤེས་སྒྱུ་མའི་སྐུས་རྗེས་སུ་བཟུང་ཞིང་། ཁོང་གི་གཏེར་ཆོས་ཐམས་ཅད་སྒྲོམ་བུ་དང་ཤོག་སེར་གྱི་ཚུལ་དུ་གནང་ནས་གཏད་རྒྱ་མཛད། མཁའ་འགྲོ་ཡེ་ཤེས་མཚོ་རྒྱལ་གྱིས་བྱིན་གྱིས་བརླབས། རིག་འཛིན་ལུང་རིག་གླིང་པས། རིགས་བདག་ཨོ་རྒྱན་ཆེན་པོ་ལགས། ངའི་ཕྲིན་ལས་ཀྱི་སྤྲུལ་པ་འདི་ལ་ཁྱེད་ཀྱིས་བསྩལ་བའི་མིང་ཞིག་ཞུ་བྱས་པས། བསམ་གཏན་ཡེ་ཤེས་གླིང་པ་ཞེས་མཚན་གསོལ། དེ་ནས་བཟུང་གཏེར་ཆོས་སྣ་ཚོགས་ཕབ་པའི་མགོ་བཙུགས། དགུང་གྲངས་སོ་བཞི་བཞེས་པ་ཆུ་སྦྲུལ་ལོར། ཏཱ་རེའི་གནས་སུ་ཚིག་བདུན་གསོལ་འདེབས་འབུམ་བསགས་པའི་ས་ཟླའི་ཡར་ཚེས་བཅུའི་ཉིན། རིག་འཛིན་ལུང་རིག་གླིང་པས་ཞལ་གཟིགས་ལུང་བསྟན་པ་ལྟར་ལྷ་དང་བླ་མ་ལ་གསོལ་བ་བཏབ་ནས་ཆུ་དབར་ཏཱ་རེའི་གནས་སྒོ་ཕྱེས། དགུང་གྲངས་སོ་དྲུག་པར་གནས་ལུང་དཔལ་གྱི་རི་བོ་ནས་ཕྱག་ན་རྡོ་རྗེས་ཞལ་གཟིགས་ཤིང་། ཕྱག་རྡོར་ཧཱུྃ་སྒྲུབ་ལུས་དཀྱིལ་གནང་། སྟོན་ཟླ་ར་བའི་ཚེས་བཅུའི་དུས་རྩང་གི་ཐང་འབེ་གནས་སུ་ཕེབས་པས། ཀླུ་སོག་མ་མེ་ལེན་དང་། རྡོ་རིང་དམར་པོའི་གྲི་བཙན་གཉིས་ཀྱིས་རང་གཟུགས་བསྟན་ནས་སྨན་སྒྲུབ་ཀྱི་ཆར་ཕབ། སྐུ་རྟེན་དང་། གཡུའི་མེ་ལོང་། ཤོག་དྲིལ་མཐིང་ག་ཞིག་བཅས་ཕུལ། སྨིན་དྲུག་ཟླ་བའི་ཚེས་ཉེར་ལྔ་ལ་ཏཱ་རེའི་གནས་ཀྱི་གུ་རུའི་བཞུགས་ཁྲིའི་དྲུང་ནས་དྲང་སྲོང་སྨུག་ནག་འོད་འཕྲོའི་སྒྲུབ་ཐབས་དང་། གཏེར་སྒྲོམ། དམ་རྫས་སོགས་ཁྲོམ་གཏེར་དུ་བཞེས་ནས་མདོ་མང་གཏེར་ཆེན་རྡོ་རྗེ་བདེ་ཆེན་གླིང་པ་དང་། སློབ་བུ་རིག་གྲོལ་སོགས་ལ་གཏད། དེ་ནས་དབྱར་མཇུག་གི་དུས་གཡུ་སྨད་ཀྱི་གཞི་བདག་སྐུ་བླ་ར་ཁང་སོགས་སྡེ་བརྒྱད་འགའ་གདན་འདྲེན་དུ་བྱུང་བ་ལྟར། རྒྱལ་རོང་འོ་བཟི་ཕྱོགས་སུ་ཕེབས་ནས་མི་དང་མི་མིན་དུ་མ་ཆོས་ཀྱི་གདམས་པས་འཕྲལ་ཕུག་གི་བདེ་བ་ལ་བཀོད། དགུང་གྲངས་སོ་བདུན་པར་གནས་ལུང་གཞི་བདག་གིས་ཞལ་གཟིགས་ནས་གནས་ལུང་གི་གནས་ཡིག་དང་ལུང་བསྟན་ཤོག་དྲིལ་གཏད། གར་མཁན་ཟླ་བའི་ནང་སྤྱན་རས་གཟིགས་དམར་པོས་ཞལ་གཟིགས། གཡུ་དགོན་དུ་ཟབ་ཆོས་དུ་མ་དང་། ཁྱད་པར་རིག་འཛིན་འཇའ་ཚོན་པའི་གཏེར་ཆོས་ཀྱི་དབང་ལུང་འབུལ་སྐབས་འཇའ་ཚོན་སྙིང་པོས་ཞལ་གཟིགས་པ་དང་། སྔོན་འཇའ་ཚོན་པའི་སློབ་བུ་པདྨ་བསྟན་འཛིན་ཡིན་དུས་ཀྱི་སྔོན་གནས་རྗེས་དྲན་དུ་མ་བྱུང་། དགུང་གྲངས་སོ་བརྒྱད་ཀྱི་དུས་བཞག་བྲ་ལྷ་རྩེས་རང་གཟུགས་བསྟན་ནས་ལུང་བསྟན་པ་ལྟར་མི་ཉག་ཕྱོགས་སུ་ཕེབས་ནས་ཡུལ་གྲུ་འགར་ཆོས་སྦྱིན་དང་། ལྷ་སྒང་གི་གནས་ཡིག་ཕབ། གྲུབ་ཆེན་དགོན་དུ་རྡོ་གྲུབ་འཇིགས་མེད་བསྟན་པའི་ཉི་མ་ལས་དམ་ཆོས་བདེ་ཆེན་ལམ་མཆོག་གི་དབང་ལུང་གསན། དགུང་གྲངས་བཞི་བཅུ་པར་ཁྲོ་སྐྱབས་གཟིག་རི་དགོན་དང་། ཕུ་དུམ་དགོན། རྒྱལ་མོ་དམུ་རྡོ། རྡོ་ཁོག སྨུག་རོང་སོགས་སུ་ཕེབས་ནས་འདུས་པའི་སྡེ་ཆེན་པོར་དམ་ཆོས་བདེ་ཆེན་ལམ་མཆོག གཏེར་གསར་གྱི་དབང་ལུང་སོགས་གསུངས་ཏེ་གདུལ་བྱ་མང་པོ་སྨིན་གྲོལ་ལ་བཀོད། ཝ་ཀོ་སིདྡྷི་དགོན་དང་། རོང་མེས་འབྲུ་སྨིན་དགོན། ཆུ་དབར་ཏཱ་རེ་མདོ་སྔགས་བཤད་སྒྲུབ་གླིང་བཅས་རྟེན་བརྟེན་པར་བཅས་པ་གསར་བཞེངས་མཛད། ཕུ་དུམ་དགོན་སོགས་ཀྱི་བསྟན་པའི་བདག་པོར་གྱུར། རི་བྲོ་སྤོས་གྱི་གླང་པོའི་རི་ཁྲོད་གསར་དུ་བཏབ་ནས་དོན་གཉེར་ཅན་དུ་མར་གཏེར་གསར་ཡོངས་རྫོགས་ཀྱི་དབང་ལུང་གིས་མཚོན་ཟབ་རྒྱས་ཆོས་ཀྱི་འཁོར་ལོ་བསྐོར། སྐབས་དེ་དག་ཏུ་གཞི་བདག་དུ་མས་བསུ་མ་བྱས་པ། སྒྲུབ་གནས་དུ་མར་སྒྲུབ་པ་ཉམས་བཞེས་མཛད་པ། ལྷ་དང་བླ་མའི་ཞལ་མཇལ་བ་དང་། གཏེར་སྣ་ཚོགས་བཞེས་པ། ལུང་བསྟན་སྣ་ཚོགས་བྱུང་བ། རྫུ་འཕྲུལ་ཡ་མ་ཟུང་བསྟན་པ་སོགས་ནི་བགྲང་གིས་མི་ལང་། སྔ་ཕྱིར་གདུང་སྲས་གསུམ་བྱོན་པ་ནི་སྲས་ཆེ་བ་གྲུབ་བརྙེས་དམ་པ་ཧོར་ཨོ་རྒྱན་དང་། འབྲིང་བ་འཁོར་གདོང་གཏེར་ཆེན་གྱི་ཡང་སྲིད་གཡུ་སྤྲུལ་སྐལ་ལྡན་གླིང་པ། ཆུང་བ་མཁར་བ་ཡེ་ཤེས་རྡོ་རྗེའི་ཡང་སྲིད་འཁོར་གདོང་པདྨ་བཛྲ་དང་གསུམ་ཡིན། དགུང་གྲངས་ཞེ་གཉིས་སྐབས་ཀ་ཀོང་དུ་ཕེབས་ནས་རྡོ་རྗེ་ཕུར་པའི་ཚོགས་འཁོར་བསྐོར་སྐབས། བཀའ་ཐང་དང་། ཟབ་གཏེར་གྱི་ཤོག་དྲིལ་བརྒྱད། ཡིད་བཞིན་ནོར་བུ་སྦྲུལ་གྱི་སྒོ་ང་ཙམ་དང་། སྒྲོམ་བུ་སྨུག་པོ། སྨན་སྒྲུབ་སོགས་ཁྲོམ་གཏེར་དུ་བཞེས། སྤ་གྱོའི་མཚོ་ནང་དུ་གུ་རུ་ཡབ་ཡུམ་གྱི་ཞབས་རྗེས་ཡོད་པ་ཀུན་ལ་མཇལ་ཁ་བསྟན། སོ་མང་དུ་གཡུ་ཁོག་རྒྱ་སྤྲུལ་པའི་ཡང་སྲིད་ལུང་རྟོགས་བསྟན་པའི་དབང་ཕྱུག་གམ་ཡོངས་གྲགས་ཝ་གོ་རྒྱ་སྤྲུལ་དུ་འབོད་པ་སྐུ་འཁྲུངས་བ་ཝ་གོ་དགོན་དུ་གདན་དྲངས། ངོས་འཛིན་ཁྲི་སྟོན་མཛད། དགུང་གྲངས་ཞེ་བཞི་བཞེས་སྐབས་སྐུ་བསྙུན་ཚུལ་བསྟན། དུད་སོལ་མའི་བརྡ་ལུང་ལྟར་སྒོ་ཆ་རི་ཁྲོད་ལ་ཕེབས་ཏེ་འཁོར་གདོང་བླ་མ་མགོན་དབང་དང་། གཡུ་སྲས་ནམ་མཁའ་དཔལ་ཆེན། སློབ་བུ་རིག་གྲོལ་སོགས་ལ་ལུགས་གཉིས་ཀྱི་བསླབ་བྱ་མང་དུ་གསུངས། སྨིན་དྲུག་ཟླ་བའི་ཚེས་བདུན་གྱི་དགུང་མོ་བླ་མ་མགོན་དབང་ལ་གསང་བའི་ཞལ་ཆེམས་བཞག་སྟེ་འཕོ་བ་གསུང་དུ་བཅུག ཚེས་བརྒྱད་ཀྱི་སྐྱ་རེངས་དང་པོ་ཤར་བ་ན་སྐུ་དྲང་སྲོང་ཙོག་པུའི་བཞུགས་སྟངས་བྱས་ཏེ་དགོངས་པ་དབྱིངས་སུ་བསྡུས། དེ་ཚེ་མཁའ་ལ་འཇའ་འོད་འཁྲིགས་ཤིང་། སྒྲ་ཆེན་པོ་འུར་བ་སོགས་རྒྱུད་ལས་གསུངས་པའི་རྟགས་རྣམས་བྱུང་བ་དང་། ཞག་གསུམ་སོང་སྐབས་གདུང་ཁྲུ་གང་ཙམ་མཁའ་ལ་འཕགས་ནས་གདུང་ཞབས་ཀྱི་འབོལ་སྟན་ལ་རེག་མེད་པ་སོགས་ངོ་མཚར་བའི་ལྟས་མང་དུ་བྱུང་། སྐུ་གདུང་ཞུགས་ལ་ཕུལ་ཚེ་དུད་པ་དཀར་པོ་དུང་དང་བུམ་པ་སོགས་ཀྱི་དབྱིབས་ལྟ་བུ་ཤར་ཕྱོགས་སུ་དལ་བར་འགྲོ་བ་དང་རྗེས་སུ་འབྲེལ་བར་མེ་ལྕེ་ཁ་ཏོག་ལྔ་ལྡན་འཇའ་ཚོན་ལྟ་བུ་དམ་དུམ་དུ་འཕྲོས་པ་དང་། དབྱིངས་ཀྱི་ཡུམ་ཆེན་ལྔ་མིའི་སྣང་ངོར་བྱ་རྒོད་ཐང་དཀར་ལྔའི་གཟུགས་སུ་བསྒྱུར་ནས་ལྡིང་སྐོར་བྱས་པ་སོགས་རྨད་དུ་བྱུང་བའི་རྟགས་མཚན་མང་དུ་བྱུང་། དེ་ནས་བུ་སློབ་རྣམས་ཀྱིས་དགོངས་རྫོགས་རྒྱ་ཆེན་བགྱིས་ཤིང་། ཞལ་ཆེམས་ལྟར་ཆུ་བོ་མྱོང་གྲོལ་དང་། ཀླུ་རྣམས་ལ་ཕན་གདག་པའི་ཕྱིར་སྐུ་གདུང་སཙྪ་རྣམས་ཤེལ་ཆུའི་ཀླུང་དུ་གཤེགས་གསོལ་བྱེད་པའི་ཚེ། ཆུ་བོའི་དབུས་སུ་འཇའ་གུར་གྱི་ཀློང་དུ་སཙྪ་རྣམས་མགོ་མཇུག་མ་ལོག་པར་ཀླུ་ཡུལ་དུ་གདན་དྲངས་པ་མི་ཀུན་གྱིས་མཐོང་བ་སོགས་ངོ་མཚར་བའི་རྟགས་མཚན་དུ་མ་ཀུན་གྱི་མཐོང་ཆོས་སུ་གྱུར་ཏོ། །ཁོང་གི་ཞལ་སློབ་ནི་གཡུ་ཁོག་བྱ་བྲལ་ཆོས་དབྱིངས་རང་གྲོལ། སྒོ་སྤེས་མཚོ་རྒྱལ། འཇིགས་མེད་ཚུལ་ཁྲིམས། ལུང་རྟོགས་བསྟན་འཛིན། མདོ་མང་གཏེར་ཆེན་གར་གྱི་དབང་ཕྱུག ཀློང་ཆེན་འོད་གསལ་རྡོ་རྗེ། དབོན་པོ་ཡེ་ཤེས་འོད་ཟེར། དབང་ཆེན་སྔགས་བདག་གླིང་པ། སྒོ་འཛི་བླ་མ་རིག་གྲོལ། གཡུ་ཁོག་རྒྱ་སྤྲུལ་གཉིས་པ་ལུང་རྟོགས་བསྟན་པའི་དབང་ཕྱུག ཕུ་དུམ་བླ་མ་དཀོན་མཆོག རས་པ་ཀླུ་སྐྱབས། གཡུ་དཔོན་ལྷ་སྲས་ནམ་མཁའ་དཔལ་ཆེན་སོགས་བྱོན། །གཏེར་ཆོས་ཀྱི་སྐོར་ལ་རྫོགས་ཆེན་མན་ངག་ཉི་མ་སྤྲིན་བྲལ། སྒྲུབ་ཐབས། ལུང་བསྟན། གནས་བསྟོད་སོགས་གཙོ་བོ་དགོངས་གཏེར་དང་། ས་གཏེར་གྱི་སྐོར་སོགས་གླེགས་བམ་དུ་མ་ཞིག་བཞུགས་པ་ལས། རས་པ་གསལ་སྟོབས་ཀྱི་གསན་ཡིག་ཏུ་འཁོད་པ་ལྟར་ན་དུས་འགྱུར་སྐབས་ཆོས་ཚན་སུམ་ཅུ་ལྷག་ཞིག་གཏོར་བརླག་ཐེབས་ནས་མི་མངོན་པའི་དབྱིངས་སུ་ཐིམ་སོང་འདུག དེང་སྐབས་མཇལ་དུ་ཡོད་པ་ནི་རྒྱལ་སྲིད་རིན་པོ་སྣ་བདུན་གྱི་གྲངས་ལྡན་གྱི་གླེགས་བམ་འདི་དག་གོ།།
གཏེར་ཆོས་གླེགས་བམ་རྣམས་ཀྱི་བཞུགས་བྱང་དཀར་ཆག་དངོས་འགོད་པ།
༈ གཉིས་པ་བཞུགས་བྱང་དཀར་ཆག་དངོས་ལ། གླེགས་བམ་དང་པོར། ཨོ་རྒྱན་ཆེན་པོའི་རྣམ་ཐར་བསྡུས་པ་ངོ་མཚར་སྤྲིན་གྱི་རོལ་མོ། གུ་རུའི་སྒྲུབ་ཐབས་བྱིན་རླབས་ཆར་འབེབས། བྱིན་འབེབས་ཀུན་བཟང་སྤྲིན་གྱི་རོལ་མོ་བྱིན་རླབས་བདུད་རྩིའི་ཟེགས་མ། བླ་སྒྲུབ་ཚོགས་མཆོད་སྤྲིན་རོལ། བླ་སྒྲུབ་རིན་ཆེན་གཏེར་མཛོད། རིག་འཛིན་བླ་མའི་བསྐང་བསྡུས་ཀུན་བཟང་སྤྲིན་ཕུང་། གུ་རུ་མཚན་བརྒྱད་ཀྱི་གསོལ་འདེབས་ཡེ་ཤེས་མངོན་གྱུར་ཚངས་པའི་གླུ་དབྱངས། ཨོ་རྒྱན་མཚན་བརྒྱད་སྒྲུབ་པ་པདྨ་འོད་ཀྱི་དྲྭ་བ། སྐྱབས་སེམས་མཎྜལ་ལྡེབ་ཤར། གུ་རུ་བདེ་བ་ཆེན་པོའི་རྒྱུན་ཁྱེར། བླ་སྒྲུབ་ཚོགས་མཆོད་བསོད་ནམས་རྒྱ་མཚོ། བླ་སྒྲུབ་ཚོགས་མཆོད་བསོད་ནམས་རྒྱ་མཚོ་རས་པ་གསལ་སྟོང་གིས་ཆོག་བསྒྲིགས་མཛད་པ། རྡོ་རྗེ་གླུའི་མཆོད་པ། བླ་སྒྲུབ་དབང་གི་མཚམས་སྦྱོར་བྱིན་རླབས་མྱུར་སྩོལ་དྷེ་ཝ་བཛྲ་གྱིས་བསྒྲིགས་པ། ཡང་དག་དོན་གྱི་དབང་མཆོག གུ་དྲག་གསོལ་འདེབས་རྒྱལ་གདོན་མཐར་བསྐྲད། རཀྴ་ཐོད་ཕྲེང་གསོལ་འདེབས། གསོལ་འདེབས་དུས་མིན་འཆི་བའི་འཇིགས་སྐྱོབ་བར་ཆད་རང་གྲོལ། འཇིགས་བརྒྱད་ཞི་བའི་གསོལ་འདེབས་ཀྱི་ཆ་ལག་འཇིགས་སྐྱོབ་གོ་ཆ་མི་ཤིགས་རྡོ་རྗེ། བཀའ་རྟགས་ཁྲོ་རྒྱལ་ཁྲོས་པའི་རྔམ་སྒྲ་ལོག་འདྲེན་ཀླད་འགེམ། སྐྱབས་སེམས་མཎྜལ་འབུལ་བ། པཎ་ཆེན་བཻ་རོ་ཙ་ནའི་བླ་སྒྲུབ་དངོས་གྲུབ་འདོད་པ་འཇོ་བའི་དགའ་སྟོན། བཻ་རོའི་བླ་སྒྲུབ་ཀྱི་ཚོགས། བཻ་རོའི་བླ་སྒྲུབ་ཀྱི་ལྷན་ཐབས། ཐང་རྒྱལ་ཚེ་སྒྲུབ་འཆི་མེད་རྡོ་རྗེའི་ཀ་བ། རྗེ་བཙུན་མི་ལའི་བླ་མའི་རྣལ་འབྱོར་དངོས་གྲུབ་འདོད་པ་འཇོ་བའི་གཏེར། རྗེ་བཙུན་བླ་མ་ཞབས་དཀར་བའི་བླ་སྒྲུབ་བྱིན་རླབས་བདུད་རྩིའི་བུམ་པ། སངས་རྒྱས་སྨན་བླའི་སྒྲུབ་ཐབས་ཀྱི་གསོལ་འདེབས་དྲང་སྲོང་བདེན་ཚིག སངས་རྒྱས་སྨན་བླའི་སྒྲུབ་ཐབས་ནད་གདོན་མཐར་བྱེད། སྨན་གྱི་ལྷ་མོའི་གཏོར་འབུལ་བསྡུས་པ་ནད་འཇོམས་བདུད་རྩིའི་ཁྲུས་བུམ། སྨན་བླའི་མཆོད་ཕྲེང་མཇུག་ཆོག སྨན་བླ་བདེ་གཤེགས་མཆེད་བརྒྱད་སྨོན་ལམ། གཏེར་གསར་སྨན་བླའི་དབང་གི་ལོ་རྒྱུས་སྐལ་ལྡན་ཡིད་ཀྱི་དགའ་སྟོན་ནགས་རྟ་མདོ་སྡེས་མཛད་པ། སངས་རྒྱས་སྨན་བླའི་རྗེས་གནང་གི་ཆོ་ག སྨན་གཟུངས་ལྡེབ་ཤར། མན་ངག་གནད་ཀྱི་ལས་ཚོགས་བཅས། ཁྱོན་ཆོས་ཚན་སུམ་ཅུ་སོ་ལྔ་བཞུགས།
༈ གླེགས་བམ་གཉིས་པ་ལ། རྒྱལ་བ་འོད་མཚན་སྟོང་འབར་གྱི་གསོལ་འདེབས་ཐུགས་རྗེའི་ལྕགས་ཀྱུ། རྒྱལ་བ་འོད་མཚན་སྟོང་འབར་གྱི་སྒྲུབ་ཐབས་བདེ་ཆེན་ལམ་བགྲོད། རྒྱལ་བ་འོད་མཚན་སྟོང་འབར་གྱི་སྒྲུབ་ཐབས་བདེ་ཆེན་རྒྱལ་པོ། འོད་དཔག་མེད་ཀྱི་གཟུངས་རིང་ལྡེབ་ཤར། རྣམ་རྒྱལ་བུམ་པ་དགོས་འདོད་ཀུན་འབྱུང་། བཀའ་ཡི་སྲུང་མ་ཞིང་སྐྱོང་གི་གསོལ་མཆོད་ལོག་འདྲེན་མཐར་བྱེད། རྒྱལ་བ་འོད་མཚན་སྟོང་འབར་གྱི་ཚོགས་ཀྱི་ལས་རིམ། རྒྱལ་བ་འོད་མཚན་སྟོང་འབར་གྱི་བསྐང་བ་ཀུན་བཟང་སྤྲིན་གྱི་རོལ་མོ། དབང་གི་མཚམས་སྦྱོར་རས་པ་གསལ་སྟོབས་ཀྱིས་མཛད་པ། སྐྱབས་སེམས་ཡན་ལག་བདུན་གྱི་ལྡེབ་ཤར། དབང་གི་ཆས་གཞུག རྒྱལ་བ་འོད་མཚན་སྟོང་འབར་གྱི་ལྷ་དབང་ཐོས་པ་རང་གྲོལ་སངས་རྒྱས་སྟོང་དབང་བསྡུས་པ་དང་བཅས་པ། མཐའ་བརྟེན་བསྡུས་པ། ཚེ་སྒྲུབ་བཛྲ་བདུན་ལྡན། ཚེ་འགུགས་འཆི་མེད་ཡེ་ཤེས། ཚེ་འགུགས་འཆི་མེད་ཡེ་ཤེས་རས་པ་གསལ་སྟོབས་ཀྱིས་རྒྱས་པར་བཀྲལ་བ། རྒྱལ་བ་འོད་མཚན་སྟོང་འབར་གྱི་ཆ་ལག་ཚེ་དབང་གི་མཚམས་སྦྱོར་དྭངས་མ་བཅུད་འདྲེན་དྷེ་ཝ་བཛྲ་གྱིས་བསྒྲིགས་པ། ཚེ་སྒྲུབ་བཛྲ་བདུན་ལྡན་གྱི་ཚེ་དབང་རྡོ་རྗེའི་རྫོང་མཁར། རྒྱལ་བ་འོད་མཚན་སྟོང་འབར་གྱི་ཁྲུས་ཆོག་རིན་ཆེན་ཀེ་ལ་ཤ་ཡི་བུམ་པ། འདོད་ཡོན་ལྡེབ་ཤར། མར་མེ་འབུལ་བའི་སྨོན་ལམ། འཕོ་བའི་མཚམས་སྦྱོར་ཨུཏྤལ་འདབ་རྒྱས། མ་བསྒོམ་འཕོ་བའི་གདམས་པ་སངས་རྒྱས་ལག་འཆང་། འཕོ་བ་ཡེ་ཤེས་སྒོ་འབྱེད་རིག་འཛིན་རྡོ་རྗེ་གྲོ་ལོད་ཀྱི་གཏེར་ཁ། བླ་མའི་ཐུགས་རྒྱུད་བསྐུལ་ཞིང་སྒོ་གསུམ་རྡོ་རྗེའི་གྲོང་དུ་འཕོ་བ། འབྲི་གུང་ཆོས་ཀྱི་གྲགས་པའི་འཕོ་བ་འཇའ་ཟུག་མ་འདོན་འགྲིགས། བླ་བརྒྱུད་གསོལ་འདེབས། རྡོ་རྗེ་སེམས་དཔའི་སྒོམ་བཟླས་སྒྲིབ་གཉིས་སྦུར་ལེན། བཤགས་པའི་རྒྱལ་པོ་སྦྱོང་བའི་ཐབས། འཇམ་དབྱངས་དཀར་པོའི་སྒྲུབ་ཐབས་མུན་སེལ་སུརྱ། འཇམ་དབྱངས་དམར་པོའི་སྒྲུབ་ཐབས་རྨོངས་པའི་མུན་སེལ། །སྐུ་གསུང་ཐུགས་བཟོ་སྤུས་ལེགས་པའི་གསོལ་འདེབས་ལེགས་པ་དོན་ལྡན། འཇམ་དཔལ་ནག་པོའི་སྒྲུབ་ཐབས་ཤེས་རབ་སྣ་ཚོགས། འཇམ་པའི་དབྱངས་ཀྱི་གསོལ་འདེབས་དྲི་མེད་བློ་གྲོས། འཇམ་དབྱངས་ཀྱི་བསྟོད་སྒྲུབ་ཤེས་རབ་སྒོ་འབྱེད་མུན་སེལ་ཉི་མ། འཇམ་དཔལ་ཚོགས་མཆོད་རྟེན་འབྱུང་བསླུ་མེད་ཤེས་རབ་རྣམ་གྲོལ། འཇམ་དབྱངས་གསོལ་འདེབས་ཚིགས་བཅད་གཅིག་པ། འཕགས་པའི་གསོལ་འདེབས་ཐུགས་རྗེ་རྒྱུད་བསྐུལ་བྱིན་རླབས་ཆར་རྒྱུན། འཕགས་པའི་སྒྲུབ་ཐབས་བསོད་ནམས་ཚོགས་ཆེན། འཕགས་པའི་གབ་ཐིག་དོན་ཞགས། བྱིན་འབེབས་ཀུན་བཟང་སྤྲིན་གྱི་རོལ་མོ་བྱིན་རླབས་བདུད་རྩིའི་ཟེགས་མ། ཐུགས་ཆེན་ཟླ་གཞོན་སྤྲིན་བྲལ་གྱི་བསྐང་བསྡུས་སྙིང་པོའི་བཅུད་དྲིལ། པདྨ་དབང་ཆེན་གྱི་གསོལ་འདེབས་མེ་ན་ཀའི་ཟུར་མིག་སྐྱེ་བོའི་ཡིད་དབང་འགུགས་མཛད། པདྨ་དབང་ཆེན་སྒྲུབ་པའི་མཚམས་ལྷ་བསྐྱེད་པ་སོགས་ཁ་སྐོང་ལྷན་ཐབས། པདྨ་དབང་ཆེན་སྒྲུབ་པའི་ལས་བྱང་བསྡུས་པ་བིནྡྷུ་ཀ་ཡི་ཞགས་པ། པདྨ་དབང་ཆེན་སྒྲུབ་པའི་རྗེས་ཀྱི་ལས་རིམ་ཁ་སྐོང་། པདྨ་དབང་ཆེན་སྒྲུབ་པའི་ལས་བྱང་བསྡུས་པ་བིནྡུ་ཀ་ཡི་ཞགས་པ་རས་པ་གསལ་སྟོང་གིས་ཁ་བསྐང་བ། ཕུར་བ་གསང་བ་སྤུ་གྲིའི་བརྒྱུད་འདེབས། ཕུར་པའི་གསོལ་འདེབས་བར་ཆད་དབྱིངས་གྲོལ། རྡོ་རྗེ་ཕུར་པའི་ཡང་བཅུད་དམ་སྲི་མཐར་བྱེད། རྡོ་རྗེ་ཕུར་པའི་ཚོགས་མཆོད་བསོད་ནམས་རྒྱ་མཚོའི་འཇུག་ངོགས། འགུགས་པ་དང་འགུགས་ཐུང་བཅས། ཁྱོན་ཆོས་ཚན་ལྔ་བཅུ་ང་གསུམ་བཞུགས།
༈ གླེགས་བམ་གསུམ་པ་ལ། སྒྲོལ་མའི་གསོལ་འདེབས་འཇིགས་བརྒྱད་གཡུལ་འཇོམས། སྒྲོལ་མའི་གསོལ་འདེབས་དུས་ངན་འཇིགས་སྐྱོབ་རྡོ་རྗེའི་གོ་ཆ། སྒྲོལ་མའི་སྐྱབས་ཡུལ་གསལ་གདབ། སྒྲོལ་མའི་གཏོར་འབུལ་དང་ཡན་ལག་བདུན་པ། རྗེ་བཙུན་སྒྲོལ་མའི་ལས་བྱང་བསྡུས་པ་ཡིད་བཞིན་དབང་སྔོན་རྒྱལ་པོ། དགོངས་གཏེར་སྒྲོལ་མའི་གབ་ཐིག་རྒྱུད་དང་ཞལ་ཤེས་ཀྱི་ཆོག་བསྒྲིགས་འདོན་བདེར་བཀོད་པ། རྗེ་བཙུན་ཏཱ་རེའི་ཚོགས་མཆོད་བསོད་ནམས་རྒྱ་མཚོའི་འཇུག་ངོགས། རྗེ་བཙུན་མའི་བསྐང་བ་མཁའ་དབྱིངས་སྤྲིན་གྱི་རོལ་མོ། རྗེ་བཙུན་སྒྲོལ་མའི་བཞེངས་བསྐུལ། མཚོ་རྒྱལ་གསོལ་འདེབས་བྱིན་རླབས་སྒོ་འབྱེད། མཁའ་འགྲོའི་གསོལ་འདེབས་དངོས་གྲུབ་ཆར་འབེབས། སྒྲོལ་མ་གཙུག་ཏོར་རྒྱལ་མོའི་ལས་བྱང་ཚེ་ཡི་བུམ་བཅུད། སྒྲོལ་མ་གཙུག་ཏོར་ལྷ་མོའི་ཚེ་འགུགས་གཡང་ཞགས་འཁྱིལ་བ། ཡང་གསང་རྡོ་རྗེའི་ཚིག་རྐང་འདི་ཕག་མོ་དམར་མོའི་སྒྲུབ་ཐབས་ཤིག་ཏུ་འདུག་པས་མཚན་བྱང་ནོར་མིན་དཔྱད། འོད་ཟེར་ཅན་མའི་སྒོམ་བཟླས། འོད་ཟེར་ཅན་མའི་མན་ངག རིག་བྱེད་ལྷ་མོའི་གསོལ་འདེབས་སྦུར་ལེན་སྙིང་པོ། ཀུ་རུ་ཀུལླེའི་སྒྲུབ་པ་འགྲོ་ཀུན་ཡིད་འགུགས་འཆིང་བྱེད་ཞགས་པ། ཀུ་རུ་ཀུལླེའི་སྒྲུབ་པའི་རྗེས་ཀྱི་ལས་རིམ། རིགས་ལྡན་ལྷ་མོ་མནྡ་ར་བ་སྒྲུབ་པའི་བསྡུས་དོན། སྒྲོལ་མ་འཇིགས་ཚོགས་རང་གྲོལ། སྒྲོལ་མ་འཇིགས་ཚོགས་རང་གྲོལ་གྱི་འགྲེལ་པ་འཇམ་དབྱངས་དགོངས་རྒྱན་དྷརྨ་ཀིརྟིས་མཛད་པ། སྒྲོལ་མ་འཇིགས་ཚོགས་རང་གྲོལ་གྱི་འགྲེལ་བའི་ས་བཅད་ཆ་མདའ་རབ་བློས་མཛད་པ། འགོང་བཀར་རྒབ་འདྲེ་མཐའ་བསྐྲད། ཨོ་རྒྱན་མཁའ་འགྲོའི་སྒྲུབ་ཐབས་འདོད་འབྱུང་གཏེར་བུམ། ཨོ་རྒྱན་མཁའ་འགྲོ་ནོར་ལྷའི་ཐུགས་སྒྲུབ་ཆ་ལག་གཏེར་བུམ་སྦ་ཐབས་བང་མཛོད་ལྡེའུ་མིག གཏེར་སྲུང་ནོར་བདག་ཡེ་ཤེས་གྲགས་ཀྱི་སྒྲུབ་པའི་སྙིང་པོ་སྦུར་ལེན། གནོད་སྦྱིན་ཛཾ་ནག་སྒྲུབ་ཐབས་རིན་ཆེན་ཡིད་བཞིན་བསམ་འཕེལ། གནོད་སྦྱིན་ཛཾ་ལྷའི་གསོལ་བསྡུས་རིན་ཆེན་དབང་སྔོན། བཟའ་བཏུང་མཆོད་པ་ཀུན་བཟང་མཆོད་སྤྲིན་ཚོགས་གཉིས་རྒྱ་མཚོ། ཕྱིར་བཟློག་ཡང་སྙིང་མན་ངག མི་ཕྱུགས་གང་ལ་ཡང་རིམས་ནད་དང་གཅན་གཟན་ལྷོག་པ་བསྲུང་བའི་སྔགས། ལྷོག་པ་སྲུང་བའི་མན་ངག སྡེ་བརྒྱད་སྤྱི་མདོས་ཁེང་ལོག་གི་བཅོས་ཐབས་དཀར་པོ་གཅིག་ཐུབ། མདོས་བསྐྱེད་དང་འགུགས་པ། ཤིང་རིས་འདོད་གསོལ། སྲིད་པའི་གོད་ཁའི་བཤོལ་མདོས་ནད་གདོན་མཐར་བྱེད། སྣང་སྲིད་ལྷ་འདྲེའི་གླུད་རྫོངས། དཔེའུ་རིས། བསིལ་གཏོར་གངྒཱའི་རྒྱུན་བཟང་ཕན་བདེའི་རྫིང་བུ། བཀའ་འདུས་ཆོས་ཀྱི་རྒྱ་མཚོ་དང་ཡང་གསང་ཌཱཀྐིའི་སྙིང་ཐིག་གི་ཐོབ་ཡིག་དྲན་པའི་ཡིད་གསོ་ཨུཏྤལ་མགུལ་རྒྱན་རས་པ་གསལ་སྟོབས་ཀྱིས་མཛད་པ། རྒྱ་སྤྲུལ་ཚེ་སྒྲུབ་འཆི་མེད་བདེ་སྟེར་གྱི་ལོ་རྒྱུས་སམ་ཆོས་བཤད་བསྡུས་པ། རྒྱ་སྤྲུལ་ཚེ་སྒྲུབ་འཆི་མེད་བདེ་སྟེར་གྱི་མཚམས་སྦྱོར་བུང་བའི་བཅུད་སྡུད། རྒྱ་སྤྲུལ་མཎྜལ་བཞི་བའི་ཆོ་ག་འཇིགས་པ་ཀུན་སྐྱོབ་ཀྱི་འདོན་འགྲིགས། རྒྱ་སྤྲུལ་རིག་བྱེད་མའི་སྨན་མཆོད་ལྡེབ་ཤར། རྒྱ་སྤྲུལ་འོད་ཟེར་ཅན་མའི་འགུག་པ་བཅས། ཁྱོན་ཆོས་ཚན་བཞི་བཅུ་ཞེ་དྲུག་བཞུགས།
༈ གླེགས་བམ་བཞི་པ་ལ། གཅོད་ཀྱི་ལས་ཚོགས་དམིགས་རིམ་སྐོར་གསུམ། ལུས་སྦྱིན་ཡེ་ཤེས་མངོན་གྱུར་པདྨ་དྲག་རྩལ་གླིང་པས་མཛད་པ། གཅོད་ཀྱི་མན་ངག་གཅིག་ཆོག་ཟབ་མོ། འགྱེད་བཞི། ཟབ་མོ་གཅོད་ཀྱི་གདམས་པ་གདན་ཐོག་གཅིག་ཏུ་ཉམས་སུ་ལེན་ཚུལ་ཤེར་ཕྱིན་དགོངས་པའི་ཆུན་འཕྱངས། རིགས་བཞིའི་འགྲེས་བྱང་བསྡུས་པ། གཉན་སའི་དམིགས་རིམ་མདོར་བསྡུས་གསལ་བའི་མེ་ལོང་བདུད་འཇོམས་གསུང་། ཕུང་པོའི་མཆོད་སྦྱིན་ཚོགས་གཉིས་བང་མཛོད། གསོལ་འདེབས་དད་པའི་འཇུག་ངོགས་རྟོག་ཚོགས་རང་གྲོལ། གཅོད་ཀྱི་གནད་དོན་བསྡུས་པ་ཕུང་པོ་ཟན་བསྒྱུར། དམར་འགྱེད་སོགས། ལུས་སྦྱིན་བསྡུས་པ། རྒྱུ་ལུས་མཆོད་སྦྱིན་ཚོགས་གཉིས་གཏེར་བུམ་རྒྱ་སྤྲུལ་གསུང་། གཏོར་ཟོར་རེག་པ་ཚར་གཅོད་སྤུ་གྲིའི་འཁོར་ལོ། མཁའ་འགྲོའི་བྲོ་བརྡུང་གདུག་པ་དམ་མནན། ཕུང་པོའི་མཆོད་སྦྱིན་ཚོགས་གཉིས་རྒྱ་མཚོ། གཡང་གཞི་བརྡབ་ཆོག་ནད་གདོན་མཐར་བྱེད། གཅོད་ཡུལ་མཁའ་འགྲོའི་ཞལ་ལུང་གི་གསོལ་འདེབས་བྱིན་རླབས་སྤྲིན་ཕུང་རྒྱ་སྤྲུལ་གསུང་། སྔོན་དུ་འགྲོ་བའི་ལས་རིམ་རས་པ་གསལ་སྟོབས་ཀྱིས་མཛད་པ། ཡན་ལག་བདུན་པ་དང་མཆོད་རྫས་བྱིན་རླབས་ལྡེབ་ཤར། མཁའ་འགྲོ་སྡེ་ལྔའི་ལས་བྱང་དངོས་གྲུབ་ཆར་འབེབས་རྒྱ་སྤྲུལ་གསུང་། ཚོགས་མཆོད་བསོད་ནམས་མྱུ་གུ་རྒྱ་སྤྲུལ་གསུང་། བྲོ་བརྡུང་ལྡེབ་ཤར། བསྐང་བ་ནོར་བུའི་ཕྲེང་མཛེས་རྒྱ་སྤྲུལ་གསུང་། གཅོད་ཀྱི་བརྒྱུད་རིམ་ཁ་སྐོང་བསྐང་བ་པདྨ་ཤེས་རབ་རྡོ་རྗེས་མཛད་པ། བཀའ་བསྲུང་གཟའ་བཙན་ཀླུའི་མཆོད་ཕྲིན་རབ་འབྱམས་རྒྱ་མཚོ། བཀའ་བསྲུང་དྲག་པོ་མཆེད་གསུམ་གྱི་གསོལ་བསྡུས་བསྟན་དགྲ་འཇོམས་བྱེད། གཅོད་ཀྱི་གཤེད་འདུལ་གདུག་པ་དམ་འདོགས་ཟ་འདྲེ་ཁ་ཕྲོལ་རས་པ་གསལ་སྟོབས་ཀྱིས་བྲིས་པ། འགུགས་པ་ཆེ་ཆུང་དང་འགུགས་སྔགས། མ་ཅིག་མཁའ་འགྲོའི་དམག་ཚོགས་དགྲ་ལ་རྦད་པ། འདུལ་རྒྱབ་བསྡུས་པ། མཁའ་འགྲོ་འབུམ་བསྐུལ་བསྡུས་པ། ཚེ་འདས་གཤེད་དང་བྲལ་ནས་རིགས་དྲུག་གི་སྡུག་བསྔལ་ལས་ཐར་ཏེ་བདེ་ཆེན་དུ་བགྲོད་པའི་ཆོ་ག་གནས་འདྲེན། འདོད་ཡོན་བསྔོ་བ་ཆགས་མེད་གར་གཅོད་ལས་བཏུས་པ། གཅོད་དབང་ཆུ་བོ་གཅིག་འདྲེས་ཀྱི་ལོ་རྒྱུས། གཅོད་དབང་ཆུ་བོ་གཅིག་འདྲེས། ཟབ་དོན་གཅོད་ཀྱི་གདམས་པའི་བྱིན་རླབས་དབང་གི་རིམ་པ་ལ་ཉེ་བར་མཁོ་བའི་མཚམས་སྦྱོར་ནགས་རྟ་མདོ་སྡེས་མཛད་པ། སྐྲ་ཆོག་བྱིན་རླབས་ཡེ་ཤེས་འཁོར་ལོ། དུང་གི་ཝ་མིག་བརྒྱན་པའི་ཐབས་བདེ་ཆེན་ཡེ་ཤེས། མེ་བསྐུལ་དམར་པོ་གློག་ཞགས། མེ་བསྐུལ། ཌཱཀྐིའི་མེ་མཆོད་ཆ་ལག་སྔོན་འགྲོའི་ཆོས་ཀྱི་ལས་རིམ་རས་པ་གསལ་སྟོབས་ཀྱིས་མཛད་པ། མཁའ་འགྲོ་དྲག་མོའི་སྦྱིན་སྲེག་གདུག་པ་དམ་འདོགས་ཡེ་ཤེས་མེ་ཡི་དྲྭ་བ། མཁའ་འགྲོ་སྡེ་ལྔ་ལ་འདོད་དོན་གསོལ་བ། གཅོད་ཀྱི་ལས་ཚོགས་བསྟབས་པ་ཆ་དྲུག་ཕྱིན་དྲུག་ལམ་བཟང་། བསྟབས་པ་ཆ་དྲུག་ཕུང་པོའི་མཆོད་སྦྱིན་ཀརྨའི་མིང་གིས་ཁྲིགས་སུ་བསྡེབ་པ། གཅོད་ཀྱི་ལས་ཚོགས་ཉེར་མཁོ་སྐོར་ཕྱོགས་གཅིག་ཏུ་བྲིས་པ། མཁའ་འགྲོའི་བྱ་འབོད་རིན་ཆེན་སྦུར་ལེན། ཆར་གཅོད་མེ་ཡི་གཡོ་འཁྲུགས་རྒྱ་མཚོའི་ཁ་གནོན། ཆར་པ་དྲག་པོར་འབེབས་ཐབས། མནན་གཏད་མི་འགྱུར་ཀ་བའི་ལག་ལེན་གསལ་བྱེད་ལྡེ་མིག་རས་པ་གསལ་སྟོབས་ཀྱིས་མཛད་པ། རིགས་ལྔའི་མཁའ་འགྲོ་རྣམས་ཀྱི་འགྲེས་བྱང་། འདོད་གསོལ། ཟབ་མོ་གཅོད་ཀྱི་ལས་མཐའ། ནད་པ་ལྕགས་ཁྲ། མནན་པ་མི་འགྱུར་ཀ་བ། དམ་སྲིའི་འགུགས་རྟགས་གསལ་བྱེད་དབལ་ཁྱུང་བོན་གཏེར་བསྟན་གཉིས་གསང་སྔགས་གླིང་པའི་གཏེར་བྱོན། རྐང་གླིང་གི་དོན་བཤད་འཇིགས་གླིང་གསུང་བཅས། ཁྱོན་ཆོས་ཚན་ལྔ་བཅུ་ང་དགུ་བཞུགས།
༈ གླེགས་བམ་ལྔ་པ་ལ། གསང་བདག་རྡོ་རྗེ་གཏུམ་པོའི་གསོལ་འདེབས་ཨོ་རྒྱན་ཉི་མས་མཛད་པ། གཏུམ་པོའི་ཐུགས་སྒྲུབ་སྙིང་པོའི་གསོལ་འདེབས་དངོས་གྲུབ་གཏེར་མཛོད། གཏུམ་པོའི་ཐུགས་སྒྲུབ་སྙིང་པོ་རྒྱ་སྤྲུལ་གཏེར་བྱོན། ཡེ་ཤེས་ཁྱུང་གི་གབ་ཐིག་རྒྱ་སྤྲུལ་གསུང་། ཁྱུང་གི་བཟླས་དམིགས། མཚམས་ལྷ་བསྐྱེད་ཆོག་སྲིད་གསུམ་ཟིལ་གནོན། བདེན་བརྗོད། མཚམས་ལྷ་བསྐྱེད་བསྡུས་པ། ཚོགས་མཆོད་ཡིད་བཞིན་ཆར་འབེབས་རྒྱ་སྤྲུལ་གསུང་། གསང་བདག་གཏུམ་པོའི་ཐུགས་སྒྲུབ་སྙིང་པོའི་བསྐང་བ་མགོ་སྤྲུལ་གྱིས་མཛད་པ། གསང་བདག་གོས་སྔོན་གསོལ་འདེབས་བྱིན་རླབས་གཏེར་བུམ། གསང་བདག་གོས་སྔོན་བདག་བསྐྱེད་དྲེགས་པའི་སྲོག་འཕྲོག་གདུག་པ་དམ་འདོགས་ཀྱི་གཏེར་གཞུང་། ཡང་གསང་བདག་གོས་སྔོན་བདག་བསྐྱེད་དྲེགས་པའི་སྲོག་འཕྲོག་གདུག་པ་དམ་འདོགས་དང་ཚོགས་མཆོད་བསོད་ནམས་དཔལ་སྟེར་རས་པ་གསལ་སྟོབས་ཀྱིས་ཁྲིགས་སུ་བསྡེབས་པ། ཕྲེང་བ་བྱིན་རླབས། སྒྲུབ་བསྙེན་ལས་སྦྱོར་རས་པ་གསལ་སྟོང་གིས་ཁ་བསྐང་བ། ཀླུ་རྒྱལ་དགའ་བོའི་སྒྲུབ་ཐབས་ཕན་བདེའི་མྱུ་གུ། ཀླུའི་མཆོད་ཕྲེང་། ཀླུ་སྨན་འབུལ་བ། བསྟོད་བསྡུས། ཀླུ་རྒྱལ་མཆོད་པའི་ཆ་ལག་ལས་ཚོགས་སྤྲིན་གྱི་རོལ་མོ། ཀླུ་ཡི་གཡང་འགུགས་གཡང་རྫས་གཏད་པ་དགོས་འདོད་མྱུར་སྩོལ། ཁྱབ་འཇུག་འོད་འཕྲོ་ཆེན་པོའི་བརྒྱུད་པའི་གསོལ་འདེབས་མུ་ཏིག་དོ་ཤལ། སྐྱབས་སེམས་མཆོད་རྫས་བྱིན་རླབས་མནྟྲའི་མིང་གིས་མཛད་པ། ཁྱབ་འཇུག་རཱ་ཧུ་ལའི་སྒྲུབ་ཐབས་གློག་ཞགས་དམར་པོ་བསྟན་དགྲ་སྒྲོལ་བའི་མཚོན་ཆ། ཕག་མོ་ཟབ་པའི་བཀའ་སྲུང་ཁྱབ་འཇུག་མཆོད་ཕྲེང་བསྡུས་པ་གློག་གི་ཕྲེང་བ་གསལ་བྱེད་དང་པོའི་མིང་གིས་སྦྱར་བ། རཱ་ཧུ་ལའི་འཁྲུགས་འགྲམ་བཤགས་པ་བདུད་རྩིའི་ཁྲུས་བུམ། རཱ་ཧུ་ལའི་མངའ་གསོལ་རྡོ་རྗེའི་ཕྲེང་བ། དྲང་སྲོང་དམ་བསྒྲགས་ཕྲིན་ལས་གསོལ་བ། དྲང་སྲོང་ལས་ལ་བསྐུལ་བ་ལོག་འདྲེན་སྒྲོལ་བའི་མཚོན་ཆ། དྲང་སྲོང་ཆེན་པོའི་སྒོ་ནས་དགྲ་ལ་ལྟས་ངན་གཏོང་ཐབས། གསེར་སྐྱེམས་བདུད་རྩིའི་ཟེགས་མ། གསེར་སྐྱེམས་དང་ཟོར་གྱི་འཆམ་ཡིག དྲང་སྲོང་ཆེན་པོའི་སྒྲོལ་ལས་གནམ་ལྕགས་སྒྱོགས་རྡོ། འགུགས་པ་ལྡེབ་ཤར། བྱུག་བདུག་བྲབ་གསུམ་ལྡེབ་ཤར། འབོད་རྦད་བསད་སྔགས་ལྡེབ་ཤར། དྲང་སྲོང་ཁྱབ་འཇུག་གི་བཟློག་པ་མི་མཐུན་གཡུལ་འཇོམས། ཟོར་བསྒྲུབ་ལྡེབ་ཤར། གཏོར་བཟློག་སྤྱི་ལ་མཁོ་བའི་སྒོ་དབྱེ་སོགས་གསལ་བར་བཀོད་པ་རྗེ་དབོན་པདྨ་ཀུན་གྲོལ་རྣམ་རྒྱལ་གྱིས་མཛད་པ། ནམ་མཁའ་མེད་པར་སོགས་ལྡེབ་ཤར། ལོ་ཟླ་མ། གསང་བདག་གོས་སྔོན་འཆང་གི་བཀའ་སྲུང་སྨུག་ནག་འོད་འཕྲོའི་བཞེངས་བསྐུལ་བརྒྱ་བྱིན་མཚོན་རྣོན། དགྲ་རྐུན་མགོ་འཁོར་གདམས་པ། དྲང་སྲོང་ཁྱབ་འཇུག་ཆེན་པོའི་བྱད་གཏད་འགྲོལ་བའི་མན་ངག་གནམ་ལྕགས་སྤུ་གྲིའི་འཁོར་ལོ། ཁྲམ་ཤིང་འབྲི་ཐབས། དྲེགས་པ་སྡེ་བརྒྱད་ཀྱི་ཁྲམ་ཕྱི་བཞར་བཀྲུ་བ། དྲེགས་པ་སུམ་ཅུ་བསྡུས་པ། དྲེགས་པ་སུམ་ཅུའི་ཁྲམ་ཤིང་། ཨ་རྒོང་ཞུ་ལན་སྣང་སྲིད་བརྡ་གླུ། ཕག་མོའི་ཟབ་ཁྲིད་ཀྱི་ཆ་ལག་འཆི་བསླུ་གཤིན་རྗེའི་དཔུང་འཇོམས། རྒྱལ་དབྱངས་དཔའ་བོའི་གད་རྒྱང་། གཟའ་ཀླུའི་དུག་སྦྱོང་རྨ་བྱ་ཆེན་མོའི་ཞལ་ལུང་བདུད་རྩིའི་བུམ་བཟང་། རྨ་བྱ་ཆེན་མོའི་སྒོ་ནས་གཟའ་ཀླུའི་དུག་དབྱུང་བདུད་རྩིའི་ཆུ་རྒྱུན། སེམས་དཔའ་ཡབ་ཡུམ་བརྒྱད་ཀྱི་སྔགས། རྨ་བྱ་ཆེན་མོའི་སྔགས། དྲང་སྲོང་ཆེན་པོའི་བཀའ་གཏད་ལོ་རྒྱུས། དྲང་སྲོང་བླ་རྡོ་འབྲི་ཐབས། དྲང་སྲོང་སྨུག་ནག་འོད་འཕྲོའི་བཀའ་གཏད་ཀྱི་མཚམས་སྦྱོར་དྲང་སྲོང་དགྱེས་པའི་མཆོད་སྤྲིན་དྷེ་ཝ་བཛྲ་བས་བསྒྲིགས་པ། དྲང་སྲོང་ཆེན་པོ་ཁྱབ་འཇུག་སྨུག་ནག་འོད་འཕྲོའི་བཀའ་གཏད་གཏོར་དབང་རབ་འབྱམས་ཕྲིན་ལས། འབོད་རྦད་བསད་སྔགས་ལྡེབ་ཤར། ལས་ཚོགས་སྤུ་གྲི་རབ་འབར། ཆར་འགོག་བསྐལ་མེའི་ཚ་དབལ། ངག་བཀྲོལ་གནམ་ལྕགས་སྤུ་གྲི་འཁོར་མ། གསང་བདག་གོས་སྔོན་ཧཱུྃ་སྒྲུབ་ཟབ་མོ། དྲང་སྲོང་ཆེན་པོའི་མེ་མཆོད་ཡེ་ཤེས་རབ་འབར་རྡོ་གྲུབ་གསུང་། གཏད་ཕྱུང་ངག་འདོན་ཟུར་བཀོལ། གསང་བདག་རྡོ་རྗེ་གཏུམ་པོ་དང་བཀའ་སྲུང་ཁྱབ་འཇུག་ཆེན་པོའི་སྒོ་ནས་བྱད་གཏད་བཀྲོལ་བའི་མན་ངག་གི་ལག་ལེན་ཟིན་བྲིས་མཐོང་བ་ཀུན་གསལ་ཆ་མདའ་རབ་བློས་མཛད་པ། དཔེའུ་རིས་བཅས། ཁྱོན་ཆོས་ཚན་བདུན་ཅུ་དོན་གཅིག་བཞུགས།
༈ གླེགས་བམ་དྲུག་པ་ལ། རྩ་གསུམ་སྲུང་མའི་གསོལ་བསྡུས། རྩ་གསུམ་ཆོས་སྐྱོང་རྣམས་ཀྱི་སྒྲུབ་ཐབས་དངོས་གྲུབ་འདོད་གཏེར། རྩ་གསུམ་སྲུང་མའི་ཕྲིན་བཅོལ་ཀློང་ཆེན་འོད་གསལ་རྡོ་རྗེས་མཛད་པ། ཕྲིན་བཅོལ་བསྡུས་པ། སྲུང་མ་སྤྱིའི་གསོལ་བསྡུས་ཀུན་འབྱུང་དབང་སྔོན་རྒྱལ་པོ། ཆོས་སྐྱོང་གཏོར་འབུལ་ལྡེབ་ཤར། བཀའ་ཡི་སྲུང་མ་ནག་པོ་ཆེའི་གསོལ་བསྡུས་དངོས་གྲུབ་འབྱུང་བའི་གཏེར། མ་མགོན་གསོལ་བསྡུས་སྙིང་པོའི་ཡང་བཅུད། རེ་མ་ཏིའི་སྲོག་འཁོར་འབྲི་ཐབས་བསྡུས་པ་སྙིང་གི་རཀྟ། དུད་སོལ་ལྷ་མོའི་གསོལ་བསྡུས་ཡིད་བཞིན་དབང་སྔོན་རྒྱལ་པོ། ཆེ་ཞེ་ཆེན་མོའི་གསོལ་མཆོད། ཚེ་རིང་མཆོད་ལྔའི་གསོལ་བསྡུས་བསམ་དོན་རེ་སྐོང་། རྡོ་རྗེ་གཡུ་སྒྲོན་མའི་མངའ་གསོལ་རྡོ་རྗེའི་ཕྲེང་བ། གཡུ་སྒྲོན་མའི་བསྟོད་པ་རྡོ་བླས་མཛད་པ། རྡོ་རྗེ་གཡུ་སྒྲོན་མའི་མཆོད་ཕྲེང་གར་དབང་ཆོས་སྐུས་མཛད་པ། སྣང་གསལ་པྲ་ཡི་ཆོ་ག་སྲིད་གསུམ་ལེགས་ཉེས་སྟོན་པའི་ཨ་དར་ཤ པྲ་འབེབས་ཁར་གསལ་བར་ཞུ་བ། སྣང་གསལ་པྲ་ཡི་ལས་སྦྱོར། སྣང་གསལ་པྲ་ཡི་ཆ་ལག་སྔོན་དུ་འགྲོའི་ཆོས་གསུམ་རས་པ་གསལ་སྟོབས་ཀྱི་མཛད་པ། བསྙེན་བསྒྲུབ་གྲངས་ཐེམས་ལས་སྦྱོར་འདོད་དོན་གསོལ་བ་རས་པ་གསལ་སྟོབས་ཀྱིས་མཛད་པ། མ་ཅིག་ཤ་ཟ་མཁའ་འགྲོ་མའི་གསོལ་མཆོད་ཕྲིན་ལས་ཀུན་འགྲུབ། སྒྲོལ་མའི་བཀའ་སྲུང་སྐྱེས་བུ་མི་ཐུང་ནོར་བདག་མགོ་ནག་གི་དགྲ་བླ་གསོལ་བསྡུས། གཟའི་གསོལ་བསྡུས། བཀའ་སྲུང་སྐྱེས་བུ་ཆེན་པོའི་གསང་སྒྲུབ་འགུགས་པའི་ལྕགས་ཀྱུ། དམ་ཅན་སྐྱེས་བུ་ཆེན་པོའི་གསོལ་མཆོད་ཡིད་བཞིན་དོན་གྲུབ། དམ་ཅན་ཨ་ཇོ་ཆེན་པོའི་བསྐུལ་བྱང་དུག་གི་མདེལ་ཐུང་། དམ་ཅན་སྔགས་འཁོར་སྣང་བ་དབང་སྡུད་སྐྱེ་འགྲོའི་ཡིད་འགུགས། ཕུར་སྲུང་མཆོད་པའི་ལས་རིམ་ཤིན་ཏུ་བསྡུས་པ་རྡོ་རྗེའི་ཐོག་དབལ། ཕུར་སྲུང་བཅུ་དྲུག་གི་བསྐུལ་བ། ལྷ་ཆེན་སྒྲུབ་པ་སྣང་སྲིད་ཡིད་འགུགས། གཏེར་སྲུང་ལྷ་བཙན་མཆོད་པའི་ལས་རིམ་བསྡུས་པ། ལྷ་བཙན་ཆེན་པོའི་བླ་རྡོ་སྲོག་འཁོར་ཟབ་མོ་འབྲི་ཐབས། ལྷ་བཙན་ཆེན་པོའི་བསྐུལ་བ་དམར་ནག་གློག་གི་ཞགས་པ་དགྲ་བོ་གསོད་པའི་གནམ་ལྕགས། ལྷ་གདོང་བཙན་རྒོད་ཀྱི་གཏོར་འབུལ། གནོད་སྦྱིན་ཙི་དྲའི་རྦད་བསྐུལ་དུག་མདའ་ལྟོང་དམར། འགོ་བའི་ལྷ་ལྔ་གསོལ་ཐབས་བྱིན་རླབས་ཡེ་ཤེས་ཆུ་རྒྱུན། དྲི་ཟའི་རྒྱལ་པོ་ཟུར་ཕུད་ལྔ་པའི་གསོལ་བསྡུས་ཡིད་བཞིན་དབང་སྔོན། དྲི་ཟའི་རྒྱལ་པོ་ཟུར་ཕུད་ལྔ་པའི་འཛབ་ལས་བཞི་ལྷུན་གྲུབ། གཉན་ཆེན་ཐང་ལྷའི་བསྐུལ་བྱང་སྲོག་གི་སྤུ་གྲི། གཉན་ཆེན་ཐང་ལྷའི་སྒོ་ནས་དགྲ་ལ་ཆོ་འཕྲུལ་སྟོན་པའི་མན་ངག་སྣང་སྲིད་མིག་འཕྲུལ། གཉན་ཆེན་ཐང་ལྷའི་སྲོག་དབང་གི་མཚམས་སྦྱོར་ལས་ཀུན་མྱུར་འགྲུབ་དྷེ་ཝ་བཛྲ་གྱིས་བསྒྲིགས་པ། གཉན་ཆེན་ཐང་ལྷའི་སྲོག་དབང་། གཉན་ཆེན་ཐང་ལྷའི་བསང་མཆོད་བདུད་རྩིའི་ཟེགས་མ། དྲང་སྲོང་ཁྱབ་འཇུག་བསང་མཆོད། ཡུལ་ལྷའི་དམ་བསྒྲགས་འབངས་མི་བཀའ་ཉན། ཡུལ་ལྷ་དགེ་བསྙེན་རྡོ་རྗེ་དྲག་པོ་རྩལ་གྱི་བསང་མཆོད་འཆི་མེད་བདུད་རྩིའི་ཟེགས་མ། ཏཱ་རེའི་ཡུལ་ལྷའི་མཆོད་ཕྲེང་ལྷ་ཡི་སྤྲིན་རོལ། ཡུལ་ལྷ་བསྟན་འཛིན་རི་རྒྱལ་ཟིལ་ཁྲོམ་འཕན་ཕྱུག་གི་བསང་མཆོད། ཏཱ་རེའི་ཡུལ་ལྷ་རི་རྒྱལ་འཕན་ཕྱུག་གི་གསོལ་མཆོད་བདུད་རྩིའི་ཟེགས་མ། ཡུལ་ལྷ་བྲག་དཀར་གྱི་བསང་མཆོད་འདོད་དོན་ལྷུན་གྲུབ། གཡུ་རོང་སྨད་ཀྱི་ཡུལ་ལྷའི་བསང་བསྡུས་ཀུན་བཟང་མཆོད་སྤྲིན་འདོད་དོན་བདེ་ལེགས། ནོར་བུ་ལྷ་རྩེའི་ཕྲིན་བཅོལ་དཔའ་བོའི་འགྱིང་གླུ། དབང་སྡུད་ལྷ་རྩེའི་བསང་མཆོད་ཉུང་བསྡུས་གློག་གི་ཞགས་པ། བཻ་ཡི་ཡུལ་ལྷ་བཀྲ་ཤིས་ལྷ་རྩེའི་བསང་མཆོད་འདོད་འབྱུང་དབང་སྔོན། ཡུལ་ལྷའི་རྒྱལ་པོ་ཆུ་ལུང་གླང་པོ་དམ་བརྟན་གྱི་བསང་མཆོད་འདོད་དོན་བསམ་གྲུབ། ཡུལ་སྐྱོང་ཤོག་ཤོག་ཟངས་ཁྲབ་དམར་པོའི་བསང་བསྡུས། སྒེག་གི་ཡིག་དྲུག་གནས་སྲུང་གཟའ་ཀླུའི་བསང་མཆོད་རྒྱས་བསྡུས་གཉིས། གཞི་བདག་བསང་བསྡུས་འདོད་དོན་ལྷུན་གྲུབ། ཡུལ་ལྷ་བ་སྦལ་ཁྱུང་གསུམ་གྱི་བསང་མཆོད་ལོ་ལེགས་འབྲུ་བཅུད་སྡུད་པའི་སྙིང་པོ། ཀར་སྟོད་མཚོ་བསང་དགོས་འདོད་ཆར་འབེབས། སྐུ་ལྷ་ཁྲབ་གྱོན་གསོལ་མཆོད་འདོད་དོན་ལྷུན་གྲུབ། ཡུལ་གྱི་ཟོ་དོར་གེ་སར་སྐྱེས་བུའི་སྐུ་ལྷ་ར་ཁང་ངམ་རྡོ་རྗེ་དབང་སྡུད་འབར་བའི་གསོལ་བསྡུས། གནས་སྲུང་སྐུ་ལྷ་ར་ཁང་གི་གསོལ་བསྡུས་བཞིན་མཛེས་རྒྱས་པའི་ལང་ཚོའི་འགྱུར་བག་དཔའ་མོའི་སྒེག་གླུ། ཤར་བཞག་བྲ་ལྷ་རྩེའི་བསང་མཆོད་འདོད་རྒུའི་དཔལ་སྟེར། ཤར་ཕྱོགས་བཞག་བྲ་ལྷ་རྩེའི་གསོལ་མཆོད་བསམ་དོན་རེ་སྐོང་བཀྲ་ཤིས་དགེ་ལེགས། ཡུལ་ལྷ་གཉན་པོ་བསེ་རྫིའི་བསང་མཆོད་བསྡུས་པ། རྩང་གི་ཡུལ་སྐྱོང་གཞི་བདག་ཏིང་རྒྱལ་མི་མགོན་དཀར་པོའི་བསང་མཆོད། ཡུལ་ལྷ་ཟོ་དོར་དབྲ་ཕོའི་བསང་ཡིག་བདེ་ལེགས་ཉི་འོད། ཡུལ་ལྷ་ཟོ་དོར་སྤྱི་རྗེའི་མངོན་རྟོགས། ཡུལ་ལྷ་ཆེན་པོ་བྲེང་ངེ་གཡག་ཕྱུག་གམ་གཡུང་དྲུང་ལྷ་རྩེའི་བསང་མཆོད་ཕན་བདེའི་གཏེར་འཆང་། རོང་མེས་ཕྱོགས་ཀྱི་སྐུ་ལྷ་ཡོ་ཎ་དཔའ་བོ་མེས་པོ་ཞལ་དཀར་རྩལ་གྱི་བསང་མཆོད་ལྷའི་དཔག་བསམ་སྙེ་མ། ངེས་ལེགས་ཆུ་མིག་ནཱ་གའི་བསང་མཆོད་དབང་སྔོན་རྒྱལ་པོ། ཤོག་བཞིའི་ཡུལ་གྱི་ཆུ་མིག་བྱང་ཆུབ་འོད་འཕྲོའི་བསང་ཡིག་ལྷ་མིའི་འཕྲིན་ཆ་གསལ་བའི་མགྲིན་གླུ། ཐུགས་ཆེན་གནས་བདག་ལི་ལི་བྲག་དཀར་གྱི་བསང་བརྔན་གཡར་དམ་བསྒྲགས་པ་རྡོ་རྗེའི་སྒྲ་དབྱངས། ཡུལ་ལྷ་བྲག་བཙན་རྡོ་རྗེ་དབང་དྲག་གི་བསང་མཆོད་ཉུང་བསྡུས། བསང་བསྡུས་ཡིད་བཞིན་སྤྲིན་ཕུང་ཧོར་བླས་ཁ་བསྐང་མཛད་པ། རི་ཁྲུས་འཁོན་སྦྱངས་དྭངས་ཤེལ། ལབ་རྩེའི་གོང་གཏད་ལག་ལེན་བཅས། ཁྱོན་ཆོས་ཚན་བདུན་ཅུ་དོན་དགུ་བཞུགས།
༈ གླེགས་བམ་བདུན་པ་ལ། རིག་འཛིན་གཞན་ཕན་བཟང་པོའི་གསང་བའི་རྣམ་ཐར་ཡེ་ཤེས་མཁའ་འགྲོའི་གསང་ཚིག་སྐལ་ལྡན་སློབ་མའི་རྒྱུད་གྲོལ། སྐྱེ་ཕྲེང་གསོལ་འདེབས་མུ་ཏིག་ཕྲེང་མཛེས། གསོལ་འདེབས་བྱིན་རླབས་བདུད་རྩིའི་སྤྲིན་ཕུང་། བླ་མའི་གསོལ་འདེབས་དད་པའི་འཇུག་ངོགས་ཨུ་པ་དེ་ཤ། གསོལ་འདེབས་དད་པའི་འཁྲི་ཤིང་། གསོལ་འདེབས་དད་པའི་འཁྲི་ཤིང་ཟླ་ཞུན་རབ་གསལ། གསོལ་འདེབས་བྱིན་རླབས་མེ་ལྕེ། མཁན་སློབ་ཆོས་གསུམ་དང་དབྱེར་མེད་པའི་བླ་མར་གསོལ་བ་འདེབས་པ་དད་པའི་འཇུག་ངོགས། གསོལ་འདེབས་དད་ལྡན་འཁྲི་ཤིང་བྱིན་རླབས་འགུགས་པའི་ལྕགས་ཀྱུ། གསོལ་འདེབས་བྱིན་རླབས་དྲི་བསུང་། གསོལ་འདེབས་བྱིན་རླབས་འོད་འབར། གསོལ་འདེབས་ཡང་དག་ལམ་སྟོན་དད་པའི་འཁྲི་ཤིང་། གསོལ་འདེབས་དྲང་སྲོང་བདེན་ཚིག་སྐལ་ལྡན་དགའ་སྟོན། གསོལ་འདེབས་བྱིན་རླབས་སྤྲིན་ཕུང་མ། གསོལ་འདེབས་དད་ལྡན་དངས་འདྲེན། གསོལ་འདེབས་དད་ཅན་དགའ་སྟོན། མོ་མ་རིག་བཟང་གི་ངོར་གསུངས་པའི་གསོལ་འདེབས། ཀར་སྟོར་མཐུ་ཆེན་ངོར་གསུངས་པའི་གསོལ་འདེབས། བུདྡྷ་ས་ག་རའི་ངོར་གསུངས་པའི་གསོལ་འདེབས། བུད་མེད་བསོད་ནམས་མིང་གི་ངོར་གསུངས་པའི་གསོལ་འདེབས། ཡང་གསོལ་འདེབས་གཅིག ཀར་སྟོད་ཡོངས་འཛིན་ལ་གསུངས་པའི་གང་དྲན་གསོལ་འདེབས། འཁོར་གདོང་མགོན་དབང་གིས་མཛད་པའི་ཧོར་བླའི་ཞབས་བརྟན་གསོལ་འདེབས། དྷརྨ་ཀིརྟིས་མཛད་པའི་ཧོར་བླའི་ཞབས་བརྟན་གསོལ་འདེབས། སྐྱེ་ཕྲེང་ཞལ་ཐང་འབྲི་ཐབས་དཔེ་ཐོ། ཆོས་བདག་ལུང་བསྟན་མུན་སེལ་འོད་སྟོང་འབར་བ། གཏེར་གྱི་ཁ་བྱང་གསལ་བའི་ལྡེ་མིག རིགས་དབོན་ལ་གདམས་པའི་ལུང་བྱང་། ཀུན་བཟང་གི་སྐྱེ་ཕྲེང་ལུང་བྱང་། བློ་གྲོས་ལ་གནང་བའི་ལུང་བྱང་། སློབ་བུ་ཞིག་ལ་གནང་བའི་ལུང་བྱང་། འོ་བཟི་པདྨ་བསྟན་འཛིན་ལ་གནང་བའི་ལུང་བྱང་། རིགས་ལྡན་བྱིས་པ་ལ་གནང་བའི་ལུང་བྱང་། སློབ་བུ་ཞིག་ལ་གདམས་པའི་ལུང་བྱང་། ཆོས་བདག་བློ་གྲོས་ཀྱི་སྐྱེ་ཕྲེང་བརྟགས་ལུང་། ཆོས་བདག་བློ་གྲོས་ཀྱི་ལུང་བྱང་། བློ་བཟང་ལ་གནང་བའི་ལུང་བྱང་། ནགས་འདབས་རས་པའི་སྐྱེ་ཕྲེང་ཀློང་ཆེན་འོད་གསལ་རྡོ་རྗེས་མཛད་པ། སྔོན་འགྲོ་བསྡུས་པ་ཐར་ལམ་སྣང་བྱེད། རྩ་བརྒྱུད་བླ་མ་ཐོ་བརྩེགས་ཀྱི་རྣམ་པར་གསལ་བ་མཐོང་བྱེད་ཉི་མ། བླ་མ་རྒྱང་འབོད་བྱིན་རླབས་བདུད་རྩིའི་ཟེགས་མ། རྫོགས་པ་ཆེན་པོ་འོད་གསལ་གསང་བའི་མན་ངག་ཉི་མ་སྤྲིན་བྲལ། རིག་པ་རྩལ་གྱི་དབང་མཆོག ཕྱག་རྫོགས་དབུ་གསུམ་གྱི་དོན་བསྡུས་ཟིན་ཐོ། དམ་པ་གསུམ་གྱི་ཟིན་བྲིས། ནམ་མཁའ་སུམ་སྤྲུགས་ཀྱི་གདམས་པ། དཔལ་དང་ཡོན་ཏན་གྱིས་མངོན་པར་མཐོ་བ་བཱ་ལྷ་སྒང་གི་གནས་ལ་བསྟོད་པ་དུང་དཀར་སྐྱེ་བ་ལྔ་པའི་རང་སྒྲ་དད་པའི་འཁྲི་ཤིང་འོད་ཀྱི་ཟླ་ཞུན། ལྷ་སྒང་གནས་འདུས་དང་བསྐོར་བའི་ཕན་ཡོན། སྦ་རོང་བྲག་དཀར་གནས་བསྟོད་ཐར་པའི་ལམ་སྟོན། སྦ་རོང་བྲག་དཀར་གནས་ཀྱི་གཉེར་གཏད། འབོ་གངས་དཀར་གནས་བསྟོད་རྡོ་རྗེ་གླུ་མའི་རྒྱུད་མང་། གནས་ལུང་དཔལ་གྱི་རི་བོའི་དཀར་ཆག་དབྱིངས་ཀྱི་ཌཱཀྐིའི་ཞལ་ལུང་འཁྲུལ་མེད། གནས་ལུང་གནས་ཀྱི་གསོལ་འདེབས། ཏཱ་རེའི་གནས་བསྟོད་སྐྱེ་ལྔའི་དུང་དཀར། ཏཱ་རེའི་གནས་ཡིག་བདེ་ཆེན་བགྲོད་པའི་ལམ་བཟང་མ་རིག་མུན་སེལ། ཏཱ་རེའི་གནས་ཡིག་གཟུ་བོའི་ལམ་སྟོན་རྣམ་གྲོལ་ལེགས་པའི་ཡོན་ཏན། ཏཱ་རེ་གཉེར་གཏད་བསྡུས་པ། གནས་ཕྲན་འགའ་ཡི་སྡོམ་ཚིག་རྒྱ་སྤྲུལ་གསུང་། ཏཱ་རེའི་གནས་བསྟོད་མཉྫུའི་མིང་གིས་མཛད་པ། ཏཱ་རེ་གཉེར་གཏད། སྤྲིངས་ཡིག་དྲང་སྲོང་དམོད་པའི་རྔམ་སྒྲ། སྒེག་གི་ཡིག་དྲུག་དོན་བསྟོད་སྡུག་བསྔལ་རང་གྲོལ། འཕགས་པའི་གནས་ཀྱི་གསོལ་འདེབས་ཚངས་པའི་མགྲིན་གླུ། རྩང་གི་ཐང་འབེའི་གནས་བསྟོད་ལྷའི་གནྜེ། གསང་སྔགས་གླིང་པའི་བསྔགས་བརྗོད་ཚིགས་བཅད་སུམ་ཅུའི་ཕྲེང་བ། དབྱི་དགོན་དབྱར་གནས་ཀྱི་ཚུལ་རྩོམ། བྱིན་རླབས་དད་རྟེན་དམ་རྫས་ཆོས་སྨན་གྱི་དཀར་ཆག གསལ་བྱེད་དབང་པོའི་སྒྲིབ་སེལ་ཡེ་ཤེས་ལྷ་ཡི་ཟླ་བ། རིག་གྲོལ་ལ་གདམས་པའི་ཀ་རྩོམ། པདྨ་ཚེ་དབང་ལ་ཕུལ་བའི་ཀ་རྩོམ། རྒྱལ་མཚན་རྩེ་མོ་བསྡུས་པ། གསང་སྔགས་སྤྱོད་པ་ལམ་སློང་། གསོལ་འདེབས་གཅིག་ཆོག་རྒྱལ་པོ་བྱིན་རླབས་མྱུར་འགུགས། ཡོངས་འཛིན་བླ་མ་དགེ་བའི་བཤེས་གཉེན་རྣམས་ལ་གསོལ་བ་འདེབས་པའི་ཚིག་བྱིན་རླབས་འགུགས་པའི་ལྕགས་ཀྱུ། ཆ་མདའ་རབ་བློའི་ཞབས་བརྟན་གསོལ་འདེབས་མི་ཤིགས་ཐིག་ལེ། མཚམས་ཐོ་འབྲི་ཚུལ། ཕྱོགས་བཅུའི་མུན་པ་སེལ་བྱེད། བར་ཆད་སེལ་བའི་གསོལ་འདེབས་སྨོན་ལམ། དཔལ་རི་པདྨ་འོད་དུ་གྲོལ་བའི་སྨོན་ལམ་འོད་གསལ་གསང་བའི་ཐོལ་གླུ། དྲང་སྲོང་བདེན་ཚིག་སྨོན་ལམ། བདག་སོ་སྐྱེས་བྱིས་པས་ཡིད་ལ་བསམ་པ་ཚིག་བཅད་དུ་བསྒྱུར་བ། བསྔོ་བ་མི་ཟད་ལམ་མཆོག བསྟན་པ་རྒྱས་བྱེད་ཀྱི་སྨོན་ལམ་བདེན་ཚིག་གྲུབ་པ་ཧོར་བླས་མཛད་པ་ལ་དྲ་ཡའི་མིང་གིས་ཁ་བསྐང་བ་བཅས། ཁྱོན་ཆོས་ཚན་བརྒྱད་ཅུ་གྱ་གསུམ་བཞུགས་སོ། །
སྨིན་གྲོལ་མན་ངག་གི་བླ་མ་བརྒྱུད་པའི་རིམ་པ་བསྟན་པ།
༈ གསུམ་པ་སྨིན་གྲོལ་མན་ངག་གི་བླ་མ་བརྒྱུད་པའི་རིམ་པ་ནི། གཏེར་སྟོན་ཆེན་པོ་ཉིད་ཀྱི་ཐུགས་སྲས་ཆོས་བདག་པདྨ་གསལ་སྟོང་ངམ་ཡོངས་གྲགས་རས་པ་གསལ་སྟོབས་སུ་འབོད་པས་མཛད་པའི་གསན་ཡིག་ཏུ་བླ་མ་བརྒྱུད་པའི་རིམ་པ་བཀོད་པ་ལྟར་ན། ཆོས་སྐུ་སྣང་བ་མཐའ་ཡས། ལོངས་སྐུ་ཐུགས་རྗེ་ཆེན་པོ། སྤྲུལ་སྐུ་པདྨ་འབྱུང་གནས། མཁའ་འགྲོ་ཡེ་ཤེས་མཚོ་རྒྱལ། མཁར་ཆུ་དཔལ་གྱི་དབང་ཕྱུག །ལོ་ཙཱ་ཡེ་ཤེས་དབྱངས། རིག་འཛིན་ལུང་རིག་གླིང་པ། སྤྲུལ་པའི་སྐུ་ས་ར་ཧི་ཏ་ཞེས་ཡོངས་འཛིན་དམ་པ་གང་དེའི་ཐུགས་བསྐྱེད་སྐྱ་རེངས་ཀྱི་བདུད་རྩིའི་ཆབ་ཀྱིས་དབང་ལུང་བདག་ཅག་རྣམས་ལ་གནང་། ཞེས་གསུངས་པ་ལྟར་དང་། ཆོས་བདག་པདྨ་གསལ་སྟོང་གིས་རིགས་སྲས་གཡུ་རོང་བླ་མ་བཀྲ་ཤིས་བསྟན་འཛིན་ལ་གནང་། དེས་བསྟན་པ་ཡང་དར་གྱི་སྐབས་ཆུ་དབར་ཏཱ་རེའི་གནས་སུ་ཧོར་བླ་གཞན་ཕན་པའི་རྣམ་སྤྲུལ་སྟོབས་ལྡན་རྟ་ཁྱུང་རོལ་པའི་རྡོ་རྗེ་ལ་དབང་ལུང་ཡོངས་རྫོགས་བསྩལ། མཆོག་སྤྲུལ་རྟ་ཁྱུང་རིན་པོ་ཆེས་རིམ་པ་བཞིན་ཆུ་དབར་ཏཱ་རེའི་གནས་དང་། ཡ་ཆེན་ཨོ་རྒྱན་བསམ་གཏན་ཆོས་གླིང་། གཡུ་མཁར་ཐེག་ཆེན་ཆོས་འཁོར་གླིང་། གཡུ་རོང་བསྐོས་ལེགས་དགོན་ཚོགས་གཉིས་གོང་འཕེལ་གླིང་རྣམས་སུ་འདུས་པའི་སྡེ་དུ་མར་གཏེར་ཆོས་ཡོངས་རྫོགས་ཀྱི་དབང་ལུང་མན་ངག་ལན་གྲངས་བཞི་ལ་སྤེལ་བར་མཛད་དོ།།
པར་དུ་བསྐྲུན་པའི་ཕན་ཡོན་བརྗོད་པ།
༈ བཞི་པ་པར་དུ་བསྐྲུན་པའི་ཕན་ཡོན་བརྗོད་པས་མཇུག་བསྡུ་བ་ནི། རྒྱལ་དབང་མཁའ་ཁྱབ་རྡོ་རྗེས། སྙིགས་མའི་ཡང་མཐའ་འདིར་དམ་པའི་ཆོས་ཡོངས་སུ་འཛིན་པ་ནི་རྒྱལ་བ་དགྱེས་པའི་མཆོད་པ་མཆོག་དང་། འགྲོ་ཁམས་ཡོངས་ལ་སྨན་པའི་རྩ་བ་དེ་ལས་ཆེ་ཞིང་ཁྱད་པར་འཕགས་པ་གཞན་མ་དམིགས་ཤིང་། དེ་ཡང་ལུང་རྟོགས་ཀྱི་བསྟན་པ་རིན་པོ་ཆེ་ནི་འཆད་ཉན་སྒོམ་སྒྲུབ་ཀྱི་སྒོ་ནས་འཛིན་པ་ཡིན་མོད་ཀྱང་། འདིར་འདུས་བྱས་ཀྱི་དགེ་བའི་རྩ་བ་གསུང་རབ་རིན་པོ་ཆེ་གཅིག་ལས་དུ་མར་འཇོ་བའི་སྤར་དུ་བཞེངས་པ་འདི་ནི་དགོས་པ་མཆོག་དང་ལྡན་ཏེ། རང་རེ་རྣམས་ཀྱི་གཉེར་བྱའི་མཐར་ཐུག་ནི་རྫོགས་པའི་སངས་རྒྱས་ཀྱི་གོ་འཕང་ཡིན་ལ། དེ་ཉིད་སྒྲུབ་པའི་ཐབས་ནི་ལུང་དང་རྟོགས་པའི་རང་བཞིན་ཅན་གྱི་དམ་པའི་ཆོས་སྒྲུབ་པ་ཁོ་ན་ལ་རགས་ལས་ཤིང་། དེའང་ཡི་གེའི་ཕྱི་མོ་ཉིད་ལ་གནས་པ་དང་། གསུང་རབ་ལ་ཐོས་བསམ་བགྱི་བ་དང་། ཡི་གེར་འབྲི་བ། གླེགས་བམ་སྦྱིན་པ་སོགས་ཀྱང་དམ་པའི་ཆོས་ཡོངས་སུ་བཟུང་བར་འགྱུར་ཞིང་། གསུང་རྡོ་རྗེ་གཟུགས་བརྙན་དུ་འཕོས་པའི་ཡི་གེའི་འབྲུ་རེ་རེའང་བདེ་བར་གཤེགས་པའི་དཀྱིལ་འཁོར་གྱི་འཁོར་ལོ་ཇི་སྙེད་པ་རྣམས་ཡོངས་སུ་རྫོགས་པའི་བདག་ཉིད་ཅན་ཡིན་པས། དེ་ཉིད་བསྐྲུན་པ་ནི་གཟུགས་སྐུ་བཞེངས་པའི་མཆོག་ཏུ་འགྱུར་བ་དང་། གླེགས་བམ་ཡི་གེར་འབྲི་བ་ལས་ཀྱང་སྤར་དུ་བཞེངས་པ་ནི་སྒོ་དུ་མ་ནས་ཁྱད་དུ་འཕགས་པ་དངོས་སྟོབས་ཀྱི་རིག་པས་འགྲུབ་ལ། ཞེས་གསུངས་པ་ལྟར། རྒྱལ་དབང་ཨོ་རྒྱན་ཆེན་པོས་གསང་སྔགས་ཀྱི་རྒྱུད་སྡེ་རྣམས་ཀྱི་དགོངས་པའི་ཡང་ཞུན་བཅུད་དུ་དྲིལ་ནས་རྗེ་འབངས་སྙིང་གི་བུ་མཆོག་རྣམས་ལ་སྨོན་ལམ་གྱི་གཏད་རྒྱ་དང་བཅས་ཏེ་སྙིགས་མའི་རྒུད་པ་འཇོམས་པའི་ཕྱིར་གཏེར་དུ་སྦས་པའི་ཟབ་ཆོས་བླ་ན་མེད་པ་རྣམས་རྟེན་འབྲེལ་དུས་སུ་སྨིན་པའི་ཚེ་ངོ་མཚར་སྤྲུལ་པའི་གཏེར་སྟོན་རྣམས་ཀྱིས་གཏེར་ནས་སྤྱན་དྲངས་པའི་དུས་བབས་ཀྱི་ཟབ་ཆོས། རྒྱུད་ལུང་མན་ངག་གི་བཅུད་ཕུར། བསྐྱེད་རྫོགས་རྫོགས་ཆེན་གྱི་གནད་གསང་། ཡེ་ཤེས་མཁའ་འགྲོའི་སྙིང་ཁྲག་དྭངས་མ་འདི་དག་འཇིག་རྟེན་གྱི་ཁམས་སུ་དར་ཞིང་རྒྱས་ལ་ཡུན་དུ་གནས་པའི་སླད་དུ་འཐོར་བ་བསྡུས་ཤིང་གླེགས་བམ་དུ་བསྐྲུན་ནས་ཕྱོགས་སུ་སྤེལ་བའི་མཛད་པ་ནི་རྒྱལ་བ་དགྱེས་པའི་མཆོད་སྤྲིན། བསྟན་ལ་བྱ་བ་བྱས་ཤིང་བླ་མའི་སྲི་ཞུ་བསྒྲུབ་པ་བླ་ན་མེད་པ་ཡིན་ཏེ། དེ་བཞིན་གཤེགས་པའི་སྙིང་པོ་ཞེས་བྱ་བའི་མདོ་ལས། ཀུན་དགའ་བོ་བྱང་ཆུབ་སེམས་དཔའ་གང་ཆོས་ཀྱི་རྣམ་གྲངས་འདི་འཆང་བ་དང་། ཀློག་པ་དང་། གཞན་དག་ལའང་རྒྱ་ཆེར་ཡང་དག་པར་རབ་ཏུ་སྟོན་པ་དང་། གླེགས་བམ་དུ་བྱས་ཏེ་འཆང་བ་དེས་འདི་སྙམ་དུ། བདག་གིས་དེང་ཉིད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ་སྙམ་དུ་སེམས་བསྐྱེད་པར་བྱའོ་ཞེས་དང་། ནམ་མཁའི་མཐའ་དང་མཉམ་པའི་རྒྱུད་ལས། རིན་ཆེན་སྣ་བདུན་ལ་སོགས་པས། །རྒྱལ་བ་ཀུན་གྱི་རང་བཞིན་ཅན། །མ་ལུས་བསྡུས་པའི་ངོ་བོ་ཉིད། །སྐུ་གསུང་ཐུགས་ཉིད་བྲིས་པ་ཡིན། །ཞེས་དང་། གུ་རུའི་ཞལ་གདམས་སྙིང་བྱང་ཡིད་བཞིན་ནོར་བུ་ལས། གླེགས་བམ་ཙམ་ཞིག་བཞུགས་པ་ཡི༔ ས་ཕྱོགས་དེ་དག་ཐམས་ཅད་ཀྱང༔ རྡོ་རྗེའི་འོག་མིན་ཉིད་དང་མཚུངས༔ སངས་རྒྱས་བྱང་ཆུབ་སེམས་དཔའ་དང༔ རིག་འཛིན་བརྒྱུད་པས་བྱིན་གྱིས་རློབས༔ དཔའ་བོ་དྷཱ་ཀི་སྤྲིན་བཞིན་འདུ༔ ཆོས་སྐྱོང་སྲུང་མས་བྲན་ལྟར་བྱེད༔ ཞེས་སོགས་མདོ་རྒྱུད་རྣམས་ནས་ཕན་ཡོན་རྒྱ་ཆེར་གསུངས་པ་ལྟར་འཆད་ཉན་སྒོམ་སྒྲུབ་ཀྱི་སྒོ་ནས་རྒྱལ་བའི་བསྟན་ལ་བྱ་བ་བྱེད་པ་ལྟ་ཅི། བཀའ་གཏེར་གསུང་རབ་རྣམས་ཀྱི་ཕྱི་མོ་དང་། དེ་ཉིད་གཅིག་ལས་དུ་མར་འཕྲུལ་བའི་གླེགས་བམ་རྣམས་གང་དང་གང་དུ་བཞུགས་པ་དེ་དང་དེར་མི་མཐུན་པའི་ཕྱོགས་ཀུན་ཞི་ཞིང་སྲིད་དང་ཞི་བའི་ལེགས་ཚོགས་ཐམས་ཅད་རང་བཞིན་འདུ་བར་འགྱུར་བར་གསུངས་པའི་ཕྱིར་ན་བསོད་ནམས་ཚད་མེད་པ་བསགས་པ་ཡིན་ནོ།། སླར་སྨྲས་པ། དེ་ལྟར་བསམ་གཏན་ཡེ་ཤེས་གླིང་པ་ཡི། །དགོངས་གཏེར་ས་གཏེར་དག་སྣང་གིས་མཚོན་པའི། །བཀའ་འབུམ་ཕྱོགས་བསྒྲིགས་མ་ཕྱི་གསར་བཞེངས་ནས། །གཅིག་ལས་དུ་མར་བསྐྲུན་འདི་ངོ་མཚར་རྨད། །འདིར་འབད་རྣམ་པར་དཀར་བའི་དགེ་བས་མཚོན། །དུས་གསུམ་བསགས་པའི་ལེགས་བྱས་དལ་འགྲོའི་རྒྱུན། །དམིགས་བྲལ་འཁོར་གསུམ་དག་པའི་རྒྱས་གདབ་ནས། །ཆོས་དབྱིངས་གདོད་མའི་རྒྱ་མཚོར་ཀུན་ནས་བསྡོམས། །ཟབ་ཆོས་འདི་ཉིད་དར་ཞིང་རྒྱས་པའི་མཐུས། །རྒྱལ་བསྟན་དར་རྒྱས་བསྟན་འཛིན་ཞབས་པད་བརྟན། །སྐྱེ་དགུ་བདེ་ཞིང་ནད་མུག་མཚོན་འཁྲུག་ཞི། །རྫོགས་ལྡན་གསར་བའི་དགའ་སྟོན་མངོན་གྱུར་ཅིག །བརྒྱུད་གསུམ་བླ་མའི་བྱིན་རླབས་སྤྲིན་ཕུང་འཁྲིགས། །ཡི་དམ་ཌཱཀྐིས་དངོས་གྲུབ་སྦྲང་ཆར་འབེབས། །ཆོས་སྐྱོང་སྲུང་མས་ཐོགས་མེད་ཕྲིན་ལས་བསྒྲུབ། །ཟབ་གཏེར་བསྟན་པ་དར་ཞིང་རྒྱས་གྱུར་ཅིག །ཞེས་དཀར་ཆག་ནོར་བུའི་ཕྲེང་བ་ཞེས་བྱ་བ་འདི་ནི་གཏེར་ཆོས་པར་སྐྲུན་གྱི་ཐུགས་སྟོབས་མངོན་པར་མཐོ་བའི་བླ་མ་བསྟན་པའི་ཉི་མས་དངོས་རྫས་ཀྱི་སྐྱེས་བཅས་ནན་ཏན་ཆེན་པོས་བསྐུལ་བ་ལྟར། གཡུ་ཁོག་ཡི་དམ་རྡོ་རྗེར་འབོད་པས་གཏེར་ཆོས་ཡོངས་རྫོགས་རྩིས་འཕྲུལ་དུ་ཕབ་བསྡུ་ཞུ་དག་བཅས་གཅིག་ལྕོགས་སུ་བགྱི་བའི་ཞོར་དུ་བྲིས་ནས་ལྕགས་བྱི་མགོ་ཟླ་བའི་ཡར་ཚེས་བདུན། དགུན་ཉི་ལྡོག་གི་དུས་ཆེན་ཉིན་མཇུག་གྲུབ་པར་བགྱིས་པ་ཤིན་ཏུ་དགེ་ཞིང་བཀྲ་ཤིས་པར་གྱུར་ཅིག ། དགེའོ།། དགེའོ༎ དགེའོ༎