ཨོ་རྒྱན་ཆེན་པོའི་རྣམ་ཐར་བསྡུས་པ་ངོ་མཚར་སྤྲིན་གྱི་རོལ་མོ།
བཀའ་འདུས་ཆོས་ཀྱི་རྒྱ་མཚོ་ལས། ཨོ་རྒྱན་ཆེན་པོའི་རྣམ་ཐར་བསྡུས་པ་ངོ་མཚར་སྤྲིན་གྱི་རོལ་མོ་ཞེས་བྱ་བ་བཞུགས་སོ།
ཨེ་མ་ཧོཿ ངོ་བོ་བློ་འདས་འོད་གསལ་ཆོས་སྐུའི་དབྱིངས། །རང་བཞིན་ལྷུན་གྲུབ་ལྔ་ལྡན་ལོངས་སྤྱོད་རྫོགས། །ཐུགས་རྗེ་གང་འདུལ་རྨད་བྱུང་སྤྲུལ་པའི་སྐུ། །རིག་འདུས་པད་འབྱུང་ཡབ་ཡུམ་སྐུ་ལ་འདུད། །དེ་ཡང་རྒྱལ་བ་གཉིས་པ་པད་འབྱུང་གི། མཛད་ཚུལ་རྣམ་གྲངས་ཅུང་ཞིག་བརྗོད་པ་ནི། །སྔོན་ཚེ་སྒྲོན་མའི་བསྐལ་པའི་སྐབས་ཤིག་ཏུ། །སངས་རྒྱས་ཀུན་གྱི་ཐུགས་རྗེའི་འོད་ཟེར་ལས། །སྤྲུལ་པའི་འགྲོ་མགོན་དཔལ་ལྡན་པདྨ་སྐྱེས། །གང་དེའི་ཡེ་ཤེས་གཟིགས་པ་རྣམ་པ་ལྔས། །ལྷོ་ནུབ་འོ་མའི་མཚོ་གླིང་འཇོག་པོ་ཡི། །ཁང་སྟེང་ནོར་བུ་འབར་བའི་ཏོག་རྩེ་མོར། །རང་བྱུང་པདྨའི་སྡོང་པོར་ལྷུམས་ཞུགས་མཛད། །མངལ་གྱི་དྲི་མས་མ་གོས་མཚན་དཔེའི་སྐུ། །རིག་པ་ཐོལ་སྐྱེས་ཚུལ་དུ་བལྟམས་པ་ཉིད། །ལས་ཅན་རྒྱལ་པོའི་བསོད་ནམས་མཐུ་ལས་ཐོབ། །རྒྱལ་སྲས་ཚུལ་བཟུང་གཞོན་ནུའི་རོལ་རྩེད་མཛད། །དེ་ནས་རྒྱལ་སྲིད་ཐབས་ཀྱིས་སྤངས་ནས་སུ། །རབ་ཏུ་བྱུང་ནས་དུར་ཁྲོད་བརྒྱད་དུ་གཤེགས། །དཀའ་བ་སྤྱད་མཛད་རིག་འཛིན་དགོངས་བཅུད་བླངས། །མདོ་རྒྱུད་ཐེག་པ་བསམ་འདས་སྐྱོང་ཚུལ་བསྟན། །ལྟ་ལོག་མུ་སྟེགས་བདུད་ཚོགས་ཐབས་ཀྱིས་བཏུལ། །མི་མཇེད་འཛམ་གླིང་རྡོ་རྗེ་གདན་དབུས་སུ། །སྨོན་ལམ་སྟོབས་ཀྱིས་མངོན་པར་བྱང་ཆུབ་མཛད། །གང་ལ་གང་འདུལ་ཆོས་འཁོར་དཔག་མེད་བསྐོར། །སངས་རྒྱས་བསྟན་པ་མི་ནུབ་གསལ་བར་མཛད། །བསྟན་པའི་རྒྱུན་སྤེལ་འགྲོ་དོན་མི་ཉམས་ཕྱིར། །ཟབ་མོ་དོན་གྱི་གཏེར་ཁ་མང་དུ་སྦས། །དེ་ནས་བོད་ཀྱི་འགྲོ་དོན་མཛད་ཚུལ་ནི། །འཇམ་དབྱངས་སྤྲུལ་པ་མངའ་བདག་ཁྲི་སྲོང་རྗེས། །ཞིང་འདིར་བསྟན་པ་སྤེལ་བའི་ཐུགས་འདུན་གྱིས། །གདན་འདྲེན་བཏང་བས་སྔོན་སྨོན་མཐུ་བཙན་པས། །རྒྱལ་པོའི་དབུ་ཡི་མཆོད་གནས་སྐལ་བར་ཐོབ། །རྒྱ་གར་བོད་ཡུལ་གཉིས་ཀྱི་ས་མཚམས་སུ། །བསྟན་མ་བཅུ་གཉིས་ལ་སོགས་དམ་ལ་བཏགས། །ཡ་མཚན་བསམ་མི་ཁྱབ་པའི་རྫུ་འཕྲུལ་གྱིས། །བསམ་ཡས་ལྷུན་གྱིས་གྲུབ་པའི་གཙུག་ལག་གི། ས་འདུལ་མཛད་ཅིང་བོད་ཡུལ་འདིར་གནས་པའི། །ལྷ་སྲིན་སྡེ་བརྒྱད་དྲེགས་པ་ཅན་རྣམས་བཏུལ། །དེ་ཚེ་ལྷ་འདྲེ་མ་ལུས་དབང་བསྡུས་ནས། །མཐུན་རྐྱེན་གང་དགོངས་ཚེགས་མེད་འགྲུབ་པ་དང་། །མངའ་གསོལ་རབ་ཏུ་གནས་ཤིང་མཐར་ཕྱིན་ནས། །བཻ་རོའི་གཙོ་བྱས་བོད་ཕྲུག་མང་པོ་ལ། །ལོ་ཙཱ་བསླབས་ཏེ་འཕགས་ཡུལ་དབུས་སུ་བཏང་། །གསུང་རྟེན་དམ་ཆོས་མ་ལུས་བོད་དུ་བསྒྱུར། །ཟ་ཧོར་མཁན་པོ་བོ་དྷི་ས་ཏྭ་ཡིས། །བསྟན་པའི་གཞི་མ་འདུལ་བའི་སྲོལ་བཟུང་སྟེ། །སད་མི་མི་བདུན་ལ་སོགས་རབ་ཏུ་བྱུང་། །སོ་བྱང་གཉིས་ཀྱི་ཆོས་གསུང་མང་དུ་བཤད། །ཐམས་ཅད་མཁྱེན་པ་པདྨ་ཀཱ་ར་ཡིས། །སྔགས་ཀྱི་སྲོལ་བཟུང་བླ་མེད་ཆོས་འཁོར་བསྐོར། །ཞི་རྒྱས་དབང་དྲག་ཕྲིན་ལས་རྣམ་པ་བཞིས། །ལོག་པ་བདུད་ཀྱི་བསྟན་པ་བསྣུབ་པར་མཛད། །ཏ་ན་ག་ཎའི་དགོངས་སྤྱོད་རླབས་ཆེན་གྱིས། །སྐྱེ་བོ་མུ་སྟེགས་ཅན་རྣམས་ཚར་བཅད་ནས། །དམ་ཆོས་མི་ནུབ་བསྟན་པའི་ཆེ་བ་མཛད། །དུས་གསུམ་མཁྱེན་དང་བསྟན་པ་གསོ་བའི་ཕྱིར། །གཏེར་ཆེན་གཏེར་ཕྲན་བྱེ་བ་ས་ཡ་སྦས། །མཐའ་དམག་དམ་སྲི་འགོང་པོ་ཚར་གཅོད་ཕྱིར། །བསྲེགས་མནན་འཕངས་གསུམ་བསྟན་ཞབས་གཏེར་སྐྱོང་མཛད། །འགྲོ་དྲུག་གང་ལ་གང་འདུལ་དོན་མཛད་ཕྱིར། །སྤྲུལ་པའི་སྐུ་མཆོག་རིགས་ལྔ་དྲག་པོ་རྩལ། །མཚན་བརྒྱད་གུ་རུ་དྲུག་དང་དེ་ལས་ཀྱང་། །འཕྲུལ་མཚན་ཉི་ཤུ་པད་འབྱུང་བྱེ་བ་སོགས། །བསམ་ཡས་སྒྱུ་འཕྲུལ་དྲྭ་བའི་བདག་ཉིད་ལ། །ཕལ་པའི་བློ་ཡིས་བརྗོད་མཐར་ཐུག་མ་ཡིན། །གཞན་ཡང་གངས་རིའི་ལྗོངས་འདིར་ཁྱད་པར་དུ། །སྒྲུབ་པའི་གནས་ཆེན་རྣམས་ལ་ཡང་དབེན་མཛད། །མཚོ་དང་གངས་བྲག་མང་པོར་ཕྱག་ཞབས་ཀྱི། །རྗེས་སོགས་མངོན་གྱུར་དང་ནི་ལྐོག་གྱུར་དུ། །ངོ་མཚར་སྐུ་ཚབ་མང་བཞག་བྱིན་གྱིས་བརླབས། །བོད་ཀྱི་རྒྱལ་ཁབ་ཐམས་ཅད་བདེ་ལ་བཀོད། །རྗེ་ཡི་དགོངས་པ་ལྷག་མེད་འགྲུབ་པའི་ཚེ། །སྐུ་ཚེ་དཔག་མེད་རྟེན་འབྲེལ་ཡོད་མོད་ཀྱང་། །གཡོན་ཅན་འཕྲུལ་གྱིས་སྐུ་ཚེ་རྟེན་འབྲེལ་ནུབ། །དེ་ཚེ་ལྷ་སྲས་མུ་ཁྲི་བཙད་པོ་ཡིས། །རྒྱལ་སྲིད་བཟུང་ནས་ལོ་གྲངས་བཅུ་གསུམ་བར། །སློབ་དཔོན་ཆེན་པོ་དང་ནི་ལྷན་ཅིག་པར། །ཡབ་སྲས་བཞིན་དུ་དབང་ཆོས་མང་དུ་གསུངས། །མཐར་ནི་སྲིན་པོ་འདུལ་བའི་དགོངས་པ་ཡིས། །གཤེགས་པར་ཆས་དེ་གུང་ཐང་ལ་ཐོག་བར། །རྗེ་འབངས་སེར་སྐྱ་ཀུན་གྱིས་སྐྱེལ་ཐུང་བྱས། །ལྷ་སྲས་ཉིད་ནས་ཡིད་བཞིན་དབང་རྒྱལ་གཙོས། །ནོར་སྣ་ཁྱད་འཕགས་མང་པོ་ཕུལ་ནས་སུ། །གདུང་བས་སྨྲེ་སྔགས་ཞུ་བ་མང་བྱས་ཀྱང་། །བཤོལ་མ་ཐེབས་པར་ལྷ་སྲས་ཉིད་ལ་ཡང་། །ཐུགས་རྗེས་བརྩེ་བའི་རྣམ་འགྱུར་ངོམ་བཞིན་དུ། །ཞལ་ཆེམས་མང་བཞག་མ་འོངས་ལུང་ཡང་བསྟན། །དད་ལྡན་གང་ཟག་ཕོ་མོ་ཐམས་ཅད་ལ། །རེ་རེ་བཞིན་དུ་གདམས་པ་སྣ་རེ་གནང་། །དེ་མ་ཐག་ཏུ་ནམ་མཁའི་སྤྲིན་གསེབ་ནས། །ཅང་ཤེས་རྟ་སྔོན་རིན་ཆེན་རྒྱན་ལྡན་ཞིག ལྷ་དང་ལྷ་མོ་མང་པོས་ཁྲིད་བྱུང་བར། །བཅིབས་ནས་རྫུ་འཕྲུལ་འགྲོས་ཀྱིས་སྐད་ཅིག་གིས། །བདེན་བྲལ་ཕྱོགས་ཀྱི་མཁའ་ལ་གཤེགས་པར་གྱུར། །དེ་ནས་རི་བོ་གནམ་ལྕགས་འབར་བའི་རྩེར། །ཐོད་མཁར་འབར་བའི་ནང་ཤེད་སྲིན་རྒྱལ་གྱི། །རིག་པ་གནས་སྤར་དེ་ཡི་གསོབ་ཏུ་བཞུགས། །ཐབས་མཁས་མཛད་པས་འཁོར་རྣམས་ཆོས་ལ་བཀོད། །སྲིན་ཡུལ་རྣམ་དག་བདེ་ལྡན་ཞིང་དུ་བསྒྱུར། །མདོར་ན་རྒྱལ་བ་ཀུན་འདུས་པད་འབྱུང་ཉིད། །གདུལ་བྱའི་ཞིང་ཁམས་བྱེ་བ་དཔག་མེད་པར། །འདུལ་བྱེད་སྟོན་པ་དེ་དང་ཚུལ་མཐུན་པའི། །སྤྲུལ་བསྒྱུར་མཐའ་དག་རྩིས་སུ་མི་ལང་ཡང་། །རེ་ཞིག་མི་མཇེད་འཇིག་རྟེན་ཞིང་འདི་རུ། །མཛད་ཚུལ་རྣམ་གྲངས་བཅུ་གཉིས་མདོ་ཙམ་ཞིག། བསྡུས་པ་འདི་ཉིད་དུས་རྣམས་ཐམས་ཅད་དུ། །གང་གི་ལྷག་བསམ་དག་པས་བརྗོད་པ་དང་། །འབྲི་དང་ཀློག་དང་ཉན་དང་ཀུན་ཆུབ་བྱེད། །དེ་དག་ཚེ་ལུས་གཅིག་ལ་རྣམ་དག་ཞིང་། །བདེ་བ་ཅན་གྱི་གནས་སུ་ངེས་པར་འགྲོ། །འདི་ལྟར་མོས་ཤིང་གུས་པས་དུས་དྲུག་ཏུ། །ཁྱེད་ཀྱི་རྣམ་ཐར་ཡིད་ལ་དྲན་བཞིན་པས། །སྙན་འགྱུར་དབྱངས་ཀྱིས་རྩེ་གཅིག་གསོལ་འདེབས་ན། །ཉེ་བར་ཐུགས་རྗེས་དགོངས་ལ་བྱིན་གྱིས་རློབས། །ལམ་འདིར་བརྩོན་པའི་བསོད་ནམས་གང་ཐོབ་པ། །དེ་ཡིས་རང་གཞན་འགྲོ་དྲུག་སེམས་ཅན་རྣམས། །སྡུག་བསྔལ་འཁོར་བའི་མཚོ་ལས་རབ་བསྒྲལ་ནས། །པདྨ་རྒྱལ་པོའི་གོ་འཕང་ལ་གནས་ཤོག། ཅེས་པ་འདི་ཡང་གུ་རུ་པདྨའི་བཀའ་དྲིན་གྱིས་འཚོ་བ་རྨོངས་བརྟུལ་ཛྙཱ་ན་དྭཱི་པའི་མིང་པས་གུ་རུའི་རྣམ་ཐར་གསུམ་གྱི་ཕྱི་མོ་འདི་ཉིད་རང་བྱུང་པདྨ་རྒྱལ་པོའི་གསུང་རྡོ་རྗེ་མི་ཤིགས་པའི་སྒྲ་དབྱངས་འཆུགས་མེད་དུ་ཕབ་པ་ལ་ཡི་གེའི་འདུ་བྱེད་ཌཱཀྐི་མས་བགྱིས་པ་དགེ་ལེགས་འཕེལ། བཀྲ་ཤིས་དཔལ་འབར་འཛམ་གླིང་ཀུན་ཁྱབ་ཤོག །