བླ་སྒྲུབ་དབང་གི་མཚམས་སྦྱོར་བྱིན་རླབས་མྱུར་སྩོལ་དྷེ་ཝ་བཛྲ་གྱིས་བསྒྲིགས་པ།

༄༅། བླ་སྒྲུབ་དབང་གི་མཚམས་སྦྱོར་བྱིན་རླབས་མྱུར་སྩོལ་བཞུགས། ཧཱུྃ། བདེ་གཤེགས་རྒྱལ་བ་རྣམས་ཀྱི་སོགས། ལས་སྔགས་དང་ཡིག་བརྒྱ། དེ་ནས་བགེགས་གཏོར་བྱིན་རླབས་ནི། ལས་སྔགས་དང། རཾ་ཡཾ་ཁཾ། གསུམ། ཨོཾ་ཨཱཿཧཱུྃ། གསུམ། ཨོཾ་སྭ་བྷ་ཝ་སོགས། སྟོང་པ་ཉིད་དུ་གྱུར། སྟོང་པའི་ངང་ལས་བྷྲུཾ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ཨོཾ་ཨཱཿཧཱུྃ་གསུམ་འོད་དུ་ཞུ་བ་ལས་བྱུང་བའི་ལན་ཆགས་བགེགས་ཀྱི་གཏོར་མ་ཁ་ཏོག་དྲི་རོ་ནུས་པ་ཕུན་སུམ་ཚོགས་པ་བདུད་རྩིའི་རྒྱ་མཚོ་ཆེན་པོར་གྱུར། ཨོཾ་ཨཱཿཧཱུྃ། ལན་གསུམ། ཨོཾ་སརྦ་བིགྷྣཾ་ན་མཿསརྦ་སོགས་ལན་གསུམ་དང་། ཨོཾ་སུམ་བྷ་ནི་སོགས་ལན་གསུམ། ཧཱུྃ་ཧྲཱིཿ མ་རིག་གཉིས་སྣང་སོགས། ཀློང་དུ་དེངས༔ ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང་། སངས་རྒྱས་ཀྱི་བཀའ་བདེན་པ་དང་། ཆོས་ཀྱི་བཀའ་བདེན་པ་དང་། དགེ་འདུན་གྱི་བཀའ་བདེན་པ་དང་། གསང་སྔགས་དང་། རིག་སྔགས་དང་། གཟུངས་སྔགས་དང་། སྙིང་པོ་དང་། ཕྱག་རྒྱ་དང་། ཏིང་ངེ་འཛིན་རྣམས་ཀྱི་བཀའ་བདེན་པ་དང་། ཁྱད་པར་དུ་རིགས་འདུས་མ་ཧཱ་གུ་རུའི་དཀྱིལ་འཁོར་གྱི་ལྷ་ཚོགས་རྣམས་ཀྱི་བཀའ་བདེན་པ་དང་། བདེན་པ་ཆེན་པོའི་མཐུ་དང་ནུས་པ་ལ་བརྟེན་ནས། དེང་འདིར་སྐལ་ལྡན་རིག་པ་འཛིན་པ་འདི་རྣམས་ལ་གསང་སྔགས་རྡོ་རྗེ་ཐེག་པའི་ལམ་གྱི་འཇུག་སྒོ་དང་པོ་སྨིན་བྱེད་ཀྱི་དབང་བསྐུར་ཟབ་མོ་བགྱི་བ་ལ་བར་དུ་གཅོད་པའི་འབྱུང་པོ་གདོན་བགེགས་ཀྱི་རིགས་སུ་གྱུར་པ་ཐམས་ཅད་མཆོད་སྦྱིན་གྱི་གཏོར་མ་འདིས་ཚིམ་པར་གྱིས་ལ་སའི་ཕྱོགས་འདིར་མ་གནས་པར་དམིགས་པའི་ཡུལ་གཞན་དུ་དེངས་ཤིག གལ་ཏེ་མི་འགྲོ་ན་ཁྲོ་བོ་ཡེ་ཤེས་ཀྱི་རྡོ་རྗེའི་མེ་རབ་ཏུ་འབར་བ་འདིས་བགེགས་ཁྱེད་རྣམས་ཀྱི་མགོ་བོ་ཚལ་བ་བརྒྱ། ལུས་དུམ་བུ་སྟོང་དུ་གཏུབ་པར་གདོན་མི་ཟའོ། །ཨོཾ་སུམ་བྷ་ནི་སོགས་དྲག་སྔགས་རོལ་མོ་དང་བཅས་པས་བགེགས་བསྐྲད། ཡེ་ཤེས་རང་རྩལ་མེ་དཔུང་སོགས། རཀྵ་བྷྲུཾ་སྭཱ་ཧཱ། ཞེས་བརྗོད་པས་སྟེང་འོག་ཕྱོགས་མཚམས་ཐམས་ཅད་རྡོ་རྗེ་བསྲུང་བའི་གུར་ཁང་ཆེན་པོས་གཏམས་པས་གདོན་བགེགས་ལོག་འདྲེན་འབྱུང་པོ་གང་གིས་ཀྱང་གླགས་མི་རྙེད་པར་གྱུར། ལས་རྡོར་པས་ནས་བཀྲམ། འོ་ནམ་མཁའ་དང་མཉམ་པའི་སེམས་ཅན་ཐམས་ཅད་རྣམ་མཁྱེན་བླ་ན་མེད་པ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ལ་འགོད་པར་བྱ། དེའི་ཆེད་དུ་གསང་སྔགས་རྡོ་རྗེ་ཐེག་པའི་དབང་བསྐུར་ཟབ་མོ་གསན་ནས་ཚུལ་བཞིན་ཉམས་སུ་ལེན་པར་བྱའོ་སྙམ་པའི་བསམ་པ་བཟང་པོ་སྔོན་དུ་བཏང་ནས་ཆོས་ལ་འཇུག་པའི་ཀུན་སློང་དང་ཀུན་སྤྱོད་ཀྱི་རིམ་པ་རྣམས་ཚུལ་བཞིན་བགྱི་བའི་ངང་ནས་ལེགས་པར་གསན་འཚལ། གང་གསན་པར་བྱ་བའི་ཆོས་ལའང་རིང་རྒྱུད་བཀའ་མ། ཉེ་བརྒྱུད་གཏེར་མ། ཟབ་མོ་དག་སྣང་མ་སྟེ་གསུམ་དུ་ཡོད་པ་ལས་འདིར་ནི་ཟབ་མོ་དགོངས་པའི་གཏེར་རོ། དེ་ཡང་རྒྱལ་དབང་པདྨའི་ཐུགས་རྗེས་བསྐུལ་ཏེ་མཁའ་འགྲོའི་གཙོ་མོ་ཛྙཱ་ན་ས་ག་ར་དང་། ཨ་ཙར་ས་ལེ་འོད་སྟངས་དཔྱལ་གཅིག་ཏུ་བཟླུམ་པའི་ཟློས་གར་བསྟན་འགྲོའི་དཔལ་དུ་བྱོན་པ་སྟེ། ཇི་སྐད་དུ། མ་འོངས་སུམ་ཅུ་ཁ་རལ་དུས༔ མདོ་ཁམས་རྒྱལ་མོ་རོང་གི་ཕྱོགས༔ སྙིགས་དུས་སྐྱོབས་པའི་གང་ཟག་ནི༔ མཚོ་རྒྱལ་ཁྱོད་དང་ཨ་ཙར་ཟུང༔ གཅིག་ཏུ་བཟླུམ་པའི་སྤྲུལ་པའི་སྲས༔ བསམ་གཏན་ཡེ་ཤེས་གླིང་པ་ཞེས༔ གར་མཁན་མཁའ་ལྡིང་ལོ་པ་འབྱུང༔ འགྲོ་ཕན་དངོས་སམ་བརྒྱུད་ནས་སྟེར༔ ཞེས་སོགས་འཁྲུལ་མེད་རྡོ་རྗེའི་ལུང་བྱང་དུ་མ་ནས་གསལ་བར་བསྔགས་པའི་སྤྲུལ་པའི་གཏེར་སྟོན་ཆེན་པོ་བསམ་གཏན་ཡེ་ཤེས་གླིང་པའི་གཏེར་བྱོན་ཡང་གསང་མཁའ་འགྲོའི་ཐུགས་ཐིག་ལས་གུ་རུའི་སྒྲུབ་ཐབས་བྱིན་རླབས་ཆར་འབེབས་ཀྱི་ཡང་དག་དོན་གྱི་དབང་མཆོག་བསྐུར་བར་བྱེད་པ་ལ། བདག་གིས་བགྱི་འོས་རྣམས་བླ་མ་དམ་པའི་ཕྱག་ལེན་བཞིན་སྔོན་དུ་སོང་ཟིན་ནས། ད་ཁྱེད་རང་རྣམས་ཀྱི་ངོ་སྐལ་དུ་གྱུར་པ་བླ་མ་དང་དཀྱིལ་འཁོར་གྱི་གཙོ་བོ་ཐ་མི་དད་པའི་དྲུང་དུ་མཎྚལ་འབུལ་བར་མཛོད། མཎྚལ་ཕུལ་མཐར། དེ་ལྟར་མཎྚལ་འབུལ་བའི་རིམ་པ་སོང་ནས་དབང་དངོས་གཞིའི་དོན་དུ་མོས་གུས་གདུང་ཤུགས་དྲག་པོས་ཐལ་མོ་སྦྱར་ཏེ་གསོལ་བ་འདེབས་པ་འདིའི་རྗེས་ཟློས་མཛོད། ཧཱུྃ་ཧྲཱིཿ སངས་རྒྱས་ཀུན་གྱི་སོགས། སྨིན་གྲོལ་སྩོལ༔ དེ་ནས་མདུན་གྱི་ནམ་མཁར་བླ་མ་རྒྱལ་བ་སྲས་དང་བཅས་པ་མངོན་སུམ་བཞིན་བཞུགས་པའི་མོས་པ་རྩེ་གཅིག་པས་དཀོན་མཆོག་གསུམ་ལ་སྐྱབས་སུ་འགྲོ་བ་དང་། བྱང་ཆུབ་ཆེན་པོར་སེམས་བསྐྱེད་པ་འདི་བཞིན་རྗེས་ཟློས་མཛོད། ཨཱཿ མ་བཅོས་རིག་སྟོང་སོགས། སེམས་མཆོག་བསྐྱེད། ལན་གསུམ། དེ་ནས་ཚོགས་བསགས་ཡན་ལག་བདུན་པ་འདི་ཡི་རྗེས་ཟློས་མཛོད། ཧཱུྃ༔ ཆོས་ཉིད་ཀློང་ནས་སོགས། འཁོར་གསུམ་དག་པས་བསྔོ༔ ལན་གསུམ། དེ་ནས་བྱིན་རླབས་ཐམས་ཅད་ཀྱི་གཞི་ཡེ་ཤེས་དབབ་པའི་སླད་དུ་དམིགས་པ་འདི་བཞིན་དུ་མཛོད་ཅིག ཨོཾ་མ་ཧཱ་ཤུ་ནྱ་ཏ་སོགས་ཀོ྅་ཧཾ། སྟོང་པའི་ངང་ལས་པདྨ་ཉི་ཟླ་བརྩེགས་པའི་སྟེང་དུ་ཁྱེད་རང་རྣམས་ཀྱི་རིག་པ་ཆུ་ལས་ཉ་ལྡང་བའི་ཚུལ་དུ་སྐད་ཅིག་གིས་རྩ་གསུམ་ཀུན་འདུས་པདྨ་ཐོད་ཕྲེང་རྩལ་སྐུ་མདོག་དཀར་ལ་དམར་བའི་མདངས་ཆགས་པ་མཚན་དང་དཔེ་བྱད་ཡོངས་སུ་རྫོགས་པ། ཞལ་གཅིག་ཞི་ཞིང་འཛུམ་པའི་ལང་ཚོའི་དཔལ་ཡོན་རྒྱས་པ། ཕྱག་གཉིས་གཡས་གསེར་གྱི་རྡོ་རྗེ་རྩེ་ལྔ་པ་བསྡིག་པའི་ཚུལ་དུ་འཛིན་པ། གཡོན་པས་མཉམ་བཞག་གི་སྟེང་དུ་ཀ་པཱ་ལ་དུམ་བུ་གཅིག་པ་འཆི་མེད་ཡེ་ཤེས་ཀྱི་བདུད་རྩིས་བཀང་བ་བསྣམས་པ། ཞབས་གཉིས་རྒྱལ་པོ་རོལ་པའི་སྟབས་སུ་བཞུགས་པ། དབུ་ལ་པད་ཞྭ་རྒོད་སྒྲོ་དང་དར་སྣས་སྤྲས་ཤིང་། སྐུ་ལ་གསང་གོས་དང་ཆོས་གོས་ཟ་བེར་གསོལ་བ་གཟི་བརྗིད་དང་ལྡན་པ། དེའི་ཕྱོགས་མཚམས་བརྒྱད་ཀྱི་འཇའ་འོད་གུར་ཁྱིམ་དུ་སྤྲུལ་པའི་གུ་རུ་བརྒྱད་དང་། འཕགས་ཡུལ་རིག་འཛིན་མཆོག་བརྒྱད། རྗེ་འབངས་ཉི་ཤུ་རྩ་ལྔ། རྒྱ་བོད་མཁས་གྲུབ་རྒྱ་མཚོ། མཁའ་འགྲོ་ཆོས་སྐྱོང་སྲུང་མའི་ཚོགས་དང་བཅས་པས་བསྐོར་བར་གསལ་བ་རྣམས་ཀྱི་སྤྱི་བོར་ཨོཾ། མགྲིན་པར་ཨཱ༔ ཐུགས་ཀར་ཧཱུྃ། དེ་ལས་འོད་ཟེར་འཕྲོས་པས་ཟངས་མདོག་དཔལ་གྱི་རི་བོ་པདྨ་འོད་ཀྱི་གཞལ་ཡས་ནས་ཨོ་རྒྱན་གྱི་གུ་རུ་པདྨ་འབྱུང་གནས་ལ་འཁོར་རྒྱལ་བ་རབ་འབྱམས་ཀྱིས་བསྐོར་བ་ཏིལ་གྱི་གོང་བུ་ཁ་ཕྱེ་བ་ལྟར་དཔག་ཏུ་མེད་པ་སྤྱན་དྲངས་ནས་ཁྱེད་རང་རྣམས་ལྷར་གསལ་བ་ལ་སིབ་སིབ་ཐིམ་པའི་མོས་པ་རྩེ་གཅིག་ཏུ་གྱིས་ཤིག ཧཱུྃ་ཧྲཱིཿ བྱིན་ཆེན་ངོ་མཚར་སོགས། ཛ་ཛཿ རོལ་མོ་དབྱངས་དང་བཅས་པས་བྱིན་དབབ། དེ་ལྟར་བྱིན་ཕབ་པའི་ཡེ་ཤེས་པ་རྣམས་ཇི་སྲིད་བྱང་ཆུབ་མ་ཐོབ་ཀྱི་བར་དུ་བརྟན་པར་གྱུར་ཅིག ཨོཾ་སུ་པྲ་ཏིཥྛ་བཛྲ་ཡེ་སྭཱ་ཧཱ། བརྟན་པར་བྱ། དེ་ནས་རྩ་གསུམ་ཀུན་འདུས་རིག་འཛིན་བླ་མའི་སྐུ་གསུང་ཐུགས་ཡོན་ཏན་ཕྲིན་ལས་དང་བཅས་པའི་དབང་བསྐུར་བ་ནི། ཧྲཱིཿ སངས་རྒྱས་ཀུན་གྱི་སོགས། ཨ་ལ་ལ་ཧོ་མ་ཧཱ༔ དེ་ཡན་ཆད་ཀྱིས་གུ་རུའི་བླ་སྒྲུབ་ཀྱི་དབང་བསྐུར་གྲུབ་ནས། ད་ནི་དེའི་རྗེས་འབྲེལ་དུ་དབང་ཐམས་ཅད་ཀྱི་ནང་ནས་ཤིན་ཏུ་ཟབ་པའི་མཐར་ཐུག་པ། ཚིག་དབང་རིན་པོ་ཆེའམ་རིག་པ་རྩལ་གྱི་དབང་བསྐུར་བ་ནི། ཀུན་རྫོབ་རྫས་ཀྱི་དབང་ལ་མི་ལྟོས་པས་དོན་དམ་རིག་པ་རྡོ་རྗེའི་ཚིག་གིས་ངོ་སྤྲོད་པ་ཡིན་པས་དེ་ལྟ་བུའི་དབང་ཟབ་མོ་ཞུ་བའི་ཡོན་དུ་མཎྚལ་འབུལ་བར་མཛོད། མཎྚལ་ཕུལ། དེ་ནས་ཁྱེད་རང་རྣམས་ལུས་གནད་རྡོ་རྗེའི་ཆོས་བདུན་དང་ལྡན་པའི་སྒོ་ནས་སེམས་བཟོ་མེད་གང་ཤར་རང་གྲོལ་དུ་ལྷོད་ལ་ཞོག་ཅིག ཚིག་བདུན་གསོལ་འདེབས་ལན་གསུམ། དེ་ནས་ཌཱ་དྲིལ་དང་བཅས་པས། ན་མོ་བདེ་གཤེགས་སྙིང་པོས་འགྲོ་བ་སོགས། རྒྱལ་བ་འཁོར་བཅས་མ་ལུས་གཤེགས་སུ་གསོལ༔ ཨ་ལ་ལ་ཧོ༔ དེ་ནས་སློབ་དཔོན་གྱིས་ཕྱག་མཉམ་བཞག སྤྱན་གཉིས་སློབ་མའི་གདོང་ལ་གཏད་ནས། ཧྲཱིཿ ངོ་བོ་རིག་སྟོང་སོགས། ཕཊ༔ ཕཊ༔ ཕཊ༔ དེ་ནས་བཀའ་ལུང་རྫོགས་ཕྱིར་གཏེར་ཆོས་ཡོངས་རྫོགས་ཀྱི་གླེགས་བམ་སྤྱི་བོར་བཞག་ནས། ཧོཿ ཆོས་སྐུ་སྣང་བ་མཐའ་ཡས༔ ལོངས་སྐུ་ཕྱག་ན་པདྨོ་སོགས་ནས། དཔལ་ཀུན་ཏུ་བཟང་པོའི་གོ་འཕང་ལ་འགོད་པར་མཛད་དུ་གསོལ༔ ཞེས་ལན་གསུམ། དེ་ནས་མཐའ་རྟེན་སོགས་སྤྱི་ལྟར་རོ། ཞེས་བླ་སྒྲུབ་དབང་གི་མཚམས་སྦྱོར་འདི་ནི་མཆོག་སྤྲུལ་རྟ་ཁྱུང་རིན་པོ་ཆེས་བཀའ་ནན་གནང་བ་ལྡོག་ཏུ་མ་བཟོད་པར་དྷེ་ཝ་བཛྲ་དུ་འབོད་པས་ཆུ་སྦྲུལ་ཧོར་ཟླ་དང་པོའི་ཡར་ཚེས་དགུའི་དགུང་མོ་ཆུ་དབར་སྒྲོལ་མའི་གནས་མདུན་ནས་བསྒྲིགས་པ་དགེ་ལེགས་འཕེལ།