པཎ་ཆེན་བཻ་རོ་ཙ་ནའི་བླ་སྒྲུབ་དངོས་གྲུབ་འདོད་པ་འཇོ་བའི་དགའ་སྟོན།

ཡང་གསང་ཌཱཀྐིའི་ཐུགས་ཐིག་ལས༔ པཎ་ཆེན་བཻ་རོ་ཙ་ནའི་བླ་སྒྲུབ་དངོས་གྲུབ་འདོད་པ་འཇོ་བའི་དགའ་སྟོན་བི་ཛ་ཧ་རཾ༔

དཀྱིལ་འཁོར་བཀོད་ལེགས་རྒྱན་སྤྱི་ལྟར༔ སྐུ་གསུང་ཐུགས་ཀྱི་རྟེན་རྣམས་དང༔ བཻ་རོའི་སྐུ་གཟུགས་བྲིས་འབུར་གང༔ རབ་གནས་བྱིན་ལྡན་བཤམས་པའི་མདུན༔ ཉེར་སྤྱོད་མཆོད་པས་མཐའ་ནས་བསྐོར༔ རང་རྒྱུད་སྔོན་འགྲོས་ཡང་དག་བྱས༔ བདེ་བའི་སྟན་ལ་བག་ཕེབས་ཏེ༔ ཡིད་ཆེས་ཚིག་འདིས་དག་དྲན་རྫོགས༔ ཨེ་མ་ཧོ༔ རང་ཉིད་ཐ་མལ་སྤྱི་བོ་ཡི༔ མདུན་གྱི་ནམ་མཁར་འོད་ལྔའི་ཀློང༔ ཉི་ཟླ་དར་གྱི་ལྷུབ་གདན་སྟེང༔ གསུམ་ལྡན་རྩ་བའི་བླ་མ་ཉིད༔ པཎ་ཆེན་བཻ་རོ་ཙ་ན་ནི༔ སྐུ་མདོག་དཀར་སེར་ལང་ཚོས་མཛེས༔ སྡེ་སྣོད་གསུམ་ཞྭ་རབ་བྱུང་ཆས༔ ཆོས་གོས་རྣམ་གསུམ་ཟ་བེར་ཀླུབ༔ ཕྱག་གཉིས་ཆོས་འཆད་གླེགས་བམ་བསྣམས༔ སྤྱི་གཙུག་རིགས་བདག་འཇམ་པའི་དབྱངས༔ དམར་པོ་རལ་གྲི་པོ་ཏི་བསྣམས༔ ལོངས་སྐུའི་རྒྱན་རྫོགས་མཚན་དཔེ་ལྡན༔ བཻ་རོའི་ཐུགས་དབུས་པད་ཟླའི་སྟེང༔ ཡེ་ཤེས་སེམས་དཔའ་དབྱངས་ཅན་མ༔ སྔོན་མོ་རལ་པོད་ལོངས་སྐུའི་ཆས༔ བཞེངས་སྟབས་སྒེག་བཞད་ཅན་ཐུགས་དབུས༔ རལ་གྲི་ཧྲཱིཿམཚན་མེ་རི་འབར༔ རང་བྱུང་ཡེ་ཤེས་འོད་ལྔ་འཕྲོས༔ མཐའ་མར་རིག་སྔགས་ཕྲེང་བས་བསྐོར༔ འཕགས་མཆོད་སེམས་ཅན་ལས་སྒྲིབ་སྦྱངས༔ མཁས་རྣམས་ཤེས་བྱའི་དཔལ་ཡོན་བསྡུས༔ བློ་གྲོས་སྤོབས་པའི་སྣང་བ་རྒྱས༔ སྟེང་ཕྱོགས་རྩ་བརྒྱུད་བླ་མ་དང༔ བར་དུ་རྒྱུད་སྡེའི་ལྷ་ཚོགས་གསལ༔ འོག་ཏུ་མ་དང་མཁའ་འགྲོས་བསྐོར༔ འདབས་བསྐོར་ཆོས་སྐྱོང་ཁྲོམ་ཚོགས་བཞིན༔ གསལ་བའི་གནས་གསུམ་འབྲུ་གསུམ་གྱིས༔ གནས་གསུམ་བྱིན་རླབས་དབང་བསྐུར་རྫོགས༔ འཁོར་བཅས་སྤྱན་དྲངས་དབྱེར་མེད་བསྟིམ༔ རང་ལུས་རྡུལ་སྙེད་གུས་ཕྱག་འཚལ༔ ཀུན་བཟང་མཆོད་སྤྲིན་རྒྱ་མཚོས་མཆོད༔ སྒོ་གསུམ་མི་དགེ་ཉེས་སྒྲིབ་བཤགས༔ ཐེག་གསུམ་དགེ་ལ་རྗེས་ཡི་རང༔ འགྲོ་དོན་ཤེས་བྱའི་ཆོས་འཁོར་བསྐོར༔ བསྐལ་པ་རྒྱ་མཚོར་བཞུགས་གསོལ་འདེབས༔ དགེ་ཚོགས་འཁོར་གསུམ་དམིགས་མེད་བསྔོ༔ ཀྱཻ༔ རང་སྣང་དོན་གྱི་འོག་མིན་ནས༔ རྗེ་བཙུན་འཇམ་པའི་རྡོ་རྗེ་དང༔ པཎ་ཆེན་རྣམ་སྣང་ལོ་ཙཱ་བ༔ དབྱངས་ཅན་སྤྲུལ་པའི་ལྷ་མོ་བཅས༔ རྩ་གསུམ་སྲུང་མ་གཤེགས་སུ་གསོལ༔ བདག་ཅག་མོས་པའི་བུ་སློབ་ལ༔ བྱིན་གྱིས་བརླབ་ཕྱིར་གཤེགས་སུ་གསོལ༔ གཏི་མུག་མུན་པ་བསལ་བའི་ཕྱིར༔ ཤེས་རབ་སྣང་བས་དབུགས་དབྱུང་མཛོད༔ ལུས་ལ་སྐུ་ཡིས་བྱིན་གྱིས་རློབས༔ ངག་ལ་གསུང་གིས་བྱིན་གྱིས་རློབས༔ སེམས་ལ་ཐུགས་ཀྱིས་བྱིན་གྱིས་རློབས༔ མ་དག་བག་ཆགས་འདུ་ཕུང་ལྔ༔ ཡེ་ཤེས་ལྔ་ཡིས་བྱིན་གྱིས་རློབས༔ གནས་སྐབས་མཐར་ཐུག་མི་མཐུན་རྐྱེན༔ མཐའ་དག་ཞི་ཞིང་བཟློག་པར་མཛོད༔ ཚེ་བསོད་ལུང་རྟོགས་ཡོན་ཏན་ཀུན༔ ཡར་ངོའི་ཟླ་བཞིན་རྒྱས་པར་མཛོད༔ ཁམས་གསུམ་སྲིད་གསུམ་མོས་ཚོགས་ཀུན༔ སྣང་སྲིད་དབང་དུ་འདུ་བར་མཛོད༔ བྱད་ཕུར་རྦོད་གཏོང་གཏད་ཁྲམ་མཁན༔ རྡུལ་དུ་བརླག་པར་མཛད་དུ་གསོལ༔ འདི་ནས་བྱང་ཆུབ་མ་ཐོབ་བར༔ སྐྱིད་སྡུག་ལེགས་ཉེས་ཅི་བྱུང་ཡང༔ གསུམ་ལྡན་བླ་མ་རིན་པོ་ཆེ༔ པཎ་ཆེན་བཻ་རོ་ཙ་ན་དང༔ མཁྱེན་རབ་སྟོང་གསལ་རྩ་གསུམ་མཁྱེན༔ མོས་གུས་སོགས༴ ཨོཾ་ཨཱཿམ་ཧཱ་གུ་རུ་བཻ་རོ་ཙ་ན་མཉྫུ་ཤྲཱི་པྲ་ཛྙཱ་དེ་ཝི་སརྦ་སིདྡྷི་ཕ་ལ་ཧཱུྃ༔ མོས་གུས་དད་པས་ཡང་ཡང་བསྙེན༔ གྲངས་བསྙེན་ཁྲི་ཕྲག་བདུན་ཡིན་ནོ༔ དུས་བསྙེན་ཟླ་བ་གསུམ་དུ་ཤེས༔ མཚན་མའི་བསྙེན་པ་རྟགས་དང་སྦྱར༔ ཨ་ཏི་བཀོད་པའི་རྒྱུད་ལས༔ གང་གིས་བསྐལ་པ་འབུམ་ཕྲག་ཏུ༔ ལྷ་སྐུ་འབུམ་ཕྲག་བསྒོམ་པ་ལས༔ དྲིན་དང་ལྡན་པའི་བླ་མ་ནི༔ སྐད་ཅིག་དྲན་པའི་བསོད་ནམས་ཆེ༔ འདིས་ནི་བྱིན་རླབས་མེ་དཔུང་འབར༔ དངོས་གྲུབ་ཆུ་བོའི་རྒྱུན་བཞིན་འབྱུང༔ ཚེ་འདིར་སྐུ་གསུམ་ལྷུན་གྱིས་འགྲུབ༔ འཕོས་ཚེ་མཁའ་སྤྱོད་བདེ་ཆེན་བསྒྲོད༔ རིག་འཛིན་དམ་པས་དབུགས་དབྱུང་ཞིང༔ ཤེས་བྱའི་ཆོས་དཔལ་ཡོན་ཏན་འབྱུང༔ ས་ཐོབ་སེམས་དཔའི་གྲལ་དུ་འཁོད༔ ཡོན་ཏན་བསམ་གྱིས་མི་ཁྱབ་འཐོབ༔ ས་མ་ཡཱ༔ རྗེས་ལ་དབང་བཞི་བླང་བ་ནི༔ མོས་གུས་ཐུགས་རྒྱུད་འདི་བཞིན་བསྡུས༔ ཀྱཻ་ཀྱཻ་བླ་མ་རིན་པོ་ཆེ༔ པཎ་ཆེན་རྣམ་སྣང་ལོ་ཙཱ་བ༔ མཁྱེན་རབ་དབང་ཕྱུག་འཇམ་པའི་དབྱངས༔ དབྱངས་ཅན་མཚོ་བྱུང་འཕགས་མ་སྒྲོལ༔ རྩ་གསུམ་རྒྱལ་བ་རབ་འབྱམས་ཚོགས༔ བདག་ལ་གསན་ཅིང་དགོངས་སུ་གསོལ༔ སྐྱབས་མགོན་རེ་ས་གཞན་ན་མེད༔ ཐུགས་རྗེས་ཟུངས་ཤིག་འགྲོ་བའི་མགོན༔ ཤེས་བྱའི་ཆོས་ལ་བློ་གྲོས་ཀྱི༔ པདྨའི་སྣང་བ་རབ་ཏུ་རྒྱས༔ བློ་ལྡོག་རྣམ་བཞི་རྒྱུད་ལ་འདྲོང་༔ མི་རྟག་ངེས་ཤེས་སྐྱེ་བར་ཤོག༔ འཇིགས་མེད་གདེངས་ཆེན་ཐོབ་པར་ཤོག༔ འཕོ་མེད་བཙན་ས་ཟིན་པར་ཤོག༔ ཕྱི་མར་ས་ཡི་དབང་ཕྱུག་ཐོབ༔ དོན་གཉིས་ལྷུན་གྱིས་འགྲུབ་པར་ཤོག༔ མཁྱེན་རབ་བླ་མ་བཻ་རོ་རྗེའི༔ སྤྱི་བོའི་ཨོཾ་ལས་འོད་དཀར་འཕྲོས༔ བདག་གི་དཔྲལ་བའི་དཀྱིལ་དུ་ཐིམ༔ བུམ་པའི་དབང་ཐོབ་ལུས་སྒྲིབ་དག༔ སྐུ་ཡི་རྡོ་རྗེ་བསྒོམ་པར་དབང༔ འབྲས་བུ་སྤྲུལ་སྐུའི་གོ་འཕང་ཐོབ༔ མཁྱེན་རབ་བླ་མ་བཻ་རོ་ཡི༔ མགྲིན་པའི་ཨཱཿལས་འོད་དམར་འཕྲོས༔ བདག་གི་མགྲིན་པའི་གནས་སུ་ཞུགས༔ གསང་བའི་དབང་ཐོབ་ངག་སྒྲིབ་དག༔ གསུང་གི་རྡོ་རྗེ་བསྒོམ་པར་དབང༔ འབྲས་བུ་ལོངས་སྐུའི་གོ་འཕང་ཐོབ༔ མཁྱེན་རབ་བླ་མ་བཻ་རོ་ཡི༔ ཐུགས་ཀའི་ཧཱུྃ་ལས་འོད་སྔོན་པོ༔ བདག་གི་སྙིང་གི་དཀྱིལ་དུ་བབ༔ ཤེས་རབ་དབང་ཐོབ་ཡིད་སྒྲིབ་དག༔ ཐུགས་མཆོག་རྡོ་རྗེ་བསྒོམ་པར་དབང༔ འབྲས་བུ་ཆོས་སྐུའི་གོ་འཕང་ཐོབ༔ མཁྱེན་རབ་བླ་མ་བཻ་རོ་ཡི༔ ལྟེ་བའི་དགའ་འཁྱིལ་ཧྲཱིཿལྗང་གི༔ འོད་ལྗང་བདག་གི་ལྟེ་བར་ཐིམ༔ ཚིག་གི་དབང་ཐོབ་ཀུན་གཞི་ཡི༔ སྒྲིབ་དག་རྡོ་རྗེའི་ཆོས་བདུན་ལྡན༔ ངོ་བོ་ཉིད་སྐུའི་གོ་འཕང་ཐོབ༔ བློ་འདས་ཆོས་སྐུའི་རང་ཞལ་བལྟ༔ དགེ་བ་འདི་ཡིས་མྱུར་དུ་བདག༔ ལོ་ཙཱ་རྣམ་སྣང་འགྲུབ་གྱུར་ནས༔ འགྲོ་བ་གཅིག་ཀྱང་མ་ལུས་པ༔ དེ་ཡི་ས་ལ་འགོད་པར་ཤོག༔ དེ་ནས་བཀྲ་ཤིས་ནི༔ ཨེ་མ་ཧོཿ ཤེས་བྱའི་མཁའ་ལ་མཁྱེན་རབ་ཉི་མ་ཤར༔ ཐུགས་རྗེའི་ཟེར་གྱིས་བློ་གྲོས་པད་ཚལ་རྒྱས༔ བསྟན་པའི་སྒྲོན་མེས་འགྲོ་ཁམས་མུན་པ་སེལ༔ པཎ་ཆེན་རྣམ་སྣང་འཁོར་བཅས་བཀྲ་ཤིས་ཤོག༔