བཻ་རོའི་བླ་སྒྲུབ་ཀྱི་ཚོགས།
རྗེས་ལ་ཚོགས་ཀྱི་ལོངས་སྤྱོད་ནི༔ བསོད་ནམས་ཡེ་ཤེས་རྒྱ་མཚོ་སྟེ༔ ཚོགས་གཉིས་ཟུང་འཇུག་སྐུ་གཉིས་ཀྱི༔ གོ་འཕང་ཐོབ་པའི་རྒྱུ་རུ་བསྔོ༔ བྱིན་གྱིས་བརླབས་ཤིང་འདི་སྐད་དོ༔ རཾ་ཡཾ་ཁཾཿ ཨོཾ་ཨཱཿཧཱུྃཿ ཚོགས་རྫས་ཡེ་ཤེས་བདུད་རྩིའི་རྒྱ་མཚོ་གཟུགས་སྒྲ་དྲི་རོ་རེག་བྱ་དྭངས་ཤིང་ཐོགས་པ་མེད་པ་ཟག་པ་མེད་པའི་འདོད་རྒུའི་དཔལ་ཡོན་དུ་གྱུར༔ དེ་ནས་སྤྱན་འདྲེན་པ་ནི༔ ཧཱུྃ༔ སྐུ་གསུམ་རྩ་གསུམ་ངོ་བོ་ཉིད༔ པཎ་ཆེན་རྣམ་སྣང་མཁྱེན་པའི་གཏེར༔ འཇམ་དཔལ་སྟངས་དཔྱལ་སྒྱུ་འཕྲུལ་ལྷ༔ ཚོགས་ཀྱི་འདུ་བར་གཤེགས་སུ་གསོལ༔ ཧཱུྃ༔ ཚོགས་རྗེ་ཚོགས་བདག་བཻ་རོ་རྗེ༔ ཚོགས་རྫས་ཡེ་ཤེས་རོལ་པའི་རྒྱན༔ སྤང་བླང་མེད་པའི་མཆོད་ཕུང་སྤྲིན༔ བླ་མ་སྐུ་གསུམ་ལྷ་ལ་འབུལ༔ སྐུ་ལྔ་མཚན་བརྒྱད་བཻ་རོ་རྗེ༔ རྗེ་འབངས་ལྷ་ཚོགས་ཚོགས་ཀྱིས་བརྔན༔ བསྐང་ངོ་གསོལ་ལོ་མཆོད་པ་འབུལ༔ རྩ་གསུམ་རྒྱལ་བ་རབ་འབྱམས་ཀྱི༔ ཐུགས་དམ་བསྐང་ལ་མཆོག་ཐུན་གྱི༔ དངོས་གྲུབ་དམ་པ་སྩལ་དུ་གསོལ༔ ལྷག་ལ་དབང་བའི་བཀའ་ཉན་ནི༔ ཕོ་རྒྱུད་མོ་རྒྱུད་མ་ནིང་རྒྱུད༔ མ་སྲིང་བསྟན་མ་གིང་ལང་ཀ༔ ལྷག་ལ་དབང་བའི་གཏོར་མ་ལོངས༔ ཆོས་དང་སྲིད་ལ་གནོད་པའི་དགྲ༔ བགེགས་དཔུང་ཐལ་བ་རྡུལ་བཞིན་རློགས༔ བཅོལ་བའི་ལས་ལ་མ་འདའ་ཞིག༔ ཨུ་ཙུཥྚ་བྷ་ཀྵ་བྷ་ཀྵ་ཀ་སྭཱ་ཧཱཿ རྗེས་ལ་ཚོགས་རྫས་དངོས་གྲུབ་རོལ༔ བརྡ་དང་བརྡ་ཡི་སྒོ་ནས་ལེན༔ རྗེས་ལ་སྨོན་ལམ་རྒྱ་ཡིས་ཐོབ༔ ཡང་ན་འདི་བཞིན་འདོན་པས་ཆོག༔ ཧོ༔ ཚོགས་མཆོད་ཡེ་ཤེས་རྒྱ་ཆེན་འདིས༔ བསོད་ནམས་ཚོགས་གཉིས་རབ་རྫོགས་ནས༔ སྐུ་གཉིས་ཟུང་འཇུག་ཐོབ་པར་ཤོག༔ འགྲོ་ཀུན་ཕྱམ་གཅིག་སངས་རྒྱས་གྱུར༔ ཨ་ལ་ལ་ཧོཿ བཛྲ་བཛྲ་བཛྲ༔ ས་མ་ཡཱ༔ ཞེས་འདི་རང་བྱུང་དགོངས་པའི་གཏེར༔ བྱིན་རླབས་དངོས་གྲུབ་ཆུ་རྒྱུན་འབེབས༔ དྲན་ཆོག་ཐང་ཆོག་ཟབ་མོ་འདི༔ རྩ་གསུམ་དགོངས་པའི་ཐུགས་ཀྱི་བཅུད༔ མ་རྒྱུད་མཁའ་འགྲོའི་སྙིང་གི་ཁྲག༔ གཅིག་ཆོག་རྒྱལ་པོ་ཨེ་མ་ཧོ༔ ཨོ་རྒྱན་པདྨའི་ཟབ་གསང་ཆོས༔ སྔོན་སྦྱངས་ལས་འཕྲོ་སད་པའི་བུ༔ སྐལ་ལྡན་སྐྱེས་བུ་གཞན་ལ་ཕན༔ གང་དེས་རྒྱལ་མོ་གཡུ་སྒྲ་ཡི༔ ཟློས་གར་སྤྲུལ་སྐུ་ཆོས་ཀྱི་བདག༔ འགྱུར་མེད་མཚན་འཆང་དེ་ལ་སྤྲོད༔ བསྟན་དང་འགྲོ་བའི་བདེ་སྐྱིད་འབྱུང༔ ཐེ་ཚོམ་མེད་ན་བྱིན་རླབས་མྱུར༔ ལོག་རྟོག་བདུད་དབང་མི་གཡེལ་བར༔ ཡང་ཟབ་འདི་ལ་ནན་ཏན་འབུངས༔ ས་མ་ཡཱ༔ སྐུ་རྒྱ༔ གསུང་རྒྱ༔ ཐུགས་རྒྱ༔ ཤུ་བྷཾ༔