སངས་རྒྱས་སྨན་བླའི་སྒྲུབ་ཐབས་ནད་གདོན་མཐར་བྱེད།

ཡང་གསང་མཁའ་འགྲོའི་ཐུགས་ཐིག་ཆ་ལག་ཏུ༔ སངས་རྒྱས་སྨན་བླའི་སྒྲུབ་ཐབས་ནད་གདོན་མཐར་བྱེད་བཞུགས༔

སངས་རྒྱས་ཀུན་གྱི་བདག་ཉིད་མཆོག༔ ནད་གདོན་སྡུག་བསྔལ་མཐར་བྱེད་ཅིང་༔ འགྲོ་དྲུག་གནས་ནས་འདྲེན་མཛད་པ༔ བདེ་གཤེགས་བརྒྱད་ལ་གུས་ཕྱག་འཚལ༔ དེ་ལ་འདི་ལྟར་སྨན་རྒྱལ་གྱི༔ སྒྲུབ་པ་སྦྱོར་དངོས་རྗེས་དང་གསུམ༔ སྦྱོར་བ་ཡོ་བྱད་ཀྱི་རིམ་པ༔ དཀྱིལ་འཁོར་སྤྱི་མཐུན་ཡང་ན་འབྲུའི༔ ཚོམ་བུ་ལྷ་གྲངས་དང་བསྟུན་ནས༔ གཏོར་མ་དཀར་ཟླུམ་གཙོ་འཁོར་བརྒྱད༔ མཆོད་པ་ཉེར་ལྔས་མཐའ་ནས་བསྐོར༔ རྣལ་འབྱོར་བདེ་བའི་སྟན་ལ་འདུག༔ མདུན་མཁར་མཆོག་གསུམ་སྨན་གྱི་ལྷ༔ དྲང་སྲོང་བདེན་ཚིག་གྲུབ་ཀུན་དམིགས༔ ན་མོ༔ བདག་སོགས་འགྲོ་ཀུན་བྱང་ཆུབ་བར༔ བླ་མ་མཆོག་གསུམ་རྩ་བ་གསུམ༔ སྨན་རྒྱལ་མཆེད་བརྒྱད་ལྷ་ཚོགས་ལ༔ སྐྱབས་སུ་མཆི་འོ་ཐུགས་རྗེས་ཟུང༔ ཧོ༔ བདག་དང་མཁའ་མཉམ་ཡིད་ཅན་འགྲོ༔ རྣམ་མཁྱེན་སངས་རྒྱས་ལ་འགོད་ཕྱིར༔ སྨན་གྱི་བླ་མ་བསྒྲུབ་ནས་ནི༔ ཡང་དག་དོན་ལ་སྦྱོར་བར་བྱ༔ ཨེ་མ་ཧོ༔ ཕྱོགས་བཅུའི་རྒྱལ་བ་སྲས་བཅས་དགོངས༔ མདུན་མཁར་པད་ཟླའི་གདན་ལ་བཞུགས༔ སྒོ་གསུམ་གུས་པས་ཕྱག་མཆོད་འབུལ༔ སྒོ་གསུམ་སྡིག་བཤགས་དགེ་རྗེས་རངས༔ རྟག་པར་བཞུགས་གསོལ་ཆོས་འཁོར་བསྐུལ༔ དགེ་རྩ་བྱང་ཆུབ་ཆེན་པོར་བསྔོ༔ ཡང་དག་བདེ་ཆེན་དོན་རྟོགས་ཤོག༔ དེ་ཡིས་སྦྱོར་བའི་ཆོས་རྣམས་རྫོགས༔ དངོས་གཞི་དྲན་རྫོགས་བསྒོམ་པ་ནི༔ ཨཱ༔ ཆོས་རྣམས་རང་བཞིན་སྤྲོས་དང་བྲལ༔ མ་རྟོགས་འགྲོ་ལ་སྙིང་རྗེའི་གདངས༔ རྩལ་ལས་རང་སེམས་ཧཱུྃ་སྔོན་པོ༔ འོད་འཕྲོས་དོན་གཉིས་བྱས་པ་ལས༔ ཡོངས་གྱུར་བུདྡྷ་བཻ་ཥ་ཛྱེ༔ སྐུ་མདོག་བཻཌཱུརྱ་ཡི་འོད༔ ཞལ་གཅིག་ཕྱག་གཉིས་ཞབས་སྐྱིལ་ཀྲུང༔ ཆོས་གོས་རྣམ་གསུམ་སྐུ་ལ་གསོལ༔ ཕྱག་གཡས་མཆོག་སྦྱིན་རྣམ་རྒྱལ་མཛེས༔ ཕྱག་གཡོན་མཉམ་བཞག་ལྷུང་བཟེད་བསྣམས༔ ཕྱི་རོལ་པད་ཟླའི་གདན་གྱི་སྟེང༔ མཚན་ལེགས་ཤཱཀ་ཐུབ་བདེ་གཤེགས་བདུན༔ ཚངས་པར་སྤྱོད་པའི་ཆ་ལུགས་ཅན༔ མཚན་དཔེའི་གཟི་བྱིན་རབ་འབར་བའི༔ འཁོར་དུ་ལྷ་དང་དྲང་སྲོང་ཀུན༔ མ་འདྲེས་མཁའ་ལ་འཇའ་ཚོན་བཞིན༔ གསལ་བའི་གནས་གསུམ་འབྲུ་གསུམ་ལས༔ འོད་འཕྲོས་ཤར་ཕྱོགས་མངོན་དགའི་ཞིང༔ སྐུ་གསུམ་དག་པའི་ཞིང་ཁམས་ནས༔ བདེ་གཤེགས་སྨན་རྒྱལ་སྲས་དང་བཅས༔ སྤྱན་དྲངས་དམ་ཚིག་པ་ལ་བསྟིམས༔ ཧཱུྃ༔ སྔོན་ཚེ་བསྐལ་པའི་དང་པོ་ལ༔ ཐུགས་བསྐྱེད་སྨོན་ལམ་མཛད་པ་བཞིན༔ བདག་སོགས་ནད་གདོན་བསལ་བ་དང༔ བྱིན་གྱིས་བརླབ་ཕྱིར་གཤེགས་སུ་གསོལ༔ གུ་རུ་བཻ་ཥ་ཛྱེ་བཛྲ་ས་མ་ཡཱ་ཛཿཛ༔ ཧོ༔ སྣང་སྲིད་དག་མཉམ་དཀྱིལ་འཁོར་དུ༔ སྨན་རྒྱལ་འཁོར་དང་བཅས་པ་རྣམས༔ མི་གཡོ་བརྟན་པར་བཞུགས་ནས་ཀྱང༔ ནད་གདོན་མ་ལུས་དག་མཛད་གསོལ༔ ཏིཥྛ་ལྷན༔ ཧོ༔ རང་ཉིད་ལྷ་ལ་ལྷ་ཉིད་རང༔ ཡེ་ནས་འདུ་བྲལ་རིག་པའི་གཤིས༔ ཆུ་ཟླའི་གར་བསྒྱུར་རང་ཤར་ལྷ༔ འཕྲུལ་དགའི་ཚུལ་གྱིས་འདུད་པར་བྱ༔ ཨ་ཏི་པུ་ཧོ༔ པྲ་ཏིཙྪ་ཧོ༔ ཧོ༔ དངོས་སུ་འབྱོར་དང་ཡིད་ཀྱིས་ལེགས་སྤྲུལ་པའི༔ ཉེར་སྤྱོད་ལྔ་དང་སྨན་གཏོར་རཀྟ་དང༔ ཏན་གན་སྦྱོར་སྒྲོལ་ཀུན་བཟང་མཆོད་པའི་སྤྲིན༔ ཡེ་ནས་དག་མཉམ་ཆེན་པོའི་ཀློང་དུ་བཞེས༔ སརྦ་པཱུ་ཙ་ས་མ་ཡཱ་ཨཱཿཧཱུྃ༔ ཧཱུྃ༔ སྐུ་མདོག་བཻ་ཌཱུརྱ་ཡི་རི་བོ་འདྲ༔ ཞལ་གཅིག་ཕྱག་གཉིས་མཆོག་སྦྱིན་མཉམ་བཞག་ཅན༔ ཞབས་གཉིས་སྐྱིལ་ཀྲུང་པད་ཟླའི་གདན་ལ་བཞུགས༔ བཅོམ་ལྡན་སྨན་གྱི་ལྷ་ལ་ཕྱག་འཚལ་བསྟོད༔ བདེ་གཤེགས་བདུན་དང་སེམས་དཔའ་མཆོག་ཟུང་དང༔ ཉེ་སྲས་བརྒྱད་དང་ཉན་ཐོས་ཕྱོགས་སྐྱོང་བཅུ༔ ཚངས་དབང་རྒྱལ་ཆེན་བཞི་དང་དཀར་ཕྱོགས་སྐྱོང༔ དཀྱིལ་འཁོར་ཡོངས་རྫོགས་ལྷ་ལ་ཕྱག་འཚལ་བསྟོད༔ རང་ཉིད་སྨན་གྱི་བླ་མ་ཡི༔ ཐུགས་ཀར་པདྨ་ཟླ་བའི་གདན༔ ཧཱུྃ་ཡིག་རང་མདོག་འོད་འབར་བའི༔ མཐའ་སྐོར་གཟུངས་སྔགས་གཡས་བསྐོར་བའི༔ འོད་ཀྱིས་འཕགས་མཆོད་བྱིན་རླབས་བསྡུས༔ འགྲོ་བའི་སྒྲིབ་སྦྱངས་བདེ་ལ་བཀོད༔ སྡེ་བརྒྱད་དྲེགས་ཚོགས་ཚར་བཅད་ནས༔ བྲན་བཀོལ་ཅི་བསྒོས་ལས་བསྒྲུབ་གྱུར༔ ཅེས་བསམ་གཟུངས་སྔགས་རྣམ་གྲངས་གསུམ༔ དང་པོ་གཟུངས་ཐུང་ཅི་འགྲུབ་བཟླ༔ དེ་ནས་གྷུ་མེ་བདུན་ཕྲག་བདུན༔ སིདྡྷི་བདུན་ཕྲག་བཟླས་པའི་མཐར༔ བདེ་གཤེགས་བདུན་གྱི་མཚན་བརྗོད་ནི༔ བདུན་བདུན་བཞི་བཅུ་ཞེ་དགུ་བསགས༔ དེ་ནས་སྟོན་པའི་མཚན་བརྗོད་བདུན༔ བརྗོད་མཐར་འདོད་གསོལ་འདི་བཞིན་གདབ༔ ཀྱཻ་ཧོ་བཅོམ་ལྡན་བདེ་གཤེགས་བདུན༔ སྔོན་གྱི་ཐུགས་བསྐྱེད་ཞལ་བཞེས་བཞིན༔ བདག་སོགས་འགྲོ་ལ་བྱིན་གྱིས་རློབས༔ མི་འདོད་རྐྱེན་དང་བར་ཆད་བཟློག༔ ཚེ་བསོད་ལོངས་སྤྱོད་འབར་དུ་གསོལ༔ ནད་རིགས་མི་འདོད་ཡོད་དོ་ཅོག༔ མཐའ་དག་ཞི་བར་མཛད་དུ་གསོལ༔ མཐར་ཐུག་བདག་དང་བདག་སོགས་ལ༔ འབྲེལ་ཐོགས་རྣམ་མཁྱེན་སངས་རྒྱས་ཀྱི༔ གོ་འཕང་ས་ལ་དབུགས་དབྱུང་ཤོག༔ དེ་མཐར་མཆོད་བསྟོད་དངོས་གྲུབ་ལེན༔ ནོངས་བཤགས་བསྔོ་སྨོན་བསྡུ་རིམ་དང་༔ ཤིས་པ་བརྗོད་པས་མཐའ་བརྒྱན་བྱ༔ ས་མ་ཡཱ༔ བརྡ་ཐིམ༔ མནྜ་གུ་ཧྱ༔ སྐུ་གསུང་ཐུགས་ཀྱི་རྒྱ་ཡོད་དོ༔ དེ་ལྟར་སྨན་བླའི་སྒྲུབ་ཐབས་འདི༔ ལས་སྐལ་ལྡན་པའི་གང་ཟག་གིས༔ བསྐུལ་ངོར་དབྱིངས་ཀྱི་བརྡ་ལས་བྱུང་༔ འགྲོ་དོན་བསྟན་པ་མཐའ་རྒྱས་ཤོག༔ བཀའ་སྲུང་སྨན་གྱི་ལྷ་མོ་ཡིས༔ དམ་མེད་ལག་ཏུ་ཤོར་ཏ་རེ༔ སྐལ་ལྡན་ཡོངས་ལ་གཏད་དོ་རྒྱ༔ མངྒ་ལཾ༔