གཏེར་གསར་སྨན་བླའི་དབང་གི་ལོ་རྒྱུས་སྐལ་ལྡན་ཡིད་ཀྱི་དགའ་སྟོན་ནགས་རྟ་མདོ་སྡེས་མཛད་པ།

༄༅། གཏེར་གསར་སྨན་བླའི་དབང་གི་ལོ་རྒྱུས་སྐལ་ལྡན་ཡིད་ཀྱི་དགའ་སྟོན་ཞེས་བྱ་བ་བཞུགས་སོ།། འོ། འགྲོ་བ་ནམ་མཁའ་དང་མཉམ་པའི་སེམས་ཅན་ཐམས་ཅད་སངས་རྒྱས་ཀྱི་གོ་འཕང་རིན་པོ་ཆེ་ཚེ་འདི་ཉིད་ལ་འཐོབ་པར་བྱ། དེའི་ཆེད་དུ་སྨིན་བྱེད་ཀྱི་དབང་བསྐུར་ཟབ་མོ་ཞུ་བར་བགྱིའོ་སྙམ་པའི་བྱང་ཆུབ་མཆོག་ཏུ་སེམས་བསྐྱེད་པ་དང་། ཆོས་ཉན་པའི་དུས་ཀྱི་ཀུན་སྤྱོད་སྤང་བླང་གི་རིམ་པ་རྣམས་མདོ་རྒྱུད་རྣམས་ནས་ཇི་ལྟར་གསུངས་པ་བཞིན་བླང་དོར་མ་འཛོལ་བར་བྱས་ནས་ལུས་ངག་ཡིད་གསུམ་དད་གུས་བག་ཡོད་དང་ལྡན་པའི་ངང་ནས་ལེགས་པར་གསན་འཚལ། གང་གསན་པར་བྱ་བའི་ཆོས་ཀྱི་རིམ་པ་བརྗོད་པ་ལའང་། ཐོག་མར་གདམས་ངག་ལ་ཡིད་ཆེས་ཀྱི་ངེས་པ་བསྐྱེད་ཅིང་ཐེ་ཚོམ་གྱི་དྲི་མ་སེལ་བའི་ཕྱིར་ལོ་རྒྱུས་ཅུང་ཟད་བརྗོད་པར་བྱ་དགོས་ཏེ། སློབ་དཔོན་ཆེན་པོས། དང་པོའི་ལས་ཅན་རྗེས་བཟུང་ཕྱིར། །གདམས་ངག་ཟབ་མོའི་བྱུང་ཁུངས་དང་། །ལོ་རྒྱུས་སྤྲོ་དགའི་ཚིག་བརྗོད་ནས། །སློབ་མའི་ཡིད་རབ་དད་པར་བྱ། །ཞེས་གསུངས་པས། དེ་ལའང་རྒྱལ་བ་ཐབས་ལ་མཁས་ཤིང་ཐུགས་རྗེ་ཆེན་པོའི་བདག་ཉིད་ཅན་དེས་གདུལ་བྱ་སེམས་ཅན་རྣམས་ཀྱི་ཁམས་དང་དབང་པོ་བསམ་པའི་ཁྱད་པར་དང་རྗེས་སུ་མཐུན་པའི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གསུངས་པའི་ཚུལ་ནི། ཀུན་བྱེད་ལས། འདོད་ཆགས་འདུལ་བའི་གཉེན་པོར་གསུངས་པ་ནི། །འདུལ་བའི་སྡེ་སྣོད་ཉི་ཁྲི་ཆིག་སྟོང་གསུངས། །ཞེ་སྡང་འདུལ་བའི་གཉེན་པོར་གསུངས་པ་ནི། །མདོ་སྡེའི་སྡེ་སྣོད་ཉི་ཁྲི་ཆིག་སྟོང་གསུངས། །གཏི་མུག་འདུལ་བའི་གཉེན་པོར་གསུངས་པ་ནི། །མངོན་པའི་སྡེ་སྣོད་ཉི་ཁྲི་ཆིག་སྟོང་གསུངས། །དུག་གསུམ་ཆ་མཉམ་འདུལ་བའི་གཉེན་པོ་རུ། །སྡེ་སྣོད་བཞི་པ་ཉི་ཁྲི་ཆིག་སྟོང་གསུངས། །ཞེས་གསུངས་པས་དེ་དག་ཐམས་ཅད་ཀྱང་ལེགས་པར་བསྡུ་ན་རྒྱུ་འབྲས་ཀྱི་ཐེག་པ་གཉིས་སུ་འདུ་ལ། དེ་ཡང་རྒྱུའི་ཐེག་པ་ལས་ཁྱད་པར་དུ་མའི་སྒོ་ནས་འཕགས་པ་གསང་སྔགས་འབྲས་བུའི་ཐེག་པ་ཡིན། དེ་ལ་ཡང་རིང་བརྒྱུད་བཀའ་མ་དང་། ཉེ་བརྒྱུད་གཏེར་མ། ཟབ་མོ་དག་སྣང་མ་སྟེ་གསུམ་དུ་བཞུགས་པ་ལས། སྤྱིར་མདོ་རྒྱུད་ཀྱི་གཞུང་རྣམས་ནས་གསུངས་པའི་སྨན་བླ་བདེ་བར་གཤེགས་པ་བདུན་གྱི་མཆོད་ཆོག་གི་སྐོར་བཀའ་ཐ་མའི་སྡེ་སྣོད་དང་རྗེས་སུ་མཐུན་པ་ལྟར་མཁན་པོ་བྷོ་དྷི་ས་ཏྭས་མཛད་པའི་མདོ་ལུགས་དངོས་བསྟན་དང་། གསང་སྔགས་ཕྱི་པ་རྣལ་འབྱོར་ཡོ་གའི་རྒྱུད་སྡེ་དང་རྗེས་སུ་མཐུན་པ་འཇམ་དཔལ་དང་ཕྱག་རྡོར་ལས་བརྒྱུད་པ་བྱ་སྤྱོད་ཐུན་མོང་གི་བཀའ་གཏེར་སོ་སོའི་ལུགས་དང་། རྒྱ་བོད་ཀྱི་གྲུབ་བརྙེས་རིག་འཛིན་དུ་མའི་ཐུགས་དག་པ་ཡེ་ཤེས་ཆོས་སྐུའི་རང་རྩལ་ལས་ཤར་བའི་དག་སྣང་མ་སོགས་སྨན་བླ་སྤྱི་དང་། བྱེ་བྲག་ཆོས་བཀའ་འདི་ཉིད་ཀྱི་ལོ་རྒྱུས་ནི། ཨོ་རྒྱན་ཆེན་པོས་བསམ་ཡས་སྒྲ་བསྒྱུར་གླིང་དུ་སྒྲུབ་ཐབས་རྒྱ་མཚོ་བསྒྱུར་བའི་དུས་སུ་མཁན་པོ་བྷོ་དྷི་ས་ཏྭ། མཁའ་འགྲོ་ཡེ་ཤེས་མཚོ་རྒྱལ། ཨ་ཙར་ཡེ་ཤེས་དབྱངས་སོགས་སྐལ་བ་ལྡན་པའི་གང་ཟག་རྣམས་ཀྱིས་སློབ་དཔོན་ཆེན་པོ་ལ། ད་རེས་ཆོས་ཀྱི་དགའ་སྟོན་དུ་སངས་རྒྱས་ཀྱི་བཀའ་དང་བླ་མའི་ལུང་གི་ཚད་མ་དང་མཐུན་པའི་བདེ་བར་གཤེགས་པའི་མདོ་ཆོག་སྔགས་བླ་མེད་ཀྱི་ཕྱོགས་མཐུན་གྱི་སྒྲུབ་ཐབས་ཤིག་གསུང་དུ་གསོལ། ཞེས་རིན་པོ་ཆེའི་མཎྜལ་ཕུལ་ནས་ཞུས་པས༔ དུས་གསུམ་མཁྱེན་པ་པདྨ་ཡིས༔ སྐལ་ལྡན་གསུམ་ལ་འདི་སྐད་གསུངས༔ ཀྱཻ་ཧོ་བསྟན་པའི་ས་འཛིན་བསྟན༔ འདུལ་བའི་མངའ་བདག་བྱང་ཆུབ་སེམས༔ བོད་ཡུལ་གཏེར་གྱི་མངའ་བདག་རྗེ༔ བདེ་སྟེར་ཌཱཀྐི་མཚོ་རྒྱལ་མ༔ རྒྱ་བོད་ཆོས་ཀྱི་ཚོང་དུས་འགྲིམ༔ མཚོ་རྒྱལ་ཐབས་མཆོག་ཨ་ཙར་དབྱངས༔ ད་ལྟ་མཁན་སློབ་ཆོས་གསུམ་འཛོམས༔ བསམ་ཡས་མི་འགྱུར་གཙུག་ལག་གྲུབ༔ རྒྱ་བོད་མཁས་གྲུབ་སྐར་ལྟར་འཁྲིགས༔ དམ་ཆོས་བསྟན་པ་འོད་སྟོང་གཟིས༔ འཆད་རྩོད་རྩོམ་པའི་དབྱར་རྔ་ལྡིར༔ དེ་འདྲའི་དུས་བཟང་ཕུན་སུམ་ཚོགས༔ མ་འོངས་སུམ་ཅུ་ཁ་རལ་དུས༔ མདོ་ཁམས་རྒྱལ་མོ་རོང་གི་ཕྱོགས༔ སྙིགས་དུས་སྐྱོབ་པའི་གང་ཟག་ནི༔ མཚོ་རྒྱལ་ཁྱོད་དང་ཨ་ཙར་ཟུང༔ གཅིག་ཏུ་བཟླུམ་པའི་སྤྲུལ་པའི་སྲས༔ བསམ་གཏན་ཡེ་ཤེས་གླིང་པ་ཞེས༔ གར་མཁན་མཁའ་ལྡིང་ལོ་པ་འབྱུང༔ འགྲོ་ཕན་དངོས་སམ་བརྒྱུད་ནས་སྟེར༔ དེ་ལ་ཟབ་གཏེར་སྒོ་ལྔ་དང༔ དག་སྣང་ཆོས་ཚན་རྟེན་འབྲེལ་བཞིན༔ འགྲིགས་ན་ཁྲིགས་སུ་བཅད་པ་མེད༔ ཆོས་འདིར་དབང་བའི་གང་ཟག་ཀྱང༔ རྩ་བ་བཅུ་དང་པད་སྡོང་དགུ༔ ཡན་ལག་བརྒྱད་དང་ལུང་ཟིན་རྣམས༔ ཤ་ཏཾ་ཙམ་ཞིག་འབྱུང་ཡང་སྲིད༔ ཅེས་གསུངས་མཚོ་རྒྱལ་སྟངས་དཔྱལ་གྱིས༔ ཡང་ཞུས་མ་འོངས་སྐྱོབ་པའི་ཆོས༔ ཟབ་པའི་ནང་ནས་ཡང་ཟབ་མཆོག༔ གདམས་པའི་དང་པོ་གང་ཡིན་ཞུས༔ དུས་གསུམ་མཁྱེན་པའི་ཞལ་ན་རེ༔ གནས་སྐབས་མཐར་ཐུག་གང་དུ་འང༔ བདེ་བའི་འབྱུང་གནས་བདེ་གཤེགས་བདུན༔ ད་ལྟ་མཁན་ཆེན་ཐུགས་དམ་ལྷ༔ པདྨ་ང་ཡི་ཡང་བཅུད་ཆོས༔ མཚོ་རྒྱལ་སྟངས་དཔྱལ་ལྷག་པའི་ལྷ༔ སངས་རྒྱས་སྨན་བླའི་སྒྲུབ་ཐབས་འདི༔ ད་ལྟ་སྤེལ་ཀྱང་ཚོང་ཟོང་ཙམ༔ སུ་ལ་མ་འཆོར་སྙིང་ལ་སྦོས༔ མ་འོངས་སྤྲུལ་པའི་སྲས་ལ་སྤྲོད༔ རིམ་བཞིན་ཆོས་ལ་དབང་བས་སྤེལ༔ འགྲོ་ལ་སྨན་པའི་སྨོན་ལམ་ཐོབ༔ ཅེས་གསུངས་པ་ལྟར། གྲུབ་པའི་རིག་འཛིན་ཨ་ཙར་ཡེ་ཤེས་དབྱངས་ཀྱི་སྐྱེ་མཐའ་སྤྲུལ་པའི་གཏེར་སྟོན་ཆེན་པོ་བསམ་གཏན་ཡེ་ཤེས་གླིང་པ་ཞེས་བྱ་བ་དེ་ཉིད་ཀྱི་ཐུགས་ཟབ་གསལ་མཉམ་པ་ཉིད་ཀྱི་ཡེ་ཤེས་ཆེན་པོའི་རོལ་རྩལ་དག་པའི་སྣང་བ་རབ་འབྱམས་སུ་ཤར་བའི་ཟབ་ཆོས་འཛད་མེད་རིན་ཆེན་གཏེར་གྱི་སྒོ་འཕར་རྣམ་པར་དབྱེ་བའི་ཆོས་སྡེ་ལས་བྱུང་བ་ཡིན་ལ། སྤྲུལ་པའི་གཏེར་སྟོན་ཆེན་པོ་འདི་ནི་ཨོ་རྒྱན་ལུང་རིག་གླིང་པའི་གཏེར་ལུང་ལས། ཁྱད་པར་ད་ལྟའི་ཨ་ཙར་ཤྲཱི་བྷ་དྲ༔ ཉེར་གཅིག་སྐྱེ་བའི་ཐ་མ་མདོ་སྨད་དུ༔ ཕ་མ་མི་རབས་ཆོ་རིགས་བཙུན་པའི་བུ༔ མཁའ་ལྡིང་གར་མཁན་རྩུབ་དྲག་ལོ་ཡི་མཇུག༔ ཡར་ཚེས་དགེ་བར་མཁའ་སྤྲིན་འཇའ་དཀྱུས་ལྟས༔ ལེགས་པའི་རྟགས་བཟང་ཆོས་ཀྱི་སྣང་བར་བཅས༔ སྲིད་པའི་མྱུ་གུ་དགེ་བའི་བག་ཆགས་སད༔ དེ་ཚེ་པདྨ་ང་དང་མཚོ་རྒྱལ་ཡུམ༔ དངོས་ཉམས་རྨི་ལམ་དག་ཏུ་ངེས་པར་མཇལ༔ ཞེས་དང་། རིག་འཛིན་གསང་སྔགས་གླིང་པའི་གཏེར་ལུང་ལས༔ དེ་ལ་སྐལ་ལྡན་གཉིས་པ་དབྱི་ཁྲོམ་ཡུལ༔ ལྕམ་སྤྲུལ་ཞེས་བྱ་ལྕགས་ཁམས་སྤྲེ་འུའི་ལོ༔ གཞན་ཕན་མིང་ཅན་རྫོགས་ཆེན་རྣལ་འབྱོར་པ༔ མ་ངེས་སྤྱོད་པས་འགྲོ་དོན་མཐའ་རུ་འཁྱོལ༔ ཞེས་དང་། རིག་འཛིན་བདུད་འཇོམས་རྡོ་རྗེ་གྲོ་ལོད་ཀྱི་ཧཱུྃ་ཆེན་ཞལ་ལུང་ལས༔ བཀའ་བབ་བྷ་དྲའི་མིང་མཐའ་ཅན༔ དཔལ་དབྱངས་སྤྲུལ་པ་སྙིང་བརྩེའི་བདག༔ བར་ཆད་སད་ཀྱིས་མ་ཁྱེར་ན༔ འོད་གསལ་ཟབ་མོའི་གསང་ལམ་ལ༔ བརྟེན་ནས་འཇའ་ལུས་འཕོ་ཆེན་འགྲུབ༔ ཅེས་དང་། ཨོ་རྒྱན་མཁའ་སྤྱོད་གླིང་པའི་གཏེར་ལུང་ལས། ཤར་ཕྱོགས་རྡོ་རྗེ་དབྱི་ཁྲོམ་འགྱིང་ཁུགས་སུ༔ མཁས་མཆོག་ཡེ་ཤེས་དབྱངས་ཀྱི་ཟློས་གར་བ༔ ཐུབ་པའི་མིང་ཅན་རྩལ་ལྡན་ཁྱུང་གཤོག་ཅན༔ མགྲིན་པར་སྨེ་བ་ཐིག་ལེ་ཡུངས་འབྲུ་ཙམ༔ མ་བསླབ་ཆོས་ཀྱི་རང་རྩལ་རྡོལ་བ་འབྱུང༔ དེ་ལ་འཇམ་པའི་དབྱངས་ཀྱི་སྒྲུབ་ཐབས་སྤྲོད༔ ཅེས་དང་། པདྨ་དྲག་རྩལ་གླིང་པའི་གཏེར་ལུང་ལས༔ དབྱི་ཡི་ཕྱོགས་སུ་ཨ་ཙར་ས་ལེའི་འཕྲུལ༔ ཕན་པའི་མིང་ཅན་བརླ་གཡས་སྨེ་བས་བརྒྱན༔ ཞེས་སོགས་གཏེར་ཁ་གོང་འོག་སོ་སོ་ནས་ལུང་གིས་ཟིན་ཅིང་། རིག་འཛིན་དམ་པ་དུ་མའི་བཀའ་གསུང་རྡོ་རྗེའི་ཚིག་གིས་ཡང་ཡང་བསྔགས་པའི་རྩོད་བྲལ་དུས་བབས་ཀྱི་གཏེར་སྟོན་ཆེན་པོ་དེ་ཉིད་ཏཱ་རེའི་གནས་ཀྱི་མདུན་ཞོལ་དུ་རྩ་ཐིག་རླུང་དང་། ཉམས་ལེན་འོད་གསལ་ལ་སྦྱངས་པའི་དབྱར་རྔའི་ལོའི་སྟོན་ཅང་ཤེས་ཟླ་བའི་ཚེས་བཅུའི་ཐོ་རངས་ཁར་གཟིམ་མལ་འོད་གསལ་གྱི་གཟིགས་ངོར་ཉམས་སྣང་ངོ་མཚར་བ་དུ་མའི་རྟེན་འབྲེལ་གྱི་བཀོད་པ་ཅིར་ཡང་ཤར་བའི་སྐབས་ཤིག་སྤྲུལ་པའི་སྐུ་རིག་འཛིན་ལུང་རིག་གླིང་པས་སླར་ཡང་ཡེ་ཤེས་སྒྱུ་མའི་སྐུ་ཡིས་རྗེས་སུ་བཟུང་ནས། ང་ཡི་ཟབ་ཆོས་དཔེ་ཐོག་ཕབ་མ་ཕབ་ཐམས་ཅད་ཁྱོད་ལ་བཀའ་གཏད་ཅིག་བྱ་གསུངས་ནས་པོ་ཏི་གསུམ་ཙམ་དང་འཕྲུལ་ཡིག་མང་པོ་མགོ་ལ་བཞག་ནས་སྨོན་ལམ་གཏད་རྒྱ་མཛད། བདག་གིས་གདུང་ཤུགས་དྲག་པོས་མཆི་མ་འཁྲུག་བཞིན་གསོལ་བ་བཏབ་པས། ང་རང་ཁྱོད་ཀྱི་རིག་པའི་རྩལ་ལས་ལོགས་སུ་གཤེགས་པ་མིན་གསུངས་བྱུང་བ་སྙམ་དུ་བླ་མ་ཕྱི་ན་མི་བཞུགས་རང་སེམས་དབྱེར་མེད་སྣང་སྲིད་བླ་མའི་རོལ་པར་ཤེས་པའི་གདེངས་ཐོབ། དག་པའི་སྣང་བ་རབ་འབྱམས་སུ་ཤར། ཟབ་མོའི་གཏེར་ཁ་མང་པོ་གནང་། ཏཱ་རེ་མི་འགྱུར་དགའ་བའི་ཚལ་གྱི་གནས་ལ་དཀར་ཆག་གནང་། ལྷ་ཁྲིད་མཛད། བྲག་དམར་རྒོད་པོ་རྫོང་གི་གནས་སུ་ཟབ་མོའི་དག་སྣང་འགའི་ལུང་བསྟན་བྱིན་རླབས་དང་། དུས་བབས་ཀྱི་ཌཱཀྐིའི་ལུང་བྱང་དང་། སྐལ་ལྡན་གྱི་སློབ་མ་འགས་རྟེན་འབྲེལ་གྱི་མཚམས་སྦྱོར་བཟང་པོ་ལ་བརྟེན་ནས་རིམ་པར་སྤེལ་བའི་ཟབ་ཆོས་ཁྱད་འཕགས་བདེ་གཤེགས་སྨན་བླའི་བྱིན་རླབས་དབང་གི་རྗེས་གནང་ཞུ་བའི་ཡོན་དུ་མཎྜལ་འབུལ་བར་མཛོད། ཅེས་མཎྜལ་ཕུལ། དེ་ལྟར་མཎྜལ་ཕུལ་བ་སོང་ནས་སླར་ཡང་དངོས་གཞིའི་དབང་དོན་དུ་མོས་གུས་གདུང་ཤུགས་དྲག་པོས་ཐལ་མོ་སྦྱར་བ་དང་བཅས་གསོལ་བ་གདབ་པ་འདིའི་རྗེས་ཟློས་མཛོད། ཀྱེ་ཧོ་བླ་མ་སོགས། དེ་ནས་མདུན་གྱི་ནམ་མཁར་བླ་མ་རྒྱལ་བ་སྲས་དང་བཅས་པ་མངོན་སུམ་བཞིན་བཞུགས་པའི་མོས་འདུན་རྩེ་གཅིག་པས་དཀོན་མཆོག་གསུམ་ལ་སྐྱབས་སུ་འགྲོ་བ་དང་། །བྱང་ཆུབ་མཆོག་ཏུ་སེམས་བསྐྱེད་པ། ཚོགས་བསགས་སྒྲིབ་སྦྱངས་ཀྱི་རིམ་པ་ཡན་ལག་བདུན་པ་རྣམས་ཚིག་གི་རྗེས་སུ་དོན་དྲན་པའི་ངང་ནས་འདི་བཞིན་རྗེས་ཟློས་མཛོད། ཅེས་སྐྱབས་སེམས་ཡན་ལག་བདུན་པ་རྣམས་གཞུང་བཞིན་བྱ། དེ་ནས་དབང་སྲོག་དམ་ཚིག་གིས་འཛིན་དགོས་པས། དེའི་སླད་དུ་དམ་ཚིག་གི་རྡོ་རྗེའི་ཆུ་འདི་བཏུང་བ་ཙམ་གྱིས་ཁྱོད་ཀྱི་སྙིང་ལ་གནས་པར་འགྱུར་བས། དམ་ཚིག་ཚུལ་བཞིན་དུ་བསྲུང་ན་མཆོག་ཐུན་མོང་གི་དངོས་གྲུབ་འགྲུབ་ཅིང་། གལ་ཏེ་དམ་ཚིག་ཉམས་ན་མནར་མེད་པའི་གནས་སུ་བརླགས་པར་འགྱུར་བས་དེ་ལྟ་བུའི་ཁེ་ཉེན་ལ་བསམས་ནས་རྡོ་རྗེ་སློབ་དཔོན་གྱིས་ཇི་ལྟར་བསྒོ་བ་བཞིན་དུ་དམ་ཚིག་བསྲུང་བར་བྱ་དགོས་པ་ཡིན་ནོ། སྐལ་ལྡན་རིགས་སོགས། བྱིན་དབབ་བྱ། དེ་ནས་ནམ་མཁར་བཞུགས་པའི་རྒྱལ་བ་སྲས་དང་བཅས་པ་རྣམས་ལ་མོས་གུས་གདུང་ཤུགས་མཆི་མ་འཁྲུགས་པ་ལྟ་བུའི་ངང་ནས་ཕྱག་འཚལ་བ་དང་བཅས་ཏེ་མཚན་རེ་རེ་བཞིན་ལན་བདུན་རེ་བརྗོད་མཐར། དེ་ལྟར་འདུ་ཤེས་དང་མོས་པ་གཏད་པས་བདེ་བར་གཤེགས་པ་བརྒྱད་འཁོར་དང་བཅས་པ་འོད་ཕུང་དུ་གྱུར་ནས་ཁྱེད་རང་རྣམས་ལ་ཐིམ་པས་སྒོ་གསུམ་གྱི་སྒྲིབ་པ་དག་ནས་དབང་གི་སྣོད་དང་ལྡན་པར་གྱུར་པར་སྒོམས་ཤིག དེ་ནས་སྐུའི་རྗེས་གནང་བུམ་དབང་ཞུ་བའི་དོན་དུ་འདི་བཞིན་སྨྲོས་ཤིག ན་མོ་རྡོ་རྗེ་སོགས། དེ་ནས་བུམ་པ་འདི་ཉིད་ཕྱི་རིན་པོ་ཆེ་བུམ་པའི་དབྱིབས་ལ་ནང་ལྟ་ན་སྡུག་པའི་ཕོ་བྲང་དུ་གྱུར་པའི་དབུས་སུ་བཅོམ་ལྡན་སྨན་བླ་བདེ་བར་གཤེགས་པ་མཆེད་བརྒྱད་ཀྱི་ལྷ་ཚོགས་བཞུགས་པའི་སྐུ་ལས་ཟག་མེད་བདུད་རྩིའི་རྒྱུན་བབས་པས་ཁྱེད་རང་རྣམས་ཀྱི་སྤྱི་བོ་ནས་དབང་བསྐུར་བས་བུམ་པ་ལྷ་ཡི་དབང་ཐོབ་བྱུང་སྙམ་པའི་མོས་པ་མཛོད། ཧཱུྃ་ཇི་ལྟར་སོགས། དེ་ལྟར་བུམ་པའི་དབང་བསྐུར་བས་ལུས་ཀྱི་སྒྲིབ་པ་དག་ཅིང་ལུས་ལྷ་བསྒོམ་པ་ལ་དབང་། འབྲས་བུ་སྤྲུལ་སྐུའི་གོ་འཕང་ཐོབ་པའི་སྐལ་བ་དང་ལྡན་པར་གྱུར་པར་སྒོམས་ཤིག གཉིས་པ་གསུང་གི་རྗེས་གནང་སྔགས་ཀྱི་དབང་ཞུ་བའི་དོན་དུ་འདི་བཞིན་སྨྲོས་ཤིག ན་མོ་རྡོ་རྗེ་སོགས། དེ་ནས་སློབ་དཔོན་བདེ་བར་གཤེགས་པ་བརྒྱད་དུ་གསལ་བའི་ཐུགས་ཀ་ནས་སྔགས་ཕྲེང་འོད་ཟེར་སྐུའི་མདོག་མཚུངས་ཀྱི་རྟ་ལ་ཞོན་ཁྱོད་རང་རྣམས་ཀྱི་མགྲིན་པར་ཞུགས་པས་བདེ་བར་གཤེགས་པ་བརྒྱད་ཀྱི་གསུང་གི་བྱིན་རླབས་ཐོབ་པར་བསྒོམ་ལ་སྔགས་འདིའི་རྗེས་ཟློས་མཛོད། སྔགས་རིང་ཐུང་ལན་བདུན་བདུན་བརྗོད། སླར་ཡང་ལྷའི་མདོག་མཚུངས་ཀྱི་སོགས། དེ་ལྟར་གསུང་གི་དབང་བསྐུར་བས་ངག་གི་སྒྲིབ་པ་དག ངག་སྔགས་བཟླ་བ་ལ་དབང་། འབྲས་བུ་ལོངས་སྤྱོད་རྫོགས་སྐུའི་གོ་འཕང་ཐོབ་པའི་སྐལ་བ་ལྡན་པར་གྱུར་པར་སྒོམས་ཤིག གསུམ་པ་ཐུགས་ཀྱི་རྗེས་གནང་ཕྱག་མཚན་ཚོམ་བུའི་དབང་ཞུ་བའི་དོན་དུ་འདི་བཞིན་སྨྲོས་ཤིག ན་མོ་རྡོ་རྗེ་སོགས། དེ་ནས་སློབ་དཔོན་གྱི་ཐུགས་ཀ་ནས་འོད་ཟེར་འཕྲོས་པས་ཁྱེད་རང་རྣམས་ལ་ཕོག་པས་སེམས་དུས་གསུམ་གྱི་རྣམ་རྟོག་འགྱུ་འཕྲོ་ཐམས་ཅད་སྐྱེ་འགག་གནས་གསུམ་དང་བྲལ་བ་བརྗོད་མེད་དེ་བཞིན་ཉིད་ཀྱི་ངང་ལ་མཉམ་པར་ཞོག་ཅིག བླ་མས། ཧཱུྃ་ཧཱུྃ་ཧཱུྃ། ཞེས་བརྗོད། སླར་ཡང་སློབ་དཔོན་གྱི་ཐུགས་ཀ་ནས་ཧཱུྃ་ཡིག་འོད་ཟེར་ལྷའི་མདོག་མཚུངས་འཕྲོས་པ་ཚོམ་བུ་ལ་ཐིམ་པས་ཕྱག་མཚན་ཐུགས་ཀྱི་ངོ་བོ་ཚོམ་བུའི་དབང་བསྐུར་བས་དེ་བཞིན་གཤེགས་པའི་ཐུགས་གསང་བ་བསམ་གྱིས་མི་ཁྱབ་པའི་དབང་ཐོབ་པའི་མོས་པ་མཛོད། ཧཱུྃ༔ བཅོམ་ལྡན་སོགས། དེ་ལྟར་ཐུགས་ཀྱི་དབང་བསྐུར་བས་སེམས་ཀྱི་སྒྲིབ་པ་དག སེམས་སྤྲོས་བྲལ་སྟོང་ཉིད་བསྒོམ་པ་ལ་དབང། འབྲས་བུ་ཆོས་སྐུའི་གོ་འཕང་ཐོབ་པའི་སྐལ་བ་དང་ལྡན་པར་གྱུར་པར་སྒོམས་ཤིག དེ་ནས་དཀྱིལ་འཁོར་གྱི་ལྷ་ཚོགས་འཁོར་དང་བཅས་པ་སོ་སོའི་སྐུ་ལས་སྐུ་གཉིས་པ་དག་རིམ་པར་འཕྲོས་པས་ཁྱེད་རང་རྣམས་ལ་ཐིམ་པས་ལྷ་དེ་དག་གི་བྱིན་རླབས་ཅིག་ཆར་ཉིད་ལ་ཐོབ་པའི་མོས་པ་མཛོད། ཧཱུྃ༔ མཚན་ལེགས་སོགས། དེ་ལྟར་བདེ་བར་གཤེགས་པ་བརྒྱད་ཀྱི་དབང་བསྐུར་བས་སོ་སོའི་ཐུགས་བསྐྱེད་སྨོན་ལམ་དང་བཅས་པ་ལ་དབང་ཞིང་རྫོགས་སྨིན་སྦྱངས་གསུམ་མཐར་ཕྱིན་པའི་སྐལ་བ་དང་ལྡན་པར་འགྱུར་རོ། །སྔོན་ཚེ་སོགས། དེ་ལྟར་སེམས་དཔའ་ཆེན་པོ་བཅུ་དྲུག་གི་དབང་བསྐུར་བས་བྱང་ཆུབ་ཀྱི་སེམས་རིན་པོ་ཆེ་རྣམ་པ་གཉིས་རྒྱུད་ལ་སྐྱེས་ནས་རྒྱལ་སྲས་ཀྱི་སྤྱོད་པ་རླབས་པོ་ཆེས་འགྲོ་བའི་དོན་བསྒྲུབ་པ་ལ་མཐུ་ཐོགས་པ་མེད་པའི་སྐལ་བ་དང་ལྡན་པར་འགྱུར་རོ། །སྔོན་ཚེ་བཀའ་སོགས། དེ་ལྟར་གནོད་སྦྱིན་གྱི་སྡེ་དཔོན་ཆེན་པོ་བཅུ་གཉིས་ཀྱི་དབང་བསྐུར་བས་བསྟན་འགྲོའི་འགལ་རྐྱེན་བསལ་ཞིང་མཐུན་རྐྱེན་བསྒྲུབ་པ་ལ་འགོ་ཞིང་སྡོང་གྲོགས་དམ་པ་མཛད་ནས་ཕྲིན་ལས་གང་བརྩམ་ཐམས་ཅད་མྱུར་དུ་འགྲུབ་པའི་སྐལ་བ་དང་ལྡན་པར་འགྱུར་རོ། །ཟབ་དང་རྒྱ་ཆེ་སོགས། དེ་ལྟར་རྒྱལ་པོ་ཆེན་པོ་སྡེ་བཞིའི་དབང་བསྐུར་བས་ལས་བཞི་སོགས་རབ་འབྱམས་ཕྲིན་ལས་ཀྱི་འཇུག་པ་མཐའ་ཡས་པས་བསྟན་འགྲོའི་དོན་རླབས་པོ་ཆེ་བསྒྲུབ་ཅིང་རྒྱལ་བའི་ཕྲིན་ལས་ལ་དབང་འབྱོར་བའི་སྐལ་བ་དང་ལྡན་པར་འགྱུར་རོ། །དེ་ནས་མཐའ་རྟེན་གཏོར་མའི་དབང་བསྐུར་བ་ནི། གཏོར་མ་འདི་དེ་བཞིན་གཤེགས་པ་བརྒྱད་ལ་འཁོར་བྱང་སེམས་དགྲ་བཅོམ་ཐམས་ཅད་ཀྱིས་བསྐོར་བ་ཁྱེད་རང་རྣམས་ཀྱི་སྤྱི་བོར་བྱོན་ནས་དབང་བསྐུར་བས་སྐུ་གསུང་ཐུགས་ཀྱི་བྱིན་རླབས་ཐམས་ཅད་སྐད་ཅིག་འདི་ཉིད་ལ་ཐོབ་པའི་མོས་པ་མཛོད། །སྤྲོ་ན་བརྒྱུད་པའི་མཚན་དོན་སྦྱར། བསྡུ་ན་གཟུངས་རིང་སྔགས་ཤམ་དུ། བྷ་ལིང་ཏ་ཏིཥྠ་ཀཱ་ཡ་ཝཀྐ་ཙིཏྟ་ཨ་བྷི་ཥིཉྩ་ཧོ༔ དེ་ལྟར་སྨན་བླ་བདེ་བར་གཤེགས་པ་བརྒྱད་ཀྱི་རྗེས་གནང་ལེགས་པར་ཐོབ་པས་དེའི་དམ་ཚིག་ཏུ་ཉིན་མཚན་དུས་དྲུག་ཏུ་བདེ་གཤེགས་བརྒྱད་ཀྱི་མཚན་ལན་བདུན་བདུན་བརྗོད། ཚེས་བརྒྱད་རྣམས་སུ་མཆོད་ཆོག་མི་བཅགས་པ་དང་། རྟག་ཏུ་བྱང་ཆུབ་སེམས་གཉིས་བསྒོམ་པ་སོགས་བསྲུང་སྡོམ་གྱི་རིམ་པ་རྣམས་ཚུལ་བཞིན་དུ་བགྱི་སྙམ་པར་མཛོད་ལ་འདིའི་རྗེས་ཟློས་མཛོད། གཙོ་བོས་ཇི་ལྟར༴སོགས། དེ་ལྟར་དབང་བསྐུར་ཟབ་མོ་ཐོབ་པའི་སྐུ་དྲིན་གཏང་རག་ཏུ་མཎྜལ་ཕུལ་མཛོད། ས་གཞི་སྤོས་སོགས། སླར་ཡང་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་འཁོར་ལོས་བསྒྱུར་བའི་རྒྱལ་སྲིད་ཀྱི་འབྱོར་བ་ཆེན་པོ་ལྟར་སྤྲུལ་ནས་རྡོ་རྗེ་སློབ་དཔོན་ལ་དབང་གི་དྲིན་ལན་དུ་འབུལ་ན་ཆ་ཤས་ནས་ལོངས་སྤྱད་དུ་གསོལ་སྙམ་པས་འདིའི་རྗེས་ཟློས་མཛོད། དེང་ནས༴སོགས། དེ་ལྟར་ཐོབ་པའི་དགེ་བ་སེམས་ཅན་གྱི་དོན་དུ་བསྔོ་བར་མཛོད། བསོད་ནམས་འདི་སོགས། ཤིས་བརྗོད་རྣམས་སྤྱི་ལྟར་བྱའོ། །དེ་ལྟར་རིག་འཛིན་མཆོག་སྤྲུལ་གཞན་ཕན་བཟང་པོའི་དགོངས་གཏེར་གྱི་ཆོས་སྡེ་ལས་བྱུང་བ་སྨན་བླའི་དབང་གི་མཚམས་སྦྱོར་འདི་གང་གི་ཟབ་གཏེར་ཆོས་ཀྱི་བདག་པོར་མངའ་གསོལ་བའི་སྒྲུབ་བརྩོན་དམ་པ་ལུང་རྟོགས་བསྟན་འཛིན་གྱི་དགོངས་བཞེད་ལྟར་བཙུན་པ་སྡེ་སྣོད་མིང་པས་བྲིས་པ་དགེ་ལེགས་སུ་གྱུར་ཅིག།