སངས་རྒྱས་སྨན་བླའི་རྗེས་གནང་གི་ཆོ་ག

བཅོམ་ལྡན་འདས་བདེ་བར་གཤེགས་པ་བརྒྱད་ལ་ཕྱག་འཚལ་ལོ༔ བདག་འདྲ་མཁར་ཆེན་མཚོ་རྒྱལ་དང༔ ཨ་ཙར་ལ་སོགས་རྗེ་འབངས་འགས༔ ཨོ་རྒྱན་དུས་གསུམ་སངས་རྒྱས་ལ༔ སྒོ་གསུམ་གུས་པས་ཕྱག་སྐོར་བྱས༔ རིན་པོ་ཆེ་ཡི་མཎྜལ་ཕུལ༔ གདུང་བའི་ཤུགས་ཀྱིས་སྙན་གསན་དབབ༔ ཨོ་རྒྱན་འགྲོ་མགོན་རིན་པོ་ཆེ༔ བདག་སོགས་མར་གྱུར་འགྲོ་དོན་དུ༔ བཅོམ་ལྡན་སྨན་གྱི་བླ་མ་ཡི༔ བྱིན་རླབས་རྗེས་གནང་རིམ་པ་སྩོལ༔ ཨོ་རྒྱན་བླ་མས་བཀའ་སྩལ་པ༔ སྐལ་ལྡན་རྗེ་འབངས་ཚུལ་བཞིན་ཉོན༔ འཕགས་པ་དེ་བཞིན་གཤེགས་པ་ཡི༔ སྨོན་ལམ་དབང་གི་རིམ་པ་ནི༔ གནས་ཁང་བཀོད་ལེགས་འཕན་གདུགས་མཛེས༔ དྲི་བཟང་བ་ལྔའི་ཆག་ཆག་གདབ༔ སྟེགས་བུ་གནས་ཁྱོན་མཛེས་པའི་ཁར༔ རས་བྲིས་ཚོན་འབྲུ་ལྷ་གྲངས་མཛེས༔ དབུས་སུ་བུམ་པ་དྲི་ལྔ་སྨན་ལྡན་ཆུས༔ སུམ་ཆ་དགང་བའི་ཁ་རྒྱན་མགུལ༔ ཆིང་ནི་ལྷ་ཡི་ཁ་དོག་གདགས༔ དེ་མདུན་འབྲས་བཤོས་གཙོ་འཁོར་བརྒྱད༔ གཡས་གཡོན་སེམས་དཔའ་གཉིས་དང་བཅས༔ སྐྱུ་གུ་གནོད་སྦྱིན་བཅུ་གཉིས་གྲངས༔ ལྷ་ཙཀ་འཛུགས་ཤིང་མཐའ་མ་རུ༔ ཉེར་སྤྱོད་མཆོད་པས་མཐའ་ནས་བསྐོར༔ སྐུ་གསུང་ཐུགས་ཀྱི་དབང་རྫས་དང༔ མཐའ་རྟེན་རྫས་རྟགས་ཕྱག་ལེན་བཞིན༔ འཛོལ་མེད་ཇི་ལྟ་བ་བཞིན་ནོ༔ དེ་ནས་སློབ་མ་མདུན་དུ་འཁོད༔ རྣམ་འཇོམས་གཟུངས་ཆུས་དག་པར་བཀྲུས༔ སྤྱི་དང་བྱེ་བྲག་ལོ་རྒྱུས་བརྗོད༔ མཎྜལ་འབུལ་ཞིང་གསོལ་བ་གདབ༔ ཀྱཻ་ཧོ་བླ་མ་བདེ་བར་གཤེགས༔ བདུད་བཞིའི་དཔུང་བཅོམ་རྡོ་རྗེའི་སྐུ༔ ཁྱེད་མཐུས་བདག་ཅག་འཇིགས་པ་ལས༔ སྐྱོབ་ཅིང་ཐར་པའི་ཞིང་ལ་སྦྱོར༔ ཡང་དག་དབང་གིས་རྒྱུད་སྨིན་མཛོད༔ སྐུ་གསུང་ཐུགས་དབང་གནང་བར་ཞུ༔ ལན་གསུམ་དེ་ནས་སློབ་དཔོན་གྱིས༔ ཀྱཻ་ཧོ་གསོན་ཅིག་སྐལ་ལྡན་བུ༔ སྡུག་བསྔལ་འཁོར་བའི་གྲོང་ཁྱེར་ལས༔ ཐར་འདོད་ངེས་འབྱུང་སེམས་ཡོད་ན༔ བཅོམ་ལྡན་སྨན་བླའི་གསང་གསུམ་དབང༔ ཁྱོད་རྣམས་ལ་ནི་བསྐུར་བར་བྱ༔ བདེ་གཤེགས་དབང་འདི་ཁྱོད་ཀྱིས་ལོངས༔ ཞེས་བརྗོད་དེ་ནས་སྐྱབས་སེམས་དང༔ ཡན་ལག་བདུན་པ་སྤྱི་ལྟར་བྱ༔ དེ་ནས་དེ་ཡི་རྗེས་འབྲེལ་དུ༔ དམ་ཆུ་སྦྱིན་ལ་དམ་ཚིག་བསྒྲགས༔ སྐལ་ལྡན་རིགས་མཆོག་ཁྱེད་རྣམས་ཀྱིས༔ དམ་ཚིག་རྡོ་རྗེའི་ཆུ་འདི་འཐུང༔ ང་ནི་ཁྱོད་ཀྱི་བླ་མ་ཡིན༔ རྡོ་རྗེ་སློབ་དཔོན་མིག་ལྟར་འཚོས༔ སྒོ་གསུམ་ལྷ་ཡི་རྣམ་རོལ་དུ༔ ནམ་ཡང་མ་འདའ་ས་མ་ཡཱ༔ དེ་ནས་ཁྱེད་རང་རྣམས་འདུག་པའི་གནས་ཁང་འདི་ཡང་ཐ་མལ་གྱི་གནས་འདི་ལྟ་བུ་མ་ཡིན་པར༔ རིན་ཆེན་སྨན་གྱི་གྲོང་ཁྱེར་ལྟ་ན་སྡུག་པའི་ཕོ་བྲང་དུ་གྱུར་པའི་དབུས་སུ༔ ཁྱོད་རང་རྣམས་སོ་སྐྱེས་རང་རྒྱུད་འདི་ལྟར་མ་ཡིན་པར་རིག་འཛིན་དྲང་སྲོང་ལྷ་ཡིད་ལས་སྐྱེས་སུ་གསལ་བཏབ་པའི་མདུན་གྱི་ནམ་མཁར་པད་ཟླ་མི་འཇིགས་སེང་ཁྲིའི་སྟེང་དུ༔ དབུས་སུ་བུདྡྷ་བཻ་ཥ་ཛྱེ་སྐུ་མདོག་མཐིང་ཀ་ས་གནོན་མཉམ་བཞག་ཨ་རུ་རྣམ་པར་རྒྱལ་བ་དང་ལྷུང་བཟེད་སྨན་གྱིས་བཀང་བ༔ ཆོས་གོས་རྣམ་གསུམ་གསོལ་ཞིང་རྡོ་རྗེའི་སྐྱིལ་མོ་ཀྲུང་དང་མཚན་དཔེའི་ཡོན་ཏན་རྫོགས་པ༔ དེའི་མདུན་དུ་རིམ་བཞིན་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་དང༔ མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་དང༔ གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པ་དང༔ མྱ་ངན་མེད་མཆོག་དཔལ་དང་༔ ཆོས་བསྒྲགས་རྒྱ་མཚོའི་དབྱངས་དང༔ ཆོས་རྒྱ་མཚོ་མཆོག་གི་བློ་གྲོས་མངོན་མཁྱེན་དང༔ སྟོན་པ་ཤཱཀྱ་ཐུབ་པ་དང༔ སྨན་གྱི་བླ་བཻཌཱུརྱའི་འོད་ཀྱི་ལྷ་དང༔ དྲང་སྲོང་གནོད་སྦྱིན་གྱི་སྡེ་དཔོན་བཅུ་གཉིས་དང༔ རྒྱལ་པོ་ཆེན་པོ་སྡེ་བཞི་ལ་སོགས་ཁྲོམ་ཚོགས་ལྟར་དམིགས་ལ༔ བདག་སོགས་འགྲོ་བའི་ནད་གདོན་སྡུག་བསྔལ་བསལ་ཞིང་རྒྱུད་བྱིན་གྱིས་བརླབས་པར་མོས་ཤིག༔ དེ་ནས་སྤྱན་འདྲེན་སྤོས་རོལ་དབྱངས་དང་བཅས༔ གདུང་ཤུགས་དྲག་པོས་སྤྱན་འདྲེན་གསོལ་བ་འདེབས༔ ན་མོ༔ བདེ་གཤེགས་སྙིང་པོས་འགྲོ་བ་ཡོངས་ལ་ཁྱབ༔ སེམས་ནི་རྒྱ་ཆེན་མཆོག་ཏུ་རབ་བསྐྱེད་དེ༔ འགྲོ་བ་འདི་དག་མ་ལུས་སངས་རྒྱས་རྒྱུ༔ འདི་ན་སྣོད་མིན་སེམས་ཅན་གཅིག་ཀྱང་མེད༔ བཞེངས་ཤིག་བཞེངས་ཤིག་སྟོབས་བཅུ་མངའ་བའི་ལྷ༔ དུས་ལས་མི་འདའ་ཐུགས་རྗེའི་དབང་གིས་ནི༔ སེམས་ཅན་དོན་ལ་དགོངས་པའི་དཀོན་མཆོག་གསུམ༔ བདེ་གཤེགས་བདུན་དང་ཐུབ་དབང་བཅོམ་ལྡན་འདས༔ ལྷ་མི་སྨན་གྱི་རིག་འཛིན་དྲང་སྲོང་སོགས༔ ཡིད་ཀྱིས་སྤྲུལ་ཞིང་བཤམས་པའི་གནས་འདི་རུ༔ རྒྱལ་བ་སྲས་བཅས་མ་ལུས་གཤེགས་སུ་གསོལ༔ བདག་ཅག་སྐལ་ལྡན་བུ་ཡི་སྒོ་གསུམ་ལ༔ སྐུ་གསུང་ཐུགས་ཀྱིས་བྱིན་གྱིས་བརླབ་ཏུ་གསོལ༔ སིདྡྷི་དང་གྷུ་མེ་དང་བྷཻ་ཥ་ཛྱེའི་སྔགས་ཤམ་ལ༔ ཨ་ཝེ་ཤ་ཡ་ཕཻཾ༔ ཨ་ཨ་བཛྲ་ཏིཥྛ་བརྗོད༔ དེ་ནས་ཚོགས་ཞིང་སྤྱན་སྔ་རུ༔ སྒོ་གསུམ་གུས་དང་ཕྱག་འཚལ་དང༔ གསོལ་འདེབས་ལྷ་གྲངས་བདེ་གཤེགས་བརྒྱད༔ རིམ་བཞིན་མཚན་བརྗོད་བདུན་ནམ་གསུམ༔ བརྗོད་ལ་རང་ཐིམ་བྱིན་བརླབས་དམིགས༔ སྐུ་ཡི་རྗེས་གནང་ཞུ་ཕྱིར་གསོལ་བ་འདི་བཞིན་ཐོབ༔ ན་མོ༔ རྡོ་རྗེ་འཆང་དབང་སྨན་རྒྱལ་དང༔ དབྱེར་མེད་བླ་མ་སྤྲུལ་པའི་སྐུའི༔ ཀཱ་ཡའི་རྗེས་གནང་སྨིན་གྲོལ་སྩོལ༔ བྱིན་རླབས་ཡེ་ཤེས་དབང་བསྐུར་ཞུ༔ དེ་ནས་སློབ་དཔོན་གྱིས་རྣམ་རྒྱལ་བུམ་པའི་ཆུས་དབང་བསྐུར་ལ༔ ཧཱུྃ༔ ཇི་ལྟར་བལྟམས་པ་ཙམ་གྱིས་ནི༔ ལྷ་རྣམས་ཀྱིས་ནི་ཁྲུས་གསོལ་ལྟར༔ ལྷ་ཡི་ཆུ་ནི་དག་པ་ཡིས༔ དེ་བཞིན་བདག་གིས་དབང་བསྐུར་རོ༔ ཨོཾ་བུདྡྷ་བཻ་ཥ་ཛྱེ་ཨཥྚ་ཨ་བྷི་ཥིཉྩ་ཧཱུྃ༔ དེ་ནས་ཤིས་བརྗོད་མེ་ཏོག་འཐོར༔ གང་གི་སྐུ་ནི་ཨིནྜ་ནི་ལའི་མདོག༔ མཚན་དཔེ་ཉི་མའི་འོད་སྟོང་འབར་བའི་མཁའ༔ ཀུན་ལ་ཞི་བདེའི་གོ་སྐབས་འབྱེད་པའི་དབྱངས༔ བཅོམ་ལྡན་སྨན་བླའི་སྐུ་ཡི་བཀྲ་ཤིས་ཤོག༔ གསུང་གི་དབང་བསྐུར་ཞུ་བའི་སླད་དུ་འདི་བཞིན་སྨྲོས་ཤིག༔ ན་མོ༔ རྡོ་རྗེ་འཆང་དབང་སྨན་རྒྱལ་དང༔ དབྱེར་མེད་བླ་མ་ལོངས་སྤྱོད་རྫོགས༔ ཝཀྐའི་རྗེས་གནང་སྨིན་གྲོལ་སྩོལ༔ བྱིན་རླབས་ཡེ་ཤེས་དབང་བསྐུར་ཞུ༔ དེ་ནས་སྔགས་བྱང་དང་བགྲང་ཕྲེང་ཐོགས་ལ༔ ཧཱུྃ༔ བཅོམ་ལྡན་བདེ་གཤེགས་མཆེད་བརྒྱད་ཀྱི༔ གསུང་གི་བྱིན་རླབས་ཡོན་ཏན་དབང༔ སྔགས་ཀྱི་འབྲས་བུ་བཅུད་དང་ལྡན༔ གྲགས་སྟོང་གསུང་གི་དབང་ཐོབ་ཤོག༔ རྩ་སྔགས་ཤམ་དུ་ཝཀྐ་དང༔ གཟུངས་སྔགས་རིང་ཐུང་བདུན་བདུན་གྱི༔ རྗེས་ཟློས་བྱེད་བཅུག་གཟུངས་ཡིག་དང༔ སྔགས་ཀྱི་ཕྲེང་བ་འདྲེན་དུ་བཅུག༔ སླར་ཡང་ལྷའི་མདོག་མཚུངས་ཀྱི་ཕྲེང་བ་སློབ་དཔོན་ལ་ཕུལ་ཞིང་སྔགས་ཀྱི་དངོས་གྲུབ་ཞུ་བ་ནི༔ དེ་ནས་བཅོམ་ལྡན་བདེ་གཤེགས་བརྒྱད༔ སློབ་མ་འདི་ལ་ལེགས་བསྩལ་ནས༔ འདི་ཉིད་རྗེས་སུ་འཛིན་པའི་ཕྱིར༔ སྔགས་ཀྱི་དངོས་གྲུབ་སྩལ་དུ་གསོལ༔ དབྱངས་གསལ་རྟེན་འབྲེལ་སྙིང་པོ་བཟླ༔ བཀྲ་ཤིས་བརྗོད་ཅིང་མེ་ཏོག་འཐོར༔ གང་གི་གསུང་ནི་དྲི་ཟའི་རྒྱུད་སྟོང་ལྟར༔ ཚངས་པའི་དབྱངས་ཀྱིས་སྣ་ཚོགས་གདུལ་བྱའི་ཡིད༔ ཀུན་ཏུ་ཚིམ་བྱེད་གསུང་རབ་རྒྱ་མཚོའི་གཏེར༔ བཅོམ་ལྡན་སྨན་བླའི་གསུང་གི་བཀྲ་ཤིས་ཤོག༔ ཐུགས་ཀྱི་དབང་ཞུ་བའི་དོན་དུ་འདི་བཞིན་སྨྲོས་ཤིག༔ ན་མོ༔ རྡོ་རྗེ་འཆང་དབང་སྨན་རྒྱལ་དང༔ དབྱེར་མེད་བླ་མ་ཆོས་ཀྱི་སྐུ༔ ཙིཏྟའི་རྗེས་གནང་སྨིན་གྲོལ་སྩོལ༔ བྱིན་རླབས་ཡེ་ཤེས་དབང་བསྐུར་ཞུ༔ ཞེས་གསོལ་བ་བཏབ་པས་སློབ་དཔོན་གྱི་ཐུགས་ཕྱག་མཚན་ཨ་རུ་བརྒྱད་ཀྱི་དབང་བསྐུར་ལ༔ ཧཱུྃ༔ བཅོམ་ལྡན་བདེ་གཤེགས་སྨན་ལྷ་གཙོ་འཁོར་གྱི༔ ཡང་དག་ཐུགས་ཀྱི་ངོ་བོ་ཕྱག་མཚན་དབང༔ ཨ་རུ་རྣམ་བརྒྱད་བདེ་གཤེགས་བརྒྱད་ཀྱི་ཐུགས༔ ཚོམ་བུའི་རྣམ་པ་འོད་མདངས་གཟི་བརྗིད་འབར༔ སྐལ་ལྡན་སློབ་བུ་ཁྱོད་ལ་དབང་བསྐུར་རོ༔ སྨན་ལྷ་མཆེད་བརྒྱད་ཐུགས་ཀྱི་དབང་ཐོབ་ཤོག༔ ན་མཿསརྦ་ཏ་ཐཱ་ག་ཏཱ་ཨརྷ་ཏེ་ཙིཏྟ་ཨ་བྷི་ཥིཉྩ་ཧཱུྃ༔ བཀྲ་ཤིས་བརྗོད་ཅིང་མེ་ཏོག་འཐོར༔ གང་གི་ཐུགས་ནི་ཡེ་ཤེས་རྒྱ་མཚོའི་ངང༔ དམིགས་མེད་ཐུགས་རྗེའི་རྦ་རླབས་ཆེར་གཡོས་ཤིང༔ སྨོན་ལམ་རྒྱ་མཚོའི་མཛད་པ་ལྷུན་གྲུབ་པའི༔ བཅོམ་ལྡན་སྨན་བླའི་ཐུགས་ཀྱི་བཀྲ་ཤིས་ཤོག༔ དེས་ནི་སྐུ་གསུང་ཐུགས་དབང་རྫོགས༔ ས་མ་ཡཱ༔ དེ་ནས་ལྷ་དབང་བསྡུས་པ་ནི༔ བདེ་བར་གཤེགས་པ་བརྒྱད་ཀྱི་སྐུ་ཐོགས་ལ༔ ཧཱུྃ༔ མཚན་ལེགས་རིན་ཆེན་གསེར་བཟང་མྱ་ངན་མེད༔ ཆོས་བསྒྲགས་རྒྱ་མཚོ་ཆོས་བློ་ཤཱཀྱ་ཐུབ༔ རྒྱ་ཆེན་སྨོན་ལམ་ཡོངས་སུ་རྫོགས་པ་ཡི༔ བདེ་བར་གཤེགས་པ་བརྒྱད་ཀྱི་དབང་བསྐུར་རོ༔ མི་མཐུན་རྐྱེན་སོལ་མཐུན་པའི་དངོས་གྲུབ་སྩོལ༔ མངོན་དགའི་ཞིང་དུ་དབུགས་དབྱུང་ལུང་བསྟན་ཅིང༔ བདེ་གཤེགས་བརྒྱད་ཀྱི་གདུལ་ཞིང་དག་པར་ཤོག༔ བྷཻ་ཥ་ཛྱཻ་དང་མུ་ནེའི་ཤམ༔ ཨོཾ་སརྦ་ཏ་ཐཱ་ག་ཏ་ཨརྷ་ཏེ་ཨཥྚ་ཨ་བྷི་ཥིཉྩ་ཧཱུྃ༔ དེ་ནས་སེམས་དཔའ་བཅུ་དྲུག་གི་སྐུ་ཐོགས་ལ༔ སྔོན་ཚེ་དམ་བཅའི་བྱ་དཀའི་སྤྱོད་པ་ཡིས༔ འགྲོ་བའི་ཁམས་དང་དབང་པོའི་རྗེས་མཐུན་པར༔ གང་ལ་གང་འདུལ་འགྲོ་ལ་མི་འཇིགས་སྦྱིན༔ སེམས་དཔའ་བཅུ་དྲུག་དབང་འདི་ཁྱོད་ཀྱིས་ལོངས༔ བསྟན་འགྲོའི་དོན་ཀུན་འགྲུབ་པའི་དབང་ཐོབ་ཤོག༔ མ་ཧཱ་བྷོ་དྷི་ས་ཏྭ་ཨ་བྷི་ཥིཉྩ་ཧཱུྃ་སིདྡྷི་ཕ་ལ་ཧོ༔ གནོད་སྦྱིན་སྡེ་དཔོན་བཅུ་གཉིས་ཀྱི་སྐུ་ཐོགས་ལ༔ སྔོན་ཚེ་བཀའ་འཁོར་བསྟན་པ་སྐྱོང་བའི་ལྷ༔ གནོད་སྦྱིན་བཅུ་གཉིས་བདུན་འབུམ་ཉི་ཁྲི་བཅས༔ སངས་རྒྱས་བསྟན་པ་སྲུང་བའི་དབང་བསྐུར་བས༔ མདོ་ནས་གསུངས་པའི་ཕན་ཡོན་ཅི་མཆིས་པ༔ བྱང་ཆུབ་བར་དུ་ཐོབ་པར་མཛད་དུ་གསོལ༔ ཨོཾ་སརྦ་ཀུ་བཻ་ར་ཨ་བྷི་ཥིཉྩ་སིདྡྷི་ཕ་ལ་ཧཱུྃ༔ དེ་ནས་རྒྱལ་ཆེན་བཞིའི་སྐུ་ཐོགས་ལ༔ ཟབ་དང་རྒྱ་ཆེ་གཟིགས་པ་པོ༔ ཡུལ་འཁོར་སྲུང་དང་འཕགས་སྐྱེས་པོ༔ སྤྱན་མི་བཟང་དང་རྣམ་ཐོས་སྲས༔ རྒྱལ་ཆེན་བཞི་ཡི་དབང་བསྐུར་རོ༔ ལས་བཞི་ལྷུན་གྱིས་གྲུབ་པ་དང༔ དཀར་ཕྱོགས་ལྷ་ཡིས་སྐྱོབ་པར་ཤོག༔ ཨོཾ་ཙ་དུར་མ་ཧཱ་ར་ཛ་ཨ་བྷི་ཥིཉྩ་སིདྡྷི་ཕ་ལ་ཧོ༔ དེ་ནས་མཐའ་རྟེན་གཏོར་མ་ནི༔ སྤྲོ་ན་བརྒྱུད་པའི་མཚན་དོན་སྦྱར༔ བསྡུ་ན་གཟུངས་རིང་སྔགས་ཤམ་དུ༔ བྷ་ལིང་ཏ་ཏིཥྛ་ཀ་ཡ་ཝཀྐ་ཙིཏྟ་ཨ་ཥིཉྩ་ཧོ༔ དེ་ནས་སྣ་བདུན་རྫས་རྟགས་དབང༔ གཞན་ནས་བྱུང་བ་སྤྱི་ལྟར་བྱ༔ དགེ་བསྔོ་ཤིས་བརྗོད་མཐའ་ལ་བརྒྱན༔ བདེ་གཤེགས་དབང་གི་རིམ་པ་འོ༔ རྗེས་ལ་དམ་ཚིག་རིམ་པ་ནི༔ རྗེས་གནང་ཐོབ་ནས་དུས་དྲུག་དུ༔ སྨན་བླའི་གསོལ་འདེབས་བདུན་བདུན་བརྗོད༔ ཚེས་བརྒྱད་མཆོད་ཆོག་མི་བཅགས་ཤིང༔ འགྲོ་ལ་ཕན་པའི་སྨན་གཅིག་པུ༔ བྱང་ཆུབ་སེམས་གཉིས་འབད་དེ་བསྒོམ༔ ས་མ་ཡཱ༔ དབང་འདི་ལན་གཅིག་ཐོབ་པས་ཀྱང༔ གནས་སྐབས་བར་ཆད་རྐྱེན་ལས་གྲོལ༔ འཕོས་ཚེ་བཻ་ཌཱུར་ཞིང་ཁམས་བསྒྲོད༔ དེ་ནས་ཞིང་འབྱུང་གདུལ་བྱ་སྨིན༔ ཕན་པའི་ཡོན་ཏན་བསམ་ལས་འདས༔ ཨོ་རྒྱན་དགོངས་བཅུད་ཡང་སྙིང་ཆོས༔ མཚོ་རྒྱལ་ཨ་ཙར་ཡོངས་ལ་གདམས༔ འདི་ཕྱིའི་དཔལ་དང་དགེ་ལེགས་འབྱུང༔ ཐེ་ཚོམ་མེད་ན་བྱིན་རླབས་མྱུར༔ ལོག་རྟོག་ཅན་ལ་ཕག་ཏུ་སྦས༔ སྐལ་ལྡན་ཡོངས་ལ་སྟོན་པར་འོས༔ ཉམས་སུ་བླངས་ན་རྟགས་མཚན་འབྱུང༔ རྣོ་ནུས་ཐོན་པ་གཏེར་གྱི་ཁྱད༔ བཀའ་སྲུང་སྨན་གྱི་ལྷ་མོས་འཚོས༔ ཉམས་པ་ཅན་གྱི་སྲོག་ལ་རྒོལ༔ སྐལ་ལྡན་དམ་པ་སྲུངས་ཤིང་སྐྱོབས༔ ས་མ་ཡཱ༔ རྒྱ་རྒྱ་རྒྱ༔ ཞེས་པའང་རིང་མོ་ནས་སེམས་ལ་ཤར་ཡང་སྦས་པའི་ཚུལ་གྱིས་ཅི་མི་སྙམ་པར་བཞག་པ༔ ཕྱིས་ལས་ལྡན་ལུང་ཟིན་དམ་པ་ལུང་རྟོགས་བསྟན་འཛིན༔ པདྨ་བསྟན་འཛིན༔ ཀརྨ་ཡེ་ཤེས་སོགས་ཀྱིས་བསྐུལ་བ་ལ་བརྟེན་ནས་ཨོ་རྒྱན་རྡོ་རྗེ་འཆང་གི་རྒྱལ་ཚབ་འཁྲུལ་བ་མེད་པར་དབུགས་དབྱུང་ལུང་བསྟན་ཐོབ་པའི་གཏེར་སྟོན་བསམ་གཏན་ཡེ་ཤེས་གླིང་པར་འབོད་པས་རིག་པ་མཉམ་བཞག་གི་སྒྲོམ་ནས་བཏོན་ཏེ་མགྱོགས་པར་བྲིས་པའི་དགེ་བས་ཁམས་གསུམ་སྐྱེ་དགུའི་སྡུག་བསྔལ་མཐའ་དག་ཞི་ཞིང་བཻ་ཌཱུརྱར་སྣང་བའི་ཞིང་དུ་མེ་ཏོག་པདྨའི་སྙིང་པོ་སེང་གེའི་ཁྲི་ལ་བརྫུས་ཏེ་སྐྱེ་བར་ཤོག་ཅིག༔ དགེའོ༔