མན་ངག་གནད་ཀྱི་ལས་ཚོགས།

ཡང་གསང་མཁའ་འགྲོའི་ཐུགས་ཐིག་ལས༔ མན་ངག་གནད་ཀྱི་ལས་ཚོགས་སྟོན༔ རྫས་སྔགས་སྨན་དང་ཆུ་བརྟག་སོགས༔ མཁོ་བའི་ཡོ་བྱད་རྣམ་པ་བཞི༔ འགྲོ་ལ་ཕན་ཕྱིར་འདིར་བཀོད་ཀྱཻ༔ ས་མ་ཡཱ༔ རིགས་གསུམ་མགོན་དང་སྨན་གྱི་བླ༔ ཨོ་རྒྱན་པདྨ་མཚོ་རྒྱལ་དང༔ དབྱེར་མེད་ལུང་རིག་གླིང་པ་མཁྱེན༔ ཀྱཻ་ཀྱཻ་དེང་སང་ལྔ་བདོ་སྙིགས་མའི་དུས༔ ཆོས་བྱེད་སྒྲུབ་ཚུགས་ཟིན་པ་དཀོན༔ མཁས་མཆོག་རྣམས་ནི་བདུད་ཀྱིས་བསླུ༔ གྲུབ་ཐོབ་འདྲ་མོའི་སྤྱོད་པ་ཅན༔ གཏེར་རྫུན་ཕལ་གྱིས་ལོག་ལམ་སྟོན༔ ཁྲིམས་ལྡན་འགའ་ཡིས་ཚུལ་འཆོས་བྱེད༔ མི་སྐྱ་ཕོ་མོས་ཆོས་བྱེད་སློབ༔ ཅིག་ཤོས་དུ་མ་ཡི་མུག་མང༔ དེ་ནང་བྱང་སེམས་འགའ་ཡི་སྤྲུལ༔ སྦས་པའི་ཚུལ་ཅན་འགྲོ་ལ་ཕན༔ དུས་ཡམས་བཅོས་པའི་སྤྱོད་པ་སྐྱོང༔ ལོག་པའི་སྐྱེ་འགྲོས་ཁས་ལེན་ཉུང༔ གཏེར་རིགས་མི་འདྲ་མང་མོད་ཀྱང༔ སྙིང་རྗེ་ཅན་གྱི་ཉམས་ཆོས་ནི༔ ནམ་ལངས་རྗེས་སུ་ཉི་མ་བཞིན༔ བཟང་ངན་ཡོན་ཏན་རྗེས་ནས་མངོན༔ ལོག་ལམ་སྟོན་པའི་བརླང་སྤྱོད་མཁན༔ རི་མཐོའི་དགོང་ཁའི་ཉི་ཟེར་བཞིན༔ ལས་ཀྱི་བྱེད་པ་རྗེས་ཤེས་ཡོང༔ དེ་བཞིན་བདག་གི་ཟབ་ཆོས་མཁའ་འགྲོའི་བརྡ༔ ཨོ་རྒྱན་སྟངས་དཔྱལ་ཐུགས་ལ་བརྣག་པའི་གཏེར༔ ཆུ་ཕོ་རྟོགས་ལྡན་སྐྱེ་མཐའ་ཕན་པའི་མིང༔ པདྨའི་བསྟན་པས་འགྲོ་བ་ཕལ་ཆེར་འདུལ༔ བསམ་གཏན་ཡེ་ཤེས་གླིང་ཞེས་སྦས་པའི་གཏེར༔ ཡང་བཅུད་སྙིང་གི་གདམས་པ་འདི་ན་སྤེལ༔ ས་མ་ཡཱ༔ དང་པོ་རྫས་ཀྱི་མན་ངག་ནི༔ འབྲས་བུ་གསུམ་ནི་ཞིབ་ཏུ་བརྡུང༔ སེལ་མེད་དམ་རྫས་ཆོས་སྨན་དང༔ སྐྱེས་ཆེན་གདུང་རུས་ཚོན་རྩི་ཡིས༔ རིལ་བུ་སྲན་ཆུང་ཙམ་རེ་འམ༔ ཡང་ན་སྐར་ཆུས་སྦགས་པ་ལ༔ ཤ་ཆང་སྒོག་ཙོང་ཐ་མ་ཁ༔ སྤངས་ཤིང་ཡན་ལག་བརྒྱད་སྡོམ་བླངས༔ ཐོ་རངས་རྣམ་འཇོམས་གཟུངས་ཉེར་གཅིག༔ རྣོ་སོ་གདགས་ལ་སྔགས་འདི་བཟླ༔ ཨོཾ་ཨཱཿཧཱུྃཿཕཊ་སྟོང་རྩ་དང༔ ཊ་ཕ་ས་ཧ་ཧྲི་ཨོཾ་ནི༔ ཁྲི་ཕྲག་བཟླས་རྗེས་ཡང་སྔགས་བཟླ༔ རྡོ་རྗེའི་གོ་ཁྲབ་བཟླས་ཆོག་འདོན༔ དེས་ནི་ནད་རིགས་བཞི་བརྒྱ་དང༔ རྩ་བཞི་ལ་སོགས་རྨ་བརྒྱད་སོགས༔ སྨན་པས་བཅོས་མི་ཐུབ་པའི་རིགས༔ འདི་ཡིས་འཇོམས་པར་ཐེ་ཚོམ་མེད༔ ཕན་ཡོན་བརྗོད་པ་བསམ་མི་ཁྱབ༔ གཅིག་ཆོག་རྒྱལ་པོ་ཨེ་མ་ཧོ༔ དཀྱིལ་འཁོར་མི་དགོས་དྲན་ཆོག་དང༔ འདུན་པས་ཚོམ་མེད་ཐང་ཆོག་ཡིན༔ བཛྲ་ས་མ་ཡཱ༔ རྒྱ་རྒྱ་རྒྱ༔ གཉིས་པ་སྔགས་འབྲུའི་མན་ངག་ནི༔ ཤོག་བུ་དྲི་བྲལ་དུག་མེད་ལ༔ རིན་ཆེན་སྣ་ལྔ་མཚལ་རྒྱ་སྣག༔ དྲི་བཟང་ཆུ་ཡིས་འདི་བྲིས་ལ༔ ནང་གི་ནད་ལ་ཁོག་ཏུ་མིད༔ ཕྱི་ཡི་ནད་ལ་གདགས་པས་ཆོག༔ ནད་བརྒྱ་སྔགས་གཅིག་ཟབ་པའི་ཆོས༔ ལྷ་བསྒོམ་དམིགས་པའི་འཕྲོ་འདུ་མེད༔ འདི་ལས་ཟབ་པའི་མན་ངག་ཆོས༔ མདོ་རྒྱུད་དུ་མའི་བཅུད་དུ་དྲིལ༔ མཁའ་འགྲོའི་ཐུགས་ལ་བརྣགས་པའི་གནད༔ ཕན་པའི་ཡོན་ཏན་བརྗོད་མི་ལང༔ འགྲོ་ལ་སྨན་པའི་སྔགས་གཅིག་ཆོག༔ ས་སྟེང་དཀོན་པ་ཨེ་མ་ཧོ༔ སེམས་བསྐྱེད་ལྡན་པས་གནད་ལ་སྦྱོར༔ བཛྲ་ས་མ་ཡཱ༔ གསུམ་པ་སྨན་གྱི་མན་ངག་ནི༔ སངས་རྒྱས་སྨན་བླའི་ཐུགས་བསྐྱེད་ལས༔ བྱུང་བའི་སྨན་མདོ་བརྒྱ་ཕྲག་གི༔ གནད་དོན་མན་ངག་རྩེ་མོ་འདི༔ ཨོ་རྒྱན་སྨན་གྱི་བླ་མ་ཡིས༔ མ་འོངས་དུས་ཀྱི་ཐ་མ་ལ༔ ལྔ་བདོའི་རྩུབ་འགྱུར་བསྐལ་བའི་ཞབས༔ ནད་རིགས་མི་གཅིག་ངོས་མི་ཟིན༔ དེ་ཚེ་གཅིག་ཆོག་གདམས་པ་འདིའི༔ ཡོན་ཏན་བསམ་ལས་འདས་པ་འབྱུང༔ དེ་ཕྱིར་ལག་ལེན་འདི་ལ་བརྩོན༔ རྒྱ་གར་ཡུལ་གྱི་བྷཻ་ཥ་ཛྱཻ༔ དང༔ སྐྱེ་འགྲོ་ལས་བྱུང་བྷཻ་ཥ་ཛྱཻ༔ སྦྱར་བ་དང༔ མི་མཐུན་གསོད་པའི་བྷཻ་ཥ་ཛྱཻ༔ཞིབ་ཏུ་བཏག༔ དགེ་སློང་ཚངས་སྤྱོད་ཁྲིམས་ལྡན་དང༔ བྱིས་པ་རིགས་བཟང་དྲི་ཆུ་ནི༔ བར་མ་ཐོ་རངས་དུས་ཀྱི་ཚེ༔ དུང་ཕོར་སྣོད་དུ་ལེགས་པར་བསྐྱིལ༔ སྨན་ལྷའི་མདོ་འདོན་སྔགས་ཀྱིས་བསྒྲུབ༔ རིལ་བུ་རྒྱ་སྲན་རྡོག་པོ་ཙམ༔ ཞག་བདུན་བསྒྲུབ་ལ་ནད་གདོན་གྱིས༔ ནོན་པའི་ལྟོ་ལ་ཞལ་ཤེས་བཞིན༔ བཏང་ན་སྔོན་ལས་མ་གཏོགས་པའི༔ འཕྲལ་རྐྱེན་མི་གྲོལ་གང་ཡང་མེད༔ ཨོ་རྒྱན་སྨན་བླའི་ཐུགས་བཅུད་ཆོས༔ ལས་འཕྲོ་ལྡན་པའི་བློ་ལ་ཤར༔ ཕན་པའི་ཡོན་ཏན་བརྗོད་ན་ནི༔ འཛད་མེད་སྨན་བླའི་ལྗགས་ཀྱང་རྡུགས༔ སེམས་བསྐྱེད་ལྡན་པའི་ཆོས་བདག་གིས༔ ཐེ་ཚོམ་མེད་པར་ཉམས་སུ་ལོངས༔ འགྲོ་ལ་ཕན་པ་རྒྱ་ཆེན་འགྱུར༔ གཅིག་ཆོག་ར་ཛ་ཨེ་མ་ཧོ༔ འདི་ལས་ལྷག་པ་བྱ་སླ་དང༔ ཚེགས་ཆུང་དོན་ཆེ་ས་སྟེང་དཀོན༔ བཛྲ་ས་མ་ཡཱ༔ རྒྱ་རྒྱ་རྒྱ༔ བཞི་པ་ཆུ་བརྟགས་ནད་ཁམས་དཔྱད༔ བརྟགས་བྱ་ཐོ་རངས་ལངས་པའི་ཚེ༔ དུང་ཕོར་རམ་ནི་དཀར་ཡོལ་ནང༔ དྲི་ཆུ་བར་མ་ལེགས་པར་བསྐྱིལ༔ དཔྱོད་ལྡན་དམ་པས་རབ་ཏུ་དཀྲུག༔ ཆུ་མདོག་དཀར་ཞིང་ལྦུ་བ་འབུར༔ རླུང་ཤེད་ཆེ་བའི་ནད་ཀྱི་ཁམས༔ ཆུ་མདོག་སེར་ན་མཁྲིས་པ་རྒྱས༔ ཆུ་མདོག་དམར་ན་ཁྲག་མཁྲིས་ལྡང༔ ཆུ་མདོག་སྔོ་ན་གྲང་ཞད་ཆེ༔ དྭངས་སྙིགས་འབྱེད་དང་རུལ་བ་ན༔ ཚེ་བླ་ཉམས་ཤིང་དུས་བྱའི་རྟགས༔ ཚད་པས་ཁྲག་མདོག་དུད་ཁ་འབྱུང༔ ལྕེ་ལ་རེག་ན་སྐྱུར་བ་འབྱུང༔ ལྦུ་བ་ཙིག་ཙིག་མང་བ་དང༔ ཙག་ཙག་མང་ན་གདོན་གྱི་ངོ༔ རིམ་གྲོ་ཆེན་པོས་བསླུ་བར་ངེས༔ ལྦུ་བ་ཉུང་ཞིང་ཕྱོད་ཕྱོད་ཀྱིས༔ ནད་མེད་གདོན་གྱིས་བཏང་བའོ༔ ས་མ་ཡཱ༔