འཇིགས་བརྒྱད་ཞི་བའི་གསོལ་འདེབས་ཀྱི་ཆ་ལག་འཇིགས་སྐྱོབ་གོ་ཆ་མི་ཤིགས་རྡོ་རྗེ།

ཡང་གསང་ཌཱཀྐིའི་ཐུགས་ཐིག་ལས༔ འཇིགས་བརྒྱད་ཞི་བའི་གསོལ་འདེབས་ཀྱི་ཆ་ལག་འཇིགས་སྐྱོབ་གོ་ཆ་མི་ཤིགས་རྡོ་རྗེ་ཞེས་བྱ་བ་བཞུགས༔

ཡང་གསང་ཌཱཀྐིའི་ཐུགས་ཐིག་ལས༔ རཀྴ་ཐོད་ཕྲེང་ལུས་དཀྱིལ་བསྟན༔ སྲིན་རྒྱལ་ཐོད་ཕྲེང་རྩལ་ལ་འདུད༔ སྙིགས་མའི་དུས་ཀྱི་འགྲོ་བ་ཀུན༔ ནད་གདོན་བགེགས་ཀྱིས་ཉེ་བར་འཚེ༔ མི་འདོད་འབྱུང་པོས་ཚ་རེག་གཏོང༔ དུག་ལྔའི་རང་གཟུགས་གདོན་གྱིས་བརླམས༔ ཆོས་བྱེད་དམ་སྲིས་འགྲུབ་མི་སྟེར༔ ཕྱུགས་ལ་འགོང་པོས་གོད་ཡམས་གཏོང༔ མི་རྣམས་སྙིང་ལ་རྒྱལ་འགོང་ཞུགས༔ ཤོག་སྐྱ་རླུང་གིས་བསྐྱོད་པ་ལྟར༔ སྡོད་པའི་གནས་སུ་བསྲན་མི་ཚུགས༔ རྒྱ་བོད་མི་རྣམས་ཆས་གོས་བསྒྱུར༔ ཕྱོགས་ཀུན་མི་སྙན་སྒྲ་ཡིས་གང༔ ནད་མུག་མཚོན་འཁྲུགས་འཇིགས་པ་འབྱུང༔ སྤྱོད་ངན་རང་གིས་བྱས་ནས་ཀྱང༔ དུས་ངན་གཞན་གྱི་ལས་ལ་བདའ༔ དེ་འདྲའི་དུས་སུ་སྐྱོབ་པའི་ལྷ༔ པད་འབྱུང་སྟངས་དཔྱལ་རིགས་གསུམ་མགོན༔ རྗེ་བཙུན་སྒྲོལ་མས་སྐྱོབ་པར་ངེས༔ ཁྱད་པར་སྡེ་བརྒྱད་ཁ་དར་བའི༔ གཉེན་པོ་རཀྴ་ཐོད་ཕྲེང་རྩལ༔ རྒྱལ་བ་ཡོངས་ཀྱིས་བསྔགས་འོས་པའི༔ ལུས་དཀྱིལ་དཔའ་བོ་གཅིག་སྒྲུབ་བསྟན༔ ས་མ་ཡཱ༔ དང་པོ་སྐྱབས་འགྲོ་སེམས་བསྐྱེད་དང༔ ཚོགས་བསགས་བདུན་པ་སྔོན་སོང་ནས༔ དངོས་གཞི་བསྐྱེད་པའི་ལས་རིམ་ནི༔ ཧཱུྃ་ཧཱུྃ་ཧཱུྃ༔ སྐད་ཅིག་དྲན་རྫོགས་རང་སེམས་བཟོ་མེད་འདི༔ རྔ་ཡབ་རཀྴ་ཕོ་མོ་དམ་སྲིའི་སྟེང༔ རབ་འཇིགས་མེ་ཕྲེང་རྡོ་རྗེ་དྲག་པོ་རྩལ༔ སྐུ་མདོག་དམར་ནག་དབང་དྲག་འཛོམས་པའི་ཞལ༔ སྤྱན་གསུམ་དམར་ཟླུམ་ཁྲོ་འཁྲུགས་ཨམ་གཙིགས་བསྡམ༔ དབུ་སྐྲ་དམར་སེར་གྱེན་བརྫེས་ཐོད་སྐམ་བརྒྱན༔ ཁྲོ་བོའི་ཆས་རྫོགས་མགོ་ཕྲེང་རུས་རྒྱན་གསོལ༔ ཞབས་གཉིས་འདོར་སྟབས་དྲེགས་ཚོགས་ལས་ལ་འགྱེད༔ ཕྱག་གཡས་རྡོ་རྗེ་དབྱིངས་ནས་བགེགས་ལ་གཟིར༔ གཡོན་པས་སྡིགས་མཛུབ་ཕུར་འདྲིལ་མེ་སྟག་འཕྲོ༔ རྒྱལ་བསེན་འབྱུང་པོའི་ཀླད་པ་ཞོ་ལྟར་དཀྲུགས༔ ཞལ་ནས་ཧ་ཧ་ཧཱུྃ་ཕཊ་གད་རྒྱངས་སྒྲོག༔ མི་དང་མི་མིན་དྲེགས་ཚོགས་དབང་དུ་སྡུད༔ མདུན་དུ་དྲང་སྲོང་དུད་ཁ་འཇིགས་པའི་གཟུགས༔ གཡས་སུ་མ་ནིང་མ་ཧཱ་ཀཱ་ལ་ཆེ༔ རྒྱབ་ཏུ་སྲིད་གསུམ་བདག་མོ་ཨེ་ཀ་ཛ༔ གཡོན་དུ་དམ་ཅན་མགར་བ་འཇིགས་ཤིང་རྔམ༔ མཐའ་བསྐོར་ལྷ་སྲིན་དྲེགས་པའི་ཚོགས་ཀྱིས་བསྐོར༔ བར་དུ་ཡི་དམ་མཁའ་འགྲོ་སྤྲིན་ཕུང་འཁྲིགས༔ སྟེང་ན་བརྒྱུད་གསུམ་བླ་མ་སྐར་ལྟར་བཀྲ༔ ལྷ་ཚོགས་ཨ་འཐས་དངོས་གཟུགས་དང་བྲལ་བའི༔ གནས་གསུམ་འབྲུ་གསུམ་ཐུགས་སྲོག་ས་བོན་ལས༔ འོད་འཕྲོས་ལྷོ་ནུབ་རྔ་ཡབ་ལང་ཀའི་གླིང༔ རཀྴ་སྲིན་པོའི་ཡུལ་གླིང་ཆེན་པོ་དགུ༔ རབ་འཇིགས་རྡོ་རྗེ་དབྱིངས་ཀྱི་མཁའ་ཀློང་ནས༔ སྲིན་རྒྱལ་ཐོད་ཕྲེང་ལྕམ་དྲལ་སྡེ་དང་བཅས༔ མ་ཐོག་འདིར་གཤེགས་དམ་ཚིག་རྟེན་ལ་བཞུགས༔ གུས་པས་ཕྱག་འཚལ་མཆོད་ཚོགས་ཀུན་འབུལ་ཞིང༔ གསང་གསུམ་ཡོན་ཏན་རྗེས་སུ་དྲན་པས་བསྟོད༔ མི་དགེའི་ཉམས་ཆག་འགལ་འཁྲུལ་བཤགས་ཤིང་སྡོམ༔ ཡི་གེ་བརྒྱ་པ་ཉེར་གཅིག་བདུན་ལྔ་བརྗོད༔ རང་ཉིད་རྡོ་རྗེ་སྲིན་པོ་ཐོད་ཕྲེང་རྩལ་གྱི་ཐུགས་རིན་པོ་ཆེ་མཆོང་གི་གུར་ཕུབ་པ་འདྲ་བའི་དབུས་སུ་པད་ཟླ་ཉི་མའི་སྟེང་དུ་རང་སྲོག་ཧཱུྃ་དམར་ནག་མེ་རི་དང་བཅས་པའི་མཐར་དྲག་སྔགས་མེ་ཡི་སྤུ་གྲི་གཡས་དང་གཡོན་དུ་འཁོར་བས་མེ་དང་མཚོན་ཆ་ལ་སོགས་འཕྲོས་ཏེ་སེམས་ཅན་མ་རུངས་པ་བསྒྲལ་བའི་ཞིང་དུ་གྱུར་པ་ཐམས་ཅད་ཚར་བཅད༔ ངན་སོང་འཁོར་བའི་ལས་སྒྲིབ་སྦྱངས༔ འཕགས་པ་མཆོད༔ བྱིན་རླབས་དང་འོད་ཟེར་ཚུར་འདུས༔ ཕྱི་ནང་སྣོད་བཅུད་དག་པ་རབ་འབྱམས་དཀྱིལ་འཁོར་འཁོར་ལོའི་རང་བཞིན་དུ་སད་པར་བསམ་ལ༔ སྔགས་སྒྲ་འུ་རུ་རུ་བཟླས་པར་བསམ༔ ཨོཾ་ཨཱཿཧཱུྃ་རཀྴ་ཐོད་ཕྲེང་རྩལ་ཀྲོ་ཏ་ཕཊ་ཕཊ་སརྦ་དུཥྜན་ཧཱུྃ༔ གྲངས་ཀྱི་བསྙེན་པ་ཁྲི་དགུ་སྟོང༔ དུས་ཀྱི་བསྙེན་པ་སྐབས་དང་བསྟུན༔ མཚན་མའི་བསྙེན་པ་རྟགས་དང་སྦྱར༔ དྲག་སྔགས་མེ་དཔུང་རྣོ་སོ་གདགས༔ མ་ཡེངས་ལས་སྦྱོར་ཚོད་དང་བསྟུན༔ དེ་ནས་འཇིགས་སྐྱོབ་གསོལ་བ་འདེབས་པའི་ཚིག༔ རྡོ་རྗེའི་ང་རོ་ཅི་འགྲུབ་གདོན༔ བར་ཆད་རྐྱེན་རྣམས་དབྱིངས་སུ་སེལ༔ མི་འདོད་གཏོང་བའི་གདོན་བགེགས་གཞོམ༔ ཚེ་འཕེལ་ཕྱི་མར་མཁའ་སྤྱོད་བསྒྲོད༔ སྔོན་གྱི་ལས་ཀྱང་སྲབ་པར་ངེས༔ འཕྲལ་རྐྱེན་ཙམ་ལ་སྨོས་ཅི་དགོས༔ བྱིན་རླབས་བཀའ་དང་སྙན་བརྒྱུད་རྫོགས༔ ས་མ་ཡཱ༔ རཀྴ་སྲིན་རྒྱལ་ཐོད་ཕྲེང་གི༔ ལས་ཚོགས་དམིགས་པའི་ལྡེ་ཁ་ནི༔ རིན་ཆེན་བང་མཛོད་ཕྱེ་བ་འདྲ༔ ཁྲིགས་སུ་བཅད་པ་མེད་མོད་ཀྱང༔ མདོར་བསྡུས་རྣམ་གྲངས་བརྒྱད་ཡིན་ནོ༔ རྒྱལ་བསེན་ཡུལ་འདྲེས་འཚེ་བ་ན༔ མདུན་མཁར་མེ་འཁོར་པད་ཉིའི་སྟེང༔ ཕྱག་རྒྱའི་ངོ་བོ་སྟག་མོའི་སྟེང༔ རབ་འཇིགས་རྡོ་རྗེ་གྲོ་བོ་ལོད༔ དམར་སྨུག་སྤྱན་གསུམ་ཨམ་གཙིགས་བསྡམས༔ དམར་སེར་སྐྲ་ལ་ཐོད་སྐམ་བརྒྱན༔ གཡས་པས་གསེར་རྡོར་གཡོན་ལྕགས་ཕུར༔ བགེགས་ལ་བསྡིག་ཅིང་གཟིར་བའི་ཚུལ༔ མེ་དཔུང་ཁྲོ་ཆུང་ཐོག་སེར་འགྱེད༔ རྒྱལ་བསེན་དམ་སྲིའི་ཀླད་པ་འགེམས༔ ཁྲོ་བོ་འཆོལ་བའི་ཆས་དང་ལྡན༔ རང་བཞིན་དབྱིངས་ནས་ཡེ་ཤེས་པ༔ སྤྱན་དྲངས་དམ་ཚིག་པ་ལ་བསྟིམས༔ ཐུགས་ཀར་ཉི་དཀྱིལ་དབུས་སུ་ཧཱུྃ༔ དམར་ནག་མེ་ཕྲེང་ཧཱུྃ་གིས་བསྐོར༔ འོད་འཕྲོས་འཕགས་མཆོད་ལས་སྒྲིབ་སྦྱངས༔ དྲེགས་པ་ཚར་བཅད་དབང་དུ་བསྡུས༔ མ་ཡེངས་བྱམས་བརྩེ་གསལ་སྣང་ལྷའི༔ དག་པ་དྲན་པའི་ངང་ཉིད་ལས༔ སྣང་སྲིད་ཧཱུྃ་གི་འཕྲོ་འདུ་བསྒོམ༔ ཧཱུྃ་ཧཱུྃ་ཧཱུྃ༔ རིག་པ་བརྟུལ་ཞུགས་ངར་ལྡན་པས༔ ཧཱུྃ་གི་སྣང་གླུ་དར་དིར་ལེན༔ རེ་འགའ་དབྱིངས་རིག་བསྲེ་སྟེ་བཟླ༔ རེ་འགའ་ལྟ་བའི་གདངས་ཀྱིས་བཟླ༔ རེ་འགའ་འཕྲོ་འདུ་གཟིར་ཞིང་བཟླ༔ གདོན་ཚབ་ཆེ་ཆུང་འཚམས་པར་བཟླ༔ རྒྱུན་དུ་བྱང་ཆུབ་སེམས་ལྡན་གཅེས༔ དེ་ནས་གསོལ་འདེབས་བརྒྱ་འམ་སྟོང༔ ཅི་འགྲུབ་གདོན་ལ་ཐུགས་དམ་བསྐུལ༔ ནད་གདོན་རྐྱེན་ལས་གྲོལ་བར་ངེས༔ ཐེ་ཚོམ་མེད་ན་བྱིན་རླབས་མྱུར༔ གསང་སྔགས་ཟབ་པའི་ཁྱད་ཆོས་ཡིན༔ ལོག་སྲེད་ཅན་ལ་ཨ་ཐམ་རྒྱ༔ ས་མ་ཡཱ༔ ཨི་ཏན་ཏེ་རྒྱ༔ ན་ར་ཀན་རྒྱ༔ སོ་ཕག་ཤི་ན་རྒྱ༔ ཟབ་རྒྱ༔ གཏེར་རྒྱ༔ ནད་གདོན་བགེགས་ཀྱིས་ཉེན་པ་ན༔ མདུན་མཁར་ཨོ་རྒྱན་སྨན་གྱི་ལྷ༔ སྐུ་མདོག་སྔོན་པོ་བཻ་ཌཱུར་མདོག༔ ཕྱག་གཡས་རྣམ་རྒྱལ་གསེར་མདོག་ནི༔ ཐུགས་ཀར་སྡིགས་མཛུབ་ཚུལ་གྱིས་འཛིན༔ ཨ་རུ་རློན་པའི་ཆར་པ་འབེབས༔ ནད་ཀྱིས་ཉེན་ལ་ཐིམ་པར་གྱུར༔ ཕྱག་གཡོན་མཉམ་བཞག་ལྷུང་བཟེད་ནི༔ འཆི་མེད་སྨན་གྱིས་གང་བ་འཛིན༔ འགྲོ་ཀུན་འཆི་བའི་འཇིགས་པ་སྐྱོབ༔ ཞབས་གཉིས་རྡོ་རྗེའི་སྐྱིལ་མོ་ཀྲུང༔ པད་ཟླར་བཞུགས་ཤིང་མཚན་དཔེར་ལྡན༔ ན་བཟའ་ཆོས་གོས་གསུམ་གྱིས་ཀླུབ༔ ཐུགས་ཀར་ཟླ་དཀྱིལ་ཧཱུྃ་ཡིག་མཐིང་ཀའི་མཐར༔ གཟུངས་སྔགས་འཁོར་བའི་འོད་ཀྱིས་འཕགས་པ་མཆོད༔ སེམས་ཅན་ཀུན་སྨིན་སྣོད་བཅུད་འཕགས་པའི་ཞིང༔ འགྲོ་ཀུན་ནད་གདོན་རྐྱེན་ལས་གྲོལ་བར་གྱུར༔ ཏདྱ་ཐཱ༔ བཻ་ཥ་ཛྱཻ་བཻ་ཥ་ཛྱཻ་མ་ཧཱ་བཻ་ཥ་ཛྱཻ་གུ་རུ་བཻཌཱུ་པྲ་བྷ་ར་ཛ་ཡ་སྭཱཧཱ༔ རྩ་བའི་སྔགས་ནི་ཁྲི་ཕྲག་བཟླ༔ ནད་གདོན་རྐྱེན་ལས་མ་གྲོལ་ན༔ རྩ་གསུམ་ལྷ་ཡི་བྱིན་རླབས་ཞན༔ དེ་ཕྱིར་སྙིང་ལས་གཅེས་པར་ཟུངས༔ སྨན་ལྷའི་གཟུངས་བདུན་མཚན་བདུན་བརྗོད༔ དེ་ནས་འཇིགས་སྐྱོབ་གསོལ་འདེབས་དང༔ བསམ་ལྷུན་སྨན་བླའི་སྒོས་སྒྲུབ་བྱ༔ མི་ཕྱུགས་ནད་ལ་ཁྲུས་དང་ནི༔ སྔགས་ཆུ་བླུད་ཅིང་བསྲུང་བ་བྱ༔ ས་མ་ཡཱ༔ དམག་དང་འཁྲུགས་རྩོད་བཟློག་པ་ལ༔ མདུན་མཁར་མེ་རླུང་དུད་སྤྲིན་འཚུབས༔ ཐོག་སེར་སྐྱིན་འདིང་དྲག་པོའི་དབུས༔ ཨོ་རྒྱན་ལྷ་སྲིན་སྡེ་བརྒྱད་ནི༔ དབུ་དགུ་བྱ་རོག་མགོ་དང་བཅུ༔ ཕྱག་བཞིའི་དང་པོ་གཉིས་ཀྱིས་ནི༔ སྲིད་པ་ལྷ་ཡི་མདའ་གཞུ་བརྡུང༔ ཐ་གཉིས་རྒྱལ་མཚན་འཁོར་ལོ་འཛིན༔ སྦྲུལ་མཇུག་སྒྲ་བརྒྱའི་སྟེང་ན་འཁྱིལ༔ སྐུ་ལས་གཟའ་བརྒྱད་གདོང་མོ་དང༔ དྲེགས་པའི་ཚོགས་འཕྲོས་དམག་འཁྲུགས་བཟློག༔ བཟློག་བསད་ལས་ལ་ཁྲོ་འཁྲུགས་རྔམ༔ ཐུགས་ཀར་ཉི་དཀྱིལ་ཀྵཿཡིག་སྨུག༔ མཐའ་མར་གཡས་བསྐོར་སྔགས་ཀྱིས་བརྒྱན༔ ལྷ་སྲིན་སྡེ་བརྒྱད་ལས་ལ་མངགས༔ ཨོཾ་བཛྲ་རཀྴ་ཐོད་ཕྲེང་རྩལ་ཀྵ་རཀྴ་ར་ཧུ་ལ་ཨ་ཡ་མ་དུ་རུ་ཙ་ཤ་ན་ཧཱུྃ་ཕཊ༔ དགྲ་བགེགས་དམག་དཔུང་ཤིག་ཕྱེ་གཏོར་མཱ་ར་ཡ་ཕཊ་བྷྱོ་བཟློག་སོད༔ ཅེས་འདི་བརྒྱ་སྟོང་ཁྲི་སྐབས་བཟླ༔ ཐུན་མཚམས་འཇིགས་སྐྱོབ་གསོལ་འདེབས་དང༔ གཟའ་གསོལ་མཆོད་པ་ཅི་འགྲུབ་གདོན༔ དེས་ནི་མཐའ་དམག་འཁྲུགས་རྩོད་ཞི༔ ཉེར་འཚེ་གཞན་ལ་སྨོས་ཅི་དགོས༔ ས་མ་ཡཱ༔ གཟའ་ཀླུ་གཉན་གྱིས་འཚེ་བ་ནི༔ མདུན་མཁར་གསང་བའི་བདག་པོ་ལ༔ བྱ་ཁྱུང་རིགས་ལྔས་བསྐོར་བར་དམིགས༔ གསང་བདག་སྐུ་མདོག་སྔོ་མདངས་འཚེར༔ སྦྲུལ་རིགས་ལྔ་ཡིས་སྐུ་ལ་བརྒྱན༔ ས་བདག་གཉན་རིགས་བསྣོལ་སྟེང་འགྱིང༔ ཕྱག་གཡས་གསེར་རྡོར་མཁའ་ལ་ཕྱར༔ ས་བདག་བདུད་སྲིན་ཀླད་པ་འགེམས༔ ཕྱག་གཡོན་སྦྲུལ་ཞགས་ཁྱུགས་སེ་ཁྱུག༔ གཟའ་ཀླུ་དམ་འགོང་འཆིང་ཞིང་སྡོམ༔ ཞལ་གདངས་སྤྱན་བསྒྲད་མཆེ་བ་གཙིགས༔ དབུ་སྐྲ་དམར་སེར་སྦྲུལ་གྱིས་བཅིངས༔ ཁྲོ་ཆས་བཅུ་དྲུག་སྐུ་ལ་གསོལ༔ གནས་གསུམ་འབྲུ་གསུམ་ལས་འོད་འཕྲོས༔ ལྕང་ལོ་ཅན་ནས་གསང་བའི་བདག༔ བྱ་ཁྱུང་རིགས་ལྔ་དང་བཅས་པ༔ སྤྱན་དྲངས་དམ་ཚིག་པ་ལ་བསྟིམ༔ དམ་ཡེ་དབྱེར་མེད་བཞུགས་པར་གསོལ༔ ཛཿཧཱུྃ་བཾ་ཧོ་ཏིཥྛནྟུ༔ གསང་བདག་ཐུགས་མཆོག་རྡོ་རྗེ་སྔོ༔ དེ་དབུས་ཐུགས་སྲོག་ཧཱུྃ་གི་མཐར༔ ཨོཾ་བཛྲ་ཙནྜ་མ་ཧཱ་རོ་ཥ་ཎ་ཁྲོཾ་གྷ་རུ་ཊ་པཉྩ་ཛྙ་ན་སརྦ་སིདྡྷི་ཧཱུྃ་ཕཊ༔ སྔགས་ནི་གྲངས་དུས་རྟགས་དང་སྦྱར༔ ས་བདག་གཟའ་ཀླུ་གཉན་རིགས་ལ༔ འདི་ལས་ལྷག་པ་ཡོད་རེ་ཀན༔ གསང་སྟེ་ཉམས་སུ་ལེན་པ་གཅེས༔ དེ་རྗེས་འཇིགས་སྐྱོབ་གསོལ་འདེབས་དང༔ གོས་སྔོན་ཟུང་ལ་གྲངས་སུ་སྐྱོལ༔ སྔོན་ལས་མིན་པ་གང་ལ་ཡང༔ དྲན་ཆོག་ཐང་ཆོག་ཟབ་པའི་ཆོས༔ མཚོ་རྒྱལ་ཐུགས་ལ་བརྣག་པའི་ཆོས༔ ས་མ་ཡཱ༔ འཇིགས་པ་བརྒྱད་དང་བཅུ་དྲུག་ལས༔ སྐྱོབ་པའི་གསང་སྔགས་ཟབ་པའི་བཅུད༔ སྤྱི་ལ་ཕན་པའི་ཟབ་གནད་ནི༔ མདུན་མཁར་འཇའ་འོད་འཁྲིགས་པའི་ཀློང༔ པད་ཉི་ཟླ་བའི་གདན་ཀྱི་ཁར༔ སེང་ལྡིང་ནགས་ཀྱི་ཏཱ་རེ་ནི༔ སྐུ་མདོག་མར་གད་ལྗང་གུའི་མདོག༔ ཞལ་གཅིག་སྤྱན་དཀྱུས་འགྲོ་ལ་གཟིགས༔ ཕྱག་གཉིས་མཆོག་སྦྱིན་སྐྱབས་སྦྱིན་རྒྱས༔ ཨུཏྤལ་ཆོས་ཀྱི་འཁོར་ལོ་འཛིན༔ ཞབས་གཉིས་སེམས་མའི་སྐྱིལ་ཀྲུང་བཞུགས༔ གནས་གསུམ་འབྲུ་གསུམ་གསལ་བ་དང༔ ཐུགས་སྲོག་ཏཱཾ་ལས་འོད་ཟེར་འཕྲོས༔ པོ་ཊ་ལ་སོགས་དག་ཞིང་ནས༔ སྒྲོལ་མའི་ལྷ་ཚོགས་སྤྱན་དྲངས་གྱུར༔ དམ་ཚིག་ཡེ་ཤེས་དབྱེར་མེད་པར༔ ཛཿཧཱུྃ་བཾ་ཧོཿབཞུགས་པར་གྱུར༔ ཐུགས་ཀར་ཨུཏྤལ་ཟླ་སྟེང་ཏཱཾ༔ རང་མདོག་མཐའ་མར་སྔགས་ཀྱིས་བསྐོར༔ ཨོཾ་ཏཱ་རེ་ཏུཏྟ་རེ་ཏུ་རེ་སྭཱཧཱ༔ ཞེས་པ་ཁྲི་བརྒྱད་ལས་མི་དམའ༔ དེ་ནས་འཇིགས་པ་ཡོངས་སྐྱོབ་ཀྱི༔ གཟུངས་སྔགས་འདི་ལ་ནན་ཏན་མཛོད༔ ཨོཾ་ཨརྱ་ཏཱ་རེ་ཏུཏྟ་རེ་ཏུ་རེ་ད་ན་ཏྲ་ཡ་སྭཱཧཱ༔ ཅི་འགྲུབ་མཐར༔ བདག་སོགས་འགྲོ་བའི་འཇིགས་པ་བརྒྱད་དང་བཅུ་དྲུག་ལས་སྐྱོབ་པར་གྱུར་ཅིག༔ མཆོག་དང་ཐུན་མོང་གི་དངོས་གྲུབ་མ་ལུས་བདག་ལ་སྩལ་དུ་གསོལ༔ ཞེས་དང་འཇིགས་བརྒྱད་ཞི་བའི་གསོལ་འདེབས་འདོན༔ དེ་ནས་སྒྲོལ་མའི་འདོད་གསོལ་སྦྱར༔ མི་འདོད་རྐྱེན་ལས་གྲོལ་བར་ངེས༔ བསླུ་བ་མེད་དོ་པདྨའི་བཀའ༔ ཕྱི་མར་གཡུ་ལོ་བཀོད་དུ་གྲོལ༔ ཏཱ་རེ་ལྷ་མོས་རྗེས་སུ་འཛིན༔ ས་མ་ཡཱ༔ འབྱུང་བ་བཞི་ཡིས་གཙེས་དོགས་ན༔ མདུན་མཁར་མེ་རླུང་འཇའ་སྤྲིན་འཁྲིགས༔ དེ་ཡི་དབུས་སུ་པད་ཟླའི་སྟེང༔ དམ་པ་སངས་རྒྱས་སྐུ་མདོག་སྨུག༔ རས་གོས་སྒོམ་ཐག་སྟག་ཤམ་གསོལ༔ རུས་པའི་རྒྱན་དང་ཐོར་ཅོག་མཛེས༔ བརྟུལ་ཞུགས་རྔམ་པའི་ལྟ་སྟངས་མཛད༔ ཕྱག་གཡས་སྐྱབས་སྦྱིན་བདག་ལ་བསྟན༔ འབྱུང་བའི་གཡོ་འཁྲུགས་བཟློག་པར་བསམ༔ དམ་ཚིག་ཡེ་ཤེས་གཉིས་སུ་མེད༔ གཉིས་མེད་དག་མཉམ་ཆེན་པོར་བསྒོམ༔ ཨ་ཨ་སོགས་དབྱངས་དང༔ ཀ་ཁ་སོགས་གསལ་བྱེད་རྣམས་ལོང་བའི་སྐབས་དང་དགོས་གལ་བསྟུན༔ རཾ་ཤནྟིཾ་ཀུ་རུ་ཡེ་སྭཱཧཱ༔ མེ་ཡི་འཇིགས་པ་ཞི་བར་འགྱུར༔ ཡཾ་ཤནྟིཾ་ཀུ་རུ་ཡེ་སྭཱཧཱ༔ དེས་ནི་རླུང་གི་འཇིགས་པ་ཞི༔ ཁཾ་ཤནྟིཾ་ཀུ་རུ་ཡེ་སྭཱཧཱ༔ དེས་ནི་ཆུ་ཡི་འཇིགས་པ་སེལ༔ ལཾ་ཤནྟིཾ་ཀུ་རུ་ཡེ་སྭཱཧཱ༔ དེས་ནི་ས་གཡོའི་འཇིགས་པ་སེལ༔ ཀུན་ལ་དབྱངས་གསལ་དང་སྦྲགས་ཏེ༔ བརྟུལ་ཞུགས་བྱམས་དང་སྙིང་རྗེ་བསྐྱེད༔ དེ་ནས་འཇིགས་བརྒྱད་སྐྱོབ་པའི་གསོལ་འདེབས་དང༔ རིག་སྔགས་རྣོན་པོས་རྣོ་སོ་གདགས༔ ས་མ་ཡཱ༔ མི་འདོད་གློ་གོར་ཧོན་གསུམ་དང༔ ཕྱུགས་ནད་ཡམས་རིགས་གང་ལ་ཡང༔ མདུན་མཁར་ཐུབ་དབང་སངས་རྒྱས་བསྒོམ༔ ལྷུང་བཟེད་བདུད་རྩི་སྨན་གྱིས་བཀང༔ མི་ཕྱུགས་ཡོངས་ལ་ཁྲུས་བྱས་པས༔ ནད་ཀྱིས་མི་ཚུགས་སྐྱོན་ལས་གྲོལ༔ ནད་དུག་སྨན་དུ་འགྱུར་བར་བསམ༔ མདུན་དུ་སྲིད་རྒྱལ་དུད་སོལ་མ༔ དཀར་གསལ་མཛེས་འཛུམ་པད་ཟླར་བཞེངས༔ དར་དང་རཏྣ་རྒྱན་ཆས་སྤུད༔ ཕྱག་གཡས་ནད་འཇོམས་སྨན་ལྗོན་ལས༔ ཨ་རུ་རྣམ་རྒྱལ་ཆར་བ་འབེབས༔ ཕྱག་གཡོན་བདུད་རྩིའི་ཐོད་པ་བསྣམས༔ ནད་ཀྱིས་གདུང་ལ་བླུད་པར་དམིགས༔ མི་ཕྱུགས་ནད་ཞི་བྱམས་སེམས་འབྱུང༔ མུ་ནེའི་གཤམ་དུ་དུད་སོལ་མའི་རྩ་སྔགས་གཤམ་འདོགས་རིགས་པས་འཕྲུལ༔ ཨོཾ་བཛྲ་མ་ཧཱ་ཀ་ལི་རེ་མ་ཏི་ས་མ་ཡཱ་ཙིཏྟ་ཧྲིང་ཛ་སིདྡྷི་ཧཱུྃ༔ སྨན་གྱི་གཟུངས་དང་མཚན་བརྗོད་དང༔ འཇིགས་སྐྱོབ་གསོལ་འདེབས་བསམ་ལྷུན་ནས༔ བྱུང་བའི་སྨན་བླའི་གསོལ་འདེབས་གདོན༔ སྔོན་ལས་མ་གཏོགས་གང་ལ་ཡང༔ ཕན་པར་ངེས་སོ་ས་མ་ཡཱ༔ དགྲ་དང་བགེགས་ཀྱིས་འཚེ་བ་དང༔ མཐོ་གནོན་བརྙས་བཅོས་བྱེད་པ་ན༔ རང་ཉིད་སྲིན་རྒྱལ་ཐོད་ཕྲེང་བསྒོམ༔ མདུན་དུ་རང་མོས་ཆོས་སྐྱོང་བསྒོམ༔ དམར་གྱི་གཏོར་མ་འབུལ་བྱས་ལ༔ འགུག་གཞུག་བྱ་བ་གནད་དུ་ཆེ༔ མཆན། སྲུང་མ་དེ་ཉིད་ལས་ལ་བསྐུལ༔ བདག་གི་ཐུགས་ལས་འོད་ཟེར་འཕྲོས༔ སྲུང་མའི་ཐུགས་ཀའི་ས་བོན་བསྲེགས༔ དེ་ཡིས་སྔོན་གྱི་དམ་ཚིག་དྲན༔ དེ་ནས་འབོད་རྦད་བསད་གསུམ་བཟླས༔ དགོས་པའི་དུས་སུ་འདི་ཉིད་སྒྲུབ༔ དམིགས་པའི་མདའ་ཡིས་ འབེན ་ལ་བསྣུན༔ དགྲ་བགེགས་གང་ལ་ཡང་རྟགས་མཚན་འབྱུང༔ དམིགས་པ་གཅིག་པུས་ཆོག་པ་འདི༔ དགོངས་ཀློང་ཟབ་མོའི་ཁྱད་ཆོས་ཡིན༔ ལག་ལེན་གུད་དུ་སྦས་ལ་ལྟོས༔ ས་མ་ཡཱ༔ རྗེས་ལ་མཆོད་བསྟོད་དངོས་གྲུབ་ལེན༔ ཡི་གེ་བརྒྱ་པས་ནོངས་པ་བཤགས༔ མི་དམིགས་སེམས་ཀྱི་གཤིས་ལ་ཀློད༔ ལྟར་སྣང་བསྲུང་བའི་གོ་ཆ་གྱོན༔ དགེ་ཚོགས་འཁོར་གསུམ་ཡོངས་བྲལ་བསྔོ༔ དེ་ནས་ཤིས་པས་མཐའ་བརྒྱན་ནི༔ ཨེ་མ་ཧོ༔ སྐུ་གསུམ་ཞིང་ནས་འགྲོ་བའི་དོན་ལ་དགོངས༔ སྐུ་གསུམ་བདག་ཉིད་རཀྴ་ཐོད་ཕྲེང་རྩལ༔ ཁམས་གསུམ་འགྲོ་བའི་སྐྱབས་མགོན་རིན་པོ་ཆེ༔ སྐྱབས་གསུམ་བཀའ་སྡོད་བདེན་པའི་བཀྲ་ཤིས་ཤོག༔ ཤིན་ཏུ་ཟབ་མྱུར་བྱིན་རླབས་ཆེ༔ ཡེ་ཤེས་ཌཱཀྐིའི་ཞལ་ལུང་བཞིན༔ ཕབ་པའི་ཟབ་ཆོས་བླ་ན་མེད༔ ཕལ་པའི་བློ་ཡི་སྤྱོད་ཡུལ་མིན༔ ལོག་སྲེད་ཅན་ལ་ཕག་ཏུ་སྦོས༔ དད་ལྡན་ཡོངས་ཀྱིས་སྲུངས་ཤིག་རྒྱ༔ བཀའ་ཡི་སྲུང་མ་དྲང་སྲོང་གིས༔ བཀའ་འདི་འཚོས་ལ་དོན་དང་སྤྲོད༔ ས་མ་ཡཱ༔ ཨི་ཏན་ཏེ་རྒྱ༔ ན་ར་ཀན་རྒྱ༔ སོ་ཕག་ཤི་ན་རྒྱ༔ དམ་རྒྱ༔ སྦས་རྒྱ༔ གཏད་རྒྱ༔ ཞེས་པ་འདི་ཡང་སྙིང་ལ་བཀའ་རྒྱ་བྱས་ཀྱང་མཐར་ལས་དང་སྐལ་བ་ལྡན་པའི་བཙུན་པ་བསོད་ནམས་མཐུ་སྟོབས་ཀྱིས་ལྷ་རེག་དཀར་དམར་ཟུང་དང་བཀའ་དང་དམ་ཚིག་འགྱུར་བ་མེད་པའི་བརྡ་མཚོན་རྡོ་རྗེའི་སྐྱེས་བཅས་ནན་ཏན་ཆེན་པོས་བསྐུལ་ངོར་དྲིན་ཆེན་བླ་མ་དགྱེས་པའི་འབངས་དགེ་སྦྱོང་ཕན་མིང་ནས་རིག་པ་རང་བྱུང་དབྱིངས་ཀྱི་བརྡ་ལས་བཅུད་བསྡུས་ཏེ་ཞལ་བཤུས་པ་ཡོངས་ལ་དགེ་ཞིང༔ ཉེས་འགལ་མཆིས་ན་རྩ་གསུམ་སྲུང་མར་བཤགས༔ སརྦ་ཛ་ག་དམ༔