བཀའ་ཡི་སྲུང་མ་ཞིང་སྐྱོང་གི་གསོལ་མཆོད་ལོག་འདྲེན་མཐར་བྱེད།
ཡང་གསང་ཌཱཀྐིའི་ཐུགས་ཐིག་ལས༔ བཀའ་ཡི་སྲུང་མ་ཞིང་སྐྱོང་གི་གསོལ་མཆོད་ལོག་འདྲེན་མཐར་བྱེད་བཞུགས༔
སངས་རྒྱས་དམར་པོ་ལ་ཕྱག་འཚལ་ལོ༔ བཀའ་ཡི་སྲུང་མ་ཞིང་སྐྱོང་གི༔ སྒྲུབ་པ་གསོལ་མཆོད་བྱེད་འདོད་ན༔ ཡར་མར་དུས་ཚེས་བཟང་པོ་ལ༔ སྨན་གཏོར་རཀྟ་སྐྱེམས་ཕུད་བཤམས༔ རྣལ་འབྱོར་ལྷ་ཡི་ཏིང་འཛིན་གྱིས༔ དགོངས་པ་མི་འགྱུར་གཟེར་གྱིས་གདབ༔ ཞིང་སྐྱོང་འཁོར་བཅས་མགྲོན་དུ་འབོད༔ ཀྱཻ་ཀྱཻ༔ ཡེ་གཞི་འཁོར་འདས་དབྱེར་མེད་ཀྱང༔ རླུང་རིག་གཡོ་བའི་རང་རྩལ་ལས༔ ཕན་གནོད་བདེ་སྡུག་སྣང་བ་འགྱེད༔ ལྷུན་གྲུབ་རང་རྩལ་ཕན་བྱེད་ཀྱི༔ ལྷ་ནི་འོད་དཔག་མེད་མགོན་གྱི༔ སྒྱུ་འཕྲུལ་ཞིང་སྐྱོང་སེང་གེའི་གདོང༔ དམར་ནག་རབ་རྔམ་རྟ་མཆོག་ནི༔ བྲ་ནག་རླུང་གི་ཤུགས་ཅན་ཞོན༔ རྫུ་འཕྲུལ་སྟོང་གསུམ་ཡུད་ཀྱིས་བསྐོར༔ ལས་ལ་ཆས་ཚེ་སྲོག་བདུད་ནག༔ མི་སྲུན་སེང་གེའི་རལ་པ་ཅན༔ ཕྱག་གཡས་དྲི་ཤུལ་རྩེ་གསུམ་བསྣམས༔ གཡོན་པས་ཐོད་ཁྲག་ཞལ་དུ་རྔུབ༔ དར་ནག་བེར་ཆེན་སྐུ་ལ་གསོལ༔ གཡོན་ཕྱོགས་སི་ན་ར་མ་ནི༔ སྔོ་ནག་སྤྱན་བསྒྲད་མཆེ་བ་གཙིག༔ དར་ནག་གོ་ཟུ་ཨཾ་རག་ཅན༔ གཡས་གཡོན་གྲི་ཁུག་ཐོད་ཁྲག་བསྣམས༔ ཞབས་གཉིས་གར་སྟབས་རླུང་ནག་ཞོན༔ མདུན་དུ་ལས་མཁན་ཕོ་མོ་རྒྱུ༔ སྤྱི་གཙུག་རྐང་པས་གཏོར་མ་ནི༔ ཉམས་པ་ཅན་ལ་འཕེན་པ་འོ༔ འཁོར་དུ་དྲེགས་པ་སྡེ་བརྒྱད་དང༔ ལས་བྱེད་ཤན་པ་འབུམ་གྱིས་བསྐོར༔ རང་རང་ཐུགས་ཀའི་ས་བོན་དང༔ བདག་མདུན་ཐུགས་ཀའི་འོད་ཟེར་གྱིས༔ ཞིང་སྐྱོང་འཁོར་བཅས་ས་མ་ཛ༔ ཞེས་སྤྱན་འདྲེན༔ སྤོས་དཀར་དྲི་ཞིམ་སྤོས་དུད་གཏོང༔ དད་དམ་གདུང་དབྱངས་རོལ་མོས་འབོད༔ ཀྱཻ༔ དད་པ་དང་ནི་དམ་ཚིག་གིས༔ ཚུར་གཤེགས་ཚུར་བྱོན་ཞིང་སྐྱོང་དང༔ སེང་གདོང་ཡབ་ཡུམ་འཁོར་དང་བཅས༔ བཀོད་ལེགས་བཤམས་པའི་གནས་འདི་རུ༔ ཇི་སྲིད་མཆོད་པ་བདག་བགྱིད་ན༔ དེ་སྲིད་ཞིང་སྐྱོང་བཞུགས་སོ་འཚལ༔ པདྨ་ཀ་མ་ལ་ཡེ་སྟྭཾ༔ ཧཱུྃ་ཧོ༔ ཞིང་སྐྱོང་སེང་གདོང་ཡབ་ཡུམ་དང༔ སྤྲུལ་པ་འཁོར་དང་བཅས་པ་ལ༔ ཕྱི་ནང་གསང་གསུམ་མཆོད་པ་དང༔ བསྐང་རྫས་སྒྲུབ་རྫས་བརྟེན་པའི་རྫས༔ རང་མཐུན་མཆོད་པ་དངོས་འབྱོར་དང༔ ཡིད་སྤྲུལ་ཀུན་བཟང་རྣམ་པར་འཕྲུལ༔ ཞིང་སྐྱོང་འཁོར་བཅས་ཐུགས་དམ་བསྐང༔ གསོལ་ལོ་མཆོད་དོ་མངའ་གསོལ་ལོ༔ ལོག་འདྲེན་བསྟན་དགྲ་གཞོམ་པ་དང༔ གནས་སྐབས་མཐར་ཐུག་ཐར་ལམ་ལ༔ འགོད་པའི་ཕྲིན་ལས་མྱུར་དུ་སྒྲུབས༔ སྐུ་གསུང་ཐུགས་ཡོན་ཕྲིན་ལས་བསྟོད༔ ཀྱེ་ཀྱེ༔ ཛཿ དམ་ཚིག་ཅན་གྱི་ལྷ་ཆེན་པོ༔ མ་གཡེལ་མ་གཡེལ་དམ་ལ་འདུས༔ རྦད་དོ་ཉམས་པ་ཆམ་ལ་ཕོབ༔ སངས་རྒྱས་བསྟན་པ་བཤིགས་པ་དང༔ དཀོན་མཆོག་དབུ་འཕང་སྨད་པའི་དགྲ༔ དགེ་འདུན་སྡེ་ལ་འཁུ་བའི་བདུད༔ ནག་ཕྱོགས་མི་དང་མི་མ་ཡིན༔ རིང་བར་ཁུག་ལ་མྱུར་དུ་སྒྲོལ༔ ལོ་དང་ཟླ་བར་མ་འགྱང་ལ༔ བསད་རྟགས་དོན་སྙིང་ད་ལྟ་ལོངས༔ སྒྲུབ་པའི་ལས་འབྲས་མཆིས་པར་མཛོད༔ སྒྲུབ་ལ་རྟགས་མེད་ལུས་ལ་ལྷ་མེད་ན༔ སྔོན་ཚེ་རིག་འཛིན་བརྒྱུད་པའི་དམ་ལས་འགལ༔ ད་ལྟ་རྣལ་འབྱོར་བདག་གི་བཀའ་ཡང་བཅག༔ དམ་བཞིན་དགོངས་ལ་དམ་ཚིག་གཉན་པོ་སྲུངས༔ ང་ཡི་ཡིད་ལ་དམིགས་པའི་བསྟན་དགྲ་འདི༔ སྟོང་གསུམ་གང་དུ་སོང་ཡང་མ་ཤོར་བར༔ ཕོ་རྒྱུད་གྲིས་སོད་མོ་རྒྱུད་མངལ་ནས་སྐོམས༔ མཐའ་རྩ་སྐྱེ་རྒྱུད་ཁ་ཕུང་རྗེས་མེད་མཛོད༔ མ་འདའ་བཛྲ་ཕྲིན་ལས་མྱུར་འགྲུབ་མཛོད༔ ཨོཾ་ཀྵེ་ཏྲ་པ་ལ་སེང་ཧ་མུ་ཁ་སི་ན་ར་མ་གནོད་བྱེད་དགྲ་བགེགས་ཀྱི་ཤ་ཁྲག་རུས་གསུམ་ལ་རྦད་རྦད་ཁཱ་ཧི༔ ཞེས་པའི་འོད་མཚན་སྟོང་འབར་བའི༔ སྒྲུབ་ཐབས་གནད་ལ་དབབ་པའི་ཚེ༔ ཞིང་སྐྱོང་མཆོད་ཐབས་མ་བརྩམ་ན༔ འཁུ་ཞིང་ལྡོག་པའི་ཉེན་ཡོད་ཕྱིར༔ དུས་ལ་བབས་ཚེ་དགོངས་པའི་ཀློང༔ རིག་རྩལ་བརྡ་ལས་བབས་པའི་གཏེར༔ ལས་ཅན་ཆོས་ལ་དབང་བས་བསྐུལ༔ མ་དང་མཁའ་འགྲོས་གནང་བ་སྩོལ༔ རྣལ་འབྱོར་ས་ར་ཧི་ཏ་ཡིས༔ མི་ཟད་གཏེར་ཀྱི་ཆ་ལག་ཏུ༔ འཕགས་མཆོག་ཐུགས་རྗེའི་གནས་མདུན་དུ༔ དགོང་མོའི་ཐུན་སྐབས་གཅིག་ལ་བྲིས༔ ཡང་ཟབ་གནད་ཀྱི་མན་ངག་གོ༔ དམ་ལྡན་ལས་གཞན་སུ་ལ་ཡང༔ གུ་ཧྱ་བརྡ་ཐིམ་རྒྱ༔