དབང་གི་མཚམས་སྦྱོར་རས་པ་གསལ་སྟོབས་ཀྱིས་མཛད་པ།

༄༅། འོད་མཚན་སྟོང་འབར་རྒྱལ་བ་ལ། །སྒོ་གསུམ་གུས་པས་ཕྱག་འཚལ་ལོ། །སྐུ་གསུང་ཐུགས་དབང་ཟབ་མོ་ཡི། །མཚམས་སྦྱོར་གྲོང་ཚིག་གསལ་བར་འགོད།། འོ། ནམ་མཁའ་དང་མཉམ་པའི་སེམས་ཅན་ཐམས་ཅད་རྒྱལ་བ་འོད་མཚན་སྟོང་འབར་འཆི་མེད་རྔ་སྒྲའི་རྒྱལ་པོའི་གོ་འཕང་ཚེ་འདི་ཉིད་ལ་མངོན་དུ་བྱའོ་སྙམ་པའི་སེམས་བསྐྱེད་ཀྱི་དམ་བཅའ་བརྟན་པོའི་ངང་ནས་མ་ཡེངས་པར་གསན་འཚལ། དེ་ལ་འདིར་ཆོས་ཉན་པའི་དུས་སུ་སྣོད་ཀྱི་སྐྱོན་གསུམ་དང་། དྲི་མ་དྲུག མི་འཛིན་པ་ལྔ་དང་བཅས་པ་སྤང་བྱར་ངེས་པར་བྱས་ནས། སླར་ཡང་འདུ་ཤེས་བཞི་བརྟེན། ཕ་རོལ་དུ་ཕྱིན་པ་དྲུག་དང་ལྡན་པའི་སྒོ་ནས་ཚུལ་བཞིན་དུ་ཉན་དགོས་པའི་རྒྱུ་མཚན་ནི། སྐྱེས་རབས་ལས། རབ་ཏུ་དམའ་བའི་སྟན་ལ་འདུག། དུལ་བའི་དཔལ་ནི་རབ་ཏུ་བསྐྱེད། །དགའ་དང་ལྡན་པའི་མིག་གིས་བལྟ། །ཚིག་གི་བདུད་རྩི་འཐུང་བ་བཞིན། །རབ་ཏུ་བསྒྲིམས་ཏེ་ཆོས་ཉོན་ཅིག། ཅེས་གསུངས་པ་ལྟར་ཡིན་ལ། དེ་ཡང་རྒྱལ་བ་ཐབས་ལ་མཁས་ཤིང་ཐུགས་རྗེ་ཆེན་པོའི་བདག་ཉིད་ཅན་དེས་གདུལ་བྱ་སེམས་ཅན་རྣམས་ཀྱི་ཁམས་དང་དབང་པོ་བསམ་པའི་ཁྱད་པར་དང་རྗེས་སུ་མཐུན་པའི་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གསུངས་པ་ཡང་ཚུར་བསྡུས་ན་རྒྱུ་འབྲས་ཀྱི་ཐེག་པ་གཉིས་སུ་འདུ་ལ། དེ་ལ་ཡང་ཞལ་ནས་གསུངས་པའི་བཀའ་མ། རྗེས་སུ་གནང་བའི་གཏེར་མ། བྱིན་གྱིས་བརླབས་པའི་དག་སྣང་མ་སྟེ་སྲོལ་ཀ་གསུམ་ལས། ད་ལམ་འདིར་ནི་ཟབ་མོ་དག་སྣང་མའི་ཕྱོགས་སུ་གཏོགས་པ་རྒྱལ་བ་འོད་མཚན་སྟོང་འབར་འཆི་མེད་མགོན་པོའི་སྒྲུབ་ཐབས་འདི་ཉིད་ཀྱི་ལོ་རྒྱུས་མདོར་བསྡུས་ཙམ་བརྗོད་ན། སྔོན་སངས་རྒྱས་འཇིག་རྟེན་དབང་ཕྱུག་རྒྱལ་པོ་འཇིག་རྟེན་དུ་བྱོན་པའི་དུས་སུ་བྱང་ཆུབ་མཆོག་ཏུ་ཐུགས་བསྐྱེད་ནས་སངས་རྒྱས་ཀྱི་ཞིང་ཁམས་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་གཅིག་གི་ཡོན་ཏན་གྱི་བཀོད་པ་ཐམས་ཅད་གཅིག་ཏུ་བཟླུམས་པའི་ཞིང་ཁམས་གཞན་ལས་ཀྱང་ཁྱད་དུ་འཕགས་པའི་ཞིང་ཁམས་དེ་ཉིད་ལ་སྡུག་བསྔལ་གྱི་སྒྲ་མིང་ཙམ་ཡང་མི་གྲགས་པར་བདེ་བ་ཅན་ཞེས་བདེ་སྐྱིད་ཚད་མེད་པའི་ཞིང་ཁམས་ཉིད་བདག་གིས་འཛིན་ནུས་ཤིང་འོད་མཚན་སྟོང་འབར་ཡིད་ལ་བྱས་ནས་ལན་གཅིག་ཙམ་དུ་གསོལ་བ་རྩེ་གཅིག་ཏུ་བཏབ་ནའང་། བྱང་ཆུབ་ཀྱི་ལམ་ལས་ཕྱིར་མི་ལྡོག་ཅིང་སེམས་ཅན་གང་ཞིག་བདེ་བ་ཅན་གྱི་ཞིང་ཁམས་ཡིད་ལ་གསལ་ཞིང་འོད་དཔག་མེད་ཀྱི་མཚན་ཡིད་ལ་བསྒོམས་ཏེ་ནུབ་ཕྱོགས་སུ་ཐལ་མོ་སྦྱར་ཏེ་ཕྱག་འཚལ་ཞིང་དེར་བསྒྲོད་ནུས་པའི་སྨོན་ལམ་བཏབ་ན་སྐྱེ་ངེས་པ་ཅན་ཡིན་པས། རྒྱལ་བའི་སྨོན་ལམ་ཟབ་མོ་བསླུ་བ་མེད་པ་དེ་བཞིན་ལས་བཟང་ངན་དང་གང་ཟག་ཕོ་མོ་མེད་པར་སུས་སྨོན་ལམ་བཏབ་ན་བདེ་བ་ཅན་དེར་སྐྱེ་ནུས་པའི་ཐུགས་བསྐྱེད་སྨོན་ལམ་དུས་ལས་ཡོལ་བ་མེད་པའི་བདག་ཉིད་སངས་རྒྱས་འོད་དཔག་མེད་པའི་སྒྲུབ་ཐབས་འོད་མཚན་སྟོང་འབར་གྱི་རྗེས་གནང་འདི་ཉིད། མཁའ་འགྲོ་མཚོ་རྒྱལ་དང་ཨ་ཙར་ས་ལེ་འོད་སྟངས་དཔྱལ་གྱི་སྤྲུལ་པ་གཅིག་ཏུ་བཟླུམས་པ་དུས་མཐའི་གཏེར་སྟོན་བསམ་གཏན་ཡེ་ཤེས་གླིང་པ་ཞེས་བྱ་བ་སྔོན་སྦྱངས་ལས་འཕྲོ་བཟང་པོའི་བག་ཆགས་དུས་སུ་སད་ཅིང་། རང་གཞན་གྱི་གཏེར་ལུང་དུ་མ་ནས་བསྔགས་ཤིང་ཆེ་བའི་ཡོན་ཏན་བརྗོད་པའི་ཚུལ་འགའ་ཙམ་སྨོས་ན། དག་སྣང་མཚོ་རྒྱལ་དགོངས་པའི་གསང་མཛོད་ཀྱི་ཆོས་བདག་ལུང་བསྟན་ནོར་བུའི་བང་མཛོད་ལས། ཨོ་རྒྱན་ཆེན་པོས། ད་ལྟའི་ཨ་ཙར་ཤྲི་བྷ་ཏྲ༔ ཉེར་གཅིག་སྐྱེ་བའི་ཐ་མ་མདོ་སྨད་དུ༔ ཕ་མ་མི་རབས་ཆོ་རིགས་བཙུན་པའི་བུ༔ མཁའ་ལྡིང་གར་མཁན་རྩུབ་དྲག་ལོ་ཡི་མཇུག༔ ཡར་ཚེས་དགེ་བར་མཁའ་སྤྲིན་འཇའ་དཀྱུས་ལྟས༔ སྐྱེ་བའི་མྱུ་གུ་དགེ་བའི་བག་ཆགས་སད༔ ལྔ་གསུམ་རྫོགས་འཕྲལ་སྔོན་སྨོན་མཚོ་རྒྱལ་གྱིས༔ བག་ཆགས་བཟང་པོའི་གཏེར་གྱི་བརྡ་ཚིག་འགྲོལ༔ དེ་དུས་ཨོ་རྒྱན་བདག་དང་མཚོ་རྒྱལ་ཡུམ༔ དངོས་ཉམས་རྨི་ལམ་དག་ཏུ་ངེས་པར་མཇལ༔ ཞེས་སོགས་ཡིད་ཆེས་པའི་རྡོ་རྗེའི་ལུང་གིས་དཔང་པོར་བྱས་པ་བཞིན་རྩོད་པའི་དུས་ཀྱི་གཏེར་སྟོན་བསྟན་འཛིན་གྱི་སྐྱེས་བུ་ཆེན་པོ་དེ་ཉིད་ཀྱི་དགོངས་གཏེར་ཡང་གསང་མཁའ་འགྲོའི་ཐུགས་ཐིག་གི་ཆ་ལག རྒྱལ་བ་འོད་མཚན་སྟོང་འབར་གྱི་བྱིན་རླབས་རྗེས་གནང་གི་རིམ་པ་རྣམས་ཚུལ་བཞིན་གནང་བ་ལ་སློབ་དཔོན་གྱིས་བགྱི་བར་འོས་པའི་རིམ་པ་རྣམས་ལེགས་པར་གྲུབ་ཟིན། ད་སློབ་མ་ཁྱེད་རང་རྣམས་ཀྱི་ངོ་སྐལ་དུ་གྱུར་པ་ལ་མཎྜལ་ཞིག་འབུལ་བར་མཛོད། ས་གཞི་སྤོས་ཆུས་སོགས། དེ་ལྟར་མཎྜལ་ཕུལ་བའི་རིམ་པ་སོང་ནས། སླར་ཡང་སྐྱབས་སུ་འགྲོ་བ་ནི། ཆོས་ཐམས་ཅད་ཀྱི་སྒོ་དབྱེ་ཞིང་ལམ་གྱི་རྨང་རྡོ་ལྟ་བུ་ནི་ནང་པ་སངས་རྒྱས་པའི་ཁྱད་ཆོས་ཏེ། སྐྱབས་འགྲོ་བདུན་ཅུ་པ་ལས། སྡོམ་པ་ཀུན་ལ་ཡོད་མོད་ཀྱང་། །སྐྱབས་སུ་མ་སོང་བ་ལ་མེད། །ཅེས་གསུངས་པ་ལྟར་དང་། སྐྱབས་འགྲོའི་སྒོ་དབྱེ་བ་ནི་དད་པ་ཁོ་ན་ཡིན་པས་དེ་ཡང་ཡིད་ཆེས་ཤིང་ཕྱིར་མི་ལྡོག་པའི་དད་པ་ཞིག་རང་རྒྱུད་ལ་སྐྱེ་ནུས་པ་ནི་གལ་ཆེ་སྟེ། ཨོ་རྒྱན་ཆེན་པོས། དད་པ་ཅན་གྱི་གང་ཟག་ཕོ་མོ་ལ༔ པད་འབྱུང་གང་དུའང་མ་བཞུད་སྒོ་ཉལ་ཡོད༔ ང་ཡི་ཚེ་ལ་འདས་གྲོང་ཡོད་མ་ཡིན༔ དད་ལྡན་མི་རེའི་མདུན་ན་པད་འབྱུང་རེ༔ ཞེས་གསུངས་པ་ལྟར་བླ་མ་དང་རྒྱལ་བ་འོད་མཚན་སྟོང་འབར་གཉིས་སུ་མེད་པ་ལ་ཡིད་ཁྱེད་ཤེས་ཀྱི་དད་པ་བརྟན་པོས་སྐྱིད་སྡུག་ལེགས་ཉེས་ཅི་མཛད་ཁྱེད་མཁྱེན་སྙམ་པའི་མོས་གུས་གདུང་ཤུགས་དྲག་པོའི་སྒོ་ནས་སྐྱབས་སུ་འགྲོ་བ་འདིའི་རྗེས་ཟློས་མཛོད། ཧཱུྃ་ཧྲཱིཿ མཆོག་གསུམ་ཀུན་འདུས་སོགས། སྐྱབས་སུ་མཆི། ལན་གསུམ་བྱ། ཞེས་སྐྱབས་སུ་འགྲོ་བ་སྔོན་དུ་གྲུབ་ཟིན་ནས། སླར་ཡང་སེམས་བསྐྱེད་དགོས་པ་ནི། སློབ་དཔོན་ཨིནྟྲ་བྷུ་ཏིས། ཕ་དང་མ་རུ་མ་གྱུར་པའི། །སེམས་ཅན་གང་ཡང་ཡོད་མ་ཡིན། །ཞེས་གསུངས་པ་ལྟར་ཡིན་པས་འདིར་འགྲོ་བ་རང་རང་གི་ལས་སྣང་གིས་སྲིད་པ་རིགས་དྲུག་པོ་འདི་ན་མ་རྒན་སེམས་ཅན་རྣམས་ལ་ལ་ནི་སྡུག་བསྔལ་གྱི་རྒྱུ་ལ་སྤྱོད། ལ་ལ་ནི་སྡུག་བསྔལ་གྱི་འབྲས་བུ་ལ་སྤྱོད་ནས་ཡོད་པའི་ངན་འགྲོའི་སེམས་ཅན་དེ་དག་ཐམས་ཅད་སྡུག་བསྔལ་རྒྱུ་འབྲས་གཉིས་དང་བྲལ་ནས་རང་གནས་ཡེ་ཤེས་ཆེན་པོའི་ས་ལ་བདག་གིས་འགོད་དོ་སྙམ་པའི་སེམས་བསྐྱེད་པ་འདིའི་རྗེས་ཟློས་མཛོད། ཧཱུྃ་ཧྲཱིཿ ཕ་མ་འགྲོ་དྲུག་སོགས་ལན་གསུམ། དེ་ནས་སེམས་བསྐྱེད་པའི་རིམ་པ་རྣམས་གྲུབ་ནས་ཚོགས་བསགས་ཡན་ལག་བདུན་པ་འདིའི་རྗེས་ཟློས་མཛོད། ཧཱུྃ་ཧྲཱིཿ རྒྱལ་བ་ཀུན་སོགས་བསྔོ། སླར་ཡང་ཚོགས་བསགས་ཀྱི་རིམ་པ་སོང་ནས། ད་ནི་སོ་བྱང་སྔགས་གསུམ་གྱི་སྡོམ་པ་རྣམས་ཚུལ་བཞིན་དུ་ཇི་སྲིད་བྱང་ཆུབ་སྙིང་པོའི་བར་དུ་བསྲུང་སྙམ་པའི་སྒོ་ནས་འདིའི་རྗེས་ཟློས་མཛོད། ཧཱུྃ་ཧྲཱིཿ འགྲོ་ལ་གནོད་སྤང་སོ་ཐར་སྡོམ་པ་དང༔ གཞན་ཕན་མཆོག་ཏུ་བརྩོན་པའི་བྱང་ཆུབ་སེམས༔ སྣང་སྲིད་དག་མཉམ་གསང་སྔགས་དམ་ཚིག་སྡོམ༔ མ་ལུས་བདག་ཉིད་ཡང་དག་བཟུང་བར་བགྱི༔ བཛྲ་ས་མ་ཡཱ་ཨཱ༔ བཛྲ་ས་མ་ཡཱ་ན་ར་ཀན༔ ཞེས་པས་དམ་ཆུ་བླུད། དེ་ཡན་ཆད་ཀྱིས་སྔོན་དུ་འགྲོ་བའི་ཆོས་རྣམས་སོང་ནས་ད་ཁྱེད་རང་རྣམས་ཀྱིས་དངོས་གཞིའི་དབང་ཞུ་བ་ལ་ལུས་རྣམ་སྣང་ཆོས་བདུན་དང་། ངག་རླུང་ཁ་སྦྱོར་དང་། ཡིད་གཞན་དུ་མ་གཡེང་བར་དམིགས་པ་འདི་བཞིན་དུ་གྱིས་ཤིག ཨོཾ་མ་ཧཱ་ཤུ་ནྱ་སོགས། ཞེས་བརྗོད་པས་ཁྱེད་རང་རྣམས་ཀྱི་སྣང་ཞེན་གྱི་དངོས་པོར་རྟོག་པ་ཐམས་ཅད་མི་དམིགས་པ་སྟོང་པའི་ངང་ལས་རང་རིག་འདུས་མ་བྱས་པའི་རང་རྩལ་གྱི་གཞལ་ཡས་ཁང་ཚད་དང་མཚན་ཉིད་ཐམས་ཅད་ཡོངས་སུ་རྫོགས་པ་ནུབ་ཕྱོགས་བདེ་བ་ཅན་གྱི་ཞིང་ཁམས་དང་མཉམ་པའི་དབུས་སུ་ཆུ་སྐྱེས་དང་། ཟླ་བའི་དལ་གྱི་སྟེང་དུ་ཁྱེད་རང་རྣམས་ཀྱི་རིག་པ་སེམས་ཉིད་ཀྱི་ངོ་བོ་ཧྲཱིཿཡིག་དམར་གསལ་ཞིག་ཏུ་སྐྱེད་ཅིག དེ་ཉིད་སྐད་ཅིག་གིས་གནས་འགྱུར་བ་ལས་རྒྱལ་ཀུན་འདུས་པའི་རིགས་མཆོག་ཨ་མི་ཏ་བྷ་ཝ་དམར་གསལ་བྱུ་རུའི་ལྷུན་པོ་ལ་ཉི་མ་ཤར་བ་ལྟར་ཞལ་གཅིག་ཞི་འཛུམ། ཕྱག་གཉིས་མཉམ་གཞག་གི་སྟེང་ན་ལྷུང་བཟེད་བདུད་རྩིའི་གང་བ་འཛིན་པ། ཞབས་རྡོ་རྗེའི་སྐྱིལ་ཀྲུང་དུ་བཞུགས་ཤིང་ཚངས་སྤྱོད་ཀྱི་ཆ་ལུགས་མཛེས་པ། མཚན་དང་དཔེ་བྱད་ཀྱིས་སྤྲས་པ། སྐུ་བལྟ་བས་ཆོག་མི་ཤེས་པ། འོད་དང་འོད་ཟེར་མུ་མཐའ་མེད་པའི་ཞིང་ཁམས་ཁྱབ་པ་གཅིག་ཏུ་གསལ་བའི་ཐུགས་ཀར་མི་ཤིགས་པའི་ངོ་བོ་ཧྲཱིཿཡིག་གི་དབུས་སུ་ཨཱཿཤད་སྤུས་བྲིས་པ་མར་མེ་ལྟ་བུར་གསལ་བ་ལ་ཏིང་འཛིན་རྩེ་གཅིག་གི་དམིགས་པ་སྲང་ལ་གཞུར་ནས་ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་རྒྱལ་བ་འོད་མཚན་སྟོང་འབར་གྱི་སྐུ་ཡིག་ཕྱག་མཚན་གྱི་རྣམ་པར་ཆར་སྤྲིན་གཏིབས་པ་བཞིན་བྱོན་ནས་སློབ་མ་ཁྱེད་རང་རྣམས་ལྷར་གསལ་བ་དེ་ལ་སིབ་སིབ་ཐིམ་པར་སྒོམས་ཤིག ཧཱུྃ་ཧྲཱིཿ ནུབ་ཕྱོགས་བདེ་ཆེན་པདྨ་སོགས་རྩ་སྔགས་མཐར། བཛྲ་ཨ་བེ་ཤ་ཡ་ཕཻཾ་ཕཻཾ་ཛ་ཛ༔ དེ་ལྟར་བྱིན་དབབ་པའི་ཡེ་ཤེས་པ་དེ་ཉིད་ཇི་སྲིད་བྱང་ཆུབ་བར་དུ་བརྟན་པར་བཞུགས་སུ་གསོལ། ཞེས་དང་། ཏིཥྛ་བཛྲ༔ བརྗོད། དེ་ནས་བུམ་དབང་ཆེན་མོ་ཞུ་བའི་ཡོན་དུ་མཎྜལ་འབུལ་བར་མཛོད། ས་གཞི་སྤོས་ཆུས་སོགས། འོ་སྐལ་ལྡན་རིགས་ཀྱི་བུ་ཁྱོད་ལ་བུམ་པའི་དབང་བསྐུར་བ་ཡིན་པས་རྫའམ་ཤིང་གི་རང་བཞིན་དུ་མ་བསྒོམ་པར་ཕྱི་རྟེན་བུམ་པའི་དབྱིབས་ལ་གཞལ་ཡས་ཁང་གི་མཚན་ཉིད་རྫོགས་པ། ནང་བརྟེན་པའི་ལྷ་རྒྱལ་བ་འོད་མཚན་སྟོང་འབར་གྱི་ལྷ་ཚོགས་ཐམས་ཅད་ཀྱིས་གཟུངས་སྔགས་ཀྱི་སྒྲ་དི་རི་རི་འདོན་ཞིང་རིག་འཛིན་མཁའ་འགྲོའི་ཚོགས་ཀྱིས་ཤིས་པ་བརྗོད་ཅིང་དབང་ཡུལ་གྱི་སེམས་དཔའ་སེམས་མ་རྣམས་ཀྱིས་བར་ཆད་བསལ་ཞིང་བཀྲ་ཤིས་གླུ་ལེན་གྱི་ཚུལ་དུ་བྱོན་ནས་ཁྱེད་རང་རྣམས་ལ་དབང་བསྐུར་བ་ཙམ་གྱིས་བུམ་པ་ལྷ་ཡི་དབང་ཐོབ་བྱུང་སྙམ་པའི་མོས་པ་མཛོད། ཧཱུྃ་ཧྲཱིཿ རིན་ཆེན་བུམ་པ་སོགས་རྩ་སྔགས། ཀཱ་ཡ་ཨ་བྷི་ཥིཉྩ་ཧཱུཾ༔ དེ་ལྟར་སྐུ་བུམ་པའི་དབང་བསྐུར་བས་ལུས་ཀྱི་སྒྲིབ་པ་དག སྐུ་དབང་ལུས་ལ་ཐོབ། སྤྲུལ་སྐུའི་གོ་འཕང་ཐོབ་པའི་སྐལ་བ་རྒྱུད་ལ་བྱས། མཐར་རྒྱལ་བ་འོད་མཚན་སྟོང་འབར་གྱི་སྐུ་མི་ཟད་པ་རྒྱན་གྱི་འཁོར་ལོ་ལ་དབང་འབྱོར་བའི་མོས་པ་མཛོད། ཨཱཿ འགགས་མེད་སོགས་རྩ་སྔགས། ཝཀྐཱ་ཨ་བྷི་ཥིཉྩ་ཨཱ༔ དེ་ནས་གསུང་བདུད་རྩི་ཐོགས་ལ། ཧཱུྃ་ཧྲཱིཿ སྐྱེ་མེད་དབྱིངས་ཀྱི་ཀ་པཱ་ལར༔ འཆི་མེད་བདུད་རྩི་ར་ས་ཡན༔ སྐལ་ལྡན་ཁྱོད་ཀྱི་ངག་ཏུ་བླུད༔ ཚེ་སྲོག་ཆུ་རྒྱུན་རིང་བར་ཤོག༔ དེ་ལྟར་གསུང་བྷ་གའི་དབང་བསྐུར་བས་ངག་གི་སྒྲིབ་པ་དག གསུང་དབང་ངག་ལ་ཞུགས། ལོངས་སྤྱོད་རྫོགས་པའི་སྐུ་ཐོབ་པའི་སྐལ་བ་རྒྱུད་ལ་བྱས། མཐར་རྒྱལ་བ་དེ་ཉིད་ཀྱི་གསུང་མི་ཟད་རྒྱན་གྱི་འཁོར་ལོ་ལ་དབང་འབྱོར་བའི་མོས་པ་མཛོད། ཧཱུྃ་ཧཱུྃ༔ ངོ་བོ་ཀ་དག་སོགས། ཨོཾ་བཛྲ་ཙིཏྟ་ཨ་བྷི་ཥིཉྩ་ཧཱུྃ༔ དེ་ལྟར་ཐུགས་མན་ཤེལ་གྱི་དབང་བསྐུར་བས་ཡིད་ཀྱི་སྒྲིབ་པ་དག ཆོས་དབང་སེམས་ལ་ཐོབ། ཆོས་སྐུའི་གོ་འཕང་ཐོབ་པའི་སྐལ་བ་ཅན་དུ་བྱས། མཐར་ཐུག་རྒྱལ་བ་འོད་མཚན་སྟོང་འབར་འཆི་མེད་རྔ་སྒྲའི་རྒྱལ་པོའི་ཐུགས་མི་ཟད་པ་རྒྱན་གྱི་འཁོར་ལོ་ལ་དབང་འབྱོར་བའི་ཕྲིན་ལས་ཀྱི་དབུགས་དབྱུང་སྟེ་སེམས་ཅན་གྱི་དོན་ཐོགས་པ་མེད་པར་གྱིས་ཤིག དེས་སྐུ་གསུང་ཐུགས་དབང་རྫོགས། སྐབས་འདིར་སྤྲོ་ན་ལྷ་དབང་བསྐུར་ནས་རྒྱས་པར་བྱ། སླར་ཡང་མཐའ་རྟེན་རྣམས་རིམ་བཞིན་བསྐུར། བཀའ་གཏད་སོགས་སྤྱི་འགྲོས་ལགས། དེ་ལྟར་རྒྱལ་བ་འོད་མཚན་སྟོང་འབར་འཆི་མེད་རྔ་སྒྲའི་རྒྱལ་པོའི་དཀྱིལ་འཁོར་དུ་དབང་ལེགས་པར་ཐོབ་པས་སྤྱི་དང་བྱེ་བྲག་གི་དམ་ཚིག་བསྲུང་སྡོམ་རྣམས་ཚུལ་བཞིན་དུ་བགྱིའོ་སྙམ་པའི་ངང་ནས་འདིའི་རྗེས་ཟློས་མཛོད། གཙོ་བོས་ཇི་ལྟར་སོགས། དེ་ལྟར་རྒྱལ་བ་འོད་མཚན་སྟོང་འབར་གྱི་དབང་ལེགས་པར་ཐོབ་པའི་བཀའ་དྲིན་གཏང་རག་གི་ཡོན་དུ་མོས་ཏེ་མཎྜལ་འབུལ། ས་གཞི་སྤོས་ཆུས་སོགས། སླར་ཡང་ལུས་ལོངས་སྤྱོད་དགེ་ཚོགས་རྒྱ་མཚོ་དང་བཅས་པ་འཁོར་ལོས་བསྒྱུར་བའི་རྒྱལ་སྲིད་ཀྱི་འབྱོར་པ་ལྟར་སྤྲུལ་ནས་འབུལ་བས་ཆ་ཤས་ནས་ལོངས་སྤྱད་དུ་གསོལ་སྙམ་པའི་ངང་ནས་འདིའི་རྗེས་ཟློས་མཛོད། དེང་ནས་བརྩམས་ཏེ་སོགས། དེ་ལྟ་བུས་མཚོན་ཟག་བཅས་དང་ཟག་མེད་བསགས་པའི་དགེ་ཚོགས་འདི་དག་སེམས་ཅན་ཡོངས་ལ་བསྔོ་བའི་ཐུགས་འདུན་ཞུའོ། །བསོད་ནམས་འདི་ཡིས་ཐམས་ཅད་སོགས། གྲོལ་བར་ཤོག། ཅེས་དང་། རྒྱལ་བ་འོད་མཚན་སྟོང་འབར་གྱི། །སྐུ་གསུང་ཐུགས་དབང་ཟབ་མོ་ཡི། །མཚམས་སྦྱོར་གྲོང་ཚིག་མདོར་བསྡུས་འདི། །དམ་པ་གང་གིས་བཀའ་གནང་བཞིན། ། སློབ་འབངས་ཐ་ཤལ་རས་པའི་ཆས། །འཆོལ་སྤྱོད་པདྨ་གསལ་སྟོང་མིང་། །འཆད་རྩོམ་དག་ནི་མོ་གཤམ་བུ། །འདྲ་བ་གང་གིས་ལྷག་བསམ་གྱིས། །བྲིས་པས་ཉེས་འགལ་མཆིས་ན་ཡང་། །རྩ་གསུམ་བསྲུང་མའི་སྤྱན་སྔར་བཤགས། །དགེ་བ་མཆིས་ན་མ་གྱུར་རྣམས། །ཀུན་བཟང་རྒྱལ་སྲིད་ཟིན་པར་སྨོན། །ཆོས་འདིའི་བསྟན་པ་དར་རྒྱས་ཤོག །ཤུ་བྷཾ༎