རྒྱལ་བ་འོད་མཚན་སྟོང་འབར་གྱི་ལྷ་དབང་ཐོས་པ་རང་གྲོལ་སངས་རྒྱས་སྟོང་དབང་བསྡུས་པ་དང་བཅས་པ།

ཟབ་ཆོས་ཡང་ཟབ་ཌཱཀྐིའི་གབ་ཐིག་ལས༔ རྒྱལ་བ་འོད་མཚན་སྟོང་འབར་གྱི༔ ལྷ་དབང་ཐོས་པ་རང་གྲོལ་བཞུགས༔ གུ་རུ་ཨ་མི་ཏ་བྷ་རྒྱལ༔ སྐལ་བཟང་སངས་རྒྱས་སྟོང་གི་རིགས་ཀྱི་བདག༔ ཁྱབ་བདག་རྒྱལ་བ་འོད་མཚན་སྟོང་འབར་བ༔ སྨོན་ལམ་སྟོབས་ཀྱིས་འགྲོ་བའི་སྐྱབས་གནས་མཆོག༔ མཚན་ཙམ་ཐོས་པས་ངན་འགྲོའི་སྡུག་བསྔལ་སེལ༔ རྒྱལ་བ་གང་གི་སྐུ་གསུང་ཐུགས་ཡོན་ཕྲིན༔ སྒོ་གསུམ་གུས་པས་ཕྱག་འཚལ་སྙིང་ནས་སྐྱབས༔ ལྷ་དབང་ཐོས་པ་རང་གྲོལ་འདི་ན་སྤེལ༔ ས་མ་ཡཱ༔ དེ་ལ་སྟ་གོན་ཆས་གཞུག་རིམ་པ་ནི༔ དཀྱིལ་འཁོར་མཚན་ཉིད་གཞན་བྱུང་ལྟར་དུ་བྱ༔ བཀོད་ལེགས་འབྲུ་ཡི་ཚོམ་བུའི་དཀྱིལ་འཁོར་བཀྲམ༔ སྒྲུབ་པའི་གཏོར་མ་རིན་ཆེན་འབར་བ་ལྟར༔ བཅའ་ཞིང་ཉེར་སྤྱོད་མཆོད་པ་རྣམ་ལྔས་བསྐོར༔ དབུས་སུ་བུམ་པ་ཤར་དུ་གཏོར་མ་དང༔ ལྷོ་རུ་སྐུ་ཙཀ་ནུབ་ཏུ་སྔགས་ཕྲེང་དང་༔ བྱང་དུ་མན་ཤེལ་མཐའ་རྟེན་ཙ་ཀ་ལི༔ དབང་རྫས་ཡོ་བྱད་བསགས་ཤིང་རང་གདན་རོལ༔ སྔོན་འགྲོ་དངོས་གཞི་གཞུང་བཞིན་བསྐྱང་པ་ལ༔ གནས་འདྲེན་སྐུ་གསུང་ཐུགས་དབང་རྫོགས་འཕྲལ་དུ༔ དཀྱིལ་འཁོར་ལྷ་དང་རྡོ་རྗེ་སློབ་དཔོན་ལ༔ མཎྚལ་ཕུལ་ཞིང་གསོལ་བ་འདི་ལྟར་གྱེར༔ ཀྱེ་ཀྱེ༔ རིགས་ཀུན་ཁྱབ་བདག་རྡོ་རྗེ་འཛིན༔ རྒྱལ་བ་འོད་མཚན་སྟོང་འབར་གྱི༔ ལྷ་དབང་ཐོས་པ་རང་གྲོལ་དབང་༔ དུས་འདིར་བདག་ལ་གནང་བར་ཞུ༔ ལན་གསུམ༔ དེ་ནས་སློབ་དཔོན་གྱིས་ལན་བྱིན་པ་ནི༔ ཨ་ཧོ༔ སྐལ་ལྡན་རིག་པ་འཛིན་པའི་བུ༔ སྔོན་བསགས་ལས་འཕྲོ་ལྡན་པ་ཡི༔ དཀྱིལ་འཁོར་ལྷ་དང་སློབ་དཔོན་གྱི༔ དབང་རྣམས་ཡོངས་སུ་བསྐུར་བར་བྱ༔ དེ་ནས་རྡོ་རྗེ་སློབ་དཔོན་གྱིས་གདན་གསུམ་ཚང་བའི་དཀྱིལ་འཁོར་ལྷ་དང་བཅས་པའི་དབང་བསྐུར་བའི་དགོངས་པ་གཏད་ཅིང་༔ རིག་པའི་ལྷ་མོ་རྣམས་ཀྱིས་དབང་བསྐུར༔ དབང་ཡུལ་གྱི་སེམས་དཔའ་སེམས་མ་རྣམས་ཀྱིས་བཀྲ་ཤིས་བརྗོད་ཅིང་༔ ལས་དབང་གི་ཁྲོ་བོ་ཁྲོ་མོ་རྣམས་ཀྱིས་བགེགས་བསྐྲད་ཅིང་རྔམ་སྟབས་ཧཱུྃ་སྒྲ་དང་བཅས་པས་དབང་བསྐུར་བར་མོས་ཤིག དེ་ནས་རྒྱལ་བ་འོད་མཚན་སྟོང་འབར་གྱི་སྐུ་ཙཀ་ཐོག་ལ༔ ཧོ༔ སྐལ་ལྡན་རིགས་ཀྱི་བུ་རྣམས་ལ༔ རྒྱལ་བ་འོད་མཚན་སྟོང་འབར་གྱི༔ མཚན་ཙམ་ཐོས་གྲོལ་དབང་བསྐུར་བས༔ ཀུན་གཞིའི་རྟོག་པ་རང་གྲོལ་ནས༔ ཆོས་སྐུ་རབ་འབྱམས་དབང་ཐོབ་ཤོག༔ ཨོཾ་ཨ་མི་དྷེ་ཝ་ཧྲཱིཿ དྷརྨ་ཀཱ་ཡ་ཨ་བྷི་ཥིཉྩ་ཧཱུྃ༔ འོ་སྐལ་ལྡན་རིགས་ཀྱི་བུ་རྣམས་ལ་རྒྱལ་བ་འོད་མཚན་སྟོང་འབར་གྱི་དབང་བསྐུར་བ་ཙམ་གྱིས་ཀུན་གཞིའི་ཉོན་མོངས་པའི་རྟོག་པ་མ་སྤངས་རང་སར་གྲོལ་བའོ༔ ལྷ་དེ་ཉིད་གཞན་ཞིག་ཡིན་མ་སེམས་པར་རང་རིག་ངོ་བོ་ཡེ་ནས་གྲུབ་པ་མེད་པ་སྤྲོས་པའི་མཐའ་བརྒྱད་དང་བྲལ་བའི་སྟོང་གསལ་ས་ལེ་ཧྲིག་གེ་བ་འདི་ཀ་ཡིན་ནོ་ངོ་ཤེས་པར་གྱིས་ཤིག༔ དེ་ནས་བྱང་ཆུབ་སེམས་དཔའ་སྤྱན་རས་གཟིགས་ཀྱི་སྐུ་ཐོགས་ལ༔ ཧོ༔ སྐལ་ལྡན་རིགས་ཀྱི་བུ་རྣམས་ལ༔ ལོངས་སྤྱོད་རྫོགས་སྐུ་སྤྱན་རས་གཟིགས༔ བྱམས་དང་སྙིང་རྗེའི་དབང་བསྐུར་བས༔ ལྷན་སྐྱེས་རྟོག་པ་རང་གྲོལ་ནས༔ ལོངས་སྐུ་རབ་འབྱམས་དབང་ཐོབ་ཤོག༔ ཨོཾ་མ་ཎི་པདྨེ་ཧཱུྃ༔ སཾ་བྷོ་ཀཱ་ཡ་ཨ་བྷི་ཥིཉྩ་ཧཱུྃ༔ འོ་སྐལ་ལྡན་རིགས་ཀྱི་བུ་རྣམས་ལ་བྱང་ཆུབ་སེམས་དཔའ་སྤྱན་རས་གཟིགས་དབང་ཕྱུག་གི་དབང་བསྐུར་བ་ཙམ་གྱིས་ཉོན་མོངས་ལྷན་སྐྱེས་ཀྱི་རྟོག་པ་མ་སྤངས་རང་སར་གྲོལ་བའོ༔ བྱང་ཆུབ་སེམས་དཔའ་དེ་ཉིད་གཞན་ཞིག་ཡིན་མ་སེམས་པར་རང་གི་ཤེས་རིག་གི་རྩལ་སྣང་ལ་གཟུགས་བརྙན་སྣ་ཚོགས་སུ་འཆར་མཁན་གྱི་ཤེས་པ་དེ་ཀ་ཡིན་ནོ་ངོ་ཤེས་པར་གྱིས་ཤིག༔ དེ་ནས་བྱང་སེམས་ལག་ན་རྡོ་རྗེའི་སྐུ་ཐོགས་ལ༔ ཧཱུྃ༔ སྐལ་ལྡན་རིགས་ཀྱི་བུ་རྣམས་ལ༔ རྒྱལ་བའི་སྤྲུལ་བསྒྱུར་མཐུ་ཆེན་ཐོབ༔ ཕྱག་ན་རྡོ་རྗེའི་དབང་བསྐུར་བས༔ ཀུན་བརྟགས་རྟོག་པ་རང་གྲོལ་ནས༔ སྤྲུལ་སྐུ་རབ་འབྱམས་དབང་ཐོབ་ཤོག༔ ཨོཾ་བཛྲ་པཱ་ཎི་ཧཱུྃ༔ ནིརྨ་ཀཱ་ཡ་ཨ་བྷི་ཥིཉྩ་ཧཱུྃ༔ འོ་སྐལ་ལྡན་རིགས་ཀྱི་བུ་རྣམས་ལ་བྱང་ཆུབ་སེམས་དཔའ་ལག་ན་རྡོ་རྗེའི་དབང་བསྐུར་བ་ཙམ་གྱིས་ཉོན་མོངས་ཀུན་བརྟགས་ཀྱི་རྟོག་པ་མ་སྤངས་རང་སར་གྲོལ་བའོ༔ ༈ སངས་རྒྱས་སྟོང་དབང་བསྡུས་པ་ནི༔ དང་པོ་འདི་བཞིན་རྗེས་ཟློས་བྱ༔ ཧཱུྃ༔ བྱམས་མགོན་འཕགས་པ་སྤྱན་རས་གཟིགས༔ གང་ལ་གང་འདུལ་དེར་སྟོན་པའི༔ བདེ་གཤེགས་བསྐལ་བཟང་སངས་རྒྱས་ཀྱི༔ བྱིན་རླབས་དབང་གིས་སྨིན་གྲོལ་སྩོལ༔ དེ་ནས་སངས་རྒྱས་སྐུ་ཐོགས་ལ༔ མཐུན་པའི་དགེ་ཚོགས་སྨོན་ལམ་རྨད་བྱུང་ཞིང༔ སྤྱད་པ་སྤྱོད་ཚེ་ནམ་ཡང་མཆེད་གྱུར་པ༔ བསྐལ་བཟང་གཅིག་ལ་མཛད་པ་མཐར་ཕྱིན་པ༔ རྫོགས་པའི་སངས་རྒྱས་སྟོང་གི་དབང་བསྐུར་རོ༔ ཨོཾ་ཨཱཿཧཱུྃ༔ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བསྐལ་བ་བཟང་པོའི་སངས་རྒྱས་སྟོང་རྩ་གཉིས་ཀྱིས་དང་པོ་བྱང་ཆུབ་མཆོག་ཏུ་ཐུགས་བསྐྱེད་པ་ནས་བཟུང༔ བསོད་ནམས་དང་ཡེ་ཤེས་ལས་གྲུབ་པའི་ཐུགས་རྗེ་དང་བྱིན་རླབས་ཐམས་ཅད་དེང་དུས་རྡོ་རྗེའི་སློབ་མ་འདི་རྣམས་ལ་ཐོབ་པར་བྱིན་གྱིས་བརླབ་ཏུ་གསོལ༔ ཀཱ་ཡ་ཝཀྐཱ་ཙིཏྟ་གུརྞ་ཀརྨ་སརྦ་སིདྡྷི་ཕ་ལ་ཧོ༔ དེ་ནས་བྱང་ཆུབ་སེམས་དཔའ་ཕྱག་ན་རྡོ་རྗེའི་སྐུ་ཐོགས་ལ༔ ཧཱུྃ༔ འཇིག་རྟེན་རྣམ་པར་བརྒྱན་ནས་རྫུས་ཏེ་འཁྲུངས༔ བསྐལ་བཟང་སངས་རྒྱས་སྟོང་གི་ཕྲིན་ལས་པ༔ ཆོས་ཀྱི་བར་ཆད་བཟློག་པའི་མཐུ་རྩལ་ཅན༔ སྐུ་མདོག་སྔོན་པོ་བྱང་ཆུབ་སེམས་དཔའི་ཚུལ༔ བར་ཆད་བགེགས་རྣམས་འདུལ་ཕྱིར་རྡོ་རྗེ་བསྣམས༔ བྱང་ཆུབ་སེམས་དཔའ་ཆོས་ཀྱི་སེམས་དཔའ་ཡི༔ སྐལ་ལྡན་རིགས་ཀྱི་བུ་ལ་དབང་བསྐུར་རོ༔ ཨོཾ་བོ་དྷི་ས་ཏྭ་དྷརྨ་སནྟི་ཨ་བྷི་ཥིཉྩ་ཧཱུྃ༔ དེ་ནས་བྱང་ཆུབ་སེམས་དཔའ་ཚངས་པའི་སྐུ་ཐོགས་ལ༔ ཧཱུྃ༔ གཟི་བརྗིད་རྣམ་པར་བརྒྱན་ནས་རྫུས་ཏེ་འཁྲུངས༔ དུས་གསུམ་སངས་རྒྱས་སྟོང་གི་ཕྲིན་ལས་པ༔ ཆོས་འཁོར་བསྐོར་བར་བསྐུལ་བའི་བྱང་ཆུབ་སེམས༔ སྐུ་མདོག་དཀར་པོ་འཁོར་ལོས་སྒྱུར་བའི་རྒྱལ༔ གསེར་གྱི་འཁོར་ལོ་རྩིབས་སྟོང་ཕྱག་ན་བསྣམས༔ བྱང་ཆུབ་སེམས་དཔའ་ཆོས་ཀྱི་བློ་གྲོས་ཀྱི༔ སྐལ་ལྡན་རིགས་ཀྱི་བུ་ལ་དབང་བསྐུར་རོ༔ ཨོཾ་བོ་དྷི་ས་ཏྭ་དྷརྨ་མ་ཏི་ཨ་བྷི་ཥིཉྩ་ཧཱུྃ༔ སྐུ་དེ་ཉིད་གཞན་ཞིག་ཡིན་མ་སེམས་པར་རང་རྩལ་ཀྱི་སྣང་བ་ལ་གཟུགས་བརྙན་སྣ་ཚོགས་སུ་འཆར་བ་ལ་མིང་གཞིར་སོ་སོར་བཏགས་མཁན་གྱི་ཤེས་པ་དེ་ཀ་ཡིན་ནོ་ངོ་ཤེས་པར་གྱིས་ཤིག་གུ༔ དེ་ནས་བྱང་ཆུབ་སེམས་དཔའ་མཆེད་བརྒྱད་ཀྱི་སྐུ་ཐོགས་ལ༔ ཧོ༔ སྐལ་ལྡན་རིགས་ཀྱི་བུ་རྣམས་ལ༔ རྒྱལ་བའི་ཕྲིན་ལས་དབང་ཕྱུག་ཆེ༔ བྱང་སེམས་བརྒྱད་ཀྱི་དབང་བསྐུར་བས༔ ཚོགས་བརྒྱད་རྟོག་པ་རང་གྲོལ་ནས༔ བྱང་སེམས་རབ་འབྱམས་དབང་ཐོབ་ཤོག༔ ཨོཾ་བྷོ་དྷི་ས་ཏྭ་ཨཥྚ་ཨ་བྷི་ཥིཉྩ་ཧཱུྃ༔ འོ་སྐལ་ལྡན་རིགས་ཀྱི་བུ་རྣམས་ལ་བྱང་ཆུབ་སེམས་དཔའ་བརྒྱད་ཀྱི་དབང་བསྐུར་བ་ཙམ་གྱིས་ཉོན་མོངས་པའི་རྣམ་པར་ཤེས་པ་ཚོགས་བརྒྱད་ཀྱི་རྟོག་པ་མ་སྤངས་རང་སར་གྲོལ་བའོ༔ དེ་ལྟར་སྐུ་དེ་རྣམས་གཞན་ཞིག་དུ་མ་སྣང་བར་རང་གི་རྣམ་པར་ཤེས་པ་ཚོགས་བརྒྱད་ཀྱི་སྣང་ཡུལ་རང་སར་འགག་མེད་ཀྱི་ཚོར་མཁན་གྱི་ཤེས་པ་དེ་རྣམས་ཡིན་པ་ངོ་ཤེས་པ་དང་གྲོལ་བ་དུས་མཉམ་དུ་འོང་ངོ༔ སླར་ཡང་གཏོར་དབང་བྱ་བ་ནི༔ འོ་སྐལ་ལྡན་རིགས་ཀྱི་བུ་ཁྱོད་དད་པ་དམ་ཚིག་དང་ལྡན་པའི་སྒོ་ནས་གསན་འཚལ༔ རྒྱལ་བ་འོད་མཚན་སྟོང་འབར་གཙོ་འཁོར་གྱི་བསྒྲུབ་པའི་གཏོར་མ་འདི་ཡི་དབང་བསྐུར་བའི་ཚེ༔ སྟེང་གི་ཆ་ན་བརྒྱུད་པ་དགུ་ལྡན་གྱི་བླ་མ་རྣམས་ཀྱིས་དབང་བསྐུར་བའི་ལས་བྱས་ཙམ་གྱིས་བྱིན་རླབས་ཀྱི་ཆར་རྒྱུན་འབེབས་པ༔ བར་གྱི་ཆ་ན་ཡི་དམ་ཐེག་པ་རིམ་དགུ་དཀྱིལ་འཁོར་ལྷ་ཚོགས་ཐམས་ཅད་ཀྱིས་དབང་བསྐུར་བ་ཙམ་གྱིས་དངོས་གྲུབ་ཀྱི་སྦྲང་ཆར་གཏིབ་པ༔ འོག་གི་ཆ་ན་མ་སྲིང་མཁའ་འགྲོ་རྒྱ་མཚོས་དབང་བསྐུར་ཞིང་བརྡ་དང་གླུ་ཡི་ཉམས་སྣང་བསྒྱུར་ཅིང་མཆོག་གི་དངོས་གྲུབ་བསྩལ་བ༔ འདབས་འཁོར་གྱི་ཆ་ན་རྒྱལ་བའི་ཕྲིན་ལས་མངའ་བདག་བཀའ་གཏེར་དམ་ཅན་སྲུང་མ་ལྕམ་དྲལ་རྒྱ་མཚོས་བགེགས་བསྐྲད་ཅིང་ཐུན་མོང་གི་དངོས་གྲུབ་སྩོལ་བ་དང་ཕྱི་ནང་གསང་བའི་བར་ཆད་བསལ་ཅིང་ས་དང་ལམ་གྱི་ཡོན་ཏན་རྣམས་གོང་འཕེལ་དུ་བྱེད་པ་ཡིན་པས་མོས་འདུན་དྲག་པོ་མཛོད་ཅིག༔ ཨོཾ་ཨཱཿཧཱུྃ༔ སྐྱེ་མེད་དབྱིངས་ཀྱི་གཏོར་སྣོད་དུ༔ འགག་མེད་སྣང་བའི་གཏོར་ཆེན་བཤམས༔ རོལ་རྩལ་སྣ་ཚོགས་རྒྱན་གྱིས་སྤྲས༔ རྩ་བ་གསུམ་གྱི་ལྷ་ཚོགས་བཞུགས༔ སྐལ་ལྡན་ཁྱོད་ལ་དབང་བསྐུར་བས༔ དཀྱིལ་འཁོར་ལྷ་ཚོགས་དབང་རྣམས་རྫོགས༔ བར་དོ་དྲུག་པོ་རང་གྲོལ་ནས༔ སྐུ་དྲུག་ཡེ་ཤེས་མངོན་གྱུར་ནས༔ འོད་ཟེར་ཆེན་པོའི་དབང་ཐོབ་ཤོག༔ ཨོཾ་ཨཱཿཧཱུྃ་ཏྲཾ་ཧྲཱིཿཨཱཿགུ་རུ་དྷེ་ཝ་ཌཱཀྐི་ནི་བུདྡྷ་བྷོ་དྷི་ས་ཏྭ་ཤྲི་དྷརྨ་པཱ་ལ་ཨེ་དཾ་བྷ་ལིང་ཏ་ཨ་བྷི་ཥིཉྩ་ཧཱུྃ༔ དེ་ནས་གཏོར་མ་དེ་ཉིད་སློབ་བུའི་མགོ་ཐོག་ཏུ་བཞག་ཅིང་སྨོན་ལམ་དང་བཀའ་གཏད་བྱ་བ་ནི༔ ཨོཾ་ཨཱཿཧཱུྃ༔ ཆོས་སྐུ་རྒྱལ་བ་འོད་མཚན་སྟོང་འབར༔ ལོངས་སྐུ་ཕྱག་ན་པདྨོ༔ སྤྲུལ་སྐུ་ལག་ན་རྡོ་རྗེ༔ ཡང་སྤྲུལ་དགའ་རབ་རྡོ་རྗེ༔ སློབ་དཔོན་འཇམ་དཔལ་བཤེས་གཉེན༔ རིག་འཛིན་ཤྲཱི་སིངྷ༔ པཎ་ཆེན་ཡེ་ཤེས་མདོ་སྡེ༔ རྒྱལ་སྲས་པདྨ་འབྱུང་གནས༔ མཁར་ཆེན་ཛྙཱ་ན་ས་ག་ར༔ ལོ་ཆེན་དཔལ་གྱི་དབང་ཕྱུག༔ མཁས་གྲུབ་ཨ་ཙར་དབྱངས་ཉིད༔ གྲུབ་ཆེན་རྒྱལ་བ་མཆོག་དབྱངས༔ རིག་འཛིན་རྗེ་འབངས་ཉེར་ལྔ༔ ཡང་སྤྲུལ་གཏེར་སྟོན་བརྒྱ་རྩ༔ གྲུབ་དབང་བྱང་ཆུབ་རྡོ་རྗེ༔ འགྲོ་འདུལ་ལུང་རྟོགས་མཚན་ཅན༔ ཡོངས་འཛིན་བསམ་གཏན་གླིང་པ༔ བརྒྱུད་འཛིན་ཆོས་ཀྱི་བདག་པོ་ལ་སོགས་པའི་རྒྱལ་བ་དགོངས་པའི་བརྒྱུད་པ༔ རིག་འཛིན་བརྡའི་བརྒྱུད་པ༔ གང་ཟག་སྙན་ཁུང་གི་བརྒྱུད་པའི་རྒྱ་བོད་རིག་འཛིན་གྲུབ་ཐོབ་རྒྱ་མཚོའི་ཚོགས་དང་བཅས་པའི་བླ་མ་རྣམས་དང༔ ཐེག་པ་རིམ་པ་དགུ་ཡིས་བསྡུས་པའི་དཀྱིལ་འཁོར་ལྷ་ཚོགས༔ གནས་གསུམ་གྱི་མ་སྲིང་མཁའ་འགྲོ་རྒྱ་མཚོ༔ ཞིང་སྐྱོང་སེང་གདོང་ཡབ་ཡུམ་ལ་སོགས་བཀའ་གཏེར་སྲུང་མ་དམ་ཅན་ལྕམ་དྲལ་རྒྱ་མཚོ་རྣམས་ཀྱི་སྐུ་དབང་སྤྱི་བོ་ནས་ཐོབ་པར་གྱུར་ཅིག༔ གསུང་དབང་མགྲིན་པ་ནས་ཐོབ་པར་གྱུར་ཅིག༔ ཐུགས་དབང་སྙིང་ཀ་ནས་ཐོབ་པར་གྱུར་ཅིག༔ ཡོན་ཏན་གྱི་དབང་ལྟེ་བ་ནས་ཐོབ་པར་གྱུར་ཅིག༔ ཕྲིན་ལས་ཀྱི་དབང་གསང་གནས་སུ་ཐོབ་པར་གྱུར་ཅིག༔ དབང་དེ་རྣམས་ཐོབ་པ་ཙམ་གྱིས་ཉོན་མོངས་པ་ཤེས་བྱའི་སྒྲིབ་པ་ཙམ་ཡང་མ་ལུས་པ་བྱང་ཞིང་དག་ནས་མཐར་ཐུག་རྒྱལ་བ་འོད་མཚན་སྟོང་འབར་གཙོ་དང་འཁོར་དུ་བཅས་པའི་གསང་གསུམ་མི་ཟད་རྒྱན་གྱི་འཁོར་ལོ་ལ་དབང་འབྱོར་ནས་སྤྲུལ་པ་སྐུ་ཡིས་སེམས་ཅན་གྱི་དོན་ཐོགས་པ་མེད་པ་འབད་མེད་ལྷུན་གྲུབ་ཏུ་འབྱུང་བར་གྱུར་ཅིག༔ ཅེས་པའི་བཀའ་གཏད་ཅིང་མཐའ་བརྟེན་སོགས་ཤེས་པར་བྱའོ༔ དེ་ལྟར་འོད་མཚན་སྟོང་འབར་གྱི༔ ལྷ་དབང་ཐོས་པ་རང་གྲོལ་འདི༔ སྐྱེ་འགྲོ་མཆོག་དམན་སུས་ཐོབ་ཀྱང༔ ཕྱིར་མི་ལྡོག་པའི་ས་ལ་རེག༔ བསླུ་མེད་རྡོ་རྗེའི་ཐ་ཚིག་ཡིན༔ པདྨ་བདག་གི་ཟབ་ཆོས་མཆོག༔ མཁའ་འགྲོ་སྟངས་དཔྱལ་ཟུང་ལ་གཏད༔ མི་ཤིགས་སྒྲོམ་ལ་གཏེར་དུ་སྦས༔ མི་བརྗེད་གཟུངས་ཀྱིས་རྒྱས་ཐོབ་ལ༔ མ་འོངས་སུམ་ཅུའི་མར་གཤམ་དུ༔ ས་ལེའི་ཐུགས་སྤྲུལ་བྷ་ཏྲའི་མཚན༔ དེ་དུས་ཆོས་དབང་རྒྱལ་མཆོག་འཕྲུལ༔ འཆོལ་སྤྱོད་བཞད་པའི་མིང་ཅན་གྱི༔ ཏཱ་རེ་གནས་ཀྱི་ཡང་བདག་འབྱུང༔ དེ་དུས་ཟབ་ཆོས་དགོངས་ཀློང་རྡོལ༔ ཆོས་ཀྱི་བདག་པོས་འགྲོ་ལ་སྤེལ༔ གང་འབྲེལ་སེམས་ཅན་ཐར་ལམ་བཀོད༔ བཀའ་སྲུང་ཞིང་སྐྱོང་ཡབ་ཡུམ་གྱིས༔ བཀའ་རྐུན་ལོག་པའི་སྲོག་སྙིང་རོལ༔ ཟབ་ཆོས་བསྟན་པ་ཕྱོགས་བཅུར་སྤེལ༔ བསྟན་འཛིན་སྐྱེས་བུ་བུ་བཞིན་སྐྱོངས༔ སྦྱིན་པའི་བདག་པོའི་སྲིད་ནོར་འཚོས༔ མི་ཤིགས་རིམ་པ་ལྔ་ཡི་རྒྱ༔ ས་མ་ཡཱ༔ རྒྱ་རྒྱ་རྒྱ༔ གུ་ཧྱ༔ བརྡ་ཐིམ༔ ཞེས་པའི་འོད་མཚན་སྟོང་འབར་གྱི༔ ལྷ་དབང་ཐོས་པ་རང་གྲོལ་འདི༔ ཡབ་རྗེ་བསམ་བསྟན་གླིང་པ་ཡི༔ ཟབ་ཆོས་མ་ཚང་ཁ་སྐོང་དུ༔ ཁོ་བོ་པད་མ་གསལ་སྟོང་གིས༔ བཀའ་གནང་བཞིན་དུ་ཡིག་རིས་བཀོད༔ ཉེས་འགལ་མཆིས་ན་རང་གིས་ལྷ་ལ་བཤགས༔ དགེ་འབྲས་ཡོད་ན་ཡིད་ཅན་སྐྱེ་འགྲོ་རྣམས༔ བདེ་ཆེན་པདྨོ་དག་པའི་ཞིང་ཁམས་སུ༔ ཕྱིར་མི་ལྡོག་པའི་ས་མཆོག་ཐོབ་པར་བསྔོ༔ གནས་ཀྱི་མཆོག་གྱུར་ཏཱ་རེ་དགའ་ཚལ་དུ༔ གནམ་ལོ་དབྱར་རྔ་ལྡིར་བའི་ཆོ་འཕྲུལ་ཀྱི༔ ཟླ་བ་ཡར་གྱི་ངོ་ཡི་ཚེས་བརྒྱད་ཉིན༔ དག་སྣང་བན་བུན་ཙམ་དུ་བྲིས་པ་དགེ༔ ཤུ་བྷཾ༔