ཚེ་འགུགས་འཆི་མེད་ཡེ་ཤེས།
ཡང་གསང་ཌཱཀྐིའི་ཐུགས་ཐིག་ལས༔ ཚེ་འགུགས་འཆི་མེད་ཡེ་ཤེས་སྟོན༔ འོད་མཚན་སྟོང་འབར་ལ་ཕྱག་འཚལ༔ ཚེ་ཡི་སྒྲུབ་པ་ཟབ་མོ་ཡི༔ ལས་མཐའི་ཚེ་འགུག་འདིར་འབད་ཀྱི༔ བྱིན་རླབས་ཡེ་ཤེས་འབྱུང་བར་འགྱུར༔ ངག་འདོན་འདི་ལ་ཐུན་དུ་ཆོད༔ བུམ་ཅན་རླུང་དང་ཧྲཱིཿབཟླས་སྟོང༔ ཐུན་མཐར་དར་ལྔའི་མདའ་གཡབ་དེ༔ ཧྲཱིཿ བཅོམ་ལྡན་མགོན་པོ་ཚེ་དཔག་མེད༔ རྩ་གསུམ་མཆོག་གསུམ་རབ་འབྱམས་ལྷ༔ ཚེ་འཛིན་མགྱོགས་མ་རིགས་ལྔའི་ཚོགས༔ ཚེ་ལྷ་རིག་འཛིན་དྲང་སྲོང་རྣམས༔ ཐུགས་དམ་བསྐུལ་ལོ་དེང་འདིར་དགོངས༔ ཉོན་ལྔའི་སྟོབས་ཀྱིས་ཚེ་ཉམས་ན༔ འབྱུང་ལྔའི་ཁམས་ནས་ཚེ་བཅུད་ཁུག༔ ཤ་ཁྲག་སྲོག་དབུགས་བླ་ཉམས་གསོས༔ ཡུམ་ལྔའི་ཀློང་དུ་རྒྱས་ཐོབ་ལ༔ སྐུ་ལྔའི་ཀློང་དུ་ཚེ་སྦེད་དོ༔ སྒོ་གསུམ་འཆི་མེད་རྡོ་རྗེ་རུ༔ བྱིན་གྱིས་རློབས་ལ་དངོས་གྲུབ་སྩོལ༔ ཨོཾ་ཨཱཿཧཱུྃ་སྭཱ་ཧཱ༔ བཛྲ་ཨ་ཡུརྫྙཱ་ན་སིདྡྷི་ཚེ་བྷྲུཾ༔ ཧྲིང་ཧྲིང་ཛ་ཛཿཔུཥྚིཾ་ཀུ་རུ་ཨོཾ༔ ས་མ་ཡཱ༔ དེ་ནས་རྒྱས་འདེབས་མཆོད་བསྟོད་དང༔ དངོས་གྲུབ་ལེན་སོགས་སྤྱི་ལྟར་བྱ༔ ཞེས་རྒྱལ་བ་འོད་སྣང་མཐའ་ཡས་ཀྱི༔ ཚེ་འགུག་འཆི་མེད་ཡེ་ཤེས་ཞེས༔ རིགས་ཀྱི་བུ་མཆོག་མཁས་གྲུབ་ཀྱི༔ གདུལ་བྱའི་སྙིང་ལ་སིམ་པའི་འབྲས༔ རང་བྱུང་དགོངས་པའི་ཀློང་ལས་བསྐྲུན༔ ཚེ་དང་དཔལ་འབྱོར་མངའ་ཐང་དང༔ ཕྲིན་ལས་སྲིད་མཐར་ཁྱབ་པར་ཤོག༔ རྣལ་འབྱོར་ས་ར་ཧི་ཏས་སྤེལ༔ དུས་གསུམ་དགེ་བའི་ཤིས་པ་སྩོལ༔ ཤུ་བྷཾ༔