ཚེ་སྒྲུབ་བཛྲ་བདུན་ལྡན་གྱི་ཚེ་དབང་རྡོ་རྗེའི་རྫོང་མཁར།

ཡང་ཟབ་མཁའ་འགྲོའི་གབ་ཐིག་ལས༔ རྒྱལ་བ་འོད་མཚན་སྟོང་འབར་གྱི༔ ཚེ་སྒྲུབ་བཛྲ་བདུན་ལྡན་ལས༔ ཚེ་དབང་རྡོ་རྗེའི་རྫོང་མཁར་བཞུགས༔

རྒྱལ་ཀུན་སྤྱི་མྱེས་རིགས་ཀྱི་མཆོག༔ འོད་མཚན་སྟོང་འབར་ཚེ་ཡི་བདག༔ ལོངས་སྐུའི་མཚན་རྫོགས་ཚེ་དཔག་མེད༔ གང་གི་ཚེ་སྒྲུབ་བཛྲ་བདུན༔ ལྡན་པའི་ཚེ་དབང་རྡོ་རྗེ་ཡི༔ རྫོང་མཁར་ཟབ་ཆོས་འདི་ན་སྤེལ༔ ས་མ་ཡཱ༔ ཨེ་མ་འཆི་མེད་པད་འབྱུང་དང༔ གསང་ཡུམ་མནྡ་ར་བ་ཟུང༔ བྲག་ཕུག་མ་ར་ཏི་ཀ་རུ༔ འཆི་མེད་ཚེ་སྒྲུབ་མཛད་པའི་ཚེ༔ ཚེ་དཔག་མེད་པ་དངོས་སུ་གྲུབ༔ ཡི་དམ་ལྷ་དང་དགོངས་པ་མཉམ༔ འཆི་མེད་རྡོ་རྗེའི་དངོས་གྲུབ་ཐོབ༔ ཚེ་ཡི་སྒྲུབ་པ་དཔག་མེད་གནང༔ ཟབ་པའི་ཡང་ཟབ་མཐར་ཐུག་ཆོས༔ ཚེ་དབང་རྡོ་རྗེའི་རྫོང་མཁར་འདི༔ མཁར་ཆེན་ལྕམ་སྲིང་དཔལ་དབྱངས་ལ༔ པདྨ་ང་ཡི་གཅེས་ནོར་སྦྱིན༔ རང་ཉམས་ལོངས་དང་སྒྲོམ་དུ་སྦས༔ མ་འོངས་སུམ་ཅུ་ཁ་རལ་དུས༔ ཁྱེད་རྣམས་རྗེས་བཟུང་གཅིག་གིས་ནི༔ དགོངས་པ་ཀློང་རྡོལ་རྩལ་ལས་འདོན༔ ཟབ་ཆོས་མ་ཚང་ཁ་སྐོང་སྤེལ༔ འདི་འཕྲད་སྐྱེ་འགྲོའི་ཚེ་བསོད་གསོ༔ ཚེ་ཟད་ཡིན་ཡང་ལོ་བདུན་བསྲིང༔ བསླུ་མེད་རྡོ་རྗེའི་ཐ་ཚིག་ཡིན༔ བདེན་རྫུན་ལག་ཏུ་ལོངས་དང་གསལ༔ ས་མ་ཡཱ༔ རྒྱ་རྒྱ་རྒྱ༔ དེ་ལ་སྦྱོར་དངོས་རྗེས་ཀྱི་རིམ་པ་ནི༔ སྦྱོར་བ་བདག་མདུན་བུམ་གསུམ་བསྒྲུབ༔ དངོས་གཞི་བདག་འཇུག་དབང་ལྡན་དང༔ སློབ་མ་ཁྲུས་བྱ་བགེགས་བསྐྲད་དང༔ བསྲུང་འཁོར་བསྒོམ་ཞིང་ལོ་རྒྱུས་ནི༔ མདོ་ཙམ་བརྗོད་པས་སྤྲོ་བ་བསྐྱེད༔ སླར་ཡང་སློབ་མས་ཕྱག་སྙིམ་པ༔ མེ་ཏོག་དང་བཅས་འདི་བཞིན་གྱེར༔ ཀྱཻ་ཀྱཻ༔ རིགས་ཀུན་ཁྱབ་བདག་དཀྱིལ་འཁོར་གཙོ༔ བླ་མ་རྡོ་རྗེ་སློབ་དཔོན་དགོངས༔ འཆི་མེད་ཚེ་ཡི་དབང་རྣམས་ནི༔ དུས་འདིར་བདག་ལ་གནང་བར་ཞུ༔ དེ་ནས་སློབ་དཔོན་གྱིས་ལན་སྦྱིན་པ་ནི༔ ཀྱཻ་ཧོ་མོས་ལྡན་རིགས་ཀྱི་བུ༔ ཚོགས་བསགས་ལས་འཕྲོ་ངེས་ལྡན་པའི༔ གསང་སྔགས་དཀྱིལ་འཁོར་འདིར་ཞུགས་ལ༔ ཚེ་དབང་ཟབ་མོ་བསྐུར་བར་བྱ༔ དེ་ནས་དམ་ཚིག་སྨྲས་པ་ནི༔ ཨ་ཧོ་སྐལ་ལྡན་རིགས་ཀྱི་བུ༔ རྩ་གསུམ་དམ་ཚིག་ཚུལ་བཞིན་དུ༔ སྲོག་གཅོད་གཞན་གནོད་སྤོང་པ་དང༔ མི་དགེ་བཅུ་སྤོང་དགེ་བཅུ་སྤྱད༔ སྲོག་བསླུ་ཉེའུ་འདོན་དམ་ཚིག་གོ༔ སླར་ཡང་སློབ་མས་ཁས་བླངས་ནི༔ ཀྱཻ་ཧོ༔ བཀའ་དྲིན་ཅན་གྱི་བླ་མ་དགོངས༔ ངས་ཀྱང་དབང་རྣམས་ཐོབ་གྱུར་ན༔ དམ་ཚིག་གང་གསུང་ཚུལ་བཞིན་བསྲུང༔ ཐུགས་གཏད་དབང་རྣམས་གནང་བར་བྱ༔ དེ་ནས་སློབ་དཔོན་གྱིས་ཐུགས་བརྩེ་བ་ཆེན་པོས་རྗེས་སུ་བཟུང་ནས་སློབ་མའི་མ་དག་པའི་ཆོས་རྣམས་སྦྱངས་བ་ནི༔ དབང་གཞུང་ལ་འཇུག་པར་བྱའོ༔ སླར་ཡང་དབང་ལྔའི་ཐོག་མ་ལ༔ བུམ་པ་སྐུ་ཡི་དབང་བསྐུར་བར་བྱ༔ ཧཱུྃ་ཧྲཱིཿ དགོས་འདོད་ཀུན་འབྱུང་རིན་ཆེན་བུམ༔ ཚེ་ལྷ་འོད་མཚན་སྟོང་འབར་བཞུགས༔ སྐལ་ལྡན་ཁྱོད་ལ་དབང་བསྐུར་བས༔ ཚེ་སྲོག་རྡོ་རྗེ་བདུན་ལྡན་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་གསུང་བདུད་རྩི་ཐོགས་ལ༔ ཧཱུྃ་ཧྲཱིཿ སྐྱེ་མེད་དབྱིངས་ཀྱི་ཀ་པཱ་ལར༔ འཆི་མེད་བདུད་རྩི་ར་ས་ཡཱན༔ སྐལ་ལྡན་ཁྱོད་ཀྱི་ངག་ཏུ་བླུད༔ ཚེ་སྲོག་ཆུ་རྒྱུན་རིང་བར་ཤོག༔ རྩ་སྔགས་མཐར༔ ཝཀྐཱ་ཨ་བྷི་ཥིཉྩ་ཨཱ༔ དེ་ནས་ཐུགས་རྟེན་དྲིལ་བུ་ཐོགས་ལ༔ ཧཱུྃ་ཧྲཱིཿ རྒྱལ་བའི་སྐུ་གསུང་ཐུགས་ཡོན་ཕྲིན༔ བྱིན་རླབས་དམ་རྫས་མྱོང་གྲོལ་འདི༔ སྐལ་ལྡན་ཁྱོད་ལ་བྱིན་པ་ཡིས༔ ཚེ་བསོད་དབང་ཐང་རྒྱས་པར་ཤོག༔ རྩ་སྔགས་མཐར༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཡོན་ཏན་གཏོར་དབང་ནི༔ ཧཱུྃ་ཧྲཱིཿ ཡེ་ཤེས་ལྷ་ཚོགས་སྒྲུབ་པའི་རྟེན༔ དགོས་འདོད་ཀུན་འབྱུང་གཏོར་མའི་དབང༔ སྐལ་ལྡན་ཁྱོད་ལ་དབང་བསྐུར་བས༔ འཆི་མེད་རྡོ་རྗེའི་སྲོག་འགྲུབ་ཤོག༔ རྩ་སྔགས༔ གུ་ཎ་བྷ་ལིང་ཏ་ཨ་བྷི་ཥིཉྩ་ཏྲཾ༔ སླར་ཡང་ཕྲིན་ལས་ཚེ་མདའི་དབང་བསྐུར་བྱ༔ ཧཱུྃ་ཧྲཱིཿ སྐུ་གསུམ་དོན་མཚོན་ཚེ་ཡི་མདའ༔ སྐུ་ལྔ་ཡོངས་རྫོགས་དར་གྱིས་སྤུད༔ སྐལ་ལྡན་ཁྱེད་ལ་དབང་བསྐུར་བས༔ ཚེ་གཡང་མངའ་ཐང་འཕེལ་བར་ཤོག༔ རྩ་སྔགས་མཐར༔ ཀརྨ་ཨ་བྷི་ཥིཉྩ་ཧྲཱིཿ ཞེས་པའང་ཚེ་འགུག་རྒྱས་གདབ་མཐའ་རྟེན་སོགས༔ མཇུག་སྐྱོང་གཞན་འགྲོས་ལྟར་དུ་ལེགས༔ ཉེ་འུ་འདོན་དང་སྲོག་བསླུ་དང༔ ཉ་གྲོག་གསོ་དང་སཙྪ་གདབ༔ བྱ་དང་སློང་མོ་མཁན་ལ་ནི༔ རེ་འབྲས་བསྐང་བའི་སྦྱིན་པ་གཏོང༔ དེ་རྣམས་རྒྱབ་ཆོས་ཡིན་པས་གལ༔ དེ་བཞིན་གནད་དང་ལྡན་གྱུར་ན༔ ཕན་པའི་ཡོན་ཏན་བརྗོད་མི་ལང༔ ས་མ་ཡཱ༔ ཇོ་མོ་ཡེ་ཤེས་མཚོ་རྒྱལ་གྱིས༔ དུས་གསུམ་ཀུན་མཁྱེན་གུ་རུ་རྗེ༔ ཟབ་ཆོས་སྤེལ་བའི་དུས་མཚམས་དང༔ སྐལ་ལྡན་སྐྱེས་བུ་སུ་ཡིས་འདོན༔ ལས་ལྡན་བུ་མོ་མཚོ་རྒྱལ་གསོན༔ མ་འོངས་སུམ་ཅུའི་མར་གཤམ་དུས༔ རྒྱལ་མོ་རོང་གི་ཤར་གྱི་ཕྱོགས༔ དགེ་བསྙེན་དབྱི་ཁྲོམ་བརྟེན་པའི་ལྗོངས༔ ཁྱོད་ཉིད་སྤྲུལ་པ་སཔྟ་འབྱུང༔ འགའ་ཞིག་འགྲོ་དོན་རྫོགས་འཕྲལ་དུ༔ དུས་རྣམས་མི་འགྱུར་མི་རྣམས་འགྱུར་བ་ནི༔ དགེ་བཤེས་རྣམས་ཀྱིས་ཚུལ་ཁྲིམས་ཡལ་བར་དོར༔ སྔགས་པ་དམ་མེད་གསང་རྒྱ་ལྷང་ལྷང་སྒྲོགས༔ བུད་མེད་སྤོབས་ཆེན་དགེ་འདུན་ཚོགས་གྲལ་ཉུལ༔ སྟག་ཤར་རྣམས་ཀྱིས་ལས་ཀ་སྡིག་ལ་སྤྱོད༔ དཀར་ཕྱོགས་སྐྱབས་ཞན་ནག་ཕྱོགས་དབལ་རེ་གྲང༔ ནད་རིགས་ངེས་མེད་གློ་བུར་འཚུབ་ལྷོང་གཡོ༔ སྡེ་བརྒྱད་འབྱུང་པོས་ཚ་རེག་ཧུར་ཐུམ་གཏོང༔ སྤོས་ཀྱི་དུས་སུ་དབང་ཕྱུག་གོས་དམར་གྱོན༔ ལྟོ་ཧོར་ཙི་ནས་འཚེ་བ་ཡང་ཡང་ངོམ༔ རིག་འཛིན་དམ་པ་རྣམས་ནི་ཞིང་ལ་གཤེགས༔ སྐྱེ་འགྲོའི་ཚེ་ལ་ངེས་མེད་སྣོད་བཅུད་གྱི༔ བཅུད་ཉམས་འགོང་པོས་ཟ་ངུར་སྲིད་ལ་འཚེ༔ དེ་དང་དེ་སོགས་དུས་རྟགས་མང་དུ་ཡོད༔ དེ་དུས་ཁྱོད་དང་ཨ་ཙར་དཔལ་དབྱངས་ཀྱི༔ སྤྲུལ་བའི་གཏེར་ཆེན་བསམ་གཏན་གླིང་པ་འབྱུང༔ འབྲེལ་ཚད་དོན་ལྡན་དཔལ་རིའི་ཞིང་ལ་འདྲེན༔ རིག་འཛིན་དེ་ཡི་འགྲོ་དོན་རྫོགས་འཕྲལ་དུ༔ ཉིད་ཀྱི་ཕྲིན་ལས་རྗེས་བཟུང་སྔགས་པའི་ཆས༔ ཏཱ་རེ་མི་འགྱུར་གནས་ཀྱི་ཡང་བདག་འབྱུང༔ ད་ལྟར་སྨོན་ལམ་དག་པའི་འབངས་རིགས་ནི༔ རྒྱལ་མཆོག་རྣམ་འཕྲུལ་པདྨའི་མཚན་ཅན་གྱིས༔ དགོངས་པ་ཀློང་རྡོལ་རྩལ་ལས་ཐོགས་མེད་སྤེལ༔ ཆོས་འདིར་འབྲེལ་ཚད་དཔལ་རིའི་ཞིང་ལ་འགོད༔ ཆོས་ཀྱི་བདག་པོ་ལྔ་གསུམ་དག་ལ་སྤྲོད༔ རང་གཞན་འགྲོ་ལ་ཕན་པའི་རྟེན་འབྲེལ་ཡོད༔ བཀའ་ཡི་སྲུང་མ་ཞིང་སྐྱོང་ཡབ་ཡུམ་གྱིས༔ དམ་མེད་ལག་ཏུ་མ་ཤོར་ཤོར་ཏ་རེ༔ ཟབ་ཆོས་གནས་པའི་ཡུལ་ཁམས་བུ་བཞིན་སྐྱོང༔ ཟབ་ཆོས་འདི་ཉིད་སྤྱན་མའི་མཁའ་ཀློང་དུ༔ དབང་ཕྱུག་མ་ཡི་འོད་སྣང་ཁྱབ་གྱུར་ཅིག༔ འདི་དང་འཕྲད་པའི་ཡིད་ཅན་སྐྱེ་འགྲོ་ཡི༔ ཚེ་བསོད་དཔལ་འབྱོར་བསྐལ་པ་རྫོགས་ལྡན་བཞིན༔ བདེ་དགའི་དཔལ་ལ་རོལ་བའི་ཤིས་པ་སྩོལ༔ ཤུ་བྷཾ༔