རྒྱལ་བ་འོད་མཚན་སྟོང་འབར་གྱི་ཁྲུས་ཆོག་རིན་ཆེན་ཀེ་ལ་ཤ་ཡི་བུམ་པ།

ཡང་གསང་ཌཱཀྐིའི་ཐུགས་ཐིག་ལས༔ རྒྱལ་བ་འོད་མཚན་སྟོང་འབར་གྱི་ཁྲུས་ཆོག་རིན་ཆེན་ཀེ་ལ་ཤ་ཡི་བུམ་པ་བཞུགས༔

རྒྱལ་བའི་རིགས་བདག་འོད་དཔག་མེད༔ ཨ་མི་ཏ་བྷར་ཕྱག་འཚལ་ལོ༔ མ་རིག་འཐིབ་པོ་བསལ་བའི་ཕྱིར༔ ཁྲུས་ཆོག་རིན་ཆེན་ཤེལ་བུམ་འབྲི༔ ལས་གཞུང་སྔོན་བསྒྲུབ་དབང་ཡིད་བླང༔ ཚེ་འདས་བླ་རྟེན་དྲི་གོས་དང༔ ཕུང་པོ་འམ་ནི་མཚན་བྱང་ལ༔ ཚེ་འདས་ཤེས་པ་བཞི་པོ་ནི༔ རིམ་བཞིན་གསལ་བཏབ་འདི་ལྟར་གྱེར༔ ཨེ་མ་ཧོ༔ བདག་ཉིད་འོད་དཔག་མེད་ཀྱི་ཐུགས་སྲོག་ལས༔ འོད་ཟེར་འཕྲོས་པས་ཚེ་འདས་རྣམ་ཤེས་ཏེ༔ རིགས་དྲུག་བདུན་པོའི་མཆོག་དམན་གར་གནས་ཀྱང༔ མདུན་དུ་བཀུག་ནས་མཚན་བྱང་རྟེན་ལ་ཐིམ༔ ན་མོ༔ ཕྱོགས་བཅུའི་སངས་རྒྱས་སྲས་བཅས་ཆོས་ཉིད་དེ་བཞིན་ཉིད་དང་༔ ཆོས་ཅན་རྒྱུ་འབྲས་བསླུ་མེད་དང་༔ རྒྱལ་བ་འོད་མཚན་སྟོང་འབར་གྱི་སྐུ་གསུང་ཐུགས་ཡོན་ཏན་ཕྲིན་ལས༔ རྒྱལ་བ་གང་གི་ཐུགས་བསྐྱེད་སྨོན་ལམ་གྱི་བདེན་པའི་མཐུ་དང་སྟོབས་ཀྱིས༔ འཇིག་རྟེན་འདི་ནས་འཇིག་རྟེན་ཕ་རོལ་དུ་སོང་བའི་ཚེ་ལས་འདས་པའི་རྣམ་པར་ཤེས་པ་སྡུག་བསྔལ་གྱི་གནས་ཡུལ་གང་ན་ཡོད་ཀྱང་སྐད་ཅིག་ཡུད་ཙམ་གྱིས་རྟེན་ཕུང་པོ་འདི་ལ་ཁུག་ཅིག་ཛ་ཛ༔ ནྲྀ་ཡཾ་ཛ༔ བཛྲ་ཨཾ་ཀུ་ཤ་ཡ་ཛ༔ ཨ་ནྲྀ་སུ་ཏྲི་པྲེ་དུ་ཛ༔ ཛ་ཧཱུྃ་བཾ་ཧོ༔ རྟེན་མཚན་བྱང་ངམ་ཕུང་པོ་དང་དབྱེར་མེད་པར་བསམ༔ དེ་ནས་སྦྱང་བ་ནི༔ ཏིང་ལོ་གསུམ་དང་མཐེབ་ཀྱུ་གཡས་སྐོར་དང༔ གཡོན་སྐོར་གསུམ་གསུམ་བསྐོར་བ་ནི༔ ནམ་མཁའ་མཛོད་སྔགས་གནོད་མཛེས་སྔགས་ཀྱིས་ཚིམ་པར་བསྔོ༔ ཧཱུྃ་ཧྲཱིཿ ང་ནི་རྒྱལ་བ་འོད་མཚན་སྟོང་འབར་བ༔ སྨོན་ལམ་ཟབ་མོའི་ཐུགས་བསྐྱེད་འགྲོ་བ་འདྲེན༔ ཐར་པའི་ལམ་ལ་གེགས་བྱེད་གཤིན་བདུད་རྣམས༔ ལན་ཆགས་གླུད་ཀྱི་གཏོར་མས་ཚིམ་གྱིས་ལ༔ གནོད་སེམས་གདུག་པ་ཁྲོལ་ལ་གཞན་དུ་དེངས༔ བཀའ་ལས་འདའ་ན་གཞོམ་པར་གདོན་མི་ཟ༔ ཧཱུྃ་བཞིའི་སྔགས་དང་ཐུན་གྱིས་བྲབ་ཅིང་བསྲུང་བ་ནི༔ ཨོཾ་པདྨ་ཙཀྲ་ཏིཀྞ་ཛྭ་ལ་རཾ་ཧཱུྃ་ཕཊ༔ ཀྱཻ་ཧོ༔ མ་ཡེངས་མ་འཁྲུལ་ཆེ་གེ་མོ༔ རང་བྱུང་གདོད་མའི་སེམས་ཉིད་འདི༔ བུདྡྷ་ཡིན་ཏེ་ངོས་མ་ཟིན༔ རིགས་དྲུག་འཁོར་བ་འདིར་འཁྱམས་ཏེ༔ ལས་སྣང་དྲུག་པོའི་དུཿཁ་བརྒྱུད༔ དལ་འབྱོར་སྙིང་པོ་ཆུ་ཤིང་བཞིན༔ མི་ཚེ་སྟོང་ཟད་དགེ་བ་དབེན༔ འཆི་བ་འོང་སྙམ་མེད་ན་འང༔ གཤིན་རྗེའི་ཕོ་ཉས་ད་རེས་ཟིན༔ བསགས་པ་ཐམས་ཅད་ཤུལ་དུ་ལུས༔ རྣམ་སྨིན་སྡུག་བསྔལ་རང་དང་འགྲོགས༔ གཉེན་དང་ནོར་རྫས་གཅེས་དགུར་བྲལ༔ གཅིག་པུར་དངངས་སྐྲག་བར་དོར་འཁྱམས༔ རྒྱུ་དྲུག་འཁྲུལ་སྣང་རླུང་གིས་དེད༔ ཀྱཻ་མ་འདུས་བྱས་མི་རྟག་ཆོས༔ འཁོར་བ་མཐོ་དམན་གང་དུ་འང༔ བདེ་བ་ཁབ་ཀྱི་རྩེ་ཙམ་མེད༔ མ་ཡེངས་འོད་དཔག་མེད་ལ་སྐྱབས༔ མ་ཆགས་ཐུགས་རྗེ་ཆེན་པོ་བསྒོམ༔ མ་འཁྲུལ་བླ་མའི་གདམས་ངག་ཉོན༔ རྩེ་གཅིག་རིག་པ་རྣལ་དུ་ཕོབ༔ ཆོས་བཤད་རིམ་པ་སྔོན་དུ་སོང་ནས༔ ལྷ་ལ་ཁྲུས་གསོལ་བའི་ཆུས་ཚེ་འདས་ཀྱི་ལས་སྒྲིབ་བཀྲུ་བ་ནི༔ ཧོ༔ འདི་ནི་ཕ་རོལ་ཕྱིན་དྲུག་ཆུས༔ དྲི་མ་རྣམ་དྲུག་སྦྱང་ནས་ནི༔ སྐུ་དྲུག་ཡེ་ཤེས་དྲུག་ལྡན་མཛོད༔ ཁྲུས་ལེགས་མཛད་ལ་ཕྱག་འཚལ་བསྟོད༔ ཨ་མི་ཏ་བྷའི་གཟུངས་དང་ཉེ་བསྙེན་ཡིག་དྲུག་ཡིག་བརྒྱ་ཀཾ་ཀ་ནི༔ ངན་སོང་སྦྱོང་གཟུངས་དང༔ སྨན་གཟུངས་ཆེ་ཆུང་ཁྲུས་སྔགས་སོགས་ཀྱིས་དག་པར་སྦྱང༔ དེ་ནས་ནུས་ལྡན་བྱེ་མས་བྲབ༔ ཧཱུྃ་ཧོ༔ རིགས་སྔགས་ནུས་པའི་དཔུང་བསྐྱེད་བྱེ་མ་འདི༔ དམིགས་ཡུལ་ཕུང་པོ་ལ་བྲབ་སྒོ་གསུམ་གྱི༔ བཅས་དང་རང་བཞིན་འགལ་བའི་སྡིག་ལྟུང་སྒྲིབ༔ མ་ལུས་བྱང་ཞིང་དག་པས་སོར་ཆུད་གྱུར༔ ཨོཾ་སརྦ་བྷིད་ཌ་ཐ༔ བཛྲ་བྷནྡྷ་ཏྲད༔ ཨ་བྷེ་རྒྱ་ཏཾ་ཀཾ༔ མ་མ་ཀོ་ལིཾ་ས་མནྟ༔ བཛྲ་ཕཊ༔ ཧཱུྃ་ཧྲཱིཿ གསོན་ཅིག་དགོངས་ཤིག་ཚེ་འདས་རིགས་ཀྱི་བུ༔ ཐར་པ་བསྒྲུབ་པ་རང་ལ་རག་ལས་ཀྱང༔ འཇིག་རྟེན་ཚེ་འདིའི་བྱ་བས་མགོ་འཁོར་ནས༔ གཙང་བདེ་རྟག་བདག་བཞི་ཡིས་སྣང་བ་བསླུས༔ ངན་སོང་གཏིང་རྡོ་སྡིག་པའི་གྲོགས་དང་འགྲོགས༔ རང་གིས་རང་ཕུང་བསམ་བརླག་སྙིང་རེ་རྗེ༔ གློ་བུར་འཆི་བས་བཅོམ་པ་ཡ་རེ་ང༔ ལས་ངན་བར་དོའི་སྣང་ཚུལ་ཞེ་རེ་གནག༔ ཆ་མེད་གཤིན་རྗེའི་ཕོ་ཉ་ཞེ་རེ་གཏུམ༔ ངན་སོང་གསུམ་གྱི་སྡུག་བསྔལ་དོས་དྲག་ཀྱང༔ མཐའ་མེད་འཁོར་བའི་རྒྱ་མཚོ་གཏིང་རེ་ཟབ༔ འདི་ལས་ཐར་ཐབས་དམ་པའི་ཆོས་མ་གཏོགས༔ འཇིག་རྟེན་ཁེ་གྲགས་རྒྱལ་བློན་སུས་མི་ཕན༔ བར་དོའི་འཁྲུལ་སྣང་འཇིགས་སྐྲག་ཅི་ཤར་ཡང༔ ཐམས་ཅད་སྒྱུ་མའི་དཔེ་བརྒྱད་ཤེས་པར་གྱིས༔ མི་ཡུལ་དབང་ཆོས་འབྲེལ་བའི་བླ་མ་དང༔ ད་ལྟ་འདྲེན་པ་སངས་རྒྱས་དངོས་སུ་བསྒོམ༔ སྐྱོན་མཐོང་ལོག་ལྟ་མེད་པར་དག་སྣང་སྦྱོངས༔ གཏན་གྱི་སྐྱབས་མགོན་དཀོན་མཆོག་རྣམ་གསུམ་དང༔ སྨོན་ལམ་རྒྱ་མཚོའི་མངའ་བདག་འོད་དཔག་མེད༔ སྤྱན་རས་གཟིགས་དང་མཐུ་ཆེན་ཐོབ་པ་བསྙེན༔ དག་པའི་ཞིང་ཁམས་ཡིད་ཀྱི་འདུན་པས་ཟུངས༔ སྐུ་གསུང་ཐུགས་ཀྱི་སྨིན་གྲོལ་ཡེ་ཤེས་དབང༔ ད་ལྟ་ཉིད་དུ་ཁྱོད་ལ་བསྩལ་བར་བྱ༔ ཞེས་དེ་ཡན་ཆད་ནི་མ་དག་སྣང་བ་སྦྱང་ཞིང༔ བྱབ་བྲབ་སྡིག་སྦྱང་གི་རིམ་པ་སོང་ནས༔ རིག་འཛིན་རྒྱལ་བའི་གོ་སར་དབུགས་དབྱུང་ཞིང་སྨིན་པར་བྱ་བའི་ཐོག་མར་མཎྜལ་འབུལ་ཞིང་ལོ་རྒྱུས་ཆོས་བཤད་ཀྱིས་སྤྲོ་བ་བསྐྱེད་ནས༔ ཤུ་ནྱ་ཏས་དམིགས་རྟེན་སྦྱངས་ལ་སློབ་མའི་ཆ་འཛིན་འོད་མཚན་སྟོང་འབར་བསྐྱེད༔ ཐུགས་ཀའི་ཧྲཱིཿཡིག་དབུས་སུ་ཨཱ་ཤད་ནི༔ སྤུས་བྲིས་མར་མེ་ལྟ་བུ་གསལ་བ་ལ༔ ཏིང་འཛིན་རྩེ་གཅིག་དམིགས་པའི་སྲང་ལ་གཞུར༔ ཕྱོགས་བཅུའི་རྒྱལ་དང་སྲས་བཅས་མ་ལུས་ཀུན༔ འོད་མཚན་སྟོང་འབར་སྐུ་ཡིག་ཕྱག་མཚན་གྱི༔ རྣམ་པར་ཁ་ཆར་བུ་ཡུག་འཚུབ་བཞིན་བྱོན༔ ཁྱོད་རང་ལྷར་གསལ་དེ་ལ་སིབ་སིབ་ཐིམ༔ དེ་ནས་གཟུངས་སྔགས་ཚར་གསུམ་དང༔ ཨ་མི་དྷེ་ཝ་ཚར་གསུམ་དབྱངས་དང་བཅས་ཏེ་རོལ་མོས་བྱིན་དབབ་པར་བྱ༔ དེ་ནས་ཏིཥྛ་བཛྲ་བརྗོད༔ སླར་ཡང་བུམ་པ་སྤྱི་བོར་བཞག༔ ཧཱུྃ་ཧྲཱིཿ རིན་ཆེན་བུམ་པ་གཞལ་ཡས་ཁང༔ ནང་ན་འོད་མཚན་སྟོང་འབར་བཞུགས༔ སྐལ་ལྡན་ཁྱོད་ལ་དབང་བསྐུར་རོ༔ འགྱུར་མེད་སྐུ་ཡི་དབང་ཐོབ་ཤོག༔ ཨོཾ་ཨ་མི་དྷེ་ཝ་ཨ་ཡུ་སིདྡྷི་ཧཱུྃ་ཧྲཱིཿ ཀཱ་ཡ་ཨ་བྷི་ཥིཉྩ་ཧཱུྃ༔ ངག་ལ་གསུང་དབང་བསྐུར་བ་ནི༔ ཨཱ༔ འགགས་མེད་ན་དཱ་དབྱིངས་ཀྱི་ཀློང༔ འགྲོ་དྲུག་རང་གྲོལ་ཡི་གེ་དྲུག༔ སྐལ་ལྡན་བུ་ལ་དབང་བསྐུར་བས༔ ངག་ལ་ནུས་པའི་དབང་ཐོབ་ཤོག༔ ཨོཾ་མ་ཎི་པདྨེ་ཧཱུྃ་ཧྲཱིཿ ཝཀྐཱ་ཨ་བྷི་ཥིཉྩ་ཧཱུཾྃ༔ སེམས་ལ་ཐུགས་ཀྱི་བརྡ་མཚོན་མན་ཤེལ་སྙིང་གར་གཏུགས༔ ཧཱུྃ་ཧཱུྃ༔ ངོ་བོ་ཀ་དག་མེ་ལོང་ངོས༔ ལྷུན་གྲུབ་དྭངས་ཤེལ་འཇའ་ཚོན་འཁྱུག༔ སྐལ་ལྡན་སེམས་ལ་དབང་བསྐུར་བས༔ འཁྲུལ་མེད་ཐུགས་ཀྱི་དབང་ཐོབ་ཤོག༔ ཨོཾ་བཛྲ་ཙིཏྟ་ཨ་བྷི་ཥིཉྩ་ཧཱུྃ༔ སྐུ་གསུང་ཐུགས་ཀྱི་དབང་གསུམ་རྫོགས༔ ས་མ་ཡཱ༔ སྤྲོས་པ་བསྐྱེད་ན་ལྷ་དབང་ནི༔ བར་འདིར་བཙུད་ཀྱང་ལེགས་པར་འགྱུར༔ དེ་ནས་ཟས་སྐོམ་འབྱོར་དགུ་བཤམས༔ རང་ངམ་གཞན་ནས་བྱུང་བཞིན་བསྔོ༔ སྙིང་རྗེའི་སེམས་ལ་ཕན་སེམས་བསྐྱེད༔ དེ་ནས་ལྷ་ལ་ཡོན་དུ་འབུལ༔ ཧཱུྃ་ཧྲཱིཿ ཚེ་ལས་འདས་པའི་མ་དག་ཕུང་པོ་ལྔ༔ རྒྱལ་བ་འོད་དཔག་མེད་ལ་ཡོན་དུ་འབུལ༔ ཡོན་འདི་བཞེས་ལ་སྐུ་ལྔ་ཡེ་ཤེས་ལྔ༔ མངོན་གྱུར་བདེ་ཆེན་པདྨ་འོད་དུ་དྲོངས༔ ཚེ་ལས་འདས་པའི་ལུས་ངག་ཡིད་གསུམ་པོ༔ རྒྱལ་བ་འོད་དཔག་མེད་ལ་ཡོན་དུ་འབུལ༔ རྒྱལ་བའི་གསང་གསུམ་བདེན་པ་མངོན་གྱུར་ནས༔ སྐུ་གསུམ་ཞིང་ཁམས་པདྨ་འོད་དུ་དྲོངས༔ ཚེ་ལས་འདས་པའི་རྣམ་ཤེས་ཚོགས་པ་བརྒྱད༔ རྒྱལ་བ་འོད་དཔག་མེད་ལ་ཡོན་དུ་འབུལ༔ བྱང་ཆུབ་སེམས་དཔའ་བརྒྱད་དུ་གནས་གྱུར་ཏེ༔ རྣམ་ཐར་བརྒྱད་ལྡན་བདེ་ཆེན་ཞིང་དུ་དྲོངས༔ ཚེ་ལས་འདས་པའི་ལུས་དང་ལོངས་སྤྱོད་ཀུན༔ རྒྱལ་བ་འོད་དཔག་མེད་ལ་ཡོན་དུ་འབུལ༔ ཡོན་དུ་བཞེས་ལ་པདྨོ་བཀོད་ཞིང་དུ༔ གདམས་ངག་ཆོས་བསྟན་ས་བཅུ་མཐར་ཕྱིན་ཏེ༔ འོད་ཟེར་ཆེན་པོའི་དབང་སྐུར་རབ་ཐོབ་ནས༔ སྨོན་ལམ་ཡོངས་གྲུབ་སངས་རྒྱས་ཐོབ་པར་མཛོད༔ དེ་ནས་ལམ་སྟོན་གནས་སྤར་ནི༔ ཨེ་མ་ཧོ༔ ཞིང་ཁམས་འདི་ནས་ནུབ་ཀྱི་ཕྱོགས་རོལ་ན༔ འཆི་མེད་རྔ་སྒྲའི་ཞིང་ཁམས་ཞེས་བྱ་བ༔ བདེ་སྐྱིད་ཡོན་ཏན་བསམ་གྱིས་མི་ཁྱབ་པ༔ སྡུག་བསྔལ་མིང་མེད་བདེ་བ་ཆེན་པོའི་ཞིང༔ དེ་ན་སངས་རྒྱས་འོད་མཚན་སྟོང་འབར་བ༔ མཚན་གྱིས་ངན་སོང་བགྲོད་པའི་སངས་རྒྱས་བཞུགས༔ སུ་ཞིག་དེ་ཡི་མཚན་འཛིན་པ༔ ཞིང་མཆོག་དེ་རུ་སྐྱེ་བར་འགྱུར༔ ཞིང་མཆོག་དེ་རུ་སྐྱེ་བར་ཤོག༔ ཚེ་ལས་འདས་པའི་རྣམ་ཤེས་ནི༔ འོད་ལྗང་ཧྲཱིཿཡིག་རྣམ་པ་ཅན༔ མཚན་བྱང་རྟེན་ལས་མདའ་འཕང་བཞིན༔ ཤར་གྱིས་ཐོན་དེ་རྒྱང་གྱིས་འཕང༔ འོད་དཔག་མེད་པའི་སྦྱོར་མཚམས་སུ༔ ཐིམ་ནས་རྒྱལ་བའི་སྲས་སུ་གྱུར༔ ཕཊ༔ ཕཊ༔ ཕཊ༔ སླར་ཡང་ནམ་མཁའ་དང་མཉམ་པའི༔ སེམས་ཅན་ཀུན་དོན་བྱེད་པར་ཤོག༔ གཟུགས་སྟོང་པའོ༔ སྟོང་པ་ཉིད་ཀྱང་གཟུགས་སོ༔ སྟོང་པ་ལས་བྱུང་རྟེན་འབྲེལ་ལོ༔ རྟེན་འབྲེལ་ལས་བྱུང་སྟོང་པ་ཉིད༔ བྱང་བུ་མེ་ལ་སྦྱང་བ་ནི༔ ཨེ་མ་ཧོ༔ ཀུན་བཏགས་སྣང་བའི་ཐབ་ཁུང་དུ༔ གཞན་དབང་ཕུང་ཁམས་བག་ཆགས་བསྲེག་རྫས་འབུལ༔ ཡོངས་གྲུབ་དེ་བཞིན་ཉིད་ཀྱི་མེ་སྦར་རོ༔ རང་བྱུང་ཡེ་ཤེས་ཆོས་སྐུ་མངོན་གྱུར་ཤོག༔ ཅེས་གཟུངས་སྔགས་ཕན་ཡོན་གང་ཆེ་བརྗོད༔ བསྲེག་ཐལ་ཆུ་བོའི་ཀློང་དུ་འམ༔ ཡང་ན་མཆོག་བརྒྱད་སཙྪ་གདབ༔ ཕུང་པོ་གསུམ་པའི་མདོ་དང་ནི༔ བཟང་སྤྱོད་བདེ་སྨོན་ལ་སོགས་འདོན༔ འདི་དང་འབྲེལ་བའི་འགྲོ་བ་རྣམས༔ བདེ་ཆེན་ས་ལ་རྒྱལ་སྲིད་ཐོབ༔ ཕན་པའི་ཡོན་ཏན་མངོན་གྱུར་ཅིང༔ ཕྱིར་མི་ལྡོག་པའི་ས་ཐོབ་འགྱུར༔ ས་མ་ཡཱ༔ ཞེས་དུས་བབས་ཀྱི་གཏེར་ཆོས་ཡེ་ཤེས་ཀློང་གི་མཛོད་ལས་བྱུང་བའི་འོད་མཚན་སྟོང་འབར་གྱི་ཁྲུས་ཆོག་དང་འབྲེལ་བའི་རྗེས་གནང་འདི་སྔོན་བསགས་ལས་འཕྲོ་བཟང་པོའི་དཔལ་གྱིས་མངོན་པར་མཐོ་བའི་བློ་གྲོས། པདྨ་བསྟན་འཛིན། གསལ་སྟོང་གསུམ་གྱིས་བསྐུལ་ངོར་ཆོས་མེད་ཆོས་པའི་གཟུགས་སྟོན་གཏེར་མིང་པ་ས་ར་ཧི་ཏས་ལེགས་པར་བྲིས་པ་ཁམས་གསུམ་གྱི་སེམས་ཅན་བདེ་ཆེན་པདྨ་འོད་དུ་གྲོལ་བར་གྱུར་ཅིག ཤུ་བྷཾ།