མ་བསྒོམ་འཕོ་བའི་གདམས་པ་སངས་རྒྱས་ལག་འཆང་།

༄༅། ཡང་གསང་མཁའ་འགྲོའི་ཐུགས་ཐིག་ལས༔ མ་བསྒོམ་འཕོ་བའི་གདམས་པ་སངས་རྒྱས་ལག་འཆང་བཞུགས་སོ༔

༄༅། ཡང་གསང་མཁའ་འགྲོའི་ཐུགས་ཐིག་ལས༔ འོད་མཚན་སྟོང་འབར་ཆ་ལག་ཏུ༔ མ་བསྒོམ་འཕོ་བའི་གདམས་པ༔ སངས་རྒྱས་ལག་འཆང་སྟོན༔ ས་མ་ཡཱ༔ ཚེ་མཐའ་ཡས་ལ་ཕྱག་འཚལ་ལོ༔ འཕོ་བ་སངས་རྒྱས་ལག་འཆང་འབྲི༔ གང་ཟག་རབ་འབྲིང་ཐ་མའི་ཁམས༔ རབ་ཀྱིས་ལྟ་བ་རྒྱས་འདེབས་འཕོ༔ འབྲིང་གིས་བསྐྱེད་རྫོགས་ཟུང་འཇུག་འཕོ༔ ཐ་མས་སྟོང་ཉིད་སྙིང་རྗེས་འཕོ༔ འོད་ཀྱི་གོང་བུ་ཧིཀ་གིས་འཕོ༔ རྟེན་ཡོད་རྟེན་མེད་ལ་སོགས་པ༔ འཕོ་བའི་རིམ་པ་དུ་མ་ལས༔ འདིར་ནི་ཨོ་རྒྱན་སངས་རྒྱས་ཀྱིས༔ འོད་དཔག་མེད་ལ་གདམས་ངག་ཞུས༔ བསྐྱེད་རྫོགས་སྟོང་ཉིད་སྙིང་རྗེ་དང༔ རྗེས་དྲན་ཟབ་མོ་འཕོ་ཚུལ་བསྟན༔ སྦྱོར་བ་སྔོན་འགྲོས་རྒྱུད་སྦྱངས་ནས༔ དངོས་གཞི་ལུས་ཀྱི་སྟོང་ར་དང༔ དག་པ་རྩ་ཡི་སྟོང་ར་དང༔ མི་ཤིགས་ཐིག་ལེའི་སྟོང་ར་བསྒོམས༔ དེ་གསུམ་གནད་ལ་བསྣུན་པའི་ཐབས༔ སྟོང་ཉིད་སྙིང་རྗེའི་གདེངས་ལྡན་པས༔ ཨེ་མ་ཧོ༔ རང་ཉིད་གནས་པའི་འཇིག་རྟེན་ཁམས་འདི་དག༔ སྡུག་བསྔལ་དང་བྲལ་བདེ་ལྡན་སྤྲུལ་པའི་གནས༔ པདྨ་འོད་ཀྱི་མཚན་ཉིད་བཀོད་པ་རྫོགས༔ དེ་དབུས་ཆུ་སྐྱེས་གེ་སར་བཞད་པའི་སྟེང༔ ཁུ་རྡུལ་རྣམ་པར་དག་པ་ཉི་ཟླའི་ཁར༔ རང་ལུས་གནས་གྱུར་རྒྱལ་བའི་ཡུམ་ཆེན་མོ༔ ཡེ་ཤེས་མཚོ་རྒྱལ་དམར་གསལ་ལོངས་སྤྱོད་རྫོགས༔ ཕྱག་གཡས་གྲི་ཁུག་སྐྱེ་ཤིའི་རྩ་བ་གཅོད༔ གཡོན་པ་ཐོད་ཁྲག་འཁོར་བ་དབྱིངས་སུ་རོལ༔ སྤྱན་གསུམ་དམར་ཟླུམ་སྐུ་གསུམ་ཡེ་ཤེས་སྟོན༔ ཞབས་གཉིས་བཞེངས་སྟབས་འགྲོ་དོན་སྐྱོ་དུབ་བྲལ༔ འཁོར་བའི་སྒོ་བརྒྱད་བཾ་ཡིག་བརྒྱད་ཀྱིས་བཀག༔ དེ་དབུས་སྙིང་པོས་སྲོག་ཤིང་དབུ་མའི་རྩ༔ མཚན་ཉིད་བཞི་ལྡན་ཆོས་སྐུ་ཡེ་ཤེས་མཚོན༔ རོ་རྐྱང་ལོངས་སྤྲུལ་རེ་རེ་མཚན་ཉིད་བཞི༔ ཡེ་ལྡན་འཁོར་ལོ་བཞི་ཡི་ཕོ་བྲང་གནས༔ སྙིང་གར་ཆོས་འཁོར་སྙིང་དབུས་གེ་སར་སྟེང༔ རླུང་སེམས་དྭངས་མ་ལྔ་ལྡན་ཐིག་ལེ་ནི༔ མ་སར་བྱ་ཡི་སྒོ་ང་གསལ་འཚེར་སྣུམ༔ འཕར་འདར་ལིང་ངེ་གནས་པ་ཧིཀ་གིས་བསྐུལ༔ དབུ་མའི་ཡར་སྣེ་སྤྱི་བོར་ཟང་ཐལ་ལེ༔ གཙུག་སྟེང་པདྨ་སྟོང་ལྡན་ཟེའུ་འབྲུའི་ཁར༔ ཐབས་ཤེས་ཉི་ཟླ་རྨ་བྱའི་ཁྲི་འུའི་སྟེང༔ རྒྱལ་ཀུན་གསུང་གི་དབང་ཕྱུག་ཚེ་མཐའ་ཡས༔ རྒྱལ་བ་འོད་མཚན་སྟོང་འབར་བཅུ་ཕྲག་དང༔ བཅུ་གཉིས་རྒྱན་སྤྲས་མཚན་དཔེའི་ཡོན་ཏན་རྫོགས༔ ཕྱག་གཉིས་མཉམ་བཞག་སྟེང་ན་ལྷུང་བཟེད་འཛིན༔ ཆོས་གོས་རྣམ་གསུམ་གསོལ་ཞིང་ལོངས་སྤྲུལ་སྐུའི༔ བདག་ཉིད་སངས་རྒྱས་ཀུན་འདུས་ངོ་བོར་གསལ༔ བྱམས་བརྩེའི་ཐུགས་ཀྱིས་བདག་ལ་དགོངས་བཞིན་བཞུགས༔ གཡས་གཡོན་སྤྱན་རས་གཟིགས་དང་མཐུ་ཆེན་ཐོབ༔ ལོངས་སྐུའི་རྒྱན་རྫོགས་ཕྱག་གཡས་སྐྱབས་སྦྱིན་མཛད༔ གཡོན་གཉིས་དཀོན་མཆོག་གསུམ་མཚོན་ཕྱག་རྒྱ་ཡིས༔ ཨུཏྤལ་ལ་གནས་ཕྲེང་བ་རྡོ་རྗེས་མཚན༔ ཞབས་གཉིས་མཉམ་བཞག་པད་ཟླའི་གདན་ལ་བཞུགས༔ བདག་སོགས་འགྲོ་ལ་ཞལ་ཕྱོགས་སྤྱན་གྱིས་གཟིགས༔ ཐུགས་ཀྱིས་དགོངས་ཤིང་དེད་དཔོན་ཆེན་པོར་བཞུགས༔ གཙོ་བོ་གསུམ་གྱི་སྤྱི་བོར་པད་ཟླའི་སྟེང༔ རྫོགས་ཆེན་རྩ་བ་བརྒྱུད་པའི་བླ་མ་བཞུགས༔ བར་དུ་ཡི་དམ་ཐེག་པ་རིམ་དགུ་ཡི༔ ལྷ་ཚོགས་འཁོར་ལོའི་རྣམ་པར་ཁྲོམ་ལྟར་བཞུགས༔ འོག་ཏུ་ཕྲིན་ལས་མ་རྒྱུད་མཁའ་འགྲོ་དང༔ ཤུགས་འགྲོ་གནས་གསུམ་ཌཱཀྐི་འཛུམ་བཅས་བཞུགས༔ མཐའ་སྐོར་མ་མགོན་གཟའ་བཙན་དམ་ཅན་སྡེ༔ སྲུང་མ་ལྕམ་དྲལ་རྒྱ་མཚོ་འཁོར་བཅས་བཞུགས༔ ཀུན་ཀྱང་ངན་སོང་འགྲོ་བའི་སྡུག་བསྔལ་དང༔ དམིགས་ཡུལ་ཚེ་འདས་འདྲེན་པའི་དགོངས་གནད་ཅན༔ བདག་གཞན་རེ་ས་ཁྱེད་ལས་གཞན་ན་མེད༔ གསོལ་བ་མོས་གུས་སྙིང་གི་དཀྱིལ་ནས་འདེབས༔ འཕོ་ཆེན་གཞོན་ནུ་བུམ་སྐུ་འགྲུབ་པར་གྱུར༔ ཞེས་པའི་གསོལ་བ་འདེབས་པའི་ཚིག༔ ཨེ་མ་ཧོ༔ ཤིན་ཏུ་ངོ་མཚར་འོད་དཔག་མེད་མགོན་དང༔ ཐུགས་རྗེ་ཆེན་པོ་ཕྱག་རྡོར་མཐུ་ཆེན་ཐོབ༔ བདག་སོགས་རྩེ་གཅིག་ཡིད་ཀྱིས་གསོལ་བ་འདེབས༔ ཟབ་ལམ་འཕོ་བ་འབྱུང་བར་བྱིན་གྱིས་རློབས༔ བདག་སོགས་ནམ་ཞིག་ཚེ་ཡི་དུས་བྱས་ཚེ༔ ཚེ་འདས་ལ༔ འཇིག་རྟེན་ཕྱི་མར་སོང་བའི་ཚེ་འདས་ཀྱི༔ རྣམ་ཤེས་བདེ་ཆེན་འཕོ་བར་བྱིན་གྱིས་རློབས༔ ཞེས་པའི་གསོལ་འདེབས་བརྒྱ་སྟོང་ཁྲི༔ ལོང་བའི་སྐབས་དང་འཕོ་ཚད་བཞིན༔ བཟླ་བ་དགོངས་པའི་ཚད་དང་བསྟུན༔ འདི་ཡི་ལམ་གྱིས་འཕོ་བ་ནི༔ ཐ་སྙད་དགེ་སྡིག་ལ་མི་ལྟོས༔ ཉིན་བཞིན་བྲམ་ཟེ་གསོད་པ་དང༔ མཚམས་མེད་ལྔ་ལ་སྤྱོད་པ་ཡང༔ འདི་ཡིས་གྲོལ་བ་གདོན་མི་ཟ༔ རབ་ཀྱིས་དག་པའི་ཞིང་ལ་སྦྱོར༔ འབྲིང་གིས་ལྷ་གནས་གཙང་མར་བགྲོད༔ ཐ་མས་མི་ལུས་ཆོས་ལྡན་ཐོབ༔ ཐེ་ཚོམ་མ་བྱེད་རིགས་ཀྱི་བུ༔ རྡོ་རྗེ་འཆང་གི་གསང་བའི་ཚིག༔ ཡེ་ཤེས་མཁའ་འགྲོའི་ཞལ་ལུང་ཡིན༔ ས་མ་ཡཱ༔ དེ་ནས་བརྒྱུད་པའི་གསོལ་འདེབས་ཀྱིས༔ སྙན་གསན་དབབ་ཅིང་རྒྱུད་སྐུལ་ཚིག༔ ཨེ་མ་ཧོ༔ གནས་འོག་མིན་དབྱིངས་ཡུམ་བཙུན་མོའི་མཁའ༔ དོན་ཡེ་ཤེས་ཆོས་སྐུ་རྡོ་རྗེ་འཆང༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབས༔ དོན་ངེས་པ་ལྔ་ལྡན་ཞིང་ཁམས་ནས༔ ལྷ་རྒྱལ་བ་རིགས་ལྔའི་སངས་རྒྱས་ལ༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབས༔ ནུབ་བདེ་ཆེན་རྣམ་པར་དག་ཞིང་ནས༔ མགོན་རྒྱལ་བ་འོད་མཚན་སྟོང་འབར་ལ༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབ༔ ས་བཅུ་པའི་དཔལ་ཡོན་རབ་རྫོགས་སྐུ༔ སྲས་ཐུ་བོ་སྤྱན་གཟིགས་མཐུ་ཆེན་ཐོབ༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབས༔ ཞིང་ཕྱོགས་བཅུའི་རབ་འབྱམས་མུ་མེད་ན༔ སྐུ་འཚོ་ཞིང་གཞེས་པའི་རྒྱལ་དང་སྲས༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབས༔ ལས་དྲུག་གིས་སྡུག་བསྔལ་བརྒྱུད་མར་མནར༔ མཚན་ཐོས་པས་འགྲོ་སྒྲོལ་བདེ་གཤེགས་བརྒྱད༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབས༔ དཔལ་པདྨ་འོད་ཀྱི་ཕོ་བྲང་ནས༔ རིག་འཛིན་ཀྱི་གྲུབ་བརྙེས་ཐོད་ཕྲེང་རྩལ༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབས༔ གནས་གཡུ་ལོ་བཀོད་པའི་ཞིང་ཁམས་ནས༔ རྗེ་འཕགས་མ་ཨཱརྱ་ཏཱ་རེ་མ༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབས༔ སྒྲགས་མདའ་ཡི་དྷུ་མ་ཐ་ལ་ནས༔ མཁའ་སྤྱོད་ཀྱི་མཁའ་འགྲོ་མཚོ་རྒྱལ་ལ༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབས༔ གནས་ཟངས་རི་མཁར་དམར་གྱི་གནས་མཆོག་ན༔ རྗེ་མ་ཅིག་ལབ་ཀྱི་སྒྲོན་མ་ལ༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབས༔ ཕུར་བ་ཡི་གྲུབ་ཐོབ་མཁར་ཆེན་གྱི༔ དབང་ཕྱུག་གི་མངའ་བདག་བརྟུལ་ཞུགས་ཅན༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབས༔ རྒྱ་བོད་ཀྱི་ཚོང་འདུས་ཆོས་ལ་འགྲིམས༔ ཨ་ཙ་ར་ཡེ་ཤེས་དབྱངས་ཉིད་ལ༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབས༔ སྣང་སྲིད་དུ་དག་པ་འབྱམས་སུ་ཀླས༔ གཏེར་ཆེན་གྱི་བླ་མ་ལུང་རིག་གླིང༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབས༔ གསང་ཆེན་གྱི་ལྟ་བ་ཟོལ་ཟོག་བྲལ༔ དག་སྣང་གི་མཛོད་འཛིན་ཡེ་ཤེས་གླིང༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབས༔ བརྒྱུད་ལྡན་གྱི་ཆུ་བོ་རྙོག་མེད་ལ༔ རྩ་བརྒྱུད་ཀྱི་བླ་མ་ཆོས་ལ་དབང༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབས༔ སྙིང་རྗེ་ཡི་མཆོག་གྱུར་ཡི་དམ་ལྷ༔ འཕགས་པ་ནི་རྒྱལ་བ་རྒྱ་མཚོ་ལ༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབས༔ མཁའ་ལ་ནི་ཐུགས་རྗེའི་ཤུགས་ཀྱིས་འགྲོ༔ གནས་གསུམ་གྱི་མ་མོ་མཁའ་འགྲོ་ལ༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབས༔ ལེགས་ཉེས་ཀྱི་སྟངས་འཛིན་དམ་རྗེས་གཅོད༔ མ་མགོན་གྱི་ཆོས་སྐྱོང་ལྕམ་དྲལ་ལ༔ བདག་གསོལ་བ་འདེབས་སོ་ཐུགས་རྒྱུད་བསྐུལ༔ ལམ་ཟབ་མོ་འཕོ་བའི་ཆོས་སྒོ་ཕྱེ༔ གནས་བདེ་ཆེན་བགྲོད་པར་བྱིན་གྱིས་རློབས༔ འཕོ་བྱ་དང་འཕོ་བྱེད་བྲལ་བའི་བྱ་བཏང་གིས༔ ལུས་གནས་ཀྱི་ཡེ་ཤེས་བརྗོད་མེད་ཕྱག་རྒྱ་ཆེ༔ དེ་ཉིད་ལས་གཞན་ན་སངས་རྒྱས་ནི་རིས་མེད་ཀྱི༔ རང་གྲོལ་གྱི་བདེ་གཤེགས་སྙིང་པོ་དེ་འགྲུབ་གྱུར་ཅིག༔ དེ་ནས་ཧིཀ་དང་ཕཊ་ཀྱི་སྒྲ་དྲག་པོ་བརྗོད་པའི་ཚེ་སྙིང་གའི་རྣམ་པར་ཤེས་པའི་ངོ་བོ་ཐིག་ལེ་དེ་ཉིད་ནམ་མཁའི་སྐར་མདའ་ཡར་བ་ལྟར་རྩ་དབུ་མའི་ལམ་བརྒྱུད་དེ་སོང་བ་སྤྱི་གཙུག་ནས་ཐོན༔ སངས་རྒྱས་འོད་དཔག་མེད་པའི་ཐུགས་ཀར་ཐིམ་ནས་ཐུགས་ཡིད་དབྱེར་མེད་དུ་འདྲེས་ནས་འོག་མིན་མཁའ་སྤྱོད་དུ་གཤེགས་པར་བསམ༔ འཕོ་བྱ་འཕོ་བྱེད་བྲལ་བ་དེ༔ ཆོས་སྐུ་ལྟ་བ་རྒྱས་འདེབས་ཡིན༔ ཕྱི་ནང་རྩ་ཡི་སྟོང་ར་བསྐྱེད༔ ལོངས་སྐུ་བསྐྱེད་རྫོགས་ཟུང་འཇུག་འཕོ༔ སྙིང་རྗེ་ཚད་མེད་གདུང་ཤུགས་བསྐྱེད༔ སྤྲུལ་སྐུ་ཚད་མེད་སྙིང་རྗེ་ཡི༔ འཕོ་ཚུལ་དེ་སོགས་ཤེས་པར་བྱ༔ རྩ་ཐིག་རླུང་གསུམ་རྣམ་དག་པའི༔ བདེ་སྟོང་རླུང་གི་རྫོགས་རིམ་ལས༔ གང་ཟག་རླུང་གི་རྣལ་འབྱོར་བས༔ དང་པོ་རླུང་གི་རོ་དགུ་སྤྲུགས༔ དེ་ནས་བུམ་ཅན་གནད་ལ་བསྣུན༔ འོག་རླུང་གྱེན་ལ་འདྲེན་བྱ་ཞིང༔ བར་རླུང་ཐད་སོར་བརྒྱང་བྱས་ཏེ༔ སྟེང་རླུང་སྤྱི་གཙུག་མཁའ་ལ་འཕངས༔ གཙུག་ཏོར་ནམ་མཁའི་འཁོར་ལོར་འཕོ༔ བདེ་གཤེགས་རྒྱལ་བའི་སྲས་སུ་འགྱུར༔ ས་མ་ཡཱ༔ མཐར་ནི་མི་དམིགས་གཤིས་ལ་ཀློད༔ ཡང་ན་རྫོགས་པའི་རིམ་པ་ནི༔ འོད་དཔག་མེད་ཀྱི་ཐུགས་ཀ་ནས་འོད་ཟེར་ལྕགས་ཀྱུ་ལྟ་བུ་འཕྲོས༔ བདག་ལུས་མཚོ་རྒྱལ་དུ་གསལ་བའི་སྙིང་གར་རེག་པ་ཙམ་གྱིས་འོད་དམར་གྱི་གོང་བུ་ཞིག་ཏུ་གྱུར་ནས་འོད་མཚན་སྟོང་འབར་གྱི་ཐུགས་རྣམ་པར་མི་རྟོག་པའི་ཡེ་ཤེས་དང་འདྲེས༔ སླར་ཡང་འདོད་ཡོན་མཆོད་པའི་ལོངས་སྤྱོད་དུ་དམིགས་ལ་ཚེ་འདས་ཀྱི་རྟོག་ཚོགས་དྲུག་གི་ཞེན་སྣང་དབྱིངས་སུ་དག་པར་བསམ༔ མཐར་ནི་བདེ་ཆེན་ཞིང་བཀོད་ཀྱི༔ མདོ་དང་སྨོན་ལམ་རྣམ་བཞི་ཡིས༔ བདེ་གཤེགས་ཞིང་བགྲོད་རྒྱུ་བཞི་བསྒྲུབ༔ རང་བཞིན་ཡོངས་ལ་ཕན་པའི་མཆོག༔ མ་བསྒོམས་ཆོས་ལྔའི་ནང་ནས་ཀྱང༔ ཟབ་པའི་མཐར་ཐུག་རྒྱ༔ མཁའ་འགྲོ་ཡེ་ཤེས་མཚོ་རྒྱལ་དང༔ ཨ་ཙར་ཡེ་ཤེས་དབྱངས་ཉིད་ཀྱི༔ ཐུགས་བཅུད་སངས་རྒྱས་ལག་བཅང་ཞེས༔ དུས་སྙིགས་སུམ་ཅུའི་ལྔ་བདོའི་དུས༔ རྒྱ་བོད་ཧོར་སོག་ཆ་ལུགས་འདྲེས༔ རྗེ་འཕྲུལ་ལྕགས་ཀྱི་རཱ་ཛ་ཡི༔ མངའ་ཐང་ཅུང་ཟད་འཆོལ་བའི་དུས༔ ལོ་ཙཱའི་སྤྲུལ་པ་གཞན་ལ་ཕན༔ ཟབ་གསང་གཏེར་ལ་སྤྱོད་པའི་ཚེ༔ རང་གཞན་ཆོས་ཀྱིས་འཚང་བ་འབྱུང༔ བྱ་ཐུལ་དམ་སྲིས་མ་འཚེ་ཞིང༔ རྡོ་རྗེ་གཞོན་ནུས་བསྲུང་བ་དང༔ དྲང་སྲོང་ཆེན་པོས་འཚོས་པ་ན༔ བསྟན་འཛིན་ཆོས་ཀྱི་བདག་པོ་དང༔ འཕྲད་ནས་འགྲོ་ལ་སྤེལ་ཐུབ་ཚེ༔ འབུམ་ལྔའི་སེམས་ཅན་བདེ་ལ་འགོད༔ ཆོས་འདིར་དབང་བ་བཅུ་ཕྲག་འབྱུང༔ གསུམ་གྱི་ལག་གཡོན་སྨེ་བས་བརྒྱན༔ གསུམ་གྱི་གནས་གསུམ་སྨེ་ཐིག་བཀྲ༔ བཞི་ཡི་ཞབས་ཀྱི་མཐིལ་དང་ནི༔ འགྲམ་གཡོན་སྨེ་བའི་ཐིག་ལེ་ཤར༔ དེ་སོགས་རང་རང་སྐྱེས་བུ་ནི༔ འབངས་རིགས་གྲུབ་པའི་དཔའ་བོ་དང༔ པདྨའི་ཞལ་མཇལ་དབང་གིས་སྨིན༔ རིག་པ་འཛིན་པ་ཤ་སྟག་ཡིན༔ དེ་རྣམས་ཀྱིས་ནི་རིམ་བཞིན་སྤེལ༔ འགྲོ་དོན་མཐའ་ནས་མཐའ་རུ་འཁྱོལ༔ ས་མ་ཡཱ༔ ཞེས་པའི་འཕོ་བའི་ཟབ་ཆོས་འདི་ནི༔ རང་བྱུང་ཀློང་གི་མཛོད་ལས་ཤར་ཡང་ལེ་ལོ་ཕྱི་བཤོལ་གྱི་དབང་དུ་ལུས་སོང་བའི་མཐར་དུས་ལ་བབ་ཚེ་ལས་ལྡན་སྤྲུལ་པའི་གང་ཟག་པདྨའི་ལུང་གིས་བསྔགས་པའི་བུ་དབྱི་ཁོག་པ་བློ་གྲོས་རབ་གསལ་དང༔ འཁོར་སར་བ་བློ་གྲོས་རྒྱ་མཚོ་དང༔ འོ་བཟིའི་དགེ་སྦྱོང་པདྨ་བསྟན་འཛིན་སོགས་ཆོས་བདག་དུ་མས་བསྐུལ་ངོར༔ དགེ་སློང་དགེ་བའི་བཤེས་གཉེན་བདག་ཉིད་སྤྲུལ་སྐུ་གཞན་ཕན་ཐུབ་བསྟན་ཉི་མ་དཔལ་བཟང་པོར་འབོད་པས་སྤེལ་བ་ཡོངས་ལ་དགེ་ཞིང་འགྲོ་ཀུན་ནུབ་ཕྱོགས་བདེ་ཆེན་གླིང་དུ་ཕྱིན་པར་གྱུར་ཅིག༔