འཕོ་བ་ཡེ་ཤེས་སྒོ་འབྱེད་རིག་འཛིན་རྡོ་རྗེ་གྲོ་ལོད་ཀྱི་གཏེར་ཁ།
ཆོས་ཉིད་ནམ་མཁའི་ཀློང་མཛོད་ལས༔ འཕོ་བ་ཡེ་ཤེས་སྒོ་འབྱེད་བཞུགས༔ ན་མོ་གུ་རུ་ས་ར་ཧ་པ་ཡེ༔ མ་འོངས་རྒྱུད་འཛིན་རྣམས་ཀྱི་ལམ༔ འཕོ་བ་ཡེ་ཤེས་སྒོ་འབྱེད་སྟོན༔ ཉམས་ལེན་ཚགས་སུ་ཚུད་མཛོད་ཅིག༔ ལས་ཅན་ཐར་ལམ་བགྲོད་འདོད་རྣམས༔ སྦྱངས་པ་སྔོན་དུ་མ་སོང་ན༔ དུས་ལ་བབ་ཚེ་གྲོལ་མི་འགྱུར༔ དུས་དང་རྣམ་པ་ཐམས་ཅད་དུ༔ ཉམས་ལེན་གནད་དང་མི་འབྲལ་གཅེས༔ ས་མ་ཡཱ༔ སྐྱབས་འགྲོ་སེམས་བསྐྱེད་སྔོན་སོང་ནས༔ ཟབ་ལམ་ཉམས་སུ་ལེན་པ་ལ༔ ཕཊ༔ སྣང་སྲིད་དག་པ་མཁའ་སྤྱོད་ཞིང༔ བདེ་ཆེན་འགྱུར་མེད་བཀོད་པ་རྫོགས༔ ཆུ་སྐྱེས་གེ་སར་བཞད་པའི་ཁར༔ ཉི་མའི་གདན་སྟེང་འོད་ཐིག་ཀློང༔ རང་ལུས་རྡོ་རྗེ་རྣལ་འབྱོར་མ༔ ལྗང་གསལ་གྲི་ཐོད་ཁ་ཊཱཾ་ཀ༔ ཞི་འཛུམ་འདོར་སྟབས་རུས་རྒྱན་གསོལ༔ སྐུ་དབུས་ཡར་གྱི་ཟང་ཐལ་ལམ༔ སྒོ་ཡི་དྭངས་མ་ཡེ་ཤེས་རྩ༔ དྲང་གསལ་སྣུམ་གསལ་མཚན་ཉིད་རྫོགས༔ དཀར་དམར་མཐིང་གའི་ཁ་དོག་འཆར༔ མར་སྣ་རྐང་མཐིལ་གཉིས་སུ་འགགས༔ ཡར་སྣ་སྤྱི་བོར་ཐ་ལེར་ཟུག༔ བདེ་སྐྱོང་འཁོར་ལོར་སྒྲོལ་མ་ལྗང༔ སྤྲུལ་པའི་འཁོར་ལོར་སྤྱན་མ་སེར༔ ཆོས་ཀྱི་འཁོར་ལོར་མ་ཀི་དཀར༔ ལོངས་སྤྱོད་འཁོར་ལོར་གོས་དཀར་དམར༔ བདེ་ཆེན་འཁོར་ལོར་དབྱིངས་ཕྱུག་མཐིང༔ ཡེ་ཤེས་འཁོར་ལོ་འོག་མིན་ཞིང༔ མ་བཙལ་རྫོགས་ལྡན་རང་བྱུང་བསྒོམ༔ རྐང་མཐིལ་ཐབས་ཤེས་ཐིག་ལེ་ནི༔ དཀར་དམར་གསལ་འཚེར་སྣུམ་འདྲིལ་འཕར༔ མ་སར་བྱ་ཡི་སྒོ་ང་ཙམ༔ ཡར་འཕར་གསང་བར་ཁ་སྦྱོར་ནས༔ དབྱིངས་ཀྱི་ཡུམ་ལྔའི་ཐུགས་བརྒྱུད་དེ༔ གཙུག་ཏོར་འཁོར་ལོར་ཞིང་བཀོད་རྒྱལ༔ ཕཊ༔ ཕཊ༔ ཕཊ༔ རྐང་མཐིལ་ཐབས་ཤེས་ཀྱི་ཐིག་ལེ་དེ་གཉིས་ཡར་སྤར་ནས་གསང་གནས་སུ་ཁ་སྦྱོར་ནས་གསང་གནས་བདེ་སྐྱོང་འཁོར་ལོའི་དམ་ཚིག་སྒྲོལ་མའི་ཐུགས་ཀར་འཕོ༔ དེ་ནས་ལྟེ་བ་སྤྲུལ་པའི༔ སྙིང་ཁ་ཆོས་ཀྱི༔ མགྲིན་པ་ལོངས་སྤྱོད༔ སྤྱི་བོ་སོགས་འཁོར་ལོ་ལྔའི་གནས་སུ་སྤྱན་མ་མ་ཀི་གོས་དཀར་དང་དབྱིངས་ཕྱུག་ཡུམ་ལྔའི་ཐུགས་ཀར་འཕོ༔ སྤྱི་གཙུག་ཏུ་རྒྱང་གིས་ཕྱིན་ནས་ཡེ་ཤེས་ཀྱི་འཁོར་ལོ་དང་བསྲེས་ཏེ༔ རྟོག་མེད་ཀྱི་ངང་དུ་མཉམ་པར་བཞག་གོ༔ དེ་ནས་གསོལ་བ་འདེབས་པ་ནི༔ ཀྱེ༔ ཀུན་བཟང་རྡོར་སེམས་རྡོ་རྗེ་འཆང༔ དགའ་རབ་ཤྲཱི་སེང་པདྨ་འབྱུང༔ ས་ར་ཧ་དང་གྲུབ་བརྙེས་འབུམ༔ བླ་མ་རྣམས་ལ་གསོལ་བ་འདེབས༔ འཕོ་ཆེན་བུམ་སྐུར་བྱིན་གྱིས་རློབས༔ ཆོས་སྐུ་ཡུམ་ཆེན་རྣལ་འབྱོར་མ༔ ཁྲོས་མའི་སྒྱུ་འཕྲུལ་མཁའ་འགྲོ་འབུམ༔ ཨ་མ་ཡེ་ཤེས་མཚོ་རྒྱལ་ལ༔ གསོལ་བ་འདེབས་སོ་ཐུགས་རྒྱུད་བསྐུལ༔ འཇའ་ལུས་ཆེན་པོར་བྱིན་གྱིས་རློབས༔ ཟབ་ལམ་འཕོ་བའི་ཆོས་སྒོ་ཕྱེས༔ དབྱིངས་དང་ཡེ་ཤེས་གཉིས་མེད་ཀློང༔ འགྱུར་མེད་བཙན་ས་ཟིན་པར་ཤོག༔ ཕཊ༔སྒྲ་བདུན་གྱིས་ཐ་མ་ལ་གཙུག་ཏོར་ཡེ་ཤེས་ཀྱི་འཁོར་ལོར་བསྲེས་ཏེ་རྟོག་མེད་ཀྱི་ངང་དུ་མཉམ་པར་བཞག༔ ཡང་ཡང་སྦྱང་བའི་རྗེས་སུ་ནམ་མཁའི་ཀློང་ནས་རང་ཉིད་ཡེ་ཤེས་ཀྱི་མཁའ་འགྲོར་བབ༔ དེ་ནས་ལུས་ཀྱི་མཆོད་སྦྱིན་འདི་ལྟར་བྱའོ༔ ཕཊ༔ རང་ཉིད་ཡེ་ཤེས་ཁྲོས་མར་ལྡང༔ ཕྱག་གཡས་གྲི་ཁུག་ཚད་ཙམ་གྱིས༔ སྣང་སྲིད་ཁེབ་པའི་ཞིང་ལྤགས་གཞིར༔ ཤ་རི་ཁྲག་མཚོ་རུས་གྲམ་ཁྲོད༔ ཚིལ་ཞུན་མར་ཁུའི་རྒྱ་མཚོ་འཁྱིལ༔ ལྦུ་བ་ངད་རླངས་འདོད་དགུ་འཆར༔ ཆོས་དབྱིངས་དང་མཉམ་བྷན་སྣོད་དུ༔ ཀོ་རོ་ཙ་ན་བྱང་སེམས་བསྐྱིལ༔ འབྲུ་གསུམ་ནུས་པས་བྱིན་རླབས་ཏེ༔ སྐུ་གསུང་ཐུགས་ཀྱི་བདུད་རྩི་ལས༔ མཆོད་སྤྲིན་ནམ་མཁའ་མཉམ་པར་སྤེལ༔ ཨོཾ་ཨཱཿཧཱུྃ་གིས་བྱིན་གྱིས་རླབས༔ ཕཊ༔ ཕཊ༔ ཕཊ༔ ཀུན་བཟང་རྡོར་སེམས་རྡོ་རྗེ་འཆང༔ དགའ་རབ་ཤྲཱི་སེང་པདྨ་འབྱུང༔ ས་ར་ཧ་དང་གྲུབ་བརྙེས་འབུམ༔ སྐུ་གསུམ་རྒྱུད་པའི་བླ་མ་མཆོད༔ ཕཊ༔ ཕཊ༔ ཕཊ༔ གསང་འདུས་མ་ཧཱ་མ་ཡ་དང༔ དུས་འཁོར་སྒྱུ་འཕྲུལ་ཀྱེ་རྡོ་རྗེ༔ ཟླ་གསང་དམ་ཚིག་བཀོད་དང་གདན༔ བདེ་མཆོག་བཀའ་བརྒྱད་ལ་སོགས་པའི༔ ཡི་དམ་དཀྱིལ་འཁོར་ལྷ་ཚོགས་མཆོད༔ འཁོར་བ་དོང་སྤྲུགས་ནུས་པར་ཤོག༔ ཕཊ༔ ཕཊ༔ ཕཊ༔ སངས་རྒྱས་ཆོས་དང་དགེ་འདུན་སོགས༔ དཀོན་མཆོག་སྲིད་ཞིའི་མགྲོན་རྣམས་མཆོད༔ ཡེ་ཤེས་མགོན་པོ་དཔལ་མགོན་སོགས༔ མགོན་པོ་ཡོན་ཏན་མགྲོན་རྣམས་མཆོད༔ ཕཊ༔ ཕཊ༔ ཕཊ༔ ལྷ་གཤིན་མ་བདུད་སྲིན་པོ་བཙན༔ གནོད་སྦྱིན་ཀླུ་བདུད་གཟའ་རྡོར་རྒྱལ༔ ཕྱོགས་སྐྱོང་དྲེགས་དཔོན་བསྟན་མ་སྐྱོང༔ བཀའ་ཡི་ལྷ་སྲིན་སྡེ་བརྒྱད་མཆོད༔ ཕཊ༔ ཕཊ༔ ཕཊ༔ རྒྱལ་པོ་བེ་ཧར་བེར་ནག་དང༔ ཙི་དམར་འགོང་པོ་ཕོ་གདོན་སྡེ༔ འཕྲོག་མ་མ་བུ་ལྔ་བརྒྱ་དང༔ བྱིས་པའི་གདོན་ཆེན་བཅོ་ལྔ་མཆོད༔ ཕཊ༔ ཕཊ༔ ཕཊ༔ འགབ་འདྲེ་དམ་སྲི་ཡུལ་འདྲེ་དང༔ ཟོ་དོར་གཉན་དང་གྲོང་འདྲེ་དང༔ དྲི་ཟ་གནས་གདོན་ཡུལ་གདོན་བཅས༔ སྣང་ཞིང་སྲིད་པའི་ལྷ་འདྲེ་ལ༔ གང་ལ་གང་མཁོའི་འདོད་ཡོན་སྦྱིན༔ ལྷག་མ་མེད་པར་ཧབ་ཐོབ་རོལ༔ ཕཊ༔ ཕཊ༔ ཕཊ༔ དམྱལ་བ་ཡི་དྭགས་དུད་འགྲོ་མི༔ ལྷ་དང་ལྷ་མིན་བར་དོ་བ༔ ཁམས་གསུམ་སེམས་ཅན་ཐམས་ཅད་མཆོད༔ ཐམས་ཅད་ངོམ་ཞིང་དགའ་མགུར་ཚིམ༔ སྦྱིན་པའི་ཕ་རོལ་ཕྱིན་གྱུར་ནས༔ ཚོགས་གཉིས་ཡོངས་སུ་རྫོགས་པར་ཤོག༔ ཕཊ༔ ཕཊ༔ ཕཊ༔ ལྷག་མ་མྱོང་གྲོལ་བདུད་རྩི་ཡིས༔ འོན་ལོང་ལྐུགས་པ་ཞ་བོ་དང༔ ཁས་ཞན་དབང་ཆུང་ཐམས་ཅད་མཆོད༔ སྡུག་བསྔལ་རྒྱུ་འབྲས་དང་བྲལ་ནས༔ བདེ་ཆེན་དག་པའི་ཀློང་དུ་འཕོས༔ སྐད་ཅིག་རྫོགས་སངས་རྒྱས་གྱུར་ཅིག༔ ཕཊ༔ ཕཊ༔ ཕཊ༔ མཆོད་བྱ་མཆོད་བྱེད་མཆོད་ཡུལ་བཅས༔ རྨི་ལམ་སད་བཞིན་རང་ངོར་སངས༔ ཆོས་ཉིད་སྐྱེ་འགགས་འགྱུར་མེད་ངང༔ འཁོར་གསུམ་དམིགས་མེད་དབྱིངས་སུ་ཨཱ༔ ཕཊ༔ ཕཊ༔ ཕཊ༔ འདི་ནི་གསང་ལམ་འཕོ་བའི་ལུགས༔ ཉམས་སུ་ལེན་པའི་གང་ཟག་རྣམས༔ རྒྱུན་དུ་ཉམས་ལེན་བྱེད་པའི་བུ༔ ཚེ་འདིར་གྲོལ་བ་མ་ཐོབ་ན༔ ཕ་ཡིས་བསླུས་སོ་སྐལ་ལྡན་རྣམས༔ ས་མ་ཡཱ༔ གཟའ་བདུད་དུག་གི་སྤུ་གྲིས་སྲུངས༔ བཀའ་དང་ཐ་ཚིག་གཉན་པོའི་རྒྱ༔ ཞེས་པ་འདི་ཡང་འོད་གསལ་རྫོགས་པ་ཆེན་པོའི་ཀློང་ཡངས་ནམ་མཁའི་རྣལ་འབྱོར་པ་རིག་འཛིན་རྡོ་རྗེ་གྲོ་ལོད་ཀྱིས་ཆོས་ཉིད་ནམ་མཁའི་ཀློང་མཛོད་ལས་ཞལ་བཤུས་ཏེ་དག་པར་ཕབ་པའི་ཡི་གེ་པ་ནི་སྒ་ཡི་བན་དྷེ་པདྨས་བྲིས་སོ༔