འབྲི་གུང་ཆོས་ཀྱི་གྲགས་པའི་འཕོ་བ་འཇའ་ཟུག་མ་འདོན་འགྲིགས།

༄༅། འབྲི་གུང་ཆོས་ཀྱི་གྲགས་པའི་འཕོ་བ་འཇའ་ཟུག་མ་འདོན་འགྲིགས་སུ་བཀོད་པ། འདི་འབྲི་གུང་ཆོས་ཀྱི་གྲགས་པའི་འཕོ་བ་འཇའ་ཟུག་མ་འདོན་འགྲིགས་སུ་བཀོད་པ་སེམས་ཅན་འཆི་ཁ་མའི་རྣ་ལམ་དུ་སངས་རྒྱས་སྨན་བླའི་མཚན་བརྗོད་ན་བདེ་བར་གཤེགས་པ་བརྒྱད་ཀྱིས་ནུབ་ཕྱོགས་བདེ་ཅན་དུ་སྐྱེ་བར་གསུངས་པ་བཞིན་གལ་ཤིན་ཏུ་ཆེ་སྟེ་མཚན་བརྗོད་འདི་ལྟར་རོ༎ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་ལེགས་པར་ཡོངས་བསྒྲགས་དཔལ་གྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེ་དང་ཟླ་བ་དང་པདྨས་རབ་ཏུ་བརྒྱན་པ་མཁས་པ་གཟི་བརྗིད་སྒྲ་དབྱངས་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གསེར་བཟང་དྲི་མེད་རིན་ཆེན་སྣང་བརྟུལ་ཞུགས་གྲུབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མྱ་ངན་མེད་མཆོག་དཔལ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་བསྒྲགས་རྒྱ་མཚོའི་དབྱངས་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཆོས་རྒྱ་མཚོ་མཆོག་གི་བློས་རྣམ་པར་རོལ་པས་མངོན་པར་མཁྱེན་པའི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སྨན་གྱི་བླ་བཻ་ཌཱུརྱའི་འོད་ཀྱི་རྒྱལ་པོ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དཔལ་རྒྱལ་བ་ཤཱཀྱ་ཐུབ་པ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བཅོམ་ལྡན་འདས་མ་ཤེས་རབ་ཀྱི་ཕ་རོལ་ཏུ་ཕྱིན་མ་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཇམ་པའི་དབྱངས་དང་སྐྱབས་གྲོལ་དང་། རྡོ་རྗེ་འཛིན་པ་ཉི་མ་ལྟར་སྣང་བྱེད་ཟླ་བ་ལྟར་གསལ་བྱེད་ལ་སོགས་པའི་སེམས་དཔའ་ཆེན་པོ་བཅུ་དྲུག་གཙོ་བོར་བཞུགས་པའི་བྱང་ཆུབ་སེམས་དཔའི་ཚོགས་ཐམས་ཅད་ལ་ཕྱག་འཚལ་ལོ། །མཆོད་དོ་སྐྱབས་སུ་མཆིའོ། །གསོལ་འདེབས་ནི། ཨོཾ་སྭ་སྟི། གསེར་གྱི་མདོག་ཅན་སྐྱབས་སྦྱིན་ཕྱག་རྒྱ་ཅན། །སྨོན་ལམ་བརྒྱད་གྲུབ་ཚོགས་གཉིས་དཔལ་གྱིས་བརྗིད། །གཞན་གྱིས་མི་ཐུབ་ཞིང་གི་དཔལ་གྱུར་པ། །མཚན་ལེགས་ཡོངས་བསྒྲགས་དཔལ་ལ་ཕྱག་འཚལ་ལོ། །མགོན་པོ་ཁྱེད་ལ་ཕྱག་འཚལ་གསོལ་བཏབ་མཐུས། །ཚེ་འདས་བདེ་ཆེན་ཞིང་དུ་འདྲེན་པར་མཛོད། །སྐུ་མདོག་སེར་པོ་མཆོག་སྦྱིན་ཕྱག་རྒྱ་ཅན། །སྨོན་ལམ་བརྒྱད་གྲུབ་ཚོགས་གཉིས་དཔལ་གྱིས་བརྗིད། །རིན་ཆེན་ལྡན་པའི་ཞིང་གི་དཔལ་གྱུར་པ། །རིན་ཆེན་ཟླ་བའི་ཞབས་ལ་ཕྱག་འཚལ་ལོ། །མགོན་པོ་ཁྱེད་ལ་ཕྱག་འཚལ་གསོལ་བཏབ་མཐུས། །ཚེ་འདས་བདེ་ཆེན་ཞིང་དུ་འདྲེན་པར་མཛོད། །འཛམ་བུའི་གསེར་འདྲ་ཆོས་སྟོན་ཕྱག་རྒྱ་ཅན། །སྨོན་ལམ་བཞི་གྲུབ་ཚོགས་གཉིས་དཔལ་གྱིས་བརྗིད། །སྤོས་ཀྱིས་ཡོངས་གང་ཞིང་གི་དཔལ་གྱུར་པ། །གསེར་བཟང་དྲི་མེད་སྣང་ལ་ཕྱག་འཚལ་ལོ། །མགོན་པོ་ཁྱེད་ལ་ཕྱག་འཚལ་གསོལ་བཏབ་མཐུས། །ཚེ་འདས་བདེ་ཆེན་ཞིང་དུ་འདྲེན་པར་མཛོད། །སྐུ་མདོག་དམར་སྐྱ་མཉམ་བཞག་ཕྱག་རྒྱ་ཅན། །སྨོན་ལམ་བཞི་གྲུབ་ཚོགས་གཉིས་དཔལ་གྱིས་བརྗིད། །མྱ་ངན་མེད་པའི་ཞིང་གི་དཔལ་གྱུར་པའི། །མྱ་ངན་མེད་མཆོག་དཔལ་ལ་ཕྱག་འཚལ་ལོ། །མགོན་པོ་ཁྱེད་ལ་ཕྱག་འཚལ་གསོལ་བཏབ་མཐུས། །ཚེ་འདས་བདེ་ཆེན་ཞིང་དུ་འདྲེན་པར་མཛོད། །སྐུ་མདོག་དཀར་དམར་ཆོས་སྟོན་ཕྱག་རྒྱ་ཅན། །སྨོན་ལམ་བཞི་གྲུབ་ཚོགས་གཉིས་དཔལ་གྱིས་བརྗིད། །ཆོས་ཀྱི་རྒྱལ་མཚན་ཞིང་གི་དཔལ་གྱུར་པའི། །ཆོས་བསྒྲགས་རྒྱ་མཚོའི་དབྱངས་ལ་ཕྱག་འཚལ་ལོ། །མགོན་པོ་ཁྱེད་ལ་ཕྱག་འཚལ་གསོལ་བཏབ་མཐུས། །ཚེ་འདས་བདེ་ཆེན་ཞིང་དུ་འདྲེན་པར་མཛོད། །བྱི་རུའི་མདོག་ཅན་མཆོག་སྦྱིན་ཕྱག་རྒྱ་ཅན། །སྨོན་ལམ་བཞི་གྲུབ་ཚོགས་གཉིས་དཔལ་གྱིས་བརྗིད། །རིན་ཆེན་རྒྱ་མཚོའི་ཞིང་གི་དཔལ་གྱུར་པའི། །མངོན་མཁྱེན་རྒྱལ་པོ་དེ་ལ་ཕྱག་འཚལ་ལོ། །མགོན་པོ་ཁྱེད་ལ་ཕྱག་འཚལ་གསོལ་བཏབ་མཐུས། །ཚེ་འདས་བདེ་ཆེན་ཞིང་དུ་འདྲེན་པར་མཛོད། །སྐུ་མདོག་སྔོན་པོ་མཆོག་སྦྱིན་ཕྱག་རྒྱ་ཅན། །བཅུ་གཉིས་སྨོན་གྲུབ་ཚོགས་གཉིས་དཔལ་གྱིས་བརྗིད། །བཻ་ཌཱུརྱ་སྣང་ཞིང་གི་དཔལ་གྱུར་པའི། །སྨན་པའི་རྒྱལ་པོ་དེ་ལ་ཕྱག་འཚལ་ལོ། །མགོན་པོ་ཁྱེད་ལ་ཕྱག་འཚལ་གསོལ་བཏབ་མཐུས། །ཚེ་འདས་བདེ་ཆེན་ཞིང་དུ་འདྲེན་པར་མཛོད། །གསེར་གྱི་མདོག་ཅན་ས་གནོན་ཕྱག་རྒྱ་ཅན། །རྨད་བྱུང་ཐུགས་རྗེ་བརྩོན་འགྲུས་ཆེན་པོའི་མཐུས། །མི་མཇེད་འཇིག་རྟེན་ཁམས་ཀྱི་དཔལ་གྱུར་པའི། །འདྲེན་མཆོག་ཤཱཀྱའི་ཏོག་ལ་ཕྱག་འཚལ་ལོ། །མགོན་པོ་ཁྱེད་ལ་ཕྱག་འཚལ་གསོལ་བཏབ་མཐུས། །ཚེ་འདས་བདེ་ཆེན་ཞིང་དུ་འདྲེན་པར་མཛོད། །དམར་སེར་ཕྱག་གཡས་ཆོས་འཆད་རྡོ་རྗེ་འཛིན། །གཡོན་པ་མཉམ་བཞག་པོ་ཏི་ལེགས་པར་བསྣམས། །དུས་གསུམ་རྒྱལ་བ་ཐམས་ཅད་སྐྱེད་པའི་ཡུམ། །ཤེས་རབ་ཕ་རོལ་ཕྱིན་ལ་ཕྱག་འཚལ་ལོ། །ཡུམ་ཆེན་ཁྱེད་ལ་ཕྱག་འཚལ་གསོལ་བཏབ་མཐུས། །ཚེ་འདས་བདེ་ཆེན་ཞིང་དུ་འདྲེན་པར་མཛོད། །རབ་མཛེས་ཡིད་འོང་རིན་ཆེན་རྒྱན་གྱིས་སྤྲས། །ཟླ་བའི་གདན་ལ་སྐྱིལ་ཀྲུང་ཚུལ་གྱིས་བཞུགས། །མཁྱེན་དང་བརྩེ་དང་ནུས་པ་ཕུན་སུམ་ཚོགས། །སེམས་དཔའ་ཆེན་པོ་རྣམས་ལ་ཕྱག་འཚལ་ལོ། ། འཕགས་པའི་ཚོགས་ལ་ཕྱག་འཚལ་གསོལ་བཏབ་མཐུས། ། ཚེ་འདས་བདེ་ཆེན་ཞིང་དུ་འདྲེན་པར་མཛོད། །ཅེས་གསོལ་བ་བཏབ་པའི་མཐར། ཚེ་འདས་ཀྱི་རྣམ་ཤེས་ཀྱི་ངོ་བོ་སྙིང་གའི་ཐིག་ལེ་དེ་མེ་སྟག་ཡར་བ་བཞིན་འོད་དཔག་མེད་ཀྱི་ཐུགས་ཀར་ཐིམ་པར་བསམ་བཞིན། ཧིཀ་ཉེར་གཅིག་གམ་བདུན་བརྗོད་དོ། ། ༈ སྙིང་ཐིག་ལས། ཨེ་མ་ཧོ༔ གནས་རང་སྣང་དོན་གྱི་འོག་མིན་ན༔ ཡིད་དད་བརྒྱའི་འཇའ་གུར་འཁྲིགས་པའི་ཀློང༔ སྐྱབས་ཀུན་འདུས་རྩ་བའི་བླ་མ་ནི༔ སྐུ་ཐ་མལ་མ་ཡིན་དྭངས་མའི་ལུས༔ དཔལ་སངས་རྒྱས་སྣང་མཐའི་ངོ་བོར་བཞུགས༔ ཡིད་མོས་གུས་གདུང་བས་གསོལ་བ་འདེབས༔ ལམ་འཕོ་བ་འབྱོང་བར་བྱིན་གྱིས་རློབས༔ གནས་འོག་མིན་བགྲོད་པར་བྱིན་གྱིས་རློབས༔ དབྱིངས་ཆོས་སྐུའི་རྒྱལ་ས་ཟིན་པར་ཤོག༔ ཅེས་བརྗོད་སྤར་ཆོག་དམིགས་པ་གོང་བཞིན་བསྐྱར༔