རྡོ་རྗེ་སེམས་དཔའི་སྒོམ་བཟླས་སྒྲིབ་གཉིས་སྦུར་ལེན།

ཡང་གསང་ཌཱཀྐིའི་ཐུགས་ཐིག་ལས༔ རྡོ་རྗེ་སེམས་དཔའི་སྒོམ་བཟླས་སྒྲིབ་གཉིས་སྦུར་ལེན་བི་ཛ་རསྨི༔ རིགས་ཀུན་ཁྱབ་བདག་རྡོ་རྗེ་སེམས༔ སྒོ་གསུམ་གུས་པས་རབ་བཏུད་དེ༔ རིགས་གཅིག་རྡོ་རྗེ་སེམས་དཔའ་ཡི༔ དཔའ་བོ་ཕྱག་རྒྱ་གཅིག་པུའི་ལྷ༔ སྒྲིབ་གཉིས་སྦུར་ལེན་འདི་ན་ངོམ༔ ལས་སྐལ་ལྡན་པས་དང་དུ་ལོངས༔ ས་མ་ཡཱ༔ ཨེ་མ་ཧོ༔ མཆོག་གསུམ་ངོ་བོ་བླ་མ་རྡོ་རྗེ་སེམས༔ ཁྱོད་ལ་བྱང་ཆུབ་བར་དུ་སྐྱབས་སུ་མཆི༔ བདག་གཞན་མཁའ་ཁྱབ་འགྲོ་བ་མ་ལུས་པ༔ བླ་མ་རྡོར་སེམས་གོ་འཕང་མཆོག་ཐོབ་བྱ༔ དམིགས་མེད་ཁྱབ་བརྡལ་དྲན་པའི་ཏིང་འཛིན་ངང༔ མ་རྟོགས་འགྲོ་ལ་བརྩེ་བའི་སྙིང་རྗེའི་གདངས༔ ཟུང་འཇུག་རྩལ་ལས་རང་གི་སྤྱི་གཙུག་ཏུ༔ པད་དཀར་ཟླ་སྟེང་ཧཱུྃ་མཚན་ཡོངས་གྱུར་ལས༔ དཔལ་ལྡན་བླ་མ་བཛྲ་ས་ཏྭའི་སྐུ༔ གངས་རིའི་ཕུང་པོར་ཉིན་བྱེད་འབུམ་འཁྱུད་བཞིན༔ ཞལ་གཅིག་འཛུམ་མདངས་བརྩེ་བའི་སྤྱན་གྱིས་གཟིགས༔ ཕྱག་གཡས་རིག་སྟོང་རྡོ་རྗེ་ཐུགས་ཀར་གཏོད༔ གཡོན་པས་སྣང་སྟོང་དྲིལ་བུ་དཀུ་ལ་བརྟེན༔ ཞབས་གཉིས་ཕྱེད་པའི་སྐྱིལ་མོ་ཀྲུང་གིས་བཞུགས༔ དེ་ཡི་པང་ཡུམ་རྡོ་རྗེ་སྙེམ་མ་དཀར༔ དར་དཔྱང་རུས་རྒྱན་དགའ་བ་བརྒྱད་ལྡན་གྱི༔ པདྨའི་སྐྱིལ་ཀྲུང་གིས་འཁྱུད་འཁྲིལ་ཞིང་སྦྱོར༔ ཞལ་འཛུམ་བརྩེ་ལྡན་གྲི་ཁུག་ཐོད་ཁྲག་བསྣམས༔ ཡབ་ཡུམ་སྣང་སྟོང་གནས་གསུམ་འབྲུ་གསུམ་གསལ༔ དབུ་རྒྱན་སྙན་ཆ་དོ་ཤལ་སེ་མོ་དོ༔ ཕྱག་ཞབས་དཔུང་གདུབ་ཕྲེང་བ་རིན་པོ་ཆེའི༔ རྒྱན་ཆ་བརྒྱད་དང་དར་ལྗང་སྟོད་གཡོག་ཀླུབས༔ སྨད་དཀྲིས་ཁྲ་བོ་ཟི་ལྡིར་ཅོད་པན་དཔྱང༔ སྐ་རགས་གསེར་མདོག་དར་གོས་ན་བཟའ་ལྔ༔ ལོངས་སྐུའི་བདག་ཉིད་ཞི་བའི་ཚུལ་དགུས་སྤྲས༔ མཚན་བཟང་དཔེ་བྱད་ཡོངས་རྫོགས་མཛེས་སྡུག་སྐུ༔ ཡན་ལག་དྲུག་ཅུའི་ཐོས་ལྡན་རྣམ་གྲོལ་གསུང༔ མཁྱེན་གཉིས་མངོན་གྱུར་ཡེ་ཤེས་རྒྱ་མཚོའི་ཐུགས༔ རིགས་བརྒྱ་འདུས་པའི་སྤྱི་དཔལ་ཆེན་པོར་གསལ༔ ཀྱཻ༔ བཅོམ་ལྡན་རིགས་ཀུན་ཁྱབ་བདག་རྡོ་རྗེ་སེམས༔ དམིགས་མེད་མཁྱེན་དང་བརྩེ་བའི་བདག་ཉིད་ཅན༔ མཐུ་ནུས་སྟོབས་ཀྱིས་སྲིད་མཚོར་འགྲོ་སྒྲོལ་མགོན༔ བདག་འདྲ་ལས་ཉོན་ཞགས་པས་དམ་འཆིང་ནས༔ མ་རིག་རྒྱུ་ལས་རྐྱེན་སྣང་གློ་བུར་གྱི༔ མི་དགེ་བཅུ་དང་མཚམས་མེད་དེ་དང་ཉེ༔ ཆང་འཐུང་ལ་སོགས་ཁ་ན་མ་ཐོའི་སྡིག༔ སོ་ཐར་བྱང་སེམས་རིག་འཛིན་སྔགས་ཀྱི་སྡོམ༔ བླ་མའི་སྐུ་གསུང་ཐུགས་གསང་ས་མ་ཡཱ༔ འགལ་ཉམས་འདས་རལ་བཅས་པའི་ལྟུང་བ་རྣམས༔ ཐམས་ཅད་མགོན་ཁྱོད་སྤྱན་སྔར་སྙིང་ནས་བཤགས༔ ཁྱོད་ཐུགས་ཟླ་བ་ཆ་གང་ལེབ་ཆགས་སྟེང༔ ཧཱུྃ་དཀར་མཐའ་དམར་ཨོཾ་ཡིག་ནས་བཟུང་སྟེ༔ སྔགས་ཕྲེང་གཡས་སུ་འཁོར་བས་བདུད་རྩིའི་རྒྱུན༔ འོ་མ་ལྟ་བུ་དཀར་ལ་དྭངས་པ་ནི༔ ཚངས་བུག་ནས་ཁྱབ་ནད་རྣམས་དུད་སོལ་ཁུ༔ གདོན་བགེགས་སྦལ་སྦྲུལ་ཉ་ལྕོང་གྲོག་སྦུར་གཟུགས༔ སྡིག་སྒྲིབ་རྣག་ཁྲག་རྣམ་པར་ནུ་རུ་རུ༔ འོག་སྒོ་གཉིས་དང་རྐང་མཐིལ་ནས་ཐོན་ཏེ༔ དབང་ཆེན་སར་ཐིམ་འཆི་བདག་གཤིན་རྗེ་ནི༔ གླང་དམར་རྣམ་པར་གན་རྐྱལ་གནས་པའི་ཁར༔ སོང་བས་དུས་མིན་འཆི་རྐྱེན་བཟློག་པ་དང༔ བུ་ལོན་ལན་ཆགས་ཤ་འཁོན་སྦྱང་བར་བསམ༔ རང་ལུས་ཤེལ་བུམ་ཞོ་ཡིས་གང་བ་ལྟར༔ གསལ་སྟོང་ཡེངས་མེད་གཟུངས་སྔགས་བརྒྱ་པ་བཟླ༔ ཨོཾ་བཛྲ་ས་ཏྭ་སོགས༔ གཟུངས་འདི་ལན་གཅིག་བཟླས་པའི་ཕན་ཡོན་ནི༔ སྐྱེ་བ་གཅིག་གི་ལས་སྒྲིབ་སྲབ་པར་ངེས༔ མ་ཡེངས་གཟུངས་འདི་བརྒྱ་ཕྲག་གཅིག་བཟླས་ན༔ མི་དགེ་བཅུ་སོགས་ལས་སྒྲིབ་འདག་པར་འགྱུར༔ སྟོང་བཟླས་སོ་ཐར་ལ་སོགས་ཐབས་བརྒྱད་ཀྱིས༔ ཁས་བླངས་འགལ་བ་ཉམས་པ་སོར་དུ་ཆུད༔ ཁྲི་ཡིས་མཚམས་མེད་ལྔ་ཡི་ལས་ཀྱང་བྱང༔ འབུམ་གྱིས་རྩ་བའི་སྔགས་སྡོམ་ཉམས་པ་འདག༔ འབུམ་ཕྲག་བདུན་བཟླས་ཚེ་འདིར་སངས་རྒྱས་འགྲུབ༔ ས་མ་ཡཱ༔ དེ་ལྟར་བཤགས་པས་སྦྱངས་ཤིང་དེང་ཕྱིན་ཆད༔ རང་གི་སྲོག་ལ་བབ་ཀྱང་མི་དགེའི་ལས༔ སྤྱིར་ནི་ལས་འབྲས་བསླུ་བ་མེད་པ་དང༔ ཁྱད་པར་བླ་མའི་བཀའ་འགལ་དམ་ལོག་པའི༔ རྒྱུར་གྱུར་གསང་ཆེན་འཆོལ་སྤྱོད་མནར་མེད་རྒྱུ༔ སྙིང་ནས་མི་བགྱིད་དམ་བཅའ་ཁུར་དུ་ལེན༔ སྤྱི་བོར་རྡོར་སེམས་དགྱེས་འཛུམ་བཞད་པའི་སྒྲས༔ བུ་ཁྱོད་སྡིག་སྒྲིབ་ཐམས་ཅད་དག་གོ་ཞེས༔ གནང་བ་བྱིན་ནས་འོད་ཞུ་རང་ལ་ཐིམ༔ རང་ཡང་སྣང་སྟོང་ཟུང་འཇུག་རྡོར་སེམས་གསལ༔ ཕྱི་སྣོད་མངོན་པར་དགའ་བའི་ཞིང་དུ་གྱུར༔ ནང་བཅུད་སེམས་ཅན་རྡོར་སེམས་རིགས་ལྔ་ཡི༔ ཞལ་ནས་འབྲུ་དྲུག་འཁོར་འདས་ལྡིར་བ་བཞིན༔ འབྱུང་བཞིའི་རང་སྒྲ་སྔགས་ཀྱི་སྒྲ་གདངས་བསམ༔ སྣང་སྟོང་གྲགས་སྟོང་གསལ་སྟོང་ངང་ཉིད་ལས༔ ཨོཾ་བཛྲ་ས་ཏྭ་ཧཱུྃ༔ འབྲུ་འབུམ་ལ་སོགས་ཅི་འགྲུབ་འདོན༔ མཐར་ནི་བཤག་བྱ་བཤགས་བྱེད་དང༔ བཤགས་ཡུལ་སྐྱེ་འགགས་གནས་གསུམ་བྲལ༔ མི་དམིགས་གཤིས་ལ་ཀློད་གྱུར་ན༔ ཡང་དག་དོན་གྱི་བཤགས་པ་མཆོག༔ བཤགས་སྦྱང་མཐར་ཕྱིན་ཨ་ལ་ལ༔ དགེ་བསྔོ་ཤིས་བརྗོད་སྤྱི་ལྟར་ལ༔ ཐུན་མཚམས་རྣམས་སུ་བཤགས་རྒྱུད་ཐོན༔ ཕན་ཡོན་རྒྱུད་ནས་གསུངས་བཞིན་འཐོབ༔ དུས་གསུམ་རྒྱལ་བའི་སྲས་སུ་དགོངས༔ དད་མེད་ལོག་ལྟ་ཅན་ལ་གསང༔ སྐལ་ལྡན་རིག་པ་འཛིན་པའི་བུ༔ དེ་ལ་ལས་ཚོགས་དང་བཅས་སྤྲོད༔ བཀའ་སྲུང་ཁྱབ་འཇུག་ཆེན་པོས་འཚོས༔ བཀའ་རྐུན་ཉམས་པའི་དབང་པོ་སྣུབས༔ འཛིན་སྐྱོང་སྤེལ་རྣམས་སྲུངས་ཤིག་རྒྱ༔ སྐུ་གསུང་ཐུགས་ཀྱི་རྒྱ་ཡོད་དོ༔ ཨི་ཏན་ཏེ་ནི་ན་ར་ཀན༔ ཞེས་རྡོ་རྗེ་སེམས་དཔའི་སྒོམ་བཟླས་སྒྲིབ་གཉིས་སྦུར་ལེན་ཞེས་བྱ་བ་འདི་ནི༔ དམ་ཚིག་ཉམས་པའི་ཆད་པ་མི་བཟོད་པར་མྱོང་དགོས་པའི་ཚུལ་ཤེས་ཤིང་དཔྱོད་ལྡན་གྱི་གང་ཟག་གསང་སྔགས་ཐབས་ཀྱི་ལམ་མཆོག་ནོད་པའི་སློབ་བུ་ཆོས་དཔལ་དང༔ ཆུང་ནས་རང་དང་འབྲེལ་འདྲིས་ཆེ་བའི་རྡོ་རྗེའི་མཆེད་པོ་བསླབ་གསུམ་ནོར་བུའི་མཛོད་འཆང་ཤཱཀྱའི་དགེ་སྦྱོང་ས་མནྟ་བྷ་ཏྲ་ཟུང་གིས་བཀའ་ཕེབ་པ་བཞིན༔ ཟབ་གསང་མཁའ་འགྲོའི་བརྡ་ཤོག་ལ་དབང་བའི་སྤྲུལ་བའི་སྐུ་གཞན་ཕན་ཐུབ་བསྟན་ཉི་མས་རང་བྱུང་དབྱིངས་ཀྱི་སྒྲོམ་ནས་བཏོན་ཏེ་སྤེལ་བ་ཡོངས་ལ་དགེ་བར་གྱུར་ཅིག༔ ཤུ་བྷཾ༔ སརྦ་ཛ་ག་ཏཾ༔