འཇམ་དབྱངས་དཀར་པོའི་སྒྲུབ་ཐབས་མུན་སེལ་སུརྱ།
ཡང་གསང་མཁའ་འགྲོའི་ཐུགས་ཐིག་ལས༔ འཇམ་དབྱངས་དཀར་པོའི་སྒྲུབ་ཐབས་མུན་སེལ་སུརྱ་བི་ཛ་ཧ་རཾ༔ ན་མོ་ཀཱ་ཡ་མཉྫུ་ཤྲི་ཡེ༔ རྒྱལ་བའི་བསྟན་པ་འཛིན་པའི་གཞི༔ ལུང་དང་རྟོགས་པའི་ཆོས་ཡིན་པས༔ དེ་ཡི་རྩ་བ་ཤེས་རབ་སྟེ༔ ཡེ་ཤེས་སེམས་དཔའ་འཇམ་དཔལ་དབྱངས༔ དེ་ཉིད་སྒྲུབ་པའི་སྙིང་པོ་ནི༔ བཅུད་ལས་བཅུད་དུ་བསྡུས་ནས་བསྟན༔ སྐལ་བ་ཅན་གྱི་སྤྱོད་ཡུལ་ཤོག༔ ས་མ་ཡཱ༔ འདི་ལ་སྦྱོར་བ་དང་ནི་དངོས༔ རྗེས་དང་གསུམ་ལས་དང་པོ་ནི༔ སྔོན་འགྲོ་སྐྱབས་སེམས་རིམ་པ་ནི༔ ན་མོ༔ བསླུ་མེད་སྐྱབས་མཆོག་རིན་ཆེན་རྣམ་གསུམ་དང༔ མཁྱེན་རབ་འཇམ་པའི་རྡོ་རྗེར་གུས་སྐྱབས་མཆི༔ མ་རིག་འཐིབ་པོས་བསྒྲིབས་པའི་མཁའ་ཁྱབ་འགྲོ༔ རིག་པའི་ཡེ་ཤེས་རྟོགས་ཕྱིར་སེམས་བསྐྱེད་དོ༔ ལན་གསུམ་བསྐྱར་ཞིང་གཉིས་པ་དངོས་གཞི་ནི༔ ཨཱ༔ དེ་བཞིན་ཉིད་དབྱིངས་ཆོས་སྐུ་འགྱུར་བ་མེད༔ གདོད་ནས་ཀ་དག་བསམ་བརྗོད་བློ་ལས་འདས༔ དེ་དོན་མ་རྟོགས་འཁྲུལ་བའི་སེམས་ཅན་ལ༔ ཀུན་རྫོབ་ཕྱོགས་རིས་བྲལ་བའི་སྙིང་རྗེ་བརྡལ༔ བྷྲཱུྃ་ཡིག་ལས་བསྐྱེད་རཏྣའི་ཁང་བཟང་དབུས༔ སྣ་ཚོགས་པདྨ་ཐབས་ཤེས་ཉི་ཟླའི་སྟེང༔ རང་རིག་རྒྱུ་ཡི་ས་བོན་དྷི་ཡིག་དཀར༔ ཡོངས་གྱུར་མཁྱེན་པའི་དབང་ཕྱུག་འཇམ་པའི་དབྱངས༔ ཞལ་གཅིག་ཕྱག་གཉིས་རིན་ཆེན་དུང་གི་མདོག༔ དབུ་སྐྲ་ཟུར་ཕུད་ལྔ་ལྡན་རཏྣས་སྤྲས༔ རབ་ཏུ་ཞི་ཞིང་འཛུམ་པའི་མདངས་མཛེས་ལྡན༔ ཕྱག་གཡས་ཤེས་རབ་མེ་འབར་རལ་གྲི་ཕྱར༔ གཡོན་པས་ཐུགས་ཀར་ཨུཏྤལ་དམར་པོ་བསྣམ༔ ལོ་འདབ་སྙན་གྱི་ཐད་ཀར་རྒྱས་པའི་སྟེང༔ ཀུན་རྫོབ་དོན་དམ་བདེན་པའི་གླེགས་བམ་བཞུགས༔ ཞབས་གཉིས་སེམས་དཔའི་སྐྱིལ་མོ་ཀྲུང་གིས་འགྱིང༔ དར་དམར་སྟོད་གཡོག་སྔོ་ལྗང་ཤམ་ཐབས་ཀླུབས༔ རིན་ཆེན་རྒྱན་སྤྲས་མཚན་དང་དཔེ་འོད་འབར༔ སྲས་བཅས་རྒྱལ་བའི་སྐུ་ཡི་ངོ་བོར་བཞུགས༔ གནས་གསུམ་འབྲུ་གསུམ་ཐུགས་ཀའི་དྷཱི་ཡིག་ལས༔ འོད་ཟེར་དཀར་དམར་མཐིང་གསུམ་ཕྱོགས་བཅུར་སྤྲོས༔ བདེ་ཆེན་ཞིང་དང་རྔ་ཡབ་དཔལ་གྱི་རི༔ རི་བོ་དེ་ཤན་ལ་སོགས་གར་བཞུགས་ནས༔ ཡེ་ཤེས་སྤྱན་དྲངས་དམ་ཚིག་ལྷར་ཐིམ་གྱུར༔ དམ་ཡེ་གཉིས་མེད་བརྟན་པར་བཞུགས་སུ་གསོལ༔ འོད་གསལ་ལྟ་བ་མཇལ་བའི་ཕྱག་བགྱི་འོ༔ དངོས་འབྱོར་ཡིད་སྤྲུལ་ཀུན་བཟང་མཆོད་ཚོགས་འབུལ༔ རྒྱལ་ཀུན་གསང་གསུམ་ཡོན་ཏན་རྫོགས་ལ་བསྟོད༔ ཐོག་མེད་ནས་བསགས་མི་དགེའི་ལས་ཀུན་བཤགས༔ ཐུགས་ཀར་པདྨ་འདབ་བཅུའི་ལྟེ་བ་ལ༔ ཉི་མའི་དཀྱིལ་འཁོར་འོད་བཀྲག་རབ་འབར་དབུས༔ དྷཱི་ཡིག་དཀར་པོ་དབང་གཞུའི་གུར་ཁྱིམ་ཅན༔ ཕྱི་རོལ་པད་འདབ་འབྲུ་བཅུ་གཡས་སུ་འཁོར༔ འོད་ཟེར་ཡར་འཕྲོས་རྒྱལ་ཀུན་མཆོད་པས་མཉེས༔ མཁྱེན་བརྩེའི་ནུས་པ་ཚུར་འདུས་རང་ལ་ཐིམ༔ མར་འཕྲོས་འགྲོ་དྲུག་སྒྲིབ་གཉིས་བག་ཆགས་སྦྱངས༔ ཀུན་ཀྱང་འཇམ་དཔལ་སྐུར་གྱུར་སྔགས་སྒྲ་འུར༔ ཀ་དག་མ་བཅོས་གཉུག་མ་ཅོག་བཞག་ངང༔ ཨོཾ་ཝཀྐཱི་ཤྭ་རི་མཱུྃ༔ ཨ་ར་པ་ཙ་ན་དྷི༔ གདན་གསུམ་ཚང་བའི་ངང་ནས་ཅི་འགྲུབ་བཟླ། བསྒྲུབ་ཐག་ཉེ་ཞིང་བཀའ་བཙན་བྱིན་རླབས་མྱུར༔ ས་མ་ཡཱ༔ ཐུན་མཚམས་གསོལ་བ་འདེབས་པའི་ཚིག་བརྒྱ་སྟོང་ལ་སོགས་ཅི་འགྲུབ་འདོན༔ ཨེ་མ་ཧོ༔ མཁྱེན་རབ་ཁྱེད་ཀྱི་བརྩེ་བའི་འོད་ཟེར་ཀྱིས༔ བདག་བློ་ཉོན་མོངས་གཏི་མུག་རབ་བསལ་ནས༔ གནས་སོགས་བཅུ་ཕྲག་སྒོ་འཕར་རབ་ཕྱེས་ནས༔ བཀའ་དང་བསྟན་བཅོས་གཞུང་ལུགས་རྟོགས་པ་ཡི༔ ཤེས་རབ་མགྲིན་པའི་རྩ་མདུད་གྲོལ་བ་དང༔ བློ་གྲོས་ཤེས་བྱའི་སྤོབས་པ་བསྩལ་དུ་གསོལ༔ ཨོཾ་ཝཀྐཱི་ཤྭ་རི་མཱུྃ༔ ཨ་ར་པ་ཙ་ན་དྷི༔ ཞེས་བརྗོད༔ མཆོད་ཅིང་བསྟོད་པར་བྱ༔ ཨོཾ་ཨཱརྱ་མཉྫུ་ཤྲི་ཨརྒྷཾ་སོགས་ནས་ཤཔྟ་པྲ་ཏིཙྪ་ཡེ་སྭཱཧཱ༔ གཞོན་ནུའི་སྐུ་ལུས་འཆང་བ་པོ༔ ཡེ་ཤེས་སྒྲོན་མེས་རབ་ཏུ་བརྒྱན༔ འཇིག་རྟེན་གསུམ་གྱི་མུན་སེལ་བ༔ འཇམ་པའི་དབྱངས་ལ་ཕྱག་འཚལ་བསྟོད༔ ཤོ་ལོ་ཀ་བརྗོད༔ ཤིས་པས་མཐའ་བརྒྱན་བྱ་བ་ནི༔ ཨཱ༔ སྐྱེ་མེད་དབྱིངས་ལས་ཤར་བའི་བསྐྱེད་རིམ་ལྷ༔ སྐད་ཅིག་འོད་ཞུ་ཐུགས་ཀའི་སྔགས་ལ་ཐིམ༔ དེ་ཡང་སྐྱེ་འགག་གནས་གསུམ་བྲལ་བའི་ངང༔ སླར་ཡང་སྣང་སྟོང་ལྷ་སྐུར་ལམ་གྱིས་གསལ༔ འདིས་མཚོན་དུས་གསུམ་བསགས་པའི་རྣམ་དཀར་དགེ༔ འཁོར་གསུམ་དམིགས་མེད་ཆོས་སྐུའི་ཀློང་དུ་བསྔོ༔ བདག་སོགས་འགྲོ་བ་ཕ་མཐའ་ཡས་པའི་ཁམས༔ ཀུན་ཀྱང་མ་རིག་འཐིབ་པོའི་སྨག་ལས་ཐར༔ བཤད་སྒྲུབ་ལུང་རྟོགས་ཆོས་ཀྱི་རྒྱལ་མཚན་འཛིན༔ མཐར་ཐུག་དོན་གཉིས་འགྲུབ་པའི་བཀྲ་ཤིས་ཤོག༔ ཨེ་མ་འཇམ་དཔལ་དབྱངས་ཀྱི་སྒྲུབ་ཐབས་འདི༔ བཅུད་ཀྱི་ཡང་བཅུད་མན་ངག་གནད༔ པདྨའི་ཐུགས་ཀྱི་ཏི་ཀ་སྟེ༔ དབྱངས་ཅན་སྤྲུལ་པ་ས་ག་རས༔ ཁྱོད་ལ་གཏད་དོ་སྙིང་ལ་ཆོངས༔ མ་འོངས་སུམ་ཅུ་ཁ་རལ་དུས༔ ང་སྤྲུལ་བདུན་གྱིས་བསྔགས་པའི་བུ༔ ཕན་པའི་མིང་འཛིན་བྱང་སེམས་ལྡན༔ གར་མཁན་ལོ་པ་ཆོས་ལ་དཀར༔ དེ་ལ་དགོངས་པའི་གཏེར་དུ་སྟོན༔ དེ་ནས་ཆོས་གྱི་བདག་པོ་བཅུའི༔ ཉམས་རྟོགས་སྤེལ་བའི་དབང་ལུང་སྦྱིན༔ འབྲེལ་ཚད་དོན་ལྡན་ཡིན་ནོ་སྐད༔ རྟོག་གེ་ལོག་སྲེད་ཅན་ལ་གསང༔ བཀའ་ཡི་སྲུང་མ་དམ་ཚིག་ཅན༔ འཛམ་གླིང་རྡོ་རྗེ་ལེགས་པས་སྲུངས༔ ས་མ་ཡཱ་གུ་ཧྱ། བརྡ་ཐིམ༔ ཞེས་པ་འདི་ཡང་སྔོན་སྦྱངས་ལས་འཕྲོའི་མྱུ་གུ་གསར་དུ་འཁྲུངས་བའི་བཙུན་པ་རིག་གྲོལ་ཞེས་རྫོགས་སྤྲུལ་གསུམ་པའི་དངོས་སློབ་མགོན་བླ་བསོད་ནམས་ཀྱི་སྐྱེ་སྲིད་ཐོབ་པའི་སློབ་བུ་དང་། བདག་གི་ཆོས་བརྒྱུད་འཛིན་པའི་གང་ཟག་རྣམས་ལ་སྤེལ་བས་ཤེས་བྱའི་ཆོས་ལ་བློ་གྲོས་ཀྱི་པད་མོ་རབ་ཏུ་རྒྱས་པའི་རྒྱུར་གྱུར་ཅིག༔ སརྦ་མངྒ་ལཾ༔