འཕགས་པའི་སྒྲུབ་ཐབས་བསོད་ནམས་ཚོགས་ཆེན།
བཀའ་འདུས་ཆོས་ཀྱི་རྒྱ་མཚོ་ལས༔ འཕགས་པའི་སྒྲུབ་ཐབས་བསོད་ནམས་ཚོགས་ཆེན་བཞུགས༔
རང་བྱུང་ཡེ་ཤེས་སྙིང་རྗེའི་གཏེར༔ འཕགས་མཆོག་ཕྱག་ན་པདྨོར་འདུད༔ དེ་ཉིད་སྒྲུབ་པའི་ཐབས་ཟབ་མོ༔ བསོད་ནམས་ཚོགས་ཆེན་རྒྱས་པའི་སྐུ༔ ཚོགས་གཉིས་ཟུང་འཇུག་འདི་ན་སྤེལ༔ དྲང་སྲོང་ཆེན་པོས་བྱ་ར་མཛོད༔ ས་མ་ཡཱ༔ ཨཱཿ རང་བྱུང་ལྷུན་གྲུབ་གཞལ་ཡས་ཁང༔ མཚན་ཉིད་ཡོངས་རྫོགས་དཀྱིལ་འཁོར་དབུས༔ ཆུ་སྐྱེས་གེ་སར་བཞད་པའི་སྟེང༔ ཁུ་རྡུལ་དག་པ་ཉི་ཟླའི་ཁར༔ ཧྲཱིཿལས་འཕགས་པ་སྤྱན་རས་གཟིགས༔ ཞལ་གཅིག་ཕྱག་བཞི་ལོངས་སྤྱོད་རྫོགས༔ འཁོར་ལོས་བསྒྱུར་བའི་ཆས་ཀྱིས་ཀླུབས༔ སྐུ་མདོག་གསེར་སྦྱང་བཙོ་མ་ལ༔ ཉིན་བྱེད་འབུམ་གྱིས་འཁྱུད་ལྟར་འཚེར༔ དང་པོའི་ཕྱག་གཉིས་ཐལ་མོ་སྦྱར༔ འདོད་འབྱུང་བསམ་འཕེལ་ནོར་བུ་དང༔ གཡས་འོག་རིན་ཆེན་གཏེར་བུམ་བསྣམས༔ གཡོན་འོག་ནོར་སྐྱུག་ནེའུ་ལེ་བཙིར༔ ཞབས་གཉིས་བརྐྱང་བསྐུམ་གནོད་སྦྱིན་མནན༔ སྐུ་ལས་རིན་ཆེན་ཆར་ལྟར་འབབས༔ བསྟན་དང་འགྲོ་བའི་དབུལ་བ་བསལ༔ མདུན་དུ་ཞི་རྒྱས་དབང་དྲག་གི༔ བདག་ཉིད་སོག་པོ་ནོར་གྱི་ལྷ༔ རིན་ཆེན་མང་སྤྲུལ་ཁྲོ་འཛུམ་བརྗིད༔ ཕྱག་གཡས་པཉྩ་པུ་ར་དང༔ གནམ་ལྕགས་མདུང་དར་དཀར་པོས་སྤུད༔ གཡོན་པས་ནོར་སྐྱུག་ནེ་འུ་ལེ༔ སྤྲུལ་པའི་རྒྱ་སྟག་དམར་པོ་ཁྲིད༔ ཞབས་གཉིས་འདོར་སྟབས་དམ་སྲི་མནན༔ སྟག་གི་སྡེར་བཞིས་འགོང་པོ་འཆིང༔ འཁོར་དུ་རྩ་གསུམ་ནོར་གྱི་ལྷ༔ ནམ་མཁའི་སྤྲིན་ལྟར་ཐིབས་སེ་བཞུགས༔ ལྷ་ཚོགས་དེ་དག་ཐམས་ཅད་ཀྱང༔ ཨ་འཐས་དངོས་གཟུགས་མ་ཡིན་པར༔ ཆུ་ཟླ་འཇའ་ཚོན་ལྟ་བུ་བཞིན༔ མ་ཡེང་ཡིད་ཡུལ་གསལ་བར་བསྒོམ༔ གནས་གསུམ་ཡི་གེའི་འཕྲོ་འདུ་ལས༔ བྱང་ཕྱོགས་གནོད་སྦྱིན་རྫོངས་ཀྱི་ཞིང༔ པོ་ཊ་ལ་ནས་སྤྱན་དྲངས་ཏེ༔ དམ་ཚིག་ཡེ་ཤེས་དབྱེར་མེད་གྱུར༔ ཛཿཧཱུྃ་བཾ་ཧོཿ ས་མ་ཡཱ་ཏིཥྛ་ལྷནཿ ན་མོ་པུ་རུ་ཤ་ཡ་ཧོཿ ནཱ་མ་ཡ་ཏིཿ ཧཱུྃ་ཧྲཱིཿ ཚོགས་དྲུག་ཡུལ་དྲུག་བདེ་སྟོང་མཉམ་པར་སྦྱོར༔ རང་གསལ་འགག་མེད་མཆོད་པའི་ཕྱག་རྒྱ་ཆེ༔ འཕགས་མཆོག་ཐུགས་རྗེ་ནོར་ལྷ་རྒྱ་མཚོར་འབུལ༔ བཞེས་ནས་བདག་སོགས་བསྟན་འགྲོའི་དབུལ་བ་སོལ༔ དགོས་འདོད་རེ་སྐོང་ཡིད་བཞིན་འཇོ་བར་མཛོད༔ ཨོཾ་ཨརྱ་ལོ་ཀི་ཤྭ་ར་མ་ཧཱ་ཀ་རུ་ཎི་ཀ་ཡཀྵ་ས་པཱ་རི་ཝ་ར་བཛྲ་ས་མ་ཡཱ་ཨརྒྷཾ་པ་དྱཾ་སོགས། ཤཔྟ་པཱུ་ཛ་ཨཱཿཧཱུྃ༔ ཧྲཱིཿ ཐུགས་རྗེ་ཆེན་པོས་འགྲོ་བ་ཡོངས་ལ་གཟིགས༔ བྱམས་དང་སྙིང་རྗེས་ནོར་ལྷ་རྒྱ་མཚོར་སྤྲུལ༔ བསྟན་འགྲོའི་དབུལ་སེལ་ཕུན་ཚོགས་ཕན་བདེའི་དཔལ༔ འཕགས་མཆོག་འཇིག་རྟེན་དབང་ཕྱུག་རྒྱལ་པོར་བསྟོད༔ སྔོན་གྱི་ཐུགས་བསྐྱེད་སྨོན་ལམ་རྗེས་དགོངས་ལ༔ བདེ་གཤེགས་རིན་ཆེན་མིང་དང་གསེར་ཐུབ་ཀྱི༔ སྤྲུལ་པ་གནོད་སྦྱིན་སོག་པོའི་ཆས་སུ་སྤྲུལ༔ ཡིད་བཞིན་གཏེར་འཆང་སོག་པོའི་རྒྱལ་དེར་བསྟོད༔ གཞན་ཡང་ལྷ་དང་དྲང་སྲོང་ནོར་གྱི་ལྷ༔ ཚངས་དབང་རྒྱལ་ཆེན་ཕྱོགས་ཀྱི་དཀར་སྐྱོང་ཚོགས༔ ཀླུ་ཆེན་བརྒྱད་དང་ལྷ་མོ་ས་ཡི་བདག༔ རྒྱས་མཛད་འཕགས་པ་གཙོ་འཁོར་ཡོངས་རྫོགས་བསྟོད༔ བདག་ཉིད་འཕགས་པའི་ཐུགས་ཀར་རིན་ཆེན་ཟུར་བརྒྱད་པའི་སྟེང་དུ་ཡི་གེ་ཧྲཱིཿགསེར་གྱི་མདོག་ཅན་ཉི་མའི་སྙིང་པོ་ལྟར་འཚེར་བའི་མཐར་ཡིག་དྲུག་གཡས་སུ་འཁོར་བས་འོད་ཟེར་གསེར་གྱི་ལྕུག་མ་ལྟར་ཕྱོགས་བཅུར་འཕྲོས་རྒྱལ་བ་རྣམས་ལ་མཉེས་མཆོད་ཕུལ༔ སྐུ་གསུང་ཐུགས་ཀྱི་བྱིན་རླབས་ཐམས་ཅད་འབྲུ་གསུམ་གྱི་རྣམ་པར་བདག་ལ་འདུས༔ འོད་ཟེར་མར་འཕྲོས་རིགས་དྲུག་གི་སྡུག་བསྔལ་སྦྱང༔ ཀུན་ཀྱང་འཕགས་མཆོག་ནོར་ལྷ་རྒྱ་མཚོའི་གོ་འཕང་ལ་བཀོད༔ ཚེ་བསོད་མངའ་ཐང་ཐམས་ཅད་འོད་ཀྱི་ཚུལ་དུ་བདག་དང་སྦྱིན་བདག་ལ་འདུས༔ འོད་ཟེར་ཕར་འཕྲོས་བྱང་ཕྱོགས་ལྕང་ལོ་ཅན་ནས་གནོད་སྦྱིན་ནོར་ལྷ་རྒྱ་མཚོའི་ཐུགས་རྒྱུད་བསྐུལ༔ གཉེན་ལ་ནོར་གྱི་ཉམས་གསོ་སྤྲད་པ་ལྟར༔ བདག་གནས་ཡོ་བྱད་ཐམས་ཅད་ལ་རིན་པོ་ཆེ་གོས་ཕྲུག་ཐེར་རས་ཇ་དར་ནོར་དབྱིག་སོགས་ཅི་འདོད་ཀྱི་ལོངས་སྤྱོད་ཐམས་ཅད་སྦུར་མ་རླུང་གིས་དེད་པ་བཞིན་དུ་བསྡུས་ནས་མེར་མེར་ཕྱུར་ཕྱུར་གང་བར་བསམ་ལ་དམིགས་པའི་འཕྲོ་འདུ་དང་བཅས་གཅིག་ཆོག་རྒྱལ་པོ་འདི་ལ་བརྩོན་པར་བྱའོ༔ ཨོཾ་མ་ཎི་པདྨེ་ཧཱུྃ༔ ཅི་ནུས་རྟགས་འབྱུང་བཟླ༔ སླར་ནོར་སྒྲུབ་སྔགས་ཤམ་ནི༔ སྔགས་མཐར། ཧྲཱིཿམ་ཧཱ་ཡཀྴ་རཱ་ཛ་རྒྱལ་བློན་བཙུན་མོ་དམངས་ཕལ་པའི་ནོར་ཕྱུགས་ཀ་ཆ་ཐམས་ཅད་བསྡུས་བསྡུས་ཁུག་ཁུག་སྐྱོལ་སྐྱོལ་མ་མ་བ་སུ་པུཥྚིཾ་ཀུ་རུ་ཡེ་སྭཱ་ཧཱཿ བསྡུ་ན༔ ཧྲཱིཿམ་ཧཱ་པུཎྱཻ་ད་ན་སརྦ་པུཥྚིཾ་ཀུ་རུ་ཡེ་སྭཱཧཱ༔ ས་མ་ཡཱ༔ གུ་ཧྱ༔ ཞེས་འདི་རང་བྱུང་དབྱིངས་ཀྱི་ཆོས༔ ལས་འཕྲོ་སྨོན་ལམ་དག་པས་ཕབ༔ སྐལ་ལྡན་ཆོས་ལ་དབང་དེར་གཏད༔ བཀའ་སྲུང་ཁྱབ་འཇུག་འོད་འཕྲོ་དང༔ ནོར་སྦྱིན་རྒྱལ་པོས་སྲུངས་ཤིག་རྒྱ༔ འདི་ཉིད་ཉམས་སུ་སུས་བླང་བའི༔ ཚེ་བསོད་ཡོན་ཏན་ཡར་ངོ་བཞིན༔ བདེ་ལེགས་སྣང་བས་ཡོངས་གང་ཤོག༔ བརྡ་ཐིམ༔ ཞེས་འཕགས་པ་འཇིག་རྟེན་དབང་ཕྱུག་ནོར་ལྷ་རྒྱ་མཚོའི་བདག་ཉིད་གང་གི་སྒྲུབ་ཐབས་རྒྱས་པའི་ལྷ་འདིའི་ཟབ་དོན་སྔར་ནས་དགོངས་པའི་རྩལ་དུ་བབས་ཀྱང་དགོས་མེད་དུ་བཞག་པ༔ ཕྱིས་དུས་ལ་བབ་པའི་ཚེ་རྟེན་འབྲེལ་བཟང་པོས་མཚམས་སྦྱར་ནས་མི་ཉག་བསྟན་པའི་སྦྱིན་བདག་རིགས་རུས་ལོངས་སྤྱོད་ཀྱིས་རྒྱགས་པ་ཁྲོ་བོ་ཚང་གི་གཡང་སྒྲུབ་སྐབས་དབུ་བཙུགས་ནས༔ རང་བྱུང་དགོངས་པའི་མཛོད་ལས་མཁའ་འགྲོའི་བརྡ་ཐོགས་མེད་དུ་བྲིས་པ་ཀར་སྟོད་ནས་སྦྱིན་བདག་བསོད་ནམས་མཐུ་སྟོབས་ཀྱི་འདུན་སར་རྡོ་རྗེ་སློབ་མའི་ཡོན་ཏན་གྱིས་མངོན་པར་མཐོ་བའི་རྡོ་རྗེ་ཡོན་ཏན་དང་༔ ཀར་སྟོད་མཁས་གྲུབ་གཉིས་ཀྱི་ཆོས་སྐལ་དུ་སྐར་མ་རྒྱལ་ལ་ཕུལ་བ་པོ་ནི་སྤྲུལ་སྐུ་གཞན་ཕན་བཟང་པོས་སོ༔ ཤུ་བྷཾ༔ མངྒ་ལཾ༔