དབང་ཆེན་གྱི་གསོལ་འདེབས་མེ་ན་ཀའི་ཟུར་མིག་སྐྱེ་བོའི་ཡིད་དབང་འགུགས་མཛད།
པདྨ་དབང་ཆེན་གྱི་གསོལ་འདེབས་མེ་ན་ཀའི་ཟུར་མིག་སྐྱེ་བོའི་ཡིད་དབང་འགུགས་མཛད་བི་ཛ་ཧ་རཾ༔ ཨེ་མ་ཧོ༔ ཆོས་སྐུ་རྡོར་འཆང་ལོངས་སྐུ་རྡོ་རྗེ་སེམས༔ སྤྲུལ་སྐུ་དགའ་རབ་བཱི་མ་རིག་འཛིན་སྡེ༔ གསོལ་བ་འདེབས་སོ་དྲེགས་པའི་བླ་ཡིད་སེམས༔ དབང་སྡུད་བྲན་དུ་ཁོལ་བར་བྱིན་གྱིས་རློབས༔ ན་གརྫུ་ན་ཨོ་རྒྱན་མཚོ་སྐྱེས་རྗེ༔ མ་ཅིག་མཁའ་འགྲོ་ཨ་ཙར་ཡེ་ཤེས་དབྱངས༔ གསོལ་བ་འདེབས་སོ་སྣང་སེམས་འཁྲུལ་བའི་འགྲོ༔ བདེན་མེད་དབང་དུ་འདུ་བར་བྱིན་གྱིས་རློབས༔ ལུང་རིག་གླིང་པ་ཆོས་བདག་ཐུབ་བསྟན་མཚན༔ བརྒྱུད་འཛིན་སྐལ་ལྡན་ལུང་ཟིན་དམ་པ་ལ༔ གསོལ་བ་འདེབས་སོ་ཐབས་ཤེས་རྟེན་འབྲེལ་འགྲིག༔ ཐེག་ཆེན་གནམ་འཕང་གཅོད་པར་བྱིན་གྱིས་རློབས༔ པདྨ་དབང་ཆེན་ཡབ་ཡུམ་གཙོ་དང་འཁོར༔ ཁྱབ་འཇུག་འོད་འཕྲོ་ལྷ་བཙན་ཡིད་བཞིན་ནོར༔ གསོལ་བ་འདེབས་སོ་སྣང་ཞིང་སྲིད་པའི་ཆོས༔ ཐོགས་མེད་དབང་དུ་འདུ་བར་བྱིན་གྱིས་རློབས༔ རྒྱལ་བ་རབ་འབྱམས་ཞི་དང་ཁྲོ་བོའི་སྡེ༔ དཀྱིལ་འཁོར་འཁོར་ལོའི་ལྷ་ཚོགས་ཐམས་ཅད་ལ༔ གསོལ་བ་འདེབས་སོ་དག་པ་དབྱིངས་ཀྱི་ཀློང་༔ ཡེ་གཞི་གཞོན་ནུ་བུམ་སྐུར་གྲོལ་བར་ཤོག༔ ཅེས་པའི་རྟ་མགྲིན་བརྒྱུད་འདེབས་འདི༔ བཙུན་པ་ཨ་དོན་སྐྱེ་བ་མེད༔ རིག་དང་གྲོལ་བའི་དམ་པ་དེའི༔ ཐུགས་བཞེད་སྐོང་ཕྱིར་བྷུ་སུ་ཀུ༔ གཞན་ལ་ཕན་དེས་སྨྲས་པ་དགེ༔