པདྨ་དབང་ཆེན་སྒྲུབ་པའི་ལས་བྱང་བསྡུས་པ་བིནྡྷུ་ཀ་ཡི་ཞགས་པ།

བཀའ་འདུས་ཆོས་ཀྱི་རྒྱ་མཚོ་ལས༔ པདྨ་དབང་ཆེན་སྒྲུབ་པའི་ལས་བྱང་བིན་དྷུ་ཀའི་ཞགས་པ་བཞུགས་སོ༔   ཨཱཿ སྣང་གྲགས་ཆོས་ཀུན་མི་དམིགས་སྟོང་པའི་ངང་༔ ལྷུན་གྲུབ་རང་མདངས་བསྲུང་བའི་ཙཀྲར་གྱུར༔ ཕྱི་སྣོད་དུར་ཁྲོད་མེ་རི་འབར་ཀློང་གྱུར༔ ནང་ནི་གནམ་ལྕགས་ངར་མའི་ཕོ་བྲང་གི༔ དཀྱིལ་ཡངས་ཟླ་གམ་སྒོ་གཅིག་རབ་འབར་དབུས༔ པད་ཉི་དབང་ཕྱུག་སྒྲ་གཅན་བསྣོལ་བའི་སྟེང་༔ རང་སེམས་ཧྲཱིཿཡིག་དམར་པོའི་འཕྲོ་འདུ་ལས༔ འཕགས་མཆོད་བྱིན་བསྡུས་སེམས་ཅན་བདེ་ལ་བཀོད༔ བཀའ་འགལ་དམ་ལོག་མི་མིན་ནག་ཕྱོགས་སྡེ༔ ཚར་བཅད་དབང་བསྡུས་འོད་ཟེར་ཚུར་འདུས་པས༔ ཧྲཱིཿདམར་ཡོངས་གྱུར་རྟ་མགྲིན་དབང་གི་ལྷ༔ པདྨ་ར་གའི་མདོག་ཅན་ཁྲོ་འཛུམ་བཞད༔ ཁྲོ་ཆས་ཡོངས་རྫོགས་ཕྱག་གཡས་པདྨ་ཡིས༔ རྣམ་པར་མཛེས་པའི་ལྕགས་ཀྱུ་ཕྱར་ཐབས་འཛིན༔ གཡོན་པས་པདྨའི་ཞགས་པ་དབང་རྒྱས་བསྣམས༔ ཞབས་གཉིས་འགྱིང་སྟབས་ཤེས་རབ་གོས་དཀར་མོ༔ རྡོ་རྗེ་ཕག་གདོང་དམར་མོ་པད་ཕྲེང་དང་༔ ཐོད་ཁྲག་འཛིན་པ་ཡབ་འཁྱུད་ཆགས་བཞད་སྒེག༔ དབང་ཆེན་སྤྱི་གཙུག་རྟ་དབུ་ལྗང་ཞུར་རྔམས༔ ལྷང་ལྷང་ལན་གསུམ་འཚེར་བས་ཁམས་གསུམ་གྱི༔ མི་དང་མི་མིན་དྲེགས་པ་དབང་དུ་བསྡུས༔ རྩ་གསུམ་ཀུན་འདུས་བདག་ཉིད་ཆེན་པོར་གསལ༔ རིག་རྩལ་རོལ་བའི་ཀློང་ནས་གཤེགས་སུ་གསོལ༔ གཉིས་མེད་འདུ་འབྲལ་སྤང་ཕྱིར་བརྟན་བཞུགས་གསོལ༔ འཕྲུལ་དགའི་ཚུལ་གྱིས་ལྟ་བ་མཇལ་ཕྱག་འཚལ༔ ཕྱི་ནང་སྣོད་བཅུད་གཟུང་འཛིན་བྲལ་བས་མཆོད༔ ཆགས་ཞེན་མཉམ་བརྡལ་དགྱེས་པ་ཆེན་པོས་བཞེས༔ གསང་གསུམ་ཡོན་ཏན་རྫོགས་ལ་གུས་པས་བསྟོད༔ ཐུགས་དབུས་པད་རཀ་རྡོ་རྗེ་སྦུབས་སྟོང་དབུས༔ ཧྲཱིཿདམར་མཐའ་ལ་རང་སྔགས་གཡོན་དུ་འཁོར༔ འོད་དམར་ཟེར་ཕྲེང་དྲེགས་ཚོགས་བྲན་དུ་བཀོལ༔ མཐོང་ཐོས་དྲན་རེག་རྣམ་མཁྱེན་སར་བཀོད་ནས༔ རྒྱལ་ཀུན་ཕྲིན་ལས་སྒྲུབ་པའི་བྱེད་པོར་དམིགས༔ ལྷ་སྔགས་ཡེ་ཤེས་རོལ་བ་འབྱམས་ཀླས་ངང༔ ཨོཾ་མ་ཧཱ་ཀྲོ་ཏ་པདྨ་ཧེ་རུ་ཀ་ཧྱ་གྷྲྀ་ཝ་པདྨ་ཌཱཀྐི་ནི་ཧཱུྃ་ཧྲཱིཿ དེ་ནས་ལས་སྦྱོར་རྩ་སྔགས་ཤམ༔ ཛ་ཛ་ཛུ་ཛུ་ཕོ་རྒྱུད་མོ་རྒྱུད་ཡུལ་ཁམས་མངའ་ཐང་ལོངས་སྤྱོད་སྟོབས་འབྱོར་སྙན་པ་དང་གྲགས་པ་ཐམས་ཅད་འོད་དམར་པོའི་རྣམ་པར་བདག་གི་དབང་དུ་བསྡུས་ཤིག་སིདྡྷི་ཕ་ལ་ཧཱུྃ་ཛ་ཛ༔ སརྦ་པ་ཤཾ་ཀུ་རུ་ཧོ༔ ཡེང་མེད་ངང་ནས་ཅི་འགྲུབ་བསྙེན༔ དམིགས་པའི་མདའ་དང་དམིགས་བྱའི་འབེན༔ ཟུང་དུ་འཇུག་པས་གནད་བསྣུན་ན༔ གང་ལ་དམིགས་པ་དབང་དུ་འགྱུར༔ འདི་ནི་ཟབ་པའི་མཐར་ཐུག་གོ༔ གང་ཟག་དབང་པོའི་རིམ་པ་བཞིན༔ སྒྲུབ་པའི་རྣོ་ནུས་རང་ལ་རག༔ གཅིག་ཆོག་རྒྱལ་པོ་རྒྱ༔ ས་མ་ཡཱ༔  བཅོམ་ལྡན་དབང་གི་ལྷ་ལ་འདུད༔ དབང་ཆེན་སྒྲུབ་པའི་ཟབ་ཏིག་འདི༔ རྒྱ་གར་མཁས་པ་པད་འབྱུང་གིས༔ ཀླུ་སྒྲུབ་སྙིང་པོར་ཞུས་པ་ལས༔ རྟེན་འབྲེལ་སྒྲུབ་ཐབས་རྒྱ་མཚོ་ཡི༔ བཅུད་དྲིལ་གདམས་པ་འདི་ཉིད་བསྩལ༔ ཨོ་རྒྱན་པདྨས་སྒྲུབ་པ་མཛད༔ རྟ་མཆོག་དབང་གི་རྒྱལ་པོ་དང༔ དབྱེར་མེད་གསུང་གི་དབང་ཕྱུག་གྱུར༔ ཡེ་ཤེས་མཚོ་རྒྱལ་སྟངས་དཔྱལ་གྱིས༔ ཞུས་ཤིང་གནང་བར་ཁས་བླངས་ནས༔ བསམ་ཡས་གཡའ་མ་ལུང་གི་ཞོལ༔ པདྨ་དབང་ཆེན་དཀྱིལ་འཁོར་གྱི༔ ཞལ་ཕྱེས་སྐལ་ལྡན་སྨིན་པར་བྱས༔ རང་རང་བསྒྲུབ་པའི་རྟགས་མཚན་བྱུང༔ དེ་ནས་པདྨས་བཀའ་བྱུང་བ༔ ད་ནི་དངོས་གྲུབ་སྐལ་བ་བརྙེས༔ ད་ལྟ་སྤེལ་ཀྱང་ཚོང་ཟོང་ཙམ༔ མ་འོངས་འགྲོ་བ་སྐྱོབ་པའི་ཆོས༔ ཏཱ་རེའི་གནས་ལ་གཏེར་དུ་སྦོས༔ འདི་ནས་སྐྱེ་བ་ཉེར་ལྔའི་མཚམས༔ ཨ་ཙར་ས་ལེའི་ཐུགས་ཀྱི་སྤྲུལ༔ མཚོ་རྒྱལ་ཕྲིན་ལས་ཆ་ཤས་སྤྲུལ༔ ཟུང་གི་ཐུགས་རྗེ་གཅིག་བསྡུས་པའི༔ རང་གཟུགས་ཐུབ་པའི་མཚན་འཆང་བ༔ ངེས་མེད་འགྲོ་ལ་ཕན་པ་འབྱུང༔ མཚོ་རྒྱལ་ཁྱེད་ཀྱིས་རྗེས་སུ་འཛིན༔ ལྷ་སྲས་སྤྲུལ་པས་དངོས་གྲུབ་ཕོག༔ དེ་འདྲའི་གཏེར་སྟོན་སྐྱེས་བུ་ལ༔ འབྲེལ་ཐོགས་ཕོ་མོ་སུམ་འབུམ་དང༔ ཆོས་ཀྱི་བདག་པོ་ལྔ་བདུན་འབྱུང༔ དེ་སྐད་གསུངས་ནས་ལེགས་སོ་ཞུས༔ མཚོ་རྒྱལ་ཨ་ཙར་ཟུང་གཅིག་གིས༔ ཆོས་ནོར་རྫས་གཏེར་ཅི་འདྲ་དབང༔ འགྲོ་དོན་བསྟན་པ་གང་དུ་འབྱུང༔ ལེགས་སམ་སྨོད་པ་ཅི་ལྟ་བུ༔ ཆོས་ཀྱི་བདག་པོ་ཅི་དང་ཅི༔ དུས་གསུམ་མཁྱེན་པས་གསུང་དུ་གསོལ༔ ཞེས་ཞུས་གུ་རུའི་ཞལ་ནས་ནི༔ རྟེན་འབྲེལ་རབ་དང་འབྲིང་ཐ་གསུམ༔ རབ་ཀྱིས་ཆོས་གཏེར་པོ་ཏི་བདུན༔ དགོངས་པའི་གཏེར་དུ་སྟོན་པར་འགྱུར༔ ས་གཏེར་ཆོས་ལ་ཅི་འདོད་འབྱུང༔ ནོར་སོགས་རྫས་གཏེར་བཅུ་ཙམ་དབང༔ འགྲོ་དོན་མཐའ་ནས་མཐའ་རུ་རྒྱས༔ འབྲིང་གིས་ཆོས་ནི་དགོངས་ཀློང་འབྱུང༔ གཏེར་ཆོས་ཟུང་འབྲེལ་སྒྲུབ་ཐབས་བརྒྱ༔ འབྱུང་ཞིང་ཧ་ཅང་ཁྱབ་མིན་ཡང༔ སྨན་ལྷའི་ཐུགས་སྒྲུབ་སྔོན་བྱུང་ན༔ སྨན་པའི་བུ་བཞིན་ཀུན་ལ་ཕན༔ རྫས་གཏེར་འགའ་ལ་དབང་ཡང་སྲིད༔ རྟེན་འབྲེལ་འགའ་ཞིག་མ་འཕྱུགས་ན༔ གཏེར་གནས་གསུམ་དང་གནས་སྒོ་གཅིག༔ འབྱེད་པ་བླ་མས་གནང་བ་ཡོད༔ ཐ་མས་དག་སྣང་བན་མ་བུན༔ འབྱུང་ཡང་ཕན་པའི་ཡོན་ཏན་ནི༔ མཐོངས་ཀྱི་ཉི་ཟེར་ཙམ་འབྱུང་སྲིད༔ རང་གི་སྒྲིབ་དག་ཕྱི་མར་ནི༔ སྐྱེ་བའི་དབང་པོ་དོན་དང་ལྡན༔ དེ་འདྲ་འབྱུང་ཞིང་བསྟན་པ་ནི༔ ཤར་གྱི་ཕྱོགས་སུ་འགྲོ་དོན་འཕེལ༔ ལྷོ་ཡི་ཕྱོགས་ནས་མི་དབང་དགུགས༔ ནུབ་ཀྱི་ཕྱོགས་སུ་དབང་མོ་འབྱུང༔ བྱང་གི་ཕྱོགས་སུ་མི་ཁ་ལྡང༔ རྡོ་རྗེ་གཞོན་ནུ་སྙིང་ལྟར་བསྟེན༔ ཞེས་གསུངས་གཟུངས་མས་ལེགས་སོ་ཞུས༔ ཨ་ཙར་སྤྲུལ་པས་མ་འོངས་དུས༔ ང་ཡི་སྐྱེ་སྲིད་ཟབ་གཏེར་བདག༔ དེ་ལ་སྒྲུབ་ཐབས་ཟབ་པའི་གནད༔ དབང་ཆེན་འདོན་པའི་དུས་རྟགས་དང༔ ཆོས་ལ་དབང་བ་གང་སུ་དག༔ པདྨ་རྒྱལ་པོས་གསུང་དུ་གསོལ༔ ཞེས་ཞུས་གུ་རུས་བཀའ་བསྩལ་པ༔ ཀྱཻ་ཧོ་སྐལ་ལྡན་རིགས་ཀྱི་བུ༔ དུས་ནི་རྒྱ་འདྲེ་འགོང་པོ་དང༔ མི་མིན་ལྷ་འདྲེས་ཚ་རེག་གཏོང༔ མི་རྣམས་རྒྱ་བོད་ཆས་གོས་བསྒྱུར༔ ཟས་ལ་བཅུད་མེད་ལྟོག་འགོང་ཞུགས༔ སྡོམ་ཁྲིམས་ཉམས་པས་འགྲུབ་རྟགས་དཀོན༔ སེར་སྣས་བསགས་པ་དོན་མེད་འགྱུར༔ ནད་མུག་མཚོན་གྱི་བསྐལ་པ་དར༔ ཐ་མ་ཁྲིམས་ཆེན་རམ་གྱིས་གནོན༔ དགུན་གྱི་ཀློང་ལ་དབྱར་རྔ་ལྡིར༔ དེ་འདྲའི་དུས་སུ་ཟབ་ཆོས་སྤེལ༔ ཁྱད་པར་དབང་ཆེན་ཧྱ་གྷྲྀ༔ ཆོས་ལ་དབང་བ་བདུན་ནམ་ལྔ༔ གླང་སྦྲུལ་ཕག་བྱི་རྟ་ཡི་ལོ༔ མཁའ་ལྡིང་གར་མཁན་ལོ་བ་འབྱུང༔ རིམ་བཞིན་མཁའ་འགྲོའི་ནང་བློན་ལྔ༔ མཆོག་དབྱངས་སྤྲུལ་པ་སོགས་ལ་སྤེལ༔ དེ་ནས་འགྲོ་ལ་ཕན་པ་འབྱང༔ པདྨའི་ཟབ་ཆོས་མཁའ་འགྲོའི་བརྡ༔ ཕལ་བའི་བློ་ཡི་སྤྱོད་ཡུལ་མིན༔ ལོག་སྲེད་ཅན་ལ་རྒྱུན་དུ་སྦོས༔ དད་ལྡན་ལས་སྐལ་ལྡན་ལ་གཏོད༔ སྲུང་མ་དབང་ཕྱུག་ཆེན་པོས་འཚོས༔ ས་མ་ཡཱ༔ འདི་ནི་སྤྲོས་མེད་རྒྱུན་ཁྱེར་དུ༔ ཡར་མར་དུས་ཚོད་བཟང་པོ་ལ༔ མགོ་བརྩམ་དགོང་མོ་དབང་གི་དུས༔ ཐེ་ཚོམ་མེད་པའི་རྣལ་འབྱོར་གྱིས༔ ཉམས་སུ་བླངས་ན་མྱུར་དུ་འགྲུབ༔ རྒྱ་གར་མཁས་པའི་ཐུགས་བཅུད་མཆོག༔ འདི་ཕྱིའི་དོན་ཀུན་འགྲུབ་པར་འགྱུར༔    མཐར་ནི་མཆོད་བསྟོད་དངོས་གྲུབ་ལེན། །མི་དམིགས་སྟོང་པའི་གཤིས་ལ་ཀློད། །དགེ་རྩ་འགྲོ་ལ་དམིགས་མེད་ཐོངས། །དེ་ནས་ཤིས་པ་བརྗོད་པ་ནི། ཧཱུྃ་ཧྲཱིཿ རྒྱལ་ཀུན་སོར་རྟོག་ཡེ་ཤེས་ཀྱི༔ གསུང་གི་རོལ་གར་འོད་དཔག་མེད༔ དྲག་པོའི་སྐུར་བཞེངས་གདུལ་དཀའ་འདུལ༔ དབང་ཆེན་རྒྱལ་པོའི་བཀྲ་ཤིས་ཤོག༔ ས་མ་ཡཱ༔  དེ་རྗེས་མདུན་མཁར་གཏོར་མའི་མགྲོན་རྣམས་ལ༔ གཏོར་མ་དཔལ་གྱི་བཱ་ལིང་སྨན་རཀ་དང་༔ གསེར་སྐྱེམས་གཡུ་སྐྱེམས་འདོད་རྫས་ཇི་ལྟ་བར༔ བཤམས་ལ་དམ་སྲི་འབྱུང་པོ་འགུག་གཞུགས་བསྟིམས༔ རང་ཉིད་ཧྱཱ་གྷྲྀ་ཝའི་ང་རྒྱལ་ངང་༔ མདུན་དུ་ཨེ་ལས་ལྕགས་ཁང་གྲུ་གསུམ་སྣོད༔ གནོད་བྱེད་དགྲ་འདྲེ་མངོན་སུམ་ལྟ་བུར་གསལ༔ བདག་ལས་སྤྲུལ་པའི་ཕྱག་རྒྱའི་ལྷ་མོ་བཞིས༔ རྒབ་འདྲེ་དམ་སྲི་བྱད་མ་དབང་མེད་བཀུགས༔ གཏོར་མའི་རྫས་དང་དབྱེར་མེད་གཅིག་ཏུ་གྱུར༔ དེ་ནས་འགུག་གཞུག་བྱ་བ་འདི་སྐད་དོ༔ ན་མོ་མཆོག་གསུམ་རྩ་གསུམ་ལྷ་ཚོགས་དང༔ ཁྱད་པར་པདྨ་དབང་ཆེན་བདེན་པའི་སྟོབས༔ གནོད་བྱེད་རྒབ་འདྲེ་དམ་སྲི་བྱད་མ་དགྲ༔ དམིགས་པའི་རྟེན་དང་དབྱེར་མེད་ཁུག་ཅིག་ཛཿ ལན་གསུམ། ཨོཾ་གུ་རུ་དྷེ་ཝ་ཌཱཀྐི་ནི་ཤྲི་དྷརྨ་པཱ་ལ་དགྲ་འདྲེ་སརྦ་རྒབ་འདྲེ་འབྱུང་པོ་ཁུག་ཅིག༔ བསྟིམ་ཅིག༔ ཛཿཧཱུྃ་བཾ་ཧོ༔ མཆོད་རྫས་བྱིན་རླབས་འདོད་དགུའི་གཏེར་དུ་དམིགས༔ ཨོཾ་ཨཱཿཧཱུྃ་ཧ་ཧོ་ཧྲཱིཿསྭཱ་ཧཱ༔ ཧོ༔ རང་རང་ཡིད་མཐུན་སྣོད་དུ་བྷ་ལིང་ཏ༔ སྨན་རཀ་སྐྱེམས་ཕུད་འདོད་དགུའི་དཔལ་གྱིས་འབྱོར༔ ཀུན་བཟང་རྣམ་འཕྲུལ་མཁའ་དབྱིངས་ཡོང་བཀང་རྫས༔ དབང་ཆེན་འཁོར་བཅས་དགྱེས་སྐོང་དམ་པར་གྱུར༔ ནམ་མཁའ་མཛོད་ཀྱི་སྔགས་རྒྱས་བརླབས༔ དེ་ནས་གཏོར་མགྲོན་སྤྱན་འདྲེན་ནི༔ ཧཱུྃ་ཧྲཱིཿ རང་ཉིད་ལྷ་ཡི་ཐུགས་ཀའི་འོད་ཟེར་གྱིས༔ འོག་མིན་བདེ་ཆེན་མཁའ་སྤྱོད་བདེ་ལྡན་ཞིང་༔ དུར་ཁྲོད་གསང་ཆེན་རོལ་བ་ལ་སོགས་ནས༔ དབང་ཆེན་རྟ་མཆོག་རོལ་པའི་ལྷ་ཚོགས་ལ༔ དྲེགས་པ་ལྷ་སྲིན་སྡེ་བརྒྱད་འཁོར་དང་བཅས༔ གཏོར་མའི་མགྲོན་ལ་སྤྱན་འདྲེན་གཤེགས་སུ་གསོལ༔ ཉི་ཟླ་པདྨ་བམ་ཆེན་གདན་ལ་བཞུགས༔ རང་ལས་འཕྲུལ་བའི་ལྷ་མོས་འཕྲུལ་ཕྱག་འཚལ༔ དངོས་སུ་འབྱོར་བ་ཕྱི་མཆོད་རྣམ་ལྔ་དང་༔ ནང་མཆོད་སྨན་གཏོར་རཀྟ་དམ་ཚིག་རྫས༔ གསང་བ་སྦྱོར་སྒྲོལ་བློ་འདས་རིག་པའི་གཤིས༔ མ་ཚང་མེད་པ་དངོས་ཡིད་ལས་བྱུང་བའི༔ མི་ཟད་ནམ་མཁའ་མཛོད་ཀྱི་གཏེར་ཆེན་པོས༔ ཐུགས་དམ་གཉན་པོ་བསྐང་ལ་དངོས་གྲུབ་སྩོལ༔ མི་འདོད་རྐྱེན་ངན་བར་ཆད་དབྱིངས་སུ་སོལ༔ གནོད་བྱེད་དགྲ་གདོན་དམ་སྲི་རྡུལ་དུ་རློགས༔ བྱད་མ་རྦོད་གཏོང་རང་གཤེད་རང་ལ་ཕོབས༔ བསྟན་པ་འཇིགས་པའི་དགྲ་བོའི་དབང་པོ་སྣུབས༔ ཉམས་པ་བདུན་དང་ལྡན་པའི་སྐྱེ་རྒྱུད་ཆོད༔ ཞིང་བཅུ་ཚང་བའི་དམ་ཉམས་ཁ་ཕུང་རྫོགས༔ གནོད་བྱེད་མ་ལུས་ཕུང་གསུམ་གཡབ་ཀྱིས་ཐོབ༔ མ་གཡེལ་མ་འདའ་བཅོལ་པའི་ཕྲིན་ལས་མཛོད༔ ཧཱུྃ་བྷྱོ་ཛཿ བཅོམ་ལྡན་པདྨ་དབང་ཆེན་འཁོར་བཅས་ཀྱིས༔ རྣལ་འབྱོར་བདག་ཅག་འཁོར་དང་སྦྱིན་བདག་གིས༔ ཁྱེད་གསོལ་ཁྱེད་མཆོད་མཐུ་དཔུང་མ་གཡེལ་ཅིག༔ དམ་རྫས་བརྒྱན་པའི་གཏོར་མ་འདི་བཞེས་ལ༔ ཞི་བའི་ཕྲིན་ལས་འོད་སྟོང་འབར་བའི་གཟིས༔ འཇིགས་བརྒྱད་མུན་ཁམས་འཇོམས་པའི་ཕྲིན་ལས་མཛོད༔ རྒྱས་པའི་ཕྲིན་ལས་དཔག་བསམ་ལྗོན་པའི་ཚལ༔ འབྱོར་དྲུག་འབྲས་བུ་གཡུར་དུ་ཟ་བར་མཛོད༔ དབང་གི་ཕྲིན་ལས་འགུགས་པའི་མཆིལ་པ་ཡིས༔ མོས་ཚོགས་རྣམ་བཞིའི་སྣང་བ་རིང་དུ་ཁུག༔ དྲག་པོའི་ཕྲིན་ལས་གནམ་ལྕགས་ཐོག་མདའ་ཡིས༔ དམིགས་པའི་བསྟན་དགྲ་མ་ལུས་རྨིང་ནས་རློགས༔ བཅོམ་ལྡན་པདྨ་དབང་ཆེན་འཁོར་བཅས་ཀྱིས༔ སྤྱི་ཆགས་སྒོས་ཆགས་ཐན་ལྟས་ཆོ་འཕྲུལ་བཟློག༔ དགེ་འདུན་སྡེ་འཁྲུགས་རྡོ་རྗེའི་ནང་དམེ་བཟློག༔ རྗེ་དཔོན་ནང་འཐབ་གྲི་ཁ་སྨེ་ངོ་བཟློག༔ མདོ་སྔགས་ཆོས་ལ་ཕྱོགས་རིས་ཕྲག་ཏོག་བཟློག༔ བན་བོན་ཁ་མི་འཆམ་པའི་བྱད་ཁ་བཟློག༔ ཆོས་ལ་བར་ཆད་དམ་སྲིའི་འཚེ་བ་བཟློག༔ ཚེ་ལ་བར་ཆད་གཤིས་ངན་འགུམ་པ་བཟློག༔ སྲིད་ལ་དར་གུད་འགོང་པོའི་སྡང་མིག་བཟློག༔ བསོད་ནམས་ཟད་བྱེད་ངན་པའི་རྟོག་པ་བཟློག༔ ཁ་རྗེ་ཉམས་པའི་མ་རབས་སྤྱོད་ངན་བཟློག༔ བཀྲེས་ཤིང་སྐོམ་པའི་སེར་སྣའི་འཆིང་སྒྲོག་བཟློག༔ ཕྱུགས་ལ་གནོད་པའི་གློ་གོར་ཧོན་སོགས་བཟློག༔ ཞིང་ལ་འཚེ་བའི་བཙའ་སད་སེར་གསུམ་བཟློག༔ ཡུལ་ཁམས་ཕུང་བའི་ནད་མུག་མཚོན་གསུམ་བཟློག༔ མདོར་ན་མི་མཐུན་དུས་ཀྱི་རྒུད་པའི་ཚོགས༔ མ་ལུས་ཞི་ཞིང་བཟློག་པའི་དུས་ལ་བབས༔ རྣལ་འབྱོར་བཅོལ་པའི་ཕྲིན་ལས་འགྲུབ་པར་མཛོད༔ ཞེས་འདི་དག་སྣང་རྒྱན་འཁོར་ལས༔ ཧྱ་གྷྲྀ་ཝའི་ཁ་བསྐང་འདི༔ རང་བྱུང་ཆོས་སྐུ་རིག་པའི་གཤིས༔ སྣང་བྱེད་གཟིགས་པའི་ཌཱཀྐི་མས༔ སྲེད་ལེན་མེད་པའི་བརྡ་རིས་སྤྲད༔ འཕོ་འགྱུར་མེད་པའི་ཡི་གེར་བཀོད༔ དུས་ལ་བབས་ཚེ་ལས་འབྲེལ་དང་༔ མཐུན་པའི་ལུང་ཟིན་བིདྱ་ཡི༔ བཀའ་ཡིས་བསྐུལ་བ་ལ་བརྟེན་ནས༔ བསམ་གཏན་ཛྙཱ་ན་དྭཱི་པ་ཡིས༔ ཐུན་མཚམས་ཤིག་ལ་སྤེལ་བ་དགེ༔