པདྨ་དབང་ཆེན་སྒྲུབ་པའི་རྗེས་ཀྱི་ལས་རིམ་ཁ་སྐོང་།
ཟུར་འགེབས་མི་ཟད་རྒྱན་འཁོར་ལས༔ རྗེས་ཀྱི་རིམ་པ་འདི་བཞིན་ནོ༔ ཧཱུྃ་ཧྲཱིཿ པདྨ་དབང་ཆེན་ལྷ་ཚོགས་འཁོར་བཅས་ལ༔ མེ་ཏོག་བདུག་སྤོས་མར་མེ་དྲི་ཞལ་ཟས༔ སྒྲ་སྙན་རོལ་མོའི་བྱེ་བྲག་བསྟོད་པའི་དབྱངས༔ རང་བྱུང་རང་ཤར་དབང་ཆེན་ལྷ་ལ་འབུལ༔ ཨོཾ་ཧྱ་གྷྲྀ་ཝ་པདྨ་ཧེ་རུ་ཀ་ས་པཱ་རི་ཝ་ར་པུཥྤེ་སོགས་ནས། ཤཔྟ་མ་ཧཱ་པཉྩ་རཀྟ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི༔ ཧཱུྃ་ཧྲཱིཿ གར་གྱི་དབང་ཕྱུག་པདྨ་ཧེ་རུ་ཀ༔ སོ་སོར་རྟོག་པའི་ཡེ་ཤེས་སྐུར་སྣང་བ༔ སྙིང་རྗེ་ཆེན་པོས་གདུལ་དཀའ་འདུལ་བ་པོ༔ པདྨ་དབང་ཆེན་ལྷ་ལ་ཕྱག་འཚལ་བསྟོད༔ ཧཱུྃ་ཧྲཱིཿ མཚན་དཔེ་འགྱུར་མེད་སྐུ་ཡི་དཀྱིལ་འཁོར་ནས༔ འཕོ་འགྱུར་མེད་པ་ཚེ་ཡི་དངོས་གྲུབ་སྩོལ༔ འགགས་མེད་ཚངས་དབྱངས་གསུང་གི་དཀྱིལ་འཁོར་ནས༔ མི་ཤིགས་ན་དཱ་དབྱངས་ཀྱི་དངོས་གྲུབ་སྩོལ༔ སྐྱེ་མེད་རང་བྱུང་ཐུགས་ཀྱི་དཀྱིལ་འཁོར་ནས༔ འཕོ་མེད་བརྗོད་བྲལ་དགོངས་པའི་དངོས་གྲུབ་སྩོལ༔ སྣ་ཚོགས་འགྲོ་འདུལ་ཡོན་ཏན་ཕྲིན་ལས་ཀྱིས༔ དབང་བཅུའི་དཔལ་ལ་འགོད་པའི་དངོས་གྲུབ་སྩོལ༔ ཨོཾ་བཛྲ་ཀྲོ་ཏ་ཧྱ་གྷྲི་ཝ་ཀཱ་ཡ་ཝཀྐ་ཙིཏྟ་གུ་ཎ་ཀརྨ་སརྦ་སིདྡྷི་ཕ་ལ་ཧཱུྃ༔ ཧཱུྃ་ཧྲཱིཿ པདྨ་དབང་ཆེན་དཀྱིལ་འཁོར་ལྷ་ཚོགས་རྣམས༔ ཆོ་ག་ལྷག་ཆད་འགལ་འཁྲུལ་བསྐྱེད་རྫོགས་ཕྲི༔ མི་ཤེས་མ་གུས་རྩ་བ་ཡན་ལག་གི༔ དམ་ཚིག་ཆགས་ཉམ་འདས་རལ་ཅི་མཆིས་པ༔ མི་འཆབ་བཤགས་སོ་ཚངས་པའི་དངོས་གྲུབ་སྩོལ༔ ཨོཾ་ཨཱཿཧཱུྃ་བཛྲ་ས་ཏྭ་ས་མ་ཡཱ་སོགས། ཡི་གེ་བརྒྱ་པ་དབྱངས་གསལ་བྱེད༔ གཟུངས་སྔགས་ཟབ་མོས་ཉམས་པ་གསོ༔ ལྷ་ཚོགས་སྐུ་གསུང་ཐུགས་རྟེན་ལ༔ བསྟིམ་མམ་ཡང་ན་བཛྲ་མཱུ༔ ཧཱུྃ་ཧྲཱིཿ དགེ་འདིའི་མཐུ་ཡིས་མི་མཐུན་རྒུད་པ་སེལ༔ སྡེ་བརྒྱད་དབང་འདུས་ལོག་འདྲེན་གཡུལ་ལས་རྒྱལ༔ འགྲོ་ཀུན་ཕྱམ་གཅིག་གདོད་མའི་ས་ལ་གྲོལ༔ མངོན་རྫོགས་ཧེ་རུ་ཀ་དཔལ་མངོན་གྱུར་ཤོག༔ ཧཱུྃ་ཧྲཱིཿ ཆོས་སྐུ་དེ་བཞིན་ཉིད་དབྱིངས་སྤྲོས་དང་བྲལ༔ ལོངས་སྐུ་ངེས་པ་ལྔ་ལྡན་རྡོ་རྗེ་སེམས༔ སྤྲུལ་སྐུ་ཐུགས་རྗེའི་དཔལ་འབར་ཐོད་ཕྲེང་ལྔ༔ སྐུ་གསུམ་པདྨ་དབང་ཆེན་བཀྲ་ཤིས་ཤོག༔ ས་མ་ཡཱ༔ ཅེས་པ་རྟ་མཆོག་རྒྱལ་པོ་ཡི༔ ལྷན་ཐབས་མི་ཟད་རྒྱན་འཁོར་གྱི༔ ཁ་བསྐང་མཛེས་མའི་ལུས་རྒྱན་འདི༔ མེད་མི་རུང་བའི་ཆ་ལག་ཏེ༔ ལས་འཕྲོའི་སྟོབས་ཀྱིས་དགོངས་ཀློང་ནས༔ དག་པར་ཕབ་པས་ཆོས་ཀྱི་བདག༔ རིགས་ཀྱི་མྱུ་གུའི་དོན་ཀུན་འགྲུབ༔ བསྟན་དང་འགྲོ་ལ་ཕན་པར་ཤོག༔