རྡོ་རྗེ་ཕུར་པའི་ཡང་བཅུད་དམ་སྲི་མཐར་བྱེད།

བཀའ་འདུས་ཆོས་ཀྱི་རྒྱ་མཚོ་ལས༔ རྡོ་རྗེ་ཕུར་པའི་ཡང་བཅུད་དམ་སྲི་མཐར་བྱེད་བཞུགས༔

རྡོ་རྗེ་ཕུར་པའི་ལྷ་ལ་འདུད༔ མ་འོངས་རྩུབ་འགྱུར་ལྔ་བདོའི་དུས༔ ཆོས་བྱེད་བར་ཆད་དམ་སྲིས་འཚེ༔ དེ་བཟློག་ཕུར་བའི་སྒྲུབ་ཐབས་སྟོན༔ སྤྲོས་མེད་རྒྱུན་གྱི་རྣལ་འབྱོར་པས༔ ཚོགས་ཞིང་གསལ་འདེབས་སྐྱབས་སེམས་དང༔ ཡན་ལག་བདུན་པ་སྔོན་སོང་ནས༔ རྒྱུན་གྱི་ཕྲིན་ལས་འདི་ལ་འཇུག༔ ས་མ་ཡཱ༔ ཨཱ༔ ཐམས་ཅད་འོད་གསལ་སྤྲོས་བྲལ་དབྱིངས༔ ཀུན་སྣང་སྙིང་རྗེའི་རོལ་རྩལ་ལས༔ རྒྱུ་ཡི་རིག་པ་ཧཱུྃ་མཐིང་ག༔ མཁའ་ལ་འཇའ་ཚོན་ཇི་བཞིན་ཤར༔ དེ་ལས་འོད་འཕྲོས་འཕགས་པ་མཆོད༔ སེམས་ཅན་དོན་བྱས་ལོག་འདྲེན་བསྒྲལ༔ ཚུར་འདུས་ཡོངས་སུ་གྱུར་པ་ལས༔ རང་ཉིད་དཔལ་ཆེན་ཕུར་བའི་སྐུ༔ མཐིང་ནག་ཞལ་གསུམ་གཡས་དཀར་བཞད༔ གཡོན་དམར་གཤེ་ཞིང་དབུས་མཐིང་ནག༔ སྤྱན་དགུའི་སྡང་མིག་བགེགས་ལ་གཟིགས༔ དབུ་སྐྲ་སྦྲུལ་ཆིངས་རྡོ་རྗེའི་ཏོག༔ རྫི་སྨིན་སྨ་ར་མེ་འོད་འཕྲོ༔ ཕྱག་དྲུག་གཡས་གཉིས་རྡོ་རྗེ་དང༔ དགྲ་སྟྭ་གཡོན་གཉིས་མེ་རྩེ་གསུམ༔ འཛིན་ཅིང་ཐ་གཉིས་ལྕགས་ཕུར་བསྒྲིལ༔ དུར་ཁྲོད་ཆས་བརྒྱད་དཔལ་ཆས་རྫོགས༔ ཞལ་གདངས་མཆེ་གཙིགས་སྔགས་སྒྲ་སྒྲོག༔ སྐུ་སྨད་གནམ་ལྕགས་དབལ་ཟུར་གསུམ༔ རྣོ་ངར་དམ་སྲི་ཕོ་མོ་ཡི༔ སྙིང་ལ་གཟིར་ཞིང་ཚེ་བསོད་འདྲེན༔ ཆུ་སྲིན་ཁ་ནས་ཐོག་སེར་འཕྲོ༔ འབྲུག་སྟོང་སྒྲ་ལྡིར་གློག་འོད་འགྱེད༔ གནས་བཅུར་རང་བྱུང་ཁྲོ་རྒྱལ་བཅུ༔ ཁྲ་ཕྱག་ཟ་གསོད་ཕུར་སྲུང་གཏམས༔ ཁྲོ་རྒྱལ་ཕྲིན་ལས་གཅིག་བསྡུས་དཔལ༔ ལྷག་ལྷ་བཛྲ་ཀུ་མ་ར༔ ཡེ་ནས་རང་གནས་རིག་པའི་གཤིས༔ བསྐྱེད་བསྟིམ་རྒྱས་གདབ་མི་འཚལ་ཡང༔ དྲན་པ་ཙམ་གྱིས་རྫོགས་པར་འགྱུར༔ འདུ་འབྲལ་མེད་པར་བཞུགས་ཕྱག་འཚལ༔ བདེ་སྟོང་ཡེ་ཤེས་ཆེན་པོས་མཆོད༔ ཁྱབ་གདལ་མ་བཅོས་ངང་ནས་བསྟོད༔ ཨོཾ་འགྱུར་བ་མེད་པ་རྡོ་རྗེའི་སྐུ༔ ཨཱཿའགག་པ་མེད་པ་རྡོ་རྗེའི་གསུང༔ ཧཱུྃ་འཁྲུལ་བ་མེད་པ་རྡོ་རྗེའི་ཐུགས༔ ཧྲཱིཿཡོན་ཏན་ཕྲིན་ལས་རྨད་བྱུང་གཏེར༔ གསང་བ་གསུམ་གྱི་དངོས་གྲུབ་སྩོལ༔ ཐུགས་མཆོག་དཔལ་གྱི་བེ་འུའི་ཀློང༔ རྡོ་རྗེ་སྔོན་པོ་ནས་ཙམ་གྱི༔ ལྟེ་བར་ཧཱུྃ་མཐིང་སྔགས་ཀྱིས་བསྐོར༔ འོད་འཕྲོས་རྒྱལ་མཆོད་བྱིན་ནུས་བཀུགས༔ འགྲོ་བའི་སྒྲིབ་སྦྱངས་མཐུ་དཔལ་བསྡུས༔ འོད་ཟེར་མེ་སྟག་ཚྭ་ཚྭ་འཕྲོས༔ སྡེ་བརྒྱད་ལོག་འདྲེན་དམ་སྲི་བཏུལ༔ གཉིས་སྣང་དགྲ་བགེགས་ཚར་བཅད་ནས༔ ཆོས་དབྱིངས་བརྡལ་ཁྱབ་ཆེན་པོའི་ངང༔ ཧཱུྃ༔ སངས་རྒྱས་ཀུན་གྱི་ཡེ་ཤེས་སྐུ༔ ངང་ཉིད་རྡོ་རྗེ་ཆོས་དབྱིངས་ལས༔ འབར་བའི་གཏུམ་ཆེན་མི་བཟད་པ༔ སྐུ་ཡི་དབྱིག་ཏུ་བདག་བསྐྱེད་ཅིག༔ སྲོག་གི་གོ་རུ་ཤར་བ་དང༔ སྙིང་གི་དཀྱིལ་དུ་བསྒོམ་པར་བྱ༔ མ་ཡེངས་མི་བསྒོམ་ལྷུག་པའི་གཤིས༔ རང་བབས་ཆེན་པོས་རྡོ་རྗེའི་སྔགས༔ རྡོར་བཟླས་འགོགས་བཟླས་དབྱངས་ཀྱིས་བཟླ༔ ཨོཾ་བཛྲ་ཀཱི་ལི་ཀཱི་ལ་སརྦ་བྷིག་ནན་བཾ་ཧཱུྃ་ཕཊཿཛ་ཧཱུྃ་ཨཱཿ བསྙེན་སྔགས་ཡིག་འབྲུ་བཅུ་བདུན་པ༔ གྲངས་སུ་བསགས་ན་མན་ངག་ཡིན༔ ཐུན་མཐར་སྟོང་ཚིག་གིས་བསྟོད་ཅིང༔ ཧཱུྃ་གིས་འོད་གསལ་དབྱིངས་སུ་བསྡུ༔ ཕཊ་ཀྱིས་ལྷར་ལྡང་དགེ་བ་བསྔོ༔ ཤིས་པ་བརྗོད་པས་མཐའ་ལ་བརྒྱན༔ འདི་ནི་སྤྲོས་མེད་རྒྱུན་ཁྱེར་ཏེ༔ ཕུར་སྒྲུབ་ཡང་བཅུད་སྙིང་གི་ཁྲག༔ རང་བྱུང་སྤྲུལ་སྐུ་པདྨ་ངས༔ བདེ་སྟེར་ཌཱཀྐི་ཁྱེད་ལ་གདམས༔ ད་ལྟ་མ་སྤེལ་མ་འོངས་དུས༔ བསྟན་དང་འགྲོ་བའི་དོན་ཆེད་དུ༔ ཏཱ་རེ་མི་འགྱུར་དགའ་ཚལ་གྱི༔ བྲག་དམར་མདའ་སྒྲོའི་དབྱིབས་རྫོངས་སུ༔ རྒྱས་ཐོབ་མ་འོངས་ཌཱཀྐི་མ༔ ཁྱེད་དང་ཨ་ཙར་གསལ་སྣང་གི༔ སྤྲུལ་མིང་སྲས་དང་འཕྲད་པར་གྱིས༔ འདི་ཉིད་ཉམས་སུ་སུས་བསྟར་བ༔ བར་ཆད་བདུད་དབང་མི་འགྱུར་བའི༔ པདྨ་འབྱུང་གནས་ཐ་ཚིག་ཡོད༔ ཤིན་ཏུ་གསང་ལ་རང་ཉམས་ལོངས༔ བསླུ་བར་མི་འགྱུར་ས་མ་ཡཱ༔ ཕུན་སུམ་ཚོགས་པ་ལྔ་ཡི་རྒྱ༔ ཞེས་པ་འདི་ཡང་སྔོན་སྦྱངས་བག་ཆགས་བཟང་པོས་མཚམས་སྦྱར་བའི་དགེ་སློང་དགེ་བའི་བཤེས་གཉེན་ནག་ཕྲན་བླ་མ་མཉྫུ་ཤྲཱིའི་ཡང་སྲིད་ཡིན་ནོ་སྙམ་པའི་ཆོས་དབང་སྐྱེས་ཐོབ་ཀྱི་བློ་ལྡན་ཚ་ཉག་པ་མཁྱེན་རབ་འོད་ཟེར་གྱིས་བསྐུལ་ངོར་ལས་འཕྲོ་སད་པའི་གཏེར་སྟོན་བསམ་གཏན་ཡེ་ཤེས་གླིང་པས་མེ་བྱ་མཁའ་ལྡིང་རྒྱལ་པོས་གཤོག་རྩལ་བརྐྱངས་པའི་ལོའི་ཟླ་བ་གཉིས་པའི་ཚེས་བཅུར་དབེན་རི་བཀྲ་ཤིས་ལྷ་རྩེའི་ཞོལ་དུ་ཤོག་སེར་ལས་ཞལ་བཤུས་པ་ཐོག་མཐའ་བར་དུ་དགེ་ཞིང་བཀྲ་ཤིས་པར་གྱུར་ཅིག༔