རྡོ་རྗེ་ཕུར་པའི་ཚོགས་མཆོད་བསོད་ནམས་རྒྱ་མཚོའི་འཇུག་ངོགས།
ཡང་གསང་མཁའ་འགྲོའི་ཐུགས་ཐིག་ལས༔ རྡོ་རྗེ་ཕུར་པའི་ཚོགས་མཆོད་བསོད་ནམས་རྒྱ་མཚོའི་འཇུག་ངོགས་བཞུགས༔ དཔལ་ཆེན་ཧེ་རུ་ཀ་ལ་འདུད༔ མ་འོངས་སྐྱེ་འགྲོའི་ཚོགས་རྫོགས་ཕྱིར༔ བསོད་ནམས་རྒྱ་མཚོའི་འཇུག་ངོགས་སྟོན༔ པ་ལ་ཤ་དང་ནི་མ་ད་ན་ཆང་༔ གཙོ་བོར་བྱེད་ལ་ལོངས་སྤྱོད་བསགས༔ ཡར་མར་དུས་ཚེས་བཟང་པོར་རྩོམ༔ རྡོ་རྗེ་ཕུར་བའི་རྣལ་འབྱོར་བས༔ དང་པོ་བྱིན་རླབས་རིམ་པ་ནི༔ ལས་སྔགས་བརྗོད་པས་བར་ཆད་བསལ༔ ཚོགས་རྫས་བསང་སྦྱངས་འདི་ལྟར་རོ༔ རཾ་ཡཾ་ཁཾ༔ ལན་གསུམ༔ ཨོཾ་ཨཱཿཧཱུྃ༔ ལན་གསུམ༔ རང་ཉིད་ལྷར་གསལ་ཐུགས་ཀ་ནས༔ རཾ་ལས་མེ་འབར་དངོས་འཛིན་བསྲེགས༔ ཡཾ་ལས་རླུང་བྱུང་བགས་ཆགས་གཏོར༔ ཁཾ་ལས་ཆུ་བྱུང་གཉིས་འཛིན་བཀྲུས༔ ཨོཾ་གྱིས་མི་གཙང་དྲི་མ་སྦྱང༔ ཨཱཿཡིས་ཟག་མེད་བདུད་རྩིར་སྤེལ༔ ཧཱུྃ་གིས་འདོད་ཡོན་ཚོགས་སུ་བསྒྱུར༔ རྒྱ་ཆེ་གཏིང་ཟབ་བཀོད་མཛེས་ལེགས༔ ཨོཾ་ཨཱཿཧཱུྃ༔ ལན་གསུམ༔ ཧཱུྃ་བླ་མ་ཡི་དམ་མཁའ་འགྲོ་དང༔ ཆོས་སྐྱོང་དམ་ཅན་གཏེར་བདག་རྣམས༔ རྡོ་རྗེ་ཕུར་པའི་ལྷ་ཚོགས་གཤེགས༔ ཚོགས་མཆོད་བདུད་རྩིའི་སྤྲིན་ཕུང་བཞེས༔ བདག་ལ་ཚེ་དབང་ལོངས་སྤྱོད་སྩོལ༔ གྷ་ན་ཙཀྲ་པཱུ་ཛ་ཧོ༔ བར་དུ་བཤགས་པ་ཚིག་འདི་བརྗོད༔ ཧོ༔ རྡོ་རྗེ་གཞོན་ནུའི་ལྷ་ཚོགས་བདག་ལ་དགོངས༔ ཚེ་རབས་ཐོག་མེད་དུས་ནས་ད་བར་དུ༔ སོར་བྱང་སྔགས་སྡོམ་ཉམས་འགལ་འདས་རལ་སོགས༔ མི་འཆབ་ཚོགས་ཀྱི་མཆོད་པས་བཤགས་ཤིང་སྦྱང༔ ཚངས་པ་མཆོག་གི་དངོས་གྲུབ་དུས་འདིར་སྩོལ༔ ཨོཾ་ས་མ་ཡཱ༔ ཨཱ་ས་མ་ཡཱ༔ ཧཱུྃ་ས་མ་ཡཱ༔ ཧེ་རུ་ཀ་ས་ཏྭ་ས་མ་ཡཱ་སོགས་ཡི་གེ་བརྒྱ་པས་ཉམས་ཆག་བཤག༔ དགྲ་བགེགས་ཚོགས་རྫས་ཐ་མར་བཀུག༔ བྲུབ་ཁུང་བསྐྱེད་ཅིང་འགུག་གཞུག་བྱ༔ ཧཱུྃ་བྷྱོ༔ ཆོས་ཀྱི་དབྱིངས་ནས་རང་བྱུང་གྲུབ་པའི་ལྷ༔ ཕུར་པ་རོལ་པའི་དུར་ཁྲོད་ཆེན་པོ་ནས༔ མི་སྲུན་དམ་སྲི་འདུལ་བའི་སྟོབས་པོ་ཆེ༔ རྡོ་རྗེ་གཞོན་ནུ་དྲག་ཤུལ་སྟོབས་དང་ལྡན༔ གནོད་བྱེད་བྱད་མ་འགུགས་བསྒྲལ་སྤར་བར་བྱ༔ ཕྱག་གཡས་གནམ་ལྕགས་རྡོ་རྗེས་བྱད་མ་གཞོམ༔ ཕྱག་གཡོན་ལྕགས་ཕུར་བྱད་མའི་ཚེ་བསོད་འདྲེན༔ རྣམ་ཤེས་ཨ་ཡིག་ཀུན་བཟང་སྲས་སུ་བསྐྲུན༔ ཚེ་བསོད་ཎི་ཡིག་བདག་གི་སྙིང་གར་འདུས༔ ཤ་ཁྲག་ཕུང་ཁམས་ཕུར་སྲུང་ཚོགས་ཀྱིས་རོལ༔ ལས་བཞི་ལྷུན་གྱིས་གྲུབ་པའི་ཕྲིན་ལས་མཛོད༔ གནོད་བྱེད་བྱད་མའི་ཤ་ཁྲག་རུས་པ་རྩ་གསུམ་སྲུང་མའི་ཞལ་ཏུ་བསྟབ་པོ་བཞེས་ཤིག་རོལ་ཅིག་ཁ་རཾ་ཁཱ་ཧི༔ ཧཱུྃ་ཧོ༔ དགེ་བ་འདི་ཡིས་མ་རིག་འཁྲུལ་བའི་འདྲེ༔ རང་བྱུང་ཡེ་ཤེས་སྙིང་པོའི་དོན་རྟོགས་ནས༔ འཁོར་གསུམ་ཡོངས་དག་ཆེན་པོར་རྒྱས་བཏབ་ཏེ༔ ཀུན་བཟང་དགོངས་ཀློང་ཕྱམ་གཅིག་གྲོལ་བར་སྨོན༔ དེ་ནས་དཔལ་གྱི་ལྷག་མ་རྣལ་འབྱོར་པའི་ཕུད༔ བཀའ་ཡི་ཕ་འབབ་བཅས་ཏེ༔ ཞལ་ཆབ་བྲན་ལ་བྱིན་གྱིས་བརླབས༔ ཕེཾ་གྱིས་མགྲོན་བཀུག༔ ཚིག་འདིས་ལེགས་པར་བསྔོ༔ ཧཱུྃ་ཧོ༔ རྡོ་རྗེ་ཕུར་པའི་བཀའ་འཁོར་སྐྱོང་བའི་ཚོགས༔ དཀར་མོ་ཟླ་འདབས་སེར་མོ་ཉི་མའི་འདབས༔ དམར་མོ་མེ་འདབས་ལྗང་མོ་རླུང་གི་འདབས༔ དབང་ཕྱུག་ཉེར་བརྒྱད་རྡོ་རྗེ་ཕྲ་མེན་དྲུག༔ ཕུར་བའི་སྲུང་མ་ཕྱོགས་སྐྱོང་འཕྲོག་མ་དང༔ དཀར་ཕྱོགས་གཞི་བདག་ལྷག་གཏོར་དབང་བའི་སྡེ༔ ལྷག་མའི་གཏོར་མ་བཤལ་ཆུ་དང་བཅས་བཞེས༔ རྣལ་འབྱོར་དགྲ་སྒྲོལ་བསྟན་པའི་བྱ་ར་མཛོད༔ བྱད་མ་རྦོད་གཏོང་རང་གཤེད་རང་ལ་ཕོབ༔ ནད་ཡམས་དམག་འཁྲུགས་སྲིད་ཞིའི་རྒུད་པ་སོལ༔ ཕན་དང་བདེ་བས་འཚོ་བའི་སྡོང་གྲོགས་མཛོད༔ སརྦ་ཨུ་ཙུ་ཊ་བྷ་ལིང་ཏ་ཁ་ཧཱི༔ ལྷག་མ་ཕྱི་རོལ་གཙང་སར་གཤེགས༔ རྗེས་ལ་སྨོན་ལམ་ཤིས་པ་བརྗོད༔ ཐ་ཚིག་གཏོར་བསྔོ་བསྟན་མ་སྐྱོང༔ བྲོ་རྒྱས་གདབ་སོགས་སྤྱི་བྱེ་བྲག༔ གང་ལྟར་བྱས་ཀྱང་འགལ་བ་མེད༔ ཕན་པའི་ཡོན་ཏན་བརྗོད་མི་ལངས༔ ཚོགས་གཉིས་ཡེ་ཤེས་རྒྱ་ཆེན་འགྲུབ༔ གནས་སྐབས་མཐར་ཐུག་ཀུན་ལ་བདེ༔ བདེ་ནས་བདེ་བའི་ས་ལ་གཤེགས༔ ས་མ་ཡཱ༔ རྒྱ་རྒྱ་རྒྱ༔ རང་བྱུང་སྙིང་གི་སྒྲོམ་ནས་བཏོན༔ སློབ་བུ་རིག་འཛིན་རྡོ་རྗེ་དང༔ དད་དང་ལྡན་པའི་ཆོས་སྐལ་ཡིན༔ རྣལ་འབྱོར་ས་ར་ཧི་ཏས་སྤེལ༔