སྒྲོལ་མའི་གསོལ་འདེབས་དུས་ངན་འཇིགས་སྐྱོབ་རྡོ་རྗེའི་གོ་ཆ།
ཡང་གསང་མཁའ་འགྲོའི་ཐུགས་ཐིག་ལས༔ སྒྲོལ་མའི་གསོལ་འདེབས་དུས་ངན་འཇིགས་སྐྱོབ་རྡོ་རྗེའི་གོ་ཆ་བཞུགས༔ ཡང་གསང་ཌཱཀྐི་མ་ལ་འདུད༔ དུས་སྙིགས་འགྲོ་བའི་གདུང་སེལ་ཕྱིར༔ རྡོ་རྗེའི་གོ་ཆ་འདིར་བཀོད་ཀྱེ༔ མོས་གུས་ཡིད་ཆེས་མདུན་མཁའ་རུ༔ འཕགས་མ་འཁོར་བཅས་བཞུགས་པར་མོས༔ ཐེ་ཆོམ་མེད་པར་ཁྱེད་ཤེས་ཀྱིས༔ གསོལ་འདེབས་འདི་ལ་བརྩོན་གལ་ཆེ༔ དེས་ནི་སྔོན་ལས་མ་གཏོགས་པར༔ འཕྲལ་རྐྱེན་ཆེ་ཕྲ་གང་ཡིན་ཡང༔ དྲན་པ་ཙམ་གྱིས་སེལ་བར་ངེས༔ དེ་ཕྱིར་སྙིང་ལས་གཅེས་པར་བརྩོན༔ ཨེ་མ་ཧོ༔ སྔོན་ཚེ་བདེ་གཤེགས་རྔ་སྒྲའི་བསྟན་པ་ལ༔ རྒྱལ་པོའི་སྲས་མོ་ཛྙཱ་ན་ཙན་ཏྲར་གྱུར༔ དེ་ཚེ་བྱང་ཆུབ་མཆོག་ཏུ་ཐུགས་བསྐྱེད་ནས༔ ཉེས་བརྒྱས་གཟིར་བའི་འགྲོ་བ་ཉམ་ཐག་རྣམས༔ ལྔ་བདོའི་དུས་སུ་བདག་གིས་མ་བསྒྲལ་བར༔ ཡང་དག་བྱང་ཆུབ་ས་ལ་མི་འགོད་ཅེས༔ དེ་སོགས་སྔོན་གྱི་དམ་བཅའ་ཉེར་དགོངས་ལ༔ བདག་སོགས་རྣམས་ཀྱི་མི་འདོད་ཉེར་འཚེའི་རིགས༔ ནད་ཡམས་དུས་འཁྲུགས་སད་སེར་བཙའ་ཐན་དང༔ མི་ཕྱུགས་གློ་བུར་དུས་མིན་འཆི་བ་རྣམས༔ རྗེ་བཙུན་འཕགས་མའི་ཐུགས་བསྐྱེད་ཞལ་བཞེས་དང༔ བདག་གི་དད་པས་ཁྱེད་ཤེས་གསོལ་བཏབ་མཐུས༔ མི་མཐུན་བར་ཆད་རྐྱེན་ངན་བཟློག་ཏུ་གསོལ༔ བདག་སོགས་ཚེ་ཆོས་སྲིད་ནོར་ལོངས་སྤྱོད་རྫས༔ གང་ཡང་མ་ཚང་མེད་པ་ཐམས་ཅད་ཀུན༔ རྗེ་བཙུན་འཕགས་མའི་ཐུགས་བསྐྱེད་ཞལ་བཞེས་དང༔ བདག་གི་དད་པས་ཁྱེད་ཤེས་གསོལ་བཏབ་མཐུས༔ རབ་ཏུ་འཕེལ་ཞིང་རྒྱས་པར་མཛད་དུ་གསོལ༔ བླ་མ་མཁན་སློབ་དགེ་འདུན་མི་དབང་འབངས༔ སྣང་སྲིད་འདོད་པའི་ཡོན་ཏན་གང་དམིགས་ཀུན༔ རྗེ་བཙུན་འཕགས་མའི་ཐུགས་བསྐྱེད་ཞལ་བཞེས་དང༔ བདག་གི་དད་པས་ཁྱེད་ཤེས་གསོལ་བཏབ་མཐུས༔ ཐོགས་མེད་དབང་དུ་སྡུད་པར་མཛད་དུ་གསོལ༔ གཟུགས་ཅན་མི་དང་གཟུགས་མེད་བགེགས༔ ལོག་པར་འདྲེན་པའི་རིགས་མཐའ་དག༔ རྗེ་བཙུན་འཕགས་མའི་ཐུགས་བསྐྱེད་དང༔ བདག་གི་དད་པས་གསོལ་བཏབ་མཐུས༔ རྡུལ་དུ་བརླག་པར་མཛད་དུ་གསོལ༔ ཕྱི་མ་མཁའ་སྤྱོད་གཡུ་ལོ་བཀོད༔ རྗེ་བཙུན་སྒྲོལ་མའི་ཞབས་དྲུང་དེར༔ པདྨའི་སྦུབས་སུ་སྐྱེ་བར་ཤོག༔ མཚན་དཔེ་ལྡན་པའི་ལུས་ཐོབ་ནས༔ མངོན་ཤེས་ལྔ་དང་རྗེས་དྲན་དྲུག༔ སྤྱན་ལྔ་ལ་སོགས་འབྱུང་བར་ཤོག༔ མཐའ་ཡས་འགྲོ་བའི་ཁམས་བཞིན་དུ༔ འདྲེན་པའི་དེད་དཔོན་དམ་པར་གྱུར༔ ཅེས་འདི་དབྱིངས་ཀྱི་ཌཱཀྐིའི་བརྡ༔ ཕལ་པའི་བློ་ཡིས་གཞལ་བར་དཀའ༔ ཉམས་སུ་བླངས་ན་རྟགས་མཚན་འབྱུང༔ སྐལ་བ་ལྡན་ལ་གཏད་དོ་རྒྱ༔ སྐལ་མེད་རྣམས་ལ་གསང་ངོ་རྒྱ༔ བཀའ་ཡི་སྲུང་མས་བྱ་ར་མཛོད༔ དུས་ལ་བབས་ཚེ་ལག་ཏུ་སྤྲོད༔ ས་མ་ཡཱ༔ ཞེས་པའང་བཙུན་པ་ལུང་རྟོགས་ཀྱི་བཞེད་སྐོང་དུ་ས་ར་ཧི་ཏས་སོ༔ སརྦ་མངྒ་ལམ༔