རྗེ་བཙུན་ཏཱ་རེའི་ཚོགས་མཆོད་བསོད་ནམས་རྒྱ་མཚོའི་འཇུག་ངོགས།
ཡང་གསང་ཌཱཀྐིའི་ཐུགས་ཐིག་ལས༔ རྗེ་བཙུན་ཏཱ་རེའི་ཚོགས་མཆོད་བསོད་ནམས་རྒྱ་མཚོའི་འཇུག་ངོགས་བི་ཛ་ཧ་རཾ༔ ཏཱ་རེ་ལྷ་མོར་ཕྱག་འཚལ་ལོ༔ བསོད་ནམས་རྒྱ་མཚོའི་འཇུག་ངོགས་སྟོན༔ ཕྱི་ནང་གསང་བའི་ཚོགས་རྫས་བསགས༔ བཟའ་བཅའ་བཏུང་བའི་རིམ་པ་རྣམས༔ བྱིན་གྱིས་བརླབ་པ་འདི་སྐད་བརྗོད༔ ཨོཾ་ཨཱཿཧཱུྃ་ཧྲཱི་སྭཱ་ཧཱ༔ སརྦ་དྲ་ཕྱམ་ཤྭ་དྷ་ན་ཡེ་སྭཱ་ཧཱ༔ བདག་ཉིད་འཕགས་མའི་ལྷ་ཚོགས་ཀྱི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་པས༔ སྲིད་གསུམ་ལྷ་མིའི་བདུད་རྩི་འཇིག་རྟེན་གྱི་འབྱུང་ལྔ་རྩི་ཤིང་ནགས་ཚལ་སོགས་ཀྱི་སྨན་དང་ཟས་སྐོམ་གྱི་བཅུད་ཐམས་ཅད་བསྡུས་ནས་ཚོགས་རྫས་ལ་ཐིམ་པར་གྱུར༔ ཨོཾ་བཛྲ་ཨ་ར་ལི་ཧོ༔ ཛཿཧཱུྃ་བཾ་ཧོ༔ རྩ་གསུམ་དཔའ་བོ་དཔའ་མོ་དང༔ ཆོས་སྐྱོང་ནོར་ལྷ་གཏེར་བདག་སོགས༔ ཁྱད་པར་ཨཱཏྱ་ཏཱ་རེ་མ༔ གཙོ་འཁོར་ཉི་ཟེར་རྡུལ་འཁྲིགས་ལྟར༔ མ་ལུས་མདུན་གྱི་མཁའ་ལ་སྤྱོན༔ སྒེག་མོ་བཞི་དང་རྣམ་ལྔའི་སྔགས༔ བརྗོད་ཅིང་ཕྱག་རྒྱ་དང་བཅས་མཆོད༔ དེ་ནས་རྩ་སྔགས་ཤམ་བུ་རུ༔ ཨེ་དམ་བྷ་ལིང་ཏཱ་ཁཱ་ཧི༔ ག་ན་ཙཀྲ་ཁཱ་ཧི༔ མ་ཧཱ་པཉྩ་རཀྟ་པཱུ་ཛ་ཁ་རཾ་ཁཱ་ཧི༔ བཀའ་འཁོར་ཁས་ཉན་དབང་ཆུང་ལྷག་མའི་མགྲོན༔ མ་ལུས་ཟས་སྐོམ་བདུད་རྩིའི་དཔལ་ཐོབ་ཤོག༔ ཁ་འབར་མ་ཡི་སྔགས་ཀྱི་གཤམ༔ ཨུ་ཙུཥྚ་བྷ་ཀྵ་བྷ་ཀྵ་བྷ་སྭཱ་ཧཱ༔ དེ་ནས་ཚོགས་ཀྱི་དངོས་གྲུབ་ལེན༔ ཨ་ཧོ༔ རྗེ་བཙུན་འཕགས་མའི་ལྷ་ཚོགས་འཁོར་དང་བཅས༔ འགྲོ་བ་འདུལ་ཕྱིར་ཐུགས་རྗེའི་སྐུ་བསྐྱོད་ལ༔ རིག་སྔགས་མཆོག་གྲུབ་རྟགས་ཀྱི་ནུས་པ་དང༔ མཆོག་ཐུན་ལས་བཞི་འགྲུབ་པའི་དངོས་གྲུབ་ཞུ༔ ཨོཾ་ཏཱ་རེ་ཏཱཾ་སྭཱ་ཧཱ༔ ཀཱ་ཡ་ཝཀྐ་ཙིཏྟ་སིདྡྷི་ཕ་ལ་ཧཱུྃ༔ སྐུ་གསུང་ཐུགས་སྐྱེ་འགག་གནས་གསུམ་དང་བྲལ་བའི་ཆོས་ཉིད་རང་གསལ་གྱི་དངོས་གྲུབ་ཐོབ་པར་སྒོམས་ཤིག༔ རྗེས་སུ་སྨོན་ལམ་ནི༔ ཨེ་མ་ཧོ༔ རྗེ་བཙུན་འཕགས་མ་མཁྱེན་བརྩེ་ནུས་པའི་བདག༔ དང་པོ་བྱང་ཆུབ་མཆོག་ཏུ་ཐུགས་བསྐྱེད་ནས༔ ལམ་ལྔ་ས་བཅུའི་དཔལ་ཡོན་མངོན་གྱུར་ནས༔ ཕ་རོལ་ཕྱིན་བཅུའི་ཡོན་ཏན་རབ་སྦྱངས་ནས༔ འགྲོ་བ་གང་ལ་གང་འདུལ་སྐུར་སྤྲུལ་པ༔ བདག་སོགས་མར་གྱུར་མཁའ་མཉམ་ཡིད་ཅན་འགྲོ༔ ཚོགས་བསགས་རྣམ་དཀར་ལས་འབྲས་འདིའི་མཐུ་ལ༔ བརྟེན་ནས་གཡུ་ལོ་བཀོད་དུ་གྲོལ་བར་ཤོག༔ བཀྲ་ཤིས་ནི༔ དུས་གསུམ་སངས་རྒྱས་ཀུན་གྱི་ཕྲིན་ལས་ལྷ༔ འགྲོ་དྲུག་སེམས་ཅན་ཐུགས་རྗེས་རབ་དགོངས་མཛད༔ འཇིགས་བརྒྱད་འཁོར་བའི་སྡུག་བསྔལ་མཐའ་དག་ལས༔ སྐྱོབ་མཛད་སྒྲོལ་མ་དཔའ་མོའི་བཀྲ་ཤིས་ཤོག༔ ས་མ་ཡཱ༔ ཚོགས་མཆོད་རྒྱ་མཚོའི་འཇུག་ངོགས་འདི༔ བསོད་ནམས་ཡོན་ཏན་བསམ་མི་ཁྱབ༔ ཡེ་ཤེས་ཡོན་ཏན་མངོན་དུ་གྱུར༔ སྐྱེ་སྲིད་སྐུ་བཞིའི་རྒྱལ་སྲིད་དབང༔ འགྲོ་དོན་བསྟན་པ་མཐའ་རྒྱས་ཤོག༔ ཅེས་པའི་ཚོགས་མཆོད་འདིའང་བཙུན་པ་ཀུན་བཟང་དང་ཀུན་དགའ་བརྩོན་འགྲུས་སོགས༔ རང་སློབ་འགའ་ཡིས་བསྐུལ་ངོར་སྤྲུལ་མིང་ས་ར་ཧི་ཏས་དག་སྣང་གི་ཆོས་སྡེ་ལས་དག་པར་ཕབ་པའོ༔