རྗེ་བཙུན་སྒྲོལ་མའི་བཞེངས་བསྐུལ།
རྗེ་བཙུན་སྒྲོལ་མའི་བཞེངས་བསྐུལ་ནི༔ ཧཱུྃ་ཧྲཱིཿ བཞེངས་ཤིག་བཞེངས་ཤིག་དབྱིངས་ནས་བཞེངས༔ དཀོན་མཆོག་གསུམ་དང་རྗེ་བཙུན་ཏཱ་རེ་མ༔ མི་མཐུན་གཡུལ་འཇོམས་འཇིགས་བརྒྱད་བྱད་མ་བཟློག༔ ཐུགས་དམ་རྒྱུད་བསྐུལ་བསྟོད་དོ་ཕྲིན་ལས་མཛོད༔ དེ་ནས་ཆད་མདོ་བསྒྲགས་པ་ནི༔ ཧཱུྃ་ཧྲཱིཿ སྔོན་ཚེ་འདུས་དུས་བསྐལ་པའི་ཐོག་མ་ལ༔ རང་བྱུང་ཡེ་ཤེས་ཀུན་བཟང་སྟོན་པ་ཡིས༔ རང་རིག་རང་རྩལ་འཁོར་ལ་ཆོས་བསྟན་ཚེ༔ རྣམ་རྟོག་རང་སར་གྲོལ་བའི་དྲེགས་ཚོགས་ལ༔ རྣམ་དག་བདུད་རྩིའི་གཏོར་མ་བསྔོས་ནས་ཀྱང༔ འཁྲུལ་བ་གཞི་ལ་དག་པའི་ཆད་དོན་བཞིན༔ རང་ཤེས་རང་སར་གྲོལ་བའི་ཕྲིན་ལས་མཛོད༔ དེ་འོག་བར་གྱི་བསྐལ་པ་ཕྱི་མ་ལ༔ བདེ་གཤེགས་རྔ་སྒྲའི་རྒྱལ་པོའི་སྲས་མོ་ནི༔ ཐུགས་བསྐྱེད་རྨད་བྱུང་ཡེ་ཤེས་ཟླ་བ་ཡིས༔ ཐུགས་བསྐྱེད་མཛད་ཚེ་ལྷ་ཀླུ་ཕྱོགས་སྐྱོང་དང༔ དཀར་ཕྱོགས་སྐྱོང་བའི་རྒྱལ་ཆེན་ལ་སོགས་ལ༔ ཕུད་སྐྱེམས་གསེར་སྐྱེམས་གཏོར་མས་རབ་བརྔན་ཏེ༔ བར་ཆད་རྐྱེན་སེལ་བསོད་ནམས་སྤེལ་བ་དང༔ འཕགས་མའི་མཚན་འཛིན་བསྲུང་ཞིང་སྐྱོང་བར་ཆད༔ ད་ལྟ་རྣལ་འབྱོར་བཀའ་ཡི་གཏོར་མ་ལོངས༔ མི་མཐུན་རྐྱེན་སོལ་མཐུན་པའི་ལོངས་སྤྱོད་སྤེལ༔ དེ་འོག་ཚེ་ལོ་བརྒྱ་པ་དོན་ཀུན་གྱི༔ གྲུབ་པ་ཤཱཀྱའི་རྒྱལ་པོའི་བསྟན་པ་ལ༔ སྒྲོལ་མ་མངོན་བྱུང་ལ་སོགས་རྒྱུད་སྒྲུབ་ཐབས༔ བྱང་སེམས་ཉན་ཐོས་རང་རྒྱལ་འཁོར་ཚོགས་ལ༔ འཛིན་སྤེལ་སྐྱོང་བའི་དུས་ལ་བབས་པའི་ཚེ༔ ཚངས་དབང་ལ་སོགས་དྲེགས་པ་ཆེ་དགུ་ཡིས༔ སྲོག་སྙིང་ཕུལ་ཞིང་བསྟན་པའི་གཉེར་ཁ་བླངས༔ རང་རང་ཡིད་མཐུན་མཆོད་པ་འདི་བཞིན་བཞེས༔ ཐ་ཚིག་གཉན་གྱི་གཏོར་མ་འདི་ལོངས་ལ༔ བསྟན་པའི་ཀ་དར་མཛད་པའི་ཕྲིན་ལས་མཛོད༔ ཐ་མ་བོད་ཡུལ་བསྟན་གཉིས་ཟུང་འཇུག་ལ༔ མཁན་སློབ་ཆོས་རྒྱལ་འཛོམས་པའི་ཆོས་འཁོར་དུས༔ སྒྲོལ་མ་ཉེར་གཅིག་བཀའ་ཉན་སྒོམ་སྒྲུབ་དུས༔ འཇིག་རྟེན་དྲེགས་པ་མ་གཟའ་དམ་གསུམ་དང་༔ མགུར་ལྷ་དགེ་བསྙེན་ལྷ་མོ་བསྟན་མ་དང་༔ ཀླུ་རྒྱལ་དགའ་བོ་འཇོག་པོ་དུང་སྐྱོང་སོགས༔ དཀར་ཕྱོགས་སྐྱོང་བའི་དྲེགས་པ་ཅན་རྣམས་ཀྱིས༔ སོ་སོས་གཟུགས་བསྟན་རང་རྟགས་སྙིང་པོ་ཕུལ༔ ཁས་བླངས་དམ་བཅའ་མཛད་པ་དེ་བཞིན་དུ༔ གཡར་དམ་ཅན་རྣམས་ཐ་ཚིག་གཏོར་མ་ལོངས༔ བསྟན་ལ་འཁུ་བའི་སྲོག་གི་དབང་པོ་སྣུབས༔ བསྟན་དང་བསྟན་འཛིན་བསྟན་པའི་སྦྱིན་བདག་སྲུངས༔ དུས་སྙིགས་ལྔ་བདོ་སུམ་ཅུ་ཁ་རལ་དུས༔ ཆུ་ཕོ་རྟོགས་ལྡན་སྐྱེ་མཐའི་རིག་པ་འཛིན༔ གཏེར་སྟོན་བསམ་གཏན་ཡེ་ཤེས་གླིང་པ་རྩལ༔ དག་སྣང་ཟབ་མོའི་གཏེར་ཁ་རྡོལ་བའི་ཚེ༔ གཏེར་གནས་སྒྲུབ་གནས་དཀར་ཆག་བརྡ་རུ་མངོན༔ འགྲོ་རྣམས་ཐར་པའི་ལམ་ལ་བཀོད་པའི་ཚེ༔ དྲང་སྲོང་ཆེན་པོ་སྨུག་ནག་འོད་འཕྲོ་དང༔ མ་ཅིག་ལྷ་མོ་ཡུལ་སྐྱོང་གཞི་བདག་གིས༔ རང་གཟུགས་དངོས་བསྟན་གཏེར་སྟོན་ཆོས་བདག་དང་༔ གཏེར་ཆོས་སྤེལ་བའི་སྐལ་ལྡན་སྐྱོང་ངོ་ཞེས༔ ཐ་ཚིག་མ་གཡེལ་བཀའ་ཡི་གཏོར་མ་ལོངས༔ བསྟན་པ་གཉན་ལ་སྡང་བའི་དགྲ་བགེགས་སྒྲོལ༔ ཁམས་གསུམ་སྲིད་གསུམ་ཕྱྭ་གཡང་བདེ་ལེགས་སྩོལ༔ ཕྱོགས་ལས་རྣམ་རྒྱལ་དཔལ་དང་དཔུང་གྲོགས་མཛོད༔ ཨ་ཡ་མ་དུ་རུ་ཙ་ཤ་ན་ས་མ་ཡཱ་བྷ་ལིང་ཏ་ཁཱ་ཧི༔ དེ་ནས་བསྟན་མ་སྐྱོང་བ་ནི༔ ཧཱུྃ་ཧྲཱིཿ ཆེ་ཞེ་ཆེན་མོ་ལ་སོགས་སྨན་མོ་བཞི༔ གངས་དཀར་ཤ་མེད་ལ་སོགས་བདུད་མོ་བཞི༔ ཀོང་བཙུན་དེ་མོ་ལ་སོགས་གནོད་སྦྱིན་བཞི༔ བསྟན་མ་བཅུ་གཉིས་བཤལ་ཆུ་གཏོར་མ་བཞེས༔ མུ་སྟེགས་ལོག་རྟོག་ལྟ་བ་རྨང་ནས་རློགས༔ བསྟན་དང་བསྟན་འཛིན་སྣོད་བཅུད་རྒུད་པ་སོལ༔ ནད་ཡམས་དམག་འཁྲུག་མུ་གེ་འགོང་པོ་ཐུལ༔ བདེ་སྐྱིད་འབྱོར་ལྡན་དཔལ་གྱིས་འབྱོར་བར་མཛོད༔ རྣལ་འབྱོར་ཚེ་ཆོས་སྲིད་ཀྱི་བར་ཆད་བཟློག༔ སྣང་བཞི་མཐར་ཕྱིན་ས་ལམ་ཉམས་རྟོགས་སྤོར༔ ཚེ་འདིར་རང་བྱུང་ཡེ་ཤེས་མངོན་གྱུར་མཛོད༔ མ་མ་ལ་ལ་ལེ་ལེ་ཏ་ཏ་ཏཾ་ཏཾ་ཨེ་དཾ་བྷ་ལིང་ཏ་ཁ་ཁ་ཁཱ་ཧི་ཁཱ་ཧི༔ ས་མ་ཡཱ༔ རང་བྱུང་དགོངས་ཀློང་ཡངས་པ་ནས༔ རྩལ་སྣང་ཡི་གེའི་བརྡ་རུ་མངོན༔ ཏཱ་རེ་ལྷ་མོའི་ཆོ་ག་ཡི༔ མ་ཚང་ཁ་སྐོང་ཚུལ་དུ་སྤེལ༔ སློབ་བུ་བདེ་དཔལ་ཞེས་བྱ་ལ༔ གཅེས་ནོར་པདྨའི་དངོས་གྲུབ་སྦྱིན༔ དངོས་གྲུབ་ཆེན་པོ་བགོ་སྐལ་ཡིན༔ ཤིན་ཏུ་གཅེས་པ་མིག་ལྟར་སྲུངས༔ ཉམས་པ་ལོག་རྟོག་ཅན་ལ་གསང༔ སྐལ་བ་ལྡན་པའི་སྤྱོད་ཡུལ་ཡིན༔ བཀའ་ཡི་སྲུང་མས་འཚོས་ཤིག་རྒྱ༔