མཚོ་རྒྱལ་གསོལ་འདེབས་བྱིན་རླབས་སྒོ་འབྱེད།
ཡང་གསང་མཁའ་འགྲོའི་ཐུགས་ཐིག་ལས༔ མཚོ་རྒྱལ་གསོལ་འདེབས་བྱིན་རླབས་སྒོ་འབྱེད་བཞུགས༔ ཨེ་མ་ཧོ༔ ཆོས་སྐུ་ཀུན་ཏུ་བཟང་མོ་དང༔ ལོངས་སྐུ་རྗེ་བཙུན་སྒྲོལ་མཛད་ཡུམ༔ སྤྲུལ་སྐུ་ཡེ་ཤེས་མཚོ་རྒྱལ་མ༔ རྣམ་གསུམ་དབྱེར་མེད་གཅིག་པ་རུ༔ ངེས་ཤེས་གཏིང་ནས་རྙེད་ལགས་ནས༔ ཐ་དད་མེད་པར་གསོལ་བ་འདེབས༔ འགལ་རྐྱེན་ཕྱི་ནང་བར་ཆད་བཟློག༔ མཐུན་རྐྱེན་ཚེ་བསོད་ལེགས་ཚོགས་སྤེལ༔ མོས་པ་རྣམ་བཞིས་འགྲོ་དབང་ཁུག༔ དགྲ་གདོན་ཐན་ལྟས་བརླག་པར་མཛོད༔ ཨོཾ་ཨཱཿཧཱུྃ་ཛྙཱ་ན་ཌཱཀྐི་སརྦ་སིདྡྷི་ཕ་ལ་ཧཱུྃ༔ ཞེས་པའི་མཚོ་རྒྱལ་གསོལ་འདེབས་འདིས༔ མཆོག་ཐུན་དངོས་གྲུབ་ཐོབ་པ་དང༔ བར་ཆད་ཚེ་འཕྲང་གེགས་ལས་སྒྲོལ༔ འཕོས་ཚེ་མཁའ་སྤྱོད་ས་ལ་རེག༔ པདྨས་དབུགས་དབྱུང་དབང་བསྐུར་འགྱུར༔ ས་མ་ཡཱ༔ ཞེས་པ་འདི་ཡང་ལས་ལྡན་གྲོགས་པོས་བསྐུལ་ངོར༔ བྷུ་སུ་ཀུ་པ་ཕན་མིང་ནས་བྲིས་པ་དགེའོ༔