སྒྲོལ་མ་གཙུག་ཏོར་རྒྱལ་མོའི་ལས་བྱང་ཚེ་ཡི་བུམ་བཅུད།
ཡང་གསང་ཌཱཀྐིའི་ཐུགས་ཐིག་ལས༔ སྒྲོལ་མ་གཙུག་ཏོར་རྒྱལ་མོ་ཡི༔ ལས་བྱང་ཚེ་ཡི་བུམ་བཅུད་བསྟན༔ རྒྱལ་ཡུམ་འཕགས་མ་ལ་བཏུད་དེ༔ ཚེ་ཡི་སྒྲུབ་པ་རྒྱུན་ཁྱེར་གྱི༔ རྣལ་འབྱོར་བླ་ཚེའི་ལྗོན་པ་གསོ༔ ལག་ལེན་གནད་ཀྱི་ལྡེའུ་མིག་ནི༔ དཀྱིལ་འཁོར་མདའ་གང་འབྲུ་ཚོམ་དགོད༔ ཚེ་བུམ་དབུས་ལ་ཚེ་གཏོར་མདུན༔ ཚེ་རིལ་གཡས་ལ་ཚེ་ཆང་གཡོན༔ ཚེ་མདའ་རྒྱབ་ལ་ཉེར་སྤྱོད་ཀྱིས༔ མཐའ་ནས་ལེགས་བསྐོར་བཅའ་གཤོམ་ཚད༔ རྣལ་འབྱོར་རླུང་སེམས་ལས་རུང་བས༔ འཇམ་རླུང་བཟུང་ཞིང་སྨོན་འཇུག་གི༔ སེམས་བསྐྱེད་བདེ་བའི་སྟན་ལ་འཁོད༔ དང་པོ་སྐྱབས་འགྲོ་སེམས་བསྐྱེད་དང༔ ཡན་ལག་བདུན་པ་སྤྱི་ལྟར་བྱ༔ དེ་ནས་བཀའ་བསྒོ་མཚམས་གཅོད་དང༔ བསྲུང་འཁོར་མཆོད་རྫས་བྱིན་རླབས་དང༔ བྱིན་འབེབས་ལ་སོགས་རིག་པས་འཕྲུལ༔ དེ་ཡིས་སྔོན་འགྲོ་ཆོས་རྣམས་རྫོགས༔ གཉིས་པ་དངོས་གཞི་ལྷ་བསྐྱེད་ནི༔ ཨོཾ་མ་ཧཱ་ཤཱུ་ནྱ་ཏ་སོགས། ཧཾ༔ དང་པོ་དེ་བཞིན་སྤྲོས་བྲལ་ངང༔ མ་རྟོགས་འགྲོ་ལ་སྙིང་རྗེའི་རྩལ༔ ཟུང་འཇུག་རྒྱུ་ཡི་ཡི་གེ་ཏཱཾ༔ གསལ་འཚེར་འོད་ལྔའི་རང་མདངས་འབར༔ སྤྲོ་བསྡུ་དོན་གཉིས་བྱས་པ་ལས༔ ཡོངས་གྱུར་པད་ཉི་ཟླ་བའི་སྟེང༔ སྒྲོལ་མ་གཙུག་ཏོར་རྒྱལ་མོ་ནི༔ དཀར་གསལ་བཞད་མདངས་མུ་ལེར་གསལ༔ ཞབས་གཉིས་རྟ་བབ་སྐྱིལ་མོ་ཀྲུང༔ ཕྱག་གཡས་མཆོག་སྦྱིན་མདའ་དར་བསྣམས༔ ཕྱག་གཡོན་དཀོན་མཆོག་གསུམ་མཚོན་རྒྱས༔ ཨུཏྤལ་ལ་གནས་ཚེ་བུམ་འཛིན༔ དར་གྱི་སྟོད་གཡོག་སྨད་ཤམ་དཀྲིས༔ དར་དཔྱངས་ཅོད་པཎ་རཏྣས་སྤུད༔ རིགས་བདག་བཅོམ་ལྡན་ཚེ་དཔག་མེད༔ ཚེ་ལྷ་རྒྱལ་བ་རབ་འབྱམས་ཀྱིས༔ ཆར་སྤྲིན་གཏིབ་བཞིན་བསྐོར་བར་དམིགས༔ གནས་གསུམ་འབྲུ་གསུམ་ཐུགས་སྲོག་ལས༔ འོད་འཕྲོས་བདེ་ལྡན་རྔ་ཡབ་གླིང༔ གཡུ་ལོ་བཀོད་པའི་ཞིང་ཁམས་ནས༔ ཚེ་འཛིན་ཏཱ་རེའི་ལྷ་ཚོགས་རྣམས༔ སྤྱན་དྲངས་བསྐྱེད་པའི་སྐུ་ལ་བསྟིམ༔ ཨརྱ་ཏཱ་རེ་བཛྲ་ས་མ་ཡཱ་ཛ༔ ཛཿཧཱུྃ་བཾ་ཧོ༔ ཏིཥྛ་ལྷན༔ ན་མ་ཡ་ཏི༔ ཤ་མ་ཤ་ན་ས་པཱ་རི་ཝ་ར་ཨརྒྷཾ་སོགས་པྲ་ཏིཥྩ་ཨ་ཧཱུྃ༔ མ་ཧཱ་པཉྩ་རཀྟ་བྷ་ལིང་ཏ་ཁཱ་ཧི༔ ཕྱག་འཚལ་དེ་བཞིན་གཤེགས་པའི་གཙུག་ཏོར་སོགས། ཤོ་ལོ་ཀ་བརྗོད་མཐར་འཛབ་ནི༔ བདག་མདུན་བུམ་པའི་ལྷ་ཚོགས་ཀྱི༔ ཐུགས་ཀར་པད་ཟླ་ཉི་མའི་སྟེང༔ ཚེ་ཡི་སྙིང་པོ་ཧྲཱིཿཏཱཾ་དམར༔ དེ་ལས་འོད་འཕྲོས་ཕྱོགས་བཅུའི་ཞིང༔ རྒྱལ་བ་རབ་འབྱམས་ཐུགས་རྒྱུད་བསྐུལ༔ ཚེ་བཅུད་འབྲུ་གསུམ་རྣམ་པར་བསྡུས༔ ཕྱི་སྣོད་འབྱུང་ལྔའི་དྭངས་མ་དང༔ ནང་བཅུད་སྐྱེ་འགྲོའི་ཚེ་བསོད་དཔལ༔ ཨ་ནྲྀ་ཧཱུྃ་གསུམ་རྣམ་པར་བསྡུས༔ བདག་མདུན་བུམ་པའི་ལྷ་ལ་བསྟིམ༔ འཆི་མེད་རྡོ་རྗེའི་སྲོག་འགྲུབ་བསམ༔ ཨོཾ་ཏཱ་རེ་ཏུཏྟ་རེ་ཏུ་རེ་ཨ་ཡུརྡ་ཏེ་བྷྲཱུྃ་སྭཱ་ཧཱ༔ མཐར་ནི་ཚེ་ཡི་གཟུངས་སྔགས་འདོན༔ ཡིད་ཆེས་ངེས་ཤེས་འདྲོང་བ་དང༔ བསྙེན་པ་ཚད་དུ་ལོང་བ་ན༔ དུས་མིན་འཆི་བ་བརྒྱད་མི་འབྱུང༔ ཕྱི་མར་བདེ་ཆེན་རྔ་སྒྲའི་ཞིང༔ འོད་དཔག་མེད་མགོན་མཐོང་བར་འགྱུར༔ ས་མ་ཡཱ༔ གསུམ་པ་ཚོགས་བསགས་བསྡུ་རིམ་དང༔ བསྔོ་སྨོན་ཤིས་བརྗོད་རིམ་པ་རྣམས༔ ལུང་རིག་གླིང་པའི་ཚོགས་སྤྱི་འགྲོས༔ དེ་བཞིན་བརྗོད་པ་ཨེ་མ་ཧོ༔