སྒྲོལ་མ་གཙུག་ཏོར་ལྷ་མོའི་ཚེ་འགུགས་གཡང་ཞགས་འཁྱིལ་བ།
ཡང་གསང་ཌཱཀྐིའི་ཐུགས་ཐིག་ལས༔ སྒྲོལ་མ་གཙུག་ཏོར་ལྷ་མོའི་ཚེ་འགུགས་གཡང་ཞགས་འཁྱིལ་བ་བཞུགས༔ ཏཱ་རེ་མ་ལ་ཕྱག་འཚལ་ལོ༔ ཚེ་ཡི་དངོས་གྲུབ་ཞུ་འདོད་པས༔ སྣ་ལྔའི་མདའ་དར་ཕྱོགས་བཅུར་གཡབ༔ དད་བརྩོན་ལྡན་པས་འདི་བཞིན་བརྗོད༔ ཨེ་མ་ཧོ༔ དུས་གསུམ་རྒྱལ་བ་ཀུན་གྱི་ཡུམ་གྱུར་མཆོག༔ སྒྲོལ་མ་དཔའ་མོ་དུང་ལྟར་དཀར་བའི་མདངས༔ འགྲོ་རྣམས་འཁོར་བའི་མཚོ་ལས་རབ་སྒྲོལ་མ༔ ཚེ་དཔག་མེད་པའི་ངོ་བོར་རྟག་བཞུགས་མཛད༔ བདག་གཞན་ལུས་ངག་ཡིད་གསུམ་བྱིན་རློབས་ལ༔ འཆི་མེད་ཚེ་ཡི་དངོས་གྲུབ་སྩལ་དུ་གསོལ༔ ཨོཾ་ཏཱཾཿ དབུས་ཕྱོགས་མི་འགྱུར་གཡུ་ལོ་བཀོད་པའི་ཞིང༔ རྗེ་བཙུན་བཅོམ་ལྡན་འདས་མ་ཚེ་ཡི་བདག༔ རྣམ་ཤེས་ཁམས་ནས་ཡར་བའི་བླ་དང་ཚེ༔ སྟེང་ཕྱོགས་ཚངས་པ་གཟའ་སྐར་ལག་ནས་ཁུག༔ ཚེ་ཡི་བཅུད་བསྡུས་འབྱུང་བའི་གསོས་སུ་སྩོལ༔ འཆི་མེད་རིག་འཛིན་འགྲུབ་པར་མཛད་དུ་གསོལ༔ ཨོཾ་ཨཱརྱ་ཏཱ་རེ་ཏུཏྟཱ་རེ་ཏུ་རེ་མ་མ་ཨ་ཡུར་དྷ་ཏེ་བྷྲཱུྃ་སྭཱ་ཧཱཿ ཧཱུྃ་ཏཱཾཿ ཤར་ཕྱོགས་དཀར་མོ་ཤེལ་གྱི་ཁང་བཟང་ནས༔ རྡོ་རྗེ་བཅོམ་ལྡན་འདས་མ་ཚེ་ཡི་བདག༔ ཤ་ཡི་ཁམས་ནས་ཡར་བའི་བླ་དང་ཚེ༔ ཤར་ཕྱོགས་དྲི་ཟ་རྒྱལ་བསེན་ལག་ནས་ཁུག༔ ཚེ་ཡི་བཅུད་བསྡུས་འབྱུང་བའི་གསོས་སུ་སྩོལ༔ འཆི་མེད་རིག་འཛིན་འགྲུབ་པར་མཛད་དུ་གསོལ༔ ཨོཾ་ཨཱརྱ་ཏཱ་རེ་ཏུཏྟཱ་རེ་ཏུ་རེ་མ་མ་ཨ་ཡུར་དྷ་ཏེ་བྷྲཱུྃ་སྭཱ་ཧཱ༔ ཏྲཾ་ཏཱཾ༔ ལྷོ་ཕྱོགས་བཻཌཱུརྱ་ཡི་རི་བོ་ནས༔ རིན་ཆེན་བཅོམ་ལྡན་འདས་མ་ཚེ་ཡི་བདག༔ ཁྲག་གི་ཁམས་ནས་ཡར་བའི་བླ་དང་ཚེ༔ ལྷོ་ཕྱོགས་གཤིན་རྗེ་དམ་འགོང་ལག་ནས་ཁུག༔ ཚེ་ཡི་བཅུད་བསྡུས་འབྱུང་བའི་གསོས་སུ་སྩོལ༔ འཆི་མེད་རིག་འཛིན་འགྲུབ་པར་མཛད་དུ་གསོལ༔ ཨོཾ་ཨཱརྱ་ཏཱ་རེ་ཏུཏྟཱ་རེ་མ་མ་ཨ་ཡུར་དྷ་ཏེ་བྷྲཱུྃ་སྭཱ་ཧཱ༔ ཧྲཱིཿཏཱཾཿ ནུབ་ཕྱོགས་བསེ་ཡི་ཕོ་བྲང་གཞལ་ཡས་ནས༔ པདྨ་བཅོམ་ལྡན་འདས་མ་ཚེ་ཡི་བདག༔ དྲོད་ཀྱི་ཁམས་ནས་ཡར་བའི་བླ་དང་ཚེ༔ ནུབ་ཕྱོགས་ཀླུ་དབང་ས་བདག་ལག་ནས་ཁུག༔ ཚེ་ཡི་བཅུད་བསྡུས་འབྱུང་བའི་གསོས་སུ་སྩོལ༔ འཆི་མེད་རིག་འཛིན་འགྲུབ་པར་མཛད་དུ་གསོལ༔ ཨོཾ་ཨཱརྱ་ཏཱ་རེ་ཏུཏྟཱ་ཏེ་ཏུ་རེ་མ་མ་ཨ་ཡུར་དྷ་ཏེ་བྷྲཱུྃ་སྭཱ་ཧཱ༔ ཨཱཿཏཱཾ༔ བྱང་ཕྱོགས་ཨིནྡྲ་ནི་ལའི་བསྟི་སྟེང་ནས༔ ལས་རབ་བཅོམ་ལྡན་འདས་མ་ཚེ་ཡི་བདག༔ དབུགས་ཀྱི་ཁམས་ནས་ཉམས་པའི་བླ་དང་ཚེ༔ བྱང་ཕྱོགས་གནོད་སྦྱིན་གྲུལ་བུམ་ལག་ནས་ཁུག༔ ཚེ་ཡི་བཅུད་བསྡུས་འབྱུང་བའི་གསོས་སུ་སྩོལ༔ འཆི་མེད་རིག་འཛིན་འགྲུབ་པར་མཛད་དུ་གསོལ༔ ཨོཾ་ཨཱརྱ་ཏཱ་རེ་ཏུཏྟཱ་རེ་མ་མ་ཨ་ཡུར་དྷ་ཏེ་བྷྲཱུྃ་སྭཱ་ཧཱ༔ ཧོ༔ འབྱུང་ལྔའི་དབྱིངས་སུ་འཁྱམས་པའི་བླ་དང་ཚེ༔ ཡུམ་ལྔའི་ཀློང་དུ་བསྐྱེད་བསྟིམ་རྒྱས་བཏབ་པས༔ སྐུ་ལྔ་ཡེ་ཤེས་ལྔ་ལ་སྐྱེ་འཆི་མེད༔ རིགས་ལྔ་རྒྱལ་བའི་ཀློང་དུ་ཚེ་སྦ་འོ༔ ཨོཾ་ཧཱུྃ་ཏྲཱཾ་ཧྲཱིཿཨཱ་དྷརྨཱ་དྷརྟུ་བཛྲ་རཀྵ་རཀྵ་ཀུ་རུ་བྷྲཱུཾ༔ ཚེ་འགུགས་གཡང་ཞགས་འཁྱིལ་བ་འདི༔ རྒྱ་གར་མཁས་པ་པད་འབྱུང་གིས༔ སྙིགས་མའི་སེམས་ཅན་ཉམ་ཐག་པར༔ ཚེ་ལ་གནོད་པའི་འཕྲལ་རྐྱེན་མང༔ དེ་བཟློག་ཕྱིར་དུ་འདི་བཀོད་དགེ༔ ཐེ་ཚོམ་མེད་པའི་གང་ཟག་གིས༔ བརྒྱ་སྟོང་གྲངས་སུ་འཁྱོལ་བ་དང༔ ཚེ་མདོ་རྒྱབ་ཆོས་ཚུལ་དུ་གདགས༔ ཚེ་ཟད་པ་ཡང་ལོ་གསུམ་བཤོལ༔ ས་མ་ཡཱ༔ ཞེས་པའང་ཆོས་ལ་དབང་བའི་སློབ་བུ་འགའ་དང་ཀར་སྟོད་སློབ་བུ་དད་དང་བརྩོན་འགྲུས་ལྡན་པ་པུཎྱེས་བསྐུལ་ངོར་གཏེར་གྱི་མིང་འཛིན་ལུང་རིག་བླ་མ་དགྱེས་པའི་འབངས་ཧོར་བན་གཞན་ཕན་བཟང་པོས་གང་ཤར་རི་མོའི་ལམ་དུ་བགྱིས་པ་དགེ་ལེགས་འཕེལ༔