འོད་ཟེར་ཅན་མའི་སྒོམ་བཟླས།
འོད་ཟེར་ཅན་མའི་སྒོམ་བཟླས་བཞུགས༔ དག་སྣང་ལས༔ ཨ༔ སྐད་ཅིག་སྟོང་གསལ་ངང་ཉིད་ལས༔ རང་ཉིད་འཕགས་མ་མདུན་གྱི་ནམ་མཁར་མཱ་རི་ཙྱཻ༔ ཞལ་གཅིག་གསེར་མདོག་ཁྲོ་འཛུམ་འབར༔ སྤྱན་ཟུང་ཉི་ཟླའི་འོད་མདངས་ཀྱིས༔ དགྲ་གདོན་ཅེ་རེ་ལོང་བར་བྱེད༔ ཕྱག་གཉིས་ཁབ་དང་སྐུད་པ་ཡིས༔ དགྲ་གདོན་ཁ་མིག་བཙེམས་པར་བྱེད༔ ཞབས་གཉིས་གར་སྟབས་བདུད་དགྲ་འདུལ༔ ཁྲོ་ཆས་རུས་རྒྱན་དར་དཔྱངས་དང༔ རིན་པོ་ཆེ་ཡི་པྲོག་ཞུ་ངོམ༔ ཕྱི་རོལ་ཕག་རྒོད་སུམ་རིམ་བསྐོར༔ ཉི་ཟླའི་ག་འུ་རིམ་དགུའི་ནང༔ བདག་དང་བསྲུང་བྱ་ཚུད་པར་དམིགས༔ གནོད་བྱེད་བསྐྲད་རྨོངས་དབྱེ་བསད་པའི༔ ཏིང་ངེ་འཛིན་ལ་དཔའ་མོའི་གདེངས༔ གང་དང་ལྡན་པས་འཛབ་འདི་བཟླ༔ ཨོཾ་མཱ་རི་ཙྱཻ་སྭཱ་ཧཱ༔ གནོད་བྱེད་དགྲ་ཇག་ཆོམ་རྐུན་བསམ་ངན་སྦྱོར་རྩུབ་ངན་པའི་ཡུལ་འདྲེ་འབྱུང་པོ་གཅན་གཟན་ལ་སོགས་པའི་ཙཀྵུ་མུ་ཁཾ་བྷནྡྷ་བྷནྡྷ་ཧུ་ལུ་ཧུ་ལུ་ཧཱུྃ་ཕཊ༔ གནོད་བྱེད་སརྦ་དུཀྵཾ་མཱ་ར་ཡ་ཧཱུྃ་ཕཊ༔ ཅི་འགྲུབ་བཏོན་རྗེས་མཁྱེན་བརྩེའི་ལྷའི༔ འོད་ཟེར་ཅན་གྱི་བཟློག་གྲངས་བགྲང༔ གསར་རྙིང་གདམས་པའི་འོད་ཟེར་ཅན༔ བཅུད་ལས་བཅུད་ཕྱུང་ཉམས་ལ་བསྟར༔ འགྲོ་ལ་ཕན་ཕྱིར་འདི་རུ་སྤེལ༔ རྗེས་ལ་དགེ་བསྔོ་ཤིས་པ་བརྗོད༔ དམིགས་མེད་དངོས་པོའི་གཤིས་ལ་ཀློད༔ དགོངས་ཀློང་ཡངས་པའི་གསང་མཛོད་ནས༔ རྣལ་འབྱོར་དག་པའི་བརྡ་རིས་བཀྲོལ༔ སྐལ་བ་ལྡན་ལ་གཏད་རྒྱ་ཐོབ༔ ལོག་སྲེད་སྒྲོ་སྐུར་མཁན་ལ་སྦོས༔ བསྟན་དང་འགྲོ་ལ་སྨན་པར་ཤོག༔ མངྒ་ལམ༔ ཤུ་བྷཾ༔ རང་སློབ་སྐལ་བ་ལྡན་པའི་བུ༔ གསལ་སྟོང་འདུ་འབྲལ་མེད་པ་ལ༔ ཟོག་པོ་ས་ར་ཧི་ཏས་སྤེལ༔ དུས་གསུམ་དགྲ་གདོན་ཕམ་པར་ཤོག༔