འོད་ཟེར་ཅན་མའི་མན་ངག
ཡང་གསང་མཁའ་འགྲོའི་ཐུགས་ཐིག་ལས༔ འོད་ཟེར་ཅན་མའི་མན་ངག་ནི༔ རང་ཉིད་སྐད་ཅིག་དྲན་རྫོགས་སུ༔ རྒྱལ་ཡུམ་ཁྲོ་མོ་འོད་ཟེར་ཅན༔ འཇིགས་བྱེད་དུས་དགྲའི་སྦྱོར་ཡུམ་ནི༔ སེར་ནག་རབ་གཏུམ་རྔམ་པའི་སྐུ༔ པད་ཟླ་ཉི་སྟེང་བཾ་གྱི་ཁར༔ ཞབས་གཉིས་འགྱིང་སྟབས་ཁྲོ་མོའི་ཆས༔ ཕྱག་གཉིས་ཉི་ཟླ་ཆ་ལང་རྡེབ༔ བསྟན་ལ་འཁུ་དང་འགྲོ་ལ་འཚེ༔ མི་མིན་ལོག་སྦྱོར་གྲོས་ངན་ཤོམ༔ དགྲ་རྐུན་ཇག་པའི་ཀླད་ཡུ་འཁོར༔ ཁ་རྗེ་བསོད་ནམས་བླ་ཚེ་སྲོག༔ སྒོ་ང་བྲག་ལ་བཅར་བ་བཞིན༔ ཐལ་མོ་བརྡབ་པས་བསད་ཅིང་རྨུགས༔ རང་ཉིད་ཐུགས་སྲོག་མཱུཾ་ཡིག་ལས༔ མུན་པ་ནག་པོའི་འཚུབ་མ་གཡོས༔ དགྲ་གདོན་བྱད་མ་འཐུམ་ཞིང་བརྒྱལ༔ དྲན་པའི་སྣང་བ་རྡོལ་བར་བསམ༔ རྩ་སྔགས་ཤམ་དུ་འདི་བཏགས་བསྙེན༔ མ་རཱི་ཙྱཻ་ཡ་མནྟ་ཀ་སུརྱ་ཙནྡྲ་རཀྵ་རཀྵ་ཧཾ༔ མ་མ་དཱ་ན་པ་ཏི་ཙཀྲ་རཀྵ་སྲུངས་ཤིག༔ དགྲ་སྡེའི་ཙཀྵུ་མུ་ཁཾ་བྷནྡྷ་བྷནྡྷ་རྨུག་རྨུག་ཕཊ་ཕཊཿཨུ་ཙ་ཏ་གརྫ་གརྫ་ཐུམ་ཐུམ་ཧཱུྃ་ཕཊ༔ ཅེས་པ་འདི་ནི་ཟབ་པའི་ཡང་ཞུན་འདྲ༔ ཡིད་ཆེས་ནུས་པ་རྙེད་པའི་བུས༔ དམིགས་འདོན་ཡ་མ་བྲལ་བ་ན༔ ས་བདག་རྒྱལ་པོ་དགྲར་ལངས་ཀྱང༔ འདི་ལྡན་རྨུག་ཅིང་རིང་བར་འགྱུར༔ འདི་ལྡན་རྡོ་རྗེའི་རྫོང་དང་འདྲ༔ ས་མ་ཡཱ༔ དགྲ་རྐུན་ཇག་ཆོམ་བསྲུང་བ་ལ༔ དར་ནི་དཀར་སེར་དམར་དང་ལྗང་༔ ལོགས་ལ༔ ཨོཾ་བཛྲ་མ་རཱི་ཙྱཻ་མཱུཾ་སྭཱ་ཧཱ༔ བ་ད་ལི་བ་ད་ལི་གནོད་བྱེད་དགྲ་རྐུན་ཇག་གསུམ་གྱི་ཙཀྵུ་མུ་ཁཾ་བནྡྷ་བནྡྷ་མཱ་ར་ཡ་ཕཊ༔ ཨུ་ཙ་ཏ་ཡ་ད་ཧ་ད་ཧ་ཕཊ་ཕཊ༔ ཨོཾ་རཏྣ་མ་རཱི་ཙྱཻ་སོགས༔ གོང་བཞིན་པདྨ་ཀརྨ་དང༔ བུདྡྷ་མ་རཱི་རང་མདོག་གི༔ དར་ལ་འདྲི་ཞིང་ཕྱོགས་མདོག་བརྒྱན༔ རྡོ་རྗེ་འཁོར་ལོ་པདྨ་དང༔ རྒྱ་གྲམ་ནོར་བུ་དག་གི་ཤིང༔ ཡུ་བ་ཅན་ལ་གདེངས་ཤིང་འཕྱར༔ མདུན་མཁར་འཕགས་མ་འཁོར་བཅས་བསྒོམ༔ ཕྱག་གཉིས་ཉི་ཟླའི་གའུའི་ནང་༔ རང་དང་བསྲུང་བྱ་ཚུད་པར་བསམ༔ བལྟར་མེད་གཞུར་མེད་བཅིང་དུ་མེད༔ ཕྱི་རོལ་ལྷ་མོས་ཕག་རྒོད་ཞོན༔ གྲངས་མེད་ར་བས་བསྐོར་བར་དམིགས༔ ཀུན་གྱི་ཞལ་ནས་བ་ད་ལི༔ ཙཀྵུ་མུ་ཁཾ་ཧཱུྃ་ཕཊ་བརྗོད༔ ཕྱག་གཉིས་ཁབ་དང་སྐུད་པ་ཡིས༔ གནོད་བྱེད་ཁ་མིག་བཙེམ་པར་བསམ༔ ལྷ་མོ་ཡིད་ལ་བསྒོམ་བྱས་ནས༔ ཕྱག་དང་བཅས་ཏེ་འོད་ཟེར་ཅན༔ བདག་ཅག་དགྲ་རྐུན་འཇིགས་ལས་བསྲུང་༔ སྒྲ་དང་བཅས་ཏེ་ལན་བདུན་བརྗོད༔ དེ་ནས་གསང་སྔགས་གླིང་པ་ཡི༔ ཇག་སྲུང་ཟབ་མོས་རྣོ་སོ་གདགས༔ དེས་ནི་སྔོན་ལས་མ་གཏོགས་པ༔ འཕྲལ་རྐྱེན་བཟློག་པར་ཐེ་མི་ཚོམ༔ ས་མ་ཡཱ༔ ལམ་འཕྲང་དགྲ་རྐུན་བཟློག་པའི་ཐབས༔ རང་ཉིད་འགྲོ་བའི་དུས་ཀྱི་ཚེ༔ གནས་ཁང་སྒོ་ནས་གོམ་བདུན་མཐར༔ རྡོ་བ་འཇམ་ངོས་དགྲ་ནྲྀ་བྲིས༔ ཕྱོགས་མཚམས་ཛ་ཁྲམ་བྷྱོ་ཡིས་གཏམས༔ ཡུལ་ལྷ་དྲེགས་པ་སྐྱེམས་ཀྱིས་བརྔན༔ རང་ཉིད་ཁྲོ་མོ་མ་རི་ཙྱཻའི༔ སྙེམས་པས་ལམ་དགྲ་བགེགས་ཀྱི་ཚོགས༔ ནྲི་ཏྲིའི་རྣམ་པར་སྦུར་མ་ནི༔ རླུང་གིས་དེད་པ་ཇི་བཞིན་དུ༔ འགུགས་པ་དང་བཅས་རྫས་ལ་བསྟིམ༔ དེ་ནས་འགུགས་སྔགས་སྤྱི་མཐུན་དང་༔ གནད་ཡིག་ཟབ་མོ་འདི་ཡང་བཟླ༔ ཨོཾ་ཨཱརྱ་མ་རི་ཙྱཻ་ཡ་མནྟ་ཀ་གནོད་བྱེད་དགྲ་རྐུན་ཇག་པའི་བླ་ཤ་རེ་མ་ཏི་འགྲིམ་འགྲིམ་ཤ་མ་རུ་ཏི་ཁུག་ཁུག་ལིང་མྱོགས་ལིང་ཤག་ཛཿཐུམ་མཱ་ར་ཡ་རྦད་རྦད་ནན་ཁུག་ཛ༔ ཨཾ་ཀུ་ཤ་ཡ་ཛཿཛ༔ ཅེས་པ་བརྒྱ་སྟོང་སྐབས་དང་བསྟུན༔ དེ་ནས་དོང་བྲུས་འོག་ཏུ་མནན༔ རང་ཉིད་དཔའ་མོའི་ཞབས་གཡོན་འོག༔ ལྕགས་ཁང་མེ་འབར་སྒོ་མེད་ནང༔ གདུག་ཅན་དམ་ཉམས་ཚུད་པར་བསམ༔ དམིགས་པ་ཟབ་མོ་ཡང་ཡང་གསལ༔ དེ་ནས་ཡེ་དྷར་མཇུག་ནས་འདོན༔ རབ་ཏུ་གནས་ཤིང་རྒྱས་གདབ་བྱ༔ མ་ཧཱ་བ་ལའི་བྲོ་མནན་བརྡུང༔ དེས་ནི་ལམ་དགྲའི་འཇིགས་མི་འབྱུང༔ དགྲ་ཇག་ལོག་པའི་ལམ་དུ་འགྲོ༔ དམིགས་པའི་དགྲ་ལ་འདི་སྒྲུབ་ན༔ དེ་ནས་དུས་ཀུན་རྨུགས་ཤིང་འཐུམ༔ ཇག་རྐུན་འགོ་བའི་ལྷ་ཡང་དོར༔ ཡོངས་ལ་ཕན་པའི་གདམས་པ་འདི༔ ཨོ་རྒྱན་ཐུགས་ལ་བརྣགས་པའི་ཆོས༔ དམ་པ་མ་ཅིག་སྙན་ནས་བརྒྱུད༔ བདག་གི་དགོངས་པའི་ཀློང་ནས་རྡོལ༔ གུ་ཧྱ༔ བརྡ་ཐིམ༔ ལོག་པའི་ལམ་ལ་གསང་བར་བྱོས༔ རྣམ་དཀར་ལས་འཕྲོ་ཅན་ལ་གཏོད༔ ཟབ་རྒྱ༔ སྦས་རྒྱ༔ གཏད་རྒྱ༔ གཏེར་རྒྱ༔ ས་མ་ཡཱ༔ འོད་ཟེར་ཅན་མའི་ཆ་ལག་ཏུ་ཕབ་པ་འདི་ཡང༔ བཙུན་པ་མཁས་དབང་ཀརྨ་ཛྙཱ་ནས་བསྐུལ་ངོར༔ ཏཱ་རེ་གནས་ཀྱི་བདག་པོ་སྤྲང་མ་ནུས་ཧད་པོ་ཕན་པའི་མིང་གིས་ཐོལ་བྱུང་ཐོགས་མེད་ཧོར་ཟླ་དགུ་པའི་ཚེས་༡༠ལ་སུག་བྲིས་བགྱིས་པ་དགེའོ༔ དགེའོ༔ དགེའོ༔