རིག་བྱེད་ལྷ་མོའི་གསོལ་འདེབས་སྦུར་ལེན་སྙིང་པོ།
དག་སྣང་ལས༔ རིག་བྱེད་ལྷ་མོའི་གསོལ་འདེབས་སྦུར་ལེན་སྙིང་པོ་བི་ཛ་ཧ་རཾ༔ ཨེ་མ་ཧོ༔ རྒྱལ་ཀུན་སྤྱི་གཟུགས་སྟོན་པ་ཚེ་མཐའ་ཡས༔ འཕགས་མཆོག་སྙིང་རྗེའི་མངའ་བདག་སྤྱན་རས་གཟིགས༔ རིག་སྔགས་མཐུ་གྲུབ་པདྨ་ཐོད་ཕྲེང་རྩལ༔ གསོལ་བ་འདེབས་སོ་བདག་གིས་གདུལ་བྱའི་ཁམས༔ དབང་དུ་བསྡུས་ཤིང་གནོན་པར་བྱིན་གྱིས་རློབས༔ འཛམ་གླིང་མཛེས་རྒྱན་ནཱ་གཱརྫུ་ན་དང༔ དབྱངས་ཅན་རྣམ་རོལ་ཛྙཱ་ན་ས་ག་ར༔ པདྨའི་ཐུགས་ཟིན་ཨ་ཙར་ཤྲཱི་བྷ་ཏྲ༔ གསོལ་བ་འདེབས་སོ་ཚོགས་དྲུག་སྣང་བའི་ཡུལ༔ བདེན་མེད་འུབས་སུ་ཆུབ་པར་བྱིན་གྱིས་རློབས༔ ཟབ་གཏེར་ཆོས་ཀྱི་བཅུད་མྱང་གཞན་ལ་ཕན༔ ཟབ་དོན་ལོངས་སྤྱོད་བརྒྱུད་འཛིན་ཆོས་ཀྱི་བདག༔ ཟབ་རྒྱས་འགྲོ་ལ་ཆོས་ཆར་འབེབས་པའི་མགོན༔ གསོལ་བ་འདེབས་སོ་སྐྱེ་རྒུའི་དཔལ་ཡོན་རྣམས༔ འབད་མེད་ལག་རྩེར་སྩོལ་བར་བྱིན་གྱིས་རློབས༔ སོར་རྟོག་ཡེ་ཤེས་རང་གདངས་རིག་བྱེད་མ༔ སྣང་སྲིད་ཐབས་ཀྱིས་ཟིལ་གནོན་ཧྱ་གྷྲི༔ བཀའ་སྡོད་ལྷ་ཆེན་ཡབ་ཡུམ་ཕྲིན་ལས་བཞིར༔ གསོལ་བ་འདེབས་སོ་རྗེ་འབངས་མཛའ་ན་མོ༔ མོས་བཞི་དབང་དུ་འདུ་བར་བྱིན་གྱིས་རློབས༔ དེ་ལྟར་གསོལ་བཏབ་ནུས་པས་ཕུང་པོའི་ཁམས༔ སྣང་སྟོང་ལྷ་སྐུ་ལས་རླུང་སྔགས་སུ་དག༔ ཀུན་རྟོག་ཆོས་སྐུར་སྨིན་ཅིང་གྲོལ་ནས་ཀྱང༔ སྐུ་བཞིའི་རྒྱལ་ཐབས་ཚེ་འདིར་མངོན་གྱུར་ཤོག༔ ཅེས་པ་འདིའང་ཨོ་རྒྱན་པདྨའི་ལུང་གིས་བསྔགས་པའི་མཁས་མཆོག་བློ་གྲོས་ལྡན་པ་ཀརྨ་ཆོས་སྐྱོང་གི་ཞལ་འདོན་མཛད་པའི་ཆ་རྐྱེན་དུ༔ དད་གསུམ་ལྡན་པའི་སློབ་དཔོན་ལུང་རྟོགས་བསྟན་འཛིན་གྱིས་བསྐུལ་ངོར༔ ཆོས་མེད་ཆོས་པའི་གཟུགས་སྟོན་གཞན་ཕན་བཟང་པོས་འཁྲུལ་མེད་སྤྲུལ་པའི་སྐུའི་གསུང་ཆོས་བཀླག་ལུང་སྐབས་གང་དྲན་ཐོགས་མེད་དུ་བྲིས་པའི་སྨྱུག་འཛིན་མཁན་པོ་དགེ་བཤེས་ལྷ་འཕན་གྱིས་བགྱིས་པ་དགེ་ལེགས་འཕེལ༔