ཀུ་རུ་ཀུལླེའི་སྒྲུབ་པ་འགྲོ་ཀུན་ཡིད་འགུགས་འཆིང་བྱེད་ཞགས་པ།
ཡང་གསང་མཁའ་འགྲོའི་སྙིང་ཐིག་ལས༔ ཀུ་རུ་ཀུལླེའི་སྒྲུབ་པ་འགྲོ་ཀུན་ཡིད་འགུགས་འཆིང་བྱེད་ཞགས་པ་ཞེས་བྱ་བ༔
འཕགས་མ་ཀུ་རུ་ཀུལླེ་ཡི༔ སྒྲུབ་ཐབས་འགྲོ་བའི་ཡིད་འགུགས་འདི༔ སྤྲོས་མེད་གང་ཟག་ཉམས་ལེན་ཡིན༔ དཀྱིལ་འཁོར་མེད་ཅིང་སྒྲུབ་རྫས་མེད༔ ལུས་དཀྱིལ་ཁོ་ནས་ཆོག་པ་སྟེ༔ གསང་བ་སྔགས་ཀྱི་ཁྱད་ཆོས་ཡིན༔ བྱིན་རླབས་གཞན་ལས་འགྲན་བྲལ་བ༔ གསང་ཞིང་ཉམས་སུ་སུས་བླང་ཡང༔ འདོད་པའི་བསམ་པ་ཡིད་བཞིན་སྐོང་༔ ཐེ་ཚོམ་མེད་ན་ལྷག་པར་ནི༔ བསམ་དོན་འགྲུབ་པ་པདྨའི་བཀའ༔ དེ་བཞིན་སྔོན་འགྲོས་རྒྱུད་སྦྱངས་ནས༔ ཚིག་དོན་དྲན་བཞིན་འདི་ལྟར་ཟློས༔ ན་མོ༔ བདག་དང་མཁའ་མཉམ་སེམས་ཅན་ཀུན༔ བྱང་ཆུབ་སྙིང་པོའི་བར་དག་ཏུ༔ རྩ་གསུམ་བདག་ཉིད་རིག་བྱེད་མར༔ སྐྱབས་སུ་མཆི་འོ་ཐུགས་རྗེས་ཟུངས༔ འཁོར་བར་འཁྱམས་པའི་མ་རྒན་འགྲོ༔ ཡང་དག་སྙིང་པོའི་ལམ་མཆོག་ལ༔ འགོད་ཕྱིར་བྱང་ཆུབ་སེམས་བསྐྱེད་ནས༔ འགྲོ་བ་སྒྲོལ་བར་དམ་བཅའ་འོ༔ ཧོ༔ དཀོན་མཆོག་གསུམ་དངོས་རིག་བྱེད་ལྷ༔ རང་བཞིན་ཀློང་ནས་སྤྱན་འདྲེན་གཤེགས༔ མདུན་མཁར་པད་ཟླའི་ཁྲི་ལ་བཞུགས༔ ཕྱག་འཚལ་མཆོད་འབུལ་སྡིག་པ་བཤགས༔ ཆོས་བསྐུལ་ཡི་རང་བཞུགས་གསོལ་འདེབས༔ དགེ་ཚོགས་མཁའ་ཁྱབ་ཡོངས་ལ་བསྔོ༔ ཕྱམ་གཅིག་སངས་རྒྱས་མྱུར་ཐོབ་ཤོག༔ དེ་ནས་དངོས་གཞིའི་རིམ་པ་ནི༔ ཨཱ༔ སྐད་ཅིག་སྟོང་གསལ་གཞལ་ཡས་ཁང༔ པདྨ་རཱ་གའི་ཕོ་བྲང་ནི༔ ཟླ་གམ་སྒོ་གཅིག་དལ་གྱི་དབུས༔ ཆུ་སྐྱེས་དམར་པོ་འདབ་སྟོང་སྟེང༔ ཟླ་ཉི་དབང་ཕྱུག་ཁྱོ་ཤུག་དང༔ སྒྲ་གཅན་བསྣོལ་སྟེང་ཐ་མལ་གྱི༔ རིག་པ་ཧྲཱིཿཡིག་བྱི་རུའི་མདོག༔ འོད་འཕྲོས་དོན་བྱས་ཚུར་འདུས་ལས༔ ཀུ་རུ་ཀུལླེ་སྐུ་མདོག་དམར༔ ཞལ་གཅིག་ཕྱག་བཞི་ཞབས་གཉིས་བསྒྲད༔ སྤྱན་གསུམ་ཞི་འཛུམ་ཆགས་པའི་ཚུལ༔ བཞད་མདངས་མཆེ་བའི་མྱུ་གུ་གཙིགས༔ འཇིག་རྟེན་སྐྱེས་སོ་ཅོག་རྣམས་ཀུན༔ ཆགས་པའི་སྟོབས་ཀྱིས་བདག་དབང་འགུགས༔ དཀའ་ཐུབ་གདུང་བ་བཟློག་པར་བྱེད༔ ཕྱག་བཞིའི་དང་པོ་ཐབས་ཤེས་ཀྱི༔ མདའ་གཞུ་ཆེ་བཙན་སྙིང་ལ་གཟིར༔ འོག་གཉིས་ལྕགས་ཀྱུ་ཞགས་པ་ཡིས༔ འཇིག་རྟེན་ཟས་ནོར་ལོངས་སྤྱོད་ཀུན༔ ལྕགས་ཀྱུས་འགུགས་ཤིང་ཞགས་པས་འཆིང༔ གནས་ཁང་ལ་དྲངས་ལྟེམ་གྱིས་གང༔ ནོར་བུའི་པྲོག་ཞུ་ཅོད་པཎ་འཕུར༔ རུས་པའི་རྒྱན་དྲུག་སྐུ་ལ་གསོལ༔ དར་ལྗང་སྟོད་གཡོགས་དམར་པོ་བཀླུབས༔ སྟག་ལྤགས་ཤམ་ཐབས་ཞི་དང་ཁྲོའི༔ ཆས་ལྡན་གཡས་གཡོན་བཀའ་སྡོད་ནི༔ དབང་ཕྱུག་ཡབ་ཡུམ་ཕྱོགས་བཞི་རུ༔ གླིང་བཞིའི་ཕྱྭ་འགུགས་ཕྲ་མེན་བཞི༔ ཀུན་ཀྱང་ལྕགས་ཀྱུ་ཞགས་པ་འཛིན༔ ཆགས་པའི་ལང་ཚོ་བདེ་ཉམས་རྒྱས༔ དེ་འཁོར་རྩ་གསུམ་སྲུང་མར་བཅས༔ དབང་གི་ལྷ་ཡི་རྣམ་པར་བཞུགས༔ དེ་དག་གནས་གསུམ་འབྲུ་གསུམ་ལས༔ འོད་འཕྲོས་བདེ་ཆེན་པདྨོ་བཀོད༔ རང་བཞིན་སྤྲུལ་པའི་ཞིང་ཁམས་ནས༔ དབང་གི་ལྷ་ཚོགས་སྤྱན་འདྲེན་གཤེགས༔ རང་མཐུན་དྲེགས་པའི་གདན་ལ་བཞུགས༔ ལུས་ངག་ཡིད་ཀྱིས་གུས་ཕྱག་འཚལ༔ ཕྱི་ནང་གསང་གསུམ་མཆོད་ཚོགས་འབུལ༔ དབང་གི་ཕྲིན་ལས་འགྲུབ་མཛད་གསོལ༔ ཧྲཱིཿ སོར་རྟོག་ཡེ་ཤེས་རང་རྩལ་ལས༔ གཟུགས་ཀྱི་སྐུར་སྟོན་དབང་གི་ལྷ༔ རིག་བྱེད་སྤྲུལ་དང་ཡང་སྤྲུལ་བཅས༔ ལྷ་ཚོགས་གསང་གསུམ་ཡོན་ཏན་ལ༔ རྗེས་སུ་དྲན་པས་བསྟོད་པར་བགྱི༔ དབང་གི་ལྷ་མོའི་ཐུགས་ཀ་རུ༔ པད་སྟེང་ཧྲཱིཿདམར་སྔགས་ཕྲེང་ནི༔ བཀླག་ཕྱོགས་འཁོར་ལས་འོད་དམར་འཕྲོས༔ རྒྱལ་མཆོད་འགྲོ་བའི་ལས་ཉོན་སྦྱངས༔ ལྷ་སྲིན་དྲེགས་པ་ཆེ་རྒུ་དང༔ སྐྱེ་འགྲོ་རྗེ་འབངས་དབང་བསྡུས་ནས༔ མོས་ཚོགས་རྣམ་བཞི་འགྲུབ་པར་བསམ༔ མ་ཡེངས་སྒྲ་དག་སྔགས་འདི་བཟླ༔ ཨོཾ་ཀུ་རུ་ཀུལླེ་ཧྲཱིཿ ཅི་ནུས་བསྙེན་མཐར་གཤམ་འདོགས་ནི༔ ཨ་ཏྲི་ནྲི་ཛ༔ ལོ་ཀ་སརྦ་ཕོ་རྒྱུད་མོ་རྒྱུད་ཡུལ་ཁམས་མངའ་ཐང་ལོངས་སྤྱོད་དང་བཅས་པ་པ་ཤཾ་ཀུ་རུ་ཡེ་ཛ་ཛ༔ ཁུག་ཁུག་དུང་དུང་སྭཱ་ཧཱ༔ ཨོཾ་མ་ཧཱ་དྷེ་ཝ་ཛ་ཨུ་མ་དྷེ་ཝི་ཧྲིང་ཧ་རི་ནི་ས་སརྦ་ལོ་ཀ་པཱ་ཤཾ་ཀུ་རུ་ཛ་ཛ༔ ཁུག་ཁུག་དུང་དུང་སྭཱ་ཧཱ༔ དེས་ནི་གང་དམིགས་དབང་དུ་འདུས༔ ཡིད་ཆེས་ཐེ་ཚོམ་མེད་པ་ན༔ གྲངས་མ་འཁྱོལ་ཀྱང་རྟགས་མཐོང་ངེས༔ ས་མ་ཡཱ༔ རྗེས་སུ་བསྡུ་རིམ་ལྷར་ལྡང་དང༔ དགེ་བསྔོ་ཤིས་བརྗོད་སྤྱི་ལྟར་བྱ༔ ཨེ་མ་མཁའ་འགྲོའི་སྒྲུབ་ཐབས་ནི༔ ཟབ་པའི་ནང་ནས་ཆེས་ཟབ་པ༔ ཡང་གསང་མཁའ་འགྲོའི་སྙིང་ཁྲག་ཡིན༔ སུ་ལ་མ་སྤེལ་རང་ཉམས་ལོངས༔ གལ་ཏེ་སྤེལ་ཀྱང་རེས་འགའ་ཙམ༔ མང་དུ་སྤེལ་ན་ནུས་པ་ཞན༔ བཀའ་ཡི་སྲུང་མས་བྱ་ར་གྱིས༔ སྐལ་ལྡན་བུ་ལ་གཏད་དོ་རྒྱ༔ སྐལ་མེད་ཡོངས་ལ་གསང་ངོ་རྒྱ༔ གུ་ཧྱ༔ དྷ་ཐིམ༔ ཞེས་པ་འདི་ཡང་རིག་འཛིན་གསང་སྔགས་གླིང་པ་སོགས་ཀྱིས་ལུང་གིས་བསྔགས་པའི་དམ་པ་ཨ་གཾ་བིདྱའི་བཞེད་སྐོང་དུ་བསམ་གཏན་ཡེ་ཤེས་གླིང་པས་རིག་པ་མཉམ་བཞག་གི་སྒྲོམ་ནས་བཏོན་པ་མངྒ་ལམ༔