ཀུ་རུ་ཀུལླེའི་སྒྲུབ་པའི་རྗེས་ཀྱི་ལས་རིམ།
༄༅། ཐུན་མཐར་རྗེས་ཀྱི་ལས་རིམ་ནི༔ གཏང་རག་གསོལ་ཞིང་དངོས་གྲུབ་བླངས༔ བསྔོ་སྨོན་མཐའ་སྡུད་ཤིས་པ་བརྗོད༔ ཁྲིགས་རིམ་ལྔ་རུ་བསྟན་པའོ༔ ཧོ༔ རིག་བྱེད་དབང་གི་ལྷ་མོ་ལ༔ ཕྱི་ནང་གསང་བ་ཡང་གསང་རྫས༔ དངོས་འབྱོར་ཡིད་སྤྲུལ་མཆོད་པ་འབུལ༔ ལྷ་ཚོགས་འཁོར་བཅས་མཉེས་གྱུར་ཅིག༔ སརྦ་པཱུ་ཙ་པྲ་ཏིཙྪ་ཧོ༔ རང་བྱུང་མངོན་གྱུར་རིག་པའི་ལྷ༔ བཅོམ་ལྡན་རིག་བྱེད་ལྷ་མོ་ཡི༔ ལྷ་ཚོགས་འཁོར་དང་བཅས་རྣམས་ལ༔ འཁྲུལ་གྲོལ་གཉིས་མེད་ཀློང་ནས་བསྟོད༔ རྗེས་ལ་འདོད་དོན་གསོལ་བའི་ཕྲིན་ལས་ནི༔ ཧོ༔ བཅོམ་ལྡན་འདས་མ་རིག་བྱེད་དབང་གི་ལྷ༔ བསྙེན་སྒྲུབ་ལས་སྦྱོར་ནུས་པའི་སྟོབས་བསྐྱེད་མཐུས༔ བླ་མ་མཁན་སློབ་དགེ་འདུན་བཞི་ཡི་སྡེ༔ རྒྱལ་པོ་བློན་པོ་བཙུན་མོ་མཛའ་ན་མོ༔ ཕོ་རྒྱུད་མོ་རྒྱུད་ཟས་ནོར་ཚེ་ཆོས་སྲིད༔ གང་དམིགས་ཡིད་འོང་དབང་མེད་མཐུ་ཡིས་ཁུག༔ དཀོན་མཆོག་ཞབས་ཏོག་དགེ་འདུན་མཉེས་པའི་ཆས༔ ངན་སློང་དབུལ་པོའི་རེ་བ་སྐོང་བའི་ཕྱིར༔ སྲིད་གསུམ་སྐྱེ་འགྲོ་ཀ་ཆ་དཀོར་ནོར་ཀུན༔ པདྨའི་ལྕགས་ཀྱུས་ཟུངས་ལ་ཞགས་པས་ཆིངས༔ བདག་དང་བསྲུང་བྱར་གྱུར་པ་གང་སུ་དག༔ གནས་སྐབས་རྐྱེན་སོལ་མཐར་ཐུག་བདེ་ལ་སྦྱོར༔ རིག་པའི་ལྷ་དང་སྐལ་བ་མཉམ་པར་ཤོག༔ འདི་ཁོལ་བྱུང་དུ་འདུག་པ་རང་བློས་བར་དུ་བཙུད་པའོ༔ ཨོཾ་ཨཱཿཧཱུྃ༔ འགྱུར་བ་མི་མངའ་ཆོས་ཀྱི་སྐུ༔ འགགས་མེད་གསུང་དང་འཁྲུལ་བྲལ་ཐུགས༔ ཡོན་ཏན་ཕྲིན་ལས་རྨད་བྱུང་གཏེར༔ གསང་བ་གསུམ་གྱི་དངོས་གྲུབ་སྩོལ༔ ཀཱ་ཡ་ཝཱཀྐ་ཙིཏྟ་སརྦ་སིིདྡྷི་ཕ་ལ་ཧྲཱིཿ ཧོ༔ དུས་གསུམ་ཚོགས་གཉིས་བསགས་འབྲས་གང༔ རྣམ་མཁྱེན་གདོད་མའི་རྒྱུ་རུ་བསྔོ༔ མཁའ་མཉམ་ཡིད་ཅན་འགྲོ་བ་ཀུན༔ དབང་ལྷ་དང་མཉམ་མཐུ་ཐོབ་ཤོག༔ ཨཱཿ སྤྲོས་བྲལ་ཡེ་ཤེས་རང་མདངས་ལྷ༔ རིག་སྟོང་མཉམ་ཉིད་དབྱིངས་སུ་བསྡུ༔ སླར་ཡང་སྒྱུ་མའི་རོལ་རྩལ་ལས༔ སྣང་གྲགས་ལྷ་སྔགས་ཆོས་སྐུར་ཤར༔ ཧྲཱིཿཛྙཱ་ན་ཙིཏྟ་བཛྲ་ཧཱུྃ༔ ཨེ་མ་ཧོ༔ རིག་བྱེད་ལྷ་མོའི་སྐུ་ལ་བགྲེས་རྒུད་མེད༔ སོར་རྟོག་ཡེ་ཤེས་གསུང་ལ་འགག་པ་མེད༔ གོས་དཀར་ལྷ་མོའི་ཐུགས་ལ་གསལ་འགྲིབ་བྲལ༔ རྟག་པའི་རྡོ་རྗེ་གསུམ་གྱི་བཀྲ་ཤིས་ཤོག༔ ས་མ་ཡཱ༔ རྒྱ་རྒྱ་རྒྱ༔ ཅེས་པ་འདི་ཡང་བདག་དང་སྔོན་ནས་འབྲེལ་བའི་དགེ་སྦྱོང་ཡེ་ཤེས་མཁའ་འགྲོའི་ལུང་གིས་བསྔགས་པའི་ཀརྨ་དྷརྨ་པཱ་ལས་བསྐུལ་ངོར་བླ་མའི་བྱིན་རླབས་སྙིང་ལ་སིམ་པའི་བཙུན་གཟུགས་ས་ར་ཧི་ཏས་རང་བྱུང་དགོངས་པའི་ཀློང་ནས་སྤེལ་བ་ཛ་ཡནྟུ༔
#div1 རིགས་ལྡན་ལྷ་མོ་མནྡ་ར་བ་སྒྲུབ་པའི་བསྡུས་དོན།
རིགས་ལྡན་ལྷ་མོ་མནྡ་ར་བ་སྒྲུབ་པའི་བསྡུས་དོན༔ པདྨ་ཀཱ་ར་ལ་བཏུད་དེ༔ རིགས་ལྡན་ལྷ་མོ་མནྡ་ར༔ དེ་ཉིད་སྒྲུབ་པའི་བསྡུས་དོན་ནི༔ དཀྱིལ་འཁོར་མེད་ཅིང་གཏོར་མ་མེད༔ སྐད་ཅིག་དྲན་པའི་ཏིང་འཛིན་གྱིས༔ སྟོང་པའི་ངང་ལས་པད་ཟླའི་སྟེང་༔ རང་སེམས་བཅོས་མེད་རིག་པ་འདི༔ མནྡ་ར་བ་སྐུ་མདོག་དཀར༔ དམར་ལ་མདངས་ཆགས་ཞི་འཛུམ་བཞད༔ རུས་རྒྱན་དར་དཔྱངས་མུ་མེན་གྱི༔ གཙུག་ཏོར་མཆོད་ལྷའི་རྣམ་འགྱུར་ངོམ༔ ཞབས་གཉིས་གར་སྟབས་ཤིགས་སེ་ཤིག༔ ཕྱག་གཡས་གྲི་གུག་ནམ་མཁར་ཕྱར༔ གཡོན་པས་ཐོད་བུམ་ལྟེ་བར་བསྣམས༔ སྤྱི་སྟེང་ཟླ་དཀྱིལ་དབུས་སུ་ཧཾ༔ གསང་སྦུབས་པདྨའི་དཀྱིལ་དུ་ནི༔ ཉི་གདན་སྟེང་དུ་གཏུམ་མོའི་ཨ༔ ཟངས་ཀྱི་མོ་ཁབ་ལྟ་བུར་བསྒོམ༔ རྩ་ཡི་གཙོ་བོ་གསུམ་པོ་ལ༔ འཁོར་ལོ་ལྔ་ཡི་དཀྱིལ་འཁོར་གསལ༔ རོ་རྐྱང་གཉིས་ནས་རླུང་བརྔུབ་པས༔ དབུ་མའི་མར་སྣེ་གསང་བའི་སྦུབས༔ གཏུམ་མོའི་ཨ་ལ་ཕོག་པ་ཡིས༔ བྱིན་རླབས་མེ་འོད་ལྷབ་ཀྱིས་འབར༔ མཚན་ཉིད་བཞི་ལྡན་མེ་ལྕེ་ཡིས༔ ཧཾ་ཡིག་རེག་པ་འཕྲོད་པའི་ཚེ༔ འོད་ཟེར་སྤྲོ་བསྡུས་དོན་གཉིས་བྱས༔ ཚུར་འདུས་ཧཾ་ཡིག་བདུད་རྩིར་ཞུ༔ དཀར་སེར་དམར་ལྗང་མཐིང་ཀར་གྱུར༔ སྤྱི་བོ་བདེ་ཆེན་འཁོར་ལོ་རུ༔ སངས་རྒྱས་རྣམ་སྣང་རྒྱལ་པོ་དང༔ ཡི་དམ་སྒྲུབ་སྡེ་བརྒྱད་ལ་ནི༔ རྩ་གསུམ་སྲུང་མས་ཁྲོམ་ལྟར་བསྐོར༔ ཁྱད་པར་རང་གིས་སྒྲུབ་པའི་ལྷ༔ རྩ་གསུམ་སྲུང་མ་ཆེད་དུ་བསྒོམ༔ ཟག་མེད་བྱང་སེམས་བདུད་རྩི་དང༔ རང་གི་བཟའ་བཏུང་ལས་བཞི་ཡི༔ རྫས་དང་ཁ་དོག་དེ་ལྟར་བསྒོམ༔ སོ་སོའི་མཆོད་པའི་ལྷ་མོར་དམིགས༔ ཁ་ནི་ཞི་རྒྱས་དབང་དྲག་གི༔ ཐབ་ཏུ་འདུ་ཤེས་སྲེག་བླུགས་འབུལ༔ གཏུམ་མོའི་མེ་ལྕེས་བཞུས་ནས་ནི༔ ལྷ་ཚོགས་ལྗགས་ནི་འཁོར་ལོ་དང༔ རྡོ་རྗེ་ནོར་བུ་པདྨ་གྲི༔ འོད་ཀྱི་སྦུ་གུའི་ནང་དུ་དྲངས༔ ཐུགས་རྒྱུད་མཉེས་ཤིང་ཚིམ་པ་དང་༔ བདག་ལ་ལས་བཞིའི་དངོས་གྲུབ་གང༔ དེ་དང་དེ་བཞིན་འགྲུབ་པར་དམིགས༔ དམིགས་པའི་ལྡེ་ཁ་གཞན་ལྟར་བསྒྱུར༔ དེ་ནི་སྤྱི་ལྟར་བྱེ་བྲག་ཏུ༔ ཐོ་རངས་ཞི་བའི་དུས་བབས་ཚེ༔ སྙིང་ཀ་ཆོས་ཀྱི་འཁོར་ལོའི་དབུས༔ བཅོམ་ལྡན་རྡོ་རྗེ་སེམས་དཔའ་ལ༔ ཞི་བ་བཞི་བཅུ་སྤྱི་བྱེ་བྲག༔ ལྷ་ཚོགས་རྣམས་ལ་ཧཾ་བདུད་རྩི༔ དཀར་པོའི་རྒྱུན་བབས་བཟའ་བཏུང་གི༔ བསྲེག་རྫས་ཞི་བའི་རྫས་སུ་འབུལ༔ རྡོར་སེམས་ལ་སོགས་ལྷ་ཚོགས་ཀྱི༔ ལྗགས་ནི་རྡོ་རྗེའི་སྦུ་གུ་ཅན༔ དེ་ཡིས་བདུད་རྩི་དཀར་ལྟེམ་གྱིས༔ གསོལ་བས་མཉེས་ཚིམ་སྐུ་ལས་ནི༔ འོད་ཟེར་དཀར་པོ་བདག་གཞན་ལ༔ ཕོག་པས་སྒྲིབ་གཉིས་བག་ཆགས་དང༔ ནད་གདོན་སྡིག་སྒྲིབ་དག་པར་དམིགས༔ ས་མ་ཡཱ༔ དེས་ནི་ཞི་བའི་ལས་ཀུན་འགྲུབ༔ ཉི་ཕྱེད་རྒྱས་པའི་དུས་བབས་ཚེ༔ ལྟེ་བ་སྤྲུལ་པའི་འཁོར་ལོའི་དབུས༔ བཅོམ་ལྡན་རིན་ཆེན་འབྱུང་གནས་ལ༔ རྒྱས་པའི་ལྷ་ནི་སྤྱི་བྱེ་བྲག༔ རྣམས་ལ་ཧཾ་གི་བདུད་རྩི་ནི༔ སེར་པོའི་རྒྱུན་བབས་བཟའ་བཏུང་གི༔ བསྲེག་རྫས་རྒྱས་པའི་རྫས་སུ་འབུལ༔ རིན་འབྱུང་ནོར་ལྷ་ལ་སོགས་པའི༔ ལྗགས་ནི་ནོར་བུའི་སྦུ་གུ་ཅན༔ བདུད་རྩི་སེར་གསལ་གསོལ་བས་མཉེས༔ སྐུ་ལས་འོད་ཟེར་སེར་པོ་འཕྲོས༔ ཁམས་གསུམ་སྐྱེ་དགུའི་ཕྱྭ་གཡང་འགུགས༔ ཚེ་བསོད་འབྱོར་དྲུག་རྒྱས་པར་དམིགས༔ ས་མ་ཡཱ༔ དེས་ནི་རྒྱས་པའི་ལས་ཀུན་འགྲུབ༔ དགོང་མོ་དབང་གི་དུས་ཚོད་ལ༔ མགྲིན་པ་ལོངས་སྤྱོད་རྩ་འཁོར་དུ༔ བཅོམ་ལྡན་སྣང་བ་མཐའ་ཡས་ལ༔ གོས་དཀར་མོ་སོགས་དབང་ལྷ་སྤྱི༔ བྱེ་བྲག་རྣམས་ལ་ཧཾ་བདུད་རྩི༔ དམར་པོའི་རྒྱུན་བབ་བཟའ་བཏུང་གི༔ བསྲེག་རྫས་དབང་གི་རྫས་སུ་འབུལ༔ སྣང་མཐའ་རིག་བྱེད་ལྷ་ཆེན་སོགས༔ ལྗགས་ནི་པདྨའི་ཕྱག་མཚན་གྱི༔ སྦུ་གུ་འོད་དམར་རྣམ་པས་གསོལ༔ ལྷ་ཚོགས་སྐུ་ལ་འོད་དམར་པོ༔ ལྕགས་ཀྱུ་ཞགས་པའི་རྣམ་པར་འཕྲོས༔ ཆེ་བཙན་དྲེགས་པ་མི་ལྷ་འདྲེ༔ ཕོ་མོ་ཡུལ་ཁམས་དཀོར་ནོར་རྫས༔ ཁབ་ལེན་རྡོ་ཡིས་ལྕགས་བཞིན་བསྡུས༔ གང་དམིགས་སྣང་བ་དབང་དུ་འགྱུར༔ ས་མ་ཡཱ༔ དེས་ནི་དབང་གི་ལས་ཚོགས་འགྲུབ༔ མུན་རུབ་སྲོད་འཁོར་གདོང་ནག་དུས༔ གསང་གནས་བདེ་སྐྱོང་འཁོར་ལོའི་གཤིས༔ བཅོམ་ལྡན་དོན་ཡོད་གྲུབ་པ་ལ༔ ཕྲིན་ལས་ཕུར་པ་མ་མགོན་གཟའ༔ དྲག་པོའི་དཔུང་ཚོགས་རྔམ་པ་ཡིས༔ ཞལ་གདངས་མཆེ་གཙིགས་གད་རྒྱངས་སྒྲོག༔ བརྟུལ་ཞུགས་ཅན་རྣམས་ལྗགས་མཚོན་ཆའི༔ སྦུ་གུ་ཅན་གྱིས་བཟའ་བཏུང་ཚོགས༔ གང་དམིགས་དགྲ་བོའི་ཕུང་ཁམས་དང༔ ཧཾ་གི་བདུད་རྩི་མཐིང་ག་ལྗང་༔ རྣམ་པས་དགྲ་གདོན་ཚེ་བསོད་རྔུབ༔ ཞལ་གྱི་ཧོམ་དུ་བསྟིམ་པ་ཡིས༔ རྣམ་ཤེས་སྐྱེ་མེད་དབྱིངས་སུ་སྤར༔ ས་མ་ཡཱ༔ དེས་ནི་དྲག་པོའི་ལས་ཚོགས་འགྲུབ༔ རྡོ་རྗེ་མཁའ་འགྲོའི་ལུས་དཀྱིལ་འདི༔ ཟབ་པའི་ནང་ནས་ཡང་ཟབ་ཡིན༔ བཅུད་ལས་བཅུད་དུ་བསྡུས་ཏེ་བསྟན༔ མཚོ་རྒྱལ་ཨ་ཙར་ཟུང་གི་འཕྲུལ༔ འགྲོ་ཕན་སེམས་དཔའ་དེ་ལ་ནི༔ མི་སྣང་དགོངས་པའི་རྒྱས་བཏབ་པ༔ དུས་བབ་ལས་འཕྲོ་སད་པའི་ཚེ༔ ཐོགས་པ་མེད་པར་སྤེལ་བ་འདི༔ དད་ལྡན་སྐྱེས་བུ་ཟུང་ལ་སྤྲོད༔ ཚོགས་བསགས་འབྲས་བུ་དུས་འདིར་སྨིན༔ ཕུན་སུམ་ཚོགས་པ་ལྔ་ཡི་རྒྱ༔