ཨོ་རྒྱན་མཁའ་འགྲོ་ནོར་ལྷའི་ཐུགས་སྒྲུབ་ཆ་ལག་གཏེར་བུམ་སྦ་ཐབས་བང་མཛོད་ལྡེའུ་མིག
ཨོ་རྒྱན་མཁའ་འགྲོ་ནོར་ལྷའི་ཐུགས་སྒྲུབ་ཆ་ལག་གཏེར་བུམ་སྦ་ཐབས་བང་མཛོད་ལྡེའུ་མིག་བི་ཛ་ཧ་རཾ༔ དགོས་ཆས་ཡོངས་རྫོགས་སྟ་གོན་བྱ༔ སྐྱབས་འགྲོ་སེམས་བསྐྱེད་སྔོན་དུ་འགྲོ་བས༔ མཆོད་རྫས་སྔགས་དྲུག་ཕྱག་དྲུག་གིས་བྱིན་གྱིས་བརླབ་ལ་འདི་སྐད་དོ༔ ཧཱུྃ་ཧོ༔ སྟོང་ཉིད་སྙིང་རྗེའི་རང་རྩལ་ལས༔ ཡི་གེ་ཀྵི་ཧིའི་འཕྲོ་འདུ་ལས༔ འོད་ཞུ་རང་ཉིད་ས་སྙིང་དཀར༔ བྱང་སེམས་ལོངས་སྐུའི་ཆ་ལུགས་རྫོགས༔ གཡས་གཡོན་མྱུ་གུ་དྲིལ་བུ་འཛིན༔ ཞབས་གཉིས་སེམས་དཔའི་དཀྱིལ་ཀྲུང་བཞུགས༔ མདུན་དུ་ས་ཡི་ལྷ་མོ་ལ༔ ས་བདག་ལྷ་ཀླུའི་ཚོགས་ཀྱིས་བསྐོར༔ གནས་གསུམ་འབྲུ་གསུམ་ཐུགས་ཀ་ཡི༔ ས་བོན་འོད་ཀྱིས་སྤྱན་དྲངས་གྱུར༔ པྲི་ཐི་དེ་ཝཱི་བྷུ་མི་པ་ཏི་ས་པཱ་རི་ཝ་ར་བཛྲ་ས་མ་ཡཱ་ཛ་ཛ༔ ཛཿཧཱུྃ་བཾ་ཧོ༔ ཏིཥྛ་ལྷན༔ རྣམ་ལྔའི་མཆོད་པ་དང་སྡེ་བརྒྱད་གསེར་སྐྱེམས་འདོན༔ དེ་ནས་འཇོར་གྱིས་ས་བརྐོས་འདི་སྐད་དོ༔ ཧཱུྃྃ་ཧོ༔ བཅོམ་ལྡན་བདེ་གཤེགས་སངས་རྒྱས་དུས༔ དགའ་རབ་དབང་ཕྱུག་བཏུལ་བའི་ཚེ༔ རྒྱལ་བའི་བསོད་ནམས་དཔང་མཛད་ནས༔ བདུད་དགྲའི་གཡུལ་ངོ་ཕམ་བྱས་པའི༔ སངས་རྒྱས་བཀའ་ཉན་ལྷ་མོ་བསྟན༔ ས་བདག་དབང་ཆེན་འཁོར་གྱིས་བསྐོར༔ འདོད་རྒུའི་གཏེར་གྱི་བུམ་པ་འདི༔ རིན་ཆེན་ས་ཡི་སྙིང་པོ་བྱ༔ ཀོ་ལོང་རུ་ང་མ་མཛད་པར༔ བསྟན་དང་འགྲོ་བའི་དབུལ་བ་སེལ༔ སྦྱིན་བདག་གཏེར་དང་འཕྲད་པར་མཛོད༔ གཏེར་བུམ་གཏེར་རྫས་འདི་བཞེས་ལ༔ སྐྱེ་བ་འདི་ནས་ཚེ་རབས་སུ༔ བཙན་ཕྱུག་འཕན་དར་འཛོམས་པ་དང༔ མཁོ་རྒུའི་དཔལ་འབྱོར་དངོས་གྲུབ་ཞུ༔ ཞེས་བུམ་པ་ལེགས་པར་སྦས༔ བཀྲ་ཤིས་སྨོན་ལམ་གཞན་ནས་བྱུང་ལྟར་ཁ་བསྐང་བར་བྱའོ༔ ས་མ་ཡཱ༔ ད་ནི་རྒྱས་འདེབས་ནི༔ ཨོཾ་ཨཱཿཧཱུྃ་ཧྲཱིཿ འོག་མིན་སྤྲོས་བྲལ་དབྱིངས་ཀྱི་ཕོ་བྲང་ནས༔ ཁྱད་ཆོས་དྲུག་གིས་མངོན་པར་སངས་རྒྱས་པའི༔ ཐོག་མའི་སངས་རྒྱས་འོད་མི་འགྱུར་བ་ཡིས༔ འཕོ་མེད་ཆོས་སྐུའི་མཁའ་རུ་གཏེར་འདི་སྦ༔ ཀ་དག་གཞི་གྲོལ་ཆེན་པོའི་དངོས་གྲུབ་སྩོལ༔ ངེས་པ་ལྔ་ལྡན་ལོངས་སྐུའི་ཕོ་བྲང་ནས༔ ཚོམ་བུ་ཚོགས་སྒྲུབ་ལོངས་སྤྱོད་རྫོགས་པའི་དཔལ༔ བཅོམ་ལྡན་མི་བསྐྱོད་རིགས་ལྔ་སྟངས་དཔྱལ་གྱིས༔ བདེ་སྟོང་དབྱིངས་ཡེའི་མཁའ་རུ་གཏེར་འདི་སྦ༔ སྣང་སྟོང་ལྷུན་གྲུབ་གཏེར་དབང་དངོས་གྲུབ་སྩོལ༔ མ་ངེས་སྤྲུལ་པའི་ཞིང་ཁམས་རབ་འབྱམས་ནས༔ འགྲོ་འདུལ་རིག་འཛིན་པད་འབྱུང་གཏེར་སྟོན་ཚོགས༔ བརྒྱུད་པ་དགུ་ལྡན་རྩ་བརྒྱུད་བླ་མ་ཡིས༔ དཔལ་ལྡན་ས་སྤྱོད་གནས་སུ་གཏེར་འདི་སྦ༔ ཕུན་ཚོགས་དཔལ་གྱིས་འབྱོར་བའི་དངོས་གྲུབ་སྩོལ༔ གླིང་གི་གླིང་མཆོག་ལྷོ་རྒྱལ་འཛམ་བུ་གླིང༔ ལས་བཞི་ལྷུན་གྱིས་གྲུབ་པའི་ཐ་གྲུ་འདིར༔ སྔོན་སྨོན་ལས་འབྲེལ་འཛོམས་པའི་ཡོན་མཆོད་ཀྱིས༔ གསུམ་ལྡན་རིང་བསྲེལ་རིན་ཆེན་གཏེར་བུམ་སྦ༔ མཆོག་ཐུན་ཕྱྭ་གཡང་གཏེར་གྱི་དངོས་གྲུབ་སྩོལ༔