མདོས་བསྐྱེད་དང་འགུགས་པ།
དེ་ལ་ཐོག་མར་ཡས་རྣམས་སྔགས་དྲུག་ཕྱག་དྲུག་གིས་བྱིན་གྱིས་རླབས་ལ༔ དངོས་གཞི་མདོས་ལ༔ རཾ་ཡཾ་ཁཾ་གིས་བསངས༔ སཱ་བྷ་ཝས་སྦྱངས༔ སྟོང་པའི་ངང་ལས་རང་ཉིད་ལྷར་གསལ་བའི་མདུན་དུ་རིན་པོ་ཆེ་སྣ་ཚོགས་ལས་གྲུབ་པའི་རི་རབ་བང་རིམ་བཞི་དང་ལྡན་པའི་དབུས་སུ་རྒྱན་དང་བཀོད་པ་ཕུན་སུམ་ཚོགས་པའི་ཁང་བཟང་རྒྱ་ཁྱོན་ཚད་ལས་འདས་པའི་ནང་དུ་ཡི་གེ་ཏྲི་ནག་པོ་དགུ་བསམ༔ དེ་ལས་འོད་ཟེར་འཕྲོས༔ འདྲེ་གདོན་དལ་ཡམས་ནད་བདག་རྒྱལ་བསེན་དམ་སྲི་རྣམས་ལ་ཕོག༔ ཚུར་འདུས་ཡོངས་སུ་གྱུར་པ་ལས་དབུས་སུ་དམ་སྲི་གོད་འདྲེ་ནག་མོ་དོམ་གྱི་མགོ་ཅན༔ ལུས་ལ་མུན་པའི་གོས་དང་མགོ་ལ་ཞྭ་ནག་གྱོན་པའི་རྩེ་ལ་དར་འཕྲུས་བརྒྱན་པ༔ རླུང་གི་གཤོག་པ་ཅན༔ ལག་གཡས་གསོད་པའི་སྤུ་གྲི་ནམ་མཁར་གདངས་ཤིང་གཡོན་པའི་ཞགས་པ་ནག་པོས་སྐྱེ་འགྲོའི་བླ་ཚེ་སྡུད་པ༔ ཁ་ན་ཁྲག་གི་དུག་ཆར་གཏོང་བ༔ མི་སྡུག་པའི་རྣམ་འཕྲུལ་བསམ་གྱིས་མི་ཁྱབ་པས་བརྒྱན་པར་བསམ༔ དེའི་ཤར་དུ་གནོད་སྦྱིན་མི་ནག་ཕག་གི་མགོ་ཅན༔ དར་དཀར་གྱི་ལའུ་གྱོན་པ་མགོ་ལ་ཞྭ་ནག་གྱོན་པའི་རྩེ་ལ་དར་འཕྲུ་ངོམ་པ༔ ལག་གཉིས་གསོད་པའི་མདུང་ཐུང་འཕེན་པ༔ ལྷོ་རུ་དམ་སྲི་མི་ནག་པུ་ཤུད་མགོ་ཅན་དར་སེར་གྱི་རལ་ཀ་ཅན་བྱ་ནག་གི་ཕོད་འཕྲུས་མཛེས་པ་ལག་གཉིས་ཞགས་པ་ནག་པོས་དམིགས་བྱ་སྡོམ་པ༔ ནུབ་ཏུ་གོད་འདྲེ་ནག་པོ་ཤ་བའི་མགོ་ཅན་མིའི་ལུས་ལ་ཤ་ལྤགས་དམར་པོའི་གཡང་གཞི་ལྡིང་སྟབས་སུ་གྱོན་པ༔ ལག་གཉིས་གསོད་པའི་གྲི་དང་རྔ་ཡབ་འཛིན་པ༔ བྱང་དུ་བུད་མེད་ནག་མོ་བྱ་ཡི་མཆུ་སྒྲོ་ཅན༔ ལུས་གཅེར་བུ་འཚུབ་མ་ནག་པོའི་རྟ་ལ་ཞོན་པ༔ ལག་གཉིས་ཤ་ཟུང་འཕེན་སྡུད་བྱེད་པ༔ ཤར་ལྷོར་གླུད་བདག་སྲེ་མོང་གི་མགོ་ཅན་ནག་མོ་བུད་མེད་ཀྱི་ལུས་ལ་སྲེ་མོང་གི་གཡང་གཞི་གྱོན་པ༔ ལག་པ་གཉིས་ཀས་སྲེ་མོང་སྣ་ཚོགས་ཕོ་ཉར་འགྱེད་པ༔ ལྷོ་ནུབ་ཏུ་གྲོང་འདྲེ་བྱ་རོག་གི་མགོ་ཅན་ལུས་ལ་བྱ་ཐུལ་གྱོན་པ༔ ལག་གཉིས་ཞགས་ཟོར་བསྣོལ་མར་འཛིན་པ༔ ནུབ་བྱང་དུ་དབུལ་འདྲེ་ནག་པོ་ཀང་ཀའི་མགོ་ཅན་ཀང་ཀའི་མཆུ་སྡེར་ཅན་གཡང་གཞི་དམར་པོ་སྐེད་ལ་དཀྲིས་ཤིང༔ ལག་གཉིས་བསླུ་བའི་གཡབ་མོ་འདེབས་པ༔ བྱང་ཤར་དུ་ཐན་འགྱེད་འགོང་པོ་ནག་པོ་མགོ་བོ་དགུ་པ༔ ཁ་དགུར་ཡམས་ཁྲག་གི་ཆར་པ་འབེབས་པ༔ ལག་གཉིས་མཚོན་ཆ་སྣ་ཚོགས་འཛིན་པ༔ དེ་དག་གི་འཁོར་དུ་དལ་ཡམས་ནད་བདག༔ རྒྱ་འདྲེ་འགོང་པོ༔ རྒྱལ་བསེན་དམ་སྲི༔ ཟ་འདྲེ་ཤི་གཤེད༔ མི་ནད་ཕྱུགས་ནད་སྣ་ཚོགས་གཏོང་བའི་འདྲེ་གདོན་དམ་སྲིའི་ཚོགས་བསམ་གྱིས་མི་ཁྱབ་པས་བསྐོར་བ་དེ་དག་ཐམས་ཅད་རང་ལ་གུས་ཤིང་འདུད་པའི་སྒོ་ནས་བཀའ་ཉན་གསུང་སྡོད་ཀྱི་ཚུལ་དུ་འཁོད་པར་བསམ༔ དེ་ནས་རང་ཉིད་ཡི་དམ་གྱི་ཐུགས་ཀ་ནས་ཕོ་ཉ་ལྕགས་ཀྱུ་ཞགས་པ་ལྕགས་སྒྲོག་དྲིལ་བུ་ཐོགས་པ་དཔག་དུ་མེད་པ་ཕྱོགས་བཅུར་འཕྲོས་ནས་གནོད་བྱེད་དལ་ཡམས་ནད་བདག་རྒྱ་འདྲེ་འགོང་པོ་རྒྱལ་བསེན་དམ་སྲི་ཕོ་མོའི་ཚོགས་ཐམས་ཅད་སྐད་ཅིག་གིས་རང་དབང་མེད་པར་བཀུག་ནས་རང་རང་གི་གཟུགས་དང་དབྱེར་མེད་དུ་གྱུར༔ འགུག་གཞུག་ནི༔ ཛཿ ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང༔ སངས་རྒྱས་ཀྱི་བཀའ་བདེན་པ་དང༔ ཆོས་ཀྱི་བཀའ་བདེན་པ་དང༔ དགེ་འདུན་གྱི་བཀའ་བདེན་པ་དང༔ གསང་སྔགས་དང༔ རིགས་སྔགས་དང༔ གཟུངས་སྔགས་དང༔ སྙིང་པོ་དང༔ ཕྱག་རྒྱ་དང༔ ཏིང་ངེ་འཛིན་རྣམས་ཀྱི་བདེན་པ་དང༔ ཆོས་ཉིད་རང་བཞིན་གྱིས་རྣམ་པར་དག་པ་དང༔ ཆོས་ཅན་རྒྱུ་འབྲས་བསླུ་བ་མེད་པའི་བཀའ་ཡི་བདེན་པ་དང༔ གནས་འོག་མིན་ཆོས་ཀྱི་དབྱིངས་ཀྱི་ཕོ་བྲང་ནས༔ ཆོས་སྐུ་ཀུན་ཏུ་བཟང་པོ༔ ལོངས་སྐུ་རྒྱལ་བ་རིགས་ལྔ༔ དྲུག་པ་རྡོ་རྗེ་འཆང་ཆེན༔ སྟོན་པ་རྡོ་རྗེ་སེམས་དཔའ༔ གུ་རུ་དགའ་རབ་རྡོ་རྗེ༔ སློབ་དཔོན་འཇམ་དཔལ་བཤེས་གཉེན༔ མཁས་པ་ཤྲཱི་སེང་ཧ༔ གུ་རུ་ཛྙཱ་ན་སཱུ་ཏྲ༔ ཨོ་རྒྱན་པདྨ་འབྱུང་གནས༔ པཎ་ཆེན་བི་མ་མི་ཏྲ༔ རིག་འཛིན་རྗེ་འབངས་ཉེར་ལྔ༔ འགྲོ་འདུལ་གཏེར་སྟོན་རྒྱ་མཚོ༔ ཆོས་བདག་རྩ་བརྒྱུད་ཀྱི་བླ་མ་ལ་སོགས་པའི་རྒྱལ་བ་དགོངས་པའི་བརྒྱུད་པ༔ རིག་འཛིན་བརྡ་ཡི་བརྒྱུད་པ༔ གང་ཟག་སྙན་ཁུང་དུ་བརྒྱུད་པའི་བླ་མ་རྒྱ་བོད་རིག་འཛིན་གྲུབ་ཐོབ་རྒྱ་མཚོའི་ཚོགས་དང་བཅས་པ་རྣམས་ཀྱི་བཀའ་བདེན་པ་དང༔ ཞི་བ་ལྷུན་གྱིས་གྲུབ་པའི་དཀྱིལ་འཁོར་ནས་རྡོ་རྗེ་དབྱིངས་ཀྱི་ལྷ་ཚོགས་བཞི་བཅུ་རྩ་གཉིས༔ ཁྲག་འཐུང་རོལ་པའི་དུར་ཁྲོད་ཆེན་པོ་ནས་འབར་བ་ཁྲག་འཐུང་གི་ལྷ་ཚོགས་ལྔ་བཅུ་རྩ་བརྒྱད༔ བདེ་གཤེགས་འདུས་པའི་དཀྱིལ་འཁོར་ཆེན་པོ་ནས་སྒྲུབ་ཆེན་བཀའ་བརྒྱད་ཀྱི་ལྷ་ཚོགས་བདུན་བརྒྱ་ཉེར་ལྔ་ལ་སོགས་པའི་ཡི་དམ་རྒྱུད་སྡེ་བཞི་དང༔ ཐེག་པ་རིམ་པ་དགུས་བསྡུས་པའི་དཀྱིལ་འཁོར་གྱི་ལྷ་ཚོགས་འཁོར་དང་བཅས་པ་རྣམས་ཀྱི་བདེན་པ་དང༔ མཁའ་སྤྱོད་གནས་ཡུལ་གྱི་དུར་ཁྲོད་ཆེན་པོ་ནས་རིགས་ལྔའི་མཁའ་འགྲོ་ཤུགས་འགྲོ༔ མ་སྲིང་ཌཱཀྐི་རྒྱ་མཚོ་བྱེ་བ་འབུམ་འབུམ་གྱི་ལྷ་ཚོགས་སྤྲུལ་བ་ཡང་སྤྲུལ་ཕྱག་བརྙན་དང་བཅས་པ་རྣམས་ཀྱི་བཀའ་ཡི་བདེན་པ་དང༔ བཀའ་དང་དམ་ཚིག་གཉན་པོའི་ཕོ་བྲང་ནས༔ མགོན་པོ་ཕོ་རྒྱུད་ལྷ་མོ་མོ་རྒྱུད་སྲུང་མ་དམ་ཅན་རྒྱ་མཚོའི་ཚོགས༔ འཁོར་ཡེ་ཤེས་དང་ལས་ལ་གྲུབ་པའི་དྲེགས་པ་ཕོ་རྒྱུད་མོ་རྒྱུད་རྫུ་འཕྲུལ་མྱུར་མགྱོགས་ཀྱི་མཐུ་དང་རྩལ་མངའ་བ་རྣམས་ཀྱི་བཀའ་ཡི་བདེན་པ་དང༔ ལེགས་ཉེས་སྟངས་འཛིན་གཉན་པོའི་ཕོ་བྲང་ནས་སྔགས་བདག་དྲེགས་ཆེན་བཅོ་བརྒྱད༔ དྲེགས་པའི་སྡེ་དཔོན་སུམ་ཅུ༔ དཔལ་མགོན་བདུན་ཅུ་རྩ་ལྔ༔ བཀའ་ཡི་ལྷ་སྲིན་སྡེ་བརྒྱད༔ བོད་ཀྱི་མགུར་ལྷ་བཅུ་གསུམ༔ མ་ཡམས་བསྟན་མ་བཅུ་གཉིས༔ དགེ་བསྙེན་ཉི་ཤུ་རྩ་གཅིག༔ ཡུལ་རི་འདིའི་གཞི་བདག༔ དབེན་རི་འདིའི་བསྲུང་མ་དང་བཅས་པ་རྣམས་ཀྱི་བཀའ་ཡི་བདེན་པ་དང༔ བདེན་པ་ཆེན་པོ་དེ་དག་གི་མཐུ་དང་ནུས་པས་བྱིན་གྱིས་བརླབས་པ་ལ་བརྟེན་ནས་དེང་འདིར་རྣལ་འབྱོར་པ་བདག་ཅག་དཔོན་སློབ་ཡོན་མཆོད་མི་ནོར་འཁོར་དང་བཅས་པ་རྣམས་ལ་གནོད་ཅིང་འཚེ་བར་བྱེད་པའི་འབྱུང་པོ་གདོན་བགེགས་ཀྱི་རིགས་སུ་གྱུར་པ་མི་མིན་མི་རུ་བརྫུ་བ༔ ལྷ་མིན་ལྷ་རུ་བརྫུ་བ༔ ཁྱིམ་གྱི་མིའི་ཚེ་བསོད་དབང་ཐང་ལ་བར་དུ་གཅོད་ཅིང༔ སྒོ་ཡི་ནོར་ཕྱུགས་ལ་གོད་ཡམས་ནད་རིམས་ཆོ་འཕྲུལ་གཏོང་བའི་རྒྱ་འདྲེ་འགོང་པོ༔ རྒྱལ་བསེན་དམ་སྲི༔ ཤི་འདྲེ་གསོན་འདྲེ༔ གནའ་འདྲེ་རྙིང་པ༔ ད་འདྲེ་གསར་པ༔ ཡུལ་འདྲེ་འཁྱམས་པོ༔ ཕོ་སྲི་མོ་སྲི༔ ཆེ་སྲི་ཆུང་སྲི༔ གོད་འདྲེ་གོད་སྲི༔ རྒབ་འདྲེ་བསེ་རག་ལ་སོགས་མི་འདོད་པ་སྣ་ཚོགས་འབེབས་ཤིང་འདོད་པ་ལ་བར་དུ་གཅོད་པར་བྱེད་པའི་གདོན་བགེགས་འབྱུང་པོ་རྒྱབ་རྟེན་སྡོང་ཟླ་སྣ་འདྲེན་དང་བཅས་པ་ཐམས་ཅད་སྲིད་གསུམ་འཇིག་རྟེན་གར་གནས་གར་བྲོས་ཀྱང་སྐད་ཅིག་རང་དབང་མེད་པར་རང་གཟུགས་མདོས་ཡས་འདི་ལ་མཆིས་པར་མཛོད་ཅིག༔ ཡི་དམ་གྱི་རྩ་སྔགས་བཅས༔ ཏྲི་ཡཾ་ཛཿ ཏྲི་བཛྲ་ཨངྐུ་ཤ་ཡ་ཛཿ ཛ་ཧཱུྃ་བཾ་ཧོ༔ ཞེས་ལན་གསུམ་མམ་བདུན་ནམ་དགུའམ་རང་རྟགས་མ་བྱུང་གི་བར་དུ་བསྐྱར་ལ༔ མགྲོན་རྣམས་ཞི་ཞིང་བྱམས་པའི་སེམས་ཀྱིས་འདུས་ཏེ་གནས་པར་མོས་ལ་དམིགས་འདོན་ཡ་མ་བྲལ་བར་རང་གཞུང་གི་ཕྲིན་ལས་ལ་འཇུག་པར་བྱའོ༔ མཇུག་ཏུ༔ བདག་གི་བདེན་པའི་ཚིག་ལ་མི་ཉན་རྣམས༔ རྩ་གསུམ་རྒྱལ་ཀུན་འདུས་ཞལ་ཐོད་ཕྲེང་རྩལ༔ རབ་ཁྲོས་རྔམ་པའི་ཁྲོ་མཚོན་དྲག་སྔགས་དང༔ མེ་དཔུང་གནམ་ལྕགས་ཐོག་སེར་དྲག་པོ་ཡིས༔ ལོག་པར་འདྲེན་པའི་བགེགས་རིགས་འབྱུང་པོའི་ཚོགས༔ ཁྱེད་རྣམས་རྡུལ་ཕྲན་བཞིན་དུ་བརླག་འགྱུར་བས༔ དེ་ཕྱིར་བྱམས་པའི་སེམས་དང་ལྡན་བྱོས་ལ༔ རང་རང་གནས་སུ་བདེ་བར་ཕྱིར་དེངས་ཤིག༔