བསིལ་གཏོར་གངྒཱའི་རྒྱུན་བཟང་ཕན་བདེའི་རྫིང་བུ།
ཡང་གསང་མཁའ་འགྲོའི་ཐུགས་ཐིག་ལས༔ བསིལ་གཏོར་གངྒཱའི་རྒྱུན་བཟང་ཕན་བདེའི་རྫིང་བུ་བི་ཛ་ཧ་རམ༔ ཁ་སར་པ་ཎི་ལ་བཏུད་དེ༔ བསིལ་གཏོར་གངྒའི་རྒྱུན་བཟང་འབྲི༔ རིན་ཆེན་སྣོད་མཆོག་ཡངས་པའི་ནང༔ དྭངས་བསིལ་ཡིད་འོང་གངྒའི་རྒྱུན༔ དྲི་བཟང་འོ་ཆབ་ཀྱིས་སྦགས་པའི༔ ཆུ་དང་རིལ་བུ་སྟ་གོན་བྱ༔ སྐྱབས་འགྲོ་སེམས་སྐྱེད་ཡན་ལག་བདུན༔ སྔོན་དུ་བཏང་ནས་དངོས་གཞི་ནི༔ སྭ་བྷ་ཝ་ཡི་སྔགས་ཀྱིས་སྦྱངས༔ སྟོང་པའི་ངང་ལས་སྐད་ཅིག་དྲན་རྫོགས་སུ༔ པད་དཀར་ཧྲཱིཿམཚན་ཡོངས་སུ་གྱུར་པ་ལས༔ རང་ཉིད་འཕགས་མཆོག་ཐུགས་ཆེན་སྤྱན་རས་གཟིགས༔ ཁ་སར་པ་ཎི་ཞལ་གཅིག་ཕྱག་གཉིས་པ༔ བཞེངས་སྟབས་དར་དང་རིན་ཆེན་དུ་མས་བརྒྱན༔ རི་དྭགས་པགས་པས་སྟོད་གཡོག་བྱམས་སེམས་ལྡན༔ ཕྱག་གཡས་མཆོད་སྦྱིན་གཡོན་པས་པད་དཀར་བསྣམས༔ ཐུགས་ཀར་ཟླ་སྟེང་ཧྲཱིཿལ་ཡིག་དྲུག་བསྐོར༔ ཨོཾ་མ་ཎི་པདྨེ་ཧཱུྃ༔ བརྒྱ་རྩ་བཟླས་རྗེས་སྭ་བྷ་ཝ་ཡིས་སྦྱངས༔ སྟོང་པའི་ངང་ལས་ཕྱི་སྣོད་རྣམ་པར་དག༔ བྷྲཱུྃ་ལས་རིན་ཆེན་ལས་གྲུབ་སྣོད་ཡངས་ནང༔ ཨོཾ་ལས་གཏོར་མ་ཁ་དོག་དྲི་རོ་དང༔ རེག་བྱ་ནུས་པའི་ཕུན་སུམ་ཚོགས་པར་གྱུར༔ ཨོཾ་ཨཱཿཧཱུྃ་གིས་སྦྱངས་སྤེལ་བདུད་རྩིར་གྱུར༔ རང་ཉིད་འཕགས་པའི་ཐུགས་ལས་འོད་ཟེར་འཕྲོས༔ མཆོག་གསུམ་རྩ་བ་གསུམ་དང་སྲུང་མའི་ཚོགས༔ རིགས་དྲུག་ལན་ཆགས་མགྲོན་བཅས་ས་མ་ཛ༔ རང་མཐུན་ཡིད་འོང་གདན་ལ་ལེགས་པར་བཞུགས༔ མེ་ཏོག་བདུག་སྤོས་མར་མེ་དྲི་ཞལ་ཟས༔ སྒྲ་སྙན་ཡིད་འོང་མཆོད་པས་དགྱེས་པར་གྱིས༔ སྒོ་གསུམ་རབ་གུས་དངས་བས་བསྟོད་ཕྱག་འཚལ༔ ཨོཾ་ན་མཿསརྦ་ཏ་ཐཱ་ག་ཏ་སོགས། སམ་བྷ་ར་ཧཱུྃ༔ བརྒྱ་དང་ཁྲི་འབུམ་ཅི་ནུས་སྦྱོངས༔ ཨོཾ་ཛྭ་ལ་མི་ཏཾ་པྲེ་ཏ་བྷྱ་སྭཱཧཱ༔ ཆོས་རྣམས་ཐམས་ཅད་སོགས། སྡིག་པ་ཅི་ཡང་སོགས། ཕན་པའི་ཡོན་ཏན་བརྗོད་མི་ལང༔ མཆོག་ཐུན་དངོས་གྲུབ་ཐོབ་པར་འགྱུར༔ འདོད་འབྱུང་ཡིད་བཞིན་གཏེར་དང་མཚུངས༔ ས་མ་ཡཱ༔ ཁམས་གསུམ་དག་པའི་ཞིང༔ སྲིད་གསུམ་ཐུགས་རྗེའི་མགྲོན༔ མ་ལུས་ཁྱབ་པའི་མཐུས༔ ཆུ་སྦྱིན་མི་ཟད་པའི་གཏེར་ལ་ལོངས་སྤྱོད་པར་གྱུར་ཅིག༔ རང་ཉིད་ཐུགས་རྗེ་ཆེན་པོའི་ཕྱག་གཡས་མཆོག་སྦྱིན་གྱི་རྩེ་ལས་བདུད་རྩིའི་རྒྱུན་བབས་པས་ཡི་དྭགས་རྣམས་ཚིམ་པར་བསམ༔ མ་ཎི་ཀཾ་ཀ་ནི་སོགས་བརྗོད༔ བར་དོའི་འགྲོ་བ་རྣམས་གཙང་ཞིང་བསིལ་བའི་སྐོམ་གྱིས་ཚིམས་ཏེ་བླ་ན་མེད་པ་བདེ་བའི་མཆོག་ལ་རེག་པར་གྱུར་ཅིག༔ གཏོར་མགྲོན་གཤེགས་ཤིང་བསྔོ་སྨོན་དང༔ ཤིས་པ་བརྗོད་པས་མཐའ་ལ་བརྒྱན༔ སློབ་བུ་བདེ་བའི་རྡོ་རྗེས་བསྐུལ༔ གཏེར་སྟོན་བསམ་གཏན་ཡེ་ཤེས་གླིང༔ ཟོག་པོ་འཆོལ་སྤྱོད་མཁན་དེས་བྲིས༔ ཕུན་ཚོགས་འབྱུང་བའི་རྒྱུར་གྱུར་ཅིག༔ མངྒ་ལམ༔